|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 67
|
1. Info |
| To: | mitra, varuṇa | |
| From: | bharadvāja bārhaspatya | |
| Metres: | 1st set of styles: nicṛttriṣṭup (3, 7, 8, 11); svarāṭpaṅkti (1, 9); bhurikpaṅkti (2, 10); triṣṭup (4, 5); virāṭtrisṭup (6) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.067.01 (Mandala. Sukta. Rik)
5.1.09.01 (Ashtaka. Adhyaya. Varga. Rik)
06.06.046 (Mandala. Anuvāka. Rik)
Samhita Devanagari Accented
विश्वे॑षां वः स॒तां ज्येष्ठ॑तमा गी॒र्भिर्मि॒त्रावरु॑णा वावृ॒धध्यै॑ ।
सं या र॒श्मेव॑ य॒मतु॒र्यमि॑ष्ठा॒ द्वा जनाँ॒ अस॑मा बा॒हुभिः॒ स्वैः ॥
Samhita Devanagari Nonaccented
विश्वेषां वः सतां ज्येष्ठतमा गीर्भिर्मित्रावरुणा वावृधध्यै ।
सं या रश्मेव यमतुर्यमिष्ठा द्वा जनाँ असमा बाहुभिः स्वैः ॥
Samhita Transcription Accented
víśveṣām vaḥ satā́m jyéṣṭhatamā gīrbhírmitrā́váruṇā vāvṛdhádhyai ǀ
sám yā́ raśméva yamáturyámiṣṭhā dvā́ jánām̐ ásamā bāhúbhiḥ sváiḥ ǁ
Samhita Transcription Nonaccented
viśveṣām vaḥ satām jyeṣṭhatamā gīrbhirmitrāvaruṇā vāvṛdhadhyai ǀ
sam yā raśmeva yamaturyamiṣṭhā dvā janām̐ asamā bāhubhiḥ svaiḥ ǁ
Padapatha Devanagari Accented
विश्वे॑षाम् । वः॒ । स॒ताम् । ज्येष्ठ॑ऽतमा । गीः॒ऽभिः । मि॒त्रावरु॑णा । व॒वृ॒धध्यै॑ ।
सम् । या । र॒श्माऽइ॑व । य॒मतुः॑ । यमि॑ष्ठा । द्वा । जना॑न् । अस॑मा । बा॒हुऽभिः॑ । स्वैः ॥
Padapatha Devanagari Nonaccented
विश्वेषाम् । वः । सताम् । ज्येष्ठऽतमा । गीःऽभिः । मित्रावरुणा । ववृधध्यै ।
सम् । या । रश्माऽइव । यमतुः । यमिष्ठा । द्वा । जनान् । असमा । बाहुऽभिः । स्वैः ॥
Padapatha Transcription Accented
víśveṣām ǀ vaḥ ǀ satā́m ǀ jyéṣṭha-tamā ǀ gīḥ-bhíḥ ǀ mitrā́váruṇā ǀ vavṛdhádhyai ǀ
sám ǀ yā́ ǀ raśmā́-iva ǀ yamátuḥ ǀ yámiṣṭhā ǀ dvā́ ǀ jánān ǀ ásamā ǀ bāhú-bhiḥ ǀ sváiḥ ǁ
Padapatha Transcription Nonaccented
viśveṣām ǀ vaḥ ǀ satām ǀ jyeṣṭha-tamā ǀ gīḥ-bhiḥ ǀ mitrāvaruṇā ǀ vavṛdhadhyai ǀ
sam ǀ yā ǀ raśmā-iva ǀ yamatuḥ ǀ yamiṣṭhā ǀ dvā ǀ janān ǀ asamā ǀ bāhu-bhiḥ ǀ svaiḥ ǁ
06.067.02 (Mandala. Sukta. Rik)
5.1.09.02 (Ashtaka. Adhyaya. Varga. Rik)
06.06.047 (Mandala. Anuvāka. Rik)
Samhita Devanagari Accented
इ॒यं मद्वां॒ प्र स्तृ॑णीते मनी॒षोप॑ प्रि॒या नम॑सा ब॒र्हिरच्छ॑ ।
यं॒तं नो॑ मित्रावरुणा॒वधृ॑ष्टं छ॒र्दिर्यद्वां॑ वरू॒थ्यं॑ सुदानू ॥
Samhita Devanagari Nonaccented
इयं मद्वां प्र स्तृणीते मनीषोप प्रिया नमसा बर्हिरच्छ ।
यंतं नो मित्रावरुणावधृष्टं छर्दिर्यद्वां वरूथ्यं सुदानू ॥
Samhita Transcription Accented
iyám mádvām prá stṛṇīte manīṣópa priyā́ námasā barhíráccha ǀ
yantám no mitrāvaruṇāvádhṛṣṭam chardíryádvām varūthyám sudānū ǁ
Samhita Transcription Nonaccented
iyam madvām pra stṛṇīte manīṣopa priyā namasā barhiraccha ǀ
yantam no mitrāvaruṇāvadhṛṣṭam chardiryadvām varūthyam sudānū ǁ
Padapatha Devanagari Accented
इ॒यम् । मत् । वा॒म् । प्र । स्तृ॒णी॒ते॒ । म॒नी॒षा । उप॑ । प्रि॒या । नम॑सा । ब॒र्हिः । अच्छ॑ ।
य॒न्तम् । नः॒ । मि॒त्रा॒व॒रु॒णौ॒ । अधृ॑ष्टम् । छ॒र्दिः । यत् । वा॒म् । व॒रू॒थ्य॑म् । सु॒दा॒नू॒ इति॑ सुऽदानू ॥
Padapatha Devanagari Nonaccented
इयम् । मत् । वाम् । प्र । स्तृणीते । मनीषा । उप । प्रिया । नमसा । बर्हिः । अच्छ ।
यन्तम् । नः । मित्रावरुणौ । अधृष्टम् । छर्दिः । यत् । वाम् । वरूथ्यम् । सुदानू इति सुऽदानू ॥
Padapatha Transcription Accented
iyám ǀ mát ǀ vām ǀ prá ǀ stṛṇīte ǀ manīṣā́ ǀ úpa ǀ priyā́ ǀ námasā ǀ barhíḥ ǀ áccha ǀ
yantám ǀ naḥ ǀ mitrāvaruṇau ǀ ádhṛṣṭam ǀ chardíḥ ǀ yát ǀ vām ǀ varūthyám ǀ sudānū íti su-dānū ǁ
Padapatha Transcription Nonaccented
iyam ǀ mat ǀ vām ǀ pra ǀ stṛṇīte ǀ manīṣā ǀ upa ǀ priyā ǀ namasā ǀ barhiḥ ǀ accha ǀ
yantam ǀ naḥ ǀ mitrāvaruṇau ǀ adhṛṣṭam ǀ chardiḥ ǀ yat ǀ vām ǀ varūthyam ǀ sudānū iti su-dānū ǁ
06.067.03 (Mandala. Sukta. Rik)
5.1.09.03 (Ashtaka. Adhyaya. Varga. Rik)
06.06.048 (Mandala. Anuvāka. Rik)
Samhita Devanagari Accented
आ या॑तं मित्रावरुणा सुश॒स्त्युप॑ प्रि॒या नम॑सा हू॒यमा॑ना ।
सं याव॑प्नः॒स्थो अ॒पसे॑व॒ जनां॑छ्रुधीय॒तश्चि॑द्यतथो महि॒त्वा ॥
Samhita Devanagari Nonaccented
आ यातं मित्रावरुणा सुशस्त्युप प्रिया नमसा हूयमाना ।
सं यावप्नःस्थो अपसेव जनांछ्रुधीयतश्चिद्यतथो महित्वा ॥
Samhita Transcription Accented
ā́ yātam mitrāvaruṇā suśastyúpa priyā́ námasā hūyámānā ǀ
sám yā́vapnaḥsthó apáseva jánāñchrudhīyatáścidyatatho mahitvā́ ǁ
Samhita Transcription Nonaccented
ā yātam mitrāvaruṇā suśastyupa priyā namasā hūyamānā ǀ
sam yāvapnaḥstho apaseva janāñchrudhīyataścidyatatho mahitvā ǁ
Padapatha Devanagari Accented
आ । या॒त॒म् । मि॒त्रा॒व॒रु॒णा॒ । सु॒ऽश॒स्ति । उप॑ । प्रि॒या । नम॑सा । हू॒यमा॑ना ।
सम् । यौ । अ॒प्नः॒ऽस्थः । अ॒पसा॑ऽइव । जना॑न् । श्रु॒धि॒ऽय॒तः । चि॒त् । य॒त॒थः॒ । म॒हि॒ऽत्वा ॥
Padapatha Devanagari Nonaccented
आ । यातम् । मित्रावरुणा । सुऽशस्ति । उप । प्रिया । नमसा । हूयमाना ।
सम् । यौ । अप्नःऽस्थः । अपसाऽइव । जनान् । श्रुधिऽयतः । चित् । यतथः । महिऽत्वा ॥
Padapatha Transcription Accented
ā́ ǀ yātam ǀ mitrāvaruṇā ǀ su-śastí ǀ úpa ǀ priyā́ ǀ námasā ǀ hūyámānā ǀ
sám ǀ yáu ǀ apnaḥ-stháḥ ǀ apásā-iva ǀ jánān ǀ śrudhi-yatáḥ ǀ cit ǀ yatathaḥ ǀ mahi-tvā́ ǁ
Padapatha Transcription Nonaccented
ā ǀ yātam ǀ mitrāvaruṇā ǀ su-śasti ǀ upa ǀ priyā ǀ namasā ǀ hūyamānā ǀ
sam ǀ yau ǀ apnaḥ-sthaḥ ǀ apasā-iva ǀ janān ǀ śrudhi-yataḥ ǀ cit ǀ yatathaḥ ǀ mahi-tvā ǁ
06.067.04 (Mandala. Sukta. Rik)
5.1.09.04 (Ashtaka. Adhyaya. Varga. Rik)
06.06.049 (Mandala. Anuvāka. Rik)
Samhita Devanagari Accented
अश्वा॒ न या वा॒जिना॑ पू॒तबं॑धू ऋ॒ता यद्गर्भ॒मदि॑ति॒र्भर॑ध्यै ।
प्र या महि॑ म॒हांता॒ जाय॑माना घो॒रा मर्ता॑य रि॒पवे॒ नि दी॑धः ॥
Samhita Devanagari Nonaccented
अश्वा न या वाजिना पूतबंधू ऋता यद्गर्भमदितिर्भरध्यै ।
प्र या महि महांता जायमाना घोरा मर्ताय रिपवे नि दीधः ॥
Samhita Transcription Accented
áśvā ná yā́ vājínā pūtábandhū ṛtā́ yádgárbhamáditirbháradhyai ǀ
prá yā́ máhi mahā́ntā jā́yamānā ghorā́ mártāya ripáve ní dīdhaḥ ǁ
Samhita Transcription Nonaccented
aśvā na yā vājinā pūtabandhū ṛtā yadgarbhamaditirbharadhyai ǀ
pra yā mahi mahāntā jāyamānā ghorā martāya ripave ni dīdhaḥ ǁ
Padapatha Devanagari Accented
अश्वा॑ । न । या । वा॒जिना॑ । पू॒तब॑न्धू॒ इति॑ पू॒तऽब॑न्धू । ऋ॒ता । यत् । गर्भ॑म् । अदि॑तिः । भर॑ध्यै ।
प्र । या । महि॑ । म॒हान्ता॑ । जाय॑माना । घो॒रा । मर्ता॑य । रि॒पवे॑ । नि । दी॒ध॒रिति॑ दीधः ॥
Padapatha Devanagari Nonaccented
अश्वा । न । या । वाजिना । पूतबन्धू इति पूतऽबन्धू । ऋता । यत् । गर्भम् । अदितिः । भरध्यै ।
प्र । या । महि । महान्ता । जायमाना । घोरा । मर्ताय । रिपवे । नि । दीधरिति दीधः ॥
Padapatha Transcription Accented
áśvā ǀ ná ǀ yā́ ǀ vājínā ǀ pūtábandhū íti pūtá-bandhū ǀ ṛtā́ ǀ yát ǀ gárbham ǀ áditiḥ ǀ bháradhyai ǀ
prá ǀ yā́ ǀ máhi ǀ mahā́ntā ǀ jā́yamānā ǀ ghorā́ ǀ mártāya ǀ ripáve ǀ ní ǀ dīdharíti dīdhaḥ ǁ
Padapatha Transcription Nonaccented
aśvā ǀ na ǀ yā ǀ vājinā ǀ pūtabandhū iti pūta-bandhū ǀ ṛtā ǀ yat ǀ garbham ǀ aditiḥ ǀ bharadhyai ǀ
pra ǀ yā ǀ mahi ǀ mahāntā ǀ jāyamānā ǀ ghorā ǀ martāya ǀ ripave ǀ ni ǀ dīdhariti dīdhaḥ ǁ
06.067.05 (Mandala. Sukta. Rik)
5.1.09.05 (Ashtaka. Adhyaya. Varga. Rik)
06.06.050 (Mandala. Anuvāka. Rik)
Samhita Devanagari Accented
विश्वे॒ यद्वां॑ मं॒हना॒ मंद॑मानाः क्ष॒त्रं दे॒वासो॒ अद॑धुः स॒जोषाः॑ ।
परि॒ यद्भू॒थो रोद॑सी चिदु॒र्वी संति॒ स्पशो॒ अद॑ब्धासो॒ अमू॑राः ॥
Samhita Devanagari Nonaccented
विश्वे यद्वां मंहना मंदमानाः क्षत्रं देवासो अदधुः सजोषाः ।
परि यद्भूथो रोदसी चिदुर्वी संति स्पशो अदब्धासो अमूराः ॥
Samhita Transcription Accented
víśve yádvām maṃhánā mándamānāḥ kṣatrám devā́so ádadhuḥ sajóṣāḥ ǀ
pári yádbhūthó ródasī cidurvī́ sánti spáśo ádabdhāso ámūrāḥ ǁ
Samhita Transcription Nonaccented
viśve yadvām maṃhanā mandamānāḥ kṣatram devāso adadhuḥ sajoṣāḥ ǀ
pari yadbhūtho rodasī cidurvī santi spaśo adabdhāso amūrāḥ ǁ
Padapatha Devanagari Accented
विश्वे॑ । यत् । वा॒म् । मं॒हना॑ । मन्द॑मानाः । क्ष॒त्रम् । दे॒वासः॑ । अद॑धुः । स॒ऽजोषाः॑ ।
परि॑ । यत् । भू॒थः । रोद॑सी॒ इति॑ । चि॒त् । उ॒र्वी इति॑ । सन्ति॑ । स्पशः॑ । अद॑ब्धासः । अमू॑राः ॥
Padapatha Devanagari Nonaccented
विश्वे । यत् । वाम् । मंहना । मन्दमानाः । क्षत्रम् । देवासः । अदधुः । सऽजोषाः ।
परि । यत् । भूथः । रोदसी इति । चित् । उर्वी इति । सन्ति । स्पशः । अदब्धासः । अमूराः ॥
Padapatha Transcription Accented
víśve ǀ yát ǀ vām ǀ maṃhánā ǀ mándamānāḥ ǀ kṣatrám ǀ devā́saḥ ǀ ádadhuḥ ǀ sa-jóṣāḥ ǀ
pári ǀ yát ǀ bhūtháḥ ǀ ródasī íti ǀ cit ǀ urvī́ íti ǀ sánti ǀ spáśaḥ ǀ ádabdhāsaḥ ǀ ámūrāḥ ǁ
Padapatha Transcription Nonaccented
viśve ǀ yat ǀ vām ǀ maṃhanā ǀ mandamānāḥ ǀ kṣatram ǀ devāsaḥ ǀ adadhuḥ ǀ sa-joṣāḥ ǀ
pari ǀ yat ǀ bhūthaḥ ǀ rodasī iti ǀ cit ǀ urvī iti ǀ santi ǀ spaśaḥ ǀ adabdhāsaḥ ǀ amūrāḥ ǁ
06.067.06 (Mandala. Sukta. Rik)
5.1.10.01 (Ashtaka. Adhyaya. Varga. Rik)
06.06.051 (Mandala. Anuvāka. Rik)
Samhita Devanagari Accented
ता हि क्ष॒त्रं धा॒रये॑थे॒ अनु॒ द्यूंदृं॒हेथे॒ सानु॑मुप॒मादि॑व॒ द्योः ।
दृ॒ळ्हो नक्ष॑त्र उ॒त वि॒श्वदे॑वो॒ भूमि॒मातां॒द्यां धा॒सिना॒योः ॥
Samhita Devanagari Nonaccented
ता हि क्षत्रं धारयेथे अनु द्यूंदृंहेथे सानुमुपमादिव द्योः ।
दृळ्हो नक्षत्र उत विश्वदेवो भूमिमातांद्यां धासिनायोः ॥
Samhita Transcription Accented
tā́ hí kṣatrám dhāráyethe ánu dyū́ndṛṃhéthe sā́numupamā́diva dyóḥ ǀ
dṛḷhó nákṣatra utá viśvádevo bhū́mimā́tāndyā́m dhāsínāyóḥ ǁ
Samhita Transcription Nonaccented
tā hi kṣatram dhārayethe anu dyūndṛṃhethe sānumupamādiva dyoḥ ǀ
dṛḷho nakṣatra uta viśvadevo bhūmimātāndyām dhāsināyoḥ ǁ
Padapatha Devanagari Accented
ता । हि । क्ष॒त्रम् । धा॒रये॑थे॒ इति॑ । अनु॑ । द्यून् । दृं॒हेथे॒ इति॑ । सानु॑म् । उ॒प॒मात्ऽइ॑व । द्योः ।
दृ॒ळ्हः । नक्ष॑त्रः । उ॒त । वि॒श्वऽदे॑वः । भूमि॑म् । आ । अ॒ता॒न् । द्याम् । धा॒सिना॑ । आ॒योः ॥
Padapatha Devanagari Nonaccented
ता । हि । क्षत्रम् । धारयेथे इति । अनु । द्यून् । दृंहेथे इति । सानुम् । उपमात्ऽइव । द्योः ।
दृळ्हः । नक्षत्रः । उत । विश्वऽदेवः । भूमिम् । आ । अतान् । द्याम् । धासिना । आयोः ॥
Padapatha Transcription Accented
tā́ ǀ hí ǀ kṣatrám ǀ dhāráyethe íti ǀ ánu ǀ dyū́n ǀ dṛṃhéthe íti ǀ sā́num ǀ upamā́t-iva ǀ dyóḥ ǀ
dṛḷháḥ ǀ nákṣatraḥ ǀ utá ǀ viśvá-devaḥ ǀ bhū́mim ǀ ā́ ǀ atān ǀ dyā́m ǀ dhāsínā ǀ āyóḥ ǁ
Padapatha Transcription Nonaccented
tā ǀ hi ǀ kṣatram ǀ dhārayethe iti ǀ anu ǀ dyūn ǀ dṛṃhethe iti ǀ sānum ǀ upamāt-iva ǀ dyoḥ ǀ
dṛḷhaḥ ǀ nakṣatraḥ ǀ uta ǀ viśva-devaḥ ǀ bhūmim ǀ ā ǀ atān ǀ dyām ǀ dhāsinā ǀ āyoḥ ǁ
06.067.07 (Mandala. Sukta. Rik)
5.1.10.02 (Ashtaka. Adhyaya. Varga. Rik)
06.06.052 (Mandala. Anuvāka. Rik)
Samhita Devanagari Accented
ता वि॒ग्रं धै॑थे ज॒ठरं॑ पृ॒णध्या॒ आ यत्सद्म॒ सभृ॑तयः पृ॒णंति॑ ।
न मृ॑ष्यंते युव॒तयोऽवा॑ता॒ वि यत्पयो॑ विश्वजिन्वा॒ भरं॑ते ॥
Samhita Devanagari Nonaccented
ता विग्रं धैथे जठरं पृणध्या आ यत्सद्म सभृतयः पृणंति ।
न मृष्यंते युवतयोऽवाता वि यत्पयो विश्वजिन्वा भरंते ॥
Samhita Transcription Accented
tā́ vigrám dhaithe jaṭháram pṛṇádhyā ā́ yátsádma sábhṛtayaḥ pṛṇánti ǀ
ná mṛṣyante yuvatáyó’vātā ví yátpáyo viśvajinvā bhárante ǁ
Samhita Transcription Nonaccented
tā vigram dhaithe jaṭharam pṛṇadhyā ā yatsadma sabhṛtayaḥ pṛṇanti ǀ
na mṛṣyante yuvatayo’vātā vi yatpayo viśvajinvā bharante ǁ
Padapatha Devanagari Accented
ता । वि॒ग्रम् । धै॒थे॒ इति॑ । ज॒ठर॑म् । पृ॒णध्यै॑ । आ । यत् । सद्म॑ । सऽभृ॑तयः । पृ॒णन्ति॑ ।
न । मृ॒ष्य॒न्ते॒ । यु॒व॒तयः॑ । अवा॑ताः । वि । यत् । पयः॑ । वि॒श्व॒ऽजि॒न्वा॒ । भर॑न्ते ॥
Padapatha Devanagari Nonaccented
ता । विग्रम् । धैथे इति । जठरम् । पृणध्यै । आ । यत् । सद्म । सऽभृतयः । पृणन्ति ।
न । मृष्यन्ते । युवतयः । अवाताः । वि । यत् । पयः । विश्वऽजिन्वा । भरन्ते ॥
Padapatha Transcription Accented
tā́ ǀ vigrám ǀ dhaithe íti ǀ jaṭháram ǀ pṛṇádhyai ǀ ā́ ǀ yát ǀ sádma ǀ sá-bhṛtayaḥ ǀ pṛṇánti ǀ
ná ǀ mṛṣyante ǀ yuvatáyaḥ ǀ ávātāḥ ǀ ví ǀ yát ǀ páyaḥ ǀ viśva-jinvā ǀ bhárante ǁ
Padapatha Transcription Nonaccented
tā ǀ vigram ǀ dhaithe iti ǀ jaṭharam ǀ pṛṇadhyai ǀ ā ǀ yat ǀ sadma ǀ sa-bhṛtayaḥ ǀ pṛṇanti ǀ
na ǀ mṛṣyante ǀ yuvatayaḥ ǀ avātāḥ ǀ vi ǀ yat ǀ payaḥ ǀ viśva-jinvā ǀ bharante ǁ
06.067.08 (Mandala. Sukta. Rik)
5.1.10.03 (Ashtaka. Adhyaya. Varga. Rik)
06.06.053 (Mandala. Anuvāka. Rik)
Samhita Devanagari Accented
ता जि॒ह्वया॒ सद॒मेदं सु॑मे॒धा आ यद्वां॑ स॒त्यो अ॑र॒तिर्ऋ॒ते भूत् ।
तद्वां॑ महि॒त्वं घृ॑तान्नावस्तु यु॒वं दा॒शुषे॒ वि च॑यिष्ट॒मंहः॑ ॥
Samhita Devanagari Nonaccented
ता जिह्वया सदमेदं सुमेधा आ यद्वां सत्यो अरतिर्ऋते भूत् ।
तद्वां महित्वं घृतान्नावस्तु युवं दाशुषे वि चयिष्टमंहः ॥
Samhita Transcription Accented
tā́ jihváyā sádamédám sumedhā́ ā́ yádvām satyó aratírṛté bhū́t ǀ
tádvām mahitvám ghṛtānnāvastu yuvám dāśúṣe ví cayiṣṭamáṃhaḥ ǁ
Samhita Transcription Nonaccented
tā jihvayā sadamedam sumedhā ā yadvām satyo aratirṛte bhūt ǀ
tadvām mahitvam ghṛtānnāvastu yuvam dāśuṣe vi cayiṣṭamaṃhaḥ ǁ
Padapatha Devanagari Accented
ता । जि॒ह्वया॑ । सद॑म् । आ । इ॒दम् । सु॒ऽमे॒धाः । आ । यत् । वा॒म् । स॒त्यः । अ॒र॒तिः । ऋ॒ते । भूत् ।
तत् । वा॒म् । म॒हि॒ऽत्वम् । घृ॒त॒ऽअ॒न्नौ॒ । अ॒स्तु॒ । यु॒वम् । दा॒शुषे॑ । वि । च॒यि॒ष्ट॒म् । अंहः॑ ॥
Padapatha Devanagari Nonaccented
ता । जिह्वया । सदम् । आ । इदम् । सुऽमेधाः । आ । यत् । वाम् । सत्यः । अरतिः । ऋते । भूत् ।
तत् । वाम् । महिऽत्वम् । घृतऽअन्नौ । अस्तु । युवम् । दाशुषे । वि । चयिष्टम् । अंहः ॥
Padapatha Transcription Accented
tā́ ǀ jihváyā ǀ sádam ǀ ā́ ǀ idám ǀ su-medhā́ḥ ǀ ā́ ǀ yát ǀ vām ǀ satyáḥ ǀ aratíḥ ǀ ṛté ǀ bhū́t ǀ
tát ǀ vām ǀ mahi-tvám ǀ ghṛta-annau ǀ astu ǀ yuvám ǀ dāśúṣe ǀ ví ǀ cayiṣṭam ǀ áṃhaḥ ǁ
Padapatha Transcription Nonaccented
tā ǀ jihvayā ǀ sadam ǀ ā ǀ idam ǀ su-medhāḥ ǀ ā ǀ yat ǀ vām ǀ satyaḥ ǀ aratiḥ ǀ ṛte ǀ bhūt ǀ
tat ǀ vām ǀ mahi-tvam ǀ ghṛta-annau ǀ astu ǀ yuvam ǀ dāśuṣe ǀ vi ǀ cayiṣṭam ǀ aṃhaḥ ǁ
06.067.09 (Mandala. Sukta. Rik)
5.1.10.04 (Ashtaka. Adhyaya. Varga. Rik)
06.06.054 (Mandala. Anuvāka. Rik)
Samhita Devanagari Accented
प्र यद्वां॑ मित्रावरुणा स्पू॒र्धन्प्रि॒या धाम॑ यु॒वधि॑ता मि॒नंति॑ ।
न ये दे॒वास॒ ओह॑सा॒ न मर्ता॒ अय॑ज्ञसाचो॒ अप्यो॒ न पु॒त्राः ॥
Samhita Devanagari Nonaccented
प्र यद्वां मित्रावरुणा स्पूर्धन्प्रिया धाम युवधिता मिनंति ।
न ये देवास ओहसा न मर्ता अयज्ञसाचो अप्यो न पुत्राः ॥
Samhita Transcription Accented
prá yádvām mitrāvaruṇā spūrdhánpriyā́ dhā́ma yuvádhitā minánti ǀ
ná yé devā́sa óhasā ná mártā áyajñasāco ápyo ná putrā́ḥ ǁ
Samhita Transcription Nonaccented
pra yadvām mitrāvaruṇā spūrdhanpriyā dhāma yuvadhitā minanti ǀ
na ye devāsa ohasā na martā ayajñasāco apyo na putrāḥ ǁ
Padapatha Devanagari Accented
प्र । यत् । वा॒म् । मि॒त्रा॒व॒रु॒णा॒ । स्पू॒र्धन् । प्रि॒या । धाम॑ । यु॒वऽधि॑ता । मि॒नन्ति॑ ।
न । ये । दे॒वासः॑ । ओह॑सा । न । मर्ताः॑ । अय॑ज्ञऽसाचः । अप्यः॑ । न । पु॒त्राः ॥
Padapatha Devanagari Nonaccented
प्र । यत् । वाम् । मित्रावरुणा । स्पूर्धन् । प्रिया । धाम । युवऽधिता । मिनन्ति ।
न । ये । देवासः । ओहसा । न । मर्ताः । अयज्ञऽसाचः । अप्यः । न । पुत्राः ॥
Padapatha Transcription Accented
prá ǀ yát ǀ vām ǀ mitrāvaruṇā ǀ spūrdhán ǀ priyā́ ǀ dhā́ma ǀ yuvá-dhitā ǀ minánti ǀ
ná ǀ yé ǀ devā́saḥ ǀ óhasā ǀ ná ǀ mártāḥ ǀ áyajña-sācaḥ ǀ ápyaḥ ǀ ná ǀ putrā́ḥ ǁ
Padapatha Transcription Nonaccented
pra ǀ yat ǀ vām ǀ mitrāvaruṇā ǀ spūrdhan ǀ priyā ǀ dhāma ǀ yuva-dhitā ǀ minanti ǀ
na ǀ ye ǀ devāsaḥ ǀ ohasā ǀ na ǀ martāḥ ǀ ayajña-sācaḥ ǀ apyaḥ ǀ na ǀ putrāḥ ǁ
06.067.10 (Mandala. Sukta. Rik)
5.1.10.05 (Ashtaka. Adhyaya. Varga. Rik)
06.06.055 (Mandala. Anuvāka. Rik)
Samhita Devanagari Accented
वि यद्वाचं॑ की॒स्तासो॒ भरं॑ते॒ शंसं॑ति॒ के चि॑न्नि॒विदो॑ मना॒नाः ।
आद्वां॑ ब्रवाम स॒त्यान्यु॒क्था नकि॑र्दे॒वेभि॑र्यतथो महि॒त्वा ॥
Samhita Devanagari Nonaccented
वि यद्वाचं कीस्तासो भरंते शंसंति के चिन्निविदो मनानाः ।
आद्वां ब्रवाम सत्यान्युक्था नकिर्देवेभिर्यतथो महित्वा ॥
Samhita Transcription Accented
ví yádvā́cam kīstā́so bhárante śáṃsanti ké cinnivído manānā́ḥ ǀ
ā́dvām bravāma satyā́nyukthā́ nákirdevébhiryatatho mahitvā́ ǁ
Samhita Transcription Nonaccented
vi yadvācam kīstāso bharante śaṃsanti ke cinnivido manānāḥ ǀ
ādvām bravāma satyānyukthā nakirdevebhiryatatho mahitvā ǁ
Padapatha Devanagari Accented
वि । यत् । वाच॑म् । की॒स्तासः॑ । भर॑न्ते । शंस॑न्ति । के । चि॒त् । नि॒ऽविदः॑ । म॒ना॒नाः ।
आत् । वा॒म् । ब्र॒वा॒म॒ । स॒त्यानि॑ । उ॒क्था । नकिः॑ । दे॒वेभिः॑ । य॒त॒थः॒ । म॒हि॒ऽत्वा ॥
Padapatha Devanagari Nonaccented
वि । यत् । वाचम् । कीस्तासः । भरन्ते । शंसन्ति । के । चित् । निऽविदः । मनानाः ।
आत् । वाम् । ब्रवाम । सत्यानि । उक्था । नकिः । देवेभिः । यतथः । महिऽत्वा ॥
Padapatha Transcription Accented
ví ǀ yát ǀ vā́cam ǀ kīstā́saḥ ǀ bhárante ǀ śáṃsanti ǀ ké ǀ cit ǀ ni-vídaḥ ǀ manānā́ḥ ǀ
ā́t ǀ vām ǀ bravāma ǀ satyā́ni ǀ ukthā́ ǀ nákiḥ ǀ devébhiḥ ǀ yatathaḥ ǀ mahi-tvā́ ǁ
Padapatha Transcription Nonaccented
vi ǀ yat ǀ vācam ǀ kīstāsaḥ ǀ bharante ǀ śaṃsanti ǀ ke ǀ cit ǀ ni-vidaḥ ǀ manānāḥ ǀ
āt ǀ vām ǀ bravāma ǀ satyāni ǀ ukthā ǀ nakiḥ ǀ devebhiḥ ǀ yatathaḥ ǀ mahi-tvā ǁ
06.067.11 (Mandala. Sukta. Rik)
5.1.10.06 (Ashtaka. Adhyaya. Varga. Rik)
06.06.056 (Mandala. Anuvāka. Rik)
Samhita Devanagari Accented
अ॒वोरि॒त्था वां॑ छ॒र्दिषो॑ अ॒भिष्टौ॑ यु॒वोर्मि॑त्रावरुणा॒वस्कृ॑धोयु ।
अनु॒ यद्गावः॑ स्फु॒रानृ॑जि॒प्यं धृ॒ष्णुं यद्रणे॒ वृष॑णं यु॒नज॑न् ॥
Samhita Devanagari Nonaccented
अवोरित्था वां छर्दिषो अभिष्टौ युवोर्मित्रावरुणावस्कृधोयु ।
अनु यद्गावः स्फुरानृजिप्यं धृष्णुं यद्रणे वृषणं युनजन् ॥
Samhita Transcription Accented
avóritthā́ vām chardíṣo abhíṣṭau yuvórmitrāvaruṇāváskṛdhoyu ǀ
ánu yádgā́vaḥ sphurā́nṛjipyám dhṛṣṇúm yádráṇe vṛ́ṣaṇam yunájan ǁ
Samhita Transcription Nonaccented
avoritthā vām chardiṣo abhiṣṭau yuvormitrāvaruṇāvaskṛdhoyu ǀ
anu yadgāvaḥ sphurānṛjipyam dhṛṣṇum yadraṇe vṛṣaṇam yunajan ǁ
Padapatha Devanagari Accented
अ॒वोः । इ॒त्था । वा॒म् । छ॒र्दिषः॑ । अ॒भिष्टौ॑ । यु॒वोः । मि॒त्रा॒व॒रु॒णौ॒ । अस्कृ॑धोयु ।
अनु॑ । यत् । गावः॑ । स्फु॒रान् । ऋ॒जि॒प्यम् । धृ॒ष्णुम् । यत् । रणे॑ । वृष॑णम् । यु॒नज॑न् ॥
Padapatha Devanagari Nonaccented
अवोः । इत्था । वाम् । छर्दिषः । अभिष्टौ । युवोः । मित्रावरुणौ । अस्कृधोयु ।
अनु । यत् । गावः । स्फुरान् । ऋजिप्यम् । धृष्णुम् । यत् । रणे । वृषणम् । युनजन् ॥
Padapatha Transcription Accented
avóḥ ǀ itthā́ ǀ vām ǀ chardíṣaḥ ǀ abhíṣṭau ǀ yuvóḥ ǀ mitrāvaruṇau ǀ áskṛdhoyu ǀ
ánu ǀ yát ǀ gā́vaḥ ǀ sphurā́n ǀ ṛjipyám ǀ dhṛṣṇúm ǀ yát ǀ ráṇe ǀ vṛ́ṣaṇam ǀ yunájan ǁ
Padapatha Transcription Nonaccented
avoḥ ǀ itthā ǀ vām ǀ chardiṣaḥ ǀ abhiṣṭau ǀ yuvoḥ ǀ mitrāvaruṇau ǀ askṛdhoyu ǀ
anu ǀ yat ǀ gāvaḥ ǀ sphurān ǀ ṛjipyam ǀ dhṛṣṇum ǀ yat ǀ raṇe ǀ vṛṣaṇam ǀ yunajan ǁ