|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 4
Sūkta 11
|
1. Info |
| To: | agni | |
| From: | vāmadeva gautama | |
| Metres: | 1st set of styles: nicṛttriṣṭup (1, 2, 5, 6); svarāḍbṛhatī (3); bhurikpaṅkti (4) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
04.011.01 (Mandala. Sukta. Rik)
3.5.11.01 (Ashtaka. Adhyaya. Varga. Rik)
04.02.001 (Mandala. Anuvāka. Rik)
Samhita Devanagari Accented
भ॒द्रं ते॑ अग्ने सहसि॒न्ननी॑कमुपा॒क आ रो॑चते॒ सूर्य॑स्य ।
रुश॑द्दृ॒शे द॑दृशे नक्त॒या चि॒दरू॑क्षितं दृ॒श आ रू॒पे अन्नं॑ ॥
Samhita Devanagari Nonaccented
भद्रं ते अग्ने सहसिन्ननीकमुपाक आ रोचते सूर्यस्य ।
रुशद्दृशे ददृशे नक्तया चिदरूक्षितं दृश आ रूपे अन्नं ॥
Samhita Transcription Accented
bhadrám te agne sahasinnánīkamupāká ā́ rocate sū́ryasya ǀ
rúśaddṛśé dadṛśe naktayā́ cidárūkṣitam dṛśá ā́ rūpé ánnam ǁ
Samhita Transcription Nonaccented
bhadram te agne sahasinnanīkamupāka ā rocate sūryasya ǀ
ruśaddṛśe dadṛśe naktayā cidarūkṣitam dṛśa ā rūpe annam ǁ
Padapatha Devanagari Accented
भ॒द्रम् । ते॒ । अ॒ग्ने॒ । स॒ह॒सि॒न् । अनी॑कम् । उ॒पा॒के । आ । रो॒च॒ते॒ । सूर्य॑स्य ।
रुश॑त् । दृ॒शे । द॒दृ॒शे॒ । न॒क्त॒ऽया । चि॒त् । अरू॑क्षितम् । दृ॒शे । आ । रू॒पे । अन्न॑म् ॥
Padapatha Devanagari Nonaccented
भद्रम् । ते । अग्ने । सहसिन् । अनीकम् । उपाके । आ । रोचते । सूर्यस्य ।
रुशत् । दृशे । ददृशे । नक्तऽया । चित् । अरूक्षितम् । दृशे । आ । रूपे । अन्नम् ॥
Padapatha Transcription Accented
bhadrám ǀ te ǀ agne ǀ sahasin ǀ ánīkam ǀ upāké ǀ ā́ ǀ rocate ǀ sū́ryasya ǀ
rúśat ǀ dṛśé ǀ dadṛśe ǀ nakta-yā́ ǀ cit ǀ árūkṣitam ǀ dṛśé ǀ ā́ ǀ rūpé ǀ ánnam ǁ
Padapatha Transcription Nonaccented
bhadram ǀ te ǀ agne ǀ sahasin ǀ anīkam ǀ upāke ǀ ā ǀ rocate ǀ sūryasya ǀ
ruśat ǀ dṛśe ǀ dadṛśe ǀ nakta-yā ǀ cit ǀ arūkṣitam ǀ dṛśe ǀ ā ǀ rūpe ǀ annam ǁ
04.011.02 (Mandala. Sukta. Rik)
3.5.11.02 (Ashtaka. Adhyaya. Varga. Rik)
04.02.002 (Mandala. Anuvāka. Rik)
Samhita Devanagari Accented
वि षा॑ह्यग्ने गृण॒ते म॑नी॒षां खं वेप॑सा तुविजात॒ स्तवा॑नः ।
विश्वे॑भि॒र्यद्वा॒वनः॑ शुक्र दे॒वैस्तन्नो॑ रास्व सुमहो॒ भूरि॒ मन्म॑ ॥
Samhita Devanagari Nonaccented
वि षाह्यग्ने गृणते मनीषां खं वेपसा तुविजात स्तवानः ।
विश्वेभिर्यद्वावनः शुक्र देवैस्तन्नो रास्व सुमहो भूरि मन्म ॥
Samhita Transcription Accented
ví ṣāhyagne gṛṇaté manīṣā́m khám vépasā tuvijāta stávānaḥ ǀ
víśvebhiryádvāvánaḥ śukra deváistánno rāsva sumaho bhū́ri mánma ǁ
Samhita Transcription Nonaccented
vi ṣāhyagne gṛṇate manīṣām kham vepasā tuvijāta stavānaḥ ǀ
viśvebhiryadvāvanaḥ śukra devaistanno rāsva sumaho bhūri manma ǁ
Padapatha Devanagari Accented
वि । सा॒हि॒ । अ॒ग्ने॒ । गृ॒ण॒ते । म॒नी॒षाम् । खम् । वेप॑सा । तु॒वि॒ऽजा॒त॒ । स्तवा॑नः ।
विश्वे॑भिः । यत् । व॒वनः॑ । शु॒क्र॒ । दे॒वैः । तत् । नः॒ । रा॒स्व॒ । सु॒ऽम॒हः॒ । भूरि॑ । मन्म॑ ॥
Padapatha Devanagari Nonaccented
वि । साहि । अग्ने । गृणते । मनीषाम् । खम् । वेपसा । तुविऽजात । स्तवानः ।
विश्वेभिः । यत् । ववनः । शुक्र । देवैः । तत् । नः । रास्व । सुऽमहः । भूरि । मन्म ॥
Padapatha Transcription Accented
ví ǀ sāhi ǀ agne ǀ gṛṇaté ǀ manīṣā́m ǀ khám ǀ vépasā ǀ tuvi-jāta ǀ stávānaḥ ǀ
víśvebhiḥ ǀ yát ǀ vavánaḥ ǀ śukra ǀ deváiḥ ǀ tát ǀ naḥ ǀ rāsva ǀ su-mahaḥ ǀ bhū́ri ǀ mánma ǁ
Padapatha Transcription Nonaccented
vi ǀ sāhi ǀ agne ǀ gṛṇate ǀ manīṣām ǀ kham ǀ vepasā ǀ tuvi-jāta ǀ stavānaḥ ǀ
viśvebhiḥ ǀ yat ǀ vavanaḥ ǀ śukra ǀ devaiḥ ǀ tat ǀ naḥ ǀ rāsva ǀ su-mahaḥ ǀ bhūri ǀ manma ǁ
04.011.03 (Mandala. Sukta. Rik)
3.5.11.03 (Ashtaka. Adhyaya. Varga. Rik)
04.02.003 (Mandala. Anuvāka. Rik)
Samhita Devanagari Accented
त्वद॑ग्ने॒ काव्या॒ त्वन्म॑नी॒षास्त्वदु॒क्था जा॑यंते॒ राध्या॑नि ।
त्वदे॑ति॒ द्रवि॑णं वी॒रपे॑शा इ॒त्थाधि॑ये दा॒शुषे॒ मर्त्या॑य ॥
Samhita Devanagari Nonaccented
त्वदग्ने काव्या त्वन्मनीषास्त्वदुक्था जायंते राध्यानि ।
त्वदेति द्रविणं वीरपेशा इत्थाधिये दाशुषे मर्त्याय ॥
Samhita Transcription Accented
tvádagne kā́vyā tvánmanīṣā́stvádukthā́ jāyante rā́dhyāni ǀ
tvádeti dráviṇam vīrápeśā itthā́dhiye dāśúṣe mártyāya ǁ
Samhita Transcription Nonaccented
tvadagne kāvyā tvanmanīṣāstvadukthā jāyante rādhyāni ǀ
tvadeti draviṇam vīrapeśā itthādhiye dāśuṣe martyāya ǁ
Padapatha Devanagari Accented
त्वत् । अ॒ग्ने॒ । काव्या॑ । त्वम् । म॒नी॒षाः । त्वत् । उ॒क्था । जा॒य॒न्ते॒ । राध्या॑नि ।
त्वत् । ए॒ति॒ । द्रवि॑णम् । वी॒रऽपे॑शाः । इ॒त्थाऽधि॑ये । दा॒शुषे॑ । मर्त्या॑य ॥
Padapatha Devanagari Nonaccented
त्वत् । अग्ने । काव्या । त्वम् । मनीषाः । त्वत् । उक्था । जायन्ते । राध्यानि ।
त्वत् । एति । द्रविणम् । वीरऽपेशाः । इत्थाऽधिये । दाशुषे । मर्त्याय ॥
Padapatha Transcription Accented
tvát ǀ agne ǀ kā́vyā ǀ tvám ǀ manīṣā́ḥ ǀ tvát ǀ ukthā́ ǀ jāyante ǀ rā́dhyāni ǀ
tvát ǀ eti ǀ dráviṇam ǀ vīrá-peśāḥ ǀ itthā́-dhiye ǀ dāśúṣe ǀ mártyāya ǁ
Padapatha Transcription Nonaccented
tvat ǀ agne ǀ kāvyā ǀ tvam ǀ manīṣāḥ ǀ tvat ǀ ukthā ǀ jāyante ǀ rādhyāni ǀ
tvat ǀ eti ǀ draviṇam ǀ vīra-peśāḥ ǀ itthā-dhiye ǀ dāśuṣe ǀ martyāya ǁ
04.011.04 (Mandala. Sukta. Rik)
3.5.11.04 (Ashtaka. Adhyaya. Varga. Rik)
04.02.004 (Mandala. Anuvāka. Rik)
Samhita Devanagari Accented
त्वद्वा॒जी वा॑जंभ॒रो विहा॑या अभिष्टि॒कृज्जा॑यते स॒त्यशु॑ष्मः ।
त्वद्र॒यिर्दे॒वजू॑तो मयो॒भुस्त्वदा॒शुर्जू॑जु॒वाँ अ॑ग्ने॒ अर्वा॑ ॥
Samhita Devanagari Nonaccented
त्वद्वाजी वाजंभरो विहाया अभिष्टिकृज्जायते सत्यशुष्मः ।
त्वद्रयिर्देवजूतो मयोभुस्त्वदाशुर्जूजुवाँ अग्ने अर्वा ॥
Samhita Transcription Accented
tvádvājī́ vājambharó víhāyā abhiṣṭikṛ́jjāyate satyáśuṣmaḥ ǀ
tvádrayírdevájūto mayobhústvádāśúrjūjuvā́m̐ agne árvā ǁ
Samhita Transcription Nonaccented
tvadvājī vājambharo vihāyā abhiṣṭikṛjjāyate satyaśuṣmaḥ ǀ
tvadrayirdevajūto mayobhustvadāśurjūjuvām̐ agne arvā ǁ
Padapatha Devanagari Accented
त्वत् । वा॒जी । वा॒ज॒म्ऽभ॒रः । विऽहा॑याः । अ॒भि॒ष्टि॒ऽकृत् । जा॒य॒ते॒ । स॒त्यऽशु॑ष्मः ।
त्वत् । र॒यिः । दे॒वऽजू॑तः । म॒यः॒ऽभुः । त्वत् । आ॒शुः । जू॒जु॒ऽवान् । अ॒ग्ने॒ । अर्वा॑ ॥
Padapatha Devanagari Nonaccented
त्वत् । वाजी । वाजम्ऽभरः । विऽहायाः । अभिष्टिऽकृत् । जायते । सत्यऽशुष्मः ।
त्वत् । रयिः । देवऽजूतः । मयःऽभुः । त्वत् । आशुः । जूजुऽवान् । अग्ने । अर्वा ॥
Padapatha Transcription Accented
tvát ǀ vājī́ ǀ vājam-bharáḥ ǀ ví-hāyāḥ ǀ abhiṣṭi-kṛ́t ǀ jāyate ǀ satyá-śuṣmaḥ ǀ
tvát ǀ rayíḥ ǀ devá-jūtaḥ ǀ mayaḥ-bhúḥ ǀ tvát ǀ āśúḥ ǀ jūju-vā́n ǀ agne ǀ árvā ǁ
Padapatha Transcription Nonaccented
tvat ǀ vājī ǀ vājam-bharaḥ ǀ vi-hāyāḥ ǀ abhiṣṭi-kṛt ǀ jāyate ǀ satya-śuṣmaḥ ǀ
tvat ǀ rayiḥ ǀ deva-jūtaḥ ǀ mayaḥ-bhuḥ ǀ tvat ǀ āśuḥ ǀ jūju-vān ǀ agne ǀ arvā ǁ
04.011.05 (Mandala. Sukta. Rik)
3.5.11.05 (Ashtaka. Adhyaya. Varga. Rik)
04.02.005 (Mandala. Anuvāka. Rik)
Samhita Devanagari Accented
त्वाम॑ग्ने प्रथ॒मं दे॑व॒यंतो॑ दे॒वं मर्ता॑ अमृत मं॒द्रजि॑ह्वं ।
द्वे॒षो॒युत॒मा वि॑वासंति धी॒भिर्दमू॑नसं गृ॒हप॑ति॒ममू॑रं ॥
Samhita Devanagari Nonaccented
त्वामग्ने प्रथमं देवयंतो देवं मर्ता अमृत मंद्रजिह्वं ।
द्वेषोयुतमा विवासंति धीभिर्दमूनसं गृहपतिममूरं ॥
Samhita Transcription Accented
tvā́magne prathamám devayánto devám mártā amṛta mandrájihvam ǀ
dveṣoyútamā́ vivāsanti dhībhírdámūnasam gṛhápatimámūram ǁ
Samhita Transcription Nonaccented
tvāmagne prathamam devayanto devam martā amṛta mandrajihvam ǀ
dveṣoyutamā vivāsanti dhībhirdamūnasam gṛhapatimamūram ǁ
Padapatha Devanagari Accented
त्वाम् । अ॒ग्ने॒ । प्र॒थ॒मम् । दे॒व॒ऽयन्तः॑ । दे॒वम् । भर्ता॑ । अ॒मृ॒त॒ । म॒न्द्रऽजि॑ह्वम् ।
द्वे॒षः॒ऽयुत॑म् । आ । वि॒वा॒स॒न्ति॒ । धी॒भिः । दमू॑नसम् । गृ॒हऽप॑तिम् । अमू॑रम् ॥
Padapatha Devanagari Nonaccented
त्वाम् । अग्ने । प्रथमम् । देवऽयन्तः । देवम् । भर्ता । अमृत । मन्द्रऽजिह्वम् ।
द्वेषःऽयुतम् । आ । विवासन्ति । धीभिः । दमूनसम् । गृहऽपतिम् । अमूरम् ॥
Padapatha Transcription Accented
tvā́m ǀ agne ǀ prathamám ǀ deva-yántaḥ ǀ devám ǀ bhártā ǀ amṛta ǀ mandrá-jihvam ǀ
dveṣaḥ-yútam ǀ ā́ ǀ vivāsanti ǀ dhībhíḥ ǀ dámūnasam ǀ gṛhá-patim ǀ ámūram ǁ
Padapatha Transcription Nonaccented
tvām ǀ agne ǀ prathamam ǀ deva-yantaḥ ǀ devam ǀ bhartā ǀ amṛta ǀ mandra-jihvam ǀ
dveṣaḥ-yutam ǀ ā ǀ vivāsanti ǀ dhībhiḥ ǀ damūnasam ǀ gṛha-patim ǀ amūram ǁ
04.011.06 (Mandala. Sukta. Rik)
3.5.11.06 (Ashtaka. Adhyaya. Varga. Rik)
04.02.006 (Mandala. Anuvāka. Rik)
Samhita Devanagari Accented
आ॒रे अ॒स्मदम॑तिमा॒रे अंह॑ आ॒रे विश्वां॑ दुर्म॒तिं यन्नि॒पासि॑ ।
दो॒षा शि॒वः स॑हसः सूनो अग्ने॒ यं दे॒व आ चि॒त्सच॑से स्व॒स्ति ॥
Samhita Devanagari Nonaccented
आरे अस्मदमतिमारे अंह आरे विश्वां दुर्मतिं यन्निपासि ।
दोषा शिवः सहसः सूनो अग्ने यं देव आ चित्सचसे स्वस्ति ॥
Samhita Transcription Accented
āré asmádámatimāré áṃha āré víśvām durmatím yánnipā́si ǀ
doṣā́ śiváḥ sahasaḥ sūno agne yám devá ā́ citsácase svastí ǁ
Samhita Transcription Nonaccented
āre asmadamatimāre aṃha āre viśvām durmatim yannipāsi ǀ
doṣā śivaḥ sahasaḥ sūno agne yam deva ā citsacase svasti ǁ
Padapatha Devanagari Accented
आ॒रे । अ॒स्मत् । अम॑तिम् । आ॒रे । अंहः॑ । आ॒रे । विश्वा॑म् । दुः॒ऽम॒तिम् । यत् । नि॒ऽपासि॑ ।
दो॒षा । शि॒वः । स॒ह॒सः॒ । सू॒नो॒ इति॑ । अ॒ग्ने॒ । यम् । दे॒वः । आ । चि॒त् । सच॑से । स्व॒स्ति ॥
Padapatha Devanagari Nonaccented
आरे । अस्मत् । अमतिम् । आरे । अंहः । आरे । विश्वाम् । दुःऽमतिम् । यत् । निऽपासि ।
दोषा । शिवः । सहसः । सूनो इति । अग्ने । यम् । देवः । आ । चित् । सचसे । स्वस्ति ॥
Padapatha Transcription Accented
āré ǀ asmát ǀ ámatim ǀ āré ǀ áṃhaḥ ǀ āré ǀ víśvām ǀ duḥ-matím ǀ yát ǀ ni-pā́si ǀ
doṣā́ ǀ śiváḥ ǀ sahasaḥ ǀ sūno íti ǀ agne ǀ yám ǀ deváḥ ǀ ā́ ǀ cit ǀ sácase ǀ svastí ǁ
Padapatha Transcription Nonaccented
āre ǀ asmat ǀ amatim ǀ āre ǀ aṃhaḥ ǀ āre ǀ viśvām ǀ duḥ-matim ǀ yat ǀ ni-pāsi ǀ
doṣā ǀ śivaḥ ǀ sahasaḥ ǀ sūno iti ǀ agne ǀ yam ǀ devaḥ ǀ ā ǀ cit ǀ sacase ǀ svasti ǁ