|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 21
|
1. Info |
| To: | indra | |
| From: | bharadvāja bārhaspatya | |
| Metres: | 1st set of styles: virāṭtrisṭup (1, 2, 9, 10, 12); triṣṭup (4-6, 11); nicṛttriṣṭup (3, 7); svarāḍbṛhatī (8) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.021.01 (Mandala. Sukta. Rik)
4.6.11.01 (Ashtaka. Adhyaya. Varga. Rik)
06.02.105 (Mandala. Anuvāka. Rik)
Samhita Devanagari Accented
इ॒मा उ॑ त्वा पुरु॒तम॑स्य का॒रोर्हव्यं॑ वीर॒ हव्या॑ हवंते ।
धियो॑ रथे॒ष्ठाम॒जरं॒ नवी॑यो र॒यिर्विभू॑तिरीयते वच॒स्या ॥
Samhita Devanagari Nonaccented
इमा उ त्वा पुरुतमस्य कारोर्हव्यं वीर हव्या हवंते ।
धियो रथेष्ठामजरं नवीयो रयिर्विभूतिरीयते वचस्या ॥
Samhita Transcription Accented
imā́ u tvā purutámasya kārórhávyam vīra hávyā havante ǀ
dhíyo ratheṣṭhā́majáram návīyo rayírvíbhūtirīyate vacasyā́ ǁ
Samhita Transcription Nonaccented
imā u tvā purutamasya kārorhavyam vīra havyā havante ǀ
dhiyo ratheṣṭhāmajaram navīyo rayirvibhūtirīyate vacasyā ǁ
Padapatha Devanagari Accented
इ॒माः । ऊं॒ इति॑ । त्वा॒ । पु॒रु॒ऽतम॑स्य । का॒रोः । हव्य॑म् । वी॒र॒ । हव्याः॑ । ह॒व॒न्ते॒ ।
धियः॑ । र॒थे॒ऽस्थाम् । अ॒जर॑म् । नवी॑यः । र॒यिः । विऽभू॑तिः । ई॒य॒ते॒ । व॒च॒स्या ॥
Padapatha Devanagari Nonaccented
इमाः । ऊं इति । त्वा । पुरुऽतमस्य । कारोः । हव्यम् । वीर । हव्याः । हवन्ते ।
धियः । रथेऽस्थाम् । अजरम् । नवीयः । रयिः । विऽभूतिः । ईयते । वचस्या ॥
Padapatha Transcription Accented
imā́ḥ ǀ ūṃ íti ǀ tvā ǀ puru-támasya ǀ kāróḥ ǀ hávyam ǀ vīra ǀ hávyāḥ ǀ havante ǀ
dhíyaḥ ǀ rathe-sthā́m ǀ ajáram ǀ návīyaḥ ǀ rayíḥ ǀ ví-bhūtiḥ ǀ īyate ǀ vacasyā́ ǁ
Padapatha Transcription Nonaccented
imāḥ ǀ ūṃ iti ǀ tvā ǀ puru-tamasya ǀ kāroḥ ǀ havyam ǀ vīra ǀ havyāḥ ǀ havante ǀ
dhiyaḥ ǀ rathe-sthām ǀ ajaram ǀ navīyaḥ ǀ rayiḥ ǀ vi-bhūtiḥ ǀ īyate ǀ vacasyā ǁ
06.021.02 (Mandala. Sukta. Rik)
4.6.11.02 (Ashtaka. Adhyaya. Varga. Rik)
06.02.106 (Mandala. Anuvāka. Rik)
Samhita Devanagari Accented
तमु॑ स्तुष॒ इंद्रं॒ यो विदा॑नो॒ गिर्वा॑हसं गी॒र्भिर्य॒ज्ञवृ॑द्धं ।
यस्य॒ दिव॒मति॑ म॒ह्ना पृ॑थि॒व्याः पु॑रुमा॒यस्य॑ रिरि॒चे म॑हि॒त्वं ॥
Samhita Devanagari Nonaccented
तमु स्तुष इंद्रं यो विदानो गिर्वाहसं गीर्भिर्यज्ञवृद्धं ।
यस्य दिवमति मह्ना पृथिव्याः पुरुमायस्य रिरिचे महित्वं ॥
Samhita Transcription Accented
támu stuṣa índram yó vídāno gírvāhasam gīrbhíryajñávṛddham ǀ
yásya dívamáti mahnā́ pṛthivyā́ḥ purumāyásya riricé mahitvám ǁ
Samhita Transcription Nonaccented
tamu stuṣa indram yo vidāno girvāhasam gīrbhiryajñavṛddham ǀ
yasya divamati mahnā pṛthivyāḥ purumāyasya ririce mahitvam ǁ
Padapatha Devanagari Accented
तम् । ऊं॒ इति॑ । स्तु॒षे॒ । इन्द्र॑म् । यः । विदा॑नः । गिर्वा॑हसम् । गीः॒ऽभिः । य॒ज्ञऽवृ॑द्धम् ।
यस्य॑ । दिव॑म् । अति॑ । म॒ह्ना । पृ॒थि॒व्याः । पु॒रु॒ऽमा॒यस्य॑ । रि॒रि॒चे । म॒हि॒ऽत्वम् ॥
Padapatha Devanagari Nonaccented
तम् । ऊं इति । स्तुषे । इन्द्रम् । यः । विदानः । गिर्वाहसम् । गीःऽभिः । यज्ञऽवृद्धम् ।
यस्य । दिवम् । अति । मह्ना । पृथिव्याः । पुरुऽमायस्य । रिरिचे । महिऽत्वम् ॥
Padapatha Transcription Accented
tám ǀ ūṃ íti ǀ stuṣe ǀ índram ǀ yáḥ ǀ vídānaḥ ǀ gírvāhasam ǀ gīḥ-bhíḥ ǀ yajñá-vṛddham ǀ
yásya ǀ dívam ǀ áti ǀ mahnā́ ǀ pṛthivyā́ḥ ǀ puru-māyásya ǀ riricé ǀ mahi-tvám ǁ
Padapatha Transcription Nonaccented
tam ǀ ūṃ iti ǀ stuṣe ǀ indram ǀ yaḥ ǀ vidānaḥ ǀ girvāhasam ǀ gīḥ-bhiḥ ǀ yajña-vṛddham ǀ
yasya ǀ divam ǀ ati ǀ mahnā ǀ pṛthivyāḥ ǀ puru-māyasya ǀ ririce ǀ mahi-tvam ǁ
06.021.03 (Mandala. Sukta. Rik)
4.6.11.03 (Ashtaka. Adhyaya. Varga. Rik)
06.02.107 (Mandala. Anuvāka. Rik)
Samhita Devanagari Accented
स इत्तमो॑ऽवयु॒नं त॑त॒न्वत्सूर्ये॑ण व॒युन॑वच्चकार ।
क॒दा ते॒ मर्ता॑ अ॒मृत॑स्य॒ धामेय॑क्षंतो॒ न मि॑नंति स्वधावः ॥
Samhita Devanagari Nonaccented
स इत्तमोऽवयुनं ततन्वत्सूर्येण वयुनवच्चकार ।
कदा ते मर्ता अमृतस्य धामेयक्षंतो न मिनंति स्वधावः ॥
Samhita Transcription Accented
sá íttámo’vayunám tatanvátsū́ryeṇa vayúnavaccakāra ǀ
kadā́ te mártā amṛ́tasya dhā́méyakṣanto ná minanti svadhāvaḥ ǁ
Samhita Transcription Nonaccented
sa ittamo’vayunam tatanvatsūryeṇa vayunavaccakāra ǀ
kadā te martā amṛtasya dhāmeyakṣanto na minanti svadhāvaḥ ǁ
Padapatha Devanagari Accented
सः । इत् । तमः॑ । अ॒व॒यु॒नम् । त॒त॒न्वत् । सूर्ये॑ण । व॒युन॑ऽवत् । च॒का॒र॒ ।
क॒दा । ते॒ । मर्ताः॑ । अ॒मृत॑स्य । धाम॑ । इय॑क्षन्तः । न । मि॒न॒न्ति॒ । स्व॒धा॒ऽवः॒ ॥
Padapatha Devanagari Nonaccented
सः । इत् । तमः । अवयुनम् । ततन्वत् । सूर्येण । वयुनऽवत् । चकार ।
कदा । ते । मर्ताः । अमृतस्य । धाम । इयक्षन्तः । न । मिनन्ति । स्वधाऽवः ॥
Padapatha Transcription Accented
sáḥ ǀ ít ǀ támaḥ ǀ avayunám ǀ tatanvát ǀ sū́ryeṇa ǀ vayúna-vat ǀ cakāra ǀ
kadā́ ǀ te ǀ mártāḥ ǀ amṛ́tasya ǀ dhā́ma ǀ íyakṣantaḥ ǀ ná ǀ minanti ǀ svadhā-vaḥ ǁ
Padapatha Transcription Nonaccented
saḥ ǀ it ǀ tamaḥ ǀ avayunam ǀ tatanvat ǀ sūryeṇa ǀ vayuna-vat ǀ cakāra ǀ
kadā ǀ te ǀ martāḥ ǀ amṛtasya ǀ dhāma ǀ iyakṣantaḥ ǀ na ǀ minanti ǀ svadhā-vaḥ ǁ
06.021.04 (Mandala. Sukta. Rik)
4.6.11.04 (Ashtaka. Adhyaya. Varga. Rik)
06.02.108 (Mandala. Anuvāka. Rik)
Samhita Devanagari Accented
यस्ता च॒कार॒ स कुह॑ स्वि॒दिंद्रः॒ कमा जनं॑ चरति॒ कासु॑ वि॒क्षु ।
कस्ते॑ य॒ज्ञो मन॑से॒ शं वरा॑य॒ को अ॒र्क इं॑द्र कत॒मः स होता॑ ॥
Samhita Devanagari Nonaccented
यस्ता चकार स कुह स्विदिंद्रः कमा जनं चरति कासु विक्षु ।
कस्ते यज्ञो मनसे शं वराय को अर्क इंद्र कतमः स होता ॥
Samhita Transcription Accented
yástā́ cakā́ra sá kúha svidíndraḥ kámā́ jánam carati kā́su vikṣú ǀ
káste yajñó mánase śám várāya kó arká indra katamáḥ sá hótā ǁ
Samhita Transcription Nonaccented
yastā cakāra sa kuha svidindraḥ kamā janam carati kāsu vikṣu ǀ
kaste yajño manase śam varāya ko arka indra katamaḥ sa hotā ǁ
Padapatha Devanagari Accented
यः । ता । च॒कार॑ । सः । कुह॑ । स्वि॒त् । इन्द्रः॑ । कम् । आ । जन॑म् । च॒र॒ति॒ । कासु॑ । वि॒क्षु ।
कः । ते॒ । य॒ज्ञः । मन॑से । शम् । वरा॑य । कः । अ॒र्कः । इ॒न्द्र॒ । क॒त॒मः । सः । होता॑ ॥
Padapatha Devanagari Nonaccented
यः । ता । चकार । सः । कुह । स्वित् । इन्द्रः । कम् । आ । जनम् । चरति । कासु । विक्षु ।
कः । ते । यज्ञः । मनसे । शम् । वराय । कः । अर्कः । इन्द्र । कतमः । सः । होता ॥
Padapatha Transcription Accented
yáḥ ǀ tā́ ǀ cakā́ra ǀ sáḥ ǀ kúha ǀ svit ǀ índraḥ ǀ kám ǀ ā́ ǀ jánam ǀ carati ǀ kā́su ǀ vikṣú ǀ
káḥ ǀ te ǀ yajñáḥ ǀ mánase ǀ śám ǀ várāya ǀ káḥ ǀ arkáḥ ǀ indra ǀ katamáḥ ǀ sáḥ ǀ hótā ǁ
Padapatha Transcription Nonaccented
yaḥ ǀ tā ǀ cakāra ǀ saḥ ǀ kuha ǀ svit ǀ indraḥ ǀ kam ǀ ā ǀ janam ǀ carati ǀ kāsu ǀ vikṣu ǀ
kaḥ ǀ te ǀ yajñaḥ ǀ manase ǀ śam ǀ varāya ǀ kaḥ ǀ arkaḥ ǀ indra ǀ katamaḥ ǀ saḥ ǀ hotā ǁ
06.021.05 (Mandala. Sukta. Rik)
4.6.11.05 (Ashtaka. Adhyaya. Varga. Rik)
06.02.109 (Mandala. Anuvāka. Rik)
Samhita Devanagari Accented
इ॒दा हि ते॒ वेवि॑षतः पुरा॒जाः प्र॒त्नास॑ आ॒सुः पु॑रुकृ॒त्सखा॑यः ।
ये म॑ध्य॒मास॑ उ॒त नूत॑नास उ॒ताव॒मस्य॑ पुरुहूत बोधि ॥
Samhita Devanagari Nonaccented
इदा हि ते वेविषतः पुराजाः प्रत्नास आसुः पुरुकृत्सखायः ।
ये मध्यमास उत नूतनास उतावमस्य पुरुहूत बोधि ॥
Samhita Transcription Accented
idā́ hí te véviṣataḥ purājā́ḥ pratnā́sa āsúḥ purukṛtsákhāyaḥ ǀ
yé madhyamā́sa utá nū́tanāsa utā́vamásya puruhūta bodhi ǁ
Samhita Transcription Nonaccented
idā hi te veviṣataḥ purājāḥ pratnāsa āsuḥ purukṛtsakhāyaḥ ǀ
ye madhyamāsa uta nūtanāsa utāvamasya puruhūta bodhi ǁ
Padapatha Devanagari Accented
इ॒दा । हि । ते॒ । वेवि॑षतः । पु॒रा॒ऽजाः । प्र॒त्नासः॑ । आ॒सुः । पु॒रु॒ऽकृ॒त् । सखा॑यः ।
ये । म॒ध्य॒मासः॑ । उ॒त । नूत॑नासः । उ॒त । अ॒व॒मस्य॑ । पु॒रु॒ऽहू॒त॒ । बो॒धि॒ ॥
Padapatha Devanagari Nonaccented
इदा । हि । ते । वेविषतः । पुराऽजाः । प्रत्नासः । आसुः । पुरुऽकृत् । सखायः ।
ये । मध्यमासः । उत । नूतनासः । उत । अवमस्य । पुरुऽहूत । बोधि ॥
Padapatha Transcription Accented
idā́ ǀ hí ǀ te ǀ véviṣataḥ ǀ purā-jā́ḥ ǀ pratnā́saḥ ǀ āsúḥ ǀ puru-kṛt ǀ sákhāyaḥ ǀ
yé ǀ madhyamā́saḥ ǀ utá ǀ nū́tanāsaḥ ǀ utá ǀ avamásya ǀ puru-hūta ǀ bodhi ǁ
Padapatha Transcription Nonaccented
idā ǀ hi ǀ te ǀ veviṣataḥ ǀ purā-jāḥ ǀ pratnāsaḥ ǀ āsuḥ ǀ puru-kṛt ǀ sakhāyaḥ ǀ
ye ǀ madhyamāsaḥ ǀ uta ǀ nūtanāsaḥ ǀ uta ǀ avamasya ǀ puru-hūta ǀ bodhi ǁ
06.021.06 (Mandala. Sukta. Rik)
4.6.12.01 (Ashtaka. Adhyaya. Varga. Rik)
06.02.110 (Mandala. Anuvāka. Rik)
Samhita Devanagari Accented
तं पृ॒च्छंतोऽव॑रासः॒ परा॑णि प्र॒त्ना त॑ इंद्र॒ श्रुत्यानु॑ येमुः ।
अर्चा॑मसि वीर ब्रह्मवाहो॒ यादे॒व वि॒द्म तात्त्वा॑ म॒हांतं॑ ॥
Samhita Devanagari Nonaccented
तं पृच्छंतोऽवरासः पराणि प्रत्ना त इंद्र श्रुत्यानु येमुः ।
अर्चामसि वीर ब्रह्मवाहो यादेव विद्म तात्त्वा महांतं ॥
Samhita Transcription Accented
tám pṛcchántó’varāsaḥ párāṇi pratnā́ ta indra śrútyā́nu yemuḥ ǀ
árcāmasi vīra brahmavāho yā́devá vidmá tā́ttvā mahā́ntam ǁ
Samhita Transcription Nonaccented
tam pṛcchanto’varāsaḥ parāṇi pratnā ta indra śrutyānu yemuḥ ǀ
arcāmasi vīra brahmavāho yādeva vidma tāttvā mahāntam ǁ
Padapatha Devanagari Accented
तम् । पृ॒च्छन्तः॑ । अव॑रासः । परा॑णि । प्र॒त्ना । ते॒ । इ॒न्द्र॒ । श्रुत्या॑ । अनु॑ । ये॒मुः॒ ।
अर्चा॑मसि । वी॒र॒ । ब्र॒ह्म॒ऽवा॒हः॒ । यात् । ए॒व । वि॒द्म । तात् । त्वा॒ । म॒हान्त॑म् ॥
Padapatha Devanagari Nonaccented
तम् । पृच्छन्तः । अवरासः । पराणि । प्रत्ना । ते । इन्द्र । श्रुत्या । अनु । येमुः ।
अर्चामसि । वीर । ब्रह्मऽवाहः । यात् । एव । विद्म । तात् । त्वा । महान्तम् ॥
Padapatha Transcription Accented
tám ǀ pṛcchántaḥ ǀ ávarāsaḥ ǀ párāṇi ǀ pratnā́ ǀ te ǀ indra ǀ śrútyā ǀ ánu ǀ yemuḥ ǀ
árcāmasi ǀ vīra ǀ brahma-vāhaḥ ǀ yā́t ǀ evá ǀ vidmá ǀ tā́t ǀ tvā ǀ mahā́ntam ǁ
Padapatha Transcription Nonaccented
tam ǀ pṛcchantaḥ ǀ avarāsaḥ ǀ parāṇi ǀ pratnā ǀ te ǀ indra ǀ śrutyā ǀ anu ǀ yemuḥ ǀ
arcāmasi ǀ vīra ǀ brahma-vāhaḥ ǀ yāt ǀ eva ǀ vidma ǀ tāt ǀ tvā ǀ mahāntam ǁ
06.021.07 (Mandala. Sukta. Rik)
4.6.12.02 (Ashtaka. Adhyaya. Varga. Rik)
06.02.111 (Mandala. Anuvāka. Rik)
Samhita Devanagari Accented
अ॒भि त्वा॒ पाजो॑ र॒क्षसो॒ वि त॑स्थे॒ महि॑ जज्ञा॒नम॒भि तत्सु ति॑ष्ठ ।
तव॑ प्र॒त्नेन॒ युज्ये॑न॒ सख्या॒ वज्रे॑ण धृष्णो॒ अप॒ ता नु॑दस्व ॥
Samhita Devanagari Nonaccented
अभि त्वा पाजो रक्षसो वि तस्थे महि जज्ञानमभि तत्सु तिष्ठ ।
तव प्रत्नेन युज्येन सख्या वज्रेण धृष्णो अप ता नुदस्व ॥
Samhita Transcription Accented
abhí tvā pā́jo rakṣáso ví tasthe máhi jajñānámabhí tátsú tiṣṭha ǀ
táva pratnéna yújyena sákhyā vájreṇa dhṛṣṇo ápa tā́ nudasva ǁ
Samhita Transcription Nonaccented
abhi tvā pājo rakṣaso vi tasthe mahi jajñānamabhi tatsu tiṣṭha ǀ
tava pratnena yujyena sakhyā vajreṇa dhṛṣṇo apa tā nudasva ǁ
Padapatha Devanagari Accented
अ॒भि । त्वा॒ । पाजः॑ । र॒क्षसः॑ । वि । त॒स्थे॒ । महि॑ । ज॒ज्ञा॒नम् । अ॒भि । तत् । सु । ति॒ष्ठ॒ ।
तव॑ । प्र॒त्नेन॑ । युज्ये॑न । सख्या॑ । वज्रे॑ण । धृ॒ष्णो॒ इति॑ । अप॑ । ता । नु॒द॒स्व॒ ॥
Padapatha Devanagari Nonaccented
अभि । त्वा । पाजः । रक्षसः । वि । तस्थे । महि । जज्ञानम् । अभि । तत् । सु । तिष्ठ ।
तव । प्रत्नेन । युज्येन । सख्या । वज्रेण । धृष्णो इति । अप । ता । नुदस्व ॥
Padapatha Transcription Accented
abhí ǀ tvā ǀ pā́jaḥ ǀ rakṣásaḥ ǀ ví ǀ tasthe ǀ máhi ǀ jajñānám ǀ abhí ǀ tát ǀ sú ǀ tiṣṭha ǀ
táva ǀ pratnéna ǀ yújyena ǀ sákhyā ǀ vájreṇa ǀ dhṛṣṇo íti ǀ ápa ǀ tā́ ǀ nudasva ǁ
Padapatha Transcription Nonaccented
abhi ǀ tvā ǀ pājaḥ ǀ rakṣasaḥ ǀ vi ǀ tasthe ǀ mahi ǀ jajñānam ǀ abhi ǀ tat ǀ su ǀ tiṣṭha ǀ
tava ǀ pratnena ǀ yujyena ǀ sakhyā ǀ vajreṇa ǀ dhṛṣṇo iti ǀ apa ǀ tā ǀ nudasva ǁ
06.021.08 (Mandala. Sukta. Rik)
4.6.12.03 (Ashtaka. Adhyaya. Varga. Rik)
06.02.112 (Mandala. Anuvāka. Rik)
Samhita Devanagari Accented
स तु श्रु॑धींद्र॒ नूत॑नस्य ब्रह्मण्य॒तो वी॑र कारुधायः ।
त्वं ह्या॒३॒॑पिः प्र॒दिवि॑ पितॄ॒णां शश्व॑द्ब॒भूथ॑ सु॒हव॒ एष्टौ॑ ॥
Samhita Devanagari Nonaccented
स तु श्रुधींद्र नूतनस्य ब्रह्मण्यतो वीर कारुधायः ।
त्वं ह्यापिः प्रदिवि पितॄणां शश्वद्बभूथ सुहव एष्टौ ॥
Samhita Transcription Accented
sá tú śrudhīndra nū́tanasya brahmaṇyató vīra kārudhāyaḥ ǀ
tvám hyā́píḥ pradívi pitṝṇā́m śáśvadbabhū́tha suháva éṣṭau ǁ
Samhita Transcription Nonaccented
sa tu śrudhīndra nūtanasya brahmaṇyato vīra kārudhāyaḥ ǀ
tvam hyāpiḥ pradivi pitṝṇām śaśvadbabhūtha suhava eṣṭau ǁ
Padapatha Devanagari Accented
सः । तु । श्रु॒धि॒ । इ॒न्द्र॒ । नूत॑नस्य । ब्र॒ह्म॒ण्य॒तः । वी॒र॒ । का॒रु॒ऽधा॒यः॒ ।
त्वम् । हि । आ॒पिः । प्र॒ऽदिवि॑ । पि॒तॄ॒णाम् । शश्व॑त् । ब॒भूथ॑ । सु॒ऽहवः॑ । आऽइ॑ष्टौ ॥
Padapatha Devanagari Nonaccented
सः । तु । श्रुधि । इन्द्र । नूतनस्य । ब्रह्मण्यतः । वीर । कारुऽधायः ।
त्वम् । हि । आपिः । प्रऽदिवि । पितॄणाम् । शश्वत् । बभूथ । सुऽहवः । आऽइष्टौ ॥
Padapatha Transcription Accented
sáḥ ǀ tú ǀ śrudhi ǀ indra ǀ nū́tanasya ǀ brahmaṇyatáḥ ǀ vīra ǀ kāru-dhāyaḥ ǀ
tvám ǀ hí ǀ āpíḥ ǀ pra-dívi ǀ pitṝṇā́m ǀ śáśvat ǀ babhū́tha ǀ su-hávaḥ ǀ ā́-iṣṭau ǁ
Padapatha Transcription Nonaccented
saḥ ǀ tu ǀ śrudhi ǀ indra ǀ nūtanasya ǀ brahmaṇyataḥ ǀ vīra ǀ kāru-dhāyaḥ ǀ
tvam ǀ hi ǀ āpiḥ ǀ pra-divi ǀ pitṝṇām ǀ śaśvat ǀ babhūtha ǀ su-havaḥ ǀ ā-iṣṭau ǁ
06.021.09 (Mandala. Sukta. Rik)
4.6.12.04 (Ashtaka. Adhyaya. Varga. Rik)
06.02.113 (Mandala. Anuvāka. Rik)
Samhita Devanagari Accented
प्रोतये॒ वरु॑णं मि॒त्रमिंद्रं॑ म॒रुतः॑ कृ॒ष्वाव॑से नो अ॒द्य ।
प्र पू॒षणं॒ विष्णु॑म॒ग्निं पुरं॑धिं सवि॒तार॒मोष॑धीः॒ पर्व॑तांश्च ॥
Samhita Devanagari Nonaccented
प्रोतये वरुणं मित्रमिंद्रं मरुतः कृष्वावसे नो अद्य ।
प्र पूषणं विष्णुमग्निं पुरंधिं सवितारमोषधीः पर्वतांश्च ॥
Samhita Transcription Accented
prótáye váruṇam mitrámíndram marútaḥ kṛṣvā́vase no adyá ǀ
prá pūṣáṇam víṣṇumagním púraṃdhim savitā́ramóṣadhīḥ párvatāṃśca ǁ
Samhita Transcription Nonaccented
protaye varuṇam mitramindram marutaḥ kṛṣvāvase no adya ǀ
pra pūṣaṇam viṣṇumagnim puraṃdhim savitāramoṣadhīḥ parvatāṃśca ǁ
Padapatha Devanagari Accented
प्र । ऊ॒तये॑ । वरु॑णम् । मि॒त्रम् । इन्द्र॑म् । म॒रुतः॑ । कृ॒ष्व॒ । अव॑से । नः॒ । अ॒द्य ।
प्र । पू॒षण॑म् । विष्णु॑म् । अ॒ग्निम् । पुर॑म्ऽधि॑म् । स॒वि॒तार॑म् । ओष॑धीः । पर्व॑तान् । च॒ ॥
Padapatha Devanagari Nonaccented
प्र । ऊतये । वरुणम् । मित्रम् । इन्द्रम् । मरुतः । कृष्व । अवसे । नः । अद्य ।
प्र । पूषणम् । विष्णुम् । अग्निम् । पुरम्ऽधिम् । सवितारम् । ओषधीः । पर्वतान् । च ॥
Padapatha Transcription Accented
prá ǀ ūtáye ǀ váruṇam ǀ mitrám ǀ índram ǀ marútaḥ ǀ kṛṣva ǀ ávase ǀ naḥ ǀ adyá ǀ
prá ǀ pūṣáṇam ǀ víṣṇum ǀ agním ǀ púram-dhim ǀ savitā́ram ǀ óṣadhīḥ ǀ párvatān ǀ ca ǁ
Padapatha Transcription Nonaccented
pra ǀ ūtaye ǀ varuṇam ǀ mitram ǀ indram ǀ marutaḥ ǀ kṛṣva ǀ avase ǀ naḥ ǀ adya ǀ
pra ǀ pūṣaṇam ǀ viṣṇum ǀ agnim ǀ puram-dhim ǀ savitāram ǀ oṣadhīḥ ǀ parvatān ǀ ca ǁ
06.021.10 (Mandala. Sukta. Rik)
4.6.12.05 (Ashtaka. Adhyaya. Varga. Rik)
06.02.114 (Mandala. Anuvāka. Rik)
Samhita Devanagari Accented
इ॒म उ॑ त्वा पुरुशाक प्रयज्यो जरि॒तारो॑ अ॒भ्य॑र्चंत्य॒र्कैः ।
श्रु॒धी हव॒मा हु॑व॒तो हु॑वा॒नो न त्वावाँ॑ अ॒न्यो अ॑मृत॒ त्वद॑स्ति ॥
Samhita Devanagari Nonaccented
इम उ त्वा पुरुशाक प्रयज्यो जरितारो अभ्यर्चंत्यर्कैः ।
श्रुधी हवमा हुवतो हुवानो न त्वावाँ अन्यो अमृत त्वदस्ति ॥
Samhita Transcription Accented
imá u tvā puruśāka prayajyo jaritā́ro abhyárcantyarkáiḥ ǀ
śrudhī́ hávamā́ huvató huvānó ná tvā́vām̐ anyó amṛta tvádasti ǁ
Samhita Transcription Nonaccented
ima u tvā puruśāka prayajyo jaritāro abhyarcantyarkaiḥ ǀ
śrudhī havamā huvato huvāno na tvāvām̐ anyo amṛta tvadasti ǁ
Padapatha Devanagari Accented
इ॒मे । ऊं॒ इति॑ । त्वा॒ । पु॒रु॒ऽशा॒क॒ । प्र॒य॒ज्यो॒ इति॑ प्रऽयज्यो । ज॒रि॒तारः॑ । अ॒भि । अ॒र्च॒न्ति॒ । अ॒र्कैः ।
श्रु॒धि । हव॑म् । आ । हु॒व॒तः । हु॒वा॒नः । न । त्वाऽवा॑न् । अ॒न्यः । अ॒मृ॒त॒ । त्वत् । अ॒स्ति॒ ॥
Padapatha Devanagari Nonaccented
इमे । ऊं इति । त्वा । पुरुऽशाक । प्रयज्यो इति प्रऽयज्यो । जरितारः । अभि । अर्चन्ति । अर्कैः ।
श्रुधि । हवम् । आ । हुवतः । हुवानः । न । त्वाऽवान् । अन्यः । अमृत । त्वत् । अस्ति ॥
Padapatha Transcription Accented
imé ǀ ūṃ íti ǀ tvā ǀ puru-śāka ǀ prayajyo íti pra-yajyo ǀ jaritā́raḥ ǀ abhí ǀ arcanti ǀ arkáiḥ ǀ
śrudhí ǀ hávam ǀ ā́ ǀ huvatáḥ ǀ huvānáḥ ǀ ná ǀ tvā́-vān ǀ anyáḥ ǀ amṛta ǀ tvát ǀ asti ǁ
Padapatha Transcription Nonaccented
ime ǀ ūṃ iti ǀ tvā ǀ puru-śāka ǀ prayajyo iti pra-yajyo ǀ jaritāraḥ ǀ abhi ǀ arcanti ǀ arkaiḥ ǀ
śrudhi ǀ havam ǀ ā ǀ huvataḥ ǀ huvānaḥ ǀ na ǀ tvā-vān ǀ anyaḥ ǀ amṛta ǀ tvat ǀ asti ǁ
06.021.11 (Mandala. Sukta. Rik)
4.6.12.06 (Ashtaka. Adhyaya. Varga. Rik)
06.02.115 (Mandala. Anuvāka. Rik)
Samhita Devanagari Accented
नू म॒ आ वाच॒मुप॑ याहि वि॒द्वान्विश्वे॑भिः सूनो सहसो॒ यज॑त्रैः ।
ये अ॑ग्निजि॒ह्वा ऋ॑त॒साप॑ आ॒सुर्ये मनुं॑ च॒क्रुरुप॑रं॒ दसा॑य ॥
Samhita Devanagari Nonaccented
नू म आ वाचमुप याहि विद्वान्विश्वेभिः सूनो सहसो यजत्रैः ।
ये अग्निजिह्वा ऋतसाप आसुर्ये मनुं चक्रुरुपरं दसाय ॥
Samhita Transcription Accented
nū́ ma ā́ vā́camúpa yāhi vidvā́nvíśvebhiḥ sūno sahaso yájatraiḥ ǀ
yé agnijihvā́ ṛtasā́pa āsúryé mánum cakrúrúparam dásāya ǁ
Samhita Transcription Nonaccented
nū ma ā vācamupa yāhi vidvānviśvebhiḥ sūno sahaso yajatraiḥ ǀ
ye agnijihvā ṛtasāpa āsurye manum cakruruparam dasāya ǁ
Padapatha Devanagari Accented
नु । मे॒ । आ । वाच॑म् । उप॑ । या॒हि॒ । वि॒द्वान् । विश्वे॑भिः । सू॒नो॒ इति॑ । स॒ह॒सः॒ । यज॑त्रैः ।
ये । अ॒ग्नि॒ऽजि॒ह्वाः । ऋ॒त॒ऽसापः॑ । आ॒सुः । ये । मनु॑म् । च॒क्रुः । उप॑रम् । दसा॑य ॥
Padapatha Devanagari Nonaccented
नु । मे । आ । वाचम् । उप । याहि । विद्वान् । विश्वेभिः । सूनो इति । सहसः । यजत्रैः ।
ये । अग्निऽजिह्वाः । ऋतऽसापः । आसुः । ये । मनुम् । चक्रुः । उपरम् । दसाय ॥
Padapatha Transcription Accented
nú ǀ me ǀ ā́ ǀ vā́cam ǀ úpa ǀ yāhi ǀ vidvā́n ǀ víśvebhiḥ ǀ sūno íti ǀ sahasaḥ ǀ yájatraiḥ ǀ
yé ǀ agni-jihvā́ḥ ǀ ṛta-sā́paḥ ǀ āsúḥ ǀ yé ǀ mánum ǀ cakrúḥ ǀ úparam ǀ dásāya ǁ
Padapatha Transcription Nonaccented
nu ǀ me ǀ ā ǀ vācam ǀ upa ǀ yāhi ǀ vidvān ǀ viśvebhiḥ ǀ sūno iti ǀ sahasaḥ ǀ yajatraiḥ ǀ
ye ǀ agni-jihvāḥ ǀ ṛta-sāpaḥ ǀ āsuḥ ǀ ye ǀ manum ǀ cakruḥ ǀ uparam ǀ dasāya ǁ
06.021.12 (Mandala. Sukta. Rik)
4.6.12.07 (Ashtaka. Adhyaya. Varga. Rik)
06.02.116 (Mandala. Anuvāka. Rik)
Samhita Devanagari Accented
स नो॑ बोधि पुरए॒ता सु॒गेषू॒त दु॒र्गेषु॑ पथि॒कृद्विदा॑नः ।
ये अश्र॑मास उ॒रवो॒ वहि॑ष्ठा॒स्तेभि॑र्न इंद्रा॒भि व॑क्षि॒ वाजं॑ ॥
Samhita Devanagari Nonaccented
स नो बोधि पुरएता सुगेषूत दुर्गेषु पथिकृद्विदानः ।
ये अश्रमास उरवो वहिष्ठास्तेभिर्न इंद्राभि वक्षि वाजं ॥
Samhita Transcription Accented
sá no bodhi puraetā́ sugéṣūtá durgéṣu pathikṛ́dvídānaḥ ǀ
yé áśramāsa urávo váhiṣṭhāstébhirna indrābhí vakṣi vā́jam ǁ
Samhita Transcription Nonaccented
sa no bodhi puraetā sugeṣūta durgeṣu pathikṛdvidānaḥ ǀ
ye aśramāsa uravo vahiṣṭhāstebhirna indrābhi vakṣi vājam ǁ
Padapatha Devanagari Accented
सः । नः॒ । बो॒धि॒ । पु॒रः॒ऽए॒ता । सु॒ऽगेषु॑ । उ॒त । दुः॒ऽगेषु॑ । प॒थि॒ऽकृत् । विदा॑नः ।
ये । अश्र॑मासः । उ॒रवः॑ । वहि॑ष्ठाः । तेभिः॑ । नः॒ । इ॒न्द्र॒ । अ॒भि । व॒क्षि॒ । वाज॑म् ॥
Padapatha Devanagari Nonaccented
सः । नः । बोधि । पुरःऽएता । सुऽगेषु । उत । दुःऽगेषु । पथिऽकृत् । विदानः ।
ये । अश्रमासः । उरवः । वहिष्ठाः । तेभिः । नः । इन्द्र । अभि । वक्षि । वाजम् ॥
Padapatha Transcription Accented
sáḥ ǀ naḥ ǀ bodhi ǀ puraḥ-etā́ ǀ su-géṣu ǀ utá ǀ duḥ-géṣu ǀ pathi-kṛ́t ǀ vídānaḥ ǀ
yé ǀ áśramāsaḥ ǀ urávaḥ ǀ váhiṣṭhāḥ ǀ tébhiḥ ǀ naḥ ǀ indra ǀ abhí ǀ vakṣi ǀ vā́jam ǁ
Padapatha Transcription Nonaccented
saḥ ǀ naḥ ǀ bodhi ǀ puraḥ-etā ǀ su-geṣu ǀ uta ǀ duḥ-geṣu ǀ pathi-kṛt ǀ vidānaḥ ǀ
ye ǀ aśramāsaḥ ǀ uravaḥ ǀ vahiṣṭhāḥ ǀ tebhiḥ ǀ naḥ ǀ indra ǀ abhi ǀ vakṣi ǀ vājam ǁ