|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 3
Sūkta 54
|
1. Info |
| To: | viśvedevās | |
| From: | prajāpati vācya or prajāpati vaiśvāmitra | |
| Metres: | 1st set of styles: triṣṭup (2, 3, 6, 8, 10, 11, 13, 14); nicṛttriṣṭup (4, 7, 15, 16, 18, 20, 21); virāṭtrisṭup (19, 22); nicṛtpaṅkti (1); svarāṭtriṣṭup (5); bhurikpaṅkti (9); svarāṭpaṅkti (12); bhuriktriṣṭup (17) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
03.054.01 (Mandala. Sukta. Rik)
3.3.24.01 (Ashtaka. Adhyaya. Varga. Rik)
03.05.001 (Mandala. Anuvāka. Rik)
Samhita Devanagari Accented
इ॒मं म॒हे वि॑द॒थ्या॑य शू॒षं शश्व॒त्कृत्व॒ ईड्या॑य॒ प्र ज॑भ्रुः ।
शृ॒णोतु॑ नो॒ दम्ये॑भि॒रनी॑कैः शृ॒णोत्व॒ग्निर्दि॒व्यैरज॑स्रः ॥
Samhita Devanagari Nonaccented
इमं महे विदथ्याय शूषं शश्वत्कृत्व ईड्याय प्र जभ्रुः ।
शृणोतु नो दम्येभिरनीकैः शृणोत्वग्निर्दिव्यैरजस्रः ॥
Samhita Transcription Accented
imám mahé vidathyā́ya śūṣám śáśvatkṛ́tva ī́ḍyāya prá jabhruḥ ǀ
śṛṇótu no dámyebhiránīkaiḥ śṛṇótvagnírdivyáirájasraḥ ǁ
Samhita Transcription Nonaccented
imam mahe vidathyāya śūṣam śaśvatkṛtva īḍyāya pra jabhruḥ ǀ
śṛṇotu no damyebhiranīkaiḥ śṛṇotvagnirdivyairajasraḥ ǁ
Padapatha Devanagari Accented
इ॒मम् । म॒हे । वि॒द॒थ्या॑य । शू॒षम् । शश्व॑त् । कृत्वः॑ । ईड्या॑य । प्र । ज॒भ्रुः॒ ।
शृ॒णोतु॑ । नः॒ । दम्ये॑भिः । अनी॑कैः । शृ॒णोतु॑ । अ॒ग्निः । दि॒व्यैः । अज॑स्रः ॥
Padapatha Devanagari Nonaccented
इमम् । महे । विदथ्याय । शूषम् । शश्वत् । कृत्वः । ईड्याय । प्र । जभ्रुः ।
शृणोतु । नः । दम्येभिः । अनीकैः । शृणोतु । अग्निः । दिव्यैः । अजस्रः ॥
Padapatha Transcription Accented
imám ǀ mahé ǀ vidathyā́ya ǀ śūṣám ǀ śáśvat ǀ kṛ́tvaḥ ǀ ī́ḍyāya ǀ prá ǀ jabhruḥ ǀ
śṛṇótu ǀ naḥ ǀ dámyebhiḥ ǀ ánīkaiḥ ǀ śṛṇótu ǀ agníḥ ǀ divyáiḥ ǀ ájasraḥ ǁ
Padapatha Transcription Nonaccented
imam ǀ mahe ǀ vidathyāya ǀ śūṣam ǀ śaśvat ǀ kṛtvaḥ ǀ īḍyāya ǀ pra ǀ jabhruḥ ǀ
śṛṇotu ǀ naḥ ǀ damyebhiḥ ǀ anīkaiḥ ǀ śṛṇotu ǀ agniḥ ǀ divyaiḥ ǀ ajasraḥ ǁ
03.054.02 (Mandala. Sukta. Rik)
3.3.24.02 (Ashtaka. Adhyaya. Varga. Rik)
03.05.002 (Mandala. Anuvāka. Rik)
Samhita Devanagari Accented
महि॑ म॒हे दि॒वे अ॑र्चा पृथि॒व्यै कामो॑ म इ॒च्छंच॑रति प्रजा॒नन् ।
ययो॑र्ह॒ स्तोमे॑ वि॒दथे॑षु दे॒वाः स॑प॒र्यवो॑ मा॒दयं॑ते॒ सचा॒योः ॥
Samhita Devanagari Nonaccented
महि महे दिवे अर्चा पृथिव्यै कामो म इच्छंचरति प्रजानन् ।
ययोर्ह स्तोमे विदथेषु देवाः सपर्यवो मादयंते सचायोः ॥
Samhita Transcription Accented
máhi mahé divé arcā pṛthivyái kā́mo ma iccháñcarati prajānán ǀ
yáyorha stóme vidátheṣu devā́ḥ saparyávo mādáyante sácāyóḥ ǁ
Samhita Transcription Nonaccented
mahi mahe dive arcā pṛthivyai kāmo ma icchañcarati prajānan ǀ
yayorha stome vidatheṣu devāḥ saparyavo mādayante sacāyoḥ ǁ
Padapatha Devanagari Accented
महि॑ । म॒हे । दि॒वे । अ॒र्च॒ । पृ॒थि॒व्यै । कामः॑ । मे॒ । इ॒च्छन् । च॒र॒ति॒ । प्र॒ऽजा॒नन् ।
ययोः॑ । ह॒ । स्तोमे॑ । वि॒दथे॑षु । दे॒वाः । स॒प॒र्यवः॑ । मा॒दय॑न्ते । सचा॑ । आ॒योः ॥
Padapatha Devanagari Nonaccented
महि । महे । दिवे । अर्च । पृथिव्यै । कामः । मे । इच्छन् । चरति । प्रऽजानन् ।
ययोः । ह । स्तोमे । विदथेषु । देवाः । सपर्यवः । मादयन्ते । सचा । आयोः ॥
Padapatha Transcription Accented
máhi ǀ mahé ǀ divé ǀ arca ǀ pṛthivyái ǀ kā́maḥ ǀ me ǀ icchán ǀ carati ǀ pra-jānán ǀ
yáyoḥ ǀ ha ǀ stóme ǀ vidátheṣu ǀ devā́ḥ ǀ saparyávaḥ ǀ mādáyante ǀ sácā ǀ āyóḥ ǁ
Padapatha Transcription Nonaccented
mahi ǀ mahe ǀ dive ǀ arca ǀ pṛthivyai ǀ kāmaḥ ǀ me ǀ icchan ǀ carati ǀ pra-jānan ǀ
yayoḥ ǀ ha ǀ stome ǀ vidatheṣu ǀ devāḥ ǀ saparyavaḥ ǀ mādayante ǀ sacā ǀ āyoḥ ǁ
03.054.03 (Mandala. Sukta. Rik)
3.3.24.03 (Ashtaka. Adhyaya. Varga. Rik)
03.05.003 (Mandala. Anuvāka. Rik)
Samhita Devanagari Accented
यु॒वोर्ऋ॒तं रो॑दसी स॒त्यम॑स्तु म॒हे षु णः॑ सुवि॒ताय॒ प्र भू॑तं ।
इ॒दं दि॒वे नमो॑ अग्ने पृथि॒व्यै स॑प॒र्यामि॒ प्रय॑सा॒ यामि॒ रत्नं॑ ॥
Samhita Devanagari Nonaccented
युवोर्ऋतं रोदसी सत्यमस्तु महे षु णः सुविताय प्र भूतं ।
इदं दिवे नमो अग्ने पृथिव्यै सपर्यामि प्रयसा यामि रत्नं ॥
Samhita Transcription Accented
yuvórṛtám rodasī satyámastu mahé ṣú ṇaḥ suvitā́ya prá bhūtam ǀ
idám divé námo agne pṛthivyái saparyā́mi práyasā yā́mi rátnam ǁ
Samhita Transcription Nonaccented
yuvorṛtam rodasī satyamastu mahe ṣu ṇaḥ suvitāya pra bhūtam ǀ
idam dive namo agne pṛthivyai saparyāmi prayasā yāmi ratnam ǁ
Padapatha Devanagari Accented
यु॒वोः । ऋ॒तम् । रो॒द॒सी॒ इति॑ । स॒त्यम् । अ॒स्तु॒ । म॒हे । सु । नः॒ । सु॒वि॒ताय॑ । प्र । भू॒त॒म् ।
इ॒दम् । दि॒वे । नमः॑ । अ॒ग्ने॒ । पृ॒थि॒व्यै । स॒प॒र्यामि॑ । प्रय॑सा । यामि॑ । रत्न॑म् ॥
Padapatha Devanagari Nonaccented
युवोः । ऋतम् । रोदसी इति । सत्यम् । अस्तु । महे । सु । नः । सुविताय । प्र । भूतम् ।
इदम् । दिवे । नमः । अग्ने । पृथिव्यै । सपर्यामि । प्रयसा । यामि । रत्नम् ॥
Padapatha Transcription Accented
yuvóḥ ǀ ṛtám ǀ rodasī íti ǀ satyám ǀ astu ǀ mahé ǀ sú ǀ naḥ ǀ suvitā́ya ǀ prá ǀ bhūtam ǀ
idám ǀ divé ǀ námaḥ ǀ agne ǀ pṛthivyái ǀ saparyā́mi ǀ práyasā ǀ yā́mi ǀ rátnam ǁ
Padapatha Transcription Nonaccented
yuvoḥ ǀ ṛtam ǀ rodasī iti ǀ satyam ǀ astu ǀ mahe ǀ su ǀ naḥ ǀ suvitāya ǀ pra ǀ bhūtam ǀ
idam ǀ dive ǀ namaḥ ǀ agne ǀ pṛthivyai ǀ saparyāmi ǀ prayasā ǀ yāmi ǀ ratnam ǁ
03.054.04 (Mandala. Sukta. Rik)
3.3.24.04 (Ashtaka. Adhyaya. Varga. Rik)
03.05.004 (Mandala. Anuvāka. Rik)
Samhita Devanagari Accented
उ॒तो हि वां॑ पू॒र्व्या आ॑विवि॒द्र ऋता॑वरी रोदसी सत्य॒वाचः॑ ।
नर॑श्चिद्वां समि॒थे शूर॑सातौ ववंदि॒रे पृ॑थिवि॒ वेवि॑दानाः ॥
Samhita Devanagari Nonaccented
उतो हि वां पूर्व्या आविविद्र ऋतावरी रोदसी सत्यवाचः ।
नरश्चिद्वां समिथे शूरसातौ ववंदिरे पृथिवि वेविदानाः ॥
Samhita Transcription Accented
utó hí vām pūrvyā́ āvividrá ṛ́tāvarī rodasī satyavā́caḥ ǀ
náraścidvām samithé śū́rasātau vavandiré pṛthivi vévidānāḥ ǁ
Samhita Transcription Nonaccented
uto hi vām pūrvyā āvividra ṛtāvarī rodasī satyavācaḥ ǀ
naraścidvām samithe śūrasātau vavandire pṛthivi vevidānāḥ ǁ
Padapatha Devanagari Accented
उ॒तो इति॑ । हि । वा॒म् । पू॒र्व्याः । आ॒ऽवि॒वि॒द्रे । ऋत॑वरी॒ इत्यृत॑ऽवरी । रो॒द॒सी॒ इति॑ । स॒त्य॒ऽवाचः॑ ।
नरः॑ । चि॒त् । वा॒म् । स॒म्ऽइ॒थे । शूर॑ऽसातौ । व॒व॒न्दि॒रे । पृ॒थि॒वि॒ । वेवि॑दानाः ॥
Padapatha Devanagari Nonaccented
उतो इति । हि । वाम् । पूर्व्याः । आऽविविद्रे । ऋतवरी इत्यृतऽवरी । रोदसी इति । सत्यऽवाचः ।
नरः । चित् । वाम् । सम्ऽइथे । शूरऽसातौ । ववन्दिरे । पृथिवि । वेविदानाः ॥
Padapatha Transcription Accented
utó íti ǀ hí ǀ vām ǀ pūrvyā́ḥ ǀ ā-vividré ǀ ṛ́tavarī ítyṛta-varī ǀ rodasī íti ǀ satya-vā́caḥ ǀ
náraḥ ǀ cit ǀ vām ǀ sam-ithé ǀ śū́ra-sātau ǀ vavandiré ǀ pṛthivi ǀ vévidānāḥ ǁ
Padapatha Transcription Nonaccented
uto iti ǀ hi ǀ vām ǀ pūrvyāḥ ǀ ā-vividre ǀ ṛtavarī ityṛta-varī ǀ rodasī iti ǀ satya-vācaḥ ǀ
naraḥ ǀ cit ǀ vām ǀ sam-ithe ǀ śūra-sātau ǀ vavandire ǀ pṛthivi ǀ vevidānāḥ ǁ
03.054.05 (Mandala. Sukta. Rik)
3.3.24.05 (Ashtaka. Adhyaya. Varga. Rik)
03.05.005 (Mandala. Anuvāka. Rik)
Samhita Devanagari Accented
को अ॒द्धा वे॑द॒ क इ॒ह प्र वो॑चद्दे॒वाँ अच्छा॑ प॒थ्या॒३॒॑ का समे॑ति ।
ददृ॑श्र एषामव॒मा सदां॑सि॒ परे॑षु॒ या गुह्ये॑षु व्र॒तेषु॑ ॥
Samhita Devanagari Nonaccented
को अद्धा वेद क इह प्र वोचद्देवाँ अच्छा पथ्या का समेति ।
ददृश्र एषामवमा सदांसि परेषु या गुह्येषु व्रतेषु ॥
Samhita Transcription Accented
kó addhā́ veda ká ihá prá vocaddevā́m̐ ácchā pathyā́ kā́ sámeti ǀ
dádṛśra eṣāmavamā́ sádāṃsi páreṣu yā́ gúhyeṣu vratéṣu ǁ
Samhita Transcription Nonaccented
ko addhā veda ka iha pra vocaddevām̐ acchā pathyā kā sameti ǀ
dadṛśra eṣāmavamā sadāṃsi pareṣu yā guhyeṣu vrateṣu ǁ
Padapatha Devanagari Accented
कः । अ॒द्धा । वे॒द॒ । कः । इ॒ह । प्र । वो॒च॒त् । दे॒वान् । अच्छ॑ । प॒थ्या॑ । का । सम् । ए॒ति॒ ।
ददृ॑श्रे । ए॒षा॒म् । अ॒व॒मा । सदां॑सि । परे॑षु । या । गुह्ये॑षु । व्र॒तेषु॑ ॥
Padapatha Devanagari Nonaccented
कः । अद्धा । वेद । कः । इह । प्र । वोचत् । देवान् । अच्छ । पथ्या । का । सम् । एति ।
ददृश्रे । एषाम् । अवमा । सदांसि । परेषु । या । गुह्येषु । व्रतेषु ॥
Padapatha Transcription Accented
káḥ ǀ addhā́ ǀ veda ǀ káḥ ǀ ihá ǀ prá ǀ vocat ǀ devā́n ǀ áccha ǀ pathyā́ ǀ kā́ ǀ sám ǀ eti ǀ
dádṛśre ǀ eṣām ǀ avamā́ ǀ sádāṃsi ǀ páreṣu ǀ yā́ ǀ gúhyeṣu ǀ vratéṣu ǁ
Padapatha Transcription Nonaccented
kaḥ ǀ addhā ǀ veda ǀ kaḥ ǀ iha ǀ pra ǀ vocat ǀ devān ǀ accha ǀ pathyā ǀ kā ǀ sam ǀ eti ǀ
dadṛśre ǀ eṣām ǀ avamā ǀ sadāṃsi ǀ pareṣu ǀ yā ǀ guhyeṣu ǀ vrateṣu ǁ
03.054.06 (Mandala. Sukta. Rik)
3.3.25.01 (Ashtaka. Adhyaya. Varga. Rik)
03.05.006 (Mandala. Anuvāka. Rik)
Samhita Devanagari Accented
क॒विर्नृ॒चक्षा॑ अ॒भि षी॑मचष्ट ऋ॒तस्य॒ योना॒ विघृ॑ते॒ मदं॑ती ।
नाना॑ चक्राते॒ सद॑नं॒ यथा॒ वेः स॑मा॒नेन॒ क्रतु॑ना संविदा॒ने ॥
Samhita Devanagari Nonaccented
कविर्नृचक्षा अभि षीमचष्ट ऋतस्य योना विघृते मदंती ।
नाना चक्राते सदनं यथा वेः समानेन क्रतुना संविदाने ॥
Samhita Transcription Accented
kavírnṛcákṣā abhí ṣīmacaṣṭa ṛtásya yónā víghṛte mádantī ǀ
nā́nā cakrāte sádanam yáthā véḥ samānéna krátunā saṃvidāné ǁ
Samhita Transcription Nonaccented
kavirnṛcakṣā abhi ṣīmacaṣṭa ṛtasya yonā vighṛte madantī ǀ
nānā cakrāte sadanam yathā veḥ samānena kratunā saṃvidāne ǁ
Padapatha Devanagari Accented
क॒विः । नृ॒ऽचक्षाः॑ । अ॒भि । सी॒म् । अ॒च॒ष्ट॒ । ऋ॒तस्य॑ । योना॑ । विघृ॑ते॒ इति॒ विऽघृ॑ते । मद॑न्ती॒ इति॑ ।
नाना॑ । च॒क्रा॒ते॒ इति॑ । सद॑नम् । यथा॑ । वेः । स॒मा॒नेन॑ । क्रतु॑ना । सं॒वि॒दा॒ने इति॑ स॒म्ऽवि॒दा॒ने ॥
Padapatha Devanagari Nonaccented
कविः । नृऽचक्षाः । अभि । सीम् । अचष्ट । ऋतस्य । योना । विघृते इति विऽघृते । मदन्ती इति ।
नाना । चक्राते इति । सदनम् । यथा । वेः । समानेन । क्रतुना । संविदाने इति सम्ऽविदाने ॥
Padapatha Transcription Accented
kavíḥ ǀ nṛ-cákṣāḥ ǀ abhí ǀ sīm ǀ acaṣṭa ǀ ṛtásya ǀ yónā ǀ víghṛte íti ví-ghṛte ǀ mádantī íti ǀ
nā́nā ǀ cakrāte íti ǀ sádanam ǀ yáthā ǀ véḥ ǀ samānéna ǀ krátunā ǀ saṃvidāné íti sam-vidāné ǁ
Padapatha Transcription Nonaccented
kaviḥ ǀ nṛ-cakṣāḥ ǀ abhi ǀ sīm ǀ acaṣṭa ǀ ṛtasya ǀ yonā ǀ vighṛte iti vi-ghṛte ǀ madantī iti ǀ
nānā ǀ cakrāte iti ǀ sadanam ǀ yathā ǀ veḥ ǀ samānena ǀ kratunā ǀ saṃvidāne iti sam-vidāne ǁ
03.054.07 (Mandala. Sukta. Rik)
3.3.25.02 (Ashtaka. Adhyaya. Varga. Rik)
03.05.007 (Mandala. Anuvāka. Rik)
Samhita Devanagari Accented
स॒मा॒न्या वियु॑ते दू॒रेअं॑ते ध्रु॒वे प॒दे त॑स्थतुर्जाग॒रूके॑ ।
उ॒त स्वसा॑रा युव॒ती भवं॑ती॒ आदु॑ ब्रुवाते मिथु॒नानि॒ नाम॑ ॥
Samhita Devanagari Nonaccented
समान्या वियुते दूरेअंते ध्रुवे पदे तस्थतुर्जागरूके ।
उत स्वसारा युवती भवंती आदु ब्रुवाते मिथुनानि नाम ॥
Samhita Transcription Accented
samānyā́ víyute dūréante dhruvé padé tasthaturjāgarū́ke ǀ
utá svásārā yuvatī́ bhávantī ā́du bruvāte mithunā́ni nā́ma ǁ
Samhita Transcription Nonaccented
samānyā viyute dūreante dhruve pade tasthaturjāgarūke ǀ
uta svasārā yuvatī bhavantī ādu bruvāte mithunāni nāma ǁ
Padapatha Devanagari Accented
स॒मा॒न्या । वियु॑ते॒ इति॒ विऽयु॑ते । दू॒रेअ॑न्ते॒ इति॑ दू॒रेऽअ॑न्ते । ध्रु॒वे । प॒दे । त॒स्थ॒तुः॒ । जा॒ग॒रूके॒ इति॑ ।
उ॒त । स्वसा॑रा । यु॒व॒ती इति॑ । भव॑न्ती॒ इति॑ । आत् । ऊं॒ इति॑ । ब्रु॒वा॒ते॒ इति॑ । मि॒थु॒नानि॑ । नाम॑ ॥
Padapatha Devanagari Nonaccented
समान्या । वियुते इति विऽयुते । दूरेअन्ते इति दूरेऽअन्ते । ध्रुवे । पदे । तस्थतुः । जागरूके इति ।
उत । स्वसारा । युवती इति । भवन्ती इति । आत् । ऊं इति । ब्रुवाते इति । मिथुनानि । नाम ॥
Padapatha Transcription Accented
samānyā́ ǀ víyute íti ví-yute ǀ dūréante íti dūré-ante ǀ dhruvé ǀ padé ǀ tasthatuḥ ǀ jāgarū́ke íti ǀ
utá ǀ svásārā ǀ yuvatī́ íti ǀ bhávantī íti ǀ ā́t ǀ ūṃ íti ǀ bruvāte íti ǀ mithunā́ni ǀ nā́ma ǁ
Padapatha Transcription Nonaccented
samānyā ǀ viyute iti vi-yute ǀ dūreante iti dūre-ante ǀ dhruve ǀ pade ǀ tasthatuḥ ǀ jāgarūke iti ǀ
uta ǀ svasārā ǀ yuvatī iti ǀ bhavantī iti ǀ āt ǀ ūṃ iti ǀ bruvāte iti ǀ mithunāni ǀ nāma ǁ
03.054.08 (Mandala. Sukta. Rik)
3.3.25.03 (Ashtaka. Adhyaya. Varga. Rik)
03.05.008 (Mandala. Anuvāka. Rik)
Samhita Devanagari Accented
विश्वेदे॒ते जनि॑मा॒ सं वि॑विक्तो म॒हो दे॒वान्बिभ्र॑ती॒ न व्य॑थेते ।
एज॑द्ध्रु॒वं प॑त्यते॒ विश्व॒मेकं॒ चर॑त्पत॒त्रि विषु॑णं॒ वि जा॒तं ॥
Samhita Devanagari Nonaccented
विश्वेदेते जनिमा सं विविक्तो महो देवान्बिभ्रती न व्यथेते ।
एजद्ध्रुवं पत्यते विश्वमेकं चरत्पतत्रि विषुणं वि जातं ॥
Samhita Transcription Accented
víśvédeté jánimā sám vivikto mahó devā́nbíbhratī ná vyathete ǀ
éjaddhruvám patyate víśvamékam cáratpatatrí víṣuṇam ví jātám ǁ
Samhita Transcription Nonaccented
viśvedete janimā sam vivikto maho devānbibhratī na vyathete ǀ
ejaddhruvam patyate viśvamekam caratpatatri viṣuṇam vi jātam ǁ
Padapatha Devanagari Accented
विश्वा॑ । इत् । ए॒ते इति॑ । जनि॑म । सम् । वि॒वि॒क्तः॒ । म॒हः । दे॒वान् । बिभ्र॑ती॒ इति॑ । न । व्य॒थे॒ते॒ इति॑ ।
एज॑त् । ध्रु॒वम् । प॒त्य॒ते॒ । विश्व॑म् । एक॑म् । चर॑त् । प॒त॒त्रि । विषु॑णम् । वि । जा॒तम् ॥
Padapatha Devanagari Nonaccented
विश्वा । इत् । एते इति । जनिम । सम् । विविक्तः । महः । देवान् । बिभ्रती इति । न । व्यथेते इति ।
एजत् । ध्रुवम् । पत्यते । विश्वम् । एकम् । चरत् । पतत्रि । विषुणम् । वि । जातम् ॥
Padapatha Transcription Accented
víśvā ǀ ít ǀ eté íti ǀ jánima ǀ sám ǀ viviktaḥ ǀ maháḥ ǀ devā́n ǀ bíbhratī íti ǀ ná ǀ vyathete íti ǀ
éjat ǀ dhruvám ǀ patyate ǀ víśvam ǀ ékam ǀ cárat ǀ patatrí ǀ víṣuṇam ǀ ví ǀ jātám ǁ
Padapatha Transcription Nonaccented
viśvā ǀ it ǀ ete iti ǀ janima ǀ sam ǀ viviktaḥ ǀ mahaḥ ǀ devān ǀ bibhratī iti ǀ na ǀ vyathete iti ǀ
ejat ǀ dhruvam ǀ patyate ǀ viśvam ǀ ekam ǀ carat ǀ patatri ǀ viṣuṇam ǀ vi ǀ jātam ǁ
03.054.09 (Mandala. Sukta. Rik)
3.3.25.04 (Ashtaka. Adhyaya. Varga. Rik)
03.05.009 (Mandala. Anuvāka. Rik)
Samhita Devanagari Accented
सना॑ पुरा॒णमध्ये॑म्या॒रान्म॒हः पि॒तुर्ज॑नि॒तुर्जा॒मि तन्नः॑ ।
दे॒वासो॒ यत्र॑ पनि॒तार॒ एवै॑रु॒रौ प॒थि व्यु॑ते त॒स्थुरं॒तः ॥
Samhita Devanagari Nonaccented
सना पुराणमध्येम्यारान्महः पितुर्जनितुर्जामि तन्नः ।
देवासो यत्र पनितार एवैरुरौ पथि व्युते तस्थुरंतः ॥
Samhita Transcription Accented
sánā purāṇámádhyemyārā́nmaháḥ pitúrjanitúrjāmí tánnaḥ ǀ
devā́so yátra panitā́ra évairuráu pathí vyúte tasthúrantáḥ ǁ
Samhita Transcription Nonaccented
sanā purāṇamadhyemyārānmahaḥ piturjaniturjāmi tannaḥ ǀ
devāso yatra panitāra evairurau pathi vyute tasthurantaḥ ǁ
Padapatha Devanagari Accented
सना॑ । पु॒रा॒णम् । अधि॑ । ए॒मि॒ । आ॒रात् । म॒हः । पि॒तुः । ज॒नि॒तुः । जा॒मि । तत् । नः॒ ।
दे॒वासः॑ । यत्र॑ । प॒नि॒तारः॑ । एवैः॑ । उ॒रौ । प॒थि । विऽउ॑ते । त॒स्थुः । अ॒न्तरिति॑ ॥
Padapatha Devanagari Nonaccented
सना । पुराणम् । अधि । एमि । आरात् । महः । पितुः । जनितुः । जामि । तत् । नः ।
देवासः । यत्र । पनितारः । एवैः । उरौ । पथि । विऽउते । तस्थुः । अन्तरिति ॥
Padapatha Transcription Accented
sánā ǀ purāṇám ǀ ádhi ǀ emi ǀ ārā́t ǀ maháḥ ǀ pitúḥ ǀ janitúḥ ǀ jāmí ǀ tát ǀ naḥ ǀ
devā́saḥ ǀ yátra ǀ panitā́raḥ ǀ évaiḥ ǀ uráu ǀ pathí ǀ ví-ute ǀ tasthúḥ ǀ antáríti ǁ
Padapatha Transcription Nonaccented
sanā ǀ purāṇam ǀ adhi ǀ emi ǀ ārāt ǀ mahaḥ ǀ pituḥ ǀ janituḥ ǀ jāmi ǀ tat ǀ naḥ ǀ
devāsaḥ ǀ yatra ǀ panitāraḥ ǀ evaiḥ ǀ urau ǀ pathi ǀ vi-ute ǀ tasthuḥ ǀ antariti ǁ
03.054.10 (Mandala. Sukta. Rik)
3.3.25.05 (Ashtaka. Adhyaya. Varga. Rik)
03.05.010 (Mandala. Anuvāka. Rik)
Samhita Devanagari Accented
इ॒मं स्तोमं॑ रोदसी॒ प्र ब्र॑वीम्यृदू॒दराः॑ शृणवन्नग्निजि॒ह्वाः ।
मि॒त्रः स॒म्राजो॒ वरु॑णो॒ युवा॑न आदि॒त्यासः॑ क॒वयः॑ पप्रथा॒नाः ॥
Samhita Devanagari Nonaccented
इमं स्तोमं रोदसी प्र ब्रवीम्यृदूदराः शृणवन्नग्निजिह्वाः ।
मित्रः सम्राजो वरुणो युवान आदित्यासः कवयः पप्रथानाः ॥
Samhita Transcription Accented
imám stómam rodasī prá bravīmyṛdūdárāḥ śṛṇavannagnijihvā́ḥ ǀ
mitráḥ samrā́jo váruṇo yúvāna ādityā́saḥ kaváyaḥ paprathānā́ḥ ǁ
Samhita Transcription Nonaccented
imam stomam rodasī pra bravīmyṛdūdarāḥ śṛṇavannagnijihvāḥ ǀ
mitraḥ samrājo varuṇo yuvāna ādityāsaḥ kavayaḥ paprathānāḥ ǁ
Padapatha Devanagari Accented
इ॒मम् । स्तोम॑म् । रो॒द॒सी॒ इति॑ । प्र । ब्र॒वी॒मि॒ । ऋ॒दू॒दराः॑ । शृ॒ण॒व॒न् । अ॒ग्नि॒ऽजि॒ह्वाः ।
मि॒त्रः । स॒म्ऽराजः॑ । वरु॑णः । युवा॑नः । आ॒दि॒त्यासः॑ । क॒वयः॑ । प॒प्र॒था॒नाः ॥
Padapatha Devanagari Nonaccented
इमम् । स्तोमम् । रोदसी इति । प्र । ब्रवीमि । ऋदूदराः । शृणवन् । अग्निऽजिह्वाः ।
मित्रः । सम्ऽराजः । वरुणः । युवानः । आदित्यासः । कवयः । पप्रथानाः ॥
Padapatha Transcription Accented
imám ǀ stómam ǀ rodasī íti ǀ prá ǀ bravīmi ǀ ṛdūdárāḥ ǀ śṛṇavan ǀ agni-jihvā́ḥ ǀ
mitráḥ ǀ sam-rā́jaḥ ǀ váruṇaḥ ǀ yúvānaḥ ǀ ādityā́saḥ ǀ kaváyaḥ ǀ paprathānā́ḥ ǁ
Padapatha Transcription Nonaccented
imam ǀ stomam ǀ rodasī iti ǀ pra ǀ bravīmi ǀ ṛdūdarāḥ ǀ śṛṇavan ǀ agni-jihvāḥ ǀ
mitraḥ ǀ sam-rājaḥ ǀ varuṇaḥ ǀ yuvānaḥ ǀ ādityāsaḥ ǀ kavayaḥ ǀ paprathānāḥ ǁ
03.054.11 (Mandala. Sukta. Rik)
3.3.26.01 (Ashtaka. Adhyaya. Varga. Rik)
03.05.011 (Mandala. Anuvāka. Rik)
Samhita Devanagari Accented
हिर॑ण्यपाणिः सवि॒ता सु॑जि॒ह्वस्त्रिरा दि॒वो वि॒दथे॒ पत्य॑मानः ।
दे॒वेषु॑ च सवितः॒ श्लोक॒मश्रे॒राद॒स्मभ्य॒मा सु॑व स॒र्वता॑तिं ॥
Samhita Devanagari Nonaccented
हिरण्यपाणिः सविता सुजिह्वस्त्रिरा दिवो विदथे पत्यमानः ।
देवेषु च सवितः श्लोकमश्रेरादस्मभ्यमा सुव सर्वतातिं ॥
Samhita Transcription Accented
híraṇyapāṇiḥ savitā́ sujihvástrírā́ divó vidáthe pátyamānaḥ ǀ
devéṣu ca savitaḥ ślókamáśrerā́dasmábhyamā́ suva sarvátātim ǁ
Samhita Transcription Nonaccented
hiraṇyapāṇiḥ savitā sujihvastrirā divo vidathe patyamānaḥ ǀ
deveṣu ca savitaḥ ślokamaśrerādasmabhyamā suva sarvatātim ǁ
Padapatha Devanagari Accented
हिर॑ण्यऽपाणिः । स॒वि॒ता । सु॒ऽजि॒ह्वः । त्रिः । आ । दि॒वः । वि॒दथे॑ । पत्य॑मानः ।
दे॒वेषु॑ । च॒ । स॒वि॒त॒रिति॑ । श्लोक॑म् । अश्रेः॑ । आत् । अ॒स्मभ्य॑म् । आ । सु॒व॒ । स॒र्वऽता॑तिम् ॥
Padapatha Devanagari Nonaccented
हिरण्यऽपाणिः । सविता । सुऽजिह्वः । त्रिः । आ । दिवः । विदथे । पत्यमानः ।
देवेषु । च । सवितरिति । श्लोकम् । अश्रेः । आत् । अस्मभ्यम् । आ । सुव । सर्वऽतातिम् ॥
Padapatha Transcription Accented
híraṇya-pāṇiḥ ǀ savitā́ ǀ su-jihváḥ ǀ tríḥ ǀ ā́ ǀ diváḥ ǀ vidáthe ǀ pátyamānaḥ ǀ
devéṣu ǀ ca ǀ savitaríti ǀ ślókam ǀ áśreḥ ǀ ā́t ǀ asmábhyam ǀ ā́ ǀ suva ǀ sarvá-tātim ǁ
Padapatha Transcription Nonaccented
hiraṇya-pāṇiḥ ǀ savitā ǀ su-jihvaḥ ǀ triḥ ǀ ā ǀ divaḥ ǀ vidathe ǀ patyamānaḥ ǀ
deveṣu ǀ ca ǀ savitariti ǀ ślokam ǀ aśreḥ ǀ āt ǀ asmabhyam ǀ ā ǀ suva ǀ sarva-tātim ǁ
03.054.12 (Mandala. Sukta. Rik)
3.3.26.02 (Ashtaka. Adhyaya. Varga. Rik)
03.05.012 (Mandala. Anuvāka. Rik)
Samhita Devanagari Accented
सु॒कृत्सु॑पा॒णिः स्ववाँ॑ ऋ॒तावा॑ दे॒वस्त्वष्टाव॑से॒ तानि॑ नो धात् ।
पू॒ष॒ण्वंत॑ ऋभवो मादयध्वमू॒र्ध्वग्रा॑वाणो अध्व॒रम॑तष्ट ॥
Samhita Devanagari Nonaccented
सुकृत्सुपाणिः स्ववाँ ऋतावा देवस्त्वष्टावसे तानि नो धात् ।
पूषण्वंत ऋभवो मादयध्वमूर्ध्वग्रावाणो अध्वरमतष्ट ॥
Samhita Transcription Accented
sukṛ́tsupāṇíḥ svávām̐ ṛtā́vā devástváṣṭā́vase tā́ni no dhāt ǀ
pūṣaṇvánta ṛbhavo mādayadhvamūrdhvágrāvāṇo adhvarámataṣṭa ǁ
Samhita Transcription Nonaccented
sukṛtsupāṇiḥ svavām̐ ṛtāvā devastvaṣṭāvase tāni no dhāt ǀ
pūṣaṇvanta ṛbhavo mādayadhvamūrdhvagrāvāṇo adhvaramataṣṭa ǁ
Padapatha Devanagari Accented
सु॒ऽकृत् । सु॒ऽपा॒णिः । स्वऽवा॑न् । ऋ॒तऽवा॑ । दे॒वः । त्वष्टा॑ । अव॑से । तानि॑ । नः॒ । धा॒त् ।
पू॒ष॒ण्ऽवन्तः॑ । ऋ॒भ॒वः॒ । मा॒द॒य॒ध्व॒म् । ऊ॒र्ध्वऽग्रा॑वाणः । अ॒ध्व॒रम् । अ॒त॒ष्ट॒ ॥
Padapatha Devanagari Nonaccented
सुऽकृत् । सुऽपाणिः । स्वऽवान् । ऋतऽवा । देवः । त्वष्टा । अवसे । तानि । नः । धात् ।
पूषण्ऽवन्तः । ऋभवः । मादयध्वम् । ऊर्ध्वऽग्रावाणः । अध्वरम् । अतष्ट ॥
Padapatha Transcription Accented
su-kṛ́t ǀ su-pāṇíḥ ǀ svá-vān ǀ ṛtá-vā ǀ deváḥ ǀ tváṣṭā ǀ ávase ǀ tā́ni ǀ naḥ ǀ dhāt ǀ
pūṣaṇ-vántaḥ ǀ ṛbhavaḥ ǀ mādayadhvam ǀ ūrdhvá-grāvāṇaḥ ǀ adhvarám ǀ ataṣṭa ǁ
Padapatha Transcription Nonaccented
su-kṛt ǀ su-pāṇiḥ ǀ sva-vān ǀ ṛta-vā ǀ devaḥ ǀ tvaṣṭā ǀ avase ǀ tāni ǀ naḥ ǀ dhāt ǀ
pūṣaṇ-vantaḥ ǀ ṛbhavaḥ ǀ mādayadhvam ǀ ūrdhva-grāvāṇaḥ ǀ adhvaram ǀ ataṣṭa ǁ
03.054.13 (Mandala. Sukta. Rik)
3.3.26.03 (Ashtaka. Adhyaya. Varga. Rik)
03.05.013 (Mandala. Anuvāka. Rik)
Samhita Devanagari Accented
वि॒द्युद्र॑था म॒रुत॑ ऋष्टि॒मंतो॑ दि॒वो मर्या॑ ऋ॒तजा॑ता अ॒यासः॑ ।
सर॑स्वती शृणवन्य॒ज्ञिया॑सो॒ धाता॑ र॒यिं स॒हवी॑रं तुरासः ॥
Samhita Devanagari Nonaccented
विद्युद्रथा मरुत ऋष्टिमंतो दिवो मर्या ऋतजाता अयासः ।
सरस्वती शृणवन्यज्ञियासो धाता रयिं सहवीरं तुरासः ॥
Samhita Transcription Accented
vidyúdrathā marúta ṛṣṭimánto divó máryā ṛtájātā ayā́saḥ ǀ
sárasvatī śṛṇavanyajñíyāso dhā́tā rayím sahávīram turāsaḥ ǁ
Samhita Transcription Nonaccented
vidyudrathā maruta ṛṣṭimanto divo maryā ṛtajātā ayāsaḥ ǀ
sarasvatī śṛṇavanyajñiyāso dhātā rayim sahavīram turāsaḥ ǁ
Padapatha Devanagari Accented
वि॒द्युत्ऽर॑थाः । म॒रुतः॑ । ऋ॒ष्टि॒ऽमन्तः॑ । दि॒वः । मर्याः॑ । ऋ॒तऽजा॑ताः । अ॒यासः॑ ।
सर॑स्वती । शृ॒ण॒व॒न् । य॒ज्ञिया॑सः । धात॑ । र॒यिम् । स॒हऽवी॑रम् । तु॒रा॒सः॒ ॥
Padapatha Devanagari Nonaccented
विद्युत्ऽरथाः । मरुतः । ऋष्टिऽमन्तः । दिवः । मर्याः । ऋतऽजाताः । अयासः ।
सरस्वती । शृणवन् । यज्ञियासः । धात । रयिम् । सहऽवीरम् । तुरासः ॥
Padapatha Transcription Accented
vidyút-rathāḥ ǀ marútaḥ ǀ ṛṣṭi-mántaḥ ǀ diváḥ ǀ máryāḥ ǀ ṛtá-jātāḥ ǀ ayā́saḥ ǀ
sárasvatī ǀ śṛṇavan ǀ yajñíyāsaḥ ǀ dhā́ta ǀ rayím ǀ sahá-vīram ǀ turāsaḥ ǁ
Padapatha Transcription Nonaccented
vidyut-rathāḥ ǀ marutaḥ ǀ ṛṣṭi-mantaḥ ǀ divaḥ ǀ maryāḥ ǀ ṛta-jātāḥ ǀ ayāsaḥ ǀ
sarasvatī ǀ śṛṇavan ǀ yajñiyāsaḥ ǀ dhāta ǀ rayim ǀ saha-vīram ǀ turāsaḥ ǁ
03.054.14 (Mandala. Sukta. Rik)
3.3.26.04 (Ashtaka. Adhyaya. Varga. Rik)
03.05.014 (Mandala. Anuvāka. Rik)
Samhita Devanagari Accented
विष्णुं॒ स्तोमा॑सः पुरुद॒स्मम॒र्का भग॑स्येव का॒रिणो॒ याम॑नि ग्मन् ।
उ॒रु॒क्र॒मः क॑कु॒हो यस्य॑ पू॒र्वीर्न म॑र्धंति युव॒तयो॒ जनि॑त्रीः ॥
Samhita Devanagari Nonaccented
विष्णुं स्तोमासः पुरुदस्ममर्का भगस्येव कारिणो यामनि ग्मन् ।
उरुक्रमः ककुहो यस्य पूर्वीर्न मर्धंति युवतयो जनित्रीः ॥
Samhita Transcription Accented
víṣṇum stómāsaḥ purudasmámarkā́ bhágasyeva kāríṇo yā́mani gman ǀ
urukramáḥ kakuhó yásya pūrvī́rná mardhanti yuvatáyo jánitrīḥ ǁ
Samhita Transcription Nonaccented
viṣṇum stomāsaḥ purudasmamarkā bhagasyeva kāriṇo yāmani gman ǀ
urukramaḥ kakuho yasya pūrvīrna mardhanti yuvatayo janitrīḥ ǁ
Padapatha Devanagari Accented
विष्णु॑म् । स्तोमा॑सः । पु॒रु॒ऽद॒स्मम् । अ॒र्काः । भग॑स्यऽइव । का॒रिणः॑ । याम॑नि । ग्म॒न् ।
उ॒रु॒ऽक्र॒मः । क॒कु॒हः । यस्य॑ । पू॒र्वीः । न । म॒र्ध॒न्ति॒ । यु॒व॒तयः॑ । जनि॑त्रीः ॥
Padapatha Devanagari Nonaccented
विष्णुम् । स्तोमासः । पुरुऽदस्मम् । अर्काः । भगस्यऽइव । कारिणः । यामनि । ग्मन् ।
उरुऽक्रमः । ककुहः । यस्य । पूर्वीः । न । मर्धन्ति । युवतयः । जनित्रीः ॥
Padapatha Transcription Accented
víṣṇum ǀ stómāsaḥ ǀ puru-dasmám ǀ arkā́ḥ ǀ bhágasya-iva ǀ kāríṇaḥ ǀ yā́mani ǀ gman ǀ
uru-kramáḥ ǀ kakuháḥ ǀ yásya ǀ pūrvī́ḥ ǀ ná ǀ mardhanti ǀ yuvatáyaḥ ǀ jánitrīḥ ǁ
Padapatha Transcription Nonaccented
viṣṇum ǀ stomāsaḥ ǀ puru-dasmam ǀ arkāḥ ǀ bhagasya-iva ǀ kāriṇaḥ ǀ yāmani ǀ gman ǀ
uru-kramaḥ ǀ kakuhaḥ ǀ yasya ǀ pūrvīḥ ǀ na ǀ mardhanti ǀ yuvatayaḥ ǀ janitrīḥ ǁ
03.054.15 (Mandala. Sukta. Rik)
3.3.26.05 (Ashtaka. Adhyaya. Varga. Rik)
03.05.015 (Mandala. Anuvāka. Rik)
Samhita Devanagari Accented
इंद्रो॒ विश्वै॑र्वी॒र्यैः॒३॒॑ पत्य॑मान उ॒भे आ प॑प्रौ॒ रोद॑सी महि॒त्वा ।
पु॒रं॒द॒रो वृ॑त्र॒हा धृ॒ष्णुषे॑णः सं॒गृभ्या॑ न॒ आ भ॑रा॒ भूरि॑ प॒श्वः ॥
Samhita Devanagari Nonaccented
इंद्रो विश्वैर्वीर्यैः पत्यमान उभे आ पप्रौ रोदसी महित्वा ।
पुरंदरो वृत्रहा धृष्णुषेणः संगृभ्या न आ भरा भूरि पश्वः ॥
Samhita Transcription Accented
índro víśvairvīryáiḥ pátyamāna ubhé ā́ paprau ródasī mahitvā́ ǀ
puraṃdaró vṛtrahā́ dhṛṣṇúṣeṇaḥ saṃgṛ́bhyā na ā́ bharā bhū́ri paśváḥ ǁ
Samhita Transcription Nonaccented
indro viśvairvīryaiḥ patyamāna ubhe ā paprau rodasī mahitvā ǀ
puraṃdaro vṛtrahā dhṛṣṇuṣeṇaḥ saṃgṛbhyā na ā bharā bhūri paśvaḥ ǁ
Padapatha Devanagari Accented
इन्द्रः॑ । विश्वैः॑ । वी॒र्यैः॑ । पत्य॑मानः । उ॒भे इति॑ । आ । प॒प्रौ॒ । रोद॑सी॒ इति॑ । म॒हि॒ऽत्वा ।
पु॒र॒म्ऽद॒रः । वृ॒त्र॒ऽहा । धृ॒ष्णुऽसे॑णः । स॒म्ऽगृभ्य॑ । नः॒ । आ । भ॒र॒ । भूरि॑ । प॒श्वः ॥
Padapatha Devanagari Nonaccented
इन्द्रः । विश्वैः । वीर्यैः । पत्यमानः । उभे इति । आ । पप्रौ । रोदसी इति । महिऽत्वा ।
पुरम्ऽदरः । वृत्रऽहा । धृष्णुऽसेणः । सम्ऽगृभ्य । नः । आ । भर । भूरि । पश्वः ॥
Padapatha Transcription Accented
índraḥ ǀ víśvaiḥ ǀ vīryáiḥ ǀ pátyamānaḥ ǀ ubhé íti ǀ ā́ ǀ paprau ǀ ródasī íti ǀ mahi-tvā́ ǀ
puram-daráḥ ǀ vṛtra-hā́ ǀ dhṛṣṇú-seṇaḥ ǀ sam-gṛ́bhya ǀ naḥ ǀ ā́ ǀ bhara ǀ bhū́ri ǀ paśváḥ ǁ
Padapatha Transcription Nonaccented
indraḥ ǀ viśvaiḥ ǀ vīryaiḥ ǀ patyamānaḥ ǀ ubhe iti ǀ ā ǀ paprau ǀ rodasī iti ǀ mahi-tvā ǀ
puram-daraḥ ǀ vṛtra-hā ǀ dhṛṣṇu-seṇaḥ ǀ sam-gṛbhya ǀ naḥ ǀ ā ǀ bhara ǀ bhūri ǀ paśvaḥ ǁ
03.054.16 (Mandala. Sukta. Rik)
3.3.27.01 (Ashtaka. Adhyaya. Varga. Rik)
03.05.016 (Mandala. Anuvāka. Rik)
Samhita Devanagari Accented
नास॑त्या मे पि॒तरा॑ बंधु॒पृच्छा॑ सजा॒त्य॑म॒श्विनो॒श्चारु॒ नाम॑ ।
यु॒वं हि स्थो र॑यि॒दौ नो॑ रयी॒णां दा॒त्रं र॑क्षेथे॒ अक॑वै॒रद॑ब्धा ॥
Samhita Devanagari Nonaccented
नासत्या मे पितरा बंधुपृच्छा सजात्यमश्विनोश्चारु नाम ।
युवं हि स्थो रयिदौ नो रयीणां दात्रं रक्षेथे अकवैरदब्धा ॥
Samhita Transcription Accented
nā́satyā me pitárā bandhupṛ́cchā sajātyámaśvínoścā́ru nā́ma ǀ
yuvám hí sthó rayidáu no rayīṇā́m dātrám rakṣethe ákavairádabdhā ǁ
Samhita Transcription Nonaccented
nāsatyā me pitarā bandhupṛcchā sajātyamaśvinoścāru nāma ǀ
yuvam hi stho rayidau no rayīṇām dātram rakṣethe akavairadabdhā ǁ
Padapatha Devanagari Accented
नास॑त्या । मे॒ । पि॒तरा॑ । ब॒न्धु॒ऽपृच्छा॑ । स॒ऽजा॒त्य॑म् । अ॒श्विनोः॑ । चारु॑ । नाम॑ ।
यु॒वम् । हि । स्थः । र॒यि॒ऽदौ । नः॒ । र॒यी॒णाम् । दा॒त्रम् । र॒क्षे॒थे॒ इति॑ । अक॑वैः । अद॑ब्धा ॥
Padapatha Devanagari Nonaccented
नासत्या । मे । पितरा । बन्धुऽपृच्छा । सऽजात्यम् । अश्विनोः । चारु । नाम ।
युवम् । हि । स्थः । रयिऽदौ । नः । रयीणाम् । दात्रम् । रक्षेथे इति । अकवैः । अदब्धा ॥
Padapatha Transcription Accented
nā́satyā ǀ me ǀ pitárā ǀ bandhu-pṛ́cchā ǀ sa-jātyám ǀ aśvínoḥ ǀ cā́ru ǀ nā́ma ǀ
yuvám ǀ hí ǀ stháḥ ǀ rayi-dáu ǀ naḥ ǀ rayīṇā́m ǀ dātrám ǀ rakṣethe íti ǀ ákavaiḥ ǀ ádabdhā ǁ
Padapatha Transcription Nonaccented
nāsatyā ǀ me ǀ pitarā ǀ bandhu-pṛcchā ǀ sa-jātyam ǀ aśvinoḥ ǀ cāru ǀ nāma ǀ
yuvam ǀ hi ǀ sthaḥ ǀ rayi-dau ǀ naḥ ǀ rayīṇām ǀ dātram ǀ rakṣethe iti ǀ akavaiḥ ǀ adabdhā ǁ
03.054.17 (Mandala. Sukta. Rik)
3.3.27.02 (Ashtaka. Adhyaya. Varga. Rik)
03.05.017 (Mandala. Anuvāka. Rik)
Samhita Devanagari Accented
म॒हत्तद्वः॑ कवय॒श्चारु॒ नाम॒ यद्ध॑ देवा॒ भव॑थ॒ विश्व॒ इंद्रे॑ ।
सख॑ ऋ॒भुभिः॑ पुरुहूत प्रि॒येभि॑रि॒मां धियं॑ सा॒तये॑ तक्षता नः ॥
Samhita Devanagari Nonaccented
महत्तद्वः कवयश्चारु नाम यद्ध देवा भवथ विश्व इंद्रे ।
सख ऋभुभिः पुरुहूत प्रियेभिरिमां धियं सातये तक्षता नः ॥
Samhita Transcription Accented
maháttádvaḥ kavayaścā́ru nā́ma yáddha devā bhávatha víśva índre ǀ
sákha ṛbhúbhiḥ puruhūta priyébhirimā́m dhíyam sātáye takṣatā naḥ ǁ
Samhita Transcription Nonaccented
mahattadvaḥ kavayaścāru nāma yaddha devā bhavatha viśva indre ǀ
sakha ṛbhubhiḥ puruhūta priyebhirimām dhiyam sātaye takṣatā naḥ ǁ
Padapatha Devanagari Accented
म॒हत् । तत् । वः॒ । क॒व॒यः॒ । चारु॑ । नाम॑ । यत् । ह॒ । दे॒वाः॒ । भव॑थ । विश्वे॑ । इन्द्रे॑ ।
सखा॑ । ऋ॒भुऽभिः॑ । पु॒रु॒ऽहू॒त॒ । प्रि॒येभिः॑ । इ॒माम् । धिय॑म् । सा॒तये॑ । त॒क्ष॒त॒ । नः॒ ॥
Padapatha Devanagari Nonaccented
महत् । तत् । वः । कवयः । चारु । नाम । यत् । ह । देवाः । भवथ । विश्वे । इन्द्रे ।
सखा । ऋभुऽभिः । पुरुऽहूत । प्रियेभिः । इमाम् । धियम् । सातये । तक्षत । नः ॥
Padapatha Transcription Accented
mahát ǀ tát ǀ vaḥ ǀ kavayaḥ ǀ cā́ru ǀ nā́ma ǀ yát ǀ ha ǀ devāḥ ǀ bhávatha ǀ víśve ǀ índre ǀ
sákhā ǀ ṛbhú-bhiḥ ǀ puru-hūta ǀ priyébhiḥ ǀ imā́m ǀ dhíyam ǀ sātáye ǀ takṣata ǀ naḥ ǁ
Padapatha Transcription Nonaccented
mahat ǀ tat ǀ vaḥ ǀ kavayaḥ ǀ cāru ǀ nāma ǀ yat ǀ ha ǀ devāḥ ǀ bhavatha ǀ viśve ǀ indre ǀ
sakhā ǀ ṛbhu-bhiḥ ǀ puru-hūta ǀ priyebhiḥ ǀ imām ǀ dhiyam ǀ sātaye ǀ takṣata ǀ naḥ ǁ
03.054.18 (Mandala. Sukta. Rik)
3.3.27.03 (Ashtaka. Adhyaya. Varga. Rik)
03.05.018 (Mandala. Anuvāka. Rik)
Samhita Devanagari Accented
अ॒र्य॒मा णो॒ अदि॑तिर्य॒ज्ञिया॒सोऽद॑ब्धानि॒ वरु॑णस्य व्र॒तानि॑ ।
यु॒योत॑ नो अनप॒त्यानि॒ गंतोः॑ प्र॒जावा॑न्नः पशु॒माँ अ॑स्तु गा॒तुः ॥
Samhita Devanagari Nonaccented
अर्यमा णो अदितिर्यज्ञियासोऽदब्धानि वरुणस्य व्रतानि ।
युयोत नो अनपत्यानि गंतोः प्रजावान्नः पशुमाँ अस्तु गातुः ॥
Samhita Transcription Accented
aryamā́ ṇo áditiryajñíyāsó’dabdhāni váruṇasya vratā́ni ǀ
yuyóta no anapatyā́ni gántoḥ prajā́vānnaḥ paśumā́m̐ astu gātúḥ ǁ
Samhita Transcription Nonaccented
aryamā ṇo aditiryajñiyāso’dabdhāni varuṇasya vratāni ǀ
yuyota no anapatyāni gantoḥ prajāvānnaḥ paśumām̐ astu gātuḥ ǁ
Padapatha Devanagari Accented
अ॒र्य॒मा । नः॒ । अदि॑तिः । य॒ज्ञिया॑सः । अद॑ब्धानि । वरु॑णस्य । व्र॒तानि॑ ।
यु॒योत॑ । नः॒ । अ॒न॒प॒त्यानि॑ । गन्तोः॑ । प्र॒जाऽवा॑न् । नः॒ । प॒शु॒ऽमान् । अ॒स्तु॒ । गा॒तुः ॥
Padapatha Devanagari Nonaccented
अर्यमा । नः । अदितिः । यज्ञियासः । अदब्धानि । वरुणस्य । व्रतानि ।
युयोत । नः । अनपत्यानि । गन्तोः । प्रजाऽवान् । नः । पशुऽमान् । अस्तु । गातुः ॥
Padapatha Transcription Accented
aryamā́ ǀ naḥ ǀ áditiḥ ǀ yajñíyāsaḥ ǀ ádabdhāni ǀ váruṇasya ǀ vratā́ni ǀ
yuyóta ǀ naḥ ǀ anapatyā́ni ǀ gántoḥ ǀ prajā́-vān ǀ naḥ ǀ paśu-mā́n ǀ astu ǀ gātúḥ ǁ
Padapatha Transcription Nonaccented
aryamā ǀ naḥ ǀ aditiḥ ǀ yajñiyāsaḥ ǀ adabdhāni ǀ varuṇasya ǀ vratāni ǀ
yuyota ǀ naḥ ǀ anapatyāni ǀ gantoḥ ǀ prajā-vān ǀ naḥ ǀ paśu-mān ǀ astu ǀ gātuḥ ǁ
03.054.19 (Mandala. Sukta. Rik)
3.3.27.04 (Ashtaka. Adhyaya. Varga. Rik)
03.05.019 (Mandala. Anuvāka. Rik)
Samhita Devanagari Accented
दे॒वानां॑ दू॒तः पु॑रु॒ध प्रसू॒तोऽना॑गान्नो वोचतु स॒र्वता॑ता ।
शृ॒णोतु॑ नः पृथि॒वी द्यौरु॒तापः॒ सूर्यो॒ नक्ष॑त्रैरु॒र्वं१॒॑तरि॑क्षं ॥
Samhita Devanagari Nonaccented
देवानां दूतः पुरुध प्रसूतोऽनागान्नो वोचतु सर्वताता ।
शृणोतु नः पृथिवी द्यौरुतापः सूर्यो नक्षत्रैरुर्वंतरिक्षं ॥
Samhita Transcription Accented
devā́nām dūtáḥ purudhá prásūtó’nāgānno vocatu sarvátātā ǀ
śṛṇótu naḥ pṛthivī́ dyáurutā́paḥ sū́ryo nákṣatrairurvántárikṣam ǁ
Samhita Transcription Nonaccented
devānām dūtaḥ purudha prasūto’nāgānno vocatu sarvatātā ǀ
śṛṇotu naḥ pṛthivī dyaurutāpaḥ sūryo nakṣatrairurvantarikṣam ǁ
Padapatha Devanagari Accented
दे॒वाना॑म् । दू॒तः । पु॒रु॒ध । प्रऽसू॑तः । अना॑गान् । नः॒ । वो॒च॒तु॒ । स॒र्वऽता॑ता ।
शृ॒णोतु॑ । नः॒ । पृ॒थि॒वी । द्यौः । उ॒त । आपः॑ । सूर्यः॑ । नक्ष॑त्रैः । उ॒रु । अ॒न्तरि॑क्षम् ॥
Padapatha Devanagari Nonaccented
देवानाम् । दूतः । पुरुध । प्रऽसूतः । अनागान् । नः । वोचतु । सर्वऽताता ।
शृणोतु । नः । पृथिवी । द्यौः । उत । आपः । सूर्यः । नक्षत्रैः । उरु । अन्तरिक्षम् ॥
Padapatha Transcription Accented
devā́nām ǀ dūtáḥ ǀ purudhá ǀ prá-sūtaḥ ǀ ánāgān ǀ naḥ ǀ vocatu ǀ sarvá-tātā ǀ
śṛṇótu ǀ naḥ ǀ pṛthivī́ ǀ dyáuḥ ǀ utá ǀ ā́paḥ ǀ sū́ryaḥ ǀ nákṣatraiḥ ǀ urú ǀ antárikṣam ǁ
Padapatha Transcription Nonaccented
devānām ǀ dūtaḥ ǀ purudha ǀ pra-sūtaḥ ǀ anāgān ǀ naḥ ǀ vocatu ǀ sarva-tātā ǀ
śṛṇotu ǀ naḥ ǀ pṛthivī ǀ dyauḥ ǀ uta ǀ āpaḥ ǀ sūryaḥ ǀ nakṣatraiḥ ǀ uru ǀ antarikṣam ǁ
03.054.20 (Mandala. Sukta. Rik)
3.3.27.05 (Ashtaka. Adhyaya. Varga. Rik)
03.05.020 (Mandala. Anuvāka. Rik)
Samhita Devanagari Accented
शृ॒ण्वंतु॑ नो॒ वृष॑णः॒ पर्व॑तासो ध्रु॒वक्षे॑मास॒ इळ॑या॒ मदं॑तः ।
आ॒दि॒त्यैर्नो॒ अदि॑तिः शृणोतु॒ यच्छं॑तु नो म॒रुतः॒ शर्म॑ भ॒द्रं ॥
Samhita Devanagari Nonaccented
शृण्वंतु नो वृषणः पर्वतासो ध्रुवक्षेमास इळया मदंतः ।
आदित्यैर्नो अदितिः शृणोतु यच्छंतु नो मरुतः शर्म भद्रं ॥
Samhita Transcription Accented
śṛṇvántu no vṛ́ṣaṇaḥ párvatāso dhruvákṣemāsa íḷayā mádantaḥ ǀ
ādityáirno áditiḥ śṛṇotu yácchantu no marútaḥ śárma bhadrám ǁ
Samhita Transcription Nonaccented
śṛṇvantu no vṛṣaṇaḥ parvatāso dhruvakṣemāsa iḷayā madantaḥ ǀ
ādityairno aditiḥ śṛṇotu yacchantu no marutaḥ śarma bhadram ǁ
Padapatha Devanagari Accented
शृ॒ण्वन्तु॑ । नः॒ । वृष॑णः । पर्व॑तासः । ध्रु॒वऽक्षे॑मासः । इळ॑या । मद॑न्तः ।
आ॒दि॒त्यैः । नः॒ । अदि॑तिः । शृ॒णो॒तु॒ । यच्छ॑न्तु । नः॒ । म॒रुतः॑ । शर्म॑ । भ॒द्रम् ॥
Padapatha Devanagari Nonaccented
शृण्वन्तु । नः । वृषणः । पर्वतासः । ध्रुवऽक्षेमासः । इळया । मदन्तः ।
आदित्यैः । नः । अदितिः । शृणोतु । यच्छन्तु । नः । मरुतः । शर्म । भद्रम् ॥
Padapatha Transcription Accented
śṛṇvántu ǀ naḥ ǀ vṛ́ṣaṇaḥ ǀ párvatāsaḥ ǀ dhruvá-kṣemāsaḥ ǀ íḷayā ǀ mádantaḥ ǀ
ādityáiḥ ǀ naḥ ǀ áditiḥ ǀ śṛṇotu ǀ yácchantu ǀ naḥ ǀ marútaḥ ǀ śárma ǀ bhadrám ǁ
Padapatha Transcription Nonaccented
śṛṇvantu ǀ naḥ ǀ vṛṣaṇaḥ ǀ parvatāsaḥ ǀ dhruva-kṣemāsaḥ ǀ iḷayā ǀ madantaḥ ǀ
ādityaiḥ ǀ naḥ ǀ aditiḥ ǀ śṛṇotu ǀ yacchantu ǀ naḥ ǀ marutaḥ ǀ śarma ǀ bhadram ǁ
03.054.21 (Mandala. Sukta. Rik)
3.3.27.06 (Ashtaka. Adhyaya. Varga. Rik)
03.05.021 (Mandala. Anuvāka. Rik)
Samhita Devanagari Accented
सदा॑ सु॒गः पि॑तु॒माँ अ॑स्तु॒ पंथा॒ मध्वा॑ देवा॒ ओष॑धीः॒ सं पि॑पृक्त ।
भगो॑ मे अग्ने स॒ख्ये न मृ॑ध्या॒ उद्रा॒यो अ॑श्यां॒ सद॑नं पुरु॒क्षोः ॥
Samhita Devanagari Nonaccented
सदा सुगः पितुमाँ अस्तु पंथा मध्वा देवा ओषधीः सं पिपृक्त ।
भगो मे अग्ने सख्ये न मृध्या उद्रायो अश्यां सदनं पुरुक्षोः ॥
Samhita Transcription Accented
sádā sugáḥ pitumā́m̐ astu pánthā mádhvā devā óṣadhīḥ sám pipṛkta ǀ
bhágo me agne sakhyé ná mṛdhyā údrāyó aśyām sádanam purukṣóḥ ǁ
Samhita Transcription Nonaccented
sadā sugaḥ pitumām̐ astu panthā madhvā devā oṣadhīḥ sam pipṛkta ǀ
bhago me agne sakhye na mṛdhyā udrāyo aśyām sadanam purukṣoḥ ǁ
Padapatha Devanagari Accented
सदा॑ । सु॒ऽगः । पि॒तु॒ऽमान् । अ॒स्तु॒ । पन्थाः॑ । मध्वा॑ । दे॒वाः॒ । ओष॑धीः । सम् । पि॒पृ॒क्त॒ ।
भगः॑ । मे॒ । अ॒ग्ने॒ । स॒ख्ये । न । मृ॒ध्याः॒ । उत् । रा॒यः । अ॒श्या॒म् । सद॑नम् । पु॒रु॒ऽक्षोः ॥
Padapatha Devanagari Nonaccented
सदा । सुऽगः । पितुऽमान् । अस्तु । पन्थाः । मध्वा । देवाः । ओषधीः । सम् । पिपृक्त ।
भगः । मे । अग्ने । सख्ये । न । मृध्याः । उत् । रायः । अश्याम् । सदनम् । पुरुऽक्षोः ॥
Padapatha Transcription Accented
sádā ǀ su-gáḥ ǀ pitu-mā́n ǀ astu ǀ pánthāḥ ǀ mádhvā ǀ devāḥ ǀ óṣadhīḥ ǀ sám ǀ pipṛkta ǀ
bhágaḥ ǀ me ǀ agne ǀ sakhyé ǀ ná ǀ mṛdhyāḥ ǀ út ǀ rāyáḥ ǀ aśyām ǀ sádanam ǀ puru-kṣóḥ ǁ
Padapatha Transcription Nonaccented
sadā ǀ su-gaḥ ǀ pitu-mān ǀ astu ǀ panthāḥ ǀ madhvā ǀ devāḥ ǀ oṣadhīḥ ǀ sam ǀ pipṛkta ǀ
bhagaḥ ǀ me ǀ agne ǀ sakhye ǀ na ǀ mṛdhyāḥ ǀ ut ǀ rāyaḥ ǀ aśyām ǀ sadanam ǀ puru-kṣoḥ ǁ
03.054.22 (Mandala. Sukta. Rik)
3.3.27.07 (Ashtaka. Adhyaya. Varga. Rik)
03.05.022 (Mandala. Anuvāka. Rik)
Samhita Devanagari Accented
स्वद॑स्व ह॒व्या समिषो॑ दिदीह्यस्म॒द्र्य१॒॑क्सं मि॑मीहि॒ श्रवां॑सि ।
विश्वाँ॑ अग्ने पृ॒त्सु तांजे॑षि॒ शत्रू॒नहा॒ विश्वा॑ सु॒मना॑ दीदिही नः ॥
Samhita Devanagari Nonaccented
स्वदस्व हव्या समिषो दिदीह्यस्मद्र्यक्सं मिमीहि श्रवांसि ।
विश्वाँ अग्ने पृत्सु तांजेषि शत्रूनहा विश्वा सुमना दीदिही नः ॥
Samhita Transcription Accented
svádasva havyā́ sámíṣo didīhyasmadryáksám mimīhi śrávāṃsi ǀ
víśvām̐ agne pṛtsú tā́ñjeṣi śátrūnáhā víśvā sumánā dīdihī naḥ ǁ
Samhita Transcription Nonaccented
svadasva havyā samiṣo didīhyasmadryaksam mimīhi śravāṃsi ǀ
viśvām̐ agne pṛtsu tāñjeṣi śatrūnahā viśvā sumanā dīdihī naḥ ǁ
Padapatha Devanagari Accented
स्वद॑स्व । ह॒व्या । सम् । इषः॑ । दि॒दी॒हि॒ । अ॒स्म॒द्र्य॑क् । सम् । मि॒मी॒हि॒ । श्रवां॑सि ।
विश्वा॑न् । अ॒ग्ने॒ । पृ॒त्ऽसु । तान् । जे॒षि॒ । शत्रू॑न् । अहा॑ । विश्वा॑ । सु॒ऽमनाः॑ । दी॒दि॒हि॒ । नः॒ ॥
Padapatha Devanagari Nonaccented
स्वदस्व । हव्या । सम् । इषः । दिदीहि । अस्मद्र्यक् । सम् । मिमीहि । श्रवांसि ।
विश्वान् । अग्ने । पृत्ऽसु । तान् । जेषि । शत्रून् । अहा । विश्वा । सुऽमनाः । दीदिहि । नः ॥
Padapatha Transcription Accented
svádasva ǀ havyā́ ǀ sám ǀ íṣaḥ ǀ didīhi ǀ asmadryák ǀ sám ǀ mimīhi ǀ śrávāṃsi ǀ
víśvān ǀ agne ǀ pṛt-sú ǀ tā́n ǀ jeṣi ǀ śátrūn ǀ áhā ǀ víśvā ǀ su-mánāḥ ǀ dīdihi ǀ naḥ ǁ
Padapatha Transcription Nonaccented
svadasva ǀ havyā ǀ sam ǀ iṣaḥ ǀ didīhi ǀ asmadryak ǀ sam ǀ mimīhi ǀ śravāṃsi ǀ
viśvān ǀ agne ǀ pṛt-su ǀ tān ǀ jeṣi ǀ śatrūn ǀ ahā ǀ viśvā ǀ su-manāḥ ǀ dīdihi ǀ naḥ ǁ