|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 2
Sūkta 28
|
1. Info |
| To: | varuṇa | |
| From: | somahūti bhārgava śaunaka or kūrma gārtsamada | |
| Metres: | 1st set of styles: nicṛttriṣṭup (1, 3, 4, 6); triṣṭup (5, 7, 11); bhurikpaṅkti (2, 10); virāṭtrisṭup (8); bhuriktriṣṭup (9) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
02.028.01 (Mandala. Sukta. Rik)
2.7.09.01 (Ashtaka. Adhyaya. Varga. Rik)
02.03.062 (Mandala. Anuvāka. Rik)
Samhita Devanagari Accented
इ॒दं क॒वेरा॑दि॒त्यस्य॑ स्व॒राजो॒ विश्वा॑नि॒ सांत्य॒भ्य॑स्तु म॒ह्ना ।
अति॒ यो मं॒द्रो य॒जथा॑य दे॒वः सु॑की॒र्तिं भि॑क्षे॒ वरु॑णस्य॒ भूरेः॑ ॥
Samhita Devanagari Nonaccented
इदं कवेरादित्यस्य स्वराजो विश्वानि सांत्यभ्यस्तु मह्ना ।
अति यो मंद्रो यजथाय देवः सुकीर्तिं भिक्षे वरुणस्य भूरेः ॥
Samhita Transcription Accented
idám kavérādityásya svarā́jo víśvāni sā́ntyabhyástu mahnā́ ǀ
áti yó mandró yajáthāya deváḥ sukīrtím bhikṣe váruṇasya bhū́reḥ ǁ
Samhita Transcription Nonaccented
idam kaverādityasya svarājo viśvāni sāntyabhyastu mahnā ǀ
ati yo mandro yajathāya devaḥ sukīrtim bhikṣe varuṇasya bhūreḥ ǁ
Padapatha Devanagari Accented
इ॒दम् । क॒वेः । आ॒दि॒त्यस्य॑ । स्व॒ऽराजः॑ । विश्वा॑नि । सन्ति॑ । अ॒भि । अ॒स्तु॒ । म॒ह्ना ।
अति॑ । यः । म॒न्द्रः । य॒जथा॑य । दे॒वः । सु॒ऽकी॒र्तिम् । भि॒क्षे॒ । वरु॑णस्य । भूरेः॑ ॥
Padapatha Devanagari Nonaccented
इदम् । कवेः । आदित्यस्य । स्वऽराजः । विश्वानि । सन्ति । अभि । अस्तु । मह्ना ।
अति । यः । मन्द्रः । यजथाय । देवः । सुऽकीर्तिम् । भिक्षे । वरुणस्य । भूरेः ॥
Padapatha Transcription Accented
idám ǀ kavéḥ ǀ ādityásya ǀ sva-rā́jaḥ ǀ víśvāni ǀ sánti ǀ abhí ǀ astu ǀ mahnā́ ǀ
áti ǀ yáḥ ǀ mandráḥ ǀ yajáthāya ǀ deváḥ ǀ su-kīrtím ǀ bhikṣe ǀ váruṇasya ǀ bhū́reḥ ǁ
Padapatha Transcription Nonaccented
idam ǀ kaveḥ ǀ ādityasya ǀ sva-rājaḥ ǀ viśvāni ǀ santi ǀ abhi ǀ astu ǀ mahnā ǀ
ati ǀ yaḥ ǀ mandraḥ ǀ yajathāya ǀ devaḥ ǀ su-kīrtim ǀ bhikṣe ǀ varuṇasya ǀ bhūreḥ ǁ
02.028.02 (Mandala. Sukta. Rik)
2.7.09.02 (Ashtaka. Adhyaya. Varga. Rik)
02.03.063 (Mandala. Anuvāka. Rik)
Samhita Devanagari Accented
तव॑ व्र॒ते सु॒भगा॑सः स्याम स्वा॒ध्यो॑ वरुण तुष्टु॒वांसः॑ ।
उ॒पाय॑न उ॒षसां॒ गोम॑तीनाम॒ग्नयो॒ न जर॑माणा॒ अनु॒ द्यून् ॥
Samhita Devanagari Nonaccented
तव व्रते सुभगासः स्याम स्वाध्यो वरुण तुष्टुवांसः ।
उपायन उषसां गोमतीनामग्नयो न जरमाणा अनु द्यून् ॥
Samhita Transcription Accented
táva vraté subhágāsaḥ syāma svādhyó varuṇa tuṣṭuvā́ṃsaḥ ǀ
upā́yana uṣásām gómatīnāmagnáyo ná járamāṇā ánu dyū́n ǁ
Samhita Transcription Nonaccented
tava vrate subhagāsaḥ syāma svādhyo varuṇa tuṣṭuvāṃsaḥ ǀ
upāyana uṣasām gomatīnāmagnayo na jaramāṇā anu dyūn ǁ
Padapatha Devanagari Accented
तव॑ । व्र॒ते । सु॒ऽभगा॑सः । स्या॒म॒ । सु॒ऽआ॒ध्यः॑ । व॒रु॒ण॒ । तु॒स्तु॒ऽवांसः॑ ।
उ॒प॒ऽअय॑ने । उ॒षसा॑म् । गोऽम॑तीनाम् । अ॒ग्नयः॑ । न । जर॑माणाः । अनु॑ । द्यून् ॥
Padapatha Devanagari Nonaccented
तव । व्रते । सुऽभगासः । स्याम । सुऽआध्यः । वरुण । तुस्तुऽवांसः ।
उपऽअयने । उषसाम् । गोऽमतीनाम् । अग्नयः । न । जरमाणाः । अनु । द्यून् ॥
Padapatha Transcription Accented
táva ǀ vraté ǀ su-bhágāsaḥ ǀ syāma ǀ su-ādhyáḥ ǀ varuṇa ǀ tustu-vā́ṃsaḥ ǀ
upa-áyane ǀ uṣásām ǀ gó-matīnām ǀ agnáyaḥ ǀ ná ǀ járamāṇāḥ ǀ ánu ǀ dyū́n ǁ
Padapatha Transcription Nonaccented
tava ǀ vrate ǀ su-bhagāsaḥ ǀ syāma ǀ su-ādhyaḥ ǀ varuṇa ǀ tustu-vāṃsaḥ ǀ
upa-ayane ǀ uṣasām ǀ go-matīnām ǀ agnayaḥ ǀ na ǀ jaramāṇāḥ ǀ anu ǀ dyūn ǁ
02.028.03 (Mandala. Sukta. Rik)
2.7.09.03 (Ashtaka. Adhyaya. Varga. Rik)
02.03.064 (Mandala. Anuvāka. Rik)
Samhita Devanagari Accented
तव॑ स्याम पुरु॒वीर॑स्य॒ शर्म॑न्नुरु॒शंस॑स्य वरुण प्रणेतः ।
यू॒यं नः॑ पुत्रा अदितेरदब्धा अ॒भि क्ष॑मध्वं॒ युज्या॑य देवाः ॥
Samhita Devanagari Nonaccented
तव स्याम पुरुवीरस्य शर्मन्नुरुशंसस्य वरुण प्रणेतः ।
यूयं नः पुत्रा अदितेरदब्धा अभि क्षमध्वं युज्याय देवाः ॥
Samhita Transcription Accented
táva syāma puruvī́rasya śármannuruśáṃsasya varuṇa praṇetaḥ ǀ
yūyám naḥ putrā aditeradabdhā abhí kṣamadhvam yújyāya devāḥ ǁ
Samhita Transcription Nonaccented
tava syāma puruvīrasya śarmannuruśaṃsasya varuṇa praṇetaḥ ǀ
yūyam naḥ putrā aditeradabdhā abhi kṣamadhvam yujyāya devāḥ ǁ
Padapatha Devanagari Accented
अव॑ । स्या॒म॒ । पु॒रु॒ऽवीर॑स्य । शर्म॑न् । उ॒रु॒ऽशंस॑स्य । व॒रु॒ण॒ । प्र॒ने॒त॒रिति॑ प्रऽनेतः ।
यू॒यम् । नः॒ । पु॒त्राः॒ । अ॒दि॒तेः॒ । अ॒द॒ब्धाः॒ । अ॒भि । क्ष॒म॒ध्व॒म् । युज्या॑य । दे॒वाः॒ ॥
Padapatha Devanagari Nonaccented
अव । स्याम । पुरुऽवीरस्य । शर्मन् । उरुऽशंसस्य । वरुण । प्रनेतरिति प्रऽनेतः ।
यूयम् । नः । पुत्राः । अदितेः । अदब्धाः । अभि । क्षमध्वम् । युज्याय । देवाः ॥
Padapatha Transcription Accented
áva ǀ syāma ǀ puru-vī́rasya ǀ śárman ǀ uru-śáṃsasya ǀ varuṇa ǀ pranetaríti pra-netaḥ ǀ
yūyám ǀ naḥ ǀ putrāḥ ǀ aditeḥ ǀ adabdhāḥ ǀ abhí ǀ kṣamadhvam ǀ yújyāya ǀ devāḥ ǁ
Padapatha Transcription Nonaccented
ava ǀ syāma ǀ puru-vīrasya ǀ śarman ǀ uru-śaṃsasya ǀ varuṇa ǀ pranetariti pra-netaḥ ǀ
yūyam ǀ naḥ ǀ putrāḥ ǀ aditeḥ ǀ adabdhāḥ ǀ abhi ǀ kṣamadhvam ǀ yujyāya ǀ devāḥ ǁ
02.028.04 (Mandala. Sukta. Rik)
2.7.09.04 (Ashtaka. Adhyaya. Varga. Rik)
02.03.065 (Mandala. Anuvāka. Rik)
Samhita Devanagari Accented
प्र सी॑मादि॒त्यो अ॑सृजद्विध॒र्ताँ ऋ॒तं सिंध॑वो॒ वरु॑णस्य यंति ।
न श्रा॑म्यंति॒ न वि मु॑चंत्ये॒ते वयो॒ न प॑प्तू रघु॒या परि॑ज्मन् ॥
Samhita Devanagari Nonaccented
प्र सीमादित्यो असृजद्विधर्ताँ ऋतं सिंधवो वरुणस्य यंति ।
न श्राम्यंति न वि मुचंत्येते वयो न पप्तू रघुया परिज्मन् ॥
Samhita Transcription Accented
prá sīmādityó asṛjadvidhartā́m̐ ṛtám síndhavo váruṇasya yanti ǀ
ná śrāmyanti ná ví mucantyeté váyo ná paptū raghuyā́ párijman ǁ
Samhita Transcription Nonaccented
pra sīmādityo asṛjadvidhartām̐ ṛtam sindhavo varuṇasya yanti ǀ
na śrāmyanti na vi mucantyete vayo na paptū raghuyā parijman ǁ
Padapatha Devanagari Accented
प्र । सी॒म् । आ॒दि॒त्यः । अ॒सृ॒ज॒त् । वि॒ऽध॒र्ता । ऋ॒तम् । सिन्ध॑वः । वरु॑णस्य । य॒न्ति॒ ।
न । श्रा॒म्य॒न्ति॒ । न । वि । मु॒च॒न्ति॒ । ए॒ते । वयः॑ । न । प॒प्तुः॒ । र॒घु॒ऽया । परि॑ऽज्मन् ॥
Padapatha Devanagari Nonaccented
प्र । सीम् । आदित्यः । असृजत् । विऽधर्ता । ऋतम् । सिन्धवः । वरुणस्य । यन्ति ।
न । श्राम्यन्ति । न । वि । मुचन्ति । एते । वयः । न । पप्तुः । रघुऽया । परिऽज्मन् ॥
Padapatha Transcription Accented
prá ǀ sīm ǀ ādityáḥ ǀ asṛjat ǀ vi-dhartā́ ǀ ṛtám ǀ síndhavaḥ ǀ váruṇasya ǀ yanti ǀ
ná ǀ śrāmyanti ǀ ná ǀ ví ǀ mucanti ǀ eté ǀ váyaḥ ǀ ná ǀ paptuḥ ǀ raghu-yā́ ǀ pári-jman ǁ
Padapatha Transcription Nonaccented
pra ǀ sīm ǀ ādityaḥ ǀ asṛjat ǀ vi-dhartā ǀ ṛtam ǀ sindhavaḥ ǀ varuṇasya ǀ yanti ǀ
na ǀ śrāmyanti ǀ na ǀ vi ǀ mucanti ǀ ete ǀ vayaḥ ǀ na ǀ paptuḥ ǀ raghu-yā ǀ pari-jman ǁ
02.028.05 (Mandala. Sukta. Rik)
2.7.09.05 (Ashtaka. Adhyaya. Varga. Rik)
02.03.066 (Mandala. Anuvāka. Rik)
Samhita Devanagari Accented
वि मच्छ्र॑थाय रश॒नामि॒वाग॑ ऋ॒ध्याम॑ ते वरुण॒ खामृ॒तस्य॑ ।
मा तंतु॑श्छेदि॒ वय॑तो॒ धियं॑ मे॒ मा मात्रा॑ शार्य॒पसः॑ पु॒र ऋ॒तोः ॥
Samhita Devanagari Nonaccented
वि मच्छ्रथाय रशनामिवाग ऋध्याम ते वरुण खामृतस्य ।
मा तंतुश्छेदि वयतो धियं मे मा मात्रा शार्यपसः पुर ऋतोः ॥
Samhita Transcription Accented
ví mácchrathāya raśanā́mivā́ga ṛdhyā́ma te varuṇa khā́mṛtásya ǀ
mā́ tántuśchedi váyato dhíyam me mā́ mā́trā śāryapásaḥ purá ṛtóḥ ǁ
Samhita Transcription Nonaccented
vi macchrathāya raśanāmivāga ṛdhyāma te varuṇa khāmṛtasya ǀ
mā tantuśchedi vayato dhiyam me mā mātrā śāryapasaḥ pura ṛtoḥ ǁ
Padapatha Devanagari Accented
वि । मत् । श्र॒थ॒य॒ । र॒श॒नाम्ऽइ॑व । आगः॑ । ऋ॒ध्याम॑ । ते॒ । व॒रु॒ण॒ । खाम् । ऋ॒तस्य॑ ।
मा । तन्तुः॑ । छे॒दि॒ । वय॑तः । धिय॑म् । मे॒ । मा । मात्रा॑ । शा॒रि॒ । अ॒पसः॑ । पु॒रा । ऋ॒तोः ॥
Padapatha Devanagari Nonaccented
वि । मत् । श्रथय । रशनाम्ऽइव । आगः । ऋध्याम । ते । वरुण । खाम् । ऋतस्य ।
मा । तन्तुः । छेदि । वयतः । धियम् । मे । मा । मात्रा । शारि । अपसः । पुरा । ऋतोः ॥
Padapatha Transcription Accented
ví ǀ mát ǀ śrathaya ǀ raśanā́m-iva ǀ ā́gaḥ ǀ ṛdhyā́ma ǀ te ǀ varuṇa ǀ khā́m ǀ ṛtásya ǀ
mā́ ǀ tántuḥ ǀ chedi ǀ váyataḥ ǀ dhíyam ǀ me ǀ mā́ ǀ mā́trā ǀ śāri ǀ apásaḥ ǀ purā́ ǀ ṛtóḥ ǁ
Padapatha Transcription Nonaccented
vi ǀ mat ǀ śrathaya ǀ raśanām-iva ǀ āgaḥ ǀ ṛdhyāma ǀ te ǀ varuṇa ǀ khām ǀ ṛtasya ǀ
mā ǀ tantuḥ ǀ chedi ǀ vayataḥ ǀ dhiyam ǀ me ǀ mā ǀ mātrā ǀ śāri ǀ apasaḥ ǀ purā ǀ ṛtoḥ ǁ
02.028.06 (Mandala. Sukta. Rik)
2.7.10.01 (Ashtaka. Adhyaya. Varga. Rik)
02.03.067 (Mandala. Anuvāka. Rik)
Samhita Devanagari Accented
अपो॒ सु म्य॑क्ष वरुण भि॒यसं॒ मत्सम्रा॒ळृता॒वोऽनु॑ मा गृभाय ।
दामे॑व व॒त्साद्वि मु॑मु॒ग्ध्यंहो॑ न॒हि त्वदा॒रे नि॒मिष॑श्च॒नेशे॑ ॥
Samhita Devanagari Nonaccented
अपो सु म्यक्ष वरुण भियसं मत्सम्राळृतावोऽनु मा गृभाय ।
दामेव वत्साद्वि मुमुग्ध्यंहो नहि त्वदारे निमिषश्चनेशे ॥
Samhita Transcription Accented
ápo sú myakṣa varuṇa bhiyásam mátsámrāḷṛ́tāvó’nu mā gṛbhāya ǀ
dā́meva vatsā́dví mumugdhyáṃho nahí tvádāré nimíṣaścanéśe ǁ
Samhita Transcription Nonaccented
apo su myakṣa varuṇa bhiyasam matsamrāḷṛtāvo’nu mā gṛbhāya ǀ
dāmeva vatsādvi mumugdhyaṃho nahi tvadāre nimiṣaścaneśe ǁ
Padapatha Devanagari Accented
अपो॒ इति॑ । सु । म्य॒क्ष॒ । व॒रु॒ण॒ । भि॒यस॑म् । मत् । सम्ऽरा॑ट् । ऋत॑ऽवः । अनु॑ । मा॒ । गृ॒भा॒य॒ ।
दाम॑ऽइव । व॒त्सात् । वि । मु॒मु॒ग्धि॒ । अंहः॑ । न॒हि । त्वत् । आ॒रे । नि॒ऽमिषः॑ । च॒न । ईशे॑ ॥
Padapatha Devanagari Nonaccented
अपो इति । सु । म्यक्ष । वरुण । भियसम् । मत् । सम्ऽराट् । ऋतऽवः । अनु । मा । गृभाय ।
दामऽइव । वत्सात् । वि । मुमुग्धि । अंहः । नहि । त्वत् । आरे । निऽमिषः । चन । ईशे ॥
Padapatha Transcription Accented
ápo íti ǀ sú ǀ myakṣa ǀ varuṇa ǀ bhiyásam ǀ mát ǀ sám-rāṭ ǀ ṛ́ta-vaḥ ǀ ánu ǀ mā ǀ gṛbhāya ǀ
dā́ma-iva ǀ vatsā́t ǀ ví ǀ mumugdhi ǀ áṃhaḥ ǀ nahí ǀ tvát ǀ āré ǀ ni-míṣaḥ ǀ caná ǀ ī́śe ǁ
Padapatha Transcription Nonaccented
apo iti ǀ su ǀ myakṣa ǀ varuṇa ǀ bhiyasam ǀ mat ǀ sam-rāṭ ǀ ṛta-vaḥ ǀ anu ǀ mā ǀ gṛbhāya ǀ
dāma-iva ǀ vatsāt ǀ vi ǀ mumugdhi ǀ aṃhaḥ ǀ nahi ǀ tvat ǀ āre ǀ ni-miṣaḥ ǀ cana ǀ īśe ǁ
02.028.07 (Mandala. Sukta. Rik)
2.7.10.02 (Ashtaka. Adhyaya. Varga. Rik)
02.03.068 (Mandala. Anuvāka. Rik)
Samhita Devanagari Accented
मा नो॑ व॒धैर्व॑रुण॒ ये त॑ इ॒ष्टावेनः॑ कृ॒ण्वंत॑मसुर भ्री॒णंति॑ ।
मा ज्योति॑षः प्रवस॒थानि॑ गन्म॒ वि षू मृधः॑ शिश्रथो जी॒वसे॑ नः ॥
Samhita Devanagari Nonaccented
मा नो वधैर्वरुण ये त इष्टावेनः कृण्वंतमसुर भ्रीणंति ।
मा ज्योतिषः प्रवसथानि गन्म वि षू मृधः शिश्रथो जीवसे नः ॥
Samhita Transcription Accented
mā́ no vadháirvaruṇa yé ta iṣṭā́vénaḥ kṛṇvántamasura bhrīṇánti ǀ
mā́ jyótiṣaḥ pravasathā́ni ganma ví ṣū́ mṛ́dhaḥ śiśratho jīváse naḥ ǁ
Samhita Transcription Nonaccented
mā no vadhairvaruṇa ye ta iṣṭāvenaḥ kṛṇvantamasura bhrīṇanti ǀ
mā jyotiṣaḥ pravasathāni ganma vi ṣū mṛdhaḥ śiśratho jīvase naḥ ǁ
Padapatha Devanagari Accented
मा । नः॒ । व॒धैः । व॒रु॒ण॒ । ये । ते॒ । इ॒ष्टौ । एनः॑ । कृ॒ण्वन्त॑म् । अ॒सु॒र॒ । भ्री॒णन्ति॑ ।
मा । ज्योति॑षः । प्र॒ऽव॒स॒थानि॑ । ग॒न्म॒ । वि । सु । मृधः॑ । शि॒श्र॒थः॒ । जी॒वसे॑ । नः॒ ॥
Padapatha Devanagari Nonaccented
मा । नः । वधैः । वरुण । ये । ते । इष्टौ । एनः । कृण्वन्तम् । असुर । भ्रीणन्ति ।
मा । ज्योतिषः । प्रऽवसथानि । गन्म । वि । सु । मृधः । शिश्रथः । जीवसे । नः ॥
Padapatha Transcription Accented
mā́ ǀ naḥ ǀ vadháiḥ ǀ varuṇa ǀ yé ǀ te ǀ iṣṭáu ǀ énaḥ ǀ kṛṇvántam ǀ asura ǀ bhrīṇánti ǀ
mā́ ǀ jyótiṣaḥ ǀ pra-vasathā́ni ǀ ganma ǀ ví ǀ sú ǀ mṛ́dhaḥ ǀ śiśrathaḥ ǀ jīváse ǀ naḥ ǁ
Padapatha Transcription Nonaccented
mā ǀ naḥ ǀ vadhaiḥ ǀ varuṇa ǀ ye ǀ te ǀ iṣṭau ǀ enaḥ ǀ kṛṇvantam ǀ asura ǀ bhrīṇanti ǀ
mā ǀ jyotiṣaḥ ǀ pra-vasathāni ǀ ganma ǀ vi ǀ su ǀ mṛdhaḥ ǀ śiśrathaḥ ǀ jīvase ǀ naḥ ǁ
02.028.08 (Mandala. Sukta. Rik)
2.7.10.03 (Ashtaka. Adhyaya. Varga. Rik)
02.03.069 (Mandala. Anuvāka. Rik)
Samhita Devanagari Accented
नमः॑ पु॒रा ते॑ वरुणो॒त नू॒नमु॒ताप॒रं तु॑विजात ब्रवाम ।
त्वे हि कं॒ पर्व॑ते॒ न श्रि॒तान्यप्र॑च्युतानि दूळभ व्र॒तानि॑ ॥
Samhita Devanagari Nonaccented
नमः पुरा ते वरुणोत नूनमुतापरं तुविजात ब्रवाम ।
त्वे हि कं पर्वते न श्रितान्यप्रच्युतानि दूळभ व्रतानि ॥
Samhita Transcription Accented
námaḥ purā́ te varuṇotá nūnámutā́parám tuvijāta bravāma ǀ
tvé hí kam párvate ná śritā́nyápracyutāni dūḷabha vratā́ni ǁ
Samhita Transcription Nonaccented
namaḥ purā te varuṇota nūnamutāparam tuvijāta bravāma ǀ
tve hi kam parvate na śritānyapracyutāni dūḷabha vratāni ǁ
Padapatha Devanagari Accented
नमः॑ । पु॒रा । ते॒ । व॒रु॒ण॒ । उ॒त । नू॒नम् । उ॒त । अ॒प॒रम् । तु॒वि॒ऽजा॒त॒ । ब्र॒वा॒म॒ ।
त्वे इति॑ । हि । क॒म् । पर्व॑ते । न । श्रि॒तानि॑ । अप्र॑ऽच्युतानि । दुः॒ऽद॒भ॒ । व्र॒तानि॑ ॥
Padapatha Devanagari Nonaccented
नमः । पुरा । ते । वरुण । उत । नूनम् । उत । अपरम् । तुविऽजात । ब्रवाम ।
त्वे इति । हि । कम् । पर्वते । न । श्रितानि । अप्रऽच्युतानि । दुःऽदभ । व्रतानि ॥
Padapatha Transcription Accented
námaḥ ǀ purā́ ǀ te ǀ varuṇa ǀ utá ǀ nūnám ǀ utá ǀ aparám ǀ tuvi-jāta ǀ bravāma ǀ
tvé íti ǀ hí ǀ kam ǀ párvate ǀ ná ǀ śritā́ni ǀ ápra-cyutāni ǀ duḥ-dabha ǀ vratā́ni ǁ
Padapatha Transcription Nonaccented
namaḥ ǀ purā ǀ te ǀ varuṇa ǀ uta ǀ nūnam ǀ uta ǀ aparam ǀ tuvi-jāta ǀ bravāma ǀ
tve iti ǀ hi ǀ kam ǀ parvate ǀ na ǀ śritāni ǀ apra-cyutāni ǀ duḥ-dabha ǀ vratāni ǁ
02.028.09 (Mandala. Sukta. Rik)
2.7.10.04 (Ashtaka. Adhyaya. Varga. Rik)
02.03.070 (Mandala. Anuvāka. Rik)
Samhita Devanagari Accented
पर॑ ऋ॒णा सा॑वी॒रध॒ मत्कृ॑तानि॒ माहं रा॑जन्न॒न्यकृ॑तेन भोजं ।
अव्यु॑ष्टा॒ इन्नु भूय॑सीरु॒षास॒ आ नो॑ जी॒वान्व॑रुण॒ तासु॑ शाधि ॥
Samhita Devanagari Nonaccented
पर ऋणा सावीरध मत्कृतानि माहं राजन्नन्यकृतेन भोजं ।
अव्युष्टा इन्नु भूयसीरुषास आ नो जीवान्वरुण तासु शाधि ॥
Samhita Transcription Accented
pára ṛṇā́ sāvīrádha mátkṛtāni mā́hám rājannanyákṛtena bhojam ǀ
ávyuṣṭā ínnú bhū́yasīruṣā́sa ā́ no jīvā́nvaruṇa tā́su śādhi ǁ
Samhita Transcription Nonaccented
para ṛṇā sāvīradha matkṛtāni māham rājannanyakṛtena bhojam ǀ
avyuṣṭā innu bhūyasīruṣāsa ā no jīvānvaruṇa tāsu śādhi ǁ
Padapatha Devanagari Accented
परा॑ । ऋ॒णा । सा॒वीः॒ । अध॑ । मत्ऽकृ॑तानि । मा । अ॒हम् । रा॒ज॒न् । अ॒न्यऽकृ॑तेन । भो॒ज॒म् ।
अवि॑ऽउष्टाः । इत् । नु । भूय॑सीः । उ॒षसः॑ । आ । नः॒ । जी॒वान् । व॒रु॒ण॒ । तासु॑ । शा॒धि॒ ॥
Padapatha Devanagari Nonaccented
परा । ऋणा । सावीः । अध । मत्ऽकृतानि । मा । अहम् । राजन् । अन्यऽकृतेन । भोजम् ।
अविऽउष्टाः । इत् । नु । भूयसीः । उषसः । आ । नः । जीवान् । वरुण । तासु । शाधि ॥
Padapatha Transcription Accented
párā ǀ ṛṇā́ ǀ sāvīḥ ǀ ádha ǀ mát-kṛtāni ǀ mā́ ǀ ahám ǀ rājan ǀ anyá-kṛtena ǀ bhojam ǀ
ávi-uṣṭāḥ ǀ ít ǀ nú ǀ bhū́yasīḥ ǀ uṣásaḥ ǀ ā́ ǀ naḥ ǀ jīvā́n ǀ varuṇa ǀ tā́su ǀ śādhi ǁ
Padapatha Transcription Nonaccented
parā ǀ ṛṇā ǀ sāvīḥ ǀ adha ǀ mat-kṛtāni ǀ mā ǀ aham ǀ rājan ǀ anya-kṛtena ǀ bhojam ǀ
avi-uṣṭāḥ ǀ it ǀ nu ǀ bhūyasīḥ ǀ uṣasaḥ ǀ ā ǀ naḥ ǀ jīvān ǀ varuṇa ǀ tāsu ǀ śādhi ǁ
02.028.10 (Mandala. Sukta. Rik)
2.7.10.05 (Ashtaka. Adhyaya. Varga. Rik)
02.03.071 (Mandala. Anuvāka. Rik)
Samhita Devanagari Accented
यो मे॑ राज॒न्युज्यो॑ वा॒ सखा॑ वा॒ स्वप्ने॑ भ॒यं भी॒रवे॒ मह्य॒माह॑ ।
स्ते॒नो वा॒ यो दिप्स॑ति नो॒ वृको॑ वा॒ त्वं तस्मा॑द्वरुण पाह्य॒स्मान् ॥
Samhita Devanagari Nonaccented
यो मे राजन्युज्यो वा सखा वा स्वप्ने भयं भीरवे मह्यमाह ।
स्तेनो वा यो दिप्सति नो वृको वा त्वं तस्माद्वरुण पाह्यस्मान् ॥
Samhita Transcription Accented
yó me rājanyújyo vā sákhā vā svápne bhayám bhīráve máhyamā́ha ǀ
stenó vā yó dípsati no vṛ́ko vā tvám tásmādvaruṇa pāhyasmā́n ǁ
Samhita Transcription Nonaccented
yo me rājanyujyo vā sakhā vā svapne bhayam bhīrave mahyamāha ǀ
steno vā yo dipsati no vṛko vā tvam tasmādvaruṇa pāhyasmān ǁ
Padapatha Devanagari Accented
यः । मे॒ । रा॒ज॒न् । युज्यः॑ । वा॒ । सखा॑ । वा॒ । स्वप्ने॑ । भ॒यम् । भी॒रवे॑ । मह्य॑म् । आह॑ ।
स्ते॒नः । वा॒ । यः । दिप्स॑ति । नः॒ । वृकः॑ । वा॒ । त्वम् । तस्मा॑त् । व॒रु॒ण॒ । पा॒हि॒ । अ॒स्मान् ॥
Padapatha Devanagari Nonaccented
यः । मे । राजन् । युज्यः । वा । सखा । वा । स्वप्ने । भयम् । भीरवे । मह्यम् । आह ।
स्तेनः । वा । यः । दिप्सति । नः । वृकः । वा । त्वम् । तस्मात् । वरुण । पाहि । अस्मान् ॥
Padapatha Transcription Accented
yáḥ ǀ me ǀ rājan ǀ yújyaḥ ǀ vā ǀ sákhā ǀ vā ǀ svápne ǀ bhayám ǀ bhīráve ǀ máhyam ǀ ā́ha ǀ
stenáḥ ǀ vā ǀ yáḥ ǀ dípsati ǀ naḥ ǀ vṛ́kaḥ ǀ vā ǀ tvám ǀ tásmāt ǀ varuṇa ǀ pāhi ǀ asmā́n ǁ
Padapatha Transcription Nonaccented
yaḥ ǀ me ǀ rājan ǀ yujyaḥ ǀ vā ǀ sakhā ǀ vā ǀ svapne ǀ bhayam ǀ bhīrave ǀ mahyam ǀ āha ǀ
stenaḥ ǀ vā ǀ yaḥ ǀ dipsati ǀ naḥ ǀ vṛkaḥ ǀ vā ǀ tvam ǀ tasmāt ǀ varuṇa ǀ pāhi ǀ asmān ǁ
02.028.11 (Mandala. Sukta. Rik)
2.7.10.06 (Ashtaka. Adhyaya. Varga. Rik)
02.03.072 (Mandala. Anuvāka. Rik)
Samhita Devanagari Accented
माहं म॒घोनो॑ वरुण प्रि॒यस्य॑ भूरि॒दाव्न॒ आ वि॑दं॒ शून॑मा॒पेः ।
मा रा॒यो रा॑जन्त्सु॒यमा॒दव॑ स्थां बृ॒हद्व॑देम वि॒दथे॑ सु॒वीराः॑ ॥
Samhita Devanagari Nonaccented
माहं मघोनो वरुण प्रियस्य भूरिदाव्न आ विदं शूनमापेः ।
मा रायो राजन्त्सुयमादव स्थां बृहद्वदेम विदथे सुवीराः ॥
Samhita Transcription Accented
mā́hám maghóno varuṇa priyásya bhūridā́vna ā́ vidam śū́namāpéḥ ǀ
mā́ rāyó rājantsuyámādáva sthām bṛhádvadema vidáthe suvī́rāḥ ǁ
Samhita Transcription Nonaccented
māham maghono varuṇa priyasya bhūridāvna ā vidam śūnamāpeḥ ǀ
mā rāyo rājantsuyamādava sthām bṛhadvadema vidathe suvīrāḥ ǁ
Padapatha Devanagari Accented
मा । अ॒हम् । म॒घोनः॑ । व॒रु॒ण॒ । प्रि॒यस्य॑ । भू॒रि॒ऽदाव्नः॑ । आ । वि॒द॒म् । शून॑म् । आ॒पेः ।
मा । रा॒यः । रा॒ज॒न् । सु॒ऽयमा॑त् । अव॑ । स्था॒म् । बृ॒हत् । व॒दे॒म॒ । वि॒दथे॑ । सु॒ऽवीराः॑ ॥
Padapatha Devanagari Nonaccented
मा । अहम् । मघोनः । वरुण । प्रियस्य । भूरिऽदाव्नः । आ । विदम् । शूनम् । आपेः ।
मा । रायः । राजन् । सुऽयमात् । अव । स्थाम् । बृहत् । वदेम । विदथे । सुऽवीराः ॥
Padapatha Transcription Accented
mā́ ǀ ahám ǀ maghónaḥ ǀ varuṇa ǀ priyásya ǀ bhūri-dā́vnaḥ ǀ ā́ ǀ vidam ǀ śū́nam ǀ āpéḥ ǀ
mā́ ǀ rāyáḥ ǀ rājan ǀ su-yámāt ǀ áva ǀ sthām ǀ bṛhát ǀ vadema ǀ vidáthe ǀ su-vī́rāḥ ǁ
Padapatha Transcription Nonaccented
mā ǀ aham ǀ maghonaḥ ǀ varuṇa ǀ priyasya ǀ bhūri-dāvnaḥ ǀ ā ǀ vidam ǀ śūnam ǀ āpeḥ ǀ
mā ǀ rāyaḥ ǀ rājan ǀ su-yamāt ǀ ava ǀ sthām ǀ bṛhat ǀ vadema ǀ vidathe ǀ su-vīrāḥ ǁ