|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 43
|
1. Info |
| To: | viśvedevās | |
| From: | atri bhauma | |
| Metres: | 1st set of styles: triṣṭup (2, 4, 5, 10-12, 15); nicṛttriṣṭup (1, 3, 6, 8, 9, 17); virāṭtrisṭup (7, 13); bhurikpaṅkti (14); yājuṣīpaṅkti (16) 2nd set of styles: triṣṭubh (1-15, 17); ekapadā virāj (16) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.043.01 (Mandala. Sukta. Rik)
4.2.20.01 (Ashtaka. Adhyaya. Varga. Rik)
05.03.096 (Mandala. Anuvāka. Rik)
Samhita Devanagari Accented
आ धे॒नवः॒ पय॑सा॒ तूर्ण्य॑र्था॒ अम॑र्धंती॒रुप॑ नो यंतु॒ मध्वा॑ ।
म॒हो रा॒ये बृ॑ह॒तीः स॒प्त विप्रो॑ मयो॒भुवो॑ जरि॒ता जो॑हवीति ॥
Samhita Devanagari Nonaccented
आ धेनवः पयसा तूर्ण्यर्था अमर्धंतीरुप नो यंतु मध्वा ।
महो राये बृहतीः सप्त विप्रो मयोभुवो जरिता जोहवीति ॥
Samhita Transcription Accented
ā́ dhenávaḥ páyasā tū́rṇyarthā ámardhantīrúpa no yantu mádhvā ǀ
mahó rāyé bṛhatī́ḥ saptá vípro mayobhúvo jaritā́ johavīti ǁ
Samhita Transcription Nonaccented
ā dhenavaḥ payasā tūrṇyarthā amardhantīrupa no yantu madhvā ǀ
maho rāye bṛhatīḥ sapta vipro mayobhuvo jaritā johavīti ǁ
Padapatha Devanagari Accented
आ । धे॒नवः॑ । पय॑सा । तूर्णि॑ऽअर्थाः । अम॑र्धन्तीः । उप॑ । नः॒ । य॒न्तु॒ । मध्वा॑ ।
म॒हः । रा॒ये । बृ॒ह॒तीः । स॒प्त । विप्रः॑ । म॒यः॒ऽभुवः॑ । ज॒रि॒ता । जो॒ह॒वी॒ति॒ ॥
Padapatha Devanagari Nonaccented
आ । धेनवः । पयसा । तूर्णिऽअर्थाः । अमर्धन्तीः । उप । नः । यन्तु । मध्वा ।
महः । राये । बृहतीः । सप्त । विप्रः । मयःऽभुवः । जरिता । जोहवीति ॥
Padapatha Transcription Accented
ā́ ǀ dhenávaḥ ǀ páyasā ǀ tū́rṇi-arthāḥ ǀ ámardhantīḥ ǀ úpa ǀ naḥ ǀ yantu ǀ mádhvā ǀ
maháḥ ǀ rāyé ǀ bṛhatī́ḥ ǀ saptá ǀ vípraḥ ǀ mayaḥ-bhúvaḥ ǀ jaritā́ ǀ johavīti ǁ
Padapatha Transcription Nonaccented
ā ǀ dhenavaḥ ǀ payasā ǀ tūrṇi-arthāḥ ǀ amardhantīḥ ǀ upa ǀ naḥ ǀ yantu ǀ madhvā ǀ
mahaḥ ǀ rāye ǀ bṛhatīḥ ǀ sapta ǀ vipraḥ ǀ mayaḥ-bhuvaḥ ǀ jaritā ǀ johavīti ǁ
05.043.02 (Mandala. Sukta. Rik)
4.2.20.02 (Ashtaka. Adhyaya. Varga. Rik)
05.03.097 (Mandala. Anuvāka. Rik)
Samhita Devanagari Accented
आ सु॑ष्टु॒ती नम॑सा वर्त॒यध्यै॒ द्यावा॒ वाजा॑य पृथि॒वी अमृ॑ध्रे ।
पि॒ता मा॒ता मधु॑वचाः सु॒हस्ता॒ भरे॑भरे नो य॒शसा॑वविष्टां ॥
Samhita Devanagari Nonaccented
आ सुष्टुती नमसा वर्तयध्यै द्यावा वाजाय पृथिवी अमृध्रे ।
पिता माता मधुवचाः सुहस्ता भरेभरे नो यशसावविष्टां ॥
Samhita Transcription Accented
ā́ suṣṭutī́ námasā vartayádhyai dyā́vā vā́jāya pṛthivī́ ámṛdhre ǀ
pitā́ mātā́ mádhuvacāḥ suhástā bhárebhare no yaśásāvaviṣṭām ǁ
Samhita Transcription Nonaccented
ā suṣṭutī namasā vartayadhyai dyāvā vājāya pṛthivī amṛdhre ǀ
pitā mātā madhuvacāḥ suhastā bharebhare no yaśasāvaviṣṭām ǁ
Padapatha Devanagari Accented
आ । सु॒ऽस्तु॒ती । नम॑सा । व॒र्त॒यध्यै॑ । द्यावा॑ । वाजा॑य । पृ॒थि॒वी इति॑ । अमृ॑ध्रे॒ इति॑ ।
पि॒ता । मा॒ता । मधु॑ऽवचाः । सु॒ऽहस्ता॑ । भरे॑ऽभरे । नः॒ । य॒शसौ॑ । अ॒वि॒ष्टा॒म् ॥
Padapatha Devanagari Nonaccented
आ । सुऽस्तुती । नमसा । वर्तयध्यै । द्यावा । वाजाय । पृथिवी इति । अमृध्रे इति ।
पिता । माता । मधुऽवचाः । सुऽहस्ता । भरेऽभरे । नः । यशसौ । अविष्टाम् ॥
Padapatha Transcription Accented
ā́ ǀ su-stutī́ ǀ námasā ǀ vartayádhyai ǀ dyā́vā ǀ vā́jāya ǀ pṛthivī́ íti ǀ ámṛdhre íti ǀ
pitā́ ǀ mātā́ ǀ mádhu-vacāḥ ǀ su-hástā ǀ bháre-bhare ǀ naḥ ǀ yaśásau ǀ aviṣṭām ǁ
Padapatha Transcription Nonaccented
ā ǀ su-stutī ǀ namasā ǀ vartayadhyai ǀ dyāvā ǀ vājāya ǀ pṛthivī iti ǀ amṛdhre iti ǀ
pitā ǀ mātā ǀ madhu-vacāḥ ǀ su-hastā ǀ bhare-bhare ǀ naḥ ǀ yaśasau ǀ aviṣṭām ǁ
05.043.03 (Mandala. Sukta. Rik)
4.2.20.03 (Ashtaka. Adhyaya. Varga. Rik)
05.03.098 (Mandala. Anuvāka. Rik)
Samhita Devanagari Accented
अध्व॑र्यवश्चकृ॒वांसो॒ मधू॑नि॒ प्र वा॒यवे॑ भरत॒ चारु॑ शु॒क्रं ।
होते॑व नः प्रथ॒मः पा॑ह्य॒स्य देव॒ मध्वो॑ ररि॒मा ते॒ मदा॑य ॥
Samhita Devanagari Nonaccented
अध्वर्यवश्चकृवांसो मधूनि प्र वायवे भरत चारु शुक्रं ।
होतेव नः प्रथमः पाह्यस्य देव मध्वो ररिमा ते मदाय ॥
Samhita Transcription Accented
ádhvaryavaścakṛvā́ṃso mádhūni prá vāyáve bharata cā́ru śukrám ǀ
hóteva naḥ prathamáḥ pāhyasyá déva mádhvo rarimā́ te mádāya ǁ
Samhita Transcription Nonaccented
adhvaryavaścakṛvāṃso madhūni pra vāyave bharata cāru śukram ǀ
hoteva naḥ prathamaḥ pāhyasya deva madhvo rarimā te madāya ǁ
Padapatha Devanagari Accented
अध्व॑र्यवः । च॒कृ॒ऽवांसः॑ । मधू॑नि । प्र । वा॒यवे॑ । भ॒र॒त॒ । चारु॑ । शु॒क्रम् ।
होता॑ऽइव । नः॒ । प्र॒थ॒मः । पा॒हि॒ । अ॒स्य । देव॑ । मध्वः॑ । र॒रि॒म । ते॒ । मदा॑य ॥
Padapatha Devanagari Nonaccented
अध्वर्यवः । चकृऽवांसः । मधूनि । प्र । वायवे । भरत । चारु । शुक्रम् ।
होताऽइव । नः । प्रथमः । पाहि । अस्य । देव । मध्वः । ररिम । ते । मदाय ॥
Padapatha Transcription Accented
ádhvaryavaḥ ǀ cakṛ-vā́ṃsaḥ ǀ mádhūni ǀ prá ǀ vāyáve ǀ bharata ǀ cā́ru ǀ śukrám ǀ
hótā-iva ǀ naḥ ǀ prathamáḥ ǀ pāhi ǀ asyá ǀ déva ǀ mádhvaḥ ǀ rarimá ǀ te ǀ mádāya ǁ
Padapatha Transcription Nonaccented
adhvaryavaḥ ǀ cakṛ-vāṃsaḥ ǀ madhūni ǀ pra ǀ vāyave ǀ bharata ǀ cāru ǀ śukram ǀ
hotā-iva ǀ naḥ ǀ prathamaḥ ǀ pāhi ǀ asya ǀ deva ǀ madhvaḥ ǀ rarima ǀ te ǀ madāya ǁ
05.043.04 (Mandala. Sukta. Rik)
4.2.20.04 (Ashtaka. Adhyaya. Varga. Rik)
05.03.099 (Mandala. Anuvāka. Rik)
Samhita Devanagari Accented
दश॒ क्षिपो॑ युंजते बा॒हू अद्रिं॒ सोम॑स्य॒ या श॑मि॒तारा॑ सु॒हस्ता॑ ।
मध्वो॒ रसं॑ सु॒गभ॑स्तिर्गिरि॒ष्ठां चनि॑श्चदद्दुदुहे शु॒क्रमं॒शुः ॥
Samhita Devanagari Nonaccented
दश क्षिपो युंजते बाहू अद्रिं सोमस्य या शमितारा सुहस्ता ।
मध्वो रसं सुगभस्तिर्गिरिष्ठां चनिश्चदद्दुदुहे शुक्रमंशुः ॥
Samhita Transcription Accented
dáśa kṣípo yuñjate bāhū́ ádrim sómasya yā́ śamitā́rā suhástā ǀ
mádhvo rásam sugábhastirgiriṣṭhā́m cániścadadduduhe śukrámaṃśúḥ ǁ
Samhita Transcription Nonaccented
daśa kṣipo yuñjate bāhū adrim somasya yā śamitārā suhastā ǀ
madhvo rasam sugabhastirgiriṣṭhām caniścadadduduhe śukramaṃśuḥ ǁ
Padapatha Devanagari Accented
दश॑ । क्षिपः॑ । यु॒ञ्ज॒ते॒ । बा॒हू इति॑ । अद्रि॑म् । सोम॑स्य । या । श॒मि॒तारा॑ । सु॒ऽहस्ता॑ ।
मध्वः॑ । रस॑म् । सु॒ऽगभ॑स्तिः । गि॒रि॒ऽस्थाम् । चनि॑श्चदत् । दु॒दु॒हे॒ । शु॒क्रम् । अं॒शुः ॥
Padapatha Devanagari Nonaccented
दश । क्षिपः । युञ्जते । बाहू इति । अद्रिम् । सोमस्य । या । शमितारा । सुऽहस्ता ।
मध्वः । रसम् । सुऽगभस्तिः । गिरिऽस्थाम् । चनिश्चदत् । दुदुहे । शुक्रम् । अंशुः ॥
Padapatha Transcription Accented
dáśa ǀ kṣípaḥ ǀ yuñjate ǀ bāhū́ íti ǀ ádrim ǀ sómasya ǀ yā́ ǀ śamitā́rā ǀ su-hástā ǀ
mádhvaḥ ǀ rásam ǀ su-gábhastiḥ ǀ giri-sthā́m ǀ cániścadat ǀ duduhe ǀ śukrám ǀ aṃśúḥ ǁ
Padapatha Transcription Nonaccented
daśa ǀ kṣipaḥ ǀ yuñjate ǀ bāhū iti ǀ adrim ǀ somasya ǀ yā ǀ śamitārā ǀ su-hastā ǀ
madhvaḥ ǀ rasam ǀ su-gabhastiḥ ǀ giri-sthām ǀ caniścadat ǀ duduhe ǀ śukram ǀ aṃśuḥ ǁ
05.043.05 (Mandala. Sukta. Rik)
4.2.20.05 (Ashtaka. Adhyaya. Varga. Rik)
05.03.100 (Mandala. Anuvāka. Rik)
Samhita Devanagari Accented
असा॑वि ते जुजुषा॒णाय॒ सोमः॒ क्रत्वे॒ दक्षा॑य बृह॒ते मदा॑य ।
हरी॒ रथे॑ सु॒धुरा॒ योगे॑ अ॒र्वागिंद्र॑ प्रि॒या कृ॑णुहि हू॒यमा॑नः ॥
Samhita Devanagari Nonaccented
असावि ते जुजुषाणाय सोमः क्रत्वे दक्षाय बृहते मदाय ।
हरी रथे सुधुरा योगे अर्वागिंद्र प्रिया कृणुहि हूयमानः ॥
Samhita Transcription Accented
ásāvi te jujuṣāṇā́ya sómaḥ krátve dákṣāya bṛhaté mádāya ǀ
hárī ráthe sudhúrā yóge arvā́gíndra priyā́ kṛṇuhi hūyámānaḥ ǁ
Samhita Transcription Nonaccented
asāvi te jujuṣāṇāya somaḥ kratve dakṣāya bṛhate madāya ǀ
harī rathe sudhurā yoge arvāgindra priyā kṛṇuhi hūyamānaḥ ǁ
Padapatha Devanagari Accented
असा॑वि । ते॒ । जु॒जु॒षा॒णाय॑ । सोमः॑ । क्रत्वे॑ । दक्षा॑य । बृ॒ह॒ते । मदा॑य ।
हरी॒ इति॑ । रथे॑ । सु॒ऽधुरा॑ । योगे॑ । अ॒र्वाक् । इन्द्र॑ । प्रि॒या । कृ॒णु॒हि॒ । हू॒यमा॑नः ॥
Padapatha Devanagari Nonaccented
असावि । ते । जुजुषाणाय । सोमः । क्रत्वे । दक्षाय । बृहते । मदाय ।
हरी इति । रथे । सुऽधुरा । योगे । अर्वाक् । इन्द्र । प्रिया । कृणुहि । हूयमानः ॥
Padapatha Transcription Accented
ásāvi ǀ te ǀ jujuṣāṇā́ya ǀ sómaḥ ǀ krátve ǀ dákṣāya ǀ bṛhaté ǀ mádāya ǀ
hárī íti ǀ ráthe ǀ su-dhúrā ǀ yóge ǀ arvā́k ǀ índra ǀ priyā́ ǀ kṛṇuhi ǀ hūyámānaḥ ǁ
Padapatha Transcription Nonaccented
asāvi ǀ te ǀ jujuṣāṇāya ǀ somaḥ ǀ kratve ǀ dakṣāya ǀ bṛhate ǀ madāya ǀ
harī iti ǀ rathe ǀ su-dhurā ǀ yoge ǀ arvāk ǀ indra ǀ priyā ǀ kṛṇuhi ǀ hūyamānaḥ ǁ
05.043.06 (Mandala. Sukta. Rik)
4.2.21.01 (Ashtaka. Adhyaya. Varga. Rik)
05.03.101 (Mandala. Anuvāka. Rik)
Samhita Devanagari Accented
आ नो॑ म॒हीम॒रम॑तिं स॒जोषा॒ ग्नां दे॒वीं नम॑सा रा॒तह॑व्यां ।
मधो॒र्मदा॑य बृह॒तीमृ॑त॒ज्ञामाग्ने॑ वह प॒थिभि॑र्देव॒यानैः॑ ॥
Samhita Devanagari Nonaccented
आ नो महीमरमतिं सजोषा ग्नां देवीं नमसा रातहव्यां ।
मधोर्मदाय बृहतीमृतज्ञामाग्ने वह पथिभिर्देवयानैः ॥
Samhita Transcription Accented
ā́ no mahī́marámatim sajóṣā gnā́m devī́m námasā rātáhavyām ǀ
mádhormádāya bṛhatī́mṛtajñā́mā́gne vaha pathíbhirdevayā́naiḥ ǁ
Samhita Transcription Nonaccented
ā no mahīmaramatim sajoṣā gnām devīm namasā rātahavyām ǀ
madhormadāya bṛhatīmṛtajñāmāgne vaha pathibhirdevayānaiḥ ǁ
Padapatha Devanagari Accented
आ । नः॒ । म॒हीम् । अ॒रम॑तिम् । स॒ऽजोषाः॑ । ग्नाम् । दे॒वीम् । नम॑सा । रा॒तऽह॑व्याम् ।
मधोः॑ । मदा॑य । बृ॒ह॒तीम् । ऋ॒त॒ऽज्ञाम् । आ । अ॒ग्ने॒ । व॒ह॒ । प॒थिऽभिः॑ । दे॒व॒ऽयानैः॑ ॥
Padapatha Devanagari Nonaccented
आ । नः । महीम् । अरमतिम् । सऽजोषाः । ग्नाम् । देवीम् । नमसा । रातऽहव्याम् ।
मधोः । मदाय । बृहतीम् । ऋतऽज्ञाम् । आ । अग्ने । वह । पथिऽभिः । देवऽयानैः ॥
Padapatha Transcription Accented
ā́ ǀ naḥ ǀ mahī́m ǀ arámatim ǀ sa-jóṣāḥ ǀ gnā́m ǀ devī́m ǀ námasā ǀ rātá-havyām ǀ
mádhoḥ ǀ mádāya ǀ bṛhatī́m ǀ ṛta-jñā́m ǀ ā́ ǀ agne ǀ vaha ǀ pathí-bhiḥ ǀ deva-yā́naiḥ ǁ
Padapatha Transcription Nonaccented
ā ǀ naḥ ǀ mahīm ǀ aramatim ǀ sa-joṣāḥ ǀ gnām ǀ devīm ǀ namasā ǀ rāta-havyām ǀ
madhoḥ ǀ madāya ǀ bṛhatīm ǀ ṛta-jñām ǀ ā ǀ agne ǀ vaha ǀ pathi-bhiḥ ǀ deva-yānaiḥ ǁ
05.043.07 (Mandala. Sukta. Rik)
4.2.21.02 (Ashtaka. Adhyaya. Varga. Rik)
05.03.102 (Mandala. Anuvāka. Rik)
Samhita Devanagari Accented
अं॒जंति॒ यं प्र॒थयं॑तो॒ न विप्रा॑ व॒पावं॑तं॒ नाग्निना॒ तपं॑तः ।
पि॒तुर्न पु॒त्र उ॒पसि॒ प्रेष्ठ॒ आ घ॒र्मो अ॒ग्निमृ॒तय॑न्नसादि ॥
Samhita Devanagari Nonaccented
अंजंति यं प्रथयंतो न विप्रा वपावंतं नाग्निना तपंतः ।
पितुर्न पुत्र उपसि प्रेष्ठ आ घर्मो अग्निमृतयन्नसादि ॥
Samhita Transcription Accented
añjánti yám pratháyanto ná víprā vapā́vantam nā́gnínā tápantaḥ ǀ
pitúrná putrá upási préṣṭha ā́ gharmó agnímṛtáyannasādi ǁ
Samhita Transcription Nonaccented
añjanti yam prathayanto na viprā vapāvantam nāgninā tapantaḥ ǀ
piturna putra upasi preṣṭha ā gharmo agnimṛtayannasādi ǁ
Padapatha Devanagari Accented
अ॒ञ्जन्ति॑ । यम् । प्र॒थय॑न्तः । न । विप्राः॑ । व॒पाऽव॑न्तम् । न । अ॒ग्निना॑ । तप॑न्तः ।
पि॒तुः । न । पु॒त्रः । उ॒पसि॑ । प्रेष्ठः॑ । आ । घ॒र्मः । अ॒ग्निम् । ऋ॒तय॑न् । अ॒सा॒दि॒ ॥
Padapatha Devanagari Nonaccented
अञ्जन्ति । यम् । प्रथयन्तः । न । विप्राः । वपाऽवन्तम् । न । अग्निना । तपन्तः ।
पितुः । न । पुत्रः । उपसि । प्रेष्ठः । आ । घर्मः । अग्निम् । ऋतयन् । असादि ॥
Padapatha Transcription Accented
añjánti ǀ yám ǀ pratháyantaḥ ǀ ná ǀ víprāḥ ǀ vapā́-vantam ǀ ná ǀ agnínā ǀ tápantaḥ ǀ
pitúḥ ǀ ná ǀ putráḥ ǀ upási ǀ préṣṭhaḥ ǀ ā́ ǀ gharmáḥ ǀ agním ǀ ṛtáyan ǀ asādi ǁ
Padapatha Transcription Nonaccented
añjanti ǀ yam ǀ prathayantaḥ ǀ na ǀ viprāḥ ǀ vapā-vantam ǀ na ǀ agninā ǀ tapantaḥ ǀ
pituḥ ǀ na ǀ putraḥ ǀ upasi ǀ preṣṭhaḥ ǀ ā ǀ gharmaḥ ǀ agnim ǀ ṛtayan ǀ asādi ǁ
05.043.08 (Mandala. Sukta. Rik)
4.2.21.03 (Ashtaka. Adhyaya. Varga. Rik)
05.03.103 (Mandala. Anuvāka. Rik)
Samhita Devanagari Accented
अच्छा॑ म॒ही बृ॑ह॒ती शंत॑मा॒ गीर्दू॒तो न गं॑त्व॒श्विना॑ हु॒वध्यै॑ ।
म॒यो॒भुवा॑ स॒रथा या॑तम॒र्वाग्गं॒तं नि॒धिं धुर॑मा॒णिर्न नाभिं॑ ॥
Samhita Devanagari Nonaccented
अच्छा मही बृहती शंतमा गीर्दूतो न गंत्वश्विना हुवध्यै ।
मयोभुवा सरथा यातमर्वाग्गंतं निधिं धुरमाणिर्न नाभिं ॥
Samhita Transcription Accented
ácchā mahī́ bṛhatī́ śáṃtamā gī́rdūtó ná gantvaśvínā huvádhyai ǀ
mayobhúvā saráthā́ yātamarvā́ggantám nidhím dhúramāṇírná nā́bhim ǁ
Samhita Transcription Nonaccented
acchā mahī bṛhatī śaṃtamā gīrdūto na gantvaśvinā huvadhyai ǀ
mayobhuvā sarathā yātamarvāggantam nidhim dhuramāṇirna nābhim ǁ
Padapatha Devanagari Accented
अच्छ॑ । म॒ही । बृ॒ह॒ती । शम्ऽत॑मा । गीः । दू॒तः । न । ग॒न्तु॒ । अ॒श्विना॑ । हु॒वध्यै॑ ।
म॒यः॒ऽभुवा॑ । स॒ऽरथा॑ । आ । या॒त॒म् । अ॒र्वाक् । ग॒न्तम् । नि॒ऽधिम् । धुर॑म् । आ॒णिः । न । नाभि॑म् ॥
Padapatha Devanagari Nonaccented
अच्छ । मही । बृहती । शम्ऽतमा । गीः । दूतः । न । गन्तु । अश्विना । हुवध्यै ।
मयःऽभुवा । सऽरथा । आ । यातम् । अर्वाक् । गन्तम् । निऽधिम् । धुरम् । आणिः । न । नाभिम् ॥
Padapatha Transcription Accented
áccha ǀ mahī́ ǀ bṛhatī́ ǀ śám-tamā ǀ gī́ḥ ǀ dūtáḥ ǀ ná ǀ gantu ǀ aśvínā ǀ huvádhyai ǀ
mayaḥ-bhúvā ǀ sa-ráthā ǀ ā́ ǀ yātam ǀ arvā́k ǀ gantám ǀ ni-dhím ǀ dhúram ǀ āṇíḥ ǀ ná ǀ nā́bhim ǁ
Padapatha Transcription Nonaccented
accha ǀ mahī ǀ bṛhatī ǀ śam-tamā ǀ gīḥ ǀ dūtaḥ ǀ na ǀ gantu ǀ aśvinā ǀ huvadhyai ǀ
mayaḥ-bhuvā ǀ sa-rathā ǀ ā ǀ yātam ǀ arvāk ǀ gantam ǀ ni-dhim ǀ dhuram ǀ āṇiḥ ǀ na ǀ nābhim ǁ
05.043.09 (Mandala. Sukta. Rik)
4.2.21.04 (Ashtaka. Adhyaya. Varga. Rik)
05.03.104 (Mandala. Anuvāka. Rik)
Samhita Devanagari Accented
प्र तव्य॑सो॒ नम॑उक्तिं तु॒रस्या॒हं पू॒ष्ण उ॒त वा॒योर॑दिक्षि ।
या राध॑सा चोदि॒तारा॑ मती॒नां या वाज॑स्य द्रविणो॒दा उ॒त त्मन् ॥
Samhita Devanagari Nonaccented
प्र तव्यसो नमउक्तिं तुरस्याहं पूष्ण उत वायोरदिक्षि ।
या राधसा चोदितारा मतीनां या वाजस्य द्रविणोदा उत त्मन् ॥
Samhita Transcription Accented
prá távyaso náma+uktim turásyāhám pūṣṇá utá vāyóradikṣi ǀ
yā́ rā́dhasā coditā́rā matīnā́m yā́ vā́jasya draviṇodā́ utá tmán ǁ
Samhita Transcription Nonaccented
pra tavyaso nama+uktim turasyāham pūṣṇa uta vāyoradikṣi ǀ
yā rādhasā coditārā matīnām yā vājasya draviṇodā uta tman ǁ
Padapatha Devanagari Accented
प्र । तव्य॑सः । नमः॑ऽउक्तिम् । तु॒रस्य॑ । अ॒हम् । पू॒ष्णः । उ॒त । वा॒योः । अ॒दि॒क्षि॒ ।
या । राध॑सा । चो॒दि॒तारा॑ । म॒ती॒नाम् । या । वाज॑स्य । द्र॒वि॒णः॒ऽदौ । उ॒त । त्मन् ॥
Padapatha Devanagari Nonaccented
प्र । तव्यसः । नमःऽउक्तिम् । तुरस्य । अहम् । पूष्णः । उत । वायोः । अदिक्षि ।
या । राधसा । चोदितारा । मतीनाम् । या । वाजस्य । द्रविणःऽदौ । उत । त्मन् ॥
Padapatha Transcription Accented
prá ǀ távyasaḥ ǀ námaḥ-uktim ǀ turásya ǀ ahám ǀ pūṣṇáḥ ǀ utá ǀ vāyóḥ ǀ adikṣi ǀ
yā́ ǀ rā́dhasā ǀ coditā́rā ǀ matīnā́m ǀ yā́ ǀ vā́jasya ǀ draviṇaḥ-dáu ǀ utá ǀ tmán ǁ
Padapatha Transcription Nonaccented
pra ǀ tavyasaḥ ǀ namaḥ-uktim ǀ turasya ǀ aham ǀ pūṣṇaḥ ǀ uta ǀ vāyoḥ ǀ adikṣi ǀ
yā ǀ rādhasā ǀ coditārā ǀ matīnām ǀ yā ǀ vājasya ǀ draviṇaḥ-dau ǀ uta ǀ tman ǁ
05.043.10 (Mandala. Sukta. Rik)
4.2.21.05 (Ashtaka. Adhyaya. Varga. Rik)
05.03.105 (Mandala. Anuvāka. Rik)
Samhita Devanagari Accented
आ नाम॑भिर्म॒रुतो॑ वक्षि॒ विश्वा॒ना रू॒पेभि॑र्जातवेदो हुवा॒नः ।
य॒ज्ञं गिरो॑ जरि॒तुः सु॑ष्टु॒तिं च॒ विश्वे॑ गंत मरुतो॒ विश्व॑ ऊ॒ती ॥
Samhita Devanagari Nonaccented
आ नामभिर्मरुतो वक्षि विश्वाना रूपेभिर्जातवेदो हुवानः ।
यज्ञं गिरो जरितुः सुष्टुतिं च विश्वे गंत मरुतो विश्व ऊती ॥
Samhita Transcription Accented
ā́ nā́mabhirmarúto vakṣi víśvānā́ rūpébhirjātavedo huvānáḥ ǀ
yajñám gíro jaritúḥ suṣṭutím ca víśve ganta maruto víśva ūtī́ ǁ
Samhita Transcription Nonaccented
ā nāmabhirmaruto vakṣi viśvānā rūpebhirjātavedo huvānaḥ ǀ
yajñam giro jarituḥ suṣṭutim ca viśve ganta maruto viśva ūtī ǁ
Padapatha Devanagari Accented
आ । नाम॑ऽभिः । म॒रुतः॑ । व॒क्षि॒ । विश्वा॑न् । आ । रू॒पेभिः॑ । जा॒त॒ऽवे॒दः॒ । हु॒वा॒नः ।
य॒ज्ञम् । गिरः॑ । ज॒रि॒तुः । सु॒ऽस्तु॒तिम् । च॒ । विश्वे॑ । ग॒न्त॒ । म॒रु॒तः॒ । विश्वे॑ । ऊ॒ती ॥
Padapatha Devanagari Nonaccented
आ । नामऽभिः । मरुतः । वक्षि । विश्वान् । आ । रूपेभिः । जातऽवेदः । हुवानः ।
यज्ञम् । गिरः । जरितुः । सुऽस्तुतिम् । च । विश्वे । गन्त । मरुतः । विश्वे । ऊती ॥
Padapatha Transcription Accented
ā́ ǀ nā́ma-bhiḥ ǀ marútaḥ ǀ vakṣi ǀ víśvān ǀ ā́ ǀ rūpébhiḥ ǀ jāta-vedaḥ ǀ huvānáḥ ǀ
yajñám ǀ gíraḥ ǀ jaritúḥ ǀ su-stutím ǀ ca ǀ víśve ǀ ganta ǀ marutaḥ ǀ víśve ǀ ūtī́ ǁ
Padapatha Transcription Nonaccented
ā ǀ nāma-bhiḥ ǀ marutaḥ ǀ vakṣi ǀ viśvān ǀ ā ǀ rūpebhiḥ ǀ jāta-vedaḥ ǀ huvānaḥ ǀ
yajñam ǀ giraḥ ǀ jarituḥ ǀ su-stutim ǀ ca ǀ viśve ǀ ganta ǀ marutaḥ ǀ viśve ǀ ūtī ǁ
05.043.11 (Mandala. Sukta. Rik)
4.2.22.01 (Ashtaka. Adhyaya. Varga. Rik)
05.03.106 (Mandala. Anuvāka. Rik)
Samhita Devanagari Accented
आ नो॑ दि॒वो बृ॑ह॒तः पर्व॑ता॒दा सर॑स्वती यज॒ता गं॑तु य॒ज्ञं ।
हवं॑ दे॒वी जु॑जुषा॒णा घृ॒ताची॑ श॒ग्मां नो॒ वाच॑मुश॒ती शृ॑णोतु ॥
Samhita Devanagari Nonaccented
आ नो दिवो बृहतः पर्वतादा सरस्वती यजता गंतु यज्ञं ।
हवं देवी जुजुषाणा घृताची शग्मां नो वाचमुशती शृणोतु ॥
Samhita Transcription Accented
ā́ no divó bṛhatáḥ párvatādā́ sárasvatī yajatā́ gantu yajñám ǀ
hávam devī́ jujuṣāṇā́ ghṛtā́cī śagmā́m no vā́camuśatī́ śṛṇotu ǁ
Samhita Transcription Nonaccented
ā no divo bṛhataḥ parvatādā sarasvatī yajatā gantu yajñam ǀ
havam devī jujuṣāṇā ghṛtācī śagmām no vācamuśatī śṛṇotu ǁ
Padapatha Devanagari Accented
आ । नः॒ । दि॒वः । बृ॒ह॒तः । पर्व॑तात् । आ । सर॑स्वती । य॒ज॒ता । ग॒न्तु॒ । य॒ज्ञम् ।
हव॑म् । दे॒वी । जु॒जु॒षा॒णा । घृ॒ताची॑ । श॒ग्माम् । नः॒ । वाच॑म् । उ॒श॒ती । शृ॒णो॒तु॒ ॥
Padapatha Devanagari Nonaccented
आ । नः । दिवः । बृहतः । पर्वतात् । आ । सरस्वती । यजता । गन्तु । यज्ञम् ।
हवम् । देवी । जुजुषाणा । घृताची । शग्माम् । नः । वाचम् । उशती । शृणोतु ॥
Padapatha Transcription Accented
ā́ ǀ naḥ ǀ diváḥ ǀ bṛhatáḥ ǀ párvatāt ǀ ā́ ǀ sárasvatī ǀ yajatā́ ǀ gantu ǀ yajñám ǀ
hávam ǀ devī́ ǀ jujuṣāṇā́ ǀ ghṛtā́cī ǀ śagmā́m ǀ naḥ ǀ vā́cam ǀ uśatī́ ǀ śṛṇotu ǁ
Padapatha Transcription Nonaccented
ā ǀ naḥ ǀ divaḥ ǀ bṛhataḥ ǀ parvatāt ǀ ā ǀ sarasvatī ǀ yajatā ǀ gantu ǀ yajñam ǀ
havam ǀ devī ǀ jujuṣāṇā ǀ ghṛtācī ǀ śagmām ǀ naḥ ǀ vācam ǀ uśatī ǀ śṛṇotu ǁ
05.043.12 (Mandala. Sukta. Rik)
4.2.22.02 (Ashtaka. Adhyaya. Varga. Rik)
05.03.107 (Mandala. Anuvāka. Rik)
Samhita Devanagari Accented
आ वे॒धसं॒ नील॑पृष्ठं बृ॒हंतं॒ बृह॒स्पतिं॒ सद॑ने सादयध्वं ।
सा॒दद्यो॑निं॒ दम॒ आ दी॑दि॒वांसं॒ हिर॑ण्यवर्णमरु॒षं स॑पेम ॥
Samhita Devanagari Nonaccented
आ वेधसं नीलपृष्ठं बृहंतं बृहस्पतिं सदने सादयध्वं ।
सादद्योनिं दम आ दीदिवांसं हिरण्यवर्णमरुषं सपेम ॥
Samhita Transcription Accented
ā́ vedhásam nī́lapṛṣṭham bṛhántam bṛ́haspátim sádane sādayadhvam ǀ
sādádyonim dáma ā́ dīdivā́ṃsam híraṇyavarṇamaruṣám sapema ǁ
Samhita Transcription Nonaccented
ā vedhasam nīlapṛṣṭham bṛhantam bṛhaspatim sadane sādayadhvam ǀ
sādadyonim dama ā dīdivāṃsam hiraṇyavarṇamaruṣam sapema ǁ
Padapatha Devanagari Accented
आ । वे॒धस॑म् । नील॑ऽपृष्ठम् । बृ॒हन्त॑म् । बृह॒स्पति॑म् । सद॑ने । सा॒द॒य॒ध्व॒म् ।
सा॒दत्ऽयो॑निम् । दमे॑ । आ । दी॒दि॒ऽवांस॑म् । हिर॑ण्यऽवर्णम् । अ॒रु॒षम् । स॒पे॒म॒ ॥
Padapatha Devanagari Nonaccented
आ । वेधसम् । नीलऽपृष्ठम् । बृहन्तम् । बृहस्पतिम् । सदने । सादयध्वम् ।
सादत्ऽयोनिम् । दमे । आ । दीदिऽवांसम् । हिरण्यऽवर्णम् । अरुषम् । सपेम ॥
Padapatha Transcription Accented
ā́ ǀ vedhásam ǀ nī́la-pṛṣṭham ǀ bṛhántam ǀ bṛ́haspátim ǀ sádane ǀ sādayadhvam ǀ
sādát-yonim ǀ dáme ǀ ā́ ǀ dīdi-vā́ṃsam ǀ híraṇya-varṇam ǀ aruṣám ǀ sapema ǁ
Padapatha Transcription Nonaccented
ā ǀ vedhasam ǀ nīla-pṛṣṭham ǀ bṛhantam ǀ bṛhaspatim ǀ sadane ǀ sādayadhvam ǀ
sādat-yonim ǀ dame ǀ ā ǀ dīdi-vāṃsam ǀ hiraṇya-varṇam ǀ aruṣam ǀ sapema ǁ
05.043.13 (Mandala. Sukta. Rik)
4.2.22.03 (Ashtaka. Adhyaya. Varga. Rik)
05.03.108 (Mandala. Anuvāka. Rik)
Samhita Devanagari Accented
आ ध॑र्ण॒सिर्बृ॒हद्दि॑वो॒ ररा॑णो॒ विश्वे॑भिर्गं॒त्वोम॑भिर्हुवा॒नः ।
ग्ना वसा॑न॒ ओष॑धी॒रमृ॑ध्रस्त्रि॒धातु॑शृंगो वृष॒भो व॑यो॒धाः ॥
Samhita Devanagari Nonaccented
आ धर्णसिर्बृहद्दिवो रराणो विश्वेभिर्गंत्वोमभिर्हुवानः ।
ग्ना वसान ओषधीरमृध्रस्त्रिधातुशृंगो वृषभो वयोधाः ॥
Samhita Transcription Accented
ā́ dharṇasírbṛháddivo rárāṇo víśvebhirgantvómabhirhuvānáḥ ǀ
gnā́ vásāna óṣadhīrámṛdhrastridhā́tuśṛṅgo vṛṣabhó vayodhā́ḥ ǁ
Samhita Transcription Nonaccented
ā dharṇasirbṛhaddivo rarāṇo viśvebhirgantvomabhirhuvānaḥ ǀ
gnā vasāna oṣadhīramṛdhrastridhātuśṛṅgo vṛṣabho vayodhāḥ ǁ
Padapatha Devanagari Accented
आ । ध॒र्ण॒सिः । बृ॒हत्ऽदि॑वः । ररा॑णः । विश्वे॑भिः । ग॒न्तु॒ । ओम॑ऽभिः । हु॒वा॒नः ।
ग्नाः । वसा॑नः । ओष॑धीः । अमृ॑ध्रः । त्रि॒धातु॑ऽशृङ्गः । वृ॒ष॒भः । व॒यः॒ऽधाः ॥
Padapatha Devanagari Nonaccented
आ । धर्णसिः । बृहत्ऽदिवः । रराणः । विश्वेभिः । गन्तु । ओमऽभिः । हुवानः ।
ग्नाः । वसानः । ओषधीः । अमृध्रः । त्रिधातुऽशृङ्गः । वृषभः । वयःऽधाः ॥
Padapatha Transcription Accented
ā́ ǀ dharṇasíḥ ǀ bṛhát-divaḥ ǀ rárāṇaḥ ǀ víśvebhiḥ ǀ gantu ǀ óma-bhiḥ ǀ huvānáḥ ǀ
gnā́ḥ ǀ vásānaḥ ǀ óṣadhīḥ ǀ ámṛdhraḥ ǀ tridhā́tu-śṛṅgaḥ ǀ vṛṣabháḥ ǀ vayaḥ-dhā́ḥ ǁ
Padapatha Transcription Nonaccented
ā ǀ dharṇasiḥ ǀ bṛhat-divaḥ ǀ rarāṇaḥ ǀ viśvebhiḥ ǀ gantu ǀ oma-bhiḥ ǀ huvānaḥ ǀ
gnāḥ ǀ vasānaḥ ǀ oṣadhīḥ ǀ amṛdhraḥ ǀ tridhātu-śṛṅgaḥ ǀ vṛṣabhaḥ ǀ vayaḥ-dhāḥ ǁ
05.043.14 (Mandala. Sukta. Rik)
4.2.22.04 (Ashtaka. Adhyaya. Varga. Rik)
05.03.109 (Mandala. Anuvāka. Rik)
Samhita Devanagari Accented
मा॒तुष्प॒दे प॑र॒मे शु॒क्र आ॒योर्वि॑प॒न्यवो॑ रास्पि॒रासो॑ अग्मन् ।
सु॒शेव्यं॒ नम॑सा रा॒तह॑व्याः॒ शिशुं॑ मृजंत्या॒यवो॒ न वा॒से ॥
Samhita Devanagari Nonaccented
मातुष्पदे परमे शुक्र आयोर्विपन्यवो रास्पिरासो अग्मन् ।
सुशेव्यं नमसा रातहव्याः शिशुं मृजंत्यायवो न वासे ॥
Samhita Transcription Accented
mātúṣpadé paramé śukrá āyórvipanyávo rāspirā́so agman ǀ
suśévyam námasā rātáhavyāḥ śíśum mṛjantyāyávo ná vāsé ǁ
Samhita Transcription Nonaccented
mātuṣpade parame śukra āyorvipanyavo rāspirāso agman ǀ
suśevyam namasā rātahavyāḥ śiśum mṛjantyāyavo na vāse ǁ
Padapatha Devanagari Accented
मा॒तुः । प॒दे । प॒र॒मे । शु॒क्रे । आ॒योः । वि॒प॒न्यवः॑ । रा॒स्पि॒रासः॑ । अ॒ग्म॒न् ।
सु॒ऽशेव्य॑म् । नम॑सा । रा॒तऽह॑व्याः । शिशु॑म् । मृ॒ज॒न्ति॒ । आ॒यवः॑ । न । वा॒से ॥
Padapatha Devanagari Nonaccented
मातुः । पदे । परमे । शुक्रे । आयोः । विपन्यवः । रास्पिरासः । अग्मन् ।
सुऽशेव्यम् । नमसा । रातऽहव्याः । शिशुम् । मृजन्ति । आयवः । न । वासे ॥
Padapatha Transcription Accented
mātúḥ ǀ padé ǀ paramé ǀ śukré ǀ āyóḥ ǀ vipanyávaḥ ǀ rāspirā́saḥ ǀ agman ǀ
su-śévyam ǀ námasā ǀ rātá-havyāḥ ǀ śíśum ǀ mṛjanti ǀ āyávaḥ ǀ ná ǀ vāsé ǁ
Padapatha Transcription Nonaccented
mātuḥ ǀ pade ǀ parame ǀ śukre ǀ āyoḥ ǀ vipanyavaḥ ǀ rāspirāsaḥ ǀ agman ǀ
su-śevyam ǀ namasā ǀ rāta-havyāḥ ǀ śiśum ǀ mṛjanti ǀ āyavaḥ ǀ na ǀ vāse ǁ
05.043.15 (Mandala. Sukta. Rik)
4.2.22.05 (Ashtaka. Adhyaya. Varga. Rik)
05.03.110 (Mandala. Anuvāka. Rik)
Samhita Devanagari Accented
बृ॒हद्वयो॑ बृह॒ते तुभ्य॑मग्ने धिया॒जुरो॑ मिथु॒नासः॑ सचंत ।
दे॒वोदे॑वः सु॒हवो॑ भूतु॒ मह्यं॒ मा नो॑ मा॒ता पृ॑थि॒वी दु॑र्म॒तौ धा॑त् ॥
Samhita Devanagari Nonaccented
बृहद्वयो बृहते तुभ्यमग्ने धियाजुरो मिथुनासः सचंत ।
देवोदेवः सुहवो भूतु मह्यं मा नो माता पृथिवी दुर्मतौ धात् ॥
Samhita Transcription Accented
bṛhádváyo bṛhaté túbhyamagne dhiyājúro mithunā́saḥ sacanta ǀ
devódevaḥ suhávo bhūtu máhyam mā́ no mātā́ pṛthivī́ durmatáu dhāt ǁ
Samhita Transcription Nonaccented
bṛhadvayo bṛhate tubhyamagne dhiyājuro mithunāsaḥ sacanta ǀ
devodevaḥ suhavo bhūtu mahyam mā no mātā pṛthivī durmatau dhāt ǁ
Padapatha Devanagari Accented
बृ॒हत् । वयः॑ । बृ॒ह॒ते । तुभ्य॑म् । अ॒ग्ने॒ । धि॒या॒ऽजुरः॑ । मि॒थु॒नासः॑ । स॒च॒न्त॒ ।
दे॒वःऽदे॑वः । सु॒ऽहवः॑ । भू॒तु॒ । मह्य॑म् । मा । नः॒ । मा॒ता । पृ॒थि॒वी । दुः॒ऽम॒तौ । धा॒त् ॥
Padapatha Devanagari Nonaccented
बृहत् । वयः । बृहते । तुभ्यम् । अग्ने । धियाऽजुरः । मिथुनासः । सचन्त ।
देवःऽदेवः । सुऽहवः । भूतु । मह्यम् । मा । नः । माता । पृथिवी । दुःऽमतौ । धात् ॥
Padapatha Transcription Accented
bṛhát ǀ váyaḥ ǀ bṛhaté ǀ túbhyam ǀ agne ǀ dhiyā-júraḥ ǀ mithunā́saḥ ǀ sacanta ǀ
deváḥ-devaḥ ǀ su-hávaḥ ǀ bhūtu ǀ máhyam ǀ mā́ ǀ naḥ ǀ mātā́ ǀ pṛthivī́ ǀ duḥ-matáu ǀ dhāt ǁ
Padapatha Transcription Nonaccented
bṛhat ǀ vayaḥ ǀ bṛhate ǀ tubhyam ǀ agne ǀ dhiyā-juraḥ ǀ mithunāsaḥ ǀ sacanta ǀ
devaḥ-devaḥ ǀ su-havaḥ ǀ bhūtu ǀ mahyam ǀ mā ǀ naḥ ǀ mātā ǀ pṛthivī ǀ duḥ-matau ǀ dhāt ǁ
05.043.16 (Mandala. Sukta. Rik)
4.2.22.06 (Ashtaka. Adhyaya. Varga. Rik)
05.03.111 (Mandala. Anuvāka. Rik)
Samhita Devanagari Accented
उ॒रौ दे॑वा अनिबा॒धे स्या॑म ॥
Samhita Devanagari Nonaccented
उरौ देवा अनिबाधे स्याम ॥
Samhita Transcription Accented
uráu devā anibādhé syāma ǁ
Samhita Transcription Nonaccented
urau devā anibādhe syāma ǁ
Padapatha Devanagari Accented
उ॒रौ । दे॒वाः॒ । अ॒नि॒ऽबा॒धे । स्या॒म॒ ॥
Padapatha Devanagari Nonaccented
उरौ । देवाः । अनिऽबाधे । स्याम ॥
Padapatha Transcription Accented
uráu ǀ devāḥ ǀ ani-bādhé ǀ syāma ǁ
Padapatha Transcription Nonaccented
urau ǀ devāḥ ǀ ani-bādhe ǀ syāma ǁ
05.043.17 (Mandala. Sukta. Rik)
4.2.22.07 (Ashtaka. Adhyaya. Varga. Rik)
05.03.112 (Mandala. Anuvāka. Rik)
Samhita Devanagari Accented
सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम ।
आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि ॥
Samhita Devanagari Nonaccented
समश्विनोरवसा नूतनेन मयोभुवा सुप्रणीती गमेम ।
आ नो रयिं वहतमोत वीराना विश्वान्यमृता सौभगानि ॥
Samhita Transcription Accented
sámaśvínorávasā nū́tanena mayobhúvā supráṇītī gamema ǀ
ā́ no rayím vahatamótá vīrā́nā́ víśvānyamṛtā sáubhagāni ǁ
Samhita Transcription Nonaccented
samaśvinoravasā nūtanena mayobhuvā supraṇītī gamema ǀ
ā no rayim vahatamota vīrānā viśvānyamṛtā saubhagāni ǁ
Padapatha Devanagari Accented
सम् । अ॒श्विनोः॑ । अव॑सा । नूत॑नेन । म॒यः॒ऽभुवा॑ । सु॒ऽप्रनी॑ती । ग॒मे॒म॒ ।
आ । नः॒ । र॒यिम् । व॒ह॒त॒म् । आ । उ॒त । वी॒रान् । आ । विश्वा॑नि । अ॒मृ॒ता॒ । सौभ॑गानि ॥
Padapatha Devanagari Nonaccented
सम् । अश्विनोः । अवसा । नूतनेन । मयःऽभुवा । सुऽप्रनीती । गमेम ।
आ । नः । रयिम् । वहतम् । आ । उत । वीरान् । आ । विश्वानि । अमृता । सौभगानि ॥
Padapatha Transcription Accented
sám ǀ aśvínoḥ ǀ ávasā ǀ nū́tanena ǀ mayaḥ-bhúvā ǀ su-pránītī ǀ gamema ǀ
ā́ ǀ naḥ ǀ rayím ǀ vahatam ǀ ā́ ǀ utá ǀ vīrā́n ǀ ā́ ǀ víśvāni ǀ amṛtā ǀ sáubhagāni ǁ
Padapatha Transcription Nonaccented
sam ǀ aśvinoḥ ǀ avasā ǀ nūtanena ǀ mayaḥ-bhuvā ǀ su-pranītī ǀ gamema ǀ
ā ǀ naḥ ǀ rayim ǀ vahatam ǀ ā ǀ uta ǀ vīrān ǀ ā ǀ viśvāni ǀ amṛtā ǀ saubhagāni ǁ