|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 15
|
1. Info |
| To: | agni | |
| From: | bharadvāja bārhaspatya or vītahavya āṅgirasa | |
| Metres: | 1st set of styles: triṣṭup (9-11, 16, 19); nicṛjjagatī (1, 2, 5); bhuriktriṣṭup (4, 14); nicṛdatijagatī (3); nicṛdatiśakvarī (6); jagatī (7); virāḍjagatī (8); paṅktiḥ (12); virāṭtrisṭup (13); brāhmībṛhatī (15); virāḍanuṣṭup (17); svarāḍanuṣṭup (18) 2nd set of styles: jagatī (1, 2, 4, 5, 7-9); triṣṭubh (10-14, 16, 19); śakvarī (3, 15); atiśakvarī (6); anuṣṭubh (17); bṛhatī (18) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.015.01 (Mandala. Sukta. Rik)
4.5.17.01 (Ashtaka. Adhyaya. Varga. Rik)
06.01.107 (Mandala. Anuvāka. Rik)
Samhita Devanagari Accented
इ॒ममू॒ षु वो॒ अति॑थिमुष॒र्बुधं॒ विश्वा॑सां वि॒शां पति॑मृंजसे गि॒रा ।
वेतीद्दि॒वो ज॒नुषा॒ कच्चि॒दा शुचि॒र्ज्योक्चि॑दत्ति॒ गर्भो॒ यदच्यु॑तं ॥
Samhita Devanagari Nonaccented
इममू षु वो अतिथिमुषर्बुधं विश्वासां विशां पतिमृंजसे गिरा ।
वेतीद्दिवो जनुषा कच्चिदा शुचिर्ज्योक्चिदत्ति गर्भो यदच्युतं ॥
Samhita Transcription Accented
imámū ṣú vo átithimuṣarbúdham víśvāsām viśā́m pátimṛñjase girā́ ǀ
vétī́ddivó janúṣā káccidā́ śúcirjyókcidatti gárbho yádácyutam ǁ
Samhita Transcription Nonaccented
imamū ṣu vo atithimuṣarbudham viśvāsām viśām patimṛñjase girā ǀ
vetīddivo januṣā kaccidā śucirjyokcidatti garbho yadacyutam ǁ
Padapatha Devanagari Accented
इ॒मम् । ऊं॒ इति॑ । सु । वः॒ । अति॑थिम् । उ॒षः॒ऽबुध॑म् । विश्वा॑साम् । वि॒शाम् । पति॑म् । ऋ॒ञ्ज॒से॒ । गि॒रा ।
वेति॑ । इत् । दि॒वः । ज॒नुषा॑ । कत् । चि॒त् । आ । शुचिः॑ । ज्योक् । चि॒त् । अ॒त्ति॒ । गर्भः॑ । यत् । अच्यु॑तम् ॥
Padapatha Devanagari Nonaccented
इमम् । ऊं इति । सु । वः । अतिथिम् । उषःऽबुधम् । विश्वासाम् । विशाम् । पतिम् । ऋञ्जसे । गिरा ।
वेति । इत् । दिवः । जनुषा । कत् । चित् । आ । शुचिः । ज्योक् । चित् । अत्ति । गर्भः । यत् । अच्युतम् ॥
Padapatha Transcription Accented
imám ǀ ūṃ íti ǀ sú ǀ vaḥ ǀ átithim ǀ uṣaḥ-búdham ǀ víśvāsām ǀ viśā́m ǀ pátim ǀ ṛñjase ǀ girā́ ǀ
véti ǀ ít ǀ diváḥ ǀ janúṣā ǀ kát ǀ cit ǀ ā́ ǀ śúciḥ ǀ jyók ǀ cit ǀ atti ǀ gárbhaḥ ǀ yát ǀ ácyutam ǁ
Padapatha Transcription Nonaccented
imam ǀ ūṃ iti ǀ su ǀ vaḥ ǀ atithim ǀ uṣaḥ-budham ǀ viśvāsām ǀ viśām ǀ patim ǀ ṛñjase ǀ girā ǀ
veti ǀ it ǀ divaḥ ǀ januṣā ǀ kat ǀ cit ǀ ā ǀ śuciḥ ǀ jyok ǀ cit ǀ atti ǀ garbhaḥ ǀ yat ǀ acyutam ǁ
06.015.02 (Mandala. Sukta. Rik)
4.5.17.02 (Ashtaka. Adhyaya. Varga. Rik)
06.01.108 (Mandala. Anuvāka. Rik)
Samhita Devanagari Accented
मि॒त्रं न यं सुधि॑तं॒ भृग॑वो द॒धुर्वन॒स्पता॒वीड्य॑मू॒र्ध्वशो॑चिषं ।
स त्वं सुप्री॑तो वी॒तह॑व्ये अद्भुत॒ प्रश॑स्तिभिर्महयसे दि॒वेदि॑वे ॥
Samhita Devanagari Nonaccented
मित्रं न यं सुधितं भृगवो दधुर्वनस्पतावीड्यमूर्ध्वशोचिषं ।
स त्वं सुप्रीतो वीतहव्ये अद्भुत प्रशस्तिभिर्महयसे दिवेदिवे ॥
Samhita Transcription Accented
mitrám ná yám súdhitam bhṛ́gavo dadhúrvánaspátāvī́ḍyamūrdhváśociṣam ǀ
sá tvám súprīto vītáhavye adbhuta práśastibhirmahayase divédive ǁ
Samhita Transcription Nonaccented
mitram na yam sudhitam bhṛgavo dadhurvanaspatāvīḍyamūrdhvaśociṣam ǀ
sa tvam suprīto vītahavye adbhuta praśastibhirmahayase divedive ǁ
Padapatha Devanagari Accented
मि॒त्रम् । न । यम् । सुऽधि॑तम् । भृग॑वः । द॒धुः । वन॒स्पतौ॑ । ईड्य॑म् । ऊ॒र्ध्वऽशो॑चिषम् ।
सः । त्वम् । सुऽप्री॑तः । वी॒तऽह॑व्ये । अ॒द्भु॒त॒ । प्रश॑स्तिऽभिः । म॒ह॒य॒से॒ । दि॒वेऽदि॑वे ॥
Padapatha Devanagari Nonaccented
मित्रम् । न । यम् । सुऽधितम् । भृगवः । दधुः । वनस्पतौ । ईड्यम् । ऊर्ध्वऽशोचिषम् ।
सः । त्वम् । सुऽप्रीतः । वीतऽहव्ये । अद्भुत । प्रशस्तिऽभिः । महयसे । दिवेऽदिवे ॥
Padapatha Transcription Accented
mitrám ǀ ná ǀ yám ǀ sú-dhitam ǀ bhṛ́gavaḥ ǀ dadhúḥ ǀ vánaspátau ǀ ī́ḍyam ǀ ūrdhvá-śociṣam ǀ
sáḥ ǀ tvám ǀ sú-prītaḥ ǀ vītá-havye ǀ adbhuta ǀ práśasti-bhiḥ ǀ mahayase ǀ divé-dive ǁ
Padapatha Transcription Nonaccented
mitram ǀ na ǀ yam ǀ su-dhitam ǀ bhṛgavaḥ ǀ dadhuḥ ǀ vanaspatau ǀ īḍyam ǀ ūrdhva-śociṣam ǀ
saḥ ǀ tvam ǀ su-prītaḥ ǀ vīta-havye ǀ adbhuta ǀ praśasti-bhiḥ ǀ mahayase ǀ dive-dive ǁ
06.015.03 (Mandala. Sukta. Rik)
4.5.17.03 (Ashtaka. Adhyaya. Varga. Rik)
06.01.109 (Mandala. Anuvāka. Rik)
Samhita Devanagari Accented
स त्वं दक्ष॑स्यावृ॒को वृ॒धो भू॑र॒र्यः पर॒स्यांत॑रस्य॒ तरु॑षः ।
रा॒यः सू॑नो सहसो॒ मर्त्ये॒ष्वा छ॒र्दिर्य॑च्छ वी॒तह॑व्याय स॒प्रथो॑ भ॒रद्वा॑जाय स॒प्रथः॑ ॥
Samhita Devanagari Nonaccented
स त्वं दक्षस्यावृको वृधो भूरर्यः परस्यांतरस्य तरुषः ।
रायः सूनो सहसो मर्त्येष्वा छर्दिर्यच्छ वीतहव्याय सप्रथो भरद्वाजाय सप्रथः ॥
Samhita Transcription Accented
sá tvám dákṣasyāvṛkó vṛdhó bhūraryáḥ párasyā́ntarasya táruṣaḥ ǀ
rāyáḥ sūno sahaso mártyeṣvā́ chardíryaccha vītáhavyāya saprátho bharádvājāya sapráthaḥ ǁ
Samhita Transcription Nonaccented
sa tvam dakṣasyāvṛko vṛdho bhūraryaḥ parasyāntarasya taruṣaḥ ǀ
rāyaḥ sūno sahaso martyeṣvā chardiryaccha vītahavyāya sapratho bharadvājāya saprathaḥ ǁ
Padapatha Devanagari Accented
सः । त्वम् । दक्ष॑स्य । अ॒वृ॒कः । वृ॒धः । भूः॒ । अ॒र्यः । पर॑स्य । अन्त॑रस्य । तरु॑षः ।
रा॒यः । सू॒नो॒ इति॑ । स॒ह॒सः॒ । मर्त्ये॑षु । आ । छ॒र्दिः । य॒च्छ॒ । वी॒तऽह॑व्याय । स॒ऽप्रथः॑ । भ॒रत्ऽवा॑जाय । स॒ऽप्रथः॑ ॥
Padapatha Devanagari Nonaccented
सः । त्वम् । दक्षस्य । अवृकः । वृधः । भूः । अर्यः । परस्य । अन्तरस्य । तरुषः ।
रायः । सूनो इति । सहसः । मर्त्येषु । आ । छर्दिः । यच्छ । वीतऽहव्याय । सऽप्रथः । भरत्ऽवाजाय । सऽप्रथः ॥
Padapatha Transcription Accented
sáḥ ǀ tvám ǀ dákṣasya ǀ avṛkáḥ ǀ vṛdháḥ ǀ bhūḥ ǀ aryáḥ ǀ párasya ǀ ántarasya ǀ táruṣaḥ ǀ
rāyáḥ ǀ sūno íti ǀ sahasaḥ ǀ mártyeṣu ǀ ā́ ǀ chardíḥ ǀ yaccha ǀ vītá-havyāya ǀ sa-práthaḥ ǀ bharát-vājāya ǀ sa-práthaḥ ǁ
Padapatha Transcription Nonaccented
saḥ ǀ tvam ǀ dakṣasya ǀ avṛkaḥ ǀ vṛdhaḥ ǀ bhūḥ ǀ aryaḥ ǀ parasya ǀ antarasya ǀ taruṣaḥ ǀ
rāyaḥ ǀ sūno iti ǀ sahasaḥ ǀ martyeṣu ǀ ā ǀ chardiḥ ǀ yaccha ǀ vīta-havyāya ǀ sa-prathaḥ ǀ bharat-vājāya ǀ sa-prathaḥ ǁ
06.015.04 (Mandala. Sukta. Rik)
4.5.17.04 (Ashtaka. Adhyaya. Varga. Rik)
06.01.110 (Mandala. Anuvāka. Rik)
Samhita Devanagari Accented
द्यु॒ता॒नं वो॒ अति॑थिं॒ स्व॑र्णरम॒ग्निं होता॑रं॒ मनु॑षः स्वध्व॒रं ।
विप्रं॒ न द्यु॒क्षव॑चसं सुवृ॒क्तिभि॑र्हव्य॒वाह॑मर॒तिं दे॒वमृं॑जसे ॥
Samhita Devanagari Nonaccented
द्युतानं वो अतिथिं स्वर्णरमग्निं होतारं मनुषः स्वध्वरं ।
विप्रं न द्युक्षवचसं सुवृक्तिभिर्हव्यवाहमरतिं देवमृंजसे ॥
Samhita Transcription Accented
dyutānám vo átithim svárṇaramagním hótāram mánuṣaḥ svadhvarám ǀ
vípram ná dyukṣávacasam suvṛktíbhirhavyavā́hamaratím devámṛñjase ǁ
Samhita Transcription Nonaccented
dyutānam vo atithim svarṇaramagnim hotāram manuṣaḥ svadhvaram ǀ
vipram na dyukṣavacasam suvṛktibhirhavyavāhamaratim devamṛñjase ǁ
Padapatha Devanagari Accented
द्यु॒ता॒नम् । वः॒ । अति॑थिम् । स्वः॑ऽनरम् । अ॒ग्निम् । होता॑रम् । मनु॑षः । सु॒ऽअ॒ध्व॒रम् ।
विप्र॑म् । न । द्यु॒क्षऽव॑चसम् । सु॒वृ॒क्तिऽभिः॑ । ह॒व्य॒ऽवाह॑म् । अ॒र॒तिम् । दे॒वम् । ऋ॒ञ्ज॒से॒ ॥
Padapatha Devanagari Nonaccented
द्युतानम् । वः । अतिथिम् । स्वःऽनरम् । अग्निम् । होतारम् । मनुषः । सुऽअध्वरम् ।
विप्रम् । न । द्युक्षऽवचसम् । सुवृक्तिऽभिः । हव्यऽवाहम् । अरतिम् । देवम् । ऋञ्जसे ॥
Padapatha Transcription Accented
dyutānám ǀ vaḥ ǀ átithim ǀ sváḥ-naram ǀ agním ǀ hótāram ǀ mánuṣaḥ ǀ su-adhvarám ǀ
vípram ǀ ná ǀ dyukṣá-vacasam ǀ suvṛktí-bhiḥ ǀ havya-vā́ham ǀ aratím ǀ devám ǀ ṛñjase ǁ
Padapatha Transcription Nonaccented
dyutānam ǀ vaḥ ǀ atithim ǀ svaḥ-naram ǀ agnim ǀ hotāram ǀ manuṣaḥ ǀ su-adhvaram ǀ
vipram ǀ na ǀ dyukṣa-vacasam ǀ suvṛkti-bhiḥ ǀ havya-vāham ǀ aratim ǀ devam ǀ ṛñjase ǁ
06.015.05 (Mandala. Sukta. Rik)
4.5.17.05 (Ashtaka. Adhyaya. Varga. Rik)
06.01.111 (Mandala. Anuvāka. Rik)
Samhita Devanagari Accented
पा॒व॒कया॒ यश्चि॒तयं॑त्या कृ॒पा क्षाम॑न्रुरु॒च उ॒षसो॒ न भा॒नुना॑ ।
तूर्व॒न्न याम॒न्नेत॑शस्य॒ नू रण॒ आ यो घृ॒णे न त॑तृषा॒णो अ॒जरः॑ ॥
Samhita Devanagari Nonaccented
पावकया यश्चितयंत्या कृपा क्षामन्रुरुच उषसो न भानुना ।
तूर्वन्न यामन्नेतशस्य नू रण आ यो घृणे न ततृषाणो अजरः ॥
Samhita Transcription Accented
pāvakáyā yáścitáyantyā kṛpā́ kṣā́manrurucá uṣáso ná bhānúnā ǀ
tū́rvanná yā́mannétaśasya nū́ ráṇa ā́ yó ghṛṇé ná tatṛṣāṇó ajáraḥ ǁ
Samhita Transcription Nonaccented
pāvakayā yaścitayantyā kṛpā kṣāmanruruca uṣaso na bhānunā ǀ
tūrvanna yāmannetaśasya nū raṇa ā yo ghṛṇe na tatṛṣāṇo ajaraḥ ǁ
Padapatha Devanagari Accented
पा॒व॒कया॑ । यः । चि॒तय॑न्त्या । कृ॒पा । क्षाम॑न् । रु॒रु॒चे । उ॒षसः॑ । न । भा॒नुना॑ ।
तूर्व॑न् । न । याम॑न् । एत॑शस्य । नु । रणे॑ । आ । यः । घृ॒णे । न । त॒तृ॒षा॒णः । अ॒जरः॑ ॥
Padapatha Devanagari Nonaccented
पावकया । यः । चितयन्त्या । कृपा । क्षामन् । रुरुचे । उषसः । न । भानुना ।
तूर्वन् । न । यामन् । एतशस्य । नु । रणे । आ । यः । घृणे । न । ततृषाणः । अजरः ॥
Padapatha Transcription Accented
pāvakáyā ǀ yáḥ ǀ citáyantyā ǀ kṛpā́ ǀ kṣā́man ǀ rurucé ǀ uṣásaḥ ǀ ná ǀ bhānúnā ǀ
tū́rvan ǀ ná ǀ yā́man ǀ étaśasya ǀ nú ǀ ráṇe ǀ ā́ ǀ yáḥ ǀ ghṛṇé ǀ ná ǀ tatṛṣāṇáḥ ǀ ajáraḥ ǁ
Padapatha Transcription Nonaccented
pāvakayā ǀ yaḥ ǀ citayantyā ǀ kṛpā ǀ kṣāman ǀ ruruce ǀ uṣasaḥ ǀ na ǀ bhānunā ǀ
tūrvan ǀ na ǀ yāman ǀ etaśasya ǀ nu ǀ raṇe ǀ ā ǀ yaḥ ǀ ghṛṇe ǀ na ǀ tatṛṣāṇaḥ ǀ ajaraḥ ǁ
06.015.06 (Mandala. Sukta. Rik)
4.5.18.01 (Ashtaka. Adhyaya. Varga. Rik)
06.01.112 (Mandala. Anuvāka. Rik)
Samhita Devanagari Accented
अ॒ग्निम॑ग्निं वः स॒मिधा॑ दुवस्यत प्रि॒यंप्रि॑यं वो॒ अति॑थिं गृणी॒षणि॑ ।
उप॑ वो गी॒र्भिर॒मृतं॑ विवासत दे॒वो दे॒वेषु॒ वन॑ते॒ हि वार्यं॑ दे॒वो दे॒वेषु॒ वन॑ते॒ हि नो॒ दुवः॑ ॥
Samhita Devanagari Nonaccented
अग्निमग्निं वः समिधा दुवस्यत प्रियंप्रियं वो अतिथिं गृणीषणि ।
उप वो गीर्भिरमृतं विवासत देवो देवेषु वनते हि वार्यं देवो देवेषु वनते हि नो दुवः ॥
Samhita Transcription Accented
agnímagnim vaḥ samídhā duvasyata priyámpriyam vo átithim gṛṇīṣáṇi ǀ
úpa vo gīrbhíramṛ́tam vivāsata devó devéṣu vánate hí vāryam devó devéṣu vánate hí no dúvaḥ ǁ
Samhita Transcription Nonaccented
agnimagnim vaḥ samidhā duvasyata priyampriyam vo atithim gṛṇīṣaṇi ǀ
upa vo gīrbhiramṛtam vivāsata devo deveṣu vanate hi vāryam devo deveṣu vanate hi no duvaḥ ǁ
Padapatha Devanagari Accented
अ॒ग्निम्ऽअ॑ग्निम् । वः॒ । स॒म्ऽइधा॑ । दु॒व॒स्य॒त॒ । प्रि॒यम्ऽप्रि॑यम् । वः॒ । अति॑थिम् । गृ॒णी॒षणि॑ ।
उप॑ । वः॒ । गीः॒ऽभिः । अ॒मृत॑म् । वि॒वा॒स॒त॒ । दे॒वः । दे॒वेषु॑ । वन॑ते । हि । वार्य॑म् । दे॒वः । दे॒वेषु॑ । वन॑ते । हि । नः॒ । दुवः॑ ॥
Padapatha Devanagari Nonaccented
अग्निम्ऽअग्निम् । वः । सम्ऽइधा । दुवस्यत । प्रियम्ऽप्रियम् । वः । अतिथिम् । गृणीषणि ।
उप । वः । गीःऽभिः । अमृतम् । विवासत । देवः । देवेषु । वनते । हि । वार्यम् । देवः । देवेषु । वनते । हि । नः । दुवः ॥
Padapatha Transcription Accented
agním-agnim ǀ vaḥ ǀ sam-ídhā ǀ duvasyata ǀ priyám-priyam ǀ vaḥ ǀ átithim ǀ gṛṇīṣáṇi ǀ
úpa ǀ vaḥ ǀ gīḥ-bhíḥ ǀ amṛ́tam ǀ vivāsata ǀ deváḥ ǀ devéṣu ǀ vánate ǀ hí ǀ vā́ryam ǀ deváḥ ǀ devéṣu ǀ vánate ǀ hí ǀ naḥ ǀ dúvaḥ ǁ
Padapatha Transcription Nonaccented
agnim-agnim ǀ vaḥ ǀ sam-idhā ǀ duvasyata ǀ priyam-priyam ǀ vaḥ ǀ atithim ǀ gṛṇīṣaṇi ǀ
upa ǀ vaḥ ǀ gīḥ-bhiḥ ǀ amṛtam ǀ vivāsata ǀ devaḥ ǀ deveṣu ǀ vanate ǀ hi ǀ vāryam ǀ devaḥ ǀ deveṣu ǀ vanate ǀ hi ǀ naḥ ǀ duvaḥ ǁ
06.015.07 (Mandala. Sukta. Rik)
4.5.18.02 (Ashtaka. Adhyaya. Varga. Rik)
06.01.113 (Mandala. Anuvāka. Rik)
Samhita Devanagari Accented
समि॑द्धम॒ग्निं स॒मिधा॑ गि॒रा गृ॑णे॒ शुचिं॑ पाव॒कं पु॒रो अ॑ध्व॒रे ध्रु॒वं ।
विप्रं॒ होता॑रं पुरु॒वार॑म॒द्रुहं॑ क॒विं सु॒म्नैरी॑महे जा॒तवे॑दसं ॥
Samhita Devanagari Nonaccented
समिद्धमग्निं समिधा गिरा गृणे शुचिं पावकं पुरो अध्वरे ध्रुवं ।
विप्रं होतारं पुरुवारमद्रुहं कविं सुम्नैरीमहे जातवेदसं ॥
Samhita Transcription Accented
sámiddhamagním samídhā girā́ gṛṇe śúcim pāvakám puró adhvaré dhruvám ǀ
vípram hótāram puruvā́ramadrúham kavím sumnáirīmahe jātávedasam ǁ
Samhita Transcription Nonaccented
samiddhamagnim samidhā girā gṛṇe śucim pāvakam puro adhvare dhruvam ǀ
vipram hotāram puruvāramadruham kavim sumnairīmahe jātavedasam ǁ
Padapatha Devanagari Accented
सम्ऽइ॑द्धम् । अ॒ग्निम् । स॒म्ऽइधा॑ । गि॒रा । गृ॒णे॒ । शुचि॑म् । पा॒व॒कम् । पु॒रः । अ॒ध्व॒रे । ध्रु॒वम् ।
विप्र॑म् । होता॑रम् । पु॒रु॒ऽवार॑म् । अ॒द्रुह॑म् । क॒विम् । सु॒म्नैः । ई॒म॒हे॒ । जा॒तऽवे॑दसम् ॥
Padapatha Devanagari Nonaccented
सम्ऽइद्धम् । अग्निम् । सम्ऽइधा । गिरा । गृणे । शुचिम् । पावकम् । पुरः । अध्वरे । ध्रुवम् ।
विप्रम् । होतारम् । पुरुऽवारम् । अद्रुहम् । कविम् । सुम्नैः । ईमहे । जातऽवेदसम् ॥
Padapatha Transcription Accented
sám-iddham ǀ agním ǀ sam-ídhā ǀ girā́ ǀ gṛṇe ǀ śúcim ǀ pāvakám ǀ puráḥ ǀ adhvaré ǀ dhruvám ǀ
vípram ǀ hótāram ǀ puru-vā́ram ǀ adrúham ǀ kavím ǀ sumnáiḥ ǀ īmahe ǀ jātá-vedasam ǁ
Padapatha Transcription Nonaccented
sam-iddham ǀ agnim ǀ sam-idhā ǀ girā ǀ gṛṇe ǀ śucim ǀ pāvakam ǀ puraḥ ǀ adhvare ǀ dhruvam ǀ
vipram ǀ hotāram ǀ puru-vāram ǀ adruham ǀ kavim ǀ sumnaiḥ ǀ īmahe ǀ jāta-vedasam ǁ
06.015.08 (Mandala. Sukta. Rik)
4.5.18.03 (Ashtaka. Adhyaya. Varga. Rik)
06.01.114 (Mandala. Anuvāka. Rik)
Samhita Devanagari Accented
त्वां दू॒तम॑ग्ने अ॒मृतं॑ यु॒गेयु॑गे हव्य॒वाहं॑ दधिरे पा॒युमीड्यं॑ ।
दे॒वास॑श्च॒ मर्ता॑सश्च॒ जागृ॑विं वि॒भुं वि॒श्पतिं॒ नम॑सा॒ नि षे॑दिरे ॥
Samhita Devanagari Nonaccented
त्वां दूतमग्ने अमृतं युगेयुगे हव्यवाहं दधिरे पायुमीड्यं ।
देवासश्च मर्तासश्च जागृविं विभुं विश्पतिं नमसा नि षेदिरे ॥
Samhita Transcription Accented
tvā́m dūtámagne amṛ́tam yugéyuge havyavā́ham dadhire pāyúmī́ḍyam ǀ
devā́saśca mártāsaśca jā́gṛvim vibhúm viśpátim námasā ní ṣedire ǁ
Samhita Transcription Nonaccented
tvām dūtamagne amṛtam yugeyuge havyavāham dadhire pāyumīḍyam ǀ
devāsaśca martāsaśca jāgṛvim vibhum viśpatim namasā ni ṣedire ǁ
Padapatha Devanagari Accented
त्वाम् । दू॒तम् । अ॒ग्ने॒ । अ॒मृत॑म् । यु॒गेऽयु॑गे । ह॒व्य॒ऽवाह॑म् । द॒धि॒रे॒ । पा॒युम् । ईड्य॑म् ।
दे॒वासः॑ । च॒ । मर्ता॑सः । च॒ । जागृ॑विम् । वि॒ऽभुम् । वि॒श्पति॑म् । नम॑सा । नि । से॒दि॒रे॒ ॥
Padapatha Devanagari Nonaccented
त्वाम् । दूतम् । अग्ने । अमृतम् । युगेऽयुगे । हव्यऽवाहम् । दधिरे । पायुम् । ईड्यम् ।
देवासः । च । मर्तासः । च । जागृविम् । विऽभुम् । विश्पतिम् । नमसा । नि । सेदिरे ॥
Padapatha Transcription Accented
tvā́m ǀ dūtám ǀ agne ǀ amṛ́tam ǀ yugé-yuge ǀ havya-vā́ham ǀ dadhire ǀ pāyúm ǀ ī́ḍyam ǀ
devā́saḥ ǀ ca ǀ mártāsaḥ ǀ ca ǀ jā́gṛvim ǀ vi-bhúm ǀ viśpátim ǀ námasā ǀ ní ǀ sedire ǁ
Padapatha Transcription Nonaccented
tvām ǀ dūtam ǀ agne ǀ amṛtam ǀ yuge-yuge ǀ havya-vāham ǀ dadhire ǀ pāyum ǀ īḍyam ǀ
devāsaḥ ǀ ca ǀ martāsaḥ ǀ ca ǀ jāgṛvim ǀ vi-bhum ǀ viśpatim ǀ namasā ǀ ni ǀ sedire ǁ
06.015.09 (Mandala. Sukta. Rik)
4.5.18.04 (Ashtaka. Adhyaya. Varga. Rik)
06.01.115 (Mandala. Anuvāka. Rik)
Samhita Devanagari Accented
वि॒भूष॑न्नग्न उ॒भयाँ॒ अनु॑ व्र॒ता दू॒तो दे॒वानां॒ रज॑सी॒ समी॑यसे ।
यत्ते॑ धी॒तिं सु॑म॒तिमा॑वृणी॒महेऽध॑ स्मा नस्त्रि॒वरू॑थः शि॒वो भ॑व ॥
Samhita Devanagari Nonaccented
विभूषन्नग्न उभयाँ अनु व्रता दूतो देवानां रजसी समीयसे ।
यत्ते धीतिं सुमतिमावृणीमहेऽध स्मा नस्त्रिवरूथः शिवो भव ॥
Samhita Transcription Accented
vibhū́ṣannagna ubháyām̐ ánu vratā́ dūtó devā́nām rájasī sámīyase ǀ
yátte dhītím sumatímāvṛṇīmáhé’dha smā nastrivárūthaḥ śivó bhava ǁ
Samhita Transcription Nonaccented
vibhūṣannagna ubhayām̐ anu vratā dūto devānām rajasī samīyase ǀ
yatte dhītim sumatimāvṛṇīmahe’dha smā nastrivarūthaḥ śivo bhava ǁ
Padapatha Devanagari Accented
वि॒ऽभूष॑न् । अ॒ग्ने॒ । उ॒भया॑न् । अनु॑ । व्र॒ता । दू॒तः । दे॒वाना॑म् । रज॑सी॒ इति॑ । सम् । ई॒य॒से॒ ।
यत् । ते॒ । धी॒तिम् । सु॒ऽम॒तिम् । आ॒ऽवृ॒णी॒महे॑ । अध॑ । स्म॒ । नः॒ । त्रि॒ऽवरू॑थः । शि॒वः । भ॒व॒ ॥
Padapatha Devanagari Nonaccented
विऽभूषन् । अग्ने । उभयान् । अनु । व्रता । दूतः । देवानाम् । रजसी इति । सम् । ईयसे ।
यत् । ते । धीतिम् । सुऽमतिम् । आऽवृणीमहे । अध । स्म । नः । त्रिऽवरूथः । शिवः । भव ॥
Padapatha Transcription Accented
vi-bhū́ṣan ǀ agne ǀ ubháyān ǀ ánu ǀ vratā́ ǀ dūtáḥ ǀ devā́nām ǀ rájasī íti ǀ sám ǀ īyase ǀ
yát ǀ te ǀ dhītím ǀ su-matím ǀ ā-vṛṇīmáhe ǀ ádha ǀ sma ǀ naḥ ǀ tri-várūthaḥ ǀ śiváḥ ǀ bhava ǁ
Padapatha Transcription Nonaccented
vi-bhūṣan ǀ agne ǀ ubhayān ǀ anu ǀ vratā ǀ dūtaḥ ǀ devānām ǀ rajasī iti ǀ sam ǀ īyase ǀ
yat ǀ te ǀ dhītim ǀ su-matim ǀ ā-vṛṇīmahe ǀ adha ǀ sma ǀ naḥ ǀ tri-varūthaḥ ǀ śivaḥ ǀ bhava ǁ
06.015.10 (Mandala. Sukta. Rik)
4.5.18.05 (Ashtaka. Adhyaya. Varga. Rik)
06.01.116 (Mandala. Anuvāka. Rik)
Samhita Devanagari Accented
तं सु॒प्रती॑कं सु॒दृशं॒ स्वंच॒मवि॑द्वांसो वि॒दुष्ट॑रं सपेम ।
स य॑क्ष॒द्विश्वा॑ व॒युना॑नि वि॒द्वान्प्र ह॒व्यम॒ग्निर॒मृते॑षु वोचत् ॥
Samhita Devanagari Nonaccented
तं सुप्रतीकं सुदृशं स्वंचमविद्वांसो विदुष्टरं सपेम ।
स यक्षद्विश्वा वयुनानि विद्वान्प्र हव्यमग्निरमृतेषु वोचत् ॥
Samhita Transcription Accented
tám suprátīkam sudṛ́śam sváñcamávidvāṃso vidúṣṭaram sapema ǀ
sá yakṣadvíśvā vayúnāni vidvā́nprá havyámagníramṛ́teṣu vocat ǁ
Samhita Transcription Nonaccented
tam supratīkam sudṛśam svañcamavidvāṃso viduṣṭaram sapema ǀ
sa yakṣadviśvā vayunāni vidvānpra havyamagniramṛteṣu vocat ǁ
Padapatha Devanagari Accented
तम् । सु॒ऽप्रती॑कम् । सु॒ऽदृश॑म् । सु॒ऽअञ्च॑म् । अवि॑द्वांसः । वि॒दुःऽत॑रम् । स॒पे॒म॒ ।
सः । य॒क्ष॒त् । विश्वा॑ । व॒युना॑नि । वि॒द्वान् । प्र । ह॒व्यम् । अ॒ग्निः । अ॒मृते॑षु । वो॒च॒त् ॥
Padapatha Devanagari Nonaccented
तम् । सुऽप्रतीकम् । सुऽदृशम् । सुऽअञ्चम् । अविद्वांसः । विदुःऽतरम् । सपेम ।
सः । यक्षत् । विश्वा । वयुनानि । विद्वान् । प्र । हव्यम् । अग्निः । अमृतेषु । वोचत् ॥
Padapatha Transcription Accented
tám ǀ su-prátīkam ǀ su-dṛ́śam ǀ su-áñcam ǀ ávidvāṃsaḥ ǀ vidúḥ-taram ǀ sapema ǀ
sáḥ ǀ yakṣat ǀ víśvā ǀ vayúnāni ǀ vidvā́n ǀ prá ǀ havyám ǀ agníḥ ǀ amṛ́teṣu ǀ vocat ǁ
Padapatha Transcription Nonaccented
tam ǀ su-pratīkam ǀ su-dṛśam ǀ su-añcam ǀ avidvāṃsaḥ ǀ viduḥ-taram ǀ sapema ǀ
saḥ ǀ yakṣat ǀ viśvā ǀ vayunāni ǀ vidvān ǀ pra ǀ havyam ǀ agniḥ ǀ amṛteṣu ǀ vocat ǁ
06.015.11 (Mandala. Sukta. Rik)
4.5.19.01 (Ashtaka. Adhyaya. Varga. Rik)
06.01.117 (Mandala. Anuvāka. Rik)
Samhita Devanagari Accented
तम॑ग्ने पास्यु॒त तं पि॑पर्षि॒ यस्त॒ आन॑ट्क॒वये॑ शूर धी॒तिं ।
य॒ज्ञस्य॑ वा॒ निशि॑तिं॒ वोदि॑तिं वा॒ तमित्पृ॑णक्षि॒ शव॑सो॒त रा॒या ॥
Samhita Devanagari Nonaccented
तमग्ने पास्युत तं पिपर्षि यस्त आनट्कवये शूर धीतिं ।
यज्ञस्य वा निशितिं वोदितिं वा तमित्पृणक्षि शवसोत राया ॥
Samhita Transcription Accented
támagne pāsyutá tám piparṣi yásta ā́naṭkaváye śūra dhītím ǀ
yajñásya vā níśitim vóditim vā támítpṛṇakṣi śávasotá rāyā́ ǁ
Samhita Transcription Nonaccented
tamagne pāsyuta tam piparṣi yasta ānaṭkavaye śūra dhītim ǀ
yajñasya vā niśitim voditim vā tamitpṛṇakṣi śavasota rāyā ǁ
Padapatha Devanagari Accented
तम् । अ॒ग्ने॒ । पा॒सि॒ । उ॒त । तम् । पि॒प॒र्षि॒ । यः । ते॒ । आन॑ट् । क॒वये॑ । शू॒र॒ । धी॒तिम् ।
य॒ज्ञस्य॑ । वा॒ । निऽशि॑तिम् । वा॒ । उत्ऽइ॑तिम् । वा॒ । तम् । इत् । पृ॒ण॒क्षि॒ । शव॑सा । उ॒त । रा॒या ॥
Padapatha Devanagari Nonaccented
तम् । अग्ने । पासि । उत । तम् । पिपर्षि । यः । ते । आनट् । कवये । शूर । धीतिम् ।
यज्ञस्य । वा । निऽशितिम् । वा । उत्ऽइतिम् । वा । तम् । इत् । पृणक्षि । शवसा । उत । राया ॥
Padapatha Transcription Accented
tám ǀ agne ǀ pāsi ǀ utá ǀ tám ǀ piparṣi ǀ yáḥ ǀ te ǀ ā́naṭ ǀ kaváye ǀ śūra ǀ dhītím ǀ
yajñásya ǀ vā ǀ ní-śitim ǀ vā ǀ út-itim ǀ vā ǀ tám ǀ ít ǀ pṛṇakṣi ǀ śávasā ǀ utá ǀ rāyā́ ǁ
Padapatha Transcription Nonaccented
tam ǀ agne ǀ pāsi ǀ uta ǀ tam ǀ piparṣi ǀ yaḥ ǀ te ǀ ānaṭ ǀ kavaye ǀ śūra ǀ dhītim ǀ
yajñasya ǀ vā ǀ ni-śitim ǀ vā ǀ ut-itim ǀ vā ǀ tam ǀ it ǀ pṛṇakṣi ǀ śavasā ǀ uta ǀ rāyā ǁ
06.015.12 (Mandala. Sukta. Rik)
4.5.19.02 (Ashtaka. Adhyaya. Varga. Rik)
06.01.118 (Mandala. Anuvāka. Rik)
Samhita Devanagari Accented
त्वम॑ग्ने वनुष्य॒तो नि पा॑हि॒ त्वमु॑ नः सहसावन्नव॒द्यात् ।
सं त्वा॑ ध्वस्म॒न्वद॒भ्ये॑तु॒ पाथः॒ सं र॒यिः स्पृ॑ह॒याय्यः॑ सह॒स्री ॥
Samhita Devanagari Nonaccented
त्वमग्ने वनुष्यतो नि पाहि त्वमु नः सहसावन्नवद्यात् ।
सं त्वा ध्वस्मन्वदभ्येतु पाथः सं रयिः स्पृहयाय्यः सहस्री ॥
Samhita Transcription Accented
tvámagne vanuṣyató ní pāhi tvámu naḥ sahasāvannavadyā́t ǀ
sám tvā dhvasmanvádabhyétu pā́thaḥ sám rayíḥ spṛhayā́yyaḥ sahasrī́ ǁ
Samhita Transcription Nonaccented
tvamagne vanuṣyato ni pāhi tvamu naḥ sahasāvannavadyāt ǀ
sam tvā dhvasmanvadabhyetu pāthaḥ sam rayiḥ spṛhayāyyaḥ sahasrī ǁ
Padapatha Devanagari Accented
त्वम् । अ॒ग्ने॒ । व॒नु॒ष्य॒तः । नि । पा॒हि॒ । त्वम् । ऊं॒ इति॑ । नः॒ । स॒ह॒सा॒ऽव॒न् । अ॒व॒द्यात् ।
सम् । त्वा॒ । ध्व॒स्म॒न्ऽवत् । अ॒भि । ए॒तु॒ । पाथः॑ । सम् । र॒यिः । स्पृ॒ह॒याय्यः॑ । स॒ह॒स्री ॥
Padapatha Devanagari Nonaccented
त्वम् । अग्ने । वनुष्यतः । नि । पाहि । त्वम् । ऊं इति । नः । सहसाऽवन् । अवद्यात् ।
सम् । त्वा । ध्वस्मन्ऽवत् । अभि । एतु । पाथः । सम् । रयिः । स्पृहयाय्यः । सहस्री ॥
Padapatha Transcription Accented
tvám ǀ agne ǀ vanuṣyatáḥ ǀ ní ǀ pāhi ǀ tvám ǀ ūṃ íti ǀ naḥ ǀ sahasā-van ǀ avadyā́t ǀ
sám ǀ tvā ǀ dhvasman-vát ǀ abhí ǀ etu ǀ pā́thaḥ ǀ sám ǀ rayíḥ ǀ spṛhayā́yyaḥ ǀ sahasrī́ ǁ
Padapatha Transcription Nonaccented
tvam ǀ agne ǀ vanuṣyataḥ ǀ ni ǀ pāhi ǀ tvam ǀ ūṃ iti ǀ naḥ ǀ sahasā-van ǀ avadyāt ǀ
sam ǀ tvā ǀ dhvasman-vat ǀ abhi ǀ etu ǀ pāthaḥ ǀ sam ǀ rayiḥ ǀ spṛhayāyyaḥ ǀ sahasrī ǁ
06.015.13 (Mandala. Sukta. Rik)
4.5.19.03 (Ashtaka. Adhyaya. Varga. Rik)
06.01.119 (Mandala. Anuvāka. Rik)
Samhita Devanagari Accented
अ॒ग्निर्होता॑ गृ॒हप॑तिः॒ स राजा॒ विश्वा॑ वेद॒ जनि॑मा जा॒तवे॑दाः ।
दे॒वाना॑मु॒त यो मर्त्या॑नां॒ यजि॑ष्ठः॒ स प्र य॑जतामृ॒तावा॑ ॥
Samhita Devanagari Nonaccented
अग्निर्होता गृहपतिः स राजा विश्वा वेद जनिमा जातवेदाः ।
देवानामुत यो मर्त्यानां यजिष्ठः स प्र यजतामृतावा ॥
Samhita Transcription Accented
agnírhótā gṛhápatiḥ sá rā́jā víśvā veda jánimā jātávedāḥ ǀ
devā́nāmutá yó mártyānām yájiṣṭhaḥ sá prá yajatāmṛtā́vā ǁ
Samhita Transcription Nonaccented
agnirhotā gṛhapatiḥ sa rājā viśvā veda janimā jātavedāḥ ǀ
devānāmuta yo martyānām yajiṣṭhaḥ sa pra yajatāmṛtāvā ǁ
Padapatha Devanagari Accented
अ॒ग्निः । होता॑ । गृ॒हऽप॑तिः । सः । राजा॑ । विश्वा॑ । वे॒द॒ । जनि॑म । जा॒तऽवे॑दाः ।
दे॒वाना॑म् । उ॒त । यः । मर्त्या॑नाम् । यजि॑ष्ठः । सः । प्र । य॒ज॒ता॒म् । ऋ॒तऽवा॑ ॥
Padapatha Devanagari Nonaccented
अग्निः । होता । गृहऽपतिः । सः । राजा । विश्वा । वेद । जनिम । जातऽवेदाः ।
देवानाम् । उत । यः । मर्त्यानाम् । यजिष्ठः । सः । प्र । यजताम् । ऋतऽवा ॥
Padapatha Transcription Accented
agníḥ ǀ hótā ǀ gṛhá-patiḥ ǀ sáḥ ǀ rā́jā ǀ víśvā ǀ veda ǀ jánima ǀ jātá-vedāḥ ǀ
devā́nām ǀ utá ǀ yáḥ ǀ mártyānām ǀ yájiṣṭhaḥ ǀ sáḥ ǀ prá ǀ yajatām ǀ ṛtá-vā ǁ
Padapatha Transcription Nonaccented
agniḥ ǀ hotā ǀ gṛha-patiḥ ǀ saḥ ǀ rājā ǀ viśvā ǀ veda ǀ janima ǀ jāta-vedāḥ ǀ
devānām ǀ uta ǀ yaḥ ǀ martyānām ǀ yajiṣṭhaḥ ǀ saḥ ǀ pra ǀ yajatām ǀ ṛta-vā ǁ
06.015.14 (Mandala. Sukta. Rik)
4.5.19.04 (Ashtaka. Adhyaya. Varga. Rik)
06.01.120 (Mandala. Anuvāka. Rik)
Samhita Devanagari Accented
अग्ने॒ यद॒द्य वि॒शो अ॑ध्वरस्य होतः॒ पाव॑कशोचे॒ वेष्ट्वं हि यज्वा॑ ।
ऋ॒ता य॑जासि महि॒ना वि यद्भूर्ह॒व्या व॑ह यविष्ठ॒ या ते॑ अ॒द्य ॥
Samhita Devanagari Nonaccented
अग्ने यदद्य विशो अध्वरस्य होतः पावकशोचे वेष्ट्वं हि यज्वा ।
ऋता यजासि महिना वि यद्भूर्हव्या वह यविष्ठ या ते अद्य ॥
Samhita Transcription Accented
ágne yádadyá viśó adhvarasya hotaḥ pā́vakaśoce véṣṭvám hí yájvā ǀ
ṛtā́ yajāsi mahinā́ ví yádbhū́rhavyā́ vaha yaviṣṭha yā́ te adyá ǁ
Samhita Transcription Nonaccented
agne yadadya viśo adhvarasya hotaḥ pāvakaśoce veṣṭvam hi yajvā ǀ
ṛtā yajāsi mahinā vi yadbhūrhavyā vaha yaviṣṭha yā te adya ǁ
Padapatha Devanagari Accented
अग्ने॑ । यत् । अ॒द्य । वि॒शः । अ॒ध्व॒र॒स्य॒ । हो॒त॒रिति॑ । पाव॑कऽशोचे । वेः । त्वम् । हि । यज्वा॑ ।
ऋ॒ता । य॒जा॒सि॒ । म॒हि॒ना । वि । यत् । भूः । ह॒व्या । व॒ह॒ । य॒वि॒ष्ठ॒ । या । ते॒ । अ॒द्य ॥
Padapatha Devanagari Nonaccented
अग्ने । यत् । अद्य । विशः । अध्वरस्य । होतरिति । पावकऽशोचे । वेः । त्वम् । हि । यज्वा ।
ऋता । यजासि । महिना । वि । यत् । भूः । हव्या । वह । यविष्ठ । या । ते । अद्य ॥
Padapatha Transcription Accented
ágne ǀ yát ǀ adyá ǀ viśáḥ ǀ adhvarasya ǀ hotaríti ǀ pā́vaka-śoce ǀ véḥ ǀ tvám ǀ hí ǀ yájvā ǀ
ṛtā́ ǀ yajāsi ǀ mahinā́ ǀ ví ǀ yát ǀ bhū́ḥ ǀ havyā́ ǀ vaha ǀ yaviṣṭha ǀ yā́ ǀ te ǀ adyá ǁ
Padapatha Transcription Nonaccented
agne ǀ yat ǀ adya ǀ viśaḥ ǀ adhvarasya ǀ hotariti ǀ pāvaka-śoce ǀ veḥ ǀ tvam ǀ hi ǀ yajvā ǀ
ṛtā ǀ yajāsi ǀ mahinā ǀ vi ǀ yat ǀ bhūḥ ǀ havyā ǀ vaha ǀ yaviṣṭha ǀ yā ǀ te ǀ adya ǁ
06.015.15 (Mandala. Sukta. Rik)
4.5.19.05 (Ashtaka. Adhyaya. Varga. Rik)
06.01.121 (Mandala. Anuvāka. Rik)
Samhita Devanagari Accented
अ॒भि प्रयां॑सि॒ सुधि॑तानि॒ हि ख्यो नि त्वा॑ दधीत॒ रोद॑सी॒ यज॑ध्यै ।
अवा॑ नो मघव॒न्वाज॑साता॒वग्ने॒ विश्वा॑नि दुरि॒ता त॑रेम॒ ता त॑रेम॒ तवाव॑सा तरेम ॥
Samhita Devanagari Nonaccented
अभि प्रयांसि सुधितानि हि ख्यो नि त्वा दधीत रोदसी यजध्यै ।
अवा नो मघवन्वाजसातावग्ने विश्वानि दुरिता तरेम ता तरेम तवावसा तरेम ॥
Samhita Transcription Accented
abhí práyāṃsi súdhitāni hí khyó ní tvā dadhīta ródasī yájadhyai ǀ
ávā no maghavanvā́jasātāvágne víśvāni duritā́ tarema tā́ tarema távā́vasā tarema ǁ
Samhita Transcription Nonaccented
abhi prayāṃsi sudhitāni hi khyo ni tvā dadhīta rodasī yajadhyai ǀ
avā no maghavanvājasātāvagne viśvāni duritā tarema tā tarema tavāvasā tarema ǁ
Padapatha Devanagari Accented
अ॒भि । प्रयां॑सि । सुऽधि॑तानि । हि । ख्यः । नि । त्वा॒ । द॒धी॒त॒ । रोद॑सी॒ इति॑ । यज॑ध्यै ।
अव॑ । नः॒ । म॒घ॒ऽव॒न् । वाज॑ऽसातौ । अग्ने॑ । विश्वा॑नि । दुः॒ऽइ॒ता । त॒रे॒म॒ । ता । त॒रे॒म॒ । तव॑ । अव॑सा । त॒रे॒म॒ ॥
Padapatha Devanagari Nonaccented
अभि । प्रयांसि । सुऽधितानि । हि । ख्यः । नि । त्वा । दधीत । रोदसी इति । यजध्यै ।
अव । नः । मघऽवन् । वाजऽसातौ । अग्ने । विश्वानि । दुःऽइता । तरेम । ता । तरेम । तव । अवसा । तरेम ॥
Padapatha Transcription Accented
abhí ǀ práyāṃsi ǀ sú-dhitāni ǀ hí ǀ khyáḥ ǀ ní ǀ tvā ǀ dadhīta ǀ ródasī íti ǀ yájadhyai ǀ
áva ǀ naḥ ǀ magha-van ǀ vā́ja-sātau ǀ ágne ǀ víśvāni ǀ duḥ-itā́ ǀ tarema ǀ tā́ ǀ tarema ǀ táva ǀ ávasā ǀ tarema ǁ
Padapatha Transcription Nonaccented
abhi ǀ prayāṃsi ǀ su-dhitāni ǀ hi ǀ khyaḥ ǀ ni ǀ tvā ǀ dadhīta ǀ rodasī iti ǀ yajadhyai ǀ
ava ǀ naḥ ǀ magha-van ǀ vāja-sātau ǀ agne ǀ viśvāni ǀ duḥ-itā ǀ tarema ǀ tā ǀ tarema ǀ tava ǀ avasā ǀ tarema ǁ
06.015.16 (Mandala. Sukta. Rik)
4.5.20.01 (Ashtaka. Adhyaya. Varga. Rik)
06.01.122 (Mandala. Anuvāka. Rik)
Samhita Devanagari Accented
अग्ने॒ विश्वे॑भिः स्वनीक दे॒वैरूर्णा॑वंतं प्रथ॒मः सी॑द॒ योनिं॑ ।
कु॒ला॒यिनं॑ घृ॒तवं॑तं सवि॒त्रे य॒ज्ञं न॑य॒ यज॑मानाय सा॒धु ॥
Samhita Devanagari Nonaccented
अग्ने विश्वेभिः स्वनीक देवैरूर्णावंतं प्रथमः सीद योनिं ।
कुलायिनं घृतवंतं सवित्रे यज्ञं नय यजमानाय साधु ॥
Samhita Transcription Accented
ágne víśvebhiḥ svanīka deváirū́rṇāvantam prathamáḥ sīda yónim ǀ
kulāyínam ghṛtávantam savitré yajñám naya yájamānāya sādhú ǁ
Samhita Transcription Nonaccented
agne viśvebhiḥ svanīka devairūrṇāvantam prathamaḥ sīda yonim ǀ
kulāyinam ghṛtavantam savitre yajñam naya yajamānāya sādhu ǁ
Padapatha Devanagari Accented
अग्ने॑ । विश्वे॑भिः । सु॒ऽअ॒नी॒क॒ । दे॒वैः । ऊर्णा॑ऽवन्तम् । प्र॒थ॒मः । सी॒द॒ । योनि॑म् ।
कु॒ला॒यिन॑म् । घृ॒तऽव॑न्तम् । स॒वि॒त्रे । य॒ज्ञम् । न॒य॒ । यज॑मानाय । सा॒धु ॥
Padapatha Devanagari Nonaccented
अग्ने । विश्वेभिः । सुऽअनीक । देवैः । ऊर्णाऽवन्तम् । प्रथमः । सीद । योनिम् ।
कुलायिनम् । घृतऽवन्तम् । सवित्रे । यज्ञम् । नय । यजमानाय । साधु ॥
Padapatha Transcription Accented
ágne ǀ víśvebhiḥ ǀ su-anīka ǀ deváiḥ ǀ ū́rṇā-vantam ǀ prathamáḥ ǀ sīda ǀ yónim ǀ
kulāyínam ǀ ghṛtá-vantam ǀ savitré ǀ yajñám ǀ naya ǀ yájamānāya ǀ sādhú ǁ
Padapatha Transcription Nonaccented
agne ǀ viśvebhiḥ ǀ su-anīka ǀ devaiḥ ǀ ūrṇā-vantam ǀ prathamaḥ ǀ sīda ǀ yonim ǀ
kulāyinam ǀ ghṛta-vantam ǀ savitre ǀ yajñam ǀ naya ǀ yajamānāya ǀ sādhu ǁ
06.015.17 (Mandala. Sukta. Rik)
4.5.20.02 (Ashtaka. Adhyaya. Varga. Rik)
06.01.123 (Mandala. Anuvāka. Rik)
Samhita Devanagari Accented
इ॒ममु॒ त्यम॑थर्व॒वद॒ग्निं मं॑थंति वे॒धसः॑ ।
यमं॑कू॒यंत॒मान॑य॒न्नमू॑रं श्या॒व्या॑भ्यः ॥
Samhita Devanagari Nonaccented
इममु त्यमथर्ववदग्निं मंथंति वेधसः ।
यमंकूयंतमानयन्नमूरं श्याव्याभ्यः ॥
Samhita Transcription Accented
imámu tyámatharvavádagním manthanti vedhásaḥ ǀ
yámaṅkūyántamā́nayannámūram śyāvyā́bhyaḥ ǁ
Samhita Transcription Nonaccented
imamu tyamatharvavadagnim manthanti vedhasaḥ ǀ
yamaṅkūyantamānayannamūram śyāvyābhyaḥ ǁ
Padapatha Devanagari Accented
इ॒मम् । ऊं॒ इति॑ । त्यम् । अ॒थ॒र्व॒ऽवत् । अ॒ग्निम् । म॒न्थ॒न्ति॒ । वे॒धसः॑ ।
यम् । अ॒ङ्कु॒ऽयन्त॑म् । आ । अन॑यन् । अमू॑रम् । श्या॒व्या॑भ्यः ॥
Padapatha Devanagari Nonaccented
इमम् । ऊं इति । त्यम् । अथर्वऽवत् । अग्निम् । मन्थन्ति । वेधसः ।
यम् । अङ्कुऽयन्तम् । आ । अनयन् । अमूरम् । श्याव्याभ्यः ॥
Padapatha Transcription Accented
imám ǀ ūṃ íti ǀ tyám ǀ atharva-vát ǀ agním ǀ manthanti ǀ vedhásaḥ ǀ
yám ǀ aṅku-yántam ǀ ā́ ǀ ánayan ǀ ámūram ǀ śyāvyā́bhyaḥ ǁ
Padapatha Transcription Nonaccented
imam ǀ ūṃ iti ǀ tyam ǀ atharva-vat ǀ agnim ǀ manthanti ǀ vedhasaḥ ǀ
yam ǀ aṅku-yantam ǀ ā ǀ anayan ǀ amūram ǀ śyāvyābhyaḥ ǁ
06.015.18 (Mandala. Sukta. Rik)
4.5.20.03 (Ashtaka. Adhyaya. Varga. Rik)
06.01.124 (Mandala. Anuvāka. Rik)
Samhita Devanagari Accented
जनि॑ष्वा दे॒ववी॑तये स॒र्वता॑ता स्व॒स्तये॑ ।
आ दे॒वान्व॑क्ष्य॒मृताँ॑ ऋता॒वृधो॑ य॒ज्ञं दे॒वेषु॑ पिस्पृशः ॥
Samhita Devanagari Nonaccented
जनिष्वा देववीतये सर्वताता स्वस्तये ।
आ देवान्वक्ष्यमृताँ ऋतावृधो यज्ञं देवेषु पिस्पृशः ॥
Samhita Transcription Accented
jániṣvā devávītaye sarvátātā svastáye ǀ
ā́ devā́nvakṣyamṛ́tām̐ ṛtāvṛ́dho yajñám devéṣu pispṛśaḥ ǁ
Samhita Transcription Nonaccented
janiṣvā devavītaye sarvatātā svastaye ǀ
ā devānvakṣyamṛtām̐ ṛtāvṛdho yajñam deveṣu pispṛśaḥ ǁ
Padapatha Devanagari Accented
जनि॑ष्व । दे॒वऽवी॑तये । स॒र्वऽता॑ता । स्व॒स्तये॑ ।
आ । दे॒वान् । व॒क्षि॒ । अ॒मृता॑न् । ऋ॒त॒ऽवृधः॑ । य॒ज्ञम् । दे॒वेषु॑ । पि॒स्पृ॒शः॒ ॥
Padapatha Devanagari Nonaccented
जनिष्व । देवऽवीतये । सर्वऽताता । स्वस्तये ।
आ । देवान् । वक्षि । अमृतान् । ऋतऽवृधः । यज्ञम् । देवेषु । पिस्पृशः ॥
Padapatha Transcription Accented
jániṣva ǀ devá-vītaye ǀ sarvá-tātā ǀ svastáye ǀ
ā́ ǀ devā́n ǀ vakṣi ǀ amṛ́tān ǀ ṛta-vṛ́dhaḥ ǀ yajñám ǀ devéṣu ǀ pispṛśaḥ ǁ
Padapatha Transcription Nonaccented
janiṣva ǀ deva-vītaye ǀ sarva-tātā ǀ svastaye ǀ
ā ǀ devān ǀ vakṣi ǀ amṛtān ǀ ṛta-vṛdhaḥ ǀ yajñam ǀ deveṣu ǀ pispṛśaḥ ǁ
06.015.19 (Mandala. Sukta. Rik)
4.5.20.04 (Ashtaka. Adhyaya. Varga. Rik)
06.01.125 (Mandala. Anuvāka. Rik)
Samhita Devanagari Accented
व॒यमु॑ त्वा गृहपते जनाना॒मग्ने॒ अक॑र्म स॒मिधा॑ बृ॒हंतं॑ ।
अ॒स्थू॒रि नो॒ गार्ह॑पत्यानि संतु ति॒ग्मेन॑ न॒स्तेज॑सा॒ सं शि॑शाधि ॥
Samhita Devanagari Nonaccented
वयमु त्वा गृहपते जनानामग्ने अकर्म समिधा बृहंतं ।
अस्थूरि नो गार्हपत्यानि संतु तिग्मेन नस्तेजसा सं शिशाधि ॥
Samhita Transcription Accented
vayámu tvā gṛhapate janānāmágne ákarma samídhā bṛhántam ǀ
asthūrí no gā́rhapatyāni santu tigména nastéjasā sám śiśādhi ǁ
Samhita Transcription Nonaccented
vayamu tvā gṛhapate janānāmagne akarma samidhā bṛhantam ǀ
asthūri no gārhapatyāni santu tigmena nastejasā sam śiśādhi ǁ
Padapatha Devanagari Accented
व॒यम् । ऊं॒ इति॑ । त्वा॒ । गृ॒ह॒ऽप॒ते॒ । ज॒ना॒ना॒म् । अग्ने॑ । अक॑र्म । स॒म्ऽइधा॑ । बृ॒हन्त॑म् ।
अ॒स्थू॒रि । नः॒ । गार्ह॑ऽपत्यानि । स॒न्तु॒ । ति॒ग्मेन॑ । नः॒ । तेज॑सा । सम् । शि॒शा॒धि॒ ॥
Padapatha Devanagari Nonaccented
वयम् । ऊं इति । त्वा । गृहऽपते । जनानाम् । अग्ने । अकर्म । सम्ऽइधा । बृहन्तम् ।
अस्थूरि । नः । गार्हऽपत्यानि । सन्तु । तिग्मेन । नः । तेजसा । सम् । शिशाधि ॥
Padapatha Transcription Accented
vayám ǀ ūṃ íti ǀ tvā ǀ gṛha-pate ǀ janānām ǀ ágne ǀ ákarma ǀ sam-ídhā ǀ bṛhántam ǀ
asthūrí ǀ naḥ ǀ gā́rha-patyāni ǀ santu ǀ tigména ǀ naḥ ǀ téjasā ǀ sám ǀ śiśādhi ǁ
Padapatha Transcription Nonaccented
vayam ǀ ūṃ iti ǀ tvā ǀ gṛha-pate ǀ janānām ǀ agne ǀ akarma ǀ sam-idhā ǀ bṛhantam ǀ
asthūri ǀ naḥ ǀ gārha-patyāni ǀ santu ǀ tigmena ǀ naḥ ǀ tejasā ǀ sam ǀ śiśādhi ǁ