|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 51
|
1. Info |
| To: | 1: varuṇa, viśvedevās; 2-16: viśvedevās |
|
| From: | ṛjiśvan bhāradvāja | |
| Metres: | 1st set of styles: nicṛttriṣṭup (1-3, 5, 7, 10-12); svarāṭpaṅkti (4, 6, 9); nicṛduṣṇik (13-15); triṣṭup (8); nicṛdanuṣṭup (16) 2nd set of styles: triṣṭubh (1-12); uṣṇih (13-15); anuṣṭubh (16) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.051.01 (Mandala. Sukta. Rik)
4.8.11.01 (Ashtaka. Adhyaya. Varga. Rik)
06.05.016 (Mandala. Anuvāka. Rik)
Samhita Devanagari Accented
उदु॒ त्यच्चक्षु॒र्महि॑ मि॒त्रयो॒राँ एति॑ प्रि॒यं वरु॑णयो॒रद॑ब्धं ।
ऋ॒तस्य॒ शुचि॑ दर्श॒तमनी॑कं रु॒क्मो न दि॒व उदि॑ता॒ व्य॑द्यौत् ॥
Samhita Devanagari Nonaccented
उदु त्यच्चक्षुर्महि मित्रयोराँ एति प्रियं वरुणयोरदब्धं ।
ऋतस्य शुचि दर्शतमनीकं रुक्मो न दिव उदिता व्यद्यौत् ॥
Samhita Transcription Accented
údu tyáccákṣurmáhi mitráyorā́m̐ éti priyám váruṇayorádabdham ǀ
ṛtásya śúci darśatámánīkam rukmó ná divá úditā vyádyaut ǁ
Samhita Transcription Nonaccented
udu tyaccakṣurmahi mitrayorām̐ eti priyam varuṇayoradabdham ǀ
ṛtasya śuci darśatamanīkam rukmo na diva uditā vyadyaut ǁ
Padapatha Devanagari Accented
उत् । ऊं॒ इति॑ । त्यत् । चक्षुः॑ । महि॑ । मि॒त्रयोः॑ । आ । एति॑ । प्रि॒यम् । वरु॑णयोः । अद॑ब्धम् ।
ऋ॒तस्य॑ । शुचि॑ । द॒र्श॒तम् । अनी॑कम् । रु॒क्मः । न । दि॒वः । उत्ऽइ॑ता । वि । अ॒द्यौ॒त् ॥
Padapatha Devanagari Nonaccented
उत् । ऊं इति । त्यत् । चक्षुः । महि । मित्रयोः । आ । एति । प्रियम् । वरुणयोः । अदब्धम् ।
ऋतस्य । शुचि । दर्शतम् । अनीकम् । रुक्मः । न । दिवः । उत्ऽइता । वि । अद्यौत् ॥
Padapatha Transcription Accented
út ǀ ūṃ íti ǀ tyát ǀ cákṣuḥ ǀ máhi ǀ mitráyoḥ ǀ ā́ ǀ éti ǀ priyám ǀ váruṇayoḥ ǀ ádabdham ǀ
ṛtásya ǀ śúci ǀ darśatám ǀ ánīkam ǀ rukmáḥ ǀ ná ǀ diváḥ ǀ út-itā ǀ ví ǀ adyaut ǁ
Padapatha Transcription Nonaccented
ut ǀ ūṃ iti ǀ tyat ǀ cakṣuḥ ǀ mahi ǀ mitrayoḥ ǀ ā ǀ eti ǀ priyam ǀ varuṇayoḥ ǀ adabdham ǀ
ṛtasya ǀ śuci ǀ darśatam ǀ anīkam ǀ rukmaḥ ǀ na ǀ divaḥ ǀ ut-itā ǀ vi ǀ adyaut ǁ
06.051.02 (Mandala. Sukta. Rik)
4.8.11.02 (Ashtaka. Adhyaya. Varga. Rik)
06.05.017 (Mandala. Anuvāka. Rik)
Samhita Devanagari Accented
वेद॒ यस्त्रीणि॑ वि॒दथा॑न्येषां दे॒वानां॒ जन्म॑ सनु॒तरा च॒ विप्रः॑ ।
ऋ॒जु मर्ते॑षु वृजि॒ना च॒ पश्य॑न्न॒भि च॑ष्टे॒ सूरो॑ अ॒र्य एवा॑न् ॥
Samhita Devanagari Nonaccented
वेद यस्त्रीणि विदथान्येषां देवानां जन्म सनुतरा च विप्रः ।
ऋजु मर्तेषु वृजिना च पश्यन्नभि चष्टे सूरो अर्य एवान् ॥
Samhita Transcription Accented
véda yástrī́ṇi vidáthānyeṣām devā́nām jánma sanutárā́ ca vípraḥ ǀ
ṛjú márteṣu vṛjinā́ ca páśyannabhí caṣṭe sū́ro aryá évān ǁ
Samhita Transcription Nonaccented
veda yastrīṇi vidathānyeṣām devānām janma sanutarā ca vipraḥ ǀ
ṛju marteṣu vṛjinā ca paśyannabhi caṣṭe sūro arya evān ǁ
Padapatha Devanagari Accented
वेद॑ । यः । त्रीणि॑ । वि॒दथा॑नि । ए॒षा॒म् । दे॒वाना॑म् । जन्म॑ । स॒नु॒तः । आ । च॒ । विप्रः॑ ।
ऋ॒जु । मर्ते॑षु । वृ॒जि॒ना । च॒ । पश्य॑न् । अ॒भि । च॒ष्टे॒ । सूरः॑ । अ॒र्यः । एवा॑न् ॥
Padapatha Devanagari Nonaccented
वेद । यः । त्रीणि । विदथानि । एषाम् । देवानाम् । जन्म । सनुतः । आ । च । विप्रः ।
ऋजु । मर्तेषु । वृजिना । च । पश्यन् । अभि । चष्टे । सूरः । अर्यः । एवान् ॥
Padapatha Transcription Accented
véda ǀ yáḥ ǀ trī́ṇi ǀ vidáthāni ǀ eṣām ǀ devā́nām ǀ jánma ǀ sanutáḥ ǀ ā́ ǀ ca ǀ vípraḥ ǀ
ṛjú ǀ márteṣu ǀ vṛjinā́ ǀ ca ǀ páśyan ǀ abhí ǀ caṣṭe ǀ sū́raḥ ǀ aryáḥ ǀ évān ǁ
Padapatha Transcription Nonaccented
veda ǀ yaḥ ǀ trīṇi ǀ vidathāni ǀ eṣām ǀ devānām ǀ janma ǀ sanutaḥ ǀ ā ǀ ca ǀ vipraḥ ǀ
ṛju ǀ marteṣu ǀ vṛjinā ǀ ca ǀ paśyan ǀ abhi ǀ caṣṭe ǀ sūraḥ ǀ aryaḥ ǀ evān ǁ
06.051.03 (Mandala. Sukta. Rik)
4.8.11.03 (Ashtaka. Adhyaya. Varga. Rik)
06.05.018 (Mandala. Anuvāka. Rik)
Samhita Devanagari Accented
स्तु॒ष उ॑ वो म॒ह ऋ॒तस्य॑ गो॒पानदि॑तिं मि॒त्रं वरु॑णं सुजा॒तान् ।
अ॒र्य॒मणं॒ भग॒मद॑ब्धधीती॒नच्छा॑ वोचे सध॒न्यः॑ पाव॒कान् ॥
Samhita Devanagari Nonaccented
स्तुष उ वो मह ऋतस्य गोपानदितिं मित्रं वरुणं सुजातान् ।
अर्यमणं भगमदब्धधीतीनच्छा वोचे सधन्यः पावकान् ॥
Samhita Transcription Accented
stuṣá u vo mahá ṛtásya gopā́náditim mitrám váruṇam sujātā́n ǀ
aryamáṇam bhágamádabdhadhītīnácchā voce sadhanyáḥ pāvakā́n ǁ
Samhita Transcription Nonaccented
stuṣa u vo maha ṛtasya gopānaditim mitram varuṇam sujātān ǀ
aryamaṇam bhagamadabdhadhītīnacchā voce sadhanyaḥ pāvakān ǁ
Padapatha Devanagari Accented
स्तु॒षे । ऊं॒ इति॑ । वः॒ । म॒हः । ऋ॒तस्य॑ । गो॒पान् । अदि॑तिम् । मि॒त्रम् । वरु॑णम् । सु॒ऽजा॒तान् ।
अ॒र्य॒मण॑म् । भग॑म् । अद॑ब्धऽधीतीन् । अच्छ॑ । वो॒चे॒ । स॒ऽध॒न्यः॑ । पा॒व॒कान् ॥
Padapatha Devanagari Nonaccented
स्तुषे । ऊं इति । वः । महः । ऋतस्य । गोपान् । अदितिम् । मित्रम् । वरुणम् । सुऽजातान् ।
अर्यमणम् । भगम् । अदब्धऽधीतीन् । अच्छ । वोचे । सऽधन्यः । पावकान् ॥
Padapatha Transcription Accented
stuṣé ǀ ūṃ íti ǀ vaḥ ǀ maháḥ ǀ ṛtásya ǀ gopā́n ǀ áditim ǀ mitrám ǀ váruṇam ǀ su-jātā́n ǀ
aryamáṇam ǀ bhágam ǀ ádabdha-dhītīn ǀ áccha ǀ voce ǀ sa-dhanyáḥ ǀ pāvakā́n ǁ
Padapatha Transcription Nonaccented
stuṣe ǀ ūṃ iti ǀ vaḥ ǀ mahaḥ ǀ ṛtasya ǀ gopān ǀ aditim ǀ mitram ǀ varuṇam ǀ su-jātān ǀ
aryamaṇam ǀ bhagam ǀ adabdha-dhītīn ǀ accha ǀ voce ǀ sa-dhanyaḥ ǀ pāvakān ǁ
06.051.04 (Mandala. Sukta. Rik)
4.8.11.04 (Ashtaka. Adhyaya. Varga. Rik)
06.05.019 (Mandala. Anuvāka. Rik)
Samhita Devanagari Accented
रि॒शाद॑सः॒ सत्प॑तीँ॒रद॑ब्धान्म॒हो राज्ञः॑ सुवस॒नस्य॑ दा॒तॄन् ।
यूनः॑ सुक्ष॒त्रान्क्षय॑तो दि॒वो नॄना॑दि॒त्यान्या॒म्यदि॑तिं दुवो॒यु ॥
Samhita Devanagari Nonaccented
रिशादसः सत्पतीँरदब्धान्महो राज्ञः सुवसनस्य दातॄन् ।
यूनः सुक्षत्रान्क्षयतो दिवो नॄनादित्यान्याम्यदितिं दुवोयु ॥
Samhita Transcription Accented
riśā́dasaḥ sátpatīm̐rádabdhānmahó rā́jñaḥ suvasanásya dātṝ́n ǀ
yū́naḥ sukṣatrā́nkṣáyato divó nṝ́nādityā́nyāmyáditim duvoyú ǁ
Samhita Transcription Nonaccented
riśādasaḥ satpatīm̐radabdhānmaho rājñaḥ suvasanasya dātṝn ǀ
yūnaḥ sukṣatrānkṣayato divo nṝnādityānyāmyaditim duvoyu ǁ
Padapatha Devanagari Accented
रि॒शाद॑सः । सत्ऽप॑तीन् । अद॑ब्धान् । म॒हः । राज्ञः॑ । सु॒ऽव॒स॒नस्य॑ । दा॒तॄन् ।
यूनः॑ । सु॒ऽक्ष॒त्रान् । क्षय॑तः । दि॒वः । नॄन् । आ॒दि॒त्यान् । या॒मि॒ । अदि॑तिम् । दु॒वः॒ऽयु ॥
Padapatha Devanagari Nonaccented
रिशादसः । सत्ऽपतीन् । अदब्धान् । महः । राज्ञः । सुऽवसनस्य । दातॄन् ।
यूनः । सुऽक्षत्रान् । क्षयतः । दिवः । नॄन् । आदित्यान् । यामि । अदितिम् । दुवःऽयु ॥
Padapatha Transcription Accented
riśā́dasaḥ ǀ sát-patīn ǀ ádabdhān ǀ maháḥ ǀ rā́jñaḥ ǀ su-vasanásya ǀ dātṝ́n ǀ
yū́naḥ ǀ su-kṣatrā́n ǀ kṣáyataḥ ǀ diváḥ ǀ nṝ́n ǀ ādityā́n ǀ yāmi ǀ áditim ǀ duvaḥ-yú ǁ
Padapatha Transcription Nonaccented
riśādasaḥ ǀ sat-patīn ǀ adabdhān ǀ mahaḥ ǀ rājñaḥ ǀ su-vasanasya ǀ dātṝn ǀ
yūnaḥ ǀ su-kṣatrān ǀ kṣayataḥ ǀ divaḥ ǀ nṝn ǀ ādityān ǀ yāmi ǀ aditim ǀ duvaḥ-yu ǁ
06.051.05 (Mandala. Sukta. Rik)
4.8.11.05 (Ashtaka. Adhyaya. Varga. Rik)
06.05.020 (Mandala. Anuvāka. Rik)
Samhita Devanagari Accented
द्यौ॒३॒॑ष्पितः॒ पृथि॑वि॒ मात॒रध्रु॒गग्ने॑ भ्रातर्वसवो मृ॒ळता॑ नः ।
विश्व॑ आदित्या अदिते स॒जोषा॑ अ॒स्मभ्यं॒ शर्म॑ बहु॒लं वि यं॑त ॥
Samhita Devanagari Nonaccented
द्यौष्पितः पृथिवि मातरध्रुगग्ने भ्रातर्वसवो मृळता नः ।
विश्व आदित्या अदिते सजोषा अस्मभ्यं शर्म बहुलं वि यंत ॥
Samhita Transcription Accented
dyaúṣpítaḥ pṛ́thivi mā́tarádhrugágne bhrātarvasavo mṛḷátā naḥ ǀ
víśva ādityā adite sajóṣā asmábhyam śárma bahulám ví yanta ǁ
Samhita Transcription Nonaccented
dyauṣpitaḥ pṛthivi mātaradhrugagne bhrātarvasavo mṛḷatā naḥ ǀ
viśva ādityā adite sajoṣā asmabhyam śarma bahulam vi yanta ǁ
Padapatha Devanagari Accented
द्यौः॑ । पित॒रिति॑ । पृथि॑वि । मातः॑ । अध्रु॑क् । अग्ने॑ । भ्रा॒तः॒ । व॒स॒वः॒ । मृ॒ळत॑ । नः॒ ।
विश्वे॑ । आ॒दि॒त्याः॒ । अ॒दि॒ते॒ । स॒ऽजोषाः॑ । अ॒स्मभ्य॑म् । शर्म॑ । ब॒हु॒लम् । वि । य॒न्त॒ ॥
Padapatha Devanagari Nonaccented
द्यौः । पितरिति । पृथिवि । मातः । अध्रुक् । अग्ने । भ्रातः । वसवः । मृळत । नः ।
विश्वे । आदित्याः । अदिते । सऽजोषाः । अस्मभ्यम् । शर्म । बहुलम् । वि । यन्त ॥
Padapatha Transcription Accented
dyáuḥ ǀ pítaríti ǀ pṛ́thivi ǀ mā́taḥ ǀ ádhruk ǀ ágne ǀ bhrātaḥ ǀ vasavaḥ ǀ mṛḷáta ǀ naḥ ǀ
víśve ǀ ādityāḥ ǀ adite ǀ sa-jóṣāḥ ǀ asmábhyam ǀ śárma ǀ bahulám ǀ ví ǀ yanta ǁ
Padapatha Transcription Nonaccented
dyauḥ ǀ pitariti ǀ pṛthivi ǀ mātaḥ ǀ adhruk ǀ agne ǀ bhrātaḥ ǀ vasavaḥ ǀ mṛḷata ǀ naḥ ǀ
viśve ǀ ādityāḥ ǀ adite ǀ sa-joṣāḥ ǀ asmabhyam ǀ śarma ǀ bahulam ǀ vi ǀ yanta ǁ
06.051.06 (Mandala. Sukta. Rik)
4.8.12.01 (Ashtaka. Adhyaya. Varga. Rik)
06.05.021 (Mandala. Anuvāka. Rik)
Samhita Devanagari Accented
मा नो॒ वृका॑य वृ॒क्ये॑ समस्मा अघाय॒ते री॑रधता यजत्राः ।
यू॒यं हि ष्ठा र॒थ्यो॑ नस्त॒नूनां॑ यू॒यं दक्ष॑स्य॒ वच॑सो बभू॒व ॥
Samhita Devanagari Nonaccented
मा नो वृकाय वृक्ये समस्मा अघायते रीरधता यजत्राः ।
यूयं हि ष्ठा रथ्यो नस्तनूनां यूयं दक्षस्य वचसो बभूव ॥
Samhita Transcription Accented
mā́ no vṛ́kāya vṛkyé samasmā aghāyaté rīradhatā yajatrāḥ ǀ
yūyám hí ṣṭhā́ rathyó nastanū́nām yūyám dákṣasya vácaso babhūvá ǁ
Samhita Transcription Nonaccented
mā no vṛkāya vṛkye samasmā aghāyate rīradhatā yajatrāḥ ǀ
yūyam hi ṣṭhā rathyo nastanūnām yūyam dakṣasya vacaso babhūva ǁ
Padapatha Devanagari Accented
मा । नः॒ । वृका॑य । वृ॒क्ये॑ । स॒म॒स्मै॒ । अ॒घ॒ऽय॒ते । री॒र॒ध॒त॒ । य॒ज॒त्राः॒ ।
यू॒यम् । हि । स्थ । र॒थ्यः॑ । नः॒ । त॒नूना॑म् । यू॒यम् । दक्ष॑स्य । वच॑सः । ब॒भू॒व ॥
Padapatha Devanagari Nonaccented
मा । नः । वृकाय । वृक्ये । समस्मै । अघऽयते । रीरधत । यजत्राः ।
यूयम् । हि । स्थ । रथ्यः । नः । तनूनाम् । यूयम् । दक्षस्य । वचसः । बभूव ॥
Padapatha Transcription Accented
mā́ ǀ naḥ ǀ vṛ́kāya ǀ vṛkyé ǀ samasmai ǀ agha-yaté ǀ rīradhata ǀ yajatrāḥ ǀ
yūyám ǀ hí ǀ sthá ǀ rathyáḥ ǀ naḥ ǀ tanū́nām ǀ yūyám ǀ dákṣasya ǀ vácasaḥ ǀ babhūvá ǁ
Padapatha Transcription Nonaccented
mā ǀ naḥ ǀ vṛkāya ǀ vṛkye ǀ samasmai ǀ agha-yate ǀ rīradhata ǀ yajatrāḥ ǀ
yūyam ǀ hi ǀ stha ǀ rathyaḥ ǀ naḥ ǀ tanūnām ǀ yūyam ǀ dakṣasya ǀ vacasaḥ ǀ babhūva ǁ
06.051.07 (Mandala. Sukta. Rik)
4.8.12.02 (Ashtaka. Adhyaya. Varga. Rik)
06.05.022 (Mandala. Anuvāka. Rik)
Samhita Devanagari Accented
मा व॒ एनो॑ अ॒न्यकृ॑तं भुजेम॒ मा तत्क॑र्म वसवो॒ यच्चय॑ध्वे ।
विश्व॑स्य॒ हि क्षय॑थ विश्वदेवाः स्व॒यं रि॒पुस्त॒न्वं॑ रीरिषीष्ट ॥
Samhita Devanagari Nonaccented
मा व एनो अन्यकृतं भुजेम मा तत्कर्म वसवो यच्चयध्वे ।
विश्वस्य हि क्षयथ विश्वदेवाः स्वयं रिपुस्तन्वं रीरिषीष्ट ॥
Samhita Transcription Accented
mā́ va éno anyákṛtam bhujema mā́ tátkarma vasavo yáccáyadhve ǀ
víśvasya hí kṣáyatha viśvadevāḥ svayám ripústanvám rīriṣīṣṭa ǁ
Samhita Transcription Nonaccented
mā va eno anyakṛtam bhujema mā tatkarma vasavo yaccayadhve ǀ
viśvasya hi kṣayatha viśvadevāḥ svayam ripustanvam rīriṣīṣṭa ǁ
Padapatha Devanagari Accented
मा । वः॒ । एनः॑ । अ॒न्यऽकृ॑तम् । भु॒जे॒म॒ । मा । तत् । क॒र्म॒ । व॒स॒वः॒ । यत् । चय॑ध्वे ।
विश्व॑स्य । हि । क्षय॑थ । वि॒श्व॒ऽदे॒वाः॒ । स्व॒यम् । रि॒पुः । त॒न्व॑म् । रि॒रि॒षी॒ष्ट॒ ॥
Padapatha Devanagari Nonaccented
मा । वः । एनः । अन्यऽकृतम् । भुजेम । मा । तत् । कर्म । वसवः । यत् । चयध्वे ।
विश्वस्य । हि । क्षयथ । विश्वऽदेवाः । स्वयम् । रिपुः । तन्वम् । रिरिषीष्ट ॥
Padapatha Transcription Accented
mā́ ǀ vaḥ ǀ énaḥ ǀ anyá-kṛtam ǀ bhujema ǀ mā́ ǀ tát ǀ karma ǀ vasavaḥ ǀ yát ǀ cáyadhve ǀ
víśvasya ǀ hí ǀ kṣáyatha ǀ viśva-devāḥ ǀ svayám ǀ ripúḥ ǀ tanvám ǀ ririṣīṣṭa ǁ
Padapatha Transcription Nonaccented
mā ǀ vaḥ ǀ enaḥ ǀ anya-kṛtam ǀ bhujema ǀ mā ǀ tat ǀ karma ǀ vasavaḥ ǀ yat ǀ cayadhve ǀ
viśvasya ǀ hi ǀ kṣayatha ǀ viśva-devāḥ ǀ svayam ǀ ripuḥ ǀ tanvam ǀ ririṣīṣṭa ǁ
06.051.08 (Mandala. Sukta. Rik)
4.8.12.03 (Ashtaka. Adhyaya. Varga. Rik)
06.05.023 (Mandala. Anuvāka. Rik)
Samhita Devanagari Accented
नम॒ इदु॒ग्रं नम॒ आ वि॑वासे॒ नमो॑ दाधार पृथि॒वीमु॒त द्यां ।
नमो॑ दे॒वेभ्यो॒ नम॑ ईश एषां कृ॒तं चि॒देनो॒ नम॒सा वि॑वासे ॥
Samhita Devanagari Nonaccented
नम इदुग्रं नम आ विवासे नमो दाधार पृथिवीमुत द्यां ।
नमो देवेभ्यो नम ईश एषां कृतं चिदेनो नमसा विवासे ॥
Samhita Transcription Accented
náma ídugrám náma ā́ vivāse námo dādhāra pṛthivī́mutá dyā́m ǀ
námo devébhyo náma īśa eṣām kṛtám cidéno námasā́ vivāse ǁ
Samhita Transcription Nonaccented
nama idugram nama ā vivāse namo dādhāra pṛthivīmuta dyām ǀ
namo devebhyo nama īśa eṣām kṛtam cideno namasā vivāse ǁ
Padapatha Devanagari Accented
नमः॑ । इत् । उ॒ग्रम् । नमः॑ । आ । वि॒वा॒से॒ । नमः॑ । दा॒धा॒र॒ । पृ॒थि॒वीम् । उ॒त । द्याम् ।
नमः॑ । दे॒वेभ्यः॑ । नमः॑ । ई॒शे॒ । ए॒षा॒म् । कृ॒तम् । चि॒त् । एनः॑ । नम॑सा । आ । वि॒वा॒से॒ ॥
Padapatha Devanagari Nonaccented
नमः । इत् । उग्रम् । नमः । आ । विवासे । नमः । दाधार । पृथिवीम् । उत । द्याम् ।
नमः । देवेभ्यः । नमः । ईशे । एषाम् । कृतम् । चित् । एनः । नमसा । आ । विवासे ॥
Padapatha Transcription Accented
námaḥ ǀ ít ǀ ugrám ǀ námaḥ ǀ ā́ ǀ vivāse ǀ námaḥ ǀ dādhāra ǀ pṛthivī́m ǀ utá ǀ dyā́m ǀ
námaḥ ǀ devébhyaḥ ǀ námaḥ ǀ īśe ǀ eṣām ǀ kṛtám ǀ cit ǀ énaḥ ǀ námasā ǀ ā́ ǀ vivāse ǁ
Padapatha Transcription Nonaccented
namaḥ ǀ it ǀ ugram ǀ namaḥ ǀ ā ǀ vivāse ǀ namaḥ ǀ dādhāra ǀ pṛthivīm ǀ uta ǀ dyām ǀ
namaḥ ǀ devebhyaḥ ǀ namaḥ ǀ īśe ǀ eṣām ǀ kṛtam ǀ cit ǀ enaḥ ǀ namasā ǀ ā ǀ vivāse ǁ
06.051.09 (Mandala. Sukta. Rik)
4.8.12.04 (Ashtaka. Adhyaya. Varga. Rik)
06.05.024 (Mandala. Anuvāka. Rik)
Samhita Devanagari Accented
ऋ॒तस्य॑ वो र॒थ्यः॑ पू॒तद॑क्षानृ॒तस्य॑ पस्त्य॒सदो॒ अद॑ब्धान् ।
ताँ आ नमो॑भिरुरु॒चक्ष॑सो॒ नॄन्विश्वा॑न्व॒ आ न॑मे म॒हो य॑जत्राः ॥
Samhita Devanagari Nonaccented
ऋतस्य वो रथ्यः पूतदक्षानृतस्य पस्त्यसदो अदब्धान् ।
ताँ आ नमोभिरुरुचक्षसो नॄन्विश्वान्व आ नमे महो यजत्राः ॥
Samhita Transcription Accented
ṛtásya vo rathyáḥ pūtádakṣānṛtásya pastyasádo ádabdhān ǀ
tā́m̐ ā́ námobhirurucákṣaso nṝ́nvíśvānva ā́ name mahó yajatrāḥ ǁ
Samhita Transcription Nonaccented
ṛtasya vo rathyaḥ pūtadakṣānṛtasya pastyasado adabdhān ǀ
tām̐ ā namobhirurucakṣaso nṝnviśvānva ā name maho yajatrāḥ ǁ
Padapatha Devanagari Accented
ऋ॒तस्य॑ । वः॒ । र॒थ्यः॑ । पू॒तऽद॑क्षान् । ऋ॒तस्य॑ । प॒स्त्य॒ऽसदः॑ । अद॑ब्धान् ।
तान् । आ । नमः॑ऽभिः । उ॒रु॒ऽचक्ष॑सः । नॄन् । विश्वा॑न् । वः॒ । आ । न॒मे॒ । म॒हः । य॒ज॒त्राः॒ ॥
Padapatha Devanagari Nonaccented
ऋतस्य । वः । रथ्यः । पूतऽदक्षान् । ऋतस्य । पस्त्यऽसदः । अदब्धान् ।
तान् । आ । नमःऽभिः । उरुऽचक्षसः । नॄन् । विश्वान् । वः । आ । नमे । महः । यजत्राः ॥
Padapatha Transcription Accented
ṛtásya ǀ vaḥ ǀ rathyáḥ ǀ pūtá-dakṣān ǀ ṛtásya ǀ pastya-sádaḥ ǀ ádabdhān ǀ
tā́n ǀ ā́ ǀ námaḥ-bhiḥ ǀ uru-cákṣasaḥ ǀ nṝ́n ǀ víśvān ǀ vaḥ ǀ ā́ ǀ name ǀ maháḥ ǀ yajatrāḥ ǁ
Padapatha Transcription Nonaccented
ṛtasya ǀ vaḥ ǀ rathyaḥ ǀ pūta-dakṣān ǀ ṛtasya ǀ pastya-sadaḥ ǀ adabdhān ǀ
tān ǀ ā ǀ namaḥ-bhiḥ ǀ uru-cakṣasaḥ ǀ nṝn ǀ viśvān ǀ vaḥ ǀ ā ǀ name ǀ mahaḥ ǀ yajatrāḥ ǁ
06.051.10 (Mandala. Sukta. Rik)
4.8.12.05 (Ashtaka. Adhyaya. Varga. Rik)
06.05.025 (Mandala. Anuvāka. Rik)
Samhita Devanagari Accented
ते हि श्रेष्ठ॑वर्चस॒स्त उ॑ नस्ति॒रो विश्वा॑नि दुरि॒ता नयं॑ति ।
सु॒क्ष॒त्रासो॒ वरु॑णो मि॒त्रो अ॒ग्निर्ऋ॒तधी॑तयो वक्म॒राज॑सत्याः ॥
Samhita Devanagari Nonaccented
ते हि श्रेष्ठवर्चसस्त उ नस्तिरो विश्वानि दुरिता नयंति ।
सुक्षत्रासो वरुणो मित्रो अग्निर्ऋतधीतयो वक्मराजसत्याः ॥
Samhita Transcription Accented
té hí śréṣṭhavarcasastá u nastiró víśvāni duritā́ náyanti ǀ
sukṣatrā́so váruṇo mitró agnírṛtádhītayo vakmarā́jasatyāḥ ǁ
Samhita Transcription Nonaccented
te hi śreṣṭhavarcasasta u nastiro viśvāni duritā nayanti ǀ
sukṣatrāso varuṇo mitro agnirṛtadhītayo vakmarājasatyāḥ ǁ
Padapatha Devanagari Accented
ते । हि । श्रेष्ठ॑ऽवर्चसः । ते । ऊं॒ इति॑ । नः॒ । ति॒रः । विश्वा॑नि । दुः॒ऽइ॒ता । नय॑न्ति ।
सु॒ऽक्ष॒त्रासः॑ । वरु॑णः । मि॒त्रः । अ॒ग्निः । ऋ॒तऽधी॑तयः । व॒क्म॒राज॑ऽसत्याः ॥
Padapatha Devanagari Nonaccented
ते । हि । श्रेष्ठऽवर्चसः । ते । ऊं इति । नः । तिरः । विश्वानि । दुःऽइता । नयन्ति ।
सुऽक्षत्रासः । वरुणः । मित्रः । अग्निः । ऋतऽधीतयः । वक्मराजऽसत्याः ॥
Padapatha Transcription Accented
té ǀ hí ǀ śréṣṭha-varcasaḥ ǀ té ǀ ūṃ íti ǀ naḥ ǀ tiráḥ ǀ víśvāni ǀ duḥ-itā́ ǀ náyanti ǀ
su-kṣatrā́saḥ ǀ váruṇaḥ ǀ mitráḥ ǀ agníḥ ǀ ṛtá-dhītayaḥ ǀ vakmarā́ja-satyāḥ ǁ
Padapatha Transcription Nonaccented
te ǀ hi ǀ śreṣṭha-varcasaḥ ǀ te ǀ ūṃ iti ǀ naḥ ǀ tiraḥ ǀ viśvāni ǀ duḥ-itā ǀ nayanti ǀ
su-kṣatrāsaḥ ǀ varuṇaḥ ǀ mitraḥ ǀ agniḥ ǀ ṛta-dhītayaḥ ǀ vakmarāja-satyāḥ ǁ
06.051.11 (Mandala. Sukta. Rik)
4.8.13.01 (Ashtaka. Adhyaya. Varga. Rik)
06.05.026 (Mandala. Anuvāka. Rik)
Samhita Devanagari Accented
ते न॒ इंद्रः॑ पृथि॒वी क्षाम॑ वर्धन्पू॒षा भगो॒ अदि॑तिः॒ पंच॒ जनाः॑ ।
सु॒शर्मा॑णः॒ स्वव॑सः सुनी॒था भवं॑तु नः सुत्रा॒त्रासः॑ सुगो॒पाः ॥
Samhita Devanagari Nonaccented
ते न इंद्रः पृथिवी क्षाम वर्धन्पूषा भगो अदितिः पंच जनाः ।
सुशर्माणः स्ववसः सुनीथा भवंतु नः सुत्रात्रासः सुगोपाः ॥
Samhita Transcription Accented
té na índraḥ pṛthivī́ kṣā́ma vardhanpūṣā́ bhágo áditiḥ páñca jánāḥ ǀ
suśármāṇaḥ svávasaḥ sunīthā́ bhávantu naḥ sutrātrā́saḥ sugopā́ḥ ǁ
Samhita Transcription Nonaccented
te na indraḥ pṛthivī kṣāma vardhanpūṣā bhago aditiḥ pañca janāḥ ǀ
suśarmāṇaḥ svavasaḥ sunīthā bhavantu naḥ sutrātrāsaḥ sugopāḥ ǁ
Padapatha Devanagari Accented
ते । नः॒ । इन्द्रः॑ । पृ॒थि॒वी । क्षाम॑ । व॒र्ध॒न् । पू॒षा । भगः॑ । अदि॑तिः । पञ्च॑ । जनाः॑ ।
सु॒ऽशर्मा॑णः । सु॒ऽअव॑सः । सु॒ऽनी॒थाः । भव॑न्तु । नः॒ । सु॒ऽत्रा॒त्रासः॑ । सु॒ऽगो॒पाः ॥
Padapatha Devanagari Nonaccented
ते । नः । इन्द्रः । पृथिवी । क्षाम । वर्धन् । पूषा । भगः । अदितिः । पञ्च । जनाः ।
सुऽशर्माणः । सुऽअवसः । सुऽनीथाः । भवन्तु । नः । सुऽत्रात्रासः । सुऽगोपाः ॥
Padapatha Transcription Accented
té ǀ naḥ ǀ índraḥ ǀ pṛthivī́ ǀ kṣā́ma ǀ vardhan ǀ pūṣā́ ǀ bhágaḥ ǀ áditiḥ ǀ páñca ǀ jánāḥ ǀ
su-śármāṇaḥ ǀ su-ávasaḥ ǀ su-nīthā́ḥ ǀ bhávantu ǀ naḥ ǀ su-trātrā́saḥ ǀ su-gopā́ḥ ǁ
Padapatha Transcription Nonaccented
te ǀ naḥ ǀ indraḥ ǀ pṛthivī ǀ kṣāma ǀ vardhan ǀ pūṣā ǀ bhagaḥ ǀ aditiḥ ǀ pañca ǀ janāḥ ǀ
su-śarmāṇaḥ ǀ su-avasaḥ ǀ su-nīthāḥ ǀ bhavantu ǀ naḥ ǀ su-trātrāsaḥ ǀ su-gopāḥ ǁ
06.051.12 (Mandala. Sukta. Rik)
4.8.13.02 (Ashtaka. Adhyaya. Varga. Rik)
06.05.027 (Mandala. Anuvāka. Rik)
Samhita Devanagari Accented
नू स॒द्मानं॑ दि॒व्यं नंशि॑ देवा॒ भार॑द्वाजः सुम॒तिं या॑ति॒ होता॑ ।
आ॒सा॒नेभि॒र्यज॑मानो मि॒येधै॑र्दे॒वानां॒ जन्म॑ वसू॒युर्व॑वंद ॥
Samhita Devanagari Nonaccented
नू सद्मानं दिव्यं नंशि देवा भारद्वाजः सुमतिं याति होता ।
आसानेभिर्यजमानो मियेधैर्देवानां जन्म वसूयुर्ववंद ॥
Samhita Transcription Accented
nū́ sadmā́nam divyám náṃśi devā bhā́radvājaḥ sumatím yāti hótā ǀ
āsānébhiryájamāno miyédhairdevā́nām jánma vasūyúrvavanda ǁ
Samhita Transcription Nonaccented
nū sadmānam divyam naṃśi devā bhāradvājaḥ sumatim yāti hotā ǀ
āsānebhiryajamāno miyedhairdevānām janma vasūyurvavanda ǁ
Padapatha Devanagari Accented
नु । स॒द्मान॑म् । दि॒व्यम् । नंशि॑ । दे॒वाः॒ । भार॑त्ऽवाजः । सु॒ऽम॒तिम् । या॒ति॒ । होता॑ ।
आ॒सा॒नेभिः॑ । यज॑मानः । मि॒येधैः॑ । दे॒वाना॑म् । जन्म॑ । व॒सु॒ऽयुः । व॒व॒न्द॒ ॥
Padapatha Devanagari Nonaccented
नु । सद्मानम् । दिव्यम् । नंशि । देवाः । भारत्ऽवाजः । सुऽमतिम् । याति । होता ।
आसानेभिः । यजमानः । मियेधैः । देवानाम् । जन्म । वसुऽयुः । ववन्द ॥
Padapatha Transcription Accented
nú ǀ sadmā́nam ǀ divyám ǀ náṃśi ǀ devāḥ ǀ bhā́rat-vājaḥ ǀ su-matím ǀ yāti ǀ hótā ǀ
āsānébhiḥ ǀ yájamānaḥ ǀ miyédhaiḥ ǀ devā́nām ǀ jánma ǀ vasu-yúḥ ǀ vavanda ǁ
Padapatha Transcription Nonaccented
nu ǀ sadmānam ǀ divyam ǀ naṃśi ǀ devāḥ ǀ bhārat-vājaḥ ǀ su-matim ǀ yāti ǀ hotā ǀ
āsānebhiḥ ǀ yajamānaḥ ǀ miyedhaiḥ ǀ devānām ǀ janma ǀ vasu-yuḥ ǀ vavanda ǁ
06.051.13 (Mandala. Sukta. Rik)
4.8.13.03 (Ashtaka. Adhyaya. Varga. Rik)
06.05.028 (Mandala. Anuvāka. Rik)
Samhita Devanagari Accented
अप॒ त्यं वृ॑जि॒नं रि॒पुं स्ते॒नम॑ग्ने दुरा॒ध्यं॑ ।
द॒वि॒ष्ठम॑स्य सत्पते कृ॒धी सु॒गं ॥
Samhita Devanagari Nonaccented
अप त्यं वृजिनं रिपुं स्तेनमग्ने दुराध्यं ।
दविष्ठमस्य सत्पते कृधी सुगं ॥
Samhita Transcription Accented
ápa tyám vṛjinám ripúm stenámagne durādhyám ǀ
daviṣṭhámasya satpate kṛdhī́ sugám ǁ
Samhita Transcription Nonaccented
apa tyam vṛjinam ripum stenamagne durādhyam ǀ
daviṣṭhamasya satpate kṛdhī sugam ǁ
Padapatha Devanagari Accented
अप॑ । त्यम् । वृ॒जि॒नम् । रि॒पुम् । स्ते॒नम् । अ॒ग्ने॒ । दुः॒ऽआ॒ध्य॑म् ।
द॒वि॒ष्ठम् । अ॒स्य॒ । स॒त्ऽप॒ते॒ । कृ॒धि । सु॒ऽगम् ॥
Padapatha Devanagari Nonaccented
अप । त्यम् । वृजिनम् । रिपुम् । स्तेनम् । अग्ने । दुःऽआध्यम् ।
दविष्ठम् । अस्य । सत्ऽपते । कृधि । सुऽगम् ॥
Padapatha Transcription Accented
ápa ǀ tyám ǀ vṛjinám ǀ ripúm ǀ stenám ǀ agne ǀ duḥ-ādhyám ǀ
daviṣṭhám ǀ asya ǀ sat-pate ǀ kṛdhí ǀ su-gám ǁ
Padapatha Transcription Nonaccented
apa ǀ tyam ǀ vṛjinam ǀ ripum ǀ stenam ǀ agne ǀ duḥ-ādhyam ǀ
daviṣṭham ǀ asya ǀ sat-pate ǀ kṛdhi ǀ su-gam ǁ
06.051.14 (Mandala. Sukta. Rik)
4.8.13.04 (Ashtaka. Adhyaya. Varga. Rik)
06.05.029 (Mandala. Anuvāka. Rik)
Samhita Devanagari Accented
ग्रावा॑णः सोम नो॒ हि कं॑ सखित्व॒नाय॑ वाव॒शुः ।
ज॒ही न्य१॒॑त्रिणं॑ प॒णिं वृको॒ हि षः ॥
Samhita Devanagari Nonaccented
ग्रावाणः सोम नो हि कं सखित्वनाय वावशुः ।
जही न्यत्रिणं पणिं वृको हि षः ॥
Samhita Transcription Accented
grā́vāṇaḥ soma no hí kam sakhitvanā́ya vāvaśúḥ ǀ
jahī́ nyátríṇam paṇím vṛ́ko hí ṣáḥ ǁ
Samhita Transcription Nonaccented
grāvāṇaḥ soma no hi kam sakhitvanāya vāvaśuḥ ǀ
jahī nyatriṇam paṇim vṛko hi ṣaḥ ǁ
Padapatha Devanagari Accented
ग्रावा॑णः । सो॒म॒ । नः॒ । हि । क॒म् । स॒खि॒ऽत्व॒नाय॑ । वा॒व॒शुः ।
ज॒हि । नि । अ॒त्रिण॑म् । प॒णिम् । वृकः॑ । हि । सः ॥
Padapatha Devanagari Nonaccented
ग्रावाणः । सोम । नः । हि । कम् । सखिऽत्वनाय । वावशुः ।
जहि । नि । अत्रिणम् । पणिम् । वृकः । हि । सः ॥
Padapatha Transcription Accented
grā́vāṇaḥ ǀ soma ǀ naḥ ǀ hí ǀ kam ǀ sakhi-tvanā́ya ǀ vāvaśúḥ ǀ
jahí ǀ ní ǀ atríṇam ǀ paṇím ǀ vṛ́kaḥ ǀ hí ǀ sáḥ ǁ
Padapatha Transcription Nonaccented
grāvāṇaḥ ǀ soma ǀ naḥ ǀ hi ǀ kam ǀ sakhi-tvanāya ǀ vāvaśuḥ ǀ
jahi ǀ ni ǀ atriṇam ǀ paṇim ǀ vṛkaḥ ǀ hi ǀ saḥ ǁ
06.051.15 (Mandala. Sukta. Rik)
4.8.13.05 (Ashtaka. Adhyaya. Varga. Rik)
06.05.030 (Mandala. Anuvāka. Rik)
Samhita Devanagari Accented
यू॒यं हि ष्ठा सु॑दानव॒ इंद्र॑ज्येष्ठा अ॒भिद्य॑वः ।
कर्ता॑ नो॒ अध्व॒न्ना सु॒गं गो॒पा अ॒मा ॥
Samhita Devanagari Nonaccented
यूयं हि ष्ठा सुदानव इंद्रज्येष्ठा अभिद्यवः ।
कर्ता नो अध्वन्ना सुगं गोपा अमा ॥
Samhita Transcription Accented
yūyám hí ṣṭhā́ sudānava índrajyeṣṭhā abhídyavaḥ ǀ
kártā no ádhvannā́ sugám gopā́ amā́ ǁ
Samhita Transcription Nonaccented
yūyam hi ṣṭhā sudānava indrajyeṣṭhā abhidyavaḥ ǀ
kartā no adhvannā sugam gopā amā ǁ
Padapatha Devanagari Accented
यू॒यम् । हि । स्थ । सु॒ऽदा॒न॒वः॒ । इन्द्र॑ऽज्येष्ठाः । अ॒भिऽद्य॑वः ।
कर्त॑ । नः॒ । अध्व॑न् । आ । सु॒ऽगम् । गो॒पाः । अ॒मा ॥
Padapatha Devanagari Nonaccented
यूयम् । हि । स्थ । सुऽदानवः । इन्द्रऽज्येष्ठाः । अभिऽद्यवः ।
कर्त । नः । अध्वन् । आ । सुऽगम् । गोपाः । अमा ॥
Padapatha Transcription Accented
yūyám ǀ hí ǀ sthá ǀ su-dānavaḥ ǀ índra-jyeṣṭhāḥ ǀ abhí-dyavaḥ ǀ
kárta ǀ naḥ ǀ ádhvan ǀ ā́ ǀ su-gám ǀ gopā́ḥ ǀ amā́ ǁ
Padapatha Transcription Nonaccented
yūyam ǀ hi ǀ stha ǀ su-dānavaḥ ǀ indra-jyeṣṭhāḥ ǀ abhi-dyavaḥ ǀ
karta ǀ naḥ ǀ adhvan ǀ ā ǀ su-gam ǀ gopāḥ ǀ amā ǁ
06.051.16 (Mandala. Sukta. Rik)
4.8.13.06 (Ashtaka. Adhyaya. Varga. Rik)
06.05.031 (Mandala. Anuvāka. Rik)
Samhita Devanagari Accented
अपि॒ पंथा॑मगन्महि स्वस्ति॒गाम॑ने॒हसं॑ ।
येन॒ विश्वाः॒ परि॒ द्विषो॑ वृ॒णक्ति॑ विं॒दते॒ वसु॑ ॥
Samhita Devanagari Nonaccented
अपि पंथामगन्महि स्वस्तिगामनेहसं ।
येन विश्वाः परि द्विषो वृणक्ति विंदते वसु ॥
Samhita Transcription Accented
ápi pánthāmaganmahi svastigā́manehásam ǀ
yéna víśvāḥ pári dvíṣo vṛṇákti vindáte vásu ǁ
Samhita Transcription Nonaccented
api panthāmaganmahi svastigāmanehasam ǀ
yena viśvāḥ pari dviṣo vṛṇakti vindate vasu ǁ
Padapatha Devanagari Accented
अपि॑ । पन्था॑म् । अ॒ग॒न्म॒हि॒ । स्व॒स्ति॒ऽगाम् । अ॒ने॒हस॑म् ।
येन॑ । विश्वाः॑ । परि॑ । द्विषः॑ । वृ॒णक्ति॑ । वि॒न्दते॑ । वसु॑ ॥
Padapatha Devanagari Nonaccented
अपि । पन्थाम् । अगन्महि । स्वस्तिऽगाम् । अनेहसम् ।
येन । विश्वाः । परि । द्विषः । वृणक्ति । विन्दते । वसु ॥
Padapatha Transcription Accented
ápi ǀ pánthām ǀ aganmahi ǀ svasti-gā́m ǀ anehásam ǀ
yéna ǀ víśvāḥ ǀ pári ǀ dvíṣaḥ ǀ vṛṇákti ǀ vindáte ǀ vásu ǁ
Padapatha Transcription Nonaccented
api ǀ panthām ǀ aganmahi ǀ svasti-gām ǀ anehasam ǀ
yena ǀ viśvāḥ ǀ pari ǀ dviṣaḥ ǀ vṛṇakti ǀ vindate ǀ vasu ǁ