|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 3
Sūkta 25
|
1. Info |
| To: | 1-3, 5: agni; 4: agni, indra |
|
| From: | viśvāmitra gāthina | |
| Metres: | 1st set of styles: bhuriktriṣṭup (3-5); nicṛdanuṣṭup (1); anuṣṭup (2) 2nd set of styles: virāj |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
03.025.01 (Mandala. Sukta. Rik)
3.1.25.01 (Ashtaka. Adhyaya. Varga. Rik)
03.02.068 (Mandala. Anuvāka. Rik)
Samhita Devanagari Accented
अग्ने॑ दि॒वः सू॒नुर॑सि॒ प्रचे॑ता॒स्तना॑ पृथि॒व्या उ॒त वि॒श्ववे॑दाः ।
ऋध॑ग्दे॒वाँ इ॒ह य॑जा चिकित्वः ॥
Samhita Devanagari Nonaccented
अग्ने दिवः सूनुरसि प्रचेतास्तना पृथिव्या उत विश्ववेदाः ।
ऋधग्देवाँ इह यजा चिकित्वः ॥
Samhita Transcription Accented
ágne diváḥ sūnúrasi prácetāstánā pṛthivyā́ utá viśvávedāḥ ǀ
ṛ́dhagdevā́m̐ ihá yajā cikitvaḥ ǁ
Samhita Transcription Nonaccented
agne divaḥ sūnurasi pracetāstanā pṛthivyā uta viśvavedāḥ ǀ
ṛdhagdevām̐ iha yajā cikitvaḥ ǁ
Padapatha Devanagari Accented
अग्ने॑ । दि॒वः । सू॒नुः । अ॒सि॒ । प्रऽचे॑ताः । तना॑ । पृ॒थि॒व्याः । उ॒त । वि॒श्वऽवे॑दाः ।
ऋध॑क् । दे॒वान् । इ॒ह । य॒ज॒ । चि॒कि॒त्वः॒ ॥
Padapatha Devanagari Nonaccented
अग्ने । दिवः । सूनुः । असि । प्रऽचेताः । तना । पृथिव्याः । उत । विश्वऽवेदाः ।
ऋधक् । देवान् । इह । यज । चिकित्वः ॥
Padapatha Transcription Accented
ágne ǀ diváḥ ǀ sūnúḥ ǀ asi ǀ prá-cetāḥ ǀ tánā ǀ pṛthivyā́ḥ ǀ utá ǀ viśvá-vedāḥ ǀ
ṛ́dhak ǀ devā́n ǀ ihá ǀ yaja ǀ cikitvaḥ ǁ
Padapatha Transcription Nonaccented
agne ǀ divaḥ ǀ sūnuḥ ǀ asi ǀ pra-cetāḥ ǀ tanā ǀ pṛthivyāḥ ǀ uta ǀ viśva-vedāḥ ǀ
ṛdhak ǀ devān ǀ iha ǀ yaja ǀ cikitvaḥ ǁ
03.025.02 (Mandala. Sukta. Rik)
3.1.25.02 (Ashtaka. Adhyaya. Varga. Rik)
03.02.069 (Mandala. Anuvāka. Rik)
Samhita Devanagari Accented
अ॒ग्निः स॑नोति वी॒र्या॑णि वि॒द्वान्त्स॒नोति॒ वाज॑म॒मृता॑य॒ भूष॑न् ।
स नो॑ दे॒वाँ एह व॑हा पुरुक्षो ॥
Samhita Devanagari Nonaccented
अग्निः सनोति वीर्याणि विद्वान्त्सनोति वाजममृताय भूषन् ।
स नो देवाँ एह वहा पुरुक्षो ॥
Samhita Transcription Accented
agníḥ sanoti vīryā́ṇi vidvā́ntsanóti vā́jamamṛ́tāya bhū́ṣan ǀ
sá no devā́m̐ éhá vahā purukṣo ǁ
Samhita Transcription Nonaccented
agniḥ sanoti vīryāṇi vidvāntsanoti vājamamṛtāya bhūṣan ǀ
sa no devām̐ eha vahā purukṣo ǁ
Padapatha Devanagari Accented
अ॒ग्निः । स॒नो॒ति॒ । वी॒र्या॑णि । वि॒द्वान् । स॒नोति॑ । वाज॑म् । अ॒मृता॑य । भूष॑न् ।
सः । नः॒ । दे॒वान् । आ । इ॒ह । व॒ह॒ । पु॒रु॒क्षो॒ इति॑ पुरुऽक्षो ॥
Padapatha Devanagari Nonaccented
अग्निः । सनोति । वीर्याणि । विद्वान् । सनोति । वाजम् । अमृताय । भूषन् ।
सः । नः । देवान् । आ । इह । वह । पुरुक्षो इति पुरुऽक्षो ॥
Padapatha Transcription Accented
agníḥ ǀ sanoti ǀ vīryā́ṇi ǀ vidvā́n ǀ sanóti ǀ vā́jam ǀ amṛ́tāya ǀ bhū́ṣan ǀ
sáḥ ǀ naḥ ǀ devā́n ǀ ā́ ǀ ihá ǀ vaha ǀ purukṣo íti puru-kṣo ǁ
Padapatha Transcription Nonaccented
agniḥ ǀ sanoti ǀ vīryāṇi ǀ vidvān ǀ sanoti ǀ vājam ǀ amṛtāya ǀ bhūṣan ǀ
saḥ ǀ naḥ ǀ devān ǀ ā ǀ iha ǀ vaha ǀ purukṣo iti puru-kṣo ǁ
03.025.03 (Mandala. Sukta. Rik)
3.1.25.03 (Ashtaka. Adhyaya. Varga. Rik)
03.02.070 (Mandala. Anuvāka. Rik)
Samhita Devanagari Accented
अ॒ग्निर्द्यावा॑पृथि॒वी वि॒श्वज॑न्ये॒ आ भा॑ति दे॒वी अ॒मृते॒ अमू॑रः ।
क्षय॒न्वाजैः॑ पुरुश्चं॒द्रो नमो॑भिः ॥
Samhita Devanagari Nonaccented
अग्निर्द्यावापृथिवी विश्वजन्ये आ भाति देवी अमृते अमूरः ।
क्षयन्वाजैः पुरुश्चंद्रो नमोभिः ॥
Samhita Transcription Accented
agnírdyā́vāpṛthivī́ viśvájanye ā́ bhāti devī́ amṛ́te ámūraḥ ǀ
kṣáyanvā́jaiḥ puruścandró námobhiḥ ǁ
Samhita Transcription Nonaccented
agnirdyāvāpṛthivī viśvajanye ā bhāti devī amṛte amūraḥ ǀ
kṣayanvājaiḥ puruścandro namobhiḥ ǁ
Padapatha Devanagari Accented
अ॒ग्निः । द्यावा॑पृथि॒वी इति॑ । वि॒श्वज॑न्ये॒ इति॑ वि॒श्वऽज॑न्ये । आ । भा॒ति॒ । दे॒वी इति॑ । अ॒मृते॒ इति॑ । अमू॑रः ।
क्षय॑न् । वाजैः॑ । पु॒रु॒ऽच॒न्द्रः । नमः॑ऽभिः ॥
Padapatha Devanagari Nonaccented
अग्निः । द्यावापृथिवी इति । विश्वजन्ये इति विश्वऽजन्ये । आ । भाति । देवी इति । अमृते इति । अमूरः ।
क्षयन् । वाजैः । पुरुऽचन्द्रः । नमःऽभिः ॥
Padapatha Transcription Accented
agníḥ ǀ dyā́vāpṛthivī́ íti ǀ viśvájanye íti viśvá-janye ǀ ā́ ǀ bhāti ǀ devī́ íti ǀ amṛ́te íti ǀ ámūraḥ ǀ
kṣáyan ǀ vā́jaiḥ ǀ puru-candráḥ ǀ námaḥ-bhiḥ ǁ
Padapatha Transcription Nonaccented
agniḥ ǀ dyāvāpṛthivī iti ǀ viśvajanye iti viśva-janye ǀ ā ǀ bhāti ǀ devī iti ǀ amṛte iti ǀ amūraḥ ǀ
kṣayan ǀ vājaiḥ ǀ puru-candraḥ ǀ namaḥ-bhiḥ ǁ
03.025.04 (Mandala. Sukta. Rik)
3.1.25.04 (Ashtaka. Adhyaya. Varga. Rik)
03.02.071 (Mandala. Anuvāka. Rik)
Samhita Devanagari Accented
अग्न॒ इंद्र॑श्च दा॒शुषो॑ दुरो॒णे सु॒ताव॑तो य॒ज्ञमि॒होप॑ यातं ।
अम॑र्धंता सोम॒पेया॑य देवा ॥
Samhita Devanagari Nonaccented
अग्न इंद्रश्च दाशुषो दुरोणे सुतावतो यज्ञमिहोप यातं ।
अमर्धंता सोमपेयाय देवा ॥
Samhita Transcription Accented
ágna índraśca dāśúṣo duroṇé sutā́vato yajñámihópa yātam ǀ
ámardhantā somapéyāya devā ǁ
Samhita Transcription Nonaccented
agna indraśca dāśuṣo duroṇe sutāvato yajñamihopa yātam ǀ
amardhantā somapeyāya devā ǁ
Padapatha Devanagari Accented
अग्ने॑ । इन्द्रः॑ । च॒ । दा॒शुषः॑ । दु॒रो॒णे । सु॒तऽव॑तः । य॒ज्ञम् । इ॒ह । उप॑ । या॒त॒म् ।
अम॑र्धन्ता । सो॒म॒ऽपेया॑य । दे॒वा॒ ॥
Padapatha Devanagari Nonaccented
अग्ने । इन्द्रः । च । दाशुषः । दुरोणे । सुतऽवतः । यज्ञम् । इह । उप । यातम् ।
अमर्धन्ता । सोमऽपेयाय । देवा ॥
Padapatha Transcription Accented
ágne ǀ índraḥ ǀ ca ǀ dāśúṣaḥ ǀ duroṇé ǀ sutá-vataḥ ǀ yajñám ǀ ihá ǀ úpa ǀ yātam ǀ
ámardhantā ǀ soma-péyāya ǀ devā ǁ
Padapatha Transcription Nonaccented
agne ǀ indraḥ ǀ ca ǀ dāśuṣaḥ ǀ duroṇe ǀ suta-vataḥ ǀ yajñam ǀ iha ǀ upa ǀ yātam ǀ
amardhantā ǀ soma-peyāya ǀ devā ǁ
03.025.05 (Mandala. Sukta. Rik)
3.1.25.05 (Ashtaka. Adhyaya. Varga. Rik)
03.02.072 (Mandala. Anuvāka. Rik)
Samhita Devanagari Accented
अग्ने॑ अ॒पां समि॑ध्यसे दुरो॒णे नित्यः॑ सूनो सहसो जातवेदः ।
स॒धस्था॑नि म॒हय॑मान ऊ॒ती ॥
Samhita Devanagari Nonaccented
अग्ने अपां समिध्यसे दुरोणे नित्यः सूनो सहसो जातवेदः ।
सधस्थानि महयमान ऊती ॥
Samhita Transcription Accented
ágne apā́m sámidhyase duroṇé nítyaḥ sūno sahaso jātavedaḥ ǀ
sadhásthāni maháyamāna ūtī́ ǁ
Samhita Transcription Nonaccented
agne apām samidhyase duroṇe nityaḥ sūno sahaso jātavedaḥ ǀ
sadhasthāni mahayamāna ūtī ǁ
Padapatha Devanagari Accented
अग्ने॑ । अ॒पाम् । सम् । इ॒ध्य॒से॒ । दु॒रो॒णे । नित्यः॑ । सू॒नो॒ इति॑ । स॒ह॒सः॒ । जा॒त॒ऽवे॒दः॒ ।
स॒धऽस्था॑नि । म॒हय॑मानः । ऊ॒ती ॥
Padapatha Devanagari Nonaccented
अग्ने । अपाम् । सम् । इध्यसे । दुरोणे । नित्यः । सूनो इति । सहसः । जातऽवेदः ।
सधऽस्थानि । महयमानः । ऊती ॥
Padapatha Transcription Accented
ágne ǀ apā́m ǀ sám ǀ idhyase ǀ duroṇé ǀ nítyaḥ ǀ sūno íti ǀ sahasaḥ ǀ jāta-vedaḥ ǀ
sadhá-sthāni ǀ maháyamānaḥ ǀ ūtī́ ǁ
Padapatha Transcription Nonaccented
agne ǀ apām ǀ sam ǀ idhyase ǀ duroṇe ǀ nityaḥ ǀ sūno iti ǀ sahasaḥ ǀ jāta-vedaḥ ǀ
sadha-sthāni ǀ mahayamānaḥ ǀ ūtī ǁ