|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 9
Sūkta 1
|
1. Info |
| To: | soma pavamāna | |
| From: | madhucchandas vaiśvāmitra | |
| Metres: | 1st set of styles: nicṛdgāyatrī (3, 7-10); gāyatrī (1, 2, 6); virāḍgāyatrī (4, 5) 2nd set of styles: gāyatrī |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
09.001.01 (Mandala. Sukta. Rik)
6.7.16.01 (Ashtaka. Adhyaya. Varga. Rik)
09.01.001 (Mandala. Anuvāka. Rik)
Samhita Devanagari Accented
स्वादि॑ष्ठया॒ मदि॑ष्ठया॒ पव॑स्व सोम॒ धार॑या ।
इंद्रा॑य॒ पात॑वे सु॒तः ॥
Samhita Devanagari Nonaccented
स्वादिष्ठया मदिष्ठया पवस्व सोम धारया ।
इंद्राय पातवे सुतः ॥
Samhita Transcription Accented
svā́diṣṭhayā mádiṣṭhayā pávasva soma dhā́rayā ǀ
índrāya pā́tave sutáḥ ǁ
Samhita Transcription Nonaccented
svādiṣṭhayā madiṣṭhayā pavasva soma dhārayā ǀ
indrāya pātave sutaḥ ǁ
Padapatha Devanagari Accented
स्वादि॑ष्ठया । मदि॑ष्ठया । पव॑स्व । सो॒म॒ । धार॑या ।
इन्द्रा॑य । पात॑वे । सु॒तः ॥
Padapatha Devanagari Nonaccented
स्वादिष्ठया । मदिष्ठया । पवस्व । सोम । धारया ।
इन्द्राय । पातवे । सुतः ॥
Padapatha Transcription Accented
svā́diṣṭhayā ǀ mádiṣṭhayā ǀ pávasva ǀ soma ǀ dhā́rayā ǀ
índrāya ǀ pā́tave ǀ sutáḥ ǁ
Padapatha Transcription Nonaccented
svādiṣṭhayā ǀ madiṣṭhayā ǀ pavasva ǀ soma ǀ dhārayā ǀ
indrāya ǀ pātave ǀ sutaḥ ǁ
09.001.02 (Mandala. Sukta. Rik)
6.7.16.02 (Ashtaka. Adhyaya. Varga. Rik)
09.01.002 (Mandala. Anuvāka. Rik)
Samhita Devanagari Accented
र॒क्षो॒हा वि॒श्वच॑र्षणिर॒भि योनि॒मयो॑हतं ।
द्रुणा॑ स॒धस्थ॒मास॑दत् ॥
Samhita Devanagari Nonaccented
रक्षोहा विश्वचर्षणिरभि योनिमयोहतं ।
द्रुणा सधस्थमासदत् ॥
Samhita Transcription Accented
rakṣohā́ viśvácarṣaṇirabhí yónimáyohatam ǀ
drúṇā sadhásthamā́sadat ǁ
Samhita Transcription Nonaccented
rakṣohā viśvacarṣaṇirabhi yonimayohatam ǀ
druṇā sadhasthamāsadat ǁ
Padapatha Devanagari Accented
र॒क्षः॒ऽहा । वि॒श्वऽच॑र्षणिः । अ॒भि । योनि॑म् । अयः॑ऽहतम् ।
द्रुणा॑ । स॒धऽस्थ॑म् । आ । अ॒स॒द॒त् ॥
Padapatha Devanagari Nonaccented
रक्षःऽहा । विश्वऽचर्षणिः । अभि । योनिम् । अयःऽहतम् ।
द्रुणा । सधऽस्थम् । आ । असदत् ॥
Padapatha Transcription Accented
rakṣaḥ-hā́ ǀ viśvá-carṣaṇiḥ ǀ abhí ǀ yónim ǀ áyaḥ-hatam ǀ
drúṇā ǀ sadhá-stham ǀ ā́ ǀ asadat ǁ
Padapatha Transcription Nonaccented
rakṣaḥ-hā ǀ viśva-carṣaṇiḥ ǀ abhi ǀ yonim ǀ ayaḥ-hatam ǀ
druṇā ǀ sadha-stham ǀ ā ǀ asadat ǁ
09.001.03 (Mandala. Sukta. Rik)
6.7.16.03 (Ashtaka. Adhyaya. Varga. Rik)
09.01.003 (Mandala. Anuvāka. Rik)
Samhita Devanagari Accented
व॒रि॒वो॒धात॑मो भव॒ मंहि॑ष्ठो वृत्र॒हंत॑मः ।
पर्षि॒ राधो॑ म॒घोनां॑ ॥
Samhita Devanagari Nonaccented
वरिवोधातमो भव मंहिष्ठो वृत्रहंतमः ।
पर्षि राधो मघोनां ॥
Samhita Transcription Accented
varivodhā́tamo bhava máṃhiṣṭho vṛtrahántamaḥ ǀ
párṣi rā́dho maghónām ǁ
Samhita Transcription Nonaccented
varivodhātamo bhava maṃhiṣṭho vṛtrahantamaḥ ǀ
parṣi rādho maghonām ǁ
Padapatha Devanagari Accented
व॒रि॒वः॒ऽधात॑मः । भ॒व॒ । मंहि॑ष्ठः । वृ॒त्र॒हन्ऽत॑मः ।
पर्षि॑ । राधः॑ । म॒घोना॑म् ॥
Padapatha Devanagari Nonaccented
वरिवःऽधातमः । भव । मंहिष्ठः । वृत्रहन्ऽतमः ।
पर्षि । राधः । मघोनाम् ॥
Padapatha Transcription Accented
varivaḥ-dhā́tamaḥ ǀ bhava ǀ máṃhiṣṭhaḥ ǀ vṛtrahán-tamaḥ ǀ
párṣi ǀ rā́dhaḥ ǀ maghónām ǁ
Padapatha Transcription Nonaccented
varivaḥ-dhātamaḥ ǀ bhava ǀ maṃhiṣṭhaḥ ǀ vṛtrahan-tamaḥ ǀ
parṣi ǀ rādhaḥ ǀ maghonām ǁ
09.001.04 (Mandala. Sukta. Rik)
6.7.16.04 (Ashtaka. Adhyaya. Varga. Rik)
09.01.004 (Mandala. Anuvāka. Rik)
Samhita Devanagari Accented
अ॒भ्य॑र्ष म॒हानां॑ दे॒वानां॑ वी॒तिमंध॑सा ।
अ॒भि वाज॑मु॒त श्रवः॑ ॥
Samhita Devanagari Nonaccented
अभ्यर्ष महानां देवानां वीतिमंधसा ।
अभि वाजमुत श्रवः ॥
Samhita Transcription Accented
abhyárṣa mahā́nām devā́nām vītímándhasā ǀ
abhí vā́jamutá śrávaḥ ǁ
Samhita Transcription Nonaccented
abhyarṣa mahānām devānām vītimandhasā ǀ
abhi vājamuta śravaḥ ǁ
Padapatha Devanagari Accented
अ॒भि । अ॒र्ष॒ । म॒हाना॑म् । दे॒वाना॑म् । वी॒तिम् । अन्ध॑सा ।
अ॒भि । वाज॑म् । उ॒त । श्रवः॑ ॥
Padapatha Devanagari Nonaccented
अभि । अर्ष । महानाम् । देवानाम् । वीतिम् । अन्धसा ।
अभि । वाजम् । उत । श्रवः ॥
Padapatha Transcription Accented
abhí ǀ arṣa ǀ mahā́nām ǀ devā́nām ǀ vītím ǀ ándhasā ǀ
abhí ǀ vā́jam ǀ utá ǀ śrávaḥ ǁ
Padapatha Transcription Nonaccented
abhi ǀ arṣa ǀ mahānām ǀ devānām ǀ vītim ǀ andhasā ǀ
abhi ǀ vājam ǀ uta ǀ śravaḥ ǁ
09.001.05 (Mandala. Sukta. Rik)
6.7.16.05 (Ashtaka. Adhyaya. Varga. Rik)
09.01.005 (Mandala. Anuvāka. Rik)
Samhita Devanagari Accented
त्वामच्छा॑ चरामसि॒ तदिदर्थं॑ दि॒वेदि॑वे ।
इंदो॒ त्वे न॑ आ॒शसः॑ ॥
Samhita Devanagari Nonaccented
त्वामच्छा चरामसि तदिदर्थं दिवेदिवे ।
इंदो त्वे न आशसः ॥
Samhita Transcription Accented
tvā́mácchā carāmasi tádídártham divédive ǀ
índo tvé na āśásaḥ ǁ
Samhita Transcription Nonaccented
tvāmacchā carāmasi tadidartham divedive ǀ
indo tve na āśasaḥ ǁ
Padapatha Devanagari Accented
त्वाम् । अच्छ॑ । च॒रा॒म॒सि॒ । तत् । इत् । अर्थ॑म् । दि॒वेऽदि॑वे ।
इन्दो॒ इति॑ । त्वे इति॑ । नः॒ । आ॒ऽशसः॑ ॥
Padapatha Devanagari Nonaccented
त्वाम् । अच्छ । चरामसि । तत् । इत् । अर्थम् । दिवेऽदिवे ।
इन्दो इति । त्वे इति । नः । आऽशसः ॥
Padapatha Transcription Accented
tvā́m ǀ áccha ǀ carāmasi ǀ tát ǀ ít ǀ ártham ǀ divé-dive ǀ
índo íti ǀ tvé íti ǀ naḥ ǀ ā-śásaḥ ǁ
Padapatha Transcription Nonaccented
tvām ǀ accha ǀ carāmasi ǀ tat ǀ it ǀ artham ǀ dive-dive ǀ
indo iti ǀ tve iti ǀ naḥ ǀ ā-śasaḥ ǁ
09.001.06 (Mandala. Sukta. Rik)
6.7.17.01 (Ashtaka. Adhyaya. Varga. Rik)
09.01.006 (Mandala. Anuvāka. Rik)
Samhita Devanagari Accented
पु॒नाति॑ ते परि॒स्रुतं॒ सोमं॒ सूर्य॑स्य दुहि॒ता ।
वारे॑ण॒ शश्व॑ता॒ तना॑ ॥
Samhita Devanagari Nonaccented
पुनाति ते परिस्रुतं सोमं सूर्यस्य दुहिता ।
वारेण शश्वता तना ॥
Samhita Transcription Accented
punā́ti te parisrútam sómam sū́ryasya duhitā́ ǀ
vā́reṇa śáśvatā tánā ǁ
Samhita Transcription Nonaccented
punāti te parisrutam somam sūryasya duhitā ǀ
vāreṇa śaśvatā tanā ǁ
Padapatha Devanagari Accented
पु॒नाति॑ । ते॒ । प॒रि॒ऽस्रुत॑म् । सोम॑म् । सूर्य॑स्य । दु॒हि॒ता ।
वारे॑ण । शश्व॑ता । तना॑ ॥
Padapatha Devanagari Nonaccented
पुनाति । ते । परिऽस्रुतम् । सोमम् । सूर्यस्य । दुहिता ।
वारेण । शश्वता । तना ॥
Padapatha Transcription Accented
punā́ti ǀ te ǀ pari-srútam ǀ sómam ǀ sū́ryasya ǀ duhitā́ ǀ
vā́reṇa ǀ śáśvatā ǀ tánā ǁ
Padapatha Transcription Nonaccented
punāti ǀ te ǀ pari-srutam ǀ somam ǀ sūryasya ǀ duhitā ǀ
vāreṇa ǀ śaśvatā ǀ tanā ǁ
09.001.07 (Mandala. Sukta. Rik)
6.7.17.02 (Ashtaka. Adhyaya. Varga. Rik)
09.01.007 (Mandala. Anuvāka. Rik)
Samhita Devanagari Accented
तमी॒मण्वीः॑ सम॒र्य आ गृ॒भ्णंति॒ योष॑णो॒ दश॑ ।
स्वसा॑रः॒ पार्ये॑ दि॒वि ॥
Samhita Devanagari Nonaccented
तमीमण्वीः समर्य आ गृभ्णंति योषणो दश ।
स्वसारः पार्ये दिवि ॥
Samhita Transcription Accented
támīmáṇvīḥ samaryá ā́ gṛbhṇánti yóṣaṇo dáśa ǀ
svásāraḥ pā́rye diví ǁ
Samhita Transcription Nonaccented
tamīmaṇvīḥ samarya ā gṛbhṇanti yoṣaṇo daśa ǀ
svasāraḥ pārye divi ǁ
Padapatha Devanagari Accented
तम् । ई॒म् । अण्वीः॑ । स॒ऽम॒र्ये । आ । गृ॒भ्णन्ति॑ । योष॑णः । दश॑ ।
स्वसा॑रः । पार्ये॑ । दि॒वि ॥
Padapatha Devanagari Nonaccented
तम् । ईम् । अण्वीः । सऽमर्ये । आ । गृभ्णन्ति । योषणः । दश ।
स्वसारः । पार्ये । दिवि ॥
Padapatha Transcription Accented
tám ǀ īm ǀ áṇvīḥ ǀ sa-maryé ǀ ā́ ǀ gṛbhṇánti ǀ yóṣaṇaḥ ǀ dáśa ǀ
svásāraḥ ǀ pā́rye ǀ diví ǁ
Padapatha Transcription Nonaccented
tam ǀ īm ǀ aṇvīḥ ǀ sa-marye ǀ ā ǀ gṛbhṇanti ǀ yoṣaṇaḥ ǀ daśa ǀ
svasāraḥ ǀ pārye ǀ divi ǁ
09.001.08 (Mandala. Sukta. Rik)
6.7.17.03 (Ashtaka. Adhyaya. Varga. Rik)
09.01.008 (Mandala. Anuvāka. Rik)
Samhita Devanagari Accented
तमीं॑ हिन्वंत्य॒ग्रुवो॒ धमं॑ति बाकु॒रं दृतिं॑ ।
त्रि॒धातु॑ वार॒णं मधु॑ ॥
Samhita Devanagari Nonaccented
तमीं हिन्वंत्यग्रुवो धमंति बाकुरं दृतिं ।
त्रिधातु वारणं मधु ॥
Samhita Transcription Accented
támīm hinvantyagrúvo dhámanti bākurám dṛ́tim ǀ
tridhā́tu vāraṇám mádhu ǁ
Samhita Transcription Nonaccented
tamīm hinvantyagruvo dhamanti bākuram dṛtim ǀ
tridhātu vāraṇam madhu ǁ
Padapatha Devanagari Accented
तम् । ई॒म् । हि॒न्व॒न्ति॒ । अ॒ग्रुवः॑ । धम॑न्ति । बा॒कु॒रम् । दृति॑म् ।
त्रि॒ऽधातु॑ । वा॒र॒णम् । मधु॑ ॥
Padapatha Devanagari Nonaccented
तम् । ईम् । हिन्वन्ति । अग्रुवः । धमन्ति । बाकुरम् । दृतिम् ।
त्रिऽधातु । वारणम् । मधु ॥
Padapatha Transcription Accented
tám ǀ īm ǀ hinvanti ǀ agrúvaḥ ǀ dhámanti ǀ bākurám ǀ dṛ́tim ǀ
tri-dhā́tu ǀ vāraṇám ǀ mádhu ǁ
Padapatha Transcription Nonaccented
tam ǀ īm ǀ hinvanti ǀ agruvaḥ ǀ dhamanti ǀ bākuram ǀ dṛtim ǀ
tri-dhātu ǀ vāraṇam ǀ madhu ǁ
09.001.09 (Mandala. Sukta. Rik)
6.7.17.04 (Ashtaka. Adhyaya. Varga. Rik)
09.01.009 (Mandala. Anuvāka. Rik)
Samhita Devanagari Accented
अ॒भी॒३॒॑ममघ्न्या॑ उ॒त श्री॒णंति॑ धे॒नवः॒ शिशुं॑ ।
सोम॒मिंद्रा॑य॒ पात॑वे ॥
Samhita Devanagari Nonaccented
अभीममघ्न्या उत श्रीणंति धेनवः शिशुं ।
सोममिंद्राय पातवे ॥
Samhita Transcription Accented
abhī́mámághnyā utá śrīṇánti dhenávaḥ śíśum ǀ
sómamíndrāya pā́tave ǁ
Samhita Transcription Nonaccented
abhīmamaghnyā uta śrīṇanti dhenavaḥ śiśum ǀ
somamindrāya pātave ǁ
Padapatha Devanagari Accented
अ॒भि । इ॒मम् । अघ्न्याः॑ । उ॒त । श्री॒णन्ति॑ । धे॒नवः॑ । शिशु॑म् ।
सोम॑म् । इन्द्रा॑य । पात॑वे ॥
Padapatha Devanagari Nonaccented
अभि । इमम् । अघ्न्याः । उत । श्रीणन्ति । धेनवः । शिशुम् ।
सोमम् । इन्द्राय । पातवे ॥
Padapatha Transcription Accented
abhí ǀ imám ǀ ághnyāḥ ǀ utá ǀ śrīṇánti ǀ dhenávaḥ ǀ śíśum ǀ
sómam ǀ índrāya ǀ pā́tave ǁ
Padapatha Transcription Nonaccented
abhi ǀ imam ǀ aghnyāḥ ǀ uta ǀ śrīṇanti ǀ dhenavaḥ ǀ śiśum ǀ
somam ǀ indrāya ǀ pātave ǁ
09.001.10 (Mandala. Sukta. Rik)
6.7.17.05 (Ashtaka. Adhyaya. Varga. Rik)
09.01.010 (Mandala. Anuvāka. Rik)
Samhita Devanagari Accented
अ॒स्येदिंद्रो॒ मदे॒ष्वा विश्वा॑ वृ॒त्राणि॑ जिघ्नते ।
शूरो॑ म॒घा च॑ मंहते ॥
Samhita Devanagari Nonaccented
अस्येदिंद्रो मदेष्वा विश्वा वृत्राणि जिघ्नते ।
शूरो मघा च मंहते ॥
Samhita Transcription Accented
asyédíndro mádeṣvā́ víśvā vṛtrā́ṇi jighnate ǀ
śū́ro maghā́ ca maṃhate ǁ
Samhita Transcription Nonaccented
asyedindro madeṣvā viśvā vṛtrāṇi jighnate ǀ
śūro maghā ca maṃhate ǁ
Padapatha Devanagari Accented
अ॒स्य । इत् । इन्द्रः॑ । मदे॑षु । आ । विश्वा॑ । वृ॒त्राणि॑ । जि॒घ्न॒ते॒ ।
शूरः॑ । म॒घा । च॒ । मं॒ह॒ते॒ ॥
Padapatha Devanagari Nonaccented
अस्य । इत् । इन्द्रः । मदेषु । आ । विश्वा । वृत्राणि । जिघ्नते ।
शूरः । मघा । च । मंहते ॥
Padapatha Transcription Accented
asyá ǀ ít ǀ índraḥ ǀ mádeṣu ǀ ā́ ǀ víśvā ǀ vṛtrā́ṇi ǀ jighnate ǀ
śū́raḥ ǀ maghā́ ǀ ca ǀ maṃhate ǁ
Padapatha Transcription Nonaccented
asya ǀ it ǀ indraḥ ǀ madeṣu ǀ ā ǀ viśvā ǀ vṛtrāṇi ǀ jighnate ǀ
śūraḥ ǀ maghā ǀ ca ǀ maṃhate ǁ