|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 3
Sūkta 34
|
1. Info |
| To: | indra | |
| From: | viśvāmitra gāthina | |
| Metres: | 1st set of styles: nicṛttriṣṭup (4, 5, 7, 10); triṣṭup (1, 2, 11); bhurikpaṅkti (3, 6, 8); virāṭtrisṭup (9) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
03.034.01 (Mandala. Sukta. Rik)
3.2.15.01 (Ashtaka. Adhyaya. Varga. Rik)
03.03.075 (Mandala. Anuvāka. Rik)
Samhita Devanagari Accented
इंद्रः॑ पू॒र्भिदाति॑र॒द्दास॑म॒र्कैर्वि॒दद्व॑सु॒र्दय॑मानो॒ वि शत्रू॑न् ।
ब्रह्म॑जूतस्त॒न्वा॑ वावृधा॒नो भूरि॑दात्र॒ आपृ॑ण॒द्रोद॑सी उ॒भे ॥
Samhita Devanagari Nonaccented
इंद्रः पूर्भिदातिरद्दासमर्कैर्विदद्वसुर्दयमानो वि शत्रून् ।
ब्रह्मजूतस्तन्वा वावृधानो भूरिदात्र आपृणद्रोदसी उभे ॥
Samhita Transcription Accented
índraḥ pūrbhídā́tiraddā́samarkáirvidádvasurdáyamāno ví śátrūn ǀ
bráhmajūtastanvā́ vāvṛdhānó bhū́ridātra ā́pṛṇadródasī ubhé ǁ
Samhita Transcription Nonaccented
indraḥ pūrbhidātiraddāsamarkairvidadvasurdayamāno vi śatrūn ǀ
brahmajūtastanvā vāvṛdhāno bhūridātra āpṛṇadrodasī ubhe ǁ
Padapatha Devanagari Accented
इन्द्रः॑ । पूः॒ऽभित् । आ । अ॒ति॒र॒त् । दास॑म् । अ॒र्कैः । वि॒दत्ऽव॑सुः । दय॑मानः । वि । शत्रू॑न् ।
ब्रह्म॑ऽजूतः । त॒न्वा॑ । व॒वृ॒धा॒नः । भूरि॑ऽदात्रः । आ । अ॒पृ॒ण॒त् । रोद॑सी॒ इति॑ । उ॒भे इति॑ ॥
Padapatha Devanagari Nonaccented
इन्द्रः । पूःऽभित् । आ । अतिरत् । दासम् । अर्कैः । विदत्ऽवसुः । दयमानः । वि । शत्रून् ।
ब्रह्मऽजूतः । तन्वा । ववृधानः । भूरिऽदात्रः । आ । अपृणत् । रोदसी इति । उभे इति ॥
Padapatha Transcription Accented
índraḥ ǀ pūḥ-bhít ǀ ā́ ǀ atirat ǀ dā́sam ǀ arkáiḥ ǀ vidát-vasuḥ ǀ dáyamānaḥ ǀ ví ǀ śátrūn ǀ
bráhma-jūtaḥ ǀ tanvā́ ǀ vavṛdhānáḥ ǀ bhū́ri-dātraḥ ǀ ā́ ǀ apṛṇat ǀ ródasī íti ǀ ubhé íti ǁ
Padapatha Transcription Nonaccented
indraḥ ǀ pūḥ-bhit ǀ ā ǀ atirat ǀ dāsam ǀ arkaiḥ ǀ vidat-vasuḥ ǀ dayamānaḥ ǀ vi ǀ śatrūn ǀ
brahma-jūtaḥ ǀ tanvā ǀ vavṛdhānaḥ ǀ bhūri-dātraḥ ǀ ā ǀ apṛṇat ǀ rodasī iti ǀ ubhe iti ǁ
03.034.02 (Mandala. Sukta. Rik)
3.2.15.02 (Ashtaka. Adhyaya. Varga. Rik)
03.03.076 (Mandala. Anuvāka. Rik)
Samhita Devanagari Accented
म॒खस्य॑ ते तवि॒षस्य॒ प्र जू॒तिमिय॑र्मि॒ वाच॑म॒मृता॑य॒ भूष॑न् ।
इंद्र॑ क्षिती॒नाम॑सि॒ मानु॑षीणां वि॒शां दैवी॑नामु॒त पू॑र्व॒यावा॑ ॥
Samhita Devanagari Nonaccented
मखस्य ते तविषस्य प्र जूतिमियर्मि वाचममृताय भूषन् ।
इंद्र क्षितीनामसि मानुषीणां विशां दैवीनामुत पूर्वयावा ॥
Samhita Transcription Accented
makhásya te taviṣásya prá jūtímíyarmi vā́camamṛ́tāya bhū́ṣan ǀ
índra kṣitīnā́masi mā́nuṣīṇām viśā́m dáivīnāmutá pūrvayā́vā ǁ
Samhita Transcription Nonaccented
makhasya te taviṣasya pra jūtimiyarmi vācamamṛtāya bhūṣan ǀ
indra kṣitīnāmasi mānuṣīṇām viśām daivīnāmuta pūrvayāvā ǁ
Padapatha Devanagari Accented
म॒खस्य॑ । ते॒ । त॒वि॒षस्य॑ । प्र । जू॒तिम् । इय॑र्मि । वाच॑म् । अ॒मृता॑य । भूष॑न् ।
इन्द्र॑ । क्षि॒ती॒नाम् । अ॒सि॒ । मानु॑षीणाम् । वि॒शाम् । दैवी॑नाम् । उ॒त । पू॒र्व॒ऽयावा॑ ॥
Padapatha Devanagari Nonaccented
मखस्य । ते । तविषस्य । प्र । जूतिम् । इयर्मि । वाचम् । अमृताय । भूषन् ।
इन्द्र । क्षितीनाम् । असि । मानुषीणाम् । विशाम् । दैवीनाम् । उत । पूर्वऽयावा ॥
Padapatha Transcription Accented
makhásya ǀ te ǀ taviṣásya ǀ prá ǀ jūtím ǀ íyarmi ǀ vā́cam ǀ amṛ́tāya ǀ bhū́ṣan ǀ
índra ǀ kṣitīnā́m ǀ asi ǀ mā́nuṣīṇām ǀ viśā́m ǀ dáivīnām ǀ utá ǀ pūrva-yā́vā ǁ
Padapatha Transcription Nonaccented
makhasya ǀ te ǀ taviṣasya ǀ pra ǀ jūtim ǀ iyarmi ǀ vācam ǀ amṛtāya ǀ bhūṣan ǀ
indra ǀ kṣitīnām ǀ asi ǀ mānuṣīṇām ǀ viśām ǀ daivīnām ǀ uta ǀ pūrva-yāvā ǁ
03.034.03 (Mandala. Sukta. Rik)
3.2.15.03 (Ashtaka. Adhyaya. Varga. Rik)
03.03.077 (Mandala. Anuvāka. Rik)
Samhita Devanagari Accented
इंद्रो॑ वृ॒त्रम॑वृणो॒च्छर्ध॑नीतिः॒ प्र मा॒यिना॑ममिना॒द्वर्प॑णीतिः ।
अह॒न्व्यं॑समु॒शध॒ग्वने॑ष्वा॒विर्धेना॑ अकृणोद्रा॒म्याणां॑ ॥
Samhita Devanagari Nonaccented
इंद्रो वृत्रमवृणोच्छर्धनीतिः प्र मायिनाममिनाद्वर्पणीतिः ।
अहन्व्यंसमुशधग्वनेष्वाविर्धेना अकृणोद्राम्याणां ॥
Samhita Transcription Accented
índro vṛtrámavṛṇocchárdhanītiḥ prá māyínāmaminādvárpaṇītiḥ ǀ
áhanvyáṃsamuśádhagváneṣvāvírdhénā akṛṇodrāmyā́ṇām ǁ
Samhita Transcription Nonaccented
indro vṛtramavṛṇocchardhanītiḥ pra māyināmaminādvarpaṇītiḥ ǀ
ahanvyaṃsamuśadhagvaneṣvāvirdhenā akṛṇodrāmyāṇām ǁ
Padapatha Devanagari Accented
इन्द्रः॑ । वृ॒त्रम् । अ॒वृ॒णो॒त् । शर्ध॑ऽनीतिः । प्र । मा॒यिना॑म् । अ॒मि॒ना॒त् । वर्प॑ऽनीतिः ।
अह॑न् । विऽअं॑सम् । उ॒शध॑क् । वने॑षु । आ॒विः । धेनाः॑ । अ॒कृ॒णो॒त् । रा॒म्याणा॑म् ॥
Padapatha Devanagari Nonaccented
इन्द्रः । वृत्रम् । अवृणोत् । शर्धऽनीतिः । प्र । मायिनाम् । अमिनात् । वर्पऽनीतिः ।
अहन् । विऽअंसम् । उशधक् । वनेषु । आविः । धेनाः । अकृणोत् । राम्याणाम् ॥
Padapatha Transcription Accented
índraḥ ǀ vṛtrám ǀ avṛṇot ǀ śárdha-nītiḥ ǀ prá ǀ māyínām ǀ amināt ǀ várpa-nītiḥ ǀ
áhan ǀ ví-aṃsam ǀ uśádhak ǀ váneṣu ǀ āvíḥ ǀ dhénāḥ ǀ akṛṇot ǀ rāmyā́ṇām ǁ
Padapatha Transcription Nonaccented
indraḥ ǀ vṛtram ǀ avṛṇot ǀ śardha-nītiḥ ǀ pra ǀ māyinām ǀ amināt ǀ varpa-nītiḥ ǀ
ahan ǀ vi-aṃsam ǀ uśadhak ǀ vaneṣu ǀ āviḥ ǀ dhenāḥ ǀ akṛṇot ǀ rāmyāṇām ǁ
03.034.04 (Mandala. Sukta. Rik)
3.2.15.04 (Ashtaka. Adhyaya. Varga. Rik)
03.03.078 (Mandala. Anuvāka. Rik)
Samhita Devanagari Accented
इंद्रः॑ स्व॒र्षा ज॒नय॒न्नहा॑नि जि॒गायो॒शिग्भिः॒ पृत॑ना अभि॒ष्टिः ।
प्रारो॑चय॒न्मन॑वे के॒तुमह्ना॒मविं॑द॒ज्ज्योति॑र्बृह॒ते रणा॑य ॥
Samhita Devanagari Nonaccented
इंद्रः स्वर्षा जनयन्नहानि जिगायोशिग्भिः पृतना अभिष्टिः ।
प्रारोचयन्मनवे केतुमह्नामविंदज्ज्योतिर्बृहते रणाय ॥
Samhita Transcription Accented
índraḥ svarṣā́ janáyannáhāni jigā́yośígbhiḥ pṛ́tanā abhiṣṭíḥ ǀ
prā́rocayanmánave ketúmáhnāmávindajjyótirbṛhaté ráṇāya ǁ
Samhita Transcription Nonaccented
indraḥ svarṣā janayannahāni jigāyośigbhiḥ pṛtanā abhiṣṭiḥ ǀ
prārocayanmanave ketumahnāmavindajjyotirbṛhate raṇāya ǁ
Padapatha Devanagari Accented
इन्द्रः॑ । स्वः॒ऽसाः । ज॒नय॑न् । अहा॑नि । जि॒गाय॑ । उ॒शिक्ऽभिः॑ । पृत॑नाः । अ॒भि॒ष्टिः ।
प्र । अ॒रो॒च॒य॒त् । मन॑वे । के॒तुम् । अह्ना॑म् । अवि॑न्दत् । ज्योतिः॑ । बृ॒ह॒ते । रणा॑य ॥
Padapatha Devanagari Nonaccented
इन्द्रः । स्वःऽसाः । जनयन् । अहानि । जिगाय । उशिक्ऽभिः । पृतनाः । अभिष्टिः ।
प्र । अरोचयत् । मनवे । केतुम् । अह्नाम् । अविन्दत् । ज्योतिः । बृहते । रणाय ॥
Padapatha Transcription Accented
índraḥ ǀ svaḥ-sā́ḥ ǀ janáyan ǀ áhāni ǀ jigā́ya ǀ uśík-bhiḥ ǀ pṛ́tanāḥ ǀ abhiṣṭíḥ ǀ
prá ǀ arocayat ǀ mánave ǀ ketúm ǀ áhnām ǀ ávindat ǀ jyótiḥ ǀ bṛhaté ǀ ráṇāya ǁ
Padapatha Transcription Nonaccented
indraḥ ǀ svaḥ-sāḥ ǀ janayan ǀ ahāni ǀ jigāya ǀ uśik-bhiḥ ǀ pṛtanāḥ ǀ abhiṣṭiḥ ǀ
pra ǀ arocayat ǀ manave ǀ ketum ǀ ahnām ǀ avindat ǀ jyotiḥ ǀ bṛhate ǀ raṇāya ǁ
03.034.05 (Mandala. Sukta. Rik)
3.2.15.05 (Ashtaka. Adhyaya. Varga. Rik)
03.03.079 (Mandala. Anuvāka. Rik)
Samhita Devanagari Accented
इंद्र॒स्तुजो॑ ब॒र्हणा॒ आ वि॑वेश नृ॒वद्दधा॑नो॒ नर्या॑ पु॒रूणि॑ ।
अचे॑तय॒द्धिय॑ इ॒मा ज॑रि॒त्रे प्रेमं वर्ण॑मतिरच्छु॒क्रमा॑सां ॥
Samhita Devanagari Nonaccented
इंद्रस्तुजो बर्हणा आ विवेश नृवद्दधानो नर्या पुरूणि ।
अचेतयद्धिय इमा जरित्रे प्रेमं वर्णमतिरच्छुक्रमासां ॥
Samhita Transcription Accented
índrastújo barháṇā ā́ viveśa nṛváddádhāno náryā purū́ṇi ǀ
ácetayaddhíya imā́ jaritré prémám várṇamatiracchukrámāsām ǁ
Samhita Transcription Nonaccented
indrastujo barhaṇā ā viveśa nṛvaddadhāno naryā purūṇi ǀ
acetayaddhiya imā jaritre premam varṇamatiracchukramāsām ǁ
Padapatha Devanagari Accented
इन्द्रः॑ । तुजः॑ । ब॒र्हणाः॑ । आ । वि॒वे॒श॒ । नृ॒ऽवत् । दधा॑नः । नर्या॑ । पु॒रूणि॑ ।
अचे॑तयत् । धियः॑ । इ॒माः । ज॒रि॒त्रे । प्र । इ॒मम् । वर्ण॑म् । अ॒ति॒र॒त् । शु॒क्रम् । आ॒सा॒म् ॥
Padapatha Devanagari Nonaccented
इन्द्रः । तुजः । बर्हणाः । आ । विवेश । नृऽवत् । दधानः । नर्या । पुरूणि ।
अचेतयत् । धियः । इमाः । जरित्रे । प्र । इमम् । वर्णम् । अतिरत् । शुक्रम् । आसाम् ॥
Padapatha Transcription Accented
índraḥ ǀ tújaḥ ǀ barháṇāḥ ǀ ā́ ǀ viveśa ǀ nṛ-vát ǀ dádhānaḥ ǀ náryā ǀ purū́ṇi ǀ
ácetayat ǀ dhíyaḥ ǀ imā́ḥ ǀ jaritré ǀ prá ǀ imám ǀ várṇam ǀ atirat ǀ śukrám ǀ āsām ǁ
Padapatha Transcription Nonaccented
indraḥ ǀ tujaḥ ǀ barhaṇāḥ ǀ ā ǀ viveśa ǀ nṛ-vat ǀ dadhānaḥ ǀ naryā ǀ purūṇi ǀ
acetayat ǀ dhiyaḥ ǀ imāḥ ǀ jaritre ǀ pra ǀ imam ǀ varṇam ǀ atirat ǀ śukram ǀ āsām ǁ
03.034.06 (Mandala. Sukta. Rik)
3.2.16.01 (Ashtaka. Adhyaya. Varga. Rik)
03.03.080 (Mandala. Anuvāka. Rik)
Samhita Devanagari Accented
म॒हो म॒हानि॑ पनयंत्य॒स्येंद्र॑स्य॒ कर्म॒ सुकृ॑ता पु॒रूणि॑ ।
वृ॒जने॑न वृजि॒नान्त्सं पि॑पेष मा॒याभि॒र्दस्यूँ॑र॒भिभू॑त्योजाः ॥
Samhita Devanagari Nonaccented
महो महानि पनयंत्यस्येंद्रस्य कर्म सुकृता पुरूणि ।
वृजनेन वृजिनान्त्सं पिपेष मायाभिर्दस्यूँरभिभूत्योजाः ॥
Samhita Transcription Accented
mahó mahā́ni panayantyasyéndrasya kárma súkṛtā purū́ṇi ǀ
vṛjánena vṛjinā́ntsám pipeṣa māyā́bhirdásyūm̐rabhíbhūtyojāḥ ǁ
Samhita Transcription Nonaccented
maho mahāni panayantyasyendrasya karma sukṛtā purūṇi ǀ
vṛjanena vṛjināntsam pipeṣa māyābhirdasyūm̐rabhibhūtyojāḥ ǁ
Padapatha Devanagari Accented
म॒हः । म॒हानि॑ । प॒न॒य॒न्ति॒ । अ॒स्य॒ । इन्द्र॑स्य । कर्म॑ । सुऽकृ॑ता । पु॒रूणि॑ ।
वृ॒जने॑न । वृ॒जि॒नान् । सम् । पि॒पे॒ष॒ । मा॒याभिः॑ । दस्यू॑न् । अ॒भिभू॑तिऽओजाः ॥
Padapatha Devanagari Nonaccented
महः । महानि । पनयन्ति । अस्य । इन्द्रस्य । कर्म । सुऽकृता । पुरूणि ।
वृजनेन । वृजिनान् । सम् । पिपेष । मायाभिः । दस्यून् । अभिभूतिऽओजाः ॥
Padapatha Transcription Accented
maháḥ ǀ mahā́ni ǀ panayanti ǀ asya ǀ índrasya ǀ kárma ǀ sú-kṛtā ǀ purū́ṇi ǀ
vṛjánena ǀ vṛjinā́n ǀ sám ǀ pipeṣa ǀ māyā́bhiḥ ǀ dásyūn ǀ abhíbhūti-ojāḥ ǁ
Padapatha Transcription Nonaccented
mahaḥ ǀ mahāni ǀ panayanti ǀ asya ǀ indrasya ǀ karma ǀ su-kṛtā ǀ purūṇi ǀ
vṛjanena ǀ vṛjinān ǀ sam ǀ pipeṣa ǀ māyābhiḥ ǀ dasyūn ǀ abhibhūti-ojāḥ ǁ
03.034.07 (Mandala. Sukta. Rik)
3.2.16.02 (Ashtaka. Adhyaya. Varga. Rik)
03.03.081 (Mandala. Anuvāka. Rik)
Samhita Devanagari Accented
यु॒धेंद्रो॑ म॒ह्ना वरि॑वश्चकार दे॒वेभ्यः॒ सत्प॑तिश्चर्षणि॒प्राः ।
वि॒वस्व॑तः॒ सद॑ने अस्य॒ तानि॒ विप्रा॑ उ॒क्थेभिः॑ क॒वयो॑ गृणंति ॥
Samhita Devanagari Nonaccented
युधेंद्रो मह्ना वरिवश्चकार देवेभ्यः सत्पतिश्चर्षणिप्राः ।
विवस्वतः सदने अस्य तानि विप्रा उक्थेभिः कवयो गृणंति ॥
Samhita Transcription Accented
yudhéndro mahnā́ várivaścakāra devébhyaḥ sátpatiścarṣaṇiprā́ḥ ǀ
vivásvataḥ sádane asya tā́ni víprā ukthébhiḥ kaváyo gṛṇanti ǁ
Samhita Transcription Nonaccented
yudhendro mahnā varivaścakāra devebhyaḥ satpatiścarṣaṇiprāḥ ǀ
vivasvataḥ sadane asya tāni viprā ukthebhiḥ kavayo gṛṇanti ǁ
Padapatha Devanagari Accented
यु॒धा । इन्द्रः॑ । म॒ह्ना । वरि॑वः । च॒का॒र॒ । दे॒वेभ्यः॑ । सत्ऽप॑तिः । च॒र्ष॒णि॒ऽप्राः ।
वि॒वस्व॑तः । सद॑ने । अ॒स्य॒ । तानि॑ । विप्राः॑ । उ॒क्थेभिः॑ । क॒वयः॑ । गृ॒ण॒न्ति॒ ॥
Padapatha Devanagari Nonaccented
युधा । इन्द्रः । मह्ना । वरिवः । चकार । देवेभ्यः । सत्ऽपतिः । चर्षणिऽप्राः ।
विवस्वतः । सदने । अस्य । तानि । विप्राः । उक्थेभिः । कवयः । गृणन्ति ॥
Padapatha Transcription Accented
yudhā́ ǀ índraḥ ǀ mahnā́ ǀ várivaḥ ǀ cakāra ǀ devébhyaḥ ǀ sát-patiḥ ǀ carṣaṇi-prā́ḥ ǀ
vivásvataḥ ǀ sádane ǀ asya ǀ tā́ni ǀ víprāḥ ǀ ukthébhiḥ ǀ kaváyaḥ ǀ gṛṇanti ǁ
Padapatha Transcription Nonaccented
yudhā ǀ indraḥ ǀ mahnā ǀ varivaḥ ǀ cakāra ǀ devebhyaḥ ǀ sat-patiḥ ǀ carṣaṇi-prāḥ ǀ
vivasvataḥ ǀ sadane ǀ asya ǀ tāni ǀ viprāḥ ǀ ukthebhiḥ ǀ kavayaḥ ǀ gṛṇanti ǁ
03.034.08 (Mandala. Sukta. Rik)
3.2.16.03 (Ashtaka. Adhyaya. Varga. Rik)
03.03.082 (Mandala. Anuvāka. Rik)
Samhita Devanagari Accented
स॒त्रा॒साहं॒ वरे॑ण्यं सहो॒दां स॑स॒वांसं॒ स्व॑र॒पश्च॑ दे॒वीः ।
स॒सान॒ यः पृ॑थि॒वीं द्यामु॒तेमामिंद्रं॑ मदं॒त्यनु॒ धीर॑णासः ॥
Samhita Devanagari Nonaccented
सत्रासाहं वरेण्यं सहोदां ससवांसं स्वरपश्च देवीः ।
ससान यः पृथिवीं द्यामुतेमामिंद्रं मदंत्यनु धीरणासः ॥
Samhita Transcription Accented
satrāsā́ham váreṇyam sahodā́m sasavā́ṃsam svárapáśca devī́ḥ ǀ
sasā́na yáḥ pṛthivī́m dyā́mutémā́míndram madantyánu dhī́raṇāsaḥ ǁ
Samhita Transcription Nonaccented
satrāsāham vareṇyam sahodām sasavāṃsam svarapaśca devīḥ ǀ
sasāna yaḥ pṛthivīm dyāmutemāmindram madantyanu dhīraṇāsaḥ ǁ
Padapatha Devanagari Accented
स॒त्रा॒ऽसह॑म् । वरे॑ण्यम् । स॒हः॒ऽदाम् । स॒स॒वांस॑म् । स्वः॑ । अ॒पः । च॒ । दे॒वीः ।
स॒सान॑ । यः । पृ॒थि॒वीम् । द्याम् । उ॒त । इ॒माम् । इन्द्र॑म् । म॒द॒न्ति॒ । अनु॑ । धीऽर॑णासः ॥
Padapatha Devanagari Nonaccented
सत्राऽसहम् । वरेण्यम् । सहःऽदाम् । ससवांसम् । स्वः । अपः । च । देवीः ।
ससान । यः । पृथिवीम् । द्याम् । उत । इमाम् । इन्द्रम् । मदन्ति । अनु । धीऽरणासः ॥
Padapatha Transcription Accented
satrā-sáham ǀ váreṇyam ǀ sahaḥ-dā́m ǀ sasavā́ṃsam ǀ sváḥ ǀ apáḥ ǀ ca ǀ devī́ḥ ǀ
sasā́na ǀ yáḥ ǀ pṛthivī́m ǀ dyā́m ǀ utá ǀ imā́m ǀ índram ǀ madanti ǀ ánu ǀ dhī́-raṇāsaḥ ǁ
Padapatha Transcription Nonaccented
satrā-saham ǀ vareṇyam ǀ sahaḥ-dām ǀ sasavāṃsam ǀ svaḥ ǀ apaḥ ǀ ca ǀ devīḥ ǀ
sasāna ǀ yaḥ ǀ pṛthivīm ǀ dyām ǀ uta ǀ imām ǀ indram ǀ madanti ǀ anu ǀ dhī-raṇāsaḥ ǁ
03.034.09 (Mandala. Sukta. Rik)
3.2.16.04 (Ashtaka. Adhyaya. Varga. Rik)
03.03.083 (Mandala. Anuvāka. Rik)
Samhita Devanagari Accented
स॒सानात्याँ॑ उ॒त सूर्यं॑ ससा॒नेंद्रः॑ ससान पुरु॒भोज॑सं॒ गां ।
हि॒र॒ण्यय॑मु॒त भोगं॑ ससान ह॒त्वी दस्यू॒न्प्रार्यं॒ वर्ण॑मावत् ॥
Samhita Devanagari Nonaccented
ससानात्याँ उत सूर्यं ससानेंद्रः ससान पुरुभोजसं गां ।
हिरण्ययमुत भोगं ससान हत्वी दस्यून्प्रार्यं वर्णमावत् ॥
Samhita Transcription Accented
sasā́nā́tyām̐ utá sū́ryam sasānéndraḥ sasāna purubhójasam gā́m ǀ
hiraṇyáyamutá bhógam sasāna hatvī́ dásyūnprā́ryam várṇamāvat ǁ
Samhita Transcription Nonaccented
sasānātyām̐ uta sūryam sasānendraḥ sasāna purubhojasam gām ǀ
hiraṇyayamuta bhogam sasāna hatvī dasyūnprāryam varṇamāvat ǁ
Padapatha Devanagari Accented
स॒सान॑ । अत्या॑न् । उ॒त । सूर्य॑म् । स॒सा॒न॒ । इन्द्रः॑ । स॒सा॒न॒ । पु॒रु॒ऽभोज॑सम् । गाम् ।
हि॒र॒ण्यय॑म् । उ॒त । भोग॑म् । स॒सा॒न॒ । ह॒त्वी । दस्यू॑न् । प्र । आर्य॑म् । वर्ण॑म् । आ॒व॒त् ॥
Padapatha Devanagari Nonaccented
ससान । अत्यान् । उत । सूर्यम् । ससान । इन्द्रः । ससान । पुरुऽभोजसम् । गाम् ।
हिरण्ययम् । उत । भोगम् । ससान । हत्वी । दस्यून् । प्र । आर्यम् । वर्णम् । आवत् ॥
Padapatha Transcription Accented
sasā́na ǀ átyān ǀ utá ǀ sū́ryam ǀ sasāna ǀ índraḥ ǀ sasāna ǀ puru-bhójasam ǀ gā́m ǀ
hiraṇyáyam ǀ utá ǀ bhógam ǀ sasāna ǀ hatvī́ ǀ dásyūn ǀ prá ǀ ā́ryam ǀ várṇam ǀ āvat ǁ
Padapatha Transcription Nonaccented
sasāna ǀ atyān ǀ uta ǀ sūryam ǀ sasāna ǀ indraḥ ǀ sasāna ǀ puru-bhojasam ǀ gām ǀ
hiraṇyayam ǀ uta ǀ bhogam ǀ sasāna ǀ hatvī ǀ dasyūn ǀ pra ǀ āryam ǀ varṇam ǀ āvat ǁ
03.034.10 (Mandala. Sukta. Rik)
3.2.16.05 (Ashtaka. Adhyaya. Varga. Rik)
03.03.084 (Mandala. Anuvāka. Rik)
Samhita Devanagari Accented
इंद्र॒ ओष॑धीरसनो॒दहा॑नि॒ वन॒स्पतीँ॑रसनोदं॒तरि॑क्षं ।
बि॒भेद॑ व॒लं नु॑नु॒दे विवा॒चोऽथा॑भवद्दमि॒ताभिक्र॑तूनां ॥
Samhita Devanagari Nonaccented
इंद्र ओषधीरसनोदहानि वनस्पतीँरसनोदंतरिक्षं ।
बिभेद वलं नुनुदे विवाचोऽथाभवद्दमिताभिक्रतूनां ॥
Samhita Transcription Accented
índra óṣadhīrasanodáhāni vánaspátīm̐rasanodantárikṣam ǀ
bibhéda valám nunudé vívācó’thābhavaddamitā́bhíkratūnām ǁ
Samhita Transcription Nonaccented
indra oṣadhīrasanodahāni vanaspatīm̐rasanodantarikṣam ǀ
bibheda valam nunude vivāco’thābhavaddamitābhikratūnām ǁ
Padapatha Devanagari Accented
इन्द्रः॑ । ओष॑धीः । अ॒स॒नो॒त् । अहा॑नि । वन॒स्पती॑न् । अ॒स॒नो॒त् । अ॒न्तरि॑क्षम् ।
बि॒भेद॑ । व॒लम् । नु॒नु॒दे । विऽवा॑चः । अथ॑ । अ॒भ॒व॒त् । द॒मि॒ता । अ॒भिऽक्र॑तूनाम् ॥
Padapatha Devanagari Nonaccented
इन्द्रः । ओषधीः । असनोत् । अहानि । वनस्पतीन् । असनोत् । अन्तरिक्षम् ।
बिभेद । वलम् । नुनुदे । विऽवाचः । अथ । अभवत् । दमिता । अभिऽक्रतूनाम् ॥
Padapatha Transcription Accented
índraḥ ǀ óṣadhīḥ ǀ asanot ǀ áhāni ǀ vánaspátīn ǀ asanot ǀ antárikṣam ǀ
bibhéda ǀ valám ǀ nunudé ǀ ví-vācaḥ ǀ átha ǀ abhavat ǀ damitā́ ǀ abhí-kratūnām ǁ
Padapatha Transcription Nonaccented
indraḥ ǀ oṣadhīḥ ǀ asanot ǀ ahāni ǀ vanaspatīn ǀ asanot ǀ antarikṣam ǀ
bibheda ǀ valam ǀ nunude ǀ vi-vācaḥ ǀ atha ǀ abhavat ǀ damitā ǀ abhi-kratūnām ǁ
03.034.11 (Mandala. Sukta. Rik)
3.2.16.06 (Ashtaka. Adhyaya. Varga. Rik)
03.03.085 (Mandala. Anuvāka. Rik)
Samhita Devanagari Accented
शु॒नं हु॑वेम म॒घवा॑न॒मिंद्र॑म॒स्मिन्भरे॒ नृत॑मं॒ वाज॑सातौ ।
शृ॒ण्वंत॑मु॒ग्रमू॒तये॑ स॒मत्सु॒ घ्नंतं॑ वृ॒त्राणि॑ सं॒जितं॒ धना॑नां ॥
Samhita Devanagari Nonaccented
शुनं हुवेम मघवानमिंद्रमस्मिन्भरे नृतमं वाजसातौ ।
शृण्वंतमुग्रमूतये समत्सु घ्नंतं वृत्राणि संजितं धनानां ॥
Samhita Transcription Accented
śunám huvema maghávānamíndramasmínbháre nṛ́tamam vā́jasātau ǀ
śṛṇvántamugrámūtáye samátsu ghnántam vṛtrā́ṇi saṃjítam dhánānām ǁ
Samhita Transcription Nonaccented
śunam huvema maghavānamindramasminbhare nṛtamam vājasātau ǀ
śṛṇvantamugramūtaye samatsu ghnantam vṛtrāṇi saṃjitam dhanānām ǁ
Padapatha Devanagari Accented
शु॒नम् । हु॒वे॒म॒ । म॒घऽवा॑नम् । इन्द्र॑म् । अ॒स्मिन् । भरे॑ । नृऽत॑मम् । वाज॑ऽसातौ ।
शृ॒ण्वन्त॑म् । उ॒ग्रम् । ऊ॒तये॑ । स॒मत्ऽसु॑ । घ्नन्त॑म् । वृ॒त्राणि॑ । स॒म्ऽजित॑म् । धना॑नाम् ॥
Padapatha Devanagari Nonaccented
शुनम् । हुवेम । मघऽवानम् । इन्द्रम् । अस्मिन् । भरे । नृऽतमम् । वाजऽसातौ ।
शृण्वन्तम् । उग्रम् । ऊतये । समत्ऽसु । घ्नन्तम् । वृत्राणि । सम्ऽजितम् । धनानाम् ॥
Padapatha Transcription Accented
śunám ǀ huvema ǀ maghá-vānam ǀ índram ǀ asmín ǀ bháre ǀ nṛ́-tamam ǀ vā́ja-sātau ǀ
śṛṇvántam ǀ ugrám ǀ ūtáye ǀ samát-su ǀ ghnántam ǀ vṛtrā́ṇi ǀ sam-jítam ǀ dhánānām ǁ
Padapatha Transcription Nonaccented
śunam ǀ huvema ǀ magha-vānam ǀ indram ǀ asmin ǀ bhare ǀ nṛ-tamam ǀ vāja-sātau ǀ
śṛṇvantam ǀ ugram ǀ ūtaye ǀ samat-su ǀ ghnantam ǀ vṛtrāṇi ǀ sam-jitam ǀ dhanānām ǁ