|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 69
|
1. Info |
| To: | indra, viṣṇu | |
| From: | bharadvāja bārhaspatya | |
| Metres: | 1st set of styles: nicṛttriṣṭup (1, 3, 6, 7); triṣṭup (2, 4, 8); brāhmyuṣnik (5) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.069.01 (Mandala. Sukta. Rik)
5.1.13.01 (Ashtaka. Adhyaya. Varga. Rik)
06.06.068 (Mandala. Anuvāka. Rik)
Samhita Devanagari Accented
सं वां॒ कर्म॑णा॒ समि॒षा हि॑नो॒मींद्रा॑विष्णू॒ अप॑सस्पा॒रे अ॒स्य ।
जु॒षेथां॑ य॒ज्ञं द्रवि॑णं च धत्त॒मरि॑ष्टैर्नः प॒थिभिः॑ पा॒रयं॑ता ॥
Samhita Devanagari Nonaccented
सं वां कर्मणा समिषा हिनोमींद्राविष्णू अपसस्पारे अस्य ।
जुषेथां यज्ञं द्रविणं च धत्तमरिष्टैर्नः पथिभिः पारयंता ॥
Samhita Transcription Accented
sám vām kármaṇā sámiṣā́ hinomī́ndrāviṣṇū ápasaspāré asyá ǀ
juṣéthām yajñám dráviṇam ca dhattamáriṣṭairnaḥ pathíbhiḥ pāráyantā ǁ
Samhita Transcription Nonaccented
sam vām karmaṇā samiṣā hinomīndrāviṣṇū apasaspāre asya ǀ
juṣethām yajñam draviṇam ca dhattamariṣṭairnaḥ pathibhiḥ pārayantā ǁ
Padapatha Devanagari Accented
सम् । वा॒म् । कर्म॑णा । सम् । इ॒षा । हि॒नो॒मि॒ । इन्द्रा॑विष्णू॒ इति॑ । अप॑सः । पा॒रे । अ॒स्य ।
जु॒षेथा॑म् । य॒ज्ञम् । द्रवि॑णम् । च॒ । ध॒त्त॒म् । अरि॑ष्टैः । नः॒ । प॒थिऽभिः॑ । पा॒रय॑न्ता ॥
Padapatha Devanagari Nonaccented
सम् । वाम् । कर्मणा । सम् । इषा । हिनोमि । इन्द्राविष्णू इति । अपसः । पारे । अस्य ।
जुषेथाम् । यज्ञम् । द्रविणम् । च । धत्तम् । अरिष्टैः । नः । पथिऽभिः । पारयन्ता ॥
Padapatha Transcription Accented
sám ǀ vām ǀ kármaṇā ǀ sám ǀ iṣā́ ǀ hinomi ǀ índrāviṣṇū íti ǀ ápasaḥ ǀ pāré ǀ asyá ǀ
juṣéthām ǀ yajñám ǀ dráviṇam ǀ ca ǀ dhattam ǀ áriṣṭaiḥ ǀ naḥ ǀ pathí-bhiḥ ǀ pāráyantā ǁ
Padapatha Transcription Nonaccented
sam ǀ vām ǀ karmaṇā ǀ sam ǀ iṣā ǀ hinomi ǀ indrāviṣṇū iti ǀ apasaḥ ǀ pāre ǀ asya ǀ
juṣethām ǀ yajñam ǀ draviṇam ǀ ca ǀ dhattam ǀ ariṣṭaiḥ ǀ naḥ ǀ pathi-bhiḥ ǀ pārayantā ǁ
06.069.02 (Mandala. Sukta. Rik)
5.1.13.02 (Ashtaka. Adhyaya. Varga. Rik)
06.06.069 (Mandala. Anuvāka. Rik)
Samhita Devanagari Accented
या विश्वा॑सां जनि॒तारा॑ मती॒नामिंद्रा॒विष्णू॑ क॒लशा॑ सोम॒धाना॑ ।
प्र वां॒ गिरः॑ श॒स्यमा॑ना अवंतु॒ प्र स्तोमा॑सो गी॒यमा॑नासो अ॒र्कैः ॥
Samhita Devanagari Nonaccented
या विश्वासां जनितारा मतीनामिंद्राविष्णू कलशा सोमधाना ।
प्र वां गिरः शस्यमाना अवंतु प्र स्तोमासो गीयमानासो अर्कैः ॥
Samhita Transcription Accented
yā́ víśvāsām janitā́rā matīnā́míndrāvíṣṇū kaláśā somadhā́nā ǀ
prá vām gíraḥ śasyámānā avantu prá stómāso gīyámānāso arkáiḥ ǁ
Samhita Transcription Nonaccented
yā viśvāsām janitārā matīnāmindrāviṣṇū kalaśā somadhānā ǀ
pra vām giraḥ śasyamānā avantu pra stomāso gīyamānāso arkaiḥ ǁ
Padapatha Devanagari Accented
या । विश्वा॑साम् । ज॒नि॒तारा॑ । म॒ती॒नाम् । इन्द्रा॒विष्णू॒ इति॑ । क॒लशा॑ । सो॒म॒ऽधाना॑ ।
प्र । वा॒म् । गिरः॑ । श॒स्यमा॑नाः । अ॒व॒न्तु॒ । प्र । स्तोमा॑सः । गी॒यमा॑नासः । अ॒र्कैः ॥
Padapatha Devanagari Nonaccented
या । विश्वासाम् । जनितारा । मतीनाम् । इन्द्राविष्णू इति । कलशा । सोमऽधाना ।
प्र । वाम् । गिरः । शस्यमानाः । अवन्तु । प्र । स्तोमासः । गीयमानासः । अर्कैः ॥
Padapatha Transcription Accented
yā́ ǀ víśvāsām ǀ janitā́rā ǀ matīnā́m ǀ índrāvíṣṇū íti ǀ kaláśā ǀ soma-dhā́nā ǀ
prá ǀ vām ǀ gíraḥ ǀ śasyámānāḥ ǀ avantu ǀ prá ǀ stómāsaḥ ǀ gīyámānāsaḥ ǀ arkáiḥ ǁ
Padapatha Transcription Nonaccented
yā ǀ viśvāsām ǀ janitārā ǀ matīnām ǀ indrāviṣṇū iti ǀ kalaśā ǀ soma-dhānā ǀ
pra ǀ vām ǀ giraḥ ǀ śasyamānāḥ ǀ avantu ǀ pra ǀ stomāsaḥ ǀ gīyamānāsaḥ ǀ arkaiḥ ǁ
06.069.03 (Mandala. Sukta. Rik)
5.1.13.03 (Ashtaka. Adhyaya. Varga. Rik)
06.06.070 (Mandala. Anuvāka. Rik)
Samhita Devanagari Accented
इंद्रा॑विष्णू मदपती मदाना॒मा सोमं॑ यातं॒ द्रवि॑णो॒ दधा॑ना ।
सं वा॑मंजंत्व॒क्तुभि॑र्मती॒नां सं स्तोमा॑सः श॒स्यमा॑नास उ॒क्थैः ॥
Samhita Devanagari Nonaccented
इंद्राविष्णू मदपती मदानामा सोमं यातं द्रविणो दधाना ।
सं वामंजंत्वक्तुभिर्मतीनां सं स्तोमासः शस्यमानास उक्थैः ॥
Samhita Transcription Accented
índrāviṣṇū madapatī madānāmā́ sómam yātam dráviṇo dádhānā ǀ
sám vāmañjantvaktúbhirmatīnā́m sám stómāsaḥ śasyámānāsa uktháiḥ ǁ
Samhita Transcription Nonaccented
indrāviṣṇū madapatī madānāmā somam yātam draviṇo dadhānā ǀ
sam vāmañjantvaktubhirmatīnām sam stomāsaḥ śasyamānāsa ukthaiḥ ǁ
Padapatha Devanagari Accented
इन्द्रा॑विष्णू॒ इति॑ । म॒द॒प॒ती॒ इति॑ मदऽपती । म॒दा॒ना॒म् । आ । सोम॑म् । या॒त॒म् । द्रवि॑णो॒ इति॑ । दधा॑ना ।
सम् । वा॒म् । अ॒ञ्ज॒न्तु॒ । अ॒क्तुऽभिः॑ । म॒ती॒नाम् । सम् । स्तोमा॑सः । श॒स्यमा॑नासः । उ॒क्थैः ॥
Padapatha Devanagari Nonaccented
इन्द्राविष्णू इति । मदपती इति मदऽपती । मदानाम् । आ । सोमम् । यातम् । द्रविणो इति । दधाना ।
सम् । वाम् । अञ्जन्तु । अक्तुऽभिः । मतीनाम् । सम् । स्तोमासः । शस्यमानासः । उक्थैः ॥
Padapatha Transcription Accented
índrāviṣṇū íti ǀ madapatī íti mada-patī ǀ madānām ǀ ā́ ǀ sómam ǀ yātam ǀ dráviṇo íti ǀ dádhānā ǀ
sám ǀ vām ǀ añjantu ǀ aktú-bhiḥ ǀ matīnā́m ǀ sám ǀ stómāsaḥ ǀ śasyámānāsaḥ ǀ uktháiḥ ǁ
Padapatha Transcription Nonaccented
indrāviṣṇū iti ǀ madapatī iti mada-patī ǀ madānām ǀ ā ǀ somam ǀ yātam ǀ draviṇo iti ǀ dadhānā ǀ
sam ǀ vām ǀ añjantu ǀ aktu-bhiḥ ǀ matīnām ǀ sam ǀ stomāsaḥ ǀ śasyamānāsaḥ ǀ ukthaiḥ ǁ
06.069.04 (Mandala. Sukta. Rik)
5.1.13.04 (Ashtaka. Adhyaya. Varga. Rik)
06.06.071 (Mandala. Anuvāka. Rik)
Samhita Devanagari Accented
आ वा॒मश्वा॑सो अभिमाति॒षाह॒ इंद्रा॑विष्णू सध॒मादो॑ वहंतु ।
जु॒षेथां॒ विश्वा॒ हव॑ना मती॒नामुप॒ ब्रह्मा॑णि शृणुतं॒ गिरो॑ मे ॥
Samhita Devanagari Nonaccented
आ वामश्वासो अभिमातिषाह इंद्राविष्णू सधमादो वहंतु ।
जुषेथां विश्वा हवना मतीनामुप ब्रह्माणि शृणुतं गिरो मे ॥
Samhita Transcription Accented
ā́ vāmáśvāso abhimātiṣā́ha índrāviṣṇū sadhamā́do vahantu ǀ
juṣéthām víśvā hávanā matīnā́múpa bráhmāṇi śṛṇutam gíro me ǁ
Samhita Transcription Nonaccented
ā vāmaśvāso abhimātiṣāha indrāviṣṇū sadhamādo vahantu ǀ
juṣethām viśvā havanā matīnāmupa brahmāṇi śṛṇutam giro me ǁ
Padapatha Devanagari Accented
आ । वा॒म् । अश्वा॑सः । अ॒भि॒मा॒ति॒ऽसहः॑ । इन्द्रा॑विष्णू॒ इति॑ । स॒ध॒ऽमादः॑ । व॒ह॒न्तु॒ ।
जु॒षेथा॑म् । विश्वा॑ । हव॑ना । म॒ती॒नाम् । उप॑ । ब्रह्मा॑णि । शृ॒णु॒त॒म् । गिरः॑ । मे॒ ॥
Padapatha Devanagari Nonaccented
आ । वाम् । अश्वासः । अभिमातिऽसहः । इन्द्राविष्णू इति । सधऽमादः । वहन्तु ।
जुषेथाम् । विश्वा । हवना । मतीनाम् । उप । ब्रह्माणि । शृणुतम् । गिरः । मे ॥
Padapatha Transcription Accented
ā́ ǀ vām ǀ áśvāsaḥ ǀ abhimāti-sáhaḥ ǀ índrāviṣṇū íti ǀ sadha-mā́daḥ ǀ vahantu ǀ
juṣéthām ǀ víśvā ǀ hávanā ǀ matīnā́m ǀ úpa ǀ bráhmāṇi ǀ śṛṇutam ǀ gíraḥ ǀ me ǁ
Padapatha Transcription Nonaccented
ā ǀ vām ǀ aśvāsaḥ ǀ abhimāti-sahaḥ ǀ indrāviṣṇū iti ǀ sadha-mādaḥ ǀ vahantu ǀ
juṣethām ǀ viśvā ǀ havanā ǀ matīnām ǀ upa ǀ brahmāṇi ǀ śṛṇutam ǀ giraḥ ǀ me ǁ
06.069.05 (Mandala. Sukta. Rik)
5.1.13.05 (Ashtaka. Adhyaya. Varga. Rik)
06.06.072 (Mandala. Anuvāka. Rik)
Samhita Devanagari Accented
इंद्रा॑विष्णू॒ तत्प॑न॒याय्यं॑ वां॒ सोम॑स्य॒ मद॑ उ॒रु च॑क्रमाथे ।
अकृ॑णुतमं॒तरि॑क्षं॒ वरी॒योऽप्र॑थतं जी॒वसे॑ नो॒ रजां॑सि ॥
Samhita Devanagari Nonaccented
इंद्राविष्णू तत्पनयाय्यं वां सोमस्य मद उरु चक्रमाथे ।
अकृणुतमंतरिक्षं वरीयोऽप्रथतं जीवसे नो रजांसि ॥
Samhita Transcription Accented
índrāviṣṇū tátpanayā́yyam vām sómasya máda urú cakramāthe ǀ
ákṛṇutamantárikṣam várīyó’prathatam jīváse no rájāṃsi ǁ
Samhita Transcription Nonaccented
indrāviṣṇū tatpanayāyyam vām somasya mada uru cakramāthe ǀ
akṛṇutamantarikṣam varīyo’prathatam jīvase no rajāṃsi ǁ
Padapatha Devanagari Accented
इन्द्रा॑विष्णू॒ इति॑ । तत् । प॒न॒याय्य॑म् । वा॒म् । सोम॑स्य । मदे॑ । उ॒रु । च॒क्र॒मा॒थे॒ इति॑ ।
अकृ॑णुतम् । अ॒न्तरि॑क्षम् । वरी॑यः । अप्र॑थतम् । जी॒वसे॑ । नः॒ । रजां॑सि ॥
Padapatha Devanagari Nonaccented
इन्द्राविष्णू इति । तत् । पनयाय्यम् । वाम् । सोमस्य । मदे । उरु । चक्रमाथे इति ।
अकृणुतम् । अन्तरिक्षम् । वरीयः । अप्रथतम् । जीवसे । नः । रजांसि ॥
Padapatha Transcription Accented
índrāviṣṇū íti ǀ tát ǀ panayā́yyam ǀ vām ǀ sómasya ǀ máde ǀ urú ǀ cakramāthe íti ǀ
ákṛṇutam ǀ antárikṣam ǀ várīyaḥ ǀ áprathatam ǀ jīváse ǀ naḥ ǀ rájāṃsi ǁ
Padapatha Transcription Nonaccented
indrāviṣṇū iti ǀ tat ǀ panayāyyam ǀ vām ǀ somasya ǀ made ǀ uru ǀ cakramāthe iti ǀ
akṛṇutam ǀ antarikṣam ǀ varīyaḥ ǀ aprathatam ǀ jīvase ǀ naḥ ǀ rajāṃsi ǁ
06.069.06 (Mandala. Sukta. Rik)
5.1.13.06 (Ashtaka. Adhyaya. Varga. Rik)
06.06.073 (Mandala. Anuvāka. Rik)
Samhita Devanagari Accented
इंद्रा॑विष्णू ह॒विषा॑ वावृधा॒नाग्रा॑द्वाना॒ नम॑सा रातहव्या ।
घृता॑सुती॒ द्रवि॑णं धत्तम॒स्मे स॑मु॒द्रः स्थः॑ क॒लशः॑ सोम॒धानः॑ ॥
Samhita Devanagari Nonaccented
इंद्राविष्णू हविषा वावृधानाग्राद्वाना नमसा रातहव्या ।
घृतासुती द्रविणं धत्तमस्मे समुद्रः स्थः कलशः सोमधानः ॥
Samhita Transcription Accented
índrāviṣṇū havíṣā vāvṛdhānā́grādvānā námasā rātahavyā ǀ
ghṛ́tāsutī dráviṇam dhattamasmé samudráḥ sthaḥ kaláśaḥ somadhā́naḥ ǁ
Samhita Transcription Nonaccented
indrāviṣṇū haviṣā vāvṛdhānāgrādvānā namasā rātahavyā ǀ
ghṛtāsutī draviṇam dhattamasme samudraḥ sthaḥ kalaśaḥ somadhānaḥ ǁ
Padapatha Devanagari Accented
इन्द्रा॑विष्णू॒ इति॑ । ह॒विषा॑ । व॒वृ॒धा॒ना । अग्र॑ऽअद्वाना । नम॑सा । रा॒त॒ऽह॒व्या॒ ।
घृता॑सुती॒ इति॒ घृत॑ऽआसुती । द्रवि॑णम् । ध॒त्त॒म् । अ॒स्मे इति॑ । स॒मु॒द्रः । स्थः॒ । क॒लशः॑ । सो॒म॒ऽधानः॑ ॥
Padapatha Devanagari Nonaccented
इन्द्राविष्णू इति । हविषा । ववृधाना । अग्रऽअद्वाना । नमसा । रातऽहव्या ।
घृतासुती इति घृतऽआसुती । द्रविणम् । धत्तम् । अस्मे इति । समुद्रः । स्थः । कलशः । सोमऽधानः ॥
Padapatha Transcription Accented
índrāviṣṇū íti ǀ havíṣā ǀ vavṛdhānā́ ǀ ágra-advānā ǀ námasā ǀ rāta-havyā ǀ
ghṛ́tāsutī íti ghṛ́ta-āsutī ǀ dráviṇam ǀ dhattam ǀ asmé íti ǀ samudráḥ ǀ sthaḥ ǀ kaláśaḥ ǀ soma-dhā́naḥ ǁ
Padapatha Transcription Nonaccented
indrāviṣṇū iti ǀ haviṣā ǀ vavṛdhānā ǀ agra-advānā ǀ namasā ǀ rāta-havyā ǀ
ghṛtāsutī iti ghṛta-āsutī ǀ draviṇam ǀ dhattam ǀ asme iti ǀ samudraḥ ǀ sthaḥ ǀ kalaśaḥ ǀ soma-dhānaḥ ǁ
06.069.07 (Mandala. Sukta. Rik)
5.1.13.07 (Ashtaka. Adhyaya. Varga. Rik)
06.06.074 (Mandala. Anuvāka. Rik)
Samhita Devanagari Accented
इंद्रा॑विष्णू॒ पिब॑तं॒ मध्वो॑ अ॒स्य सोम॑स्य दस्रा ज॒ठरं॑ पृणेथां ।
आ वा॒मंधां॑सि मदि॒राण्य॑ग्म॒न्नुप॒ ब्रह्मा॑णि शृणुतं॒ हवं॑ मे ॥
Samhita Devanagari Nonaccented
इंद्राविष्णू पिबतं मध्वो अस्य सोमस्य दस्रा जठरं पृणेथां ।
आ वामंधांसि मदिराण्यग्मन्नुप ब्रह्माणि शृणुतं हवं मे ॥
Samhita Transcription Accented
índrāviṣṇū píbatam mádhvo asyá sómasya dasrā jaṭháram pṛṇethām ǀ
ā́ vāmándhāṃsi madirā́ṇyagmannúpa bráhmāṇi śṛṇutam hávam me ǁ
Samhita Transcription Nonaccented
indrāviṣṇū pibatam madhvo asya somasya dasrā jaṭharam pṛṇethām ǀ
ā vāmandhāṃsi madirāṇyagmannupa brahmāṇi śṛṇutam havam me ǁ
Padapatha Devanagari Accented
इन्द्रा॑विष्णू॒ इति॑ । पिब॑तम् । मध्वः॑ । अ॒स्य । सोम॑स्य । द॒स्रा॒ । ज॒ठर॑म् । पृ॒णे॒था॒म् ।
आ । वा॒म् । अन्धां॑सि । म॒दि॒राणि॑ । अ॒ग्म॒न् । उप॑ । ब्रह्मा॑णि । शृ॒णु॒त॒म् । हव॑म् । मे॒ ॥
Padapatha Devanagari Nonaccented
इन्द्राविष्णू इति । पिबतम् । मध्वः । अस्य । सोमस्य । दस्रा । जठरम् । पृणेथाम् ।
आ । वाम् । अन्धांसि । मदिराणि । अग्मन् । उप । ब्रह्माणि । शृणुतम् । हवम् । मे ॥
Padapatha Transcription Accented
índrāviṣṇū íti ǀ píbatam ǀ mádhvaḥ ǀ asyá ǀ sómasya ǀ dasrā ǀ jaṭháram ǀ pṛṇethām ǀ
ā́ ǀ vām ǀ ándhāṃsi ǀ madirā́ṇi ǀ agman ǀ úpa ǀ bráhmāṇi ǀ śṛṇutam ǀ hávam ǀ me ǁ
Padapatha Transcription Nonaccented
indrāviṣṇū iti ǀ pibatam ǀ madhvaḥ ǀ asya ǀ somasya ǀ dasrā ǀ jaṭharam ǀ pṛṇethām ǀ
ā ǀ vām ǀ andhāṃsi ǀ madirāṇi ǀ agman ǀ upa ǀ brahmāṇi ǀ śṛṇutam ǀ havam ǀ me ǁ
06.069.08 (Mandala. Sukta. Rik)
5.1.13.08 (Ashtaka. Adhyaya. Varga. Rik)
06.06.075 (Mandala. Anuvāka. Rik)
Samhita Devanagari Accented
उ॒भा जि॑ग्यथु॒र्न परा॑ जयेथे॒ न परा॑ जिग्ये कत॒रश्च॒नैनोः॑ ।
इंद्र॑श्च विष्णो॒ यदप॑स्पृधेथां त्रे॒धा स॒हस्रं॒ वि तदै॑रयेथां ॥
Samhita Devanagari Nonaccented
उभा जिग्यथुर्न परा जयेथे न परा जिग्ये कतरश्चनैनोः ।
इंद्रश्च विष्णो यदपस्पृधेथां त्रेधा सहस्रं वि तदैरयेथां ॥
Samhita Transcription Accented
ubhā́ jigyathurná párā jayethe ná párā jigye kataráścanáinoḥ ǀ
índraśca viṣṇo yádápaspṛdhethām tredhā́ sahásram ví tádairayethām ǁ
Samhita Transcription Nonaccented
ubhā jigyathurna parā jayethe na parā jigye kataraścanainoḥ ǀ
indraśca viṣṇo yadapaspṛdhethām tredhā sahasram vi tadairayethām ǁ
Padapatha Devanagari Accented
उ॒भा । जि॒ग्य॒थुः॒ । न । परा॑ । ज॒ये॒थे॒ इति॑ । न । परा॑ । जि॒ग्ये॒ । क॒त॒रः । च॒न । ए॒नोः॒ ।
इन्द्रः॑ । च॒ । वि॒ष्णो॒ इति॑ । यत् । अप॑स्पृधेथाम् । त्रे॒धा । स॒हस्र॑म् । वि । तत् । ऐ॒र॒ये॒था॒म् ॥
Padapatha Devanagari Nonaccented
उभा । जिग्यथुः । न । परा । जयेथे इति । न । परा । जिग्ये । कतरः । चन । एनोः ।
इन्द्रः । च । विष्णो इति । यत् । अपस्पृधेथाम् । त्रेधा । सहस्रम् । वि । तत् । ऐरयेथाम् ॥
Padapatha Transcription Accented
ubhā́ ǀ jigyathuḥ ǀ ná ǀ párā ǀ jayethe íti ǀ ná ǀ párā ǀ jigye ǀ kataráḥ ǀ caná ǀ enoḥ ǀ
índraḥ ǀ ca ǀ viṣṇo íti ǀ yát ǀ ápaspṛdhethām ǀ tredhā́ ǀ sahásram ǀ ví ǀ tát ǀ airayethām ǁ
Padapatha Transcription Nonaccented
ubhā ǀ jigyathuḥ ǀ na ǀ parā ǀ jayethe iti ǀ na ǀ parā ǀ jigye ǀ kataraḥ ǀ cana ǀ enoḥ ǀ
indraḥ ǀ ca ǀ viṣṇo iti ǀ yat ǀ apaspṛdhethām ǀ tredhā ǀ sahasram ǀ vi ǀ tat ǀ airayethām ǁ