|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 2
Sūkta 18
|
1. Info |
| To: | indra | |
| From: | gṛtsamada bhārgava śaunaka | |
| Metres: | 1st set of styles: triṣṭup (2, 3, 9); bhurikpaṅkti (4, 8); svarāṭpaṅkti (5, 6); paṅktiḥ (1); nicṛtpaṅkti (7) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
02.018.01 (Mandala. Sukta. Rik)
2.6.21.01 (Ashtaka. Adhyaya. Varga. Rik)
02.02.069 (Mandala. Anuvāka. Rik)
Samhita Devanagari Accented
प्रा॒ता रथो॒ नवो॑ योजि॒ सस्नि॒श्चतु॑र्युगस्त्रिक॒शः स॒प्तर॑श्मिः ।
दशा॑रित्रो मनु॒ष्यः॑ स्व॒र्षाः स इ॒ष्टिभि॑र्म॒तिभी॒ रंह्यो॑ भूत् ॥
Samhita Devanagari Nonaccented
प्राता रथो नवो योजि सस्निश्चतुर्युगस्त्रिकशः सप्तरश्मिः ।
दशारित्रो मनुष्यः स्वर्षाः स इष्टिभिर्मतिभी रंह्यो भूत् ॥
Samhita Transcription Accented
prātā́ rátho návo yoji sásniścáturyugastrikaśáḥ saptáraśmiḥ ǀ
dáśāritro manuṣyáḥ svarṣā́ḥ sá iṣṭíbhirmatíbhī ráṃhyo bhūt ǁ
Samhita Transcription Nonaccented
prātā ratho navo yoji sasniścaturyugastrikaśaḥ saptaraśmiḥ ǀ
daśāritro manuṣyaḥ svarṣāḥ sa iṣṭibhirmatibhī raṃhyo bhūt ǁ
Padapatha Devanagari Accented
प्रा॒तरिति॑ । रथः॑ । नवः॑ । यो॒जि॒ । सस्निः॑ । चतुः॑ऽयुगः । त्रिऽक॒शः । स॒प्तऽर॑श्मिः ।
दश॑ऽअरित्रः । म॒नु॒ष्यः॑ । स्वः॒ऽसाः । सः । इ॒ष्टिऽभिः॑ । म॒तिऽभिः॑ । रंह्यः॑ । भू॒त् ॥
Padapatha Devanagari Nonaccented
प्रातरिति । रथः । नवः । योजि । सस्निः । चतुःऽयुगः । त्रिऽकशः । सप्तऽरश्मिः ।
दशऽअरित्रः । मनुष्यः । स्वःऽसाः । सः । इष्टिऽभिः । मतिऽभिः । रंह्यः । भूत् ॥
Padapatha Transcription Accented
prātáríti ǀ ráthaḥ ǀ návaḥ ǀ yoji ǀ sásniḥ ǀ cátuḥ-yugaḥ ǀ trí-kaśáḥ ǀ saptá-raśmiḥ ǀ
dáśa-aritraḥ ǀ manuṣyáḥ ǀ svaḥ-sā́ḥ ǀ sáḥ ǀ iṣṭí-bhiḥ ǀ matí-bhiḥ ǀ ráṃhyaḥ ǀ bhūt ǁ
Padapatha Transcription Nonaccented
prātariti ǀ rathaḥ ǀ navaḥ ǀ yoji ǀ sasniḥ ǀ catuḥ-yugaḥ ǀ tri-kaśaḥ ǀ sapta-raśmiḥ ǀ
daśa-aritraḥ ǀ manuṣyaḥ ǀ svaḥ-sāḥ ǀ saḥ ǀ iṣṭi-bhiḥ ǀ mati-bhiḥ ǀ raṃhyaḥ ǀ bhūt ǁ
02.018.02 (Mandala. Sukta. Rik)
2.6.21.02 (Ashtaka. Adhyaya. Varga. Rik)
02.02.070 (Mandala. Anuvāka. Rik)
Samhita Devanagari Accented
सास्मा॒ अरं॑ प्रथ॒मं स द्वि॒तीय॑मु॒तो तृ॒तीयं॒ मनु॑षः॒ स होता॑ ।
अ॒न्यस्या॒ गर्भ॑म॒न्य ऊ॑ जनंत॒ सो अ॒न्येभिः॑ सचते॒ जेन्यो॒ वृषा॑ ॥
Samhita Devanagari Nonaccented
सास्मा अरं प्रथमं स द्वितीयमुतो तृतीयं मनुषः स होता ।
अन्यस्या गर्भमन्य ऊ जनंत सो अन्येभिः सचते जेन्यो वृषा ॥
Samhita Transcription Accented
sā́smā áram prathamám sá dvitī́yamutó tṛtī́yam mánuṣaḥ sá hótā ǀ
anyásyā gárbhamanyá ū jananta só anyébhiḥ sacate jényo vṛ́ṣā ǁ
Samhita Transcription Nonaccented
sāsmā aram prathamam sa dvitīyamuto tṛtīyam manuṣaḥ sa hotā ǀ
anyasyā garbhamanya ū jananta so anyebhiḥ sacate jenyo vṛṣā ǁ
Padapatha Devanagari Accented
सः । अ॒स्मै॒ । अर॑म् । प्र॒थ॒मम् । सः । द्वि॒तीय॑म् । उ॒तो इति॑ । तृ॒तीय॑म् । मनु॑षः । सः । होता॑ ।
अ॒न्यस्याः॑ । गर्भ॑म् । अ॒न्ये । ऊं॒ इति॑ । ज॒न॒न्त॒ । सः । अ॒न्येभिः॑ । स॒च॒ते॒ । जेन्यः॑ । वृषा॑ ॥
Padapatha Devanagari Nonaccented
सः । अस्मै । अरम् । प्रथमम् । सः । द्वितीयम् । उतो इति । तृतीयम् । मनुषः । सः । होता ।
अन्यस्याः । गर्भम् । अन्ये । ऊं इति । जनन्त । सः । अन्येभिः । सचते । जेन्यः । वृषा ॥
Padapatha Transcription Accented
sáḥ ǀ asmai ǀ áram ǀ prathamám ǀ sáḥ ǀ dvitī́yam ǀ utó íti ǀ tṛtī́yam ǀ mánuṣaḥ ǀ sáḥ ǀ hótā ǀ
anyásyāḥ ǀ gárbham ǀ anyé ǀ ūṃ íti ǀ jananta ǀ sáḥ ǀ anyébhiḥ ǀ sacate ǀ jényaḥ ǀ vṛ́ṣā ǁ
Padapatha Transcription Nonaccented
saḥ ǀ asmai ǀ aram ǀ prathamam ǀ saḥ ǀ dvitīyam ǀ uto iti ǀ tṛtīyam ǀ manuṣaḥ ǀ saḥ ǀ hotā ǀ
anyasyāḥ ǀ garbham ǀ anye ǀ ūṃ iti ǀ jananta ǀ saḥ ǀ anyebhiḥ ǀ sacate ǀ jenyaḥ ǀ vṛṣā ǁ
02.018.03 (Mandala. Sukta. Rik)
2.6.21.03 (Ashtaka. Adhyaya. Varga. Rik)
02.02.071 (Mandala. Anuvāka. Rik)
Samhita Devanagari Accented
हरी॒ नु कं॒ रथ॒ इंद्र॑स्य योजमा॒यै सू॒क्तेन॒ वच॑सा॒ नवे॑न ।
मो षु त्वामत्र॑ ब॒हवो॒ हि विप्रा॒ नि री॑रम॒न्यज॑मानासो अ॒न्ये ॥
Samhita Devanagari Nonaccented
हरी नु कं रथ इंद्रस्य योजमायै सूक्तेन वचसा नवेन ।
मो षु त्वामत्र बहवो हि विप्रा नि रीरमन्यजमानासो अन्ये ॥
Samhita Transcription Accented
hárī nú kam rátha índrasya yojamāyái sūkténa vácasā návena ǀ
mó ṣú tvā́mátra bahávo hí víprā ní rīramanyájamānāso anyé ǁ
Samhita Transcription Nonaccented
harī nu kam ratha indrasya yojamāyai sūktena vacasā navena ǀ
mo ṣu tvāmatra bahavo hi viprā ni rīramanyajamānāso anye ǁ
Padapatha Devanagari Accented
हरी॒ इति॑ । नु । क॒म् । रथे॑ । इन्द्र॑स्य । यो॒ज॒म् । आ॒ऽयै । सु॒ऽउ॒क्तेन॑ । वच॑सा । नवे॑न ।
मो इति॑ । सु । त्वाम् । अत्र॑ । ब॒हवः॑ । हि । विप्राः॑ । नि । री॒र॒म॒न् । यज॑मानासः । अ॒न्ये ॥
Padapatha Devanagari Nonaccented
हरी इति । नु । कम् । रथे । इन्द्रस्य । योजम् । आऽयै । सुऽउक्तेन । वचसा । नवेन ।
मो इति । सु । त्वाम् । अत्र । बहवः । हि । विप्राः । नि । रीरमन् । यजमानासः । अन्ये ॥
Padapatha Transcription Accented
hárī íti ǀ nú ǀ kam ǀ ráthe ǀ índrasya ǀ yojam ǀ ā-yái ǀ su-ukténa ǀ vácasā ǀ návena ǀ
mó íti ǀ sú ǀ tvā́m ǀ átra ǀ bahávaḥ ǀ hí ǀ víprāḥ ǀ ní ǀ rīraman ǀ yájamānāsaḥ ǀ anyé ǁ
Padapatha Transcription Nonaccented
harī iti ǀ nu ǀ kam ǀ rathe ǀ indrasya ǀ yojam ǀ ā-yai ǀ su-uktena ǀ vacasā ǀ navena ǀ
mo iti ǀ su ǀ tvām ǀ atra ǀ bahavaḥ ǀ hi ǀ viprāḥ ǀ ni ǀ rīraman ǀ yajamānāsaḥ ǀ anye ǁ
02.018.04 (Mandala. Sukta. Rik)
2.6.21.04 (Ashtaka. Adhyaya. Varga. Rik)
02.02.072 (Mandala. Anuvāka. Rik)
Samhita Devanagari Accented
आ द्वाभ्यां॒ हरि॑भ्यामिंद्र या॒ह्या च॒तुर्भि॒रा ष॒ड्भिर्हू॒यमा॑नः ।
आष्टा॒भिर्द॒शभिः॑ सोम॒पेय॑म॒यं सु॒तः सु॑मख॒ मा मृध॑स्कः ॥
Samhita Devanagari Nonaccented
आ द्वाभ्यां हरिभ्यामिंद्र याह्या चतुर्भिरा षड्भिर्हूयमानः ।
आष्टाभिर्दशभिः सोमपेयमयं सुतः सुमख मा मृधस्कः ॥
Samhita Transcription Accented
ā́ dvā́bhyām háribhyāmindra yāhyā́ catúrbhirā́ ṣaḍbhírhūyámānaḥ ǀ
ā́ṣṭābhírdaśábhiḥ somapéyamayám sutáḥ sumakha mā́ mṛ́dhaskaḥ ǁ
Samhita Transcription Nonaccented
ā dvābhyām haribhyāmindra yāhyā caturbhirā ṣaḍbhirhūyamānaḥ ǀ
āṣṭābhirdaśabhiḥ somapeyamayam sutaḥ sumakha mā mṛdhaskaḥ ǁ
Padapatha Devanagari Accented
आ । द्वाभ्या॑म् । हरि॑ऽभ्याम् । इ॒न्द्र॒ । या॒हि॒ । आ । च॒तुःऽभिः॑ । आ । ष॒ट्ऽभिः । हू॒यमा॑नः ।
आ । अ॒ष्टा॒भिः । द॒शऽभिः॑ । सो॒म॒ऽपेय॑म् । अ॒यम् । सु॒तः । सु॒ऽम॒ख॒ । मा । मृधः॑ । क॒रिति॑ कः ॥
Padapatha Devanagari Nonaccented
आ । द्वाभ्याम् । हरिऽभ्याम् । इन्द्र । याहि । आ । चतुःऽभिः । आ । षट्ऽभिः । हूयमानः ।
आ । अष्टाभिः । दशऽभिः । सोमऽपेयम् । अयम् । सुतः । सुऽमख । मा । मृधः । करिति कः ॥
Padapatha Transcription Accented
ā́ ǀ dvā́bhyām ǀ hári-bhyām ǀ indra ǀ yāhi ǀ ā́ ǀ catúḥ-bhiḥ ǀ ā́ ǀ ṣaṭ-bhíḥ ǀ hūyámānaḥ ǀ
ā́ ǀ aṣṭābhíḥ ǀ daśá-bhiḥ ǀ soma-péyam ǀ ayám ǀ sutáḥ ǀ su-makha ǀ mā́ ǀ mṛ́dhaḥ ǀ karíti kaḥ ǁ
Padapatha Transcription Nonaccented
ā ǀ dvābhyām ǀ hari-bhyām ǀ indra ǀ yāhi ǀ ā ǀ catuḥ-bhiḥ ǀ ā ǀ ṣaṭ-bhiḥ ǀ hūyamānaḥ ǀ
ā ǀ aṣṭābhiḥ ǀ daśa-bhiḥ ǀ soma-peyam ǀ ayam ǀ sutaḥ ǀ su-makha ǀ mā ǀ mṛdhaḥ ǀ kariti kaḥ ǁ
02.018.05 (Mandala. Sukta. Rik)
2.6.21.05 (Ashtaka. Adhyaya. Varga. Rik)
02.02.073 (Mandala. Anuvāka. Rik)
Samhita Devanagari Accented
आ विं॑श॒त्या त्रिं॒शता॑ याह्य॒र्वाङा च॑त्वारिं॒शता॒ हरि॑भिर्युजा॒नः ।
आ पं॑चा॒शता॑ सु॒रथे॑भिरिं॒द्रा ष॒ष्ट्या स॑प्त॒त्या सो॑म॒पेयं॑ ॥
Samhita Devanagari Nonaccented
आ विंशत्या त्रिंशता याह्यर्वाङा चत्वारिंशता हरिभिर्युजानः ।
आ पंचाशता सुरथेभिरिंद्रा षष्ट्या सप्तत्या सोमपेयं ॥
Samhita Transcription Accented
ā́ viṃśatyā́ triṃśátā yāhyarvā́ṅā́ catvāriṃśátā háribhiryujānáḥ ǀ
ā́ pañcāśátā suráthebhirindrā́ ṣaṣṭyā́ saptatyā́ somapéyam ǁ
Samhita Transcription Nonaccented
ā viṃśatyā triṃśatā yāhyarvāṅā catvāriṃśatā haribhiryujānaḥ ǀ
ā pañcāśatā surathebhirindrā ṣaṣṭyā saptatyā somapeyam ǁ
Padapatha Devanagari Accented
आ । विं॒श॒त्या । त्रिं॒शता॑ । या॒हि॒ । अ॒र्वाङ् । आ । च॒त्वा॒रिं॒शता॑ । हरि॑ऽभिः । यु॒जा॒नः ।
आ । प॒ञ्चा॒शता॑ । सु॒ऽरथे॑भिः । इ॒न्द्र॒ । आ । ष॒ष्ट्या । स॒प्त॒त्या । सो॒म॒ऽपेय॑म् ॥
Padapatha Devanagari Nonaccented
आ । विंशत्या । त्रिंशता । याहि । अर्वाङ् । आ । चत्वारिंशता । हरिऽभिः । युजानः ।
आ । पञ्चाशता । सुऽरथेभिः । इन्द्र । आ । षष्ट्या । सप्तत्या । सोमऽपेयम् ॥
Padapatha Transcription Accented
ā́ ǀ viṃśatyā́ ǀ triṃśátā ǀ yāhi ǀ arvā́ṅ ǀ ā́ ǀ catvāriṃśátā ǀ hári-bhiḥ ǀ yujānáḥ ǀ
ā́ ǀ pañcāśátā ǀ su-ráthebhiḥ ǀ indra ǀ ā́ ǀ ṣaṣṭyā́ ǀ saptatyā́ ǀ soma-péyam ǁ
Padapatha Transcription Nonaccented
ā ǀ viṃśatyā ǀ triṃśatā ǀ yāhi ǀ arvāṅ ǀ ā ǀ catvāriṃśatā ǀ hari-bhiḥ ǀ yujānaḥ ǀ
ā ǀ pañcāśatā ǀ su-rathebhiḥ ǀ indra ǀ ā ǀ ṣaṣṭyā ǀ saptatyā ǀ soma-peyam ǁ
02.018.06 (Mandala. Sukta. Rik)
2.6.22.01 (Ashtaka. Adhyaya. Varga. Rik)
02.02.074 (Mandala. Anuvāka. Rik)
Samhita Devanagari Accented
आशी॒त्या न॑व॒त्या या॑ह्य॒र्वाङा श॒तेन॒ हरि॑भिरु॒ह्यमा॑नः ।
अ॒यं हि ते॑ शु॒नहो॑त्रेषु॒ सोम॒ इंद्र॑ त्वा॒या परि॑षिक्तो॒ मदा॑य ॥
Samhita Devanagari Nonaccented
आशीत्या नवत्या याह्यर्वाङा शतेन हरिभिरुह्यमानः ।
अयं हि ते शुनहोत्रेषु सोम इंद्र त्वाया परिषिक्तो मदाय ॥
Samhita Transcription Accented
ā́śītyā́ navatyā́ yāhyarvā́ṅā́ śaténa háribhiruhyámānaḥ ǀ
ayám hí te śunáhotreṣu sóma índra tvāyā́ páriṣikto mádāya ǁ
Samhita Transcription Nonaccented
āśītyā navatyā yāhyarvāṅā śatena haribhiruhyamānaḥ ǀ
ayam hi te śunahotreṣu soma indra tvāyā pariṣikto madāya ǁ
Padapatha Devanagari Accented
आ । अ॒शी॒त्या । न॒व॒त्या । या॒हि॒ । अ॒र्वाङ् । आ । श॒तेन॑ । हरि॑ऽभिः । उ॒ह्यमा॑नः ।
अ॒यम् । हि । ते॒ । शु॒नऽहो॑त्रेषु । सोमः॑ । इन्द्र॑ । त्वा॒ऽया । परि॑ऽसिक्तः । मदा॑य ॥
Padapatha Devanagari Nonaccented
आ । अशीत्या । नवत्या । याहि । अर्वाङ् । आ । शतेन । हरिऽभिः । उह्यमानः ।
अयम् । हि । ते । शुनऽहोत्रेषु । सोमः । इन्द्र । त्वाऽया । परिऽसिक्तः । मदाय ॥
Padapatha Transcription Accented
ā́ ǀ aśītyā́ ǀ navatyā́ ǀ yāhi ǀ arvā́ṅ ǀ ā́ ǀ śaténa ǀ hári-bhiḥ ǀ uhyámānaḥ ǀ
ayám ǀ hí ǀ te ǀ śuná-hotreṣu ǀ sómaḥ ǀ índra ǀ tvā-yā́ ǀ pári-siktaḥ ǀ mádāya ǁ
Padapatha Transcription Nonaccented
ā ǀ aśītyā ǀ navatyā ǀ yāhi ǀ arvāṅ ǀ ā ǀ śatena ǀ hari-bhiḥ ǀ uhyamānaḥ ǀ
ayam ǀ hi ǀ te ǀ śuna-hotreṣu ǀ somaḥ ǀ indra ǀ tvā-yā ǀ pari-siktaḥ ǀ madāya ǁ
02.018.07 (Mandala. Sukta. Rik)
2.6.22.02 (Ashtaka. Adhyaya. Varga. Rik)
02.02.075 (Mandala. Anuvāka. Rik)
Samhita Devanagari Accented
मम॒ ब्रह्में॑द्र या॒ह्यच्छा॒ विश्वा॒ हरी॑ धु॒रि धि॑ष्वा॒ रथ॑स्य ।
पु॒रु॒त्रा हि वि॒हव्यो॑ ब॒भूथा॒स्मिंछू॑र॒ सव॑ने मादयस्व ॥
Samhita Devanagari Nonaccented
मम ब्रह्मेंद्र याह्यच्छा विश्वा हरी धुरि धिष्वा रथस्य ।
पुरुत्रा हि विहव्यो बभूथास्मिंछूर सवने मादयस्व ॥
Samhita Transcription Accented
máma bráhmendra yāhyácchā víśvā hárī dhurí dhiṣvā ráthasya ǀ
purutrā́ hí vihávyo babhū́thāsmíñchūra sávane mādayasva ǁ
Samhita Transcription Nonaccented
mama brahmendra yāhyacchā viśvā harī dhuri dhiṣvā rathasya ǀ
purutrā hi vihavyo babhūthāsmiñchūra savane mādayasva ǁ
Padapatha Devanagari Accented
मम॑ । ब्रह्म॑ । इ॒न्द्र॒ । या॒हि॒ । अच्छ॑ । विश्वा॑ । हरी॒ इति॑ । धु॒रि । धि॒ष्व॒ । रथ॑स्य ।
पु॒रु॒ऽत्रा । हि । वि॒ऽहव्यः॑ । ब॒भूथ॑ । अ॒स्मिन् । शू॒र॒ । सव॑ने । मा॒द॒य॒स्व॒ ॥
Padapatha Devanagari Nonaccented
मम । ब्रह्म । इन्द्र । याहि । अच्छ । विश्वा । हरी इति । धुरि । धिष्व । रथस्य ।
पुरुऽत्रा । हि । विऽहव्यः । बभूथ । अस्मिन् । शूर । सवने । मादयस्व ॥
Padapatha Transcription Accented
máma ǀ bráhma ǀ indra ǀ yāhi ǀ áccha ǀ víśvā ǀ hárī íti ǀ dhurí ǀ dhiṣva ǀ ráthasya ǀ
puru-trā́ ǀ hí ǀ vi-hávyaḥ ǀ babhū́tha ǀ asmín ǀ śūra ǀ sávane ǀ mādayasva ǁ
Padapatha Transcription Nonaccented
mama ǀ brahma ǀ indra ǀ yāhi ǀ accha ǀ viśvā ǀ harī iti ǀ dhuri ǀ dhiṣva ǀ rathasya ǀ
puru-trā ǀ hi ǀ vi-havyaḥ ǀ babhūtha ǀ asmin ǀ śūra ǀ savane ǀ mādayasva ǁ
02.018.08 (Mandala. Sukta. Rik)
2.6.22.03 (Ashtaka. Adhyaya. Varga. Rik)
02.02.076 (Mandala. Anuvāka. Rik)
Samhita Devanagari Accented
न म॒ इंद्रे॑ण स॒ख्यं वि यो॑षद॒स्मभ्य॑मस्य॒ दक्षि॑णा दुहीत ।
उप॒ ज्येष्ठे॒ वरू॑थे॒ गभ॑स्तौ प्रा॒येप्रा॑ये जिगी॒वांसः॑ स्याम ॥
Samhita Devanagari Nonaccented
न म इंद्रेण सख्यं वि योषदस्मभ्यमस्य दक्षिणा दुहीत ।
उप ज्येष्ठे वरूथे गभस्तौ प्रायेप्राये जिगीवांसः स्याम ॥
Samhita Transcription Accented
ná ma índreṇa sakhyám ví yoṣadasmábhyamasya dákṣiṇā duhīta ǀ
úpa jyéṣṭhe várūthe gábhastau prāyéprāye jigīvā́ṃsaḥ syāma ǁ
Samhita Transcription Nonaccented
na ma indreṇa sakhyam vi yoṣadasmabhyamasya dakṣiṇā duhīta ǀ
upa jyeṣṭhe varūthe gabhastau prāyeprāye jigīvāṃsaḥ syāma ǁ
Padapatha Devanagari Accented
न । मे॒ । इन्द्रे॑ण । स॒ख्यम् । वि । यो॒ष॒त् । अ॒स्मभ्य॑म् । अ॒स्य॒ । दक्षि॑णा । दु॒ही॒त॒ ।
उप॑ । ज्येष्ठे॑ । वरू॑थे । गभ॑स्तौ । प्रा॒येऽप्रा॑ये । जि॒गी॒वांसः॑ । स्या॒म॒ ॥
Padapatha Devanagari Nonaccented
न । मे । इन्द्रेण । सख्यम् । वि । योषत् । अस्मभ्यम् । अस्य । दक्षिणा । दुहीत ।
उप । ज्येष्ठे । वरूथे । गभस्तौ । प्रायेऽप्राये । जिगीवांसः । स्याम ॥
Padapatha Transcription Accented
ná ǀ me ǀ índreṇa ǀ sakhyám ǀ ví ǀ yoṣat ǀ asmábhyam ǀ asya ǀ dákṣiṇā ǀ duhīta ǀ
úpa ǀ jyéṣṭhe ǀ várūthe ǀ gábhastau ǀ prāyé-prāye ǀ jigīvā́ṃsaḥ ǀ syāma ǁ
Padapatha Transcription Nonaccented
na ǀ me ǀ indreṇa ǀ sakhyam ǀ vi ǀ yoṣat ǀ asmabhyam ǀ asya ǀ dakṣiṇā ǀ duhīta ǀ
upa ǀ jyeṣṭhe ǀ varūthe ǀ gabhastau ǀ prāye-prāye ǀ jigīvāṃsaḥ ǀ syāma ǁ
02.018.09 (Mandala. Sukta. Rik)
2.6.22.04 (Ashtaka. Adhyaya. Varga. Rik)
02.02.077 (Mandala. Anuvāka. Rik)
Samhita Devanagari Accented
नू॒नं सा ते॒ प्रति॒ वरं॑ जरि॒त्रे दु॑ही॒यदिं॑द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद्व॑देम वि॒दथे॑ सु॒वीराः॑ ॥
Samhita Devanagari Nonaccented
नूनं सा ते प्रति वरं जरित्रे दुहीयदिंद्र दक्षिणा मघोनी ।
शिक्षा स्तोतृभ्यो माति धग्भगो नो बृहद्वदेम विदथे सुवीराः ॥
Samhita Transcription Accented
nūnám sā́ te práti váram jaritré duhīyádindra dákṣiṇā maghónī ǀ
śíkṣā stotṛ́bhyo mā́ti dhagbhágo no bṛhádvadema vidáthe suvī́rāḥ ǁ
Samhita Transcription Nonaccented
nūnam sā te prati varam jaritre duhīyadindra dakṣiṇā maghonī ǀ
śikṣā stotṛbhyo māti dhagbhago no bṛhadvadema vidathe suvīrāḥ ǁ
Padapatha Devanagari Accented
नू॒नम् । सा । ते॒ । प्रति॑ । वर॑म् । ज॒रि॒त्रे । दु॒ही॒यत् । इ॒न्द्र॒ । दक्षि॑णा । म॒घोनी॑ ।
शिक्ष॑ । स्तो॒तृऽभ्यः॑ । मा । अति॑ । ध॒क् । भगः॑ । नः॒ । बृ॒हत् । व॒दे॒म॒ । वि॒दथे॑ । सु॒ऽवीराः॑ ॥
Padapatha Devanagari Nonaccented
नूनम् । सा । ते । प्रति । वरम् । जरित्रे । दुहीयत् । इन्द्र । दक्षिणा । मघोनी ।
शिक्ष । स्तोतृऽभ्यः । मा । अति । धक् । भगः । नः । बृहत् । वदेम । विदथे । सुऽवीराः ॥
Padapatha Transcription Accented
nūnám ǀ sā́ ǀ te ǀ práti ǀ váram ǀ jaritré ǀ duhīyát ǀ indra ǀ dákṣiṇā ǀ maghónī ǀ
śíkṣa ǀ stotṛ́-bhyaḥ ǀ mā́ ǀ áti ǀ dhak ǀ bhágaḥ ǀ naḥ ǀ bṛhát ǀ vadema ǀ vidáthe ǀ su-vī́rāḥ ǁ
Padapatha Transcription Nonaccented
nūnam ǀ sā ǀ te ǀ prati ǀ varam ǀ jaritre ǀ duhīyat ǀ indra ǀ dakṣiṇā ǀ maghonī ǀ
śikṣa ǀ stotṛ-bhyaḥ ǀ mā ǀ ati ǀ dhak ǀ bhagaḥ ǀ naḥ ǀ bṛhat ǀ vadema ǀ vidathe ǀ su-vīrāḥ ǁ