|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 1
|
1. Info |
| To: | agni | |
| From: | bharadvāja bārhaspatya | |
| Metres: | 1st set of styles: nicṛttriṣṭup (3, 4, 6, 11, 12); bhurikpaṅkti (1, 7, 13); triṣṭup (8, 10); svarāṭpaṅkti (2); paṅktiḥ (5); virāṭtrisṭup (9) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.001.01 (Mandala. Sukta. Rik)
4.4.35.01 (Ashtaka. Adhyaya. Varga. Rik)
06.01.001 (Mandala. Anuvāka. Rik)
Samhita Devanagari Accented
त्वं ह्य॑ग्ने प्रथ॒मो म॒नोता॒स्या धि॒यो अभ॑वो दस्म॒ होता॑ ।
त्वं सीं॑ वृषन्नकृणोर्दु॒ष्टरी॑तु॒ सहो॒ विश्व॑स्मै॒ सह॑से॒ सह॑ध्यै ॥
Samhita Devanagari Nonaccented
त्वं ह्यग्ने प्रथमो मनोतास्या धियो अभवो दस्म होता ।
त्वं सीं वृषन्नकृणोर्दुष्टरीतु सहो विश्वस्मै सहसे सहध्यै ॥
Samhita Transcription Accented
tvám hyágne prathamó manótāsyā́ dhiyó ábhavo dasma hótā ǀ
tvám sīm vṛṣannakṛṇorduṣṭárītu sáho víśvasmai sáhase sáhadhyai ǁ
Samhita Transcription Nonaccented
tvam hyagne prathamo manotāsyā dhiyo abhavo dasma hotā ǀ
tvam sīm vṛṣannakṛṇorduṣṭarītu saho viśvasmai sahase sahadhyai ǁ
Padapatha Devanagari Accented
त्वम् । हि । अ॒ग्ने॒ । प्र॒थ॒मः । म॒नोता॑ । अ॒स्याः । धि॒यः । अभ॑वः । द॒स्म॒ । होता॑ ।
त्वम् । सी॒म् । वृ॒ष॒न् । अ॒कृ॒णोः॒ । दु॒स्तरी॑तु । सहः॑ । विश्व॑स्मै । सह॑से । सह॑ध्यै ॥
Padapatha Devanagari Nonaccented
त्वम् । हि । अग्ने । प्रथमः । मनोता । अस्याः । धियः । अभवः । दस्म । होता ।
त्वम् । सीम् । वृषन् । अकृणोः । दुस्तरीतु । सहः । विश्वस्मै । सहसे । सहध्यै ॥
Padapatha Transcription Accented
tvám ǀ hí ǀ agne ǀ prathamáḥ ǀ manótā ǀ asyā́ḥ ǀ dhiyáḥ ǀ ábhavaḥ ǀ dasma ǀ hótā ǀ
tvám ǀ sīm ǀ vṛṣan ǀ akṛṇoḥ ǀ dustárītu ǀ sáhaḥ ǀ víśvasmai ǀ sáhase ǀ sáhadhyai ǁ
Padapatha Transcription Nonaccented
tvam ǀ hi ǀ agne ǀ prathamaḥ ǀ manotā ǀ asyāḥ ǀ dhiyaḥ ǀ abhavaḥ ǀ dasma ǀ hotā ǀ
tvam ǀ sīm ǀ vṛṣan ǀ akṛṇoḥ ǀ dustarītu ǀ sahaḥ ǀ viśvasmai ǀ sahase ǀ sahadhyai ǁ
06.001.02 (Mandala. Sukta. Rik)
4.4.35.02 (Ashtaka. Adhyaya. Varga. Rik)
06.01.002 (Mandala. Anuvāka. Rik)
Samhita Devanagari Accented
अधा॒ होता॒ न्य॑सीदो॒ यजी॑यानि॒ळस्प॒द इ॒षय॒न्नीड्यः॒ सन् ।
तं त्वा॒ नरः॑ प्रथ॒मं दे॑व॒यंतो॑ म॒हो रा॒ये चि॒तयं॑तो॒ अनु॑ ग्मन् ॥
Samhita Devanagari Nonaccented
अधा होता न्यसीदो यजीयानिळस्पद इषयन्नीड्यः सन् ।
तं त्वा नरः प्रथमं देवयंतो महो राये चितयंतो अनु ग्मन् ॥
Samhita Transcription Accented
ádhā hótā nyásīdo yájīyāniḷáspadá iṣáyannī́ḍyaḥ sán ǀ
tám tvā náraḥ prathamám devayánto mahó rāyé citáyanto ánu gman ǁ
Samhita Transcription Nonaccented
adhā hotā nyasīdo yajīyāniḷaspada iṣayannīḍyaḥ san ǀ
tam tvā naraḥ prathamam devayanto maho rāye citayanto anu gman ǁ
Padapatha Devanagari Accented
अध॑ । होता॑ । नि । अ॒सी॒दः॒ । यजी॑यान् । इ॒ळः । प॒दे । इ॒षय॑न् । ईड्यः॑ । सन् ।
तम् । त्वा॒ । नरः॑ । प्र॒थ॒मम् । दे॒व॒ऽयन्तः॑ । म॒हः । रा॒ये । चि॒तय॑न्तः । अनु॑ । ग्म॒न् ॥
Padapatha Devanagari Nonaccented
अध । होता । नि । असीदः । यजीयान् । इळः । पदे । इषयन् । ईड्यः । सन् ।
तम् । त्वा । नरः । प्रथमम् । देवऽयन्तः । महः । राये । चितयन्तः । अनु । ग्मन् ॥
Padapatha Transcription Accented
ádha ǀ hótā ǀ ní ǀ asīdaḥ ǀ yájīyān ǀ iḷáḥ ǀ padé ǀ iṣáyan ǀ ī́ḍyaḥ ǀ sán ǀ
tám ǀ tvā ǀ náraḥ ǀ prathamám ǀ deva-yántaḥ ǀ maháḥ ǀ rāyé ǀ citáyantaḥ ǀ ánu ǀ gman ǁ
Padapatha Transcription Nonaccented
adha ǀ hotā ǀ ni ǀ asīdaḥ ǀ yajīyān ǀ iḷaḥ ǀ pade ǀ iṣayan ǀ īḍyaḥ ǀ san ǀ
tam ǀ tvā ǀ naraḥ ǀ prathamam ǀ deva-yantaḥ ǀ mahaḥ ǀ rāye ǀ citayantaḥ ǀ anu ǀ gman ǁ
06.001.03 (Mandala. Sukta. Rik)
4.4.35.03 (Ashtaka. Adhyaya. Varga. Rik)
06.01.003 (Mandala. Anuvāka. Rik)
Samhita Devanagari Accented
वृ॒तेव॒ यंतं॑ ब॒हुभि॑र्वस॒व्यै॒३॒॑स्त्वे र॒यिं जा॑गृ॒वांसो॒ अनु॑ ग्मन् ।
रुशं॑तम॒ग्निं द॑र्श॒तं बृ॒हंतं॑ व॒पावं॑तं वि॒श्वहा॑ दीदि॒वांसं॑ ॥
Samhita Devanagari Nonaccented
वृतेव यंतं बहुभिर्वसव्यैस्त्वे रयिं जागृवांसो अनु ग्मन् ।
रुशंतमग्निं दर्शतं बृहंतं वपावंतं विश्वहा दीदिवांसं ॥
Samhita Transcription Accented
vṛtéva yántam bahúbhirvasavyáistvé rayím jāgṛvā́ṃso ánu gman ǀ
rúśantamagním darśatám bṛhántam vapā́vantam viśváhā dīdivā́ṃsam ǁ
Samhita Transcription Nonaccented
vṛteva yantam bahubhirvasavyaistve rayim jāgṛvāṃso anu gman ǀ
ruśantamagnim darśatam bṛhantam vapāvantam viśvahā dīdivāṃsam ǁ
Padapatha Devanagari Accented
वृ॒ताऽइ॑व । यन्त॑म् । ब॒हुऽभिः॑ । व॒स॒व्यैः॑ । त्वे इति॑ । र॒यिम् । जा॒गृ॒ऽवांसः॑ । अनु॑ । ग्म॒न् ।
रुश॑न्तम् । अ॒ग्निम् । द॒र्श॒तम् । बृ॒हन्त॑म् । व॒पाऽव॑न्तम् । वि॒श्वहा॑ । दी॒दि॒ऽवांस॑म् ॥
Padapatha Devanagari Nonaccented
वृताऽइव । यन्तम् । बहुऽभिः । वसव्यैः । त्वे इति । रयिम् । जागृऽवांसः । अनु । ग्मन् ।
रुशन्तम् । अग्निम् । दर्शतम् । बृहन्तम् । वपाऽवन्तम् । विश्वहा । दीदिऽवांसम् ॥
Padapatha Transcription Accented
vṛtā́-iva ǀ yántam ǀ bahú-bhiḥ ǀ vasavyáiḥ ǀ tvé íti ǀ rayím ǀ jāgṛ-vā́ṃsaḥ ǀ ánu ǀ gman ǀ
rúśantam ǀ agním ǀ darśatám ǀ bṛhántam ǀ vapā́-vantam ǀ viśváhā ǀ dīdi-vā́ṃsam ǁ
Padapatha Transcription Nonaccented
vṛtā-iva ǀ yantam ǀ bahu-bhiḥ ǀ vasavyaiḥ ǀ tve iti ǀ rayim ǀ jāgṛ-vāṃsaḥ ǀ anu ǀ gman ǀ
ruśantam ǀ agnim ǀ darśatam ǀ bṛhantam ǀ vapā-vantam ǀ viśvahā ǀ dīdi-vāṃsam ǁ
06.001.04 (Mandala. Sukta. Rik)
4.4.35.04 (Ashtaka. Adhyaya. Varga. Rik)
06.01.004 (Mandala. Anuvāka. Rik)
Samhita Devanagari Accented
प॒दं दे॒वस्य॒ नम॑सा॒ व्यंतः॑ श्रव॒स्यवः॒ श्रव॑ आप॒न्नमृ॑क्तं ।
नामा॑नि चिद्दधिरे य॒ज्ञिया॑नि भ॒द्रायां॑ ते रणयंत॒ संदृ॑ष्टौ ॥
Samhita Devanagari Nonaccented
पदं देवस्य नमसा व्यंतः श्रवस्यवः श्रव आपन्नमृक्तं ।
नामानि चिद्दधिरे यज्ञियानि भद्रायां ते रणयंत संदृष्टौ ॥
Samhita Transcription Accented
padám devásya námasā vyántaḥ śravasyávaḥ śráva āpannámṛktam ǀ
nā́māni ciddadhire yajñíyāni bhadrā́yām te raṇayanta sáṃdṛṣṭau ǁ
Samhita Transcription Nonaccented
padam devasya namasā vyantaḥ śravasyavaḥ śrava āpannamṛktam ǀ
nāmāni ciddadhire yajñiyāni bhadrāyām te raṇayanta saṃdṛṣṭau ǁ
Padapatha Devanagari Accented
प॒दम् । दे॒वस्य॑ । नम॑सा । व्यन्तः॑ । श्र॒व॒स्यवः॑ । श्रवः॑ । आ॒प॒न् । अमृ॑क्तम् ।
नामा॑नि । चि॒त् । द॒धि॒रे॒ । य॒ज्ञिया॑नि । भ॒द्राया॑म् । ते॒ । र॒ण॒य॒न्त॒ । सम्ऽदृ॑ष्टौ ॥
Padapatha Devanagari Nonaccented
पदम् । देवस्य । नमसा । व्यन्तः । श्रवस्यवः । श्रवः । आपन् । अमृक्तम् ।
नामानि । चित् । दधिरे । यज्ञियानि । भद्रायाम् । ते । रणयन्त । सम्ऽदृष्टौ ॥
Padapatha Transcription Accented
padám ǀ devásya ǀ námasā ǀ vyántaḥ ǀ śravasyávaḥ ǀ śrávaḥ ǀ āpan ǀ ámṛktam ǀ
nā́māni ǀ cit ǀ dadhire ǀ yajñíyāni ǀ bhadrā́yām ǀ te ǀ raṇayanta ǀ sám-dṛṣṭau ǁ
Padapatha Transcription Nonaccented
padam ǀ devasya ǀ namasā ǀ vyantaḥ ǀ śravasyavaḥ ǀ śravaḥ ǀ āpan ǀ amṛktam ǀ
nāmāni ǀ cit ǀ dadhire ǀ yajñiyāni ǀ bhadrāyām ǀ te ǀ raṇayanta ǀ sam-dṛṣṭau ǁ
06.001.05 (Mandala. Sukta. Rik)
4.4.35.05 (Ashtaka. Adhyaya. Varga. Rik)
06.01.005 (Mandala. Anuvāka. Rik)
Samhita Devanagari Accented
त्वां व॑र्धंति क्षि॒तयः॑ पृथि॒व्यां त्वां राय॑ उ॒भया॑सो॒ जना॑नां ।
त्वं त्रा॒ता त॑रणे॒ चेत्यो॑ भूः पि॒ता मा॒ता सद॒मिन्मानु॑षाणां ॥
Samhita Devanagari Nonaccented
त्वां वर्धंति क्षितयः पृथिव्यां त्वां राय उभयासो जनानां ।
त्वं त्राता तरणे चेत्यो भूः पिता माता सदमिन्मानुषाणां ॥
Samhita Transcription Accented
tvā́m vardhanti kṣitáyaḥ pṛthivyā́m tvā́m rā́ya ubháyāso jánānām ǀ
tvám trātā́ taraṇe cétyo bhūḥ pitā́ mātā́ sádamínmā́nuṣāṇām ǁ
Samhita Transcription Nonaccented
tvām vardhanti kṣitayaḥ pṛthivyām tvām rāya ubhayāso janānām ǀ
tvam trātā taraṇe cetyo bhūḥ pitā mātā sadaminmānuṣāṇām ǁ
Padapatha Devanagari Accented
त्वाम् । व॒र्ध॒न्ति॒ । क्षि॒तयः॑ । पृ॒थि॒व्याम् । त्वाम् । रायः॑ । उ॒भया॑सः । जना॑नाम् ।
त्वम् । त्रा॒ता । त॒र॒णे॒ । चेत्यः॑ । भूः॒ । पि॒ता । मा॒ता । सद॑म् । इत् । मानु॑षाणाम् ॥
Padapatha Devanagari Nonaccented
त्वाम् । वर्धन्ति । क्षितयः । पृथिव्याम् । त्वाम् । रायः । उभयासः । जनानाम् ।
त्वम् । त्राता । तरणे । चेत्यः । भूः । पिता । माता । सदम् । इत् । मानुषाणाम् ॥
Padapatha Transcription Accented
tvā́m ǀ vardhanti ǀ kṣitáyaḥ ǀ pṛthivyā́m ǀ tvā́m ǀ rā́yaḥ ǀ ubháyāsaḥ ǀ jánānām ǀ
tvám ǀ trātā́ ǀ taraṇe ǀ cétyaḥ ǀ bhūḥ ǀ pitā́ ǀ mātā́ ǀ sádam ǀ ít ǀ mā́nuṣāṇām ǁ
Padapatha Transcription Nonaccented
tvām ǀ vardhanti ǀ kṣitayaḥ ǀ pṛthivyām ǀ tvām ǀ rāyaḥ ǀ ubhayāsaḥ ǀ janānām ǀ
tvam ǀ trātā ǀ taraṇe ǀ cetyaḥ ǀ bhūḥ ǀ pitā ǀ mātā ǀ sadam ǀ it ǀ mānuṣāṇām ǁ
06.001.06 (Mandala. Sukta. Rik)
4.4.36.01 (Ashtaka. Adhyaya. Varga. Rik)
06.01.006 (Mandala. Anuvāka. Rik)
Samhita Devanagari Accented
स॒प॒र्येण्यः॒ स प्रि॒यो वि॒क्ष्व१॒॑ग्निर्होता॑ मं॒द्रो नि ष॑सादा॒ यजी॑यान् ।
तं त्वा॑ व॒यं दम॒ आ दी॑दि॒वांस॒मुप॑ ज्ञु॒बाधो॒ नम॑सा सदेम ॥
Samhita Devanagari Nonaccented
सपर्येण्यः स प्रियो विक्ष्वग्निर्होता मंद्रो नि षसादा यजीयान् ।
तं त्वा वयं दम आ दीदिवांसमुप ज्ञुबाधो नमसा सदेम ॥
Samhita Transcription Accented
saparyéṇyaḥ sá priyó vikṣvágnírhótā mandró ní ṣasādā yájīyān ǀ
tám tvā vayám dáma ā́ dīdivā́ṃsamúpa jñubā́dho námasā sadema ǁ
Samhita Transcription Nonaccented
saparyeṇyaḥ sa priyo vikṣvagnirhotā mandro ni ṣasādā yajīyān ǀ
tam tvā vayam dama ā dīdivāṃsamupa jñubādho namasā sadema ǁ
Padapatha Devanagari Accented
स॒प॒र्येण्यः॑ । सः । प्रि॒यः । वि॒क्षु । अ॒ग्निः । होता॑ । म॒न्द्रः । नि । स॒सा॒द॒ । यजी॑यान् ।
तम् । त्वा॒ । व॒यम् । दमे॑ । आ । दी॒दि॒ऽवांस॑म् । उप॑ । ज्ञु॒ऽबाधः॑ । नम॑सा । स॒दे॒म॒ ॥
Padapatha Devanagari Nonaccented
सपर्येण्यः । सः । प्रियः । विक्षु । अग्निः । होता । मन्द्रः । नि । ससाद । यजीयान् ।
तम् । त्वा । वयम् । दमे । आ । दीदिऽवांसम् । उप । ज्ञुऽबाधः । नमसा । सदेम ॥
Padapatha Transcription Accented
saparyéṇyaḥ ǀ sáḥ ǀ priyáḥ ǀ vikṣú ǀ agníḥ ǀ hótā ǀ mandráḥ ǀ ní ǀ sasāda ǀ yájīyān ǀ
tám ǀ tvā ǀ vayám ǀ dáme ǀ ā́ ǀ dīdi-vā́ṃsam ǀ úpa ǀ jñu-bā́dhaḥ ǀ námasā ǀ sadema ǁ
Padapatha Transcription Nonaccented
saparyeṇyaḥ ǀ saḥ ǀ priyaḥ ǀ vikṣu ǀ agniḥ ǀ hotā ǀ mandraḥ ǀ ni ǀ sasāda ǀ yajīyān ǀ
tam ǀ tvā ǀ vayam ǀ dame ǀ ā ǀ dīdi-vāṃsam ǀ upa ǀ jñu-bādhaḥ ǀ namasā ǀ sadema ǁ
06.001.07 (Mandala. Sukta. Rik)
4.4.36.02 (Ashtaka. Adhyaya. Varga. Rik)
06.01.007 (Mandala. Anuvāka. Rik)
Samhita Devanagari Accented
तं त्वा॑ व॒यं सु॒ध्यो॒३॒॑ नव्य॑मग्ने सुम्ना॒यव॑ ईमहे देव॒यंतः॑ ।
त्वं विशो॑ अनयो॒ दीद्या॑नो दि॒वो अ॑ग्ने बृह॒ता रो॑च॒नेन॑ ॥
Samhita Devanagari Nonaccented
तं त्वा वयं सुध्यो नव्यमग्ने सुम्नायव ईमहे देवयंतः ।
त्वं विशो अनयो दीद्यानो दिवो अग्ने बृहता रोचनेन ॥
Samhita Transcription Accented
tám tvā vayám sudhyó návyamagne sumnāyáva īmahe devayántaḥ ǀ
tvám víśo anayo dī́dyāno divó agne bṛhatā́ rocanéna ǁ
Samhita Transcription Nonaccented
tam tvā vayam sudhyo navyamagne sumnāyava īmahe devayantaḥ ǀ
tvam viśo anayo dīdyāno divo agne bṛhatā rocanena ǁ
Padapatha Devanagari Accented
त्वम् । त्वा॒ । व॒यम् । सु॒ऽध्यः॑ । नव्य॑म् । अ॒ग्ने॒ । सु॒म्न॒ऽयवः॑ । ई॒म॒हे॒ । दे॒व॒ऽयन्तः॑ ।
त्वम् । विशः॑ । अ॒न॒यः॒ । दीद्या॑नः । दि॒वः । अ॒ग्ने॒ । बृ॒ह॒ता । रो॒च॒नेन॑ ॥
Padapatha Devanagari Nonaccented
त्वम् । त्वा । वयम् । सुऽध्यः । नव्यम् । अग्ने । सुम्नऽयवः । ईमहे । देवऽयन्तः ।
त्वम् । विशः । अनयः । दीद्यानः । दिवः । अग्ने । बृहता । रोचनेन ॥
Padapatha Transcription Accented
tvám ǀ tvā ǀ vayám ǀ su-dhyáḥ ǀ návyam ǀ agne ǀ sumna-yávaḥ ǀ īmahe ǀ deva-yántaḥ ǀ
tvám ǀ víśaḥ ǀ anayaḥ ǀ dī́dyānaḥ ǀ diváḥ ǀ agne ǀ bṛhatā́ ǀ rocanéna ǁ
Padapatha Transcription Nonaccented
tvam ǀ tvā ǀ vayam ǀ su-dhyaḥ ǀ navyam ǀ agne ǀ sumna-yavaḥ ǀ īmahe ǀ deva-yantaḥ ǀ
tvam ǀ viśaḥ ǀ anayaḥ ǀ dīdyānaḥ ǀ divaḥ ǀ agne ǀ bṛhatā ǀ rocanena ǁ
06.001.08 (Mandala. Sukta. Rik)
4.4.36.03 (Ashtaka. Adhyaya. Varga. Rik)
06.01.008 (Mandala. Anuvāka. Rik)
Samhita Devanagari Accented
वि॒शां क॒विं वि॒श्पतिं॒ शश्व॑तीनां नि॒तोश॑नं वृष॒भं च॑र्षणी॒नां ।
प्रेती॑षणिमि॒षयं॑तं पाव॒कं राजं॑तम॒ग्निं य॑ज॒तं र॑यी॒णां ॥
Samhita Devanagari Nonaccented
विशां कविं विश्पतिं शश्वतीनां नितोशनं वृषभं चर्षणीनां ।
प्रेतीषणिमिषयंतं पावकं राजंतमग्निं यजतं रयीणां ॥
Samhita Transcription Accented
viśā́m kavím viśpátim śáśvatīnām nitóśanam vṛṣabhám carṣaṇīnā́m ǀ
prétīṣaṇimiṣáyantam pāvakám rā́jantamagním yajatám rayīṇā́m ǁ
Samhita Transcription Nonaccented
viśām kavim viśpatim śaśvatīnām nitośanam vṛṣabham carṣaṇīnām ǀ
pretīṣaṇimiṣayantam pāvakam rājantamagnim yajatam rayīṇām ǁ
Padapatha Devanagari Accented
वि॒शाम् । क॒विम् । वि॒श्पति॑म् । शश्व॑तीनाम् । नि॒ऽतोश॑नम् । वृ॒ष॒भम् । च॒र्ष॒णी॒नाम् ।
प्रेति॑ऽइषणिम् । इ॒षय॑न्तम् । पा॒व॒कम् । राज॑न्तम् । अ॒ग्निम् । य॒ज॒तम् । र॒यी॒णाम् ॥
Padapatha Devanagari Nonaccented
विशाम् । कविम् । विश्पतिम् । शश्वतीनाम् । निऽतोशनम् । वृषभम् । चर्षणीनाम् ।
प्रेतिऽइषणिम् । इषयन्तम् । पावकम् । राजन्तम् । अग्निम् । यजतम् । रयीणाम् ॥
Padapatha Transcription Accented
viśā́m ǀ kavím ǀ viśpátim ǀ śáśvatīnām ǀ ni-tóśanam ǀ vṛṣabhám ǀ carṣaṇīnā́m ǀ
préti-iṣaṇim ǀ iṣáyantam ǀ pāvakám ǀ rā́jantam ǀ agním ǀ yajatám ǀ rayīṇā́m ǁ
Padapatha Transcription Nonaccented
viśām ǀ kavim ǀ viśpatim ǀ śaśvatīnām ǀ ni-tośanam ǀ vṛṣabham ǀ carṣaṇīnām ǀ
preti-iṣaṇim ǀ iṣayantam ǀ pāvakam ǀ rājantam ǀ agnim ǀ yajatam ǀ rayīṇām ǁ
06.001.09 (Mandala. Sukta. Rik)
4.4.36.04 (Ashtaka. Adhyaya. Varga. Rik)
06.01.009 (Mandala. Anuvāka. Rik)
Samhita Devanagari Accented
सो अ॑ग्न ईजे शश॒मे च॒ मर्तो॒ यस्त॒ आन॑ट् स॒मिधा॑ ह॒व्यदा॑तिं ।
य आहु॑तिं॒ परि॒ वेदा॒ नमो॑भि॒र्विश्वेत्स वा॒मा द॑धते॒ त्वोतः॑ ॥
Samhita Devanagari Nonaccented
सो अग्न ईजे शशमे च मर्तो यस्त आनट् समिधा हव्यदातिं ।
य आहुतिं परि वेदा नमोभिर्विश्वेत्स वामा दधते त्वोतः ॥
Samhita Transcription Accented
só agna īje śaśamé ca márto yásta ā́naṭ samídhā havyádātim ǀ
yá ā́hutim pári védā námobhirvíśvétsá vāmā́ dadhate tvótaḥ ǁ
Samhita Transcription Nonaccented
so agna īje śaśame ca marto yasta ānaṭ samidhā havyadātim ǀ
ya āhutim pari vedā namobhirviśvetsa vāmā dadhate tvotaḥ ǁ
Padapatha Devanagari Accented
सः । अ॒ग्ने॒ । ई॒जे॒ । श॒श॒मे । च॒ । मर्तः॑ । यः । ते॒ । आन॑ट् । स॒म्ऽइधा॑ । ह॒व्यऽदा॑तिम् ।
यः । आऽहु॑तिम् । परि॑ । वे॒द॒ । नमः॑ऽभिः । विश्वा॑ । इत् । सः । वा॒मा । द॒ध॒ते॒ । त्वाऽऊ॑तः ॥
Padapatha Devanagari Nonaccented
सः । अग्ने । ईजे । शशमे । च । मर्तः । यः । ते । आनट् । सम्ऽइधा । हव्यऽदातिम् ।
यः । आऽहुतिम् । परि । वेद । नमःऽभिः । विश्वा । इत् । सः । वामा । दधते । त्वाऽऊतः ॥
Padapatha Transcription Accented
sáḥ ǀ agne ǀ īje ǀ śaśamé ǀ ca ǀ mártaḥ ǀ yáḥ ǀ te ǀ ā́naṭ ǀ sam-ídhā ǀ havyá-dātim ǀ
yáḥ ǀ ā́-hutim ǀ pári ǀ veda ǀ námaḥ-bhiḥ ǀ víśvā ǀ ít ǀ sáḥ ǀ vāmā́ ǀ dadhate ǀ tvā́-ūtaḥ ǁ
Padapatha Transcription Nonaccented
saḥ ǀ agne ǀ īje ǀ śaśame ǀ ca ǀ martaḥ ǀ yaḥ ǀ te ǀ ānaṭ ǀ sam-idhā ǀ havya-dātim ǀ
yaḥ ǀ ā-hutim ǀ pari ǀ veda ǀ namaḥ-bhiḥ ǀ viśvā ǀ it ǀ saḥ ǀ vāmā ǀ dadhate ǀ tvā-ūtaḥ ǁ
06.001.10 (Mandala. Sukta. Rik)
4.4.36.05 (Ashtaka. Adhyaya. Varga. Rik)
06.01.010 (Mandala. Anuvāka. Rik)
Samhita Devanagari Accented
अ॒स्मा उ॑ ते॒ महि॑ म॒हे वि॑धेम॒ नमो॑भिरग्ने स॒मिधो॒त ह॒व्यैः ।
वेदी॑ सूनो सहसो गी॒र्भिरु॒क्थैरा ते॑ भ॒द्रायां॑ सुम॒तौ य॑तेम ॥
Samhita Devanagari Nonaccented
अस्मा उ ते महि महे विधेम नमोभिरग्ने समिधोत हव्यैः ।
वेदी सूनो सहसो गीर्भिरुक्थैरा ते भद्रायां सुमतौ यतेम ॥
Samhita Transcription Accented
asmā́ u te máhi mahé vidhema námobhiragne samídhotá havyáiḥ ǀ
védī sūno sahaso gīrbhíruktháirā́ te bhadrā́yām sumatáu yatema ǁ
Samhita Transcription Nonaccented
asmā u te mahi mahe vidhema namobhiragne samidhota havyaiḥ ǀ
vedī sūno sahaso gīrbhirukthairā te bhadrāyām sumatau yatema ǁ
Padapatha Devanagari Accented
अ॒स्मै । ऊं॒ इति॑ । ते॒ । महि॑ । म॒हे । वि॒धे॒म॒ । नमः॑ऽभिः । अ॒ग्ने॒ । स॒म्ऽइधा॑ । उ॒त । ह॒व्यैः ।
वेदी॑ । सू॒नो॒ इति॑ । स॒ह॒सः॒ । गीः॒ऽभिः । उ॒क्थैः । आ । ते॒ । भ॒द्राया॑म् । सु॒ऽम॒तौ । य॒ते॒म॒ ॥
Padapatha Devanagari Nonaccented
अस्मै । ऊं इति । ते । महि । महे । विधेम । नमःऽभिः । अग्ने । सम्ऽइधा । उत । हव्यैः ।
वेदी । सूनो इति । सहसः । गीःऽभिः । उक्थैः । आ । ते । भद्रायाम् । सुऽमतौ । यतेम ॥
Padapatha Transcription Accented
asmái ǀ ūṃ íti ǀ te ǀ máhi ǀ mahé ǀ vidhema ǀ námaḥ-bhiḥ ǀ agne ǀ sam-ídhā ǀ utá ǀ havyáiḥ ǀ
védī ǀ sūno íti ǀ sahasaḥ ǀ gīḥ-bhíḥ ǀ uktháiḥ ǀ ā́ ǀ te ǀ bhadrā́yām ǀ su-matáu ǀ yatema ǁ
Padapatha Transcription Nonaccented
asmai ǀ ūṃ iti ǀ te ǀ mahi ǀ mahe ǀ vidhema ǀ namaḥ-bhiḥ ǀ agne ǀ sam-idhā ǀ uta ǀ havyaiḥ ǀ
vedī ǀ sūno iti ǀ sahasaḥ ǀ gīḥ-bhiḥ ǀ ukthaiḥ ǀ ā ǀ te ǀ bhadrāyām ǀ su-matau ǀ yatema ǁ
06.001.11 (Mandala. Sukta. Rik)
4.4.36.06 (Ashtaka. Adhyaya. Varga. Rik)
06.01.011 (Mandala. Anuvāka. Rik)
Samhita Devanagari Accented
आ यस्त॒तंथ॒ रोद॑सी॒ वि भा॒सा श्रवो॑भिश्च श्रव॒स्य१॒॑स्तरु॑त्रः ।
बृ॒हद्भि॒र्वाजैः॒ स्थवि॑रेभिर॒स्मे रे॒वद्भि॑रग्ने वित॒रं वि भा॑हि ॥
Samhita Devanagari Nonaccented
आ यस्ततंथ रोदसी वि भासा श्रवोभिश्च श्रवस्यस्तरुत्रः ।
बृहद्भिर्वाजैः स्थविरेभिरस्मे रेवद्भिरग्ने वितरं वि भाहि ॥
Samhita Transcription Accented
ā́ yástatántha ródasī ví bhāsā́ śrávobhiśca śravasyástárutraḥ ǀ
bṛhádbhirvā́jaiḥ sthávirebhirasmé revádbhiragne vitarám ví bhāhi ǁ
Samhita Transcription Nonaccented
ā yastatantha rodasī vi bhāsā śravobhiśca śravasyastarutraḥ ǀ
bṛhadbhirvājaiḥ sthavirebhirasme revadbhiragne vitaram vi bhāhi ǁ
Padapatha Devanagari Accented
आ । यः । त॒तन्थ॑ । रोद॑सी॒ इति॑ । वि । भा॒सा । श्रवः॑ऽभिः । च॒ । श्र॒व॒स्यः॑ । तरु॑त्रः ।
बृ॒हत्ऽभिः॑ । वाजैः॑ । स्थवि॑रेभिः । अ॒स्मे इति॑ । रे॒वत्ऽभिः॑ । अ॒ग्ने॒ । वि॒ऽत॒रम् । वि । भा॒हि॒ ॥
Padapatha Devanagari Nonaccented
आ । यः । ततन्थ । रोदसी इति । वि । भासा । श्रवःऽभिः । च । श्रवस्यः । तरुत्रः ।
बृहत्ऽभिः । वाजैः । स्थविरेभिः । अस्मे इति । रेवत्ऽभिः । अग्ने । विऽतरम् । वि । भाहि ॥
Padapatha Transcription Accented
ā́ ǀ yáḥ ǀ tatántha ǀ ródasī íti ǀ ví ǀ bhāsā́ ǀ śrávaḥ-bhiḥ ǀ ca ǀ śravasyáḥ ǀ tárutraḥ ǀ
bṛhát-bhiḥ ǀ vā́jaiḥ ǀ sthávirebhiḥ ǀ asmé íti ǀ revát-bhiḥ ǀ agne ǀ vi-tarám ǀ ví ǀ bhāhi ǁ
Padapatha Transcription Nonaccented
ā ǀ yaḥ ǀ tatantha ǀ rodasī iti ǀ vi ǀ bhāsā ǀ śravaḥ-bhiḥ ǀ ca ǀ śravasyaḥ ǀ tarutraḥ ǀ
bṛhat-bhiḥ ǀ vājaiḥ ǀ sthavirebhiḥ ǀ asme iti ǀ revat-bhiḥ ǀ agne ǀ vi-taram ǀ vi ǀ bhāhi ǁ
06.001.12 (Mandala. Sukta. Rik)
4.4.36.07 (Ashtaka. Adhyaya. Varga. Rik)
06.01.012 (Mandala. Anuvāka. Rik)
Samhita Devanagari Accented
नृ॒वद्व॑सो॒ सद॒मिद्धे॑ह्य॒स्मे भूरि॑ तो॒काय॒ तन॑याय प॒श्वः ।
पू॒र्वीरिषो॑ बृह॒तीरा॒रेअ॑घा अ॒स्मे भ॒द्रा सौ॑श्रव॒सानि॑ संतु ॥
Samhita Devanagari Nonaccented
नृवद्वसो सदमिद्धेह्यस्मे भूरि तोकाय तनयाय पश्वः ।
पूर्वीरिषो बृहतीरारेअघा अस्मे भद्रा सौश्रवसानि संतु ॥
Samhita Transcription Accented
nṛvádvaso sádamíddhehyasmé bhū́ri tokā́ya tánayāya paśváḥ ǀ
pūrvī́ríṣo bṛhatī́rāréaghā asmé bhadrā́ sauśravasā́ni santu ǁ
Samhita Transcription Nonaccented
nṛvadvaso sadamiddhehyasme bhūri tokāya tanayāya paśvaḥ ǀ
pūrvīriṣo bṛhatīrāreaghā asme bhadrā sauśravasāni santu ǁ
Padapatha Devanagari Accented
नृ॒ऽवत् । व॒सो॒ इति॑ । सद॑म् । इत् । धे॒हि॒ । अ॒स्मे इति॑ । भूरि॑ । तो॒काय॑ । तन॑याय । प॒श्वः ।
पू॒र्वीः । इषः॑ । बृ॒ह॒तीः । आ॒रेऽअ॑घाः । अ॒स्मे इति॑ । भ॒द्रा । सौ॒श्र॒व॒सानि॑ । स॒न्तु॒ ॥
Padapatha Devanagari Nonaccented
नृऽवत् । वसो इति । सदम् । इत् । धेहि । अस्मे इति । भूरि । तोकाय । तनयाय । पश्वः ।
पूर्वीः । इषः । बृहतीः । आरेऽअघाः । अस्मे इति । भद्रा । सौश्रवसानि । सन्तु ॥
Padapatha Transcription Accented
nṛ-vát ǀ vaso íti ǀ sádam ǀ ít ǀ dhehi ǀ asmé íti ǀ bhū́ri ǀ tokā́ya ǀ tánayāya ǀ paśváḥ ǀ
pūrvī́ḥ ǀ íṣaḥ ǀ bṛhatī́ḥ ǀ āré-aghāḥ ǀ asmé íti ǀ bhadrā́ ǀ sauśravasā́ni ǀ santu ǁ
Padapatha Transcription Nonaccented
nṛ-vat ǀ vaso iti ǀ sadam ǀ it ǀ dhehi ǀ asme iti ǀ bhūri ǀ tokāya ǀ tanayāya ǀ paśvaḥ ǀ
pūrvīḥ ǀ iṣaḥ ǀ bṛhatīḥ ǀ āre-aghāḥ ǀ asme iti ǀ bhadrā ǀ sauśravasāni ǀ santu ǁ
06.001.13 (Mandala. Sukta. Rik)
4.4.36.08 (Ashtaka. Adhyaya. Varga. Rik)
06.01.013 (Mandala. Anuvāka. Rik)
Samhita Devanagari Accented
पु॒रूण्य॑ग्ने पुरु॒धा त्वा॒या वसू॑नि राजन्व॒सुता॑ ते अश्यां ।
पु॒रूणि॒ हि त्वे पु॑रुवार॒ संत्यग्ने॒ वसु॑ विध॒ते राज॑नि॒ त्वे ॥
Samhita Devanagari Nonaccented
पुरूण्यग्ने पुरुधा त्वाया वसूनि राजन्वसुता ते अश्यां ।
पुरूणि हि त्वे पुरुवार संत्यग्ने वसु विधते राजनि त्वे ॥
Samhita Transcription Accented
purū́ṇyagne purudhā́ tvāyā́ vásūni rājanvasútā te aśyām ǀ
purū́ṇi hí tvé puruvāra sántyágne vásu vidhaté rā́jani tvé ǁ
Samhita Transcription Nonaccented
purūṇyagne purudhā tvāyā vasūni rājanvasutā te aśyām ǀ
purūṇi hi tve puruvāra santyagne vasu vidhate rājani tve ǁ
Padapatha Devanagari Accented
पु॒रूणि॑ । अ॒ग्ने॒ । पु॒रु॒धा । त्वा॒ऽया । वसू॑नि । रा॒ज॒न् । व॒सुता॑ । ते॒ । अ॒श्या॒म् ।
पु॒रूणि॑ । हि । त्वे इति॑ । पु॒रु॒ऽवा॒र॒ । सन्ति॑ । अग्ने॑ । वसु॑ । वि॒ध॒ते । राज॑नि । त्वे इति॑ ॥
Padapatha Devanagari Nonaccented
पुरूणि । अग्ने । पुरुधा । त्वाऽया । वसूनि । राजन् । वसुता । ते । अश्याम् ।
पुरूणि । हि । त्वे इति । पुरुऽवार । सन्ति । अग्ने । वसु । विधते । राजनि । त्वे इति ॥
Padapatha Transcription Accented
purū́ṇi ǀ agne ǀ purudhā́ ǀ tvā-yā́ ǀ vásūni ǀ rājan ǀ vasútā ǀ te ǀ aśyām ǀ
purū́ṇi ǀ hí ǀ tvé íti ǀ puru-vāra ǀ sánti ǀ ágne ǀ vásu ǀ vidhaté ǀ rā́jani ǀ tvé íti ǁ
Padapatha Transcription Nonaccented
purūṇi ǀ agne ǀ purudhā ǀ tvā-yā ǀ vasūni ǀ rājan ǀ vasutā ǀ te ǀ aśyām ǀ
purūṇi ǀ hi ǀ tve iti ǀ puru-vāra ǀ santi ǀ agne ǀ vasu ǀ vidhate ǀ rājani ǀ tve iti ǁ