|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 104
|
1. Info |
| To: | 1-7, 15, 25: indra, soma; 8, 16, 19-22, 24: indra; 9, 12, 13: soma; 10, 14: agni; 11: devāḥ; 17: grāvāṇaḥ; 18: maruts; 23: vasiṣṭha’s wish (a); pṛthivī, antarikṣa (c) |
|
| From: | vasiṣṭha maitrāvaruṇi | |
| Metres: | 1st set of styles: nicṛttriṣṭup (8, 10, 11, 13-15, 17, 23, 24); virāḍjagatī (1, 4, 6, 7); nicṛjjagatī (3, 5, 18, 21); triṣṭup (19, 20, 22); virāṭtrisṭup (12, 16); ārṣījagatī (2); ārṣītriṣṭup (9); pādanicṛdanuṣṭup (25) 2nd set of styles: triṣṭubh (8-17, 19, 20, 22, 24); jagatī (1-6, 18, 21, 23); jagatī or triṣṭubh (7); anuṣṭubh (25) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.104.01 (Mandala. Sukta. Rik)
5.7.05.01 (Ashtaka. Adhyaya. Varga. Rik)
07.06.102 (Mandala. Anuvāka. Rik)
Samhita Devanagari Accented
इंद्रा॑सोमा॒ तप॑तं॒ रक्ष॑ उ॒ब्जतं॒ न्य॑र्पयतं वृषणा तमो॒वृधः॑ ।
परा॑ शृणीतम॒चितो॒ न्यो॑षतं ह॒तं नु॒देथां॒ नि शि॑शीतम॒त्रिणः॑ ॥
Samhita Devanagari Nonaccented
इंद्रासोमा तपतं रक्ष उब्जतं न्यर्पयतं वृषणा तमोवृधः ।
परा शृणीतमचितो न्योषतं हतं नुदेथां नि शिशीतमत्रिणः ॥
Samhita Transcription Accented
índrāsomā tápatam rákṣa ubjátam nyárpayatam vṛṣaṇā tamovṛ́dhaḥ ǀ
párā śṛṇītamacíto nyoṣatam hatám nudéthām ní śiśītamatríṇaḥ ǁ
Samhita Transcription Nonaccented
indrāsomā tapatam rakṣa ubjatam nyarpayatam vṛṣaṇā tamovṛdhaḥ ǀ
parā śṛṇītamacito nyoṣatam hatam nudethām ni śiśītamatriṇaḥ ǁ
Padapatha Devanagari Accented
इन्द्रा॑सोमा । तप॑तम् । रक्षः॑ । उ॒ब्जत॑म् । नि । अ॒र्प॒य॒त॒म् । वृ॒ष॒णा॒ । त॒मः॒ऽवृधः॑ ।
परा॑ । शृ॒णी॒त॒म् । अ॒चितः॑ । नि । ओ॒ष॒त॒म् । ह॒तम् । नु॒देथा॑म् । नि । शि॒शी॒त॒म् । अ॒त्रिणः॑ ॥
Padapatha Devanagari Nonaccented
इन्द्रासोमा । तपतम् । रक्षः । उब्जतम् । नि । अर्पयतम् । वृषणा । तमःऽवृधः ।
परा । शृणीतम् । अचितः । नि । ओषतम् । हतम् । नुदेथाम् । नि । शिशीतम् । अत्रिणः ॥
Padapatha Transcription Accented
índrāsomā ǀ tápatam ǀ rákṣaḥ ǀ ubjátam ǀ ní ǀ arpayatam ǀ vṛṣaṇā ǀ tamaḥ-vṛ́dhaḥ ǀ
párā ǀ śṛṇītam ǀ acítaḥ ǀ ní ǀ oṣatam ǀ hatám ǀ nudéthām ǀ ní ǀ śiśītam ǀ atríṇaḥ ǁ
Padapatha Transcription Nonaccented
indrāsomā ǀ tapatam ǀ rakṣaḥ ǀ ubjatam ǀ ni ǀ arpayatam ǀ vṛṣaṇā ǀ tamaḥ-vṛdhaḥ ǀ
parā ǀ śṛṇītam ǀ acitaḥ ǀ ni ǀ oṣatam ǀ hatam ǀ nudethām ǀ ni ǀ śiśītam ǀ atriṇaḥ ǁ
07.104.02 (Mandala. Sukta. Rik)
5.7.05.02 (Ashtaka. Adhyaya. Varga. Rik)
07.06.103 (Mandala. Anuvāka. Rik)
Samhita Devanagari Accented
इंद्रा॑सोमा॒ सम॒घशं॑सम॒भ्य१॒॑घं तपु॑र्ययस्तु च॒रुर॑ग्नि॒वाँ इ॑व ।
ब्र॒ह्म॒द्विषे॑ क्र॒व्यादे॑ घो॒रच॑क्षसे॒ द्वेषो॑ धत्तमनवा॒यं कि॑मी॒दिने॑ ॥
Samhita Devanagari Nonaccented
इंद्रासोमा समघशंसमभ्यघं तपुर्ययस्तु चरुरग्निवाँ इव ।
ब्रह्मद्विषे क्रव्यादे घोरचक्षसे द्वेषो धत्तमनवायं किमीदिने ॥
Samhita Transcription Accented
índrāsomā sámagháśaṃsamabhyághám tápuryayastu carúragnivā́m̐ iva ǀ
brahmadvíṣe kravyā́de ghorácakṣase dvéṣo dhattamanavāyám kimīdíne ǁ
Samhita Transcription Nonaccented
indrāsomā samaghaśaṃsamabhyagham tapuryayastu caruragnivām̐ iva ǀ
brahmadviṣe kravyāde ghoracakṣase dveṣo dhattamanavāyam kimīdine ǁ
Padapatha Devanagari Accented
इन्द्रा॑सोमा । सम् । अ॒घऽशं॑सम् । अ॒भि । अ॒घम् । तपुः॑ । य॒य॒स्तु॒ । च॒रुः । अ॒ग्नि॒वान्ऽइ॑व ।
ब्र॒ह्म॒ऽद्विषे॑ । क्र॒व्य॒ऽअदे॑ । घो॒रऽच॑क्षसे । द्वेषः॑ । ध॒त्त॒म् । अ॒न॒वा॒यम् । कि॒मी॒दिने॑ ॥
Padapatha Devanagari Nonaccented
इन्द्रासोमा । सम् । अघऽशंसम् । अभि । अघम् । तपुः । ययस्तु । चरुः । अग्निवान्ऽइव ।
ब्रह्मऽद्विषे । क्रव्यऽअदे । घोरऽचक्षसे । द्वेषः । धत्तम् । अनवायम् । किमीदिने ॥
Padapatha Transcription Accented
índrāsomā ǀ sám ǀ aghá-śaṃsam ǀ abhí ǀ aghám ǀ tápuḥ ǀ yayastu ǀ carúḥ ǀ agnivā́n-iva ǀ
brahma-dvíṣe ǀ kravya-áde ǀ ghorá-cakṣase ǀ dvéṣaḥ ǀ dhattam ǀ anavāyám ǀ kimīdíne ǁ
Padapatha Transcription Nonaccented
indrāsomā ǀ sam ǀ agha-śaṃsam ǀ abhi ǀ agham ǀ tapuḥ ǀ yayastu ǀ caruḥ ǀ agnivān-iva ǀ
brahma-dviṣe ǀ kravya-ade ǀ ghora-cakṣase ǀ dveṣaḥ ǀ dhattam ǀ anavāyam ǀ kimīdine ǁ
07.104.03 (Mandala. Sukta. Rik)
5.7.05.03 (Ashtaka. Adhyaya. Varga. Rik)
07.06.104 (Mandala. Anuvāka. Rik)
Samhita Devanagari Accented
इंद्रा॑सोमा दु॒ष्कृतो॑ व॒व्रे अं॒तर॑नारंभ॒णे तम॑सि॒ प्र वि॑ध्यतं ।
यथा॒ नातः॒ पुन॒रेक॑श्च॒नोदय॒त्तद्वा॑मस्तु॒ सह॑से मन्यु॒मच्छवः॑ ॥
Samhita Devanagari Nonaccented
इंद्रासोमा दुष्कृतो वव्रे अंतरनारंभणे तमसि प्र विध्यतं ।
यथा नातः पुनरेकश्चनोदयत्तद्वामस्तु सहसे मन्युमच्छवः ॥
Samhita Transcription Accented
índrāsomā duṣkṛ́to vavré antáranārambhaṇé támasi prá vidhyatam ǀ
yáthā nā́taḥ púnarékaścanódáyattádvāmastu sáhase manyumácchávaḥ ǁ
Samhita Transcription Nonaccented
indrāsomā duṣkṛto vavre antaranārambhaṇe tamasi pra vidhyatam ǀ
yathā nātaḥ punarekaścanodayattadvāmastu sahase manyumacchavaḥ ǁ
Padapatha Devanagari Accented
इन्द्रा॑सोमा । दुः॒ऽकृतः॑ । व॒व्रे । अ॒न्तः । अ॒ना॒र॒म्भ॒णे । तम॑सि । प्र । वि॒ध्य॒त॒म् ।
यथा॑ । न । अतः॑ । पुनः॑ । एकः॑ । च॒न । उ॒त्ऽअय॑त् । तत् । वा॒म् । अ॒स्तु॒ । सह॑से । म॒न्यु॒ऽमत् । शवः॑ ॥
Padapatha Devanagari Nonaccented
इन्द्रासोमा । दुःऽकृतः । वव्रे । अन्तः । अनारम्भणे । तमसि । प्र । विध्यतम् ।
यथा । न । अतः । पुनः । एकः । चन । उत्ऽअयत् । तत् । वाम् । अस्तु । सहसे । मन्युऽमत् । शवः ॥
Padapatha Transcription Accented
índrāsomā ǀ duḥ-kṛ́taḥ ǀ vavré ǀ antáḥ ǀ anārambhaṇé ǀ támasi ǀ prá ǀ vidhyatam ǀ
yáthā ǀ ná ǀ átaḥ ǀ púnaḥ ǀ ékaḥ ǀ caná ǀ ut-áyat ǀ tát ǀ vām ǀ astu ǀ sáhase ǀ manyu-mát ǀ śávaḥ ǁ
Padapatha Transcription Nonaccented
indrāsomā ǀ duḥ-kṛtaḥ ǀ vavre ǀ antaḥ ǀ anārambhaṇe ǀ tamasi ǀ pra ǀ vidhyatam ǀ
yathā ǀ na ǀ ataḥ ǀ punaḥ ǀ ekaḥ ǀ cana ǀ ut-ayat ǀ tat ǀ vām ǀ astu ǀ sahase ǀ manyu-mat ǀ śavaḥ ǁ
07.104.04 (Mandala. Sukta. Rik)
5.7.05.04 (Ashtaka. Adhyaya. Varga. Rik)
07.06.105 (Mandala. Anuvāka. Rik)
Samhita Devanagari Accented
इंद्रा॑सोमा व॒र्तय॑तं दि॒वो व॒धं सं पृ॑थि॒व्या अ॒घशं॑साय॒ तर्ह॑णं ।
उत्त॑क्षतं स्व॒र्यं१॒॑ पर्व॑तेभ्यो॒ येन॒ रक्षो॑ वावृधा॒नं नि॒जूर्व॑थः ॥
Samhita Devanagari Nonaccented
इंद्रासोमा वर्तयतं दिवो वधं सं पृथिव्या अघशंसाय तर्हणं ।
उत्तक्षतं स्वर्यं पर्वतेभ्यो येन रक्षो वावृधानं निजूर्वथः ॥
Samhita Transcription Accented
índrāsomā vartáyatam divó vadhám sám pṛthivyā́ agháśaṃsāya tárhaṇam ǀ
úttakṣatam svaryám párvatebhyo yéna rákṣo vāvṛdhānám nijū́rvathaḥ ǁ
Samhita Transcription Nonaccented
indrāsomā vartayatam divo vadham sam pṛthivyā aghaśaṃsāya tarhaṇam ǀ
uttakṣatam svaryam parvatebhyo yena rakṣo vāvṛdhānam nijūrvathaḥ ǁ
Padapatha Devanagari Accented
इन्द्रा॑सोमा । व॒र्तय॑तम् । दि॒वः । व॒धम् । सम् । पृ॒थि॒व्याः । अ॒घऽशं॑साय । तर्ह॑णम् ।
उत् । त॒क्ष॒त॒म् । स्व॒र्य॑म् । पर्व॑तेभ्यः । येन॑ । रक्षः॑ । व॒वृ॒धा॒नम् । नि॒ऽजूर्व॑थः ॥
Padapatha Devanagari Nonaccented
इन्द्रासोमा । वर्तयतम् । दिवः । वधम् । सम् । पृथिव्याः । अघऽशंसाय । तर्हणम् ।
उत् । तक्षतम् । स्वर्यम् । पर्वतेभ्यः । येन । रक्षः । ववृधानम् । निऽजूर्वथः ॥
Padapatha Transcription Accented
índrāsomā ǀ vartáyatam ǀ diváḥ ǀ vadhám ǀ sám ǀ pṛthivyā́ḥ ǀ aghá-śaṃsāya ǀ tárhaṇam ǀ
út ǀ takṣatam ǀ svaryám ǀ párvatebhyaḥ ǀ yéna ǀ rákṣaḥ ǀ vavṛdhānám ǀ ni-jū́rvathaḥ ǁ
Padapatha Transcription Nonaccented
indrāsomā ǀ vartayatam ǀ divaḥ ǀ vadham ǀ sam ǀ pṛthivyāḥ ǀ agha-śaṃsāya ǀ tarhaṇam ǀ
ut ǀ takṣatam ǀ svaryam ǀ parvatebhyaḥ ǀ yena ǀ rakṣaḥ ǀ vavṛdhānam ǀ ni-jūrvathaḥ ǁ
07.104.05 (Mandala. Sukta. Rik)
5.7.05.05 (Ashtaka. Adhyaya. Varga. Rik)
07.06.106 (Mandala. Anuvāka. Rik)
Samhita Devanagari Accented
इंद्रा॑सोमा व॒र्तय॑तं दि॒वस्पर्य॑ग्नित॒प्तेभि॑र्यु॒वमश्म॑हन्मभिः ।
तपु॑र्वधेभिर॒जरे॑भिर॒त्रिणो॒ नि पर्शा॑ने विध्यतं॒ यंतु॑ निस्व॒रं ॥
Samhita Devanagari Nonaccented
इंद्रासोमा वर्तयतं दिवस्पर्यग्नितप्तेभिर्युवमश्महन्मभिः ।
तपुर्वधेभिरजरेभिरत्रिणो नि पर्शाने विध्यतं यंतु निस्वरं ॥
Samhita Transcription Accented
índrāsomā vartáyatam diváspáryagnitaptébhiryuvámáśmahanmabhiḥ ǀ
tápurvadhebhirajárebhiratríṇo ní párśāne vidhyatam yántu nisvarám ǁ
Samhita Transcription Nonaccented
indrāsomā vartayatam divasparyagnitaptebhiryuvamaśmahanmabhiḥ ǀ
tapurvadhebhirajarebhiratriṇo ni parśāne vidhyatam yantu nisvaram ǁ
Padapatha Devanagari Accented
इन्द्रा॑सोमा । व॒र्तय॑तम् । दि॒वः । परि॑ । अ॒ग्नि॒ऽत॒प्तेभिः॑ । यु॒वम् । अश्म॑हन्मऽभिः ।
तपुः॑ऽवधेभिः । अ॒जरे॑भिः । अ॒त्रिणः॑ । नि । पर्शा॑ने । वि॒ध्य॒त॒म् । यन्तु॑ । नि॒ऽस्व॒रम् ॥
Padapatha Devanagari Nonaccented
इन्द्रासोमा । वर्तयतम् । दिवः । परि । अग्निऽतप्तेभिः । युवम् । अश्महन्मऽभिः ।
तपुःऽवधेभिः । अजरेभिः । अत्रिणः । नि । पर्शाने । विध्यतम् । यन्तु । निऽस्वरम् ॥
Padapatha Transcription Accented
índrāsomā ǀ vartáyatam ǀ diváḥ ǀ pári ǀ agni-taptébhiḥ ǀ yuvám ǀ áśmahanma-bhiḥ ǀ
tápuḥ-vadhebhiḥ ǀ ajárebhiḥ ǀ atríṇaḥ ǀ ní ǀ párśāne ǀ vidhyatam ǀ yántu ǀ ni-svarám ǁ
Padapatha Transcription Nonaccented
indrāsomā ǀ vartayatam ǀ divaḥ ǀ pari ǀ agni-taptebhiḥ ǀ yuvam ǀ aśmahanma-bhiḥ ǀ
tapuḥ-vadhebhiḥ ǀ ajarebhiḥ ǀ atriṇaḥ ǀ ni ǀ parśāne ǀ vidhyatam ǀ yantu ǀ ni-svaram ǁ
07.104.06 (Mandala. Sukta. Rik)
5.7.06.01 (Ashtaka. Adhyaya. Varga. Rik)
07.06.107 (Mandala. Anuvāka. Rik)
Samhita Devanagari Accented
इंद्रा॑सोमा॒ परि॑ वां भूतु वि॒श्वत॑ इ॒यं म॒तिः क॒क्ष्याश्वे॑व वा॒जिना॑ ।
यां वां॒ होत्रां॑ परिहि॒नोमि॑ मे॒धये॒मा ब्रह्मा॑णि नृ॒पती॑व जिन्वतं ॥
Samhita Devanagari Nonaccented
इंद्रासोमा परि वां भूतु विश्वत इयं मतिः कक्ष्याश्वेव वाजिना ।
यां वां होत्रां परिहिनोमि मेधयेमा ब्रह्माणि नृपतीव जिन्वतं ॥
Samhita Transcription Accented
índrāsomā pári vām bhūtu viśváta iyám matíḥ kakṣyā́śveva vājínā ǀ
yā́m vām hótrām parihinómi medháyemā́ bráhmāṇi nṛpátīva jinvatam ǁ
Samhita Transcription Nonaccented
indrāsomā pari vām bhūtu viśvata iyam matiḥ kakṣyāśveva vājinā ǀ
yām vām hotrām parihinomi medhayemā brahmāṇi nṛpatīva jinvatam ǁ
Padapatha Devanagari Accented
इन्द्रा॑सोमा । परि॑ । वा॒म् । भू॒तु॒ । वि॒श्वतः॑ । इ॒यम् । म॒तिः । क॒क्ष्या॑ । अश्वा॑ऽइव । वा॒जिना॑ ।
याम् । वा॒म् । होत्रा॑म् । प॒रि॒ऽहि॒नोमि॑ । मे॒धया॑ । इ॒मा । ब्रह्मा॑णि । नृ॒पती॑ इ॒वेति॑ नृ॒पती॑ऽइव । जि॒न्व॒त॒म् ॥
Padapatha Devanagari Nonaccented
इन्द्रासोमा । परि । वाम् । भूतु । विश्वतः । इयम् । मतिः । कक्ष्या । अश्वाऽइव । वाजिना ।
याम् । वाम् । होत्राम् । परिऽहिनोमि । मेधया । इमा । ब्रह्माणि । नृपती इवेति नृपतीऽइव । जिन्वतम् ॥
Padapatha Transcription Accented
índrāsomā ǀ pári ǀ vām ǀ bhūtu ǀ viśvátaḥ ǀ iyám ǀ matíḥ ǀ kakṣyā́ ǀ áśvā-iva ǀ vājínā ǀ
yā́m ǀ vām ǀ hótrām ǀ pari-hinómi ǀ medháyā ǀ imā́ ǀ bráhmāṇi ǀ nṛpátī ivéti nṛpátī-iva ǀ jinvatam ǁ
Padapatha Transcription Nonaccented
indrāsomā ǀ pari ǀ vām ǀ bhūtu ǀ viśvataḥ ǀ iyam ǀ matiḥ ǀ kakṣyā ǀ aśvā-iva ǀ vājinā ǀ
yām ǀ vām ǀ hotrām ǀ pari-hinomi ǀ medhayā ǀ imā ǀ brahmāṇi ǀ nṛpatī iveti nṛpatī-iva ǀ jinvatam ǁ
07.104.07 (Mandala. Sukta. Rik)
5.7.06.02 (Ashtaka. Adhyaya. Varga. Rik)
07.06.108 (Mandala. Anuvāka. Rik)
Samhita Devanagari Accented
प्रति॑ स्मरेथां तु॒जय॑द्भि॒रेवै॑र्ह॒तं द्रु॒हो र॒क्षसो॑ भंगु॒राव॑तः ।
इंद्रा॑सोमा दु॒ष्कृते॒ मा सु॒गं भू॒द्यो नः॑ क॒दा चि॑दभि॒दास॑ति द्रु॒हा ॥
Samhita Devanagari Nonaccented
प्रति स्मरेथां तुजयद्भिरेवैर्हतं द्रुहो रक्षसो भंगुरावतः ।
इंद्रासोमा दुष्कृते मा सुगं भूद्यो नः कदा चिदभिदासति द्रुहा ॥
Samhita Transcription Accented
práti smarethām tujáyadbhirévairhatám druhó rakṣáso bhaṅgurā́vataḥ ǀ
índrāsomā duṣkṛ́te mā́ sugám bhūdyó naḥ kadā́ cidabhidā́sati druhā́ ǁ
Samhita Transcription Nonaccented
prati smarethām tujayadbhirevairhatam druho rakṣaso bhaṅgurāvataḥ ǀ
indrāsomā duṣkṛte mā sugam bhūdyo naḥ kadā cidabhidāsati druhā ǁ
Padapatha Devanagari Accented
प्रति॑ । स्म॒रे॒था॒म् । तु॒जय॑त्ऽभिः । एवैः॑ । ह॒तम् । द्रु॒हः । र॒क्षसः॑ । भ॒ङ्गु॒रऽव॑तः ।
इन्द्रा॑सोमा । दुः॒ऽकृते॑ । मा । सु॒ऽगम् । भू॒त् । यः । नः॒ । क॒दा । चि॒त् । अ॒भि॒ऽदास॑ति । द्रु॒हा ॥
Padapatha Devanagari Nonaccented
प्रति । स्मरेथाम् । तुजयत्ऽभिः । एवैः । हतम् । द्रुहः । रक्षसः । भङ्गुरऽवतः ।
इन्द्रासोमा । दुःऽकृते । मा । सुऽगम् । भूत् । यः । नः । कदा । चित् । अभिऽदासति । द्रुहा ॥
Padapatha Transcription Accented
práti ǀ smarethām ǀ tujáyat-bhiḥ ǀ évaiḥ ǀ hatám ǀ druháḥ ǀ rakṣásaḥ ǀ bhaṅgurá-vataḥ ǀ
índrāsomā ǀ duḥ-kṛ́te ǀ mā́ ǀ su-gám ǀ bhūt ǀ yáḥ ǀ naḥ ǀ kadā́ ǀ cit ǀ abhi-dā́sati ǀ druhā́ ǁ
Padapatha Transcription Nonaccented
prati ǀ smarethām ǀ tujayat-bhiḥ ǀ evaiḥ ǀ hatam ǀ druhaḥ ǀ rakṣasaḥ ǀ bhaṅgura-vataḥ ǀ
indrāsomā ǀ duḥ-kṛte ǀ mā ǀ su-gam ǀ bhūt ǀ yaḥ ǀ naḥ ǀ kadā ǀ cit ǀ abhi-dāsati ǀ druhā ǁ
07.104.08 (Mandala. Sukta. Rik)
5.7.06.03 (Ashtaka. Adhyaya. Varga. Rik)
07.06.109 (Mandala. Anuvāka. Rik)
Samhita Devanagari Accented
यो मा॒ पाके॑न॒ मन॑सा॒ चरं॑तमभि॒चष्टे॒ अनृ॑तेभि॒र्वचो॑भिः ।
आप॑ इव का॒शिना॒ संगृ॑भीता॒ अस॑न्न॒स्त्वास॑त इंद्र व॒क्ता ॥
Samhita Devanagari Nonaccented
यो मा पाकेन मनसा चरंतमभिचष्टे अनृतेभिर्वचोभिः ।
आप इव काशिना संगृभीता असन्नस्त्वासत इंद्र वक्ता ॥
Samhita Transcription Accented
yó mā pā́kena mánasā cárantamabhicáṣṭe ánṛtebhirvácobhiḥ ǀ
ā́pa iva kāśínā sáṃgṛbhītā ásannastvā́sata indra vaktā́ ǁ
Samhita Transcription Nonaccented
yo mā pākena manasā carantamabhicaṣṭe anṛtebhirvacobhiḥ ǀ
āpa iva kāśinā saṃgṛbhītā asannastvāsata indra vaktā ǁ
Padapatha Devanagari Accented
यः । मा॒ । पाके॑न । मन॑सा । चर॑न्तम् । अ॒भि॒ऽचष्टे॑ । अनृ॑तेभिः । वचः॑ऽभिः ।
आपः॑ऽइव । का॒शिना॑ । सम्ऽगृ॑भीताः । अस॑न् । अ॒स्तु॒ । अस॑तः । इ॒न्द्र॒ । व॒क्ता ॥
Padapatha Devanagari Nonaccented
यः । मा । पाकेन । मनसा । चरन्तम् । अभिऽचष्टे । अनृतेभिः । वचःऽभिः ।
आपःऽइव । काशिना । सम्ऽगृभीताः । असन् । अस्तु । असतः । इन्द्र । वक्ता ॥
Padapatha Transcription Accented
yáḥ ǀ mā ǀ pā́kena ǀ mánasā ǀ cárantam ǀ abhi-cáṣṭe ǀ ánṛtebhiḥ ǀ vácaḥ-bhiḥ ǀ
ā́paḥ-iva ǀ kāśínā ǀ sám-gṛbhītāḥ ǀ ásan ǀ astu ǀ ásataḥ ǀ indra ǀ vaktā́ ǁ
Padapatha Transcription Nonaccented
yaḥ ǀ mā ǀ pākena ǀ manasā ǀ carantam ǀ abhi-caṣṭe ǀ anṛtebhiḥ ǀ vacaḥ-bhiḥ ǀ
āpaḥ-iva ǀ kāśinā ǀ sam-gṛbhītāḥ ǀ asan ǀ astu ǀ asataḥ ǀ indra ǀ vaktā ǁ
07.104.09 (Mandala. Sukta. Rik)
5.7.06.04 (Ashtaka. Adhyaya. Varga. Rik)
07.06.110 (Mandala. Anuvāka. Rik)
Samhita Devanagari Accented
ये पा॑कशं॒सं वि॒हरं॑त॒ एवै॒र्ये वा॑ भ॒द्रं दू॒षयं॑ति स्व॒धाभिः॑ ।
अह॑ये वा॒ तान्प्र॒ददा॑तु॒ सोम॒ आ वा॑ दधातु॒ निर्ऋ॑तेरु॒पस्थे॑ ॥
Samhita Devanagari Nonaccented
ये पाकशंसं विहरंत एवैर्ये वा भद्रं दूषयंति स्वधाभिः ।
अहये वा तान्प्रददातु सोम आ वा दधातु निर्ऋतेरुपस्थे ॥
Samhita Transcription Accented
yé pākaśaṃsám viháranta évairyé vā bhadrám dūṣáyanti svadhā́bhiḥ ǀ
áhaye vā tā́npradádātu sóma ā́ vā dadhātu nírṛterupásthe ǁ
Samhita Transcription Nonaccented
ye pākaśaṃsam viharanta evairye vā bhadram dūṣayanti svadhābhiḥ ǀ
ahaye vā tānpradadātu soma ā vā dadhātu nirṛterupasthe ǁ
Padapatha Devanagari Accented
ये । पा॒क॒ऽशं॒सम् । वि॒ऽहर॑न्ते । एवैः॑ । ये । वा॒ । भ॒द्रम् । दू॒षय॑न्ति । स्व॒धाभिः॑ ।
अह॑ये । वा॒ । तान् । प्र॒ऽददा॑तु । सोमः॑ । आ । वा॒ । द॒धा॒तु॒ । निःऽऋ॑तेः । उ॒पऽस्थे॑ ॥
Padapatha Devanagari Nonaccented
ये । पाकऽशंसम् । विऽहरन्ते । एवैः । ये । वा । भद्रम् । दूषयन्ति । स्वधाभिः ।
अहये । वा । तान् । प्रऽददातु । सोमः । आ । वा । दधातु । निःऽऋतेः । उपऽस्थे ॥
Padapatha Transcription Accented
yé ǀ pāka-śaṃsám ǀ vi-hárante ǀ évaiḥ ǀ yé ǀ vā ǀ bhadrám ǀ dūṣáyanti ǀ svadhā́bhiḥ ǀ
áhaye ǀ vā ǀ tā́n ǀ pra-dádātu ǀ sómaḥ ǀ ā́ ǀ vā ǀ dadhātu ǀ níḥ-ṛteḥ ǀ upá-sthe ǁ
Padapatha Transcription Nonaccented
ye ǀ pāka-śaṃsam ǀ vi-harante ǀ evaiḥ ǀ ye ǀ vā ǀ bhadram ǀ dūṣayanti ǀ svadhābhiḥ ǀ
ahaye ǀ vā ǀ tān ǀ pra-dadātu ǀ somaḥ ǀ ā ǀ vā ǀ dadhātu ǀ niḥ-ṛteḥ ǀ upa-sthe ǁ
07.104.10 (Mandala. Sukta. Rik)
5.7.06.05 (Ashtaka. Adhyaya. Varga. Rik)
07.06.111 (Mandala. Anuvāka. Rik)
Samhita Devanagari Accented
यो नो॒ रसं॒ दिप्स॑ति पि॒त्वो अ॑ग्ने॒ यो अश्वा॑नां॒ यो गवां॒ यस्त॒नूनां॑ ।
रि॒पुः स्ते॒नः स्ते॑य॒कृद्द॒भ्रमे॑तु॒ नि ष ही॑यतां त॒न्वा॒३॒॑ तना॑ च ॥
Samhita Devanagari Nonaccented
यो नो रसं दिप्सति पित्वो अग्ने यो अश्वानां यो गवां यस्तनूनां ।
रिपुः स्तेनः स्तेयकृद्दभ्रमेतु नि ष हीयतां तन्वा तना च ॥
Samhita Transcription Accented
yó no rásam dípsati pitvó agne yó áśvānām yó gávām yástanū́nām ǀ
ripúḥ stenáḥ steyakṛ́ddabhrámetu ní ṣá hīyatām tanvā́ tánā ca ǁ
Samhita Transcription Nonaccented
yo no rasam dipsati pitvo agne yo aśvānām yo gavām yastanūnām ǀ
ripuḥ stenaḥ steyakṛddabhrametu ni ṣa hīyatām tanvā tanā ca ǁ
Padapatha Devanagari Accented
यः । नः॒ । रस॑म् । दिप्स॑ति । पि॒त्वः । अ॒ग्ने॒ । यः । अश्वा॑नाम् । यः । गवा॑म् । यः । त॒नूना॑म् ।
रि॒पुः । स्ते॒नः । स्ते॒य॒ऽकृत् । द॒भ्रम् । ए॒तु॒ । नि । सः । ही॒य॒ता॒म् । त॒न्वा॑ । तना॑ । च॒ ॥
Padapatha Devanagari Nonaccented
यः । नः । रसम् । दिप्सति । पित्वः । अग्ने । यः । अश्वानाम् । यः । गवाम् । यः । तनूनाम् ।
रिपुः । स्तेनः । स्तेयऽकृत् । दभ्रम् । एतु । नि । सः । हीयताम् । तन्वा । तना । च ॥
Padapatha Transcription Accented
yáḥ ǀ naḥ ǀ rásam ǀ dípsati ǀ pitváḥ ǀ agne ǀ yáḥ ǀ áśvānām ǀ yáḥ ǀ gávām ǀ yáḥ ǀ tanū́nām ǀ
ripúḥ ǀ stenáḥ ǀ steya-kṛ́t ǀ dabhrám ǀ etu ǀ ní ǀ sáḥ ǀ hīyatām ǀ tanvā́ ǀ tánā ǀ ca ǁ
Padapatha Transcription Nonaccented
yaḥ ǀ naḥ ǀ rasam ǀ dipsati ǀ pitvaḥ ǀ agne ǀ yaḥ ǀ aśvānām ǀ yaḥ ǀ gavām ǀ yaḥ ǀ tanūnām ǀ
ripuḥ ǀ stenaḥ ǀ steya-kṛt ǀ dabhram ǀ etu ǀ ni ǀ saḥ ǀ hīyatām ǀ tanvā ǀ tanā ǀ ca ǁ
07.104.11 (Mandala. Sukta. Rik)
5.7.07.01 (Ashtaka. Adhyaya. Varga. Rik)
07.06.112 (Mandala. Anuvāka. Rik)
Samhita Devanagari Accented
प॒रः सो अ॑स्तु त॒न्वा॒३॒॑ तना॑ च ति॒स्रः पृ॑थि॒वीर॒धो अ॑स्तु॒ विश्वाः॑ ।
प्रति॑ शुष्यतु॒ यशो॑ अस्य देवा॒ यो नो॒ दिवा॒ दिप्स॑ति॒ यश्च॒ नक्तं॑ ॥
Samhita Devanagari Nonaccented
परः सो अस्तु तन्वा तना च तिस्रः पृथिवीरधो अस्तु विश्वाः ।
प्रति शुष्यतु यशो अस्य देवा यो नो दिवा दिप्सति यश्च नक्तं ॥
Samhita Transcription Accented
paráḥ só astu tanvā́ tánā ca tisráḥ pṛthivī́radhó astu víśvāḥ ǀ
práti śuṣyatu yáśo asya devā yó no dívā dípsati yáśca náktam ǁ
Samhita Transcription Nonaccented
paraḥ so astu tanvā tanā ca tisraḥ pṛthivīradho astu viśvāḥ ǀ
prati śuṣyatu yaśo asya devā yo no divā dipsati yaśca naktam ǁ
Padapatha Devanagari Accented
प॒रः । सः । अ॒स्तु॒ । त॒न्वा॑ । तना॑ । च॒ । ति॒स्रः । पृ॒थि॒वीः । अ॒धः । अ॒स्तु॒ । विश्वाः॑ ।
प्रति॑ । शु॒ष्य॒तु॒ । यशः॑ । अ॒स्य॒ । दे॒वाः॒ । यः । नः॒ । दिवा॑ । दिप्स॑ति । यः । च॒ । नक्त॑म् ॥
Padapatha Devanagari Nonaccented
परः । सः । अस्तु । तन्वा । तना । च । तिस्रः । पृथिवीः । अधः । अस्तु । विश्वाः ।
प्रति । शुष्यतु । यशः । अस्य । देवाः । यः । नः । दिवा । दिप्सति । यः । च । नक्तम् ॥
Padapatha Transcription Accented
paráḥ ǀ sáḥ ǀ astu ǀ tanvā́ ǀ tánā ǀ ca ǀ tisráḥ ǀ pṛthivī́ḥ ǀ adháḥ ǀ astu ǀ víśvāḥ ǀ
práti ǀ śuṣyatu ǀ yáśaḥ ǀ asya ǀ devāḥ ǀ yáḥ ǀ naḥ ǀ dívā ǀ dípsati ǀ yáḥ ǀ ca ǀ náktam ǁ
Padapatha Transcription Nonaccented
paraḥ ǀ saḥ ǀ astu ǀ tanvā ǀ tanā ǀ ca ǀ tisraḥ ǀ pṛthivīḥ ǀ adhaḥ ǀ astu ǀ viśvāḥ ǀ
prati ǀ śuṣyatu ǀ yaśaḥ ǀ asya ǀ devāḥ ǀ yaḥ ǀ naḥ ǀ divā ǀ dipsati ǀ yaḥ ǀ ca ǀ naktam ǁ
07.104.12 (Mandala. Sukta. Rik)
5.7.07.02 (Ashtaka. Adhyaya. Varga. Rik)
07.06.113 (Mandala. Anuvāka. Rik)
Samhita Devanagari Accented
सु॒वि॒ज्ञा॒नं चि॑कि॒तुषे॒ जना॑य॒ सच्चास॑च्च॒ वच॑सी पस्पृधाते ।
तयो॒र्यत्स॒त्यं य॑त॒रदृजी॑य॒स्तदित्सोमो॑ऽवति॒ हंत्यास॑त् ॥
Samhita Devanagari Nonaccented
सुविज्ञानं चिकितुषे जनाय सच्चासच्च वचसी पस्पृधाते ।
तयोर्यत्सत्यं यतरदृजीयस्तदित्सोमोऽवति हंत्यासत् ॥
Samhita Transcription Accented
suvijñānám cikitúṣe jánāya sáccā́sacca vácasī paspṛdhāte ǀ
táyoryátsatyám yatarádṛ́jīyastádítsómo’vati hántyā́sat ǁ
Samhita Transcription Nonaccented
suvijñānam cikituṣe janāya saccāsacca vacasī paspṛdhāte ǀ
tayoryatsatyam yataradṛjīyastaditsomo’vati hantyāsat ǁ
Padapatha Devanagari Accented
सु॒ऽवि॒ज्ञा॒नम् । चि॒कि॒तुषे॑ । जना॑य । सत् । च॒ । अस॑त् । च॒ । वच॑सी॒ इति॑ । प॒स्पृ॒धा॒ते॒ इति॑ ।
तयोः॑ । यत् । स॒त्यम् । य॒त॒रत् । ऋजी॑यः । तत् । इत् । सोमः॑ । अ॒व॒ति॒ । हन्ति॑ । अस॑त् ॥
Padapatha Devanagari Nonaccented
सुऽविज्ञानम् । चिकितुषे । जनाय । सत् । च । असत् । च । वचसी इति । पस्पृधाते इति ।
तयोः । यत् । सत्यम् । यतरत् । ऋजीयः । तत् । इत् । सोमः । अवति । हन्ति । असत् ॥
Padapatha Transcription Accented
su-vijñānám ǀ cikitúṣe ǀ jánāya ǀ sát ǀ ca ǀ ásat ǀ ca ǀ vácasī íti ǀ paspṛdhāte íti ǀ
táyoḥ ǀ yát ǀ satyám ǀ yatarát ǀ ṛ́jīyaḥ ǀ tát ǀ ít ǀ sómaḥ ǀ avati ǀ hánti ǀ ásat ǁ
Padapatha Transcription Nonaccented
su-vijñānam ǀ cikituṣe ǀ janāya ǀ sat ǀ ca ǀ asat ǀ ca ǀ vacasī iti ǀ paspṛdhāte iti ǀ
tayoḥ ǀ yat ǀ satyam ǀ yatarat ǀ ṛjīyaḥ ǀ tat ǀ it ǀ somaḥ ǀ avati ǀ hanti ǀ asat ǁ
07.104.13 (Mandala. Sukta. Rik)
5.7.07.03 (Ashtaka. Adhyaya. Varga. Rik)
07.06.114 (Mandala. Anuvāka. Rik)
Samhita Devanagari Accented
न वा उ॒ सोमो॑ वृजि॒नं हि॑नोति॒ न क्ष॒त्रियं॑ मिथु॒या धा॒रयं॑तं ।
हंति॒ रक्षो॒ हंत्यास॒द्वदं॑तमु॒भाविंद्र॑स्य॒ प्रसि॑तौ शयाते ॥
Samhita Devanagari Nonaccented
न वा उ सोमो वृजिनं हिनोति न क्षत्रियं मिथुया धारयंतं ।
हंति रक्षो हंत्यासद्वदंतमुभाविंद्रस्य प्रसितौ शयाते ॥
Samhita Transcription Accented
ná vā́ u sómo vṛjinám hinoti ná kṣatríyam mithuyā́ dhāráyantam ǀ
hánti rákṣo hántyā́sadvádantamubhā́víndrasya prásitau śayāte ǁ
Samhita Transcription Nonaccented
na vā u somo vṛjinam hinoti na kṣatriyam mithuyā dhārayantam ǀ
hanti rakṣo hantyāsadvadantamubhāvindrasya prasitau śayāte ǁ
Padapatha Devanagari Accented
न । वै । ऊं॒ इति॑ । सोमः॑ । वृ॒जि॒नम् । हि॒नो॒ति॒ । न । क्ष॒त्रिय॑म् । मि॒थु॒या । धा॒रय॑न्तम् ।
हन्ति॑ । रक्षः॑ । हन्ति॑ । अस॑त् । वद॑न्तम् । उ॒भौ । इन्द्र॑स्य । प्रऽसि॑तौ । श॒या॒ते॒ इति॑ ॥
Padapatha Devanagari Nonaccented
न । वै । ऊं इति । सोमः । वृजिनम् । हिनोति । न । क्षत्रियम् । मिथुया । धारयन्तम् ।
हन्ति । रक्षः । हन्ति । असत् । वदन्तम् । उभौ । इन्द्रस्य । प्रऽसितौ । शयाते इति ॥
Padapatha Transcription Accented
ná ǀ vái ǀ ūṃ íti ǀ sómaḥ ǀ vṛjinám ǀ hinoti ǀ ná ǀ kṣatríyam ǀ mithuyā́ ǀ dhāráyantam ǀ
hánti ǀ rákṣaḥ ǀ hánti ǀ ásat ǀ vádantam ǀ ubháu ǀ índrasya ǀ prá-sitau ǀ śayāte íti ǁ
Padapatha Transcription Nonaccented
na ǀ vai ǀ ūṃ iti ǀ somaḥ ǀ vṛjinam ǀ hinoti ǀ na ǀ kṣatriyam ǀ mithuyā ǀ dhārayantam ǀ
hanti ǀ rakṣaḥ ǀ hanti ǀ asat ǀ vadantam ǀ ubhau ǀ indrasya ǀ pra-sitau ǀ śayāte iti ǁ
07.104.14 (Mandala. Sukta. Rik)
5.7.07.04 (Ashtaka. Adhyaya. Varga. Rik)
07.06.115 (Mandala. Anuvāka. Rik)
Samhita Devanagari Accented
यदि॑ वा॒हमनृ॑तदेव॒ आस॒ मोघं॑ वा दे॒वाँ अ॑प्यू॒हे अ॑ग्ने ।
किम॒स्मभ्यं॑ जातवेदो हृणीषे द्रोघ॒वाच॑स्ते निर्ऋ॒थं स॑चंतां ॥
Samhita Devanagari Nonaccented
यदि वाहमनृतदेव आस मोघं वा देवाँ अप्यूहे अग्ने ।
किमस्मभ्यं जातवेदो हृणीषे द्रोघवाचस्ते निर्ऋथं सचंतां ॥
Samhita Transcription Accented
yádi vāhámánṛtadeva ā́sa mógham vā devā́m̐ apyūhé agne ǀ
kímasmábhyam jātavedo hṛṇīṣe droghavā́caste nirṛthám sacantām ǁ
Samhita Transcription Nonaccented
yadi vāhamanṛtadeva āsa mogham vā devām̐ apyūhe agne ǀ
kimasmabhyam jātavedo hṛṇīṣe droghavācaste nirṛtham sacantām ǁ
Padapatha Devanagari Accented
यदि॑ । वा॒ । अ॒हम् । अनृ॑तऽदेवः । आस॑ । मोघ॑म् । वा॒ । दे॒वान् । अ॒पि॒ऽऊ॒हे । अ॒ग्ने॒ ।
किम् । अ॒स्मभ्य॑म् । जा॒त॒ऽवे॒दः॒ । हृ॒णी॒षे॒ । द्रो॒घ॒ऽवाचः॑ । ते॒ । निः॒ऽऋ॒थम् । स॒च॒न्ता॒म् ॥
Padapatha Devanagari Nonaccented
यदि । वा । अहम् । अनृतऽदेवः । आस । मोघम् । वा । देवान् । अपिऽऊहे । अग्ने ।
किम् । अस्मभ्यम् । जातऽवेदः । हृणीषे । द्रोघऽवाचः । ते । निःऽऋथम् । सचन्ताम् ॥
Padapatha Transcription Accented
yádi ǀ vā ǀ ahám ǀ ánṛta-devaḥ ǀ ā́sa ǀ mógham ǀ vā ǀ devā́n ǀ api-ūhé ǀ agne ǀ
kím ǀ asmábhyam ǀ jāta-vedaḥ ǀ hṛṇīṣe ǀ drogha-vā́caḥ ǀ te ǀ niḥ-ṛthám ǀ sacantām ǁ
Padapatha Transcription Nonaccented
yadi ǀ vā ǀ aham ǀ anṛta-devaḥ ǀ āsa ǀ mogham ǀ vā ǀ devān ǀ api-ūhe ǀ agne ǀ
kim ǀ asmabhyam ǀ jāta-vedaḥ ǀ hṛṇīṣe ǀ drogha-vācaḥ ǀ te ǀ niḥ-ṛtham ǀ sacantām ǁ
07.104.15 (Mandala. Sukta. Rik)
5.7.07.05 (Ashtaka. Adhyaya. Varga. Rik)
07.06.116 (Mandala. Anuvāka. Rik)
Samhita Devanagari Accented
अ॒द्या मु॑रीय॒ यदि॑ यातु॒धानो॒ अस्मि॒ यदि॒ वायु॑स्त॒तप॒ पूरु॑षस्य ।
अधा॒ स वी॒रैर्द॒शभि॒र्वि यू॑या॒ यो मा॒ मोघं॒ यातु॑धा॒नेत्याह॑ ॥
Samhita Devanagari Nonaccented
अद्या मुरीय यदि यातुधानो अस्मि यदि वायुस्ततप पूरुषस्य ।
अधा स वीरैर्दशभिर्वि यूया यो मा मोघं यातुधानेत्याह ॥
Samhita Transcription Accented
adyā́ murīya yádi yātudhā́no ásmi yádi vā́yustatápa pū́ruṣasya ǀ
ádhā sá vīráirdaśábhirví yūyā yó mā mógham yā́tudhānétyā́ha ǁ
Samhita Transcription Nonaccented
adyā murīya yadi yātudhāno asmi yadi vāyustatapa pūruṣasya ǀ
adhā sa vīrairdaśabhirvi yūyā yo mā mogham yātudhānetyāha ǁ
Padapatha Devanagari Accented
अ॒द्य । मु॒री॒य॒ । यदि॑ । या॒तु॒ऽधानः॑ । अस्मि॑ । यदि॑ । वा॒ । आयुः॑ । त॒तप॑ । पुरु॑षस्य ।
अध॑ । सः । वी॒रैः । द॒शऽभिः॑ । वि । यू॒याः॒ । यः । मा॒ । मोघ॑म् । यातु॑ऽधान । इति॑ । आह॑ ॥
Padapatha Devanagari Nonaccented
अद्य । मुरीय । यदि । यातुऽधानः । अस्मि । यदि । वा । आयुः । ततप । पुरुषस्य ।
अध । सः । वीरैः । दशऽभिः । वि । यूयाः । यः । मा । मोघम् । यातुऽधान । इति । आह ॥
Padapatha Transcription Accented
adyá ǀ murīya ǀ yádi ǀ yātu-dhā́naḥ ǀ ásmi ǀ yádi ǀ vā ǀ ā́yuḥ ǀ tatápa ǀ púruṣasya ǀ
ádha ǀ sáḥ ǀ vīráiḥ ǀ daśá-bhiḥ ǀ ví ǀ yūyāḥ ǀ yáḥ ǀ mā ǀ mógham ǀ yā́tu-dhāna ǀ íti ǀ ā́ha ǁ
Padapatha Transcription Nonaccented
adya ǀ murīya ǀ yadi ǀ yātu-dhānaḥ ǀ asmi ǀ yadi ǀ vā ǀ āyuḥ ǀ tatapa ǀ puruṣasya ǀ
adha ǀ saḥ ǀ vīraiḥ ǀ daśa-bhiḥ ǀ vi ǀ yūyāḥ ǀ yaḥ ǀ mā ǀ mogham ǀ yātu-dhāna ǀ iti ǀ āha ǁ
07.104.16 (Mandala. Sukta. Rik)
5.7.08.01 (Ashtaka. Adhyaya. Varga. Rik)
07.06.117 (Mandala. Anuvāka. Rik)
Samhita Devanagari Accented
यो माया॑तुं॒ यातु॑धा॒नेत्याह॒ यो वा॑ र॒क्षाः शुचि॑र॒स्मीत्याह॑ ।
इंद्र॒स्तं हं॑तु मह॒ता व॒धेन॒ विश्व॑स्य जं॒तोर॑ध॒मस्प॑दीष्ट ॥
Samhita Devanagari Nonaccented
यो मायातुं यातुधानेत्याह यो वा रक्षाः शुचिरस्मीत्याह ।
इंद्रस्तं हंतु महता वधेन विश्वस्य जंतोरधमस्पदीष्ट ॥
Samhita Transcription Accented
yó mā́yātum yā́tudhānétyā́ha yó vā rakṣā́ḥ śúcirasmī́tyā́ha ǀ
índrastám hantu mahatā́ vadhéna víśvasya jantóradhamáspadīṣṭa ǁ
Samhita Transcription Nonaccented
yo māyātum yātudhānetyāha yo vā rakṣāḥ śucirasmītyāha ǀ
indrastam hantu mahatā vadhena viśvasya jantoradhamaspadīṣṭa ǁ
Padapatha Devanagari Accented
यः । मा॒ । अया॑तुम् । यातु॑ऽधान । इति॑ । आह॑ । यः । वा॒ । र॒क्षाः । शुचिः॑ । अ॒स्मि॒ । इति॑ । आह॑ ।
इन्द्रः॑ । तम् । ह॒न्तु॒ । म॒ह॒ता । व॒धेन॑ । विश्व॑स्य । ज॒न्तोः । अ॒ध॒मः । प॒दी॒ष्ट॒ ॥
Padapatha Devanagari Nonaccented
यः । मा । अयातुम् । यातुऽधान । इति । आह । यः । वा । रक्षाः । शुचिः । अस्मि । इति । आह ।
इन्द्रः । तम् । हन्तु । महता । वधेन । विश्वस्य । जन्तोः । अधमः । पदीष्ट ॥
Padapatha Transcription Accented
yáḥ ǀ mā ǀ áyātum ǀ yā́tu-dhāna ǀ íti ǀ ā́ha ǀ yáḥ ǀ vā ǀ rakṣā́ḥ ǀ śúciḥ ǀ asmi ǀ íti ǀ ā́ha ǀ
índraḥ ǀ tám ǀ hantu ǀ mahatā́ ǀ vadhéna ǀ víśvasya ǀ jantóḥ ǀ adhamáḥ ǀ padīṣṭa ǁ
Padapatha Transcription Nonaccented
yaḥ ǀ mā ǀ ayātum ǀ yātu-dhāna ǀ iti ǀ āha ǀ yaḥ ǀ vā ǀ rakṣāḥ ǀ śuciḥ ǀ asmi ǀ iti ǀ āha ǀ
indraḥ ǀ tam ǀ hantu ǀ mahatā ǀ vadhena ǀ viśvasya ǀ jantoḥ ǀ adhamaḥ ǀ padīṣṭa ǁ
07.104.17 (Mandala. Sukta. Rik)
5.7.08.02 (Ashtaka. Adhyaya. Varga. Rik)
07.06.118 (Mandala. Anuvāka. Rik)
Samhita Devanagari Accented
प्र या जिगा॑ति ख॒र्गले॑व॒ नक्त॒मप॑ द्रु॒हा त॒न्वं१॒॑ गूह॑माना ।
व॒व्राँ अ॑नं॒ताँ अव॒ सा प॑दीष्ट॒ ग्रावा॑णो घ्नंतु र॒क्षस॑ उप॒ब्दैः ॥
Samhita Devanagari Nonaccented
प्र या जिगाति खर्गलेव नक्तमप द्रुहा तन्वं गूहमाना ।
वव्राँ अनंताँ अव सा पदीष्ट ग्रावाणो घ्नंतु रक्षस उपब्दैः ॥
Samhita Transcription Accented
prá yā́ jígāti khargáleva náktamápa druhā́ tanvám gū́hamānā ǀ
vavrā́m̐ anantā́m̐ áva sā́ padīṣṭa grā́vāṇo ghnantu rakṣása upabdáiḥ ǁ
Samhita Transcription Nonaccented
pra yā jigāti khargaleva naktamapa druhā tanvam gūhamānā ǀ
vavrām̐ anantām̐ ava sā padīṣṭa grāvāṇo ghnantu rakṣasa upabdaiḥ ǁ
Padapatha Devanagari Accented
प्र । या । जिगा॑ति । ख॒र्गला॑ऽइव । नक्त॑म् । अप॑ । द्रु॒हा । त॒न्व॑म् । गूह॑माना ।
व॒व्रान् । अ॒न॒न्तान् । अव॑ । सा । प॒दी॒ष्ट॒ । ग्रावा॑णः । घ्न॒न्तु॒ । र॒क्षसः॑ । उ॒प॒ब्दैः ॥
Padapatha Devanagari Nonaccented
प्र । या । जिगाति । खर्गलाऽइव । नक्तम् । अप । द्रुहा । तन्वम् । गूहमाना ।
वव्रान् । अनन्तान् । अव । सा । पदीष्ट । ग्रावाणः । घ्नन्तु । रक्षसः । उपब्दैः ॥
Padapatha Transcription Accented
prá ǀ yā́ ǀ jígāti ǀ khargálā-iva ǀ náktam ǀ ápa ǀ druhā́ ǀ tanvám ǀ gū́hamānā ǀ
vavrā́n ǀ anantā́n ǀ áva ǀ sā́ ǀ padīṣṭa ǀ grā́vāṇaḥ ǀ ghnantu ǀ rakṣásaḥ ǀ upabdáiḥ ǁ
Padapatha Transcription Nonaccented
pra ǀ yā ǀ jigāti ǀ khargalā-iva ǀ naktam ǀ apa ǀ druhā ǀ tanvam ǀ gūhamānā ǀ
vavrān ǀ anantān ǀ ava ǀ sā ǀ padīṣṭa ǀ grāvāṇaḥ ǀ ghnantu ǀ rakṣasaḥ ǀ upabdaiḥ ǁ
07.104.18 (Mandala. Sukta. Rik)
5.7.08.03 (Ashtaka. Adhyaya. Varga. Rik)
07.06.119 (Mandala. Anuvāka. Rik)
Samhita Devanagari Accented
वि ति॑ष्ठध्वं मरुतो वि॒क्ष्वि१॒॑च्छत॑ गृभा॒यत॑ र॒क्षसः॒ सं पि॑नष्टन ।
वयो॒ ये भू॒त्वी प॒तयं॑ति न॒क्तभि॒र्ये वा॒ रिपो॑ दधि॒रे दे॒वे अ॑ध्व॒रे ॥
Samhita Devanagari Nonaccented
वि तिष्ठध्वं मरुतो विक्ष्विच्छत गृभायत रक्षसः सं पिनष्टन ।
वयो ये भूत्वी पतयंति नक्तभिर्ये वा रिपो दधिरे देवे अध्वरे ॥
Samhita Transcription Accented
ví tiṣṭhadhvam maruto vikṣvíccháta gṛbhāyáta rakṣásaḥ sám pinaṣṭana ǀ
váyo yé bhūtvī́ patáyanti naktábhiryé vā rípo dadhiré devé adhvaré ǁ
Samhita Transcription Nonaccented
vi tiṣṭhadhvam maruto vikṣvicchata gṛbhāyata rakṣasaḥ sam pinaṣṭana ǀ
vayo ye bhūtvī patayanti naktabhirye vā ripo dadhire deve adhvare ǁ
Padapatha Devanagari Accented
वि । ति॒ष्ठ॒ध्व॒म् । म॒रु॒तः॒ । वि॒क्षु । इ॒च्छत॑ । गृ॒भा॒यत॑ । र॒क्षसः॑ । सम् । पि॒न॒ष्ट॒न॒ ।
वयः॑ । ये । भू॒त्वी । प॒तय॑न्ति । न॒क्तऽभिः॑ । ये । वा॒ । रिपः॑ । द॒धि॒रे । दे॒वे । अ॒ध्व॒रे ॥
Padapatha Devanagari Nonaccented
वि । तिष्ठध्वम् । मरुतः । विक्षु । इच्छत । गृभायत । रक्षसः । सम् । पिनष्टन ।
वयः । ये । भूत्वी । पतयन्ति । नक्तऽभिः । ये । वा । रिपः । दधिरे । देवे । अध्वरे ॥
Padapatha Transcription Accented
ví ǀ tiṣṭhadhvam ǀ marutaḥ ǀ vikṣú ǀ iccháta ǀ gṛbhāyáta ǀ rakṣásaḥ ǀ sám ǀ pinaṣṭana ǀ
váyaḥ ǀ yé ǀ bhūtvī́ ǀ patáyanti ǀ naktá-bhiḥ ǀ yé ǀ vā ǀ rípaḥ ǀ dadhiré ǀ devé ǀ adhvaré ǁ
Padapatha Transcription Nonaccented
vi ǀ tiṣṭhadhvam ǀ marutaḥ ǀ vikṣu ǀ icchata ǀ gṛbhāyata ǀ rakṣasaḥ ǀ sam ǀ pinaṣṭana ǀ
vayaḥ ǀ ye ǀ bhūtvī ǀ patayanti ǀ nakta-bhiḥ ǀ ye ǀ vā ǀ ripaḥ ǀ dadhire ǀ deve ǀ adhvare ǁ
07.104.19 (Mandala. Sukta. Rik)
5.7.08.04 (Ashtaka. Adhyaya. Varga. Rik)
07.06.120 (Mandala. Anuvāka. Rik)
Samhita Devanagari Accented
प्र व॑र्तय दि॒वो अश्मा॑नमिंद्र॒ सोम॑शितं मघव॒न्त्सं शि॑शाधि ।
प्राक्ता॒दपा॑क्तादध॒रादुद॑क्ताद॒भि ज॑हि र॒क्षसः॒ पर्व॑तेन ॥
Samhita Devanagari Nonaccented
प्र वर्तय दिवो अश्मानमिंद्र सोमशितं मघवन्त्सं शिशाधि ।
प्राक्तादपाक्तादधरादुदक्तादभि जहि रक्षसः पर्वतेन ॥
Samhita Transcription Accented
prá vartaya divó áśmānamindra sómaśitam maghavantsám śiśādhi ǀ
prā́ktādápāktādadharā́dúdaktādabhí jahi rakṣásaḥ párvatena ǁ
Samhita Transcription Nonaccented
pra vartaya divo aśmānamindra somaśitam maghavantsam śiśādhi ǀ
prāktādapāktādadharādudaktādabhi jahi rakṣasaḥ parvatena ǁ
Padapatha Devanagari Accented
प्र । व॒र्त॒य॒ । दि॒वः । अश्मा॑नम् । इ॒न्द्र॒ । सोम॑ऽशितम् । म॒घ॒ऽव॒न् । सम् । शि॒शा॒धि॒ ।
प्राक्ता॑त् । अपा॑क्तात् । अ॒ध॒रात् । उद॑क्तात् । अ॒भि । ज॒हि॒ । र॒क्षसः॑ । पर्व॑तेन ॥
Padapatha Devanagari Nonaccented
प्र । वर्तय । दिवः । अश्मानम् । इन्द्र । सोमऽशितम् । मघऽवन् । सम् । शिशाधि ।
प्राक्तात् । अपाक्तात् । अधरात् । उदक्तात् । अभि । जहि । रक्षसः । पर्वतेन ॥
Padapatha Transcription Accented
prá ǀ vartaya ǀ diváḥ ǀ áśmānam ǀ indra ǀ sóma-śitam ǀ magha-van ǀ sám ǀ śiśādhi ǀ
prā́ktāt ǀ ápāktāt ǀ adharā́t ǀ údaktāt ǀ abhí ǀ jahi ǀ rakṣásaḥ ǀ párvatena ǁ
Padapatha Transcription Nonaccented
pra ǀ vartaya ǀ divaḥ ǀ aśmānam ǀ indra ǀ soma-śitam ǀ magha-van ǀ sam ǀ śiśādhi ǀ
prāktāt ǀ apāktāt ǀ adharāt ǀ udaktāt ǀ abhi ǀ jahi ǀ rakṣasaḥ ǀ parvatena ǁ
07.104.20 (Mandala. Sukta. Rik)
5.7.08.05 (Ashtaka. Adhyaya. Varga. Rik)
07.06.121 (Mandala. Anuvāka. Rik)
Samhita Devanagari Accented
ए॒त उ॒ त्ये प॑तयंति॒ श्वया॑तव॒ इंद्रं॑ दिप्संति दि॒प्सवोऽदा॑भ्यं ।
शिशी॑ते श॒क्रः पिशु॑नेभ्यो व॒धं नू॒नं सृ॑जद॒शनिं॑ यातु॒मद्भ्यः॑ ॥
Samhita Devanagari Nonaccented
एत उ त्ये पतयंति श्वयातव इंद्रं दिप्संति दिप्सवोऽदाभ्यं ।
शिशीते शक्रः पिशुनेभ्यो वधं नूनं सृजदशनिं यातुमद्भ्यः ॥
Samhita Transcription Accented
etá u tyé patayanti śváyātava índram dipsanti dipsávó’dābhyam ǀ
śíśīte śakráḥ píśunebhyo vadhám nūnám sṛjadaśánim yātumádbhyaḥ ǁ
Samhita Transcription Nonaccented
eta u tye patayanti śvayātava indram dipsanti dipsavo’dābhyam ǀ
śiśīte śakraḥ piśunebhyo vadham nūnam sṛjadaśanim yātumadbhyaḥ ǁ
Padapatha Devanagari Accented
ए॒ते । ऊं॒ इति॑ । त्ये । प॒त॒य॒न्ति॒ । श्वऽया॑तवः । इन्द्र॑म् । दि॒प्स॒न्ति॒ । दि॒प्सवः॑ । अदा॑भ्यम् ।
शिशी॑ते । श॒क्रः । पिशु॑नेभ्यः । व॒धम् । नू॒नम् । सृ॒ज॒त् । अ॒शनि॑म् । या॒तु॒मत्ऽभ्यः॑ ॥
Padapatha Devanagari Nonaccented
एते । ऊं इति । त्ये । पतयन्ति । श्वऽयातवः । इन्द्रम् । दिप्सन्ति । दिप्सवः । अदाभ्यम् ।
शिशीते । शक्रः । पिशुनेभ्यः । वधम् । नूनम् । सृजत् । अशनिम् । यातुमत्ऽभ्यः ॥
Padapatha Transcription Accented
eté ǀ ūṃ íti ǀ tyé ǀ patayanti ǀ śvá-yātavaḥ ǀ índram ǀ dipsanti ǀ dipsávaḥ ǀ ádābhyam ǀ
śíśīte ǀ śakráḥ ǀ píśunebhyaḥ ǀ vadhám ǀ nūnám ǀ sṛjat ǀ aśánim ǀ yātumát-bhyaḥ ǁ
Padapatha Transcription Nonaccented
ete ǀ ūṃ iti ǀ tye ǀ patayanti ǀ śva-yātavaḥ ǀ indram ǀ dipsanti ǀ dipsavaḥ ǀ adābhyam ǀ
śiśīte ǀ śakraḥ ǀ piśunebhyaḥ ǀ vadham ǀ nūnam ǀ sṛjat ǀ aśanim ǀ yātumat-bhyaḥ ǁ
07.104.21 (Mandala. Sukta. Rik)
5.7.09.01 (Ashtaka. Adhyaya. Varga. Rik)
07.06.122 (Mandala. Anuvāka. Rik)
Samhita Devanagari Accented
इंद्रो॑ यातू॒नाम॑भवत्पराश॒रो ह॑वि॒र्मथी॑नाम॒भ्या॒३॒॑विवा॑सतां ।
अ॒भीदु॑ श॒क्रः प॑र॒शुर्यथा॒ वनं॒ पात्रे॑व भिं॒दन्त्स॒त ए॑ति र॒क्षसः॑ ॥
Samhita Devanagari Nonaccented
इंद्रो यातूनामभवत्पराशरो हविर्मथीनामभ्याविवासतां ।
अभीदु शक्रः परशुर्यथा वनं पात्रेव भिंदन्त्सत एति रक्षसः ॥
Samhita Transcription Accented
índro yātūnā́mabhavatparāśaró havirmáthīnāmabhyā́vívāsatām ǀ
abhī́du śakráḥ paraśúryáthā vánam pā́treva bhindántsatá eti rakṣásaḥ ǁ
Samhita Transcription Nonaccented
indro yātūnāmabhavatparāśaro havirmathīnāmabhyāvivāsatām ǀ
abhīdu śakraḥ paraśuryathā vanam pātreva bhindantsata eti rakṣasaḥ ǁ
Padapatha Devanagari Accented
इन्द्रः॑ । या॒तू॒नाम् । अ॒भ॒व॒त् । प॒रा॒ऽश॒रः । ह॒विः॒ऽमथी॑नाम् । अ॒भि । आ॒ऽविवा॑सताम् ।
अ॒भि । इत् । ऊं॒ इति॑ । श॒क्रः । प॒र॒शुः । यथा॑ । वन॑म् । पात्रा॑ऽइव । भि॒न्दन् । स॒तः । ए॒ति॒ । र॒क्षसः॑ ॥
Padapatha Devanagari Nonaccented
इन्द्रः । यातूनाम् । अभवत् । पराऽशरः । हविःऽमथीनाम् । अभि । आऽविवासताम् ।
अभि । इत् । ऊं इति । शक्रः । परशुः । यथा । वनम् । पात्राऽइव । भिन्दन् । सतः । एति । रक्षसः ॥
Padapatha Transcription Accented
índraḥ ǀ yātūnā́m ǀ abhavat ǀ parā-śaráḥ ǀ haviḥ-máthīnām ǀ abhí ǀ ā-vívāsatām ǀ
abhí ǀ ít ǀ ūṃ íti ǀ śakráḥ ǀ paraśúḥ ǀ yáthā ǀ vánam ǀ pā́trā-iva ǀ bhindán ǀ satáḥ ǀ eti ǀ rakṣásaḥ ǁ
Padapatha Transcription Nonaccented
indraḥ ǀ yātūnām ǀ abhavat ǀ parā-śaraḥ ǀ haviḥ-mathīnām ǀ abhi ǀ ā-vivāsatām ǀ
abhi ǀ it ǀ ūṃ iti ǀ śakraḥ ǀ paraśuḥ ǀ yathā ǀ vanam ǀ pātrā-iva ǀ bhindan ǀ sataḥ ǀ eti ǀ rakṣasaḥ ǁ
07.104.22 (Mandala. Sukta. Rik)
5.7.09.02 (Ashtaka. Adhyaya. Varga. Rik)
07.06.123 (Mandala. Anuvāka. Rik)
Samhita Devanagari Accented
उलू॑कयातुं शुशु॒लूक॑यातुं ज॒हि श्वया॑तुमु॒त कोक॑यातुं ।
सु॒प॒र्णया॑तुमु॒त गृध्र॑यातुं दृ॒षदे॑व॒ प्र मृ॑ण॒ रक्ष॑ इंद्र ॥
Samhita Devanagari Nonaccented
उलूकयातुं शुशुलूकयातुं जहि श्वयातुमुत कोकयातुं ।
सुपर्णयातुमुत गृध्रयातुं दृषदेव प्र मृण रक्ष इंद्र ॥
Samhita Transcription Accented
úlūkayātum śuśulū́kayātum jahí śváyātumutá kókayātum ǀ
suparṇáyātumutá gṛ́dhrayātum dṛṣádeva prá mṛṇa rákṣa indra ǁ
Samhita Transcription Nonaccented
ulūkayātum śuśulūkayātum jahi śvayātumuta kokayātum ǀ
suparṇayātumuta gṛdhrayātum dṛṣadeva pra mṛṇa rakṣa indra ǁ
Padapatha Devanagari Accented
उलू॑कऽयातुम् । शु॒शु॒लूक॑ऽयातुम् । ज॒हि । श्वऽया॑तुम् । उ॒त । कोक॑ऽयातुम् ।
सु॒प॒र्णऽया॑तुम् । उ॒त । गृध्र॑ऽयातुम् । दृ॒षदा॑ऽइव । प्र । मृ॒ण॒ । रक्षः॑ । इ॒न्द्र॒ ॥
Padapatha Devanagari Nonaccented
उलूकऽयातुम् । शुशुलूकऽयातुम् । जहि । श्वऽयातुम् । उत । कोकऽयातुम् ।
सुपर्णऽयातुम् । उत । गृध्रऽयातुम् । दृषदाऽइव । प्र । मृण । रक्षः । इन्द्र ॥
Padapatha Transcription Accented
úlūka-yātum ǀ śuśulū́ka-yātum ǀ jahí ǀ śvá-yātum ǀ utá ǀ kóka-yātum ǀ
suparṇá-yātum ǀ utá ǀ gṛ́dhra-yātum ǀ dṛṣádā-iva ǀ prá ǀ mṛṇa ǀ rákṣaḥ ǀ indra ǁ
Padapatha Transcription Nonaccented
ulūka-yātum ǀ śuśulūka-yātum ǀ jahi ǀ śva-yātum ǀ uta ǀ koka-yātum ǀ
suparṇa-yātum ǀ uta ǀ gṛdhra-yātum ǀ dṛṣadā-iva ǀ pra ǀ mṛṇa ǀ rakṣaḥ ǀ indra ǁ
07.104.23 (Mandala. Sukta. Rik)
5.7.09.03 (Ashtaka. Adhyaya. Varga. Rik)
07.06.124 (Mandala. Anuvāka. Rik)
Samhita Devanagari Accented
मा नो॒ रक्षो॑ अ॒भि न॑ड्यातु॒माव॑ता॒मपो॑च्छतु मिथु॒ना या कि॑मी॒दिना॑ ।
पृ॒थि॒वी नः॒ पार्थि॑वात्पा॒त्वंह॑सो॒ऽंतरि॑क्षं दि॒व्यात्पा॑त्व॒स्मान् ॥
Samhita Devanagari Nonaccented
मा नो रक्षो अभि नड्यातुमावतामपोच्छतु मिथुना या किमीदिना ।
पृथिवी नः पार्थिवात्पात्वंहसोऽंतरिक्षं दिव्यात्पात्वस्मान् ॥
Samhita Transcription Accented
mā́ no rákṣo abhí naḍyātumā́vatāmápocchatu mithunā́ yā́ kimīdínā ǀ
pṛthivī́ naḥ pā́rthivātpātváṃhaso’ntárikṣam divyā́tpātvasmā́n ǁ
Samhita Transcription Nonaccented
mā no rakṣo abhi naḍyātumāvatāmapocchatu mithunā yā kimīdinā ǀ
pṛthivī naḥ pārthivātpātvaṃhaso’ntarikṣam divyātpātvasmān ǁ
Padapatha Devanagari Accented
मा । नः॒ । रक्षः॑ । अ॒भि । न॒ट् । या॒तु॒ऽमाव॑ताम् । अप॑ । उ॒च्छ॒तु॒ । मि॒थु॒ना । या । कि॒मी॒दिना॑ ।
पृ॒थि॒वी । नः॒ । पार्थि॑वात् । पा॒तु॒ । अंह॑सः । अ॒न्तरि॑क्षम् । दि॒व्यात् । पा॒तु॒ । अ॒स्मान् ॥
Padapatha Devanagari Nonaccented
मा । नः । रक्षः । अभि । नट् । यातुऽमावताम् । अप । उच्छतु । मिथुना । या । किमीदिना ।
पृथिवी । नः । पार्थिवात् । पातु । अंहसः । अन्तरिक्षम् । दिव्यात् । पातु । अस्मान् ॥
Padapatha Transcription Accented
mā́ ǀ naḥ ǀ rákṣaḥ ǀ abhí ǀ naṭ ǀ yātu-mā́vatām ǀ ápa ǀ ucchatu ǀ mithunā́ ǀ yā́ ǀ kimīdínā ǀ
pṛthivī́ ǀ naḥ ǀ pā́rthivāt ǀ pātu ǀ áṃhasaḥ ǀ antárikṣam ǀ divyā́t ǀ pātu ǀ asmā́n ǁ
Padapatha Transcription Nonaccented
mā ǀ naḥ ǀ rakṣaḥ ǀ abhi ǀ naṭ ǀ yātu-māvatām ǀ apa ǀ ucchatu ǀ mithunā ǀ yā ǀ kimīdinā ǀ
pṛthivī ǀ naḥ ǀ pārthivāt ǀ pātu ǀ aṃhasaḥ ǀ antarikṣam ǀ divyāt ǀ pātu ǀ asmān ǁ
07.104.24 (Mandala. Sukta. Rik)
5.7.09.04 (Ashtaka. Adhyaya. Varga. Rik)
07.06.125 (Mandala. Anuvāka. Rik)
Samhita Devanagari Accented
इंद्र॑ ज॒हि पुमां॑सं यातु॒धान॑मु॒त स्त्रियं॑ मा॒यया॒ शाश॑दानां ।
विग्री॑वासो॒ मूर॑देवा ऋदंतु॒ मा ते दृ॑शं॒त्सूर्य॑मु॒च्चरं॑तं ॥
Samhita Devanagari Nonaccented
इंद्र जहि पुमांसं यातुधानमुत स्त्रियं मायया शाशदानां ।
विग्रीवासो मूरदेवा ऋदंतु मा ते दृशंत्सूर्यमुच्चरंतं ॥
Samhita Transcription Accented
índra jahí púmāṃsam yātudhā́namutá stríyam māyáyā śā́śadānām ǀ
vígrīvāso mū́radevā ṛdantu mā́ té dṛśantsū́ryamuccárantam ǁ
Samhita Transcription Nonaccented
indra jahi pumāṃsam yātudhānamuta striyam māyayā śāśadānām ǀ
vigrīvāso mūradevā ṛdantu mā te dṛśantsūryamuccarantam ǁ
Padapatha Devanagari Accented
इन्द्र॑ । ज॒हि । पुमां॑सम् । या॒तु॒ऽधान॑म् । उ॒त । स्त्रिय॑म् । मा॒यया॑ । शाश॑दानाम् ।
विऽग्री॑वासः । मूर॑ऽदेवाः । ऋ॒द॒न्तु॒ । मा । ते । दृ॒श॒न् । सूर्य॑म् । उ॒त्ऽचर॑न्तम् ॥
Padapatha Devanagari Nonaccented
इन्द्र । जहि । पुमांसम् । यातुऽधानम् । उत । स्त्रियम् । मायया । शाशदानाम् ।
विऽग्रीवासः । मूरऽदेवाः । ऋदन्तु । मा । ते । दृशन् । सूर्यम् । उत्ऽचरन्तम् ॥
Padapatha Transcription Accented
índra ǀ jahí ǀ púmāṃsam ǀ yātu-dhā́nam ǀ utá ǀ stríyam ǀ māyáyā ǀ śā́śadānām ǀ
ví-grīvāsaḥ ǀ mū́ra-devāḥ ǀ ṛdantu ǀ mā́ ǀ té ǀ dṛśan ǀ sū́ryam ǀ ut-cárantam ǁ
Padapatha Transcription Nonaccented
indra ǀ jahi ǀ pumāṃsam ǀ yātu-dhānam ǀ uta ǀ striyam ǀ māyayā ǀ śāśadānām ǀ
vi-grīvāsaḥ ǀ mūra-devāḥ ǀ ṛdantu ǀ mā ǀ te ǀ dṛśan ǀ sūryam ǀ ut-carantam ǁ
07.104.25 (Mandala. Sukta. Rik)
5.7.09.05 (Ashtaka. Adhyaya. Varga. Rik)
07.06.126 (Mandala. Anuvāka. Rik)
Samhita Devanagari Accented
प्रति॑ चक्ष्व॒ वि च॒क्ष्वेंद्र॑श्च सोम जागृतं ।
रक्षो॑भ्यो व॒धम॑स्यतम॒शनिं॑ यातु॒मद्भ्यः॑ ॥
Samhita Devanagari Nonaccented
प्रति चक्ष्व वि चक्ष्वेंद्रश्च सोम जागृतं ।
रक्षोभ्यो वधमस्यतमशनिं यातुमद्भ्यः ॥
Samhita Transcription Accented
práti cakṣva ví cakṣvéndraśca soma jāgṛtam ǀ
rákṣobhyo vadhámasyatamaśánim yātumádbhyaḥ ǁ
Samhita Transcription Nonaccented
prati cakṣva vi cakṣvendraśca soma jāgṛtam ǀ
rakṣobhyo vadhamasyatamaśanim yātumadbhyaḥ ǁ
Padapatha Devanagari Accented
प्रति॑ । च॒क्ष्व॒ । वि । च॒क्ष्व॒ । इन्द्रः॑ । च॒ । सो॒म॒ । जा॒गृ॒त॒म् ।
रक्षः॑ऽभ्यः । व॒धम् । अ॒स्य॒त॒म् । अ॒शनि॑म् । या॒तु॒मत्ऽभ्यः॑ ॥
Padapatha Devanagari Nonaccented
प्रति । चक्ष्व । वि । चक्ष्व । इन्द्रः । च । सोम । जागृतम् ।
रक्षःऽभ्यः । वधम् । अस्यतम् । अशनिम् । यातुमत्ऽभ्यः ॥
Padapatha Transcription Accented
práti ǀ cakṣva ǀ ví ǀ cakṣva ǀ índraḥ ǀ ca ǀ soma ǀ jāgṛtam ǀ
rákṣaḥ-bhyaḥ ǀ vadhám ǀ asyatam ǀ aśánim ǀ yātumát-bhyaḥ ǁ
Padapatha Transcription Nonaccented
prati ǀ cakṣva ǀ vi ǀ cakṣva ǀ indraḥ ǀ ca ǀ soma ǀ jāgṛtam ǀ
rakṣaḥ-bhyaḥ ǀ vadham ǀ asyatam ǀ aśanim ǀ yātumat-bhyaḥ ǁ