|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 9
|
1. Info |
| To: | agni vaiśvānara | |
| From: | bharadvāja bārhaspatya | |
| Metres: | 1st set of styles: paṅktiḥ (3, 4); virāṭtrisṭup (1); bhurikpaṅkti (2); nicṛttriṣṭup (5); triṣṭup (6); bhurigjagatī (7) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.009.01 (Mandala. Sukta. Rik)
4.5.11.01 (Ashtaka. Adhyaya. Varga. Rik)
06.01.069 (Mandala. Anuvāka. Rik)
Samhita Devanagari Accented
अह॑श्च कृ॒ष्णमह॒रर्जु॑नं च॒ वि व॑र्तेते॒ रज॑सी वे॒द्याभिः॑ ।
वै॒श्वा॒न॒रो जाय॑मानो॒ न राजावा॑तिर॒ज्ज्योति॑षा॒ग्निस्तमां॑सि ॥
Samhita Devanagari Nonaccented
अहश्च कृष्णमहरर्जुनं च वि वर्तेते रजसी वेद्याभिः ।
वैश्वानरो जायमानो न राजावातिरज्ज्योतिषाग्निस्तमांसि ॥
Samhita Transcription Accented
áhaśca kṛṣṇámáharárjunam ca ví vartete rájasī vedyā́bhiḥ ǀ
vaiśvānaró jā́yamāno ná rā́jā́vātirajjyótiṣāgnístámāṃsi ǁ
Samhita Transcription Nonaccented
ahaśca kṛṣṇamahararjunam ca vi vartete rajasī vedyābhiḥ ǀ
vaiśvānaro jāyamāno na rājāvātirajjyotiṣāgnistamāṃsi ǁ
Padapatha Devanagari Accented
अहः॑ । च॒ । कृ॒ष्णम् । अहः॑ । अर्जु॑नम् । च॒ । वि । व॒र्ते॒ते॒ इति॑ । रज॑सी॒ इति॑ । वे॒द्याभिः॑ ।
वै॒श्वा॒न॒रः । जाय॑मानः । न । राजा॑ । अव॑ । अ॒ति॒र॒त् । ज्योति॑षा । अ॒ग्निः । तमां॑सि ॥
Padapatha Devanagari Nonaccented
अहः । च । कृष्णम् । अहः । अर्जुनम् । च । वि । वर्तेते इति । रजसी इति । वेद्याभिः ।
वैश्वानरः । जायमानः । न । राजा । अव । अतिरत् । ज्योतिषा । अग्निः । तमांसि ॥
Padapatha Transcription Accented
áhaḥ ǀ ca ǀ kṛṣṇám ǀ áhaḥ ǀ árjunam ǀ ca ǀ ví ǀ vartete íti ǀ rájasī íti ǀ vedyā́bhiḥ ǀ
vaiśvānaráḥ ǀ jā́yamānaḥ ǀ ná ǀ rā́jā ǀ áva ǀ atirat ǀ jyótiṣā ǀ agníḥ ǀ támāṃsi ǁ
Padapatha Transcription Nonaccented
ahaḥ ǀ ca ǀ kṛṣṇam ǀ ahaḥ ǀ arjunam ǀ ca ǀ vi ǀ vartete iti ǀ rajasī iti ǀ vedyābhiḥ ǀ
vaiśvānaraḥ ǀ jāyamānaḥ ǀ na ǀ rājā ǀ ava ǀ atirat ǀ jyotiṣā ǀ agniḥ ǀ tamāṃsi ǁ
06.009.02 (Mandala. Sukta. Rik)
4.5.11.02 (Ashtaka. Adhyaya. Varga. Rik)
06.01.070 (Mandala. Anuvāka. Rik)
Samhita Devanagari Accented
नाहं तंतुं॒ न वि जा॑ना॒म्योतुं॒ न यं वयं॑ति सम॒रेऽत॑मानाः ।
कस्य॑ स्वित्पु॒त्र इ॒ह वक्त्वा॑नि प॒रो व॑दा॒त्यव॑रेण पि॒त्रा ॥
Samhita Devanagari Nonaccented
नाहं तंतुं न वि जानाम्योतुं न यं वयंति समरेऽतमानाः ।
कस्य स्वित्पुत्र इह वक्त्वानि परो वदात्यवरेण पित्रा ॥
Samhita Transcription Accented
nā́hám tántum ná ví jānāmyótum ná yám váyanti samaré’tamānāḥ ǀ
kásya svitputrá ihá váktvāni paró vadātyávareṇa pitrā́ ǁ
Samhita Transcription Nonaccented
nāham tantum na vi jānāmyotum na yam vayanti samare’tamānāḥ ǀ
kasya svitputra iha vaktvāni paro vadātyavareṇa pitrā ǁ
Padapatha Devanagari Accented
न । अ॒हम् । तन्तु॑म् । न । वि । जा॒ना॒मि॒ । ओतु॑म् । न । यम् । वय॑न्ति । स॒म्ऽअ॒रे । अत॑मानाः ।
कस्य॑ । स्वि॒त् । पु॒त्रः । इ॒ह । वक्त्वा॑नि । प॒रः । व॒दा॒ति॒ । अव॑रेण । पि॒त्रा ॥
Padapatha Devanagari Nonaccented
न । अहम् । तन्तुम् । न । वि । जानामि । ओतुम् । न । यम् । वयन्ति । सम्ऽअरे । अतमानाः ।
कस्य । स्वित् । पुत्रः । इह । वक्त्वानि । परः । वदाति । अवरेण । पित्रा ॥
Padapatha Transcription Accented
ná ǀ ahám ǀ tántum ǀ ná ǀ ví ǀ jānāmi ǀ ótum ǀ ná ǀ yám ǀ váyanti ǀ sam-aré ǀ átamānāḥ ǀ
kásya ǀ svit ǀ putráḥ ǀ ihá ǀ váktvāni ǀ paráḥ ǀ vadāti ǀ ávareṇa ǀ pitrā́ ǁ
Padapatha Transcription Nonaccented
na ǀ aham ǀ tantum ǀ na ǀ vi ǀ jānāmi ǀ otum ǀ na ǀ yam ǀ vayanti ǀ sam-are ǀ atamānāḥ ǀ
kasya ǀ svit ǀ putraḥ ǀ iha ǀ vaktvāni ǀ paraḥ ǀ vadāti ǀ avareṇa ǀ pitrā ǁ
06.009.03 (Mandala. Sukta. Rik)
4.5.11.03 (Ashtaka. Adhyaya. Varga. Rik)
06.01.071 (Mandala. Anuvāka. Rik)
Samhita Devanagari Accented
स इत्तंतुं॒ स वि जा॑ना॒त्योतुं॒ स वक्त्वा॑न्यृतु॒था व॑दाति ।
य ईं॒ चिके॑तद॒मृत॑स्य गो॒पा अ॒वश्चर॑न्प॒रो अ॒न्येन॒ पश्य॑न् ॥
Samhita Devanagari Nonaccented
स इत्तंतुं स वि जानात्योतुं स वक्त्वान्यृतुथा वदाति ।
य ईं चिकेतदमृतस्य गोपा अवश्चरन्परो अन्येन पश्यन् ॥
Samhita Transcription Accented
sá íttántum sá ví jānātyótum sá váktvānyṛtuthā́ vadāti ǀ
yá īm cíketadamṛ́tasya gopā́ aváścáranparó anyéna páśyan ǁ
Samhita Transcription Nonaccented
sa ittantum sa vi jānātyotum sa vaktvānyṛtuthā vadāti ǀ
ya īm ciketadamṛtasya gopā avaścaranparo anyena paśyan ǁ
Padapatha Devanagari Accented
सः । इत् । तन्तु॑म् । सः । वि । जा॒ना॒ति॒ । ओतु॑म् । सः । वक्त्वा॑नि । ऋ॒तु॒ऽथा । व॒दा॒ति॒ ।
यः । ई॒म् । चिके॑तत् । अ॒मृत॑स्य । गो॒पाः । अ॒वः । चर॑न् । प॒रः । अ॒न्येन॑ । पश्य॑न् ॥
Padapatha Devanagari Nonaccented
सः । इत् । तन्तुम् । सः । वि । जानाति । ओतुम् । सः । वक्त्वानि । ऋतुऽथा । वदाति ।
यः । ईम् । चिकेतत् । अमृतस्य । गोपाः । अवः । चरन् । परः । अन्येन । पश्यन् ॥
Padapatha Transcription Accented
sáḥ ǀ ít ǀ tántum ǀ sáḥ ǀ ví ǀ jānāti ǀ ótum ǀ sáḥ ǀ váktvāni ǀ ṛtu-thā́ ǀ vadāti ǀ
yáḥ ǀ īm ǀ cíketat ǀ amṛ́tasya ǀ gopā́ḥ ǀ aváḥ ǀ cáran ǀ paráḥ ǀ anyéna ǀ páśyan ǁ
Padapatha Transcription Nonaccented
saḥ ǀ it ǀ tantum ǀ saḥ ǀ vi ǀ jānāti ǀ otum ǀ saḥ ǀ vaktvāni ǀ ṛtu-thā ǀ vadāti ǀ
yaḥ ǀ īm ǀ ciketat ǀ amṛtasya ǀ gopāḥ ǀ avaḥ ǀ caran ǀ paraḥ ǀ anyena ǀ paśyan ǁ
06.009.04 (Mandala. Sukta. Rik)
4.5.11.04 (Ashtaka. Adhyaya. Varga. Rik)
06.01.072 (Mandala. Anuvāka. Rik)
Samhita Devanagari Accented
अ॒यं होता॑ प्रथ॒मः पश्य॑ते॒ममि॒दं ज्योति॑र॒मृतं॒ मर्त्ये॑षु ।
अ॒यं स ज॑ज्ञे ध्रु॒व आ निष॒त्तोऽम॑र्त्यस्त॒न्वा॒३॒॑ वर्ध॑मानः ॥
Samhita Devanagari Nonaccented
अयं होता प्रथमः पश्यतेममिदं ज्योतिरमृतं मर्त्येषु ।
अयं स जज्ञे ध्रुव आ निषत्तोऽमर्त्यस्तन्वा वर्धमानः ॥
Samhita Transcription Accented
ayám hótā prathamáḥ páśyatemámidám jyótiramṛ́tam mártyeṣu ǀ
ayám sá jajñe dhruvá ā́ níṣattó’martyastanvā́ várdhamānaḥ ǁ
Samhita Transcription Nonaccented
ayam hotā prathamaḥ paśyatemamidam jyotiramṛtam martyeṣu ǀ
ayam sa jajñe dhruva ā niṣatto’martyastanvā vardhamānaḥ ǁ
Padapatha Devanagari Accented
अ॒यम् । होता॑ । प्र॒थ॒मः । पश्य॑त । इ॒मम् । इ॒दम् । ज्योतिः॑ । अ॒मृत॑म् । मर्त्ये॑षु ।
अ॒यम् । सः । ज॒ज्ञे॒ । ध्रु॒वः । आ । निऽस॑त्तः । अम॑र्त्यः । त॒न्वा॑ । वर्ध॑मानः ॥
Padapatha Devanagari Nonaccented
अयम् । होता । प्रथमः । पश्यत । इमम् । इदम् । ज्योतिः । अमृतम् । मर्त्येषु ।
अयम् । सः । जज्ञे । ध्रुवः । आ । निऽसत्तः । अमर्त्यः । तन्वा । वर्धमानः ॥
Padapatha Transcription Accented
ayám ǀ hótā ǀ prathamáḥ ǀ páśyata ǀ imám ǀ idám ǀ jyótiḥ ǀ amṛ́tam ǀ mártyeṣu ǀ
ayám ǀ sáḥ ǀ jajñe ǀ dhruváḥ ǀ ā́ ǀ ní-sattaḥ ǀ ámartyaḥ ǀ tanvā́ ǀ várdhamānaḥ ǁ
Padapatha Transcription Nonaccented
ayam ǀ hotā ǀ prathamaḥ ǀ paśyata ǀ imam ǀ idam ǀ jyotiḥ ǀ amṛtam ǀ martyeṣu ǀ
ayam ǀ saḥ ǀ jajñe ǀ dhruvaḥ ǀ ā ǀ ni-sattaḥ ǀ amartyaḥ ǀ tanvā ǀ vardhamānaḥ ǁ
06.009.05 (Mandala. Sukta. Rik)
4.5.11.05 (Ashtaka. Adhyaya. Varga. Rik)
06.01.073 (Mandala. Anuvāka. Rik)
Samhita Devanagari Accented
ध्रु॒वं ज्योति॒र्निहि॑तं दृ॒शये॒ कं मनो॒ जवि॑ष्ठं प॒तय॑त्स्वं॒तः ।
विश्वे॑ दे॒वाः सम॑नसः॒ सके॑ता॒ एकं॒ क्रतु॑म॒भि वि यं॑ति सा॒धु ॥
Samhita Devanagari Nonaccented
ध्रुवं ज्योतिर्निहितं दृशये कं मनो जविष्ठं पतयत्स्वंतः ।
विश्वे देवाः समनसः सकेता एकं क्रतुमभि वि यंति साधु ॥
Samhita Transcription Accented
dhruvám jyótirníhitam dṛśáye kám máno jáviṣṭham patáyatsvantáḥ ǀ
víśve devā́ḥ sámanasaḥ sáketā ékam krátumabhí ví yanti sādhú ǁ
Samhita Transcription Nonaccented
dhruvam jyotirnihitam dṛśaye kam mano javiṣṭham patayatsvantaḥ ǀ
viśve devāḥ samanasaḥ saketā ekam kratumabhi vi yanti sādhu ǁ
Padapatha Devanagari Accented
ध्रु॒वम् । ज्योतिः॑ । निऽहि॑तम् । दृ॒शये॑ । कम् । मनः॑ । जवि॑ष्ठम् । प॒तय॑त्ऽसु । अ॒न्तरिति॑ ।
विश्वे॑ । दे॒वाः । सऽम॑नसः । सऽके॑ताः । एक॑म् । क्रतु॑म् । अ॒भि । वि । या॒न्ति॒ । सा॒धु ॥
Padapatha Devanagari Nonaccented
ध्रुवम् । ज्योतिः । निऽहितम् । दृशये । कम् । मनः । जविष्ठम् । पतयत्ऽसु । अन्तरिति ।
विश्वे । देवाः । सऽमनसः । सऽकेताः । एकम् । क्रतुम् । अभि । वि । यान्ति । साधु ॥
Padapatha Transcription Accented
dhruvám ǀ jyótiḥ ǀ ní-hitam ǀ dṛśáye ǀ kám ǀ mánaḥ ǀ jáviṣṭham ǀ patáyat-su ǀ antáríti ǀ
víśve ǀ devā́ḥ ǀ sá-manasaḥ ǀ sá-ketāḥ ǀ ékam ǀ krátum ǀ abhí ǀ ví ǀ yānti ǀ sādhú ǁ
Padapatha Transcription Nonaccented
dhruvam ǀ jyotiḥ ǀ ni-hitam ǀ dṛśaye ǀ kam ǀ manaḥ ǀ javiṣṭham ǀ patayat-su ǀ antariti ǀ
viśve ǀ devāḥ ǀ sa-manasaḥ ǀ sa-ketāḥ ǀ ekam ǀ kratum ǀ abhi ǀ vi ǀ yānti ǀ sādhu ǁ
06.009.06 (Mandala. Sukta. Rik)
4.5.11.06 (Ashtaka. Adhyaya. Varga. Rik)
06.01.074 (Mandala. Anuvāka. Rik)
Samhita Devanagari Accented
वि मे॒ कर्णा॑ पतयतो॒ वि चक्षु॒र्वी॒३॒॑दं ज्योति॒र्हृद॑य॒ आहि॑तं॒ यत् ।
वि मे॒ मन॑श्चरति दू॒रआ॑धीः॒ किं स्वि॑द्व॒क्ष्यामि॒ किमु॒ नू म॑निष्ये ॥
Samhita Devanagari Nonaccented
वि मे कर्णा पतयतो वि चक्षुर्वीदं ज्योतिर्हृदय आहितं यत् ।
वि मे मनश्चरति दूरआधीः किं स्विद्वक्ष्यामि किमु नू मनिष्ये ॥
Samhita Transcription Accented
ví me kárṇā patayato ví cákṣurvī́dám jyótirhṛ́daya ā́hitam yát ǀ
ví me mánaścarati dūráādhīḥ kím svidvakṣyā́mi kímu nū́ maniṣye ǁ
Samhita Transcription Nonaccented
vi me karṇā patayato vi cakṣurvīdam jyotirhṛdaya āhitam yat ǀ
vi me manaścarati dūraādhīḥ kim svidvakṣyāmi kimu nū maniṣye ǁ
Padapatha Devanagari Accented
वि । मे॒ । कर्णा॑ । प॒त॒य॒तः॒ । वि । चक्षुः॑ । वि । इ॒दम् । ज्योतिः॑ । हृद॑ये । आऽहि॑तम् । यत् ।
वि । मे॒ । मनः॑ । च॒र॒ति॒ । दू॒रेऽआ॑धीः । किम् । स्वि॒त् । व॒क्ष्यामि॑ । किम् । ऊं॒ इति॑ । नु । म॒नि॒ष्ये॒ ॥
Padapatha Devanagari Nonaccented
वि । मे । कर्णा । पतयतः । वि । चक्षुः । वि । इदम् । ज्योतिः । हृदये । आऽहितम् । यत् ।
वि । मे । मनः । चरति । दूरेऽआधीः । किम् । स्वित् । वक्ष्यामि । किम् । ऊं इति । नु । मनिष्ये ॥
Padapatha Transcription Accented
ví ǀ me ǀ kárṇā ǀ patayataḥ ǀ ví ǀ cákṣuḥ ǀ ví ǀ idám ǀ jyótiḥ ǀ hṛ́daye ǀ ā́-hitam ǀ yát ǀ
ví ǀ me ǀ mánaḥ ǀ carati ǀ dūré-ādhīḥ ǀ kím ǀ svit ǀ vakṣyā́mi ǀ kím ǀ ūṃ íti ǀ nú ǀ maniṣye ǁ
Padapatha Transcription Nonaccented
vi ǀ me ǀ karṇā ǀ patayataḥ ǀ vi ǀ cakṣuḥ ǀ vi ǀ idam ǀ jyotiḥ ǀ hṛdaye ǀ ā-hitam ǀ yat ǀ
vi ǀ me ǀ manaḥ ǀ carati ǀ dūre-ādhīḥ ǀ kim ǀ svit ǀ vakṣyāmi ǀ kim ǀ ūṃ iti ǀ nu ǀ maniṣye ǁ
06.009.07 (Mandala. Sukta. Rik)
4.5.11.07 (Ashtaka. Adhyaya. Varga. Rik)
06.01.075 (Mandala. Anuvāka. Rik)
Samhita Devanagari Accented
विश्वे॑ दे॒वा अ॑नमस्यन्भिया॒नास्त्वाम॑ग्ने॒ तम॑सि तस्थि॒वांसं॑ ।
वै॒श्वा॒न॒रो॑ऽवतू॒तये॒ नोऽम॑र्त्योऽवतू॒तये॑ नः ॥
Samhita Devanagari Nonaccented
विश्वे देवा अनमस्यन्भियानास्त्वामग्ने तमसि तस्थिवांसं ।
वैश्वानरोऽवतूतये नोऽमर्त्योऽवतूतये नः ॥
Samhita Transcription Accented
víśve devā́ anamasyanbhiyānā́stvā́magne támasi tasthivā́ṃsam ǀ
vaiśvānaró’vatūtáye nó’martyo’vatūtáye naḥ ǁ
Samhita Transcription Nonaccented
viśve devā anamasyanbhiyānāstvāmagne tamasi tasthivāṃsam ǀ
vaiśvānaro’vatūtaye no’martyo’vatūtaye naḥ ǁ
Padapatha Devanagari Accented
विश्वे॑ । दे॒वाः । अ॒न॒म॒स्य॒न् । भि॒या॒नाः । त्वाम् । अ॒ग्ने॒ । तम॑सि । त॒स्थि॒ऽवांस॑म् ।
वै॒श्वा॒न॒रः । अ॒व॒तु॒ । ऊ॒तये॑ । नः॒ । अम॑र्त्यः । अ॒व॒तु॒ । ऊ॒तये॑ । नः॒ ॥
Padapatha Devanagari Nonaccented
विश्वे । देवाः । अनमस्यन् । भियानाः । त्वाम् । अग्ने । तमसि । तस्थिऽवांसम् ।
वैश्वानरः । अवतु । ऊतये । नः । अमर्त्यः । अवतु । ऊतये । नः ॥
Padapatha Transcription Accented
víśve ǀ devā́ḥ ǀ anamasyan ǀ bhiyānā́ḥ ǀ tvā́m ǀ agne ǀ támasi ǀ tasthi-vā́ṃsam ǀ
vaiśvānaráḥ ǀ avatu ǀ ūtáye ǀ naḥ ǀ ámartyaḥ ǀ avatu ǀ ūtáye ǀ naḥ ǁ
Padapatha Transcription Nonaccented
viśve ǀ devāḥ ǀ anamasyan ǀ bhiyānāḥ ǀ tvām ǀ agne ǀ tamasi ǀ tasthi-vāṃsam ǀ
vaiśvānaraḥ ǀ avatu ǀ ūtaye ǀ naḥ ǀ amartyaḥ ǀ avatu ǀ ūtaye ǀ naḥ ǁ