|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 4
Sūkta 19
|
1. Info |
| To: | indra | |
| From: | vāmadeva gautama | |
| Metres: | 1st set of styles: triṣṭup (3, 5, 8); nicṛttriṣṭup (2, 9); bhurikpaṅkti (4, 6); paṅktiḥ (7, 10); virāṭtrisṭup (1); nicṛtpaṅkti (11) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
04.019.01 (Mandala. Sukta. Rik)
3.6.01.01 (Ashtaka. Adhyaya. Varga. Rik)
04.02.088 (Mandala. Anuvāka. Rik)
Samhita Devanagari Accented
ए॒वा त्वामिं॑द्र वज्रि॒न्नत्र॒ विश्वे॑ दे॒वासः॑ सु॒हवा॑स॒ ऊमाः॑ ।
म॒हामु॒भे रोद॑सी वृ॒द्धमृ॒ष्वं निरेक॒मिद्वृ॑णते वृत्र॒हत्ये॑ ॥
Samhita Devanagari Nonaccented
एवा त्वामिंद्र वज्रिन्नत्र विश्वे देवासः सुहवास ऊमाः ।
महामुभे रोदसी वृद्धमृष्वं निरेकमिद्वृणते वृत्रहत्ये ॥
Samhita Transcription Accented
evā́ tvā́mindra vajrinnátra víśve devā́saḥ suhávāsa ū́māḥ ǀ
mahā́mubhé ródasī vṛddhámṛṣvám nírékamídvṛṇate vṛtrahátye ǁ
Samhita Transcription Nonaccented
evā tvāmindra vajrinnatra viśve devāsaḥ suhavāsa ūmāḥ ǀ
mahāmubhe rodasī vṛddhamṛṣvam nirekamidvṛṇate vṛtrahatye ǁ
Padapatha Devanagari Accented
ए॒व । त्वाम् । इ॒न्द्र॒ । व॒ज्रि॒न् । अत्र॑ । विश्वे॑ । दे॒वासः॑ । सु॒ऽहवा॑सः । ऊमाः॑ ।
म॒हाम् । उ॒भे इति॑ । रोद॑सी॒ इति॑ । वृ॒द्धम् । ऋ॒ष्वम् । निः । एक॑म् । इत् । गृ॒ण॒ते॒ । वृ॒त्र॒ऽहत्ये॑ ॥
Padapatha Devanagari Nonaccented
एव । त्वाम् । इन्द्र । वज्रिन् । अत्र । विश्वे । देवासः । सुऽहवासः । ऊमाः ।
महाम् । उभे इति । रोदसी इति । वृद्धम् । ऋष्वम् । निः । एकम् । इत् । गृणते । वृत्रऽहत्ये ॥
Padapatha Transcription Accented
evá ǀ tvā́m ǀ indra ǀ vajrin ǀ átra ǀ víśve ǀ devā́saḥ ǀ su-hávāsaḥ ǀ ū́māḥ ǀ
mahā́m ǀ ubhé íti ǀ ródasī íti ǀ vṛddhám ǀ ṛṣvám ǀ níḥ ǀ ékam ǀ ít ǀ gṛṇate ǀ vṛtra-hátye ǁ
Padapatha Transcription Nonaccented
eva ǀ tvām ǀ indra ǀ vajrin ǀ atra ǀ viśve ǀ devāsaḥ ǀ su-havāsaḥ ǀ ūmāḥ ǀ
mahām ǀ ubhe iti ǀ rodasī iti ǀ vṛddham ǀ ṛṣvam ǀ niḥ ǀ ekam ǀ it ǀ gṛṇate ǀ vṛtra-hatye ǁ
04.019.02 (Mandala. Sukta. Rik)
3.6.01.02 (Ashtaka. Adhyaya. Varga. Rik)
04.02.089 (Mandala. Anuvāka. Rik)
Samhita Devanagari Accented
अवा॑सृजंत॒ जिव्र॑यो॒ न दे॒वा भुवः॑ स॒म्राळिं॑द्र स॒त्ययो॑निः ।
अह॒न्नहिं॑ परि॒शया॑न॒मर्णः॒ प्र व॑र्त॒नीर॑रदो वि॒श्वधे॑नाः ॥
Samhita Devanagari Nonaccented
अवासृजंत जिव्रयो न देवा भुवः सम्राळिंद्र सत्ययोनिः ।
अहन्नहिं परिशयानमर्णः प्र वर्तनीररदो विश्वधेनाः ॥
Samhita Transcription Accented
ávāsṛjanta jívrayo ná devā́ bhúvaḥ samrā́ḷindra satyáyoniḥ ǀ
áhannáhim pariśáyānamárṇaḥ prá vartanī́rarado viśvádhenāḥ ǁ
Samhita Transcription Nonaccented
avāsṛjanta jivrayo na devā bhuvaḥ samrāḷindra satyayoniḥ ǀ
ahannahim pariśayānamarṇaḥ pra vartanīrarado viśvadhenāḥ ǁ
Padapatha Devanagari Accented
अव॑ । अ॒सृ॒ज॒न्त॒ । जिव्र॑यः । न । दे॒वाः । भुवः॑ । स॒म्ऽराट् । इ॒न्द्र॒ । स॒त्यऽयो॑निः ।
अह॑न् । अहि॑म् । प॒रि॒ऽशया॑नम् । अर्णः॑ । प्र । व॒र्त॒नीः । अ॒र॒दः॒ । वि॒श्वऽधे॑नाः ॥
Padapatha Devanagari Nonaccented
अव । असृजन्त । जिव्रयः । न । देवाः । भुवः । सम्ऽराट् । इन्द्र । सत्यऽयोनिः ।
अहन् । अहिम् । परिऽशयानम् । अर्णः । प्र । वर्तनीः । अरदः । विश्वऽधेनाः ॥
Padapatha Transcription Accented
áva ǀ asṛjanta ǀ jívrayaḥ ǀ ná ǀ devā́ḥ ǀ bhúvaḥ ǀ sam-rā́ṭ ǀ indra ǀ satyá-yoniḥ ǀ
áhan ǀ áhim ǀ pari-śáyānam ǀ árṇaḥ ǀ prá ǀ vartanī́ḥ ǀ aradaḥ ǀ viśvá-dhenāḥ ǁ
Padapatha Transcription Nonaccented
ava ǀ asṛjanta ǀ jivrayaḥ ǀ na ǀ devāḥ ǀ bhuvaḥ ǀ sam-rāṭ ǀ indra ǀ satya-yoniḥ ǀ
ahan ǀ ahim ǀ pari-śayānam ǀ arṇaḥ ǀ pra ǀ vartanīḥ ǀ aradaḥ ǀ viśva-dhenāḥ ǁ
04.019.03 (Mandala. Sukta. Rik)
3.6.01.03 (Ashtaka. Adhyaya. Varga. Rik)
04.02.090 (Mandala. Anuvāka. Rik)
Samhita Devanagari Accented
अतृ॑प्णुवंतं॒ विय॑तमबु॒ध्यमबु॑ध्यमानं सुषुपा॒णमिं॑द्र ।
स॒प्त प्रति॑ प्र॒वत॑ आ॒शया॑न॒महिं॒ वज्रे॑ण॒ वि रि॑णा अप॒र्वन् ॥
Samhita Devanagari Nonaccented
अतृप्णुवंतं वियतमबुध्यमबुध्यमानं सुषुपाणमिंद्र ।
सप्त प्रति प्रवत आशयानमहिं वज्रेण वि रिणा अपर्वन् ॥
Samhita Transcription Accented
átṛpṇuvantam víyatamabudhyámábudhyamānam suṣupāṇámindra ǀ
saptá práti praváta āśáyānamáhim vájreṇa ví riṇā aparván ǁ
Samhita Transcription Nonaccented
atṛpṇuvantam viyatamabudhyamabudhyamānam suṣupāṇamindra ǀ
sapta prati pravata āśayānamahim vajreṇa vi riṇā aparvan ǁ
Padapatha Devanagari Accented
अतृ॑प्णुवन्तम् । विऽय॑तम् । अ॒बु॒ध्यम् । अबु॑ध्यमानम् । सु॒सु॒पा॒नम् । इ॒न्द्र॒ ।
स॒प्त । प्रति॑ । प्र॒ऽवतः॑ । आ॒ऽशया॑नम् । अहि॑म् । वज्रे॑ण । वि । रि॒णाः॒ । अ॒प॒र्वन् ॥
Padapatha Devanagari Nonaccented
अतृप्णुवन्तम् । विऽयतम् । अबुध्यम् । अबुध्यमानम् । सुसुपानम् । इन्द्र ।
सप्त । प्रति । प्रऽवतः । आऽशयानम् । अहिम् । वज्रेण । वि । रिणाः । अपर्वन् ॥
Padapatha Transcription Accented
átṛpṇuvantam ǀ ví-yatam ǀ abudhyám ǀ ábudhyamānam ǀ susupānám ǀ indra ǀ
saptá ǀ práti ǀ pra-vátaḥ ǀ ā-śáyānam ǀ áhim ǀ vájreṇa ǀ ví ǀ riṇāḥ ǀ aparván ǁ
Padapatha Transcription Nonaccented
atṛpṇuvantam ǀ vi-yatam ǀ abudhyam ǀ abudhyamānam ǀ susupānam ǀ indra ǀ
sapta ǀ prati ǀ pra-vataḥ ǀ ā-śayānam ǀ ahim ǀ vajreṇa ǀ vi ǀ riṇāḥ ǀ aparvan ǁ
04.019.04 (Mandala. Sukta. Rik)
3.6.01.04 (Ashtaka. Adhyaya. Varga. Rik)
04.02.091 (Mandala. Anuvāka. Rik)
Samhita Devanagari Accented
अक्षो॑दय॒च्छव॑सा॒ क्षाम॑ बु॒ध्नं वार्ण वात॒स्तवि॑षीभि॒रिंद्रः॑ ।
दृ॒ळ्हान्यौ॑भ्नादु॒शमा॑न॒ ओजोऽवा॑भिनत्क॒कुभः॒ पर्व॑तानां ॥
Samhita Devanagari Nonaccented
अक्षोदयच्छवसा क्षाम बुध्नं वार्ण वातस्तविषीभिरिंद्रः ।
दृळ्हान्यौभ्नादुशमान ओजोऽवाभिनत्ककुभः पर्वतानां ॥
Samhita Transcription Accented
ákṣodayacchávasā kṣā́ma budhnám vā́rṇá vā́tastáviṣībhiríndraḥ ǀ
dṛḷhā́nyaubhnāduśámāna ójó’vābhinatkakúbhaḥ párvatānām ǁ
Samhita Transcription Nonaccented
akṣodayacchavasā kṣāma budhnam vārṇa vātastaviṣībhirindraḥ ǀ
dṛḷhānyaubhnāduśamāna ojo’vābhinatkakubhaḥ parvatānām ǁ
Padapatha Devanagari Accented
अक्षो॑दयत् । शव॑सा । क्षाम॑ । बु॒ध्नम् । वाः । न । वातः॑ । तवि॑षीभिः । इन्द्रः॑ ।
दृ॒ळ्हानि॑ । औ॒भ्ना॒त् । उ॒शमा॑नः । ओजः॑ । अव॑ । अ॒भि॒न॒त् । क॒कुभः॑ । पर्व॑तानाम् ॥
Padapatha Devanagari Nonaccented
अक्षोदयत् । शवसा । क्षाम । बुध्नम् । वाः । न । वातः । तविषीभिः । इन्द्रः ।
दृळ्हानि । औभ्नात् । उशमानः । ओजः । अव । अभिनत् । ककुभः । पर्वतानाम् ॥
Padapatha Transcription Accented
ákṣodayat ǀ śávasā ǀ kṣā́ma ǀ budhnám ǀ vā́ḥ ǀ ná ǀ vā́taḥ ǀ táviṣībhiḥ ǀ índraḥ ǀ
dṛḷhā́ni ǀ aubhnāt ǀ uśámānaḥ ǀ ójaḥ ǀ áva ǀ abhinat ǀ kakúbhaḥ ǀ párvatānām ǁ
Padapatha Transcription Nonaccented
akṣodayat ǀ śavasā ǀ kṣāma ǀ budhnam ǀ vāḥ ǀ na ǀ vātaḥ ǀ taviṣībhiḥ ǀ indraḥ ǀ
dṛḷhāni ǀ aubhnāt ǀ uśamānaḥ ǀ ojaḥ ǀ ava ǀ abhinat ǀ kakubhaḥ ǀ parvatānām ǁ
04.019.05 (Mandala. Sukta. Rik)
3.6.01.05 (Ashtaka. Adhyaya. Varga. Rik)
04.02.092 (Mandala. Anuvāka. Rik)
Samhita Devanagari Accented
अ॒भि प्र द॑द्रु॒र्जन॑यो॒ न गर्भं॒ रथा॑ इव॒ प्र य॑युः सा॒कमद्र॑यः ।
अत॑र्पयो वि॒सृत॑ उ॒ब्ज ऊ॒र्मींत्वं वृ॒ताँ अ॑रिणा इंद्र॒ सिंधू॑न् ॥
Samhita Devanagari Nonaccented
अभि प्र दद्रुर्जनयो न गर्भं रथा इव प्र ययुः साकमद्रयः ।
अतर्पयो विसृत उब्ज ऊर्मींत्वं वृताँ अरिणा इंद्र सिंधून् ॥
Samhita Transcription Accented
abhí prá dadrurjánayo ná gárbham ráthā iva prá yayuḥ sākámádrayaḥ ǀ
átarpayo visṛ́ta ubjá ūrmī́ntvám vṛtā́m̐ ariṇā indra síndhūn ǁ
Samhita Transcription Nonaccented
abhi pra dadrurjanayo na garbham rathā iva pra yayuḥ sākamadrayaḥ ǀ
atarpayo visṛta ubja ūrmīntvam vṛtām̐ ariṇā indra sindhūn ǁ
Padapatha Devanagari Accented
अ॒भि । प्र । द॒द्रुः॒ । जन॑यः । न । गर्भ॑म् । रथाः॑ऽइव । प्र । य॒युः॒ । सा॒कम् । अद्र॑यः ।
अत॑र्पयः । वि॒ऽसृतः॑ । उ॒ब्जः । ऊ॒र्मीन् । त्वम् । वृ॒तान् । अ॒रि॒णाः॒ । इ॒न्द्र॒ । सिन्धू॑न् ॥
Padapatha Devanagari Nonaccented
अभि । प्र । दद्रुः । जनयः । न । गर्भम् । रथाःऽइव । प्र । ययुः । साकम् । अद्रयः ।
अतर्पयः । विऽसृतः । उब्जः । ऊर्मीन् । त्वम् । वृतान् । अरिणाः । इन्द्र । सिन्धून् ॥
Padapatha Transcription Accented
abhí ǀ prá ǀ dadruḥ ǀ jánayaḥ ǀ ná ǀ gárbham ǀ ráthāḥ-iva ǀ prá ǀ yayuḥ ǀ sākám ǀ ádrayaḥ ǀ
átarpayaḥ ǀ vi-sṛ́taḥ ǀ ubjáḥ ǀ ūrmī́n ǀ tvám ǀ vṛtā́n ǀ ariṇāḥ ǀ indra ǀ síndhūn ǁ
Padapatha Transcription Nonaccented
abhi ǀ pra ǀ dadruḥ ǀ janayaḥ ǀ na ǀ garbham ǀ rathāḥ-iva ǀ pra ǀ yayuḥ ǀ sākam ǀ adrayaḥ ǀ
atarpayaḥ ǀ vi-sṛtaḥ ǀ ubjaḥ ǀ ūrmīn ǀ tvam ǀ vṛtān ǀ ariṇāḥ ǀ indra ǀ sindhūn ǁ
04.019.06 (Mandala. Sukta. Rik)
3.6.02.01 (Ashtaka. Adhyaya. Varga. Rik)
04.02.093 (Mandala. Anuvāka. Rik)
Samhita Devanagari Accented
त्वं म॒हीम॒वनिं॑ वि॒श्वधे॑नां तु॒र्वीत॑ये व॒य्या॑य॒ क्षरं॑तीं ।
अर॑मयो॒ नम॒सैज॒दर्णः॑ सुतर॒णाँ अ॑कृणोरिंद्र॒ सिंधू॑न् ॥
Samhita Devanagari Nonaccented
त्वं महीमवनिं विश्वधेनां तुर्वीतये वय्याय क्षरंतीं ।
अरमयो नमसैजदर्णः सुतरणाँ अकृणोरिंद्र सिंधून् ॥
Samhita Transcription Accented
tvám mahī́mavánim viśvádhenām turvī́taye vayyā́ya kṣárantīm ǀ
áramayo námasáijadárṇaḥ sutaraṇā́m̐ akṛṇorindra síndhūn ǁ
Samhita Transcription Nonaccented
tvam mahīmavanim viśvadhenām turvītaye vayyāya kṣarantīm ǀ
aramayo namasaijadarṇaḥ sutaraṇām̐ akṛṇorindra sindhūn ǁ
Padapatha Devanagari Accented
त्वम् । म॒हीम् । अ॒वनि॑म् । वि॒श्वऽधे॑नाम् । तु॒र्वीत॑ये । व॒य्या॑य । क्षर॑न्तीम् ।
अर॑मयः । नम॑सा । एज॑त् । अर्णः॑ । सु॒ऽत॒र॒णान् । अ॒कृ॒णोः॒ । इ॒न्द्र॒ । सिन्धू॑न् ॥
Padapatha Devanagari Nonaccented
त्वम् । महीम् । अवनिम् । विश्वऽधेनाम् । तुर्वीतये । वय्याय । क्षरन्तीम् ।
अरमयः । नमसा । एजत् । अर्णः । सुऽतरणान् । अकृणोः । इन्द्र । सिन्धून् ॥
Padapatha Transcription Accented
tvám ǀ mahī́m ǀ avánim ǀ viśvá-dhenām ǀ turvī́taye ǀ vayyā́ya ǀ kṣárantīm ǀ
áramayaḥ ǀ námasā ǀ éjat ǀ árṇaḥ ǀ su-taraṇā́n ǀ akṛṇoḥ ǀ indra ǀ síndhūn ǁ
Padapatha Transcription Nonaccented
tvam ǀ mahīm ǀ avanim ǀ viśva-dhenām ǀ turvītaye ǀ vayyāya ǀ kṣarantīm ǀ
aramayaḥ ǀ namasā ǀ ejat ǀ arṇaḥ ǀ su-taraṇān ǀ akṛṇoḥ ǀ indra ǀ sindhūn ǁ
04.019.07 (Mandala. Sukta. Rik)
3.6.02.02 (Ashtaka. Adhyaya. Varga. Rik)
04.02.094 (Mandala. Anuvāka. Rik)
Samhita Devanagari Accented
प्राग्रुवो॑ नभ॒न्वो॒३॒॑ न वक्वा॑ ध्व॒स्रा अ॑पिन्वद्युव॒तीर्ऋ॑त॒ज्ञाः ।
धन्वा॒न्यज्राँ॑ अपृणक्तृषा॒णाँ अधो॒गिंद्रः॑ स्त॒र्यो॒३॒॑ दंसु॑पत्नीः ॥
Samhita Devanagari Nonaccented
प्राग्रुवो नभन्वो न वक्वा ध्वस्रा अपिन्वद्युवतीर्ऋतज्ञाः ।
धन्वान्यज्राँ अपृणक्तृषाणाँ अधोगिंद्रः स्तर्यो दंसुपत्नीः ॥
Samhita Transcription Accented
prā́grúvo nabhanvó ná vákvā dhvasrā́ apinvadyuvatī́rṛtajñā́ḥ ǀ
dhánvānyájrām̐ apṛṇaktṛṣāṇā́m̐ ádhogíndraḥ staryó dáṃsupatnīḥ ǁ
Samhita Transcription Nonaccented
prāgruvo nabhanvo na vakvā dhvasrā apinvadyuvatīrṛtajñāḥ ǀ
dhanvānyajrām̐ apṛṇaktṛṣāṇām̐ adhogindraḥ staryo daṃsupatnīḥ ǁ
Padapatha Devanagari Accented
प्र । अ॒ग्रुवः॑ । न॒भ॒न्वः॑ । न । वक्वाः॑ । ध्व॒स्राः । अ॒पि॒न्व॒त् । यु॒व॒तीः । ऋ॒त॒ऽज्ञाः ।
धन्वा॑नि । अज्रा॑न् । अ॒पृ॒ण॒क् । तृ॒षा॒णान् । अधो॑क् । इन्द्रः॑ । स्त॒र्यः॑ । दंऽसु॑पत्नीः ॥
Padapatha Devanagari Nonaccented
प्र । अग्रुवः । नभन्वः । न । वक्वाः । ध्वस्राः । अपिन्वत् । युवतीः । ऋतऽज्ञाः ।
धन्वानि । अज्रान् । अपृणक् । तृषाणान् । अधोक् । इन्द्रः । स्तर्यः । दंऽसुपत्नीः ॥
Padapatha Transcription Accented
prá ǀ agrúvaḥ ǀ nabhanváḥ ǀ ná ǀ vákvāḥ ǀ dhvasrā́ḥ ǀ apinvat ǀ yuvatī́ḥ ǀ ṛta-jñā́ḥ ǀ
dhánvāni ǀ ájrān ǀ apṛṇak ǀ tṛṣāṇā́n ǀ ádhok ǀ índraḥ ǀ staryáḥ ǀ dáṃ-supatnīḥ ǁ
Padapatha Transcription Nonaccented
pra ǀ agruvaḥ ǀ nabhanvaḥ ǀ na ǀ vakvāḥ ǀ dhvasrāḥ ǀ apinvat ǀ yuvatīḥ ǀ ṛta-jñāḥ ǀ
dhanvāni ǀ ajrān ǀ apṛṇak ǀ tṛṣāṇān ǀ adhok ǀ indraḥ ǀ staryaḥ ǀ daṃ-supatnīḥ ǁ
04.019.08 (Mandala. Sukta. Rik)
3.6.02.03 (Ashtaka. Adhyaya. Varga. Rik)
04.02.095 (Mandala. Anuvāka. Rik)
Samhita Devanagari Accented
पू॒र्वीरु॒षसः॑ श॒रद॑श्च गू॒र्ता वृ॒त्रं ज॑घ॒न्वाँ अ॑सृज॒द्वि सिंधू॑न् ।
परि॑ष्ठिता अतृणद्बद्बधा॒नाः सी॒रा इंद्रः॒ स्रवि॑तवे पृथि॒व्या ॥
Samhita Devanagari Nonaccented
पूर्वीरुषसः शरदश्च गूर्ता वृत्रं जघन्वाँ असृजद्वि सिंधून् ।
परिष्ठिता अतृणद्बद्बधानाः सीरा इंद्रः स्रवितवे पृथिव्या ॥
Samhita Transcription Accented
pūrvī́ruṣásaḥ śarádaśca gūrtā́ vṛtrám jaghanvā́m̐ asṛjadví síndhūn ǀ
páriṣṭhitā atṛṇadbadbadhānā́ḥ sīrā́ índraḥ srávitave pṛthivyā́ ǁ
Samhita Transcription Nonaccented
pūrvīruṣasaḥ śaradaśca gūrtā vṛtram jaghanvām̐ asṛjadvi sindhūn ǀ
pariṣṭhitā atṛṇadbadbadhānāḥ sīrā indraḥ sravitave pṛthivyā ǁ
Padapatha Devanagari Accented
पू॒र्वीः । उ॒षसः॑ । श॒रदः॑ । च॒ । गू॒र्ताः । वृ॒त्रम् । ज॒घ॒न्वान् । अ॒सृ॒ज॒त् । वि । सिन्धू॑न् ।
परि॑ऽस्थिताः । अ॒तृ॒ण॒त् । ब॒द्ब॒धा॒नाः । सी॒राः । इन्द्रः॑ । स्रवि॑तवे । पृ॒थि॒व्या ॥
Padapatha Devanagari Nonaccented
पूर्वीः । उषसः । शरदः । च । गूर्ताः । वृत्रम् । जघन्वान् । असृजत् । वि । सिन्धून् ।
परिऽस्थिताः । अतृणत् । बद्बधानाः । सीराः । इन्द्रः । स्रवितवे । पृथिव्या ॥
Padapatha Transcription Accented
pūrvī́ḥ ǀ uṣásaḥ ǀ śarádaḥ ǀ ca ǀ gūrtā́ḥ ǀ vṛtrám ǀ jaghanvā́n ǀ asṛjat ǀ ví ǀ síndhūn ǀ
pári-sthitāḥ ǀ atṛṇat ǀ badbadhānā́ḥ ǀ sīrā́ḥ ǀ índraḥ ǀ srávitave ǀ pṛthivyā́ ǁ
Padapatha Transcription Nonaccented
pūrvīḥ ǀ uṣasaḥ ǀ śaradaḥ ǀ ca ǀ gūrtāḥ ǀ vṛtram ǀ jaghanvān ǀ asṛjat ǀ vi ǀ sindhūn ǀ
pari-sthitāḥ ǀ atṛṇat ǀ badbadhānāḥ ǀ sīrāḥ ǀ indraḥ ǀ sravitave ǀ pṛthivyā ǁ
04.019.09 (Mandala. Sukta. Rik)
3.6.02.04 (Ashtaka. Adhyaya. Varga. Rik)
04.02.096 (Mandala. Anuvāka. Rik)
Samhita Devanagari Accented
व॒म्रीभिः॑ पु॒त्रम॒ग्रुवो॑ अदा॒नं नि॒वेश॑नाद्धरिव॒ आ ज॑भर्थ ।
व्यं१॒॑धो अ॑ख्य॒दहि॑माददा॒नो निर्भू॑दुख॒च्छित्सम॑रंत॒ पर्व॑ ॥
Samhita Devanagari Nonaccented
वम्रीभिः पुत्रमग्रुवो अदानं निवेशनाद्धरिव आ जभर्थ ।
व्यंधो अख्यदहिमाददानो निर्भूदुखच्छित्समरंत पर्व ॥
Samhita Transcription Accented
vamrī́bhiḥ putrámagrúvo adānám nivéśanāddhariva ā́ jabhartha ǀ
vyándhó akhyadáhimādadānó nírbhūdukhacchítsámaranta párva ǁ
Samhita Transcription Nonaccented
vamrībhiḥ putramagruvo adānam niveśanāddhariva ā jabhartha ǀ
vyandho akhyadahimādadāno nirbhūdukhacchitsamaranta parva ǁ
Padapatha Devanagari Accented
व॒म्रीभिः॑ । पु॒त्रम् । अ॒ग्रुवः॑ । अ॒दा॒नम् । नि॒ऽवेश॑नात् । ह॒रि॒ऽवः॒ । आ । ज॒भ॒र्थ॒ ।
वि । अ॒न्धः । अ॒ख्य॒त् । अहि॑म् । आ॒ऽद॒दा॒नः । निः । भू॒त् । उ॒ख॒ऽछित् । सम् । अ॒र॒न्त॒ । पर्व॑ ॥
Padapatha Devanagari Nonaccented
वम्रीभिः । पुत्रम् । अग्रुवः । अदानम् । निऽवेशनात् । हरिऽवः । आ । जभर्थ ।
वि । अन्धः । अख्यत् । अहिम् । आऽददानः । निः । भूत् । उखऽछित् । सम् । अरन्त । पर्व ॥
Padapatha Transcription Accented
vamrī́bhiḥ ǀ putrám ǀ agrúvaḥ ǀ adānám ǀ ni-véśanāt ǀ hari-vaḥ ǀ ā́ ǀ jabhartha ǀ
ví ǀ andháḥ ǀ akhyat ǀ áhim ǀ ā-dadānáḥ ǀ níḥ ǀ bhūt ǀ ukha-chít ǀ sám ǀ aranta ǀ párva ǁ
Padapatha Transcription Nonaccented
vamrībhiḥ ǀ putram ǀ agruvaḥ ǀ adānam ǀ ni-veśanāt ǀ hari-vaḥ ǀ ā ǀ jabhartha ǀ
vi ǀ andhaḥ ǀ akhyat ǀ ahim ǀ ā-dadānaḥ ǀ niḥ ǀ bhūt ǀ ukha-chit ǀ sam ǀ aranta ǀ parva ǁ
04.019.10 (Mandala. Sukta. Rik)
3.6.02.05 (Ashtaka. Adhyaya. Varga. Rik)
04.02.097 (Mandala. Anuvāka. Rik)
Samhita Devanagari Accented
प्र ते॒ पूर्वा॑णि॒ कर॑णानि विप्रावि॒द्वाँ आ॑ह वि॒दुषे॒ करां॑सि ।
यथा॑यथा॒ वृष्ण्या॑नि॒ स्वगू॒र्तापां॑सि राज॒न्नर्यावि॑वेषीः ॥
Samhita Devanagari Nonaccented
प्र ते पूर्वाणि करणानि विप्राविद्वाँ आह विदुषे करांसि ।
यथायथा वृष्ण्यानि स्वगूर्तापांसि राजन्नर्याविवेषीः ॥
Samhita Transcription Accented
prá te pū́rvāṇi káraṇāni viprāvidvā́m̐ āha vidúṣe kárāṃsi ǀ
yáthāyathā vṛ́ṣṇyāni svágūrtā́pāṃsi rājannáryā́viveṣīḥ ǁ
Samhita Transcription Nonaccented
pra te pūrvāṇi karaṇāni viprāvidvām̐ āha viduṣe karāṃsi ǀ
yathāyathā vṛṣṇyāni svagūrtāpāṃsi rājannaryāviveṣīḥ ǁ
Padapatha Devanagari Accented
प्र । ते॒ । पूर्वा॑णि । कर॑णानि । वि॒प्र॒ । आ॒ऽवि॒द्वान् । आ॒ह॒ । वि॒दुषे॑ । करां॑सि ।
यथा॑ऽयथा । वृष्ण्या॑नि । स्वऽगू॑र्ता । अपां॑सि । रा॒ज॒न् । नर्या॑ । अवि॑वेषीः ॥
Padapatha Devanagari Nonaccented
प्र । ते । पूर्वाणि । करणानि । विप्र । आऽविद्वान् । आह । विदुषे । करांसि ।
यथाऽयथा । वृष्ण्यानि । स्वऽगूर्ता । अपांसि । राजन् । नर्या । अविवेषीः ॥
Padapatha Transcription Accented
prá ǀ te ǀ pū́rvāṇi ǀ káraṇāni ǀ vipra ǀ ā-vidvā́n ǀ āha ǀ vidúṣe ǀ kárāṃsi ǀ
yáthā-yathā ǀ vṛ́ṣṇyāni ǀ svá-gūrtā ǀ ápāṃsi ǀ rājan ǀ náryā ǀ áviveṣīḥ ǁ
Padapatha Transcription Nonaccented
pra ǀ te ǀ pūrvāṇi ǀ karaṇāni ǀ vipra ǀ ā-vidvān ǀ āha ǀ viduṣe ǀ karāṃsi ǀ
yathā-yathā ǀ vṛṣṇyāni ǀ sva-gūrtā ǀ apāṃsi ǀ rājan ǀ naryā ǀ aviveṣīḥ ǁ
04.019.11 (Mandala. Sukta. Rik)
3.6.02.06 (Ashtaka. Adhyaya. Varga. Rik)
04.02.098 (Mandala. Anuvāka. Rik)
Samhita Devanagari Accented
नू ष्टु॒त इं॑द्र॒ नू गृ॑णा॒न इषं॑ जरि॒त्रे न॒द्यो॒३॒॑ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्यः॑ सदा॒साः ॥
Samhita Devanagari Nonaccented
नू ष्टुत इंद्र नू गृणान इषं जरित्रे नद्यो न पीपेः ।
अकारि ते हरिवो ब्रह्म नव्यं धिया स्याम रथ्यः सदासाः ॥
Samhita Transcription Accented
nū́ ṣṭutá indra nū́ gṛṇāná íṣam jaritré nadyó ná pīpeḥ ǀ
ákāri te harivo bráhma návyam dhiyā́ syāma rathyáḥ sadāsā́ḥ ǁ
Samhita Transcription Nonaccented
nū ṣṭuta indra nū gṛṇāna iṣam jaritre nadyo na pīpeḥ ǀ
akāri te harivo brahma navyam dhiyā syāma rathyaḥ sadāsāḥ ǁ
Padapatha Devanagari Accented
नु । स्तु॒तः । इ॒न्द्र॒ । नु । गृ॒णा॒नः । इष॑म् । ज॒रि॒त्रे । न॒द्यः॑ । न । पी॒पे॒रिति॑ पीपेः ।
अका॑रि । ते॒ । ह॒रि॒ऽवः॒ । ब्रह्म॑ । नव्य॑म् । धि॒या । स्या॒म॒ । र॒थ्यः॑ । स॒दा॒ऽसाः ॥
Padapatha Devanagari Nonaccented
नु । स्तुतः । इन्द्र । नु । गृणानः । इषम् । जरित्रे । नद्यः । न । पीपेरिति पीपेः ।
अकारि । ते । हरिऽवः । ब्रह्म । नव्यम् । धिया । स्याम । रथ्यः । सदाऽसाः ॥
Padapatha Transcription Accented
nú ǀ stutáḥ ǀ indra ǀ nú ǀ gṛṇānáḥ ǀ íṣam ǀ jaritré ǀ nadyáḥ ǀ ná ǀ pīperíti pīpeḥ ǀ
ákāri ǀ te ǀ hari-vaḥ ǀ bráhma ǀ návyam ǀ dhiyā́ ǀ syāma ǀ rathyáḥ ǀ sadā-sā́ḥ ǁ
Padapatha Transcription Nonaccented
nu ǀ stutaḥ ǀ indra ǀ nu ǀ gṛṇānaḥ ǀ iṣam ǀ jaritre ǀ nadyaḥ ǀ na ǀ pīperiti pīpeḥ ǀ
akāri ǀ te ǀ hari-vaḥ ǀ brahma ǀ navyam ǀ dhiyā ǀ syāma ǀ rathyaḥ ǀ sadā-sāḥ ǁ