|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 3
Sūkta 58
|
1. Info |
| To: | aśvins | |
| From: | viśvāmitra gāthina | |
| Metres: | 1st set of styles: nicṛttriṣṭup (2-5, 7); triṣṭup (1, 8, 9); bhurikpaṅkti (6) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
03.058.01 (Mandala. Sukta. Rik)
3.4.03.01 (Ashtaka. Adhyaya. Varga. Rik)
03.05.059 (Mandala. Anuvāka. Rik)
Samhita Devanagari Accented
धे॒नुः प्र॒त्नस्य॒ काम्यं॒ दुहा॑नां॒तः पु॒त्रश्च॑रति॒ दक्षि॑णायाः ।
आ द्यो॑त॒निं व॑हति शु॒भ्रया॑मो॒षसः॒ स्तोमो॑ अ॒श्विना॑वजीगः ॥
Samhita Devanagari Nonaccented
धेनुः प्रत्नस्य काम्यं दुहानांतः पुत्रश्चरति दक्षिणायाः ।
आ द्योतनिं वहति शुभ्रयामोषसः स्तोमो अश्विनावजीगः ॥
Samhita Transcription Accented
dhenúḥ pratnásya kā́myam dúhānāntáḥ putráścarati dákṣiṇāyāḥ ǀ
ā́ dyotaním vahati śubhráyāmoṣásaḥ stómo aśvínāvajīgaḥ ǁ
Samhita Transcription Nonaccented
dhenuḥ pratnasya kāmyam duhānāntaḥ putraścarati dakṣiṇāyāḥ ǀ
ā dyotanim vahati śubhrayāmoṣasaḥ stomo aśvināvajīgaḥ ǁ
Padapatha Devanagari Accented
धे॒नुः । प्र॒त्नस्य॑ । काम्य॑म् । दुहा॑ना । अ॒न्तरिति॑ । पु॒त्रः । च॒र॒ति॒ । दक्षि॑णायाः ।
आ । द्यो॒त॒निम् । व॒ह॒ति॒ । शु॒भ्रऽया॑मा । उ॒षसः॑ । स्तोमः॑ । अ॒श्विनौ॑ । अ॒जी॒ग॒रिति॑ ॥
Padapatha Devanagari Nonaccented
धेनुः । प्रत्नस्य । काम्यम् । दुहाना । अन्तरिति । पुत्रः । चरति । दक्षिणायाः ।
आ । द्योतनिम् । वहति । शुभ्रऽयामा । उषसः । स्तोमः । अश्विनौ । अजीगरिति ॥
Padapatha Transcription Accented
dhenúḥ ǀ pratnásya ǀ kā́myam ǀ dúhānā ǀ antáríti ǀ putráḥ ǀ carati ǀ dákṣiṇāyāḥ ǀ
ā́ ǀ dyotaním ǀ vahati ǀ śubhrá-yāmā ǀ uṣásaḥ ǀ stómaḥ ǀ aśvínau ǀ ajīgaríti ǁ
Padapatha Transcription Nonaccented
dhenuḥ ǀ pratnasya ǀ kāmyam ǀ duhānā ǀ antariti ǀ putraḥ ǀ carati ǀ dakṣiṇāyāḥ ǀ
ā ǀ dyotanim ǀ vahati ǀ śubhra-yāmā ǀ uṣasaḥ ǀ stomaḥ ǀ aśvinau ǀ ajīgariti ǁ
03.058.02 (Mandala. Sukta. Rik)
3.4.03.02 (Ashtaka. Adhyaya. Varga. Rik)
03.05.060 (Mandala. Anuvāka. Rik)
Samhita Devanagari Accented
सु॒युग्व॑हंति॒ प्रति॑ वामृ॒तेनो॒र्ध्वा भ॑वंति पि॒तरे॑व॒ मेधाः॑ ।
जरे॑थाम॒स्मद्वि प॒णेर्म॑नी॒षां यु॒वोरव॑श्चकृ॒मा या॑तम॒र्वाक् ॥
Samhita Devanagari Nonaccented
सुयुग्वहंति प्रति वामृतेनोर्ध्वा भवंति पितरेव मेधाः ।
जरेथामस्मद्वि पणेर्मनीषां युवोरवश्चकृमा यातमर्वाक् ॥
Samhita Transcription Accented
suyúgvahanti práti vāmṛténordhvā́ bhavanti pitáreva médhāḥ ǀ
járethāmasmádví paṇérmanīṣā́m yuvórávaścakṛmā́ yātamarvā́k ǁ
Samhita Transcription Nonaccented
suyugvahanti prati vāmṛtenordhvā bhavanti pitareva medhāḥ ǀ
jarethāmasmadvi paṇermanīṣām yuvoravaścakṛmā yātamarvāk ǁ
Padapatha Devanagari Accented
सु॒ऽयुक् । व॒ह॒न्ति॒ । प्रति॑ । वा॒म् । ऋ॒तेन॑ । ऊ॒र्ध्वाः । भ॒व॒न्ति॒ । पि॒तरा॑ऽइव । मेधाः॑ ।
जरे॑थाम् । अ॒स्मत् । वि । प॒णेः । म॒नी॒षाम् । यु॒वोः । अवः॑ । च॒कृ॒म॒ । आ । या॒त॒म् । अ॒र्वाक् ॥
Padapatha Devanagari Nonaccented
सुऽयुक् । वहन्ति । प्रति । वाम् । ऋतेन । ऊर्ध्वाः । भवन्ति । पितराऽइव । मेधाः ।
जरेथाम् । अस्मत् । वि । पणेः । मनीषाम् । युवोः । अवः । चकृम । आ । यातम् । अर्वाक् ॥
Padapatha Transcription Accented
su-yúk ǀ vahanti ǀ práti ǀ vām ǀ ṛténa ǀ ūrdhvā́ḥ ǀ bhavanti ǀ pitárā-iva ǀ médhāḥ ǀ
járethām ǀ asmát ǀ ví ǀ paṇéḥ ǀ manīṣā́m ǀ yuvóḥ ǀ ávaḥ ǀ cakṛma ǀ ā́ ǀ yātam ǀ arvā́k ǁ
Padapatha Transcription Nonaccented
su-yuk ǀ vahanti ǀ prati ǀ vām ǀ ṛtena ǀ ūrdhvāḥ ǀ bhavanti ǀ pitarā-iva ǀ medhāḥ ǀ
jarethām ǀ asmat ǀ vi ǀ paṇeḥ ǀ manīṣām ǀ yuvoḥ ǀ avaḥ ǀ cakṛma ǀ ā ǀ yātam ǀ arvāk ǁ
03.058.03 (Mandala. Sukta. Rik)
3.4.03.03 (Ashtaka. Adhyaya. Varga. Rik)
03.05.061 (Mandala. Anuvāka. Rik)
Samhita Devanagari Accented
सु॒युग्भि॒रश्वैः॑ सु॒वृता॒ रथे॑न॒ दस्रा॑वि॒मं शृ॑णुतं॒ श्लोक॒मद्रेः॑ ।
किमं॒ग वां॒ प्रत्यव॑र्तिं॒ गमि॑ष्ठा॒हुर्विप्रा॑सो अश्विना पुरा॒जाः ॥
Samhita Devanagari Nonaccented
सुयुग्भिरश्वैः सुवृता रथेन दस्राविमं शृणुतं श्लोकमद्रेः ।
किमंग वां प्रत्यवर्तिं गमिष्ठाहुर्विप्रासो अश्विना पुराजाः ॥
Samhita Transcription Accented
suyúgbhiráśvaiḥ suvṛ́tā ráthena dásrāvimám śṛṇutam ślókamádreḥ ǀ
kímaṅgá vām prátyávartim gámiṣṭhāhúrvíprāso aśvinā purājā́ḥ ǁ
Samhita Transcription Nonaccented
suyugbhiraśvaiḥ suvṛtā rathena dasrāvimam śṛṇutam ślokamadreḥ ǀ
kimaṅga vām pratyavartim gamiṣṭhāhurviprāso aśvinā purājāḥ ǁ
Padapatha Devanagari Accented
सु॒युक्ऽभिः॑ । अश्वैः॑ । सु॒ऽवृता॑ । रथे॑न । दस्रौ॑ । इ॒मम् । शृ॒णु॒त॒म् । श्लोक॑म् । अद्रेः॑ ।
किम् । अ॒ङ्ग । वा॒म् । प्रति॑ । अव॑र्तिम् । गमि॑ष्ठा । आ॒हुः । विप्रा॑सः । अ॒श्वि॒ना॒ । पु॒रा॒ऽजाः ॥
Padapatha Devanagari Nonaccented
सुयुक्ऽभिः । अश्वैः । सुऽवृता । रथेन । दस्रौ । इमम् । शृणुतम् । श्लोकम् । अद्रेः ।
किम् । अङ्ग । वाम् । प्रति । अवर्तिम् । गमिष्ठा । आहुः । विप्रासः । अश्विना । पुराऽजाः ॥
Padapatha Transcription Accented
suyúk-bhiḥ ǀ áśvaiḥ ǀ su-vṛ́tā ǀ ráthena ǀ dásrau ǀ imám ǀ śṛṇutam ǀ ślókam ǀ ádreḥ ǀ
kím ǀ aṅgá ǀ vām ǀ práti ǀ ávartim ǀ gámiṣṭhā ǀ āhúḥ ǀ víprāsaḥ ǀ aśvinā ǀ purā-jā́ḥ ǁ
Padapatha Transcription Nonaccented
suyuk-bhiḥ ǀ aśvaiḥ ǀ su-vṛtā ǀ rathena ǀ dasrau ǀ imam ǀ śṛṇutam ǀ ślokam ǀ adreḥ ǀ
kim ǀ aṅga ǀ vām ǀ prati ǀ avartim ǀ gamiṣṭhā ǀ āhuḥ ǀ viprāsaḥ ǀ aśvinā ǀ purā-jāḥ ǁ
03.058.04 (Mandala. Sukta. Rik)
3.4.03.04 (Ashtaka. Adhyaya. Varga. Rik)
03.05.062 (Mandala. Anuvāka. Rik)
Samhita Devanagari Accented
आ म॑न्येथा॒मा ग॑तं॒ कच्चि॒देवै॒र्विश्वे॒ जना॑सो अ॒श्विना॑ हवंते ।
इ॒मा हि वां॒ गोऋ॑जीका॒ मधू॑नि॒ प्र मि॒त्रासो॒ न द॒दुरु॒स्रो अग्रे॑ ॥
Samhita Devanagari Nonaccented
आ मन्येथामा गतं कच्चिदेवैर्विश्वे जनासो अश्विना हवंते ।
इमा हि वां गोऋजीका मधूनि प्र मित्रासो न ददुरुस्रो अग्रे ॥
Samhita Transcription Accented
ā́ manyethāmā́ gatam káccidévairvíśve jánāso aśvínā havante ǀ
imā́ hí vām góṛjīkā mádhūni prá mitrā́so ná dadúrusró ágre ǁ
Samhita Transcription Nonaccented
ā manyethāmā gatam kaccidevairviśve janāso aśvinā havante ǀ
imā hi vām goṛjīkā madhūni pra mitrāso na dadurusro agre ǁ
Padapatha Devanagari Accented
आ । म॒न्ये॒था॒म् । आ । ग॒त॒म् । कत् । चि॒त् । एवैः॑ । विश्वे॑ । जना॑सः । अ॒श्विना॑ । ह॒व॒न्ते॒ ।
इ॒मा । हि । वा॒म् । गोऽऋ॑जीका । मधू॑नि । प्र । मि॒त्रासः॑ । न । द॒दुः । उ॒स्रः । अग्रे॑ ॥
Padapatha Devanagari Nonaccented
आ । मन्येथाम् । आ । गतम् । कत् । चित् । एवैः । विश्वे । जनासः । अश्विना । हवन्ते ।
इमा । हि । वाम् । गोऽऋजीका । मधूनि । प्र । मित्रासः । न । ददुः । उस्रः । अग्रे ॥
Padapatha Transcription Accented
ā́ ǀ manyethām ǀ ā́ ǀ gatam ǀ kát ǀ cit ǀ évaiḥ ǀ víśve ǀ jánāsaḥ ǀ aśvínā ǀ havante ǀ
imā́ ǀ hí ǀ vām ǀ gó-ṛjīkā ǀ mádhūni ǀ prá ǀ mitrā́saḥ ǀ ná ǀ dadúḥ ǀ usráḥ ǀ ágre ǁ
Padapatha Transcription Nonaccented
ā ǀ manyethām ǀ ā ǀ gatam ǀ kat ǀ cit ǀ evaiḥ ǀ viśve ǀ janāsaḥ ǀ aśvinā ǀ havante ǀ
imā ǀ hi ǀ vām ǀ go-ṛjīkā ǀ madhūni ǀ pra ǀ mitrāsaḥ ǀ na ǀ daduḥ ǀ usraḥ ǀ agre ǁ
03.058.05 (Mandala. Sukta. Rik)
3.4.03.05 (Ashtaka. Adhyaya. Varga. Rik)
03.05.063 (Mandala. Anuvāka. Rik)
Samhita Devanagari Accented
ति॒रः पु॒रू चि॑दश्विना॒ रजां॑स्यांगू॒षो वां॑ मघवाना॒ जने॑षु ।
एह या॑तं प॒थिभि॑र्देव॒यानै॒र्दस्रा॑वि॒मे वां॑ नि॒धयो॒ मधू॑नां ॥
Samhita Devanagari Nonaccented
तिरः पुरू चिदश्विना रजांस्यांगूषो वां मघवाना जनेषु ।
एह यातं पथिभिर्देवयानैर्दस्राविमे वां निधयो मधूनां ॥
Samhita Transcription Accented
tiráḥ purū́ cidaśvinā rájāṃsyāṅgūṣó vām maghavānā jáneṣu ǀ
éhá yātam pathíbhirdevayā́nairdásrāvimé vām nidháyo mádhūnām ǁ
Samhita Transcription Nonaccented
tiraḥ purū cidaśvinā rajāṃsyāṅgūṣo vām maghavānā janeṣu ǀ
eha yātam pathibhirdevayānairdasrāvime vām nidhayo madhūnām ǁ
Padapatha Devanagari Accented
ति॒रः । पु॒रु । चि॒त् । अ॒श्वि॒ना॒ । रजां॑सि । आ॒ङ्गू॒षः । वा॒म् । म॒घ॒ऽवा॒ना॒ । जने॑षु ।
आ । इ॒ह । या॒त॒म् । प॒थिऽभिः॑ । दे॒व॒ऽयानैः॑ । दस्रौ॑ । इ॒मे । वा॒म् । नि॒ऽधयः॑ । मधू॑नाम् ॥
Padapatha Devanagari Nonaccented
तिरः । पुरु । चित् । अश्विना । रजांसि । आङ्गूषः । वाम् । मघऽवाना । जनेषु ।
आ । इह । यातम् । पथिऽभिः । देवऽयानैः । दस्रौ । इमे । वाम् । निऽधयः । मधूनाम् ॥
Padapatha Transcription Accented
tiráḥ ǀ purú ǀ cit ǀ aśvinā ǀ rájāṃsi ǀ āṅgūṣáḥ ǀ vām ǀ magha-vānā ǀ jáneṣu ǀ
ā́ ǀ ihá ǀ yātam ǀ pathí-bhiḥ ǀ deva-yā́naiḥ ǀ dásrau ǀ imé ǀ vām ǀ ni-dháyaḥ ǀ mádhūnām ǁ
Padapatha Transcription Nonaccented
tiraḥ ǀ puru ǀ cit ǀ aśvinā ǀ rajāṃsi ǀ āṅgūṣaḥ ǀ vām ǀ magha-vānā ǀ janeṣu ǀ
ā ǀ iha ǀ yātam ǀ pathi-bhiḥ ǀ deva-yānaiḥ ǀ dasrau ǀ ime ǀ vām ǀ ni-dhayaḥ ǀ madhūnām ǁ
03.058.06 (Mandala. Sukta. Rik)
3.4.04.01 (Ashtaka. Adhyaya. Varga. Rik)
03.05.064 (Mandala. Anuvāka. Rik)
Samhita Devanagari Accented
पु॒रा॒णमोकः॑ स॒ख्यं शि॒वं वां॑ यु॒वोर्न॑रा॒ द्रवि॑णं ज॒ह्नाव्यां॑ ।
पुनः॑ कृण्वा॒नाः स॒ख्या शि॒वानि॒ मध्वा॑ मदेम स॒ह नू स॑मा॒नाः ॥
Samhita Devanagari Nonaccented
पुराणमोकः सख्यं शिवं वां युवोर्नरा द्रविणं जह्नाव्यां ।
पुनः कृण्वानाः सख्या शिवानि मध्वा मदेम सह नू समानाः ॥
Samhita Transcription Accented
purāṇámókaḥ sakhyám śivám vām yuvórnarā dráviṇam jahnā́vyām ǀ
púnaḥ kṛṇvānā́ḥ sakhyā́ śivā́ni mádhvā madema sahá nū́ samānā́ḥ ǁ
Samhita Transcription Nonaccented
purāṇamokaḥ sakhyam śivam vām yuvornarā draviṇam jahnāvyām ǀ
punaḥ kṛṇvānāḥ sakhyā śivāni madhvā madema saha nū samānāḥ ǁ
Padapatha Devanagari Accented
पु॒रा॒णम् । ओकः॑ । स॒ख्यम् । शि॒वम् । वा॒म् । यु॒वोः । न॒रा॒ । द्रवि॑णम् । ज॒ह्नाव्या॑म् ।
पुन॒रिति॑ । कृ॒ण्वा॒नाः । स॒ख्या । शि॒वानि॑ । मध्वा॑ । म॒दे॒म॒ । स॒ह । नु । स॒मा॒नाः ॥
Padapatha Devanagari Nonaccented
पुराणम् । ओकः । सख्यम् । शिवम् । वाम् । युवोः । नरा । द्रविणम् । जह्नाव्याम् ।
पुनरिति । कृण्वानाः । सख्या । शिवानि । मध्वा । मदेम । सह । नु । समानाः ॥
Padapatha Transcription Accented
purāṇám ǀ ókaḥ ǀ sakhyám ǀ śivám ǀ vām ǀ yuvóḥ ǀ narā ǀ dráviṇam ǀ jahnā́vyām ǀ
púnaríti ǀ kṛṇvānā́ḥ ǀ sakhyā́ ǀ śivā́ni ǀ mádhvā ǀ madema ǀ sahá ǀ nú ǀ samānā́ḥ ǁ
Padapatha Transcription Nonaccented
purāṇam ǀ okaḥ ǀ sakhyam ǀ śivam ǀ vām ǀ yuvoḥ ǀ narā ǀ draviṇam ǀ jahnāvyām ǀ
punariti ǀ kṛṇvānāḥ ǀ sakhyā ǀ śivāni ǀ madhvā ǀ madema ǀ saha ǀ nu ǀ samānāḥ ǁ
03.058.07 (Mandala. Sukta. Rik)
3.4.04.02 (Ashtaka. Adhyaya. Varga. Rik)
03.05.065 (Mandala. Anuvāka. Rik)
Samhita Devanagari Accented
अश्वि॑ना वा॒युना॑ यु॒वं सु॑दक्षा नि॒युद्भि॑ष्च स॒जोष॑सा युवाना ।
नास॑त्या ति॒रोअ॑ह्न्यं जुषा॒णा सोमं॑ पिबतम॒स्रिधा॑ सुदानू ॥
Samhita Devanagari Nonaccented
अश्विना वायुना युवं सुदक्षा नियुद्भिष्च सजोषसा युवाना ।
नासत्या तिरोअह्न्यं जुषाणा सोमं पिबतमस्रिधा सुदानू ॥
Samhita Transcription Accented
áśvinā vāyúnā yuvám sudakṣā niyúdbhiśca sajóṣasā yuvānā ǀ
nā́satyā tiróahnyam juṣāṇā́ sómam pibatamasrídhā sudānū ǁ
Samhita Transcription Nonaccented
aśvinā vāyunā yuvam sudakṣā niyudbhiśca sajoṣasā yuvānā ǀ
nāsatyā tiroahnyam juṣāṇā somam pibatamasridhā sudānū ǁ
Padapatha Devanagari Accented
अश्वि॑ना । वा॒युना॑ । यु॒वम् । सु॒ऽद॒क्षा॒ । नि॒युत्ऽभिः॑ । च॒ । स॒ऽजोष॑सा । यु॒वा॒ना॒ ।
नास॑त्या । ति॒रःऽअ॑ह्न्यम् । जु॒षा॒णा । सोम॑म् । पि॒ब॒त॒म् । अ॒स्रिधा॑ । सु॒दा॒नू॒ इति॑ सुऽदानू ॥
Padapatha Devanagari Nonaccented
अश्विना । वायुना । युवम् । सुऽदक्षा । नियुत्ऽभिः । च । सऽजोषसा । युवाना ।
नासत्या । तिरःऽअह्न्यम् । जुषाणा । सोमम् । पिबतम् । अस्रिधा । सुदानू इति सुऽदानू ॥
Padapatha Transcription Accented
áśvinā ǀ vāyúnā ǀ yuvám ǀ su-dakṣā ǀ niyút-bhiḥ ǀ ca ǀ sa-jóṣasā ǀ yuvānā ǀ
nā́satyā ǀ tiráḥ-ahnyam ǀ juṣāṇā́ ǀ sómam ǀ pibatam ǀ asrídhā ǀ sudānū íti su-dānū ǁ
Padapatha Transcription Nonaccented
aśvinā ǀ vāyunā ǀ yuvam ǀ su-dakṣā ǀ niyut-bhiḥ ǀ ca ǀ sa-joṣasā ǀ yuvānā ǀ
nāsatyā ǀ tiraḥ-ahnyam ǀ juṣāṇā ǀ somam ǀ pibatam ǀ asridhā ǀ sudānū iti su-dānū ǁ
03.058.08 (Mandala. Sukta. Rik)
3.4.04.03 (Ashtaka. Adhyaya. Varga. Rik)
03.05.066 (Mandala. Anuvāka. Rik)
Samhita Devanagari Accented
अश्वि॑ना॒ परि॑ वा॒मिषः॑ पुरू॒चीरी॒युर्गी॒र्भिर्यत॑माना॒ अमृ॑ध्राः ।
रथो॑ ह वामृत॒जा अद्रि॑जूतः॒ परि॒ द्यावा॑पृथि॒वी या॑ति स॒द्यः ॥
Samhita Devanagari Nonaccented
अश्विना परि वामिषः पुरूचीरीयुर्गीर्भिर्यतमाना अमृध्राः ।
रथो ह वामृतजा अद्रिजूतः परि द्यावापृथिवी याति सद्यः ॥
Samhita Transcription Accented
áśvinā pári vāmíṣaḥ purūcī́rīyúrgīrbhíryátamānā ámṛdhrāḥ ǀ
rátho ha vāmṛtajā́ ádrijūtaḥ pári dyā́vāpṛthivī́ yāti sadyáḥ ǁ
Samhita Transcription Nonaccented
aśvinā pari vāmiṣaḥ purūcīrīyurgīrbhiryatamānā amṛdhrāḥ ǀ
ratho ha vāmṛtajā adrijūtaḥ pari dyāvāpṛthivī yāti sadyaḥ ǁ
Padapatha Devanagari Accented
अश्वि॑ना । परि॑ । वा॒म् । इषः॑ । पु॒रू॒चीः । ई॒युः । गीः॒ऽभिः । यत॑मानाः । अमृ॑ध्राः ।
रथः॑ । ह॒ । वा॒म् । ऋ॒त॒ऽजाः । अद्रि॑ऽजूतः । परि॑ । द्यावा॑पृथि॒वी इति॑ । या॒ति॒ । स॒द्यः ॥
Padapatha Devanagari Nonaccented
अश्विना । परि । वाम् । इषः । पुरूचीः । ईयुः । गीःऽभिः । यतमानाः । अमृध्राः ।
रथः । ह । वाम् । ऋतऽजाः । अद्रिऽजूतः । परि । द्यावापृथिवी इति । याति । सद्यः ॥
Padapatha Transcription Accented
áśvinā ǀ pári ǀ vām ǀ íṣaḥ ǀ purūcī́ḥ ǀ īyúḥ ǀ gīḥ-bhíḥ ǀ yátamānāḥ ǀ ámṛdhrāḥ ǀ
ráthaḥ ǀ ha ǀ vām ǀ ṛta-jā́ḥ ǀ ádri-jūtaḥ ǀ pári ǀ dyā́vāpṛthivī́ íti ǀ yāti ǀ sadyáḥ ǁ
Padapatha Transcription Nonaccented
aśvinā ǀ pari ǀ vām ǀ iṣaḥ ǀ purūcīḥ ǀ īyuḥ ǀ gīḥ-bhiḥ ǀ yatamānāḥ ǀ amṛdhrāḥ ǀ
rathaḥ ǀ ha ǀ vām ǀ ṛta-jāḥ ǀ adri-jūtaḥ ǀ pari ǀ dyāvāpṛthivī iti ǀ yāti ǀ sadyaḥ ǁ
03.058.09 (Mandala. Sukta. Rik)
3.4.04.04 (Ashtaka. Adhyaya. Varga. Rik)
03.05.067 (Mandala. Anuvāka. Rik)
Samhita Devanagari Accented
अश्वि॑ना मधु॒षुत्त॑मो यु॒वाकुः॒ सोम॒स्तं पा॑त॒मा ग॑तं दुरो॒णे ।
रथो॑ ह वां॒ भूरि॒ वर्पः॒ करि॑क्रत्सु॒ताव॑तो निष्कृ॒तमाग॑मिष्ठः ॥
Samhita Devanagari Nonaccented
अश्विना मधुषुत्तमो युवाकुः सोमस्तं पातमा गतं दुरोणे ।
रथो ह वां भूरि वर्पः करिक्रत्सुतावतो निष्कृतमागमिष्ठः ॥
Samhita Transcription Accented
áśvinā madhuṣúttamo yuvā́kuḥ sómastám pātamā́ gatam duroṇé ǀ
rátho ha vām bhū́ri várpaḥ kárikratsutā́vato niṣkṛtámā́gamiṣṭhaḥ ǁ
Samhita Transcription Nonaccented
aśvinā madhuṣuttamo yuvākuḥ somastam pātamā gatam duroṇe ǀ
ratho ha vām bhūri varpaḥ karikratsutāvato niṣkṛtamāgamiṣṭhaḥ ǁ
Padapatha Devanagari Accented
अश्वि॑ना । म॒धु॒सुत्ऽत॑मः । यु॒वाकुः॑ । सोमः॑ । तम् । पा॒त॒म् । आ । ग॒त॒म् । दु॒रो॒णे ।
रथः॑ । ह॒ । वा॒म् । भूरि॑ । वर्पः॑ । करि॑क्रत् । सु॒तऽव॑तः । निः॒ऽकृ॒तम् । आऽग॑मिष्ठः ॥
Padapatha Devanagari Nonaccented
अश्विना । मधुसुत्ऽतमः । युवाकुः । सोमः । तम् । पातम् । आ । गतम् । दुरोणे ।
रथः । ह । वाम् । भूरि । वर्पः । करिक्रत् । सुतऽवतः । निःऽकृतम् । आऽगमिष्ठः ॥
Padapatha Transcription Accented
áśvinā ǀ madhusút-tamaḥ ǀ yuvā́kuḥ ǀ sómaḥ ǀ tám ǀ pātam ǀ ā́ ǀ gatam ǀ duroṇé ǀ
ráthaḥ ǀ ha ǀ vām ǀ bhū́ri ǀ várpaḥ ǀ kárikrat ǀ sutá-vataḥ ǀ niḥ-kṛtám ǀ ā́-gamiṣṭhaḥ ǁ
Padapatha Transcription Nonaccented
aśvinā ǀ madhusut-tamaḥ ǀ yuvākuḥ ǀ somaḥ ǀ tam ǀ pātam ǀ ā ǀ gatam ǀ duroṇe ǀ
rathaḥ ǀ ha ǀ vām ǀ bhūri ǀ varpaḥ ǀ karikrat ǀ suta-vataḥ ǀ niḥ-kṛtam ǀ ā-gamiṣṭhaḥ ǁ