|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 17
|
1. Info |
| To: | indra | |
| From: | bharadvāja bārhaspatya | |
| Metres: | 1st set of styles: triṣṭup (1-4, 11); nicṛttriṣṭup (7, 9, 10, 12, 14); virāṭtrisṭup (5, 6, 8); svarāṭpaṅkti (13); ārcyuṣṇik (15) 2nd set of styles: triṣṭubh (1-14); dvipadā (15) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.017.01 (Mandala. Sukta. Rik)
4.6.01.01 (Ashtaka. Adhyaya. Varga. Rik)
06.02.049 (Mandala. Anuvāka. Rik)
Samhita Devanagari Accented
पिबा॒ सोम॑म॒भि यमु॑ग्र॒ तर्द॑ ऊ॒र्वं गव्यं॒ महि॑ गृणा॒न इं॑द्र ।
वि यो धृ॑ष्णो॒ वधि॑षो वज्रहस्त॒ विश्वा॑ वृ॒त्रम॑मि॒त्रिया॒ शवो॑भिः ॥
Samhita Devanagari Nonaccented
पिबा सोममभि यमुग्र तर्द ऊर्वं गव्यं महि गृणान इंद्र ।
वि यो धृष्णो वधिषो वज्रहस्त विश्वा वृत्रममित्रिया शवोभिः ॥
Samhita Transcription Accented
píbā sómamabhí yámugra tárda ūrvám gávyam máhi gṛṇāná indra ǀ
ví yó dhṛṣṇo vádhiṣo vajrahasta víśvā vṛtrámamitríyā śávobhiḥ ǁ
Samhita Transcription Nonaccented
pibā somamabhi yamugra tarda ūrvam gavyam mahi gṛṇāna indra ǀ
vi yo dhṛṣṇo vadhiṣo vajrahasta viśvā vṛtramamitriyā śavobhiḥ ǁ
Padapatha Devanagari Accented
पिब॑ । सोम॑म् । अ॒भि । यम् । उ॒ग्र॒ । तर्दः॑ । ऊ॒र्वम् । गव्य॑म् । महि॑ । गृ॒णा॒नः । इ॒न्द्र॒ ।
वि । यः । धृ॒ष्णो॒ इति॑ । वधि॑षः । व॒ज्र॒ऽह॒स्त॒ । विश्वा॑ । वृ॒त्रम् । अ॒मि॒त्रिया॑ । शवः॑ऽभिः ॥
Padapatha Devanagari Nonaccented
पिब । सोमम् । अभि । यम् । उग्र । तर्दः । ऊर्वम् । गव्यम् । महि । गृणानः । इन्द्र ।
वि । यः । धृष्णो इति । वधिषः । वज्रऽहस्त । विश्वा । वृत्रम् । अमित्रिया । शवःऽभिः ॥
Padapatha Transcription Accented
píba ǀ sómam ǀ abhí ǀ yám ǀ ugra ǀ tárdaḥ ǀ ūrvám ǀ gávyam ǀ máhi ǀ gṛṇānáḥ ǀ indra ǀ
ví ǀ yáḥ ǀ dhṛṣṇo íti ǀ vádhiṣaḥ ǀ vajra-hasta ǀ víśvā ǀ vṛtrám ǀ amitríyā ǀ śávaḥ-bhiḥ ǁ
Padapatha Transcription Nonaccented
piba ǀ somam ǀ abhi ǀ yam ǀ ugra ǀ tardaḥ ǀ ūrvam ǀ gavyam ǀ mahi ǀ gṛṇānaḥ ǀ indra ǀ
vi ǀ yaḥ ǀ dhṛṣṇo iti ǀ vadhiṣaḥ ǀ vajra-hasta ǀ viśvā ǀ vṛtram ǀ amitriyā ǀ śavaḥ-bhiḥ ǁ
06.017.02 (Mandala. Sukta. Rik)
4.6.01.02 (Ashtaka. Adhyaya. Varga. Rik)
06.02.050 (Mandala. Anuvāka. Rik)
Samhita Devanagari Accented
स ईं॑ पाहि॒ य ऋ॑जी॒षी तरु॑त्रो॒ यः शिप्र॑वान्वृष॒भो यो म॑ती॒नां ।
यो गो॑त्र॒भिद्व॑ज्र॒भृद्यो ह॑रि॒ष्ठाः स इं॑द्र चि॒त्राँ अ॒भि तृं॑धि॒ वाजा॑न् ॥
Samhita Devanagari Nonaccented
स ईं पाहि य ऋजीषी तरुत्रो यः शिप्रवान्वृषभो यो मतीनां ।
यो गोत्रभिद्वज्रभृद्यो हरिष्ठाः स इंद्र चित्राँ अभि तृंधि वाजान् ॥
Samhita Transcription Accented
sá īm pāhi yá ṛjīṣī́ tárutro yáḥ śípravānvṛṣabhó yó matīnā́m ǀ
yó gotrabhídvajrabhṛ́dyó hariṣṭhā́ḥ sá indra citrā́m̐ abhí tṛndhi vā́jān ǁ
Samhita Transcription Nonaccented
sa īm pāhi ya ṛjīṣī tarutro yaḥ śipravānvṛṣabho yo matīnām ǀ
yo gotrabhidvajrabhṛdyo hariṣṭhāḥ sa indra citrām̐ abhi tṛndhi vājān ǁ
Padapatha Devanagari Accented
सः । ई॒म् । पा॒हि॒ । यः । ऋ॒जी॒षी । तरु॑त्रः । यः । शिप्र॑ऽवान् । वृ॒ष॒भः । यः । म॒ती॒नाम् ।
यः । गो॒त्र॒ऽभित् । व॒ज्र॒ऽभृत् । यः । ह॒रि॒ऽस्थाः । सः । इ॒न्द्र॒ । चि॒त्रान् । अ॒भि । तृ॒न्धि॒ । वाजा॑न् ॥
Padapatha Devanagari Nonaccented
सः । ईम् । पाहि । यः । ऋजीषी । तरुत्रः । यः । शिप्रऽवान् । वृषभः । यः । मतीनाम् ।
यः । गोत्रऽभित् । वज्रऽभृत् । यः । हरिऽस्थाः । सः । इन्द्र । चित्रान् । अभि । तृन्धि । वाजान् ॥
Padapatha Transcription Accented
sáḥ ǀ īm ǀ pāhi ǀ yáḥ ǀ ṛjīṣī́ ǀ tárutraḥ ǀ yáḥ ǀ śípra-vān ǀ vṛṣabháḥ ǀ yáḥ ǀ matīnā́m ǀ
yáḥ ǀ gotra-bhít ǀ vajra-bhṛ́t ǀ yáḥ ǀ hari-sthā́ḥ ǀ sáḥ ǀ indra ǀ citrā́n ǀ abhí ǀ tṛndhi ǀ vā́jān ǁ
Padapatha Transcription Nonaccented
saḥ ǀ īm ǀ pāhi ǀ yaḥ ǀ ṛjīṣī ǀ tarutraḥ ǀ yaḥ ǀ śipra-vān ǀ vṛṣabhaḥ ǀ yaḥ ǀ matīnām ǀ
yaḥ ǀ gotra-bhit ǀ vajra-bhṛt ǀ yaḥ ǀ hari-sthāḥ ǀ saḥ ǀ indra ǀ citrān ǀ abhi ǀ tṛndhi ǀ vājān ǁ
06.017.03 (Mandala. Sukta. Rik)
4.6.01.03 (Ashtaka. Adhyaya. Varga. Rik)
06.02.051 (Mandala. Anuvāka. Rik)
Samhita Devanagari Accented
ए॒वा पा॑हि प्र॒त्नथा॒ मंद॑तु त्वा श्रु॒धि ब्रह्म॑ वावृ॒धस्वो॒त गी॒र्भिः ।
आ॒विः सूर्यं॑ कृणु॒हि पी॑पि॒हीषो॑ ज॒हि शत्रूँ॑र॒भि गा इं॑द्र तृंधि ॥
Samhita Devanagari Nonaccented
एवा पाहि प्रत्नथा मंदतु त्वा श्रुधि ब्रह्म वावृधस्वोत गीर्भिः ।
आविः सूर्यं कृणुहि पीपिहीषो जहि शत्रूँरभि गा इंद्र तृंधि ॥
Samhita Transcription Accented
evā́ pāhi pratnáthā mándatu tvā śrudhí bráhma vāvṛdhásvotá gīrbhíḥ ǀ
āvíḥ sū́ryam kṛṇuhí pīpihī́ṣo jahí śátrūm̐rabhí gā́ indra tṛndhi ǁ
Samhita Transcription Nonaccented
evā pāhi pratnathā mandatu tvā śrudhi brahma vāvṛdhasvota gīrbhiḥ ǀ
āviḥ sūryam kṛṇuhi pīpihīṣo jahi śatrūm̐rabhi gā indra tṛndhi ǁ
Padapatha Devanagari Accented
ए॒व । पा॒हि॒ । प्र॒त्नऽथा॑ । मन्द॑तु । त्वा॒ । श्रु॒धि । ब्रह्म॑ । व॒वृ॒धस्व॑ । उ॒त । गीः॒ऽभिः ।
आ॒विः । सूर्य॑म् । कृ॒णु॒हि । पी॒पि॒हि । इषः॑ । ज॒हि । शत्रू॑न् । अ॒भि । गाः । इ॒न्द्र॒ । तृ॒न्धि॒ ॥
Padapatha Devanagari Nonaccented
एव । पाहि । प्रत्नऽथा । मन्दतु । त्वा । श्रुधि । ब्रह्म । ववृधस्व । उत । गीःऽभिः ।
आविः । सूर्यम् । कृणुहि । पीपिहि । इषः । जहि । शत्रून् । अभि । गाः । इन्द्र । तृन्धि ॥
Padapatha Transcription Accented
evá ǀ pāhi ǀ pratná-thā ǀ mándatu ǀ tvā ǀ śrudhí ǀ bráhma ǀ vavṛdhásva ǀ utá ǀ gīḥ-bhíḥ ǀ
āvíḥ ǀ sū́ryam ǀ kṛṇuhí ǀ pīpihí ǀ íṣaḥ ǀ jahí ǀ śátrūn ǀ abhí ǀ gā́ḥ ǀ indra ǀ tṛndhi ǁ
Padapatha Transcription Nonaccented
eva ǀ pāhi ǀ pratna-thā ǀ mandatu ǀ tvā ǀ śrudhi ǀ brahma ǀ vavṛdhasva ǀ uta ǀ gīḥ-bhiḥ ǀ
āviḥ ǀ sūryam ǀ kṛṇuhi ǀ pīpihi ǀ iṣaḥ ǀ jahi ǀ śatrūn ǀ abhi ǀ gāḥ ǀ indra ǀ tṛndhi ǁ
06.017.04 (Mandala. Sukta. Rik)
4.6.01.04 (Ashtaka. Adhyaya. Varga. Rik)
06.02.052 (Mandala. Anuvāka. Rik)
Samhita Devanagari Accented
ते त्वा॒ मदा॑ बृ॒हदिं॑द्र स्वधाव इ॒मे पी॒ता उ॑क्षयंत द्यु॒मंतं॑ ।
म॒हामनू॑नं त॒वसं॒ विभू॑तिं मत्स॒रासो॑ जर्हृषंत प्र॒साहं॑ ॥
Samhita Devanagari Nonaccented
ते त्वा मदा बृहदिंद्र स्वधाव इमे पीता उक्षयंत द्युमंतं ।
महामनूनं तवसं विभूतिं मत्सरासो जर्हृषंत प्रसाहं ॥
Samhita Transcription Accented
té tvā mádā bṛhádindra svadhāva imé pītā́ ukṣayanta dyumántam ǀ
mahā́mánūnam tavásam víbhūtim matsarā́so jarhṛṣanta prasā́ham ǁ
Samhita Transcription Nonaccented
te tvā madā bṛhadindra svadhāva ime pītā ukṣayanta dyumantam ǀ
mahāmanūnam tavasam vibhūtim matsarāso jarhṛṣanta prasāham ǁ
Padapatha Devanagari Accented
ते । त्वा॒ । मदाः॑ । बृ॒हत् । इ॒न्द्र॒ । स्व॒धा॒ऽवः॒ । इ॒मे । पी॒ताः । उ॒क्ष॒य॒न्त॒ । द्यु॒ऽमन्त॑म् ।
म॒हाम् । अनू॑नम् । त॒वस॑म् । विऽभू॑तिम् । म॒त्स॒रासः॑ । ज॒र्हृ॒ष॒न्त॒ । प्र॒ऽसह॑म् ॥
Padapatha Devanagari Nonaccented
ते । त्वा । मदाः । बृहत् । इन्द्र । स्वधाऽवः । इमे । पीताः । उक्षयन्त । द्युऽमन्तम् ।
महाम् । अनूनम् । तवसम् । विऽभूतिम् । मत्सरासः । जर्हृषन्त । प्रऽसहम् ॥
Padapatha Transcription Accented
té ǀ tvā ǀ mádāḥ ǀ bṛhát ǀ indra ǀ svadhā-vaḥ ǀ imé ǀ pītā́ḥ ǀ ukṣayanta ǀ dyu-mántam ǀ
mahā́m ǀ ánūnam ǀ tavásam ǀ ví-bhūtim ǀ matsarā́saḥ ǀ jarhṛṣanta ǀ pra-sáham ǁ
Padapatha Transcription Nonaccented
te ǀ tvā ǀ madāḥ ǀ bṛhat ǀ indra ǀ svadhā-vaḥ ǀ ime ǀ pītāḥ ǀ ukṣayanta ǀ dyu-mantam ǀ
mahām ǀ anūnam ǀ tavasam ǀ vi-bhūtim ǀ matsarāsaḥ ǀ jarhṛṣanta ǀ pra-saham ǁ
06.017.05 (Mandala. Sukta. Rik)
4.6.01.05 (Ashtaka. Adhyaya. Varga. Rik)
06.02.053 (Mandala. Anuvāka. Rik)
Samhita Devanagari Accented
येभिः॒ सूर्य॑मु॒षसं॑ मंदसा॒नोऽवा॑स॒योऽप॑ दृ॒ळ्हानि॒ दर्द्र॑त् ।
म॒हामद्रिं॒ परि॒ गा इं॑द्र॒ संतं॑ नु॒त्था अच्यु॑तं॒ सद॑सः॒ परि॒ स्वात् ॥
Samhita Devanagari Nonaccented
येभिः सूर्यमुषसं मंदसानोऽवासयोऽप दृळ्हानि दर्द्रत् ।
महामद्रिं परि गा इंद्र संतं नुत्था अच्युतं सदसः परि स्वात् ॥
Samhita Transcription Accented
yébhiḥ sū́ryamuṣásam mandasānó’vāsayó’pa dṛḷhā́ni dárdrat ǀ
mahā́mádrim pári gā́ indra sántam nutthā́ ácyutam sádasaḥ pári svā́t ǁ
Samhita Transcription Nonaccented
yebhiḥ sūryamuṣasam mandasāno’vāsayo’pa dṛḷhāni dardrat ǀ
mahāmadrim pari gā indra santam nutthā acyutam sadasaḥ pari svāt ǁ
Padapatha Devanagari Accented
येभिः॑ । सूर्य॑म् । उ॒षस॑म् । म॒न्द॒सा॒नः । अवा॑सयः । अप॑ । दृ॒ळ्हानि॑ । दर्द्र॑त् ।
म॒हाम् । अद्रि॑म् । परि॑ । गाः । इ॒न्द्र॒ । सन्त॑म् । नु॒त्थाः । अच्यु॑तम् । सद॑सः । परि॑ । स्वात् ॥
Padapatha Devanagari Nonaccented
येभिः । सूर्यम् । उषसम् । मन्दसानः । अवासयः । अप । दृळ्हानि । दर्द्रत् ।
महाम् । अद्रिम् । परि । गाः । इन्द्र । सन्तम् । नुत्थाः । अच्युतम् । सदसः । परि । स्वात् ॥
Padapatha Transcription Accented
yébhiḥ ǀ sū́ryam ǀ uṣásam ǀ mandasānáḥ ǀ ávāsayaḥ ǀ ápa ǀ dṛḷhā́ni ǀ dárdrat ǀ
mahā́m ǀ ádrim ǀ pári ǀ gā́ḥ ǀ indra ǀ sántam ǀ nutthā́ḥ ǀ ácyutam ǀ sádasaḥ ǀ pári ǀ svā́t ǁ
Padapatha Transcription Nonaccented
yebhiḥ ǀ sūryam ǀ uṣasam ǀ mandasānaḥ ǀ avāsayaḥ ǀ apa ǀ dṛḷhāni ǀ dardrat ǀ
mahām ǀ adrim ǀ pari ǀ gāḥ ǀ indra ǀ santam ǀ nutthāḥ ǀ acyutam ǀ sadasaḥ ǀ pari ǀ svāt ǁ
06.017.06 (Mandala. Sukta. Rik)
4.6.02.01 (Ashtaka. Adhyaya. Varga. Rik)
06.02.054 (Mandala. Anuvāka. Rik)
Samhita Devanagari Accented
तव॒ क्रत्वा॒ तव॒ तद्दं॒सना॑भिरा॒मासु॑ प॒क्वं शच्या॒ नि दी॑धः ।
और्णो॒र्दुर॑ उ॒स्रिया॑भ्यो॒ वि दृ॒ळ्होदू॒र्वाद्गा अ॑सृजो॒ अंगि॑रस्वान् ॥
Samhita Devanagari Nonaccented
तव क्रत्वा तव तद्दंसनाभिरामासु पक्वं शच्या नि दीधः ।
और्णोर्दुर उस्रियाभ्यो वि दृळ्होदूर्वाद्गा असृजो अंगिरस्वान् ॥
Samhita Transcription Accented
táva krátvā táva táddaṃsánābhirāmā́su pakvám śácyā ní dīdhaḥ ǀ
áurṇordúra usríyābhyo ví dṛḷhódūrvā́dgā́ asṛjo áṅgirasvān ǁ
Samhita Transcription Nonaccented
tava kratvā tava taddaṃsanābhirāmāsu pakvam śacyā ni dīdhaḥ ǀ
aurṇordura usriyābhyo vi dṛḷhodūrvādgā asṛjo aṅgirasvān ǁ
Padapatha Devanagari Accented
तव॑ । क्रत्वा॑ । तव॑ । तत् । दं॒सना॑भिः । आ॒मासु॑ । प॒क्वम् । शच्या॑ । नि । दी॒ध॒रिति॑ दीधः ।
और्णोः॑ । दुरः॑ । उ॒स्रिया॑भ्यः । वि । दृ॒ळ्हा । उत् । ऊ॒र्वात् । गाः । अ॒सृ॒जः॒ । अङ्गि॑रस्वान् ॥
Padapatha Devanagari Nonaccented
तव । क्रत्वा । तव । तत् । दंसनाभिः । आमासु । पक्वम् । शच्या । नि । दीधरिति दीधः ।
और्णोः । दुरः । उस्रियाभ्यः । वि । दृळ्हा । उत् । ऊर्वात् । गाः । असृजः । अङ्गिरस्वान् ॥
Padapatha Transcription Accented
táva ǀ krátvā ǀ táva ǀ tát ǀ daṃsánābhiḥ ǀ āmā́su ǀ pakvám ǀ śácyā ǀ ní ǀ dīdharíti dīdhaḥ ǀ
áurṇoḥ ǀ dúraḥ ǀ usríyābhyaḥ ǀ ví ǀ dṛḷhā́ ǀ út ǀ ūrvā́t ǀ gā́ḥ ǀ asṛjaḥ ǀ áṅgirasvān ǁ
Padapatha Transcription Nonaccented
tava ǀ kratvā ǀ tava ǀ tat ǀ daṃsanābhiḥ ǀ āmāsu ǀ pakvam ǀ śacyā ǀ ni ǀ dīdhariti dīdhaḥ ǀ
aurṇoḥ ǀ duraḥ ǀ usriyābhyaḥ ǀ vi ǀ dṛḷhā ǀ ut ǀ ūrvāt ǀ gāḥ ǀ asṛjaḥ ǀ aṅgirasvān ǁ
06.017.07 (Mandala. Sukta. Rik)
4.6.02.02 (Ashtaka. Adhyaya. Varga. Rik)
06.02.055 (Mandala. Anuvāka. Rik)
Samhita Devanagari Accented
प॒प्राथ॒ क्षां महि॒ दंसो॒ व्यु१॒॑र्वीमुप॒ द्यामृ॒ष्वो बृ॒हदिं॑द्र स्तभायः ।
अधा॑रयो॒ रोद॑सी दे॒वपु॑त्रे प्र॒त्ने मा॒तरा॑ य॒ह्वी ऋ॒तस्य॑ ॥
Samhita Devanagari Nonaccented
पप्राथ क्षां महि दंसो व्युर्वीमुप द्यामृष्वो बृहदिंद्र स्तभायः ।
अधारयो रोदसी देवपुत्रे प्रत्ने मातरा यह्वी ऋतस्य ॥
Samhita Transcription Accented
paprā́tha kṣā́m máhi dáṃso vyúrvī́múpa dyā́mṛṣvó bṛhádindra stabhāyaḥ ǀ
ádhārayo ródasī deváputre pratné mātárā yahvī́ ṛtásya ǁ
Samhita Transcription Nonaccented
paprātha kṣām mahi daṃso vyurvīmupa dyāmṛṣvo bṛhadindra stabhāyaḥ ǀ
adhārayo rodasī devaputre pratne mātarā yahvī ṛtasya ǁ
Padapatha Devanagari Accented
प॒प्राथ॑ । क्षाम् । महि॑ । दंसः॑ । वि । उ॒र्वीम् । उप॑ । द्याम् । ऋ॒ष्वः । बृ॒हत् । इ॒न्द्र॒ । स्त॒भा॒यः॒ ।
अधा॑रयः । रोद॑सी॒ इति॑ । दे॒वपु॑त्रे॒ इति॑ दे॒वऽपु॑त्रे । प्र॒त्ने इति॑ । मा॒तरा॑ । य॒ह्वी इति॑ । ऋ॒तस्य॑ ॥
Padapatha Devanagari Nonaccented
पप्राथ । क्षाम् । महि । दंसः । वि । उर्वीम् । उप । द्याम् । ऋष्वः । बृहत् । इन्द्र । स्तभायः ।
अधारयः । रोदसी इति । देवपुत्रे इति देवऽपुत्रे । प्रत्ने इति । मातरा । यह्वी इति । ऋतस्य ॥
Padapatha Transcription Accented
paprā́tha ǀ kṣā́m ǀ máhi ǀ dáṃsaḥ ǀ ví ǀ urvī́m ǀ úpa ǀ dyā́m ǀ ṛṣváḥ ǀ bṛhát ǀ indra ǀ stabhāyaḥ ǀ
ádhārayaḥ ǀ ródasī íti ǀ deváputre íti devá-putre ǀ pratné íti ǀ mātárā ǀ yahvī́ íti ǀ ṛtásya ǁ
Padapatha Transcription Nonaccented
paprātha ǀ kṣām ǀ mahi ǀ daṃsaḥ ǀ vi ǀ urvīm ǀ upa ǀ dyām ǀ ṛṣvaḥ ǀ bṛhat ǀ indra ǀ stabhāyaḥ ǀ
adhārayaḥ ǀ rodasī iti ǀ devaputre iti deva-putre ǀ pratne iti ǀ mātarā ǀ yahvī iti ǀ ṛtasya ǁ
06.017.08 (Mandala. Sukta. Rik)
4.6.02.03 (Ashtaka. Adhyaya. Varga. Rik)
06.02.056 (Mandala. Anuvāka. Rik)
Samhita Devanagari Accented
अध॑ त्वा॒ विश्वे॑ पु॒र इं॑द्र दे॒वा एकं॑ त॒वसं॑ दधिरे॒ भरा॑य ।
अदे॑वो॒ यद॒भ्यौहि॑ष्ट दे॒वान्त्स्व॑र्षाता वृणत॒ इंद्र॒मत्र॑ ॥
Samhita Devanagari Nonaccented
अध त्वा विश्वे पुर इंद्र देवा एकं तवसं दधिरे भराय ।
अदेवो यदभ्यौहिष्ट देवान्त्स्वर्षाता वृणत इंद्रमत्र ॥
Samhita Transcription Accented
ádha tvā víśve purá indra devā́ ékam tavásam dadhire bhárāya ǀ
ádevo yádabhyáuhiṣṭa devā́ntsvárṣātā vṛṇata índramátra ǁ
Samhita Transcription Nonaccented
adha tvā viśve pura indra devā ekam tavasam dadhire bharāya ǀ
adevo yadabhyauhiṣṭa devāntsvarṣātā vṛṇata indramatra ǁ
Padapatha Devanagari Accented
अध॑ । त्वा॒ । विश्वे॑ । पु॒रः । इ॒न्द्र॒ । दे॒वाः । एक॑म् । त॒वस॑म् । द॒धि॒रे॒ । भरा॑य ।
अदे॑वः । यत् । अ॒भि । औहि॑ष्ट । दे॒वान् । स्वः॑ऽसाता । वृ॒ण॒ते॒ । इन्द्र॑म् । अत्र॑ ॥
Padapatha Devanagari Nonaccented
अध । त्वा । विश्वे । पुरः । इन्द्र । देवाः । एकम् । तवसम् । दधिरे । भराय ।
अदेवः । यत् । अभि । औहिष्ट । देवान् । स्वःऽसाता । वृणते । इन्द्रम् । अत्र ॥
Padapatha Transcription Accented
ádha ǀ tvā ǀ víśve ǀ puráḥ ǀ indra ǀ devā́ḥ ǀ ékam ǀ tavásam ǀ dadhire ǀ bhárāya ǀ
ádevaḥ ǀ yát ǀ abhí ǀ áuhiṣṭa ǀ devā́n ǀ sváḥ-sātā ǀ vṛṇate ǀ índram ǀ átra ǁ
Padapatha Transcription Nonaccented
adha ǀ tvā ǀ viśve ǀ puraḥ ǀ indra ǀ devāḥ ǀ ekam ǀ tavasam ǀ dadhire ǀ bharāya ǀ
adevaḥ ǀ yat ǀ abhi ǀ auhiṣṭa ǀ devān ǀ svaḥ-sātā ǀ vṛṇate ǀ indram ǀ atra ǁ
06.017.09 (Mandala. Sukta. Rik)
4.6.02.04 (Ashtaka. Adhyaya. Varga. Rik)
06.02.057 (Mandala. Anuvāka. Rik)
Samhita Devanagari Accented
अध॒ द्यौश्चि॑त्ते॒ अप॒ सा नु वज्रा॑द्द्वि॒तान॑मद्भि॒यसा॒ स्वस्य॑ म॒न्योः ।
अहिं॒ यदिंद्रो॑ अ॒भ्योह॑सानं॒ नि चि॑द्वि॒श्वायुः॑ श॒यथे॑ ज॒घान॑ ॥
Samhita Devanagari Nonaccented
अध द्यौश्चित्ते अप सा नु वज्राद्द्वितानमद्भियसा स्वस्य मन्योः ।
अहिं यदिंद्रो अभ्योहसानं नि चिद्विश्वायुः शयथे जघान ॥
Samhita Transcription Accented
ádha dyáuścitte ápa sā́ nú vájrāddvitā́namadbhiyásā svásya manyóḥ ǀ
áhim yádíndro abhyóhasānam ní cidviśvā́yuḥ śayáthe jaghā́na ǁ
Samhita Transcription Nonaccented
adha dyauścitte apa sā nu vajrāddvitānamadbhiyasā svasya manyoḥ ǀ
ahim yadindro abhyohasānam ni cidviśvāyuḥ śayathe jaghāna ǁ
Padapatha Devanagari Accented
अध॑ । द्यौः । चि॒त् । ते॒ । अप॑ । सा । नु । वज्रा॑त् । द्वि॒ता । अ॒न॒म॒त् । भि॒यसा॑ । स्वस्य॑ । म॒न्योः ।
अहि॑म् । यत् । इन्द्रः॑ । अ॒भि । ओह॑सानम् । नि । चि॒त् । वि॒श्वऽआ॑युः । श॒यथे॑ । ज॒घान॑ ॥
Padapatha Devanagari Nonaccented
अध । द्यौः । चित् । ते । अप । सा । नु । वज्रात् । द्विता । अनमत् । भियसा । स्वस्य । मन्योः ।
अहिम् । यत् । इन्द्रः । अभि । ओहसानम् । नि । चित् । विश्वऽआयुः । शयथे । जघान ॥
Padapatha Transcription Accented
ádha ǀ dyáuḥ ǀ cit ǀ te ǀ ápa ǀ sā́ ǀ nú ǀ vájrāt ǀ dvitā́ ǀ anamat ǀ bhiyásā ǀ svásya ǀ manyóḥ ǀ
áhim ǀ yát ǀ índraḥ ǀ abhí ǀ óhasānam ǀ ní ǀ cit ǀ viśvá-āyuḥ ǀ śayáthe ǀ jaghā́na ǁ
Padapatha Transcription Nonaccented
adha ǀ dyauḥ ǀ cit ǀ te ǀ apa ǀ sā ǀ nu ǀ vajrāt ǀ dvitā ǀ anamat ǀ bhiyasā ǀ svasya ǀ manyoḥ ǀ
ahim ǀ yat ǀ indraḥ ǀ abhi ǀ ohasānam ǀ ni ǀ cit ǀ viśva-āyuḥ ǀ śayathe ǀ jaghāna ǁ
06.017.10 (Mandala. Sukta. Rik)
4.6.02.05 (Ashtaka. Adhyaya. Varga. Rik)
06.02.058 (Mandala. Anuvāka. Rik)
Samhita Devanagari Accented
अध॒ त्वष्टा॑ ते म॒ह उ॑ग्र॒ वज्रं॑ स॒हस्र॑भृष्टिं ववृतच्छ॒ताश्रिं॑ ।
निका॑मम॒रम॑णसं॒ येन॒ नवं॑त॒महिं॒ सं पि॑णगृजीषिन् ॥
Samhita Devanagari Nonaccented
अध त्वष्टा ते मह उग्र वज्रं सहस्रभृष्टिं ववृतच्छताश्रिं ।
निकाममरमणसं येन नवंतमहिं सं पिणगृजीषिन् ॥
Samhita Transcription Accented
ádha tváṣṭā te mahá ugra vájram sahásrabhṛṣṭim vavṛtacchatā́śrim ǀ
níkāmamarámaṇasam yéna návantamáhim sám piṇagṛjīṣin ǁ
Samhita Transcription Nonaccented
adha tvaṣṭā te maha ugra vajram sahasrabhṛṣṭim vavṛtacchatāśrim ǀ
nikāmamaramaṇasam yena navantamahim sam piṇagṛjīṣin ǁ
Padapatha Devanagari Accented
अध॑ । त्वष्टा॑ । ते॒ । म॒हः । उ॒ग्र॒ । वज्र॑म् । स॒हस्र॑ऽभृष्टिम् । व॒वृ॒त॒त् । श॒तऽअ॑श्रिम् ।
निऽका॑मम् । अ॒रऽम॑नसम् । येन॑ । नव॑न्तम् । अहि॑म् । सम् । पि॒ण॒क् । ऋ॒जी॒षि॒न् ॥
Padapatha Devanagari Nonaccented
अध । त्वष्टा । ते । महः । उग्र । वज्रम् । सहस्रऽभृष्टिम् । ववृतत् । शतऽअश्रिम् ।
निऽकामम् । अरऽमनसम् । येन । नवन्तम् । अहिम् । सम् । पिणक् । ऋजीषिन् ॥
Padapatha Transcription Accented
ádha ǀ tváṣṭā ǀ te ǀ maháḥ ǀ ugra ǀ vájram ǀ sahásra-bhṛṣṭim ǀ vavṛtat ǀ śatá-aśrim ǀ
ní-kāmam ǀ ará-manasam ǀ yéna ǀ návantam ǀ áhim ǀ sám ǀ piṇak ǀ ṛjīṣin ǁ
Padapatha Transcription Nonaccented
adha ǀ tvaṣṭā ǀ te ǀ mahaḥ ǀ ugra ǀ vajram ǀ sahasra-bhṛṣṭim ǀ vavṛtat ǀ śata-aśrim ǀ
ni-kāmam ǀ ara-manasam ǀ yena ǀ navantam ǀ ahim ǀ sam ǀ piṇak ǀ ṛjīṣin ǁ
06.017.11 (Mandala. Sukta. Rik)
4.6.03.01 (Ashtaka. Adhyaya. Varga. Rik)
06.02.059 (Mandala. Anuvāka. Rik)
Samhita Devanagari Accented
वर्धा॒न्यं विश्वे॑ म॒रुतः॑ स॒जोषाः॒ पच॑च्छ॒तं म॑हि॒षाँ इं॑द्र॒ तुभ्यं॑ ।
पू॒षा विष्णु॒स्त्रीणि॒ सरां॑सि धावन्वृत्र॒हणं॑ मदि॒रमं॒शुम॑स्मै ॥
Samhita Devanagari Nonaccented
वर्धान्यं विश्वे मरुतः सजोषाः पचच्छतं महिषाँ इंद्र तुभ्यं ।
पूषा विष्णुस्त्रीणि सरांसि धावन्वृत्रहणं मदिरमंशुमस्मै ॥
Samhita Transcription Accented
várdhānyám víśve marútaḥ sajóṣāḥ pácacchatám mahiṣā́m̐ indra túbhyam ǀ
pūṣā́ víṣṇustrī́ṇi sárāṃsi dhāvanvṛtraháṇam madirámaṃśúmasmai ǁ
Samhita Transcription Nonaccented
vardhānyam viśve marutaḥ sajoṣāḥ pacacchatam mahiṣām̐ indra tubhyam ǀ
pūṣā viṣṇustrīṇi sarāṃsi dhāvanvṛtrahaṇam madiramaṃśumasmai ǁ
Padapatha Devanagari Accented
वर्धा॑न् । यम् । विश्वे॑ । म॒रुतः॑ । स॒ऽजोषाः॑ । पच॑त् । श॒तम् । म॒हि॒षान् । इ॒न्द्र॒ । तुभ्य॑म् ।
पू॒षा । विष्णुः॑ । त्रीणि॑ । सरां॑सि । धा॒व॒न् । वृ॒त्र॒ऽहन॑म् । म॒दि॒रम् । अं॒शुम् । अ॒स्मै॒ ॥
Padapatha Devanagari Nonaccented
वर्धान् । यम् । विश्वे । मरुतः । सऽजोषाः । पचत् । शतम् । महिषान् । इन्द्र । तुभ्यम् ।
पूषा । विष्णुः । त्रीणि । सरांसि । धावन् । वृत्रऽहनम् । मदिरम् । अंशुम् । अस्मै ॥
Padapatha Transcription Accented
várdhān ǀ yám ǀ víśve ǀ marútaḥ ǀ sa-jóṣāḥ ǀ pácat ǀ śatám ǀ mahiṣā́n ǀ indra ǀ túbhyam ǀ
pūṣā́ ǀ víṣṇuḥ ǀ trī́ṇi ǀ sárāṃsi ǀ dhāvan ǀ vṛtra-hánam ǀ madirám ǀ aṃśúm ǀ asmai ǁ
Padapatha Transcription Nonaccented
vardhān ǀ yam ǀ viśve ǀ marutaḥ ǀ sa-joṣāḥ ǀ pacat ǀ śatam ǀ mahiṣān ǀ indra ǀ tubhyam ǀ
pūṣā ǀ viṣṇuḥ ǀ trīṇi ǀ sarāṃsi ǀ dhāvan ǀ vṛtra-hanam ǀ madiram ǀ aṃśum ǀ asmai ǁ
06.017.12 (Mandala. Sukta. Rik)
4.6.03.02 (Ashtaka. Adhyaya. Varga. Rik)
06.02.060 (Mandala. Anuvāka. Rik)
Samhita Devanagari Accented
आ क्षोदो॒ महि॑ वृ॒तं न॒दीनां॒ परि॑ष्ठितमसृज ऊ॒र्मिम॒पां ।
तासा॒मनु॑ प्र॒वत॑ इंद्र॒ पंथां॒ प्रार्द॑यो॒ नीची॑र॒पसः॑ समु॒द्रं ॥
Samhita Devanagari Nonaccented
आ क्षोदो महि वृतं नदीनां परिष्ठितमसृज ऊर्मिमपां ।
तासामनु प्रवत इंद्र पंथां प्रार्दयो नीचीरपसः समुद्रं ॥
Samhita Transcription Accented
ā́ kṣódo máhi vṛtám nadī́nām páriṣṭhitamasṛja ūrmímapā́m ǀ
tā́sāmánu praváta indra pánthām prā́rdayo nī́cīrapásaḥ samudrám ǁ
Samhita Transcription Nonaccented
ā kṣodo mahi vṛtam nadīnām pariṣṭhitamasṛja ūrmimapām ǀ
tāsāmanu pravata indra panthām prārdayo nīcīrapasaḥ samudram ǁ
Padapatha Devanagari Accented
आ । क्षोदः॑ । महि॑ । वृ॒तम् । न॒दीना॑म् । परि॑ऽस्थितम् । अ॒सृ॒जः॒ । ऊ॒र्मिम् । अ॒पाम् ।
तासा॑म् । अनु॑ । प्र॒ऽवतः॑ । इ॒न्द्र॒ । पन्था॑म् । प्र । आ॒र्द॒यः॒ । नीचीः॑ । अ॒पसः॑ । स॒मु॒द्रम् ॥
Padapatha Devanagari Nonaccented
आ । क्षोदः । महि । वृतम् । नदीनाम् । परिऽस्थितम् । असृजः । ऊर्मिम् । अपाम् ।
तासाम् । अनु । प्रऽवतः । इन्द्र । पन्थाम् । प्र । आर्दयः । नीचीः । अपसः । समुद्रम् ॥
Padapatha Transcription Accented
ā́ ǀ kṣódaḥ ǀ máhi ǀ vṛtám ǀ nadī́nām ǀ pári-sthitam ǀ asṛjaḥ ǀ ūrmím ǀ apā́m ǀ
tā́sām ǀ ánu ǀ pra-vátaḥ ǀ indra ǀ pánthām ǀ prá ǀ ārdayaḥ ǀ nī́cīḥ ǀ apásaḥ ǀ samudrám ǁ
Padapatha Transcription Nonaccented
ā ǀ kṣodaḥ ǀ mahi ǀ vṛtam ǀ nadīnām ǀ pari-sthitam ǀ asṛjaḥ ǀ ūrmim ǀ apām ǀ
tāsām ǀ anu ǀ pra-vataḥ ǀ indra ǀ panthām ǀ pra ǀ ārdayaḥ ǀ nīcīḥ ǀ apasaḥ ǀ samudram ǁ
06.017.13 (Mandala. Sukta. Rik)
4.6.03.03 (Ashtaka. Adhyaya. Varga. Rik)
06.02.061 (Mandala. Anuvāka. Rik)
Samhita Devanagari Accented
ए॒वा ता विश्वा॑ चकृ॒वांस॒मिंद्रं॑ म॒हामु॒ग्रम॑जु॒र्यं स॑हो॒दां ।
सु॒वीरं॑ त्वा स्वायु॒धं सु॒वज्र॒मा ब्रह्म॒ नव्य॒मव॑से ववृत्यात् ॥
Samhita Devanagari Nonaccented
एवा ता विश्वा चकृवांसमिंद्रं महामुग्रमजुर्यं सहोदां ।
सुवीरं त्वा स्वायुधं सुवज्रमा ब्रह्म नव्यमवसे ववृत्यात् ॥
Samhita Transcription Accented
evā́ tā́ víśvā cakṛvā́ṃsamíndram mahā́mugrámajuryám sahodā́m ǀ
suvī́ram tvā svāyudhám suvájramā́ bráhma návyamávase vavṛtyāt ǁ
Samhita Transcription Nonaccented
evā tā viśvā cakṛvāṃsamindram mahāmugramajuryam sahodām ǀ
suvīram tvā svāyudham suvajramā brahma navyamavase vavṛtyāt ǁ
Padapatha Devanagari Accented
ए॒व । ता । विश्वा॑ । च॒कृ॒ऽवांस॑म् । इन्द्र॑म् । म॒हाम् । उ॒ग्रम् । अ॒जु॒र्यम् । स॒हः॒ऽदाम् ।
सु॒ऽवीर॑म् । त्वा॒ । सु॒ऽआ॒यु॒धम् । सु॒ऽवज्र॑म् । आ । ब्रह्म॑ । नव्य॑म् । अव॑से । व॒वृ॒त्या॒त् ॥
Padapatha Devanagari Nonaccented
एव । ता । विश्वा । चकृऽवांसम् । इन्द्रम् । महाम् । उग्रम् । अजुर्यम् । सहःऽदाम् ।
सुऽवीरम् । त्वा । सुऽआयुधम् । सुऽवज्रम् । आ । ब्रह्म । नव्यम् । अवसे । ववृत्यात् ॥
Padapatha Transcription Accented
evá ǀ tā́ ǀ víśvā ǀ cakṛ-vā́ṃsam ǀ índram ǀ mahā́m ǀ ugrám ǀ ajuryám ǀ sahaḥ-dā́m ǀ
su-vī́ram ǀ tvā ǀ su-āyudhám ǀ su-vájram ǀ ā́ ǀ bráhma ǀ návyam ǀ ávase ǀ vavṛtyāt ǁ
Padapatha Transcription Nonaccented
eva ǀ tā ǀ viśvā ǀ cakṛ-vāṃsam ǀ indram ǀ mahām ǀ ugram ǀ ajuryam ǀ sahaḥ-dām ǀ
su-vīram ǀ tvā ǀ su-āyudham ǀ su-vajram ǀ ā ǀ brahma ǀ navyam ǀ avase ǀ vavṛtyāt ǁ
06.017.14 (Mandala. Sukta. Rik)
4.6.03.04 (Ashtaka. Adhyaya. Varga. Rik)
06.02.062 (Mandala. Anuvāka. Rik)
Samhita Devanagari Accented
स नो॒ वाजा॑य॒ श्रव॑स इ॒षे च॑ रा॒ये धे॑हि द्यु॒मत॑ इंद्र॒ विप्रा॑न् ।
भ॒रद्वा॑जे नृ॒वत॑ इंद्र सू॒रींदि॒वि च॑ स्मैधि॒ पार्ये॑ न इंद्र ॥
Samhita Devanagari Nonaccented
स नो वाजाय श्रवस इषे च राये धेहि द्युमत इंद्र विप्रान् ।
भरद्वाजे नृवत इंद्र सूरींदिवि च स्मैधि पार्ये न इंद्र ॥
Samhita Transcription Accented
sá no vā́jāya śrávasa iṣé ca rāyé dhehi dyumáta indra víprān ǀ
bharádvāje nṛváta indra sūrī́ndiví ca smaidhi pā́rye na indra ǁ
Samhita Transcription Nonaccented
sa no vājāya śravasa iṣe ca rāye dhehi dyumata indra viprān ǀ
bharadvāje nṛvata indra sūrīndivi ca smaidhi pārye na indra ǁ
Padapatha Devanagari Accented
सः । नः॒ । वाजा॑य । श्रव॑से । इ॒षे । च॒ । रा॒ये । धे॒हि॒ । द्यु॒ऽमतः॑ । इ॒न्द्र॒ । विप्रा॑न् ।
भ॒रत्ऽवा॑जे । नृ॒ऽवतः॑ । इ॒न्द्र॒ । सू॒रीन् । दि॒वि । च॒ । स्म॒ । ए॒धि॒ । पार्ये॑ । नः॒ । इ॒न्द्र॒ ॥
Padapatha Devanagari Nonaccented
सः । नः । वाजाय । श्रवसे । इषे । च । राये । धेहि । द्युऽमतः । इन्द्र । विप्रान् ।
भरत्ऽवाजे । नृऽवतः । इन्द्र । सूरीन् । दिवि । च । स्म । एधि । पार्ये । नः । इन्द्र ॥
Padapatha Transcription Accented
sáḥ ǀ naḥ ǀ vā́jāya ǀ śrávase ǀ iṣé ǀ ca ǀ rāyé ǀ dhehi ǀ dyu-mátaḥ ǀ indra ǀ víprān ǀ
bharát-vāje ǀ nṛ-vátaḥ ǀ indra ǀ sūrī́n ǀ diví ǀ ca ǀ sma ǀ edhi ǀ pā́rye ǀ naḥ ǀ indra ǁ
Padapatha Transcription Nonaccented
saḥ ǀ naḥ ǀ vājāya ǀ śravase ǀ iṣe ǀ ca ǀ rāye ǀ dhehi ǀ dyu-mataḥ ǀ indra ǀ viprān ǀ
bharat-vāje ǀ nṛ-vataḥ ǀ indra ǀ sūrīn ǀ divi ǀ ca ǀ sma ǀ edhi ǀ pārye ǀ naḥ ǀ indra ǁ
06.017.15 (Mandala. Sukta. Rik)
4.6.03.05 (Ashtaka. Adhyaya. Varga. Rik)
06.02.063 (Mandala. Anuvāka. Rik)
Samhita Devanagari Accented
अ॒या वाजं॑ दे॒वहि॑तं सनेम॒ मदे॑म श॒तहि॑माः सु॒वीराः॑ ॥
Samhita Devanagari Nonaccented
अया वाजं देवहितं सनेम मदेम शतहिमाः सुवीराः ॥
Samhita Transcription Accented
ayā́ vā́jam deváhitam sanema mádema śatáhimāḥ suvī́rāḥ ǁ
Samhita Transcription Nonaccented
ayā vājam devahitam sanema madema śatahimāḥ suvīrāḥ ǁ
Padapatha Devanagari Accented
अ॒या । वाज॑म् । दे॒वऽहि॑तम् । स॒ने॒म॒ । मदे॑म । श॒तऽहि॑माः । सु॒ऽवीराः॑ ॥
Padapatha Devanagari Nonaccented
अया । वाजम् । देवऽहितम् । सनेम । मदेम । शतऽहिमाः । सुऽवीराः ॥
Padapatha Transcription Accented
ayā́ ǀ vā́jam ǀ devá-hitam ǀ sanema ǀ mádema ǀ śatá-himāḥ ǀ su-vī́rāḥ ǁ
Padapatha Transcription Nonaccented
ayā ǀ vājam ǀ deva-hitam ǀ sanema ǀ madema ǀ śata-himāḥ ǀ su-vīrāḥ ǁ