|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 34
|
1. Info |
| To: | indra | |
| From: | saṃvaraṇa prājāpatya | |
| Metres: | 1st set of styles: nicṛjjagatī (2, 4, 5); jagatī (3, 7); triṣṭup (6, 9); bhuriktriṣṭup (1); virāḍjagatī (8) 2nd set of styles: jagatī (1-8); triṣṭubh (9) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.034.01 (Mandala. Sukta. Rik)
4.2.03.01 (Ashtaka. Adhyaya. Varga. Rik)
05.03.011 (Mandala. Anuvāka. Rik)
Samhita Devanagari Accented
अजा॑तशत्रुम॒जरा॒ स्व॑र्व॒त्यनु॑ स्व॒धामि॑ता द॒स्ममी॑यते ।
सु॒नोत॑न॒ पच॑त॒ ब्रह्म॑वाहसे पुरुष्टु॒ताय॑ प्रत॒रं द॑धातन ॥
Samhita Devanagari Nonaccented
अजातशत्रुमजरा स्वर्वत्यनु स्वधामिता दस्ममीयते ।
सुनोतन पचत ब्रह्मवाहसे पुरुष्टुताय प्रतरं दधातन ॥
Samhita Transcription Accented
ájātaśatrumajárā svárvatyánu svadhā́mitā dasmámīyate ǀ
sunótana pácata bráhmavāhase puruṣṭutā́ya pratarám dadhātana ǁ
Samhita Transcription Nonaccented
ajātaśatrumajarā svarvatyanu svadhāmitā dasmamīyate ǀ
sunotana pacata brahmavāhase puruṣṭutāya prataram dadhātana ǁ
Padapatha Devanagari Accented
अजा॑तऽशत्रुम् । अ॒जरा॑ । स्वः॑ऽवती । अनु॑ । स्व॒धा । अमि॑ता । द॒स्मम् । ई॒य॒ते॒ ।
सु॒नोत॑न । पच॑त । ब्रह्म॑ऽवाहसे । पु॒रु॒ऽस्तु॒ताय॑ । प्र॒ऽत॒रम् । द॒धा॒त॒न॒ ॥
Padapatha Devanagari Nonaccented
अजातऽशत्रुम् । अजरा । स्वःऽवती । अनु । स्वधा । अमिता । दस्मम् । ईयते ।
सुनोतन । पचत । ब्रह्मऽवाहसे । पुरुऽस्तुताय । प्रऽतरम् । दधातन ॥
Padapatha Transcription Accented
ájāta-śatrum ǀ ajárā ǀ sváḥ-vatī ǀ ánu ǀ svadhā́ ǀ ámitā ǀ dasmám ǀ īyate ǀ
sunótana ǀ pácata ǀ bráhma-vāhase ǀ puru-stutā́ya ǀ pra-tarám ǀ dadhātana ǁ
Padapatha Transcription Nonaccented
ajāta-śatrum ǀ ajarā ǀ svaḥ-vatī ǀ anu ǀ svadhā ǀ amitā ǀ dasmam ǀ īyate ǀ
sunotana ǀ pacata ǀ brahma-vāhase ǀ puru-stutāya ǀ pra-taram ǀ dadhātana ǁ
05.034.02 (Mandala. Sukta. Rik)
4.2.03.02 (Ashtaka. Adhyaya. Varga. Rik)
05.03.012 (Mandala. Anuvāka. Rik)
Samhita Devanagari Accented
आ यः सोमे॑न ज॒ठर॒मपि॑प्र॒तामं॑दत म॒घवा॒ मध्वो॒ अंध॑सः ।
यदीं॑ मृ॒गाय॒ हंत॑वे म॒हाव॑धः स॒हस्र॑भृष्टिमु॒शना॑ व॒धं यम॑त् ॥
Samhita Devanagari Nonaccented
आ यः सोमेन जठरमपिप्रतामंदत मघवा मध्वो अंधसः ।
यदीं मृगाय हंतवे महावधः सहस्रभृष्टिमुशना वधं यमत् ॥
Samhita Transcription Accented
ā́ yáḥ sómena jaṭháramápipratā́mandata maghávā mádhvo ándhasaḥ ǀ
yádīm mṛgā́ya hántave mahā́vadhaḥ sahásrabhṛṣṭimuśánā vadhám yámat ǁ
Samhita Transcription Nonaccented
ā yaḥ somena jaṭharamapipratāmandata maghavā madhvo andhasaḥ ǀ
yadīm mṛgāya hantave mahāvadhaḥ sahasrabhṛṣṭimuśanā vadham yamat ǁ
Padapatha Devanagari Accented
आ । यः । सोमे॑न । ज॒ठर॑म् । अपि॑प्रत । अम॑न्दत । म॒घऽवा॑ । मध्वः॑ । अन्ध॑सः ।
यत् । ई॒म् । मृ॒गाय॑ । हन्त॑वे । म॒हाऽव॑धः । स॒हस्र॑ऽभृष्टिम् । उ॒शना॑ । व॒धम् । यम॑त् ॥
Padapatha Devanagari Nonaccented
आ । यः । सोमेन । जठरम् । अपिप्रत । अमन्दत । मघऽवा । मध्वः । अन्धसः ।
यत् । ईम् । मृगाय । हन्तवे । महाऽवधः । सहस्रऽभृष्टिम् । उशना । वधम् । यमत् ॥
Padapatha Transcription Accented
ā́ ǀ yáḥ ǀ sómena ǀ jaṭháram ǀ ápiprata ǀ ámandata ǀ maghá-vā ǀ mádhvaḥ ǀ ándhasaḥ ǀ
yát ǀ īm ǀ mṛgā́ya ǀ hántave ǀ mahā́-vadhaḥ ǀ sahásra-bhṛṣṭim ǀ uśánā ǀ vadhám ǀ yámat ǁ
Padapatha Transcription Nonaccented
ā ǀ yaḥ ǀ somena ǀ jaṭharam ǀ apiprata ǀ amandata ǀ magha-vā ǀ madhvaḥ ǀ andhasaḥ ǀ
yat ǀ īm ǀ mṛgāya ǀ hantave ǀ mahā-vadhaḥ ǀ sahasra-bhṛṣṭim ǀ uśanā ǀ vadham ǀ yamat ǁ
05.034.03 (Mandala. Sukta. Rik)
4.2.03.03 (Ashtaka. Adhyaya. Varga. Rik)
05.03.013 (Mandala. Anuvāka. Rik)
Samhita Devanagari Accented
यो अ॑स्मै घ्रं॒स उ॒त वा॒ य ऊध॑नि॒ सोमं॑ सु॒नोति॒ भव॑ति द्यु॒माँ अह॑ ।
अपा॑प श॒क्रस्त॑त॒नुष्टि॑मूहति त॒नूशु॑भ्रं म॒घवा॒ यः क॑वास॒खः ॥
Samhita Devanagari Nonaccented
यो अस्मै घ्रंस उत वा य ऊधनि सोमं सुनोति भवति द्युमाँ अह ।
अपाप शक्रस्ततनुष्टिमूहति तनूशुभ्रं मघवा यः कवासखः ॥
Samhita Transcription Accented
yó asmai ghraṃsá utá vā yá ū́dhani sómam sunóti bhávati dyumā́m̐ áha ǀ
ápāpa śakrástatanúṣṭimūhati tanū́śubhram maghávā yáḥ kavāsakháḥ ǁ
Samhita Transcription Nonaccented
yo asmai ghraṃsa uta vā ya ūdhani somam sunoti bhavati dyumām̐ aha ǀ
apāpa śakrastatanuṣṭimūhati tanūśubhram maghavā yaḥ kavāsakhaḥ ǁ
Padapatha Devanagari Accented
यः । अ॒स्मै॒ । घ्रं॒से । उ॒त । वा॒ । यः । ऊध॑नि । सोम॑म् । सु॒नोति॑ । भव॑ति । द्यु॒ऽमान् । अह॑ ।
अप॑ऽअप । श॒क्रः । त॒त॒नुष्टि॑म् । ऊ॒ह॒ति॒ । त॒नूऽशु॑भ्रम् । म॒घऽवा॑ । यः । क॒व॒ऽस॒खः ॥
Padapatha Devanagari Nonaccented
यः । अस्मै । घ्रंसे । उत । वा । यः । ऊधनि । सोमम् । सुनोति । भवति । द्युऽमान् । अह ।
अपऽअप । शक्रः । ततनुष्टिम् । ऊहति । तनूऽशुभ्रम् । मघऽवा । यः । कवऽसखः ॥
Padapatha Transcription Accented
yáḥ ǀ asmai ǀ ghraṃsé ǀ utá ǀ vā ǀ yáḥ ǀ ū́dhani ǀ sómam ǀ sunóti ǀ bhávati ǀ dyu-mā́n ǀ áha ǀ
ápa-apa ǀ śakráḥ ǀ tatanúṣṭim ǀ ūhati ǀ tanū́-śubhram ǀ maghá-vā ǀ yáḥ ǀ kava-sakháḥ ǁ
Padapatha Transcription Nonaccented
yaḥ ǀ asmai ǀ ghraṃse ǀ uta ǀ vā ǀ yaḥ ǀ ūdhani ǀ somam ǀ sunoti ǀ bhavati ǀ dyu-mān ǀ aha ǀ
apa-apa ǀ śakraḥ ǀ tatanuṣṭim ǀ ūhati ǀ tanū-śubhram ǀ magha-vā ǀ yaḥ ǀ kava-sakhaḥ ǁ
05.034.04 (Mandala. Sukta. Rik)
4.2.03.04 (Ashtaka. Adhyaya. Varga. Rik)
05.03.014 (Mandala. Anuvāka. Rik)
Samhita Devanagari Accented
यस्याव॑धीत्पि॒तरं॒ यस्य॑ मा॒तरं॒ यस्य॑ श॒क्रो भ्रात॑रं॒ नात॑ ईषते ।
वेतीद्व॑स्य॒ प्रय॑ता यतंक॒रो न किल्बि॑षादीषते॒ वस्व॑ आक॒रः ॥
Samhita Devanagari Nonaccented
यस्यावधीत्पितरं यस्य मातरं यस्य शक्रो भ्रातरं नात ईषते ।
वेतीद्वस्य प्रयता यतंकरो न किल्बिषादीषते वस्व आकरः ॥
Samhita Transcription Accented
yásyā́vadhītpitáram yásya mātáram yásya śakró bhrā́taram nā́ta īṣate ǀ
vétī́dvasya práyatā yataṃkaró ná kílbiṣādīṣate vásva ākaráḥ ǁ
Samhita Transcription Nonaccented
yasyāvadhītpitaram yasya mātaram yasya śakro bhrātaram nāta īṣate ǀ
vetīdvasya prayatā yataṃkaro na kilbiṣādīṣate vasva ākaraḥ ǁ
Padapatha Devanagari Accented
यस्य॑ । अव॑धीत् । पि॒तर॑म् । यस्य॑ । मा॒तर॑म् । यस्य॑ । श॒क्रः । भ्रात॑रम् । न । अतः॑ । ई॒ष॒ते॒ ।
वेति॑ । इत् । ऊं॒ इति॑ । अ॒स्य॒ । प्रऽय॑ता । य॒त॒म्ऽक॒रः । न । किल्बि॑षात् । ई॒ष॒ते॒ । वस्वः॑ । आ॒ऽक॒रः ॥
Padapatha Devanagari Nonaccented
यस्य । अवधीत् । पितरम् । यस्य । मातरम् । यस्य । शक्रः । भ्रातरम् । न । अतः । ईषते ।
वेति । इत् । ऊं इति । अस्य । प्रऽयता । यतम्ऽकरः । न । किल्बिषात् । ईषते । वस्वः । आऽकरः ॥
Padapatha Transcription Accented
yásya ǀ ávadhīt ǀ pitáram ǀ yásya ǀ mātáram ǀ yásya ǀ śakráḥ ǀ bhrā́taram ǀ ná ǀ átaḥ ǀ īṣate ǀ
véti ǀ ít ǀ ūṃ íti ǀ asya ǀ prá-yatā ǀ yatam-karáḥ ǀ ná ǀ kílbiṣāt ǀ īṣate ǀ vásvaḥ ǀ ā-karáḥ ǁ
Padapatha Transcription Nonaccented
yasya ǀ avadhīt ǀ pitaram ǀ yasya ǀ mātaram ǀ yasya ǀ śakraḥ ǀ bhrātaram ǀ na ǀ ataḥ ǀ īṣate ǀ
veti ǀ it ǀ ūṃ iti ǀ asya ǀ pra-yatā ǀ yatam-karaḥ ǀ na ǀ kilbiṣāt ǀ īṣate ǀ vasvaḥ ǀ ā-karaḥ ǁ
05.034.05 (Mandala. Sukta. Rik)
4.2.03.05 (Ashtaka. Adhyaya. Varga. Rik)
05.03.015 (Mandala. Anuvāka. Rik)
Samhita Devanagari Accented
न पं॒चभि॑र्द॒शभि॑र्वष्ट्या॒रभं॒ नासु॑न्वता सचते॒ पुष्य॑ता च॒न ।
जि॒नाति॒ वेद॑मु॒या हंति॑ वा॒ धुनि॒रा दे॑व॒युं भ॑जति॒ गोम॑ति व्र॒जे ॥
Samhita Devanagari Nonaccented
न पंचभिर्दशभिर्वष्ट्यारभं नासुन्वता सचते पुष्यता चन ।
जिनाति वेदमुया हंति वा धुनिरा देवयुं भजति गोमति व्रजे ॥
Samhita Transcription Accented
ná pañcábhirdaśábhirvaṣṭyārábham nā́sunvatā sacate púṣyatā caná ǀ
jinā́ti védamuyā́ hánti vā dhúnirā́ devayúm bhajati gómati vrajé ǁ
Samhita Transcription Nonaccented
na pañcabhirdaśabhirvaṣṭyārabham nāsunvatā sacate puṣyatā cana ǀ
jināti vedamuyā hanti vā dhunirā devayum bhajati gomati vraje ǁ
Padapatha Devanagari Accented
न । प॒ञ्चऽभिः॑ । द॒शऽभिः॑ । व॒ष्टि॒ । आ॒ऽरभ॑म् । न । असु॑न्वता । स॒च॒ते॒ । पुष्य॑ता । च॒न ।
जि॒नाति॑ । वा॒ । इत् । अ॒मु॒या । हन्ति॑ । वा॒ । धुनिः॑ । आ । दे॒व॒ऽयुम् । भ॒ज॒ति॒ । गोऽम॑ति । व्र॒जे ॥
Padapatha Devanagari Nonaccented
न । पञ्चऽभिः । दशऽभिः । वष्टि । आऽरभम् । न । असुन्वता । सचते । पुष्यता । चन ।
जिनाति । वा । इत् । अमुया । हन्ति । वा । धुनिः । आ । देवऽयुम् । भजति । गोऽमति । व्रजे ॥
Padapatha Transcription Accented
ná ǀ pañcá-bhiḥ ǀ daśá-bhiḥ ǀ vaṣṭi ǀ ā-rábham ǀ ná ǀ ásunvatā ǀ sacate ǀ púṣyatā ǀ caná ǀ
jinā́ti ǀ vā ǀ ít ǀ amuyā́ ǀ hánti ǀ vā ǀ dhúniḥ ǀ ā́ ǀ deva-yúm ǀ bhajati ǀ gó-mati ǀ vrajé ǁ
Padapatha Transcription Nonaccented
na ǀ pañca-bhiḥ ǀ daśa-bhiḥ ǀ vaṣṭi ǀ ā-rabham ǀ na ǀ asunvatā ǀ sacate ǀ puṣyatā ǀ cana ǀ
jināti ǀ vā ǀ it ǀ amuyā ǀ hanti ǀ vā ǀ dhuniḥ ǀ ā ǀ deva-yum ǀ bhajati ǀ go-mati ǀ vraje ǁ
05.034.06 (Mandala. Sukta. Rik)
4.2.04.01 (Ashtaka. Adhyaya. Varga. Rik)
05.03.016 (Mandala. Anuvāka. Rik)
Samhita Devanagari Accented
वि॒त्वक्ष॑णः॒ समृ॑तौ चक्रमास॒जोऽसु॑न्वतो॒ विषु॑णः सुन्व॒तो वृ॒धः ।
इंद्रो॒ विश्व॑स्य दमि॒ता वि॒भीष॑णो यथाव॒शं न॑यति॒ दास॒मार्यः॑ ॥
Samhita Devanagari Nonaccented
वित्वक्षणः समृतौ चक्रमासजोऽसुन्वतो विषुणः सुन्वतो वृधः ।
इंद्रो विश्वस्य दमिता विभीषणो यथावशं नयति दासमार्यः ॥
Samhita Transcription Accented
vitvákṣaṇaḥ sámṛtau cakramāsajó’sunvato víṣuṇaḥ sunvató vṛdháḥ ǀ
índro víśvasya damitā́ vibhī́ṣaṇo yathāvaśám nayati dā́samā́ryaḥ ǁ
Samhita Transcription Nonaccented
vitvakṣaṇaḥ samṛtau cakramāsajo’sunvato viṣuṇaḥ sunvato vṛdhaḥ ǀ
indro viśvasya damitā vibhīṣaṇo yathāvaśam nayati dāsamāryaḥ ǁ
Padapatha Devanagari Accented
वि॒ऽत्वक्ष॑णः । सम्ऽऋ॑तौ । च॒क्र॒म्ऽआ॒स॒जः । असु॑न्वतः । विषु॑णः । सु॒न्व॒तः । वृ॒धः ।
इन्द्रः॑ । विश्व॑स्य । द॒मि॒ता । वि॒ऽभीष॑णः । य॒था॒ऽव॒शम् । न॒य॒ति॒ । दास॑म् । आर्यः॑ ॥
Padapatha Devanagari Nonaccented
विऽत्वक्षणः । सम्ऽऋतौ । चक्रम्ऽआसजः । असुन्वतः । विषुणः । सुन्वतः । वृधः ।
इन्द्रः । विश्वस्य । दमिता । विऽभीषणः । यथाऽवशम् । नयति । दासम् । आर्यः ॥
Padapatha Transcription Accented
vi-tvákṣaṇaḥ ǀ sám-ṛtau ǀ cakram-āsajáḥ ǀ ásunvataḥ ǀ víṣuṇaḥ ǀ sunvatáḥ ǀ vṛdháḥ ǀ
índraḥ ǀ víśvasya ǀ damitā́ ǀ vi-bhī́ṣaṇaḥ ǀ yathā-vaśám ǀ nayati ǀ dā́sam ǀ ā́ryaḥ ǁ
Padapatha Transcription Nonaccented
vi-tvakṣaṇaḥ ǀ sam-ṛtau ǀ cakram-āsajaḥ ǀ asunvataḥ ǀ viṣuṇaḥ ǀ sunvataḥ ǀ vṛdhaḥ ǀ
indraḥ ǀ viśvasya ǀ damitā ǀ vi-bhīṣaṇaḥ ǀ yathā-vaśam ǀ nayati ǀ dāsam ǀ āryaḥ ǁ
05.034.07 (Mandala. Sukta. Rik)
4.2.04.02 (Ashtaka. Adhyaya. Varga. Rik)
05.03.017 (Mandala. Anuvāka. Rik)
Samhita Devanagari Accented
समीं॑ प॒णेर॑जति॒ भोज॑नं मु॒षे वि दा॒शुषे॑ भजति सू॒नरं॒ वसु॑ ।
दु॒र्गे च॒न ध्रि॑यते॒ विश्व॒ आ पु॒रु जनो॒ यो अ॑स्य॒ तवि॑षी॒मचु॑क्रुधत् ॥
Samhita Devanagari Nonaccented
समीं पणेरजति भोजनं मुषे वि दाशुषे भजति सूनरं वसु ।
दुर्गे चन ध्रियते विश्व आ पुरु जनो यो अस्य तविषीमचुक्रुधत् ॥
Samhita Transcription Accented
sámīm paṇérajati bhójanam muṣé ví dāśúṣe bhajati sūnáram vásu ǀ
durgé caná dhriyate víśva ā́ purú jáno yó asya táviṣīmácukrudhat ǁ
Samhita Transcription Nonaccented
samīm paṇerajati bhojanam muṣe vi dāśuṣe bhajati sūnaram vasu ǀ
durge cana dhriyate viśva ā puru jano yo asya taviṣīmacukrudhat ǁ
Padapatha Devanagari Accented
सम् । ई॒म् । प॒णेः । अ॒ज॒ति॒ । भोज॑नम् । मु॒षे । वि । दा॒शुषे॑ । भ॒ज॒ति॒ । सू॒नर॑म् । वसु॑ ।
दुः॒ऽगे । च॒न । ध्रि॒य॒ते॒ । विश्वः॑ । आ । पु॒रु । जनः॑ । यः । अ॒स्य॒ । तवि॑षीम् । अचु॑क्रुधत् ॥
Padapatha Devanagari Nonaccented
सम् । ईम् । पणेः । अजति । भोजनम् । मुषे । वि । दाशुषे । भजति । सूनरम् । वसु ।
दुःऽगे । चन । ध्रियते । विश्वः । आ । पुरु । जनः । यः । अस्य । तविषीम् । अचुक्रुधत् ॥
Padapatha Transcription Accented
sám ǀ īm ǀ paṇéḥ ǀ ajati ǀ bhójanam ǀ muṣé ǀ ví ǀ dāśúṣe ǀ bhajati ǀ sūnáram ǀ vásu ǀ
duḥ-gé ǀ caná ǀ dhriyate ǀ víśvaḥ ǀ ā́ ǀ purú ǀ jánaḥ ǀ yáḥ ǀ asya ǀ táviṣīm ǀ ácukrudhat ǁ
Padapatha Transcription Nonaccented
sam ǀ īm ǀ paṇeḥ ǀ ajati ǀ bhojanam ǀ muṣe ǀ vi ǀ dāśuṣe ǀ bhajati ǀ sūnaram ǀ vasu ǀ
duḥ-ge ǀ cana ǀ dhriyate ǀ viśvaḥ ǀ ā ǀ puru ǀ janaḥ ǀ yaḥ ǀ asya ǀ taviṣīm ǀ acukrudhat ǁ
05.034.08 (Mandala. Sukta. Rik)
4.2.04.03 (Ashtaka. Adhyaya. Varga. Rik)
05.03.018 (Mandala. Anuvāka. Rik)
Samhita Devanagari Accented
सं यज्जनौ॑ सु॒धनौ॑ वि॒श्वश॑र्धसा॒ववे॒दिंद्रो॑ म॒घवा॒ गोषु॑ शु॒भ्रिषु॑ ।
युजं॒ ह्य१॒॑न्यमकृ॑त प्रवेप॒न्युदीं॒ गव्यं॑ सृजते॒ सत्व॑भि॒र्धुनिः॑ ॥
Samhita Devanagari Nonaccented
सं यज्जनौ सुधनौ विश्वशर्धसाववेदिंद्रो मघवा गोषु शुभ्रिषु ।
युजं ह्यन्यमकृत प्रवेपन्युदीं गव्यं सृजते सत्वभिर्धुनिः ॥
Samhita Transcription Accented
sám yájjánau sudhánau viśváśardhasāvávedíndro maghávā góṣu śubhríṣu ǀ
yújam hyányámákṛta pravepanyúdīm gávyam sṛjate sátvabhirdhúniḥ ǁ
Samhita Transcription Nonaccented
sam yajjanau sudhanau viśvaśardhasāvavedindro maghavā goṣu śubhriṣu ǀ
yujam hyanyamakṛta pravepanyudīm gavyam sṛjate satvabhirdhuniḥ ǁ
Padapatha Devanagari Accented
सम् । यत् । जनौ॑ । सु॒ऽधनौ॑ । वि॒श्वऽश॑र्धसौ । अवे॑त् । इन्द्रः॑ । म॒घऽवा॑ । गोषु॑ । शु॒भ्रिषु॑ ।
युज॑म् । हि । अ॒न्यम् । अकृ॑त । प्र॒ऽवे॒प॒नी । उत् । ई॒म् । गव्य॑म् । सृ॒ज॒ते॒ । सत्व॑ऽभिः । धुनिः॑ ॥
Padapatha Devanagari Nonaccented
सम् । यत् । जनौ । सुऽधनौ । विश्वऽशर्धसौ । अवेत् । इन्द्रः । मघऽवा । गोषु । शुभ्रिषु ।
युजम् । हि । अन्यम् । अकृत । प्रऽवेपनी । उत् । ईम् । गव्यम् । सृजते । सत्वऽभिः । धुनिः ॥
Padapatha Transcription Accented
sám ǀ yát ǀ jánau ǀ su-dhánau ǀ viśvá-śardhasau ǀ ávet ǀ índraḥ ǀ maghá-vā ǀ góṣu ǀ śubhríṣu ǀ
yújam ǀ hí ǀ anyám ǀ ákṛta ǀ pra-vepanī́ ǀ út ǀ īm ǀ gávyam ǀ sṛjate ǀ sátva-bhiḥ ǀ dhúniḥ ǁ
Padapatha Transcription Nonaccented
sam ǀ yat ǀ janau ǀ su-dhanau ǀ viśva-śardhasau ǀ avet ǀ indraḥ ǀ magha-vā ǀ goṣu ǀ śubhriṣu ǀ
yujam ǀ hi ǀ anyam ǀ akṛta ǀ pra-vepanī ǀ ut ǀ īm ǀ gavyam ǀ sṛjate ǀ satva-bhiḥ ǀ dhuniḥ ǁ
05.034.09 (Mandala. Sukta. Rik)
4.2.04.04 (Ashtaka. Adhyaya. Varga. Rik)
05.03.019 (Mandala. Anuvāka. Rik)
Samhita Devanagari Accented
स॒ह॒स्र॒सामाग्नि॑वेशिं गृणीषे॒ शत्रि॑मग्न उप॒मां के॒तुम॒र्यः ।
तस्मा॒ आपः॑ सं॒यतः॑ पीपयंत॒ तस्मि॑न्क्ष॒त्रमम॑वत्त्वे॒षम॑स्तु ॥
Samhita Devanagari Nonaccented
सहस्रसामाग्निवेशिं गृणीषे शत्रिमग्न उपमां केतुमर्यः ।
तस्मा आपः संयतः पीपयंत तस्मिन्क्षत्रममवत्त्वेषमस्तु ॥
Samhita Transcription Accented
sahasrasā́mā́gniveśim gṛṇīṣe śátrimagna upamā́m ketúmaryáḥ ǀ
tásmā ā́paḥ saṃyátaḥ pīpayanta tásminkṣatrámámavattveṣámastu ǁ
Samhita Transcription Nonaccented
sahasrasāmāgniveśim gṛṇīṣe śatrimagna upamām ketumaryaḥ ǀ
tasmā āpaḥ saṃyataḥ pīpayanta tasminkṣatramamavattveṣamastu ǁ
Padapatha Devanagari Accented
स॒ह॒स्र॒ऽसाम् । आग्नि॑ऽवेशिम् । गृ॒णी॒षे॒ । शत्रि॑म् । अ॒ग्ने॒ । उ॒प॒ऽमाम् । के॒तुम् । अ॒र्यः ।
तस्मै॑ । आपः॑ । स॒म्ऽयतः॑ । पी॒प॒य॒न्त॒ । तस्मि॑न् । क्ष॒त्रम् । अम॑ऽवत् । त्वे॒षम् । अ॒स्तु॒ ॥
Padapatha Devanagari Nonaccented
सहस्रऽसाम् । आग्निऽवेशिम् । गृणीषे । शत्रिम् । अग्ने । उपऽमाम् । केतुम् । अर्यः ।
तस्मै । आपः । सम्ऽयतः । पीपयन्त । तस्मिन् । क्षत्रम् । अमऽवत् । त्वेषम् । अस्तु ॥
Padapatha Transcription Accented
sahasra-sā́m ǀ ā́gni-veśim ǀ gṛṇīṣe ǀ śátrim ǀ agne ǀ upa-mā́m ǀ ketúm ǀ aryáḥ ǀ
tásmai ǀ ā́paḥ ǀ sam-yátaḥ ǀ pīpayanta ǀ tásmin ǀ kṣatrám ǀ áma-vat ǀ tveṣám ǀ astu ǁ
Padapatha Transcription Nonaccented
sahasra-sām ǀ āgni-veśim ǀ gṛṇīṣe ǀ śatrim ǀ agne ǀ upa-mām ǀ ketum ǀ aryaḥ ǀ
tasmai ǀ āpaḥ ǀ sam-yataḥ ǀ pīpayanta ǀ tasmin ǀ kṣatram ǀ ama-vat ǀ tveṣam ǀ astu ǁ