|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 73
|
1. Info |
| To: | bṛhaspati | |
| From: | bharadvāja bārhaspatya | |
| Metres: | 1st set of styles: triṣṭup (1, 2); virāṭtrisṭup (3) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.073.01 (Mandala. Sukta. Rik)
5.1.17.01 (Ashtaka. Adhyaya. Varga. Rik)
06.06.093 (Mandala. Anuvāka. Rik)
Samhita Devanagari Accented
यो अ॑द्रि॒भित्प्र॑थम॒जा ऋ॒तावा॒ बृह॒स्पति॑रांगिर॒सो ह॒विष्मा॑न् ।
द्वि॒बर्ह॑ज्मा प्राघर्म॒सत्पि॒ता न॒ आ रोद॑सी वृष॒भो रो॑रवीति ॥
Samhita Devanagari Nonaccented
यो अद्रिभित्प्रथमजा ऋतावा बृहस्पतिरांगिरसो हविष्मान् ।
द्विबर्हज्मा प्राघर्मसत्पिता न आ रोदसी वृषभो रोरवीति ॥
Samhita Transcription Accented
yó adribhítprathamajā́ ṛtā́vā bṛ́haspátirāṅgirasó havíṣmān ǀ
dvibárhajmā prāgharmasátpitā́ na ā́ ródasī vṛṣabhó roravīti ǁ
Samhita Transcription Nonaccented
yo adribhitprathamajā ṛtāvā bṛhaspatirāṅgiraso haviṣmān ǀ
dvibarhajmā prāgharmasatpitā na ā rodasī vṛṣabho roravīti ǁ
Padapatha Devanagari Accented
यः । अ॒द्रि॒ऽभित् । प्र॒थ॒म॒ऽजाः । ऋ॒तऽवा॑ । बृह॒स्पतिः॑ । आ॒ङ्गि॒र॒सः । ह॒विष्मा॑न् ।
द्वि॒बर्ह॑ऽज्मा । प्रा॒घ॒र्म॒ऽसत् । पि॒ता । नः॒ । आ । रोद॑सी॒ इति॑ । वृ॒ष॒भः । रो॒र॒वी॒ति॒ ॥
Padapatha Devanagari Nonaccented
यः । अद्रिऽभित् । प्रथमऽजाः । ऋतऽवा । बृहस्पतिः । आङ्गिरसः । हविष्मान् ।
द्विबर्हऽज्मा । प्राघर्मऽसत् । पिता । नः । आ । रोदसी इति । वृषभः । रोरवीति ॥
Padapatha Transcription Accented
yáḥ ǀ adri-bhít ǀ prathama-jā́ḥ ǀ ṛtá-vā ǀ bṛ́haspátiḥ ǀ āṅgirasáḥ ǀ havíṣmān ǀ
dvibárha-jmā ǀ prāgharma-sát ǀ pitā́ ǀ naḥ ǀ ā́ ǀ ródasī íti ǀ vṛṣabháḥ ǀ roravīti ǁ
Padapatha Transcription Nonaccented
yaḥ ǀ adri-bhit ǀ prathama-jāḥ ǀ ṛta-vā ǀ bṛhaspatiḥ ǀ āṅgirasaḥ ǀ haviṣmān ǀ
dvibarha-jmā ǀ prāgharma-sat ǀ pitā ǀ naḥ ǀ ā ǀ rodasī iti ǀ vṛṣabhaḥ ǀ roravīti ǁ
06.073.02 (Mandala. Sukta. Rik)
5.1.17.02 (Ashtaka. Adhyaya. Varga. Rik)
06.06.094 (Mandala. Anuvāka. Rik)
Samhita Devanagari Accented
जना॑य चि॒द्य ईव॑त उ लो॒कं बृह॒स्पति॑र्दे॒वहू॑तौ च॒कार॑ ।
घ्नन्वृ॒त्राणि॒ वि पुरो॑ दर्दरीति॒ जय॒ञ्छत्रूँ॑र॒मित्रा॑न्पृ॒त्सु साह॑न् ॥
Samhita Devanagari Nonaccented
जनाय चिद्य ईवत उ लोकं बृहस्पतिर्देवहूतौ चकार ।
घ्नन्वृत्राणि वि पुरो दर्दरीति जयञ्छत्रूँरमित्रान्पृत्सु साहन् ॥
Samhita Transcription Accented
jánāya cidyá ī́vata u lokám bṛ́haspátirdeváhūtau cakā́ra ǀ
ghnánvṛtrā́ṇi ví púro dardarīti jáyañchátrūm̐ramítrānpṛtsú sā́han ǁ
Samhita Transcription Nonaccented
janāya cidya īvata u lokam bṛhaspatirdevahūtau cakāra ǀ
ghnanvṛtrāṇi vi puro dardarīti jayañchatrūm̐ramitrānpṛtsu sāhan ǁ
Padapatha Devanagari Accented
जना॑य । चि॒त् । यः । ईव॑ते । ऊं॒ इति॑ । लो॒कम् । बृह॒स्पतिः॑ । दे॒वऽहू॑तौ । च॒कार॑ ।
घ्नन् । वृ॒त्राणि॑ । वि । पुरः॑ । द॒र्द॒री॒ति॒ । जय॑न् । शत्रू॑न् । अ॒मित्रा॑न् । पृ॒त्ऽसु । सह॑न् ॥
Padapatha Devanagari Nonaccented
जनाय । चित् । यः । ईवते । ऊं इति । लोकम् । बृहस्पतिः । देवऽहूतौ । चकार ।
घ्नन् । वृत्राणि । वि । पुरः । दर्दरीति । जयन् । शत्रून् । अमित्रान् । पृत्ऽसु । सहन् ॥
Padapatha Transcription Accented
jánāya ǀ cit ǀ yáḥ ǀ ī́vate ǀ ūṃ íti ǀ lokám ǀ bṛ́haspátiḥ ǀ devá-hūtau ǀ cakā́ra ǀ
ghnán ǀ vṛtrā́ṇi ǀ ví ǀ púraḥ ǀ dardarīti ǀ jáyan ǀ śátrūn ǀ amítrān ǀ pṛt-sú ǀ sáhan ǁ
Padapatha Transcription Nonaccented
janāya ǀ cit ǀ yaḥ ǀ īvate ǀ ūṃ iti ǀ lokam ǀ bṛhaspatiḥ ǀ deva-hūtau ǀ cakāra ǀ
ghnan ǀ vṛtrāṇi ǀ vi ǀ puraḥ ǀ dardarīti ǀ jayan ǀ śatrūn ǀ amitrān ǀ pṛt-su ǀ sahan ǁ
06.073.03 (Mandala. Sukta. Rik)
5.1.17.03 (Ashtaka. Adhyaya. Varga. Rik)
06.06.095 (Mandala. Anuvāka. Rik)
Samhita Devanagari Accented
बृह॒स्पतिः॒ सम॑जय॒द्वसू॑नि म॒हो व्र॒जान् गोम॑तो दे॒व ए॒षः ।
अ॒पः सिषा॑स॒न्त्स्व१॒॑रप्र॑तीतो॒ बृह॒स्पति॒र्हंत्य॒मित्र॑म॒र्कैः ॥
Samhita Devanagari Nonaccented
बृहस्पतिः समजयद्वसूनि महो व्रजान् गोमतो देव एषः ।
अपः सिषासन्त्स्वरप्रतीतो बृहस्पतिर्हंत्यमित्रमर्कैः ॥
Samhita Transcription Accented
bṛ́haspátiḥ sámajayadvásūni mahó vrajā́n gómato devá eṣáḥ ǀ
apáḥ síṣāsantsvárápratīto bṛ́haspátirhántyamítramarkáiḥ ǁ
Samhita Transcription Nonaccented
bṛhaspatiḥ samajayadvasūni maho vrajān gomato deva eṣaḥ ǀ
apaḥ siṣāsantsvarapratīto bṛhaspatirhantyamitramarkaiḥ ǁ
Padapatha Devanagari Accented
बृह॒स्पतिः॑ । सम् । अ॒ज॒य॒त् । वसू॑नि । म॒हः । व्र॒जान् । गोऽम॑तः । दे॒वः । ए॒षः ।
अ॒पः । सिसा॑सन् । स्वः॑ । अप्र॑तिऽइतः । बृह॒स्पतिः॑ । हन्ति॑ । अ॒मित्र॑म् । अ॒र्कैः ॥
Padapatha Devanagari Nonaccented
बृहस्पतिः । सम् । अजयत् । वसूनि । महः । व्रजान् । गोऽमतः । देवः । एषः ।
अपः । सिसासन् । स्वः । अप्रतिऽइतः । बृहस्पतिः । हन्ति । अमित्रम् । अर्कैः ॥
Padapatha Transcription Accented
bṛ́haspátiḥ ǀ sám ǀ ajayat ǀ vásūni ǀ maháḥ ǀ vrajā́n ǀ gó-mataḥ ǀ deváḥ ǀ eṣáḥ ǀ
apáḥ ǀ sísāsan ǀ sváḥ ǀ áprati-itaḥ ǀ bṛ́haspátiḥ ǀ hánti ǀ amítram ǀ arkáiḥ ǁ
Padapatha Transcription Nonaccented
bṛhaspatiḥ ǀ sam ǀ ajayat ǀ vasūni ǀ mahaḥ ǀ vrajān ǀ go-mataḥ ǀ devaḥ ǀ eṣaḥ ǀ
apaḥ ǀ sisāsan ǀ svaḥ ǀ aprati-itaḥ ǀ bṛhaspatiḥ ǀ hanti ǀ amitram ǀ arkaiḥ ǁ