|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 150
|
1. Info |
| To: | agni | |
| From: | mṛḻīka vāsiṣṭha | |
| Metres: | 1st set of styles: bṛhatī (1, 2); nicṛdbṛhatī (3); upariṣṭājyotirnāmajagatī vā (4); upariṣṭājyoti (5) 2nd set of styles: bṛhatī (1-3); upariṣṭājjyotis or jagatī (4); upariṣṭājjyotis (5) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.150.01 (Mandala. Sukta. Rik)
8.8.08.01 (Ashtaka. Adhyaya. Varga. Rik)
10.11.135 (Mandala. Anuvāka. Rik)
Samhita Devanagari Accented
समि॑द्धश्चि॒त्समि॑ध्यसे दे॒वेभ्यो॑ हव्यवाहन ।
आ॒दि॒त्यै रु॒द्रैर्वसु॑भिर्न॒ आ ग॑हि मृळी॒काय॑ न॒ आ ग॑हि ॥
Samhita Devanagari Nonaccented
समिद्धश्चित्समिध्यसे देवेभ्यो हव्यवाहन ।
आदित्यै रुद्रैर्वसुभिर्न आ गहि मृळीकाय न आ गहि ॥
Samhita Transcription Accented
sámiddhaścitsámidhyase devébhyo havyavāhana ǀ
ādityái rudráirvásubhirna ā́ gahi mṛḷīkā́ya na ā́ gahi ǁ
Samhita Transcription Nonaccented
samiddhaścitsamidhyase devebhyo havyavāhana ǀ
ādityai rudrairvasubhirna ā gahi mṛḷīkāya na ā gahi ǁ
Padapatha Devanagari Accented
सम्ऽइ॑द्धः । चि॒त् । सम् । इ॒ध्य॒से॒ । दे॒वेभ्यः॑ । ह॒व्य॒ऽवा॒ह॒न॒ ।
आ॒दि॒त्यैः । रु॒द्रैः । वसु॑ऽभिः । नः॒ । आ । ग॒हि॒ । मृ॒ळी॒काय॑ । नः॒ । आ । ग॒हि॒ ॥
Padapatha Devanagari Nonaccented
सम्ऽइद्धः । चित् । सम् । इध्यसे । देवेभ्यः । हव्यऽवाहन ।
आदित्यैः । रुद्रैः । वसुऽभिः । नः । आ । गहि । मृळीकाय । नः । आ । गहि ॥
Padapatha Transcription Accented
sám-iddhaḥ ǀ cit ǀ sám ǀ idhyase ǀ devébhyaḥ ǀ havya-vāhana ǀ
ādityáiḥ ǀ rudráiḥ ǀ vásu-bhiḥ ǀ naḥ ǀ ā́ ǀ gahi ǀ mṛḷīkā́ya ǀ naḥ ǀ ā́ ǀ gahi ǁ
Padapatha Transcription Nonaccented
sam-iddhaḥ ǀ cit ǀ sam ǀ idhyase ǀ devebhyaḥ ǀ havya-vāhana ǀ
ādityaiḥ ǀ rudraiḥ ǀ vasu-bhiḥ ǀ naḥ ǀ ā ǀ gahi ǀ mṛḷīkāya ǀ naḥ ǀ ā ǀ gahi ǁ
10.150.02 (Mandala. Sukta. Rik)
8.8.08.02 (Ashtaka. Adhyaya. Varga. Rik)
10.11.136 (Mandala. Anuvāka. Rik)
Samhita Devanagari Accented
इ॒मं य॒ज्ञमि॒दं वचो॑ जुजुषा॒ण उ॒पाग॑हि ।
मर्ता॑सस्त्वा समिधान हवामहे मृळी॒काय॑ हवामहे ॥
Samhita Devanagari Nonaccented
इमं यज्ञमिदं वचो जुजुषाण उपागहि ।
मर्तासस्त्वा समिधान हवामहे मृळीकाय हवामहे ॥
Samhita Transcription Accented
imám yajñámidám váco jujuṣāṇá upā́gahi ǀ
mártāsastvā samidhāna havāmahe mṛḷīkā́ya havāmahe ǁ
Samhita Transcription Nonaccented
imam yajñamidam vaco jujuṣāṇa upāgahi ǀ
martāsastvā samidhāna havāmahe mṛḷīkāya havāmahe ǁ
Padapatha Devanagari Accented
इ॒मम् । य॒ज्ञम् । इ॒दम् । वचः॑ । जु॒जु॒षा॒णः । उ॒प॒ऽआग॑हि ।
मर्ता॑सः । त्वा॒ । स॒म्ऽइ॒धा॒न॒ । ह॒वा॒म॒हे॒ । मृ॒ळी॒काय॑ । ह॒वा॒म॒हे॒ ॥
Padapatha Devanagari Nonaccented
इमम् । यज्ञम् । इदम् । वचः । जुजुषाणः । उपऽआगहि ।
मर्तासः । त्वा । सम्ऽइधान । हवामहे । मृळीकाय । हवामहे ॥
Padapatha Transcription Accented
imám ǀ yajñám ǀ idám ǀ vácaḥ ǀ jujuṣāṇáḥ ǀ upa-ā́gahi ǀ
mártāsaḥ ǀ tvā ǀ sam-idhāna ǀ havāmahe ǀ mṛḷīkā́ya ǀ havāmahe ǁ
Padapatha Transcription Nonaccented
imam ǀ yajñam ǀ idam ǀ vacaḥ ǀ jujuṣāṇaḥ ǀ upa-āgahi ǀ
martāsaḥ ǀ tvā ǀ sam-idhāna ǀ havāmahe ǀ mṛḷīkāya ǀ havāmahe ǁ
10.150.03 (Mandala. Sukta. Rik)
8.8.08.03 (Ashtaka. Adhyaya. Varga. Rik)
10.11.137 (Mandala. Anuvāka. Rik)
Samhita Devanagari Accented
त्वामु॑ जा॒तवे॑दसं वि॒श्ववा॑रं गृणे धि॒या ।
अग्ने॑ दे॒वाँ आ व॑ह नः प्रि॒यव्र॑तान्मृळी॒काय॑ प्रि॒यव्र॑तान् ॥
Samhita Devanagari Nonaccented
त्वामु जातवेदसं विश्ववारं गृणे धिया ।
अग्ने देवाँ आ वह नः प्रियव्रतान्मृळीकाय प्रियव्रतान् ॥
Samhita Transcription Accented
tvā́mu jātávedasam viśvávāram gṛṇe dhiyā́ ǀ
ágne devā́m̐ ā́ vaha naḥ priyávratānmṛḷīkā́ya priyávratān ǁ
Samhita Transcription Nonaccented
tvāmu jātavedasam viśvavāram gṛṇe dhiyā ǀ
agne devām̐ ā vaha naḥ priyavratānmṛḷīkāya priyavratān ǁ
Padapatha Devanagari Accented
त्वाम् । ऊं॒ इति॑ । जा॒तऽवे॑दसम् । वि॒श्वऽवा॑रम् । गृ॒णे॒ । धि॒या ।
अग्ने॑ । दे॒वान् । आ । व॒ह॒ । नः॒ । प्रि॒यऽव्र॑तान् । मृ॒ळी॒काय॑ । प्रि॒यऽव्र॑तान् ॥
Padapatha Devanagari Nonaccented
त्वाम् । ऊं इति । जातऽवेदसम् । विश्वऽवारम् । गृणे । धिया ।
अग्ने । देवान् । आ । वह । नः । प्रियऽव्रतान् । मृळीकाय । प्रियऽव्रतान् ॥
Padapatha Transcription Accented
tvā́m ǀ ūṃ íti ǀ jātá-vedasam ǀ viśvá-vāram ǀ gṛṇe ǀ dhiyā́ ǀ
ágne ǀ devā́n ǀ ā́ ǀ vaha ǀ naḥ ǀ priyá-vratān ǀ mṛḷīkā́ya ǀ priyá-vratān ǁ
Padapatha Transcription Nonaccented
tvām ǀ ūṃ iti ǀ jāta-vedasam ǀ viśva-vāram ǀ gṛṇe ǀ dhiyā ǀ
agne ǀ devān ǀ ā ǀ vaha ǀ naḥ ǀ priya-vratān ǀ mṛḷīkāya ǀ priya-vratān ǁ
10.150.04 (Mandala. Sukta. Rik)
8.8.08.04 (Ashtaka. Adhyaya. Varga. Rik)
10.11.138 (Mandala. Anuvāka. Rik)
Samhita Devanagari Accented
अ॒ग्निर्दे॒वो दे॒वाना॑मभवत्पु॒रोहि॑तो॒ऽग्निं म॑नु॒ष्या॒३॒॑ ऋष॑यः॒ समी॑धिरे ।
अ॒ग्निं म॒हो धन॑साताव॒हं हु॑वे मृळी॒कं धन॑सातये ॥
Samhita Devanagari Nonaccented
अग्निर्देवो देवानामभवत्पुरोहितोऽग्निं मनुष्या ऋषयः समीधिरे ।
अग्निं महो धनसातावहं हुवे मृळीकं धनसातये ॥
Samhita Transcription Accented
agnírdevó devā́nāmabhavatpuróhito’gním manuṣyā́ ṛ́ṣayaḥ sámīdhire ǀ
agním mahó dhánasātāvahám huve mṛḷīkám dhánasātaye ǁ
Samhita Transcription Nonaccented
agnirdevo devānāmabhavatpurohito’gnim manuṣyā ṛṣayaḥ samīdhire ǀ
agnim maho dhanasātāvaham huve mṛḷīkam dhanasātaye ǁ
Padapatha Devanagari Accented
अ॒ग्निः । दे॒वः । दे॒वाना॑म् । अ॒भ॒व॒त् । पु॒रःऽहि॑तः । अ॒ग्निम् । म॒नु॒ष्याः॑ । ऋष॑यः । सम् । ई॒धि॒रे॒ ।
अ॒ग्निम् । म॒हः । धन॑ऽसातौ । अ॒हम् । हु॒वे॒ । मृ॒ळी॒कम् । धन॑ऽसातये ॥
Padapatha Devanagari Nonaccented
अग्निः । देवः । देवानाम् । अभवत् । पुरःऽहितः । अग्निम् । मनुष्याः । ऋषयः । सम् । ईधिरे ।
अग्निम् । महः । धनऽसातौ । अहम् । हुवे । मृळीकम् । धनऽसातये ॥
Padapatha Transcription Accented
agníḥ ǀ deváḥ ǀ devā́nām ǀ abhavat ǀ puráḥ-hitaḥ ǀ agním ǀ manuṣyā́ḥ ǀ ṛ́ṣayaḥ ǀ sám ǀ īdhire ǀ
agním ǀ maháḥ ǀ dhána-sātau ǀ ahám ǀ huve ǀ mṛḷīkám ǀ dhána-sātaye ǁ
Padapatha Transcription Nonaccented
agniḥ ǀ devaḥ ǀ devānām ǀ abhavat ǀ puraḥ-hitaḥ ǀ agnim ǀ manuṣyāḥ ǀ ṛṣayaḥ ǀ sam ǀ īdhire ǀ
agnim ǀ mahaḥ ǀ dhana-sātau ǀ aham ǀ huve ǀ mṛḷīkam ǀ dhana-sātaye ǁ
10.150.05 (Mandala. Sukta. Rik)
8.8.08.05 (Ashtaka. Adhyaya. Varga. Rik)
10.11.139 (Mandala. Anuvāka. Rik)
Samhita Devanagari Accented
अ॒ग्निरत्रिं॑ भ॒रद्वा॑जं॒ गवि॑ष्ठिरं॒ प्राव॑न्नः॒ कण्वं॑ त्र॒सद॑स्युमाह॒वे ।
अ॒ग्निं वसि॑ष्ठो हवते पु॒रोहि॑तो मृळी॒काय॑ पु॒रोहि॑तः ॥
Samhita Devanagari Nonaccented
अग्निरत्रिं भरद्वाजं गविष्ठिरं प्रावन्नः कण्वं त्रसदस्युमाहवे ।
अग्निं वसिष्ठो हवते पुरोहितो मृळीकाय पुरोहितः ॥
Samhita Transcription Accented
agnírátrim bharádvājam gáviṣṭhiram prā́vannaḥ káṇvam trasádasyumāhavé ǀ
agním vásiṣṭho havate puróhito mṛḷīkā́ya puróhitaḥ ǁ
Samhita Transcription Nonaccented
agniratrim bharadvājam gaviṣṭhiram prāvannaḥ kaṇvam trasadasyumāhave ǀ
agnim vasiṣṭho havate purohito mṛḷīkāya purohitaḥ ǁ
Padapatha Devanagari Accented
अ॒ग्निः । अत्रि॑म् । भ॒रत्ऽवा॑जम् । गवि॑ष्ठिरम् । प्र । आ॒व॒त् । नः॒ । कण्व॑म् । त्र॒सद॑स्युम् । आ॒ऽह॒वे ।
अ॒ग्निम् । वसि॑ष्ठः । ह॒व॒ते॒ । पु॒रःऽहि॑तः । मृ॒ळी॒काय॑ । पु॒रःऽहि॑तः ॥
Padapatha Devanagari Nonaccented
अग्निः । अत्रिम् । भरत्ऽवाजम् । गविष्ठिरम् । प्र । आवत् । नः । कण्वम् । त्रसदस्युम् । आऽहवे ।
अग्निम् । वसिष्ठः । हवते । पुरःऽहितः । मृळीकाय । पुरःऽहितः ॥
Padapatha Transcription Accented
agníḥ ǀ átrim ǀ bharát-vājam ǀ gáviṣṭhiram ǀ prá ǀ āvat ǀ naḥ ǀ káṇvam ǀ trasádasyum ǀ ā-havé ǀ
agním ǀ vásiṣṭhaḥ ǀ havate ǀ puráḥ-hitaḥ ǀ mṛḷīkā́ya ǀ puráḥ-hitaḥ ǁ
Padapatha Transcription Nonaccented
agniḥ ǀ atrim ǀ bharat-vājam ǀ gaviṣṭhiram ǀ pra ǀ āvat ǀ naḥ ǀ kaṇvam ǀ trasadasyum ǀ ā-have ǀ
agnim ǀ vasiṣṭhaḥ ǀ havate ǀ puraḥ-hitaḥ ǀ mṛḷīkāya ǀ puraḥ-hitaḥ ǁ