|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 3
Sūkta 13
|
1. Info |
| To: | agni | |
| From: | ṛṣabha vaiśvāmitra | |
| Metres: | 1st set of styles: nicṛdanuṣṭup (2, 3, 5-7); bhuriguṣṇik (1); virāḍanuṣṭup (4) 2nd set of styles: anuṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
03.013.01 (Mandala. Sukta. Rik)
3.1.13.01 (Ashtaka. Adhyaya. Varga. Rik)
03.02.001 (Mandala. Anuvāka. Rik)
Samhita Devanagari Accented
प्र वो॑ दे॒वाया॒ग्नये॒ बर्हि॑ष्ठमर्चास्मै ।
गम॑द्दे॒वेभि॒रा स नो॒ यजि॑ष्ठो ब॒र्हिरा स॑दत् ॥
Samhita Devanagari Nonaccented
प्र वो देवायाग्नये बर्हिष्ठमर्चास्मै ।
गमद्देवेभिरा स नो यजिष्ठो बर्हिरा सदत् ॥
Samhita Transcription Accented
prá vo devā́yāgnáye bárhiṣṭhamarcāsmai ǀ
gámaddevébhirā́ sá no yájiṣṭho barhírā́ sadat ǁ
Samhita Transcription Nonaccented
pra vo devāyāgnaye barhiṣṭhamarcāsmai ǀ
gamaddevebhirā sa no yajiṣṭho barhirā sadat ǁ
Padapatha Devanagari Accented
प्र । वः॒ । दे॒वाय॑ । अ॒ग्नये॑ । बर्हि॑ष्ठम् । अ॒र्च॒ । अ॒स्मै॒ ।
गम॑त् । दे॒वेभिः॑ । आ । सः । नः॒ । यजि॑ष्ठः । ब॒र्हिः । आ । स॒द॒त् ॥
Padapatha Devanagari Nonaccented
प्र । वः । देवाय । अग्नये । बर्हिष्ठम् । अर्च । अस्मै ।
गमत् । देवेभिः । आ । सः । नः । यजिष्ठः । बर्हिः । आ । सदत् ॥
Padapatha Transcription Accented
prá ǀ vaḥ ǀ devā́ya ǀ agnáye ǀ bárhiṣṭham ǀ arca ǀ asmai ǀ
gámat ǀ devébhiḥ ǀ ā́ ǀ sáḥ ǀ naḥ ǀ yájiṣṭhaḥ ǀ barhíḥ ǀ ā́ ǀ sadat ǁ
Padapatha Transcription Nonaccented
pra ǀ vaḥ ǀ devāya ǀ agnaye ǀ barhiṣṭham ǀ arca ǀ asmai ǀ
gamat ǀ devebhiḥ ǀ ā ǀ saḥ ǀ naḥ ǀ yajiṣṭhaḥ ǀ barhiḥ ǀ ā ǀ sadat ǁ
03.013.02 (Mandala. Sukta. Rik)
3.1.13.02 (Ashtaka. Adhyaya. Varga. Rik)
03.02.002 (Mandala. Anuvāka. Rik)
Samhita Devanagari Accented
ऋ॒तावा॒ यस्य॒ रोद॑सी॒ दक्षं॒ सचं॑त ऊ॒तयः॑ ।
ह॒विष्मं॑त॒स्तमी॑ळते॒ तं स॑नि॒ष्यंतोऽव॑से ॥
Samhita Devanagari Nonaccented
ऋतावा यस्य रोदसी दक्षं सचंत ऊतयः ।
हविष्मंतस्तमीळते तं सनिष्यंतोऽवसे ॥
Samhita Transcription Accented
ṛtā́vā yásya ródasī dákṣam sácanta ūtáyaḥ ǀ
havíṣmantastámīḷate tám saniṣyántó’vase ǁ
Samhita Transcription Nonaccented
ṛtāvā yasya rodasī dakṣam sacanta ūtayaḥ ǀ
haviṣmantastamīḷate tam saniṣyanto’vase ǁ
Padapatha Devanagari Accented
ऋ॒तऽवा॑ । यस्य॑ । रोद॑सी॒ इति॑ । दक्ष॑म् । सच॑न्ते । ऊ॒तयः॑ ।
ह॒विष्म॑न्तः । तम् । ई॒ळ॒ते॒ । तम् । स॒नि॒ष्यन्तः॑ । अव॑से ॥
Padapatha Devanagari Nonaccented
ऋतऽवा । यस्य । रोदसी इति । दक्षम् । सचन्ते । ऊतयः ।
हविष्मन्तः । तम् । ईळते । तम् । सनिष्यन्तः । अवसे ॥
Padapatha Transcription Accented
ṛtá-vā ǀ yásya ǀ ródasī íti ǀ dákṣam ǀ sácante ǀ ūtáyaḥ ǀ
havíṣmantaḥ ǀ tám ǀ īḷate ǀ tám ǀ saniṣyántaḥ ǀ ávase ǁ
Padapatha Transcription Nonaccented
ṛta-vā ǀ yasya ǀ rodasī iti ǀ dakṣam ǀ sacante ǀ ūtayaḥ ǀ
haviṣmantaḥ ǀ tam ǀ īḷate ǀ tam ǀ saniṣyantaḥ ǀ avase ǁ
03.013.03 (Mandala. Sukta. Rik)
3.1.13.03 (Ashtaka. Adhyaya. Varga. Rik)
03.02.003 (Mandala. Anuvāka. Rik)
Samhita Devanagari Accented
स यं॒ता विप्र॑ एषां॒ स य॒ज्ञाना॒मथा॒ हि षः ।
अ॒ग्निं तं वो॑ दुवस्यत॒ दाता॒ यो वनि॑ता म॒घं ॥
Samhita Devanagari Nonaccented
स यंता विप्र एषां स यज्ञानामथा हि षः ।
अग्निं तं वो दुवस्यत दाता यो वनिता मघं ॥
Samhita Transcription Accented
sá yantā́ vípra eṣām sá yajñā́nāmáthā hí ṣáḥ ǀ
agním tám vo duvasyata dā́tā yó vánitā maghám ǁ
Samhita Transcription Nonaccented
sa yantā vipra eṣām sa yajñānāmathā hi ṣaḥ ǀ
agnim tam vo duvasyata dātā yo vanitā magham ǁ
Padapatha Devanagari Accented
सः । य॒न्ता । विप्रः॑ । ए॒षा॒म् । सः । य॒ज्ञाना॑म् । अथ॑ । हि । सः ।
अ॒ग्निम् । तम् । वः॒ । दु॒व॒स्य॒त॒ । दाता॑ । यः । वनि॑ता । म॒घम् ॥
Padapatha Devanagari Nonaccented
सः । यन्ता । विप्रः । एषाम् । सः । यज्ञानाम् । अथ । हि । सः ।
अग्निम् । तम् । वः । दुवस्यत । दाता । यः । वनिता । मघम् ॥
Padapatha Transcription Accented
sáḥ ǀ yantā́ ǀ vípraḥ ǀ eṣām ǀ sáḥ ǀ yajñā́nām ǀ átha ǀ hí ǀ sáḥ ǀ
agním ǀ tám ǀ vaḥ ǀ duvasyata ǀ dā́tā ǀ yáḥ ǀ vánitā ǀ maghám ǁ
Padapatha Transcription Nonaccented
saḥ ǀ yantā ǀ vipraḥ ǀ eṣām ǀ saḥ ǀ yajñānām ǀ atha ǀ hi ǀ saḥ ǀ
agnim ǀ tam ǀ vaḥ ǀ duvasyata ǀ dātā ǀ yaḥ ǀ vanitā ǀ magham ǁ
03.013.04 (Mandala. Sukta. Rik)
3.1.13.04 (Ashtaka. Adhyaya. Varga. Rik)
03.02.004 (Mandala. Anuvāka. Rik)
Samhita Devanagari Accented
स नः॒ शर्मा॑णि वी॒तये॒ऽग्निर्य॑च्छतु॒ शंत॑मा ।
यतो॑ नः प्रु॒ष्णव॒द्वसु॑ दि॒वि क्षि॒तिभ्यो॑ अ॒प्स्वा ॥
Samhita Devanagari Nonaccented
स नः शर्माणि वीतयेऽग्निर्यच्छतु शंतमा ।
यतो नः प्रुष्णवद्वसु दिवि क्षितिभ्यो अप्स्वा ॥
Samhita Transcription Accented
sá naḥ śármāṇi vītáye’gníryacchatu śáṃtamā ǀ
yáto naḥ pruṣṇávadvásu diví kṣitíbhyo apsvā́ ǁ
Samhita Transcription Nonaccented
sa naḥ śarmāṇi vītaye’gniryacchatu śaṃtamā ǀ
yato naḥ pruṣṇavadvasu divi kṣitibhyo apsvā ǁ
Padapatha Devanagari Accented
सः । नः॒ । शर्मा॑णि । वी॒तये॑ । अ॒ग्निः । य॒च्छ॒तु॒ । शम्ऽत॑मा ।
यतः॑ । नः॒ । प्रु॒ष्णव॑त् । वसु॑ । दि॒वि । क्षि॒तिऽभ्यः॑ । अ॒प्ऽसु । आ ॥
Padapatha Devanagari Nonaccented
सः । नः । शर्माणि । वीतये । अग्निः । यच्छतु । शम्ऽतमा ।
यतः । नः । प्रुष्णवत् । वसु । दिवि । क्षितिऽभ्यः । अप्ऽसु । आ ॥
Padapatha Transcription Accented
sáḥ ǀ naḥ ǀ śármāṇi ǀ vītáye ǀ agníḥ ǀ yacchatu ǀ śám-tamā ǀ
yátaḥ ǀ naḥ ǀ pruṣṇávat ǀ vásu ǀ diví ǀ kṣití-bhyaḥ ǀ ap-sú ǀ ā́ ǁ
Padapatha Transcription Nonaccented
saḥ ǀ naḥ ǀ śarmāṇi ǀ vītaye ǀ agniḥ ǀ yacchatu ǀ śam-tamā ǀ
yataḥ ǀ naḥ ǀ pruṣṇavat ǀ vasu ǀ divi ǀ kṣiti-bhyaḥ ǀ ap-su ǀ ā ǁ
03.013.05 (Mandala. Sukta. Rik)
3.1.13.05 (Ashtaka. Adhyaya. Varga. Rik)
03.02.005 (Mandala. Anuvāka. Rik)
Samhita Devanagari Accented
दी॒दि॒वांस॒मपू॑र्व्यं॒ वस्वी॑भिरस्य धी॒तिभिः॑ ।
ऋक्वा॑णो अ॒ग्निमिं॑धते॒ होता॑रं वि॒श्पतिं॑ वि॒शां ॥
Samhita Devanagari Nonaccented
दीदिवांसमपूर्व्यं वस्वीभिरस्य धीतिभिः ।
ऋक्वाणो अग्निमिंधते होतारं विश्पतिं विशां ॥
Samhita Transcription Accented
dīdivā́ṃsamápūrvyam vásvībhirasya dhītíbhiḥ ǀ
ṛ́kvāṇo agnímindhate hótāram viśpátim viśā́m ǁ
Samhita Transcription Nonaccented
dīdivāṃsamapūrvyam vasvībhirasya dhītibhiḥ ǀ
ṛkvāṇo agnimindhate hotāram viśpatim viśām ǁ
Padapatha Devanagari Accented
दी॒दि॒ऽवांस॑म् । अपू॑र्व्यम् । वस्वी॑भिः । अ॒स्य॒ । धी॒तिऽभिः॑ ।
ऋक्वा॑णः । अ॒ग्निम् । इ॒न्ध॒ते॒ । होता॑रम् । वि॒श्पति॑म् । वि॒शाम् ॥
Padapatha Devanagari Nonaccented
दीदिऽवांसम् । अपूर्व्यम् । वस्वीभिः । अस्य । धीतिऽभिः ।
ऋक्वाणः । अग्निम् । इन्धते । होतारम् । विश्पतिम् । विशाम् ॥
Padapatha Transcription Accented
dīdi-vā́ṃsam ǀ ápūrvyam ǀ vásvībhiḥ ǀ asya ǀ dhītí-bhiḥ ǀ
ṛ́kvāṇaḥ ǀ agním ǀ indhate ǀ hótāram ǀ viśpátim ǀ viśā́m ǁ
Padapatha Transcription Nonaccented
dīdi-vāṃsam ǀ apūrvyam ǀ vasvībhiḥ ǀ asya ǀ dhīti-bhiḥ ǀ
ṛkvāṇaḥ ǀ agnim ǀ indhate ǀ hotāram ǀ viśpatim ǀ viśām ǁ
03.013.06 (Mandala. Sukta. Rik)
3.1.13.06 (Ashtaka. Adhyaya. Varga. Rik)
03.02.006 (Mandala. Anuvāka. Rik)
Samhita Devanagari Accented
उ॒त नो॒ ब्रह्म॑न्नविष उ॒क्थेषु॑ देव॒हूत॑मः ।
शं नः॑ शोचा म॒रुद्वृ॒धोऽग्ने॑ सहस्र॒सात॑मः ॥
Samhita Devanagari Nonaccented
उत नो ब्रह्मन्नविष उक्थेषु देवहूतमः ।
शं नः शोचा मरुद्वृधोऽग्ने सहस्रसातमः ॥
Samhita Transcription Accented
utá no bráhmannaviṣa ukthéṣu devahū́tamaḥ ǀ
śám naḥ śocā marúdvṛdhó’gne sahasrasā́tamaḥ ǁ
Samhita Transcription Nonaccented
uta no brahmannaviṣa uktheṣu devahūtamaḥ ǀ
śam naḥ śocā marudvṛdho’gne sahasrasātamaḥ ǁ
Padapatha Devanagari Accented
उ॒त । नः॒ । ब्रह्म॑न् । अ॒वि॒षः॒ । उ॒क्थेषु॑ । दे॒व॒ऽहूत॑मः ।
शम् । नः॒ । शो॒च॒ । म॒रुत्ऽवृ॑धः । अग्ने॑ । स॒ह॒स्र॒ऽसात॑मः ॥
Padapatha Devanagari Nonaccented
उत । नः । ब्रह्मन् । अविषः । उक्थेषु । देवऽहूतमः ।
शम् । नः । शोच । मरुत्ऽवृधः । अग्ने । सहस्रऽसातमः ॥
Padapatha Transcription Accented
utá ǀ naḥ ǀ bráhman ǀ aviṣaḥ ǀ ukthéṣu ǀ deva-hū́tamaḥ ǀ
śám ǀ naḥ ǀ śoca ǀ marút-vṛdhaḥ ǀ ágne ǀ sahasra-sā́tamaḥ ǁ
Padapatha Transcription Nonaccented
uta ǀ naḥ ǀ brahman ǀ aviṣaḥ ǀ uktheṣu ǀ deva-hūtamaḥ ǀ
śam ǀ naḥ ǀ śoca ǀ marut-vṛdhaḥ ǀ agne ǀ sahasra-sātamaḥ ǁ
03.013.07 (Mandala. Sukta. Rik)
3.1.13.07 (Ashtaka. Adhyaya. Varga. Rik)
03.02.007 (Mandala. Anuvāka. Rik)
Samhita Devanagari Accented
नू नो॑ रास्व स॒हस्र॑वत्तो॒कव॑त्पुष्टि॒मद्वसु॑ ।
द्यु॒मद॑ग्ने सु॒वीर्यं॒ वर्षि॑ष्ठ॒मनु॑पक्षितं ॥
Samhita Devanagari Nonaccented
नू नो रास्व सहस्रवत्तोकवत्पुष्टिमद्वसु ।
द्युमदग्ने सुवीर्यं वर्षिष्ठमनुपक्षितं ॥
Samhita Transcription Accented
nū́ no rāsva sahásravattokávatpuṣṭimádvásu ǀ
dyumádagne suvī́ryam várṣiṣṭhamánupakṣitam ǁ
Samhita Transcription Nonaccented
nū no rāsva sahasravattokavatpuṣṭimadvasu ǀ
dyumadagne suvīryam varṣiṣṭhamanupakṣitam ǁ
Padapatha Devanagari Accented
नु । नः॒ । रा॒स्व॒ । स॒हस्र॑ऽवत् । तो॒कऽव॑त् । पु॒ष्टि॒ऽमत् । वसु॑ ।
द्यु॒ऽमत् । अ॒ग्ने॒ । सु॒ऽवीर्य॑म् । वर्षि॑ष्ठम् । अनु॑पऽक्षितम् ॥
Padapatha Devanagari Nonaccented
नु । नः । रास्व । सहस्रऽवत् । तोकऽवत् । पुष्टिऽमत् । वसु ।
द्युऽमत् । अग्ने । सुऽवीर्यम् । वर्षिष्ठम् । अनुपऽक्षितम् ॥
Padapatha Transcription Accented
nú ǀ naḥ ǀ rāsva ǀ sahásra-vat ǀ toká-vat ǀ puṣṭi-mát ǀ vásu ǀ
dyu-mát ǀ agne ǀ su-vī́ryam ǀ várṣiṣṭham ǀ ánupa-kṣitam ǁ
Padapatha Transcription Nonaccented
nu ǀ naḥ ǀ rāsva ǀ sahasra-vat ǀ toka-vat ǀ puṣṭi-mat ǀ vasu ǀ
dyu-mat ǀ agne ǀ su-vīryam ǀ varṣiṣṭham ǀ anupa-kṣitam ǁ