|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 25
|
1. Info |
| To: | agni | |
| From: | vasūyava ātreya | |
| Metres: | 1st set of styles: anuṣṭup (2, 5, 6, 9); nicṛdanuṣṭup (1, 8); virāḍanuṣṭup (3, 7); bhuriguṣṇik (4) 2nd set of styles: anuṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.025.01 (Mandala. Sukta. Rik)
4.1.17.01 (Ashtaka. Adhyaya. Varga. Rik)
05.02.046 (Mandala. Anuvāka. Rik)
Samhita Devanagari Accented
अच्छा॑ वो अ॒ग्निमव॑से दे॒वं गा॑सि॒ स नो॒ वसुः॑ ।
रास॑त्पु॒त्र ऋ॑षू॒णामृ॒तावा॑ पर्षति द्वि॒षः ॥
Samhita Devanagari Nonaccented
अच्छा वो अग्निमवसे देवं गासि स नो वसुः ।
रासत्पुत्र ऋषूणामृतावा पर्षति द्विषः ॥
Samhita Transcription Accented
ácchā vo agnímávase devám gāsi sá no vásuḥ ǀ
rā́satputrá ṛṣūṇā́mṛtā́vā parṣati dviṣáḥ ǁ
Samhita Transcription Nonaccented
acchā vo agnimavase devam gāsi sa no vasuḥ ǀ
rāsatputra ṛṣūṇāmṛtāvā parṣati dviṣaḥ ǁ
Padapatha Devanagari Accented
अच्छ॑ । वः॒ । अ॒ग्निम् । अव॑से । दे॒वम् । गा॒सि॒ । सः । नः॒ । वसुः॑ ।
रास॑त् । पु॒त्रः । ऋ॒षू॒णाम् । ऋ॒तऽवा॑ । प॒र्ष॒ति॒ । द्वि॒षः ॥
Padapatha Devanagari Nonaccented
अच्छ । वः । अग्निम् । अवसे । देवम् । गासि । सः । नः । वसुः ।
रासत् । पुत्रः । ऋषूणाम् । ऋतऽवा । पर्षति । द्विषः ॥
Padapatha Transcription Accented
áccha ǀ vaḥ ǀ agním ǀ ávase ǀ devám ǀ gāsi ǀ sáḥ ǀ naḥ ǀ vásuḥ ǀ
rā́sat ǀ putráḥ ǀ ṛṣūṇā́m ǀ ṛtá-vā ǀ parṣati ǀ dviṣáḥ ǁ
Padapatha Transcription Nonaccented
accha ǀ vaḥ ǀ agnim ǀ avase ǀ devam ǀ gāsi ǀ saḥ ǀ naḥ ǀ vasuḥ ǀ
rāsat ǀ putraḥ ǀ ṛṣūṇām ǀ ṛta-vā ǀ parṣati ǀ dviṣaḥ ǁ
05.025.02 (Mandala. Sukta. Rik)
4.1.17.02 (Ashtaka. Adhyaya. Varga. Rik)
05.02.047 (Mandala. Anuvāka. Rik)
Samhita Devanagari Accented
स हि स॒त्यो यं पूर्वे॑ चिद्दे॒वास॑श्चि॒द्यमी॑धि॒रे ।
होता॑रं मं॒द्रजि॑ह्व॒मित्सु॑दी॒तिभि॑र्वि॒भाव॑सुं ॥
Samhita Devanagari Nonaccented
स हि सत्यो यं पूर्वे चिद्देवासश्चिद्यमीधिरे ।
होतारं मंद्रजिह्वमित्सुदीतिभिर्विभावसुं ॥
Samhita Transcription Accented
sá hí satyó yám pū́rve ciddevā́saścidyámīdhiré ǀ
hótāram mandrájihvamítsudītíbhirvibhā́vasum ǁ
Samhita Transcription Nonaccented
sa hi satyo yam pūrve ciddevāsaścidyamīdhire ǀ
hotāram mandrajihvamitsudītibhirvibhāvasum ǁ
Padapatha Devanagari Accented
सः । हि । स॒त्यः । यम् । पूर्वे॑ । चि॒त् । दे॒वासः॑ । चि॒त् । यम् । ई॒धि॒रे ।
होता॑रम् । म॒न्द्रऽजि॑ह्वम् । इत् । सु॒दी॒तिऽभिः॑ । वि॒भाऽव॑सुम् ॥
Padapatha Devanagari Nonaccented
सः । हि । सत्यः । यम् । पूर्वे । चित् । देवासः । चित् । यम् । ईधिरे ।
होतारम् । मन्द्रऽजिह्वम् । इत् । सुदीतिऽभिः । विभाऽवसुम् ॥
Padapatha Transcription Accented
sáḥ ǀ hí ǀ satyáḥ ǀ yám ǀ pū́rve ǀ cit ǀ devā́saḥ ǀ cit ǀ yám ǀ īdhiré ǀ
hótāram ǀ mandrá-jihvam ǀ ít ǀ sudītí-bhiḥ ǀ vibhā́-vasum ǁ
Padapatha Transcription Nonaccented
saḥ ǀ hi ǀ satyaḥ ǀ yam ǀ pūrve ǀ cit ǀ devāsaḥ ǀ cit ǀ yam ǀ īdhire ǀ
hotāram ǀ mandra-jihvam ǀ it ǀ sudīti-bhiḥ ǀ vibhā-vasum ǁ
05.025.03 (Mandala. Sukta. Rik)
4.1.17.03 (Ashtaka. Adhyaya. Varga. Rik)
05.02.048 (Mandala. Anuvāka. Rik)
Samhita Devanagari Accented
स नो॑ धी॒ती वरि॑ष्ठया॒ श्रेष्ठ॑या च सुम॒त्या ।
अग्ने॑ रा॒यो दि॑दीहि नः सुवृ॒क्तिभि॑र्वरेण्य ॥
Samhita Devanagari Nonaccented
स नो धीती वरिष्ठया श्रेष्ठया च सुमत्या ।
अग्ने रायो दिदीहि नः सुवृक्तिभिर्वरेण्य ॥
Samhita Transcription Accented
sá no dhītī́ váriṣṭhayā śréṣṭhayā ca sumatyā́ ǀ
ágne rāyó didīhi naḥ suvṛktíbhirvareṇya ǁ
Samhita Transcription Nonaccented
sa no dhītī variṣṭhayā śreṣṭhayā ca sumatyā ǀ
agne rāyo didīhi naḥ suvṛktibhirvareṇya ǁ
Padapatha Devanagari Accented
सः । नः॒ । धी॒ती । वरि॑ष्ठया । श्रेष्ठ॑या । च॒ । सु॒ऽम॒त्या ।
अग्ने॑ । रा॒यः । दि॒दी॒हि॒ । नः॒ । सु॒वृ॒क्तिऽभिः॑ । व॒रे॒ण्य॒ ॥
Padapatha Devanagari Nonaccented
सः । नः । धीती । वरिष्ठया । श्रेष्ठया । च । सुऽमत्या ।
अग्ने । रायः । दिदीहि । नः । सुवृक्तिऽभिः । वरेण्य ॥
Padapatha Transcription Accented
sáḥ ǀ naḥ ǀ dhītī́ ǀ váriṣṭhayā ǀ śréṣṭhayā ǀ ca ǀ su-matyā́ ǀ
ágne ǀ rāyáḥ ǀ didīhi ǀ naḥ ǀ suvṛktí-bhiḥ ǀ vareṇya ǁ
Padapatha Transcription Nonaccented
saḥ ǀ naḥ ǀ dhītī ǀ variṣṭhayā ǀ śreṣṭhayā ǀ ca ǀ su-matyā ǀ
agne ǀ rāyaḥ ǀ didīhi ǀ naḥ ǀ suvṛkti-bhiḥ ǀ vareṇya ǁ
05.025.04 (Mandala. Sukta. Rik)
4.1.17.04 (Ashtaka. Adhyaya. Varga. Rik)
05.02.049 (Mandala. Anuvāka. Rik)
Samhita Devanagari Accented
अ॒ग्निर्दे॒वेषु॑ राजत्य॒ग्निर्मर्ते॑ष्वावि॒शन् ।
अ॒ग्निर्नो॑ हव्य॒वाह॑नो॒ऽग्निं धी॒भिः स॑पर्यत ॥
Samhita Devanagari Nonaccented
अग्निर्देवेषु राजत्यग्निर्मर्तेष्वाविशन् ।
अग्निर्नो हव्यवाहनोऽग्निं धीभिः सपर्यत ॥
Samhita Transcription Accented
agnírdevéṣu rājatyagnírmárteṣvāviśán ǀ
agnírno havyavā́hano’gním dhībhíḥ saparyata ǁ
Samhita Transcription Nonaccented
agnirdeveṣu rājatyagnirmarteṣvāviśan ǀ
agnirno havyavāhano’gnim dhībhiḥ saparyata ǁ
Padapatha Devanagari Accented
अ॒ग्निः । दे॒वेषु॑ । रा॒ज॒ति॒ । अ॒ग्निः । मर्ते॑षु । आ॒ऽवि॒शन् ।
अ॒ग्निः । नः॒ । ह॒व्य॒ऽवाह॑नः । अ॒ग्निम् । धी॒भिः । स॒प॒र्य॒त॒ ॥
Padapatha Devanagari Nonaccented
अग्निः । देवेषु । राजति । अग्निः । मर्तेषु । आऽविशन् ।
अग्निः । नः । हव्यऽवाहनः । अग्निम् । धीभिः । सपर्यत ॥
Padapatha Transcription Accented
agníḥ ǀ devéṣu ǀ rājati ǀ agníḥ ǀ márteṣu ǀ ā-viśán ǀ
agníḥ ǀ naḥ ǀ havya-vā́hanaḥ ǀ agním ǀ dhībhíḥ ǀ saparyata ǁ
Padapatha Transcription Nonaccented
agniḥ ǀ deveṣu ǀ rājati ǀ agniḥ ǀ marteṣu ǀ ā-viśan ǀ
agniḥ ǀ naḥ ǀ havya-vāhanaḥ ǀ agnim ǀ dhībhiḥ ǀ saparyata ǁ
05.025.05 (Mandala. Sukta. Rik)
4.1.17.05 (Ashtaka. Adhyaya. Varga. Rik)
05.02.050 (Mandala. Anuvāka. Rik)
Samhita Devanagari Accented
अ॒ग्निस्तु॒विश्र॑वस्तमं तु॒विब्र॑ह्माणमुत्त॒मं ।
अ॒तूर्तं॑ श्राव॒यत्प॑तिं पु॒त्रं द॑दाति दा॒शुषे॑ ॥
Samhita Devanagari Nonaccented
अग्निस्तुविश्रवस्तमं तुविब्रह्माणमुत्तमं ।
अतूर्तं श्रावयत्पतिं पुत्रं ददाति दाशुषे ॥
Samhita Transcription Accented
agnístuvíśravastamam tuvíbrahmāṇamuttamám ǀ
atū́rtam śrāvayátpatim putrám dadāti dāśúṣe ǁ
Samhita Transcription Nonaccented
agnistuviśravastamam tuvibrahmāṇamuttamam ǀ
atūrtam śrāvayatpatim putram dadāti dāśuṣe ǁ
Padapatha Devanagari Accented
अ॒ग्निः । तु॒विश्र॑वःऽतमम् । तु॒विऽब्र॑ह्माणम् । उ॒त्ऽत॒मम् ।
अ॒तूर्त॑म् । श्र॒व॒यत्ऽप॑तिम् । पु॒त्रम् । द॒दा॒ति॒ । दा॒शुषे॑ ॥
Padapatha Devanagari Nonaccented
अग्निः । तुविश्रवःऽतमम् । तुविऽब्रह्माणम् । उत्ऽतमम् ।
अतूर्तम् । श्रवयत्ऽपतिम् । पुत्रम् । ददाति । दाशुषे ॥
Padapatha Transcription Accented
agníḥ ǀ tuvíśravaḥ-tamam ǀ tuví-brahmāṇam ǀ ut-tamám ǀ
atū́rtam ǀ śravayát-patim ǀ putrám ǀ dadāti ǀ dāśúṣe ǁ
Padapatha Transcription Nonaccented
agniḥ ǀ tuviśravaḥ-tamam ǀ tuvi-brahmāṇam ǀ ut-tamam ǀ
atūrtam ǀ śravayat-patim ǀ putram ǀ dadāti ǀ dāśuṣe ǁ
05.025.06 (Mandala. Sukta. Rik)
4.1.18.01 (Ashtaka. Adhyaya. Varga. Rik)
05.02.051 (Mandala. Anuvāka. Rik)
Samhita Devanagari Accented
अ॒ग्निर्द॑दाति॒ सत्प॑तिं सा॒साह॒ यो यु॒धा नृभिः॑ ।
अ॒ग्निरत्यं॑ रघु॒ष्यदं॒ जेता॑र॒मप॑राजितं ॥
Samhita Devanagari Nonaccented
अग्निर्ददाति सत्पतिं सासाह यो युधा नृभिः ।
अग्निरत्यं रघुष्यदं जेतारमपराजितं ॥
Samhita Transcription Accented
agnírdadāti sátpatim sāsā́ha yó yudhā́ nṛ́bhiḥ ǀ
agnírátyam raghuṣyádam jétāramáparājitam ǁ
Samhita Transcription Nonaccented
agnirdadāti satpatim sāsāha yo yudhā nṛbhiḥ ǀ
agniratyam raghuṣyadam jetāramaparājitam ǁ
Padapatha Devanagari Accented
अ॒ग्निः । द॒दा॒ति॒ । सत्ऽप॑तिम् । स॒साह॑ । यः । यु॒धा । नृऽभिः॑ ।
अ॒ग्निः । अत्य॑म् । र॒घु॒ऽस्यद॑म् । जेता॑रम् । अप॑राऽजितम् ॥
Padapatha Devanagari Nonaccented
अग्निः । ददाति । सत्ऽपतिम् । ससाह । यः । युधा । नृऽभिः ।
अग्निः । अत्यम् । रघुऽस्यदम् । जेतारम् । अपराऽजितम् ॥
Padapatha Transcription Accented
agníḥ ǀ dadāti ǀ sát-patim ǀ sasā́ha ǀ yáḥ ǀ yudhā́ ǀ nṛ́-bhiḥ ǀ
agníḥ ǀ átyam ǀ raghu-syádam ǀ jétāram ǀ áparā-jitam ǁ
Padapatha Transcription Nonaccented
agniḥ ǀ dadāti ǀ sat-patim ǀ sasāha ǀ yaḥ ǀ yudhā ǀ nṛ-bhiḥ ǀ
agniḥ ǀ atyam ǀ raghu-syadam ǀ jetāram ǀ aparā-jitam ǁ
05.025.07 (Mandala. Sukta. Rik)
4.1.18.02 (Ashtaka. Adhyaya. Varga. Rik)
05.02.052 (Mandala. Anuvāka. Rik)
Samhita Devanagari Accented
यद्वाहि॑ष्ठं॒ तद॒ग्नये॑ बृ॒हद॑र्च विभावसो ।
महि॑षीव॒ त्वद्र॒यिस्त्वद्वाजा॒ उदी॑रते ॥
Samhita Devanagari Nonaccented
यद्वाहिष्ठं तदग्नये बृहदर्च विभावसो ।
महिषीव त्वद्रयिस्त्वद्वाजा उदीरते ॥
Samhita Transcription Accented
yádvā́hiṣṭham tádagnáye bṛhádarca vibhāvaso ǀ
máhiṣīva tvádrayístvádvā́jā údīrate ǁ
Samhita Transcription Nonaccented
yadvāhiṣṭham tadagnaye bṛhadarca vibhāvaso ǀ
mahiṣīva tvadrayistvadvājā udīrate ǁ
Padapatha Devanagari Accented
यत् । वाहि॑ष्ठम् । तत् । अ॒ग्नये॑ । बृ॒हत् । अ॒र्च॒ । वि॒भा॒व॒सो॒ इति॑ विभाऽवसो ।
महि॑षीऽइव । त्वत् । र॒यिः । त्वत् । वाजाः॑ । उत् । ई॒र॒ते॒ ॥
Padapatha Devanagari Nonaccented
यत् । वाहिष्ठम् । तत् । अग्नये । बृहत् । अर्च । विभावसो इति विभाऽवसो ।
महिषीऽइव । त्वत् । रयिः । त्वत् । वाजाः । उत् । ईरते ॥
Padapatha Transcription Accented
yát ǀ vā́hiṣṭham ǀ tát ǀ agnáye ǀ bṛhát ǀ arca ǀ vibhāvaso íti vibhā-vaso ǀ
máhiṣī-iva ǀ tvát ǀ rayíḥ ǀ tvát ǀ vā́jāḥ ǀ út ǀ īrate ǁ
Padapatha Transcription Nonaccented
yat ǀ vāhiṣṭham ǀ tat ǀ agnaye ǀ bṛhat ǀ arca ǀ vibhāvaso iti vibhā-vaso ǀ
mahiṣī-iva ǀ tvat ǀ rayiḥ ǀ tvat ǀ vājāḥ ǀ ut ǀ īrate ǁ
05.025.08 (Mandala. Sukta. Rik)
4.1.18.03 (Ashtaka. Adhyaya. Varga. Rik)
05.02.053 (Mandala. Anuvāka. Rik)
Samhita Devanagari Accented
तव॑ द्यु॒मंतो॑ अ॒र्चयो॒ ग्रावे॑वोच्यते बृ॒हत् ।
उ॒तो ते॑ तन्य॒तुर्य॑था स्वा॒नो अ॑र्त॒ त्मना॑ दि॒वः ॥
Samhita Devanagari Nonaccented
तव द्युमंतो अर्चयो ग्रावेवोच्यते बृहत् ।
उतो ते तन्यतुर्यथा स्वानो अर्त त्मना दिवः ॥
Samhita Transcription Accented
táva dyumánto arcáyo grā́vevocyate bṛhát ǀ
utó te tanyatúryathā svānó arta tmánā diváḥ ǁ
Samhita Transcription Nonaccented
tava dyumanto arcayo grāvevocyate bṛhat ǀ
uto te tanyaturyathā svāno arta tmanā divaḥ ǁ
Padapatha Devanagari Accented
तव॑ । द्यु॒ऽमन्तः॑ । अ॒र्चयः॑ । ग्रावा॑ऽइव । उ॒च्य॒ते॒ । बृ॒हत् ।
उ॒तो इति॑ । ते॒ । त॒न्य॒तुः । य॒था॒ । स्वा॒नः । अ॒र्त॒ । त्मना॑ । दि॒वः ॥
Padapatha Devanagari Nonaccented
तव । द्युऽमन्तः । अर्चयः । ग्रावाऽइव । उच्यते । बृहत् ।
उतो इति । ते । तन्यतुः । यथा । स्वानः । अर्त । त्मना । दिवः ॥
Padapatha Transcription Accented
táva ǀ dyu-mántaḥ ǀ arcáyaḥ ǀ grā́vā-iva ǀ ucyate ǀ bṛhát ǀ
utó íti ǀ te ǀ tanyatúḥ ǀ yathā ǀ svānáḥ ǀ arta ǀ tmánā ǀ diváḥ ǁ
Padapatha Transcription Nonaccented
tava ǀ dyu-mantaḥ ǀ arcayaḥ ǀ grāvā-iva ǀ ucyate ǀ bṛhat ǀ
uto iti ǀ te ǀ tanyatuḥ ǀ yathā ǀ svānaḥ ǀ arta ǀ tmanā ǀ divaḥ ǁ
05.025.09 (Mandala. Sukta. Rik)
4.1.18.04 (Ashtaka. Adhyaya. Varga. Rik)
05.02.054 (Mandala. Anuvāka. Rik)
Samhita Devanagari Accented
ए॒वाँ अ॒ग्निं व॑सू॒यवः॑ सहसा॒नं व॑वंदिम ।
स नो॒ विश्वा॒ अति॒ द्विषः॒ पर्ष॑न्ना॒वेव॑ सु॒क्रतुः॑ ॥
Samhita Devanagari Nonaccented
एवाँ अग्निं वसूयवः सहसानं ववंदिम ।
स नो विश्वा अति द्विषः पर्षन्नावेव सुक्रतुः ॥
Samhita Transcription Accented
evā́m̐ agním vasūyávaḥ sahasānám vavandima ǀ
sá no víśvā áti dvíṣaḥ párṣannāvéva sukrátuḥ ǁ
Samhita Transcription Nonaccented
evām̐ agnim vasūyavaḥ sahasānam vavandima ǀ
sa no viśvā ati dviṣaḥ parṣannāveva sukratuḥ ǁ
Padapatha Devanagari Accented
ए॒व । अ॒ग्निम् । व॒सु॒ऽयवः॑ । स॒ह॒सा॒नम् । व॒व॒न्दि॒म॒ ।
सः । नः॒ । विश्वा॑ । अति॑ । द्विषः॑ । पर्ष॑त् । ना॒वाऽइ॑व । सु॒ऽक्रतुः॑ ॥
Padapatha Devanagari Nonaccented
एव । अग्निम् । वसुऽयवः । सहसानम् । ववन्दिम ।
सः । नः । विश्वा । अति । द्विषः । पर्षत् । नावाऽइव । सुऽक्रतुः ॥
Padapatha Transcription Accented
evá ǀ agním ǀ vasu-yávaḥ ǀ sahasānám ǀ vavandima ǀ
sáḥ ǀ naḥ ǀ víśvā ǀ áti ǀ dvíṣaḥ ǀ párṣat ǀ nāvā́-iva ǀ su-krátuḥ ǁ
Padapatha Transcription Nonaccented
eva ǀ agnim ǀ vasu-yavaḥ ǀ sahasānam ǀ vavandima ǀ
saḥ ǀ naḥ ǀ viśvā ǀ ati ǀ dviṣaḥ ǀ parṣat ǀ nāvā-iva ǀ su-kratuḥ ǁ