|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 9
|
1. Info |
| To: | agni | |
| From: | gaya ātreya | |
| Metres: | 1st set of styles: bhuriguṣṇik (3, 4); svarāḍuṣnik (1); nicṛdanuṣṭup (2); svarāḍbṛhatī (5); virāḍanuṣṭup (6); paṅktiḥ (7) 2nd set of styles: anuṣṭubh (1-4, 6-7); paṅkti (5) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.009.01 (Mandala. Sukta. Rik)
4.1.01.01 (Ashtaka. Adhyaya. Varga. Rik)
05.01.086 (Mandala. Anuvāka. Rik)
Samhita Devanagari Accented
त्वाम॑ग्ने ह॒विष्मं॑तो दे॒वं मर्ता॑स ईळते ।
मन्ये॑ त्वा जा॒तवे॑दसं॒ स ह॒व्या व॑क्ष्यानु॒षक् ॥
Samhita Devanagari Nonaccented
त्वामग्ने हविष्मंतो देवं मर्तास ईळते ।
मन्ये त्वा जातवेदसं स हव्या वक्ष्यानुषक् ॥
Samhita Transcription Accented
tvā́magne havíṣmanto devám mártāsa īḷate ǀ
mánye tvā jātávedasam sá havyā́ vakṣyānuṣák ǁ
Samhita Transcription Nonaccented
tvāmagne haviṣmanto devam martāsa īḷate ǀ
manye tvā jātavedasam sa havyā vakṣyānuṣak ǁ
Padapatha Devanagari Accented
त्वाम् । अ॒ग्ने॒ । ह॒विष्म॑न्तः । दे॒वम् । मर्ता॑सः । ई॒ळ॒ते॒ ।
मन्ये॑ । त्वा॒ । जा॒तऽवे॑दसम् । सः । ह॒व्या । व॒क्षि॒ । आ॒नु॒षक् ॥
Padapatha Devanagari Nonaccented
त्वाम् । अग्ने । हविष्मन्तः । देवम् । मर्तासः । ईळते ।
मन्ये । त्वा । जातऽवेदसम् । सः । हव्या । वक्षि । आनुषक् ॥
Padapatha Transcription Accented
tvā́m ǀ agne ǀ havíṣmantaḥ ǀ devám ǀ mártāsaḥ ǀ īḷate ǀ
mánye ǀ tvā ǀ jātá-vedasam ǀ sáḥ ǀ havyā́ ǀ vakṣi ǀ ānuṣák ǁ
Padapatha Transcription Nonaccented
tvām ǀ agne ǀ haviṣmantaḥ ǀ devam ǀ martāsaḥ ǀ īḷate ǀ
manye ǀ tvā ǀ jāta-vedasam ǀ saḥ ǀ havyā ǀ vakṣi ǀ ānuṣak ǁ
05.009.02 (Mandala. Sukta. Rik)
4.1.01.02 (Ashtaka. Adhyaya. Varga. Rik)
05.01.087 (Mandala. Anuvāka. Rik)
Samhita Devanagari Accented
अ॒ग्निर्होता॒ दास्व॑तः॒ क्षय॑स्य वृ॒क्तब॑र्हिषः ।
सं य॒ज्ञास॒श्चरं॑ति॒ यं सं वाजा॑सः श्रव॒स्यवः॑ ॥
Samhita Devanagari Nonaccented
अग्निर्होता दास्वतः क्षयस्य वृक्तबर्हिषः ।
सं यज्ञासश्चरंति यं सं वाजासः श्रवस्यवः ॥
Samhita Transcription Accented
agnírhótā dā́svataḥ kṣáyasya vṛktábarhiṣaḥ ǀ
sám yajñā́saścáranti yám sám vā́jāsaḥ śravasyávaḥ ǁ
Samhita Transcription Nonaccented
agnirhotā dāsvataḥ kṣayasya vṛktabarhiṣaḥ ǀ
sam yajñāsaścaranti yam sam vājāsaḥ śravasyavaḥ ǁ
Padapatha Devanagari Accented
अ॒ग्निः । होता॑ । दास्व॑तः । क्षय॑स्य । वृ॒क्तऽब॑र्हिषः ।
सम् । य॒ज्ञासः॑ । चर॑न्ति । यम् । सम् । वाजा॑सः । श्र॒व॒स्यवः॑ ॥
Padapatha Devanagari Nonaccented
अग्निः । होता । दास्वतः । क्षयस्य । वृक्तऽबर्हिषः ।
सम् । यज्ञासः । चरन्ति । यम् । सम् । वाजासः । श्रवस्यवः ॥
Padapatha Transcription Accented
agníḥ ǀ hótā ǀ dā́svataḥ ǀ kṣáyasya ǀ vṛktá-barhiṣaḥ ǀ
sám ǀ yajñā́saḥ ǀ cáranti ǀ yám ǀ sám ǀ vā́jāsaḥ ǀ śravasyávaḥ ǁ
Padapatha Transcription Nonaccented
agniḥ ǀ hotā ǀ dāsvataḥ ǀ kṣayasya ǀ vṛkta-barhiṣaḥ ǀ
sam ǀ yajñāsaḥ ǀ caranti ǀ yam ǀ sam ǀ vājāsaḥ ǀ śravasyavaḥ ǁ
05.009.03 (Mandala. Sukta. Rik)
4.1.01.03 (Ashtaka. Adhyaya. Varga. Rik)
05.01.088 (Mandala. Anuvāka. Rik)
Samhita Devanagari Accented
उ॒त स्म॒ यं शिशुं॑ यथा॒ नवं॒ जनि॑ष्टा॒रणी॑ ।
ध॒र्तारं॒ मानु॑षीणां वि॒शाम॒ग्निं स्व॑ध्व॒रं ॥
Samhita Devanagari Nonaccented
उत स्म यं शिशुं यथा नवं जनिष्टारणी ।
धर्तारं मानुषीणां विशामग्निं स्वध्वरं ॥
Samhita Transcription Accented
utá sma yám śíśum yathā návam jániṣṭāráṇī ǀ
dhartā́ram mā́nuṣīṇām viśā́magním svadhvarám ǁ
Samhita Transcription Nonaccented
uta sma yam śiśum yathā navam janiṣṭāraṇī ǀ
dhartāram mānuṣīṇām viśāmagnim svadhvaram ǁ
Padapatha Devanagari Accented
उ॒त । स्म॒ । यम् । शिशु॑म् । य॒था॒ । नव॑म् । जनि॑ष्ट । अ॒रणी॒ इति॑ ।
ध॒र्तार॑म् । मानु॑षीणाम् । वि॒शाम् । अ॒ग्निम् । सु॒ऽअ॒ध्व॒रम् ॥
Padapatha Devanagari Nonaccented
उत । स्म । यम् । शिशुम् । यथा । नवम् । जनिष्ट । अरणी इति ।
धर्तारम् । मानुषीणाम् । विशाम् । अग्निम् । सुऽअध्वरम् ॥
Padapatha Transcription Accented
utá ǀ sma ǀ yám ǀ śíśum ǀ yathā ǀ návam ǀ jániṣṭa ǀ aráṇī íti ǀ
dhartā́ram ǀ mā́nuṣīṇām ǀ viśā́m ǀ agním ǀ su-adhvarám ǁ
Padapatha Transcription Nonaccented
uta ǀ sma ǀ yam ǀ śiśum ǀ yathā ǀ navam ǀ janiṣṭa ǀ araṇī iti ǀ
dhartāram ǀ mānuṣīṇām ǀ viśām ǀ agnim ǀ su-adhvaram ǁ
05.009.04 (Mandala. Sukta. Rik)
4.1.01.04 (Ashtaka. Adhyaya. Varga. Rik)
05.01.089 (Mandala. Anuvāka. Rik)
Samhita Devanagari Accented
उ॒त स्म॑ दुर्गृभीयसे पु॒त्रो न ह्वा॒र्याणां॑ ।
पु॒रू यो दग्धासि॒ वनाग्ने॑ प॒शुर्न यव॑से ॥
Samhita Devanagari Nonaccented
उत स्म दुर्गृभीयसे पुत्रो न ह्वार्याणां ।
पुरू यो दग्धासि वनाग्ने पशुर्न यवसे ॥
Samhita Transcription Accented
utá sma durgṛbhīyase putró ná hvāryā́ṇām ǀ
purū́ yó dágdhā́si vánā́gne paśúrná yávase ǁ
Samhita Transcription Nonaccented
uta sma durgṛbhīyase putro na hvāryāṇām ǀ
purū yo dagdhāsi vanāgne paśurna yavase ǁ
Padapatha Devanagari Accented
उ॒त । स्म॒ । दुः॒ऽगृ॒भी॒य॒से॒ । पु॒त्रः । न । ह्वा॒र्याणा॑म् ।
पु॒रु । यः । दग्धा॑ । असि॑ । वना॑ । अग्ने॑ । प॒शुः । न । यव॑से ॥
Padapatha Devanagari Nonaccented
उत । स्म । दुःऽगृभीयसे । पुत्रः । न । ह्वार्याणाम् ।
पुरु । यः । दग्धा । असि । वना । अग्ने । पशुः । न । यवसे ॥
Padapatha Transcription Accented
utá ǀ sma ǀ duḥ-gṛbhīyase ǀ putráḥ ǀ ná ǀ hvāryā́ṇām ǀ
purú ǀ yáḥ ǀ dágdhā ǀ ási ǀ vánā ǀ ágne ǀ paśúḥ ǀ ná ǀ yávase ǁ
Padapatha Transcription Nonaccented
uta ǀ sma ǀ duḥ-gṛbhīyase ǀ putraḥ ǀ na ǀ hvāryāṇām ǀ
puru ǀ yaḥ ǀ dagdhā ǀ asi ǀ vanā ǀ agne ǀ paśuḥ ǀ na ǀ yavase ǁ
05.009.05 (Mandala. Sukta. Rik)
4.1.01.05 (Ashtaka. Adhyaya. Varga. Rik)
05.01.090 (Mandala. Anuvāka. Rik)
Samhita Devanagari Accented
अध॑ स्म॒ यस्या॒र्चयः॑ स॒म्यक्सं॒यंति॑ धू॒मिनः॑ ।
यदी॒मह॑ त्रि॒तो दि॒व्युप॒ ध्माते॑व॒ धम॑ति॒ शिशी॑ते ध्मा॒तरी॑ यथा ॥
Samhita Devanagari Nonaccented
अध स्म यस्यार्चयः सम्यक्संयंति धूमिनः ।
यदीमह त्रितो दिव्युप ध्मातेव धमति शिशीते ध्मातरी यथा ॥
Samhita Transcription Accented
ádha sma yásyārcáyaḥ samyáksaṃyánti dhūmínaḥ ǀ
yádīmáha tritó divyúpa dhmā́teva dhámati śíśīte dhmātárī yathā ǁ
Samhita Transcription Nonaccented
adha sma yasyārcayaḥ samyaksaṃyanti dhūminaḥ ǀ
yadīmaha trito divyupa dhmāteva dhamati śiśīte dhmātarī yathā ǁ
Padapatha Devanagari Accented
अध॑ । स्म॒ । यस्य॑ । अ॒र्चयः॑ । स॒म्यक् । स॒म्ऽयन्ति॑ । धू॒मिनः॑ ।
यत् । ई॒म् । अह॑ । त्रि॒तः । दि॒वि । उप॑ । ध्माता॑ऽइव । धम॑ति । शिशी॑ते । ध्मा॒तरि॑ । य॒था॒ ॥
Padapatha Devanagari Nonaccented
अध । स्म । यस्य । अर्चयः । सम्यक् । सम्ऽयन्ति । धूमिनः ।
यत् । ईम् । अह । त्रितः । दिवि । उप । ध्माताऽइव । धमति । शिशीते । ध्मातरि । यथा ॥
Padapatha Transcription Accented
ádha ǀ sma ǀ yásya ǀ arcáyaḥ ǀ samyák ǀ sam-yánti ǀ dhūmínaḥ ǀ
yát ǀ īm ǀ áha ǀ tritáḥ ǀ diví ǀ úpa ǀ dhmā́tā-iva ǀ dhámati ǀ śíśīte ǀ dhmātári ǀ yathā ǁ
Padapatha Transcription Nonaccented
adha ǀ sma ǀ yasya ǀ arcayaḥ ǀ samyak ǀ sam-yanti ǀ dhūminaḥ ǀ
yat ǀ īm ǀ aha ǀ tritaḥ ǀ divi ǀ upa ǀ dhmātā-iva ǀ dhamati ǀ śiśīte ǀ dhmātari ǀ yathā ǁ
05.009.06 (Mandala. Sukta. Rik)
4.1.01.06 (Ashtaka. Adhyaya. Varga. Rik)
05.01.091 (Mandala. Anuvāka. Rik)
Samhita Devanagari Accented
तवा॒हम॑ग्न ऊ॒तिभि॑र्मि॒त्रस्य॑ च॒ प्रश॑स्तिभिः ।
द्वे॒षो॒युतो॒ न दु॑रि॒ता तु॒र्याम॒ मर्त्या॑नां ॥
Samhita Devanagari Nonaccented
तवाहमग्न ऊतिभिर्मित्रस्य च प्रशस्तिभिः ।
द्वेषोयुतो न दुरिता तुर्याम मर्त्यानां ॥
Samhita Transcription Accented
távāhámagna ūtíbhirmitrásya ca práśastibhiḥ ǀ
dveṣoyúto ná duritā́ turyā́ma mártyānām ǁ
Samhita Transcription Nonaccented
tavāhamagna ūtibhirmitrasya ca praśastibhiḥ ǀ
dveṣoyuto na duritā turyāma martyānām ǁ
Padapatha Devanagari Accented
तव॑ । अ॒हम् । अ॒ग्ने॒ । ऊ॒तिऽभिः॑ । मि॒त्रस्य॑ । च॒ । प्रश॑स्तिऽभिः ।
द्वे॒षः॒ऽयुतः॑ । न । दुः॒ऽइ॒ता । तु॒र्याम॑ । मर्त्या॑नाम् ॥
Padapatha Devanagari Nonaccented
तव । अहम् । अग्ने । ऊतिऽभिः । मित्रस्य । च । प्रशस्तिऽभिः ।
द्वेषःऽयुतः । न । दुःऽइता । तुर्याम । मर्त्यानाम् ॥
Padapatha Transcription Accented
táva ǀ ahám ǀ agne ǀ ūtí-bhiḥ ǀ mitrásya ǀ ca ǀ práśasti-bhiḥ ǀ
dveṣaḥ-yútaḥ ǀ ná ǀ duḥ-itā́ ǀ turyā́ma ǀ mártyānām ǁ
Padapatha Transcription Nonaccented
tava ǀ aham ǀ agne ǀ ūti-bhiḥ ǀ mitrasya ǀ ca ǀ praśasti-bhiḥ ǀ
dveṣaḥ-yutaḥ ǀ na ǀ duḥ-itā ǀ turyāma ǀ martyānām ǁ
05.009.07 (Mandala. Sukta. Rik)
4.1.01.07 (Ashtaka. Adhyaya. Varga. Rik)
05.01.092 (Mandala. Anuvāka. Rik)
Samhita Devanagari Accented
तं नो॑ अग्ने अ॒भी नरो॑ र॒यिं स॑हस्व॒ आ भ॑र ।
स क्षे॑पय॒त्स पो॑षय॒द्भुव॒द्वाज॑स्य सा॒तय॑ उ॒तैधि॑ पृ॒त्सु नो॑ वृ॒धे ॥
Samhita Devanagari Nonaccented
तं नो अग्ने अभी नरो रयिं सहस्व आ भर ।
स क्षेपयत्स पोषयद्भुवद्वाजस्य सातय उतैधि पृत्सु नो वृधे ॥
Samhita Transcription Accented
tám no agne abhī́ náro rayím sahasva ā́ bhara ǀ
sá kṣepayatsá poṣayadbhúvadvā́jasya sātáya utáidhi pṛtsú no vṛdhé ǁ
Samhita Transcription Nonaccented
tam no agne abhī naro rayim sahasva ā bhara ǀ
sa kṣepayatsa poṣayadbhuvadvājasya sātaya utaidhi pṛtsu no vṛdhe ǁ
Padapatha Devanagari Accented
तत् । नः॒ । अ॒ग्ने॒ । अ॒भि । नरः॑ । र॒यिम् । स॒ह॒स्वः॒ । आ । भ॒र॒ ।
सः । क्षे॒प॒य॒त् । सः । पो॒ष॒य॒त् । भुव॑त् । वाज॑स्य । सा॒तये॑ । उ॒त । ए॒धि॒ । पृ॒त्ऽसु । नः॒ । वृ॒धे ॥
Padapatha Devanagari Nonaccented
तत् । नः । अग्ने । अभि । नरः । रयिम् । सहस्वः । आ । भर ।
सः । क्षेपयत् । सः । पोषयत् । भुवत् । वाजस्य । सातये । उत । एधि । पृत्ऽसु । नः । वृधे ॥
Padapatha Transcription Accented
tát ǀ naḥ ǀ agne ǀ abhí ǀ náraḥ ǀ rayím ǀ sahasvaḥ ǀ ā́ ǀ bhara ǀ
sáḥ ǀ kṣepayat ǀ sáḥ ǀ poṣayat ǀ bhúvat ǀ vā́jasya ǀ sātáye ǀ utá ǀ edhi ǀ pṛt-sú ǀ naḥ ǀ vṛdhé ǁ
Padapatha Transcription Nonaccented
tat ǀ naḥ ǀ agne ǀ abhi ǀ naraḥ ǀ rayim ǀ sahasvaḥ ǀ ā ǀ bhara ǀ
saḥ ǀ kṣepayat ǀ saḥ ǀ poṣayat ǀ bhuvat ǀ vājasya ǀ sātaye ǀ uta ǀ edhi ǀ pṛt-su ǀ naḥ ǀ vṛdhe ǁ