|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 4
Sūkta 56
|
1. Info |
| To: | divaḥ, pṛthivī | |
| From: | vāmadeva gautama | |
| Metres: | 1st set of styles: triṣṭup (1, 2); bhurikpaṅkti (3); virāṭtrisṭup (4); nicṛdgāyatrī (5); virāḍgāyatrī (6); gāyatrī (7) 2nd set of styles: triṣṭubh (1-4); gāyatrī (5-7) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
04.056.01 (Mandala. Sukta. Rik)
3.8.08.01 (Ashtaka. Adhyaya. Varga. Rik)
04.05.075 (Mandala. Anuvāka. Rik)
Samhita Devanagari Accented
म॒ही द्यावा॑पृथि॒वी इ॒ह ज्येष्ठे॑ रु॒चा भ॑वतां शु॒चय॑द्भिर॒र्कैः ।
यत्सीं॒ वरि॑ष्ठे बृह॒ती वि॑मि॒न्वन्रु॒वद्धो॒क्षा प॑प्रथा॒नेभि॒रेवैः॑ ॥
Samhita Devanagari Nonaccented
मही द्यावापृथिवी इह ज्येष्ठे रुचा भवतां शुचयद्भिरर्कैः ।
यत्सीं वरिष्ठे बृहती विमिन्वन्रुवद्धोक्षा पप्रथानेभिरेवैः ॥
Samhita Transcription Accented
mahī́ dyā́vāpṛthivī́ ihá jyéṣṭhe rucā́ bhavatām śucáyadbhirarkáiḥ ǀ
yátsīm váriṣṭhe bṛhatī́ viminvánruváddhokṣā́ paprathānébhirévaiḥ ǁ
Samhita Transcription Nonaccented
mahī dyāvāpṛthivī iha jyeṣṭhe rucā bhavatām śucayadbhirarkaiḥ ǀ
yatsīm variṣṭhe bṛhatī viminvanruvaddhokṣā paprathānebhirevaiḥ ǁ
Padapatha Devanagari Accented
म॒ही इति॑ । द्यावा॑पृथि॒वी इति॑ । इ॒ह । ज्येष्ठे॒ इति॑ । रु॒चा । भ॒व॒ता॒म् । शु॒चय॑त्ऽभिः । अ॒र्कैः ।
यत् । सी॒म् । वरि॑ष्ठे॒ इति॑ । बृ॒ह॒ती इति॑ । वि॒ऽमि॒न्वन् । रु॒वत् । ह॒ । उ॒क्षा । प॒प्र॒था॒नेभिः॑ । एवैः॑ ॥
Padapatha Devanagari Nonaccented
मही इति । द्यावापृथिवी इति । इह । ज्येष्ठे इति । रुचा । भवताम् । शुचयत्ऽभिः । अर्कैः ।
यत् । सीम् । वरिष्ठे इति । बृहती इति । विऽमिन्वन् । रुवत् । ह । उक्षा । पप्रथानेभिः । एवैः ॥
Padapatha Transcription Accented
mahī́ íti ǀ dyā́vāpṛthivī́ íti ǀ ihá ǀ jyéṣṭhe íti ǀ rucā́ ǀ bhavatām ǀ śucáyat-bhiḥ ǀ arkáiḥ ǀ
yát ǀ sīm ǀ váriṣṭhe íti ǀ bṛhatī́ íti ǀ vi-minván ǀ ruvát ǀ ha ǀ ukṣā́ ǀ paprathānébhiḥ ǀ évaiḥ ǁ
Padapatha Transcription Nonaccented
mahī iti ǀ dyāvāpṛthivī iti ǀ iha ǀ jyeṣṭhe iti ǀ rucā ǀ bhavatām ǀ śucayat-bhiḥ ǀ arkaiḥ ǀ
yat ǀ sīm ǀ variṣṭhe iti ǀ bṛhatī iti ǀ vi-minvan ǀ ruvat ǀ ha ǀ ukṣā ǀ paprathānebhiḥ ǀ evaiḥ ǁ
04.056.02 (Mandala. Sukta. Rik)
3.8.08.02 (Ashtaka. Adhyaya. Varga. Rik)
04.05.076 (Mandala. Anuvāka. Rik)
Samhita Devanagari Accented
दे॒वी दे॒वेभि॑र्यज॒ते यज॑त्रै॒रमि॑नती तस्थतुरु॒क्षमा॑णे ।
ऋ॒ताव॑री अ॒द्रुहा॑ दे॒वपु॑त्रे य॒ज्ञस्य॑ ने॒त्री शु॒चय॑द्भिर॒र्कैः ॥
Samhita Devanagari Nonaccented
देवी देवेभिर्यजते यजत्रैरमिनती तस्थतुरुक्षमाणे ।
ऋतावरी अद्रुहा देवपुत्रे यज्ञस्य नेत्री शुचयद्भिरर्कैः ॥
Samhita Transcription Accented
devī́ devébhiryajaté yájatrairáminatī tasthaturukṣámāṇe ǀ
ṛtā́varī adrúhā deváputre yajñásya netrī́ śucáyadbhirarkáiḥ ǁ
Samhita Transcription Nonaccented
devī devebhiryajate yajatrairaminatī tasthaturukṣamāṇe ǀ
ṛtāvarī adruhā devaputre yajñasya netrī śucayadbhirarkaiḥ ǁ
Padapatha Devanagari Accented
दे॒वी इति॑ । दे॒वेभिः॑ । य॒ज॒ते इति॑ । यज॑त्रैः । अमि॑नती॒ इति॑ । त॒स्थ॒तुः॒ । उ॒क्षमा॑णे॒ इति॑ ।
ऋ॒तव॑री॒ इत्यृ॒तऽव॑री । अ॒द्रुहा॑ । दे॒वपु॑त्रे॒ इति॑ दे॒वऽपु॑त्रे । य॒ज्ञस्य॑ । ने॒त्री इति॑ । शु॒चय॑त्ऽभिः । अ॒र्कैः ॥
Padapatha Devanagari Nonaccented
देवी इति । देवेभिः । यजते इति । यजत्रैः । अमिनती इति । तस्थतुः । उक्षमाणे इति ।
ऋतवरी इत्यृतऽवरी । अद्रुहा । देवपुत्रे इति देवऽपुत्रे । यज्ञस्य । नेत्री इति । शुचयत्ऽभिः । अर्कैः ॥
Padapatha Transcription Accented
devī́ íti ǀ devébhiḥ ǀ yajaté íti ǀ yájatraiḥ ǀ áminatī íti ǀ tasthatuḥ ǀ ukṣámāṇe íti ǀ
ṛtávarī ítyṛtá-varī ǀ adrúhā ǀ deváputre íti devá-putre ǀ yajñásya ǀ netrī́ íti ǀ śucáyat-bhiḥ ǀ arkáiḥ ǁ
Padapatha Transcription Nonaccented
devī iti ǀ devebhiḥ ǀ yajate iti ǀ yajatraiḥ ǀ aminatī iti ǀ tasthatuḥ ǀ ukṣamāṇe iti ǀ
ṛtavarī ityṛta-varī ǀ adruhā ǀ devaputre iti deva-putre ǀ yajñasya ǀ netrī iti ǀ śucayat-bhiḥ ǀ arkaiḥ ǁ
04.056.03 (Mandala. Sukta. Rik)
3.8.08.03 (Ashtaka. Adhyaya. Varga. Rik)
04.05.077 (Mandala. Anuvāka. Rik)
Samhita Devanagari Accented
स इत्स्वपा॒ भुव॑नेष्वास॒ य इ॒मे द्यावा॑पृथि॒वी ज॒जान॑ ।
उ॒र्वी ग॑भी॒रे रज॑सी सु॒मेके॑ अवं॒शे धीरः॒ शच्या॒ समै॑रत् ॥
Samhita Devanagari Nonaccented
स इत्स्वपा भुवनेष्वास य इमे द्यावापृथिवी जजान ।
उर्वी गभीरे रजसी सुमेके अवंशे धीरः शच्या समैरत् ॥
Samhita Transcription Accented
sá ítsvápā bhúvaneṣvāsa yá imé dyā́vāpṛthivī́ jajā́na ǀ
urvī́ gabhīré rájasī suméke avaṃśé dhī́raḥ śácyā sámairat ǁ
Samhita Transcription Nonaccented
sa itsvapā bhuvaneṣvāsa ya ime dyāvāpṛthivī jajāna ǀ
urvī gabhīre rajasī sumeke avaṃśe dhīraḥ śacyā samairat ǁ
Padapatha Devanagari Accented
सः । इत् । सु॒ऽअपाः॑ । भुव॑नेषु । आ॒स॒ । यः । इ॒मे इति॑ । द्यावा॑पृथि॒वी इति॑ । ज॒जान॑ ।
उ॒र्वी इति॑ । ग॒भी॒रे इति॑ । रज॑सी॒ इति॑ । सु॒मेके॒ इति॑ सु॒ऽमेके॑ । अ॒वं॒शे । धीरः॑ । शच्या॑ । सम् । ऐ॒र॒त् ॥
Padapatha Devanagari Nonaccented
सः । इत् । सुऽअपाः । भुवनेषु । आस । यः । इमे इति । द्यावापृथिवी इति । जजान ।
उर्वी इति । गभीरे इति । रजसी इति । सुमेके इति सुऽमेके । अवंशे । धीरः । शच्या । सम् । ऐरत् ॥
Padapatha Transcription Accented
sáḥ ǀ ít ǀ su-ápāḥ ǀ bhúvaneṣu ǀ āsa ǀ yáḥ ǀ imé íti ǀ dyā́vāpṛthivī́ íti ǀ jajā́na ǀ
urvī́ íti ǀ gabhīré íti ǀ rájasī íti ǀ suméke íti su-méke ǀ avaṃśé ǀ dhī́raḥ ǀ śácyā ǀ sám ǀ airat ǁ
Padapatha Transcription Nonaccented
saḥ ǀ it ǀ su-apāḥ ǀ bhuvaneṣu ǀ āsa ǀ yaḥ ǀ ime iti ǀ dyāvāpṛthivī iti ǀ jajāna ǀ
urvī iti ǀ gabhīre iti ǀ rajasī iti ǀ sumeke iti su-meke ǀ avaṃśe ǀ dhīraḥ ǀ śacyā ǀ sam ǀ airat ǁ
04.056.04 (Mandala. Sukta. Rik)
3.8.08.04 (Ashtaka. Adhyaya. Varga. Rik)
04.05.078 (Mandala. Anuvāka. Rik)
Samhita Devanagari Accented
नू रो॑दसी बृ॒हद्भि॑र्नो॒ वरू॑थैः॒ पत्नी॑वद्भिरि॒षयं॑ती स॒जोषाः॑ ।
उ॒रू॒ची विश्वे॑ यज॒ते नि पा॑तं धि॒या स्या॑म र॒थ्यः॑ सदा॒साः ॥
Samhita Devanagari Nonaccented
नू रोदसी बृहद्भिर्नो वरूथैः पत्नीवद्भिरिषयंती सजोषाः ।
उरूची विश्वे यजते नि पातं धिया स्याम रथ्यः सदासाः ॥
Samhita Transcription Accented
nū́ rodasī bṛhádbhirno várūthaiḥ pátnīvadbhiriṣáyantī sajóṣāḥ ǀ
urūcī́ víśve yajaté ní pātam dhiyā́ syāma rathyáḥ sadāsā́ḥ ǁ
Samhita Transcription Nonaccented
nū rodasī bṛhadbhirno varūthaiḥ patnīvadbhiriṣayantī sajoṣāḥ ǀ
urūcī viśve yajate ni pātam dhiyā syāma rathyaḥ sadāsāḥ ǁ
Padapatha Devanagari Accented
नु । रो॒द॒सी॒ इति॑ । बृ॒हत्ऽभिः॑ । नः॒ । वरू॑थैः । पत्नी॑वत्ऽभिः । इ॒षय॑न्ती॒ इति॑ । स॒ऽजोषाः॑ ।
उ॒रू॒ची इति॑ । विश्वे॒ इति॑ । य॒ज॒ते इति॑ । नि । पा॒त॒म् । धि॒या । स्या॒म॒ । र॒थ्यः॑ । स॒दा॒ऽसाः ॥
Padapatha Devanagari Nonaccented
नु । रोदसी इति । बृहत्ऽभिः । नः । वरूथैः । पत्नीवत्ऽभिः । इषयन्ती इति । सऽजोषाः ।
उरूची इति । विश्वे इति । यजते इति । नि । पातम् । धिया । स्याम । रथ्यः । सदाऽसाः ॥
Padapatha Transcription Accented
nú ǀ rodasī íti ǀ bṛhát-bhiḥ ǀ naḥ ǀ várūthaiḥ ǀ pátnīvat-bhiḥ ǀ iṣáyantī íti ǀ sa-jóṣāḥ ǀ
urūcī́ íti ǀ víśve íti ǀ yajaté íti ǀ ní ǀ pātam ǀ dhiyā́ ǀ syāma ǀ rathyáḥ ǀ sadā-sā́ḥ ǁ
Padapatha Transcription Nonaccented
nu ǀ rodasī iti ǀ bṛhat-bhiḥ ǀ naḥ ǀ varūthaiḥ ǀ patnīvat-bhiḥ ǀ iṣayantī iti ǀ sa-joṣāḥ ǀ
urūcī iti ǀ viśve iti ǀ yajate iti ǀ ni ǀ pātam ǀ dhiyā ǀ syāma ǀ rathyaḥ ǀ sadā-sāḥ ǁ
04.056.05 (Mandala. Sukta. Rik)
3.8.08.05 (Ashtaka. Adhyaya. Varga. Rik)
04.05.079 (Mandala. Anuvāka. Rik)
Samhita Devanagari Accented
प्र वां॒ महि॒ द्यवी॑ अ॒भ्युप॑स्तुतिं भरामहे ।
शुची॒ उप॒ प्रश॑स्तये ॥
Samhita Devanagari Nonaccented
प्र वां महि द्यवी अभ्युपस्तुतिं भरामहे ।
शुची उप प्रशस्तये ॥
Samhita Transcription Accented
prá vām máhi dyávī abhyúpastutim bharāmahe ǀ
śúcī úpa práśastaye ǁ
Samhita Transcription Nonaccented
pra vām mahi dyavī abhyupastutim bharāmahe ǀ
śucī upa praśastaye ǁ
Padapatha Devanagari Accented
प्र । वा॒म् । महि॑ । द्यवी॒ इति॑ । अ॒भि । उप॑ऽस्तुतिम् । भ॒रा॒म॒हे॒ ।
शुची॒ इति॑ । उप॑ । प्रऽश॑स्तये ॥
Padapatha Devanagari Nonaccented
प्र । वाम् । महि । द्यवी इति । अभि । उपऽस्तुतिम् । भरामहे ।
शुची इति । उप । प्रऽशस्तये ॥
Padapatha Transcription Accented
prá ǀ vām ǀ máhi ǀ dyávī íti ǀ abhí ǀ úpa-stutim ǀ bharāmahe ǀ
śúcī íti ǀ úpa ǀ prá-śastaye ǁ
Padapatha Transcription Nonaccented
pra ǀ vām ǀ mahi ǀ dyavī iti ǀ abhi ǀ upa-stutim ǀ bharāmahe ǀ
śucī iti ǀ upa ǀ pra-śastaye ǁ
04.056.06 (Mandala. Sukta. Rik)
3.8.08.06 (Ashtaka. Adhyaya. Varga. Rik)
04.05.080 (Mandala. Anuvāka. Rik)
Samhita Devanagari Accented
पु॒ना॒ने त॒न्वा॑ मि॒थः स्वेन॒ दक्षे॑ण राजथः ।
ऊ॒ह्याथे॑ स॒नादृ॒तं ॥
Samhita Devanagari Nonaccented
पुनाने तन्वा मिथः स्वेन दक्षेण राजथः ।
ऊह्याथे सनादृतं ॥
Samhita Transcription Accented
punāné tanvā́ mitháḥ svéna dákṣeṇa rājathaḥ ǀ
ūhyā́the sanā́dṛtám ǁ
Samhita Transcription Nonaccented
punāne tanvā mithaḥ svena dakṣeṇa rājathaḥ ǀ
ūhyāthe sanādṛtam ǁ
Padapatha Devanagari Accented
पु॒ना॒ने इति॑ । त॒न्वा॑ । मि॒थः । स्वेन॑ । दक्षे॑ण । रा॒ज॒थः॒ ।
ऊ॒ह्याथे॒ इति॑ । स॒नात् । ऋ॒तम् ॥
Padapatha Devanagari Nonaccented
पुनाने इति । तन्वा । मिथः । स्वेन । दक्षेण । राजथः ।
ऊह्याथे इति । सनात् । ऋतम् ॥
Padapatha Transcription Accented
punāné íti ǀ tanvā́ ǀ mitháḥ ǀ svéna ǀ dákṣeṇa ǀ rājathaḥ ǀ
ūhyā́the íti ǀ sanā́t ǀ ṛtám ǁ
Padapatha Transcription Nonaccented
punāne iti ǀ tanvā ǀ mithaḥ ǀ svena ǀ dakṣeṇa ǀ rājathaḥ ǀ
ūhyāthe iti ǀ sanāt ǀ ṛtam ǁ
04.056.07 (Mandala. Sukta. Rik)
3.8.08.07 (Ashtaka. Adhyaya. Varga. Rik)
04.05.081 (Mandala. Anuvāka. Rik)
Samhita Devanagari Accented
म॒ही मि॒त्रस्य॑ साधथ॒स्तरं॑ती॒ पिप्र॑ती ऋ॒तं ।
परि॑ य॒ज्ञं नि षे॑दथुः ॥
Samhita Devanagari Nonaccented
मही मित्रस्य साधथस्तरंती पिप्रती ऋतं ।
परि यज्ञं नि षेदथुः ॥
Samhita Transcription Accented
mahī́ mitrásya sādhathastárantī pípratī ṛtám ǀ
pári yajñám ní ṣedathuḥ ǁ
Samhita Transcription Nonaccented
mahī mitrasya sādhathastarantī pipratī ṛtam ǀ
pari yajñam ni ṣedathuḥ ǁ
Padapatha Devanagari Accented
म॒ही इति॑ । मि॒त्रस्य॑ । सा॒ध॒थः॒ । तर॑न्ती॒ इति॑ । पिप्र॑ती॒ इति॑ । ऋ॒तम् ।
परि॑ । य॒ज्ञम् । नि । से॒द॒थुः॒ ॥
Padapatha Devanagari Nonaccented
मही इति । मित्रस्य । साधथः । तरन्ती इति । पिप्रती इति । ऋतम् ।
परि । यज्ञम् । नि । सेदथुः ॥
Padapatha Transcription Accented
mahī́ íti ǀ mitrásya ǀ sādhathaḥ ǀ tárantī íti ǀ pípratī íti ǀ ṛtám ǀ
pári ǀ yajñám ǀ ní ǀ sedathuḥ ǁ
Padapatha Transcription Nonaccented
mahī iti ǀ mitrasya ǀ sādhathaḥ ǀ tarantī iti ǀ pipratī iti ǀ ṛtam ǀ
pari ǀ yajñam ǀ ni ǀ sedathuḥ ǁ