|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 48
|
1. Info |
| To: | 1-10: agni; 11, 12, 20, 21: maruts; 13-15: maruts or liṅgoktadevatās; 16-19: pūṣan; 22: maruts or heaven and earth or pṛśni |
|
| From: | śaṃyu bārhaspatya | |
| Metres: | 1st set of styles: bṛhatī (1, 4, 5, 14); bhurigbṛhatī (10, 12, 17); virāḍabṛhatī (3, 19); triṣṭup (6, 21); uṣṇik (11, 16); nicṛduṣṇik (13, 18); ārcījagatī (2); nicṛttriṣṭup (7); bhuriktriṣṭup (8); bhuriganuṣṭup (9); nicṛdatijagatī (15); svarāḍanuṣṭup (20); anuṣṭup (22) 2nd set of styles: bṛhatī (1, 3, 5, 9, 14, 19, 20); satobṛhatī (2, 4, 10, 12, 17); triṣṭubh (6, 7); kakubh (11, 16); pura-uṣṇih (13, 18); mahāsatobṛhatī (8); atijagatī (15); yavamadhyā mahābṛhatī (21); anuṣṭubh (22) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.048.01 (Mandala. Sukta. Rik)
4.8.01.01 (Ashtaka. Adhyaya. Varga. Rik)
06.04.103 (Mandala. Anuvāka. Rik)
Samhita Devanagari Accented
य॒ज्ञाय॑ज्ञा वो अ॒ग्नये॑ गि॒रागि॑रा च॒ दक्ष॑से ।
प्रप्र॑ व॒यम॒मृतं॑ जा॒तवे॑दसं प्रि॒यं मि॒त्रं न शं॑सिषं ॥
Samhita Devanagari Nonaccented
यज्ञायज्ञा वो अग्नये गिरागिरा च दक्षसे ।
प्रप्र वयममृतं जातवेदसं प्रियं मित्रं न शंसिषं ॥
Samhita Transcription Accented
yajñā́yajñā vo agnáye girā́girā ca dákṣase ǀ
prápra vayámamṛ́tam jātávedasam priyám mitrám ná śaṃsiṣam ǁ
Samhita Transcription Nonaccented
yajñāyajñā vo agnaye girāgirā ca dakṣase ǀ
prapra vayamamṛtam jātavedasam priyam mitram na śaṃsiṣam ǁ
Padapatha Devanagari Accented
य॒ज्ञाऽय॑ज्ञा । वः॒ । अ॒ग्नये॑ । गि॒राऽगि॑रा । च॒ । दक्ष॑से ।
प्रऽप्र॑ । व॒यम् । अ॒मृत॑म् । जा॒तऽवे॑दसम् । प्रि॒यम् । मि॒त्रम् । न । शं॒सि॒ष॒म् ॥
Padapatha Devanagari Nonaccented
यज्ञाऽयज्ञा । वः । अग्नये । गिराऽगिरा । च । दक्षसे ।
प्रऽप्र । वयम् । अमृतम् । जातऽवेदसम् । प्रियम् । मित्रम् । न । शंसिषम् ॥
Padapatha Transcription Accented
yajñā́-yajñā ǀ vaḥ ǀ agnáye ǀ girā́-girā ǀ ca ǀ dákṣase ǀ
prá-pra ǀ vayám ǀ amṛ́tam ǀ jātá-vedasam ǀ priyám ǀ mitrám ǀ ná ǀ śaṃsiṣam ǁ
Padapatha Transcription Nonaccented
yajñā-yajñā ǀ vaḥ ǀ agnaye ǀ girā-girā ǀ ca ǀ dakṣase ǀ
pra-pra ǀ vayam ǀ amṛtam ǀ jāta-vedasam ǀ priyam ǀ mitram ǀ na ǀ śaṃsiṣam ǁ
06.048.02 (Mandala. Sukta. Rik)
4.8.01.02 (Ashtaka. Adhyaya. Varga. Rik)
06.04.104 (Mandala. Anuvāka. Rik)
Samhita Devanagari Accented
ऊ॒र्जो नपा॑तं॒ स हि॒नायम॑स्म॒युर्दाशे॑म ह॒व्यदा॑तये ।
भुव॒द्वाजे॑ष्ववि॒ता भुव॑द्वृ॒ध उ॒त त्रा॒ता त॒नूनां॑ ॥
Samhita Devanagari Nonaccented
ऊर्जो नपातं स हिनायमस्मयुर्दाशेम हव्यदातये ।
भुवद्वाजेष्वविता भुवद्वृध उत त्राता तनूनां ॥
Samhita Transcription Accented
ūrjó nápātam sá hinā́yámasmayúrdā́śema havyádātaye ǀ
bhúvadvā́jeṣvavitā́ bhúvadvṛdhá utá trātā́ tanū́nām ǁ
Samhita Transcription Nonaccented
ūrjo napātam sa hināyamasmayurdāśema havyadātaye ǀ
bhuvadvājeṣvavitā bhuvadvṛdha uta trātā tanūnām ǁ
Padapatha Devanagari Accented
ऊ॒र्जः । नपा॑तम् । सः । हि॒न । अ॒यम् । अ॒स्म॒ऽयुः । दाशे॑म । ह॒व्यऽदा॑तये ।
भुव॑त् । वाजे॑षु । अ॒वि॒ता । भुव॑त् । वृ॒धः । उ॒त । त्रा॒ता । त॒नूना॑म् ॥
Padapatha Devanagari Nonaccented
ऊर्जः । नपातम् । सः । हिन । अयम् । अस्मऽयुः । दाशेम । हव्यऽदातये ।
भुवत् । वाजेषु । अविता । भुवत् । वृधः । उत । त्राता । तनूनाम् ॥
Padapatha Transcription Accented
ūrjáḥ ǀ nápātam ǀ sáḥ ǀ hiná ǀ ayám ǀ asma-yúḥ ǀ dā́śema ǀ havyá-dātaye ǀ
bhúvat ǀ vā́jeṣu ǀ avitā́ ǀ bhúvat ǀ vṛdháḥ ǀ utá ǀ trātā́ ǀ tanū́nām ǁ
Padapatha Transcription Nonaccented
ūrjaḥ ǀ napātam ǀ saḥ ǀ hina ǀ ayam ǀ asma-yuḥ ǀ dāśema ǀ havya-dātaye ǀ
bhuvat ǀ vājeṣu ǀ avitā ǀ bhuvat ǀ vṛdhaḥ ǀ uta ǀ trātā ǀ tanūnām ǁ
06.048.03 (Mandala. Sukta. Rik)
4.8.01.03 (Ashtaka. Adhyaya. Varga. Rik)
06.04.105 (Mandala. Anuvāka. Rik)
Samhita Devanagari Accented
वृषा॒ ह्य॑ग्ने अ॒जरो॑ म॒हान्वि॒भास्य॒र्चिषा॑ ।
अज॑स्रेण शो॒चिषा॒ शोशु॑चच्छुचे सुदी॒तिभिः॒ सु दी॑दिहि ॥
Samhita Devanagari Nonaccented
वृषा ह्यग्ने अजरो महान्विभास्यर्चिषा ।
अजस्रेण शोचिषा शोशुचच्छुचे सुदीतिभिः सु दीदिहि ॥
Samhita Transcription Accented
vṛ́ṣā hyágne ajáro mahā́nvibhā́syarcíṣā ǀ
ájasreṇa śocíṣā śóśucacchuce sudītíbhiḥ sú dīdihi ǁ
Samhita Transcription Nonaccented
vṛṣā hyagne ajaro mahānvibhāsyarciṣā ǀ
ajasreṇa śociṣā śośucacchuce sudītibhiḥ su dīdihi ǁ
Padapatha Devanagari Accented
वृषा॑ । हि । अ॒ग्ने॒ । अ॒जरः॑ । म॒हान् । वि॒ऽभासि॑ । अ॒र्चिषा॑ ।
अज॑स्रेण । शो॒चिषा॑ । शोशु॑चत् । शु॒चे॒ । सु॒दी॒तिऽभिः॑ । सु । दी॒दि॒हि॒ ॥
Padapatha Devanagari Nonaccented
वृषा । हि । अग्ने । अजरः । महान् । विऽभासि । अर्चिषा ।
अजस्रेण । शोचिषा । शोशुचत् । शुचे । सुदीतिऽभिः । सु । दीदिहि ॥
Padapatha Transcription Accented
vṛ́ṣā ǀ hí ǀ agne ǀ ajáraḥ ǀ mahā́n ǀ vi-bhā́si ǀ arcíṣā ǀ
ájasreṇa ǀ śocíṣā ǀ śóśucat ǀ śuce ǀ sudītí-bhiḥ ǀ sú ǀ dīdihi ǁ
Padapatha Transcription Nonaccented
vṛṣā ǀ hi ǀ agne ǀ ajaraḥ ǀ mahān ǀ vi-bhāsi ǀ arciṣā ǀ
ajasreṇa ǀ śociṣā ǀ śośucat ǀ śuce ǀ sudīti-bhiḥ ǀ su ǀ dīdihi ǁ
06.048.04 (Mandala. Sukta. Rik)
4.8.01.04 (Ashtaka. Adhyaya. Varga. Rik)
06.04.106 (Mandala. Anuvāka. Rik)
Samhita Devanagari Accented
म॒हो दे॒वान्यज॑सि॒ यक्ष्या॑नु॒षक्तव॒ क्रत्वो॒त दं॒सना॑ ।
अ॒र्वाचः॑ सीं कृणुह्य॒ग्नेऽव॑से॒ रास्व॒ वाजो॒त वं॑स्व ॥
Samhita Devanagari Nonaccented
महो देवान्यजसि यक्ष्यानुषक्तव क्रत्वोत दंसना ।
अर्वाचः सीं कृणुह्यग्नेऽवसे रास्व वाजोत वंस्व ॥
Samhita Transcription Accented
mahó devā́nyájasi yákṣyānuṣáktáva krátvotá daṃsánā ǀ
arvā́caḥ sīm kṛṇuhyagné’vase rā́sva vā́jotá vaṃsva ǁ
Samhita Transcription Nonaccented
maho devānyajasi yakṣyānuṣaktava kratvota daṃsanā ǀ
arvācaḥ sīm kṛṇuhyagne’vase rāsva vājota vaṃsva ǁ
Padapatha Devanagari Accented
म॒हः । दे॒वान् । यज॑सि । यक्षि॑ । आ॒नु॒षक् । तव॑ । क्रत्वा॑ । उ॒त । दं॒सना॑ ।
अ॒र्वाचः॑ । सी॒म् । कृ॒णु॒हि॒ । अ॒ग्ने॒ । अव॑से । रास्व॑ । वाजा॑ । उ॒त । वं॒स्व॒ ॥
Padapatha Devanagari Nonaccented
महः । देवान् । यजसि । यक्षि । आनुषक् । तव । क्रत्वा । उत । दंसना ।
अर्वाचः । सीम् । कृणुहि । अग्ने । अवसे । रास्व । वाजा । उत । वंस्व ॥
Padapatha Transcription Accented
maháḥ ǀ devā́n ǀ yájasi ǀ yákṣi ǀ ānuṣák ǀ táva ǀ krátvā ǀ utá ǀ daṃsánā ǀ
arvā́caḥ ǀ sīm ǀ kṛṇuhi ǀ agne ǀ ávase ǀ rā́sva ǀ vā́jā ǀ utá ǀ vaṃsva ǁ
Padapatha Transcription Nonaccented
mahaḥ ǀ devān ǀ yajasi ǀ yakṣi ǀ ānuṣak ǀ tava ǀ kratvā ǀ uta ǀ daṃsanā ǀ
arvācaḥ ǀ sīm ǀ kṛṇuhi ǀ agne ǀ avase ǀ rāsva ǀ vājā ǀ uta ǀ vaṃsva ǁ
06.048.05 (Mandala. Sukta. Rik)
4.8.01.05 (Ashtaka. Adhyaya. Varga. Rik)
06.04.107 (Mandala. Anuvāka. Rik)
Samhita Devanagari Accented
यमापो॒ अद्र॑यो॒ वना॒ गर्भ॑मृ॒तस्य॒ पिप्र॑ति ।
सह॑सा॒ यो म॑थि॒तो जाय॑ते॒ नृभिः॑ पृथि॒व्या अधि॒ सान॑वि ॥
Samhita Devanagari Nonaccented
यमापो अद्रयो वना गर्भमृतस्य पिप्रति ।
सहसा यो मथितो जायते नृभिः पृथिव्या अधि सानवि ॥
Samhita Transcription Accented
yámā́po ádrayo vánā gárbhamṛtásya píprati ǀ
sáhasā yó mathitó jā́yate nṛ́bhiḥ pṛthivyā́ ádhi sā́navi ǁ
Samhita Transcription Nonaccented
yamāpo adrayo vanā garbhamṛtasya piprati ǀ
sahasā yo mathito jāyate nṛbhiḥ pṛthivyā adhi sānavi ǁ
Padapatha Devanagari Accented
यम् । आपः॑ । अद्र॑यः । वना॑ । गर्भ॑म् । ऋ॒तस्य॑ । पिप्र॑ति ।
सह॑सा । यः । म॒थि॒तः । जाय॑ते । नृऽभिः॑ । पृ॒थि॒व्याः । अधि॑ । सान॑वि ॥
Padapatha Devanagari Nonaccented
यम् । आपः । अद्रयः । वना । गर्भम् । ऋतस्य । पिप्रति ।
सहसा । यः । मथितः । जायते । नृऽभिः । पृथिव्याः । अधि । सानवि ॥
Padapatha Transcription Accented
yám ǀ ā́paḥ ǀ ádrayaḥ ǀ vánā ǀ gárbham ǀ ṛtásya ǀ píprati ǀ
sáhasā ǀ yáḥ ǀ mathitáḥ ǀ jā́yate ǀ nṛ́-bhiḥ ǀ pṛthivyā́ḥ ǀ ádhi ǀ sā́navi ǁ
Padapatha Transcription Nonaccented
yam ǀ āpaḥ ǀ adrayaḥ ǀ vanā ǀ garbham ǀ ṛtasya ǀ piprati ǀ
sahasā ǀ yaḥ ǀ mathitaḥ ǀ jāyate ǀ nṛ-bhiḥ ǀ pṛthivyāḥ ǀ adhi ǀ sānavi ǁ
06.048.06 (Mandala. Sukta. Rik)
4.8.02.01 (Ashtaka. Adhyaya. Varga. Rik)
06.04.108 (Mandala. Anuvāka. Rik)
Samhita Devanagari Accented
आ यः प॒प्रौ भा॒नुना॒ रोद॑सी उ॒भे धू॒मेन॑ धावते दि॒वि ।
ति॒रस्तमो॑ ददृश॒ ऊर्म्या॒स्वा श्या॒वास्व॑रु॒षो वृषा श्या॒वा अ॑रु॒षो वृषा॑ ॥
Samhita Devanagari Nonaccented
आ यः पप्रौ भानुना रोदसी उभे धूमेन धावते दिवि ।
तिरस्तमो ददृश ऊर्म्यास्वा श्यावास्वरुषो वृषा श्यावा अरुषो वृषा ॥
Samhita Transcription Accented
ā́ yáḥ papráu bhānúnā ródasī ubhé dhūména dhāvate diví ǀ
tirástámo dadṛśa ū́rmyāsvā́ śyāvā́svaruṣó vṛ́ṣā́ śyāvā́ aruṣó vṛ́ṣā ǁ
Samhita Transcription Nonaccented
ā yaḥ paprau bhānunā rodasī ubhe dhūmena dhāvate divi ǀ
tirastamo dadṛśa ūrmyāsvā śyāvāsvaruṣo vṛṣā śyāvā aruṣo vṛṣā ǁ
Padapatha Devanagari Accented
आ । यः । प॒प्रौ । भा॒नुना॑ । रोद॑सी॒ इति॑ । उ॒भे इति॑ । धू॒मेन॑ । धा॒व॒ते॒ । दि॒वि ।
ति॒रः । तमः॑ । द॒दृ॒शे॒ । ऊर्म्या॑सु । आ । श्या॒वासु॑ । अ॒रु॒षः । वृषा॑ । आ । श्या॒वाः । अ॒रु॒षः । वृषा॑ ॥
Padapatha Devanagari Nonaccented
आ । यः । पप्रौ । भानुना । रोदसी इति । उभे इति । धूमेन । धावते । दिवि ।
तिरः । तमः । ददृशे । ऊर्म्यासु । आ । श्यावासु । अरुषः । वृषा । आ । श्यावाः । अरुषः । वृषा ॥
Padapatha Transcription Accented
ā́ ǀ yáḥ ǀ papráu ǀ bhānúnā ǀ ródasī íti ǀ ubhé íti ǀ dhūména ǀ dhāvate ǀ diví ǀ
tiráḥ ǀ támaḥ ǀ dadṛśe ǀ ū́rmyāsu ǀ ā́ ǀ śyāvā́su ǀ aruṣáḥ ǀ vṛ́ṣā ǀ ā́ ǀ śyāvā́ḥ ǀ aruṣáḥ ǀ vṛ́ṣā ǁ
Padapatha Transcription Nonaccented
ā ǀ yaḥ ǀ paprau ǀ bhānunā ǀ rodasī iti ǀ ubhe iti ǀ dhūmena ǀ dhāvate ǀ divi ǀ
tiraḥ ǀ tamaḥ ǀ dadṛśe ǀ ūrmyāsu ǀ ā ǀ śyāvāsu ǀ aruṣaḥ ǀ vṛṣā ǀ ā ǀ śyāvāḥ ǀ aruṣaḥ ǀ vṛṣā ǁ
06.048.07 (Mandala. Sukta. Rik)
4.8.02.02 (Ashtaka. Adhyaya. Varga. Rik)
06.04.109 (Mandala. Anuvāka. Rik)
Samhita Devanagari Accented
बृ॒हद्भि॑रग्ने अ॒र्चिभिः॑ शु॒क्रेण॑ देव शो॒चिषा॑ ।
भ॒रद्वा॑जे समिधा॒नो य॑विष्ठ्य रे॒वन्नः॑ शुक्र दीदिहि द्यु॒मत्पा॑वक दीदिहि ॥
Samhita Devanagari Nonaccented
बृहद्भिरग्ने अर्चिभिः शुक्रेण देव शोचिषा ।
भरद्वाजे समिधानो यविष्ठ्य रेवन्नः शुक्र दीदिहि द्युमत्पावक दीदिहि ॥
Samhita Transcription Accented
bṛhádbhiragne arcíbhiḥ śukréṇa deva śocíṣā ǀ
bharádvāje samidhānó yaviṣṭhya revánnaḥ śukra dīdihi dyumátpāvaka dīdihi ǁ
Samhita Transcription Nonaccented
bṛhadbhiragne arcibhiḥ śukreṇa deva śociṣā ǀ
bharadvāje samidhāno yaviṣṭhya revannaḥ śukra dīdihi dyumatpāvaka dīdihi ǁ
Padapatha Devanagari Accented
बृ॒हत्ऽभिः॑ । अ॒ग्ने॒ । अ॒र्चिऽभिः॑ । शु॒क्रेण॑ । दे॒व॒ । शो॒चिषा॑ ।
भ॒रत्ऽवा॑जे । स॒म्ऽइ॒धा॒नः । य॒वि॒ष्ठ्य॒ । रे॒वत् । नः॒ । शु॒क्र॒ । दी॒दि॒हि॒ । द्यु॒ऽमत् । पा॒व॒क॒ । दी॒दि॒हि॒ ॥
Padapatha Devanagari Nonaccented
बृहत्ऽभिः । अग्ने । अर्चिऽभिः । शुक्रेण । देव । शोचिषा ।
भरत्ऽवाजे । सम्ऽइधानः । यविष्ठ्य । रेवत् । नः । शुक्र । दीदिहि । द्युऽमत् । पावक । दीदिहि ॥
Padapatha Transcription Accented
bṛhát-bhiḥ ǀ agne ǀ arcí-bhiḥ ǀ śukréṇa ǀ deva ǀ śocíṣā ǀ
bharát-vāje ǀ sam-idhānáḥ ǀ yaviṣṭhya ǀ revát ǀ naḥ ǀ śukra ǀ dīdihi ǀ dyu-mát ǀ pāvaka ǀ dīdihi ǁ
Padapatha Transcription Nonaccented
bṛhat-bhiḥ ǀ agne ǀ arci-bhiḥ ǀ śukreṇa ǀ deva ǀ śociṣā ǀ
bharat-vāje ǀ sam-idhānaḥ ǀ yaviṣṭhya ǀ revat ǀ naḥ ǀ śukra ǀ dīdihi ǀ dyu-mat ǀ pāvaka ǀ dīdihi ǁ
06.048.08 (Mandala. Sukta. Rik)
4.8.02.03 (Ashtaka. Adhyaya. Varga. Rik)
06.04.110 (Mandala. Anuvāka. Rik)
Samhita Devanagari Accented
विश्वा॑सां गृ॒हप॑तिर्वि॒शाम॑सि॒ त्वम॑ग्ने॒ मानु॑षीणां ।
श॒तं पू॒र्भिर्य॑विष्ठ पा॒ह्यंह॑सः समे॒द्धारं॑ श॒तं हिमाः॑ स्तो॒तृभ्यो॒ ये च॒ दद॑ति ॥
Samhita Devanagari Nonaccented
विश्वासां गृहपतिर्विशामसि त्वमग्ने मानुषीणां ।
शतं पूर्भिर्यविष्ठ पाह्यंहसः समेद्धारं शतं हिमाः स्तोतृभ्यो ये च ददति ॥
Samhita Transcription Accented
víśvāsām gṛhápatirviśā́masi tvámagne mā́nuṣīṇām ǀ
śatám pūrbhíryaviṣṭha pāhyáṃhasaḥ sameddhā́ram śatám hímāḥ stotṛ́bhyo yé ca dádati ǁ
Samhita Transcription Nonaccented
viśvāsām gṛhapatirviśāmasi tvamagne mānuṣīṇām ǀ
śatam pūrbhiryaviṣṭha pāhyaṃhasaḥ sameddhāram śatam himāḥ stotṛbhyo ye ca dadati ǁ
Padapatha Devanagari Accented
विश्वा॑साम् । गृ॒हऽप॑तिः । वि॒शाम् । असि॑ । त्वम् । अ॒ग्ने॒ । मानु॑षीणाम् ।
श॒तम् । पूः॒ऽभिः । य॒वि॒ष्ठ॒ । पा॒हि॒ । अंह॑सः । स॒म्ऽए॒द्धार॑म् । श॒तम् । हिमाः॑ । स्तो॒तृऽभ्यः॑ । ये । च॒ । दद॑ति ॥
Padapatha Devanagari Nonaccented
विश्वासाम् । गृहऽपतिः । विशाम् । असि । त्वम् । अग्ने । मानुषीणाम् ।
शतम् । पूःऽभिः । यविष्ठ । पाहि । अंहसः । सम्ऽएद्धारम् । शतम् । हिमाः । स्तोतृऽभ्यः । ये । च । ददति ॥
Padapatha Transcription Accented
víśvāsām ǀ gṛhá-patiḥ ǀ viśā́m ǀ ási ǀ tvám ǀ agne ǀ mā́nuṣīṇām ǀ
śatám ǀ pūḥ-bhíḥ ǀ yaviṣṭha ǀ pāhi ǀ áṃhasaḥ ǀ sam-eddhā́ram ǀ śatám ǀ hímāḥ ǀ stotṛ́-bhyaḥ ǀ yé ǀ ca ǀ dádati ǁ
Padapatha Transcription Nonaccented
viśvāsām ǀ gṛha-patiḥ ǀ viśām ǀ asi ǀ tvam ǀ agne ǀ mānuṣīṇām ǀ
śatam ǀ pūḥ-bhiḥ ǀ yaviṣṭha ǀ pāhi ǀ aṃhasaḥ ǀ sam-eddhāram ǀ śatam ǀ himāḥ ǀ stotṛ-bhyaḥ ǀ ye ǀ ca ǀ dadati ǁ
06.048.09 (Mandala. Sukta. Rik)
4.8.02.04 (Ashtaka. Adhyaya. Varga. Rik)
06.04.111 (Mandala. Anuvāka. Rik)
Samhita Devanagari Accented
त्वं न॑श्चि॒त्र ऊ॒त्या वसो॒ राधां॑सि चोदय ।
अ॒स्य रा॒यस्त्वम॑ग्ने र॒थीर॑सि वि॒दा गा॒धं तु॒चे तु नः॑ ॥
Samhita Devanagari Nonaccented
त्वं नश्चित्र ऊत्या वसो राधांसि चोदय ।
अस्य रायस्त्वमग्ने रथीरसि विदा गाधं तुचे तु नः ॥
Samhita Transcription Accented
tvám naścitrá ūtyā́ váso rā́dhāṃsi codaya ǀ
asyá rāyástvámagne rathī́rasi vidā́ gādhám tucé tú naḥ ǁ
Samhita Transcription Nonaccented
tvam naścitra ūtyā vaso rādhāṃsi codaya ǀ
asya rāyastvamagne rathīrasi vidā gādham tuce tu naḥ ǁ
Padapatha Devanagari Accented
त्वम् । नः॒ । चि॒त्रः । ऊ॒त्या । वसो॒ इति॑ । राधां॑सि । चो॒द॒य॒ ।
अ॒स्य । रा॒यः । त्वम् । अ॒ग्ने॒ । र॒थीः । अ॒सि॒ । वि॒दाः । गा॒धम् । तु॒चे । तु । नः॒ ॥
Padapatha Devanagari Nonaccented
त्वम् । नः । चित्रः । ऊत्या । वसो इति । राधांसि । चोदय ।
अस्य । रायः । त्वम् । अग्ने । रथीः । असि । विदाः । गाधम् । तुचे । तु । नः ॥
Padapatha Transcription Accented
tvám ǀ naḥ ǀ citráḥ ǀ ūtyā́ ǀ váso íti ǀ rā́dhāṃsi ǀ codaya ǀ
asyá ǀ rāyáḥ ǀ tvám ǀ agne ǀ rathī́ḥ ǀ asi ǀ vidā́ḥ ǀ gādhám ǀ tucé ǀ tú ǀ naḥ ǁ
Padapatha Transcription Nonaccented
tvam ǀ naḥ ǀ citraḥ ǀ ūtyā ǀ vaso iti ǀ rādhāṃsi ǀ codaya ǀ
asya ǀ rāyaḥ ǀ tvam ǀ agne ǀ rathīḥ ǀ asi ǀ vidāḥ ǀ gādham ǀ tuce ǀ tu ǀ naḥ ǁ
06.048.10 (Mandala. Sukta. Rik)
4.8.02.05 (Ashtaka. Adhyaya. Varga. Rik)
06.04.112 (Mandala. Anuvāka. Rik)
Samhita Devanagari Accented
पर्षि॑ तो॒कं तन॑यं प॒र्तृभि॒ष्ट्वमद॑ब्धै॒रप्र॑युत्वभिः ।
अग्ने॒ हेळां॑सि॒ दैव्या॑ युयोधि॒ नोऽदे॑वानि॒ ह्वरां॑सि च ॥
Samhita Devanagari Nonaccented
पर्षि तोकं तनयं पर्तृभिष्ट्वमदब्धैरप्रयुत्वभिः ।
अग्ने हेळांसि दैव्या युयोधि नोऽदेवानि ह्वरांसि च ॥
Samhita Transcription Accented
párṣi tokám tánayam partṛ́bhiṣṭvámádabdhairáprayutvabhiḥ ǀ
ágne héḷāṃsi dáivyā yuyodhi nó’devāni hvárāṃsi ca ǁ
Samhita Transcription Nonaccented
parṣi tokam tanayam partṛbhiṣṭvamadabdhairaprayutvabhiḥ ǀ
agne heḷāṃsi daivyā yuyodhi no’devāni hvarāṃsi ca ǁ
Padapatha Devanagari Accented
पर्षि॑ । तो॒कम् । तन॑यम् । प॒र्तृऽभिः॑ । त्वम् । अद॑ब्धैः । अप्र॑युत्वऽभिः ।
अग्ने॑ । हेळां॑सि । दैव्या॑ । यु॒यो॒धि॒ । नः॒ । अदे॑वानि । ह्वरां॑सि । च॒ ॥
Padapatha Devanagari Nonaccented
पर्षि । तोकम् । तनयम् । पर्तृऽभिः । त्वम् । अदब्धैः । अप्रयुत्वऽभिः ।
अग्ने । हेळांसि । दैव्या । युयोधि । नः । अदेवानि । ह्वरांसि । च ॥
Padapatha Transcription Accented
párṣi ǀ tokám ǀ tánayam ǀ partṛ́-bhiḥ ǀ tvám ǀ ádabdhaiḥ ǀ áprayutva-bhiḥ ǀ
ágne ǀ héḷāṃsi ǀ dáivyā ǀ yuyodhi ǀ naḥ ǀ ádevāni ǀ hvárāṃsi ǀ ca ǁ
Padapatha Transcription Nonaccented
parṣi ǀ tokam ǀ tanayam ǀ partṛ-bhiḥ ǀ tvam ǀ adabdhaiḥ ǀ aprayutva-bhiḥ ǀ
agne ǀ heḷāṃsi ǀ daivyā ǀ yuyodhi ǀ naḥ ǀ adevāni ǀ hvarāṃsi ǀ ca ǁ
06.048.11 (Mandala. Sukta. Rik)
4.8.03.01 (Ashtaka. Adhyaya. Varga. Rik)
06.04.113 (Mandala. Anuvāka. Rik)
Samhita Devanagari Accented
आ स॑खायः सब॒र्दुघां॑ धे॒नुम॑जध्व॒मुप॒ नव्य॑सा॒ वचः॑ ।
सृ॒जध्व॒मन॑पस्फुरां ॥
Samhita Devanagari Nonaccented
आ सखायः सबर्दुघां धेनुमजध्वमुप नव्यसा वचः ।
सृजध्वमनपस्फुरां ॥
Samhita Transcription Accented
ā́ sakhāyaḥ sabardúghām dhenúmajadhvamúpa návyasā vácaḥ ǀ
sṛjádhvamánapasphurām ǁ
Samhita Transcription Nonaccented
ā sakhāyaḥ sabardughām dhenumajadhvamupa navyasā vacaḥ ǀ
sṛjadhvamanapasphurām ǁ
Padapatha Devanagari Accented
आ । स॒खा॒यः॒ । स॒बः॒ऽदुघा॑म् । धे॒नुम् । अ॒ज॒ध्व॒म् । उप॑ । नव्य॑सा । वचः॑ ।
सृ॒जध्व॑म् । अन॑पऽस्फुराम् ॥
Padapatha Devanagari Nonaccented
आ । सखायः । सबःऽदुघाम् । धेनुम् । अजध्वम् । उप । नव्यसा । वचः ।
सृजध्वम् । अनपऽस्फुराम् ॥
Padapatha Transcription Accented
ā́ ǀ sakhāyaḥ ǀ sabaḥ-dúghām ǀ dhenúm ǀ ajadhvam ǀ úpa ǀ návyasā ǀ vácaḥ ǀ
sṛjádhvam ǀ ánapa-sphurām ǁ
Padapatha Transcription Nonaccented
ā ǀ sakhāyaḥ ǀ sabaḥ-dughām ǀ dhenum ǀ ajadhvam ǀ upa ǀ navyasā ǀ vacaḥ ǀ
sṛjadhvam ǀ anapa-sphurām ǁ
06.048.12 (Mandala. Sukta. Rik)
4.8.03.02 (Ashtaka. Adhyaya. Varga. Rik)
06.04.114 (Mandala. Anuvāka. Rik)
Samhita Devanagari Accented
या शर्धा॑य॒ मारु॑ताय॒ स्वभा॑नवे॒ श्रवोऽमृ॑त्यु॒ धुक्ष॑त ।
या मृ॑ळी॒के म॒रुतां॑ तु॒राणां॒ या सु॒म्नैरे॑व॒याव॑री ॥
Samhita Devanagari Nonaccented
या शर्धाय मारुताय स्वभानवे श्रवोऽमृत्यु धुक्षत ।
या मृळीके मरुतां तुराणां या सुम्नैरेवयावरी ॥
Samhita Transcription Accented
yā́ śárdhāya mā́rutāya svábhānave śrávó’mṛtyu dhúkṣata ǀ
yā́ mṛḷīké marútām turā́ṇām yā́ sumnáirevayā́varī ǁ
Samhita Transcription Nonaccented
yā śardhāya mārutāya svabhānave śravo’mṛtyu dhukṣata ǀ
yā mṛḷīke marutām turāṇām yā sumnairevayāvarī ǁ
Padapatha Devanagari Accented
या । शर्धा॑य । मारु॑ताय । स्वऽभा॑नवे । श्रवः॑ । अमृ॑त्यु । धुक्ष॑त ।
या । मृ॒ळी॒के । म॒रुता॑म् । तु॒राणा॑म् । या । सु॒म्नैः । ए॒व॒ऽयाव॑री ॥
Padapatha Devanagari Nonaccented
या । शर्धाय । मारुताय । स्वऽभानवे । श्रवः । अमृत्यु । धुक्षत ।
या । मृळीके । मरुताम् । तुराणाम् । या । सुम्नैः । एवऽयावरी ॥
Padapatha Transcription Accented
yā́ ǀ śárdhāya ǀ mā́rutāya ǀ svá-bhānave ǀ śrávaḥ ǀ ámṛtyu ǀ dhúkṣata ǀ
yā́ ǀ mṛḷīké ǀ marútām ǀ turā́ṇām ǀ yā́ ǀ sumnáiḥ ǀ eva-yā́varī ǁ
Padapatha Transcription Nonaccented
yā ǀ śardhāya ǀ mārutāya ǀ sva-bhānave ǀ śravaḥ ǀ amṛtyu ǀ dhukṣata ǀ
yā ǀ mṛḷīke ǀ marutām ǀ turāṇām ǀ yā ǀ sumnaiḥ ǀ eva-yāvarī ǁ
06.048.13 (Mandala. Sukta. Rik)
4.8.03.03 (Ashtaka. Adhyaya. Varga. Rik)
06.04.115 (Mandala. Anuvāka. Rik)
Samhita Devanagari Accented
भ॒रद्वा॑जा॒याव॑ धुक्षत द्वि॒ता ।
धे॒नुं च॑ वि॒श्वदो॑हस॒मिषं॑ च वि॒श्वभो॑जसं ॥
Samhita Devanagari Nonaccented
भरद्वाजायाव धुक्षत द्विता ।
धेनुं च विश्वदोहसमिषं च विश्वभोजसं ॥
Samhita Transcription Accented
bharádvājāyā́va dhukṣata dvitā́ ǀ
dhenúm ca viśvádohasamíṣam ca viśvábhojasam ǁ
Samhita Transcription Nonaccented
bharadvājāyāva dhukṣata dvitā ǀ
dhenum ca viśvadohasamiṣam ca viśvabhojasam ǁ
Padapatha Devanagari Accented
भ॒रत्ऽवा॑जाय । अव॑ । धु॒क्ष॒त॒ । द्वि॒ता ।
धे॒नुम् । च॒ । वि॒श्वऽदो॑हसम् । इष॑म् । च॒ । वि॒श्वऽभो॑जसम् ॥
Padapatha Devanagari Nonaccented
भरत्ऽवाजाय । अव । धुक्षत । द्विता ।
धेनुम् । च । विश्वऽदोहसम् । इषम् । च । विश्वऽभोजसम् ॥
Padapatha Transcription Accented
bharát-vājāya ǀ áva ǀ dhukṣata ǀ dvitā́ ǀ
dhenúm ǀ ca ǀ viśvá-dohasam ǀ íṣam ǀ ca ǀ viśvá-bhojasam ǁ
Padapatha Transcription Nonaccented
bharat-vājāya ǀ ava ǀ dhukṣata ǀ dvitā ǀ
dhenum ǀ ca ǀ viśva-dohasam ǀ iṣam ǀ ca ǀ viśva-bhojasam ǁ
06.048.14 (Mandala. Sukta. Rik)
4.8.03.04 (Ashtaka. Adhyaya. Varga. Rik)
06.04.116 (Mandala. Anuvāka. Rik)
Samhita Devanagari Accented
तं व॒ इंद्रं॒ न सु॒क्रतुं॒ वरु॑णमिव मा॒यिनं॑ ।
अ॒र्य॒मणं॒ न मं॒द्रं सृ॒प्रभो॑जसं॒ विष्णुं॒ न स्तु॑ष आ॒दिशे॑ ॥
Samhita Devanagari Nonaccented
तं व इंद्रं न सुक्रतुं वरुणमिव मायिनं ।
अर्यमणं न मंद्रं सृप्रभोजसं विष्णुं न स्तुष आदिशे ॥
Samhita Transcription Accented
tám va índram ná sukrátum váruṇamiva māyínam ǀ
aryamáṇam ná mandrám sṛprábhojasam víṣṇum ná stuṣa ādíśe ǁ
Samhita Transcription Nonaccented
tam va indram na sukratum varuṇamiva māyinam ǀ
aryamaṇam na mandram sṛprabhojasam viṣṇum na stuṣa ādiśe ǁ
Padapatha Devanagari Accented
तम् । वः॒ । इन्द्र॑म् । न । सु॒ऽक्रतु॑म् । वरु॑णम्ऽइव । मा॒यिन॑म् ।
अ॒र्य॒मण॑म् । न । म॒न्द्रम् । सृ॒प्रऽभो॑जसम् । विष्णु॑म् । न । स्तु॒षे॒ । आ॒ऽदिशे॑ ॥
Padapatha Devanagari Nonaccented
तम् । वः । इन्द्रम् । न । सुऽक्रतुम् । वरुणम्ऽइव । मायिनम् ।
अर्यमणम् । न । मन्द्रम् । सृप्रऽभोजसम् । विष्णुम् । न । स्तुषे । आऽदिशे ॥
Padapatha Transcription Accented
tám ǀ vaḥ ǀ índram ǀ ná ǀ su-krátum ǀ váruṇam-iva ǀ māyínam ǀ
aryamáṇam ǀ ná ǀ mandrám ǀ sṛprá-bhojasam ǀ víṣṇum ǀ ná ǀ stuṣe ǀ ā-díśe ǁ
Padapatha Transcription Nonaccented
tam ǀ vaḥ ǀ indram ǀ na ǀ su-kratum ǀ varuṇam-iva ǀ māyinam ǀ
aryamaṇam ǀ na ǀ mandram ǀ sṛpra-bhojasam ǀ viṣṇum ǀ na ǀ stuṣe ǀ ā-diśe ǁ
06.048.15 (Mandala. Sukta. Rik)
4.8.03.05 (Ashtaka. Adhyaya. Varga. Rik)
06.04.117 (Mandala. Anuvāka. Rik)
Samhita Devanagari Accented
त्वे॒षं शर्धो॒ न मारु॑तं तुवि॒ष्वण्य॑न॒र्वाणं॑ पू॒षणं॒ सं यथा॑ श॒ता ।
सं स॒हस्रा॒ कारि॑षच्चर्ष॒णिभ्य॒ आँ आ॒विर्गू॒ळ्हा वसू॑ करत्सु॒वेदा॑ नो॒ वसू॑ करत् ॥
Samhita Devanagari Nonaccented
त्वेषं शर्धो न मारुतं तुविष्वण्यनर्वाणं पूषणं सं यथा शता ।
सं सहस्रा कारिषच्चर्षणिभ्य आँ आविर्गूळ्हा वसू करत्सुवेदा नो वसू करत् ॥
Samhita Transcription Accented
tveṣám śárdho ná mā́rutam tuviṣváṇyanarvā́ṇam pūṣáṇam sám yáthā śatā́ ǀ
sám sahásrā kā́riṣaccarṣaṇíbhya ā́m̐ āvírgūḷhā́ vásū karatsuvédā no vásū karat ǁ
Samhita Transcription Nonaccented
tveṣam śardho na mārutam tuviṣvaṇyanarvāṇam pūṣaṇam sam yathā śatā ǀ
sam sahasrā kāriṣaccarṣaṇibhya ām̐ āvirgūḷhā vasū karatsuvedā no vasū karat ǁ
Padapatha Devanagari Accented
त्वे॒षम् । शर्धः॑ । न । मारु॑तम् । तु॒वि॒ऽस्वनि॑ । अ॒न॒र्वाण॑म् । पू॒षण॑म् । सम् । यथा॑ । श॒ता ।
सम् । स॒हस्रा॑ । कारि॑षत् । च॒र्ष॒णिऽभ्यः॑ । आ । आ॒विः । गू॒ळ्हा । वसु॑ । क॒र॒त् । सु॒ऽवेदा॑ । नः॒ । वसु॑ । क॒र॒त् ॥
Padapatha Devanagari Nonaccented
त्वेषम् । शर्धः । न । मारुतम् । तुविऽस्वनि । अनर्वाणम् । पूषणम् । सम् । यथा । शता ।
सम् । सहस्रा । कारिषत् । चर्षणिऽभ्यः । आ । आविः । गूळ्हा । वसु । करत् । सुऽवेदा । नः । वसु । करत् ॥
Padapatha Transcription Accented
tveṣám ǀ śárdhaḥ ǀ ná ǀ mā́rutam ǀ tuvi-sváni ǀ anarvā́ṇam ǀ pūṣáṇam ǀ sám ǀ yáthā ǀ śatā́ ǀ
sám ǀ sahásrā ǀ kā́riṣat ǀ carṣaṇí-bhyaḥ ǀ ā́ ǀ āvíḥ ǀ gūḷhā́ ǀ vásu ǀ karat ǀ su-védā ǀ naḥ ǀ vásu ǀ karat ǁ
Padapatha Transcription Nonaccented
tveṣam ǀ śardhaḥ ǀ na ǀ mārutam ǀ tuvi-svani ǀ anarvāṇam ǀ pūṣaṇam ǀ sam ǀ yathā ǀ śatā ǀ
sam ǀ sahasrā ǀ kāriṣat ǀ carṣaṇi-bhyaḥ ǀ ā ǀ āviḥ ǀ gūḷhā ǀ vasu ǀ karat ǀ su-vedā ǀ naḥ ǀ vasu ǀ karat ǁ
06.048.16 (Mandala. Sukta. Rik)
4.8.03.06 (Ashtaka. Adhyaya. Varga. Rik)
06.04.118 (Mandala. Anuvāka. Rik)
Samhita Devanagari Accented
आ मा॑ पूष॒न्नुप॑ द्रव॒ शंसि॑षं॒ नु ते॑ अपिक॒र्ण आ॑घृणे ।
अ॒घा अ॒र्यो अरा॑तयः ॥
Samhita Devanagari Nonaccented
आ मा पूषन्नुप द्रव शंसिषं नु ते अपिकर्ण आघृणे ।
अघा अर्यो अरातयः ॥
Samhita Transcription Accented
ā́ mā pūṣannúpa drava śáṃsiṣam nú te apikarṇá āghṛṇe ǀ
aghā́ aryó árātayaḥ ǁ
Samhita Transcription Nonaccented
ā mā pūṣannupa drava śaṃsiṣam nu te apikarṇa āghṛṇe ǀ
aghā aryo arātayaḥ ǁ
Padapatha Devanagari Accented
आ । मा॒ । पू॒ष॒न् । उप॑ । द्र॒व॒ । शंसि॑षम् । नु । ते॒ । अ॒पि॒ऽक॒र्णे । आ॒घृ॒णे॒ ।
अ॒घाः । अ॒र्यः । अरा॑तयः ॥
Padapatha Devanagari Nonaccented
आ । मा । पूषन् । उप । द्रव । शंसिषम् । नु । ते । अपिऽकर्णे । आघृणे ।
अघाः । अर्यः । अरातयः ॥
Padapatha Transcription Accented
ā́ ǀ mā ǀ pūṣan ǀ úpa ǀ drava ǀ śáṃsiṣam ǀ nú ǀ te ǀ api-karṇé ǀ āghṛṇe ǀ
aghā́ḥ ǀ aryáḥ ǀ árātayaḥ ǁ
Padapatha Transcription Nonaccented
ā ǀ mā ǀ pūṣan ǀ upa ǀ drava ǀ śaṃsiṣam ǀ nu ǀ te ǀ api-karṇe ǀ āghṛṇe ǀ
aghāḥ ǀ aryaḥ ǀ arātayaḥ ǁ
06.048.17 (Mandala. Sukta. Rik)
4.8.04.01 (Ashtaka. Adhyaya. Varga. Rik)
06.04.119 (Mandala. Anuvāka. Rik)
Samhita Devanagari Accented
मा का॑कं॒बीर॒मुद्वृ॑हो॒ वन॒स्पति॒मश॑स्ती॒र्वि हि नीन॑शः ।
मोत सूरो॒ अह॑ ए॒वा च॒न ग्री॒वा आ॒दध॑ते॒ वेः ॥
Samhita Devanagari Nonaccented
मा काकंबीरमुद्वृहो वनस्पतिमशस्तीर्वि हि नीनशः ।
मोत सूरो अह एवा चन ग्रीवा आदधते वेः ॥
Samhita Transcription Accented
mā́ kākambī́ramúdvṛho vánaspátimáśastīrví hí nī́naśaḥ ǀ
mótá sū́ro áha evā́ caná grīvā́ ādádhate véḥ ǁ
Samhita Transcription Nonaccented
mā kākambīramudvṛho vanaspatimaśastīrvi hi nīnaśaḥ ǀ
mota sūro aha evā cana grīvā ādadhate veḥ ǁ
Padapatha Devanagari Accented
मा । का॒क॒म्बीर॑म् । उत् । वृ॒हः॒ । वन॒स्पति॑म् । अश॑स्तीः । वि । हि । नीन॑शः ।
मा । उ॒त । सूरः॑ । अह॒रिति॑ । ए॒व । च॒न । ग्री॒वाः । आ॒ऽदध॑ते । वेरिति॒ वेः ॥
Padapatha Devanagari Nonaccented
मा । काकम्बीरम् । उत् । वृहः । वनस्पतिम् । अशस्तीः । वि । हि । नीनशः ।
मा । उत । सूरः । अहरिति । एव । चन । ग्रीवाः । आऽदधते । वेरिति वेः ॥
Padapatha Transcription Accented
mā́ ǀ kākambī́ram ǀ út ǀ vṛhaḥ ǀ vánaspátim ǀ áśastīḥ ǀ ví ǀ hí ǀ nī́naśaḥ ǀ
mā́ ǀ utá ǀ sū́raḥ ǀ áharíti ǀ evá ǀ caná ǀ grīvā́ḥ ǀ ā-dádhate ǀ véríti véḥ ǁ
Padapatha Transcription Nonaccented
mā ǀ kākambīram ǀ ut ǀ vṛhaḥ ǀ vanaspatim ǀ aśastīḥ ǀ vi ǀ hi ǀ nīnaśaḥ ǀ
mā ǀ uta ǀ sūraḥ ǀ ahariti ǀ eva ǀ cana ǀ grīvāḥ ǀ ā-dadhate ǀ veriti veḥ ǁ
06.048.18 (Mandala. Sukta. Rik)
4.8.04.02 (Ashtaka. Adhyaya. Varga. Rik)
06.04.120 (Mandala. Anuvāka. Rik)
Samhita Devanagari Accented
दृते॑रिव तेऽवृ॒कम॑स्तु स॒ख्यं ।
अच्छि॑द्रस्य दध॒न्वतः॒ सुपू॑र्णस्य दध॒न्वतः॑ ॥
Samhita Devanagari Nonaccented
दृतेरिव तेऽवृकमस्तु सख्यं ।
अच्छिद्रस्य दधन्वतः सुपूर्णस्य दधन्वतः ॥
Samhita Transcription Accented
dṛ́teriva te’vṛkámastu sakhyám ǀ
ácchidrasya dadhanvátaḥ súpūrṇasya dadhanvátaḥ ǁ
Samhita Transcription Nonaccented
dṛteriva te’vṛkamastu sakhyam ǀ
acchidrasya dadhanvataḥ supūrṇasya dadhanvataḥ ǁ
Padapatha Devanagari Accented
दृतेः॑ऽइव । ते॒ । अ॒वृ॒कम् । अ॒स्तु॒ । स॒ख्यम् ।
अच्छि॑द्रस्य । द॒ध॒न्ऽवतः॑ । सुऽपू॑र्णस्य । द॒ध॒न्ऽवतः॑ ॥
Padapatha Devanagari Nonaccented
दृतेःऽइव । ते । अवृकम् । अस्तु । सख्यम् ।
अच्छिद्रस्य । दधन्ऽवतः । सुऽपूर्णस्य । दधन्ऽवतः ॥
Padapatha Transcription Accented
dṛ́teḥ-iva ǀ te ǀ avṛkám ǀ astu ǀ sakhyám ǀ
ácchidrasya ǀ dadhan-vátaḥ ǀ sú-pūrṇasya ǀ dadhan-vátaḥ ǁ
Padapatha Transcription Nonaccented
dṛteḥ-iva ǀ te ǀ avṛkam ǀ astu ǀ sakhyam ǀ
acchidrasya ǀ dadhan-vataḥ ǀ su-pūrṇasya ǀ dadhan-vataḥ ǁ
06.048.19 (Mandala. Sukta. Rik)
4.8.04.03 (Ashtaka. Adhyaya. Varga. Rik)
06.04.121 (Mandala. Anuvāka. Rik)
Samhita Devanagari Accented
प॒रो हि मर्त्यै॒रसि॑ स॒मो दे॒वैरु॒त श्रि॒या ।
अ॒भि ख्यः॑ पूष॒न्पृत॑नासु न॒स्त्वमवा॑ नू॒नं यथा॑ पु॒रा ॥
Samhita Devanagari Nonaccented
परो हि मर्त्यैरसि समो देवैरुत श्रिया ।
अभि ख्यः पूषन्पृतनासु नस्त्वमवा नूनं यथा पुरा ॥
Samhita Transcription Accented
paró hí mártyairási samó deváirutá śriyā́ ǀ
abhí khyaḥ pūṣanpṛ́tanāsu nastvámávā nūnám yáthā purā́ ǁ
Samhita Transcription Nonaccented
paro hi martyairasi samo devairuta śriyā ǀ
abhi khyaḥ pūṣanpṛtanāsu nastvamavā nūnam yathā purā ǁ
Padapatha Devanagari Accented
प॒रः । हि । मर्त्यैः॑ । असि॑ । स॒मः । दे॒वैः । उ॒त । श्रि॒या ।
अ॒भि । ख्यः॒ । पू॒ष॒न् । पृत॑नासु । नः॒ । त्वम् । अव॑ । नू॒नम् । यथा॑ । पु॒रा ॥
Padapatha Devanagari Nonaccented
परः । हि । मर्त्यैः । असि । समः । देवैः । उत । श्रिया ।
अभि । ख्यः । पूषन् । पृतनासु । नः । त्वम् । अव । नूनम् । यथा । पुरा ॥
Padapatha Transcription Accented
paráḥ ǀ hí ǀ mártyaiḥ ǀ ási ǀ samáḥ ǀ deváiḥ ǀ utá ǀ śriyā́ ǀ
abhí ǀ khyaḥ ǀ pūṣan ǀ pṛ́tanāsu ǀ naḥ ǀ tvám ǀ áva ǀ nūnám ǀ yáthā ǀ purā́ ǁ
Padapatha Transcription Nonaccented
paraḥ ǀ hi ǀ martyaiḥ ǀ asi ǀ samaḥ ǀ devaiḥ ǀ uta ǀ śriyā ǀ
abhi ǀ khyaḥ ǀ pūṣan ǀ pṛtanāsu ǀ naḥ ǀ tvam ǀ ava ǀ nūnam ǀ yathā ǀ purā ǁ
06.048.20 (Mandala. Sukta. Rik)
4.8.04.04 (Ashtaka. Adhyaya. Varga. Rik)
06.04.122 (Mandala. Anuvāka. Rik)
Samhita Devanagari Accented
वा॒मी वा॒मस्य॑ धूतयः॒ प्रणी॑तिरस्तु सू॒नृता॑ ।
दे॒वस्य॑ वा मरुतो॒ मर्त्य॑स्य वेजा॒नस्य॑ प्रयज्यवः ॥
Samhita Devanagari Nonaccented
वामी वामस्य धूतयः प्रणीतिरस्तु सूनृता ।
देवस्य वा मरुतो मर्त्यस्य वेजानस्य प्रयज्यवः ॥
Samhita Transcription Accented
vāmī́ vāmásya dhūtayaḥ práṇītirastu sūnṛ́tā ǀ
devásya vā maruto mártyasya vejānásya prayajyavaḥ ǁ
Samhita Transcription Nonaccented
vāmī vāmasya dhūtayaḥ praṇītirastu sūnṛtā ǀ
devasya vā maruto martyasya vejānasya prayajyavaḥ ǁ
Padapatha Devanagari Accented
वा॒मी । वा॒मस्य॑ । धू॒त॒यः॒ । प्रऽनी॑तिः । अ॒स्तु॒ । सू॒नृता॑ ।
दे॒वस्य॑ । वा॒ । म॒रु॒तः॒ । मर्त्य॑स्य । वा॒ । ई॒जा॒नस्य॑ । प्र॒ऽय॒ज्य॒वः॒ ॥
Padapatha Devanagari Nonaccented
वामी । वामस्य । धूतयः । प्रऽनीतिः । अस्तु । सूनृता ।
देवस्य । वा । मरुतः । मर्त्यस्य । वा । ईजानस्य । प्रऽयज्यवः ॥
Padapatha Transcription Accented
vāmī́ ǀ vāmásya ǀ dhūtayaḥ ǀ prá-nītiḥ ǀ astu ǀ sūnṛ́tā ǀ
devásya ǀ vā ǀ marutaḥ ǀ mártyasya ǀ vā ǀ ījānásya ǀ pra-yajyavaḥ ǁ
Padapatha Transcription Nonaccented
vāmī ǀ vāmasya ǀ dhūtayaḥ ǀ pra-nītiḥ ǀ astu ǀ sūnṛtā ǀ
devasya ǀ vā ǀ marutaḥ ǀ martyasya ǀ vā ǀ ījānasya ǀ pra-yajyavaḥ ǁ
06.048.21 (Mandala. Sukta. Rik)
4.8.04.05 (Ashtaka. Adhyaya. Varga. Rik)
06.04.123 (Mandala. Anuvāka. Rik)
Samhita Devanagari Accented
स॒द्यश्चि॒द्यस्य॑ चर्कृ॒तिः परि॒ द्यां दे॒वो नैति॒ सूर्यः॑ ।
त्वे॒षं शवो॑ दधिरे॒ नाम॑ य॒ज्ञियं॑ म॒रुतो॑ वृत्र॒हं शवो॒ ज्येष्ठं॑ वृत्र॒हं शवः॑ ॥
Samhita Devanagari Nonaccented
सद्यश्चिद्यस्य चर्कृतिः परि द्यां देवो नैति सूर्यः ।
त्वेषं शवो दधिरे नाम यज्ञियं मरुतो वृत्रहं शवो ज्येष्ठं वृत्रहं शवः ॥
Samhita Transcription Accented
sadyáścidyásya carkṛtíḥ pári dyā́m devó náiti sū́ryaḥ ǀ
tveṣám śávo dadhire nā́ma yajñíyam marúto vṛtrahám śávo jyéṣṭham vṛtrahám śávaḥ ǁ
Samhita Transcription Nonaccented
sadyaścidyasya carkṛtiḥ pari dyām devo naiti sūryaḥ ǀ
tveṣam śavo dadhire nāma yajñiyam maruto vṛtraham śavo jyeṣṭham vṛtraham śavaḥ ǁ
Padapatha Devanagari Accented
स॒द्यः । चि॒त् । यस्य॑ । च॒र्कृ॒तिः । परि॑ । द्याम् । दे॒वः । न । एति॑ । सूर्यः॑ ।
त्वे॒षम् । शवः॑ । द॒धि॒रे॒ । नाम॑ । य॒ज्ञिय॑म् । म॒रुतः॑ । वृत्र॒ऽहम् । शवः॑ । ज्येष्ठ॑म् । वृत्र॒ऽहम् । शवः॑ ॥
Padapatha Devanagari Nonaccented
सद्यः । चित् । यस्य । चर्कृतिः । परि । द्याम् । देवः । न । एति । सूर्यः ।
त्वेषम् । शवः । दधिरे । नाम । यज्ञियम् । मरुतः । वृत्रऽहम् । शवः । ज्येष्ठम् । वृत्रऽहम् । शवः ॥
Padapatha Transcription Accented
sadyáḥ ǀ cit ǀ yásya ǀ carkṛtíḥ ǀ pári ǀ dyā́m ǀ deváḥ ǀ ná ǀ éti ǀ sū́ryaḥ ǀ
tveṣám ǀ śávaḥ ǀ dadhire ǀ nā́ma ǀ yajñíyam ǀ marútaḥ ǀ vṛ́tra-hám ǀ śávaḥ ǀ jyéṣṭham ǀ vṛ́tra-hám ǀ śávaḥ ǁ
Padapatha Transcription Nonaccented
sadyaḥ ǀ cit ǀ yasya ǀ carkṛtiḥ ǀ pari ǀ dyām ǀ devaḥ ǀ na ǀ eti ǀ sūryaḥ ǀ
tveṣam ǀ śavaḥ ǀ dadhire ǀ nāma ǀ yajñiyam ǀ marutaḥ ǀ vṛtra-ham ǀ śavaḥ ǀ jyeṣṭham ǀ vṛtra-ham ǀ śavaḥ ǁ
06.048.22 (Mandala. Sukta. Rik)
4.8.04.06 (Ashtaka. Adhyaya. Varga. Rik)
06.04.124 (Mandala. Anuvāka. Rik)
Samhita Devanagari Accented
स॒कृद्ध॒ द्यौर॑जायत स॒कृद्भूमि॑रजायत ।
पृश्न्या॑ दु॒ग्धं स॒कृत्पय॒स्तद॒न्यो नानु॑ जायते ॥
Samhita Devanagari Nonaccented
सकृद्ध द्यौरजायत सकृद्भूमिरजायत ।
पृश्न्या दुग्धं सकृत्पयस्तदन्यो नानु जायते ॥
Samhita Transcription Accented
sakṛ́ddha dyáurajāyata sakṛ́dbhū́mirajāyata ǀ
pṛ́śnyā dugdhám sakṛ́tpáyastádanyó nā́nu jāyate ǁ
Samhita Transcription Nonaccented
sakṛddha dyaurajāyata sakṛdbhūmirajāyata ǀ
pṛśnyā dugdham sakṛtpayastadanyo nānu jāyate ǁ
Padapatha Devanagari Accented
स॒कृत् । ह॒ । द्यौः । अ॒जा॒य॒त॒ । स॒कृत् । भूमिः॑ । अ॒जा॒य॒त॒ ।
पृश्न्याः॑ । दु॒ग्धम् । स॒कृत् । पयः॑ । तत् । अ॒न्यः । न । अनु॑ । जा॒य॒ते॒ ॥
Padapatha Devanagari Nonaccented
सकृत् । ह । द्यौः । अजायत । सकृत् । भूमिः । अजायत ।
पृश्न्याः । दुग्धम् । सकृत् । पयः । तत् । अन्यः । न । अनु । जायते ॥
Padapatha Transcription Accented
sakṛ́t ǀ ha ǀ dyáuḥ ǀ ajāyata ǀ sakṛ́t ǀ bhū́miḥ ǀ ajāyata ǀ
pṛ́śnyāḥ ǀ dugdhám ǀ sakṛ́t ǀ páyaḥ ǀ tát ǀ anyáḥ ǀ ná ǀ ánu ǀ jāyate ǁ
Padapatha Transcription Nonaccented
sakṛt ǀ ha ǀ dyauḥ ǀ ajāyata ǀ sakṛt ǀ bhūmiḥ ǀ ajāyata ǀ
pṛśnyāḥ ǀ dugdham ǀ sakṛt ǀ payaḥ ǀ tat ǀ anyaḥ ǀ na ǀ anu ǀ jāyate ǁ