|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 18
|
1. Info |
| To: | indra | |
| From: | bharadvāja bārhaspatya | |
| Metres: | 1st set of styles: nicṛttriṣṭup (1, 4, 9, 14); triṣṭup (2, 8, 11, 13); bhurikpaṅkti (3, 15); virāṭtrisṭup (7, 10); svarāṭpaṅkti (5); brāhmyuṣnik (6); bhuriktriṣṭup (12) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.018.01 (Mandala. Sukta. Rik)
4.6.04.01 (Ashtaka. Adhyaya. Varga. Rik)
06.02.064 (Mandala. Anuvāka. Rik)
Samhita Devanagari Accented
तमु॑ ष्टुहि॒ यो अ॒भिभू॑त्योजा व॒न्वन्नवा॑तः पुरुहू॒त इंद्रः॑ ।
अषा॑ळ्हमु॒ग्रं सह॑मानमा॒भिर्गी॒र्भिर्व॑र्ध वृष॒भं च॑र्षणी॒नां ॥
Samhita Devanagari Nonaccented
तमु ष्टुहि यो अभिभूत्योजा वन्वन्नवातः पुरुहूत इंद्रः ।
अषाळ्हमुग्रं सहमानमाभिर्गीर्भिर्वर्ध वृषभं चर्षणीनां ॥
Samhita Transcription Accented
támu ṣṭuhi yó abhíbhūtyojā vanvánnávātaḥ puruhūtá índraḥ ǀ
áṣāḷhamugrám sáhamānamābhírgīrbhírvardha vṛṣabhám carṣaṇīnā́m ǁ
Samhita Transcription Nonaccented
tamu ṣṭuhi yo abhibhūtyojā vanvannavātaḥ puruhūta indraḥ ǀ
aṣāḷhamugram sahamānamābhirgīrbhirvardha vṛṣabham carṣaṇīnām ǁ
Padapatha Devanagari Accented
तम् । ऊं॒ इति॑ । स्तु॒हि॒ । यः । अ॒भिभू॑तिऽओजाः । व॒न्वन् । अवा॑तः । पु॒रु॒ऽहू॒तः । इन्द्रः॑ ।
अषा॑ळ्हम् । उ॒ग्रम् । सह॑मानम् । आ॒भिः । गीः॒ऽभिः । व॒र्ध॒ । वृ॒ष॒भम् । च॒र्ष॒णी॒नाम् ॥
Padapatha Devanagari Nonaccented
तम् । ऊं इति । स्तुहि । यः । अभिभूतिऽओजाः । वन्वन् । अवातः । पुरुऽहूतः । इन्द्रः ।
अषाळ्हम् । उग्रम् । सहमानम् । आभिः । गीःऽभिः । वर्ध । वृषभम् । चर्षणीनाम् ॥
Padapatha Transcription Accented
tám ǀ ūṃ íti ǀ stuhi ǀ yáḥ ǀ abhíbhūti-ojāḥ ǀ vanván ǀ ávātaḥ ǀ puru-hūtáḥ ǀ índraḥ ǀ
áṣāḷham ǀ ugrám ǀ sáhamānam ǀ ābhíḥ ǀ gīḥ-bhíḥ ǀ vardha ǀ vṛṣabhám ǀ carṣaṇīnā́m ǁ
Padapatha Transcription Nonaccented
tam ǀ ūṃ iti ǀ stuhi ǀ yaḥ ǀ abhibhūti-ojāḥ ǀ vanvan ǀ avātaḥ ǀ puru-hūtaḥ ǀ indraḥ ǀ
aṣāḷham ǀ ugram ǀ sahamānam ǀ ābhiḥ ǀ gīḥ-bhiḥ ǀ vardha ǀ vṛṣabham ǀ carṣaṇīnām ǁ
06.018.02 (Mandala. Sukta. Rik)
4.6.04.02 (Ashtaka. Adhyaya. Varga. Rik)
06.02.065 (Mandala. Anuvāka. Rik)
Samhita Devanagari Accented
स यु॒ध्मः सत्वा॑ खज॒कृत्स॒मद्वा॑ तुविम्र॒क्षो न॑दनु॒माँ ऋ॑जी॒षी ।
बृ॒हद्रे॑णु॒श्च्यव॑नो॒ मानु॑षीणा॒मेकः॑ कृष्टी॒नाम॑भवत्स॒हावा॑ ॥
Samhita Devanagari Nonaccented
स युध्मः सत्वा खजकृत्समद्वा तुविम्रक्षो नदनुमाँ ऋजीषी ।
बृहद्रेणुश्च्यवनो मानुषीणामेकः कृष्टीनामभवत्सहावा ॥
Samhita Transcription Accented
sá yudhmáḥ sátvā khajakṛ́tsamádvā tuvimrakṣó nadanumā́m̐ ṛjīṣī́ ǀ
bṛhádreṇuścyávano mā́nuṣīṇāmékaḥ kṛṣṭīnā́mabhavatsahā́vā ǁ
Samhita Transcription Nonaccented
sa yudhmaḥ satvā khajakṛtsamadvā tuvimrakṣo nadanumām̐ ṛjīṣī ǀ
bṛhadreṇuścyavano mānuṣīṇāmekaḥ kṛṣṭīnāmabhavatsahāvā ǁ
Padapatha Devanagari Accented
सः । यु॒ध्मः । सत्वा॑ । ख॒ज॒ऽकृत् । स॒मत्ऽवा॑ । तु॒वि॒ऽम्र॒क्षः । न॒द॒नु॒ऽमान् । ऋ॒जी॒षी ।
बृ॒हत्ऽरे॑णुः । च्यव॑नः । मानु॑षीणाम् । एकः॑ । कृ॒ष्टी॒नाम् । अ॒भ॒व॒त् । स॒हऽवा॑ ॥
Padapatha Devanagari Nonaccented
सः । युध्मः । सत्वा । खजऽकृत् । समत्ऽवा । तुविऽम्रक्षः । नदनुऽमान् । ऋजीषी ।
बृहत्ऽरेणुः । च्यवनः । मानुषीणाम् । एकः । कृष्टीनाम् । अभवत् । सहऽवा ॥
Padapatha Transcription Accented
sáḥ ǀ yudhmáḥ ǀ sátvā ǀ khaja-kṛ́t ǀ samát-vā ǀ tuvi-mrakṣáḥ ǀ nadanu-mā́n ǀ ṛjīṣī́ ǀ
bṛhát-reṇuḥ ǀ cyávanaḥ ǀ mā́nuṣīṇām ǀ ékaḥ ǀ kṛṣṭīnā́m ǀ abhavat ǀ sahá-vā ǁ
Padapatha Transcription Nonaccented
saḥ ǀ yudhmaḥ ǀ satvā ǀ khaja-kṛt ǀ samat-vā ǀ tuvi-mrakṣaḥ ǀ nadanu-mān ǀ ṛjīṣī ǀ
bṛhat-reṇuḥ ǀ cyavanaḥ ǀ mānuṣīṇām ǀ ekaḥ ǀ kṛṣṭīnām ǀ abhavat ǀ saha-vā ǁ
06.018.03 (Mandala. Sukta. Rik)
4.6.04.03 (Ashtaka. Adhyaya. Varga. Rik)
06.02.066 (Mandala. Anuvāka. Rik)
Samhita Devanagari Accented
त्वं ह॒ नु त्यद॑दमायो॒ दस्यूँ॒रेकः॑ कृ॒ष्टीर॑वनो॒रार्या॑य ।
अस्ति॑ स्वि॒न्नु वी॒र्यं१॒॑ तत्त॑ इंद्र॒ न स्वि॑दस्ति॒ तदृ॑तु॒था वि वो॑चः ॥
Samhita Devanagari Nonaccented
त्वं ह नु त्यददमायो दस्यूँरेकः कृष्टीरवनोरार्याय ।
अस्ति स्विन्नु वीर्यं तत्त इंद्र न स्विदस्ति तदृतुथा वि वोचः ॥
Samhita Transcription Accented
tvám ha nú tyádadamāyo dásyūm̐rékaḥ kṛṣṭī́ravanorā́ryāya ǀ
ásti svinnú vīryám tátta indra ná svidasti tádṛtuthā́ ví vocaḥ ǁ
Samhita Transcription Nonaccented
tvam ha nu tyadadamāyo dasyūm̐rekaḥ kṛṣṭīravanorāryāya ǀ
asti svinnu vīryam tatta indra na svidasti tadṛtuthā vi vocaḥ ǁ
Padapatha Devanagari Accented
त्वम् । ह॒ । नु । त्यत् । अ॒द॒म॒यः॒ । दस्यू॑न् । एकः॑ । कृ॒ष्टीः । अ॒व॒नोः॒ । आर्या॑य ।
अस्ति॑ । स्वि॒त् । नु । वी॒र्य॑म् । तत् । ते॒ । इ॒न्द्र॒ । न । स्वि॒त् । अ॒स्ति॒ । तत् । ऋ॒तु॒ऽथा । वि । वो॒चः॒ ॥
Padapatha Devanagari Nonaccented
त्वम् । ह । नु । त्यत् । अदमयः । दस्यून् । एकः । कृष्टीः । अवनोः । आर्याय ।
अस्ति । स्वित् । नु । वीर्यम् । तत् । ते । इन्द्र । न । स्वित् । अस्ति । तत् । ऋतुऽथा । वि । वोचः ॥
Padapatha Transcription Accented
tvám ǀ ha ǀ nú ǀ tyát ǀ adamayaḥ ǀ dásyūn ǀ ékaḥ ǀ kṛṣṭī́ḥ ǀ avanoḥ ǀ ā́ryāya ǀ
ásti ǀ svit ǀ nú ǀ vīryám ǀ tát ǀ te ǀ indra ǀ ná ǀ svit ǀ asti ǀ tát ǀ ṛtu-thā́ ǀ ví ǀ vocaḥ ǁ
Padapatha Transcription Nonaccented
tvam ǀ ha ǀ nu ǀ tyat ǀ adamayaḥ ǀ dasyūn ǀ ekaḥ ǀ kṛṣṭīḥ ǀ avanoḥ ǀ āryāya ǀ
asti ǀ svit ǀ nu ǀ vīryam ǀ tat ǀ te ǀ indra ǀ na ǀ svit ǀ asti ǀ tat ǀ ṛtu-thā ǀ vi ǀ vocaḥ ǁ
06.018.04 (Mandala. Sukta. Rik)
4.6.04.04 (Ashtaka. Adhyaya. Varga. Rik)
06.02.067 (Mandala. Anuvāka. Rik)
Samhita Devanagari Accented
सदिद्धि ते॑ तुविजा॒तस्य॒ मन्ये॒ सहः॑ सहिष्ठ तुर॒तस्तु॒रस्य॑ ।
उ॒ग्रमु॒ग्रस्य॑ त॒वस॒स्तवी॒योऽर॑ध्रस्य रध्र॒तुरो॑ बभूव ॥
Samhita Devanagari Nonaccented
सदिद्धि ते तुविजातस्य मन्ये सहः सहिष्ठ तुरतस्तुरस्य ।
उग्रमुग्रस्य तवसस्तवीयोऽरध्रस्य रध्रतुरो बभूव ॥
Samhita Transcription Accented
sádíddhí te tuvijātásya mánye sáhaḥ sahiṣṭha turatásturásya ǀ
ugrámugrásya tavásastávīyó’radhrasya radhratúro babhūva ǁ
Samhita Transcription Nonaccented
sadiddhi te tuvijātasya manye sahaḥ sahiṣṭha turatasturasya ǀ
ugramugrasya tavasastavīyo’radhrasya radhraturo babhūva ǁ
Padapatha Devanagari Accented
सत् । इत् । हि । ते॒ । तु॒वि॒ऽजा॒तस्य॑ । मन्ये॑ । सहः॑ । स॒हि॒ष्ठ॒ । तु॒र॒तः । तु॒रस्य॑ ।
उ॒ग्रम् । उ॒ग्रस्य॑ । त॒वसः॑ । तवी॑यः । अर॑ध्रस्य । र॒ध्र॒ऽतुरः॑ । ब॒भू॒व॒ ॥
Padapatha Devanagari Nonaccented
सत् । इत् । हि । ते । तुविऽजातस्य । मन्ये । सहः । सहिष्ठ । तुरतः । तुरस्य ।
उग्रम् । उग्रस्य । तवसः । तवीयः । अरध्रस्य । रध्रऽतुरः । बभूव ॥
Padapatha Transcription Accented
sát ǀ ít ǀ hí ǀ te ǀ tuvi-jātásya ǀ mánye ǀ sáhaḥ ǀ sahiṣṭha ǀ turatáḥ ǀ turásya ǀ
ugrám ǀ ugrásya ǀ tavásaḥ ǀ távīyaḥ ǀ áradhrasya ǀ radhra-túraḥ ǀ babhūva ǁ
Padapatha Transcription Nonaccented
sat ǀ it ǀ hi ǀ te ǀ tuvi-jātasya ǀ manye ǀ sahaḥ ǀ sahiṣṭha ǀ turataḥ ǀ turasya ǀ
ugram ǀ ugrasya ǀ tavasaḥ ǀ tavīyaḥ ǀ aradhrasya ǀ radhra-turaḥ ǀ babhūva ǁ
06.018.05 (Mandala. Sukta. Rik)
4.6.04.05 (Ashtaka. Adhyaya. Varga. Rik)
06.02.068 (Mandala. Anuvāka. Rik)
Samhita Devanagari Accented
तन्नः॑ प्र॒त्नं स॒ख्यम॑स्तु यु॒ष्मे इ॒त्था वद॑द्भिर्व॒लमंगि॑रोभिः ।
हन्न॑च्युतच्युद्दस्मे॒षयं॑तमृ॒णोः पुरो॒ वि दुरो॑ अस्य॒ विश्वाः॑ ॥
Samhita Devanagari Nonaccented
तन्नः प्रत्नं सख्यमस्तु युष्मे इत्था वदद्भिर्वलमंगिरोभिः ।
हन्नच्युतच्युद्दस्मेषयंतमृणोः पुरो वि दुरो अस्य विश्वाः ॥
Samhita Transcription Accented
tánnaḥ pratnám sakhyámastu yuṣmé itthā́ vádadbhirvalámáṅgirobhiḥ ǀ
hánnacyutacyuddasmeṣáyantamṛṇóḥ púro ví dúro asya víśvāḥ ǁ
Samhita Transcription Nonaccented
tannaḥ pratnam sakhyamastu yuṣme itthā vadadbhirvalamaṅgirobhiḥ ǀ
hannacyutacyuddasmeṣayantamṛṇoḥ puro vi duro asya viśvāḥ ǁ
Padapatha Devanagari Accented
तत् । नः॒ । प्र॒त्नम् । स॒ख्यम् । अ॒स्तु॒ । यु॒ष्मे इति॑ । इ॒त्था । वद॑त्ऽभिः । व॒लम् । अङ्गि॑रःऽभिः ।
हन् । अ॒च्यु॒त॒ऽच्यु॒त् । द॒स्म॒ । इ॒षय॑न्तम् । ऋ॒णोः । पुरः॑ । वि । दुरः॑ । अ॒स्य॒ । विश्वाः॑ ॥
Padapatha Devanagari Nonaccented
तत् । नः । प्रत्नम् । सख्यम् । अस्तु । युष्मे इति । इत्था । वदत्ऽभिः । वलम् । अङ्गिरःऽभिः ।
हन् । अच्युतऽच्युत् । दस्म । इषयन्तम् । ऋणोः । पुरः । वि । दुरः । अस्य । विश्वाः ॥
Padapatha Transcription Accented
tát ǀ naḥ ǀ pratnám ǀ sakhyám ǀ astu ǀ yuṣmé íti ǀ itthā́ ǀ vádat-bhiḥ ǀ valám ǀ áṅgiraḥ-bhiḥ ǀ
hán ǀ acyuta-cyut ǀ dasma ǀ iṣáyantam ǀ ṛṇóḥ ǀ púraḥ ǀ ví ǀ dúraḥ ǀ asya ǀ víśvāḥ ǁ
Padapatha Transcription Nonaccented
tat ǀ naḥ ǀ pratnam ǀ sakhyam ǀ astu ǀ yuṣme iti ǀ itthā ǀ vadat-bhiḥ ǀ valam ǀ aṅgiraḥ-bhiḥ ǀ
han ǀ acyuta-cyut ǀ dasma ǀ iṣayantam ǀ ṛṇoḥ ǀ puraḥ ǀ vi ǀ duraḥ ǀ asya ǀ viśvāḥ ǁ
06.018.06 (Mandala. Sukta. Rik)
4.6.05.01 (Ashtaka. Adhyaya. Varga. Rik)
06.02.069 (Mandala. Anuvāka. Rik)
Samhita Devanagari Accented
स हि धी॒भिर्हव्यो॒ अस्त्यु॒ग्र ई॑शान॒कृन्म॑ह॒ति वृ॑त्र॒तूर्ये॑ ।
स तो॒कसा॑ता॒ तन॑ये॒ स व॒ज्री वि॑तंत॒साय्यो॑ अभवत्स॒मत्सु॑ ॥
Samhita Devanagari Nonaccented
स हि धीभिर्हव्यो अस्त्युग्र ईशानकृन्महति वृत्रतूर्ये ।
स तोकसाता तनये स वज्री वितंतसाय्यो अभवत्समत्सु ॥
Samhita Transcription Accented
sá hí dhībhírhávyo ástyugrá īśānakṛ́nmahatí vṛtratū́rye ǀ
sá tokásātā tánaye sá vajrī́ vitantasā́yyo abhavatsamátsu ǁ
Samhita Transcription Nonaccented
sa hi dhībhirhavyo astyugra īśānakṛnmahati vṛtratūrye ǀ
sa tokasātā tanaye sa vajrī vitantasāyyo abhavatsamatsu ǁ
Padapatha Devanagari Accented
सः । हि । धी॒भिः । हव्यः॑ । अस्ति॑ । उ॒ग्रः । ई॒शा॒न॒ऽकृत् । म॒ह॒ति । वृ॒त्र॒ऽतूर्ये॑ ।
सः । तो॒कऽसा॑ता । तन॑ये । सः । व॒ज्री । वि॒त॒न्त॒साय्यः॑ । अ॒भ॒व॒त् । स॒मत्ऽसु॑ ॥
Padapatha Devanagari Nonaccented
सः । हि । धीभिः । हव्यः । अस्ति । उग्रः । ईशानऽकृत् । महति । वृत्रऽतूर्ये ।
सः । तोकऽसाता । तनये । सः । वज्री । वितन्तसाय्यः । अभवत् । समत्ऽसु ॥
Padapatha Transcription Accented
sáḥ ǀ hí ǀ dhībhíḥ ǀ hávyaḥ ǀ ásti ǀ ugráḥ ǀ īśāna-kṛ́t ǀ mahatí ǀ vṛtra-tū́rye ǀ
sáḥ ǀ toká-sātā ǀ tánaye ǀ sáḥ ǀ vajrī́ ǀ vitantasā́yyaḥ ǀ abhavat ǀ samát-su ǁ
Padapatha Transcription Nonaccented
saḥ ǀ hi ǀ dhībhiḥ ǀ havyaḥ ǀ asti ǀ ugraḥ ǀ īśāna-kṛt ǀ mahati ǀ vṛtra-tūrye ǀ
saḥ ǀ toka-sātā ǀ tanaye ǀ saḥ ǀ vajrī ǀ vitantasāyyaḥ ǀ abhavat ǀ samat-su ǁ
06.018.07 (Mandala. Sukta. Rik)
4.6.05.02 (Ashtaka. Adhyaya. Varga. Rik)
06.02.070 (Mandala. Anuvāka. Rik)
Samhita Devanagari Accented
स म॒ज्मना॒ जनि॑म॒ मानु॑षाणा॒मम॑र्त्येन॒ नाम्नाति॒ प्र स॑र्स्रे ।
स द्यु॒म्नेन॒ स शव॑सो॒त रा॒या स वी॒र्ये॑ण॒ नृत॑मः॒ समो॑काः ॥
Samhita Devanagari Nonaccented
स मज्मना जनिम मानुषाणाममर्त्येन नाम्नाति प्र सर्स्रे ।
स द्युम्नेन स शवसोत राया स वीर्येण नृतमः समोकाः ॥
Samhita Transcription Accented
sá majmánā jánima mā́nuṣāṇāmámartyena nā́mnā́ti prá sarsre ǀ
sá dyumnéna sá śávasotá rāyā́ sá vīryéṇa nṛ́tamaḥ sámokāḥ ǁ
Samhita Transcription Nonaccented
sa majmanā janima mānuṣāṇāmamartyena nāmnāti pra sarsre ǀ
sa dyumnena sa śavasota rāyā sa vīryeṇa nṛtamaḥ samokāḥ ǁ
Padapatha Devanagari Accented
सः । म॒ज्मना॑ । जनि॑म । मानु॑षाणाम् । अम॑र्त्येन । नाम्ना॑ । अति॑ । प्र । स॒र्स्रे॒ ।
सः । द्यु॒म्नेन॑ । सः । शव॑सा । उ॒त । रा॒या । सः । वी॒र्ये॑ण । नृऽत॑मः । सम्ऽओ॑काः ॥
Padapatha Devanagari Nonaccented
सः । मज्मना । जनिम । मानुषाणाम् । अमर्त्येन । नाम्ना । अति । प्र । सर्स्रे ।
सः । द्युम्नेन । सः । शवसा । उत । राया । सः । वीर्येण । नृऽतमः । सम्ऽओकाः ॥
Padapatha Transcription Accented
sáḥ ǀ majmánā ǀ jánima ǀ mā́nuṣāṇām ǀ ámartyena ǀ nā́mnā ǀ áti ǀ prá ǀ sarsre ǀ
sáḥ ǀ dyumnéna ǀ sáḥ ǀ śávasā ǀ utá ǀ rāyā́ ǀ sáḥ ǀ vīryéṇa ǀ nṛ́-tamaḥ ǀ sám-okāḥ ǁ
Padapatha Transcription Nonaccented
saḥ ǀ majmanā ǀ janima ǀ mānuṣāṇām ǀ amartyena ǀ nāmnā ǀ ati ǀ pra ǀ sarsre ǀ
saḥ ǀ dyumnena ǀ saḥ ǀ śavasā ǀ uta ǀ rāyā ǀ saḥ ǀ vīryeṇa ǀ nṛ-tamaḥ ǀ sam-okāḥ ǁ
06.018.08 (Mandala. Sukta. Rik)
4.6.05.03 (Ashtaka. Adhyaya. Varga. Rik)
06.02.071 (Mandala. Anuvāka. Rik)
Samhita Devanagari Accented
स यो न मु॒हे न मिथू॒ जनो॒ भूत्सु॒मंतु॑नामा॒ चुमु॑रिं॒ धुनिं॑ च ।
वृ॒णक्पिप्रुं॒ शंब॑रं॒ शुष्ण॒मिंद्रः॑ पु॒रां च्यौ॒त्नाय॑ श॒यथा॑य॒ नू चि॑त् ॥
Samhita Devanagari Nonaccented
स यो न मुहे न मिथू जनो भूत्सुमंतुनामा चुमुरिं धुनिं च ।
वृणक्पिप्रुं शंबरं शुष्णमिंद्रः पुरां च्यौत्नाय शयथाय नू चित् ॥
Samhita Transcription Accented
sá yó ná muhé ná míthū jáno bhū́tsumántunāmā cúmurim dhúnim ca ǀ
vṛṇákpíprum śámbaram śúṣṇamíndraḥ purā́m cyautnā́ya śayáthāya nū́ cit ǁ
Samhita Transcription Nonaccented
sa yo na muhe na mithū jano bhūtsumantunāmā cumurim dhunim ca ǀ
vṛṇakpiprum śambaram śuṣṇamindraḥ purām cyautnāya śayathāya nū cit ǁ
Padapatha Devanagari Accented
सः । यः । न । मु॒हे । न । मिथु॑ । जनः॑ । भूत् । सु॒मन्तु॑ऽनामा । चुमु॑रिम् । धुनि॑म् । च॒ ।
वृ॒णक् । पिप्रु॑म् । शम्ब॑रम् । शुष्ण॑म् । इन्द्रः॑ । पु॒राम् । च्यौ॒त्नाय॑ । श॒यथा॑य । नु । चि॒त् ॥
Padapatha Devanagari Nonaccented
सः । यः । न । मुहे । न । मिथु । जनः । भूत् । सुमन्तुऽनामा । चुमुरिम् । धुनिम् । च ।
वृणक् । पिप्रुम् । शम्बरम् । शुष्णम् । इन्द्रः । पुराम् । च्यौत्नाय । शयथाय । नु । चित् ॥
Padapatha Transcription Accented
sáḥ ǀ yáḥ ǀ ná ǀ muhé ǀ ná ǀ míthu ǀ jánaḥ ǀ bhū́t ǀ sumántu-nāmā ǀ cúmurim ǀ dhúnim ǀ ca ǀ
vṛṇák ǀ píprum ǀ śámbaram ǀ śúṣṇam ǀ índraḥ ǀ purā́m ǀ cyautnā́ya ǀ śayáthāya ǀ nú ǀ cit ǁ
Padapatha Transcription Nonaccented
saḥ ǀ yaḥ ǀ na ǀ muhe ǀ na ǀ mithu ǀ janaḥ ǀ bhūt ǀ sumantu-nāmā ǀ cumurim ǀ dhunim ǀ ca ǀ
vṛṇak ǀ piprum ǀ śambaram ǀ śuṣṇam ǀ indraḥ ǀ purām ǀ cyautnāya ǀ śayathāya ǀ nu ǀ cit ǁ
06.018.09 (Mandala. Sukta. Rik)
4.6.05.04 (Ashtaka. Adhyaya. Varga. Rik)
06.02.072 (Mandala. Anuvāka. Rik)
Samhita Devanagari Accented
उ॒दाव॑ता॒ त्वक्ष॑सा॒ पन्य॑सा च वृत्र॒हत्या॑य॒ रथ॑मिंद्र तिष्ठ ।
धि॒ष्व वज्रं॒ हस्त॒ आ द॑क्षिण॒त्राभि प्र मं॑द पुरुदत्र मा॒याः ॥
Samhita Devanagari Nonaccented
उदावता त्वक्षसा पन्यसा च वृत्रहत्याय रथमिंद्र तिष्ठ ।
धिष्व वज्रं हस्त आ दक्षिणत्राभि प्र मंद पुरुदत्र मायाः ॥
Samhita Transcription Accented
udā́vatā tvákṣasā pányasā ca vṛtrahátyāya ráthamindra tiṣṭha ǀ
dhiṣvá vájram hásta ā́ dakṣiṇatrā́bhí prá manda purudatra māyā́ḥ ǁ
Samhita Transcription Nonaccented
udāvatā tvakṣasā panyasā ca vṛtrahatyāya rathamindra tiṣṭha ǀ
dhiṣva vajram hasta ā dakṣiṇatrābhi pra manda purudatra māyāḥ ǁ
Padapatha Devanagari Accented
उ॒त्ऽअव॑ता । त्वक्ष॑सा । पन्य॑सा । च॒ । वृ॒त्र॒ऽहत्या॑य । रथ॑म् । इ॒न्द्र॒ । ति॒ष्ठ॒ ।
धि॒ष्व । वज्र॑म् । हस्ते॑ । आ । द॒क्षि॒ण॒ऽत्रा । अ॒भि । प्र । म॒न्द॒ । पु॒रु॒ऽद॒त्र॒ । मा॒याः ॥
Padapatha Devanagari Nonaccented
उत्ऽअवता । त्वक्षसा । पन्यसा । च । वृत्रऽहत्याय । रथम् । इन्द्र । तिष्ठ ।
धिष्व । वज्रम् । हस्ते । आ । दक्षिणऽत्रा । अभि । प्र । मन्द । पुरुऽदत्र । मायाः ॥
Padapatha Transcription Accented
ut-ávatā ǀ tvákṣasā ǀ pányasā ǀ ca ǀ vṛtra-hátyāya ǀ rátham ǀ indra ǀ tiṣṭha ǀ
dhiṣvá ǀ vájram ǀ háste ǀ ā́ ǀ dakṣiṇa-trā́ ǀ abhí ǀ prá ǀ manda ǀ puru-datra ǀ māyā́ḥ ǁ
Padapatha Transcription Nonaccented
ut-avatā ǀ tvakṣasā ǀ panyasā ǀ ca ǀ vṛtra-hatyāya ǀ ratham ǀ indra ǀ tiṣṭha ǀ
dhiṣva ǀ vajram ǀ haste ǀ ā ǀ dakṣiṇa-trā ǀ abhi ǀ pra ǀ manda ǀ puru-datra ǀ māyāḥ ǁ
06.018.10 (Mandala. Sukta. Rik)
4.6.05.05 (Ashtaka. Adhyaya. Varga. Rik)
06.02.073 (Mandala. Anuvāka. Rik)
Samhita Devanagari Accented
अ॒ग्निर्न शुष्कं॒ वन॑मिंद्र हे॒ती रक्षो॒ नि ध॑क्ष्य॒शनि॒र्न भी॒मा ।
गं॒भी॒रय॑ ऋ॒ष्वया॒ यो रु॒रोजाध्वा॑नयद्दुरि॒ता दं॒भय॑च्च ॥
Samhita Devanagari Nonaccented
अग्निर्न शुष्कं वनमिंद्र हेती रक्षो नि धक्ष्यशनिर्न भीमा ।
गंभीरय ऋष्वया यो रुरोजाध्वानयद्दुरिता दंभयच्च ॥
Samhita Transcription Accented
agnírná śúṣkam vánamindra hetī́ rákṣo ní dhakṣyaśánirná bhīmā́ ǀ
gambhīráya ṛṣváyā yó rurójā́dhvānayadduritā́ dambháyacca ǁ
Samhita Transcription Nonaccented
agnirna śuṣkam vanamindra hetī rakṣo ni dhakṣyaśanirna bhīmā ǀ
gambhīraya ṛṣvayā yo rurojādhvānayadduritā dambhayacca ǁ
Padapatha Devanagari Accented
अ॒ग्निः । न । शुष्क॑म् । वन॑म् । इ॒न्द्र॒ । हे॒तीः । रक्षः॑ । नि । ध॒क्षि॒ । अ॒शनिः॑ । न । भी॒मा ।
ग॒म्भी॒रया॑ । ऋ॒ष्वया॑ । यः । रु॒रोज॑ । अध्व॑नयत् । दुः॒ऽइ॒ता । द॒म्भय॑त् । च॒ ॥
Padapatha Devanagari Nonaccented
अग्निः । न । शुष्कम् । वनम् । इन्द्र । हेतीः । रक्षः । नि । धक्षि । अशनिः । न । भीमा ।
गम्भीरया । ऋष्वया । यः । रुरोज । अध्वनयत् । दुःऽइता । दम्भयत् । च ॥
Padapatha Transcription Accented
agníḥ ǀ ná ǀ śúṣkam ǀ vánam ǀ indra ǀ hetī́ḥ ǀ rákṣaḥ ǀ ní ǀ dhakṣi ǀ aśániḥ ǀ ná ǀ bhīmā́ ǀ
gambhīráyā ǀ ṛṣváyā ǀ yáḥ ǀ rurója ǀ ádhvanayat ǀ duḥ-itā́ ǀ dambháyat ǀ ca ǁ
Padapatha Transcription Nonaccented
agniḥ ǀ na ǀ śuṣkam ǀ vanam ǀ indra ǀ hetīḥ ǀ rakṣaḥ ǀ ni ǀ dhakṣi ǀ aśaniḥ ǀ na ǀ bhīmā ǀ
gambhīrayā ǀ ṛṣvayā ǀ yaḥ ǀ ruroja ǀ adhvanayat ǀ duḥ-itā ǀ dambhayat ǀ ca ǁ
06.018.11 (Mandala. Sukta. Rik)
4.6.06.01 (Ashtaka. Adhyaya. Varga. Rik)
06.02.074 (Mandala. Anuvāka. Rik)
Samhita Devanagari Accented
आ स॒हस्रं॑ प॒थिभि॑रिंद्र रा॒या तुवि॑द्युम्न तुवि॒वाजे॑भिर॒र्वाक् ।
या॒हि सू॑नो सहसो॒ यस्य॒ नू चि॒ददे॑व॒ ईशे॑ पुरुहूत॒ योतोः॑ ॥
Samhita Devanagari Nonaccented
आ सहस्रं पथिभिरिंद्र राया तुविद्युम्न तुविवाजेभिरर्वाक् ।
याहि सूनो सहसो यस्य नू चिददेव ईशे पुरुहूत योतोः ॥
Samhita Transcription Accented
ā́ sahásram pathíbhirindra rāyā́ túvidyumna tuvivā́jebhirarvā́k ǀ
yāhí sūno sahaso yásya nū́ cidádeva ī́śe puruhūta yótoḥ ǁ
Samhita Transcription Nonaccented
ā sahasram pathibhirindra rāyā tuvidyumna tuvivājebhirarvāk ǀ
yāhi sūno sahaso yasya nū cidadeva īśe puruhūta yotoḥ ǁ
Padapatha Devanagari Accented
आ । स॒हस्र॑म् । प॒थिऽभिः॑ । इ॒न्द्र॒ । रा॒या । तुवि॑ऽद्युम्न । तु॒वि॒ऽवाजे॑भिः । अ॒र्वाक् ।
या॒हि । सू॒नो॒ इति॑ । स॒ह॒सः॒ । यस्य॑ । नु । चि॒त् । अदे॑वः । ईशे॑ । पु॒रु॒ऽहू॒त॒ । योतोः॑ ॥
Padapatha Devanagari Nonaccented
आ । सहस्रम् । पथिऽभिः । इन्द्र । राया । तुविऽद्युम्न । तुविऽवाजेभिः । अर्वाक् ।
याहि । सूनो इति । सहसः । यस्य । नु । चित् । अदेवः । ईशे । पुरुऽहूत । योतोः ॥
Padapatha Transcription Accented
ā́ ǀ sahásram ǀ pathí-bhiḥ ǀ indra ǀ rāyā́ ǀ túvi-dyumna ǀ tuvi-vā́jebhiḥ ǀ arvā́k ǀ
yāhí ǀ sūno íti ǀ sahasaḥ ǀ yásya ǀ nú ǀ cit ǀ ádevaḥ ǀ ī́śe ǀ puru-hūta ǀ yótoḥ ǁ
Padapatha Transcription Nonaccented
ā ǀ sahasram ǀ pathi-bhiḥ ǀ indra ǀ rāyā ǀ tuvi-dyumna ǀ tuvi-vājebhiḥ ǀ arvāk ǀ
yāhi ǀ sūno iti ǀ sahasaḥ ǀ yasya ǀ nu ǀ cit ǀ adevaḥ ǀ īśe ǀ puru-hūta ǀ yotoḥ ǁ
06.018.12 (Mandala. Sukta. Rik)
4.6.06.02 (Ashtaka. Adhyaya. Varga. Rik)
06.02.075 (Mandala. Anuvāka. Rik)
Samhita Devanagari Accented
प्र तु॑विद्यु॒म्नस्य॒ स्थवि॑रस्य॒ घृष्वे॑र्दि॒वो र॑रप्शे महि॒मा पृ॑थि॒व्याः ।
नास्य॒ शत्रु॒र्न प्र॑ति॒मान॑मस्ति॒ न प्र॑ति॒ष्ठिः पु॑रुमा॒यस्य॒ सह्योः॑ ॥
Samhita Devanagari Nonaccented
प्र तुविद्युम्नस्य स्थविरस्य घृष्वेर्दिवो ररप्शे महिमा पृथिव्याः ।
नास्य शत्रुर्न प्रतिमानमस्ति न प्रतिष्ठिः पुरुमायस्य सह्योः ॥
Samhita Transcription Accented
prá tuvidyumnásya sthávirasya ghṛ́ṣverdivó rarapśe mahimā́ pṛthivyā́ḥ ǀ
nā́sya śátrurná pratimā́namasti ná pratiṣṭhíḥ purumāyásya sáhyoḥ ǁ
Samhita Transcription Nonaccented
pra tuvidyumnasya sthavirasya ghṛṣverdivo rarapśe mahimā pṛthivyāḥ ǀ
nāsya śatrurna pratimānamasti na pratiṣṭhiḥ purumāyasya sahyoḥ ǁ
Padapatha Devanagari Accented
प्र । तु॒वि॒ऽद्यु॒म्नस्य॑ । स्थवि॑रस्य । घृष्वेः॑ । दि॒वः । र॒र॒प्शे॒ । म॒हि॒मा । पृ॒थि॒व्याः ।
न । अ॒स्य॒ । शत्रुः॑ । न । प्र॒ति॒ऽमान॑म् । अ॒स्ति॒ । न । प्र॒ति॒ऽस्थिः । पु॒रु॒ऽमा॒यस्य॑ । सह्योः॑ ॥
Padapatha Devanagari Nonaccented
प्र । तुविऽद्युम्नस्य । स्थविरस्य । घृष्वेः । दिवः । ररप्शे । महिमा । पृथिव्याः ।
न । अस्य । शत्रुः । न । प्रतिऽमानम् । अस्ति । न । प्रतिऽस्थिः । पुरुऽमायस्य । सह्योः ॥
Padapatha Transcription Accented
prá ǀ tuvi-dyumnásya ǀ sthávirasya ǀ ghṛ́ṣveḥ ǀ diváḥ ǀ rarapśe ǀ mahimā́ ǀ pṛthivyā́ḥ ǀ
ná ǀ asya ǀ śátruḥ ǀ ná ǀ prati-mā́nam ǀ asti ǀ ná ǀ prati-sthíḥ ǀ puru-māyásya ǀ sáhyoḥ ǁ
Padapatha Transcription Nonaccented
pra ǀ tuvi-dyumnasya ǀ sthavirasya ǀ ghṛṣveḥ ǀ divaḥ ǀ rarapśe ǀ mahimā ǀ pṛthivyāḥ ǀ
na ǀ asya ǀ śatruḥ ǀ na ǀ prati-mānam ǀ asti ǀ na ǀ prati-sthiḥ ǀ puru-māyasya ǀ sahyoḥ ǁ
06.018.13 (Mandala. Sukta. Rik)
4.6.06.03 (Ashtaka. Adhyaya. Varga. Rik)
06.02.076 (Mandala. Anuvāka. Rik)
Samhita Devanagari Accented
प्र तत्ते॑ अ॒द्या कर॑णं कृ॒तं भू॒त्कुत्सं॒ यदा॒युम॑तिथि॒ग्वम॑स्मै ।
पु॒रू स॒हस्रा॒ नि शि॑शा अ॒भि क्षामुत्तूर्व॑याणं धृष॒ता नि॑नेथ ॥
Samhita Devanagari Nonaccented
प्र तत्ते अद्या करणं कृतं भूत्कुत्सं यदायुमतिथिग्वमस्मै ।
पुरू सहस्रा नि शिशा अभि क्षामुत्तूर्वयाणं धृषता निनेथ ॥
Samhita Transcription Accented
prá tátte adyā́ káraṇam kṛtám bhūtkútsam yádāyúmatithigvámasmai ǀ
purū́ sahásrā ní śiśā abhí kṣā́múttū́rvayāṇam dhṛṣatā́ ninetha ǁ
Samhita Transcription Nonaccented
pra tatte adyā karaṇam kṛtam bhūtkutsam yadāyumatithigvamasmai ǀ
purū sahasrā ni śiśā abhi kṣāmuttūrvayāṇam dhṛṣatā ninetha ǁ
Padapatha Devanagari Accented
प्र । तत् । ते॒ । अ॒द्य । कर॑णम् । कृ॒तम् । भू॒त् । कुत्स॑म् । यत् । आ॒युम् । अ॒ति॒थि॒ऽग्वम् । अ॒स्मै॒ ।
पु॒रु । स॒हस्रा॑ । नि । शि॒शाः॒ । अ॒भि । क्षाम् । उत् । तूर्व॑याणम् । धृ॒ष॒ता । नि॒ने॒थ॒ ॥
Padapatha Devanagari Nonaccented
प्र । तत् । ते । अद्य । करणम् । कृतम् । भूत् । कुत्सम् । यत् । आयुम् । अतिथिऽग्वम् । अस्मै ।
पुरु । सहस्रा । नि । शिशाः । अभि । क्षाम् । उत् । तूर्वयाणम् । धृषता । निनेथ ॥
Padapatha Transcription Accented
prá ǀ tát ǀ te ǀ adyá ǀ káraṇam ǀ kṛtám ǀ bhūt ǀ kútsam ǀ yát ǀ āyúm ǀ atithi-gvám ǀ asmai ǀ
purú ǀ sahásrā ǀ ní ǀ śiśāḥ ǀ abhí ǀ kṣā́m ǀ út ǀ tū́rvayāṇam ǀ dhṛṣatā́ ǀ ninetha ǁ
Padapatha Transcription Nonaccented
pra ǀ tat ǀ te ǀ adya ǀ karaṇam ǀ kṛtam ǀ bhūt ǀ kutsam ǀ yat ǀ āyum ǀ atithi-gvam ǀ asmai ǀ
puru ǀ sahasrā ǀ ni ǀ śiśāḥ ǀ abhi ǀ kṣām ǀ ut ǀ tūrvayāṇam ǀ dhṛṣatā ǀ ninetha ǁ
06.018.14 (Mandala. Sukta. Rik)
4.6.06.04 (Ashtaka. Adhyaya. Varga. Rik)
06.02.077 (Mandala. Anuvāka. Rik)
Samhita Devanagari Accented
अनु॒ त्वाहि॑घ्ने॒ अध॑ देव दे॒वा मद॒न्विश्वे॑ क॒वित॑मं कवी॒नां ।
करो॒ यत्र॒ वरि॑वो बाधि॒ताय॑ दि॒वे जना॑य त॒न्वे॑ गृणा॒नः ॥
Samhita Devanagari Nonaccented
अनु त्वाहिघ्ने अध देव देवा मदन्विश्वे कवितमं कवीनां ।
करो यत्र वरिवो बाधिताय दिवे जनाय तन्वे गृणानः ॥
Samhita Transcription Accented
ánu tvā́highne ádha deva devā́ mádanvíśve kavítamam kavīnā́m ǀ
káro yátra várivo bādhitā́ya divé jánāya tanvé gṛṇānáḥ ǁ
Samhita Transcription Nonaccented
anu tvāhighne adha deva devā madanviśve kavitamam kavīnām ǀ
karo yatra varivo bādhitāya dive janāya tanve gṛṇānaḥ ǁ
Padapatha Devanagari Accented
अनु॑ । त्वा॒ । अहि॑ऽघ्ने । अध॑ । दे॒व॒ । दे॒वाः । मद॑न् । विश्वे॑ । क॒विऽत॑मम् । क॒वी॒नाम् ।
करः॑ । यत्र॑ । वरि॑वः । बा॒धि॒ताय॑ । दि॒वे । जना॑य । त॒न्वे॑ । गृ॒णा॒नः ॥
Padapatha Devanagari Nonaccented
अनु । त्वा । अहिऽघ्ने । अध । देव । देवाः । मदन् । विश्वे । कविऽतमम् । कवीनाम् ।
करः । यत्र । वरिवः । बाधिताय । दिवे । जनाय । तन्वे । गृणानः ॥
Padapatha Transcription Accented
ánu ǀ tvā ǀ áhi-ghne ǀ ádha ǀ deva ǀ devā́ḥ ǀ mádan ǀ víśve ǀ kaví-tamam ǀ kavīnā́m ǀ
káraḥ ǀ yátra ǀ várivaḥ ǀ bādhitā́ya ǀ divé ǀ jánāya ǀ tanvé ǀ gṛṇānáḥ ǁ
Padapatha Transcription Nonaccented
anu ǀ tvā ǀ ahi-ghne ǀ adha ǀ deva ǀ devāḥ ǀ madan ǀ viśve ǀ kavi-tamam ǀ kavīnām ǀ
karaḥ ǀ yatra ǀ varivaḥ ǀ bādhitāya ǀ dive ǀ janāya ǀ tanve ǀ gṛṇānaḥ ǁ
06.018.15 (Mandala. Sukta. Rik)
4.6.06.05 (Ashtaka. Adhyaya. Varga. Rik)
06.02.078 (Mandala. Anuvāka. Rik)
Samhita Devanagari Accented
अनु॒ द्यावा॑पृथि॒वी तत्त॒ ओजोऽम॑र्त्या जिहत इंद्र दे॒वाः ।
कृ॒ष्वा कृ॑त्नो॒ अकृ॑तं॒ यत्ते॒ अस्त्यु॒क्थं नवी॑यो जनयस्व य॒ज्ञैः ॥
Samhita Devanagari Nonaccented
अनु द्यावापृथिवी तत्त ओजोऽमर्त्या जिहत इंद्र देवाः ।
कृष्वा कृत्नो अकृतं यत्ते अस्त्युक्थं नवीयो जनयस्व यज्ञैः ॥
Samhita Transcription Accented
ánu dyā́vāpṛthivī́ tátta ójó’martyā jihata indra devā́ḥ ǀ
kṛṣvā́ kṛtno ákṛtam yátte ástyukthám návīyo janayasva yajñáiḥ ǁ
Samhita Transcription Nonaccented
anu dyāvāpṛthivī tatta ojo’martyā jihata indra devāḥ ǀ
kṛṣvā kṛtno akṛtam yatte astyuktham navīyo janayasva yajñaiḥ ǁ
Padapatha Devanagari Accented
अनु॑ । द्यावा॑पृथि॒वी इति॑ । तत् । ते॒ । ओजः॑ । अम॑र्त्याः । जि॒ह॒ते॒ । इ॒न्द्र॒ । दे॒वाः ।
कृ॒ष्व । कृ॒त्नो॒ इति॑ । अकृ॑तम् । यत् । ते॒ । अस्ति॑ । उ॒क्थम् । नवी॑यः । ज॒न॒य॒स्व॒ । य॒ज्ञैः ॥
Padapatha Devanagari Nonaccented
अनु । द्यावापृथिवी इति । तत् । ते । ओजः । अमर्त्याः । जिहते । इन्द्र । देवाः ।
कृष्व । कृत्नो इति । अकृतम् । यत् । ते । अस्ति । उक्थम् । नवीयः । जनयस्व । यज्ञैः ॥
Padapatha Transcription Accented
ánu ǀ dyā́vāpṛthivī́ íti ǀ tát ǀ te ǀ ójaḥ ǀ ámartyāḥ ǀ jihate ǀ indra ǀ devā́ḥ ǀ
kṛṣvá ǀ kṛtno íti ǀ ákṛtam ǀ yát ǀ te ǀ ásti ǀ ukthám ǀ návīyaḥ ǀ janayasva ǀ yajñáiḥ ǁ
Padapatha Transcription Nonaccented
anu ǀ dyāvāpṛthivī iti ǀ tat ǀ te ǀ ojaḥ ǀ amartyāḥ ǀ jihate ǀ indra ǀ devāḥ ǀ
kṛṣva ǀ kṛtno iti ǀ akṛtam ǀ yat ǀ te ǀ asti ǀ uktham ǀ navīyaḥ ǀ janayasva ǀ yajñaiḥ ǁ