|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 4
Sūkta 2
|
1. Info |
| To: | agni | |
| From: | vāmadeva gautama | |
| Metres: | 1st set of styles: nicṛttriṣṭup (2, 4-7, 9, 13, 15, 17, 18, 20); virāṭtrisṭup (8, 10, 11); paṅktiḥ (1, 19); triṣṭup (3, 16); nicṛtpaṅkti (12); svarāṭpaṅkti (14) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
04.002.01 (Mandala. Sukta. Rik)
3.4.16.01 (Ashtaka. Adhyaya. Varga. Rik)
04.01.021 (Mandala. Anuvāka. Rik)
Samhita Devanagari Accented
यो मर्त्ये॑ष्व॒मृत॑ ऋ॒तावा॑ दे॒वो दे॒वेष्व॑र॒तिर्नि॒धायि॑ ।
होता॒ यजि॑ष्ठो म॒ह्ना शु॒चध्यै॑ ह॒व्यैर॒ग्निर्मनु॑ष ईर॒यध्यै॑ ॥
Samhita Devanagari Nonaccented
यो मर्त्येष्वमृत ऋतावा देवो देवेष्वरतिर्निधायि ।
होता यजिष्ठो मह्ना शुचध्यै हव्यैरग्निर्मनुष ईरयध्यै ॥
Samhita Transcription Accented
yó mártyeṣvamṛ́ta ṛtā́vā devó devéṣvaratírnidhā́yi ǀ
hótā yájiṣṭho mahnā́ śucádhyai havyáiragnírmánuṣa īrayádhyai ǁ
Samhita Transcription Nonaccented
yo martyeṣvamṛta ṛtāvā devo deveṣvaratirnidhāyi ǀ
hotā yajiṣṭho mahnā śucadhyai havyairagnirmanuṣa īrayadhyai ǁ
Padapatha Devanagari Accented
यः । मर्त्ये॑षु । अ॒मृतः॑ । ऋ॒तऽवा॑ । दे॒वः । दे॒वेषु॑ । अ॒र॒तिः । नि॒ऽधायि॑ ।
होता॑ । यजि॑ष्ठः । म॒ह्ना । शु॒चध्यै॑ । ह॒व्यैः । अ॒ग्निः । मनु॑षः । ई॒र॒यध्यै॑ ॥
Padapatha Devanagari Nonaccented
यः । मर्त्येषु । अमृतः । ऋतऽवा । देवः । देवेषु । अरतिः । निऽधायि ।
होता । यजिष्ठः । मह्ना । शुचध्यै । हव्यैः । अग्निः । मनुषः । ईरयध्यै ॥
Padapatha Transcription Accented
yáḥ ǀ mártyeṣu ǀ amṛ́taḥ ǀ ṛtá-vā ǀ deváḥ ǀ devéṣu ǀ aratíḥ ǀ ni-dhā́yi ǀ
hótā ǀ yájiṣṭhaḥ ǀ mahnā́ ǀ śucádhyai ǀ havyáiḥ ǀ agníḥ ǀ mánuṣaḥ ǀ īrayádhyai ǁ
Padapatha Transcription Nonaccented
yaḥ ǀ martyeṣu ǀ amṛtaḥ ǀ ṛta-vā ǀ devaḥ ǀ deveṣu ǀ aratiḥ ǀ ni-dhāyi ǀ
hotā ǀ yajiṣṭhaḥ ǀ mahnā ǀ śucadhyai ǀ havyaiḥ ǀ agniḥ ǀ manuṣaḥ ǀ īrayadhyai ǁ
04.002.02 (Mandala. Sukta. Rik)
3.4.16.02 (Ashtaka. Adhyaya. Varga. Rik)
04.01.022 (Mandala. Anuvāka. Rik)
Samhita Devanagari Accented
इ॒ह त्वं सू॑नो सहसो नो अ॒द्य जा॒तो जा॒ताँ उ॒भयाँ॑ अं॒तर॑ग्ने ।
दू॒त ई॑यसे युयुजा॒न ऋ॑ष्व ऋजुमु॒ष्कान्वृष॑णः शु॒क्रांश्च॑ ॥
Samhita Devanagari Nonaccented
इह त्वं सूनो सहसो नो अद्य जातो जाताँ उभयाँ अंतरग्ने ।
दूत ईयसे युयुजान ऋष्व ऋजुमुष्कान्वृषणः शुक्रांश्च ॥
Samhita Transcription Accented
ihá tvám sūno sahaso no adyá jātó jātā́m̐ ubháyām̐ antáragne ǀ
dūtá īyase yuyujāná ṛṣva ṛjumuṣkā́nvṛ́ṣaṇaḥ śukrā́ṃśca ǁ
Samhita Transcription Nonaccented
iha tvam sūno sahaso no adya jāto jātām̐ ubhayām̐ antaragne ǀ
dūta īyase yuyujāna ṛṣva ṛjumuṣkānvṛṣaṇaḥ śukrāṃśca ǁ
Padapatha Devanagari Accented
इ॒ह । त्वम् । सू॒नो॒ इति॑ । स॒ह॒सः॒ । नः॒ । अ॒द्य । जा॒तः । जा॒तान् । उ॒भया॑न् । अ॒न्तः । अ॒ग्ने॒ ।
दू॒तः । ई॒य॒से॒ । यु॒यु॒जा॒नः । ऋ॒ष्व॒ । ऋ॒जु॒ऽमु॒ष्कान् । वृष॑णः । शु॒क्रान् । च॒ ॥
Padapatha Devanagari Nonaccented
इह । त्वम् । सूनो इति । सहसः । नः । अद्य । जातः । जातान् । उभयान् । अन्तः । अग्ने ।
दूतः । ईयसे । युयुजानः । ऋष्व । ऋजुऽमुष्कान् । वृषणः । शुक्रान् । च ॥
Padapatha Transcription Accented
ihá ǀ tvám ǀ sūno íti ǀ sahasaḥ ǀ naḥ ǀ adyá ǀ jātáḥ ǀ jātā́n ǀ ubháyān ǀ antáḥ ǀ agne ǀ
dūtáḥ ǀ īyase ǀ yuyujānáḥ ǀ ṛṣva ǀ ṛju-muṣkā́n ǀ vṛ́ṣaṇaḥ ǀ śukrā́n ǀ ca ǁ
Padapatha Transcription Nonaccented
iha ǀ tvam ǀ sūno iti ǀ sahasaḥ ǀ naḥ ǀ adya ǀ jātaḥ ǀ jātān ǀ ubhayān ǀ antaḥ ǀ agne ǀ
dūtaḥ ǀ īyase ǀ yuyujānaḥ ǀ ṛṣva ǀ ṛju-muṣkān ǀ vṛṣaṇaḥ ǀ śukrān ǀ ca ǁ
04.002.03 (Mandala. Sukta. Rik)
3.4.16.03 (Ashtaka. Adhyaya. Varga. Rik)
04.01.023 (Mandala. Anuvāka. Rik)
Samhita Devanagari Accented
अत्या॑ वृध॒स्नू रोहि॑ता घृ॒तस्नू॑ ऋ॒तस्य॑ मन्ये॒ मन॑सा॒ जवि॑ष्ठा ।
अं॒तरी॑यसे अरु॒षा यु॑जा॒नो यु॒ष्मांश्च॑ दे॒वान्विश॒ आ च॒ मर्ता॑न् ॥
Samhita Devanagari Nonaccented
अत्या वृधस्नू रोहिता घृतस्नू ऋतस्य मन्ये मनसा जविष्ठा ।
अंतरीयसे अरुषा युजानो युष्मांश्च देवान्विश आ च मर्तान् ॥
Samhita Transcription Accented
átyā vṛdhasnū́ róhitā ghṛtásnū ṛtásya manye mánasā jáviṣṭhā ǀ
antárīyase aruṣā́ yujānó yuṣmā́ṃśca devā́nvíśa ā́ ca mártān ǁ
Samhita Transcription Nonaccented
atyā vṛdhasnū rohitā ghṛtasnū ṛtasya manye manasā javiṣṭhā ǀ
antarīyase aruṣā yujāno yuṣmāṃśca devānviśa ā ca martān ǁ
Padapatha Devanagari Accented
अत्या॑ । वृ॒ध॒स्नू इति॑ वृ॒ध॒ऽस्नू । रोहि॑ता । घृ॒तस्नू॒ इति॑ घृ॒तऽस्नू॑ । ऋ॒तस्य॑ । म॒न्ये॒ । मन॑सा । जवि॑ष्ठा ।
अ॒न्तः । ई॒य॒से॒ । अ॒रु॒षा । यु॒जा॒नः । यु॒ष्मान् । च॒ । दे॒वान् । विशः॑ । आ । च॒ । मर्ता॑न् ॥
Padapatha Devanagari Nonaccented
अत्या । वृधस्नू इति वृधऽस्नू । रोहिता । घृतस्नू इति घृतऽस्नू । ऋतस्य । मन्ये । मनसा । जविष्ठा ।
अन्तः । ईयसे । अरुषा । युजानः । युष्मान् । च । देवान् । विशः । आ । च । मर्तान् ॥
Padapatha Transcription Accented
átyā ǀ vṛdhasnū́ íti vṛdha-snū́ ǀ róhitā ǀ ghṛtásnū íti ghṛtá-snū ǀ ṛtásya ǀ manye ǀ mánasā ǀ jáviṣṭhā ǀ
antáḥ ǀ īyase ǀ aruṣā́ ǀ yujānáḥ ǀ yuṣmā́n ǀ ca ǀ devā́n ǀ víśaḥ ǀ ā́ ǀ ca ǀ mártān ǁ
Padapatha Transcription Nonaccented
atyā ǀ vṛdhasnū iti vṛdha-snū ǀ rohitā ǀ ghṛtasnū iti ghṛta-snū ǀ ṛtasya ǀ manye ǀ manasā ǀ javiṣṭhā ǀ
antaḥ ǀ īyase ǀ aruṣā ǀ yujānaḥ ǀ yuṣmān ǀ ca ǀ devān ǀ viśaḥ ǀ ā ǀ ca ǀ martān ǁ
04.002.04 (Mandala. Sukta. Rik)
3.4.16.04 (Ashtaka. Adhyaya. Varga. Rik)
04.01.024 (Mandala. Anuvāka. Rik)
Samhita Devanagari Accented
अ॒र्य॒मणं॒ वरु॑णं मि॒त्रमे॑षा॒मिंद्रा॒विष्णू॑ म॒रुतो॑ अ॒श्विनो॒त ।
स्वश्वो॑ अग्ने सु॒रथः॑ सु॒राधा॒ एदु॑ वह सुह॒विषे॒ जना॑य ॥
Samhita Devanagari Nonaccented
अर्यमणं वरुणं मित्रमेषामिंद्राविष्णू मरुतो अश्विनोत ।
स्वश्वो अग्ने सुरथः सुराधा एदु वह सुहविषे जनाय ॥
Samhita Transcription Accented
aryamáṇam váruṇam mitrámeṣāmíndrāvíṣṇū marúto aśvínotá ǀ
sváśvo agne suráthaḥ surā́dhā édu vaha suhavíṣe jánāya ǁ
Samhita Transcription Nonaccented
aryamaṇam varuṇam mitrameṣāmindrāviṣṇū maruto aśvinota ǀ
svaśvo agne surathaḥ surādhā edu vaha suhaviṣe janāya ǁ
Padapatha Devanagari Accented
अ॒र्य॒मण॑म् । वरु॑णम् । मि॒त्रम् । ए॒षा॒म् । इन्द्रा॒विष्णू॒ इति॑ । म॒रुतः॑ । अ॒श्विना॑ । उ॒त ।
सु॒ऽअश्वः॑ । अ॒ग्ने॒ । सु॒ऽरथः॑ । सु॒ऽराधाः॑ । आ । इत् । ऊं॒ इति॑ । व॒ह॒ । सु॒ऽह॒विषे॑ । जना॑य ॥
Padapatha Devanagari Nonaccented
अर्यमणम् । वरुणम् । मित्रम् । एषाम् । इन्द्राविष्णू इति । मरुतः । अश्विना । उत ।
सुऽअश्वः । अग्ने । सुऽरथः । सुऽराधाः । आ । इत् । ऊं इति । वह । सुऽहविषे । जनाय ॥
Padapatha Transcription Accented
aryamáṇam ǀ váruṇam ǀ mitrám ǀ eṣām ǀ índrāvíṣṇū íti ǀ marútaḥ ǀ aśvínā ǀ utá ǀ
su-áśvaḥ ǀ agne ǀ su-ráthaḥ ǀ su-rā́dhāḥ ǀ ā́ ǀ ít ǀ ūṃ íti ǀ vaha ǀ su-havíṣe ǀ jánāya ǁ
Padapatha Transcription Nonaccented
aryamaṇam ǀ varuṇam ǀ mitram ǀ eṣām ǀ indrāviṣṇū iti ǀ marutaḥ ǀ aśvinā ǀ uta ǀ
su-aśvaḥ ǀ agne ǀ su-rathaḥ ǀ su-rādhāḥ ǀ ā ǀ it ǀ ūṃ iti ǀ vaha ǀ su-haviṣe ǀ janāya ǁ
04.002.05 (Mandala. Sukta. Rik)
3.4.16.05 (Ashtaka. Adhyaya. Varga. Rik)
04.01.025 (Mandala. Anuvāka. Rik)
Samhita Devanagari Accented
गोमाँ॑ अ॒ग्नेऽवि॑माँ अ॒श्वी य॒ज्ञो नृ॒वत्स॑खा॒ सद॒मिद॑प्रमृ॒ष्यः ।
इळा॑वाँ ए॒षो अ॑सुर प्र॒जावां॑दी॒र्घो र॒यिः पृ॑थुबु॒ध्नः स॒भावा॑न् ॥
Samhita Devanagari Nonaccented
गोमाँ अग्नेऽविमाँ अश्वी यज्ञो नृवत्सखा सदमिदप्रमृष्यः ।
इळावाँ एषो असुर प्रजावांदीर्घो रयिः पृथुबुध्नः सभावान् ॥
Samhita Transcription Accented
gómām̐ agné’vimām̐ aśvī́ yajñó nṛvátsakhā sádamídapramṛṣyáḥ ǀ
íḷāvām̐ eṣó asura prajā́vāndīrghó rayíḥ pṛthubudhnáḥ sabhā́vān ǁ
Samhita Transcription Nonaccented
gomām̐ agne’vimām̐ aśvī yajño nṛvatsakhā sadamidapramṛṣyaḥ ǀ
iḷāvām̐ eṣo asura prajāvāndīrgho rayiḥ pṛthubudhnaḥ sabhāvān ǁ
Padapatha Devanagari Accented
गोऽमा॑न् । अ॒ग्ने॒ । अवि॑ऽमान् । अ॒श्वी । य॒ज्ञः । नृ॒वत्ऽस॑खा । सद॑म् । इत् । अ॒प्र॒ऽमृ॒ष्यः ।
इळा॑ऽवान् । ए॒षः । अ॒सु॒र॒ । प्र॒जाऽवा॑न् । दी॒र्घः । र॒यिः । पृ॒थु॒ऽबु॒ध्नः । स॒भाऽवा॑न् ॥
Padapatha Devanagari Nonaccented
गोऽमान् । अग्ने । अविऽमान् । अश्वी । यज्ञः । नृवत्ऽसखा । सदम् । इत् । अप्रऽमृष्यः ।
इळाऽवान् । एषः । असुर । प्रजाऽवान् । दीर्घः । रयिः । पृथुऽबुध्नः । सभाऽवान् ॥
Padapatha Transcription Accented
gó-mān ǀ agne ǀ ávi-mān ǀ aśvī́ ǀ yajñáḥ ǀ nṛvát-sakhā ǀ sádam ǀ ít ǀ apra-mṛṣyáḥ ǀ
íḷā-vān ǀ eṣáḥ ǀ asura ǀ prajā́-vān ǀ dīrgháḥ ǀ rayíḥ ǀ pṛthu-budhnáḥ ǀ sabhā́-vān ǁ
Padapatha Transcription Nonaccented
go-mān ǀ agne ǀ avi-mān ǀ aśvī ǀ yajñaḥ ǀ nṛvat-sakhā ǀ sadam ǀ it ǀ apra-mṛṣyaḥ ǀ
iḷā-vān ǀ eṣaḥ ǀ asura ǀ prajā-vān ǀ dīrghaḥ ǀ rayiḥ ǀ pṛthu-budhnaḥ ǀ sabhā-vān ǁ
04.002.06 (Mandala. Sukta. Rik)
3.4.17.01 (Ashtaka. Adhyaya. Varga. Rik)
04.01.026 (Mandala. Anuvāka. Rik)
Samhita Devanagari Accented
यस्त॑ इ॒ध्मं ज॒भर॑त्सिष्विदा॒नो मू॒र्धानं॑ वा त॒तप॑ते त्वा॒या ।
भुव॒स्तस्य॒ स्वत॑वाँः पा॒युर॑ग्ने॒ विश्व॑स्मात्सीमघाय॒त उ॑रुष्य ॥
Samhita Devanagari Nonaccented
यस्त इध्मं जभरत्सिष्विदानो मूर्धानं वा ततपते त्वाया ।
भुवस्तस्य स्वतवाँः पायुरग्ने विश्वस्मात्सीमघायत उरुष्य ॥
Samhita Transcription Accented
yásta idhmám jabháratsiṣvidānó mūrdhā́nam vā tatápate tvāyā́ ǀ
bhúvastásya svátavām̐ḥ pāyúragne víśvasmātsīmaghāyatá uruṣya ǁ
Samhita Transcription Nonaccented
yasta idhmam jabharatsiṣvidāno mūrdhānam vā tatapate tvāyā ǀ
bhuvastasya svatavām̐ḥ pāyuragne viśvasmātsīmaghāyata uruṣya ǁ
Padapatha Devanagari Accented
यः । ते॒ । इ॒ध्मम् । ज॒भर॑त् । सि॒स्वि॒दा॒नः । मू॒र्धान॑म् । वा॒ । त॒तप॑ते । त्वा॒ऽया ।
भुवः॑ । तस्य॑ । स्वऽत॑वान् । पा॒युः । अ॒ग्ने॒ । विश्व॑स्मात् । सी॒म् । अ॒घ॒ऽय॒तः । उ॒रु॒ष्य॒ ॥
Padapatha Devanagari Nonaccented
यः । ते । इध्मम् । जभरत् । सिस्विदानः । मूर्धानम् । वा । ततपते । त्वाऽया ।
भुवः । तस्य । स्वऽतवान् । पायुः । अग्ने । विश्वस्मात् । सीम् । अघऽयतः । उरुष्य ॥
Padapatha Transcription Accented
yáḥ ǀ te ǀ idhmám ǀ jabhárat ǀ sisvidānáḥ ǀ mūrdhā́nam ǀ vā ǀ tatápate ǀ tvā-yā́ ǀ
bhúvaḥ ǀ tásya ǀ svá-tavān ǀ pāyúḥ ǀ agne ǀ víśvasmāt ǀ sīm ǀ agha-yatáḥ ǀ uruṣya ǁ
Padapatha Transcription Nonaccented
yaḥ ǀ te ǀ idhmam ǀ jabharat ǀ sisvidānaḥ ǀ mūrdhānam ǀ vā ǀ tatapate ǀ tvā-yā ǀ
bhuvaḥ ǀ tasya ǀ sva-tavān ǀ pāyuḥ ǀ agne ǀ viśvasmāt ǀ sīm ǀ agha-yataḥ ǀ uruṣya ǁ
04.002.07 (Mandala. Sukta. Rik)
3.4.17.02 (Ashtaka. Adhyaya. Varga. Rik)
04.01.027 (Mandala. Anuvāka. Rik)
Samhita Devanagari Accented
यस्ते॒ भरा॒दन्नि॑यते चि॒दन्नं॑ नि॒शिष॑न्मं॒द्रमति॑थिमु॒दीर॑त् ।
आ दे॑व॒युरि॒नध॑ते दुरो॒णे तस्मि॑न्र॒यिर्ध्रु॒वो अ॑स्तु॒ दास्वा॑न् ॥
Samhita Devanagari Nonaccented
यस्ते भरादन्नियते चिदन्नं निशिषन्मंद्रमतिथिमुदीरत् ।
आ देवयुरिनधते दुरोणे तस्मिन्रयिर्ध्रुवो अस्तु दास्वान् ॥
Samhita Transcription Accented
yáste bhárādánniyate cidánnam niśíṣanmandrámátithimudī́rat ǀ
ā́ devayúrinádhate duroṇé tásminrayírdhruvó astu dā́svān ǁ
Samhita Transcription Nonaccented
yaste bharādanniyate cidannam niśiṣanmandramatithimudīrat ǀ
ā devayurinadhate duroṇe tasminrayirdhruvo astu dāsvān ǁ
Padapatha Devanagari Accented
यः । ते॒ । भरा॑त् । अन्नि॑ऽयते । चि॒त् । अन्न॑म् । नि॒ऽशिष॑त् । म॒न्द्रम् । अति॑थिम् । उ॒त्ऽईर॑त् ।
आ । दे॒व॒ऽयुः । इ॒नध॑ते । दु॒रो॒णे । तस्मि॑न् । र॒यिः । ध्रु॒वः । अ॒स्तु॒ । दास्वा॑न् ॥
Padapatha Devanagari Nonaccented
यः । ते । भरात् । अन्निऽयते । चित् । अन्नम् । निऽशिषत् । मन्द्रम् । अतिथिम् । उत्ऽईरत् ।
आ । देवऽयुः । इनधते । दुरोणे । तस्मिन् । रयिः । ध्रुवः । अस्तु । दास्वान् ॥
Padapatha Transcription Accented
yáḥ ǀ te ǀ bhárāt ǀ ánni-yate ǀ cit ǀ ánnam ǀ ni-śíṣat ǀ mandrám ǀ átithim ǀ ut-ī́rat ǀ
ā́ ǀ deva-yúḥ ǀ inádhate ǀ duroṇé ǀ tásmin ǀ rayíḥ ǀ dhruváḥ ǀ astu ǀ dā́svān ǁ
Padapatha Transcription Nonaccented
yaḥ ǀ te ǀ bharāt ǀ anni-yate ǀ cit ǀ annam ǀ ni-śiṣat ǀ mandram ǀ atithim ǀ ut-īrat ǀ
ā ǀ deva-yuḥ ǀ inadhate ǀ duroṇe ǀ tasmin ǀ rayiḥ ǀ dhruvaḥ ǀ astu ǀ dāsvān ǁ
04.002.08 (Mandala. Sukta. Rik)
3.4.17.03 (Ashtaka. Adhyaya. Varga. Rik)
04.01.028 (Mandala. Anuvāka. Rik)
Samhita Devanagari Accented
यस्त्वा॑ दो॒षा य उ॒षसि॑ प्र॒शंसा॑त्प्रि॒यं वा॑ त्वा कृ॒णव॑ते ह॒विष्मा॑न् ।
अश्वो॒ न स्वे दम॒ आ हे॒म्यावां॒तमंह॑सः पीपरो दा॒श्वांसं॑ ॥
Samhita Devanagari Nonaccented
यस्त्वा दोषा य उषसि प्रशंसात्प्रियं वा त्वा कृणवते हविष्मान् ।
अश्वो न स्वे दम आ हेम्यावांतमंहसः पीपरो दाश्वांसं ॥
Samhita Transcription Accented
yástvā doṣā́ yá uṣási praśáṃsātpriyám vā tvā kṛṇávate havíṣmān ǀ
áśvo ná své dáma ā́ hemyā́vāntámáṃhasaḥ pīparo dāśvā́ṃsam ǁ
Samhita Transcription Nonaccented
yastvā doṣā ya uṣasi praśaṃsātpriyam vā tvā kṛṇavate haviṣmān ǀ
aśvo na sve dama ā hemyāvāntamaṃhasaḥ pīparo dāśvāṃsam ǁ
Padapatha Devanagari Accented
यः । त्वा॒ । दो॒षा । यः । उ॒षसि॑ । प्र॒ऽशंसा॑त् । प्रि॒यम् । वा॒ । त्वा॒ । कृ॒णव॑ते । ह॒विष्मा॑न् ।
अश्वः॑ । न । स्वे । दमे॑ । आ । हे॒म्याऽवा॑न् । तम् । अंह॑सः । पी॒प॒रः॒ । दा॒श्वांस॑म् ॥
Padapatha Devanagari Nonaccented
यः । त्वा । दोषा । यः । उषसि । प्रऽशंसात् । प्रियम् । वा । त्वा । कृणवते । हविष्मान् ।
अश्वः । न । स्वे । दमे । आ । हेम्याऽवान् । तम् । अंहसः । पीपरः । दाश्वांसम् ॥
Padapatha Transcription Accented
yáḥ ǀ tvā ǀ doṣā́ ǀ yáḥ ǀ uṣási ǀ pra-śáṃsāt ǀ priyám ǀ vā ǀ tvā ǀ kṛṇávate ǀ havíṣmān ǀ
áśvaḥ ǀ ná ǀ své ǀ dáme ǀ ā́ ǀ hemyā́-vān ǀ tám ǀ áṃhasaḥ ǀ pīparaḥ ǀ dāśvā́ṃsam ǁ
Padapatha Transcription Nonaccented
yaḥ ǀ tvā ǀ doṣā ǀ yaḥ ǀ uṣasi ǀ pra-śaṃsāt ǀ priyam ǀ vā ǀ tvā ǀ kṛṇavate ǀ haviṣmān ǀ
aśvaḥ ǀ na ǀ sve ǀ dame ǀ ā ǀ hemyā-vān ǀ tam ǀ aṃhasaḥ ǀ pīparaḥ ǀ dāśvāṃsam ǁ
04.002.09 (Mandala. Sukta. Rik)
3.4.17.04 (Ashtaka. Adhyaya. Varga. Rik)
04.01.029 (Mandala. Anuvāka. Rik)
Samhita Devanagari Accented
यस्तुभ्य॑मग्ने अ॒मृता॑य॒ दाश॒द्दुव॒स्त्वे कृ॒णव॑ते य॒तस्रु॑क् ।
न स रा॒या श॑शमा॒नो वि यो॑ष॒न्नैन॒मंहः॒ परि॑ वरदघा॒योः ॥
Samhita Devanagari Nonaccented
यस्तुभ्यमग्ने अमृताय दाशद्दुवस्त्वे कृणवते यतस्रुक् ।
न स राया शशमानो वि योषन्नैनमंहः परि वरदघायोः ॥
Samhita Transcription Accented
yástúbhyamagne amṛ́tāya dā́śaddúvastvé kṛṇávate yatásruk ǀ
ná sá rāyā́ śaśamānó ví yoṣannáinamáṃhaḥ pári varadaghāyóḥ ǁ
Samhita Transcription Nonaccented
yastubhyamagne amṛtāya dāśadduvastve kṛṇavate yatasruk ǀ
na sa rāyā śaśamāno vi yoṣannainamaṃhaḥ pari varadaghāyoḥ ǁ
Padapatha Devanagari Accented
यः । तुभ्य॑म् । अ॒ग्ने॒ । अ॒मृता॑य । दाश॑त् । दुवः॑ । त्वे इति॑ । कृ॒णव॑ते । य॒तऽस्रु॑क् ।
न । सः । रा॒या । श॒श॒मा॒नः । वि । यो॒ष॒त् । न । ए॒न॒म् । अंहः॑ । परि॑ । व॒र॒त् । अ॒घ॒ऽयोः ॥
Padapatha Devanagari Nonaccented
यः । तुभ्यम् । अग्ने । अमृताय । दाशत् । दुवः । त्वे इति । कृणवते । यतऽस्रुक् ।
न । सः । राया । शशमानः । वि । योषत् । न । एनम् । अंहः । परि । वरत् । अघऽयोः ॥
Padapatha Transcription Accented
yáḥ ǀ túbhyam ǀ agne ǀ amṛ́tāya ǀ dā́śat ǀ dúvaḥ ǀ tvé íti ǀ kṛṇávate ǀ yatá-sruk ǀ
ná ǀ sáḥ ǀ rāyā́ ǀ śaśamānáḥ ǀ ví ǀ yoṣat ǀ ná ǀ enam ǀ áṃhaḥ ǀ pári ǀ varat ǀ agha-yóḥ ǁ
Padapatha Transcription Nonaccented
yaḥ ǀ tubhyam ǀ agne ǀ amṛtāya ǀ dāśat ǀ duvaḥ ǀ tve iti ǀ kṛṇavate ǀ yata-sruk ǀ
na ǀ saḥ ǀ rāyā ǀ śaśamānaḥ ǀ vi ǀ yoṣat ǀ na ǀ enam ǀ aṃhaḥ ǀ pari ǀ varat ǀ agha-yoḥ ǁ
04.002.10 (Mandala. Sukta. Rik)
3.4.17.05 (Ashtaka. Adhyaya. Varga. Rik)
04.01.030 (Mandala. Anuvāka. Rik)
Samhita Devanagari Accented
यस्य॒ त्वम॑ग्ने अध्व॒रं जुजो॑षो दे॒वो मर्त॑स्य॒ सुधि॑तं॒ ररा॑णः ।
प्री॒तेद॑स॒द्धोत्रा॒ सा य॑वि॒ष्ठासा॑म॒ यस्य॑ विध॒तो वृ॒धासः॑ ॥
Samhita Devanagari Nonaccented
यस्य त्वमग्ने अध्वरं जुजोषो देवो मर्तस्य सुधितं रराणः ।
प्रीतेदसद्धोत्रा सा यविष्ठासाम यस्य विधतो वृधासः ॥
Samhita Transcription Accented
yásya tvámagne adhvarám jújoṣo devó mártasya súdhitam rárāṇaḥ ǀ
prītédasaddhótrā sā́ yaviṣṭhā́sāma yásya vidható vṛdhā́saḥ ǁ
Samhita Transcription Nonaccented
yasya tvamagne adhvaram jujoṣo devo martasya sudhitam rarāṇaḥ ǀ
prītedasaddhotrā sā yaviṣṭhāsāma yasya vidhato vṛdhāsaḥ ǁ
Padapatha Devanagari Accented
यस्य॑ । त्वम् । अ॒ग्ने॒ । अ॒ध्व॒रम् । जुजो॑षः । दे॒वः । मर्त॑स्य । सुऽधि॑तम् । ररा॑णः ।
प्री॒ता । इत् । अ॒स॒त् । होत्रा॑ । सा । य॒वि॒ष्ठ॒ । असा॑म । यस्य॑ । वि॒ध॒तः । वृ॒धासः॑ ॥
Padapatha Devanagari Nonaccented
यस्य । त्वम् । अग्ने । अध्वरम् । जुजोषः । देवः । मर्तस्य । सुऽधितम् । रराणः ।
प्रीता । इत् । असत् । होत्रा । सा । यविष्ठ । असाम । यस्य । विधतः । वृधासः ॥
Padapatha Transcription Accented
yásya ǀ tvám ǀ agne ǀ adhvarám ǀ jújoṣaḥ ǀ deváḥ ǀ mártasya ǀ sú-dhitam ǀ rárāṇaḥ ǀ
prītā́ ǀ ít ǀ asat ǀ hótrā ǀ sā́ ǀ yaviṣṭha ǀ ásāma ǀ yásya ǀ vidhatáḥ ǀ vṛdhā́saḥ ǁ
Padapatha Transcription Nonaccented
yasya ǀ tvam ǀ agne ǀ adhvaram ǀ jujoṣaḥ ǀ devaḥ ǀ martasya ǀ su-dhitam ǀ rarāṇaḥ ǀ
prītā ǀ it ǀ asat ǀ hotrā ǀ sā ǀ yaviṣṭha ǀ asāma ǀ yasya ǀ vidhataḥ ǀ vṛdhāsaḥ ǁ
04.002.11 (Mandala. Sukta. Rik)
3.4.18.01 (Ashtaka. Adhyaya. Varga. Rik)
04.01.031 (Mandala. Anuvāka. Rik)
Samhita Devanagari Accented
चित्ति॒मचि॑त्तिं चिनव॒द्वि वि॒द्वान्पृ॒ष्ठेव॑ वी॒ता वृ॑जि॒ना च॒ मर्ता॑न् ।
रा॒ये च॑ नः स्वप॒त्याय॑ देव॒ दितिं॑ च॒ रास्वादि॑तिमुरुष्य ॥
Samhita Devanagari Nonaccented
चित्तिमचित्तिं चिनवद्वि विद्वान्पृष्ठेव वीता वृजिना च मर्तान् ।
राये च नः स्वपत्याय देव दितिं च रास्वादितिमुरुष्य ॥
Samhita Transcription Accented
cíttimácittim cinavadví vidvā́npṛṣṭhéva vītā́ vṛjinā́ ca mártān ǀ
rāyé ca naḥ svapatyā́ya deva dítim ca rā́svā́ditimuruṣya ǁ
Samhita Transcription Nonaccented
cittimacittim cinavadvi vidvānpṛṣṭheva vītā vṛjinā ca martān ǀ
rāye ca naḥ svapatyāya deva ditim ca rāsvāditimuruṣya ǁ
Padapatha Devanagari Accented
चित्ति॑म् । अचि॑त्तिम् । चि॒न॒व॒त् । वि । वि॒द्वान् । पृ॒ष्ठाऽइ॑व । वी॒ता । वृ॒जि॒ना । च॒ । मर्ता॑न् ।
रा॒ये । च॒ । नः॒ । सु॒ऽअ॒प॒त्याय॑ । दे॒व॒ । दिति॑म् । च॒ । रास्व॑ । अदि॑तिम् । उ॒रु॒ष्य॒ ॥
Padapatha Devanagari Nonaccented
चित्तिम् । अचित्तिम् । चिनवत् । वि । विद्वान् । पृष्ठाऽइव । वीता । वृजिना । च । मर्तान् ।
राये । च । नः । सुऽअपत्याय । देव । दितिम् । च । रास्व । अदितिम् । उरुष्य ॥
Padapatha Transcription Accented
cíttim ǀ ácittim ǀ cinavat ǀ ví ǀ vidvā́n ǀ pṛṣṭhā́-iva ǀ vītā́ ǀ vṛjinā́ ǀ ca ǀ mártān ǀ
rāyé ǀ ca ǀ naḥ ǀ su-apatyā́ya ǀ deva ǀ dítim ǀ ca ǀ rā́sva ǀ áditim ǀ uruṣya ǁ
Padapatha Transcription Nonaccented
cittim ǀ acittim ǀ cinavat ǀ vi ǀ vidvān ǀ pṛṣṭhā-iva ǀ vītā ǀ vṛjinā ǀ ca ǀ martān ǀ
rāye ǀ ca ǀ naḥ ǀ su-apatyāya ǀ deva ǀ ditim ǀ ca ǀ rāsva ǀ aditim ǀ uruṣya ǁ
04.002.12 (Mandala. Sukta. Rik)
3.4.18.02 (Ashtaka. Adhyaya. Varga. Rik)
04.01.032 (Mandala. Anuvāka. Rik)
Samhita Devanagari Accented
क॒विं श॑शासुः क॒वयोऽद॑ब्धा निधा॒रयं॑तो॒ दुर्या॑स्वा॒योः ।
अत॒स्त्वं दृश्याँ॑ अग्न ए॒तान्प॒ड्भिः प॑श्ये॒रद्भु॑ताँ अ॒र्य एवैः॑ ॥
Samhita Devanagari Nonaccented
कविं शशासुः कवयोऽदब्धा निधारयंतो दुर्यास्वायोः ।
अतस्त्वं दृश्याँ अग्न एतान्पड्भिः पश्येरद्भुताँ अर्य एवैः ॥
Samhita Transcription Accented
kavím śaśāsuḥ kaváyó’dabdhā nidhāráyanto dúryāsvāyóḥ ǀ
átastvám dṛ́śyām̐ agna etā́npaḍbhíḥ paśyerádbhutām̐ aryá évaiḥ ǁ
Samhita Transcription Nonaccented
kavim śaśāsuḥ kavayo’dabdhā nidhārayanto duryāsvāyoḥ ǀ
atastvam dṛśyām̐ agna etānpaḍbhiḥ paśyeradbhutām̐ arya evaiḥ ǁ
Padapatha Devanagari Accented
क॒विम् । श॒शा॒सुः॒ । क॒वयः॑ । अद॑ब्धाः । नि॒ऽधा॒रय॑न्तः । दुर्या॑सु । आ॒योः ।
अतः॑ । त्वम् । दृश्या॑न् । अ॒ग्ने॒ । ए॒तान् । प॒ट्ऽभिः । प॒श्येः॒ । अद्भु॑तान् । अ॒र्यः । एवैः॑ ॥
Padapatha Devanagari Nonaccented
कविम् । शशासुः । कवयः । अदब्धाः । निऽधारयन्तः । दुर्यासु । आयोः ।
अतः । त्वम् । दृश्यान् । अग्ने । एतान् । पट्ऽभिः । पश्येः । अद्भुतान् । अर्यः । एवैः ॥
Padapatha Transcription Accented
kavím ǀ śaśāsuḥ ǀ kaváyaḥ ǀ ádabdhāḥ ǀ ni-dhāráyantaḥ ǀ dúryāsu ǀ āyóḥ ǀ
átaḥ ǀ tvám ǀ dṛ́śyān ǀ agne ǀ etā́n ǀ paṭ-bhíḥ ǀ paśyeḥ ǀ ádbhutān ǀ aryáḥ ǀ évaiḥ ǁ
Padapatha Transcription Nonaccented
kavim ǀ śaśāsuḥ ǀ kavayaḥ ǀ adabdhāḥ ǀ ni-dhārayantaḥ ǀ duryāsu ǀ āyoḥ ǀ
ataḥ ǀ tvam ǀ dṛśyān ǀ agne ǀ etān ǀ paṭ-bhiḥ ǀ paśyeḥ ǀ adbhutān ǀ aryaḥ ǀ evaiḥ ǁ
04.002.13 (Mandala. Sukta. Rik)
3.4.18.03 (Ashtaka. Adhyaya. Varga. Rik)
04.01.033 (Mandala. Anuvāka. Rik)
Samhita Devanagari Accented
त्वम॑ग्ने वा॒घते॑ सु॒प्रणी॑तिः सु॒तसो॑माय विध॒ते य॑विष्ठ ।
रत्नं॑ भर शशमा॒नाय॑ घृष्वे पृ॒थु श्चं॒द्रमव॑से चर्षणि॒प्राः ॥
Samhita Devanagari Nonaccented
त्वमग्ने वाघते सुप्रणीतिः सुतसोमाय विधते यविष्ठ ।
रत्नं भर शशमानाय घृष्वे पृथु श्चंद्रमवसे चर्षणिप्राः ॥
Samhita Transcription Accented
tvámagne vāgháte supráṇītiḥ sutásomāya vidhaté yaviṣṭha ǀ
rátnam bhara śaśamānā́ya ghṛṣve pṛthú ścandrámávase carṣaṇiprā́ḥ ǁ
Samhita Transcription Nonaccented
tvamagne vāghate supraṇītiḥ sutasomāya vidhate yaviṣṭha ǀ
ratnam bhara śaśamānāya ghṛṣve pṛthu ścandramavase carṣaṇiprāḥ ǁ
Padapatha Devanagari Accented
त्वम् । अ॒ग्ने॒ । वा॒घते॑ । सु॒ऽप्रनी॑तिः । सु॒तऽसो॑माय । वि॒ध॒ते । य॒वि॒ष्ठ॒ ।
रत्न॑म् । भ॒र॒ । श॒श॒मा॒नाय॑ । घृष्वे॒ । पृ॒थु । च॒न्द्रम् । अव॑से । च॒र्ष॒णि॒ऽप्राः ॥
Padapatha Devanagari Nonaccented
त्वम् । अग्ने । वाघते । सुऽप्रनीतिः । सुतऽसोमाय । विधते । यविष्ठ ।
रत्नम् । भर । शशमानाय । घृष्वे । पृथु । चन्द्रम् । अवसे । चर्षणिऽप्राः ॥
Padapatha Transcription Accented
tvám ǀ agne ǀ vāgháte ǀ su-pránītiḥ ǀ sutá-somāya ǀ vidhaté ǀ yaviṣṭha ǀ
rátnam ǀ bhara ǀ śaśamānā́ya ǀ ghṛ́ṣve ǀ pṛthú ǀ candrám ǀ ávase ǀ carṣaṇi-prā́ḥ ǁ
Padapatha Transcription Nonaccented
tvam ǀ agne ǀ vāghate ǀ su-pranītiḥ ǀ suta-somāya ǀ vidhate ǀ yaviṣṭha ǀ
ratnam ǀ bhara ǀ śaśamānāya ǀ ghṛṣve ǀ pṛthu ǀ candram ǀ avase ǀ carṣaṇi-prāḥ ǁ
04.002.14 (Mandala. Sukta. Rik)
3.4.18.04 (Ashtaka. Adhyaya. Varga. Rik)
04.01.034 (Mandala. Anuvāka. Rik)
Samhita Devanagari Accented
अधा॑ ह॒ यद्व॒यम॑ग्ने त्वा॒या प॒ड्भिर्हस्ते॑भिश्चकृ॒मा त॒नूभिः॑ ।
रथं॒ न क्रंतो॒ अप॑सा भु॒रिजो॑र्ऋ॒तं ये॑मुः सु॒ध्य॑ आशुषा॒णाः ॥
Samhita Devanagari Nonaccented
अधा ह यद्वयमग्ने त्वाया पड्भिर्हस्तेभिश्चकृमा तनूभिः ।
रथं न क्रंतो अपसा भुरिजोर्ऋतं येमुः सुध्य आशुषाणाः ॥
Samhita Transcription Accented
ádhā ha yádvayámagne tvāyā́ paḍbhírhástebhiścakṛmā́ tanū́bhiḥ ǀ
rátham ná kránto ápasā bhuríjorṛtám yemuḥ sudhyá āśuṣāṇā́ḥ ǁ
Samhita Transcription Nonaccented
adhā ha yadvayamagne tvāyā paḍbhirhastebhiścakṛmā tanūbhiḥ ǀ
ratham na kranto apasā bhurijorṛtam yemuḥ sudhya āśuṣāṇāḥ ǁ
Padapatha Devanagari Accented
अध॑ । ह॒ । यत् । व॒यम् । अ॒ग्ने॒ । त्वा॒ऽया । प॒ट्ऽभिः । हस्ते॑भिः । च॒कृ॒म । त॒नूभिः॑ ।
रथ॑म् । न । क्रन्तः॑ । अप॑सा । भु॒रिजोः॑ । ऋ॒तम् । ये॒मुः॒ । सु॒ऽध्यः॑ । आ॒शु॒षा॒णाः ॥
Padapatha Devanagari Nonaccented
अध । ह । यत् । वयम् । अग्ने । त्वाऽया । पट्ऽभिः । हस्तेभिः । चकृम । तनूभिः ।
रथम् । न । क्रन्तः । अपसा । भुरिजोः । ऋतम् । येमुः । सुऽध्यः । आशुषाणाः ॥
Padapatha Transcription Accented
ádha ǀ ha ǀ yát ǀ vayám ǀ agne ǀ tvā-yā́ ǀ paṭ-bhíḥ ǀ hástebhiḥ ǀ cakṛmá ǀ tanū́bhiḥ ǀ
rátham ǀ ná ǀ krántaḥ ǀ ápasā ǀ bhuríjoḥ ǀ ṛtám ǀ yemuḥ ǀ su-dhyáḥ ǀ āśuṣāṇā́ḥ ǁ
Padapatha Transcription Nonaccented
adha ǀ ha ǀ yat ǀ vayam ǀ agne ǀ tvā-yā ǀ paṭ-bhiḥ ǀ hastebhiḥ ǀ cakṛma ǀ tanūbhiḥ ǀ
ratham ǀ na ǀ krantaḥ ǀ apasā ǀ bhurijoḥ ǀ ṛtam ǀ yemuḥ ǀ su-dhyaḥ ǀ āśuṣāṇāḥ ǁ
04.002.15 (Mandala. Sukta. Rik)
3.4.18.05 (Ashtaka. Adhyaya. Varga. Rik)
04.01.035 (Mandala. Anuvāka. Rik)
Samhita Devanagari Accented
अधा॑ मा॒तुरु॒षसः॑ स॒प्त विप्रा॒ जाये॑महि प्रथ॒मा वे॒धसो॒ नॄन् ।
दि॒वस्पु॒त्रा अंगि॑रसो भवे॒माद्रिं॑ रुजेम ध॒निनं॑ शु॒चंतः॑ ॥
Samhita Devanagari Nonaccented
अधा मातुरुषसः सप्त विप्रा जायेमहि प्रथमा वेधसो नॄन् ।
दिवस्पुत्रा अंगिरसो भवेमाद्रिं रुजेम धनिनं शुचंतः ॥
Samhita Transcription Accented
ádhā mātúruṣásaḥ saptá víprā jā́yemahi prathamā́ vedháso nṝ́n ǀ
divásputrā́ áṅgiraso bhavemā́drim rujema dhanínam śucántaḥ ǁ
Samhita Transcription Nonaccented
adhā māturuṣasaḥ sapta viprā jāyemahi prathamā vedhaso nṝn ǀ
divasputrā aṅgiraso bhavemādrim rujema dhaninam śucantaḥ ǁ
Padapatha Devanagari Accented
अध॑ । मा॒तुः । उ॒षसः॑ । स॒प्त । विप्राः॑ । जाये॑महि । प्र॒थ॒माः । वे॒धसः॑ । नॄन् ।
दि॒वः । पु॒त्राः । अङ्गि॑रसः । भ॒वे॒म॒ । अद्रि॑म् । रु॒जे॒म॒ । ध॒निन॑म् । शु॒चन्तः॑ ॥
Padapatha Devanagari Nonaccented
अध । मातुः । उषसः । सप्त । विप्राः । जायेमहि । प्रथमाः । वेधसः । नॄन् ।
दिवः । पुत्राः । अङ्गिरसः । भवेम । अद्रिम् । रुजेम । धनिनम् । शुचन्तः ॥
Padapatha Transcription Accented
ádha ǀ mātúḥ ǀ uṣásaḥ ǀ saptá ǀ víprāḥ ǀ jā́yemahi ǀ prathamā́ḥ ǀ vedhásaḥ ǀ nṝ́n ǀ
diváḥ ǀ putrā́ḥ ǀ áṅgirasaḥ ǀ bhavema ǀ ádrim ǀ rujema ǀ dhanínam ǀ śucántaḥ ǁ
Padapatha Transcription Nonaccented
adha ǀ mātuḥ ǀ uṣasaḥ ǀ sapta ǀ viprāḥ ǀ jāyemahi ǀ prathamāḥ ǀ vedhasaḥ ǀ nṝn ǀ
divaḥ ǀ putrāḥ ǀ aṅgirasaḥ ǀ bhavema ǀ adrim ǀ rujema ǀ dhaninam ǀ śucantaḥ ǁ
04.002.16 (Mandala. Sukta. Rik)
3.4.19.01 (Ashtaka. Adhyaya. Varga. Rik)
04.01.036 (Mandala. Anuvāka. Rik)
Samhita Devanagari Accented
अधा॒ यथा॑ नः पि॒तरः॒ परा॑सः प्र॒त्नासो॑ अग्न ऋ॒तमा॑शुषा॒णाः ।
शुचीद॑यं॒दीधि॑तिमुक्थ॒शासः॒ क्षामा॑ भिं॒दंतो॑ अरु॒णीरप॑ व्रन् ॥
Samhita Devanagari Nonaccented
अधा यथा नः पितरः परासः प्रत्नासो अग्न ऋतमाशुषाणाः ।
शुचीदयंदीधितिमुक्थशासः क्षामा भिंदंतो अरुणीरप व्रन् ॥
Samhita Transcription Accented
ádhā yáthā naḥ pitáraḥ párāsaḥ pratnā́so agna ṛtámāśuṣāṇā́ḥ ǀ
śúcī́dayandī́dhitimukthaśā́saḥ kṣā́mā bhindánto aruṇī́rápa vran ǁ
Samhita Transcription Nonaccented
adhā yathā naḥ pitaraḥ parāsaḥ pratnāso agna ṛtamāśuṣāṇāḥ ǀ
śucīdayandīdhitimukthaśāsaḥ kṣāmā bhindanto aruṇīrapa vran ǁ
Padapatha Devanagari Accented
अध॑ । यथा॑ । नः॒ । पि॒तरः॑ । परा॑सः । प्र॒त्नासः॑ । अ॒ग्ने॒ । ऋ॒तम् । आ॒शु॒षा॒णाः ।
शुचि॑ । इत् । अ॒य॒न् । दीधि॑तिम् । उ॒क्थ॒ऽशसः॑ । क्षामा॑ । भि॒न्दन्तः॑ । अ॒रु॒णीः । अप॑ । व्र॒न् ॥
Padapatha Devanagari Nonaccented
अध । यथा । नः । पितरः । परासः । प्रत्नासः । अग्ने । ऋतम् । आशुषाणाः ।
शुचि । इत् । अयन् । दीधितिम् । उक्थऽशसः । क्षामा । भिन्दन्तः । अरुणीः । अप । व्रन् ॥
Padapatha Transcription Accented
ádha ǀ yáthā ǀ naḥ ǀ pitáraḥ ǀ párāsaḥ ǀ pratnā́saḥ ǀ agne ǀ ṛtám ǀ āśuṣāṇā́ḥ ǀ
śúci ǀ ít ǀ ayan ǀ dī́dhitim ǀ uktha-śásaḥ ǀ kṣā́mā ǀ bhindántaḥ ǀ aruṇī́ḥ ǀ ápa ǀ vran ǁ
Padapatha Transcription Nonaccented
adha ǀ yathā ǀ naḥ ǀ pitaraḥ ǀ parāsaḥ ǀ pratnāsaḥ ǀ agne ǀ ṛtam ǀ āśuṣāṇāḥ ǀ
śuci ǀ it ǀ ayan ǀ dīdhitim ǀ uktha-śasaḥ ǀ kṣāmā ǀ bhindantaḥ ǀ aruṇīḥ ǀ apa ǀ vran ǁ
04.002.17 (Mandala. Sukta. Rik)
3.4.19.02 (Ashtaka. Adhyaya. Varga. Rik)
04.01.037 (Mandala. Anuvāka. Rik)
Samhita Devanagari Accented
सु॒कर्मा॑णः सु॒रुचो॑ देव॒यंतोऽयो॒ न दे॒वा जनि॑मा॒ धमं॑तः ।
शु॒चंतो॑ अ॒ग्निं व॑वृ॒धंत॒ इंद्र॑मू॒र्वं गव्यं॑ परि॒षदं॑तो अग्मन् ॥
Samhita Devanagari Nonaccented
सुकर्माणः सुरुचो देवयंतोऽयो न देवा जनिमा धमंतः ।
शुचंतो अग्निं ववृधंत इंद्रमूर्वं गव्यं परिषदंतो अग्मन् ॥
Samhita Transcription Accented
sukármāṇaḥ surúco devayántó’yo ná devā́ jánimā dhámantaḥ ǀ
śucánto agním vavṛdhánta índramūrvám gávyam pariṣádanto agman ǁ
Samhita Transcription Nonaccented
sukarmāṇaḥ suruco devayanto’yo na devā janimā dhamantaḥ ǀ
śucanto agnim vavṛdhanta indramūrvam gavyam pariṣadanto agman ǁ
Padapatha Devanagari Accented
सु॒ऽकर्मा॑णः । सु॒ऽरुचः॑ । दे॒व॒ऽयन्तः॑ । अयः॑ । न । दे॒वाः । जनि॑म । धम॑न्तः ।
शु॒चन्तः॑ । अ॒ग्निम् । व॒वृ॒धन्तः॑ । इन्द्र॑म् । ऊ॒र्वम् । गव्य॑म् । प॒रि॒ऽसद॑न्तः । अ॒ग्म॒न् ॥
Padapatha Devanagari Nonaccented
सुऽकर्माणः । सुऽरुचः । देवऽयन्तः । अयः । न । देवाः । जनिम । धमन्तः ।
शुचन्तः । अग्निम् । ववृधन्तः । इन्द्रम् । ऊर्वम् । गव्यम् । परिऽसदन्तः । अग्मन् ॥
Padapatha Transcription Accented
su-kármāṇaḥ ǀ su-rúcaḥ ǀ deva-yántaḥ ǀ áyaḥ ǀ ná ǀ devā́ḥ ǀ jánima ǀ dhámantaḥ ǀ
śucántaḥ ǀ agním ǀ vavṛdhántaḥ ǀ índram ǀ ūrvám ǀ gávyam ǀ pari-sádantaḥ ǀ agman ǁ
Padapatha Transcription Nonaccented
su-karmāṇaḥ ǀ su-rucaḥ ǀ deva-yantaḥ ǀ ayaḥ ǀ na ǀ devāḥ ǀ janima ǀ dhamantaḥ ǀ
śucantaḥ ǀ agnim ǀ vavṛdhantaḥ ǀ indram ǀ ūrvam ǀ gavyam ǀ pari-sadantaḥ ǀ agman ǁ
04.002.18 (Mandala. Sukta. Rik)
3.4.19.03 (Ashtaka. Adhyaya. Varga. Rik)
04.01.038 (Mandala. Anuvāka. Rik)
Samhita Devanagari Accented
आ यू॒थेव॑ क्षु॒मति॑ प॒श्वो अ॑ख्यद्दे॒वानां॒ यज्जनि॒मांत्यु॑ग्र ।
मर्ता॑नां चिदु॒र्वशी॑रकृप्रन्वृ॒धे चि॑द॒र्य उप॑रस्या॒योः ॥
Samhita Devanagari Nonaccented
आ यूथेव क्षुमति पश्वो अख्यद्देवानां यज्जनिमांत्युग्र ।
मर्तानां चिदुर्वशीरकृप्रन्वृधे चिदर्य उपरस्यायोः ॥
Samhita Transcription Accented
ā́ yūthéva kṣumáti paśvó akhyaddevā́nām yájjánimā́ntyugra ǀ
mártānām cidurváśīrakṛpranvṛdhé cidaryá úparasyāyóḥ ǁ
Samhita Transcription Nonaccented
ā yūtheva kṣumati paśvo akhyaddevānām yajjanimāntyugra ǀ
martānām cidurvaśīrakṛpranvṛdhe cidarya uparasyāyoḥ ǁ
Padapatha Devanagari Accented
आ । यू॒थाऽइ॑व । क्षु॒ऽमति॑ । प॒श्वः । अ॒ख्य॒त् । दे॒वाना॑म् । यत् । जनि॑म । अन्ति॑ । उ॒ग्र॒ ।
मर्ता॑नाम् । चि॒त् । उ॒र्वशीः॑ । अ॒कृ॒प्र॒न् । वृ॒धे । चि॒त् । अ॒र्यः । उप॑रस्य । आ॒योः ॥
Padapatha Devanagari Nonaccented
आ । यूथाऽइव । क्षुऽमति । पश्वः । अख्यत् । देवानाम् । यत् । जनिम । अन्ति । उग्र ।
मर्तानाम् । चित् । उर्वशीः । अकृप्रन् । वृधे । चित् । अर्यः । उपरस्य । आयोः ॥
Padapatha Transcription Accented
ā́ ǀ yūthā́-iva ǀ kṣu-máti ǀ paśváḥ ǀ akhyat ǀ devā́nām ǀ yát ǀ jánima ǀ ánti ǀ ugra ǀ
mártānām ǀ cit ǀ urváśīḥ ǀ akṛpran ǀ vṛdhé ǀ cit ǀ aryáḥ ǀ úparasya ǀ āyóḥ ǁ
Padapatha Transcription Nonaccented
ā ǀ yūthā-iva ǀ kṣu-mati ǀ paśvaḥ ǀ akhyat ǀ devānām ǀ yat ǀ janima ǀ anti ǀ ugra ǀ
martānām ǀ cit ǀ urvaśīḥ ǀ akṛpran ǀ vṛdhe ǀ cit ǀ aryaḥ ǀ uparasya ǀ āyoḥ ǁ
04.002.19 (Mandala. Sukta. Rik)
3.4.19.04 (Ashtaka. Adhyaya. Varga. Rik)
04.01.039 (Mandala. Anuvāka. Rik)
Samhita Devanagari Accented
अक॑र्म ते॒ स्वप॑सो अभूम ऋ॒तम॑वस्रन्नु॒षसो॑ विभा॒तीः ।
अनू॑नम॒ग्निं पु॑रु॒धा सु॑श्चं॒द्रं दे॒वस्य॒ मर्मृ॑जत॒श्चारु॒ चक्षुः॑ ॥
Samhita Devanagari Nonaccented
अकर्म ते स्वपसो अभूम ऋतमवस्रन्नुषसो विभातीः ।
अनूनमग्निं पुरुधा सुश्चंद्रं देवस्य मर्मृजतश्चारु चक्षुः ॥
Samhita Transcription Accented
ákarma te svápaso abhūma ṛtámavasrannuṣáso vibhātī́ḥ ǀ
ánūnamagním purudhā́ suścandrám devásya mármṛjataścā́ru cákṣuḥ ǁ
Samhita Transcription Nonaccented
akarma te svapaso abhūma ṛtamavasrannuṣaso vibhātīḥ ǀ
anūnamagnim purudhā suścandram devasya marmṛjataścāru cakṣuḥ ǁ
Padapatha Devanagari Accented
अक॑र्म । ते॒ । सु॒ऽअप॑सः । अ॒भू॒म॒ । ऋ॒तम् । अ॒व॒स्र॒न् । उ॒षसः॑ । वि॒ऽभा॒तीः ।
अनू॑नम् । अ॒ग्निम् । पु॒रु॒धा । सु॒ऽच॒न्द्रम् । दे॒वस्य॑ । मर्मृ॑जतः । चारु॑ । चक्षुः॑ ॥
Padapatha Devanagari Nonaccented
अकर्म । ते । सुऽअपसः । अभूम । ऋतम् । अवस्रन् । उषसः । विऽभातीः ।
अनूनम् । अग्निम् । पुरुधा । सुऽचन्द्रम् । देवस्य । मर्मृजतः । चारु । चक्षुः ॥
Padapatha Transcription Accented
ákarma ǀ te ǀ su-ápasaḥ ǀ abhūma ǀ ṛtám ǀ avasran ǀ uṣásaḥ ǀ vi-bhātī́ḥ ǀ
ánūnam ǀ agním ǀ purudhā́ ǀ su-candrám ǀ devásya ǀ mármṛjataḥ ǀ cā́ru ǀ cákṣuḥ ǁ
Padapatha Transcription Nonaccented
akarma ǀ te ǀ su-apasaḥ ǀ abhūma ǀ ṛtam ǀ avasran ǀ uṣasaḥ ǀ vi-bhātīḥ ǀ
anūnam ǀ agnim ǀ purudhā ǀ su-candram ǀ devasya ǀ marmṛjataḥ ǀ cāru ǀ cakṣuḥ ǁ
04.002.20 (Mandala. Sukta. Rik)
3.4.19.05 (Ashtaka. Adhyaya. Varga. Rik)
04.01.040 (Mandala. Anuvāka. Rik)
Samhita Devanagari Accented
ए॒ता ते॑ अग्न उ॒चथा॑नि वे॒धोऽवो॑चाम क॒वये॒ ता जु॑षस्व ।
उच्छो॑चस्व कृणु॒हि वस्य॑सो नो म॒हो रा॒यः पु॑रुवार॒ प्र यं॑धि ॥
Samhita Devanagari Nonaccented
एता ते अग्न उचथानि वेधोऽवोचाम कवये ता जुषस्व ।
उच्छोचस्व कृणुहि वस्यसो नो महो रायः पुरुवार प्र यंधि ॥
Samhita Transcription Accented
etā́ te agna ucáthāni vedhó’vocāma kaváye tā́ juṣasva ǀ
úcchocasva kṛṇuhí vásyaso no mahó rāyáḥ puruvāra prá yandhi ǁ
Samhita Transcription Nonaccented
etā te agna ucathāni vedho’vocāma kavaye tā juṣasva ǀ
ucchocasva kṛṇuhi vasyaso no maho rāyaḥ puruvāra pra yandhi ǁ
Padapatha Devanagari Accented
ए॒ता । ते॒ । अ॒ग्ने॒ । उ॒चथा॑नि । वे॒धः॒ । अवो॑चाम । क॒वये॑ । ता । जु॒ष॒स्व॒ ।
उत् । शो॒च॒स्व॒ । कृ॒णु॒हि । वस्य॑सः । नः॒ । म॒हः । रा॒यः । पु॒रु॒ऽवा॒र॒ । प्र । य॒न्धि॒ ॥
Padapatha Devanagari Nonaccented
एता । ते । अग्ने । उचथानि । वेधः । अवोचाम । कवये । ता । जुषस्व ।
उत् । शोचस्व । कृणुहि । वस्यसः । नः । महः । रायः । पुरुऽवार । प्र । यन्धि ॥
Padapatha Transcription Accented
etā́ ǀ te ǀ agne ǀ ucáthāni ǀ vedhaḥ ǀ ávocāma ǀ kaváye ǀ tā́ ǀ juṣasva ǀ
út ǀ śocasva ǀ kṛṇuhí ǀ vásyasaḥ ǀ naḥ ǀ maháḥ ǀ rāyáḥ ǀ puru-vāra ǀ prá ǀ yandhi ǁ
Padapatha Transcription Nonaccented
etā ǀ te ǀ agne ǀ ucathāni ǀ vedhaḥ ǀ avocāma ǀ kavaye ǀ tā ǀ juṣasva ǀ
ut ǀ śocasva ǀ kṛṇuhi ǀ vasyasaḥ ǀ naḥ ǀ mahaḥ ǀ rāyaḥ ǀ puru-vāra ǀ pra ǀ yandhi ǁ