|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 3
Sūkta 3
|
1. Info |
| To: | agni vaiśvānara | |
| From: | viśvāmitra gāthina | |
| Metres: | 1st set of styles: jagatī (2-4, 6, 8, 9); nicṛjjagatī (1, 5); virāḍjagatī (7, 10); bhurikpaṅkti (11) 2nd set of styles: jagatī |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
03.003.01 (Mandala. Sukta. Rik)
2.8.20.01 (Ashtaka. Adhyaya. Varga. Rik)
03.01.039 (Mandala. Anuvāka. Rik)
Samhita Devanagari Accented
वै॒श्वा॒न॒राय॑ पृथु॒पाज॑से॒ विपो॒ रत्ना॑ विधंत ध॒रुणे॑षु॒ गात॑वे ।
अ॒ग्निर्हि दे॒वाँ अ॒मृतो॑ दुव॒स्यत्यथा॒ धर्मा॑णि स॒नता॒ न दू॑दुषत् ॥
Samhita Devanagari Nonaccented
वैश्वानराय पृथुपाजसे विपो रत्ना विधंत धरुणेषु गातवे ।
अग्निर्हि देवाँ अमृतो दुवस्यत्यथा धर्माणि सनता न दूदुषत् ॥
Samhita Transcription Accented
vaiśvānarā́ya pṛthupā́jase vípo rátnā vidhanta dharúṇeṣu gā́tave ǀ
agnírhí devā́m̐ amṛ́to duvasyátyáthā dhármāṇi sanátā ná dūduṣat ǁ
Samhita Transcription Nonaccented
vaiśvānarāya pṛthupājase vipo ratnā vidhanta dharuṇeṣu gātave ǀ
agnirhi devām̐ amṛto duvasyatyathā dharmāṇi sanatā na dūduṣat ǁ
Padapatha Devanagari Accented
वै॒श्वा॒न॒राय॑ । पृ॒थु॒ऽपाज॑से । विपः॑ । रत्ना॑ । वि॒ध॒न्त॒ । ध॒रुणे॑षु । गात॑वे ।
अ॒ग्निः । हि । दे॒वान् । अ॒मृतः॑ । दु॒व॒स्यति॑ । अथ॑ । धर्मा॑णि । स॒नता॑ । न । दू॒दु॒ष॒त् ॥
Padapatha Devanagari Nonaccented
वैश्वानराय । पृथुऽपाजसे । विपः । रत्ना । विधन्त । धरुणेषु । गातवे ।
अग्निः । हि । देवान् । अमृतः । दुवस्यति । अथ । धर्माणि । सनता । न । दूदुषत् ॥
Padapatha Transcription Accented
vaiśvānarā́ya ǀ pṛthu-pā́jase ǀ vípaḥ ǀ rátnā ǀ vidhanta ǀ dharúṇeṣu ǀ gā́tave ǀ
agníḥ ǀ hí ǀ devā́n ǀ amṛ́taḥ ǀ duvasyáti ǀ átha ǀ dhármāṇi ǀ sanátā ǀ ná ǀ dūduṣat ǁ
Padapatha Transcription Nonaccented
vaiśvānarāya ǀ pṛthu-pājase ǀ vipaḥ ǀ ratnā ǀ vidhanta ǀ dharuṇeṣu ǀ gātave ǀ
agniḥ ǀ hi ǀ devān ǀ amṛtaḥ ǀ duvasyati ǀ atha ǀ dharmāṇi ǀ sanatā ǀ na ǀ dūduṣat ǁ
03.003.02 (Mandala. Sukta. Rik)
2.8.20.02 (Ashtaka. Adhyaya. Varga. Rik)
03.01.040 (Mandala. Anuvāka. Rik)
Samhita Devanagari Accented
अं॒तर्दू॒तो रोद॑सी द॒स्म ई॑यते॒ होता॒ निष॑त्तो॒ मनु॑षः पु॒रोहि॑तः ।
क्षयं॑ बृ॒हंतं॒ परि॑ भूषति॒ द्युभि॑र्दे॒वेभि॑र॒ग्निरि॑षि॒तो धि॒याव॑सुः ॥
Samhita Devanagari Nonaccented
अंतर्दूतो रोदसी दस्म ईयते होता निषत्तो मनुषः पुरोहितः ।
क्षयं बृहंतं परि भूषति द्युभिर्देवेभिरग्निरिषितो धियावसुः ॥
Samhita Transcription Accented
antárdūtó ródasī dasmá īyate hótā níṣatto mánuṣaḥ puróhitaḥ ǀ
kṣáyam bṛhántam pári bhūṣati dyúbhirdevébhiragníriṣitó dhiyā́vasuḥ ǁ
Samhita Transcription Nonaccented
antardūto rodasī dasma īyate hotā niṣatto manuṣaḥ purohitaḥ ǀ
kṣayam bṛhantam pari bhūṣati dyubhirdevebhiragniriṣito dhiyāvasuḥ ǁ
Padapatha Devanagari Accented
अ॒न्तः । दू॒तः । रोद॑सी॒ इति॑ । द॒स्मः । ई॒य॒ते॒ । होता॑ । निऽस॑त्तः । मनु॑षः । पु॒रःऽहि॑तः ।
क्षय॑म् । बृ॒हन्त॑म् । परि॑ । भू॒ष॒ति॒ । द्युऽभिः॑ । दे॒वेभिः॑ । अ॒ग्निः । इ॒षि॒तः । धि॒याऽव॑सुः ॥
Padapatha Devanagari Nonaccented
अन्तः । दूतः । रोदसी इति । दस्मः । ईयते । होता । निऽसत्तः । मनुषः । पुरःऽहितः ।
क्षयम् । बृहन्तम् । परि । भूषति । द्युऽभिः । देवेभिः । अग्निः । इषितः । धियाऽवसुः ॥
Padapatha Transcription Accented
antáḥ ǀ dūtáḥ ǀ ródasī íti ǀ dasmáḥ ǀ īyate ǀ hótā ǀ ní-sattaḥ ǀ mánuṣaḥ ǀ puráḥ-hitaḥ ǀ
kṣáyam ǀ bṛhántam ǀ pári ǀ bhūṣati ǀ dyú-bhiḥ ǀ devébhiḥ ǀ agníḥ ǀ iṣitáḥ ǀ dhiyā́-vasuḥ ǁ
Padapatha Transcription Nonaccented
antaḥ ǀ dūtaḥ ǀ rodasī iti ǀ dasmaḥ ǀ īyate ǀ hotā ǀ ni-sattaḥ ǀ manuṣaḥ ǀ puraḥ-hitaḥ ǀ
kṣayam ǀ bṛhantam ǀ pari ǀ bhūṣati ǀ dyu-bhiḥ ǀ devebhiḥ ǀ agniḥ ǀ iṣitaḥ ǀ dhiyā-vasuḥ ǁ
03.003.03 (Mandala. Sukta. Rik)
2.8.20.03 (Ashtaka. Adhyaya. Varga. Rik)
03.01.041 (Mandala. Anuvāka. Rik)
Samhita Devanagari Accented
के॒तुं य॒ज्ञानां॑ वि॒दथ॑स्य॒ साध॑नं॒ विप्रा॑सो अ॒ग्निं म॑हयंत॒ चित्ति॑भिः ।
अपां॑सि॒ यस्मि॒न्नधि॑ संद॒धुर्गिर॒स्तस्मि॑न्त्सु॒म्नानि॒ यज॑मान॒ आ च॑के ॥
Samhita Devanagari Nonaccented
केतुं यज्ञानां विदथस्य साधनं विप्रासो अग्निं महयंत चित्तिभिः ।
अपांसि यस्मिन्नधि संदधुर्गिरस्तस्मिन्त्सुम्नानि यजमान आ चके ॥
Samhita Transcription Accented
ketúm yajñā́nām vidáthasya sā́dhanam víprāso agním mahayanta cíttibhiḥ ǀ
ápāṃsi yásminnádhi saṃdadhúrgírastásmintsumnā́ni yájamāna ā́ cake ǁ
Samhita Transcription Nonaccented
ketum yajñānām vidathasya sādhanam viprāso agnim mahayanta cittibhiḥ ǀ
apāṃsi yasminnadhi saṃdadhurgirastasmintsumnāni yajamāna ā cake ǁ
Padapatha Devanagari Accented
के॒तुम् । य॒ज्ञाना॑म् । वि॒दथ॑स्य । साध॑नम् । विप्रा॑सः । अ॒ग्निम् । म॒ह॒य॒न्त॒ । चित्ति॑ऽभिः ।
अपां॑सि । यस्मि॑न् । अधि॑ । स॒म्ऽद॒धुः । गिरः॑ । तस्मि॑न् । सु॒म्नानि॑ । यज॑मानः । आ । च॒के॒ ॥
Padapatha Devanagari Nonaccented
केतुम् । यज्ञानाम् । विदथस्य । साधनम् । विप्रासः । अग्निम् । महयन्त । चित्तिऽभिः ।
अपांसि । यस्मिन् । अधि । सम्ऽदधुः । गिरः । तस्मिन् । सुम्नानि । यजमानः । आ । चके ॥
Padapatha Transcription Accented
ketúm ǀ yajñā́nām ǀ vidáthasya ǀ sā́dhanam ǀ víprāsaḥ ǀ agním ǀ mahayanta ǀ cítti-bhiḥ ǀ
ápāṃsi ǀ yásmin ǀ ádhi ǀ sam-dadhúḥ ǀ gíraḥ ǀ tásmin ǀ sumnā́ni ǀ yájamānaḥ ǀ ā́ ǀ cake ǁ
Padapatha Transcription Nonaccented
ketum ǀ yajñānām ǀ vidathasya ǀ sādhanam ǀ viprāsaḥ ǀ agnim ǀ mahayanta ǀ citti-bhiḥ ǀ
apāṃsi ǀ yasmin ǀ adhi ǀ sam-dadhuḥ ǀ giraḥ ǀ tasmin ǀ sumnāni ǀ yajamānaḥ ǀ ā ǀ cake ǁ
03.003.04 (Mandala. Sukta. Rik)
2.8.20.04 (Ashtaka. Adhyaya. Varga. Rik)
03.01.042 (Mandala. Anuvāka. Rik)
Samhita Devanagari Accented
पि॒ता य॒ज्ञाना॒मसु॑रो विप॒श्चितां॑ वि॒मान॑म॒ग्निर्व॒युनं॑ च वा॒घतां॑ ।
आ वि॑वेश॒ रोद॑सी॒ भूरि॑वर्पसा पुरुप्रि॒यो भं॑दते॒ धाम॑भिः क॒विः ॥
Samhita Devanagari Nonaccented
पिता यज्ञानामसुरो विपश्चितां विमानमग्निर्वयुनं च वाघतां ।
आ विवेश रोदसी भूरिवर्पसा पुरुप्रियो भंदते धामभिः कविः ॥
Samhita Transcription Accented
pitā́ yajñā́nāmásuro vipaścítām vimā́namagnírvayúnam ca vāghátām ǀ
ā́ viveśa ródasī bhū́rivarpasā purupriyó bhandate dhā́mabhiḥ kavíḥ ǁ
Samhita Transcription Nonaccented
pitā yajñānāmasuro vipaścitām vimānamagnirvayunam ca vāghatām ǀ
ā viveśa rodasī bhūrivarpasā purupriyo bhandate dhāmabhiḥ kaviḥ ǁ
Padapatha Devanagari Accented
पि॒ता । य॒ज्ञाना॑म् । असु॑रः । वि॒पः॒ऽचिता॑म् । वि॒ऽमान॑म् । अ॒ग्निः । व॒युन॑म् । च॒ । वा॒घता॑म् ।
आ । वि॒वे॒श॒ । रोद॑सी॒ इति॑ । भूरि॑ऽवर्पसा । पु॒रु॒ऽप्रि॒यः । भ॒न्द॒ते॒ । धाम॑ऽभिः । क॒विः ॥
Padapatha Devanagari Nonaccented
पिता । यज्ञानाम् । असुरः । विपःऽचिताम् । विऽमानम् । अग्निः । वयुनम् । च । वाघताम् ।
आ । विवेश । रोदसी इति । भूरिऽवर्पसा । पुरुऽप्रियः । भन्दते । धामऽभिः । कविः ॥
Padapatha Transcription Accented
pitā́ ǀ yajñā́nām ǀ ásuraḥ ǀ vipaḥ-cítām ǀ vi-mā́nam ǀ agníḥ ǀ vayúnam ǀ ca ǀ vāghátām ǀ
ā́ ǀ viveśa ǀ ródasī íti ǀ bhū́ri-varpasā ǀ puru-priyáḥ ǀ bhandate ǀ dhā́ma-bhiḥ ǀ kavíḥ ǁ
Padapatha Transcription Nonaccented
pitā ǀ yajñānām ǀ asuraḥ ǀ vipaḥ-citām ǀ vi-mānam ǀ agniḥ ǀ vayunam ǀ ca ǀ vāghatām ǀ
ā ǀ viveśa ǀ rodasī iti ǀ bhūri-varpasā ǀ puru-priyaḥ ǀ bhandate ǀ dhāma-bhiḥ ǀ kaviḥ ǁ
03.003.05 (Mandala. Sukta. Rik)
2.8.20.05 (Ashtaka. Adhyaya. Varga. Rik)
03.01.043 (Mandala. Anuvāka. Rik)
Samhita Devanagari Accented
चं॒द्रम॒ग्निं चं॒द्रर॑थं॒ हरि॑व्रतं वैश्वान॒रम॑प्सु॒षदं॑ स्व॒र्विदं॑ ।
वि॒गा॒हं तूर्णिं॒ तवि॑षीभि॒रावृ॑तं॒ भूर्णिं॑ दे॒वास॑ इ॒ह सु॒श्रियं॑ दधुः ॥
Samhita Devanagari Nonaccented
चंद्रमग्निं चंद्ररथं हरिव्रतं वैश्वानरमप्सुषदं स्वर्विदं ।
विगाहं तूर्णिं तविषीभिरावृतं भूर्णिं देवास इह सुश्रियं दधुः ॥
Samhita Transcription Accented
candrámagním candráratham hárivratam vaiśvānarámapsuṣádam svarvídam ǀ
vigāhám tū́rṇim táviṣībhirā́vṛtam bhū́rṇim devā́sa ihá suśríyam dadhuḥ ǁ
Samhita Transcription Nonaccented
candramagnim candraratham harivratam vaiśvānaramapsuṣadam svarvidam ǀ
vigāham tūrṇim taviṣībhirāvṛtam bhūrṇim devāsa iha suśriyam dadhuḥ ǁ
Padapatha Devanagari Accented
च॒न्द्रम् । अ॒ग्निम् । च॒न्द्रऽर॑थम् । हरि॑ऽव्रतम् । वै॒श्वा॒न॒रम् । अ॒प्सु॒ऽसद॑म् । स्वः॒ऽविद॑म् ।
वि॒ऽगा॒हम् । तूर्णि॑म् । तवि॑षीभिः । आऽवृ॑तम् । भूर्णि॑म् । दे॒वासः॑ । इ॒ह । सु॒ऽश्रिय॑म् । द॒धुः॒ ॥
Padapatha Devanagari Nonaccented
चन्द्रम् । अग्निम् । चन्द्रऽरथम् । हरिऽव्रतम् । वैश्वानरम् । अप्सुऽसदम् । स्वःऽविदम् ।
विऽगाहम् । तूर्णिम् । तविषीभिः । आऽवृतम् । भूर्णिम् । देवासः । इह । सुऽश्रियम् । दधुः ॥
Padapatha Transcription Accented
candrám ǀ agním ǀ candrá-ratham ǀ hári-vratam ǀ vaiśvānarám ǀ apsu-sádam ǀ svaḥ-vídam ǀ
vi-gāhám ǀ tū́rṇim ǀ táviṣībhiḥ ǀ ā́-vṛtam ǀ bhū́rṇim ǀ devā́saḥ ǀ ihá ǀ su-śríyam ǀ dadhuḥ ǁ
Padapatha Transcription Nonaccented
candram ǀ agnim ǀ candra-ratham ǀ hari-vratam ǀ vaiśvānaram ǀ apsu-sadam ǀ svaḥ-vidam ǀ
vi-gāham ǀ tūrṇim ǀ taviṣībhiḥ ǀ ā-vṛtam ǀ bhūrṇim ǀ devāsaḥ ǀ iha ǀ su-śriyam ǀ dadhuḥ ǁ
03.003.06 (Mandala. Sukta. Rik)
2.8.21.01 (Ashtaka. Adhyaya. Varga. Rik)
03.01.044 (Mandala. Anuvāka. Rik)
Samhita Devanagari Accented
अ॒ग्निर्दे॒वेभि॒र्मनु॑षश्च जं॒तुभि॑स्तन्वा॒नो य॒ज्ञं पु॑रु॒पेश॑सं धि॒या ।
र॒थीरं॒तरी॑यते॒ साध॑दिष्टिभिर्जी॒रो दमू॑ना अभिशस्ति॒चात॑नः ॥
Samhita Devanagari Nonaccented
अग्निर्देवेभिर्मनुषश्च जंतुभिस्तन्वानो यज्ञं पुरुपेशसं धिया ।
रथीरंतरीयते साधदिष्टिभिर्जीरो दमूना अभिशस्तिचातनः ॥
Samhita Transcription Accented
agnírdevébhirmánuṣaśca jantúbhistanvānó yajñám purupéśasam dhiyā́ ǀ
rathī́rantárīyate sā́dhadiṣṭibhirjīró dámūnā abhiśasticā́tanaḥ ǁ
Samhita Transcription Nonaccented
agnirdevebhirmanuṣaśca jantubhistanvāno yajñam purupeśasam dhiyā ǀ
rathīrantarīyate sādhadiṣṭibhirjīro damūnā abhiśasticātanaḥ ǁ
Padapatha Devanagari Accented
अ॒ग्निः । दे॒वेभिः॑ । मनु॑षः । च॒ । ज॒न्तुऽभिः॑ । त॒न्वा॒नः । य॒ज्ञम् । पु॒रु॒ऽपेश॑सम् । धि॒या ।
र॒थीः । अ॒न्तः । ई॒य॒ते॒ । साध॑दिष्टिऽभिः । जी॒रः । दमू॑नाः । अ॒भि॒श॒स्ति॒ऽचात॑नः ॥
Padapatha Devanagari Nonaccented
अग्निः । देवेभिः । मनुषः । च । जन्तुऽभिः । तन्वानः । यज्ञम् । पुरुऽपेशसम् । धिया ।
रथीः । अन्तः । ईयते । साधदिष्टिऽभिः । जीरः । दमूनाः । अभिशस्तिऽचातनः ॥
Padapatha Transcription Accented
agníḥ ǀ devébhiḥ ǀ mánuṣaḥ ǀ ca ǀ jantú-bhiḥ ǀ tanvānáḥ ǀ yajñám ǀ puru-péśasam ǀ dhiyā́ ǀ
rathī́ḥ ǀ antáḥ ǀ īyate ǀ sā́dhadiṣṭi-bhiḥ ǀ jīráḥ ǀ dámūnāḥ ǀ abhiśasti-cā́tanaḥ ǁ
Padapatha Transcription Nonaccented
agniḥ ǀ devebhiḥ ǀ manuṣaḥ ǀ ca ǀ jantu-bhiḥ ǀ tanvānaḥ ǀ yajñam ǀ puru-peśasam ǀ dhiyā ǀ
rathīḥ ǀ antaḥ ǀ īyate ǀ sādhadiṣṭi-bhiḥ ǀ jīraḥ ǀ damūnāḥ ǀ abhiśasti-cātanaḥ ǁ
03.003.07 (Mandala. Sukta. Rik)
2.8.21.02 (Ashtaka. Adhyaya. Varga. Rik)
03.01.045 (Mandala. Anuvāka. Rik)
Samhita Devanagari Accented
अग्ने॒ जर॑स्व स्वप॒त्य आयु॑न्यू॒र्जा पि॑न्वस्व॒ समिषो॑ दिदीहि नः ।
वयां॑सि जिन्व बृह॒तश्च॑ जागृव उ॒शिग्दे॒वाना॒मसि॑ सु॒क्रतु॑र्वि॒पां ॥
Samhita Devanagari Nonaccented
अग्ने जरस्व स्वपत्य आयुन्यूर्जा पिन्वस्व समिषो दिदीहि नः ।
वयांसि जिन्व बृहतश्च जागृव उशिग्देवानामसि सुक्रतुर्विपां ॥
Samhita Transcription Accented
ágne járasva svapatyá ā́yunyūrjā́ pinvasva sámíṣo didīhi naḥ ǀ
váyāṃsi jinva bṛhatáśca jāgṛva uśígdevā́nāmási sukráturvipā́m ǁ
Samhita Transcription Nonaccented
agne jarasva svapatya āyunyūrjā pinvasva samiṣo didīhi naḥ ǀ
vayāṃsi jinva bṛhataśca jāgṛva uśigdevānāmasi sukraturvipām ǁ
Padapatha Devanagari Accented
अग्ने॑ । जर॑स्व । सु॒ऽअ॒प॒त्ये । आयु॑नि । ऊ॒र्जा । पि॒न्व॒स्व॒ । सम् । इषः॑ । दि॒दी॒हि॒ । नः॒ ।
वयां॑सि । जि॒न्व॒ । बृ॒ह॒तः । च॒ । जा॒गृ॒वे॒ । उ॒शिक् । दे॒वाना॑म् । असि॑ । सु॒ऽक्रतुः॑ । वि॒पाम् ॥
Padapatha Devanagari Nonaccented
अग्ने । जरस्व । सुऽअपत्ये । आयुनि । ऊर्जा । पिन्वस्व । सम् । इषः । दिदीहि । नः ।
वयांसि । जिन्व । बृहतः । च । जागृवे । उशिक् । देवानाम् । असि । सुऽक्रतुः । विपाम् ॥
Padapatha Transcription Accented
ágne ǀ járasva ǀ su-apatyé ǀ ā́yuni ǀ ūrjā́ ǀ pinvasva ǀ sám ǀ íṣaḥ ǀ didīhi ǀ naḥ ǀ
váyāṃsi ǀ jinva ǀ bṛhatáḥ ǀ ca ǀ jāgṛve ǀ uśík ǀ devā́nām ǀ ási ǀ su-krátuḥ ǀ vipā́m ǁ
Padapatha Transcription Nonaccented
agne ǀ jarasva ǀ su-apatye ǀ āyuni ǀ ūrjā ǀ pinvasva ǀ sam ǀ iṣaḥ ǀ didīhi ǀ naḥ ǀ
vayāṃsi ǀ jinva ǀ bṛhataḥ ǀ ca ǀ jāgṛve ǀ uśik ǀ devānām ǀ asi ǀ su-kratuḥ ǀ vipām ǁ
03.003.08 (Mandala. Sukta. Rik)
2.8.21.03 (Ashtaka. Adhyaya. Varga. Rik)
03.01.046 (Mandala. Anuvāka. Rik)
Samhita Devanagari Accented
वि॒श्पतिं॑ य॒ह्वमति॑थिं॒ नरः॒ सदा॑ यं॒तारं॑ धी॒नामु॒शिजं॑ च वा॒घतां॑ ।
अ॒ध्व॒राणां॒ चेत॑नं जा॒तवे॑दसं॒ प्र शं॑संति॒ नम॑सा जू॒तिभि॑र्वृ॒धे ॥
Samhita Devanagari Nonaccented
विश्पतिं यह्वमतिथिं नरः सदा यंतारं धीनामुशिजं च वाघतां ।
अध्वराणां चेतनं जातवेदसं प्र शंसंति नमसा जूतिभिर्वृधे ॥
Samhita Transcription Accented
viśpátim yahvámátithim náraḥ sádā yantā́ram dhīnā́muśíjam ca vāghátām ǀ
adhvarā́ṇām cétanam jātávedasam prá śaṃsanti námasā jūtíbhirvṛdhé ǁ
Samhita Transcription Nonaccented
viśpatim yahvamatithim naraḥ sadā yantāram dhīnāmuśijam ca vāghatām ǀ
adhvarāṇām cetanam jātavedasam pra śaṃsanti namasā jūtibhirvṛdhe ǁ
Padapatha Devanagari Accented
वि॒श्पति॑म् । य॒ह्वम् । अति॑थिम् । नरः॑ । सदा॑ । य॒न्तार॑म् । धी॒नाम् । उ॒शिज॑म् । च॒ । वा॒घता॑म् ।
अ॒ध्व॒राणा॑म् । चेत॑नम् । जा॒तऽवे॑दसम् । प्र । शं॒स॒न्ति॒ । नम॑सा । जू॒तिऽभिः॑ । वृ॒धे ॥
Padapatha Devanagari Nonaccented
विश्पतिम् । यह्वम् । अतिथिम् । नरः । सदा । यन्तारम् । धीनाम् । उशिजम् । च । वाघताम् ।
अध्वराणाम् । चेतनम् । जातऽवेदसम् । प्र । शंसन्ति । नमसा । जूतिऽभिः । वृधे ॥
Padapatha Transcription Accented
viśpátim ǀ yahvám ǀ átithim ǀ náraḥ ǀ sádā ǀ yantā́ram ǀ dhīnā́m ǀ uśíjam ǀ ca ǀ vāghátām ǀ
adhvarā́ṇām ǀ cétanam ǀ jātá-vedasam ǀ prá ǀ śaṃsanti ǀ námasā ǀ jūtí-bhiḥ ǀ vṛdhé ǁ
Padapatha Transcription Nonaccented
viśpatim ǀ yahvam ǀ atithim ǀ naraḥ ǀ sadā ǀ yantāram ǀ dhīnām ǀ uśijam ǀ ca ǀ vāghatām ǀ
adhvarāṇām ǀ cetanam ǀ jāta-vedasam ǀ pra ǀ śaṃsanti ǀ namasā ǀ jūti-bhiḥ ǀ vṛdhe ǁ
03.003.09 (Mandala. Sukta. Rik)
2.8.21.04 (Ashtaka. Adhyaya. Varga. Rik)
03.01.047 (Mandala. Anuvāka. Rik)
Samhita Devanagari Accented
वि॒भावा॑ दे॒वः सु॒रणः॒ परि॑ क्षि॒तीर॒ग्निर्ब॑भूव॒ शव॑सा सु॒मद्र॑थः ।
तस्य॑ व्र॒तानि॑ भूरिपो॒षिणो॑ व॒यमुप॑ भूषेम॒ दम॒ आ सु॑वृ॒क्तिभिः॑ ॥
Samhita Devanagari Nonaccented
विभावा देवः सुरणः परि क्षितीरग्निर्बभूव शवसा सुमद्रथः ।
तस्य व्रतानि भूरिपोषिणो वयमुप भूषेम दम आ सुवृक्तिभिः ॥
Samhita Transcription Accented
vibhā́vā deváḥ suráṇaḥ pári kṣitī́ragnírbabhūva śávasā sumádrathaḥ ǀ
tásya vratā́ni bhūripoṣíṇo vayámúpa bhūṣema dáma ā́ suvṛktíbhiḥ ǁ
Samhita Transcription Nonaccented
vibhāvā devaḥ suraṇaḥ pari kṣitīragnirbabhūva śavasā sumadrathaḥ ǀ
tasya vratāni bhūripoṣiṇo vayamupa bhūṣema dama ā suvṛktibhiḥ ǁ
Padapatha Devanagari Accented
वि॒भाऽवा॑ । दे॒वः । सु॒ऽरणः॑ । परि॑ । क्षि॒तीः । अ॒ग्निः । ब॒भू॒व॒ । शव॑सा । सु॒मत्ऽर॑थः ।
तस्य॑ । व्र॒तानि॑ । भू॒रि॒ऽपो॒षिणः॑ । व॒यम् । उप॑ । भू॒षे॒म॒ । दमे॑ । आ । सु॒वृ॒क्तिऽभिः॑ ॥
Padapatha Devanagari Nonaccented
विभाऽवा । देवः । सुऽरणः । परि । क्षितीः । अग्निः । बभूव । शवसा । सुमत्ऽरथः ।
तस्य । व्रतानि । भूरिऽपोषिणः । वयम् । उप । भूषेम । दमे । आ । सुवृक्तिऽभिः ॥
Padapatha Transcription Accented
vibhā́-vā ǀ deváḥ ǀ su-ráṇaḥ ǀ pári ǀ kṣitī́ḥ ǀ agníḥ ǀ babhūva ǀ śávasā ǀ sumát-rathaḥ ǀ
tásya ǀ vratā́ni ǀ bhūri-poṣíṇaḥ ǀ vayám ǀ úpa ǀ bhūṣema ǀ dáme ǀ ā́ ǀ suvṛktí-bhiḥ ǁ
Padapatha Transcription Nonaccented
vibhā-vā ǀ devaḥ ǀ su-raṇaḥ ǀ pari ǀ kṣitīḥ ǀ agniḥ ǀ babhūva ǀ śavasā ǀ sumat-rathaḥ ǀ
tasya ǀ vratāni ǀ bhūri-poṣiṇaḥ ǀ vayam ǀ upa ǀ bhūṣema ǀ dame ǀ ā ǀ suvṛkti-bhiḥ ǁ
03.003.10 (Mandala. Sukta. Rik)
2.8.21.05 (Ashtaka. Adhyaya. Varga. Rik)
03.01.048 (Mandala. Anuvāka. Rik)
Samhita Devanagari Accented
वैश्वा॑नर॒ तव॒ धामा॒न्या च॑के॒ येभिः॑ स्व॒र्विदभ॑वो विचक्षण ।
जा॒त आपृ॑णो॒ भुव॑नानि॒ रोद॑सी॒ अग्ने॒ ता विश्वा॑ परि॒भूर॑सि॒ त्मना॑ ॥
Samhita Devanagari Nonaccented
वैश्वानर तव धामान्या चके येभिः स्वर्विदभवो विचक्षण ।
जात आपृणो भुवनानि रोदसी अग्ने ता विश्वा परिभूरसि त्मना ॥
Samhita Transcription Accented
váiśvānara táva dhā́mānyā́ cake yébhiḥ svarvídábhavo vicakṣaṇa ǀ
jātá ā́pṛṇo bhúvanāni ródasī ágne tā́ víśvā paribhū́rasi tmánā ǁ
Samhita Transcription Nonaccented
vaiśvānara tava dhāmānyā cake yebhiḥ svarvidabhavo vicakṣaṇa ǀ
jāta āpṛṇo bhuvanāni rodasī agne tā viśvā paribhūrasi tmanā ǁ
Padapatha Devanagari Accented
वैश्वा॑नर । तव॑ । धामा॑नि । आ । च॒क्रे॒ । येभिः॑ । स्वः॒ऽवित् । अभ॑वः । वि॒ऽच॒क्ष॒ण॒ ।
जा॒तः । आ । अ॒पृ॒णः॒ । भुव॑नानि । रोद॑सी॒ इति॑ । अग्ने॑ । ता । विश्वा॑ । प॒रि॒ऽभूः । अ॒सि॒ । त्मना॑ ॥
Padapatha Devanagari Nonaccented
वैश्वानर । तव । धामानि । आ । चक्रे । येभिः । स्वःऽवित् । अभवः । विऽचक्षण ।
जातः । आ । अपृणः । भुवनानि । रोदसी इति । अग्ने । ता । विश्वा । परिऽभूः । असि । त्मना ॥
Padapatha Transcription Accented
váiśvānara ǀ táva ǀ dhā́māni ǀ ā́ ǀ cakre ǀ yébhiḥ ǀ svaḥ-vít ǀ ábhavaḥ ǀ vi-cakṣaṇa ǀ
jātáḥ ǀ ā́ ǀ apṛṇaḥ ǀ bhúvanāni ǀ ródasī íti ǀ ágne ǀ tā́ ǀ víśvā ǀ pari-bhū́ḥ ǀ asi ǀ tmánā ǁ
Padapatha Transcription Nonaccented
vaiśvānara ǀ tava ǀ dhāmāni ǀ ā ǀ cakre ǀ yebhiḥ ǀ svaḥ-vit ǀ abhavaḥ ǀ vi-cakṣaṇa ǀ
jātaḥ ǀ ā ǀ apṛṇaḥ ǀ bhuvanāni ǀ rodasī iti ǀ agne ǀ tā ǀ viśvā ǀ pari-bhūḥ ǀ asi ǀ tmanā ǁ
03.003.11 (Mandala. Sukta. Rik)
2.8.21.06 (Ashtaka. Adhyaya. Varga. Rik)
03.01.049 (Mandala. Anuvāka. Rik)
Samhita Devanagari Accented
वै॒श्वा॒न॒रस्य॑ दं॒सना॑भ्यो बृ॒हदरि॑णा॒देकः॑ स्वप॒स्यया॑ क॒विः ।
उ॒भा पि॒तरा॑ म॒हय॑न्नजायता॒ग्निर्द्यावा॑पृथि॒वी भूरि॑रेतसा ॥
Samhita Devanagari Nonaccented
वैश्वानरस्य दंसनाभ्यो बृहदरिणादेकः स्वपस्यया कविः ।
उभा पितरा महयन्नजायताग्निर्द्यावापृथिवी भूरिरेतसा ॥
Samhita Transcription Accented
vaiśvānarásya daṃsánābhyo bṛhádáriṇādékaḥ svapasyáyā kavíḥ ǀ
ubhā́ pitárā maháyannajāyatāgnírdyā́vāpṛthivī́ bhū́riretasā ǁ
Samhita Transcription Nonaccented
vaiśvānarasya daṃsanābhyo bṛhadariṇādekaḥ svapasyayā kaviḥ ǀ
ubhā pitarā mahayannajāyatāgnirdyāvāpṛthivī bhūriretasā ǁ
Padapatha Devanagari Accented
वै॒श्वा॒न॒रस्य॑ । दं॒सना॑भ्यः । बृ॒हत् । अरि॑णात् । एकः॑ । सु॒ऽअ॒प॒स्यया॑ । क॒विः ।
उ॒भा । पि॒तरा॑ । म॒हय॑न् । अ॒जा॒य॒त॒ । अ॒ग्निः । द्यावा॑पृथि॒वी इति॑ । भूरि॑ऽरेतसा ॥
Padapatha Devanagari Nonaccented
वैश्वानरस्य । दंसनाभ्यः । बृहत् । अरिणात् । एकः । सुऽअपस्यया । कविः ।
उभा । पितरा । महयन् । अजायत । अग्निः । द्यावापृथिवी इति । भूरिऽरेतसा ॥
Padapatha Transcription Accented
vaiśvānarásya ǀ daṃsánābhyaḥ ǀ bṛhát ǀ áriṇāt ǀ ékaḥ ǀ su-apasyáyā ǀ kavíḥ ǀ
ubhā́ ǀ pitárā ǀ maháyan ǀ ajāyata ǀ agníḥ ǀ dyā́vāpṛthivī́ íti ǀ bhū́ri-retasā ǁ
Padapatha Transcription Nonaccented
vaiśvānarasya ǀ daṃsanābhyaḥ ǀ bṛhat ǀ ariṇāt ǀ ekaḥ ǀ su-apasyayā ǀ kaviḥ ǀ
ubhā ǀ pitarā ǀ mahayan ǀ ajāyata ǀ agniḥ ǀ dyāvāpṛthivī iti ǀ bhūri-retasā ǁ