|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 55
|
1. Info |
| To: | maruts | |
| From: | śyāvāśva ātreya | |
| Metres: | 1st set of styles: nicṛjjagatī (2, 4, 7, 8); jagatī (1, 5); nicṛttriṣṭup (6, 10); svarāṭtriṣṭup (3); virāḍjagatī (9) 2nd set of styles: jagatī (1-9); triṣṭubh (10) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.055.01 (Mandala. Sukta. Rik)
4.3.17.01 (Ashtaka. Adhyaya. Varga. Rik)
05.04.105 (Mandala. Anuvāka. Rik)
Samhita Devanagari Accented
प्रय॑ज्यवो म॒रुतो॒ भ्राज॑दृष्टयो बृ॒हद्वयो॑ दधिरे रु॒क्मव॑क्षसः ।
ईयं॑ते॒ अश्वैः॑ सु॒यमे॑भिरा॒शुभिः॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
प्रयज्यवो मरुतो भ्राजदृष्टयो बृहद्वयो दधिरे रुक्मवक्षसः ।
ईयंते अश्वैः सुयमेभिराशुभिः शुभं यातामनु रथा अवृत्सत ॥
Samhita Transcription Accented
práyajyavo marúto bhrā́jadṛṣṭayo bṛhádváyo dadhire rukmávakṣasaḥ ǀ
ī́yante áśvaiḥ suyámebhirāśúbhiḥ śúbham yātā́mánu ráthā avṛtsata ǁ
Samhita Transcription Nonaccented
prayajyavo maruto bhrājadṛṣṭayo bṛhadvayo dadhire rukmavakṣasaḥ ǀ
īyante aśvaiḥ suyamebhirāśubhiḥ śubham yātāmanu rathā avṛtsata ǁ
Padapatha Devanagari Accented
प्रऽय॑ज्यवः । म॒रुतः॑ । भ्राज॑त्ऽऋष्टयः । बृ॒हत् । वयः॑ । द॒धि॒रे॒ । रु॒क्मऽव॑क्षसः ।
ईय॑न्ते । अश्वैः॑ । सु॒ऽयमे॑भिः । आ॒शुऽभिः॑ । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
प्रऽयज्यवः । मरुतः । भ्राजत्ऽऋष्टयः । बृहत् । वयः । दधिरे । रुक्मऽवक्षसः ।
ईयन्ते । अश्वैः । सुऽयमेभिः । आशुऽभिः । शुभम् । याताम् । अनु । रथाः । अवृत्सत ॥
Padapatha Transcription Accented
prá-yajyavaḥ ǀ marútaḥ ǀ bhrā́jat-ṛṣṭayaḥ ǀ bṛhát ǀ váyaḥ ǀ dadhire ǀ rukmá-vakṣasaḥ ǀ
ī́yante ǀ áśvaiḥ ǀ su-yámebhiḥ ǀ āśú-bhiḥ ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
pra-yajyavaḥ ǀ marutaḥ ǀ bhrājat-ṛṣṭayaḥ ǀ bṛhat ǀ vayaḥ ǀ dadhire ǀ rukma-vakṣasaḥ ǀ
īyante ǀ aśvaiḥ ǀ su-yamebhiḥ ǀ āśu-bhiḥ ǀ śubham ǀ yātām ǀ anu ǀ rathāḥ ǀ avṛtsata ǁ
05.055.02 (Mandala. Sukta. Rik)
4.3.17.02 (Ashtaka. Adhyaya. Varga. Rik)
05.04.106 (Mandala. Anuvāka. Rik)
Samhita Devanagari Accented
स्व॒यं द॑धिध्वे॒ तवि॑षीं॒ यथा॑ वि॒द बृ॒हन्म॑हांत उर्वि॒या वि रा॑जथ ।
उ॒तांतरि॑क्षं ममिरे॒ व्योज॑सा॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
स्वयं दधिध्वे तविषीं यथा विद बृहन्महांत उर्विया वि राजथ ।
उतांतरिक्षं ममिरे व्योजसा शुभं यातामनु रथा अवृत्सत ॥
Samhita Transcription Accented
svayám dadhidhve táviṣīm yáthā vidá bṛhánmahānta urviyā́ ví rājatha ǀ
utā́ntárikṣam mamire vyójasā śúbham yātā́mánu ráthā avṛtsata ǁ
Samhita Transcription Nonaccented
svayam dadhidhve taviṣīm yathā vida bṛhanmahānta urviyā vi rājatha ǀ
utāntarikṣam mamire vyojasā śubham yātāmanu rathā avṛtsata ǁ
Padapatha Devanagari Accented
स्व॒यम् । द॒धि॒ध्वे॒ । तवि॑षीम् । यथा॑ । वि॒द । बृ॒हत् । म॒हा॒न्तः॒ । उ॒र्वि॒या । वि । रा॒ज॒थ॒ ।
उ॒त । अ॒न्तरि॑क्षम् । म॒मि॒रे॒ । वि । ओज॑सा । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
स्वयम् । दधिध्वे । तविषीम् । यथा । विद । बृहत् । महान्तः । उर्विया । वि । राजथ ।
उत । अन्तरिक्षम् । ममिरे । वि । ओजसा । शुभम् । याताम् । अनु । रथाः । अवृत्सत ॥
Padapatha Transcription Accented
svayám ǀ dadhidhve ǀ táviṣīm ǀ yáthā ǀ vidá ǀ bṛhát ǀ mahāntaḥ ǀ urviyā́ ǀ ví ǀ rājatha ǀ
utá ǀ antárikṣam ǀ mamire ǀ ví ǀ ójasā ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
svayam ǀ dadhidhve ǀ taviṣīm ǀ yathā ǀ vida ǀ bṛhat ǀ mahāntaḥ ǀ urviyā ǀ vi ǀ rājatha ǀ
uta ǀ antarikṣam ǀ mamire ǀ vi ǀ ojasā ǀ śubham ǀ yātām ǀ anu ǀ rathāḥ ǀ avṛtsata ǁ
05.055.03 (Mandala. Sukta. Rik)
4.3.17.03 (Ashtaka. Adhyaya. Varga. Rik)
05.04.107 (Mandala. Anuvāka. Rik)
Samhita Devanagari Accented
सा॒कं जा॒ताः सु॒भ्वः॑ सा॒कमु॑क्षि॒ताः श्रि॒ये चि॒दा प्र॑त॒रं वा॑वृधु॒र्नरः॑ ।
वि॒रो॒किणः॒ सूर्य॑स्येव र॒श्मयः॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
साकं जाताः सुभ्वः साकमुक्षिताः श्रिये चिदा प्रतरं वावृधुर्नरः ।
विरोकिणः सूर्यस्येव रश्मयः शुभं यातामनु रथा अवृत्सत ॥
Samhita Transcription Accented
sākám jātā́ḥ subhváḥ sākámukṣitā́ḥ śriyé cidā́ pratarám vāvṛdhurnáraḥ ǀ
virokíṇaḥ sū́ryasyeva raśmáyaḥ śúbham yātā́mánu ráthā avṛtsata ǁ
Samhita Transcription Nonaccented
sākam jātāḥ subhvaḥ sākamukṣitāḥ śriye cidā prataram vāvṛdhurnaraḥ ǀ
virokiṇaḥ sūryasyeva raśmayaḥ śubham yātāmanu rathā avṛtsata ǁ
Padapatha Devanagari Accented
सा॒कम् । जा॒ताः । सु॒ऽभ्वः॑ । सा॒कम् । उ॒क्षि॒ताः । श्रि॒ये । चि॒त् । आ । प्र॒ऽत॒रम् । व॒वृ॒धुः॒ । नरः॑ ।
वि॒ऽरो॒किणः॑ । सूर्य॑स्यऽइव । र॒श्मयः॑ । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
साकम् । जाताः । सुऽभ्वः । साकम् । उक्षिताः । श्रिये । चित् । आ । प्रऽतरम् । ववृधुः । नरः ।
विऽरोकिणः । सूर्यस्यऽइव । रश्मयः । शुभम् । याताम् । अनु । रथाः । अवृत्सत ॥
Padapatha Transcription Accented
sākám ǀ jātā́ḥ ǀ su-bhváḥ ǀ sākám ǀ ukṣitā́ḥ ǀ śriyé ǀ cit ǀ ā́ ǀ pra-tarám ǀ vavṛdhuḥ ǀ náraḥ ǀ
vi-rokíṇaḥ ǀ sū́ryasya-iva ǀ raśmáyaḥ ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
sākam ǀ jātāḥ ǀ su-bhvaḥ ǀ sākam ǀ ukṣitāḥ ǀ śriye ǀ cit ǀ ā ǀ pra-taram ǀ vavṛdhuḥ ǀ naraḥ ǀ
vi-rokiṇaḥ ǀ sūryasya-iva ǀ raśmayaḥ ǀ śubham ǀ yātām ǀ anu ǀ rathāḥ ǀ avṛtsata ǁ
05.055.04 (Mandala. Sukta. Rik)
4.3.17.04 (Ashtaka. Adhyaya. Varga. Rik)
05.04.108 (Mandala. Anuvāka. Rik)
Samhita Devanagari Accented
आ॒भू॒षेण्यं॑ वो मरुतो महित्व॒नं दि॑दृ॒क्षेण्यं॒ सूर्य॑स्येव॒ चक्ष॑णं ।
उ॒तो अ॒स्माँ अ॑मृत॒त्वे द॑धातन॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
आभूषेण्यं वो मरुतो महित्वनं दिदृक्षेण्यं सूर्यस्येव चक्षणं ।
उतो अस्माँ अमृतत्वे दधातन शुभं यातामनु रथा अवृत्सत ॥
Samhita Transcription Accented
ābhūṣéṇyam vo maruto mahitvanám didṛkṣéṇyam sū́ryasyeva cákṣaṇam ǀ
utó asmā́m̐ amṛtatvé dadhātana śúbham yātā́mánu ráthā avṛtsata ǁ
Samhita Transcription Nonaccented
ābhūṣeṇyam vo maruto mahitvanam didṛkṣeṇyam sūryasyeva cakṣaṇam ǀ
uto asmām̐ amṛtatve dadhātana śubham yātāmanu rathā avṛtsata ǁ
Padapatha Devanagari Accented
आ॒ऽभू॒षेण्य॑म् । वः॒ । म॒रु॒तः॒ । म॒हि॒ऽत्व॒नम् । दि॒दृ॒क्षेण्य॑म् । सूर्य॑स्यऽइव । चक्ष॑णम् ।
उ॒तो इति॑ । अ॒स्मान् । अ॒मृ॒त॒ऽत्वे । द॒धा॒त॒न॒ । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
आऽभूषेण्यम् । वः । मरुतः । महिऽत्वनम् । दिदृक्षेण्यम् । सूर्यस्यऽइव । चक्षणम् ।
उतो इति । अस्मान् । अमृतऽत्वे । दधातन । शुभम् । याताम् । अनु । रथाः । अवृत्सत ॥
Padapatha Transcription Accented
ā-bhūṣéṇyam ǀ vaḥ ǀ marutaḥ ǀ mahi-tvanám ǀ didṛkṣéṇyam ǀ sū́ryasya-iva ǀ cákṣaṇam ǀ
utó íti ǀ asmā́n ǀ amṛta-tvé ǀ dadhātana ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
ā-bhūṣeṇyam ǀ vaḥ ǀ marutaḥ ǀ mahi-tvanam ǀ didṛkṣeṇyam ǀ sūryasya-iva ǀ cakṣaṇam ǀ
uto iti ǀ asmān ǀ amṛta-tve ǀ dadhātana ǀ śubham ǀ yātām ǀ anu ǀ rathāḥ ǀ avṛtsata ǁ
05.055.05 (Mandala. Sukta. Rik)
4.3.17.05 (Ashtaka. Adhyaya. Varga. Rik)
05.04.109 (Mandala. Anuvāka. Rik)
Samhita Devanagari Accented
उदी॑रयथा मरुतः समुद्र॒तो यू॒यं वृ॒ष्टिं व॑र्षयथा पुरीषिणः ।
न वो॑ दस्रा॒ उप॑ दस्यंति धे॒नवः॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
उदीरयथा मरुतः समुद्रतो यूयं वृष्टिं वर्षयथा पुरीषिणः ।
न वो दस्रा उप दस्यंति धेनवः शुभं यातामनु रथा अवृत्सत ॥
Samhita Transcription Accented
údīrayathā marutaḥ samudrató yūyám vṛṣṭím varṣayathā purīṣiṇaḥ ǀ
ná vo dasrā úpa dasyanti dhenávaḥ śúbham yātā́mánu ráthā avṛtsata ǁ
Samhita Transcription Nonaccented
udīrayathā marutaḥ samudrato yūyam vṛṣṭim varṣayathā purīṣiṇaḥ ǀ
na vo dasrā upa dasyanti dhenavaḥ śubham yātāmanu rathā avṛtsata ǁ
Padapatha Devanagari Accented
उत् । ई॒र॒य॒थ॒ । म॒रु॒तः॒ । स॒मु॒द्र॒तः । यू॒यम् । वृ॒ष्टिम् । व॒र्ष॒य॒थ॒ । पु॒री॒षि॒णः॒ ।
न । वः॒ । द॒स्राः॒ । उप॑ । द॒स्य॒न्ति॒ । धे॒नवः॑ । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
उत् । ईरयथ । मरुतः । समुद्रतः । यूयम् । वृष्टिम् । वर्षयथ । पुरीषिणः ।
न । वः । दस्राः । उप । दस्यन्ति । धेनवः । शुभम् । याताम् । अनु । रथाः । अवृत्सत ॥
Padapatha Transcription Accented
út ǀ īrayatha ǀ marutaḥ ǀ samudratáḥ ǀ yūyám ǀ vṛṣṭím ǀ varṣayatha ǀ purīṣiṇaḥ ǀ
ná ǀ vaḥ ǀ dasrāḥ ǀ úpa ǀ dasyanti ǀ dhenávaḥ ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
ut ǀ īrayatha ǀ marutaḥ ǀ samudrataḥ ǀ yūyam ǀ vṛṣṭim ǀ varṣayatha ǀ purīṣiṇaḥ ǀ
na ǀ vaḥ ǀ dasrāḥ ǀ upa ǀ dasyanti ǀ dhenavaḥ ǀ śubham ǀ yātām ǀ anu ǀ rathāḥ ǀ avṛtsata ǁ
05.055.06 (Mandala. Sukta. Rik)
4.3.18.01 (Ashtaka. Adhyaya. Varga. Rik)
05.04.110 (Mandala. Anuvāka. Rik)
Samhita Devanagari Accented
यदश्वां॑धू॒र्षु पृष॑ती॒रयु॑ग्ध्वं हिर॒ण्यया॒न्प्रत्यत्काँ॒ अमु॑ग्ध्वं ।
विश्वा॒ इत्स्पृधो॑ मरुतो॒ व्य॑स्यथ॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
यदश्वांधूर्षु पृषतीरयुग्ध्वं हिरण्ययान्प्रत्यत्काँ अमुग्ध्वं ।
विश्वा इत्स्पृधो मरुतो व्यस्यथ शुभं यातामनु रथा अवृत्सत ॥
Samhita Transcription Accented
yádáśvāndhūrṣú pṛ́ṣatīráyugdhvam hiraṇyáyānprátyátkām̐ ámugdhvam ǀ
víśvā ítspṛ́dho maruto vyásyatha śúbham yātā́mánu ráthā avṛtsata ǁ
Samhita Transcription Nonaccented
yadaśvāndhūrṣu pṛṣatīrayugdhvam hiraṇyayānpratyatkām̐ amugdhvam ǀ
viśvā itspṛdho maruto vyasyatha śubham yātāmanu rathā avṛtsata ǁ
Padapatha Devanagari Accented
यत् । अश्वा॑न् । धूः॒ऽसु । पृष॑तीः । अयु॑ग्ध्वम् । हि॒र॒ण्यया॑न् । प्रति॑ । अत्का॑न् । अमु॑ग्ध्वम् ।
विश्वाः॑ । इत् । स्पृधः॑ । म॒रु॒तः॒ । वि । अ॒स्य॒थ॒ । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
यत् । अश्वान् । धूःऽसु । पृषतीः । अयुग्ध्वम् । हिरण्ययान् । प्रति । अत्कान् । अमुग्ध्वम् ।
विश्वाः । इत् । स्पृधः । मरुतः । वि । अस्यथ । शुभम् । याताम् । अनु । रथाः । अवृत्सत ॥
Padapatha Transcription Accented
yát ǀ áśvān ǀ dhūḥ-sú ǀ pṛ́ṣatīḥ ǀ áyugdhvam ǀ hiraṇyáyān ǀ práti ǀ átkān ǀ ámugdhvam ǀ
víśvāḥ ǀ ít ǀ spṛ́dhaḥ ǀ marutaḥ ǀ ví ǀ asyatha ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
yat ǀ aśvān ǀ dhūḥ-su ǀ pṛṣatīḥ ǀ ayugdhvam ǀ hiraṇyayān ǀ prati ǀ atkān ǀ amugdhvam ǀ
viśvāḥ ǀ it ǀ spṛdhaḥ ǀ marutaḥ ǀ vi ǀ asyatha ǀ śubham ǀ yātām ǀ anu ǀ rathāḥ ǀ avṛtsata ǁ
05.055.07 (Mandala. Sukta. Rik)
4.3.18.02 (Ashtaka. Adhyaya. Varga. Rik)
05.04.111 (Mandala. Anuvāka. Rik)
Samhita Devanagari Accented
न पर्व॑ता॒ न न॒द्यो॑ वरंत वो॒ यत्राचि॑ध्वं मरुतो॒ गच्छ॒थेदु॒ तत् ।
उ॒त द्यावा॑पृथि॒वी या॑थना॒ परि॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
न पर्वता न नद्यो वरंत वो यत्राचिध्वं मरुतो गच्छथेदु तत् ।
उत द्यावापृथिवी याथना परि शुभं यातामनु रथा अवृत्सत ॥
Samhita Transcription Accented
ná párvatā ná nadyó varanta vo yátrā́cidhvam maruto gácchathédu tát ǀ
utá dyā́vāpṛthivī́ yāthanā pári śúbham yātā́mánu ráthā avṛtsata ǁ
Samhita Transcription Nonaccented
na parvatā na nadyo varanta vo yatrācidhvam maruto gacchathedu tat ǀ
uta dyāvāpṛthivī yāthanā pari śubham yātāmanu rathā avṛtsata ǁ
Padapatha Devanagari Accented
न । पर्व॑ताः । न । न॒द्यः॑ । व॒र॒न्त॒ । वः॒ । यत्र॑ । अचि॑ध्वम् । म॒रु॒तः॒ । गच्छ॑थ । इत् । ऊं॒ इति॑ । तत् ।
उ॒त । द्यावा॑पृथि॒वी इति॑ । या॒थ॒न॒ । परि॑ । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
न । पर्वताः । न । नद्यः । वरन्त । वः । यत्र । अचिध्वम् । मरुतः । गच्छथ । इत् । ऊं इति । तत् ।
उत । द्यावापृथिवी इति । याथन । परि । शुभम् । याताम् । अनु । रथाः । अवृत्सत ॥
Padapatha Transcription Accented
ná ǀ párvatāḥ ǀ ná ǀ nadyáḥ ǀ varanta ǀ vaḥ ǀ yátra ǀ ácidhvam ǀ marutaḥ ǀ gácchatha ǀ ít ǀ ūṃ íti ǀ tát ǀ
utá ǀ dyā́vāpṛthivī́ íti ǀ yāthana ǀ pári ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
na ǀ parvatāḥ ǀ na ǀ nadyaḥ ǀ varanta ǀ vaḥ ǀ yatra ǀ acidhvam ǀ marutaḥ ǀ gacchatha ǀ it ǀ ūṃ iti ǀ tat ǀ
uta ǀ dyāvāpṛthivī iti ǀ yāthana ǀ pari ǀ śubham ǀ yātām ǀ anu ǀ rathāḥ ǀ avṛtsata ǁ
05.055.08 (Mandala. Sukta. Rik)
4.3.18.03 (Ashtaka. Adhyaya. Varga. Rik)
05.04.112 (Mandala. Anuvāka. Rik)
Samhita Devanagari Accented
यत्पू॒र्व्यं म॑रुतो॒ यच्च॒ नूत॑नं॒ यदु॒द्यते॑ वसवो॒ यच्च॑ श॒स्यते॑ ।
विश्व॑स्य॒ तस्य॑ भवथा॒ नवे॑दसः॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
यत्पूर्व्यं मरुतो यच्च नूतनं यदुद्यते वसवो यच्च शस्यते ।
विश्वस्य तस्य भवथा नवेदसः शुभं यातामनु रथा अवृत्सत ॥
Samhita Transcription Accented
yátpūrvyám maruto yácca nū́tanam yádudyáte vasavo yácca śasyáte ǀ
víśvasya tásya bhavathā návedasaḥ śúbham yātā́mánu ráthā avṛtsata ǁ
Samhita Transcription Nonaccented
yatpūrvyam maruto yacca nūtanam yadudyate vasavo yacca śasyate ǀ
viśvasya tasya bhavathā navedasaḥ śubham yātāmanu rathā avṛtsata ǁ
Padapatha Devanagari Accented
यत् । पू॒र्व्यम् । म॒रु॒तः॒ । यत् । च॒ । नूत॑नम् । यत् । उ॒द्यते॑ । व॒स॒वः॒ । यत् । च॒ । श॒स्यते॑ ।
विश्व॑स्य । तस्य॑ । भ॒व॒थ॒ । नवे॑दसः । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
यत् । पूर्व्यम् । मरुतः । यत् । च । नूतनम् । यत् । उद्यते । वसवः । यत् । च । शस्यते ।
विश्वस्य । तस्य । भवथ । नवेदसः । शुभम् । याताम् । अनु । रथाः । अवृत्सत ॥
Padapatha Transcription Accented
yát ǀ pūrvyám ǀ marutaḥ ǀ yát ǀ ca ǀ nū́tanam ǀ yát ǀ udyáte ǀ vasavaḥ ǀ yát ǀ ca ǀ śasyáte ǀ
víśvasya ǀ tásya ǀ bhavatha ǀ návedasaḥ ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
yat ǀ pūrvyam ǀ marutaḥ ǀ yat ǀ ca ǀ nūtanam ǀ yat ǀ udyate ǀ vasavaḥ ǀ yat ǀ ca ǀ śasyate ǀ
viśvasya ǀ tasya ǀ bhavatha ǀ navedasaḥ ǀ śubham ǀ yātām ǀ anu ǀ rathāḥ ǀ avṛtsata ǁ
05.055.09 (Mandala. Sukta. Rik)
4.3.18.04 (Ashtaka. Adhyaya. Varga. Rik)
05.04.113 (Mandala. Anuvāka. Rik)
Samhita Devanagari Accented
मृ॒ळत॑ नो मरुतो॒ मा व॑धिष्टना॒स्मभ्यं॒ शर्म॑ बहु॒लं वि यं॑तन ।
अधि॑ स्तो॒त्रस्य॑ स॒ख्यस्य॑ गातन॒ शुभं॑ या॒तामनु॒ रथा॑ अवृत्सत ॥
Samhita Devanagari Nonaccented
मृळत नो मरुतो मा वधिष्टनास्मभ्यं शर्म बहुलं वि यंतन ।
अधि स्तोत्रस्य सख्यस्य गातन शुभं यातामनु रथा अवृत्सत ॥
Samhita Transcription Accented
mṛḷáta no maruto mā́ vadhiṣṭanāsmábhyam śárma bahulám ví yantana ǀ
ádhi stotrásya sakhyásya gātana śúbham yātā́mánu ráthā avṛtsata ǁ
Samhita Transcription Nonaccented
mṛḷata no maruto mā vadhiṣṭanāsmabhyam śarma bahulam vi yantana ǀ
adhi stotrasya sakhyasya gātana śubham yātāmanu rathā avṛtsata ǁ
Padapatha Devanagari Accented
मृ॒ळत॑ । नः॒ । म॒रु॒तः॒ । मा । व॒धि॒ष्ट॒न॒ । अ॒स्मभ्य॑म् । शर्म॑ । ब॒हु॒लम् । वि । य॒न्त॒न॒ ।
अधि॑ । स्तो॒त्रस्य॑ । स॒ख्यस्य॑ । गा॒त॒न॒ । शुभ॑म् । या॒ताम् । अनु॑ । रथाः॑ । अ॒वृ॒त्स॒त॒ ॥
Padapatha Devanagari Nonaccented
मृळत । नः । मरुतः । मा । वधिष्टन । अस्मभ्यम् । शर्म । बहुलम् । वि । यन्तन ।
अधि । स्तोत्रस्य । सख्यस्य । गातन । शुभम् । याताम् । अनु । रथाः । अवृत्सत ॥
Padapatha Transcription Accented
mṛḷáta ǀ naḥ ǀ marutaḥ ǀ mā́ ǀ vadhiṣṭana ǀ asmábhyam ǀ śárma ǀ bahulám ǀ ví ǀ yantana ǀ
ádhi ǀ stotrásya ǀ sakhyásya ǀ gātana ǀ śúbham ǀ yātā́m ǀ ánu ǀ ráthāḥ ǀ avṛtsata ǁ
Padapatha Transcription Nonaccented
mṛḷata ǀ naḥ ǀ marutaḥ ǀ mā ǀ vadhiṣṭana ǀ asmabhyam ǀ śarma ǀ bahulam ǀ vi ǀ yantana ǀ
adhi ǀ stotrasya ǀ sakhyasya ǀ gātana ǀ śubham ǀ yātām ǀ anu ǀ rathāḥ ǀ avṛtsata ǁ
05.055.10 (Mandala. Sukta. Rik)
4.3.18.05 (Ashtaka. Adhyaya. Varga. Rik)
05.04.114 (Mandala. Anuvāka. Rik)
Samhita Devanagari Accented
यू॒यम॒स्मान्न॑यत॒ वस्यो॒ अच्छा॒ निरं॑ह॒तिभ्यो॑ मरुतो गृणा॒नाः ।
जु॒षध्वं॑ नो ह॒व्यदा॑तिं यजत्रा व॒यं स्या॑म॒ पत॑यो रयी॒णां ॥
Samhita Devanagari Nonaccented
यूयमस्मान्नयत वस्यो अच्छा निरंहतिभ्यो मरुतो गृणानाः ।
जुषध्वं नो हव्यदातिं यजत्रा वयं स्याम पतयो रयीणां ॥
Samhita Transcription Accented
yūyámasmā́nnayata vásyo ácchā níraṃhatíbhyo maruto gṛṇānā́ḥ ǀ
juṣádhvam no havyádātim yajatrā vayám syāma pátayo rayīṇā́m ǁ
Samhita Transcription Nonaccented
yūyamasmānnayata vasyo acchā niraṃhatibhyo maruto gṛṇānāḥ ǀ
juṣadhvam no havyadātim yajatrā vayam syāma patayo rayīṇām ǁ
Padapatha Devanagari Accented
यू॒यम् । अ॒स्मान् । न॒य॒त॒ । वस्यः॑ । अच्छ॑ । निः । अं॒ह॒तिऽभ्यः॑ । म॒रु॒तः॒ । गृ॒णा॒नाः ।
जु॒षध्व॑म् । नः॒ । ह॒व्यऽदा॑तिम् । य॒ज॒त्राः॒ । व॒यम् । स्या॒म॒ । पत॑यः । र॒यी॒णाम् ॥
Padapatha Devanagari Nonaccented
यूयम् । अस्मान् । नयत । वस्यः । अच्छ । निः । अंहतिऽभ्यः । मरुतः । गृणानाः ।
जुषध्वम् । नः । हव्यऽदातिम् । यजत्राः । वयम् । स्याम । पतयः । रयीणाम् ॥
Padapatha Transcription Accented
yūyám ǀ asmā́n ǀ nayata ǀ vásyaḥ ǀ áccha ǀ níḥ ǀ aṃhatí-bhyaḥ ǀ marutaḥ ǀ gṛṇānā́ḥ ǀ
juṣádhvam ǀ naḥ ǀ havyá-dātim ǀ yajatrāḥ ǀ vayám ǀ syāma ǀ pátayaḥ ǀ rayīṇā́m ǁ
Padapatha Transcription Nonaccented
yūyam ǀ asmān ǀ nayata ǀ vasyaḥ ǀ accha ǀ niḥ ǀ aṃhati-bhyaḥ ǀ marutaḥ ǀ gṛṇānāḥ ǀ
juṣadhvam ǀ naḥ ǀ havya-dātim ǀ yajatrāḥ ǀ vayam ǀ syāma ǀ patayaḥ ǀ rayīṇām ǁ