|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 2
Sūkta 3
|
1. Info |
| To: | agni | |
| From: | gṛtsamada bhārgava śaunaka | |
| Metres: | 1st set of styles: bhuriktriṣṭup (3, 5, 6); nicṛttriṣṭup (4, 9, 11); virāṭtrisṭup (1, 2); triṣṭup (8, 10); jagatī (7) 2nd set of styles: triṣṭubh (1-6, 8-11); jagatī (7) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
02.003.01 (Mandala. Sukta. Rik)
2.5.22.01 (Ashtaka. Adhyaya. Varga. Rik)
02.01.030 (Mandala. Anuvāka. Rik)
Samhita Devanagari Accented
समि॑द्धो अ॒ग्निर्निहि॑तः पृथि॒व्यां प्र॒त्यङ् विश्वा॑नि॒ भुव॑नान्यस्थात् ।
होता॑ पाव॒कः प्र॒दिवः॑ सुमे॒धा दे॒वो दे॒वान्य॑जत्व॒ग्निरर्ह॑न् ॥
Samhita Devanagari Nonaccented
समिद्धो अग्निर्निहितः पृथिव्यां प्रत्यङ् विश्वानि भुवनान्यस्थात् ।
होता पावकः प्रदिवः सुमेधा देवो देवान्यजत्वग्निरर्हन् ॥
Samhita Transcription Accented
sámiddho agnírníhitaḥ pṛthivyā́m pratyáṅ víśvāni bhúvanānyasthāt ǀ
hótā pāvakáḥ pradívaḥ sumedhā́ devó devā́nyajatvagnírárhan ǁ
Samhita Transcription Nonaccented
samiddho agnirnihitaḥ pṛthivyām pratyaṅ viśvāni bhuvanānyasthāt ǀ
hotā pāvakaḥ pradivaḥ sumedhā devo devānyajatvagnirarhan ǁ
Padapatha Devanagari Accented
सम्ऽइ॑द्धः । अ॒ग्निः । निऽहि॑तः । पृ॒थि॒व्याम् । प्र॒त्यङ् । विश्वा॑नि । भुव॑नानि । अ॒स्था॒त् ।
होता॑ । पा॒व॒कः । प्र॒ऽदिवः॑ । सु॒ऽमे॒धाः । दे॒वः । दे॒वान् । य॒ज॒तु॒ । अ॒ग्निः । अर्ह॑न् ॥
Padapatha Devanagari Nonaccented
सम्ऽइद्धः । अग्निः । निऽहितः । पृथिव्याम् । प्रत्यङ् । विश्वानि । भुवनानि । अस्थात् ।
होता । पावकः । प्रऽदिवः । सुऽमेधाः । देवः । देवान् । यजतु । अग्निः । अर्हन् ॥
Padapatha Transcription Accented
sám-iddhaḥ ǀ agníḥ ǀ ní-hitaḥ ǀ pṛthivyā́m ǀ pratyáṅ ǀ víśvāni ǀ bhúvanāni ǀ asthāt ǀ
hótā ǀ pāvakáḥ ǀ pra-dívaḥ ǀ su-medhā́ḥ ǀ deváḥ ǀ devā́n ǀ yajatu ǀ agníḥ ǀ árhan ǁ
Padapatha Transcription Nonaccented
sam-iddhaḥ ǀ agniḥ ǀ ni-hitaḥ ǀ pṛthivyām ǀ pratyaṅ ǀ viśvāni ǀ bhuvanāni ǀ asthāt ǀ
hotā ǀ pāvakaḥ ǀ pra-divaḥ ǀ su-medhāḥ ǀ devaḥ ǀ devān ǀ yajatu ǀ agniḥ ǀ arhan ǁ
02.003.02 (Mandala. Sukta. Rik)
2.5.22.02 (Ashtaka. Adhyaya. Varga. Rik)
02.01.031 (Mandala. Anuvāka. Rik)
Samhita Devanagari Accented
नरा॒शंसः॒ प्रति॒ धामा॑न्यं॒जन् ति॒स्रो दिवः॒ प्रति॑ म॒ह्ना स्व॒र्चिः ।
घृ॒त॒प्रुषा॒ मन॑सा ह॒व्यमुं॒दन्मू॒र्धन्य॒ज्ञस्य॒ सम॑नक्तु दे॒वान् ॥
Samhita Devanagari Nonaccented
नराशंसः प्रति धामान्यंजन् तिस्रो दिवः प्रति मह्ना स्वर्चिः ।
घृतप्रुषा मनसा हव्यमुंदन्मूर्धन्यज्ञस्य समनक्तु देवान् ॥
Samhita Transcription Accented
nárāśáṃsaḥ práti dhā́mānyañján tisró dívaḥ práti mahnā́ svarcíḥ ǀ
ghṛtaprúṣā mánasā havyámundánmūrdhányajñásya sámanaktu devā́n ǁ
Samhita Transcription Nonaccented
narāśaṃsaḥ prati dhāmānyañjan tisro divaḥ prati mahnā svarciḥ ǀ
ghṛtapruṣā manasā havyamundanmūrdhanyajñasya samanaktu devān ǁ
Padapatha Devanagari Accented
नरा॒शंसः॑ । प्रति॑ । धामा॑नि । अ॒ञ्जन् । ति॒स्रः । दिवः॑ । प्रति॑ । म॒ह्ना । सु॒ऽअ॒र्चिः ।
घृ॒त॒ऽप्रुषा॑ । मन॑सा । ह॒व्यम् । उ॒न्दन् । मू॒र्धन् । य॒ज्ञस्य॑ । सम् । अ॒न॒क्तु॒ । दे॒वान् ॥
Padapatha Devanagari Nonaccented
नराशंसः । प्रति । धामानि । अञ्जन् । तिस्रः । दिवः । प्रति । मह्ना । सुऽअर्चिः ।
घृतऽप्रुषा । मनसा । हव्यम् । उन्दन् । मूर्धन् । यज्ञस्य । सम् । अनक्तु । देवान् ॥
Padapatha Transcription Accented
nárāśáṃsaḥ ǀ práti ǀ dhā́māni ǀ añján ǀ tisráḥ ǀ dívaḥ ǀ práti ǀ mahnā́ ǀ su-arcíḥ ǀ
ghṛta-prúṣā ǀ mánasā ǀ havyám ǀ undán ǀ mūrdhán ǀ yajñásya ǀ sám ǀ anaktu ǀ devā́n ǁ
Padapatha Transcription Nonaccented
narāśaṃsaḥ ǀ prati ǀ dhāmāni ǀ añjan ǀ tisraḥ ǀ divaḥ ǀ prati ǀ mahnā ǀ su-arciḥ ǀ
ghṛta-pruṣā ǀ manasā ǀ havyam ǀ undan ǀ mūrdhan ǀ yajñasya ǀ sam ǀ anaktu ǀ devān ǁ
02.003.03 (Mandala. Sukta. Rik)
2.5.22.03 (Ashtaka. Adhyaya. Varga. Rik)
02.01.032 (Mandala. Anuvāka. Rik)
Samhita Devanagari Accented
ई॒ळि॒तो अ॑ग्ने॒ मन॑सा नो॒ अर्हं॑दे॒वान्य॑क्षि॒ मानु॑षा॒त्पूर्वो॑ अ॒द्य ।
स आ व॑ह म॒रुतां॒ शर्धो॒ अच्यु॑त॒मिंद्रं॑ नरो बर्हि॒षदं॑ यजध्वं ॥
Samhita Devanagari Nonaccented
ईळितो अग्ने मनसा नो अर्हंदेवान्यक्षि मानुषात्पूर्वो अद्य ।
स आ वह मरुतां शर्धो अच्युतमिंद्रं नरो बर्हिषदं यजध्वं ॥
Samhita Transcription Accented
īḷitó agne mánasā no árhandevā́nyakṣi mā́nuṣātpū́rvo adyá ǀ
sá ā́ vaha marútām śárdho ácyutamíndram naro barhiṣádam yajadhvam ǁ
Samhita Transcription Nonaccented
īḷito agne manasā no arhandevānyakṣi mānuṣātpūrvo adya ǀ
sa ā vaha marutām śardho acyutamindram naro barhiṣadam yajadhvam ǁ
Padapatha Devanagari Accented
ई॒ळि॒तः । अ॒ग्ने॒ । मन॑सा । नः॒ । अर्ह॑न् । दे॒वान् । य॒क्षि॒ । मानु॑षात् । पूर्वः॑ । अ॒द्य ।
सः । आ । व॒ह॒ । म॒रुता॑म् । शर्धः॑ । अच्यु॑तम् । इन्द्र॑म् । न॒रः॒ । ब॒र्हि॒ऽसद॑म् । य॒ज॒ध्व॒म् ॥
Padapatha Devanagari Nonaccented
ईळितः । अग्ने । मनसा । नः । अर्हन् । देवान् । यक्षि । मानुषात् । पूर्वः । अद्य ।
सः । आ । वह । मरुताम् । शर्धः । अच्युतम् । इन्द्रम् । नरः । बर्हिऽसदम् । यजध्वम् ॥
Padapatha Transcription Accented
īḷitáḥ ǀ agne ǀ mánasā ǀ naḥ ǀ árhan ǀ devā́n ǀ yakṣi ǀ mā́nuṣāt ǀ pū́rvaḥ ǀ adyá ǀ
sáḥ ǀ ā́ ǀ vaha ǀ marútām ǀ śárdhaḥ ǀ ácyutam ǀ índram ǀ naraḥ ǀ barhi-sádam ǀ yajadhvam ǁ
Padapatha Transcription Nonaccented
īḷitaḥ ǀ agne ǀ manasā ǀ naḥ ǀ arhan ǀ devān ǀ yakṣi ǀ mānuṣāt ǀ pūrvaḥ ǀ adya ǀ
saḥ ǀ ā ǀ vaha ǀ marutām ǀ śardhaḥ ǀ acyutam ǀ indram ǀ naraḥ ǀ barhi-sadam ǀ yajadhvam ǁ
02.003.04 (Mandala. Sukta. Rik)
2.5.22.04 (Ashtaka. Adhyaya. Varga. Rik)
02.01.033 (Mandala. Anuvāka. Rik)
Samhita Devanagari Accented
देव॑ बर्हि॒र्वर्ध॑मानं सु॒वीरं॑ स्ती॒र्णं रा॒ये सु॒भरं॒ वेद्य॒स्यां ।
घृ॒तेना॒क्तं व॑सवः सीदते॒दं विश्वे॑ देवा आदित्या य॒ज्ञिया॑सः ॥
Samhita Devanagari Nonaccented
देव बर्हिर्वर्धमानं सुवीरं स्तीर्णं राये सुभरं वेद्यस्यां ।
घृतेनाक्तं वसवः सीदतेदं विश्वे देवा आदित्या यज्ञियासः ॥
Samhita Transcription Accented
déva barhirvárdhamānam suvī́ram stīrṇám rāyé subháram védyasyā́m ǀ
ghṛténāktám vasavaḥ sīdatedám víśve devā ādityā yajñíyāsaḥ ǁ
Samhita Transcription Nonaccented
deva barhirvardhamānam suvīram stīrṇam rāye subharam vedyasyām ǀ
ghṛtenāktam vasavaḥ sīdatedam viśve devā ādityā yajñiyāsaḥ ǁ
Padapatha Devanagari Accented
देव॑ । ब॒र्हिः॒ । वर्ध॑मानम् । सु॒ऽवीर॑म् । स्ती॒र्णम् । रा॒ये । सु॒ऽभर॑म् । वेदी॒ इति॑ । अ॒स्याम् ।
घृ॒तेन॑ । अ॒क्तम् । व॒स॒वः॒ । सी॒द॒त॒ । इ॒दम् । विश्वे॑ । दे॒वाः॒ । आ॒दि॒त्याः॒ । य॒ज्ञिया॑सः ॥
Padapatha Devanagari Nonaccented
देव । बर्हिः । वर्धमानम् । सुऽवीरम् । स्तीर्णम् । राये । सुऽभरम् । वेदी इति । अस्याम् ।
घृतेन । अक्तम् । वसवः । सीदत । इदम् । विश्वे । देवाः । आदित्याः । यज्ञियासः ॥
Padapatha Transcription Accented
déva ǀ barhiḥ ǀ várdhamānam ǀ su-vī́ram ǀ stīrṇám ǀ rāyé ǀ su-bháram ǀ védī íti ǀ asyā́m ǀ
ghṛténa ǀ aktám ǀ vasavaḥ ǀ sīdata ǀ idám ǀ víśve ǀ devāḥ ǀ ādityāḥ ǀ yajñíyāsaḥ ǁ
Padapatha Transcription Nonaccented
deva ǀ barhiḥ ǀ vardhamānam ǀ su-vīram ǀ stīrṇam ǀ rāye ǀ su-bharam ǀ vedī iti ǀ asyām ǀ
ghṛtena ǀ aktam ǀ vasavaḥ ǀ sīdata ǀ idam ǀ viśve ǀ devāḥ ǀ ādityāḥ ǀ yajñiyāsaḥ ǁ
02.003.05 (Mandala. Sukta. Rik)
2.5.22.05 (Ashtaka. Adhyaya. Varga. Rik)
02.01.034 (Mandala. Anuvāka. Rik)
Samhita Devanagari Accented
वि श्र॑यंतामुर्वि॒या हू॒यमा॑ना॒ द्वारो॑ दे॒वीः सु॑प्राय॒णा नमो॑भिः ।
व्यच॑स्वती॒र्वि प्र॑थंतामजु॒र्या वर्णं॑ पुना॒ना य॒शसं॑ सु॒वीरं॑ ॥
Samhita Devanagari Nonaccented
वि श्रयंतामुर्विया हूयमाना द्वारो देवीः सुप्रायणा नमोभिः ।
व्यचस्वतीर्वि प्रथंतामजुर्या वर्णं पुनाना यशसं सुवीरं ॥
Samhita Transcription Accented
ví śrayantāmurviyā́ hūyámānā dvā́ro devī́ḥ suprāyaṇā́ námobhiḥ ǀ
vyácasvatīrví prathantāmajuryā́ várṇam punānā́ yaśásam suvī́ram ǁ
Samhita Transcription Nonaccented
vi śrayantāmurviyā hūyamānā dvāro devīḥ suprāyaṇā namobhiḥ ǀ
vyacasvatīrvi prathantāmajuryā varṇam punānā yaśasam suvīram ǁ
Padapatha Devanagari Accented
वि । श्र॑यन्ताम् । उ॒र्वि॒या । हू॒यमा॑नाः । द्वारः॑ । दे॒वीः । सु॒प्र॒ऽअ॒य॒नाः । नमः॑ऽभिः ।
व्यच॑स्वतीः । वि । प्र॒थ॒न्ता॒म् । अ॒जु॒र्याः । वर्ण॑म् । पु॒ना॒नाः । य॒शस॑म् । सु॒ऽवीर॑म् ॥
Padapatha Devanagari Nonaccented
वि । श्रयन्ताम् । उर्विया । हूयमानाः । द्वारः । देवीः । सुप्रऽअयनाः । नमःऽभिः ।
व्यचस्वतीः । वि । प्रथन्ताम् । अजुर्याः । वर्णम् । पुनानाः । यशसम् । सुऽवीरम् ॥
Padapatha Transcription Accented
ví ǀ śráyantām ǀ urviyā́ ǀ hūyámānāḥ ǀ dvā́raḥ ǀ devī́ḥ ǀ supra-ayanā́ḥ ǀ námaḥ-bhiḥ ǀ
vyácasvatīḥ ǀ ví ǀ prathantām ǀ ajuryā́ḥ ǀ várṇam ǀ punānā́ḥ ǀ yaśásam ǀ su-vī́ram ǁ
Padapatha Transcription Nonaccented
vi ǀ śrayantām ǀ urviyā ǀ hūyamānāḥ ǀ dvāraḥ ǀ devīḥ ǀ supra-ayanāḥ ǀ namaḥ-bhiḥ ǀ
vyacasvatīḥ ǀ vi ǀ prathantām ǀ ajuryāḥ ǀ varṇam ǀ punānāḥ ǀ yaśasam ǀ su-vīram ǁ
02.003.06 (Mandala. Sukta. Rik)
2.5.23.01 (Ashtaka. Adhyaya. Varga. Rik)
02.01.035 (Mandala. Anuvāka. Rik)
Samhita Devanagari Accented
सा॒ध्वपां॑सि स॒नता॑ न उक्षि॒ते उ॒षासा॒नक्ता॑ व॒य्ये॑व रण्वि॒ते ।
तंतुं॑ त॒तं सं॒वयं॑ती समी॒ची य॒ज्ञस्य॒ पेशः॑ सु॒दुघे॒ पय॑स्वती ॥
Samhita Devanagari Nonaccented
साध्वपांसि सनता न उक्षिते उषासानक्ता वय्येव रण्विते ।
तंतुं ततं संवयंती समीची यज्ञस्य पेशः सुदुघे पयस्वती ॥
Samhita Transcription Accented
sādhvápāṃsi sanátā na ukṣité uṣā́sānáktā vayyéva raṇvité ǀ
tántum tatám saṃváyantī samīcī́ yajñásya péśaḥ sudúghe páyasvatī ǁ
Samhita Transcription Nonaccented
sādhvapāṃsi sanatā na ukṣite uṣāsānaktā vayyeva raṇvite ǀ
tantum tatam saṃvayantī samīcī yajñasya peśaḥ sudughe payasvatī ǁ
Padapatha Devanagari Accented
सा॒धु । अपां॑सि । स॒नता॑ । नः॒ । उ॒क्षि॒ते इति॑ । उ॒षसा॒नक्ता॑ । व॒य्या॑ऽइव । र॒ण्वि॒ते इति॑ ।
तन्तु॑म् । त॒तम् । सं॒वय॑न्ती॒ इति॑ स॒म्ऽवय॑न्ती । स॒मी॒ची इति॑ स॒म्ऽई॒ची । य॒ज्ञस्य॑ । पेशः॑ । सु॒दुघे॒ इति॑ सु॒ऽदुघे॑ । पय॑स्वती॒ इति॑ ॥
Padapatha Devanagari Nonaccented
साधु । अपांसि । सनता । नः । उक्षिते इति । उषसानक्ता । वय्याऽइव । रण्विते इति ।
तन्तुम् । ततम् । संवयन्ती इति सम्ऽवयन्ती । समीची इति सम्ऽईची । यज्ञस्य । पेशः । सुदुघे इति सुऽदुघे । पयस्वती इति ॥
Padapatha Transcription Accented
sādhú ǀ ápāṃsi ǀ sanátā ǀ naḥ ǀ ukṣité íti ǀ uṣásānáktā ǀ vayyā́-iva ǀ raṇvité íti ǀ
tántum ǀ tatám ǀ saṃváyantī íti sam-váyantī ǀ samīcī́ íti sam-īcī́ ǀ yajñásya ǀ péśaḥ ǀ sudúghe íti su-dúghe ǀ páyasvatī íti ǁ
Padapatha Transcription Nonaccented
sādhu ǀ apāṃsi ǀ sanatā ǀ naḥ ǀ ukṣite iti ǀ uṣasānaktā ǀ vayyā-iva ǀ raṇvite iti ǀ
tantum ǀ tatam ǀ saṃvayantī iti sam-vayantī ǀ samīcī iti sam-īcī ǀ yajñasya ǀ peśaḥ ǀ sudughe iti su-dughe ǀ payasvatī iti ǁ
02.003.07 (Mandala. Sukta. Rik)
2.5.23.02 (Ashtaka. Adhyaya. Varga. Rik)
02.01.036 (Mandala. Anuvāka. Rik)
Samhita Devanagari Accented
दैव्या॒ होता॑रा प्रथ॒मा वि॒दुष्ट॑र ऋ॒जु य॑क्षतः॒ समृ॒चा व॒पुष्ट॑रा ।
दे॒वान्यजं॑तावृतु॒था समं॑जतो॒ नाभा॑ पृथि॒व्या अधि॒ सानु॑षु त्रि॒षु ॥
Samhita Devanagari Nonaccented
दैव्या होतारा प्रथमा विदुष्टर ऋजु यक्षतः समृचा वपुष्टरा ।
देवान्यजंतावृतुथा समंजतो नाभा पृथिव्या अधि सानुषु त्रिषु ॥
Samhita Transcription Accented
dáivyā hótārā prathamā́ vidúṣṭara ṛjú yakṣataḥ sámṛcā́ vapúṣṭarā ǀ
devā́nyájantāvṛtuthā́ sámañjato nā́bhā pṛthivyā́ ádhi sā́nuṣu triṣú ǁ
Samhita Transcription Nonaccented
daivyā hotārā prathamā viduṣṭara ṛju yakṣataḥ samṛcā vapuṣṭarā ǀ
devānyajantāvṛtuthā samañjato nābhā pṛthivyā adhi sānuṣu triṣu ǁ
Padapatha Devanagari Accented
दैव्या॑ । होता॑रा । प्र॒थ॒मा । वि॒दुःऽत॑रा । ऋ॒जु । य॒क्ष॒तः॒ । सम् । ऋ॒चा । व॒पुःऽत॑रा ।
दे॒वान् । यज॑न्तौ । ऋ॒तु॒ऽथा । सम् । अ॒ञ्ज॒तः॒ । नाभा॑ । पृ॒थि॒व्याः । अधि॑ । सानु॑षु । त्रि॒षु ॥
Padapatha Devanagari Nonaccented
दैव्या । होतारा । प्रथमा । विदुःऽतरा । ऋजु । यक्षतः । सम् । ऋचा । वपुःऽतरा ।
देवान् । यजन्तौ । ऋतुऽथा । सम् । अञ्जतः । नाभा । पृथिव्याः । अधि । सानुषु । त्रिषु ॥
Padapatha Transcription Accented
dáivyā ǀ hótārā ǀ prathamā́ ǀ vidúḥ-tarā ǀ ṛjú ǀ yakṣataḥ ǀ sám ǀ ṛcā́ ǀ vapúḥ-tarā ǀ
devā́n ǀ yájantau ǀ ṛtu-thā́ ǀ sám ǀ añjataḥ ǀ nā́bhā ǀ pṛthivyā́ḥ ǀ ádhi ǀ sā́nuṣu ǀ triṣú ǁ
Padapatha Transcription Nonaccented
daivyā ǀ hotārā ǀ prathamā ǀ viduḥ-tarā ǀ ṛju ǀ yakṣataḥ ǀ sam ǀ ṛcā ǀ vapuḥ-tarā ǀ
devān ǀ yajantau ǀ ṛtu-thā ǀ sam ǀ añjataḥ ǀ nābhā ǀ pṛthivyāḥ ǀ adhi ǀ sānuṣu ǀ triṣu ǁ
02.003.08 (Mandala. Sukta. Rik)
2.5.23.03 (Ashtaka. Adhyaya. Varga. Rik)
02.01.037 (Mandala. Anuvāka. Rik)
Samhita Devanagari Accented
सर॑स्वती सा॒धयं॑ती॒ धियं॑ न॒ इळा॑ दे॒वी भार॑ती वि॒श्वतू॑र्तिः ।
ति॒स्रो दे॒वीः स्व॒धया॑ ब॒र्हिरेदमच्छि॑द्रं पांतु शर॒णं नि॒षद्य॑ ॥
Samhita Devanagari Nonaccented
सरस्वती साधयंती धियं न इळा देवी भारती विश्वतूर्तिः ।
तिस्रो देवीः स्वधया बर्हिरेदमच्छिद्रं पांतु शरणं निषद्य ॥
Samhita Transcription Accented
sárasvatī sādháyantī dhíyam na íḷā devī́ bhā́ratī viśvátūrtiḥ ǀ
tisró devī́ḥ svadháyā barhírédámácchidram pāntu śaraṇám niṣádya ǁ
Samhita Transcription Nonaccented
sarasvatī sādhayantī dhiyam na iḷā devī bhāratī viśvatūrtiḥ ǀ
tisro devīḥ svadhayā barhiredamacchidram pāntu śaraṇam niṣadya ǁ
Padapatha Devanagari Accented
सर॑स्वती । सा॒धय॑न्ती । धिय॑म् । नः॒ । इळा॑ । दे॒वी । भार॑ती । वि॒श्वऽतू॑र्तिः ।
ति॒स्रः । दे॒वीः । स्व॒धया॑ । ब॒र्हिः । आ । इ॒दम् । अच्छि॑द्रम् । पा॒न्तु॒ । श॒र॒णम् । नि॒ऽसद्य॑ ॥
Padapatha Devanagari Nonaccented
सरस्वती । साधयन्ती । धियम् । नः । इळा । देवी । भारती । विश्वऽतूर्तिः ।
तिस्रः । देवीः । स्वधया । बर्हिः । आ । इदम् । अच्छिद्रम् । पान्तु । शरणम् । निऽसद्य ॥
Padapatha Transcription Accented
sárasvatī ǀ sādháyantī ǀ dhíyam ǀ naḥ ǀ íḷā ǀ devī́ ǀ bhā́ratī ǀ viśvá-tūrtiḥ ǀ
tisráḥ ǀ devī́ḥ ǀ svadháyā ǀ barhíḥ ǀ ā́ ǀ idám ǀ ácchidram ǀ pāntu ǀ śaraṇám ǀ ni-sádya ǁ
Padapatha Transcription Nonaccented
sarasvatī ǀ sādhayantī ǀ dhiyam ǀ naḥ ǀ iḷā ǀ devī ǀ bhāratī ǀ viśva-tūrtiḥ ǀ
tisraḥ ǀ devīḥ ǀ svadhayā ǀ barhiḥ ǀ ā ǀ idam ǀ acchidram ǀ pāntu ǀ śaraṇam ǀ ni-sadya ǁ
02.003.09 (Mandala. Sukta. Rik)
2.5.23.04 (Ashtaka. Adhyaya. Varga. Rik)
02.01.038 (Mandala. Anuvāka. Rik)
Samhita Devanagari Accented
पि॒शंग॑रूपः सु॒भरो॑ वयो॒धाः श्रु॒ष्टी वी॒रो जा॑यते दे॒वका॑मः ।
प्र॒जां त्वष्टा॒ वि ष्य॑तु॒ नाभि॑म॒स्मे अथा॑ दे॒वाना॒मप्ये॑तु॒ पाथः॑ ॥
Samhita Devanagari Nonaccented
पिशंगरूपः सुभरो वयोधाः श्रुष्टी वीरो जायते देवकामः ।
प्रजां त्वष्टा वि ष्यतु नाभिमस्मे अथा देवानामप्येतु पाथः ॥
Samhita Transcription Accented
piśáṅgarūpaḥ subháro vayodhā́ḥ śruṣṭī́ vīró jāyate devákāmaḥ ǀ
prajā́m tváṣṭā ví ṣyatu nā́bhimasmé áthā devā́nāmápyetu pā́thaḥ ǁ
Samhita Transcription Nonaccented
piśaṅgarūpaḥ subharo vayodhāḥ śruṣṭī vīro jāyate devakāmaḥ ǀ
prajām tvaṣṭā vi ṣyatu nābhimasme athā devānāmapyetu pāthaḥ ǁ
Padapatha Devanagari Accented
पि॒शङ्ग॑ऽरूपः । सु॒ऽभरः॑ । व॒यः॒ऽधाः । श्रु॒ष्टी । वी॒रः । जा॒य॒ते॒ । दे॒वऽका॑मः ।
प्र॒ऽजाम् । त्वष्टा॑ । वि । स्य॒तु॒ । नाभि॑म् । अ॒स्मे इति॑ । अथ॑ । दे॒वाना॑म् । अपि॑ । ए॒तु॒ । पाथः॑ ॥
Padapatha Devanagari Nonaccented
पिशङ्गऽरूपः । सुऽभरः । वयःऽधाः । श्रुष्टी । वीरः । जायते । देवऽकामः ।
प्रऽजाम् । त्वष्टा । वि । स्यतु । नाभिम् । अस्मे इति । अथ । देवानाम् । अपि । एतु । पाथः ॥
Padapatha Transcription Accented
piśáṅga-rūpaḥ ǀ su-bháraḥ ǀ vayaḥ-dhā́ḥ ǀ śruṣṭī́ ǀ vīráḥ ǀ jāyate ǀ devá-kāmaḥ ǀ
pra-jā́m ǀ tváṣṭā ǀ ví ǀ syatu ǀ nā́bhim ǀ asmé íti ǀ átha ǀ devā́nām ǀ ápi ǀ etu ǀ pā́thaḥ ǁ
Padapatha Transcription Nonaccented
piśaṅga-rūpaḥ ǀ su-bharaḥ ǀ vayaḥ-dhāḥ ǀ śruṣṭī ǀ vīraḥ ǀ jāyate ǀ deva-kāmaḥ ǀ
pra-jām ǀ tvaṣṭā ǀ vi ǀ syatu ǀ nābhim ǀ asme iti ǀ atha ǀ devānām ǀ api ǀ etu ǀ pāthaḥ ǁ
02.003.10 (Mandala. Sukta. Rik)
2.5.23.05 (Ashtaka. Adhyaya. Varga. Rik)
02.01.039 (Mandala. Anuvāka. Rik)
Samhita Devanagari Accented
वन॒स्पति॑रवसृ॒जन्नुप॑ स्थाद॒ग्निर्ह॒विः सू॑दयाति॒ प्र धी॒भिः ।
त्रिधा॒ सम॑क्तं नयतु प्रजा॒नंदे॒वेभ्यो॒ दैव्यः॑ शमि॒तोप॑ ह॒व्यं ॥
Samhita Devanagari Nonaccented
वनस्पतिरवसृजन्नुप स्थादग्निर्हविः सूदयाति प्र धीभिः ।
त्रिधा समक्तं नयतु प्रजानंदेवेभ्यो दैव्यः शमितोप हव्यं ॥
Samhita Transcription Accented
vánaspátiravasṛjánnúpa sthādagnírhavíḥ sūdayāti prá dhībhíḥ ǀ
trídhā sámaktam nayatu prajānándevébhyo dáivyaḥ śamitópa havyám ǁ
Samhita Transcription Nonaccented
vanaspatiravasṛjannupa sthādagnirhaviḥ sūdayāti pra dhībhiḥ ǀ
tridhā samaktam nayatu prajānandevebhyo daivyaḥ śamitopa havyam ǁ
Padapatha Devanagari Accented
वन॒स्पतिः॑ । अ॒व॒ऽसृ॒जन् । उप॑ । स्था॒त् । अ॒ग्निः । ह॒विः । सू॒द॒या॒ति॒ । प्र । धी॒भिः ।
त्रिधा॑ । सम्ऽअ॑क्तम् । न॒य॒तु॒ । प्र॒ऽजा॒नन् । दे॒वेभ्यः॑ । दैव्यः॑ । श॒मि॒ता । उप॑ । ह॒व्यम् ॥
Padapatha Devanagari Nonaccented
वनस्पतिः । अवऽसृजन् । उप । स्थात् । अग्निः । हविः । सूदयाति । प्र । धीभिः ।
त्रिधा । सम्ऽअक्तम् । नयतु । प्रऽजानन् । देवेभ्यः । दैव्यः । शमिता । उप । हव्यम् ॥
Padapatha Transcription Accented
vánaspátiḥ ǀ ava-sṛján ǀ úpa ǀ sthāt ǀ agníḥ ǀ havíḥ ǀ sūdayāti ǀ prá ǀ dhībhíḥ ǀ
trídhā ǀ sám-aktam ǀ nayatu ǀ pra-jānán ǀ devébhyaḥ ǀ dáivyaḥ ǀ śamitā́ ǀ úpa ǀ havyám ǁ
Padapatha Transcription Nonaccented
vanaspatiḥ ǀ ava-sṛjan ǀ upa ǀ sthāt ǀ agniḥ ǀ haviḥ ǀ sūdayāti ǀ pra ǀ dhībhiḥ ǀ
tridhā ǀ sam-aktam ǀ nayatu ǀ pra-jānan ǀ devebhyaḥ ǀ daivyaḥ ǀ śamitā ǀ upa ǀ havyam ǁ
02.003.11 (Mandala. Sukta. Rik)
2.5.23.06 (Ashtaka. Adhyaya. Varga. Rik)
02.01.040 (Mandala. Anuvāka. Rik)
Samhita Devanagari Accented
घृ॒तं मि॑मिक्षे घृ॒तम॑स्य॒ योनि॑र्घृ॒ते श्रि॒तो घृ॒तम्व॑स्य॒ धाम॑ ।
अ॒नु॒ष्व॒धमा व॑ह मा॒दय॑स्व॒ स्वाहा॑कृतं वृषभ वक्षि ह॒व्यं ॥
Samhita Devanagari Nonaccented
घृतं मिमिक्षे घृतमस्य योनिर्घृते श्रितो घृतम्वस्य धाम ।
अनुष्वधमा वह मादयस्व स्वाहाकृतं वृषभ वक्षि हव्यं ॥
Samhita Transcription Accented
ghṛtám mimikṣe ghṛtámasya yónirghṛté śritó ghṛtámvasya dhā́ma ǀ
anuṣvadhámā́ vaha mādáyasva svā́hākṛtam vṛṣabha vakṣi havyám ǁ
Samhita Transcription Nonaccented
ghṛtam mimikṣe ghṛtamasya yonirghṛte śrito ghṛtamvasya dhāma ǀ
anuṣvadhamā vaha mādayasva svāhākṛtam vṛṣabha vakṣi havyam ǁ
Padapatha Devanagari Accented
घृ॒तम् । मि॒मि॒क्षे॒ । घृ॒तम् । अ॒स्य॒ । योनिः॑ । घृ॒ते । श्रि॒तः । घृ॒तम् । ऊं॒ इति॑ । अ॒स्य॒ । धाम॑ ।
अ॒नु॒ऽस्व॒धम् । आ । व॒ह॒ । मा॒दय॑स्व । स्वाहा॑ऽकृतम् । वृ॒ष॒भ॒ । व॒क्षि॒ । ह॒व्यम् ॥
Padapatha Devanagari Nonaccented
घृतम् । मिमिक्षे । घृतम् । अस्य । योनिः । घृते । श्रितः । घृतम् । ऊं इति । अस्य । धाम ।
अनुऽस्वधम् । आ । वह । मादयस्व । स्वाहाऽकृतम् । वृषभ । वक्षि । हव्यम् ॥
Padapatha Transcription Accented
ghṛtám ǀ mimikṣe ǀ ghṛtám ǀ asya ǀ yóniḥ ǀ ghṛté ǀ śritáḥ ǀ ghṛtám ǀ ūṃ íti ǀ asya ǀ dhā́ma ǀ
anu-svadhám ǀ ā́ ǀ vaha ǀ mādáyasva ǀ svā́hā-kṛtam ǀ vṛṣabha ǀ vakṣi ǀ havyám ǁ
Padapatha Transcription Nonaccented
ghṛtam ǀ mimikṣe ǀ ghṛtam ǀ asya ǀ yoniḥ ǀ ghṛte ǀ śritaḥ ǀ ghṛtam ǀ ūṃ iti ǀ asya ǀ dhāma ǀ
anu-svadham ǀ ā ǀ vaha ǀ mādayasva ǀ svāhā-kṛtam ǀ vṛṣabha ǀ vakṣi ǀ havyam ǁ