|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 16
|
1. Info |
| To: | agni | |
| From: | vasiṣṭha maitrāvaruṇi | |
| Metres: | 1st set of styles: bṛhatī (4, 9, 10); nicṛtpaṅkti (6, 8, 12); svarāḍanuṣṭup (1); bhurigbṛhatī (2); nicṛdbṛhatī (3); nicṛdanuṣṭup (5); anuṣṭup (7); bhuriganuṣṭup (11) 2nd set of styles: bṛhatī (1, 3, 5, 7, 9, 11); satobṛhatī (2, 4, 6, 8, 10, 12) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.016.01 (Mandala. Sukta. Rik)
5.2.21.01 (Ashtaka. Adhyaya. Varga. Rik)
07.01.127 (Mandala. Anuvāka. Rik)
Samhita Devanagari Accented
ए॒ना वो॑ अ॒ग्निं नम॑सो॒र्जो नपा॑त॒मा हु॑वे ।
प्रि॒यं चेति॑ष्ठमर॒तिं स्व॑ध्व॒रं विश्व॑स्य दू॒तम॒मृतं॑ ॥
Samhita Devanagari Nonaccented
एना वो अग्निं नमसोर्जो नपातमा हुवे ।
प्रियं चेतिष्ठमरतिं स्वध्वरं विश्वस्य दूतममृतं ॥
Samhita Transcription Accented
enā́ vo agním námasorjó nápātamā́ huve ǀ
priyám cétiṣṭhamaratím svadhvarám víśvasya dūtámamṛ́tam ǁ
Samhita Transcription Nonaccented
enā vo agnim namasorjo napātamā huve ǀ
priyam cetiṣṭhamaratim svadhvaram viśvasya dūtamamṛtam ǁ
Padapatha Devanagari Accented
ए॒ना । वः॒ । अ॒ग्निम् । नम॑सा । ऊ॒र्जः । नपा॑तम् । आ । हु॒वे॒ ।
प्रि॒यम् । चेति॑ष्ठम् । अ॒र॒तिम् । सु॒ऽअ॒ध्व॒रम् । विश्व॑स्य । दू॒तम् । अ॒मृत॑म् ॥
Padapatha Devanagari Nonaccented
एना । वः । अग्निम् । नमसा । ऊर्जः । नपातम् । आ । हुवे ।
प्रियम् । चेतिष्ठम् । अरतिम् । सुऽअध्वरम् । विश्वस्य । दूतम् । अमृतम् ॥
Padapatha Transcription Accented
enā́ ǀ vaḥ ǀ agním ǀ námasā ǀ ūrjáḥ ǀ nápātam ǀ ā́ ǀ huve ǀ
priyám ǀ cétiṣṭham ǀ aratím ǀ su-adhvarám ǀ víśvasya ǀ dūtám ǀ amṛ́tam ǁ
Padapatha Transcription Nonaccented
enā ǀ vaḥ ǀ agnim ǀ namasā ǀ ūrjaḥ ǀ napātam ǀ ā ǀ huve ǀ
priyam ǀ cetiṣṭham ǀ aratim ǀ su-adhvaram ǀ viśvasya ǀ dūtam ǀ amṛtam ǁ
07.016.02 (Mandala. Sukta. Rik)
5.2.21.02 (Ashtaka. Adhyaya. Varga. Rik)
07.01.128 (Mandala. Anuvāka. Rik)
Samhita Devanagari Accented
स यो॑जते अरु॒षा वि॒श्वभो॑जसा॒ स दु॑द्रव॒त्स्वा॑हुतः ।
सु॒ब्रह्मा॑ य॒ज्ञः सु॒शमी॒ वसू॑नां दे॒वं राधो॒ जना॑नां ॥
Samhita Devanagari Nonaccented
स योजते अरुषा विश्वभोजसा स दुद्रवत्स्वाहुतः ।
सुब्रह्मा यज्ञः सुशमी वसूनां देवं राधो जनानां ॥
Samhita Transcription Accented
sá yojate aruṣā́ viśvábhojasā sá dudravatsvā́hutaḥ ǀ
subráhmā yajñáḥ suśámī vásūnām devám rā́dho jánānām ǁ
Samhita Transcription Nonaccented
sa yojate aruṣā viśvabhojasā sa dudravatsvāhutaḥ ǀ
subrahmā yajñaḥ suśamī vasūnām devam rādho janānām ǁ
Padapatha Devanagari Accented
सः । यो॒ज॒ते॒ । अ॒रु॒षा । वि॒श्वऽभो॑जसा । सः । दु॒द्र॒व॒त् । सुऽआ॑हुतः ।
सु॒ऽब्रह्मा॑ । य॒ज्ञः । सु॒ऽशमी॑ । वसू॑नाम् । दे॒वम् । राधः॑ । जना॑नाम् ॥
Padapatha Devanagari Nonaccented
सः । योजते । अरुषा । विश्वऽभोजसा । सः । दुद्रवत् । सुऽआहुतः ।
सुऽब्रह्मा । यज्ञः । सुऽशमी । वसूनाम् । देवम् । राधः । जनानाम् ॥
Padapatha Transcription Accented
sáḥ ǀ yojate ǀ aruṣā́ ǀ viśvá-bhojasā ǀ sáḥ ǀ dudravat ǀ sú-āhutaḥ ǀ
su-bráhmā ǀ yajñáḥ ǀ su-śámī ǀ vásūnām ǀ devám ǀ rā́dhaḥ ǀ jánānām ǁ
Padapatha Transcription Nonaccented
saḥ ǀ yojate ǀ aruṣā ǀ viśva-bhojasā ǀ saḥ ǀ dudravat ǀ su-āhutaḥ ǀ
su-brahmā ǀ yajñaḥ ǀ su-śamī ǀ vasūnām ǀ devam ǀ rādhaḥ ǀ janānām ǁ
07.016.03 (Mandala. Sukta. Rik)
5.2.21.03 (Ashtaka. Adhyaya. Varga. Rik)
07.01.129 (Mandala. Anuvāka. Rik)
Samhita Devanagari Accented
उद॑स्य शो॒चिर॑स्थादा॒जुह्वा॑नस्य मी॒ळ्हुषः॑ ।
उद्धू॒मासो॑ अरु॒षासो॑ दिवि॒स्पृशः॒ सम॒ग्निमिं॑धते॒ नरः॑ ॥
Samhita Devanagari Nonaccented
उदस्य शोचिरस्थादाजुह्वानस्य मीळ्हुषः ।
उद्धूमासो अरुषासो दिविस्पृशः समग्निमिंधते नरः ॥
Samhita Transcription Accented
údasya śocírasthādājúhvānasya mīḷhúṣaḥ ǀ
úddhūmā́so aruṣā́so divispṛ́śaḥ sámagnímindhate náraḥ ǁ
Samhita Transcription Nonaccented
udasya śocirasthādājuhvānasya mīḷhuṣaḥ ǀ
uddhūmāso aruṣāso divispṛśaḥ samagnimindhate naraḥ ǁ
Padapatha Devanagari Accented
उत् । अ॒स्य॒ । शो॒चिः । अ॒स्था॒त् । आ॒ऽजुह्वा॑नस्य । मी॒ळ्हुषः॑ ।
उत् । धू॒मासः॑ । अ॒रु॒षासः॑ । दि॒वि॒ऽस्पृशः॑ । सम् । अ॒ग्निम् । इ॒न्ध॒ते॒ । नरः॑ ॥
Padapatha Devanagari Nonaccented
उत् । अस्य । शोचिः । अस्थात् । आऽजुह्वानस्य । मीळ्हुषः ।
उत् । धूमासः । अरुषासः । दिविऽस्पृशः । सम् । अग्निम् । इन्धते । नरः ॥
Padapatha Transcription Accented
út ǀ asya ǀ śocíḥ ǀ asthāt ǀ ā-júhvānasya ǀ mīḷhúṣaḥ ǀ
út ǀ dhūmā́saḥ ǀ aruṣā́saḥ ǀ divi-spṛ́śaḥ ǀ sám ǀ agním ǀ indhate ǀ náraḥ ǁ
Padapatha Transcription Nonaccented
ut ǀ asya ǀ śociḥ ǀ asthāt ǀ ā-juhvānasya ǀ mīḷhuṣaḥ ǀ
ut ǀ dhūmāsaḥ ǀ aruṣāsaḥ ǀ divi-spṛśaḥ ǀ sam ǀ agnim ǀ indhate ǀ naraḥ ǁ
07.016.04 (Mandala. Sukta. Rik)
5.2.21.04 (Ashtaka. Adhyaya. Varga. Rik)
07.01.130 (Mandala. Anuvāka. Rik)
Samhita Devanagari Accented
तं त्वा॑ दू॒तं कृ॑ण्महे य॒शस्त॑मं दे॒वाँ आ वी॒तये॑ वह ।
विश्वा॑ सूनो सहसो मर्त॒भोज॑ना॒ रास्व॒ तद्यत्त्वेम॑हे ॥
Samhita Devanagari Nonaccented
तं त्वा दूतं कृण्महे यशस्तमं देवाँ आ वीतये वह ।
विश्वा सूनो सहसो मर्तभोजना रास्व तद्यत्त्वेमहे ॥
Samhita Transcription Accented
tám tvā dūtám kṛṇmahe yaśástamam devā́m̐ ā́ vītáye vaha ǀ
víśvā sūno sahaso martabhójanā rā́sva tádyáttvémahe ǁ
Samhita Transcription Nonaccented
tam tvā dūtam kṛṇmahe yaśastamam devām̐ ā vītaye vaha ǀ
viśvā sūno sahaso martabhojanā rāsva tadyattvemahe ǁ
Padapatha Devanagari Accented
तम् । त्वा॒ । दू॒तम् । कृ॒ण्म॒हे॒ । य॒शःऽत॑मम् । दे॒वान् । आ । वी॒तये॑ । व॒ह॒ ।
विश्वा॑ । सू॒नो॒ इति॑ । स॒ह॒सः॒ । म॒र्त॒ऽभोज॑ना । रास्व॑ । तत् । यत् । त्वा॒ । ईम॑हे ॥
Padapatha Devanagari Nonaccented
तम् । त्वा । दूतम् । कृण्महे । यशःऽतमम् । देवान् । आ । वीतये । वह ।
विश्वा । सूनो इति । सहसः । मर्तऽभोजना । रास्व । तत् । यत् । त्वा । ईमहे ॥
Padapatha Transcription Accented
tám ǀ tvā ǀ dūtám ǀ kṛṇmahe ǀ yaśáḥ-tamam ǀ devā́n ǀ ā́ ǀ vītáye ǀ vaha ǀ
víśvā ǀ sūno íti ǀ sahasaḥ ǀ marta-bhójanā ǀ rā́sva ǀ tát ǀ yát ǀ tvā ǀ ī́mahe ǁ
Padapatha Transcription Nonaccented
tam ǀ tvā ǀ dūtam ǀ kṛṇmahe ǀ yaśaḥ-tamam ǀ devān ǀ ā ǀ vītaye ǀ vaha ǀ
viśvā ǀ sūno iti ǀ sahasaḥ ǀ marta-bhojanā ǀ rāsva ǀ tat ǀ yat ǀ tvā ǀ īmahe ǁ
07.016.05 (Mandala. Sukta. Rik)
5.2.21.05 (Ashtaka. Adhyaya. Varga. Rik)
07.01.131 (Mandala. Anuvāka. Rik)
Samhita Devanagari Accented
त्वम॑ग्ने गृ॒हप॑ति॒स्त्वं होता॑ नो अध्व॒रे ।
त्वं पोता॑ विश्ववार॒ प्रचे॑ता॒ यक्षि॒ वेषि॑ च॒ वार्यं॑ ॥
Samhita Devanagari Nonaccented
त्वमग्ने गृहपतिस्त्वं होता नो अध्वरे ।
त्वं पोता विश्ववार प्रचेता यक्षि वेषि च वार्यं ॥
Samhita Transcription Accented
tvámagne gṛhápatistvám hótā no adhvaré ǀ
tvám pótā viśvavāra prácetā yákṣi véṣi ca vā́ryam ǁ
Samhita Transcription Nonaccented
tvamagne gṛhapatistvam hotā no adhvare ǀ
tvam potā viśvavāra pracetā yakṣi veṣi ca vāryam ǁ
Padapatha Devanagari Accented
त्वम् । अ॒ग्ने॒ । गृ॒हऽप॑तिः । त्वम् । होता॑ । नः॒ । अ॒ध्व॒रे ।
त्वम् । पोता॑ । वि॒श्व॒ऽवा॒र॒ । प्रऽचे॑ताः । यक्षि॑ । वेषि॑ । च॒ । वार्य॑म् ॥
Padapatha Devanagari Nonaccented
त्वम् । अग्ने । गृहऽपतिः । त्वम् । होता । नः । अध्वरे ।
त्वम् । पोता । विश्वऽवार । प्रऽचेताः । यक्षि । वेषि । च । वार्यम् ॥
Padapatha Transcription Accented
tvám ǀ agne ǀ gṛhá-patiḥ ǀ tvám ǀ hótā ǀ naḥ ǀ adhvaré ǀ
tvám ǀ pótā ǀ viśva-vāra ǀ prá-cetāḥ ǀ yákṣi ǀ véṣi ǀ ca ǀ vā́ryam ǁ
Padapatha Transcription Nonaccented
tvam ǀ agne ǀ gṛha-patiḥ ǀ tvam ǀ hotā ǀ naḥ ǀ adhvare ǀ
tvam ǀ potā ǀ viśva-vāra ǀ pra-cetāḥ ǀ yakṣi ǀ veṣi ǀ ca ǀ vāryam ǁ
07.016.06 (Mandala. Sukta. Rik)
5.2.21.06 (Ashtaka. Adhyaya. Varga. Rik)
07.01.132 (Mandala. Anuvāka. Rik)
Samhita Devanagari Accented
कृ॒धि रत्नं॒ यज॑मानाय सुक्रतो॒ त्वं हि र॑त्न॒धा असि॑ ।
आ न॑ ऋ॒ते शि॑शीहि॒ विश्व॑मृ॒त्विजं॑ सु॒शंसो॒ यश्च॒ दक्ष॑ते ॥
Samhita Devanagari Nonaccented
कृधि रत्नं यजमानाय सुक्रतो त्वं हि रत्नधा असि ।
आ न ऋते शिशीहि विश्वमृत्विजं सुशंसो यश्च दक्षते ॥
Samhita Transcription Accented
kṛdhí rátnam yájamānāya sukrato tvám hí ratnadhā́ ási ǀ
ā́ na ṛté śiśīhi víśvamṛtvíjam suśáṃso yáśca dákṣate ǁ
Samhita Transcription Nonaccented
kṛdhi ratnam yajamānāya sukrato tvam hi ratnadhā asi ǀ
ā na ṛte śiśīhi viśvamṛtvijam suśaṃso yaśca dakṣate ǁ
Padapatha Devanagari Accented
कृ॒धि । रत्न॑म् । यज॑मानाय । सु॒क्र॒तो॒ इति॑ सुऽक्रतो । त्वम् । हि । र॒त्न॒ऽधाः । असि॑ ।
आ । नः॒ । ऋ॒ते । शि॒शी॒हि॒ । विश्व॑म् । ऋ॒त्विज॑म् । सु॒ऽशंसः॑ । यः । च॒ । दक्ष॑ते ॥
Padapatha Devanagari Nonaccented
कृधि । रत्नम् । यजमानाय । सुक्रतो इति सुऽक्रतो । त्वम् । हि । रत्नऽधाः । असि ।
आ । नः । ऋते । शिशीहि । विश्वम् । ऋत्विजम् । सुऽशंसः । यः । च । दक्षते ॥
Padapatha Transcription Accented
kṛdhí ǀ rátnam ǀ yájamānāya ǀ sukrato íti su-krato ǀ tvám ǀ hí ǀ ratna-dhā́ḥ ǀ ási ǀ
ā́ ǀ naḥ ǀ ṛté ǀ śiśīhi ǀ víśvam ǀ ṛtvíjam ǀ su-śáṃsaḥ ǀ yáḥ ǀ ca ǀ dákṣate ǁ
Padapatha Transcription Nonaccented
kṛdhi ǀ ratnam ǀ yajamānāya ǀ sukrato iti su-krato ǀ tvam ǀ hi ǀ ratna-dhāḥ ǀ asi ǀ
ā ǀ naḥ ǀ ṛte ǀ śiśīhi ǀ viśvam ǀ ṛtvijam ǀ su-śaṃsaḥ ǀ yaḥ ǀ ca ǀ dakṣate ǁ
07.016.07 (Mandala. Sukta. Rik)
5.2.22.01 (Ashtaka. Adhyaya. Varga. Rik)
07.01.133 (Mandala. Anuvāka. Rik)
Samhita Devanagari Accented
त्वे अ॑ग्ने स्वाहुत प्रि॒यासः॑ संतु सू॒रयः॑ ।
यं॒तारो॒ ये म॒घवा॑नो॒ जना॑नामू॒र्वांदयं॑त॒ गोनां॑ ॥
Samhita Devanagari Nonaccented
त्वे अग्ने स्वाहुत प्रियासः संतु सूरयः ।
यंतारो ये मघवानो जनानामूर्वांदयंत गोनां ॥
Samhita Transcription Accented
tvé agne svāhuta priyā́saḥ santu sūráyaḥ ǀ
yantā́ro yé maghávāno jánānāmūrvā́ndáyanta gónām ǁ
Samhita Transcription Nonaccented
tve agne svāhuta priyāsaḥ santu sūrayaḥ ǀ
yantāro ye maghavāno janānāmūrvāndayanta gonām ǁ
Padapatha Devanagari Accented
त्वे इति॑ । अ॒ग्ने॒ । सु॒ऽआ॒हु॒त॒ । प्रि॒यासः॑ । स॒न्तु॒ । सू॒रयः॑ ।
य॒न्तारः॑ । ये । म॒घऽवा॑नः । जना॑नाम् । ऊ॒र्वान् । दय॑न्त । गोना॑म् ॥
Padapatha Devanagari Nonaccented
त्वे इति । अग्ने । सुऽआहुत । प्रियासः । सन्तु । सूरयः ।
यन्तारः । ये । मघऽवानः । जनानाम् । ऊर्वान् । दयन्त । गोनाम् ॥
Padapatha Transcription Accented
tvé íti ǀ agne ǀ su-āhuta ǀ priyā́saḥ ǀ santu ǀ sūráyaḥ ǀ
yantā́raḥ ǀ yé ǀ maghá-vānaḥ ǀ jánānām ǀ ūrvā́n ǀ dáyanta ǀ gónām ǁ
Padapatha Transcription Nonaccented
tve iti ǀ agne ǀ su-āhuta ǀ priyāsaḥ ǀ santu ǀ sūrayaḥ ǀ
yantāraḥ ǀ ye ǀ magha-vānaḥ ǀ janānām ǀ ūrvān ǀ dayanta ǀ gonām ǁ
07.016.08 (Mandala. Sukta. Rik)
5.2.22.02 (Ashtaka. Adhyaya. Varga. Rik)
07.01.134 (Mandala. Anuvāka. Rik)
Samhita Devanagari Accented
येषा॒मिळा॑ घृ॒तह॑स्ता दुरो॒ण आँ अपि॑ प्रा॒ता नि॒षीद॑ति ।
तांस्त्रा॑यस्व सहस्य द्रु॒हो नि॒दो यच्छा॑ नः॒ शर्म॑ दीर्घ॒श्रुत् ॥
Samhita Devanagari Nonaccented
येषामिळा घृतहस्ता दुरोण आँ अपि प्राता निषीदति ।
तांस्त्रायस्व सहस्य द्रुहो निदो यच्छा नः शर्म दीर्घश्रुत् ॥
Samhita Transcription Accented
yéṣāmíḷā ghṛtáhastā duroṇá ā́m̐ ápi prātā́ niṣī́dati ǀ
tā́ṃstrāyasva sahasya druhó nidó yácchā naḥ śárma dīrghaśrút ǁ
Samhita Transcription Nonaccented
yeṣāmiḷā ghṛtahastā duroṇa ām̐ api prātā niṣīdati ǀ
tāṃstrāyasva sahasya druho nido yacchā naḥ śarma dīrghaśrut ǁ
Padapatha Devanagari Accented
येषा॑म् । इळा॑ । घृ॒तऽह॑स्ता । दु॒रो॒णे । आ । अपि॑ । प्रा॒ता । नि॒ऽसीद॑ति ।
तान् । त्रा॒य॒स्व॒ । स॒ह॒स्य॒ । द्रु॒हः । नि॒दः । यच्छ॑ । नः॒ । शर्म॑ । दी॒र्घ॒ऽश्रुत् ॥
Padapatha Devanagari Nonaccented
येषाम् । इळा । घृतऽहस्ता । दुरोणे । आ । अपि । प्राता । निऽसीदति ।
तान् । त्रायस्व । सहस्य । द्रुहः । निदः । यच्छ । नः । शर्म । दीर्घऽश्रुत् ॥
Padapatha Transcription Accented
yéṣām ǀ íḷā ǀ ghṛtá-hastā ǀ duroṇé ǀ ā́ ǀ ápi ǀ prātā́ ǀ ni-sī́dati ǀ
tā́n ǀ trāyasva ǀ sahasya ǀ druháḥ ǀ nidáḥ ǀ yáccha ǀ naḥ ǀ śárma ǀ dīrgha-śrút ǁ
Padapatha Transcription Nonaccented
yeṣām ǀ iḷā ǀ ghṛta-hastā ǀ duroṇe ǀ ā ǀ api ǀ prātā ǀ ni-sīdati ǀ
tān ǀ trāyasva ǀ sahasya ǀ druhaḥ ǀ nidaḥ ǀ yaccha ǀ naḥ ǀ śarma ǀ dīrgha-śrut ǁ
07.016.09 (Mandala. Sukta. Rik)
5.2.22.03 (Ashtaka. Adhyaya. Varga. Rik)
07.01.135 (Mandala. Anuvāka. Rik)
Samhita Devanagari Accented
स मं॒द्रया॑ च जि॒ह्वया॒ वह्नि॑रा॒सा वि॒दुष्ट॑रः ।
अग्ने॑ र॒यिं म॒घव॑द्भ्यो न॒ आ व॑ह ह॒व्यदा॑तिं च सूदय ॥
Samhita Devanagari Nonaccented
स मंद्रया च जिह्वया वह्निरासा विदुष्टरः ।
अग्ने रयिं मघवद्भ्यो न आ वह हव्यदातिं च सूदय ॥
Samhita Transcription Accented
sá mandráyā ca jihváyā váhnirāsā́ vidúṣṭaraḥ ǀ
ágne rayím maghávadbhyo na ā́ vaha havyádātim ca sūdaya ǁ
Samhita Transcription Nonaccented
sa mandrayā ca jihvayā vahnirāsā viduṣṭaraḥ ǀ
agne rayim maghavadbhyo na ā vaha havyadātim ca sūdaya ǁ
Padapatha Devanagari Accented
सः । म॒न्द्रया॑ । च॒ । जि॒ह्वया॑ । वह्निः॑ । आ॒सा । वि॒दुःऽत॑रः ।
अग्ने॑ । र॒यिम् । म॒घव॑त्ऽभ्यः । नः॒ । आ । व॒ह॒ । ह॒व्यऽदा॑तिम् । च॒ । सू॒द॒य॒ ॥
Padapatha Devanagari Nonaccented
सः । मन्द्रया । च । जिह्वया । वह्निः । आसा । विदुःऽतरः ।
अग्ने । रयिम् । मघवत्ऽभ्यः । नः । आ । वह । हव्यऽदातिम् । च । सूदय ॥
Padapatha Transcription Accented
sáḥ ǀ mandráyā ǀ ca ǀ jihváyā ǀ váhniḥ ǀ āsā́ ǀ vidúḥ-taraḥ ǀ
ágne ǀ rayím ǀ maghávat-bhyaḥ ǀ naḥ ǀ ā́ ǀ vaha ǀ havyá-dātim ǀ ca ǀ sūdaya ǁ
Padapatha Transcription Nonaccented
saḥ ǀ mandrayā ǀ ca ǀ jihvayā ǀ vahniḥ ǀ āsā ǀ viduḥ-taraḥ ǀ
agne ǀ rayim ǀ maghavat-bhyaḥ ǀ naḥ ǀ ā ǀ vaha ǀ havya-dātim ǀ ca ǀ sūdaya ǁ
07.016.10 (Mandala. Sukta. Rik)
5.2.22.04 (Ashtaka. Adhyaya. Varga. Rik)
07.01.136 (Mandala. Anuvāka. Rik)
Samhita Devanagari Accented
ये राधां॑सि॒ दद॒त्यश्व्या॑ म॒घा कामे॑न॒ श्रव॑सो म॒हः ।
ताँ अंह॑सः पिपृहि प॒र्तृभि॒ष्ट्वं श॒तं पू॒र्भिर्य॑विष्ठ्य ॥
Samhita Devanagari Nonaccented
ये राधांसि ददत्यश्व्या मघा कामेन श्रवसो महः ।
ताँ अंहसः पिपृहि पर्तृभिष्ट्वं शतं पूर्भिर्यविष्ठ्य ॥
Samhita Transcription Accented
yé rā́dhāṃsi dádatyáśvyā maghā́ kā́mena śrávaso maháḥ ǀ
tā́m̐ áṃhasaḥ pipṛhi partṛ́bhiṣṭvám śatám pūrbhíryaviṣṭhya ǁ
Samhita Transcription Nonaccented
ye rādhāṃsi dadatyaśvyā maghā kāmena śravaso mahaḥ ǀ
tām̐ aṃhasaḥ pipṛhi partṛbhiṣṭvam śatam pūrbhiryaviṣṭhya ǁ
Padapatha Devanagari Accented
ये । राधां॑सि । दद॑ति । अश्व्या॑ । म॒घा । कामे॑न । श्रव॑सः । म॒हः ।
तान् । अंह॑सः । पि॒पृ॒हि॒ । प॒र्तृऽभिः॑ । त्वम् । श॒तम् । पूः॒ऽभिः । य॒वि॒ष्ठ्य॒ ॥
Padapatha Devanagari Nonaccented
ये । राधांसि । ददति । अश्व्या । मघा । कामेन । श्रवसः । महः ।
तान् । अंहसः । पिपृहि । पर्तृऽभिः । त्वम् । शतम् । पूःऽभिः । यविष्ठ्य ॥
Padapatha Transcription Accented
yé ǀ rā́dhāṃsi ǀ dádati ǀ áśvyā ǀ maghā́ ǀ kā́mena ǀ śrávasaḥ ǀ maháḥ ǀ
tā́n ǀ áṃhasaḥ ǀ pipṛhi ǀ partṛ́-bhiḥ ǀ tvám ǀ śatám ǀ pūḥ-bhíḥ ǀ yaviṣṭhya ǁ
Padapatha Transcription Nonaccented
ye ǀ rādhāṃsi ǀ dadati ǀ aśvyā ǀ maghā ǀ kāmena ǀ śravasaḥ ǀ mahaḥ ǀ
tān ǀ aṃhasaḥ ǀ pipṛhi ǀ partṛ-bhiḥ ǀ tvam ǀ śatam ǀ pūḥ-bhiḥ ǀ yaviṣṭhya ǁ
07.016.11 (Mandala. Sukta. Rik)
5.2.22.05 (Ashtaka. Adhyaya. Varga. Rik)
07.01.137 (Mandala. Anuvāka. Rik)
Samhita Devanagari Accented
दे॒वो वो॑ द्रविणो॒दाः पू॒र्णां वि॑वष्ट्या॒सिचं॑ ।
उद्वा॑ सिं॒चध्व॒मुप॑ वा पृणध्व॒मादिद्वो॑ दे॒व ओ॑हते ॥
Samhita Devanagari Nonaccented
देवो वो द्रविणोदाः पूर्णां विवष्ट्यासिचं ।
उद्वा सिंचध्वमुप वा पृणध्वमादिद्वो देव ओहते ॥
Samhita Transcription Accented
devó vo draviṇodā́ḥ pūrṇā́m vivaṣṭyāsícam ǀ
údvā siñcádhvamúpa vā pṛṇadhvamā́dídvo devá ohate ǁ
Samhita Transcription Nonaccented
devo vo draviṇodāḥ pūrṇām vivaṣṭyāsicam ǀ
udvā siñcadhvamupa vā pṛṇadhvamādidvo deva ohate ǁ
Padapatha Devanagari Accented
दे॒वः । वः॒ । द्र॒वि॒णः॒ऽदाः । पू॒र्णाम् । वि॒व॒ष्टि॒ । आ॒ऽसिच॑म् ।
उत् । वा॒ । सि॒ञ्चध्व॑म् । उप॑ । वा॒ । पृ॒ण॒ध्व॒म् । आत् । इत् । वः॒ । दे॒वः । ओ॒ह॒ते॒ ॥
Padapatha Devanagari Nonaccented
देवः । वः । द्रविणःऽदाः । पूर्णाम् । विवष्टि । आऽसिचम् ।
उत् । वा । सिञ्चध्वम् । उप । वा । पृणध्वम् । आत् । इत् । वः । देवः । ओहते ॥
Padapatha Transcription Accented
deváḥ ǀ vaḥ ǀ draviṇaḥ-dā́ḥ ǀ pūrṇā́m ǀ vivaṣṭi ǀ ā-sícam ǀ
út ǀ vā ǀ siñcádhvam ǀ úpa ǀ vā ǀ pṛṇadhvam ǀ ā́t ǀ ít ǀ vaḥ ǀ deváḥ ǀ ohate ǁ
Padapatha Transcription Nonaccented
devaḥ ǀ vaḥ ǀ draviṇaḥ-dāḥ ǀ pūrṇām ǀ vivaṣṭi ǀ ā-sicam ǀ
ut ǀ vā ǀ siñcadhvam ǀ upa ǀ vā ǀ pṛṇadhvam ǀ āt ǀ it ǀ vaḥ ǀ devaḥ ǀ ohate ǁ
07.016.12 (Mandala. Sukta. Rik)
5.2.22.06 (Ashtaka. Adhyaya. Varga. Rik)
07.01.138 (Mandala. Anuvāka. Rik)
Samhita Devanagari Accented
तं होता॑रमध्व॒रस्य॒ प्रचे॑तसं॒ वह्निं॑ दे॒वा अ॑कृण्वत ।
दधा॑ति॒ रत्नं॑ विध॒ते सु॒वीर्य॑म॒ग्निर्जना॑य दा॒शुषे॑ ॥
Samhita Devanagari Nonaccented
तं होतारमध्वरस्य प्रचेतसं वह्निं देवा अकृण्वत ।
दधाति रत्नं विधते सुवीर्यमग्निर्जनाय दाशुषे ॥
Samhita Transcription Accented
tám hótāramadhvarásya prácetasam váhnim devā́ akṛṇvata ǀ
dádhāti rátnam vidhaté suvī́ryamagnírjánāya dāśúṣe ǁ
Samhita Transcription Nonaccented
tam hotāramadhvarasya pracetasam vahnim devā akṛṇvata ǀ
dadhāti ratnam vidhate suvīryamagnirjanāya dāśuṣe ǁ
Padapatha Devanagari Accented
तम् । होता॑रम् । अ॒ध्व॒रस्य॑ । प्रऽचे॑तसम् । वह्नि॑म् । दे॒वाः । अ॒कृ॒ण्व॒त॒ ।
दधा॑ति । रत्न॑म् । वि॒ध॒ते । सु॒ऽवीर्य॑म् । अ॒ग्निः । जना॑य । दा॒शुषे॑ ॥
Padapatha Devanagari Nonaccented
तम् । होतारम् । अध्वरस्य । प्रऽचेतसम् । वह्निम् । देवाः । अकृण्वत ।
दधाति । रत्नम् । विधते । सुऽवीर्यम् । अग्निः । जनाय । दाशुषे ॥
Padapatha Transcription Accented
tám ǀ hótāram ǀ adhvarásya ǀ prá-cetasam ǀ váhnim ǀ devā́ḥ ǀ akṛṇvata ǀ
dádhāti ǀ rátnam ǀ vidhaté ǀ su-vī́ryam ǀ agníḥ ǀ jánāya ǀ dāśúṣe ǁ
Padapatha Transcription Nonaccented
tam ǀ hotāram ǀ adhvarasya ǀ pra-cetasam ǀ vahnim ǀ devāḥ ǀ akṛṇvata ǀ
dadhāti ǀ ratnam ǀ vidhate ǀ su-vīryam ǀ agniḥ ǀ janāya ǀ dāśuṣe ǁ