|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 61
|
1. Info |
| To: | 1-4, 11-16: maruts; 5-8: śaśīyasī tarantamahiṣī; 9: purumīḷha vaidadaśvī; 10: taranto vaidadaśviḥ; 17-19: rathavīti dārbhya |
|
| From: | śyāvāśva ātreya | |
| Metres: | 1st set of styles: gāyatrī (1-4, 6-8, 10-19); anuṣṭup (5, 9) 2nd set of styles: gāyatrī (1-4, 6-8, 10-19); anuṣṭubh (5); satobṛhatī (9) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.061.01 (Mandala. Sukta. Rik)
4.3.26.01 (Ashtaka. Adhyaya. Varga. Rik)
05.05.033 (Mandala. Anuvāka. Rik)
Samhita Devanagari Accented
के ष्ठा॑ नरः॒ श्रेष्ठ॑तमा॒ य एक॑एक आय॒य ।
प॒र॒मस्याः॑ परा॒वतः॑ ॥
Samhita Devanagari Nonaccented
के ष्ठा नरः श्रेष्ठतमा य एकएक आयय ।
परमस्याः परावतः ॥
Samhita Transcription Accented
ké ṣṭhā naraḥ śréṣṭhatamā yá ékaeka āyayá ǀ
paramásyāḥ parāvátaḥ ǁ
Samhita Transcription Nonaccented
ke ṣṭhā naraḥ śreṣṭhatamā ya ekaeka āyaya ǀ
paramasyāḥ parāvataḥ ǁ
Padapatha Devanagari Accented
के । स्थ॒ । न॒रः॒ । श्रेष्ठ॑ऽतमाः । ये । एकः॑ऽएकः । आ॒ऽय॒य ।
प॒र॒मस्याः॑ । प॒रा॒ऽवतः॑ ॥
Padapatha Devanagari Nonaccented
के । स्थ । नरः । श्रेष्ठऽतमाः । ये । एकःऽएकः । आऽयय ।
परमस्याः । पराऽवतः ॥
Padapatha Transcription Accented
ké ǀ stha ǀ naraḥ ǀ śréṣṭha-tamāḥ ǀ yé ǀ ékaḥ-ekaḥ ǀ ā-yayá ǀ
paramásyāḥ ǀ parā-vátaḥ ǁ
Padapatha Transcription Nonaccented
ke ǀ stha ǀ naraḥ ǀ śreṣṭha-tamāḥ ǀ ye ǀ ekaḥ-ekaḥ ǀ ā-yaya ǀ
paramasyāḥ ǀ parā-vataḥ ǁ
05.061.02 (Mandala. Sukta. Rik)
4.3.26.02 (Ashtaka. Adhyaya. Varga. Rik)
05.05.034 (Mandala. Anuvāka. Rik)
Samhita Devanagari Accented
क्व१॒॑ वोऽश्वाः॒ क्वा॒३॒॑भीश॑वः क॒थं शे॑क क॒था य॑य ।
पृ॒ष्ठे सदो॑ न॒सोर्यमः॑ ॥
Samhita Devanagari Nonaccented
क्व वोऽश्वाः क्वाभीशवः कथं शेक कथा यय ।
पृष्ठे सदो नसोर्यमः ॥
Samhita Transcription Accented
kvá vó’śvāḥ kvā́bhī́śavaḥ kathám śeka kathā́ yaya ǀ
pṛṣṭhé sádo nasóryámaḥ ǁ
Samhita Transcription Nonaccented
kva vo’śvāḥ kvābhīśavaḥ katham śeka kathā yaya ǀ
pṛṣṭhe sado nasoryamaḥ ǁ
Padapatha Devanagari Accented
क्व॑ । वः॒ । अश्वाः॑ । क्व॑ । अ॒भीश॑वः । क॒थम् । शे॒क॒ । क॒था । य॒य॒ ।
पृ॒ष्ठे । सदः॑ । न॒सोः । यमः॑ ॥
Padapatha Devanagari Nonaccented
क्व । वः । अश्वाः । क्व । अभीशवः । कथम् । शेक । कथा । यय ।
पृष्ठे । सदः । नसोः । यमः ॥
Padapatha Transcription Accented
kvá ǀ vaḥ ǀ áśvāḥ ǀ kvá ǀ abhī́śavaḥ ǀ kathám ǀ śeka ǀ kathā́ ǀ yaya ǀ
pṛṣṭhé ǀ sádaḥ ǀ nasóḥ ǀ yámaḥ ǁ
Padapatha Transcription Nonaccented
kva ǀ vaḥ ǀ aśvāḥ ǀ kva ǀ abhīśavaḥ ǀ katham ǀ śeka ǀ kathā ǀ yaya ǀ
pṛṣṭhe ǀ sadaḥ ǀ nasoḥ ǀ yamaḥ ǁ
05.061.03 (Mandala. Sukta. Rik)
4.3.26.03 (Ashtaka. Adhyaya. Varga. Rik)
05.05.035 (Mandala. Anuvāka. Rik)
Samhita Devanagari Accented
ज॒घने॒ चोद॑ एषां॒ वि स॒क्थानि॒ नरो॑ यमुः ।
पु॒त्र॒कृ॒थे न जन॑यः ॥
Samhita Devanagari Nonaccented
जघने चोद एषां वि सक्थानि नरो यमुः ।
पुत्रकृथे न जनयः ॥
Samhita Transcription Accented
jagháne códa eṣām ví sakthā́ni náro yamuḥ ǀ
putrakṛthé ná jánayaḥ ǁ
Samhita Transcription Nonaccented
jaghane coda eṣām vi sakthāni naro yamuḥ ǀ
putrakṛthe na janayaḥ ǁ
Padapatha Devanagari Accented
ज॒घने॑ । चोदः॑ । ए॒षा॒म् । वि । स॒क्थानि॑ । नरः॑ । य॒मुः॒ ।
पु॒त्र॒ऽकृ॒थे । न । जन॑यः ॥
Padapatha Devanagari Nonaccented
जघने । चोदः । एषाम् । वि । सक्थानि । नरः । यमुः ।
पुत्रऽकृथे । न । जनयः ॥
Padapatha Transcription Accented
jagháne ǀ códaḥ ǀ eṣām ǀ ví ǀ sakthā́ni ǀ náraḥ ǀ yamuḥ ǀ
putra-kṛthé ǀ ná ǀ jánayaḥ ǁ
Padapatha Transcription Nonaccented
jaghane ǀ codaḥ ǀ eṣām ǀ vi ǀ sakthāni ǀ naraḥ ǀ yamuḥ ǀ
putra-kṛthe ǀ na ǀ janayaḥ ǁ
05.061.04 (Mandala. Sukta. Rik)
4.3.26.04 (Ashtaka. Adhyaya. Varga. Rik)
05.05.036 (Mandala. Anuvāka. Rik)
Samhita Devanagari Accented
परा॑ वीरास एतन॒ मर्या॑सो॒ भद्र॑जानयः ।
अ॒ग्नि॒तपो॒ यथास॑थ ॥
Samhita Devanagari Nonaccented
परा वीरास एतन मर्यासो भद्रजानयः ।
अग्नितपो यथासथ ॥
Samhita Transcription Accented
párā vīrāsa etana máryāso bhádrajānayaḥ ǀ
agnitápo yáthā́satha ǁ
Samhita Transcription Nonaccented
parā vīrāsa etana maryāso bhadrajānayaḥ ǀ
agnitapo yathāsatha ǁ
Padapatha Devanagari Accented
परा॑ । वी॒रा॒सः॒ । इ॒त॒न॒ । मर्या॑सः । भद्र॑ऽजानयः ।
अ॒ग्नि॒ऽतपः॑ । यथा॑ । अस॑थ ॥
Padapatha Devanagari Nonaccented
परा । वीरासः । इतन । मर्यासः । भद्रऽजानयः ।
अग्निऽतपः । यथा । असथ ॥
Padapatha Transcription Accented
párā ǀ vīrāsaḥ ǀ itana ǀ máryāsaḥ ǀ bhádra-jānayaḥ ǀ
agni-tápaḥ ǀ yáthā ǀ ásatha ǁ
Padapatha Transcription Nonaccented
parā ǀ vīrāsaḥ ǀ itana ǀ maryāsaḥ ǀ bhadra-jānayaḥ ǀ
agni-tapaḥ ǀ yathā ǀ asatha ǁ
05.061.05 (Mandala. Sukta. Rik)
4.3.26.05 (Ashtaka. Adhyaya. Varga. Rik)
05.05.037 (Mandala. Anuvāka. Rik)
Samhita Devanagari Accented
सन॒त्साश्व्यं॑ प॒शुमु॒त गव्यं॑ श॒ताव॑यं ।
श्या॒वाश्व॑स्तुताय॒ या दोर्वी॒रायो॑प॒बर्बृ॑हत् ॥
Samhita Devanagari Nonaccented
सनत्साश्व्यं पशुमुत गव्यं शतावयं ।
श्यावाश्वस्तुताय या दोर्वीरायोपबर्बृहत् ॥
Samhita Transcription Accented
sánatsā́śvyam paśúmutá gávyam śatā́vayam ǀ
śyāvā́śvastutāya yā́ dórvīrā́yopabárbṛhat ǁ
Samhita Transcription Nonaccented
sanatsāśvyam paśumuta gavyam śatāvayam ǀ
śyāvāśvastutāya yā dorvīrāyopabarbṛhat ǁ
Padapatha Devanagari Accented
सन॑त् । सा । अश्व्य॑म् । प॒शुम् । उ॒त । गव्य॑म् । श॒तऽअ॑वयम् ।
श्या॒वाश्व॑ऽस्तुताय । या । दोः । वी॒राय॑ । उ॒प॒ऽबर्बृ॑हत् ॥
Padapatha Devanagari Nonaccented
सनत् । सा । अश्व्यम् । पशुम् । उत । गव्यम् । शतऽअवयम् ।
श्यावाश्वऽस्तुताय । या । दोः । वीराय । उपऽबर्बृहत् ॥
Padapatha Transcription Accented
sánat ǀ sā́ ǀ áśvyam ǀ paśúm ǀ utá ǀ gávyam ǀ śatá-avayam ǀ
śyāvā́śva-stutāya ǀ yā́ ǀ dóḥ ǀ vīrā́ya ǀ upa-bárbṛhat ǁ
Padapatha Transcription Nonaccented
sanat ǀ sā ǀ aśvyam ǀ paśum ǀ uta ǀ gavyam ǀ śata-avayam ǀ
śyāvāśva-stutāya ǀ yā ǀ doḥ ǀ vīrāya ǀ upa-barbṛhat ǁ
05.061.06 (Mandala. Sukta. Rik)
4.3.27.01 (Ashtaka. Adhyaya. Varga. Rik)
05.05.038 (Mandala. Anuvāka. Rik)
Samhita Devanagari Accented
उ॒त त्वा॒ स्त्री शशी॑यसी पुं॒सो भ॑वति॒ वस्य॑सी ।
अदे॑वत्रादरा॒धसः॑ ॥
Samhita Devanagari Nonaccented
उत त्वा स्त्री शशीयसी पुंसो भवति वस्यसी ।
अदेवत्रादराधसः ॥
Samhita Transcription Accented
utá tvā strī́ śáśīyasī puṃsó bhavati vásyasī ǀ
ádevatrādarādhásaḥ ǁ
Samhita Transcription Nonaccented
uta tvā strī śaśīyasī puṃso bhavati vasyasī ǀ
adevatrādarādhasaḥ ǁ
Padapatha Devanagari Accented
उ॒त । त्वा॒ । स्त्री । शशी॑यसी । पुं॒सः । भ॒व॒ति॒ । वस्य॑सी ।
अदे॑वऽत्रात् । अ॒रा॒धसः॑ ॥
Padapatha Devanagari Nonaccented
उत । त्वा । स्त्री । शशीयसी । पुंसः । भवति । वस्यसी ।
अदेवऽत्रात् । अराधसः ॥
Padapatha Transcription Accented
utá ǀ tvā ǀ strī́ ǀ śáśīyasī ǀ puṃsáḥ ǀ bhavati ǀ vásyasī ǀ
ádeva-trāt ǀ arādhásaḥ ǁ
Padapatha Transcription Nonaccented
uta ǀ tvā ǀ strī ǀ śaśīyasī ǀ puṃsaḥ ǀ bhavati ǀ vasyasī ǀ
adeva-trāt ǀ arādhasaḥ ǁ
05.061.07 (Mandala. Sukta. Rik)
4.3.27.02 (Ashtaka. Adhyaya. Varga. Rik)
05.05.039 (Mandala. Anuvāka. Rik)
Samhita Devanagari Accented
वि या जा॒नाति॒ जसु॑रिं॒ वि तृष्यं॑तं॒ वि का॒मिनं॑ ।
दे॒व॒त्रा कृ॑णु॒ते मनः॑ ॥
Samhita Devanagari Nonaccented
वि या जानाति जसुरिं वि तृष्यंतं वि कामिनं ।
देवत्रा कृणुते मनः ॥
Samhita Transcription Accented
ví yā́ jānā́ti jásurim ví tṛ́ṣyantam ví kāmínam ǀ
devatrā́ kṛṇuté mánaḥ ǁ
Samhita Transcription Nonaccented
vi yā jānāti jasurim vi tṛṣyantam vi kāminam ǀ
devatrā kṛṇute manaḥ ǁ
Padapatha Devanagari Accented
वि । या । जा॒नाति॑ । जसु॑रिम् । वि । तृष्य॑न्तम् । वि । का॒मिन॑म् ।
दे॒व॒ऽत्रा । कृ॒णु॒ते । मनः॑ ॥
Padapatha Devanagari Nonaccented
वि । या । जानाति । जसुरिम् । वि । तृष्यन्तम् । वि । कामिनम् ।
देवऽत्रा । कृणुते । मनः ॥
Padapatha Transcription Accented
ví ǀ yā́ ǀ jānā́ti ǀ jásurim ǀ ví ǀ tṛ́ṣyantam ǀ ví ǀ kāmínam ǀ
deva-trā́ ǀ kṛṇuté ǀ mánaḥ ǁ
Padapatha Transcription Nonaccented
vi ǀ yā ǀ jānāti ǀ jasurim ǀ vi ǀ tṛṣyantam ǀ vi ǀ kāminam ǀ
deva-trā ǀ kṛṇute ǀ manaḥ ǁ
05.061.08 (Mandala. Sukta. Rik)
4.3.27.03 (Ashtaka. Adhyaya. Varga. Rik)
05.05.040 (Mandala. Anuvāka. Rik)
Samhita Devanagari Accented
उ॒त घा॒ नेमो॒ अस्तु॑तः॒ पुमाँ॒ इति॑ ब्रुवे प॒णिः ।
स वैर॑देय॒ इत्स॒मः ॥
Samhita Devanagari Nonaccented
उत घा नेमो अस्तुतः पुमाँ इति ब्रुवे पणिः ।
स वैरदेय इत्समः ॥
Samhita Transcription Accented
utá ghā némo ástutaḥ púmām̐ íti bruve paṇíḥ ǀ
sá váiradeya ítsamáḥ ǁ
Samhita Transcription Nonaccented
uta ghā nemo astutaḥ pumām̐ iti bruve paṇiḥ ǀ
sa vairadeya itsamaḥ ǁ
Padapatha Devanagari Accented
उ॒त । घ॒ । नेमः॑ । अस्तु॑तः । पुमा॑न् । इति॑ । ब्रु॒वे॒ । प॒णिः ।
सः । वैर॑ऽदेये । इत् । स॒मः ॥
Padapatha Devanagari Nonaccented
उत । घ । नेमः । अस्तुतः । पुमान् । इति । ब्रुवे । पणिः ।
सः । वैरऽदेये । इत् । समः ॥
Padapatha Transcription Accented
utá ǀ gha ǀ némaḥ ǀ ástutaḥ ǀ púmān ǀ íti ǀ bruve ǀ paṇíḥ ǀ
sáḥ ǀ váira-deye ǀ ít ǀ samáḥ ǁ
Padapatha Transcription Nonaccented
uta ǀ gha ǀ nemaḥ ǀ astutaḥ ǀ pumān ǀ iti ǀ bruve ǀ paṇiḥ ǀ
saḥ ǀ vaira-deye ǀ it ǀ samaḥ ǁ
05.061.09 (Mandala. Sukta. Rik)
4.3.27.04 (Ashtaka. Adhyaya. Varga. Rik)
05.05.041 (Mandala. Anuvāka. Rik)
Samhita Devanagari Accented
उ॒त मे॑ऽरपद्युव॒तिर्म॑मं॒दुषी॒ प्रति॑ श्या॒वाय॑ वर्त॒निं ।
वि रोहि॑ता पुरुमी॒ळ्हाय॑ येमतु॒र्विप्रा॑य दी॒र्घय॑शसे ॥
Samhita Devanagari Nonaccented
उत मेऽरपद्युवतिर्ममंदुषी प्रति श्यावाय वर्तनिं ।
वि रोहिता पुरुमीळ्हाय येमतुर्विप्राय दीर्घयशसे ॥
Samhita Transcription Accented
utá me’rapadyuvatírmamandúṣī práti śyāvā́ya vartaním ǀ
ví róhitā purumīḷhā́ya yematurvíprāya dīrgháyaśase ǁ
Samhita Transcription Nonaccented
uta me’rapadyuvatirmamanduṣī prati śyāvāya vartanim ǀ
vi rohitā purumīḷhāya yematurviprāya dīrghayaśase ǁ
Padapatha Devanagari Accented
उ॒त । मे॒ । अ॒र॒प॒त् । यु॒व॒तिः । म॒म॒न्दुषी॑ । प्रति॑ । श्या॒वाय॑ । व॒र्त॒निम् ।
वि । रोहि॑ता । पु॒रु॒ऽमी॒ळ्हाय॑ । ये॒म॒तुः॒ । विप्रा॑य । दी॒र्घऽय॑शसे ॥
Padapatha Devanagari Nonaccented
उत । मे । अरपत् । युवतिः । ममन्दुषी । प्रति । श्यावाय । वर्तनिम् ।
वि । रोहिता । पुरुऽमीळ्हाय । येमतुः । विप्राय । दीर्घऽयशसे ॥
Padapatha Transcription Accented
utá ǀ me ǀ arapat ǀ yuvatíḥ ǀ mamandúṣī ǀ práti ǀ śyāvā́ya ǀ vartaním ǀ
ví ǀ róhitā ǀ puru-mīḷhā́ya ǀ yematuḥ ǀ víprāya ǀ dīrghá-yaśase ǁ
Padapatha Transcription Nonaccented
uta ǀ me ǀ arapat ǀ yuvatiḥ ǀ mamanduṣī ǀ prati ǀ śyāvāya ǀ vartanim ǀ
vi ǀ rohitā ǀ puru-mīḷhāya ǀ yematuḥ ǀ viprāya ǀ dīrgha-yaśase ǁ
05.061.10 (Mandala. Sukta. Rik)
4.3.27.05 (Ashtaka. Adhyaya. Varga. Rik)
05.05.042 (Mandala. Anuvāka. Rik)
Samhita Devanagari Accented
यो मे॑ धेनू॒नां श॒तं वैद॑दश्वि॒र्यथा॒ दद॑त् ।
त॒रं॒त इ॑व मं॒हना॑ ॥
Samhita Devanagari Nonaccented
यो मे धेनूनां शतं वैददश्विर्यथा ददत् ।
तरंत इव मंहना ॥
Samhita Transcription Accented
yó me dhenūnā́m śatám váidadaśviryáthā dádat ǀ
tarantá iva maṃhánā ǁ
Samhita Transcription Nonaccented
yo me dhenūnām śatam vaidadaśviryathā dadat ǀ
taranta iva maṃhanā ǁ
Padapatha Devanagari Accented
यः । मे॒ । धे॒नू॒नाम् । श॒तम् । वैद॑त्ऽअश्विः । यथा॑ । दद॑त् ।
त॒र॒न्तःऽइ॑व । मं॒हना॑ ॥
Padapatha Devanagari Nonaccented
यः । मे । धेनूनाम् । शतम् । वैदत्ऽअश्विः । यथा । ददत् ।
तरन्तःऽइव । मंहना ॥
Padapatha Transcription Accented
yáḥ ǀ me ǀ dhenūnā́m ǀ śatám ǀ váidat-aśviḥ ǀ yáthā ǀ dádat ǀ
tarantáḥ-iva ǀ maṃhánā ǁ
Padapatha Transcription Nonaccented
yaḥ ǀ me ǀ dhenūnām ǀ śatam ǀ vaidat-aśviḥ ǀ yathā ǀ dadat ǀ
tarantaḥ-iva ǀ maṃhanā ǁ
05.061.11 (Mandala. Sukta. Rik)
4.3.28.01 (Ashtaka. Adhyaya. Varga. Rik)
05.05.043 (Mandala. Anuvāka. Rik)
Samhita Devanagari Accented
य ईं॒ वहं॑त आ॒शुभिः॒ पिबं॑तो मदि॒रं मधु॑ ।
अत्र॒ श्रवां॑सि दधिरे ॥
Samhita Devanagari Nonaccented
य ईं वहंत आशुभिः पिबंतो मदिरं मधु ।
अत्र श्रवांसि दधिरे ॥
Samhita Transcription Accented
yá īm váhanta āśúbhiḥ píbanto madirám mádhu ǀ
átra śrávāṃsi dadhire ǁ
Samhita Transcription Nonaccented
ya īm vahanta āśubhiḥ pibanto madiram madhu ǀ
atra śravāṃsi dadhire ǁ
Padapatha Devanagari Accented
ये । ई॒म् । वह॑न्ते । आ॒शुऽभिः॑ । पिब॑न्तः । म॒दि॒रम् । मधु॑ ।
अत्र॑ । श्रवां॑सि । द॒धि॒रे॒ ॥
Padapatha Devanagari Nonaccented
ये । ईम् । वहन्ते । आशुऽभिः । पिबन्तः । मदिरम् । मधु ।
अत्र । श्रवांसि । दधिरे ॥
Padapatha Transcription Accented
yé ǀ īm ǀ váhante ǀ āśú-bhiḥ ǀ píbantaḥ ǀ madirám ǀ mádhu ǀ
átra ǀ śrávāṃsi ǀ dadhire ǁ
Padapatha Transcription Nonaccented
ye ǀ īm ǀ vahante ǀ āśu-bhiḥ ǀ pibantaḥ ǀ madiram ǀ madhu ǀ
atra ǀ śravāṃsi ǀ dadhire ǁ
05.061.12 (Mandala. Sukta. Rik)
4.3.28.02 (Ashtaka. Adhyaya. Varga. Rik)
05.05.044 (Mandala. Anuvāka. Rik)
Samhita Devanagari Accented
येषां॑ श्रि॒याधि॒ रोद॑सी वि॒भ्राजं॑ते॒ रथे॒ष्वा ।
दि॒वि रु॒क्म इ॑वो॒परि॑ ॥
Samhita Devanagari Nonaccented
येषां श्रियाधि रोदसी विभ्राजंते रथेष्वा ।
दिवि रुक्म इवोपरि ॥
Samhita Transcription Accented
yéṣām śriyā́dhi ródasī vibhrā́jante rátheṣvā́ ǀ
diví rukmá ivopári ǁ
Samhita Transcription Nonaccented
yeṣām śriyādhi rodasī vibhrājante ratheṣvā ǀ
divi rukma ivopari ǁ
Padapatha Devanagari Accented
येषा॑म् । श्रि॒या । अधि॑ । रोद॑सी॒ इति॑ । वि॒ऽभ्राज॑न्ते । रथे॑षु । आ ।
दि॒वि । रु॒क्मःऽइ॑व । उ॒परि॑ ॥
Padapatha Devanagari Nonaccented
येषाम् । श्रिया । अधि । रोदसी इति । विऽभ्राजन्ते । रथेषु । आ ।
दिवि । रुक्मःऽइव । उपरि ॥
Padapatha Transcription Accented
yéṣām ǀ śriyā́ ǀ ádhi ǀ ródasī íti ǀ vi-bhrā́jante ǀ rátheṣu ǀ ā́ ǀ
diví ǀ rukmáḥ-iva ǀ upári ǁ
Padapatha Transcription Nonaccented
yeṣām ǀ śriyā ǀ adhi ǀ rodasī iti ǀ vi-bhrājante ǀ ratheṣu ǀ ā ǀ
divi ǀ rukmaḥ-iva ǀ upari ǁ
05.061.13 (Mandala. Sukta. Rik)
4.3.28.03 (Ashtaka. Adhyaya. Varga. Rik)
05.05.045 (Mandala. Anuvāka. Rik)
Samhita Devanagari Accented
युवा॒ स मारु॑तो ग॒णस्त्वे॒षर॑थो॒ अने॑द्यः ।
शु॒भं॒यावाप्र॑तिष्कुतः ॥
Samhita Devanagari Nonaccented
युवा स मारुतो गणस्त्वेषरथो अनेद्यः ।
शुभंयावाप्रतिष्कुतः ॥
Samhita Transcription Accented
yúvā sá mā́ruto gaṇástveṣáratho ánedyaḥ ǀ
śubhaṃyā́vā́pratiṣkutaḥ ǁ
Samhita Transcription Nonaccented
yuvā sa māruto gaṇastveṣaratho anedyaḥ ǀ
śubhaṃyāvāpratiṣkutaḥ ǁ
Padapatha Devanagari Accented
युवा॑ । सः । मारु॑तः । ग॒णः । त्वे॒षऽर॑थः । अने॑द्यः ।
शु॒भ॒म्ऽयावा॑ । अप्र॑तिऽस्कुतः ॥
Padapatha Devanagari Nonaccented
युवा । सः । मारुतः । गणः । त्वेषऽरथः । अनेद्यः ।
शुभम्ऽयावा । अप्रतिऽस्कुतः ॥
Padapatha Transcription Accented
yúvā ǀ sáḥ ǀ mā́rutaḥ ǀ gaṇáḥ ǀ tveṣá-rathaḥ ǀ ánedyaḥ ǀ
śubham-yā́vā ǀ áprati-skutaḥ ǁ
Padapatha Transcription Nonaccented
yuvā ǀ saḥ ǀ mārutaḥ ǀ gaṇaḥ ǀ tveṣa-rathaḥ ǀ anedyaḥ ǀ
śubham-yāvā ǀ aprati-skutaḥ ǁ
05.061.14 (Mandala. Sukta. Rik)
4.3.28.04 (Ashtaka. Adhyaya. Varga. Rik)
05.05.046 (Mandala. Anuvāka. Rik)
Samhita Devanagari Accented
को वे॑द नू॒नमे॑षां॒ यत्रा॒ मदं॑ति॒ धूत॑यः ।
ऋ॒तजा॑ता अरे॒पसः॑ ॥
Samhita Devanagari Nonaccented
को वेद नूनमेषां यत्रा मदंति धूतयः ।
ऋतजाता अरेपसः ॥
Samhita Transcription Accented
kó veda nūnámeṣām yátrā mádanti dhū́tayaḥ ǀ
ṛtájātā arepásaḥ ǁ
Samhita Transcription Nonaccented
ko veda nūnameṣām yatrā madanti dhūtayaḥ ǀ
ṛtajātā arepasaḥ ǁ
Padapatha Devanagari Accented
कः । वे॒द॒ । नू॒नम् । ए॒षा॒म् । यत्र॑ । मद॑न्ति । धूत॑यः ।
ऋ॒तऽजा॑ताः । अ॒रे॒पसः॑ ॥
Padapatha Devanagari Nonaccented
कः । वेद । नूनम् । एषाम् । यत्र । मदन्ति । धूतयः ।
ऋतऽजाताः । अरेपसः ॥
Padapatha Transcription Accented
káḥ ǀ veda ǀ nūnám ǀ eṣām ǀ yátra ǀ mádanti ǀ dhū́tayaḥ ǀ
ṛtá-jātāḥ ǀ arepásaḥ ǁ
Padapatha Transcription Nonaccented
kaḥ ǀ veda ǀ nūnam ǀ eṣām ǀ yatra ǀ madanti ǀ dhūtayaḥ ǀ
ṛta-jātāḥ ǀ arepasaḥ ǁ
05.061.15 (Mandala. Sukta. Rik)
4.3.28.05 (Ashtaka. Adhyaya. Varga. Rik)
05.05.047 (Mandala. Anuvāka. Rik)
Samhita Devanagari Accented
यू॒यं मर्तं॑ विपन्यवः प्रणे॒तार॑ इ॒त्था धि॒या ।
श्रोता॑रो॒ याम॑हूतिषु ॥
Samhita Devanagari Nonaccented
यूयं मर्तं विपन्यवः प्रणेतार इत्था धिया ।
श्रोतारो यामहूतिषु ॥
Samhita Transcription Accented
yūyám mártam vipanyavaḥ praṇetā́ra itthā́ dhiyā́ ǀ
śrótāro yā́mahūtiṣu ǁ
Samhita Transcription Nonaccented
yūyam martam vipanyavaḥ praṇetāra itthā dhiyā ǀ
śrotāro yāmahūtiṣu ǁ
Padapatha Devanagari Accented
यू॒यम् । मर्त॑म् । वि॒प॒न्य॒वः॒ । प्र॒ऽने॒तारः॑ । इ॒त्था । धि॒या ।
श्रोता॑रः । याम॑ऽहूतिषु ॥
Padapatha Devanagari Nonaccented
यूयम् । मर्तम् । विपन्यवः । प्रऽनेतारः । इत्था । धिया ।
श्रोतारः । यामऽहूतिषु ॥
Padapatha Transcription Accented
yūyám ǀ mártam ǀ vipanyavaḥ ǀ pra-netā́raḥ ǀ itthā́ ǀ dhiyā́ ǀ
śrótāraḥ ǀ yā́ma-hūtiṣu ǁ
Padapatha Transcription Nonaccented
yūyam ǀ martam ǀ vipanyavaḥ ǀ pra-netāraḥ ǀ itthā ǀ dhiyā ǀ
śrotāraḥ ǀ yāma-hūtiṣu ǁ
05.061.16 (Mandala. Sukta. Rik)
4.3.29.01 (Ashtaka. Adhyaya. Varga. Rik)
05.05.048 (Mandala. Anuvāka. Rik)
Samhita Devanagari Accented
ते नो॒ वसू॑नि॒ काम्या॑ पुरुश्चं॒द्रा रि॑शादसः ।
आ य॑ज्ञियासो ववृत्तन ॥
Samhita Devanagari Nonaccented
ते नो वसूनि काम्या पुरुश्चंद्रा रिशादसः ।
आ यज्ञियासो ववृत्तन ॥
Samhita Transcription Accented
té no vásūni kā́myā puruścandrā́ riśādasaḥ ǀ
ā́ yajñiyāso vavṛttana ǁ
Samhita Transcription Nonaccented
te no vasūni kāmyā puruścandrā riśādasaḥ ǀ
ā yajñiyāso vavṛttana ǁ
Padapatha Devanagari Accented
ते । नः॒ । वसू॑नि । काम्या॑ । पु॒रु॒ऽच॒न्द्राः । रि॒शा॒द॒सः॒ ।
आ । य॒ज्ञि॒या॒सः॒ । व॒वृ॒त्त॒न॒ ॥
Padapatha Devanagari Nonaccented
ते । नः । वसूनि । काम्या । पुरुऽचन्द्राः । रिशादसः ।
आ । यज्ञियासः । ववृत्तन ॥
Padapatha Transcription Accented
té ǀ naḥ ǀ vásūni ǀ kā́myā ǀ puru-candrā́ḥ ǀ riśādasaḥ ǀ
ā́ ǀ yajñiyāsaḥ ǀ vavṛttana ǁ
Padapatha Transcription Nonaccented
te ǀ naḥ ǀ vasūni ǀ kāmyā ǀ puru-candrāḥ ǀ riśādasaḥ ǀ
ā ǀ yajñiyāsaḥ ǀ vavṛttana ǁ
05.061.17 (Mandala. Sukta. Rik)
4.3.29.02 (Ashtaka. Adhyaya. Varga. Rik)
05.05.049 (Mandala. Anuvāka. Rik)
Samhita Devanagari Accented
ए॒तं मे॒ स्तोम॑मूर्म्ये दा॒र्भ्याय॒ परा॑ वह ।
गिरो॑ देवि र॒थीरि॑व ॥
Samhita Devanagari Nonaccented
एतं मे स्तोममूर्म्ये दार्भ्याय परा वह ।
गिरो देवि रथीरिव ॥
Samhita Transcription Accented
etám me stómamūrmye dārbhyā́ya párā vaha ǀ
gíro devi rathī́riva ǁ
Samhita Transcription Nonaccented
etam me stomamūrmye dārbhyāya parā vaha ǀ
giro devi rathīriva ǁ
Padapatha Devanagari Accented
ए॒तम् । मे॒ । स्तोम॑म् । ऊ॒र्म्ये॒ । दा॒र्भ्याय॑ । परा॑ । व॒ह॒ ।
गिरः॑ । दे॒वि॒ । र॒थीःऽइ॑व ॥
Padapatha Devanagari Nonaccented
एतम् । मे । स्तोमम् । ऊर्म्ये । दार्भ्याय । परा । वह ।
गिरः । देवि । रथीःऽइव ॥
Padapatha Transcription Accented
etám ǀ me ǀ stómam ǀ ūrmye ǀ dārbhyā́ya ǀ párā ǀ vaha ǀ
gíraḥ ǀ devi ǀ rathī́ḥ-iva ǁ
Padapatha Transcription Nonaccented
etam ǀ me ǀ stomam ǀ ūrmye ǀ dārbhyāya ǀ parā ǀ vaha ǀ
giraḥ ǀ devi ǀ rathīḥ-iva ǁ
05.061.18 (Mandala. Sukta. Rik)
4.3.29.03 (Ashtaka. Adhyaya. Varga. Rik)
05.05.050 (Mandala. Anuvāka. Rik)
Samhita Devanagari Accented
उ॒त मे॑ वोचता॒दिति॑ सु॒तसो॑मे॒ रथ॑वीतौ ।
न कामो॒ अप॑ वेति मे ॥
Samhita Devanagari Nonaccented
उत मे वोचतादिति सुतसोमे रथवीतौ ।
न कामो अप वेति मे ॥
Samhita Transcription Accented
utá me vocatādíti sutásome ráthavītau ǀ
ná kā́mo ápa veti me ǁ
Samhita Transcription Nonaccented
uta me vocatāditi sutasome rathavītau ǀ
na kāmo apa veti me ǁ
Padapatha Devanagari Accented
उ॒त । मे॒ । वो॒च॒ता॒त् । इति॑ । सु॒तऽसो॑मे । रथ॑ऽवीतौ ।
न । कामः॑ । अप॑ । वे॒ति॒ । मे॒ ॥
Padapatha Devanagari Nonaccented
उत । मे । वोचतात् । इति । सुतऽसोमे । रथऽवीतौ ।
न । कामः । अप । वेति । मे ॥
Padapatha Transcription Accented
utá ǀ me ǀ vocatāt ǀ íti ǀ sutá-some ǀ rátha-vītau ǀ
ná ǀ kā́maḥ ǀ ápa ǀ veti ǀ me ǁ
Padapatha Transcription Nonaccented
uta ǀ me ǀ vocatāt ǀ iti ǀ suta-some ǀ ratha-vītau ǀ
na ǀ kāmaḥ ǀ apa ǀ veti ǀ me ǁ
05.061.19 (Mandala. Sukta. Rik)
4.3.29.04 (Ashtaka. Adhyaya. Varga. Rik)
05.05.051 (Mandala. Anuvāka. Rik)
Samhita Devanagari Accented
ए॒ष क्षे॑ति॒ रथ॑वीतिर्म॒घवा॒ गोम॑ती॒रनु॑ ।
पर्व॑ते॒ष्वप॑श्रितः ॥
Samhita Devanagari Nonaccented
एष क्षेति रथवीतिर्मघवा गोमतीरनु ।
पर्वतेष्वपश्रितः ॥
Samhita Transcription Accented
eṣá kṣeti ráthavītirmaghávā gómatīránu ǀ
párvateṣvápaśritaḥ ǁ
Samhita Transcription Nonaccented
eṣa kṣeti rathavītirmaghavā gomatīranu ǀ
parvateṣvapaśritaḥ ǁ
Padapatha Devanagari Accented
ए॒षः । क्षे॒ति॒ । रथ॑ऽवीतिः । म॒घऽवा॑ । गोऽम॑तीः । अनु॑ ।
पर्व॑तेषु । अप॑ऽश्रितः ॥
Padapatha Devanagari Nonaccented
एषः । क्षेति । रथऽवीतिः । मघऽवा । गोऽमतीः । अनु ।
पर्वतेषु । अपऽश्रितः ॥
Padapatha Transcription Accented
eṣáḥ ǀ kṣeti ǀ rátha-vītiḥ ǀ maghá-vā ǀ gó-matīḥ ǀ ánu ǀ
párvateṣu ǀ ápa-śritaḥ ǁ
Padapatha Transcription Nonaccented
eṣaḥ ǀ kṣeti ǀ ratha-vītiḥ ǀ magha-vā ǀ go-matīḥ ǀ anu ǀ
parvateṣu ǀ apa-śritaḥ ǁ