|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 4
Sūkta 57
|
1. Info |
| To: | 1-3: kṣetrapatiḥ; 4: śuna; 5, 8: the two śunāsīras; 6, 7: sītā |
|
| From: | vāmadeva gautama | |
| Metres: | 1st set of styles: anuṣṭup (1, 4, 6, 7); triṣṭup (2, 3, 8); purauṣṇik (5) 2nd set of styles: anuṣṭubh (1, 4, 6, 7); triṣṭubh (2, 3, 8); purauṣṇih (5) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
04.057.01 (Mandala. Sukta. Rik)
3.8.09.01 (Ashtaka. Adhyaya. Varga. Rik)
04.05.082 (Mandala. Anuvāka. Rik)
Samhita Devanagari Accented
क्षेत्र॑स्य॒ पति॑ना व॒यं हि॒तेने॑व जयामसि ।
गामश्वं॑ पोषयि॒त्न्वा स नो॑ मृळाती॒दृशे॑ ॥
Samhita Devanagari Nonaccented
क्षेत्रस्य पतिना वयं हितेनेव जयामसि ।
गामश्वं पोषयित्न्वा स नो मृळातीदृशे ॥
Samhita Transcription Accented
kṣétrasya pátinā vayám hiténeva jayāmasi ǀ
gā́máśvam poṣayitnvā́ sá no mṛḷātīdṛ́śe ǁ
Samhita Transcription Nonaccented
kṣetrasya patinā vayam hiteneva jayāmasi ǀ
gāmaśvam poṣayitnvā sa no mṛḷātīdṛśe ǁ
Padapatha Devanagari Accented
क्षेत्र॑स्य । पति॑ना । व॒यम् । हि॒तेन॑ऽइव । ज॒या॒म॒सि॒ ।
गाम् । अश्व॑म् । पो॒ष॒यि॒त्नु । आ । सः । नः॒ । मृ॒ळा॒ति॒ । ई॒दृशे॑ ॥
Padapatha Devanagari Nonaccented
क्षेत्रस्य । पतिना । वयम् । हितेनऽइव । जयामसि ।
गाम् । अश्वम् । पोषयित्नु । आ । सः । नः । मृळाति । ईदृशे ॥
Padapatha Transcription Accented
kṣétrasya ǀ pátinā ǀ vayám ǀ hiténa-iva ǀ jayāmasi ǀ
gā́m ǀ áśvam ǀ poṣayitnú ǀ ā́ ǀ sáḥ ǀ naḥ ǀ mṛḷāti ǀ īdṛ́śe ǁ
Padapatha Transcription Nonaccented
kṣetrasya ǀ patinā ǀ vayam ǀ hitena-iva ǀ jayāmasi ǀ
gām ǀ aśvam ǀ poṣayitnu ǀ ā ǀ saḥ ǀ naḥ ǀ mṛḷāti ǀ īdṛśe ǁ
04.057.02 (Mandala. Sukta. Rik)
3.8.09.02 (Ashtaka. Adhyaya. Varga. Rik)
04.05.083 (Mandala. Anuvāka. Rik)
Samhita Devanagari Accented
क्षेत्र॑स्य पते॒ मधु॑मंतमू॒र्मिं धे॒नुरि॑व॒ पयो॑ अ॒स्मासु॑ धुक्ष्व ।
म॒धु॒श्चुतं॑ घृ॒तमि॑व॒ सुपू॑तमृ॒तस्य॑ नः॒ पत॑यो मृळयंतु ॥
Samhita Devanagari Nonaccented
क्षेत्रस्य पते मधुमंतमूर्मिं धेनुरिव पयो अस्मासु धुक्ष्व ।
मधुश्चुतं घृतमिव सुपूतमृतस्य नः पतयो मृळयंतु ॥
Samhita Transcription Accented
kṣétrasya pate mádhumantamūrmím dhenúriva páyo asmā́su dhukṣva ǀ
madhuścútam ghṛtámiva súpūtamṛtásya naḥ pátayo mṛḷayantu ǁ
Samhita Transcription Nonaccented
kṣetrasya pate madhumantamūrmim dhenuriva payo asmāsu dhukṣva ǀ
madhuścutam ghṛtamiva supūtamṛtasya naḥ patayo mṛḷayantu ǁ
Padapatha Devanagari Accented
क्षेत्र॑स्य । प॒ते॒ । मधु॑ऽमन्तम् । ऊ॒र्मिम् । धे॒नुःऽइ॑व । पयः॑ । अ॒स्मासु॑ । धु॒क्ष्व॒ ।
म॒धु॒ऽश्चुत॑म् । घृ॒तम्ऽइ॑व । सुऽपू॑तम् । ऋ॒तस्य॑ । नः॒ । पत॑यः । मृ॒ळ॒य॒न्तु॒ ॥
Padapatha Devanagari Nonaccented
क्षेत्रस्य । पते । मधुऽमन्तम् । ऊर्मिम् । धेनुःऽइव । पयः । अस्मासु । धुक्ष्व ।
मधुऽश्चुतम् । घृतम्ऽइव । सुऽपूतम् । ऋतस्य । नः । पतयः । मृळयन्तु ॥
Padapatha Transcription Accented
kṣétrasya ǀ pate ǀ mádhu-mantam ǀ ūrmím ǀ dhenúḥ-iva ǀ páyaḥ ǀ asmā́su ǀ dhukṣva ǀ
madhu-ścútam ǀ ghṛtám-iva ǀ sú-pūtam ǀ ṛtásya ǀ naḥ ǀ pátayaḥ ǀ mṛḷayantu ǁ
Padapatha Transcription Nonaccented
kṣetrasya ǀ pate ǀ madhu-mantam ǀ ūrmim ǀ dhenuḥ-iva ǀ payaḥ ǀ asmāsu ǀ dhukṣva ǀ
madhu-ścutam ǀ ghṛtam-iva ǀ su-pūtam ǀ ṛtasya ǀ naḥ ǀ patayaḥ ǀ mṛḷayantu ǁ
04.057.03 (Mandala. Sukta. Rik)
3.8.09.03 (Ashtaka. Adhyaya. Varga. Rik)
04.05.084 (Mandala. Anuvāka. Rik)
Samhita Devanagari Accented
मधु॑मती॒रोष॑धी॒र्द्याव॒ आपो॒ मधु॑मन्नो भवत्वं॒तरि॑क्षं ।
क्षेत्र॑स्य॒ पति॒र्मधु॑मान्नो अ॒स्त्वरि॑ष्यंतो॒ अन्वे॑नं चरेम ॥
Samhita Devanagari Nonaccented
मधुमतीरोषधीर्द्याव आपो मधुमन्नो भवत्वंतरिक्षं ।
क्षेत्रस्य पतिर्मधुमान्नो अस्त्वरिष्यंतो अन्वेनं चरेम ॥
Samhita Transcription Accented
mádhumatīróṣadhīrdyā́va ā́po mádhumanno bhavatvantárikṣam ǀ
kṣétrasya pátirmádhumānno astváriṣyanto ánvenam carema ǁ
Samhita Transcription Nonaccented
madhumatīroṣadhīrdyāva āpo madhumanno bhavatvantarikṣam ǀ
kṣetrasya patirmadhumānno astvariṣyanto anvenam carema ǁ
Padapatha Devanagari Accented
मधु॑ऽमतीः । ओष॑धीः । द्यावः॑ । आपः॑ । मधु॑ऽमत् । नः॒ । भ॒व॒तु॒ । अ॒न्तरि॑क्षम् ।
क्षेत्र॑स्य । पतिः॑ । मधु॑ऽमान् । नः॒ । अ॒स्तु॒ । अरि॑ष्यन्तः॑ । अनु॑ । ए॒न॒म् । च॒रे॒म॒ ॥
Padapatha Devanagari Nonaccented
मधुऽमतीः । ओषधीः । द्यावः । आपः । मधुऽमत् । नः । भवतु । अन्तरिक्षम् ।
क्षेत्रस्य । पतिः । मधुऽमान् । नः । अस्तु । अरिष्यन्तः । अनु । एनम् । चरेम ॥
Padapatha Transcription Accented
mádhu-matīḥ ǀ óṣadhīḥ ǀ dyā́vaḥ ǀ ā́paḥ ǀ mádhu-mat ǀ naḥ ǀ bhavatu ǀ antárikṣam ǀ
kṣétrasya ǀ pátiḥ ǀ mádhu-mān ǀ naḥ ǀ astu ǀ áriṣyantaḥ ǀ ánu ǀ enam ǀ carema ǁ
Padapatha Transcription Nonaccented
madhu-matīḥ ǀ oṣadhīḥ ǀ dyāvaḥ ǀ āpaḥ ǀ madhu-mat ǀ naḥ ǀ bhavatu ǀ antarikṣam ǀ
kṣetrasya ǀ patiḥ ǀ madhu-mān ǀ naḥ ǀ astu ǀ ariṣyantaḥ ǀ anu ǀ enam ǀ carema ǁ
04.057.04 (Mandala. Sukta. Rik)
3.8.09.04 (Ashtaka. Adhyaya. Varga. Rik)
04.05.085 (Mandala. Anuvāka. Rik)
Samhita Devanagari Accented
शु॒नं वा॒हाः शु॒नं नरः॑ शु॒नं कृ॑षतु॒ लांग॑लं ।
शु॒नं व॑र॒त्रा ब॑ध्यंतां शु॒नमष्ट्रा॒मुदिं॑गय ॥
Samhita Devanagari Nonaccented
शुनं वाहाः शुनं नरः शुनं कृषतु लांगलं ।
शुनं वरत्रा बध्यंतां शुनमष्ट्रामुदिंगय ॥
Samhita Transcription Accented
śunám vāhā́ḥ śunám náraḥ śunám kṛṣatu lā́ṅgalam ǀ
śunám varatrā́ badhyantām śunámáṣṭrāmúdiṅgaya ǁ
Samhita Transcription Nonaccented
śunam vāhāḥ śunam naraḥ śunam kṛṣatu lāṅgalam ǀ
śunam varatrā badhyantām śunamaṣṭrāmudiṅgaya ǁ
Padapatha Devanagari Accented
शु॒नम् । वा॒हाः । शु॒नम् । नरः॑ । शु॒नम् । कृ॒ष॒तु॒ । लाङ्ग॑लम् ।
शु॒नम् । व॒र॒त्राः । ब॒ध्य॒न्ता॒म् । शु॒नम् । अष्ट्रा॑म् । उत् । इ॒ङ्ग॒य॒ ॥
Padapatha Devanagari Nonaccented
शुनम् । वाहाः । शुनम् । नरः । शुनम् । कृषतु । लाङ्गलम् ।
शुनम् । वरत्राः । बध्यन्ताम् । शुनम् । अष्ट्राम् । उत् । इङ्गय ॥
Padapatha Transcription Accented
śunám ǀ vāhā́ḥ ǀ śunám ǀ náraḥ ǀ śunám ǀ kṛṣatu ǀ lā́ṅgalam ǀ
śunám ǀ varatrā́ḥ ǀ badhyantām ǀ śunám ǀ áṣṭrām ǀ út ǀ iṅgaya ǁ
Padapatha Transcription Nonaccented
śunam ǀ vāhāḥ ǀ śunam ǀ naraḥ ǀ śunam ǀ kṛṣatu ǀ lāṅgalam ǀ
śunam ǀ varatrāḥ ǀ badhyantām ǀ śunam ǀ aṣṭrām ǀ ut ǀ iṅgaya ǁ
04.057.05 (Mandala. Sukta. Rik)
3.8.09.05 (Ashtaka. Adhyaya. Varga. Rik)
04.05.086 (Mandala. Anuvāka. Rik)
Samhita Devanagari Accented
शुना॑सीरावि॒मां वाचं॑ जुषेथां॒ यद्दि॒वि च॒क्रथुः॒ पयः॑ ।
तेने॒मामुप॑ सिंचतं ॥
Samhita Devanagari Nonaccented
शुनासीराविमां वाचं जुषेथां यद्दिवि चक्रथुः पयः ।
तेनेमामुप सिंचतं ॥
Samhita Transcription Accented
śúnāsīrāvimā́m vā́cam juṣethām yáddiví cakráthuḥ páyaḥ ǀ
ténemā́múpa siñcatam ǁ
Samhita Transcription Nonaccented
śunāsīrāvimām vācam juṣethām yaddivi cakrathuḥ payaḥ ǀ
tenemāmupa siñcatam ǁ
Padapatha Devanagari Accented
शुना॑सीरौ । इ॒माम् । वाच॑म् । जु॒षे॒था॒म् । यत् । दि॒वि । च॒क्रथुः॑ । पयः॑ ।
तेन॑ । इ॒माम् । उप॑ । सि॒ञ्च॒त॒म् ॥
Padapatha Devanagari Nonaccented
शुनासीरौ । इमाम् । वाचम् । जुषेथाम् । यत् । दिवि । चक्रथुः । पयः ।
तेन । इमाम् । उप । सिञ्चतम् ॥
Padapatha Transcription Accented
śúnāsīrau ǀ imā́m ǀ vā́cam ǀ juṣethām ǀ yát ǀ diví ǀ cakráthuḥ ǀ páyaḥ ǀ
téna ǀ imā́m ǀ úpa ǀ siñcatam ǁ
Padapatha Transcription Nonaccented
śunāsīrau ǀ imām ǀ vācam ǀ juṣethām ǀ yat ǀ divi ǀ cakrathuḥ ǀ payaḥ ǀ
tena ǀ imām ǀ upa ǀ siñcatam ǁ
04.057.06 (Mandala. Sukta. Rik)
3.8.09.06 (Ashtaka. Adhyaya. Varga. Rik)
04.05.087 (Mandala. Anuvāka. Rik)
Samhita Devanagari Accented
अ॒र्वाची॑ सुभगे भव॒ सीते॒ वंदा॑महे त्वा ।
यथा॑ नः सु॒भगास॑सि॒ यथा॑ नः सु॒फलास॑सि ॥
Samhita Devanagari Nonaccented
अर्वाची सुभगे भव सीते वंदामहे त्वा ।
यथा नः सुभगाससि यथा नः सुफलाससि ॥
Samhita Transcription Accented
arvā́cī subhage bhava sī́te vándāmahe tvā ǀ
yáthā naḥ subhágā́sasi yáthā naḥ suphálā́sasi ǁ
Samhita Transcription Nonaccented
arvācī subhage bhava sīte vandāmahe tvā ǀ
yathā naḥ subhagāsasi yathā naḥ suphalāsasi ǁ
Padapatha Devanagari Accented
अ॒र्वाची॑ । सु॒ऽभ॒गे॒ । भ॒व॒ । सीते॑ । वन्दा॑महे । त्वा॒ ।
यथा॑ । नः॒ । सु॒ऽभगा॑ । अस॑सि । यथा॑ । नः॒ । सु॒ऽफला॑ । अस॑सि ॥
Padapatha Devanagari Nonaccented
अर्वाची । सुऽभगे । भव । सीते । वन्दामहे । त्वा ।
यथा । नः । सुऽभगा । अससि । यथा । नः । सुऽफला । अससि ॥
Padapatha Transcription Accented
arvā́cī ǀ su-bhage ǀ bhava ǀ sī́te ǀ vándāmahe ǀ tvā ǀ
yáthā ǀ naḥ ǀ su-bhágā ǀ ásasi ǀ yáthā ǀ naḥ ǀ su-phálā ǀ ásasi ǁ
Padapatha Transcription Nonaccented
arvācī ǀ su-bhage ǀ bhava ǀ sīte ǀ vandāmahe ǀ tvā ǀ
yathā ǀ naḥ ǀ su-bhagā ǀ asasi ǀ yathā ǀ naḥ ǀ su-phalā ǀ asasi ǁ
04.057.07 (Mandala. Sukta. Rik)
3.8.09.07 (Ashtaka. Adhyaya. Varga. Rik)
04.05.088 (Mandala. Anuvāka. Rik)
Samhita Devanagari Accented
इंद्रः॒ सीतां॒ नि गृ॑ह्णातु॒ तां पू॒षानु॑ यच्छतु ।
सा नः॒ पय॑स्वती दुहा॒मुत्त॑रामुत्तरां॒ समां॑ ॥
Samhita Devanagari Nonaccented
इंद्रः सीतां नि गृह्णातु तां पूषानु यच्छतु ।
सा नः पयस्वती दुहामुत्तरामुत्तरां समां ॥
Samhita Transcription Accented
índraḥ sī́tām ní gṛhṇātu tā́m pūṣā́nu yacchatu ǀ
sā́ naḥ páyasvatī duhāmúttarāmuttarām sámām ǁ
Samhita Transcription Nonaccented
indraḥ sītām ni gṛhṇātu tām pūṣānu yacchatu ǀ
sā naḥ payasvatī duhāmuttarāmuttarām samām ǁ
Padapatha Devanagari Accented
इन्द्रः॑ । सीता॑म् । नि । गृ॒ह्णा॒तु॒ । ताम् । पू॒षा । अनु॑ । य॒च्छ॒तु॒ ।
सा । नः॒ । पय॑स्वती । दु॒हा॒म् । उत्त॑राम्ऽउत्तराम् । समा॑म् ॥
Padapatha Devanagari Nonaccented
इन्द्रः । सीताम् । नि । गृह्णातु । ताम् । पूषा । अनु । यच्छतु ।
सा । नः । पयस्वती । दुहाम् । उत्तराम्ऽउत्तराम् । समाम् ॥
Padapatha Transcription Accented
índraḥ ǀ sī́tām ǀ ní ǀ gṛhṇātu ǀ tā́m ǀ pūṣā́ ǀ ánu ǀ yacchatu ǀ
sā́ ǀ naḥ ǀ páyasvatī ǀ duhām ǀ úttarām-uttarām ǀ sámām ǁ
Padapatha Transcription Nonaccented
indraḥ ǀ sītām ǀ ni ǀ gṛhṇātu ǀ tām ǀ pūṣā ǀ anu ǀ yacchatu ǀ
sā ǀ naḥ ǀ payasvatī ǀ duhām ǀ uttarām-uttarām ǀ samām ǁ
04.057.08 (Mandala. Sukta. Rik)
3.8.09.08 (Ashtaka. Adhyaya. Varga. Rik)
04.05.089 (Mandala. Anuvāka. Rik)
Samhita Devanagari Accented
शु॒नं नः॒ फाला॒ वि कृ॑षंतु॒ भूमिं॑ शु॒नं की॒नाशा॑ अ॒भि यं॑तु वा॒हैः ।
शु॒नं प॒र्जन्यो॒ मधु॑ना॒ पयो॑भिः॒ शुना॑सीरा शु॒नम॒स्मासु॑ धत्तं ॥
Samhita Devanagari Nonaccented
शुनं नः फाला वि कृषंतु भूमिं शुनं कीनाशा अभि यंतु वाहैः ।
शुनं पर्जन्यो मधुना पयोभिः शुनासीरा शुनमस्मासु धत्तं ॥
Samhita Transcription Accented
śunám naḥ phā́lā ví kṛṣantu bhū́mim śunám kīnā́śā abhí yantu vāháiḥ ǀ
śunám parjányo mádhunā páyobhiḥ śúnāsīrā śunámasmā́su dhattam ǁ
Samhita Transcription Nonaccented
śunam naḥ phālā vi kṛṣantu bhūmim śunam kīnāśā abhi yantu vāhaiḥ ǀ
śunam parjanyo madhunā payobhiḥ śunāsīrā śunamasmāsu dhattam ǁ
Padapatha Devanagari Accented
शु॒नम् । नः॒ । फालाः॑ । वि । कृ॒ष॒न्तु॒ । भूमि॑म् । शु॒नम् । की॒नाशाः॑ । अ॒भि । य॒न्तु॒ । वा॒हैः ।
शु॒नम् । प॒र्जन्यः॑ । मधु॑ना । पयः॑ऽभिः । शुना॑सीरा । शु॒नम् । अ॒स्मासु॑ । ध॒त्त॒म् ॥
Padapatha Devanagari Nonaccented
शुनम् । नः । फालाः । वि । कृषन्तु । भूमिम् । शुनम् । कीनाशाः । अभि । यन्तु । वाहैः ।
शुनम् । पर्जन्यः । मधुना । पयःऽभिः । शुनासीरा । शुनम् । अस्मासु । धत्तम् ॥
Padapatha Transcription Accented
śunám ǀ naḥ ǀ phā́lāḥ ǀ ví ǀ kṛṣantu ǀ bhū́mim ǀ śunám ǀ kīnā́śāḥ ǀ abhí ǀ yantu ǀ vāháiḥ ǀ
śunám ǀ parjányaḥ ǀ mádhunā ǀ páyaḥ-bhiḥ ǀ śúnāsīrā ǀ śunám ǀ asmā́su ǀ dhattam ǁ
Padapatha Transcription Nonaccented
śunam ǀ naḥ ǀ phālāḥ ǀ vi ǀ kṛṣantu ǀ bhūmim ǀ śunam ǀ kīnāśāḥ ǀ abhi ǀ yantu ǀ vāhaiḥ ǀ
śunam ǀ parjanyaḥ ǀ madhunā ǀ payaḥ-bhiḥ ǀ śunāsīrā ǀ śunam ǀ asmāsu ǀ dhattam ǁ