|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 32
|
1. Info |
| To: | indra | |
| From: | 1-25, 27: vasiṣṭha maitrāvaruṇi; 26: śakti vāsiṣṭha (a); vasiṣṭha maitrāvaruṇi or śakti vāsiṣṭha (b) |
|
| Metres: | 1st set of styles: nicṛdbṛhatī (6, 8, 12, 16, 18, 26); nicṛtpaṅkti (5, 13, 15, 19, 23); virāḍabṛhatī (1, 4, 24); paṅktiḥ (2, 9); bhuriganuṣṭup (10, 14); bṛhatī (11, 27); bhurigbṛhatī (17, 25); svarāḍanuṣṭup (20, 22); sāmnīpaṅkti (3); virāṭpaṅkti (7); svarāḍbṛhatī (21) 2nd set of styles: satobṛhatī (1, 5, 7, 9, 11, 13, 15, 17, 19, 21, 23, 25, 27); bṛhatī (2, 4, 6, 8, 10, 12, 14, 16, 18, 20, 22, 24, 26); dvipadā virāj (3) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.032.01 (Mandala. Sukta. Rik)
5.3.17.01 (Ashtaka. Adhyaya. Varga. Rik)
07.02.121 (Mandala. Anuvāka. Rik)
Samhita Devanagari Accented
मो षु त्वा॑ वा॒घत॑श्च॒नारे अ॒स्मन्नि री॑रमन् ।
आ॒रात्ता॑च्चित्सध॒मादं॑ न॒ आ ग॑ही॒ह वा॒ सन्नुप॑ श्रुधि ॥
Samhita Devanagari Nonaccented
मो षु त्वा वाघतश्चनारे अस्मन्नि रीरमन् ।
आरात्ताच्चित्सधमादं न आ गहीह वा सन्नुप श्रुधि ॥
Samhita Transcription Accented
mó ṣú tvā vāghátaścanā́ré asmánní rīraman ǀ
ārā́ttāccitsadhamā́dam na ā́ gahīhá vā sánnúpa śrudhi ǁ
Samhita Transcription Nonaccented
mo ṣu tvā vāghataścanāre asmanni rīraman ǀ
ārāttāccitsadhamādam na ā gahīha vā sannupa śrudhi ǁ
Padapatha Devanagari Accented
मो इति॑ । सु । त्वा॒ । वा॒घतः॑ । च॒न । आ॒रे । अ॒स्मत् । नि । री॒र॒म॒न् ।
आ॒रात्ता॑त् । चि॒त् । स॒ध॒ऽमाद॑म् । नः॒ । आ । ग॒हि॒ । इ॒ह । वा॒ । सन् । उप॑ । श्रु॒धि॒ ॥
Padapatha Devanagari Nonaccented
मो इति । सु । त्वा । वाघतः । चन । आरे । अस्मत् । नि । रीरमन् ।
आरात्तात् । चित् । सधऽमादम् । नः । आ । गहि । इह । वा । सन् । उप । श्रुधि ॥
Padapatha Transcription Accented
mó íti ǀ sú ǀ tvā ǀ vāghátaḥ ǀ caná ǀ āré ǀ asmát ǀ ní ǀ rīraman ǀ
ārā́ttāt ǀ cit ǀ sadha-mā́dam ǀ naḥ ǀ ā́ ǀ gahi ǀ ihá ǀ vā ǀ sán ǀ úpa ǀ śrudhi ǁ
Padapatha Transcription Nonaccented
mo iti ǀ su ǀ tvā ǀ vāghataḥ ǀ cana ǀ āre ǀ asmat ǀ ni ǀ rīraman ǀ
ārāttāt ǀ cit ǀ sadha-mādam ǀ naḥ ǀ ā ǀ gahi ǀ iha ǀ vā ǀ san ǀ upa ǀ śrudhi ǁ
07.032.02 (Mandala. Sukta. Rik)
5.3.17.02 (Ashtaka. Adhyaya. Varga. Rik)
07.02.122 (Mandala. Anuvāka. Rik)
Samhita Devanagari Accented
इ॒मे हि ते॑ ब्रह्म॒कृतः॑ सु॒ते सचा॒ मधौ॒ न मक्ष॒ आस॑ते ।
इंद्रे॒ कामं॑ जरि॒तारो॑ वसू॒यवो॒ रथे॒ न पाद॒मा द॑धुः ॥
Samhita Devanagari Nonaccented
इमे हि ते ब्रह्मकृतः सुते सचा मधौ न मक्ष आसते ।
इंद्रे कामं जरितारो वसूयवो रथे न पादमा दधुः ॥
Samhita Transcription Accented
imé hí te brahmakṛ́taḥ suté sácā mádhau ná mákṣa ā́sate ǀ
índre kā́mam jaritā́ro vasūyávo ráthe ná pā́damā́ dadhuḥ ǁ
Samhita Transcription Nonaccented
ime hi te brahmakṛtaḥ sute sacā madhau na makṣa āsate ǀ
indre kāmam jaritāro vasūyavo rathe na pādamā dadhuḥ ǁ
Padapatha Devanagari Accented
इ॒मे । हि । ते॒ । ब्र॒ह्म॒ऽकृतः॑ । सु॒ते । सचा॑ । मधौ॑ । न । मक्षः॑ । आस॑ते ।
इन्द्रे॑ । काम॑म् । ज॒रि॒तारः॑ । व॒सु॒ऽयवः॑ । रथे॑ । न । पाद॑म् । आ । द॒धुः॒ ॥
Padapatha Devanagari Nonaccented
इमे । हि । ते । ब्रह्मऽकृतः । सुते । सचा । मधौ । न । मक्षः । आसते ।
इन्द्रे । कामम् । जरितारः । वसुऽयवः । रथे । न । पादम् । आ । दधुः ॥
Padapatha Transcription Accented
imé ǀ hí ǀ te ǀ brahma-kṛ́taḥ ǀ suté ǀ sácā ǀ mádhau ǀ ná ǀ mákṣaḥ ǀ ā́sate ǀ
índre ǀ kā́mam ǀ jaritā́raḥ ǀ vasu-yávaḥ ǀ ráthe ǀ ná ǀ pā́dam ǀ ā́ ǀ dadhuḥ ǁ
Padapatha Transcription Nonaccented
ime ǀ hi ǀ te ǀ brahma-kṛtaḥ ǀ sute ǀ sacā ǀ madhau ǀ na ǀ makṣaḥ ǀ āsate ǀ
indre ǀ kāmam ǀ jaritāraḥ ǀ vasu-yavaḥ ǀ rathe ǀ na ǀ pādam ǀ ā ǀ dadhuḥ ǁ
07.032.03 (Mandala. Sukta. Rik)
5.3.17.03 (Ashtaka. Adhyaya. Varga. Rik)
07.02.123 (Mandala. Anuvāka. Rik)
Samhita Devanagari Accented
रा॒यस्का॑मो॒ वज्र॑हस्तं सु॒दक्षि॑णं पु॒त्रो न पि॒तरं॑ हुवे ॥
Samhita Devanagari Nonaccented
रायस्कामो वज्रहस्तं सुदक्षिणं पुत्रो न पितरं हुवे ॥
Samhita Transcription Accented
rāyáskāmo vájrahastam sudákṣiṇam putró ná pitáram huve ǁ
Samhita Transcription Nonaccented
rāyaskāmo vajrahastam sudakṣiṇam putro na pitaram huve ǁ
Padapatha Devanagari Accented
रा॒यःऽका॑मः । वज्र॑ऽहस्तम् । सु॒ऽदक्षि॑णम् । पु॒त्रः । न । पि॒तर॑म् । हु॒वे॒ ॥
Padapatha Devanagari Nonaccented
रायःऽकामः । वज्रऽहस्तम् । सुऽदक्षिणम् । पुत्रः । न । पितरम् । हुवे ॥
Padapatha Transcription Accented
rāyáḥ-kāmaḥ ǀ vájra-hastam ǀ su-dákṣiṇam ǀ putráḥ ǀ ná ǀ pitáram ǀ huve ǁ
Padapatha Transcription Nonaccented
rāyaḥ-kāmaḥ ǀ vajra-hastam ǀ su-dakṣiṇam ǀ putraḥ ǀ na ǀ pitaram ǀ huve ǁ
07.032.04 (Mandala. Sukta. Rik)
5.3.17.04 (Ashtaka. Adhyaya. Varga. Rik)
07.02.124 (Mandala. Anuvāka. Rik)
Samhita Devanagari Accented
इ॒म इंद्रा॑य सुन्विरे॒ सोमा॑सो॒ दध्या॑शिरः ।
ताँ आ मदा॑य वज्रहस्त पी॒तये॒ हरि॑भ्यां या॒ह्योक॒ आ ॥
Samhita Devanagari Nonaccented
इम इंद्राय सुन्विरे सोमासो दध्याशिरः ।
ताँ आ मदाय वज्रहस्त पीतये हरिभ्यां याह्योक आ ॥
Samhita Transcription Accented
imá índrāya sunvire sómāso dádhyāśiraḥ ǀ
tā́m̐ ā́ mádāya vajrahasta pītáye háribhyām yāhyóka ā́ ǁ
Samhita Transcription Nonaccented
ima indrāya sunvire somāso dadhyāśiraḥ ǀ
tām̐ ā madāya vajrahasta pītaye haribhyām yāhyoka ā ǁ
Padapatha Devanagari Accented
इ॒मे । इन्द्रा॑य । सु॒न्वि॒रे॒ । सोमा॑सः । दधि॑ऽआशिरः ।
तान् । आ । मदा॑य । व॒ज्र॒ऽह॒स्त॒ । पी॒तये॑ । हरि॑ऽभ्याम् । या॒हि॒ । ओकः॑ । आ ॥
Padapatha Devanagari Nonaccented
इमे । इन्द्राय । सुन्विरे । सोमासः । दधिऽआशिरः ।
तान् । आ । मदाय । वज्रऽहस्त । पीतये । हरिऽभ्याम् । याहि । ओकः । आ ॥
Padapatha Transcription Accented
imé ǀ índrāya ǀ sunvire ǀ sómāsaḥ ǀ dádhi-āśiraḥ ǀ
tā́n ǀ ā́ ǀ mádāya ǀ vajra-hasta ǀ pītáye ǀ hári-bhyām ǀ yāhi ǀ ókaḥ ǀ ā́ ǁ
Padapatha Transcription Nonaccented
ime ǀ indrāya ǀ sunvire ǀ somāsaḥ ǀ dadhi-āśiraḥ ǀ
tān ǀ ā ǀ madāya ǀ vajra-hasta ǀ pītaye ǀ hari-bhyām ǀ yāhi ǀ okaḥ ǀ ā ǁ
07.032.05 (Mandala. Sukta. Rik)
5.3.17.05 (Ashtaka. Adhyaya. Varga. Rik)
07.02.125 (Mandala. Anuvāka. Rik)
Samhita Devanagari Accented
श्रव॒च्छ्रुत्क॑र्ण ईयते॒ वसू॑नां॒ नू चि॑न्नो मर्धिष॒द्गिरः॑ ।
स॒द्यश्चि॒द्यः स॒हस्रा॑णि श॒ता दद॒न्नकि॒र्दित्सं॑त॒मा मि॑नत् ॥
Samhita Devanagari Nonaccented
श्रवच्छ्रुत्कर्ण ईयते वसूनां नू चिन्नो मर्धिषद्गिरः ।
सद्यश्चिद्यः सहस्राणि शता ददन्नकिर्दित्संतमा मिनत् ॥
Samhita Transcription Accented
śrávacchrútkarṇa īyate vásūnām nū́ cinno mardhiṣadgíraḥ ǀ
sadyáścidyáḥ sahásrāṇi śatā́ dádannákirdítsantamā́ minat ǁ
Samhita Transcription Nonaccented
śravacchrutkarṇa īyate vasūnām nū cinno mardhiṣadgiraḥ ǀ
sadyaścidyaḥ sahasrāṇi śatā dadannakirditsantamā minat ǁ
Padapatha Devanagari Accented
श्रव॑त् । श्रुत्ऽक॑र्णः । ई॒य॒ते॒ । वसू॑नाम् । नु । चि॒त् । नः॒ । म॒र्धि॒ष॒त् । गिरः॑ ।
स॒द्यः । चि॒त् । यः । स॒हस्रा॑णि । स॒ता । दद॑त् । नकिः॑ । दित्स॑न्तम् । आ । मि॒न॒त् ॥
Padapatha Devanagari Nonaccented
श्रवत् । श्रुत्ऽकर्णः । ईयते । वसूनाम् । नु । चित् । नः । मर्धिषत् । गिरः ।
सद्यः । चित् । यः । सहस्राणि । सता । ददत् । नकिः । दित्सन्तम् । आ । मिनत् ॥
Padapatha Transcription Accented
śrávat ǀ śrút-karṇaḥ ǀ īyate ǀ vásūnām ǀ nú ǀ cit ǀ naḥ ǀ mardhiṣat ǀ gíraḥ ǀ
sadyáḥ ǀ cit ǀ yáḥ ǀ sahásrāṇi ǀ satā́ ǀ dádat ǀ nákiḥ ǀ dítsantam ǀ ā́ ǀ minat ǁ
Padapatha Transcription Nonaccented
śravat ǀ śrut-karṇaḥ ǀ īyate ǀ vasūnām ǀ nu ǀ cit ǀ naḥ ǀ mardhiṣat ǀ giraḥ ǀ
sadyaḥ ǀ cit ǀ yaḥ ǀ sahasrāṇi ǀ satā ǀ dadat ǀ nakiḥ ǀ ditsantam ǀ ā ǀ minat ǁ
07.032.06 (Mandala. Sukta. Rik)
5.3.18.01 (Ashtaka. Adhyaya. Varga. Rik)
07.02.126 (Mandala. Anuvāka. Rik)
Samhita Devanagari Accented
स वी॒रो अप्र॑तिष्कुत॒ इंद्रे॑ण शूशुवे॒ नृभिः॑ ।
यस्ते॑ गभी॒रा सव॑नानि वृत्रहन्त्सु॒नोत्या च॒ धाव॑ति ॥
Samhita Devanagari Nonaccented
स वीरो अप्रतिष्कुत इंद्रेण शूशुवे नृभिः ।
यस्ते गभीरा सवनानि वृत्रहन्त्सुनोत्या च धावति ॥
Samhita Transcription Accented
sá vīró ápratiṣkuta índreṇa śūśuve nṛ́bhiḥ ǀ
yáste gabhīrā́ sávanāni vṛtrahantsunótyā́ ca dhā́vati ǁ
Samhita Transcription Nonaccented
sa vīro apratiṣkuta indreṇa śūśuve nṛbhiḥ ǀ
yaste gabhīrā savanāni vṛtrahantsunotyā ca dhāvati ǁ
Padapatha Devanagari Accented
सः । वी॒रः । अप्र॑तिऽस्कुतः । इन्द्रे॑ण । शू॒शु॒वे॒ । नृऽभिः॑ ।
यः । ते॒ । ग॒भी॒रा । सव॑नानि । वृ॒त्र॒ऽह॒न् । सु॒नोति॑ । आ । च॒ । धाव॑ति ॥
Padapatha Devanagari Nonaccented
सः । वीरः । अप्रतिऽस्कुतः । इन्द्रेण । शूशुवे । नृऽभिः ।
यः । ते । गभीरा । सवनानि । वृत्रऽहन् । सुनोति । आ । च । धावति ॥
Padapatha Transcription Accented
sáḥ ǀ vīráḥ ǀ áprati-skutaḥ ǀ índreṇa ǀ śūśuve ǀ nṛ́-bhiḥ ǀ
yáḥ ǀ te ǀ gabhīrā́ ǀ sávanāni ǀ vṛtra-han ǀ sunóti ǀ ā́ ǀ ca ǀ dhā́vati ǁ
Padapatha Transcription Nonaccented
saḥ ǀ vīraḥ ǀ aprati-skutaḥ ǀ indreṇa ǀ śūśuve ǀ nṛ-bhiḥ ǀ
yaḥ ǀ te ǀ gabhīrā ǀ savanāni ǀ vṛtra-han ǀ sunoti ǀ ā ǀ ca ǀ dhāvati ǁ
07.032.07 (Mandala. Sukta. Rik)
5.3.18.02 (Ashtaka. Adhyaya. Varga. Rik)
07.02.127 (Mandala. Anuvāka. Rik)
Samhita Devanagari Accented
भवा॒ वरू॑थं मघवन्म॒घोनां॒ यत्स॒मजा॑सि॒ शर्ध॑तः ।
वि त्वाह॑तस्य॒ वेद॑नं भजेम॒ह्या दू॒णाशो॑ भरा॒ गयं॑ ॥
Samhita Devanagari Nonaccented
भवा वरूथं मघवन्मघोनां यत्समजासि शर्धतः ।
वि त्वाहतस्य वेदनं भजेमह्या दूणाशो भरा गयं ॥
Samhita Transcription Accented
bhávā várūtham maghavanmaghónām yátsamájāsi śárdhataḥ ǀ
ví tvā́hatasya védanam bhajemahyā́ dūṇā́śo bharā gáyam ǁ
Samhita Transcription Nonaccented
bhavā varūtham maghavanmaghonām yatsamajāsi śardhataḥ ǀ
vi tvāhatasya vedanam bhajemahyā dūṇāśo bharā gayam ǁ
Padapatha Devanagari Accented
भव॑ । वरू॑थम् । म॒घ॒ऽव॒न् । म॒घोना॑म् । यत् । स॒म्ऽअजा॑सि । शर्ध॑तः ।
वि । त्वाऽह॑तस्य । वेद॑नम् । भ॒जे॒म॒हि॒ । आ । दुः॒ऽनशः॑ । भ॒र॒ । गय॑म् ॥
Padapatha Devanagari Nonaccented
भव । वरूथम् । मघऽवन् । मघोनाम् । यत् । सम्ऽअजासि । शर्धतः ।
वि । त्वाऽहतस्य । वेदनम् । भजेमहि । आ । दुःऽनशः । भर । गयम् ॥
Padapatha Transcription Accented
bháva ǀ várūtham ǀ magha-van ǀ maghónām ǀ yát ǀ sam-ájāsi ǀ śárdhataḥ ǀ
ví ǀ tvā́-hatasya ǀ védanam ǀ bhajemahi ǀ ā́ ǀ duḥ-náśaḥ ǀ bhara ǀ gáyam ǁ
Padapatha Transcription Nonaccented
bhava ǀ varūtham ǀ magha-van ǀ maghonām ǀ yat ǀ sam-ajāsi ǀ śardhataḥ ǀ
vi ǀ tvā-hatasya ǀ vedanam ǀ bhajemahi ǀ ā ǀ duḥ-naśaḥ ǀ bhara ǀ gayam ǁ
07.032.08 (Mandala. Sukta. Rik)
5.3.18.03 (Ashtaka. Adhyaya. Varga. Rik)
07.02.128 (Mandala. Anuvāka. Rik)
Samhita Devanagari Accented
सु॒नोता॑ सोम॒पाव्ने॒ सोम॒मिंद्रा॑य व॒ज्रिणे॑ ।
पच॑ता प॒क्तीरव॑से कृणु॒ध्वमित्पृ॒णन्नित्पृ॑ण॒ते मयः॑ ॥
Samhita Devanagari Nonaccented
सुनोता सोमपाव्ने सोममिंद्राय वज्रिणे ।
पचता पक्तीरवसे कृणुध्वमित्पृणन्नित्पृणते मयः ॥
Samhita Transcription Accented
sunótā somapā́vne sómamíndrāya vajríṇe ǀ
pácatā paktī́rávase kṛṇudhvámítpṛṇánnítpṛṇaté máyaḥ ǁ
Samhita Transcription Nonaccented
sunotā somapāvne somamindrāya vajriṇe ǀ
pacatā paktīravase kṛṇudhvamitpṛṇannitpṛṇate mayaḥ ǁ
Padapatha Devanagari Accented
सु॒नोत॑ । सो॒म॒ऽपाव्ने॑ । सोम॑म् । इन्द्रा॑य । व॒ज्रिणे॑ ।
पच॑त । प॒क्तीः । अव॑से । कृ॒णु॒ध्वम् । इत् । पृ॒णन् । इत् । पृ॒ण॒ते । मयः॑ ॥
Padapatha Devanagari Nonaccented
सुनोत । सोमऽपाव्ने । सोमम् । इन्द्राय । वज्रिणे ।
पचत । पक्तीः । अवसे । कृणुध्वम् । इत् । पृणन् । इत् । पृणते । मयः ॥
Padapatha Transcription Accented
sunóta ǀ soma-pā́vne ǀ sómam ǀ índrāya ǀ vajríṇe ǀ
pácata ǀ paktī́ḥ ǀ ávase ǀ kṛṇudhvám ǀ ít ǀ pṛṇán ǀ ít ǀ pṛṇaté ǀ máyaḥ ǁ
Padapatha Transcription Nonaccented
sunota ǀ soma-pāvne ǀ somam ǀ indrāya ǀ vajriṇe ǀ
pacata ǀ paktīḥ ǀ avase ǀ kṛṇudhvam ǀ it ǀ pṛṇan ǀ it ǀ pṛṇate ǀ mayaḥ ǁ
07.032.09 (Mandala. Sukta. Rik)
5.3.18.04 (Ashtaka. Adhyaya. Varga. Rik)
07.02.129 (Mandala. Anuvāka. Rik)
Samhita Devanagari Accented
मा स्रे॑धत सोमिनो॒ दक्ष॑ता म॒हे कृ॑णु॒ध्वं रा॒य आ॒तुजे॑ ।
त॒रणि॒रिज्ज॑यति॒ क्षेति॒ पुष्य॑ति॒ न दे॒वासः॑ कव॒त्नवे॑ ॥
Samhita Devanagari Nonaccented
मा स्रेधत सोमिनो दक्षता महे कृणुध्वं राय आतुजे ।
तरणिरिज्जयति क्षेति पुष्यति न देवासः कवत्नवे ॥
Samhita Transcription Accented
mā́ sredhata somino dákṣatā mahé kṛṇudhvám rāyá ātúje ǀ
taráṇiríjjayati kṣéti púṣyati ná devā́saḥ kavatnáve ǁ
Samhita Transcription Nonaccented
mā sredhata somino dakṣatā mahe kṛṇudhvam rāya ātuje ǀ
taraṇirijjayati kṣeti puṣyati na devāsaḥ kavatnave ǁ
Padapatha Devanagari Accented
मा । स्रे॒ध॒त॒ । सो॒मि॒नः॒ । दक्ष॑त । म॒हे । कृ॒णु॒ध्वम् । रा॒ये । आ॒ऽतुजे॑ ।
त॒रणिः॑ । इत् । ज॒य॒ति॒ । क्षेति॑ । पुष्य॑ति । न । दे॒वासः॑ । क॒व॒त्नवे॑ ॥
Padapatha Devanagari Nonaccented
मा । स्रेधत । सोमिनः । दक्षत । महे । कृणुध्वम् । राये । आऽतुजे ।
तरणिः । इत् । जयति । क्षेति । पुष्यति । न । देवासः । कवत्नवे ॥
Padapatha Transcription Accented
mā́ ǀ sredhata ǀ sominaḥ ǀ dákṣata ǀ mahé ǀ kṛṇudhvám ǀ rāyé ǀ ā-túje ǀ
taráṇiḥ ǀ ít ǀ jayati ǀ kṣéti ǀ púṣyati ǀ ná ǀ devā́saḥ ǀ kavatnáve ǁ
Padapatha Transcription Nonaccented
mā ǀ sredhata ǀ sominaḥ ǀ dakṣata ǀ mahe ǀ kṛṇudhvam ǀ rāye ǀ ā-tuje ǀ
taraṇiḥ ǀ it ǀ jayati ǀ kṣeti ǀ puṣyati ǀ na ǀ devāsaḥ ǀ kavatnave ǁ
07.032.10 (Mandala. Sukta. Rik)
5.3.18.05 (Ashtaka. Adhyaya. Varga. Rik)
07.02.130 (Mandala. Anuvāka. Rik)
Samhita Devanagari Accented
नकिः॑ सु॒दासो॒ रथं॒ पर्या॑स॒ न री॑रमत् ।
इंद्रो॒ यस्या॑वि॒ता यस्य॑ म॒रुतो॒ गम॒त्स गोम॑ति व्र॒जे ॥
Samhita Devanagari Nonaccented
नकिः सुदासो रथं पर्यास न रीरमत् ।
इंद्रो यस्याविता यस्य मरुतो गमत्स गोमति व्रजे ॥
Samhita Transcription Accented
nákiḥ sudā́so rátham páryāsa ná rīramat ǀ
índro yásyāvitā́ yásya marúto gámatsá gómati vrajé ǁ
Samhita Transcription Nonaccented
nakiḥ sudāso ratham paryāsa na rīramat ǀ
indro yasyāvitā yasya maruto gamatsa gomati vraje ǁ
Padapatha Devanagari Accented
नकिः॑ । सु॒ऽदासः॑ । रथ॑म् । परि॑ । आ॒स॒ । न । री॒र॒म॒त् ।
इन्द्रः॑ । यस्य॑ । अ॒वि॒ता । यस्य॑ । म॒रुतः॑ । गम॑त् । सः । गोऽम॑ति । व्र॒जे ॥
Padapatha Devanagari Nonaccented
नकिः । सुऽदासः । रथम् । परि । आस । न । रीरमत् ।
इन्द्रः । यस्य । अविता । यस्य । मरुतः । गमत् । सः । गोऽमति । व्रजे ॥
Padapatha Transcription Accented
nákiḥ ǀ su-dā́saḥ ǀ rátham ǀ pári ǀ āsa ǀ ná ǀ rīramat ǀ
índraḥ ǀ yásya ǀ avitā́ ǀ yásya ǀ marútaḥ ǀ gámat ǀ sáḥ ǀ gó-mati ǀ vrajé ǁ
Padapatha Transcription Nonaccented
nakiḥ ǀ su-dāsaḥ ǀ ratham ǀ pari ǀ āsa ǀ na ǀ rīramat ǀ
indraḥ ǀ yasya ǀ avitā ǀ yasya ǀ marutaḥ ǀ gamat ǀ saḥ ǀ go-mati ǀ vraje ǁ
07.032.11 (Mandala. Sukta. Rik)
5.3.19.01 (Ashtaka. Adhyaya. Varga. Rik)
07.02.131 (Mandala. Anuvāka. Rik)
Samhita Devanagari Accented
गम॒द्वाजं॑ वा॒जय॑न्निंद्र॒ मर्त्यो॒ यस्य॒ त्वम॑वि॒ता भुवः॑ ।
अ॒स्माकं॑ बोध्यवि॒ता रथा॑नाम॒स्माकं॑ शूर नृ॒णां ॥
Samhita Devanagari Nonaccented
गमद्वाजं वाजयन्निंद्र मर्त्यो यस्य त्वमविता भुवः ।
अस्माकं बोध्यविता रथानामस्माकं शूर नृणां ॥
Samhita Transcription Accented
gámadvā́jam vājáyannindra mártyo yásya tvámavitā́ bhúvaḥ ǀ
asmā́kam bodhyavitā́ ráthānāmasmā́kam śūra nṛṇā́m ǁ
Samhita Transcription Nonaccented
gamadvājam vājayannindra martyo yasya tvamavitā bhuvaḥ ǀ
asmākam bodhyavitā rathānāmasmākam śūra nṛṇām ǁ
Padapatha Devanagari Accented
गम॑त् । वाज॑म् । वा॒जय॑न् । इ॒न्द्र॒ । मर्त्यः॑ । यस्य॑ । त्वम् । अ॒वि॒ता । भुवः॑ ।
अ॒स्माक॑म् । बो॒धि॒ । अ॒वि॒ता । रथा॑नाम् । अ॒स्माक॑म् । शू॒र॒ । नृ॒णाम् ॥
Padapatha Devanagari Nonaccented
गमत् । वाजम् । वाजयन् । इन्द्र । मर्त्यः । यस्य । त्वम् । अविता । भुवः ।
अस्माकम् । बोधि । अविता । रथानाम् । अस्माकम् । शूर । नृणाम् ॥
Padapatha Transcription Accented
gámat ǀ vā́jam ǀ vājáyan ǀ indra ǀ mártyaḥ ǀ yásya ǀ tvám ǀ avitā́ ǀ bhúvaḥ ǀ
asmā́kam ǀ bodhi ǀ avitā́ ǀ ráthānām ǀ asmā́kam ǀ śūra ǀ nṛṇā́m ǁ
Padapatha Transcription Nonaccented
gamat ǀ vājam ǀ vājayan ǀ indra ǀ martyaḥ ǀ yasya ǀ tvam ǀ avitā ǀ bhuvaḥ ǀ
asmākam ǀ bodhi ǀ avitā ǀ rathānām ǀ asmākam ǀ śūra ǀ nṛṇām ǁ
07.032.12 (Mandala. Sukta. Rik)
5.3.19.02 (Ashtaka. Adhyaya. Varga. Rik)
07.02.132 (Mandala. Anuvāka. Rik)
Samhita Devanagari Accented
उदिन्न्व॑स्य रिच्य॒तेऽंशो॒ धनं॒ न जि॒ग्युषः॑ ।
य इंद्रो॒ हरि॑वा॒न्न द॑भंति॒ तं रिपो॒ दक्षं॑ दधाति सो॒मिनि॑ ॥
Samhita Devanagari Nonaccented
उदिन्न्वस्य रिच्यतेऽंशो धनं न जिग्युषः ।
य इंद्रो हरिवान्न दभंति तं रिपो दक्षं दधाति सोमिनि ॥
Samhita Transcription Accented
údínnvásya ricyaté’ṃśo dhánam ná jigyúṣaḥ ǀ
yá índro hárivānná dabhanti tám rípo dákṣam dadhāti somíni ǁ
Samhita Transcription Nonaccented
udinnvasya ricyate’ṃśo dhanam na jigyuṣaḥ ǀ
ya indro harivānna dabhanti tam ripo dakṣam dadhāti somini ǁ
Padapatha Devanagari Accented
उत् । इत् । नु । अ॒स्य॒ । रि॒च्य॒ते॒ । अंशः॑ । धन॑म् । न । जि॒ग्युषः॑ ।
यः । इन्द्रः॑ । हरि॑ऽवान् । न । द॒भ॒न्ति॒ । तम् । रिपः॑ । दक्ष॑म् । द॒धा॒ति॒ । सो॒मिनि॑ ॥
Padapatha Devanagari Nonaccented
उत् । इत् । नु । अस्य । रिच्यते । अंशः । धनम् । न । जिग्युषः ।
यः । इन्द्रः । हरिऽवान् । न । दभन्ति । तम् । रिपः । दक्षम् । दधाति । सोमिनि ॥
Padapatha Transcription Accented
út ǀ ít ǀ nú ǀ asya ǀ ricyate ǀ áṃśaḥ ǀ dhánam ǀ ná ǀ jigyúṣaḥ ǀ
yáḥ ǀ índraḥ ǀ hári-vān ǀ ná ǀ dabhanti ǀ tám ǀ rípaḥ ǀ dákṣam ǀ dadhāti ǀ somíni ǁ
Padapatha Transcription Nonaccented
ut ǀ it ǀ nu ǀ asya ǀ ricyate ǀ aṃśaḥ ǀ dhanam ǀ na ǀ jigyuṣaḥ ǀ
yaḥ ǀ indraḥ ǀ hari-vān ǀ na ǀ dabhanti ǀ tam ǀ ripaḥ ǀ dakṣam ǀ dadhāti ǀ somini ǁ
07.032.13 (Mandala. Sukta. Rik)
5.3.19.03 (Ashtaka. Adhyaya. Varga. Rik)
07.02.133 (Mandala. Anuvāka. Rik)
Samhita Devanagari Accented
मंत्र॒मख॑र्वं॒ सुधि॑तं सु॒पेश॑सं॒ दधा॑त य॒ज्ञिये॒ष्वा ।
पू॒र्वीश्च॒न प्रसि॑तयस्तरंति॒ तं य इंद्रे॒ कर्म॑णा॒ भुव॑त् ॥
Samhita Devanagari Nonaccented
मंत्रमखर्वं सुधितं सुपेशसं दधात यज्ञियेष्वा ।
पूर्वीश्चन प्रसितयस्तरंति तं य इंद्रे कर्मणा भुवत् ॥
Samhita Transcription Accented
mántramákharvam súdhitam supéśasam dádhāta yajñíyeṣvā́ ǀ
pūrvī́ścaná prásitayastaranti tám yá índre kármaṇā bhúvat ǁ
Samhita Transcription Nonaccented
mantramakharvam sudhitam supeśasam dadhāta yajñiyeṣvā ǀ
pūrvīścana prasitayastaranti tam ya indre karmaṇā bhuvat ǁ
Padapatha Devanagari Accented
मन्त्र॑म् । अख॑र्वम् । सुऽधि॑तम् । सु॒ऽपेश॑सम् । दधा॑त । य॒ज्ञिये॑षु । आ ।
पू॒र्वीः । च॒न । प्रऽसि॑तयः । त॒र॒न्ति॒ । तम् । यः । इन्द्रे॑ । कर्म॑णा । भुव॑त् ॥
Padapatha Devanagari Nonaccented
मन्त्रम् । अखर्वम् । सुऽधितम् । सुऽपेशसम् । दधात । यज्ञियेषु । आ ।
पूर्वीः । चन । प्रऽसितयः । तरन्ति । तम् । यः । इन्द्रे । कर्मणा । भुवत् ॥
Padapatha Transcription Accented
mántram ǀ ákharvam ǀ sú-dhitam ǀ su-péśasam ǀ dádhāta ǀ yajñíyeṣu ǀ ā́ ǀ
pūrvī́ḥ ǀ caná ǀ prá-sitayaḥ ǀ taranti ǀ tám ǀ yáḥ ǀ índre ǀ kármaṇā ǀ bhúvat ǁ
Padapatha Transcription Nonaccented
mantram ǀ akharvam ǀ su-dhitam ǀ su-peśasam ǀ dadhāta ǀ yajñiyeṣu ǀ ā ǀ
pūrvīḥ ǀ cana ǀ pra-sitayaḥ ǀ taranti ǀ tam ǀ yaḥ ǀ indre ǀ karmaṇā ǀ bhuvat ǁ
07.032.14 (Mandala. Sukta. Rik)
5.3.19.04 (Ashtaka. Adhyaya. Varga. Rik)
07.02.134 (Mandala. Anuvāka. Rik)
Samhita Devanagari Accented
कस्तमिं॑द्र॒ त्वाव॑सु॒मा मर्त्यो॑ दधर्षति ।
श्र॒द्धा इत्ते॑ मघव॒न्पार्ये॑ दि॒वि वा॒जी वाजं॑ सिषासति ॥
Samhita Devanagari Nonaccented
कस्तमिंद्र त्वावसुमा मर्त्यो दधर्षति ।
श्रद्धा इत्ते मघवन्पार्ये दिवि वाजी वाजं सिषासति ॥
Samhita Transcription Accented
kástámindra tvā́vasumā́ mártyo dadharṣati ǀ
śraddhā́ ítte maghavanpā́rye diví vājī́ vā́jam siṣāsati ǁ
Samhita Transcription Nonaccented
kastamindra tvāvasumā martyo dadharṣati ǀ
śraddhā itte maghavanpārye divi vājī vājam siṣāsati ǁ
Padapatha Devanagari Accented
कः । तम् । इ॒न्द्र॒ । त्वाऽव॑सुम् । आ । मर्त्यः॑ । द॒ध॒र्ष॒ति॒ ।
श्र॒द्धा । इत् । ते॒ । म॒घ॒ऽव॒न् । पार्ये॑ । दि॒वि । वा॒जी । वाज॑म् । सि॒सा॒स॒ति॒ ॥
Padapatha Devanagari Nonaccented
कः । तम् । इन्द्र । त्वाऽवसुम् । आ । मर्त्यः । दधर्षति ।
श्रद्धा । इत् । ते । मघऽवन् । पार्ये । दिवि । वाजी । वाजम् । सिसासति ॥
Padapatha Transcription Accented
káḥ ǀ tám ǀ indra ǀ tvā́-vasum ǀ ā́ ǀ mártyaḥ ǀ dadharṣati ǀ
śraddhā́ ǀ ít ǀ te ǀ magha-van ǀ pā́rye ǀ diví ǀ vājī́ ǀ vā́jam ǀ sisāsati ǁ
Padapatha Transcription Nonaccented
kaḥ ǀ tam ǀ indra ǀ tvā-vasum ǀ ā ǀ martyaḥ ǀ dadharṣati ǀ
śraddhā ǀ it ǀ te ǀ magha-van ǀ pārye ǀ divi ǀ vājī ǀ vājam ǀ sisāsati ǁ
07.032.15 (Mandala. Sukta. Rik)
5.3.19.05 (Ashtaka. Adhyaya. Varga. Rik)
07.02.135 (Mandala. Anuvāka. Rik)
Samhita Devanagari Accented
म॒घोनः॑ स्म वृत्र॒हत्ये॑षु चोदय॒ ये दद॑ति प्रि॒या वसु॑ ।
तव॒ प्रणी॑ती हर्यश्व सू॒रिभि॒र्विश्वा॑ तरेम दुरि॒ता ॥
Samhita Devanagari Nonaccented
मघोनः स्म वृत्रहत्येषु चोदय ये ददति प्रिया वसु ।
तव प्रणीती हर्यश्व सूरिभिर्विश्वा तरेम दुरिता ॥
Samhita Transcription Accented
maghónaḥ sma vṛtrahátyeṣu codaya yé dádati priyā́ vásu ǀ
táva práṇītī haryaśva sūríbhirvíśvā tarema duritā́ ǁ
Samhita Transcription Nonaccented
maghonaḥ sma vṛtrahatyeṣu codaya ye dadati priyā vasu ǀ
tava praṇītī haryaśva sūribhirviśvā tarema duritā ǁ
Padapatha Devanagari Accented
म॒घोनः॑ । स्म॒ । वृ॒त्र॒ऽहत्ये॑षु । चो॒द॒य॒ । ये । दद॑ति । प्रि॒या । वसु॑ ।
तव॑ । प्रऽनी॑ती । ह॒रि॒ऽअ॒श्व॒ । सू॒रिऽभिः॑ । विश्वा॑ । त॒रे॒म॒ । दुः॒ऽइ॒ता ॥
Padapatha Devanagari Nonaccented
मघोनः । स्म । वृत्रऽहत्येषु । चोदय । ये । ददति । प्रिया । वसु ।
तव । प्रऽनीती । हरिऽअश्व । सूरिऽभिः । विश्वा । तरेम । दुःऽइता ॥
Padapatha Transcription Accented
maghónaḥ ǀ sma ǀ vṛtra-hátyeṣu ǀ codaya ǀ yé ǀ dádati ǀ priyā́ ǀ vásu ǀ
táva ǀ prá-nītī ǀ hari-aśva ǀ sūrí-bhiḥ ǀ víśvā ǀ tarema ǀ duḥ-itā́ ǁ
Padapatha Transcription Nonaccented
maghonaḥ ǀ sma ǀ vṛtra-hatyeṣu ǀ codaya ǀ ye ǀ dadati ǀ priyā ǀ vasu ǀ
tava ǀ pra-nītī ǀ hari-aśva ǀ sūri-bhiḥ ǀ viśvā ǀ tarema ǀ duḥ-itā ǁ
07.032.16 (Mandala. Sukta. Rik)
5.3.20.01 (Ashtaka. Adhyaya. Varga. Rik)
07.02.136 (Mandala. Anuvāka. Rik)
Samhita Devanagari Accented
तवेदिं॑द्राव॒मं वसु॒ त्वं पु॑ष्यसि मध्य॒मं ।
स॒त्रा विश्व॑स्य पर॒मस्य॑ राजसि॒ नकि॑ष्ट्वा॒ गोषु॑ वृण्वते ॥
Samhita Devanagari Nonaccented
तवेदिंद्रावमं वसु त्वं पुष्यसि मध्यमं ।
सत्रा विश्वस्य परमस्य राजसि नकिष्ट्वा गोषु वृण्वते ॥
Samhita Transcription Accented
távédindrāvamám vásu tvám puṣyasi madhyamám ǀ
satrā́ víśvasya paramásya rājasi nákiṣṭvā góṣu vṛṇvate ǁ
Samhita Transcription Nonaccented
tavedindrāvamam vasu tvam puṣyasi madhyamam ǀ
satrā viśvasya paramasya rājasi nakiṣṭvā goṣu vṛṇvate ǁ
Padapatha Devanagari Accented
तव॑ । इत् । इ॒न्द्र॒ । अ॒व॒मम् । वसु॑ । त्वम् । पु॒ष्य॒सि॒ । म॒ध्य॒मम् ।
स॒त्रा । विश्व॑स्य । प॒र॒मस्य॑ । रा॒ज॒सि॒ । नकिः॑ । त्वा॒ । गोषु॑ । वृ॒ण्व॒ते॒ ॥
Padapatha Devanagari Nonaccented
तव । इत् । इन्द्र । अवमम् । वसु । त्वम् । पुष्यसि । मध्यमम् ।
सत्रा । विश्वस्य । परमस्य । राजसि । नकिः । त्वा । गोषु । वृण्वते ॥
Padapatha Transcription Accented
táva ǀ ít ǀ indra ǀ avamám ǀ vásu ǀ tvám ǀ puṣyasi ǀ madhyamám ǀ
satrā́ ǀ víśvasya ǀ paramásya ǀ rājasi ǀ nákiḥ ǀ tvā ǀ góṣu ǀ vṛṇvate ǁ
Padapatha Transcription Nonaccented
tava ǀ it ǀ indra ǀ avamam ǀ vasu ǀ tvam ǀ puṣyasi ǀ madhyamam ǀ
satrā ǀ viśvasya ǀ paramasya ǀ rājasi ǀ nakiḥ ǀ tvā ǀ goṣu ǀ vṛṇvate ǁ
07.032.17 (Mandala. Sukta. Rik)
5.3.20.02 (Ashtaka. Adhyaya. Varga. Rik)
07.02.137 (Mandala. Anuvāka. Rik)
Samhita Devanagari Accented
त्वं विश्व॑स्य धन॒दा अ॑सि श्रु॒तो य ईं॒ भवं॑त्या॒जयः॑ ।
तवा॒यं विश्वः॑ पुरुहूत॒ पार्थि॑वोऽव॒स्युर्नाम॑ भिक्षते ॥
Samhita Devanagari Nonaccented
त्वं विश्वस्य धनदा असि श्रुतो य ईं भवंत्याजयः ।
तवायं विश्वः पुरुहूत पार्थिवोऽवस्युर्नाम भिक्षते ॥
Samhita Transcription Accented
tvám víśvasya dhanadā́ asi śrutó yá īm bhávantyājáyaḥ ǀ
távāyám víśvaḥ puruhūta pā́rthivo’vasyúrnā́ma bhikṣate ǁ
Samhita Transcription Nonaccented
tvam viśvasya dhanadā asi śruto ya īm bhavantyājayaḥ ǀ
tavāyam viśvaḥ puruhūta pārthivo’vasyurnāma bhikṣate ǁ
Padapatha Devanagari Accented
त्वम् । विश्व॑स्य । ध॒न॒ऽदाः । अ॒सि॒ । श्रु॒तः । ये । ई॒म् । भव॑न्ति । आ॒जयः॑ ।
तव॑ । अ॒यम् । विश्वः॑ । पु॒रु॒ऽहू॒त॒ । पार्थि॑वः । अ॒व॒स्युः । नाम॑ । भि॒क्ष॒ते॒ ॥
Padapatha Devanagari Nonaccented
त्वम् । विश्वस्य । धनऽदाः । असि । श्रुतः । ये । ईम् । भवन्ति । आजयः ।
तव । अयम् । विश्वः । पुरुऽहूत । पार्थिवः । अवस्युः । नाम । भिक्षते ॥
Padapatha Transcription Accented
tvám ǀ víśvasya ǀ dhana-dā́ḥ ǀ asi ǀ śrutáḥ ǀ yé ǀ īm ǀ bhávanti ǀ ājáyaḥ ǀ
táva ǀ ayám ǀ víśvaḥ ǀ puru-hūta ǀ pā́rthivaḥ ǀ avasyúḥ ǀ nā́ma ǀ bhikṣate ǁ
Padapatha Transcription Nonaccented
tvam ǀ viśvasya ǀ dhana-dāḥ ǀ asi ǀ śrutaḥ ǀ ye ǀ īm ǀ bhavanti ǀ ājayaḥ ǀ
tava ǀ ayam ǀ viśvaḥ ǀ puru-hūta ǀ pārthivaḥ ǀ avasyuḥ ǀ nāma ǀ bhikṣate ǁ
07.032.18 (Mandala. Sukta. Rik)
5.3.20.03 (Ashtaka. Adhyaya. Varga. Rik)
07.02.138 (Mandala. Anuvāka. Rik)
Samhita Devanagari Accented
यदिं॑द्र॒ याव॑त॒स्त्वमे॒ताव॑द॒हमीशी॑य ।
स्तो॒तार॒मिद्दि॑धिषेय रदावसो॒ न पा॑प॒त्वाय॑ रासीय ॥
Samhita Devanagari Nonaccented
यदिंद्र यावतस्त्वमेतावदहमीशीय ।
स्तोतारमिद्दिधिषेय रदावसो न पापत्वाय रासीय ॥
Samhita Transcription Accented
yádindra yā́vatastvámetā́vadahámī́śīya ǀ
stotā́ramíddidhiṣeya radāvaso ná pāpatvā́ya rāsīya ǁ
Samhita Transcription Nonaccented
yadindra yāvatastvametāvadahamīśīya ǀ
stotāramiddidhiṣeya radāvaso na pāpatvāya rāsīya ǁ
Padapatha Devanagari Accented
यत् । इ॒न्द्र॒ । याव॑तः । त्वम् । ए॒ताव॑त् । अ॒हम् । ईशी॑य ।
स्तो॒तार॑म् । इत् । दि॒धि॒षे॒य॒ । र॒द॒व॒सो॒ इति॑ रदऽवसो । न । पा॒प॒ऽत्वाय॑ । रा॒सी॒य॒ ॥
Padapatha Devanagari Nonaccented
यत् । इन्द्र । यावतः । त्वम् । एतावत् । अहम् । ईशीय ।
स्तोतारम् । इत् । दिधिषेय । रदवसो इति रदऽवसो । न । पापऽत्वाय । रासीय ॥
Padapatha Transcription Accented
yát ǀ indra ǀ yā́vataḥ ǀ tvám ǀ etā́vat ǀ ahám ǀ ī́śīya ǀ
stotā́ram ǀ ít ǀ didhiṣeya ǀ radavaso íti rada-vaso ǀ ná ǀ pāpa-tvā́ya ǀ rāsīya ǁ
Padapatha Transcription Nonaccented
yat ǀ indra ǀ yāvataḥ ǀ tvam ǀ etāvat ǀ aham ǀ īśīya ǀ
stotāram ǀ it ǀ didhiṣeya ǀ radavaso iti rada-vaso ǀ na ǀ pāpa-tvāya ǀ rāsīya ǁ
07.032.19 (Mandala. Sukta. Rik)
5.3.20.04 (Ashtaka. Adhyaya. Varga. Rik)
07.02.139 (Mandala. Anuvāka. Rik)
Samhita Devanagari Accented
शिक्षे॑य॒मिन्म॑हय॒ते दि॒वेदि॑वे रा॒य आ कु॑हचि॒द्विदे॑ ।
न॒हि त्वद॒न्यन्म॑घवन्न॒ आप्यं॒ वस्यो॒ अस्ति॑ पि॒ता च॒न ॥
Samhita Devanagari Nonaccented
शिक्षेयमिन्महयते दिवेदिवे राय आ कुहचिद्विदे ।
नहि त्वदन्यन्मघवन्न आप्यं वस्यो अस्ति पिता चन ॥
Samhita Transcription Accented
śíkṣeyamínmahayaté divédive rāyá ā́ kuhacidvíde ǀ
nahí tvádanyánmaghavanna ā́pyam vásyo ásti pitā́ caná ǁ
Samhita Transcription Nonaccented
śikṣeyaminmahayate divedive rāya ā kuhacidvide ǀ
nahi tvadanyanmaghavanna āpyam vasyo asti pitā cana ǁ
Padapatha Devanagari Accented
शिक्षे॑यम् । इत् । म॒ह॒ऽय॒ते । दि॒वेऽदि॑वे । रा॒यः । आ । कु॒ह॒चि॒त्ऽविदे॑ ।
नहि । त्वत् । अ॒न्यत् । म॒घ॒ऽव॒न् । नः॒ । आप्य॑म् । वस्यः॑ । अस्ति॑ । पि॒ता । च॒न ॥
Padapatha Devanagari Nonaccented
शिक्षेयम् । इत् । महऽयते । दिवेऽदिवे । रायः । आ । कुहचित्ऽविदे ।
नहि । त्वत् । अन्यत् । मघऽवन् । नः । आप्यम् । वस्यः । अस्ति । पिता । चन ॥
Padapatha Transcription Accented
śíkṣeyam ǀ ít ǀ maha-yaté ǀ divé-dive ǀ rāyáḥ ǀ ā́ ǀ kuhacit-víde ǀ
náhí ǀ tvát ǀ anyát ǀ magha-van ǀ naḥ ǀ ā́pyam ǀ vásyaḥ ǀ ásti ǀ pitā́ ǀ caná ǁ
Padapatha Transcription Nonaccented
śikṣeyam ǀ it ǀ maha-yate ǀ dive-dive ǀ rāyaḥ ǀ ā ǀ kuhacit-vide ǀ
nahi ǀ tvat ǀ anyat ǀ magha-van ǀ naḥ ǀ āpyam ǀ vasyaḥ ǀ asti ǀ pitā ǀ cana ǁ
07.032.20 (Mandala. Sukta. Rik)
5.3.20.05 (Ashtaka. Adhyaya. Varga. Rik)
07.02.140 (Mandala. Anuvāka. Rik)
Samhita Devanagari Accented
त॒रणि॒रित्सि॑षासति॒ वाजं॒ पुरं॑ध्या यु॒जा ।
आ व॒ इंद्रं॑ पुरुहू॒तं न॑मे गि॒रा ने॒मिं तष्टे॑व सु॒द्र्वं॑ ॥
Samhita Devanagari Nonaccented
तरणिरित्सिषासति वाजं पुरंध्या युजा ।
आ व इंद्रं पुरुहूतं नमे गिरा नेमिं तष्टेव सुद्र्वं ॥
Samhita Transcription Accented
taráṇirítsiṣāsati vā́jam púraṃdhyā yujā́ ǀ
ā́ va índram puruhūtám name girā́ nemím táṣṭeva sudrvám ǁ
Samhita Transcription Nonaccented
taraṇiritsiṣāsati vājam puraṃdhyā yujā ǀ
ā va indram puruhūtam name girā nemim taṣṭeva sudrvam ǁ
Padapatha Devanagari Accented
त॒रणिः॑ । इत् । सि॒सा॒स॒ति॒ । वाज॑म् । पुर॑म्ऽध्या । यु॒जा ।
आ । वः॒ । इन्द्र॑म् । पु॒रु॒ऽहू॒तम् । न॒मे॒ । गि॒रा । ने॒मिम् । तष्टा॑ऽइव । सु॒ऽद्र्व॑म् ॥
Padapatha Devanagari Nonaccented
तरणिः । इत् । सिसासति । वाजम् । पुरम्ऽध्या । युजा ।
आ । वः । इन्द्रम् । पुरुऽहूतम् । नमे । गिरा । नेमिम् । तष्टाऽइव । सुऽद्र्वम् ॥
Padapatha Transcription Accented
taráṇiḥ ǀ ít ǀ sisāsati ǀ vā́jam ǀ púram-dhyā ǀ yujā́ ǀ
ā́ ǀ vaḥ ǀ índram ǀ puru-hūtám ǀ name ǀ girā́ ǀ nemím ǀ táṣṭā-iva ǀ su-drvám ǁ
Padapatha Transcription Nonaccented
taraṇiḥ ǀ it ǀ sisāsati ǀ vājam ǀ puram-dhyā ǀ yujā ǀ
ā ǀ vaḥ ǀ indram ǀ puru-hūtam ǀ name ǀ girā ǀ nemim ǀ taṣṭā-iva ǀ su-drvam ǁ
07.032.21 (Mandala. Sukta. Rik)
5.3.21.01 (Ashtaka. Adhyaya. Varga. Rik)
07.02.141 (Mandala. Anuvāka. Rik)
Samhita Devanagari Accented
न दु॑ष्टु॒ती मर्त्यो॑ विंदते॒ वसु॒ न स्रेधं॑तं र॒यिर्न॑शत् ।
सु॒शक्ति॒रिन्म॑घवं॒तुभ्यं॒ माव॑ते दे॒ष्णं यत्पार्ये॑ दि॒वि ॥
Samhita Devanagari Nonaccented
न दुष्टुती मर्त्यो विंदते वसु न स्रेधंतं रयिर्नशत् ।
सुशक्तिरिन्मघवंतुभ्यं मावते देष्णं यत्पार्ये दिवि ॥
Samhita Transcription Accented
ná duṣṭutī́ mártyo vindate vásu ná srédhantam rayírnaśat ǀ
suśáktirínmaghavantúbhyam mā́vate deṣṇám yátpā́rye diví ǁ
Samhita Transcription Nonaccented
na duṣṭutī martyo vindate vasu na sredhantam rayirnaśat ǀ
suśaktirinmaghavantubhyam māvate deṣṇam yatpārye divi ǁ
Padapatha Devanagari Accented
न । दुः॒ऽस्तु॒ती । मर्त्यः॑ । वि॒न्द॒ते॒ । वसु॑ । न । स्रेध॑न्तम् । र॒यिः । न॒श॒त् ।
सु॒ऽशक्तिः॑ । इत् । म॒घ॒ऽव॒न् । तुभ्य॑म् । माऽव॑ते । दे॒ष्णम् । यत् । पार्ये॑ । दि॒वि ॥
Padapatha Devanagari Nonaccented
न । दुःऽस्तुती । मर्त्यः । विन्दते । वसु । न । स्रेधन्तम् । रयिः । नशत् ।
सुऽशक्तिः । इत् । मघऽवन् । तुभ्यम् । माऽवते । देष्णम् । यत् । पार्ये । दिवि ॥
Padapatha Transcription Accented
ná ǀ duḥ-stutī́ ǀ mártyaḥ ǀ vindate ǀ vásu ǀ ná ǀ srédhantam ǀ rayíḥ ǀ naśat ǀ
su-śáktiḥ ǀ ít ǀ magha-van ǀ túbhyam ǀ mā́-vate ǀ deṣṇám ǀ yát ǀ pā́rye ǀ diví ǁ
Padapatha Transcription Nonaccented
na ǀ duḥ-stutī ǀ martyaḥ ǀ vindate ǀ vasu ǀ na ǀ sredhantam ǀ rayiḥ ǀ naśat ǀ
su-śaktiḥ ǀ it ǀ magha-van ǀ tubhyam ǀ mā-vate ǀ deṣṇam ǀ yat ǀ pārye ǀ divi ǁ
07.032.22 (Mandala. Sukta. Rik)
5.3.21.02 (Ashtaka. Adhyaya. Varga. Rik)
07.02.142 (Mandala. Anuvāka. Rik)
Samhita Devanagari Accented
अ॒भि त्वा॑ शूर नोनु॒मोऽदु॑ग्धा इव धे॒नवः॑ ।
ईशा॑नम॒स्य जग॑तः स्व॒र्दृश॒मीशा॑नमिंद्र त॒स्थुषः॑ ॥
Samhita Devanagari Nonaccented
अभि त्वा शूर नोनुमोऽदुग्धा इव धेनवः ।
ईशानमस्य जगतः स्वर्दृशमीशानमिंद्र तस्थुषः ॥
Samhita Transcription Accented
abhí tvā śūra nonumó’dugdhā iva dhenávaḥ ǀ
ī́śānamasyá jágataḥ svardṛ́śamī́śānamindra tasthúṣaḥ ǁ
Samhita Transcription Nonaccented
abhi tvā śūra nonumo’dugdhā iva dhenavaḥ ǀ
īśānamasya jagataḥ svardṛśamīśānamindra tasthuṣaḥ ǁ
Padapatha Devanagari Accented
अ॒भि । त्वा॒ । शू॒र॒ । नो॒नु॒मः॒ । अदु॑ग्धाःऽइव । धे॒नवः॑ ।
ईशा॑नम् । अ॒स्य । जग॑तः । स्वः॒ऽदृश॑म् । ईशा॑नम् । इ॒न्द्र॒ । त॒स्थुषः॑ ॥
Padapatha Devanagari Nonaccented
अभि । त्वा । शूर । नोनुमः । अदुग्धाःऽइव । धेनवः ।
ईशानम् । अस्य । जगतः । स्वःऽदृशम् । ईशानम् । इन्द्र । तस्थुषः ॥
Padapatha Transcription Accented
abhí ǀ tvā ǀ śūra ǀ nonumaḥ ǀ ádugdhāḥ-iva ǀ dhenávaḥ ǀ
ī́śānam ǀ asyá ǀ jágataḥ ǀ svaḥ-dṛ́śam ǀ ī́śānam ǀ indra ǀ tasthúṣaḥ ǁ
Padapatha Transcription Nonaccented
abhi ǀ tvā ǀ śūra ǀ nonumaḥ ǀ adugdhāḥ-iva ǀ dhenavaḥ ǀ
īśānam ǀ asya ǀ jagataḥ ǀ svaḥ-dṛśam ǀ īśānam ǀ indra ǀ tasthuṣaḥ ǁ
07.032.23 (Mandala. Sukta. Rik)
5.3.21.03 (Ashtaka. Adhyaya. Varga. Rik)
07.02.143 (Mandala. Anuvāka. Rik)
Samhita Devanagari Accented
न त्वावाँ॑ अ॒न्यो दि॒व्यो न पार्थि॑वो॒ न जा॒तो न ज॑निष्यते ।
अ॒श्वा॒यंतो॑ मघवन्निंद्र वा॒जिनो॑ ग॒व्यंत॑स्त्वा हवामहे ॥
Samhita Devanagari Nonaccented
न त्वावाँ अन्यो दिव्यो न पार्थिवो न जातो न जनिष्यते ।
अश्वायंतो मघवन्निंद्र वाजिनो गव्यंतस्त्वा हवामहे ॥
Samhita Transcription Accented
ná tvā́vām̐ anyó divyó ná pā́rthivo ná jātó ná janiṣyate ǀ
aśvāyánto maghavannindra vājíno gavyántastvā havāmahe ǁ
Samhita Transcription Nonaccented
na tvāvām̐ anyo divyo na pārthivo na jāto na janiṣyate ǀ
aśvāyanto maghavannindra vājino gavyantastvā havāmahe ǁ
Padapatha Devanagari Accented
न । त्वाऽवा॑न् । अ॒न्यः । दि॒व्यः । न । पार्थि॑वः । न । जा॒तः । न । ज॒नि॒ष्य॒ते॒ ।
अ॒श्व॒ऽयन्तः॑ । म॒घ॒ऽव॒न् । इ॒न्द्र॒ । वा॒जिनः॑ । ग॒व्यन्तः॑ । त्वा॒ । ह॒वा॒म॒हे॒ ॥
Padapatha Devanagari Nonaccented
न । त्वाऽवान् । अन्यः । दिव्यः । न । पार्थिवः । न । जातः । न । जनिष्यते ।
अश्वऽयन्तः । मघऽवन् । इन्द्र । वाजिनः । गव्यन्तः । त्वा । हवामहे ॥
Padapatha Transcription Accented
ná ǀ tvā́-vān ǀ anyáḥ ǀ divyáḥ ǀ ná ǀ pā́rthivaḥ ǀ ná ǀ jātáḥ ǀ ná ǀ janiṣyate ǀ
aśva-yántaḥ ǀ magha-van ǀ indra ǀ vājínaḥ ǀ gavyántaḥ ǀ tvā ǀ havāmahe ǁ
Padapatha Transcription Nonaccented
na ǀ tvā-vān ǀ anyaḥ ǀ divyaḥ ǀ na ǀ pārthivaḥ ǀ na ǀ jātaḥ ǀ na ǀ janiṣyate ǀ
aśva-yantaḥ ǀ magha-van ǀ indra ǀ vājinaḥ ǀ gavyantaḥ ǀ tvā ǀ havāmahe ǁ
07.032.24 (Mandala. Sukta. Rik)
5.3.21.04 (Ashtaka. Adhyaya. Varga. Rik)
07.02.144 (Mandala. Anuvāka. Rik)
Samhita Devanagari Accented
अ॒भी ष॒तस्तदा भ॒रेंद्र॒ ज्यायः॒ कनी॑यसः ।
पु॒रू॒वसु॒र्हि म॑घवन्त्स॒नादसि॒ भरे॑भरे च॒ हव्यः॑ ॥
Samhita Devanagari Nonaccented
अभी षतस्तदा भरेंद्र ज्यायः कनीयसः ।
पुरूवसुर्हि मघवन्त्सनादसि भरेभरे च हव्यः ॥
Samhita Transcription Accented
abhī́ ṣatástádā́ bharéndra jyā́yaḥ kánīyasaḥ ǀ
purūvásurhí maghavantsanā́dási bhárebhare ca hávyaḥ ǁ
Samhita Transcription Nonaccented
abhī ṣatastadā bharendra jyāyaḥ kanīyasaḥ ǀ
purūvasurhi maghavantsanādasi bharebhare ca havyaḥ ǁ
Padapatha Devanagari Accented
अ॒भि । स॒तः । तत् । आ । भ॒र॒ । इन्द्र॑ । ज्यायः॑ । कनी॑यसः ।
पु॒रु॒ऽवसुः॑ । हि । म॒घ॒ऽव॒न् । स॒नात् । असि॑ । भरे॑ऽभरे । च॒ । हव्यः॑ ॥
Padapatha Devanagari Nonaccented
अभि । सतः । तत् । आ । भर । इन्द्र । ज्यायः । कनीयसः ।
पुरुऽवसुः । हि । मघऽवन् । सनात् । असि । भरेऽभरे । च । हव्यः ॥
Padapatha Transcription Accented
abhí ǀ satáḥ ǀ tát ǀ ā́ ǀ bhara ǀ índra ǀ jyā́yaḥ ǀ kánīyasaḥ ǀ
puru-vásuḥ ǀ hí ǀ magha-van ǀ sanā́t ǀ ási ǀ bháre-bhare ǀ ca ǀ hávyaḥ ǁ
Padapatha Transcription Nonaccented
abhi ǀ sataḥ ǀ tat ǀ ā ǀ bhara ǀ indra ǀ jyāyaḥ ǀ kanīyasaḥ ǀ
puru-vasuḥ ǀ hi ǀ magha-van ǀ sanāt ǀ asi ǀ bhare-bhare ǀ ca ǀ havyaḥ ǁ
07.032.25 (Mandala. Sukta. Rik)
5.3.21.05 (Ashtaka. Adhyaya. Varga. Rik)
07.02.145 (Mandala. Anuvāka. Rik)
Samhita Devanagari Accented
परा॑ णुदस्व मघवन्न॒मित्रा॑न्त्सु॒वेदा॑ नो॒ वसू॑ कृधि ।
अ॒स्माकं॑ बोध्यवि॒ता म॑हाध॒ने भवा॑ वृ॒धः सखी॑नां ॥
Samhita Devanagari Nonaccented
परा णुदस्व मघवन्नमित्रान्त्सुवेदा नो वसू कृधि ।
अस्माकं बोध्यविता महाधने भवा वृधः सखीनां ॥
Samhita Transcription Accented
párā ṇudasva maghavannamítrāntsuvédā no vásū kṛdhi ǀ
asmā́kam bodhyavitā́ mahādhané bhávā vṛdháḥ sákhīnām ǁ
Samhita Transcription Nonaccented
parā ṇudasva maghavannamitrāntsuvedā no vasū kṛdhi ǀ
asmākam bodhyavitā mahādhane bhavā vṛdhaḥ sakhīnām ǁ
Padapatha Devanagari Accented
परा॑ । नु॒द॒स्व॒ । म॒घ॒ऽव॒न् । अ॒मित्रा॑न् । सु॒ऽवेदा॑ । नः॒ । वसु॑ । कृ॒धि॒ ।
अ॒स्माक॑म् । बो॒धि॒ । अ॒वि॒ता । म॒हा॒ऽध॒ने । भव॑ । वृ॒धः । सखी॑नाम् ॥
Padapatha Devanagari Nonaccented
परा । नुदस्व । मघऽवन् । अमित्रान् । सुऽवेदा । नः । वसु । कृधि ।
अस्माकम् । बोधि । अविता । महाऽधने । भव । वृधः । सखीनाम् ॥
Padapatha Transcription Accented
párā ǀ nudasva ǀ magha-van ǀ amítrān ǀ su-védā ǀ naḥ ǀ vásu ǀ kṛdhi ǀ
asmā́kam ǀ bodhi ǀ avitā́ ǀ mahā-dhané ǀ bháva ǀ vṛdháḥ ǀ sákhīnām ǁ
Padapatha Transcription Nonaccented
parā ǀ nudasva ǀ magha-van ǀ amitrān ǀ su-vedā ǀ naḥ ǀ vasu ǀ kṛdhi ǀ
asmākam ǀ bodhi ǀ avitā ǀ mahā-dhane ǀ bhava ǀ vṛdhaḥ ǀ sakhīnām ǁ
07.032.26 (Mandala. Sukta. Rik)
5.3.21.06 (Ashtaka. Adhyaya. Varga. Rik)
07.02.146 (Mandala. Anuvāka. Rik)
Samhita Devanagari Accented
इंद्र॒ क्रतुं॑ न॒ आ भ॑र पि॒ता पु॒त्रेभ्यो॒ यथा॑ ।
शिक्षा॑ णो अ॒स्मिन्पु॑रुहूत॒ याम॑नि जी॒वा ज्योति॑रशीमहि ॥
Samhita Devanagari Nonaccented
इंद्र क्रतुं न आ भर पिता पुत्रेभ्यो यथा ।
शिक्षा णो अस्मिन्पुरुहूत यामनि जीवा ज्योतिरशीमहि ॥
Samhita Transcription Accented
índra krátum na ā́ bhara pitā́ putrébhyo yáthā ǀ
śíkṣā ṇo asmínpuruhūta yā́mani jīvā́ jyótiraśīmahi ǁ
Samhita Transcription Nonaccented
indra kratum na ā bhara pitā putrebhyo yathā ǀ
śikṣā ṇo asminpuruhūta yāmani jīvā jyotiraśīmahi ǁ
Padapatha Devanagari Accented
इन्द्र॑ । क्रतु॑म् । नः॒ । आ । भ॒र॒ । पि॒ता । पु॒त्रेभ्यः॑ । यथा॑ ।
शिक्ष॑ । नः॒ । अ॒स्मिन् । पु॒रु॒ऽहू॒त॒ । याम॑नि । जी॒वाः । ज्योतिः॑ । अ॒शी॒म॒हि॒ ॥
Padapatha Devanagari Nonaccented
इन्द्र । क्रतुम् । नः । आ । भर । पिता । पुत्रेभ्यः । यथा ।
शिक्ष । नः । अस्मिन् । पुरुऽहूत । यामनि । जीवाः । ज्योतिः । अशीमहि ॥
Padapatha Transcription Accented
índra ǀ krátum ǀ naḥ ǀ ā́ ǀ bhara ǀ pitā́ ǀ putrébhyaḥ ǀ yáthā ǀ
śíkṣa ǀ naḥ ǀ asmín ǀ puru-hūta ǀ yā́mani ǀ jīvā́ḥ ǀ jyótiḥ ǀ aśīmahi ǁ
Padapatha Transcription Nonaccented
indra ǀ kratum ǀ naḥ ǀ ā ǀ bhara ǀ pitā ǀ putrebhyaḥ ǀ yathā ǀ
śikṣa ǀ naḥ ǀ asmin ǀ puru-hūta ǀ yāmani ǀ jīvāḥ ǀ jyotiḥ ǀ aśīmahi ǁ
07.032.27 (Mandala. Sukta. Rik)
5.3.21.07 (Ashtaka. Adhyaya. Varga. Rik)
07.02.147 (Mandala. Anuvāka. Rik)
Samhita Devanagari Accented
मा नो॒ अज्ञा॑ता वृ॒जना॑ दुरा॒ध्यो॒३॒॑ माशि॑वासो॒ अव॑ क्रमुः ।
त्वया॑ व॒यं प्र॒वतः॒ शश्व॑तीर॒पोऽति॑ शूर तरामसि ॥
Samhita Devanagari Nonaccented
मा नो अज्ञाता वृजना दुराध्यो माशिवासो अव क्रमुः ।
त्वया वयं प्रवतः शश्वतीरपोऽति शूर तरामसि ॥
Samhita Transcription Accented
mā́ no ájñātā vṛjánā durādhyo mā́śivāso áva kramuḥ ǀ
tváyā vayám pravátaḥ śáśvatīrapó’ti śūra tarāmasi ǁ
Samhita Transcription Nonaccented
mā no ajñātā vṛjanā durādhyo māśivāso ava kramuḥ ǀ
tvayā vayam pravataḥ śaśvatīrapo’ti śūra tarāmasi ǁ
Padapatha Devanagari Accented
मा । नः॒ । अज्ञा॑ताः । वृ॒जनाः॑ । दुः॒ऽआ॒ध्यः॑ । मा । अशि॑वासः । अव॑ । क्र॒मुः॒ ।
त्वया॑ । व॒यम् । प्र॒ऽवतः॑ । शश्व॑तीः । अ॒पः । अति॑ । शू॒र॒ । त॒रा॒म॒सि॒ ॥
Padapatha Devanagari Nonaccented
मा । नः । अज्ञाताः । वृजनाः । दुःऽआध्यः । मा । अशिवासः । अव । क्रमुः ।
त्वया । वयम् । प्रऽवतः । शश्वतीः । अपः । अति । शूर । तरामसि ॥
Padapatha Transcription Accented
mā́ ǀ naḥ ǀ ájñātāḥ ǀ vṛjánāḥ ǀ duḥ-ādhyáḥ ǀ mā́ ǀ áśivāsaḥ ǀ áva ǀ kramuḥ ǀ
tváyā ǀ vayám ǀ pra-vátaḥ ǀ śáśvatīḥ ǀ apáḥ ǀ áti ǀ śūra ǀ tarāmasi ǁ
Padapatha Transcription Nonaccented
mā ǀ naḥ ǀ ajñātāḥ ǀ vṛjanāḥ ǀ duḥ-ādhyaḥ ǀ mā ǀ aśivāsaḥ ǀ ava ǀ kramuḥ ǀ
tvayā ǀ vayam ǀ pra-vataḥ ǀ śaśvatīḥ ǀ apaḥ ǀ ati ǀ śūra ǀ tarāmasi ǁ