|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 20
|
1. Info |
| To: | agni | |
| From: | prayasvanta ātreya | |
| Metres: | 1st set of styles: virāḍanuṣṭup (1, 3); nicṛdanuṣṭup (2); paṅktiḥ (4) 2nd set of styles: anuṣṭubh (1-3); paṅkti (4) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.020.01 (Mandala. Sukta. Rik)
4.1.12.01 (Ashtaka. Adhyaya. Varga. Rik)
05.02.026 (Mandala. Anuvāka. Rik)
Samhita Devanagari Accented
यम॑ग्ने वाजसातम॒ त्वं चि॒न्मन्य॑से र॒यिं ।
तं नो॑ गी॒र्भिः श्र॒वाय्यं॑ देव॒त्रा प॑नया॒ युजं॑ ॥
Samhita Devanagari Nonaccented
यमग्ने वाजसातम त्वं चिन्मन्यसे रयिं ।
तं नो गीर्भिः श्रवाय्यं देवत्रा पनया युजं ॥
Samhita Transcription Accented
yámagne vājasātama tvám cinmányase rayím ǀ
tám no gīrbhíḥ śravā́yyam devatrā́ panayā yújam ǁ
Samhita Transcription Nonaccented
yamagne vājasātama tvam cinmanyase rayim ǀ
tam no gīrbhiḥ śravāyyam devatrā panayā yujam ǁ
Padapatha Devanagari Accented
यम् । अ॒ग्ने॒ । वा॒ज॒ऽसा॒त॒म॒ । त्वम् । चि॒त् । मन्य॑से । र॒यिम् ।
तम् । नः॒ । गीः॒ऽभिः । श्र॒वाय्य॑म् । दे॒व॒ऽत्रा । प॒न॒य॒ । युज॑म् ॥
Padapatha Devanagari Nonaccented
यम् । अग्ने । वाजऽसातम । त्वम् । चित् । मन्यसे । रयिम् ।
तम् । नः । गीःऽभिः । श्रवाय्यम् । देवऽत्रा । पनय । युजम् ॥
Padapatha Transcription Accented
yám ǀ agne ǀ vāja-sātama ǀ tvám ǀ cit ǀ mányase ǀ rayím ǀ
tám ǀ naḥ ǀ gīḥ-bhíḥ ǀ śravā́yyam ǀ deva-trā́ ǀ panaya ǀ yújam ǁ
Padapatha Transcription Nonaccented
yam ǀ agne ǀ vāja-sātama ǀ tvam ǀ cit ǀ manyase ǀ rayim ǀ
tam ǀ naḥ ǀ gīḥ-bhiḥ ǀ śravāyyam ǀ deva-trā ǀ panaya ǀ yujam ǁ
05.020.02 (Mandala. Sukta. Rik)
4.1.12.02 (Ashtaka. Adhyaya. Varga. Rik)
05.02.027 (Mandala. Anuvāka. Rik)
Samhita Devanagari Accented
ये अ॑ग्ने॒ नेरयं॑ति ते वृ॒द्धा उ॒ग्रस्य॒ शव॑सः ।
अप॒ द्वेषो॒ अप॒ ह्वरो॒ऽन्यव्र॑तस्य सश्चिरे ॥
Samhita Devanagari Nonaccented
ये अग्ने नेरयंति ते वृद्धा उग्रस्य शवसः ।
अप द्वेषो अप ह्वरोऽन्यव्रतस्य सश्चिरे ॥
Samhita Transcription Accented
yé agne néráyanti te vṛddhā́ ugrásya śávasaḥ ǀ
ápa dvéṣo ápa hváro’nyávratasya saścire ǁ
Samhita Transcription Nonaccented
ye agne nerayanti te vṛddhā ugrasya śavasaḥ ǀ
apa dveṣo apa hvaro’nyavratasya saścire ǁ
Padapatha Devanagari Accented
ये । अ॒ग्ने॒ । न । ई॒रय॑न्ति । ते॒ । वृ॒द्धाः । उ॒ग्रस्य॑ । शव॑सः ।
अप॑ । द्वेषः॑ । अप॑ । ह्वरः॑ । अ॒न्यऽव्र॑तस्य । स॒श्चि॒रे॒ ॥
Padapatha Devanagari Nonaccented
ये । अग्ने । न । ईरयन्ति । ते । वृद्धाः । उग्रस्य । शवसः ।
अप । द्वेषः । अप । ह्वरः । अन्यऽव्रतस्य । सश्चिरे ॥
Padapatha Transcription Accented
yé ǀ agne ǀ ná ǀ īráyanti ǀ te ǀ vṛddhā́ḥ ǀ ugrásya ǀ śávasaḥ ǀ
ápa ǀ dvéṣaḥ ǀ ápa ǀ hváraḥ ǀ anyá-vratasya ǀ saścire ǁ
Padapatha Transcription Nonaccented
ye ǀ agne ǀ na ǀ īrayanti ǀ te ǀ vṛddhāḥ ǀ ugrasya ǀ śavasaḥ ǀ
apa ǀ dveṣaḥ ǀ apa ǀ hvaraḥ ǀ anya-vratasya ǀ saścire ǁ
05.020.03 (Mandala. Sukta. Rik)
4.1.12.03 (Ashtaka. Adhyaya. Varga. Rik)
05.02.028 (Mandala. Anuvāka. Rik)
Samhita Devanagari Accented
होता॑रं त्वा वृणीम॒हेऽग्ने॒ दक्ष॑स्य॒ साध॑नं ।
य॒ज्ञेषु॑ पू॒र्व्यं गि॒रा प्रय॑स्वंतो हवामहे ॥
Samhita Devanagari Nonaccented
होतारं त्वा वृणीमहेऽग्ने दक्षस्य साधनं ।
यज्ञेषु पूर्व्यं गिरा प्रयस्वंतो हवामहे ॥
Samhita Transcription Accented
hótāram tvā vṛṇīmahé’gne dákṣasya sā́dhanam ǀ
yajñéṣu pūrvyám girā́ práyasvanto havāmahe ǁ
Samhita Transcription Nonaccented
hotāram tvā vṛṇīmahe’gne dakṣasya sādhanam ǀ
yajñeṣu pūrvyam girā prayasvanto havāmahe ǁ
Padapatha Devanagari Accented
होता॑रम् । त्वा॒ । वृ॒णी॒म॒हे॒ । अग्ने॑ । दक्ष॑स्य । साध॑नम् ।
य॒ज्ञेषु॑ । पू॒र्व्यम् । गि॒रा । प्रय॑स्वन्तः । ह॒वा॒म॒हे॒ ॥
Padapatha Devanagari Nonaccented
होतारम् । त्वा । वृणीमहे । अग्ने । दक्षस्य । साधनम् ।
यज्ञेषु । पूर्व्यम् । गिरा । प्रयस्वन्तः । हवामहे ॥
Padapatha Transcription Accented
hótāram ǀ tvā ǀ vṛṇīmahe ǀ ágne ǀ dákṣasya ǀ sā́dhanam ǀ
yajñéṣu ǀ pūrvyám ǀ girā́ ǀ práyasvantaḥ ǀ havāmahe ǁ
Padapatha Transcription Nonaccented
hotāram ǀ tvā ǀ vṛṇīmahe ǀ agne ǀ dakṣasya ǀ sādhanam ǀ
yajñeṣu ǀ pūrvyam ǀ girā ǀ prayasvantaḥ ǀ havāmahe ǁ
05.020.04 (Mandala. Sukta. Rik)
4.1.12.04 (Ashtaka. Adhyaya. Varga. Rik)
05.02.029 (Mandala. Anuvāka. Rik)
Samhita Devanagari Accented
इ॒त्था यथा॑ त ऊ॒तये॒ सह॑सावंदि॒वेदि॑वे ।
रा॒य ऋ॒ताय॑ सुक्रतो॒ गोभिः॑ ष्याम सध॒मादो॑ वी॒रैः स्या॑म सध॒मादः॑ ॥
Samhita Devanagari Nonaccented
इत्था यथा त ऊतये सहसावंदिवेदिवे ।
राय ऋताय सुक्रतो गोभिः ष्याम सधमादो वीरैः स्याम सधमादः ॥
Samhita Transcription Accented
itthā́ yáthā ta ūtáye sáhasāvandivédive ǀ
rāyá ṛtā́ya sukrato góbhiḥ ṣyāma sadhamā́do vīráiḥ syāma sadhamā́daḥ ǁ
Samhita Transcription Nonaccented
itthā yathā ta ūtaye sahasāvandivedive ǀ
rāya ṛtāya sukrato gobhiḥ ṣyāma sadhamādo vīraiḥ syāma sadhamādaḥ ǁ
Padapatha Devanagari Accented
इ॒त्था । यथा॑ । ते॒ । ऊ॒तये॑ । सह॑साऽवन् । दि॒वेऽदि॑वे ।
रा॒ये । ऋ॒ताय॑ । सु॒क्र॒तो॒ इति॑ सुऽक्रतो । गोभिः॑ । स्या॒म॒ । स॒ध॒ऽमादः॑ । वी॒रैः । स्या॒म॒ । स॒ध॒ऽमादः॑ ॥
Padapatha Devanagari Nonaccented
इत्था । यथा । ते । ऊतये । सहसाऽवन् । दिवेऽदिवे ।
राये । ऋताय । सुक्रतो इति सुऽक्रतो । गोभिः । स्याम । सधऽमादः । वीरैः । स्याम । सधऽमादः ॥
Padapatha Transcription Accented
itthā́ ǀ yáthā ǀ te ǀ ūtáye ǀ sáhasā-van ǀ divé-dive ǀ
rāyé ǀ ṛtā́ya ǀ sukrato íti su-krato ǀ góbhiḥ ǀ syāma ǀ sadha-mā́daḥ ǀ vīráiḥ ǀ syāma ǀ sadha-mā́daḥ ǁ
Padapatha Transcription Nonaccented
itthā ǀ yathā ǀ te ǀ ūtaye ǀ sahasā-van ǀ dive-dive ǀ
rāye ǀ ṛtāya ǀ sukrato iti su-krato ǀ gobhiḥ ǀ syāma ǀ sadha-mādaḥ ǀ vīraiḥ ǀ syāma ǀ sadha-mādaḥ ǁ