|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 2
Sūkta 11
|
1. Info |
| To: | indra | |
| From: | gṛtsamada bhārgava śaunaka | |
| Metres: | 1st set of styles: nicṛtpaṅkti (3, 4, 6, 11, 12, 14, 18); paṅktiḥ (1, 8, 10, 13, 19, 20); bhurikpaṅkti (2, 9); bhurigbṛhatī (16, 17); svarāḍbṛhatī (5); virāṭpaṅkti (7); bṛhatī (15); triṣṭup (21) 2nd set of styles: virāṭsthānā triṣṭubh (1-20); triṣṭubh (21) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
02.011.01 (Mandala. Sukta. Rik)
2.6.03.01 (Ashtaka. Adhyaya. Varga. Rik)
02.01.090 (Mandala. Anuvāka. Rik)
Samhita Devanagari Accented
श्रु॒धी हव॑मिंद्र॒ मा रि॑षण्यः॒ स्याम॑ ते दा॒वने॒ वसू॑नां ।
इ॒मा हि त्वामूर्जो॑ व॒र्धयं॑ति वसू॒यवः॒ सिंध॑वो॒ न क्षरं॑तः ॥
Samhita Devanagari Nonaccented
श्रुधी हवमिंद्र मा रिषण्यः स्याम ते दावने वसूनां ।
इमा हि त्वामूर्जो वर्धयंति वसूयवः सिंधवो न क्षरंतः ॥
Samhita Transcription Accented
śrudhī́ hávamindra mā́ riṣaṇyaḥ syā́ma te dāváne vásūnām ǀ
imā́ hí tvā́mū́rjo vardháyanti vasūyávaḥ síndhavo ná kṣárantaḥ ǁ
Samhita Transcription Nonaccented
śrudhī havamindra mā riṣaṇyaḥ syāma te dāvane vasūnām ǀ
imā hi tvāmūrjo vardhayanti vasūyavaḥ sindhavo na kṣarantaḥ ǁ
Padapatha Devanagari Accented
श्रु॒धि । हव॑म् । इ॒न्द्र॒ । मा । रि॒ष॒ण्यः॒ । स्याम॑ । ते॒ । दा॒वने॑ । वसू॑नाम् ।
इ॒माः । हि । त्वाम् । ऊर्जः॑ । व॒र्धय॑न्ति । व॒सु॒ऽयवः॑ । सिन्ध॑वः । न । क्षर॑न्तः ॥
Padapatha Devanagari Nonaccented
श्रुधि । हवम् । इन्द्र । मा । रिषण्यः । स्याम । ते । दावने । वसूनाम् ।
इमाः । हि । त्वाम् । ऊर्जः । वर्धयन्ति । वसुऽयवः । सिन्धवः । न । क्षरन्तः ॥
Padapatha Transcription Accented
śrudhí ǀ hávam ǀ indra ǀ mā́ ǀ riṣaṇyaḥ ǀ syā́ma ǀ te ǀ dāváne ǀ vásūnām ǀ
imā́ḥ ǀ hí ǀ tvā́m ǀ ū́rjaḥ ǀ vardháyanti ǀ vasu-yávaḥ ǀ síndhavaḥ ǀ ná ǀ kṣárantaḥ ǁ
Padapatha Transcription Nonaccented
śrudhi ǀ havam ǀ indra ǀ mā ǀ riṣaṇyaḥ ǀ syāma ǀ te ǀ dāvane ǀ vasūnām ǀ
imāḥ ǀ hi ǀ tvām ǀ ūrjaḥ ǀ vardhayanti ǀ vasu-yavaḥ ǀ sindhavaḥ ǀ na ǀ kṣarantaḥ ǁ
02.011.02 (Mandala. Sukta. Rik)
2.6.03.02 (Ashtaka. Adhyaya. Varga. Rik)
02.01.091 (Mandala. Anuvāka. Rik)
Samhita Devanagari Accented
सृ॒जो म॒हीरिं॑द्र॒ या अपि॑न्वः॒ परि॑ष्ठिता॒ अहि॑ना शूर पू॒र्वीः ।
अम॑र्त्यं चिद्दा॒सं मन्य॑मान॒मवा॑भिनदु॒क्थैर्वा॑वृधा॒नः ॥
Samhita Devanagari Nonaccented
सृजो महीरिंद्र या अपिन्वः परिष्ठिता अहिना शूर पूर्वीः ।
अमर्त्यं चिद्दासं मन्यमानमवाभिनदुक्थैर्वावृधानः ॥
Samhita Transcription Accented
sṛjó mahī́rindra yā́ ápinvaḥ páriṣṭhitā áhinā śūra pūrvī́ḥ ǀ
ámartyam ciddāsám mányamānamávābhinaduktháirvāvṛdhānáḥ ǁ
Samhita Transcription Nonaccented
sṛjo mahīrindra yā apinvaḥ pariṣṭhitā ahinā śūra pūrvīḥ ǀ
amartyam ciddāsam manyamānamavābhinadukthairvāvṛdhānaḥ ǁ
Padapatha Devanagari Accented
सृ॒जः । म॒हीः । इ॒न्द्र॒ । याः । अपि॑न्वः । परि॑ऽस्थिताः । अहि॑ना । शू॒र॒ । पू॒र्वीः ।
अम॑र्त्यम् । चि॒त् । दा॒सम् । मन्य॑मानम् । अव॑ । अ॒भि॒न॒त् । उ॒क्थैः । व॒वृ॒धा॒नः ॥
Padapatha Devanagari Nonaccented
सृजः । महीः । इन्द्र । याः । अपिन्वः । परिऽस्थिताः । अहिना । शूर । पूर्वीः ।
अमर्त्यम् । चित् । दासम् । मन्यमानम् । अव । अभिनत् । उक्थैः । ववृधानः ॥
Padapatha Transcription Accented
sṛjáḥ ǀ mahī́ḥ ǀ indra ǀ yā́ḥ ǀ ápinvaḥ ǀ pári-sthitāḥ ǀ áhinā ǀ śūra ǀ pūrvī́ḥ ǀ
ámartyam ǀ cit ǀ dāsám ǀ mányamānam ǀ áva ǀ abhinat ǀ uktháiḥ ǀ vavṛdhānáḥ ǁ
Padapatha Transcription Nonaccented
sṛjaḥ ǀ mahīḥ ǀ indra ǀ yāḥ ǀ apinvaḥ ǀ pari-sthitāḥ ǀ ahinā ǀ śūra ǀ pūrvīḥ ǀ
amartyam ǀ cit ǀ dāsam ǀ manyamānam ǀ ava ǀ abhinat ǀ ukthaiḥ ǀ vavṛdhānaḥ ǁ
02.011.03 (Mandala. Sukta. Rik)
2.6.03.03 (Ashtaka. Adhyaya. Varga. Rik)
02.01.092 (Mandala. Anuvāka. Rik)
Samhita Devanagari Accented
उ॒क्थेष्विन्नु शू॑र॒ येषु॑ चा॒कन्स्तोमे॑ष्विंद्र रु॒द्रिये॑षु च ।
तुभ्येदे॒ता यासु॑ मंदसा॒नः प्र वा॒यवे॑ सिस्रते॒ न शु॒भ्राः ॥
Samhita Devanagari Nonaccented
उक्थेष्विन्नु शूर येषु चाकन्स्तोमेष्विंद्र रुद्रियेषु च ।
तुभ्येदेता यासु मंदसानः प्र वायवे सिस्रते न शुभ्राः ॥
Samhita Transcription Accented
ukthéṣvínnú śūra yéṣu cākánstómeṣvindra rudríyeṣu ca ǀ
túbhyédetā́ yā́su mandasānáḥ prá vāyáve sisrate ná śubhrā́ḥ ǁ
Samhita Transcription Nonaccented
uktheṣvinnu śūra yeṣu cākanstomeṣvindra rudriyeṣu ca ǀ
tubhyedetā yāsu mandasānaḥ pra vāyave sisrate na śubhrāḥ ǁ
Padapatha Devanagari Accented
उ॒क्थेषु॑ । इत् । नु । शू॒र॒ । येषु॑ । चा॒कन् । स्तोमे॑षु । इ॒न्द्र॒ । रु॒द्रिये॑षु । च॒ ।
तुभ्य॑ । इत् । ए॒ताः । यासु॑ । म॒न्द॒सा॒नः । प्र । वा॒यवे॑ । सि॒स्र॒ते॒ । न । शु॒भ्राः ॥
Padapatha Devanagari Nonaccented
उक्थेषु । इत् । नु । शूर । येषु । चाकन् । स्तोमेषु । इन्द्र । रुद्रियेषु । च ।
तुभ्य । इत् । एताः । यासु । मन्दसानः । प्र । वायवे । सिस्रते । न । शुभ्राः ॥
Padapatha Transcription Accented
ukthéṣu ǀ ít ǀ nú ǀ śūra ǀ yéṣu ǀ cākán ǀ stómeṣu ǀ indra ǀ rudríyeṣu ǀ ca ǀ
túbhya ǀ ít ǀ etā́ḥ ǀ yā́su ǀ mandasānáḥ ǀ prá ǀ vāyáve ǀ sisrate ǀ ná ǀ śubhrā́ḥ ǁ
Padapatha Transcription Nonaccented
uktheṣu ǀ it ǀ nu ǀ śūra ǀ yeṣu ǀ cākan ǀ stomeṣu ǀ indra ǀ rudriyeṣu ǀ ca ǀ
tubhya ǀ it ǀ etāḥ ǀ yāsu ǀ mandasānaḥ ǀ pra ǀ vāyave ǀ sisrate ǀ na ǀ śubhrāḥ ǁ
02.011.04 (Mandala. Sukta. Rik)
2.6.03.04 (Ashtaka. Adhyaya. Varga. Rik)
02.01.093 (Mandala. Anuvāka. Rik)
Samhita Devanagari Accented
शु॒भ्रं नु ते॒ शुष्मं॑ व॒र्धयं॑तः शु॒भ्रं वज्रं॑ बा॒ह्वोर्दधा॑नाः ।
शु॒भ्रस्त्वमिं॑द्र वावृधा॒नो अ॒स्मे दासी॒र्विशः॒ सूर्ये॑ण सह्याः ॥
Samhita Devanagari Nonaccented
शुभ्रं नु ते शुष्मं वर्धयंतः शुभ्रं वज्रं बाह्वोर्दधानाः ।
शुभ्रस्त्वमिंद्र वावृधानो अस्मे दासीर्विशः सूर्येण सह्याः ॥
Samhita Transcription Accented
śubhrám nú te śúṣmam vardháyantaḥ śubhrám vájram bāhvórdádhānāḥ ǀ
śubhrástvámindra vāvṛdhānó asmé dā́sīrvíśaḥ sū́ryeṇa sahyāḥ ǁ
Samhita Transcription Nonaccented
śubhram nu te śuṣmam vardhayantaḥ śubhram vajram bāhvordadhānāḥ ǀ
śubhrastvamindra vāvṛdhāno asme dāsīrviśaḥ sūryeṇa sahyāḥ ǁ
Padapatha Devanagari Accented
शु॒भ्रम् । नु । ते॒ । शुष्म॑म् । व॒र्धय॑न्तः । शु॒भ्रम् । वज्र॑म् । बा॒ह्वोः । दधा॑नाः ।
शु॒भ्रः । त्वम् । इ॒न्द्र॒ । व॒वृ॒धा॒नः । अ॒स्मे इति॑ । दासीः॑ । विशः॑ । सूर्ये॑ण । स॒ह्याः॒ ॥
Padapatha Devanagari Nonaccented
शुभ्रम् । नु । ते । शुष्मम् । वर्धयन्तः । शुभ्रम् । वज्रम् । बाह्वोः । दधानाः ।
शुभ्रः । त्वम् । इन्द्र । ववृधानः । अस्मे इति । दासीः । विशः । सूर्येण । सह्याः ॥
Padapatha Transcription Accented
śubhrám ǀ nú ǀ te ǀ śúṣmam ǀ vardháyantaḥ ǀ śubhrám ǀ vájram ǀ bāhvóḥ ǀ dádhānāḥ ǀ
śubhráḥ ǀ tvám ǀ indra ǀ vavṛdhānáḥ ǀ asmé íti ǀ dā́sīḥ ǀ víśaḥ ǀ sū́ryeṇa ǀ sahyāḥ ǁ
Padapatha Transcription Nonaccented
śubhram ǀ nu ǀ te ǀ śuṣmam ǀ vardhayantaḥ ǀ śubhram ǀ vajram ǀ bāhvoḥ ǀ dadhānāḥ ǀ
śubhraḥ ǀ tvam ǀ indra ǀ vavṛdhānaḥ ǀ asme iti ǀ dāsīḥ ǀ viśaḥ ǀ sūryeṇa ǀ sahyāḥ ǁ
02.011.05 (Mandala. Sukta. Rik)
2.6.03.05 (Ashtaka. Adhyaya. Varga. Rik)
02.01.094 (Mandala. Anuvāka. Rik)
Samhita Devanagari Accented
गुहा॑ हि॒तं गुह्यं॑ गू॒ळ्हम॒प्स्वपी॑वृतं मा॒यिनं॑ क्षि॒यंतं॑ ।
उ॒तो अ॒पो द्यां त॑स्त॒भ्वांस॒मह॒न्नहिं॑ शूर वी॒र्ये॑ण ॥
Samhita Devanagari Nonaccented
गुहा हितं गुह्यं गूळ्हमप्स्वपीवृतं मायिनं क्षियंतं ।
उतो अपो द्यां तस्तभ्वांसमहन्नहिं शूर वीर्येण ॥
Samhita Transcription Accented
gúhā hitám gúhyam gūḷhámapsvápīvṛtam māyínam kṣiyántam ǀ
utó apó dyā́m tastabhvā́ṃsamáhannáhim śūra vīryéṇa ǁ
Samhita Transcription Nonaccented
guhā hitam guhyam gūḷhamapsvapīvṛtam māyinam kṣiyantam ǀ
uto apo dyām tastabhvāṃsamahannahim śūra vīryeṇa ǁ
Padapatha Devanagari Accented
गुहा॑ । हि॒तम् । गुह्य॑म् । गू॒ळ्हम् । अ॒प्ऽसु । अपि॑ऽवृतम् । मा॒यिन॑म् । क्षि॒यन्त॑म् ।
उ॒तो इति॑ । अ॒पः । द्याम् । त॒स्त॒भ्वांस॑म् । अह॑न् । अहि॑म् । शू॒र॒ । वी॒र्ये॑ण ॥
Padapatha Devanagari Nonaccented
गुहा । हितम् । गुह्यम् । गूळ्हम् । अप्ऽसु । अपिऽवृतम् । मायिनम् । क्षियन्तम् ।
उतो इति । अपः । द्याम् । तस्तभ्वांसम् । अहन् । अहिम् । शूर । वीर्येण ॥
Padapatha Transcription Accented
gúhā ǀ hitám ǀ gúhyam ǀ gūḷhám ǀ ap-sú ǀ ápi-vṛtam ǀ māyínam ǀ kṣiyántam ǀ
utó íti ǀ apáḥ ǀ dyā́m ǀ tastabhvā́ṃsam ǀ áhan ǀ áhim ǀ śūra ǀ vīryéṇa ǁ
Padapatha Transcription Nonaccented
guhā ǀ hitam ǀ guhyam ǀ gūḷham ǀ ap-su ǀ api-vṛtam ǀ māyinam ǀ kṣiyantam ǀ
uto iti ǀ apaḥ ǀ dyām ǀ tastabhvāṃsam ǀ ahan ǀ ahim ǀ śūra ǀ vīryeṇa ǁ
02.011.06 (Mandala. Sukta. Rik)
2.6.04.01 (Ashtaka. Adhyaya. Varga. Rik)
02.01.095 (Mandala. Anuvāka. Rik)
Samhita Devanagari Accented
स्तवा॒ नु त॑ इंद्र पू॒र्व्या म॒हान्यु॒त स्त॑वाम॒ नूत॑ना कृ॒तानि॑ ।
स्तवा॒ वज्रं॑ बा॒ह्वोरु॒शंतं॒ स्तवा॒ हरी॒ सूर्य॑स्य के॒तू ॥
Samhita Devanagari Nonaccented
स्तवा नु त इंद्र पूर्व्या महान्युत स्तवाम नूतना कृतानि ।
स्तवा वज्रं बाह्वोरुशंतं स्तवा हरी सूर्यस्य केतू ॥
Samhita Transcription Accented
stávā nú ta indra pūrvyā́ mahā́nyutá stavāma nū́tanā kṛtā́ni ǀ
stávā vájram bāhvóruśántam stávā hárī sū́ryasya ketū́ ǁ
Samhita Transcription Nonaccented
stavā nu ta indra pūrvyā mahānyuta stavāma nūtanā kṛtāni ǀ
stavā vajram bāhvoruśantam stavā harī sūryasya ketū ǁ
Padapatha Devanagari Accented
स्तव॑ । नु । ते॒ । इ॒न्द्र॒ । पू॒र्व्या । म॒हानि॑ । उ॒त । स्त॒वा॒म॒ । नूत॑ना । कृ॒तानि॑ ।
स्तव॑ । वज्र॑म् । बा॒ह्वोः । उ॒शन्त॑म् । स्तव॑ । हरी॒ इति॑ । सूर्य॑स्य । के॒तू इति॑ ॥
Padapatha Devanagari Nonaccented
स्तव । नु । ते । इन्द्र । पूर्व्या । महानि । उत । स्तवाम । नूतना । कृतानि ।
स्तव । वज्रम् । बाह्वोः । उशन्तम् । स्तव । हरी इति । सूर्यस्य । केतू इति ॥
Padapatha Transcription Accented
stáva ǀ nú ǀ te ǀ indra ǀ pūrvyā́ ǀ mahā́ni ǀ utá ǀ stavāma ǀ nū́tanā ǀ kṛtā́ni ǀ
stáva ǀ vájram ǀ bāhvóḥ ǀ uśántam ǀ stáva ǀ hárī íti ǀ sū́ryasya ǀ ketū́ íti ǁ
Padapatha Transcription Nonaccented
stava ǀ nu ǀ te ǀ indra ǀ pūrvyā ǀ mahāni ǀ uta ǀ stavāma ǀ nūtanā ǀ kṛtāni ǀ
stava ǀ vajram ǀ bāhvoḥ ǀ uśantam ǀ stava ǀ harī iti ǀ sūryasya ǀ ketū iti ǁ
02.011.07 (Mandala. Sukta. Rik)
2.6.04.02 (Ashtaka. Adhyaya. Varga. Rik)
02.01.096 (Mandala. Anuvāka. Rik)
Samhita Devanagari Accented
हरी॒ नु त॑ इंद्र वा॒जयं॑ता घृत॒श्चुतं॑ स्वा॒रम॑स्वार्ष्टां ।
वि स॑म॒ना भूमि॑रप्रथि॒ष्टारं॑स्त॒ पर्व॑तश्चित्सरि॒ष्यन् ॥
Samhita Devanagari Nonaccented
हरी नु त इंद्र वाजयंता घृतश्चुतं स्वारमस्वार्ष्टां ।
वि समना भूमिरप्रथिष्टारंस्त पर्वतश्चित्सरिष्यन् ॥
Samhita Transcription Accented
hárī nú ta indra vājáyantā ghṛtaścútam svārámasvārṣṭām ǀ
ví samanā́ bhū́miraprathiṣṭā́raṃsta párvataścitsariṣyán ǁ
Samhita Transcription Nonaccented
harī nu ta indra vājayantā ghṛtaścutam svāramasvārṣṭām ǀ
vi samanā bhūmiraprathiṣṭāraṃsta parvataścitsariṣyan ǁ
Padapatha Devanagari Accented
हरी॒ इति॑ । नु । ते॒ । इ॒न्द्र॒ । वा॒जय॑न्ता । घृ॒त॒ऽश्चुत॑म् । स्वा॒रम् । अ॒स्वा॒र्ष्टा॒म् ।
वि । स॒म॒ना । भूमिः॑ । अ॒प्र॒थि॒ष्ट । अरं॑स्त । पर्व॑तः । चि॒त् । स॒रि॒ष्यन् ॥
Padapatha Devanagari Nonaccented
हरी इति । नु । ते । इन्द्र । वाजयन्ता । घृतऽश्चुतम् । स्वारम् । अस्वार्ष्टाम् ।
वि । समना । भूमिः । अप्रथिष्ट । अरंस्त । पर्वतः । चित् । सरिष्यन् ॥
Padapatha Transcription Accented
hárī íti ǀ nú ǀ te ǀ indra ǀ vājáyantā ǀ ghṛta-ścútam ǀ svārám ǀ asvārṣṭām ǀ
ví ǀ samanā́ ǀ bhū́miḥ ǀ aprathiṣṭá ǀ áraṃsta ǀ párvataḥ ǀ cit ǀ sariṣyán ǁ
Padapatha Transcription Nonaccented
harī iti ǀ nu ǀ te ǀ indra ǀ vājayantā ǀ ghṛta-ścutam ǀ svāram ǀ asvārṣṭām ǀ
vi ǀ samanā ǀ bhūmiḥ ǀ aprathiṣṭa ǀ araṃsta ǀ parvataḥ ǀ cit ǀ sariṣyan ǁ
02.011.08 (Mandala. Sukta. Rik)
2.6.04.03 (Ashtaka. Adhyaya. Varga. Rik)
02.01.097 (Mandala. Anuvāka. Rik)
Samhita Devanagari Accented
नि पर्व॑तः सा॒द्यप्र॑युच्छ॒न्त्सं मा॒तृभि॑र्वावशा॒नो अ॑क्रान् ।
दू॒रे पा॒रे वाणीं॑ व॒र्धयं॑त॒ इंद्रे॑षितां ध॒मनिं॑ पप्रथ॒न्नि ॥
Samhita Devanagari Nonaccented
नि पर्वतः साद्यप्रयुच्छन्त्सं मातृभिर्वावशानो अक्रान् ।
दूरे पारे वाणीं वर्धयंत इंद्रेषितां धमनिं पप्रथन्नि ॥
Samhita Transcription Accented
ní párvataḥ sādyáprayucchantsám mātṛ́bhirvāvaśānó akrān ǀ
dūré pāré vā́ṇīm vardháyanta índreṣitām dhamánim paprathanní ǁ
Samhita Transcription Nonaccented
ni parvataḥ sādyaprayucchantsam mātṛbhirvāvaśāno akrān ǀ
dūre pāre vāṇīm vardhayanta indreṣitām dhamanim paprathanni ǁ
Padapatha Devanagari Accented
नि । पर्व॑तः । सा॒दि॒ । अप्र॑ऽयुच्छन् । सम् । मा॒तृऽभिः॑ । वा॒व॒शा॒नः । अ॒क्रा॒न् ।
दू॒रे । पा॒रे । वाणी॑म् । व॒र्धय॑न्तः । इन्द्र॑ऽइषिताम् । ध॒मनि॑म् । प॒प्र॒थ॒न् । नि ॥
Padapatha Devanagari Nonaccented
नि । पर्वतः । सादि । अप्रऽयुच्छन् । सम् । मातृऽभिः । वावशानः । अक्रान् ।
दूरे । पारे । वाणीम् । वर्धयन्तः । इन्द्रऽइषिताम् । धमनिम् । पप्रथन् । नि ॥
Padapatha Transcription Accented
ní ǀ párvataḥ ǀ sādi ǀ ápra-yucchan ǀ sám ǀ mātṛ́-bhiḥ ǀ vāvaśānáḥ ǀ akrān ǀ
dūré ǀ pāré ǀ vā́ṇīm ǀ vardháyantaḥ ǀ índra-iṣitām ǀ dhamánim ǀ paprathan ǀ ní ǁ
Padapatha Transcription Nonaccented
ni ǀ parvataḥ ǀ sādi ǀ apra-yucchan ǀ sam ǀ mātṛ-bhiḥ ǀ vāvaśānaḥ ǀ akrān ǀ
dūre ǀ pāre ǀ vāṇīm ǀ vardhayantaḥ ǀ indra-iṣitām ǀ dhamanim ǀ paprathan ǀ ni ǁ
02.011.09 (Mandala. Sukta. Rik)
2.6.04.04 (Ashtaka. Adhyaya. Varga. Rik)
02.01.098 (Mandala. Anuvāka. Rik)
Samhita Devanagari Accented
इंद्रो॑ म॒हां सिंधु॑मा॒शया॑नं माया॒विनं॑ वृ॒त्रम॑स्फुर॒न्निः ।
अरे॑जेतां॒ रोद॑सी भिया॒ने कनि॑क्रदतो॒ वृष्णो॑ अस्य॒ वज्रा॑त् ॥
Samhita Devanagari Nonaccented
इंद्रो महां सिंधुमाशयानं मायाविनं वृत्रमस्फुरन्निः ।
अरेजेतां रोदसी भियाने कनिक्रदतो वृष्णो अस्य वज्रात् ॥
Samhita Transcription Accented
índro mahā́m síndhumāśáyānam māyāvínam vṛtrámasphuranníḥ ǀ
árejetām ródasī bhiyāné kánikradato vṛ́ṣṇo asya vájrāt ǁ
Samhita Transcription Nonaccented
indro mahām sindhumāśayānam māyāvinam vṛtramasphuranniḥ ǀ
arejetām rodasī bhiyāne kanikradato vṛṣṇo asya vajrāt ǁ
Padapatha Devanagari Accented
इन्द्रः॑ । म॒हाम् । सिन्धु॑म् । आ॒ऽशया॑नम् । मा॒या॒ऽविन॑म् । वृ॒त्रम् । अ॒स्फु॒र॒त् । निः ।
अरे॑जेताम् । रोद॑सी॒ इति॑ । भि॒या॒ने इति॑ । कनि॑क्रदतः । वृष्णः॑ । अ॒स्य॒ । वज्रा॑त् ॥
Padapatha Devanagari Nonaccented
इन्द्रः । महाम् । सिन्धुम् । आऽशयानम् । मायाऽविनम् । वृत्रम् । अस्फुरत् । निः ।
अरेजेताम् । रोदसी इति । भियाने इति । कनिक्रदतः । वृष्णः । अस्य । वज्रात् ॥
Padapatha Transcription Accented
índraḥ ǀ mahā́m ǀ síndhum ǀ ā-śáyānam ǀ māyā-vínam ǀ vṛtrám ǀ asphurat ǀ níḥ ǀ
árejetām ǀ ródasī íti ǀ bhiyāné íti ǀ kánikradataḥ ǀ vṛ́ṣṇaḥ ǀ asya ǀ vájrāt ǁ
Padapatha Transcription Nonaccented
indraḥ ǀ mahām ǀ sindhum ǀ ā-śayānam ǀ māyā-vinam ǀ vṛtram ǀ asphurat ǀ niḥ ǀ
arejetām ǀ rodasī iti ǀ bhiyāne iti ǀ kanikradataḥ ǀ vṛṣṇaḥ ǀ asya ǀ vajrāt ǁ
02.011.10 (Mandala. Sukta. Rik)
2.6.04.05 (Ashtaka. Adhyaya. Varga. Rik)
02.01.099 (Mandala. Anuvāka. Rik)
Samhita Devanagari Accented
अरो॑रवी॒द्वृष्णो॑ अस्य॒ वज्रोऽमा॑नुषं॒ यन्मानु॑षो नि॒जूर्वा॑त् ।
नि मा॒यिनो॑ दान॒वस्य॑ मा॒या अपा॑दयत्पपि॒वान्त्सु॒तस्य॑ ॥
Samhita Devanagari Nonaccented
अरोरवीद्वृष्णो अस्य वज्रोऽमानुषं यन्मानुषो निजूर्वात् ।
नि मायिनो दानवस्य माया अपादयत्पपिवान्त्सुतस्य ॥
Samhita Transcription Accented
ároravīdvṛ́ṣṇo asya vájró’mānuṣam yánmā́nuṣo nijū́rvāt ǀ
ní māyíno dānavásya māyā́ ápādayatpapivā́ntsutásya ǁ
Samhita Transcription Nonaccented
aroravīdvṛṣṇo asya vajro’mānuṣam yanmānuṣo nijūrvāt ǀ
ni māyino dānavasya māyā apādayatpapivāntsutasya ǁ
Padapatha Devanagari Accented
अरो॑रवीत् । वृष्णः॑ । अ॒स्य॒ । वज्रः॑ । अमा॑नुषम् । यत् । मानु॑षः । नि॒ऽजूर्वा॑त् ।
नि । मा॒यिनः॑ । दा॒न॒वस्य॑ । मा॒याः । अपा॑दयत् । प॒पि॒ऽवान् । सु॒तस्य॑ ॥
Padapatha Devanagari Nonaccented
अरोरवीत् । वृष्णः । अस्य । वज्रः । अमानुषम् । यत् । मानुषः । निऽजूर्वात् ।
नि । मायिनः । दानवस्य । मायाः । अपादयत् । पपिऽवान् । सुतस्य ॥
Padapatha Transcription Accented
ároravīt ǀ vṛ́ṣṇaḥ ǀ asya ǀ vájraḥ ǀ ámānuṣam ǀ yát ǀ mā́nuṣaḥ ǀ ni-jū́rvāt ǀ
ní ǀ māyínaḥ ǀ dānavásya ǀ māyā́ḥ ǀ ápādayat ǀ papi-vā́n ǀ sutásya ǁ
Padapatha Transcription Nonaccented
aroravīt ǀ vṛṣṇaḥ ǀ asya ǀ vajraḥ ǀ amānuṣam ǀ yat ǀ mānuṣaḥ ǀ ni-jūrvāt ǀ
ni ǀ māyinaḥ ǀ dānavasya ǀ māyāḥ ǀ apādayat ǀ papi-vān ǀ sutasya ǁ
02.011.11 (Mandala. Sukta. Rik)
2.6.05.01 (Ashtaka. Adhyaya. Varga. Rik)
02.01.100 (Mandala. Anuvāka. Rik)
Samhita Devanagari Accented
पिबा॑पि॒बेदिं॑द्र शूर॒ सोमं॒ मंदं॑तु त्वा मं॒दिनः॑ सु॒तासः॑ ।
पृ॒णंत॑स्ते कु॒क्षी व॑र्धयंत्वि॒त्था सु॒तः पौ॒र इंद्र॑माव ॥
Samhita Devanagari Nonaccented
पिबापिबेदिंद्र शूर सोमं मंदंतु त्वा मंदिनः सुतासः ।
पृणंतस्ते कुक्षी वर्धयंत्वित्था सुतः पौर इंद्रमाव ॥
Samhita Transcription Accented
píbāpibédindra śūra sómam mándantu tvā mandínaḥ sutā́saḥ ǀ
pṛṇántaste kukṣī́ vardhayantvitthā́ sutáḥ paurá índramāva ǁ
Samhita Transcription Nonaccented
pibāpibedindra śūra somam mandantu tvā mandinaḥ sutāsaḥ ǀ
pṛṇantaste kukṣī vardhayantvitthā sutaḥ paura indramāva ǁ
Padapatha Devanagari Accented
पिब॑ऽपिब । इत् । इ॒न्द्र॒ । शू॒र॒ । सोम॑म् । मन्द॑न्तु । त्वा॒ । म॒न्दिनः॑ । सु॒तासः॑ ।
पृ॒णन्तः॑ । ते॒ । कु॒क्षी इति॑ । व॒र्ध॒य॒न्तु॒ । इ॒त्था । सु॒तः । पौ॒रः । इन्द्र॑म् । आ॒व॒ ॥
Padapatha Devanagari Nonaccented
पिबऽपिब । इत् । इन्द्र । शूर । सोमम् । मन्दन्तु । त्वा । मन्दिनः । सुतासः ।
पृणन्तः । ते । कुक्षी इति । वर्धयन्तु । इत्था । सुतः । पौरः । इन्द्रम् । आव ॥
Padapatha Transcription Accented
píba-piba ǀ ít ǀ indra ǀ śūra ǀ sómam ǀ mándantu ǀ tvā ǀ mandínaḥ ǀ sutā́saḥ ǀ
pṛṇántaḥ ǀ te ǀ kukṣī́ íti ǀ vardhayantu ǀ itthā́ ǀ sutáḥ ǀ pauráḥ ǀ índram ǀ āva ǁ
Padapatha Transcription Nonaccented
piba-piba ǀ it ǀ indra ǀ śūra ǀ somam ǀ mandantu ǀ tvā ǀ mandinaḥ ǀ sutāsaḥ ǀ
pṛṇantaḥ ǀ te ǀ kukṣī iti ǀ vardhayantu ǀ itthā ǀ sutaḥ ǀ pauraḥ ǀ indram ǀ āva ǁ
02.011.12 (Mandala. Sukta. Rik)
2.6.05.02 (Ashtaka. Adhyaya. Varga. Rik)
02.01.101 (Mandala. Anuvāka. Rik)
Samhita Devanagari Accented
त्वे इं॒द्राप्य॑भूम॒ विप्रा॒ धियं॑ वनेम ऋत॒या सपं॑तः ।
अ॒व॒स्यवो॑ धीमहि॒ प्रश॑स्तिं स॒द्यस्ते॑ रा॒यो दा॒वने॑ स्याम ॥
Samhita Devanagari Nonaccented
त्वे इंद्राप्यभूम विप्रा धियं वनेम ऋतया सपंतः ।
अवस्यवो धीमहि प्रशस्तिं सद्यस्ते रायो दावने स्याम ॥
Samhita Transcription Accented
tvé indrā́pyabhūma víprā dhíyam vanema ṛtayā́ sápantaḥ ǀ
avasyávo dhīmahi práśastim sadyáste rāyó dāváne syāma ǁ
Samhita Transcription Nonaccented
tve indrāpyabhūma viprā dhiyam vanema ṛtayā sapantaḥ ǀ
avasyavo dhīmahi praśastim sadyaste rāyo dāvane syāma ǁ
Padapatha Devanagari Accented
त्वे इति॑ । इ॒न्द्र॒ । अपि॑ । अ॒भू॒म॒ । विप्राः॑ । धिय॑म् । व॒ने॒म॒ । ऋ॒त॒ऽया । सप॑न्तः ।
अ॒व॒स्यवः॑ । धी॒म॒हि॒ । प्रऽश॑स्तिम् । स॒द्यः । ते॒ । रा॒यः । दा॒वने॑ । स्या॒म॒ ॥
Padapatha Devanagari Nonaccented
त्वे इति । इन्द्र । अपि । अभूम । विप्राः । धियम् । वनेम । ऋतऽया । सपन्तः ।
अवस्यवः । धीमहि । प्रऽशस्तिम् । सद्यः । ते । रायः । दावने । स्याम ॥
Padapatha Transcription Accented
tvé íti ǀ indra ǀ ápi ǀ abhūma ǀ víprāḥ ǀ dhíyam ǀ vanema ǀ ṛta-yā́ ǀ sápantaḥ ǀ
avasyávaḥ ǀ dhīmahi ǀ prá-śastim ǀ sadyáḥ ǀ te ǀ rāyáḥ ǀ dāváne ǀ syāma ǁ
Padapatha Transcription Nonaccented
tve iti ǀ indra ǀ api ǀ abhūma ǀ viprāḥ ǀ dhiyam ǀ vanema ǀ ṛta-yā ǀ sapantaḥ ǀ
avasyavaḥ ǀ dhīmahi ǀ pra-śastim ǀ sadyaḥ ǀ te ǀ rāyaḥ ǀ dāvane ǀ syāma ǁ
02.011.13 (Mandala. Sukta. Rik)
2.6.05.03 (Ashtaka. Adhyaya. Varga. Rik)
02.01.102 (Mandala. Anuvāka. Rik)
Samhita Devanagari Accented
स्याम॒ ते त॑ इंद्र॒ ये त॑ ऊ॒ती अ॑व॒स्यव॒ ऊर्जं॑ व॒र्धयं॑तः ।
शु॒ष्मिंत॑मं॒ यं चा॒कना॑म देवा॒स्मे र॒यिं रा॑सि वी॒रवं॑तं ॥
Samhita Devanagari Nonaccented
स्याम ते त इंद्र ये त ऊती अवस्यव ऊर्जं वर्धयंतः ।
शुष्मिंतमं यं चाकनाम देवास्मे रयिं रासि वीरवंतं ॥
Samhita Transcription Accented
syā́ma té ta indra yé ta ūtī́ avasyáva ū́rjam vardháyantaḥ ǀ
śuṣmíntamam yám cākánāma devāsmé rayím rāsi vīrávantam ǁ
Samhita Transcription Nonaccented
syāma te ta indra ye ta ūtī avasyava ūrjam vardhayantaḥ ǀ
śuṣmintamam yam cākanāma devāsme rayim rāsi vīravantam ǁ
Padapatha Devanagari Accented
स्याम॑ । ते । ते॒ । इ॒न्द्र॒ । ये । ते॒ । ऊ॒ती । अ॒व॒स्यवः॑ । ऊर्ज॑म् । व॒र्धय॑न्तः ।
शु॒ष्मिन्ऽत॑मम् । यम् । चा॒कना॑म । दे॒व॒ । अ॒स्मे इति॑ । र॒यिम् । रा॒सि॒ । वी॒रऽव॑न्तम् ॥
Padapatha Devanagari Nonaccented
स्याम । ते । ते । इन्द्र । ये । ते । ऊती । अवस्यवः । ऊर्जम् । वर्धयन्तः ।
शुष्मिन्ऽतमम् । यम् । चाकनाम । देव । अस्मे इति । रयिम् । रासि । वीरऽवन्तम् ॥
Padapatha Transcription Accented
syā́ma ǀ té ǀ te ǀ indra ǀ yé ǀ te ǀ ūtī́ ǀ avasyávaḥ ǀ ū́rjam ǀ vardháyantaḥ ǀ
śuṣmín-tamam ǀ yám ǀ cākánāma ǀ deva ǀ asmé íti ǀ rayím ǀ rāsi ǀ vīrá-vantam ǁ
Padapatha Transcription Nonaccented
syāma ǀ te ǀ te ǀ indra ǀ ye ǀ te ǀ ūtī ǀ avasyavaḥ ǀ ūrjam ǀ vardhayantaḥ ǀ
śuṣmin-tamam ǀ yam ǀ cākanāma ǀ deva ǀ asme iti ǀ rayim ǀ rāsi ǀ vīra-vantam ǁ
02.011.14 (Mandala. Sukta. Rik)
2.6.05.04 (Ashtaka. Adhyaya. Varga. Rik)
02.01.103 (Mandala. Anuvāka. Rik)
Samhita Devanagari Accented
रासि॒ क्षयं॒ रासि॑ मि॒त्रम॒स्मे रासि॒ शर्ध॑ इंद्र॒ मारु॑तं नः ।
स॒जोष॑सो॒ ये च॑ मंदसा॒नाः प्र वा॒यवः॑ पां॒त्यग्र॑णीतिं ॥
Samhita Devanagari Nonaccented
रासि क्षयं रासि मित्रमस्मे रासि शर्ध इंद्र मारुतं नः ।
सजोषसो ये च मंदसानाः प्र वायवः पांत्यग्रणीतिं ॥
Samhita Transcription Accented
rā́si kṣáyam rā́si mitrámasmé rā́si śárdha indra mā́rutam naḥ ǀ
sajóṣaso yé ca mandasānā́ḥ prá vāyávaḥ pāntyágraṇītim ǁ
Samhita Transcription Nonaccented
rāsi kṣayam rāsi mitramasme rāsi śardha indra mārutam naḥ ǀ
sajoṣaso ye ca mandasānāḥ pra vāyavaḥ pāntyagraṇītim ǁ
Padapatha Devanagari Accented
रासि॑ । क्षय॑म् । रासि॑ । मि॒त्रम् । अ॒स्मे इति॑ । रासि॑ । शर्धः॑ । इ॒न्द्र॒ । मारु॑तम् । नः॒ ।
स॒ऽजोष॑सः । ये । च॒ । म॒न्द॒सा॒नाः । प्र । वा॒यवः॑ । पा॒न्ति॒ । अग्र॑ऽनीतिम् ॥
Padapatha Devanagari Nonaccented
रासि । क्षयम् । रासि । मित्रम् । अस्मे इति । रासि । शर्धः । इन्द्र । मारुतम् । नः ।
सऽजोषसः । ये । च । मन्दसानाः । प्र । वायवः । पान्ति । अग्रऽनीतिम् ॥
Padapatha Transcription Accented
rā́si ǀ kṣáyam ǀ rā́si ǀ mitrám ǀ asmé íti ǀ rā́si ǀ śárdhaḥ ǀ indra ǀ mā́rutam ǀ naḥ ǀ
sa-jóṣasaḥ ǀ yé ǀ ca ǀ mandasānā́ḥ ǀ prá ǀ vāyávaḥ ǀ pānti ǀ ágra-nītim ǁ
Padapatha Transcription Nonaccented
rāsi ǀ kṣayam ǀ rāsi ǀ mitram ǀ asme iti ǀ rāsi ǀ śardhaḥ ǀ indra ǀ mārutam ǀ naḥ ǀ
sa-joṣasaḥ ǀ ye ǀ ca ǀ mandasānāḥ ǀ pra ǀ vāyavaḥ ǀ pānti ǀ agra-nītim ǁ
02.011.15 (Mandala. Sukta. Rik)
2.6.05.05 (Ashtaka. Adhyaya. Varga. Rik)
02.01.104 (Mandala. Anuvāka. Rik)
Samhita Devanagari Accented
व्यंत्विन्नु येषु॑ मंदसा॒नस्तृ॒पत्सोमं॑ पाहि द्र॒ह्यदिं॑द्र ।
अ॒स्मान्त्सु पृ॒त्स्वा त॑रु॒त्राव॑र्धयो॒ द्यां बृ॒हद्भि॑र॒र्कैः ॥
Samhita Devanagari Nonaccented
व्यंत्विन्नु येषु मंदसानस्तृपत्सोमं पाहि द्रह्यदिंद्र ।
अस्मान्त्सु पृत्स्वा तरुत्रावर्धयो द्यां बृहद्भिरर्कैः ॥
Samhita Transcription Accented
vyántvínnú yéṣu mandasānástṛpátsómam pāhi drahyádindra ǀ
asmā́ntsú pṛtsvā́ tarutrā́vardhayo dyā́m bṛhádbhirarkáiḥ ǁ
Samhita Transcription Nonaccented
vyantvinnu yeṣu mandasānastṛpatsomam pāhi drahyadindra ǀ
asmāntsu pṛtsvā tarutrāvardhayo dyām bṛhadbhirarkaiḥ ǁ
Padapatha Devanagari Accented
व्यन्तु॑ । इत् । नु । येषु॑ । म॒न्द॒सा॒नः । तृ॒पत् । सोम॑म् । पा॒हि॒ । द्र॒ह्यत् । इ॒न्द्र॒ ।
अ॒स्मान् । सु । पृ॒त्ऽसु । आ । त॒रु॒त्र॒ । अव॑र्धयः । द्याम् । बृ॒हत्ऽभिः॑ । अ॒र्कैः ॥
Padapatha Devanagari Nonaccented
व्यन्तु । इत् । नु । येषु । मन्दसानः । तृपत् । सोमम् । पाहि । द्रह्यत् । इन्द्र ।
अस्मान् । सु । पृत्ऽसु । आ । तरुत्र । अवर्धयः । द्याम् । बृहत्ऽभिः । अर्कैः ॥
Padapatha Transcription Accented
vyántu ǀ ít ǀ nú ǀ yéṣu ǀ mandasānáḥ ǀ tṛpát ǀ sómam ǀ pāhi ǀ drahyát ǀ indra ǀ
asmā́n ǀ sú ǀ pṛt-sú ǀ ā́ ǀ tarutra ǀ ávardhayaḥ ǀ dyā́m ǀ bṛhát-bhiḥ ǀ arkáiḥ ǁ
Padapatha Transcription Nonaccented
vyantu ǀ it ǀ nu ǀ yeṣu ǀ mandasānaḥ ǀ tṛpat ǀ somam ǀ pāhi ǀ drahyat ǀ indra ǀ
asmān ǀ su ǀ pṛt-su ǀ ā ǀ tarutra ǀ avardhayaḥ ǀ dyām ǀ bṛhat-bhiḥ ǀ arkaiḥ ǁ
02.011.16 (Mandala. Sukta. Rik)
2.6.06.01 (Ashtaka. Adhyaya. Varga. Rik)
02.01.105 (Mandala. Anuvāka. Rik)
Samhita Devanagari Accented
बृ॒हंत॒ इन्नु ये ते॑ तरुत्रो॒क्थेभि॑र्वा सु॒म्नमा॒विवा॑सान् ।
स्तृ॒णा॒नासो॑ ब॒र्हिः प॒स्त्या॑व॒त्त्वोता॒ इदिं॑द्र॒ वाज॑मग्मन् ॥
Samhita Devanagari Nonaccented
बृहंत इन्नु ये ते तरुत्रोक्थेभिर्वा सुम्नमाविवासान् ।
स्तृणानासो बर्हिः पस्त्यावत्त्वोता इदिंद्र वाजमग्मन् ॥
Samhita Transcription Accented
bṛhánta ínnú yé te tarutrokthébhirvā sumnámāvívāsān ǀ
stṛṇānā́so barhíḥ pastyā́vattvótā ídindra vā́jamagman ǁ
Samhita Transcription Nonaccented
bṛhanta innu ye te tarutrokthebhirvā sumnamāvivāsān ǀ
stṛṇānāso barhiḥ pastyāvattvotā idindra vājamagman ǁ
Padapatha Devanagari Accented
बृ॒हन्तः॑ । इत् । नु । ये । ते॒ । त॒रु॒त्र॒ । उ॒क्थेभिः॑ । वा॒ । सु॒म्नम् । आ॒ऽविवा॑सान् ।
स्तृ॒णा॒नासः॑ । ब॒र्हिः । प॒स्त्य॑ऽवत् । त्वाऽऊ॑ताः । इत् । इ॒न्द्र॒ । वाज॑म् । अ॒ग्म॒न् ॥
Padapatha Devanagari Nonaccented
बृहन्तः । इत् । नु । ये । ते । तरुत्र । उक्थेभिः । वा । सुम्नम् । आऽविवासान् ।
स्तृणानासः । बर्हिः । पस्त्यऽवत् । त्वाऽऊताः । इत् । इन्द्र । वाजम् । अग्मन् ॥
Padapatha Transcription Accented
bṛhántaḥ ǀ ít ǀ nú ǀ yé ǀ te ǀ tarutra ǀ ukthébhiḥ ǀ vā ǀ sumnám ǀ ā-vívāsān ǀ
stṛṇānā́saḥ ǀ barhíḥ ǀ pastyá-vat ǀ tvā́-ūtāḥ ǀ ít ǀ indra ǀ vā́jam ǀ agman ǁ
Padapatha Transcription Nonaccented
bṛhantaḥ ǀ it ǀ nu ǀ ye ǀ te ǀ tarutra ǀ ukthebhiḥ ǀ vā ǀ sumnam ǀ ā-vivāsān ǀ
stṛṇānāsaḥ ǀ barhiḥ ǀ pastya-vat ǀ tvā-ūtāḥ ǀ it ǀ indra ǀ vājam ǀ agman ǁ
02.011.17 (Mandala. Sukta. Rik)
2.6.06.02 (Ashtaka. Adhyaya. Varga. Rik)
02.01.106 (Mandala. Anuvāka. Rik)
Samhita Devanagari Accented
उ॒ग्रेष्विन्नु शू॑र मंदसा॒नस्त्रिक॑द्रुकेषु पाहि॒ सोम॑मिंद्र ।
प्र॒दोधु॑व॒च्छ्मश्रु॑षु प्रीणा॒नो या॒हि हरि॑भ्यां सु॒तस्य॑ पी॒तिं ॥
Samhita Devanagari Nonaccented
उग्रेष्विन्नु शूर मंदसानस्त्रिकद्रुकेषु पाहि सोममिंद्र ।
प्रदोधुवच्छ्मश्रुषु प्रीणानो याहि हरिभ्यां सुतस्य पीतिं ॥
Samhita Transcription Accented
ugréṣvínnú śūra mandasānástríkadrukeṣu pāhi sómamindra ǀ
pradódhuvacchmáśruṣu prīṇānó yāhí háribhyām sutásya pītím ǁ
Samhita Transcription Nonaccented
ugreṣvinnu śūra mandasānastrikadrukeṣu pāhi somamindra ǀ
pradodhuvacchmaśruṣu prīṇāno yāhi haribhyām sutasya pītim ǁ
Padapatha Devanagari Accented
उ॒ग्रेषु॑ । इत् । नु । शू॒र॒ । म॒न्द॒सा॒नः । त्रिऽक॑द्रुकेषु । पा॒हि॒ । सोम॑म् । इ॒न्द्र॒ ।
प्र॒ऽदोधु॑वत् । श्मश्रु॑षु । प्री॒णा॒नः । या॒हि । हरि॑ऽभ्याम् । सु॒तस्य॑ । पी॒तिम् ॥
Padapatha Devanagari Nonaccented
उग्रेषु । इत् । नु । शूर । मन्दसानः । त्रिऽकद्रुकेषु । पाहि । सोमम् । इन्द्र ।
प्रऽदोधुवत् । श्मश्रुषु । प्रीणानः । याहि । हरिऽभ्याम् । सुतस्य । पीतिम् ॥
Padapatha Transcription Accented
ugréṣu ǀ ít ǀ nú ǀ śūra ǀ mandasānáḥ ǀ trí-kadrukeṣu ǀ pāhi ǀ sómam ǀ indra ǀ
pra-dódhuvat ǀ śmáśruṣu ǀ prīṇānáḥ ǀ yāhí ǀ hári-bhyām ǀ sutásya ǀ pītím ǁ
Padapatha Transcription Nonaccented
ugreṣu ǀ it ǀ nu ǀ śūra ǀ mandasānaḥ ǀ tri-kadrukeṣu ǀ pāhi ǀ somam ǀ indra ǀ
pra-dodhuvat ǀ śmaśruṣu ǀ prīṇānaḥ ǀ yāhi ǀ hari-bhyām ǀ sutasya ǀ pītim ǁ
02.011.18 (Mandala. Sukta. Rik)
2.6.06.03 (Ashtaka. Adhyaya. Varga. Rik)
02.01.107 (Mandala. Anuvāka. Rik)
Samhita Devanagari Accented
धि॒ष्वा शवः॑ शूर॒ येन॑ वृ॒त्रम॒वाभि॑न॒द्दानु॑मौर्णवा॒भं ।
अपा॑वृणो॒र्ज्योति॒रार्या॑य॒ नि स॑व्य॒तः सा॑दि॒ दस्यु॑रिंद्र ॥
Samhita Devanagari Nonaccented
धिष्वा शवः शूर येन वृत्रमवाभिनद्दानुमौर्णवाभं ।
अपावृणोर्ज्योतिरार्याय नि सव्यतः सादि दस्युरिंद्र ॥
Samhita Transcription Accented
dhiṣvā́ śávaḥ śūra yéna vṛtrámavā́bhinaddā́numaurṇavābhám ǀ
ápāvṛṇorjyótirā́ryāya ní savyatáḥ sādi dásyurindra ǁ
Samhita Transcription Nonaccented
dhiṣvā śavaḥ śūra yena vṛtramavābhinaddānumaurṇavābham ǀ
apāvṛṇorjyotirāryāya ni savyataḥ sādi dasyurindra ǁ
Padapatha Devanagari Accented
धि॒ष्व । शवः॑ । शू॒र॒ । येन॑ । वृ॒त्रम् । अ॒व॒ऽअभि॑नत् । दानु॑म् । औ॒र्ण॒ऽवा॒भम् ।
अप॑ । अ॒वृ॒णोः॒ । ज्योतिः॑ । आर्या॑य । नि । स॒व्य॒तः । सा॒दि॒ । दस्युः॑ । इ॒न्द्र॒ ॥
Padapatha Devanagari Nonaccented
धिष्व । शवः । शूर । येन । वृत्रम् । अवऽअभिनत् । दानुम् । और्णऽवाभम् ।
अप । अवृणोः । ज्योतिः । आर्याय । नि । सव्यतः । सादि । दस्युः । इन्द्र ॥
Padapatha Transcription Accented
dhiṣvá ǀ śávaḥ ǀ śūra ǀ yéna ǀ vṛtrám ǀ ava-ábhinat ǀ dā́num ǀ aurṇa-vābhám ǀ
ápa ǀ avṛṇoḥ ǀ jyótiḥ ǀ ā́ryāya ǀ ní ǀ savyatáḥ ǀ sādi ǀ dásyuḥ ǀ indra ǁ
Padapatha Transcription Nonaccented
dhiṣva ǀ śavaḥ ǀ śūra ǀ yena ǀ vṛtram ǀ ava-abhinat ǀ dānum ǀ aurṇa-vābham ǀ
apa ǀ avṛṇoḥ ǀ jyotiḥ ǀ āryāya ǀ ni ǀ savyataḥ ǀ sādi ǀ dasyuḥ ǀ indra ǁ
02.011.19 (Mandala. Sukta. Rik)
2.6.06.04 (Ashtaka. Adhyaya. Varga. Rik)
02.01.108 (Mandala. Anuvāka. Rik)
Samhita Devanagari Accented
सने॑म॒ ये त॑ ऊ॒तिभि॒स्तरं॑तो॒ विश्वाः॒ स्पृध॒ आर्ये॑ण॒ दस्यू॑न् ।
अ॒स्मभ्यं॒ तत्त्वा॒ष्ट्रं वि॒श्वरू॑प॒मरं॑धयः सा॒ख्यस्य॑ त्रि॒ताय॑ ॥
Samhita Devanagari Nonaccented
सनेम ये त ऊतिभिस्तरंतो विश्वाः स्पृध आर्येण दस्यून् ।
अस्मभ्यं तत्त्वाष्ट्रं विश्वरूपमरंधयः साख्यस्य त्रिताय ॥
Samhita Transcription Accented
sánema yé ta ūtíbhistáranto víśvāḥ spṛ́dha ā́ryeṇa dásyūn ǀ
asmábhyam táttvāṣṭrám viśvárūpamárandhayaḥ sākhyásya tritā́ya ǁ
Samhita Transcription Nonaccented
sanema ye ta ūtibhistaranto viśvāḥ spṛdha āryeṇa dasyūn ǀ
asmabhyam tattvāṣṭram viśvarūpamarandhayaḥ sākhyasya tritāya ǁ
Padapatha Devanagari Accented
सने॑म । ये । ते॒ । ऊ॒तिऽभिः॑ । तर॑न्तः । विश्वाः॑ । स्पृधः॑ । आर्ये॑ण । दस्यू॑न् ।
अ॒स्मभ्य॑म् । तत् । त्वा॒ष्ट्रम् । वि॒श्वऽरू॑पम् । अर॑न्धयः । सा॒ख्यस्य॑ । त्रि॒ताय॑ ॥
Padapatha Devanagari Nonaccented
सनेम । ये । ते । ऊतिऽभिः । तरन्तः । विश्वाः । स्पृधः । आर्येण । दस्यून् ।
अस्मभ्यम् । तत् । त्वाष्ट्रम् । विश्वऽरूपम् । अरन्धयः । साख्यस्य । त्रिताय ॥
Padapatha Transcription Accented
sánema ǀ yé ǀ te ǀ ūtí-bhiḥ ǀ tárantaḥ ǀ víśvāḥ ǀ spṛ́dhaḥ ǀ ā́ryeṇa ǀ dásyūn ǀ
asmábhyam ǀ tát ǀ tvāṣṭrám ǀ viśvá-rūpam ǀ árandhayaḥ ǀ sākhyásya ǀ tritā́ya ǁ
Padapatha Transcription Nonaccented
sanema ǀ ye ǀ te ǀ ūti-bhiḥ ǀ tarantaḥ ǀ viśvāḥ ǀ spṛdhaḥ ǀ āryeṇa ǀ dasyūn ǀ
asmabhyam ǀ tat ǀ tvāṣṭram ǀ viśva-rūpam ǀ arandhayaḥ ǀ sākhyasya ǀ tritāya ǁ
02.011.20 (Mandala. Sukta. Rik)
2.6.06.05 (Ashtaka. Adhyaya. Varga. Rik)
02.01.109 (Mandala. Anuvāka. Rik)
Samhita Devanagari Accented
अ॒स्य सु॑वा॒नस्य॑ मं॒दिन॑स्त्रि॒तस्य॒ न्यर्बु॑दं वावृधा॒नो अ॑स्तः ।
अव॑र्तय॒त्सूर्यो॒ न च॒क्रं भि॒नद्व॒लमिंद्रो॒ अंगि॑रस्वान् ॥
Samhita Devanagari Nonaccented
अस्य सुवानस्य मंदिनस्त्रितस्य न्यर्बुदं वावृधानो अस्तः ।
अवर्तयत्सूर्यो न चक्रं भिनद्वलमिंद्रो अंगिरस्वान् ॥
Samhita Transcription Accented
asyá suvānásya mandínastritásya nyárbudam vāvṛdhānó astaḥ ǀ
ávartayatsū́ryo ná cakrám bhinádvalámíndro áṅgirasvān ǁ
Samhita Transcription Nonaccented
asya suvānasya mandinastritasya nyarbudam vāvṛdhāno astaḥ ǀ
avartayatsūryo na cakram bhinadvalamindro aṅgirasvān ǁ
Padapatha Devanagari Accented
अ॒स्य । सु॒वा॒नस्य॑ । म॒न्दिनः॑ । त्रि॒तस्य॑ । नि । अर्बु॑दम् । व॒वृ॒धा॒नः । अ॒स्त॒रित्य॑स्तः ।
अव॑र्तयत् । सूर्यः॑ । न । च॒क्रम् । भि॒नत् । व॒लम् । इन्द्रः॑ । अङ्गि॑रस्वान् ॥
Padapatha Devanagari Nonaccented
अस्य । सुवानस्य । मन्दिनः । त्रितस्य । नि । अर्बुदम् । ववृधानः । अस्तरित्यस्तः ।
अवर्तयत् । सूर्यः । न । चक्रम् । भिनत् । वलम् । इन्द्रः । अङ्गिरस्वान् ॥
Padapatha Transcription Accented
asyá ǀ suvānásya ǀ mandínaḥ ǀ tritásya ǀ ní ǀ árbudam ǀ vavṛdhānáḥ ǀ astarítyastaḥ ǀ
ávartayat ǀ sū́ryaḥ ǀ ná ǀ cakrám ǀ bhinát ǀ valám ǀ índraḥ ǀ áṅgirasvān ǁ
Padapatha Transcription Nonaccented
asya ǀ suvānasya ǀ mandinaḥ ǀ tritasya ǀ ni ǀ arbudam ǀ vavṛdhānaḥ ǀ astarityastaḥ ǀ
avartayat ǀ sūryaḥ ǀ na ǀ cakram ǀ bhinat ǀ valam ǀ indraḥ ǀ aṅgirasvān ǁ
02.011.21 (Mandala. Sukta. Rik)
2.6.06.06 (Ashtaka. Adhyaya. Varga. Rik)
02.01.110 (Mandala. Anuvāka. Rik)
Samhita Devanagari Accented
नू॒नं सा ते॒ प्रति॒ वरं॑ जरि॒त्रे दु॑ही॒यदिं॑द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद्व॑देम वि॒दथे॑ सु॒वीराः॑ ॥
Samhita Devanagari Nonaccented
नूनं सा ते प्रति वरं जरित्रे दुहीयदिंद्र दक्षिणा मघोनी ।
शिक्षा स्तोतृभ्यो माति धग्भगो नो बृहद्वदेम विदथे सुवीराः ॥
Samhita Transcription Accented
nūnám sā́ te práti váram jaritré duhīyádindra dákṣiṇā maghónī ǀ
śíkṣā stotṛ́bhyo mā́ti dhagbhágo no bṛhádvadema vidáthe suvī́rāḥ ǁ
Samhita Transcription Nonaccented
nūnam sā te prati varam jaritre duhīyadindra dakṣiṇā maghonī ǀ
śikṣā stotṛbhyo māti dhagbhago no bṛhadvadema vidathe suvīrāḥ ǁ
Padapatha Devanagari Accented
नू॒नम् । सा । ते॒ । प्रति॑ । वर॑म् । ज॒रि॒त्रे । दु॒ही॒यत् । इ॒न्द्र॒ । दक्षि॑णा । म॒घोनी॑ ।
शिक्ष॑ । स्तो॒तृऽभ्यः॑ । मा । अति॑ । ध॒क् । भगः॑ । नः॒ । बृ॒हत् । व॒दे॒म॒ । वि॒दथे॑ । सु॒ऽवीराः॑ ॥
Padapatha Devanagari Nonaccented
नूनम् । सा । ते । प्रति । वरम् । जरित्रे । दुहीयत् । इन्द्र । दक्षिणा । मघोनी ।
शिक्ष । स्तोतृऽभ्यः । मा । अति । धक् । भगः । नः । बृहत् । वदेम । विदथे । सुऽवीराः ॥
Padapatha Transcription Accented
nūnám ǀ sā́ ǀ te ǀ práti ǀ váram ǀ jaritré ǀ duhīyát ǀ indra ǀ dákṣiṇā ǀ maghónī ǀ
śíkṣa ǀ stotṛ́-bhyaḥ ǀ mā́ ǀ áti ǀ dhak ǀ bhágaḥ ǀ naḥ ǀ bṛhát ǀ vadema ǀ vidáthe ǀ su-vī́rāḥ ǁ
Padapatha Transcription Nonaccented
nūnam ǀ sā ǀ te ǀ prati ǀ varam ǀ jaritre ǀ duhīyat ǀ indra ǀ dakṣiṇā ǀ maghonī ǀ
śikṣa ǀ stotṛ-bhyaḥ ǀ mā ǀ ati ǀ dhak ǀ bhagaḥ ǀ naḥ ǀ bṛhat ǀ vadema ǀ vidathe ǀ su-vīrāḥ ǁ