|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 5
Sūkta 79
|
1. Info |
| To: | uṣas | |
| From: | satyaśravas ātreya | |
| Metres: | 1st set of styles: bhurigbṛhatī (2, 3, 7); paṅktiḥ (4, 5, 8); nicṛtpaṅkti (6, 9); svarāḍbrāhmīgāyatrī (1); svarāḍbṛhatī (10) 2nd set of styles: paṅkti |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
05.079.01 (Mandala. Sukta. Rik)
4.4.21.01 (Ashtaka. Adhyaya. Varga. Rik)
05.06.049 (Mandala. Anuvāka. Rik)
Samhita Devanagari Accented
म॒हे नो॑ अ॒द्य बो॑ध॒योषो॑ रा॒ये दि॒वित्म॑ती ।
यथा॑ चिन्नो॒ अबो॑धयः स॒त्यश्र॑वसि वा॒य्ये सुजा॑ते॒ अश्व॑सूनृते ॥
Samhita Devanagari Nonaccented
महे नो अद्य बोधयोषो राये दिवित्मती ।
यथा चिन्नो अबोधयः सत्यश्रवसि वाय्ये सुजाते अश्वसूनृते ॥
Samhita Transcription Accented
mahé no adyá bodhayóṣo rāyé divítmatī ǀ
yáthā cinno ábodhayaḥ satyáśravasi vāyyé sújāte áśvasūnṛte ǁ
Samhita Transcription Nonaccented
mahe no adya bodhayoṣo rāye divitmatī ǀ
yathā cinno abodhayaḥ satyaśravasi vāyye sujāte aśvasūnṛte ǁ
Padapatha Devanagari Accented
म॒हे । नः॒ । अ॒द्य । बो॒ध॒य॒ । उषः॑ । रा॒ये । दि॒वित्म॑ती ।
यथा॑ । चि॒त् । नः॒ । अबो॑धयः । स॒त्यऽश्र॑वसि । वा॒य्ये । सुऽजा॑ते । अश्व॑ऽसूनृते ॥
Padapatha Devanagari Nonaccented
महे । नः । अद्य । बोधय । उषः । राये । दिवित्मती ।
यथा । चित् । नः । अबोधयः । सत्यऽश्रवसि । वाय्ये । सुऽजाते । अश्वऽसूनृते ॥
Padapatha Transcription Accented
mahé ǀ naḥ ǀ adyá ǀ bodhaya ǀ úṣaḥ ǀ rāyé ǀ divítmatī ǀ
yáthā ǀ cit ǀ naḥ ǀ ábodhayaḥ ǀ satyá-śravasi ǀ vāyyé ǀ sú-jāte ǀ áśva-sūnṛte ǁ
Padapatha Transcription Nonaccented
mahe ǀ naḥ ǀ adya ǀ bodhaya ǀ uṣaḥ ǀ rāye ǀ divitmatī ǀ
yathā ǀ cit ǀ naḥ ǀ abodhayaḥ ǀ satya-śravasi ǀ vāyye ǀ su-jāte ǀ aśva-sūnṛte ǁ
05.079.02 (Mandala. Sukta. Rik)
4.4.21.02 (Ashtaka. Adhyaya. Varga. Rik)
05.06.050 (Mandala. Anuvāka. Rik)
Samhita Devanagari Accented
या सु॑नी॒थे शौ॑चद्र॒थे व्यौच्छो॑ दुहितर्दिवः ।
सा व्यु॑च्छ॒ सही॑यसि स॒त्यश्र॑वसि वा॒य्ये सुजा॑ते॒ अश्व॑सूनृते ॥
Samhita Devanagari Nonaccented
या सुनीथे शौचद्रथे व्यौच्छो दुहितर्दिवः ।
सा व्युच्छ सहीयसि सत्यश्रवसि वाय्ये सुजाते अश्वसूनृते ॥
Samhita Transcription Accented
yā́ sunīthé śaucadrathé vyáuccho duhitardivaḥ ǀ
sā́ vyúccha sáhīyasi satyáśravasi vāyyé sújāte áśvasūnṛte ǁ
Samhita Transcription Nonaccented
yā sunīthe śaucadrathe vyauccho duhitardivaḥ ǀ
sā vyuccha sahīyasi satyaśravasi vāyye sujāte aśvasūnṛte ǁ
Padapatha Devanagari Accented
या । सु॒ऽनी॒थे । शौ॒च॒त्ऽर॒थे । वि । औच्छः॑ । दु॒हि॒तः॒ । दि॒वः॒ ।
सा । वि । उ॒च्छ॒ । सही॑यसि । स॒त्यऽश्र॑वसि । वा॒य्ये । सुऽजा॑ते । अश्व॑ऽसूनृते ॥
Padapatha Devanagari Nonaccented
या । सुऽनीथे । शौचत्ऽरथे । वि । औच्छः । दुहितः । दिवः ।
सा । वि । उच्छ । सहीयसि । सत्यऽश्रवसि । वाय्ये । सुऽजाते । अश्वऽसूनृते ॥
Padapatha Transcription Accented
yā́ ǀ su-nīthé ǀ śaucat-rathé ǀ ví ǀ áucchaḥ ǀ duhitaḥ ǀ divaḥ ǀ
sā́ ǀ ví ǀ uccha ǀ sáhīyasi ǀ satyá-śravasi ǀ vāyyé ǀ sú-jāte ǀ áśva-sūnṛte ǁ
Padapatha Transcription Nonaccented
yā ǀ su-nīthe ǀ śaucat-rathe ǀ vi ǀ aucchaḥ ǀ duhitaḥ ǀ divaḥ ǀ
sā ǀ vi ǀ uccha ǀ sahīyasi ǀ satya-śravasi ǀ vāyye ǀ su-jāte ǀ aśva-sūnṛte ǁ
05.079.03 (Mandala. Sukta. Rik)
4.4.21.03 (Ashtaka. Adhyaya. Varga. Rik)
05.06.051 (Mandala. Anuvāka. Rik)
Samhita Devanagari Accented
सा नो॑ अ॒द्याभ॒रद्व॑सु॒र्व्यु॑च्छा दुहितर्दिवः ।
यो व्यौच्छः॒ सही॑यसि स॒त्यश्र॑वसि वा॒य्ये सुजा॑ते॒ अश्व॑सूनृते ॥
Samhita Devanagari Nonaccented
सा नो अद्याभरद्वसुर्व्युच्छा दुहितर्दिवः ।
यो व्यौच्छः सहीयसि सत्यश्रवसि वाय्ये सुजाते अश्वसूनृते ॥
Samhita Transcription Accented
sā́ no adyā́bharádvasurvyúcchā duhitardivaḥ ǀ
yó vyáucchaḥ sáhīyasi satyáśravasi vāyyé sújāte áśvasūnṛte ǁ
Samhita Transcription Nonaccented
sā no adyābharadvasurvyucchā duhitardivaḥ ǀ
yo vyaucchaḥ sahīyasi satyaśravasi vāyye sujāte aśvasūnṛte ǁ
Padapatha Devanagari Accented
सा । नः॒ । अ॒द्य । आ॒भ॒रत्ऽव॑सुः । वि । उ॒च्छ॒ । दु॒हि॒तः॒ । दि॒वः॒ ।
यो इति॑ । वि । औच्छः॑ । सही॑यसि । स॒त्यऽश्र॑वसि । वा॒य्ये । सुऽजा॑ते । अश्व॑ऽसूनृते ॥
Padapatha Devanagari Nonaccented
सा । नः । अद्य । आभरत्ऽवसुः । वि । उच्छ । दुहितः । दिवः ।
यो इति । वि । औच्छः । सहीयसि । सत्यऽश्रवसि । वाय्ये । सुऽजाते । अश्वऽसूनृते ॥
Padapatha Transcription Accented
sā́ ǀ naḥ ǀ adyá ǀ ābharát-vasuḥ ǀ ví ǀ uccha ǀ duhitaḥ ǀ divaḥ ǀ
yó íti ǀ ví ǀ áucchaḥ ǀ sáhīyasi ǀ satyá-śravasi ǀ vāyyé ǀ sú-jāte ǀ áśva-sūnṛte ǁ
Padapatha Transcription Nonaccented
sā ǀ naḥ ǀ adya ǀ ābharat-vasuḥ ǀ vi ǀ uccha ǀ duhitaḥ ǀ divaḥ ǀ
yo iti ǀ vi ǀ aucchaḥ ǀ sahīyasi ǀ satya-śravasi ǀ vāyye ǀ su-jāte ǀ aśva-sūnṛte ǁ
05.079.04 (Mandala. Sukta. Rik)
4.4.21.04 (Ashtaka. Adhyaya. Varga. Rik)
05.06.052 (Mandala. Anuvāka. Rik)
Samhita Devanagari Accented
अ॒भि ये त्वा॑ विभावरि॒ स्तोमै॑र्गृ॒णंति॒ वह्न॑यः ।
म॒घैर्म॑घोनि सु॒श्रियो॒ दाम॑न्वंतः सुरा॒तयः॒ सुजा॑ते॒ अश्व॑सूनृते ॥
Samhita Devanagari Nonaccented
अभि ये त्वा विभावरि स्तोमैर्गृणंति वह्नयः ।
मघैर्मघोनि सुश्रियो दामन्वंतः सुरातयः सुजाते अश्वसूनृते ॥
Samhita Transcription Accented
abhí yé tvā vibhāvari stómairgṛṇánti váhnayaḥ ǀ
magháirmaghoni suśríyo dā́manvantaḥ surātáyaḥ sújāte áśvasūnṛte ǁ
Samhita Transcription Nonaccented
abhi ye tvā vibhāvari stomairgṛṇanti vahnayaḥ ǀ
maghairmaghoni suśriyo dāmanvantaḥ surātayaḥ sujāte aśvasūnṛte ǁ
Padapatha Devanagari Accented
अ॒भि । ये । त्वा॒ । वि॒भा॒ऽव॒रि॒ । स्तोमैः॑ । गृ॒णन्ति॑ । वह्न॑यः ।
म॒घैः । म॒घो॒नि॒ । सु॒ऽश्रियः॑ । दाम॑न्ऽवन्तः । सु॒ऽरा॒तयः॑ । सुऽजा॑ते । अश्व॑ऽसूनृते ॥
Padapatha Devanagari Nonaccented
अभि । ये । त्वा । विभाऽवरि । स्तोमैः । गृणन्ति । वह्नयः ।
मघैः । मघोनि । सुऽश्रियः । दामन्ऽवन्तः । सुऽरातयः । सुऽजाते । अश्वऽसूनृते ॥
Padapatha Transcription Accented
abhí ǀ yé ǀ tvā ǀ vibhā-vari ǀ stómaiḥ ǀ gṛṇánti ǀ váhnayaḥ ǀ
magháiḥ ǀ maghoni ǀ su-śríyaḥ ǀ dā́man-vantaḥ ǀ su-rātáyaḥ ǀ sú-jāte ǀ áśva-sūnṛte ǁ
Padapatha Transcription Nonaccented
abhi ǀ ye ǀ tvā ǀ vibhā-vari ǀ stomaiḥ ǀ gṛṇanti ǀ vahnayaḥ ǀ
maghaiḥ ǀ maghoni ǀ su-śriyaḥ ǀ dāman-vantaḥ ǀ su-rātayaḥ ǀ su-jāte ǀ aśva-sūnṛte ǁ
05.079.05 (Mandala. Sukta. Rik)
4.4.21.05 (Ashtaka. Adhyaya. Varga. Rik)
05.06.053 (Mandala. Anuvāka. Rik)
Samhita Devanagari Accented
यच्चि॒द्धि ते॑ ग॒णा इ॒मे छ॒दयं॑ति म॒घत्त॑ये ।
परि॑ चि॒द्वष्ट॑यो दधु॒र्दद॑तो॒ राधो॒ अह्र॑यं॒ सुजा॑ते॒ अश्व॑सूनृते ॥
Samhita Devanagari Nonaccented
यच्चिद्धि ते गणा इमे छदयंति मघत्तये ।
परि चिद्वष्टयो दधुर्ददतो राधो अह्रयं सुजाते अश्वसूनृते ॥
Samhita Transcription Accented
yácciddhí te gaṇā́ imé chadáyanti magháttaye ǀ
pári cidváṣṭayo dadhurdádato rā́dho áhrayam sújāte áśvasūnṛte ǁ
Samhita Transcription Nonaccented
yacciddhi te gaṇā ime chadayanti maghattaye ǀ
pari cidvaṣṭayo dadhurdadato rādho ahrayam sujāte aśvasūnṛte ǁ
Padapatha Devanagari Accented
यत् । चि॒त् । हि । ते॒ । ग॒णाः । इ॒मे । छ॒दय॑न्ति । म॒घत्त॑ये ।
परि॑ । चि॒त् । वष्ट॑यः । द॒धुः॒ । दद॑तः । राधः॑ । अह्र॑यम् । सुऽजा॑ते । अश्व॑ऽसूनृते ॥
Padapatha Devanagari Nonaccented
यत् । चित् । हि । ते । गणाः । इमे । छदयन्ति । मघत्तये ।
परि । चित् । वष्टयः । दधुः । ददतः । राधः । अह्रयम् । सुऽजाते । अश्वऽसूनृते ॥
Padapatha Transcription Accented
yát ǀ cit ǀ hí ǀ te ǀ gaṇā́ḥ ǀ imé ǀ chadáyanti ǀ magháttaye ǀ
pári ǀ cit ǀ váṣṭayaḥ ǀ dadhuḥ ǀ dádataḥ ǀ rā́dhaḥ ǀ áhrayam ǀ sú-jāte ǀ áśva-sūnṛte ǁ
Padapatha Transcription Nonaccented
yat ǀ cit ǀ hi ǀ te ǀ gaṇāḥ ǀ ime ǀ chadayanti ǀ maghattaye ǀ
pari ǀ cit ǀ vaṣṭayaḥ ǀ dadhuḥ ǀ dadataḥ ǀ rādhaḥ ǀ ahrayam ǀ su-jāte ǀ aśva-sūnṛte ǁ
05.079.06 (Mandala. Sukta. Rik)
4.4.22.01 (Ashtaka. Adhyaya. Varga. Rik)
05.06.054 (Mandala. Anuvāka. Rik)
Samhita Devanagari Accented
ऐषु॑ धा वी॒रव॒द्यश॒ उषो॑ मघोनि सू॒रिषु॑ ।
ये नो॒ राधां॒स्यह्र॑या म॒घवा॑नो॒ अरा॑सत॒ सुजा॑ते॒ अश्व॑सूनृते ॥
Samhita Devanagari Nonaccented
ऐषु धा वीरवद्यश उषो मघोनि सूरिषु ।
ये नो राधांस्यह्रया मघवानो अरासत सुजाते अश्वसूनृते ॥
Samhita Transcription Accented
áiṣu dhā vīrávadyáśa úṣo maghoni sūríṣu ǀ
yé no rā́dhāṃsyáhrayā maghávāno árāsata sújāte áśvasūnṛte ǁ
Samhita Transcription Nonaccented
aiṣu dhā vīravadyaśa uṣo maghoni sūriṣu ǀ
ye no rādhāṃsyahrayā maghavāno arāsata sujāte aśvasūnṛte ǁ
Padapatha Devanagari Accented
आ । ए॒षु॒ । धाः॒ । वी॒रऽव॑त् । यशः॑ । उषः॑ । म॒घो॒नि॒ । सू॒रिषु॑ ।
ये । नः॒ । राधां॑सि । अह्र॑या । म॒घऽवा॑नः । अरा॑सत । सुऽजा॑ते । अश्व॑ऽसूनृते ॥
Padapatha Devanagari Nonaccented
आ । एषु । धाः । वीरऽवत् । यशः । उषः । मघोनि । सूरिषु ।
ये । नः । राधांसि । अह्रया । मघऽवानः । अरासत । सुऽजाते । अश्वऽसूनृते ॥
Padapatha Transcription Accented
ā́ ǀ eṣu ǀ dhāḥ ǀ vīrá-vat ǀ yáśaḥ ǀ úṣaḥ ǀ maghoni ǀ sūríṣu ǀ
yé ǀ naḥ ǀ rā́dhāṃsi ǀ áhrayā ǀ maghá-vānaḥ ǀ árāsata ǀ sú-jāte ǀ áśva-sūnṛte ǁ
Padapatha Transcription Nonaccented
ā ǀ eṣu ǀ dhāḥ ǀ vīra-vat ǀ yaśaḥ ǀ uṣaḥ ǀ maghoni ǀ sūriṣu ǀ
ye ǀ naḥ ǀ rādhāṃsi ǀ ahrayā ǀ magha-vānaḥ ǀ arāsata ǀ su-jāte ǀ aśva-sūnṛte ǁ
05.079.07 (Mandala. Sukta. Rik)
4.4.22.02 (Ashtaka. Adhyaya. Varga. Rik)
05.06.055 (Mandala. Anuvāka. Rik)
Samhita Devanagari Accented
तेभ्यो॑ द्यु॒म्नं बृ॒हद्यश॒ उषो॑ मघो॒न्या व॑ह ।
ये नो॒ राधां॒स्यश्व्या॑ ग॒व्या भजं॑त सू॒रयः॒ सुजा॑ते॒ अश्व॑सूनृते ॥
Samhita Devanagari Nonaccented
तेभ्यो द्युम्नं बृहद्यश उषो मघोन्या वह ।
ये नो राधांस्यश्व्या गव्या भजंत सूरयः सुजाते अश्वसूनृते ॥
Samhita Transcription Accented
tébhyo dyumnám bṛhádyáśa úṣo maghonyā́ vaha ǀ
yé no rā́dhāṃsyáśvyā gavyā́ bhájanta sūráyaḥ sújāte áśvasūnṛte ǁ
Samhita Transcription Nonaccented
tebhyo dyumnam bṛhadyaśa uṣo maghonyā vaha ǀ
ye no rādhāṃsyaśvyā gavyā bhajanta sūrayaḥ sujāte aśvasūnṛte ǁ
Padapatha Devanagari Accented
तेभ्यः॑ । द्यु॒म्नम् । बृ॒हत् । यशः॑ । उषः॑ । म॒घो॒नि॒ । आ । व॒ह॒ ।
ये । नः॒ । राधां॑सि । अश्व्या॑ । ग॒व्या । भज॑न्त । सू॒रयः॑ । सुऽजा॑ते । अश्व॑ऽसूनृते ॥
Padapatha Devanagari Nonaccented
तेभ्यः । द्युम्नम् । बृहत् । यशः । उषः । मघोनि । आ । वह ।
ये । नः । राधांसि । अश्व्या । गव्या । भजन्त । सूरयः । सुऽजाते । अश्वऽसूनृते ॥
Padapatha Transcription Accented
tébhyaḥ ǀ dyumnám ǀ bṛhát ǀ yáśaḥ ǀ úṣaḥ ǀ maghoni ǀ ā́ ǀ vaha ǀ
yé ǀ naḥ ǀ rā́dhāṃsi ǀ áśvyā ǀ gavyā́ ǀ bhájanta ǀ sūráyaḥ ǀ sú-jāte ǀ áśva-sūnṛte ǁ
Padapatha Transcription Nonaccented
tebhyaḥ ǀ dyumnam ǀ bṛhat ǀ yaśaḥ ǀ uṣaḥ ǀ maghoni ǀ ā ǀ vaha ǀ
ye ǀ naḥ ǀ rādhāṃsi ǀ aśvyā ǀ gavyā ǀ bhajanta ǀ sūrayaḥ ǀ su-jāte ǀ aśva-sūnṛte ǁ
05.079.08 (Mandala. Sukta. Rik)
4.4.22.03 (Ashtaka. Adhyaya. Varga. Rik)
05.06.056 (Mandala. Anuvāka. Rik)
Samhita Devanagari Accented
उ॒त नो॒ गोम॑ती॒रिष॒ आ व॑हा दुहितर्दिवः ।
सा॒कं सूर्य॑स्य र॒श्मिभिः॑ शु॒क्रैः शोच॑द्भिर॒र्चिभिः॒ सुजा॑ते॒ अश्व॑सूनृते ॥
Samhita Devanagari Nonaccented
उत नो गोमतीरिष आ वहा दुहितर्दिवः ।
साकं सूर्यस्य रश्मिभिः शुक्रैः शोचद्भिरर्चिभिः सुजाते अश्वसूनृते ॥
Samhita Transcription Accented
utá no gómatīríṣa ā́ vahā duhitardivaḥ ǀ
sākám sū́ryasya raśmíbhiḥ śukráiḥ śócadbhirarcíbhiḥ sújāte áśvasūnṛte ǁ
Samhita Transcription Nonaccented
uta no gomatīriṣa ā vahā duhitardivaḥ ǀ
sākam sūryasya raśmibhiḥ śukraiḥ śocadbhirarcibhiḥ sujāte aśvasūnṛte ǁ
Padapatha Devanagari Accented
उ॒त । नः॒ । गोऽम॑तीः । इषः॑ । आ । व॒ह॒ । दु॒हि॒तः॒ । दि॒वः॒ ।
सा॒कम् । सूर्य॑स्य । र॒श्मिऽभिः॑ । शु॒क्रैः । शोच॑त्ऽभिः । अ॒र्चिऽभिः॑ । सुऽजा॑ते । अश्व॑ऽसूनृते ॥
Padapatha Devanagari Nonaccented
उत । नः । गोऽमतीः । इषः । आ । वह । दुहितः । दिवः ।
साकम् । सूर्यस्य । रश्मिऽभिः । शुक्रैः । शोचत्ऽभिः । अर्चिऽभिः । सुऽजाते । अश्वऽसूनृते ॥
Padapatha Transcription Accented
utá ǀ naḥ ǀ gó-matīḥ ǀ íṣaḥ ǀ ā́ ǀ vaha ǀ duhitaḥ ǀ divaḥ ǀ
sākám ǀ sū́ryasya ǀ raśmí-bhiḥ ǀ śukráiḥ ǀ śócat-bhiḥ ǀ arcí-bhiḥ ǀ sú-jāte ǀ áśva-sūnṛte ǁ
Padapatha Transcription Nonaccented
uta ǀ naḥ ǀ go-matīḥ ǀ iṣaḥ ǀ ā ǀ vaha ǀ duhitaḥ ǀ divaḥ ǀ
sākam ǀ sūryasya ǀ raśmi-bhiḥ ǀ śukraiḥ ǀ śocat-bhiḥ ǀ arci-bhiḥ ǀ su-jāte ǀ aśva-sūnṛte ǁ
05.079.09 (Mandala. Sukta. Rik)
4.4.22.04 (Ashtaka. Adhyaya. Varga. Rik)
05.06.057 (Mandala. Anuvāka. Rik)
Samhita Devanagari Accented
व्यु॑च्छा दुहितर्दिवो॒ मा चि॒रं त॑नुथा॒ अपः॑ ।
नेत्त्वा॑ स्ते॒नं यथा॑ रि॒पुं तपा॑ति॒ सूरो॑ अ॒र्चिषा॒ सुजा॑ते॒ अश्व॑सूनृते ॥
Samhita Devanagari Nonaccented
व्युच्छा दुहितर्दिवो मा चिरं तनुथा अपः ।
नेत्त्वा स्तेनं यथा रिपुं तपाति सूरो अर्चिषा सुजाते अश्वसूनृते ॥
Samhita Transcription Accented
vyúcchā duhitardivo mā́ cirám tanuthā ápaḥ ǀ
néttvā stenám yáthā ripúm tápāti sū́ro arcíṣā sújāte áśvasūnṛte ǁ
Samhita Transcription Nonaccented
vyucchā duhitardivo mā ciram tanuthā apaḥ ǀ
nettvā stenam yathā ripum tapāti sūro arciṣā sujāte aśvasūnṛte ǁ
Padapatha Devanagari Accented
वि । उ॒च्छ॒ । दु॒हि॒तः॒ । दि॒वः॒ । मा । चि॒रम् । त॒नु॒थाः॒ । अपः॑ ।
न । इत् । त्वा॒ । स्ते॒नम् । यथा॑ । रि॒पुम् । तपा॑ति । सूरः॑ । अ॒र्चिषा॑ । सुऽजा॑ते । अश्व॑ऽसूनृते ॥
Padapatha Devanagari Nonaccented
वि । उच्छ । दुहितः । दिवः । मा । चिरम् । तनुथाः । अपः ।
न । इत् । त्वा । स्तेनम् । यथा । रिपुम् । तपाति । सूरः । अर्चिषा । सुऽजाते । अश्वऽसूनृते ॥
Padapatha Transcription Accented
ví ǀ uccha ǀ duhitaḥ ǀ divaḥ ǀ mā́ ǀ cirám ǀ tanuthāḥ ǀ ápaḥ ǀ
ná ǀ ít ǀ tvā ǀ stenám ǀ yáthā ǀ ripúm ǀ tápāti ǀ sū́raḥ ǀ arcíṣā ǀ sú-jāte ǀ áśva-sūnṛte ǁ
Padapatha Transcription Nonaccented
vi ǀ uccha ǀ duhitaḥ ǀ divaḥ ǀ mā ǀ ciram ǀ tanuthāḥ ǀ apaḥ ǀ
na ǀ it ǀ tvā ǀ stenam ǀ yathā ǀ ripum ǀ tapāti ǀ sūraḥ ǀ arciṣā ǀ su-jāte ǀ aśva-sūnṛte ǁ
05.079.10 (Mandala. Sukta. Rik)
4.4.22.05 (Ashtaka. Adhyaya. Varga. Rik)
05.06.058 (Mandala. Anuvāka. Rik)
Samhita Devanagari Accented
ए॒ताव॒द्वेदु॑ष॒स्त्वं भूयो॑ वा॒ दातु॑मर्हसि ।
या स्तो॒तृभ्यो॑ विभावर्यु॒च्छंती॒ न प्र॒मीय॑से॒ सुजा॑ते॒ अश्व॑सूनृते ॥
Samhita Devanagari Nonaccented
एतावद्वेदुषस्त्वं भूयो वा दातुमर्हसि ।
या स्तोतृभ्यो विभावर्युच्छंती न प्रमीयसे सुजाते अश्वसूनृते ॥
Samhita Transcription Accented
etā́vadvéduṣastvám bhū́yo vā dā́tumarhasi ǀ
yā́ stotṛ́bhyo vibhāvaryucchántī ná pramī́yase sújāte áśvasūnṛte ǁ
Samhita Transcription Nonaccented
etāvadveduṣastvam bhūyo vā dātumarhasi ǀ
yā stotṛbhyo vibhāvaryucchantī na pramīyase sujāte aśvasūnṛte ǁ
Padapatha Devanagari Accented
ए॒ताव॑त् । वा॒ । इत् । उ॒षः॒ । त्वम् । भूयः॑ । वा॒ । दातु॑म् । अ॒र्ह॒सि॒ ।
या । स्तो॒तृऽभ्यः॑ । वि॒भा॒ऽव॒रि॒ । उ॒च्छन्ती॑ । न । प्र॒ऽमीय॑से । सुऽजा॑ते । अश्व॑ऽसूनृते ॥
Padapatha Devanagari Nonaccented
एतावत् । वा । इत् । उषः । त्वम् । भूयः । वा । दातुम् । अर्हसि ।
या । स्तोतृऽभ्यः । विभाऽवरि । उच्छन्ती । न । प्रऽमीयसे । सुऽजाते । अश्वऽसूनृते ॥
Padapatha Transcription Accented
etā́vat ǀ vā ǀ ít ǀ uṣaḥ ǀ tvám ǀ bhū́yaḥ ǀ vā ǀ dā́tum ǀ arhasi ǀ
yā́ ǀ stotṛ́-bhyaḥ ǀ vibhā-vari ǀ ucchántī ǀ ná ǀ pra-mī́yase ǀ sú-jāte ǀ áśva-sūnṛte ǁ
Padapatha Transcription Nonaccented
etāvat ǀ vā ǀ it ǀ uṣaḥ ǀ tvam ǀ bhūyaḥ ǀ vā ǀ dātum ǀ arhasi ǀ
yā ǀ stotṛ-bhyaḥ ǀ vibhā-vari ǀ ucchantī ǀ na ǀ pra-mīyase ǀ su-jāte ǀ aśva-sūnṛte ǁ