|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 83
|
1. Info |
| To: | parjanya | |
| From: | atri bhauma | |
| Metres: | 1st set of styles: triṣṭup (5, 6); bhurikpaṅkti (8, 10); nicṛttriṣṭup (1); svarāṭtriṣṭup (2); bhuriktriṣṭup (3); nicṛjjagatī (4); virāṭtrisṭup (7); nicṛdanuṣṭup (9) 2nd set of styles: triṣṭubh (1, 5-8, 10); jagatī (2-4); anuṣṭubh (9) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.083.01 (Mandala. Sukta. Rik)
4.4.27.01 (Ashtaka. Adhyaya. Varga. Rik)
05.06.079 (Mandala. Anuvāka. Rik)
Samhita Devanagari Accented
अच्छा॑ वद त॒वसं॑ गी॒र्भिरा॒भिः स्तु॒हि प॒र्जन्यं॒ नम॒सा वि॑वास ।
कनि॑क्रदद्वृष॒भो जी॒रदा॑नू॒ रेतो॑ दधा॒त्योष॑धीषु॒ गर्भं॑ ॥
Samhita Devanagari Nonaccented
अच्छा वद तवसं गीर्भिराभिः स्तुहि पर्जन्यं नमसा विवास ।
कनिक्रदद्वृषभो जीरदानू रेतो दधात्योषधीषु गर्भं ॥
Samhita Transcription Accented
ácchā vada tavásam gīrbhírābhíḥ stuhí parjányam námasā́ vivāsa ǀ
kánikradadvṛṣabhó jīrádānū réto dadhātyóṣadhīṣu gárbham ǁ
Samhita Transcription Nonaccented
acchā vada tavasam gīrbhirābhiḥ stuhi parjanyam namasā vivāsa ǀ
kanikradadvṛṣabho jīradānū reto dadhātyoṣadhīṣu garbham ǁ
Padapatha Devanagari Accented
अच्छ॑ । व॒द॒ । त॒वस॑म् । गीः॒ऽभिः । आ॒भिः । स्तु॒हि । प॒र्जन्य॑म् । नम॑सा । आ । वि॒वा॒स॒ ।
कनि॑क्रदत् । वृ॒ष॒भः । जी॒रऽदा॑नुः । रेतः॑ । द॒धा॒ति॒ । ओष॑धीषु । गर्भ॑म् ॥
Padapatha Devanagari Nonaccented
अच्छ । वद । तवसम् । गीःऽभिः । आभिः । स्तुहि । पर्जन्यम् । नमसा । आ । विवास ।
कनिक्रदत् । वृषभः । जीरऽदानुः । रेतः । दधाति । ओषधीषु । गर्भम् ॥
Padapatha Transcription Accented
áccha ǀ vada ǀ tavásam ǀ gīḥ-bhíḥ ǀ ābhíḥ ǀ stuhí ǀ parjányam ǀ námasā ǀ ā́ ǀ vivāsa ǀ
kánikradat ǀ vṛṣabháḥ ǀ jīrá-dānuḥ ǀ rétaḥ ǀ dadhāti ǀ óṣadhīṣu ǀ gárbham ǁ
Padapatha Transcription Nonaccented
accha ǀ vada ǀ tavasam ǀ gīḥ-bhiḥ ǀ ābhiḥ ǀ stuhi ǀ parjanyam ǀ namasā ǀ ā ǀ vivāsa ǀ
kanikradat ǀ vṛṣabhaḥ ǀ jīra-dānuḥ ǀ retaḥ ǀ dadhāti ǀ oṣadhīṣu ǀ garbham ǁ
05.083.02 (Mandala. Sukta. Rik)
4.4.27.02 (Ashtaka. Adhyaya. Varga. Rik)
05.06.080 (Mandala. Anuvāka. Rik)
Samhita Devanagari Accented
वि वृ॒क्षान् हं॑त्यु॒त हं॑ति र॒क्षसो॒ विश्वं॑ बिभाय॒ भुव॑नं म॒हाव॑धात् ।
उ॒ताना॑गा ईषते॒ वृष्ण्या॑वतो॒ यत्प॒र्जन्यः॑ स्त॒नय॒न् हंति॑ दु॒ष्कृतः॑ ॥
Samhita Devanagari Nonaccented
वि वृक्षान् हंत्युत हंति रक्षसो विश्वं बिभाय भुवनं महावधात् ।
उतानागा ईषते वृष्ण्यावतो यत्पर्जन्यः स्तनयन् हंति दुष्कृतः ॥
Samhita Transcription Accented
ví vṛkṣā́n hantyutá hanti rakṣáso víśvam bibhāya bhúvanam mahā́vadhāt ǀ
utā́nāgā īṣate vṛ́ṣṇyāvato yátparjányaḥ stanáyan hánti duṣkṛ́taḥ ǁ
Samhita Transcription Nonaccented
vi vṛkṣān hantyuta hanti rakṣaso viśvam bibhāya bhuvanam mahāvadhāt ǀ
utānāgā īṣate vṛṣṇyāvato yatparjanyaḥ stanayan hanti duṣkṛtaḥ ǁ
Padapatha Devanagari Accented
वि । वृ॒क्षान् । ह॒न्ति॒ । उ॒त । ह॒न्ति॒ । र॒क्षसः॑ । विश्व॑म् । बि॒भा॒य॒ । भुव॑नम् । म॒हाऽव॑धात् ।
उ॒त । अना॑गाः । ई॒ष॒ते॒ । वृष्ण्य॑ऽवतः । यत् । प॒र्जन्यः॑ । स्त॒नय॑न् । हन्ति॑ । दुः॒ऽकृतः॑ ॥
Padapatha Devanagari Nonaccented
वि । वृक्षान् । हन्ति । उत । हन्ति । रक्षसः । विश्वम् । बिभाय । भुवनम् । महाऽवधात् ।
उत । अनागाः । ईषते । वृष्ण्यऽवतः । यत् । पर्जन्यः । स्तनयन् । हन्ति । दुःऽकृतः ॥
Padapatha Transcription Accented
ví ǀ vṛkṣā́n ǀ hanti ǀ utá ǀ hanti ǀ rakṣásaḥ ǀ víśvam ǀ bibhāya ǀ bhúvanam ǀ mahā́-vadhāt ǀ
utá ǀ ánāgāḥ ǀ īṣate ǀ vṛ́ṣṇya-vataḥ ǀ yát ǀ parjányaḥ ǀ stanáyan ǀ hánti ǀ duḥ-kṛ́taḥ ǁ
Padapatha Transcription Nonaccented
vi ǀ vṛkṣān ǀ hanti ǀ uta ǀ hanti ǀ rakṣasaḥ ǀ viśvam ǀ bibhāya ǀ bhuvanam ǀ mahā-vadhāt ǀ
uta ǀ anāgāḥ ǀ īṣate ǀ vṛṣṇya-vataḥ ǀ yat ǀ parjanyaḥ ǀ stanayan ǀ hanti ǀ duḥ-kṛtaḥ ǁ
05.083.03 (Mandala. Sukta. Rik)
4.4.27.03 (Ashtaka. Adhyaya. Varga. Rik)
05.06.081 (Mandala. Anuvāka. Rik)
Samhita Devanagari Accented
र॒थीव॒ कश॒याश्वाँ॑ अभिक्षि॒पन्ना॒विर्दू॒तान्कृ॑णुते व॒र्ष्याँ॒३॒॑ अह॑ ।
दू॒रात्सिं॒हस्य॑ स्त॒नथा॒ उदी॑रते॒ यत्प॒र्जन्यः॑ कृणु॒ते व॒र्ष्यं१॒॑ नभः॑ ॥
Samhita Devanagari Nonaccented
रथीव कशयाश्वाँ अभिक्षिपन्नाविर्दूतान्कृणुते वर्ष्याँ अह ।
दूरात्सिंहस्य स्तनथा उदीरते यत्पर्जन्यः कृणुते वर्ष्यं नभः ॥
Samhita Transcription Accented
rathī́va káśayā́śvām̐ abhikṣipánnāvírdūtā́nkṛṇute varṣyā́m̐ áha ǀ
dūrā́tsiṃhásya stanáthā údīrate yátparjányaḥ kṛṇuté varṣyám nábhaḥ ǁ
Samhita Transcription Nonaccented
rathīva kaśayāśvām̐ abhikṣipannāvirdūtānkṛṇute varṣyām̐ aha ǀ
dūrātsiṃhasya stanathā udīrate yatparjanyaḥ kṛṇute varṣyam nabhaḥ ǁ
Padapatha Devanagari Accented
र॒थीऽइ॑व । कश॑या । अश्वा॑न् । अ॒भि॒ऽक्षि॒पन् । आ॒विः । दू॒तान् । कृ॒णु॒ते॒ । व॒र्ष्या॑न् । अह॑ ।
दू॒रात् । सिं॒हस्य॑ । स्त॒नथाः॑ । उत् । ई॒र॒ते॒ । यत् । प॒र्जन्यः॑ । कृ॒णु॒ते । व॒र्ष्य॑म् । नभः॑ ॥
Padapatha Devanagari Nonaccented
रथीऽइव । कशया । अश्वान् । अभिऽक्षिपन् । आविः । दूतान् । कृणुते । वर्ष्यान् । अह ।
दूरात् । सिंहस्य । स्तनथाः । उत् । ईरते । यत् । पर्जन्यः । कृणुते । वर्ष्यम् । नभः ॥
Padapatha Transcription Accented
rathī́-iva ǀ káśayā ǀ áśvān ǀ abhi-kṣipán ǀ āvíḥ ǀ dūtā́n ǀ kṛṇute ǀ varṣyā́n ǀ áha ǀ
dūrā́t ǀ siṃhásya ǀ stanáthāḥ ǀ út ǀ īrate ǀ yát ǀ parjányaḥ ǀ kṛṇuté ǀ varṣyám ǀ nábhaḥ ǁ
Padapatha Transcription Nonaccented
rathī-iva ǀ kaśayā ǀ aśvān ǀ abhi-kṣipan ǀ āviḥ ǀ dūtān ǀ kṛṇute ǀ varṣyān ǀ aha ǀ
dūrāt ǀ siṃhasya ǀ stanathāḥ ǀ ut ǀ īrate ǀ yat ǀ parjanyaḥ ǀ kṛṇute ǀ varṣyam ǀ nabhaḥ ǁ
05.083.04 (Mandala. Sukta. Rik)
4.4.27.04 (Ashtaka. Adhyaya. Varga. Rik)
05.06.082 (Mandala. Anuvāka. Rik)
Samhita Devanagari Accented
प्र वाता॒ वांति॑ प॒तयं॑ति वि॒द्युत॒ उदोष॑धी॒र्जिह॑ते॒ पिन्व॑ते॒ स्वः॑ ।
इरा॒ विश्व॑स्मै॒ भुव॑नाय जायते॒ यत्प॒र्जन्यः॑ पृथि॒वीं रेत॒साव॑ति ॥
Samhita Devanagari Nonaccented
प्र वाता वांति पतयंति विद्युत उदोषधीर्जिहते पिन्वते स्वः ।
इरा विश्वस्मै भुवनाय जायते यत्पर्जन्यः पृथिवीं रेतसावति ॥
Samhita Transcription Accented
prá vā́tā vā́nti patáyanti vidyúta údóṣadhīrjíhate pínvate sváḥ ǀ
írā víśvasmai bhúvanāya jāyate yátparjányaḥ pṛthivī́m rétasā́vati ǁ
Samhita Transcription Nonaccented
pra vātā vānti patayanti vidyuta udoṣadhīrjihate pinvate svaḥ ǀ
irā viśvasmai bhuvanāya jāyate yatparjanyaḥ pṛthivīm retasāvati ǁ
Padapatha Devanagari Accented
प्र । वाताः॑ । वान्ति॑ । प॒तय॑न्ति । वि॒ऽद्युतः॑ । उत् । ओष॑धीः । जिह॑ते । पिन्व॑ते । स्वः॑ ।
इरा॑ । विश्व॑स्मै । भुव॑नाय । जा॒य॒ते॒ । यत् । प॒र्जन्यः॑ । पृ॒थि॒वीम् । रेत॑सा । अव॑ति ॥
Padapatha Devanagari Nonaccented
प्र । वाताः । वान्ति । पतयन्ति । विऽद्युतः । उत् । ओषधीः । जिहते । पिन्वते । स्वः ।
इरा । विश्वस्मै । भुवनाय । जायते । यत् । पर्जन्यः । पृथिवीम् । रेतसा । अवति ॥
Padapatha Transcription Accented
prá ǀ vā́tāḥ ǀ vā́nti ǀ patáyanti ǀ vi-dyútaḥ ǀ út ǀ óṣadhīḥ ǀ jíhate ǀ pínvate ǀ sváḥ ǀ
írā ǀ víśvasmai ǀ bhúvanāya ǀ jāyate ǀ yát ǀ parjányaḥ ǀ pṛthivī́m ǀ rétasā ǀ ávati ǁ
Padapatha Transcription Nonaccented
pra ǀ vātāḥ ǀ vānti ǀ patayanti ǀ vi-dyutaḥ ǀ ut ǀ oṣadhīḥ ǀ jihate ǀ pinvate ǀ svaḥ ǀ
irā ǀ viśvasmai ǀ bhuvanāya ǀ jāyate ǀ yat ǀ parjanyaḥ ǀ pṛthivīm ǀ retasā ǀ avati ǁ
05.083.05 (Mandala. Sukta. Rik)
4.4.27.05 (Ashtaka. Adhyaya. Varga. Rik)
05.06.083 (Mandala. Anuvāka. Rik)
Samhita Devanagari Accented
यस्य॑ व्र॒ते पृ॑थि॒वी नन्न॑मीति॒ यस्य॑ व्र॒ते श॒फव॒ज्जर्भु॑रीति ।
यस्य॑ व्र॒त ओष॑धीर्वि॒श्वरू॑पाः॒ स नः॑ पर्जन्य॒ महि॒ शर्म॑ यच्छ ॥
Samhita Devanagari Nonaccented
यस्य व्रते पृथिवी नन्नमीति यस्य व्रते शफवज्जर्भुरीति ।
यस्य व्रत ओषधीर्विश्वरूपाः स नः पर्जन्य महि शर्म यच्छ ॥
Samhita Transcription Accented
yásya vraté pṛthivī́ nánnamīti yásya vraté śaphávajjárbhurīti ǀ
yásya vratá óṣadhīrviśvárūpāḥ sá naḥ parjanya máhi śárma yaccha ǁ
Samhita Transcription Nonaccented
yasya vrate pṛthivī nannamīti yasya vrate śaphavajjarbhurīti ǀ
yasya vrata oṣadhīrviśvarūpāḥ sa naḥ parjanya mahi śarma yaccha ǁ
Padapatha Devanagari Accented
यस्य॑ । व्र॒ते । पृ॒थि॒वी । नम्न॑मीति । यस्य॑ । व्र॒ते । श॒फऽव॑त् । जर्भु॑रीति ।
यस्य॑ । व्र॒ते । ओष॑धीः । वि॒श्वऽरू॑पाः । सः । नः॒ । प॒र्ज॒न्य॒ । महि॑ । शर्म॑ । य॒च्छ॒ ॥
Padapatha Devanagari Nonaccented
यस्य । व्रते । पृथिवी । नम्नमीति । यस्य । व्रते । शफऽवत् । जर्भुरीति ।
यस्य । व्रते । ओषधीः । विश्वऽरूपाः । सः । नः । पर्जन्य । महि । शर्म । यच्छ ॥
Padapatha Transcription Accented
yásya ǀ vraté ǀ pṛthivī́ ǀ námnamīti ǀ yásya ǀ vraté ǀ śaphá-vat ǀ járbhurīti ǀ
yásya ǀ vraté ǀ óṣadhīḥ ǀ viśvá-rūpāḥ ǀ sáḥ ǀ naḥ ǀ parjanya ǀ máhi ǀ śárma ǀ yaccha ǁ
Padapatha Transcription Nonaccented
yasya ǀ vrate ǀ pṛthivī ǀ namnamīti ǀ yasya ǀ vrate ǀ śapha-vat ǀ jarbhurīti ǀ
yasya ǀ vrate ǀ oṣadhīḥ ǀ viśva-rūpāḥ ǀ saḥ ǀ naḥ ǀ parjanya ǀ mahi ǀ śarma ǀ yaccha ǁ
05.083.06 (Mandala. Sukta. Rik)
4.4.28.01 (Ashtaka. Adhyaya. Varga. Rik)
05.06.084 (Mandala. Anuvāka. Rik)
Samhita Devanagari Accented
दि॒वो नो॑ वृ॒ष्टिं म॑रुतो ररीध्वं॒ प्र पि॑न्वत॒ वृष्णो॒ अश्व॑स्य॒ धाराः॑ ।
अ॒र्वाङे॒तेन॑ स्तनयि॒त्नुनेह्य॒पो नि॑षिं॒चन्नसु॑रः पि॒ता नः॑ ॥
Samhita Devanagari Nonaccented
दिवो नो वृष्टिं मरुतो ररीध्वं प्र पिन्वत वृष्णो अश्वस्य धाराः ।
अर्वाङेतेन स्तनयित्नुनेह्यपो निषिंचन्नसुरः पिता नः ॥
Samhita Transcription Accented
divó no vṛṣṭím maruto rarīdhvam prá pinvata vṛ́ṣṇo áśvasya dhā́rāḥ ǀ
arvā́ṅeténa stanayitnúnéhyapó niṣiñcánnásuraḥ pitā́ naḥ ǁ
Samhita Transcription Nonaccented
divo no vṛṣṭim maruto rarīdhvam pra pinvata vṛṣṇo aśvasya dhārāḥ ǀ
arvāṅetena stanayitnunehyapo niṣiñcannasuraḥ pitā naḥ ǁ
Padapatha Devanagari Accented
दि॒वः । नः॒ । वृ॒ष्टिम् । म॒रु॒तः॒ । र॒री॒ध्व॒म् । प्र । पि॒न्व॒त॒ । वृष्णः॑ । अश्व॑स्य । धाराः॑ ।
अ॒र्वाङ् । ए॒तेन॑ । स्त॒न॒यि॒त्नुना॑ । आ । इ॒हि॒ । अ॒पः । नि॒ऽसि॒ञ्चन् । असु॑रः । पि॒ता । नः॒ ॥
Padapatha Devanagari Nonaccented
दिवः । नः । वृष्टिम् । मरुतः । ररीध्वम् । प्र । पिन्वत । वृष्णः । अश्वस्य । धाराः ।
अर्वाङ् । एतेन । स्तनयित्नुना । आ । इहि । अपः । निऽसिञ्चन् । असुरः । पिता । नः ॥
Padapatha Transcription Accented
diváḥ ǀ naḥ ǀ vṛṣṭím ǀ marutaḥ ǀ rarīdhvam ǀ prá ǀ pinvata ǀ vṛ́ṣṇaḥ ǀ áśvasya ǀ dhā́rāḥ ǀ
arvā́ṅ ǀ eténa ǀ stanayitnúnā ǀ ā́ ǀ ihi ǀ apáḥ ǀ ni-siñcán ǀ ásuraḥ ǀ pitā́ ǀ naḥ ǁ
Padapatha Transcription Nonaccented
divaḥ ǀ naḥ ǀ vṛṣṭim ǀ marutaḥ ǀ rarīdhvam ǀ pra ǀ pinvata ǀ vṛṣṇaḥ ǀ aśvasya ǀ dhārāḥ ǀ
arvāṅ ǀ etena ǀ stanayitnunā ǀ ā ǀ ihi ǀ apaḥ ǀ ni-siñcan ǀ asuraḥ ǀ pitā ǀ naḥ ǁ
05.083.07 (Mandala. Sukta. Rik)
4.4.28.02 (Ashtaka. Adhyaya. Varga. Rik)
05.06.085 (Mandala. Anuvāka. Rik)
Samhita Devanagari Accented
अ॒भि क्रं॑द स्त॒नय॒ गर्भ॒मा धा॑ उद॒न्वता॒ परि॑ दीया॒ रथे॑न ।
दृतिं॒ सु क॑र्ष॒ विषि॑तं॒ न्यं॑चं स॒मा भ॑वंतू॒द्वतो॑ निपा॒दाः ॥
Samhita Devanagari Nonaccented
अभि क्रंद स्तनय गर्भमा धा उदन्वता परि दीया रथेन ।
दृतिं सु कर्ष विषितं न्यंचं समा भवंतूद्वतो निपादाः ॥
Samhita Transcription Accented
abhí kranda stanáya gárbhamā́ dhā udanvátā pári dīyā ráthena ǀ
dṛ́tim sú karṣa víṣitam nyáñcam samā́ bhavantūdváto nipādā́ḥ ǁ
Samhita Transcription Nonaccented
abhi kranda stanaya garbhamā dhā udanvatā pari dīyā rathena ǀ
dṛtim su karṣa viṣitam nyañcam samā bhavantūdvato nipādāḥ ǁ
Padapatha Devanagari Accented
अ॒भि । क्र॒न्द॒ । स्त॒नय॑ । गर्भ॑म् । आ । धाः॒ । उ॒द॒न्ऽवता॑ । परि॑ । दी॒य॒ । रथे॑न ।
दृति॑म् । सु । क॒र्ष॒ । विऽसि॑तम् । न्य॑ञ्चम् । स॒माः । भ॒व॒न्तु॒ । उ॒त्ऽवतः॑ । नि॒ऽपा॒दाः ॥
Padapatha Devanagari Nonaccented
अभि । क्रन्द । स्तनय । गर्भम् । आ । धाः । उदन्ऽवता । परि । दीय । रथेन ।
दृतिम् । सु । कर्ष । विऽसितम् । न्यञ्चम् । समाः । भवन्तु । उत्ऽवतः । निऽपादाः ॥
Padapatha Transcription Accented
abhí ǀ kranda ǀ stanáya ǀ gárbham ǀ ā́ ǀ dhāḥ ǀ udan-vátā ǀ pári ǀ dīya ǀ ráthena ǀ
dṛ́tim ǀ sú ǀ karṣa ǀ ví-sitam ǀ nyáñcam ǀ samā́ḥ ǀ bhavantu ǀ ut-vátaḥ ǀ ni-pādā́ḥ ǁ
Padapatha Transcription Nonaccented
abhi ǀ kranda ǀ stanaya ǀ garbham ǀ ā ǀ dhāḥ ǀ udan-vatā ǀ pari ǀ dīya ǀ rathena ǀ
dṛtim ǀ su ǀ karṣa ǀ vi-sitam ǀ nyañcam ǀ samāḥ ǀ bhavantu ǀ ut-vataḥ ǀ ni-pādāḥ ǁ
05.083.08 (Mandala. Sukta. Rik)
4.4.28.03 (Ashtaka. Adhyaya. Varga. Rik)
05.06.086 (Mandala. Anuvāka. Rik)
Samhita Devanagari Accented
म॒हांतं॒ कोश॒मुद॑चा॒ नि षिं॑च॒ स्यंदं॑तां कु॒ल्या विषि॑ताः पु॒रस्ता॑त् ।
घृ॒तेन॒ द्यावा॑पृथि॒वी व्युं॑धि सुप्रपा॒णं भ॑वत्व॒घ्न्याभ्यः॑ ॥
Samhita Devanagari Nonaccented
महांतं कोशमुदचा नि षिंच स्यंदंतां कुल्या विषिताः पुरस्तात् ।
घृतेन द्यावापृथिवी व्युंधि सुप्रपाणं भवत्वघ्न्याभ्यः ॥
Samhita Transcription Accented
mahā́ntam kóśamúdacā ní ṣiñca syándantām kulyā́ víṣitāḥ purástāt ǀ
ghṛténa dyā́vāpṛthivī́ vyúndhi suprapāṇám bhavatvaghnyā́bhyaḥ ǁ
Samhita Transcription Nonaccented
mahāntam kośamudacā ni ṣiñca syandantām kulyā viṣitāḥ purastāt ǀ
ghṛtena dyāvāpṛthivī vyundhi suprapāṇam bhavatvaghnyābhyaḥ ǁ
Padapatha Devanagari Accented
म॒हान्त॑म् । कोश॑म् । उत् । अ॒च॒ । नि । सि॒ञ्च॒ । स्यन्द॑न्ताम् । कु॒ल्याः । विऽसि॑ताः । पु॒रस्ता॑त् ।
घृ॒तेन॑ । द्यावा॑पृथि॒वी इति॑ । वि । उ॒न्धि॒ । सु॒ऽप्र॒पा॒नम् । भ॒व॒तु॒ । अ॒घ्न्याभ्यः॑ ॥
Padapatha Devanagari Nonaccented
महान्तम् । कोशम् । उत् । अच । नि । सिञ्च । स्यन्दन्ताम् । कुल्याः । विऽसिताः । पुरस्तात् ।
घृतेन । द्यावापृथिवी इति । वि । उन्धि । सुऽप्रपानम् । भवतु । अघ्न्याभ्यः ॥
Padapatha Transcription Accented
mahā́ntam ǀ kóśam ǀ út ǀ aca ǀ ní ǀ siñca ǀ syándantām ǀ kulyā́ḥ ǀ ví-sitāḥ ǀ purástāt ǀ
ghṛténa ǀ dyā́vāpṛthivī́ íti ǀ ví ǀ undhi ǀ su-prapānám ǀ bhavatu ǀ aghnyā́bhyaḥ ǁ
Padapatha Transcription Nonaccented
mahāntam ǀ kośam ǀ ut ǀ aca ǀ ni ǀ siñca ǀ syandantām ǀ kulyāḥ ǀ vi-sitāḥ ǀ purastāt ǀ
ghṛtena ǀ dyāvāpṛthivī iti ǀ vi ǀ undhi ǀ su-prapānam ǀ bhavatu ǀ aghnyābhyaḥ ǁ
05.083.09 (Mandala. Sukta. Rik)
4.4.28.04 (Ashtaka. Adhyaya. Varga. Rik)
05.06.087 (Mandala. Anuvāka. Rik)
Samhita Devanagari Accented
यत्प॑र्जन्य॒ कनि॑क्रदत्स्त॒नय॒न् हंसि॑ दु॒ष्कृतः॑ ।
प्रती॒दं विश्वं॑ मोदते॒ यत्किं च॑ पृथि॒व्यामधि॑ ॥
Samhita Devanagari Nonaccented
यत्पर्जन्य कनिक्रदत्स्तनयन् हंसि दुष्कृतः ।
प्रतीदं विश्वं मोदते यत्किं च पृथिव्यामधि ॥
Samhita Transcription Accented
yátparjanya kánikradatstanáyan háṃsi duṣkṛ́taḥ ǀ
prátīdám víśvam modate yátkím ca pṛthivyā́mádhi ǁ
Samhita Transcription Nonaccented
yatparjanya kanikradatstanayan haṃsi duṣkṛtaḥ ǀ
pratīdam viśvam modate yatkim ca pṛthivyāmadhi ǁ
Padapatha Devanagari Accented
यत् । प॒र्ज॒न्य॒ । कनि॑क्रदत् । स्त॒नय॑न् । हंसि॑ । दुः॒ऽकृतः॑ ।
प्रति॑ । इ॒दम् । विश्व॑म् । मो॒द॒ते॒ । यत् । किम् । च॒ । पृ॒थि॒व्याम् । अधि॑ ॥
Padapatha Devanagari Nonaccented
यत् । पर्जन्य । कनिक्रदत् । स्तनयन् । हंसि । दुःऽकृतः ।
प्रति । इदम् । विश्वम् । मोदते । यत् । किम् । च । पृथिव्याम् । अधि ॥
Padapatha Transcription Accented
yát ǀ parjanya ǀ kánikradat ǀ stanáyan ǀ háṃsi ǀ duḥ-kṛ́taḥ ǀ
práti ǀ idám ǀ víśvam ǀ modate ǀ yát ǀ kím ǀ ca ǀ pṛthivyā́m ǀ ádhi ǁ
Padapatha Transcription Nonaccented
yat ǀ parjanya ǀ kanikradat ǀ stanayan ǀ haṃsi ǀ duḥ-kṛtaḥ ǀ
prati ǀ idam ǀ viśvam ǀ modate ǀ yat ǀ kim ǀ ca ǀ pṛthivyām ǀ adhi ǁ
05.083.10 (Mandala. Sukta. Rik)
4.4.28.05 (Ashtaka. Adhyaya. Varga. Rik)
05.06.088 (Mandala. Anuvāka. Rik)
Samhita Devanagari Accented
अव॑र्षीर्व॒र्षमुदु॒ षू गृ॑भा॒याक॒र्धन्वा॒न्यत्ये॑त॒वा उ॑ ।
अजी॑जन॒ ओष॑धी॒र्भोज॑नाय॒ कमु॒त प्र॒जाभ्यो॑ऽविदो मनी॒षां ॥
Samhita Devanagari Nonaccented
अवर्षीर्वर्षमुदु षू गृभायाकर्धन्वान्यत्येतवा उ ।
अजीजन ओषधीर्भोजनाय कमुत प्रजाभ्योऽविदो मनीषां ॥
Samhita Transcription Accented
ávarṣīrvarṣámúdu ṣū́ gṛbhāyā́kardhánvānyátyetavā́ u ǀ
ájījana óṣadhīrbhójanāya kámutá prajā́bhyo’vido manīṣā́m ǁ
Samhita Transcription Nonaccented
avarṣīrvarṣamudu ṣū gṛbhāyākardhanvānyatyetavā u ǀ
ajījana oṣadhīrbhojanāya kamuta prajābhyo’vido manīṣām ǁ
Padapatha Devanagari Accented
अव॑र्षीः । व॒र्षम् । उत् । ऊं॒ इति॑ । सु । गृ॒भा॒य॒ । अकः॑ । धन्वा॑नि । अति॑ऽए॒त॒वै । ऊं॒ इति॑ ।
अजी॑जनः । ओष॑धीः । भोज॑नाय । कम् । उ॒त । प्र॒ऽजाभ्यः॑ । अ॒वि॒दः॒ । म॒नी॒षाम् ॥
Padapatha Devanagari Nonaccented
अवर्षीः । वर्षम् । उत् । ऊं इति । सु । गृभाय । अकः । धन्वानि । अतिऽएतवै । ऊं इति ।
अजीजनः । ओषधीः । भोजनाय । कम् । उत । प्रऽजाभ्यः । अविदः । मनीषाम् ॥
Padapatha Transcription Accented
ávarṣīḥ ǀ varṣám ǀ út ǀ ūṃ íti ǀ sú ǀ gṛbhāya ǀ ákaḥ ǀ dhánvāni ǀ áti-etavái ǀ ūṃ íti ǀ
ájījanaḥ ǀ óṣadhīḥ ǀ bhójanāya ǀ kám ǀ utá ǀ pra-jā́bhyaḥ ǀ avidaḥ ǀ manīṣā́m ǁ
Padapatha Transcription Nonaccented
avarṣīḥ ǀ varṣam ǀ ut ǀ ūṃ iti ǀ su ǀ gṛbhāya ǀ akaḥ ǀ dhanvāni ǀ ati-etavai ǀ ūṃ iti ǀ
ajījanaḥ ǀ oṣadhīḥ ǀ bhojanāya ǀ kam ǀ uta ǀ pra-jābhyaḥ ǀ avidaḥ ǀ manīṣām ǁ