|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 6
Sūkta 75
|
1. Info |
| To: | 1: varman; 2: dhanu; 3: jyā; 4: ārtnī; 5: iṣudhi; 6: sārathi, raṣmaya; 7: aṣvās; 8: ratha; 9: rathopāḥ; 10: liṅgoktadevatās; 11, 12, 15, 16: iṣavaḥ; 13, 14: pratodaḥ; 17-19: liṅgoktadevatās who help in battle |
|
| From: | pāyu bhāradvāja | |
| Metres: | 1st set of styles: triṣṭup (2, 4, 5, 7-9, 11, 14, 18); nicṛttriṣṭup (1, 3); virāḍanuṣṭup (12, 19); jagatī (6); virāḍjagatī (10); svarāḍuṣnik (13); nicṛdanuṣṭup (15); anuṣṭup (16); paṅktiḥ (17) 2nd set of styles: triṣṭubh (1-5, 7-9, 11, 14, 17, 18); anuṣṭubh (12, 13, 15, 16, 19); jagatī (6, 10) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
06.075.01 (Mandala. Sukta. Rik)
5.1.19.01 (Ashtaka. Adhyaya. Varga. Rik)
06.06.100 (Mandala. Anuvāka. Rik)
Samhita Devanagari Accented
जी॒मूत॑स्येव भवति॒ प्रती॑कं॒ यद्व॒र्मी याति॑ स॒मदा॑मु॒पस्थे॑ ।
अना॑विद्धया त॒न्वा॑ जय॒ त्वं स त्वा॒ वर्म॑णो महि॒मा पि॑पर्तु ॥
Samhita Devanagari Nonaccented
जीमूतस्येव भवति प्रतीकं यद्वर्मी याति समदामुपस्थे ।
अनाविद्धया तन्वा जय त्वं स त्वा वर्मणो महिमा पिपर्तु ॥
Samhita Transcription Accented
jīmū́tasyeva bhavati prátīkam yádvarmī́ yā́ti samádāmupásthe ǀ
ánāviddhayā tanvā́ jaya tvám sá tvā vármaṇo mahimā́ pipartu ǁ
Samhita Transcription Nonaccented
jīmūtasyeva bhavati pratīkam yadvarmī yāti samadāmupasthe ǀ
anāviddhayā tanvā jaya tvam sa tvā varmaṇo mahimā pipartu ǁ
Padapatha Devanagari Accented
जी॒मूत॑स्यऽइव । भ॒व॒ति॒ । प्रती॑कम् । यत् । व॒र्मी । याति॑ । स॒ऽमदा॑म् । उ॒पऽस्थे॑ ।
अना॑विद्धया । त॒न्वा॑ । ज॒य॒ । त्वम् । सः । त्वा॒ । वर्म॑णः । म॒हि॒मा । पि॒प॒र्तु॒ ॥
Padapatha Devanagari Nonaccented
जीमूतस्यऽइव । भवति । प्रतीकम् । यत् । वर्मी । याति । सऽमदाम् । उपऽस्थे ।
अनाविद्धया । तन्वा । जय । त्वम् । सः । त्वा । वर्मणः । महिमा । पिपर्तु ॥
Padapatha Transcription Accented
jīmū́tasya-iva ǀ bhavati ǀ prátīkam ǀ yát ǀ varmī́ ǀ yā́ti ǀ sa-mádām ǀ upá-sthe ǀ
ánāviddhayā ǀ tanvā́ ǀ jaya ǀ tvám ǀ sáḥ ǀ tvā ǀ vármaṇaḥ ǀ mahimā́ ǀ pipartu ǁ
Padapatha Transcription Nonaccented
jīmūtasya-iva ǀ bhavati ǀ pratīkam ǀ yat ǀ varmī ǀ yāti ǀ sa-madām ǀ upa-sthe ǀ
anāviddhayā ǀ tanvā ǀ jaya ǀ tvam ǀ saḥ ǀ tvā ǀ varmaṇaḥ ǀ mahimā ǀ pipartu ǁ
06.075.02 (Mandala. Sukta. Rik)
5.1.19.02 (Ashtaka. Adhyaya. Varga. Rik)
06.06.101 (Mandala. Anuvāka. Rik)
Samhita Devanagari Accented
धन्व॑ना॒ गा धन्व॑ना॒जिं ज॑येम॒ धन्व॑ना ती॒व्राः स॒मदो॑ जयेम ।
धनुः॒ शत्रो॑रपका॒मं कृ॑णोति॒ धन्व॑ना॒ सर्वाः॑ प्र॒दिशो॑ जयेम ॥
Samhita Devanagari Nonaccented
धन्वना गा धन्वनाजिं जयेम धन्वना तीव्राः समदो जयेम ।
धनुः शत्रोरपकामं कृणोति धन्वना सर्वाः प्रदिशो जयेम ॥
Samhita Transcription Accented
dhánvanā gā́ dhánvanājím jayema dhánvanā tīvrā́ḥ samádo jayema ǀ
dhánuḥ śátrorapakāmám kṛṇoti dhánvanā sárvāḥ pradíśo jayema ǁ
Samhita Transcription Nonaccented
dhanvanā gā dhanvanājim jayema dhanvanā tīvrāḥ samado jayema ǀ
dhanuḥ śatrorapakāmam kṛṇoti dhanvanā sarvāḥ pradiśo jayema ǁ
Padapatha Devanagari Accented
धन्व॑ना । गाः । धन्व॑ना । आ॒जिम् । ज॒ये॒म॒ । धन्व॑ना । ती॒व्राः । स॒ऽमदः॑ । ज॒ये॒म॒ ।
धनुः॑ । शत्रोः॑ । अ॒प॒ऽका॒मम् । कृ॒णो॒ति॒ । धन्व॑ना । सर्वाः॑ । प्र॒ऽदिशः॑ । ज॒ये॒म॒ ॥
Padapatha Devanagari Nonaccented
धन्वना । गाः । धन्वना । आजिम् । जयेम । धन्वना । तीव्राः । सऽमदः । जयेम ।
धनुः । शत्रोः । अपऽकामम् । कृणोति । धन्वना । सर्वाः । प्रऽदिशः । जयेम ॥
Padapatha Transcription Accented
dhánvanā ǀ gā́ḥ ǀ dhánvanā ǀ ājím ǀ jayema ǀ dhánvanā ǀ tīvrā́ḥ ǀ sa-mádaḥ ǀ jayema ǀ
dhánuḥ ǀ śátroḥ ǀ apa-kāmám ǀ kṛṇoti ǀ dhánvanā ǀ sárvāḥ ǀ pra-díśaḥ ǀ jayema ǁ
Padapatha Transcription Nonaccented
dhanvanā ǀ gāḥ ǀ dhanvanā ǀ ājim ǀ jayema ǀ dhanvanā ǀ tīvrāḥ ǀ sa-madaḥ ǀ jayema ǀ
dhanuḥ ǀ śatroḥ ǀ apa-kāmam ǀ kṛṇoti ǀ dhanvanā ǀ sarvāḥ ǀ pra-diśaḥ ǀ jayema ǁ
06.075.03 (Mandala. Sukta. Rik)
5.1.19.03 (Ashtaka. Adhyaya. Varga. Rik)
06.06.102 (Mandala. Anuvāka. Rik)
Samhita Devanagari Accented
व॒क्ष्यंती॒वेदा ग॑नीगंति॒ कर्णं॑ प्रि॒यं सखा॑यं परिषस्वजा॒ना ।
योषे॑व शिंक्ते॒ वित॒ताधि॒ धन्व॒ञ्ज्या इ॒यं सम॑ने पा॒रयं॑ती ॥
Samhita Devanagari Nonaccented
वक्ष्यंतीवेदा गनीगंति कर्णं प्रियं सखायं परिषस्वजाना ।
योषेव शिंक्ते वितताधि धन्वञ्ज्या इयं समने पारयंती ॥
Samhita Transcription Accented
vakṣyántīvédā́ ganīganti kárṇam priyám sákhāyam pariṣasvajānā́ ǀ
yóṣeva śiṅkte vítatā́dhi dhánvañjyā́ iyám sámane pāráyantī ǁ
Samhita Transcription Nonaccented
vakṣyantīvedā ganīganti karṇam priyam sakhāyam pariṣasvajānā ǀ
yoṣeva śiṅkte vitatādhi dhanvañjyā iyam samane pārayantī ǁ
Padapatha Devanagari Accented
व॒क्ष्यन्ती॑ऽइव । इत् । आ । ग॒नी॒ग॒न्ति॒ । कर्ण॑म् । प्रि॒यम् । सखा॑यम् । प॒रि॒ऽस॒स्व॒जा॒ना ।
योषा॑ऽइव । शि॒ङ्क्ते॒ । विऽत॑ता । अधि॑ । धन्व॑न् । ज्या । इ॒यम् । सम॑ने । पा॒रय॑न्ती ॥
Padapatha Devanagari Nonaccented
वक्ष्यन्तीऽइव । इत् । आ । गनीगन्ति । कर्णम् । प्रियम् । सखायम् । परिऽसस्वजाना ।
योषाऽइव । शिङ्क्ते । विऽतता । अधि । धन्वन् । ज्या । इयम् । समने । पारयन्ती ॥
Padapatha Transcription Accented
vakṣyántī-iva ǀ ít ǀ ā́ ǀ ganīganti ǀ kárṇam ǀ priyám ǀ sákhāyam ǀ pari-sasvajānā́ ǀ
yóṣā-iva ǀ śiṅkte ǀ ví-tatā ǀ ádhi ǀ dhánvan ǀ jyā́ ǀ iyám ǀ sámane ǀ pāráyantī ǁ
Padapatha Transcription Nonaccented
vakṣyantī-iva ǀ it ǀ ā ǀ ganīganti ǀ karṇam ǀ priyam ǀ sakhāyam ǀ pari-sasvajānā ǀ
yoṣā-iva ǀ śiṅkte ǀ vi-tatā ǀ adhi ǀ dhanvan ǀ jyā ǀ iyam ǀ samane ǀ pārayantī ǁ
06.075.04 (Mandala. Sukta. Rik)
5.1.19.04 (Ashtaka. Adhyaya. Varga. Rik)
06.06.103 (Mandala. Anuvāka. Rik)
Samhita Devanagari Accented
ते आ॒चरं॑ती॒ सम॑नेव॒ योषा॑ मा॒तेव॑ पु॒त्रं बि॑भृतामु॒पस्थे॑ ।
अप॒ शत्रू॑न्विध्यतां संविदा॒ने आर्त्नी॑ इ॒मे वि॑ष्फु॒रंती॑ अ॒मित्रा॑न् ॥
Samhita Devanagari Nonaccented
ते आचरंती समनेव योषा मातेव पुत्रं बिभृतामुपस्थे ।
अप शत्रून्विध्यतां संविदाने आर्त्नी इमे विष्फुरंती अमित्रान् ॥
Samhita Transcription Accented
té ācárantī sámaneva yóṣā mātéva putrám bibhṛtāmupásthe ǀ
ápa śátrūnvidhyatām saṃvidāné ā́rtnī imé viṣphurántī amítrān ǁ
Samhita Transcription Nonaccented
te ācarantī samaneva yoṣā māteva putram bibhṛtāmupasthe ǀ
apa śatrūnvidhyatām saṃvidāne ārtnī ime viṣphurantī amitrān ǁ
Padapatha Devanagari Accented
ते इति॑ । आ॒चर॑न्ती॒ इत्या॒ऽचर॑न्ती । सम॑नाऽइव । योषा॑ । मा॒ताऽइ॑व । पु॒त्रम् । बि॒भृ॒ता॒म् । उ॒पऽस्थे॑ ।
अप॑ । शत्रू॑न् । वि॒ध्य॒ता॒म् । सं॒वि॒दा॒ने इति॑ स॒म्ऽवि॒दा॒ने । आ॒र्त्नी इति॑ । इ॒मे इति॑ । वि॒स्फु॒रन्ती॒ इति॑ वि॒ऽस्फु॒रन्ती॑ । अ॒मित्रा॑न् ॥
Padapatha Devanagari Nonaccented
ते इति । आचरन्ती इत्याऽचरन्ती । समनाऽइव । योषा । माताऽइव । पुत्रम् । बिभृताम् । उपऽस्थे ।
अप । शत्रून् । विध्यताम् । संविदाने इति सम्ऽविदाने । आर्त्नी इति । इमे इति । विस्फुरन्ती इति विऽस्फुरन्ती । अमित्रान् ॥
Padapatha Transcription Accented
té íti ǀ ācárantī ítyā-cárantī ǀ sámanā-iva ǀ yóṣā ǀ mātā́-iva ǀ putrám ǀ bibhṛtām ǀ upá-sthe ǀ
ápa ǀ śátrūn ǀ vidhyatām ǀ saṃvidāné íti sam-vidāné ǀ ārtnī́ íti ǀ imé íti ǀ visphurántī íti vi-sphurántī ǀ amítrān ǁ
Padapatha Transcription Nonaccented
te iti ǀ ācarantī ityā-carantī ǀ samanā-iva ǀ yoṣā ǀ mātā-iva ǀ putram ǀ bibhṛtām ǀ upa-sthe ǀ
apa ǀ śatrūn ǀ vidhyatām ǀ saṃvidāne iti sam-vidāne ǀ ārtnī iti ǀ ime iti ǀ visphurantī iti vi-sphurantī ǀ amitrān ǁ
06.075.05 (Mandala. Sukta. Rik)
5.1.19.05 (Ashtaka. Adhyaya. Varga. Rik)
06.06.104 (Mandala. Anuvāka. Rik)
Samhita Devanagari Accented
ब॒ह्वी॒नां पि॒ता ब॒हुर॑स्य पु॒त्रश्चि॒श्चा कृ॑णोति॒ सम॑नाव॒गत्य॑ ।
इ॒षु॒धिः संकाः॒ पृत॑नाश्च॒ सर्वाः॑ पृ॒ष्ठे निन॑द्धो जयति॒ प्रसू॑तः ॥
Samhita Devanagari Nonaccented
बह्वीनां पिता बहुरस्य पुत्रश्चिश्चा कृणोति समनावगत्य ।
इषुधिः संकाः पृतनाश्च सर्वाः पृष्ठे निनद्धो जयति प्रसूतः ॥
Samhita Transcription Accented
bahvīnā́m pitā́ bahúrasya putráściścā́ kṛṇoti sámanāvagátya ǀ
iṣudhíḥ sáṅkāḥ pṛ́tanāśca sárvāḥ pṛṣṭhé nínaddho jayati prásūtaḥ ǁ
Samhita Transcription Nonaccented
bahvīnām pitā bahurasya putraściścā kṛṇoti samanāvagatya ǀ
iṣudhiḥ saṅkāḥ pṛtanāśca sarvāḥ pṛṣṭhe ninaddho jayati prasūtaḥ ǁ
Padapatha Devanagari Accented
ब॒ह्वी॒नाम् । पि॒ता । ब॒हुः । अ॒स्य । पु॒त्रः । चि॒श्चा । कृ॒णो॒ति॒ । सम॑ना । अ॒व॒ऽगत्य॑ ।
इ॒षु॒ऽधिः । सङ्काः॑ । पृत॑नाः । च॒ । सर्वाः॑ । पृ॒ष्ठे । निऽन॑द्धः । ज॒य॒ति॒ । प्रऽसू॑तः ॥
Padapatha Devanagari Nonaccented
बह्वीनाम् । पिता । बहुः । अस्य । पुत्रः । चिश्चा । कृणोति । समना । अवऽगत्य ।
इषुऽधिः । सङ्काः । पृतनाः । च । सर्वाः । पृष्ठे । निऽनद्धः । जयति । प्रऽसूतः ॥
Padapatha Transcription Accented
bahvīnā́m ǀ pitā́ ǀ bahúḥ ǀ asyá ǀ putráḥ ǀ ciścā́ ǀ kṛṇoti ǀ sámanā ǀ ava-gátya ǀ
iṣu-dhíḥ ǀ sáṅkāḥ ǀ pṛ́tanāḥ ǀ ca ǀ sárvāḥ ǀ pṛṣṭhé ǀ ní-naddhaḥ ǀ jayati ǀ prá-sūtaḥ ǁ
Padapatha Transcription Nonaccented
bahvīnām ǀ pitā ǀ bahuḥ ǀ asya ǀ putraḥ ǀ ciścā ǀ kṛṇoti ǀ samanā ǀ ava-gatya ǀ
iṣu-dhiḥ ǀ saṅkāḥ ǀ pṛtanāḥ ǀ ca ǀ sarvāḥ ǀ pṛṣṭhe ǀ ni-naddhaḥ ǀ jayati ǀ pra-sūtaḥ ǁ
06.075.06 (Mandala. Sukta. Rik)
5.1.20.01 (Ashtaka. Adhyaya. Varga. Rik)
06.06.105 (Mandala. Anuvāka. Rik)
Samhita Devanagari Accented
रथे॒ तिष्ठ॑न्नयति वा॒जिनः॑ पु॒रो यत्र॑यत्र का॒मय॑ते सुषार॒थिः ।
अ॒भीशू॑नां महि॒मानं॑ पनायत॒ मनः॑ प॒श्चादनु॑ यच्छंति र॒श्मयः॑ ॥
Samhita Devanagari Nonaccented
रथे तिष्ठन्नयति वाजिनः पुरो यत्रयत्र कामयते सुषारथिः ।
अभीशूनां महिमानं पनायत मनः पश्चादनु यच्छंति रश्मयः ॥
Samhita Transcription Accented
ráthe tíṣṭhannayati vājínaḥ puró yátrayatra kāmáyate suṣārathíḥ ǀ
abhī́śūnām mahimā́nam panāyata mánaḥ paścā́dánu yacchanti raśmáyaḥ ǁ
Samhita Transcription Nonaccented
rathe tiṣṭhannayati vājinaḥ puro yatrayatra kāmayate suṣārathiḥ ǀ
abhīśūnām mahimānam panāyata manaḥ paścādanu yacchanti raśmayaḥ ǁ
Padapatha Devanagari Accented
रथे॑ । तिष्ठ॑न् । न॒य॒ति॒ । वा॒जिनः॑ । पु॒रः । यत्र॑ऽयत्र । का॒मय॑ते । सु॒ऽसा॒र॒थिः ।
अ॒भीशू॑नाम् । म॒हि॒मान॑म् । प॒ना॒य॒त॒ । मनः॑ । प॒श्चात् । अनु॑ । य॒च्छ॒न्ति॒ । र॒श्मयः॑ ॥
Padapatha Devanagari Nonaccented
रथे । तिष्ठन् । नयति । वाजिनः । पुरः । यत्रऽयत्र । कामयते । सुऽसारथिः ।
अभीशूनाम् । महिमानम् । पनायत । मनः । पश्चात् । अनु । यच्छन्ति । रश्मयः ॥
Padapatha Transcription Accented
ráthe ǀ tíṣṭhan ǀ nayati ǀ vājínaḥ ǀ puráḥ ǀ yátra-yatra ǀ kāmáyate ǀ su-sārathíḥ ǀ
abhī́śūnām ǀ mahimā́nam ǀ panāyata ǀ mánaḥ ǀ paścā́t ǀ ánu ǀ yacchanti ǀ raśmáyaḥ ǁ
Padapatha Transcription Nonaccented
rathe ǀ tiṣṭhan ǀ nayati ǀ vājinaḥ ǀ puraḥ ǀ yatra-yatra ǀ kāmayate ǀ su-sārathiḥ ǀ
abhīśūnām ǀ mahimānam ǀ panāyata ǀ manaḥ ǀ paścāt ǀ anu ǀ yacchanti ǀ raśmayaḥ ǁ
06.075.07 (Mandala. Sukta. Rik)
5.1.20.02 (Ashtaka. Adhyaya. Varga. Rik)
06.06.106 (Mandala. Anuvāka. Rik)
Samhita Devanagari Accented
ती॒व्रान्घोषा॑न्कृण्वते॒ वृष॑पाण॒योऽश्वा॒ रथे॑भिः स॒ह वा॒जयं॑तः ।
अ॒व॒क्रामं॑तः॒ प्रप॑दैर॒मित्रा॑न् क्षि॒णंति॒ शत्रूँ॒रन॑पव्ययंतः ॥
Samhita Devanagari Nonaccented
तीव्रान्घोषान्कृण्वते वृषपाणयोऽश्वा रथेभिः सह वाजयंतः ।
अवक्रामंतः प्रपदैरमित्रान् क्षिणंति शत्रूँरनपव्ययंतः ॥
Samhita Transcription Accented
tīvrā́nghóṣānkṛṇvate vṛ́ṣapāṇayó’śvā ráthebhiḥ sahá vājáyantaḥ ǀ
avakrā́mantaḥ prápadairamítrān kṣiṇánti śátrūm̐ránapavyayantaḥ ǁ
Samhita Transcription Nonaccented
tīvrānghoṣānkṛṇvate vṛṣapāṇayo’śvā rathebhiḥ saha vājayantaḥ ǀ
avakrāmantaḥ prapadairamitrān kṣiṇanti śatrūm̐ranapavyayantaḥ ǁ
Padapatha Devanagari Accented
ती॒व्रान् । घोषा॑न् । कृ॒ण्व॒ते॒ । वृष॑ऽपाणयः । अश्वाः॑ । रथे॑भिः । स॒ह । वा॒जय॑न्तः ।
अ॒व॒ऽक्राम॑न्तः । प्रऽप॑दैः । अ॒मित्रा॑न् । क्षि॒णन्ति॑ । शत्रू॑न् । अन॑पऽव्ययन्तः ॥
Padapatha Devanagari Nonaccented
तीव्रान् । घोषान् । कृण्वते । वृषऽपाणयः । अश्वाः । रथेभिः । सह । वाजयन्तः ।
अवऽक्रामन्तः । प्रऽपदैः । अमित्रान् । क्षिणन्ति । शत्रून् । अनपऽव्ययन्तः ॥
Padapatha Transcription Accented
tīvrā́n ǀ ghóṣān ǀ kṛṇvate ǀ vṛ́ṣa-pāṇayaḥ ǀ áśvāḥ ǀ ráthebhiḥ ǀ sahá ǀ vājáyantaḥ ǀ
ava-krā́mantaḥ ǀ prá-padaiḥ ǀ amítrān ǀ kṣiṇánti ǀ śátrūn ǀ ánapa-vyayantaḥ ǁ
Padapatha Transcription Nonaccented
tīvrān ǀ ghoṣān ǀ kṛṇvate ǀ vṛṣa-pāṇayaḥ ǀ aśvāḥ ǀ rathebhiḥ ǀ saha ǀ vājayantaḥ ǀ
ava-krāmantaḥ ǀ pra-padaiḥ ǀ amitrān ǀ kṣiṇanti ǀ śatrūn ǀ anapa-vyayantaḥ ǁ
06.075.08 (Mandala. Sukta. Rik)
5.1.20.03 (Ashtaka. Adhyaya. Varga. Rik)
06.06.107 (Mandala. Anuvāka. Rik)
Samhita Devanagari Accented
र॒थ॒वाह॑नं ह॒विर॑स्य॒ नाम॒ यत्रायु॑धं॒ निहि॑तमस्य॒ वर्म॑ ।
तत्रा॒ रथ॒मुप॑ श॒ग्मं स॑देम वि॒श्वाहा॑ व॒यं सु॑मन॒स्यमा॑नाः ॥
Samhita Devanagari Nonaccented
रथवाहनं हविरस्य नाम यत्रायुधं निहितमस्य वर्म ।
तत्रा रथमुप शग्मं सदेम विश्वाहा वयं सुमनस्यमानाः ॥
Samhita Transcription Accented
rathavā́hanam havírasya nā́ma yátrā́yudham níhitamasya várma ǀ
tátrā ráthamúpa śagmám sadema viśvā́hā vayám sumanasyámānāḥ ǁ
Samhita Transcription Nonaccented
rathavāhanam havirasya nāma yatrāyudham nihitamasya varma ǀ
tatrā rathamupa śagmam sadema viśvāhā vayam sumanasyamānāḥ ǁ
Padapatha Devanagari Accented
र॒थ॒ऽवाह॑नम् । ह॒विः । अ॒स्य॒ । नाम॑ । यत्र॑ । आयु॑धम् । निऽहि॑तम् । अ॒स्य॒ । वर्म॑ ।
तत्र॑ । रथ॑म् । उप॑ । श॒ग्मम् । स॒दे॒म॒ । वि॒श्वाहा॑ । व॒यम् । सु॒ऽम॒न॒स्यमा॑नाः ॥
Padapatha Devanagari Nonaccented
रथऽवाहनम् । हविः । अस्य । नाम । यत्र । आयुधम् । निऽहितम् । अस्य । वर्म ।
तत्र । रथम् । उप । शग्मम् । सदेम । विश्वाहा । वयम् । सुऽमनस्यमानाः ॥
Padapatha Transcription Accented
ratha-vā́hanam ǀ havíḥ ǀ asya ǀ nā́ma ǀ yátra ǀ ā́yudham ǀ ní-hitam ǀ asya ǀ várma ǀ
tátra ǀ rátham ǀ úpa ǀ śagmám ǀ sadema ǀ viśvā́hā ǀ vayám ǀ su-manasyámānāḥ ǁ
Padapatha Transcription Nonaccented
ratha-vāhanam ǀ haviḥ ǀ asya ǀ nāma ǀ yatra ǀ āyudham ǀ ni-hitam ǀ asya ǀ varma ǀ
tatra ǀ ratham ǀ upa ǀ śagmam ǀ sadema ǀ viśvāhā ǀ vayam ǀ su-manasyamānāḥ ǁ
06.075.09 (Mandala. Sukta. Rik)
5.1.20.04 (Ashtaka. Adhyaya. Varga. Rik)
06.06.108 (Mandala. Anuvāka. Rik)
Samhita Devanagari Accented
स्वा॒दु॒षं॒सदः॑ पि॒तरो॑ वयो॒धाः कृ॑च्छ्रे॒श्रितः॒ शक्ती॑वंतो गभी॒राः ।
चि॒त्रसे॑ना॒ इषु॑बला॒ अमृ॑ध्राः स॒तोवी॑रा उ॒रवो॑ व्रातसा॒हाः ॥
Samhita Devanagari Nonaccented
स्वादुषंसदः पितरो वयोधाः कृच्छ्रेश्रितः शक्तीवंतो गभीराः ।
चित्रसेना इषुबला अमृध्राः सतोवीरा उरवो व्रातसाहाः ॥
Samhita Transcription Accented
svāduṣaṃsádaḥ pitáro vayodhā́ḥ kṛcchreśrítaḥ śáktīvanto gabhīrā́ḥ ǀ
citrásenā íṣubalā ámṛdhrāḥ satóvīrā urávo vrātasāhā́ḥ ǁ
Samhita Transcription Nonaccented
svāduṣaṃsadaḥ pitaro vayodhāḥ kṛcchreśritaḥ śaktīvanto gabhīrāḥ ǀ
citrasenā iṣubalā amṛdhrāḥ satovīrā uravo vrātasāhāḥ ǁ
Padapatha Devanagari Accented
स्वा॒दु॒ऽसं॒सदः॑ । पि॒तरः॑ । व॒यः॒ऽधाः । कृ॒च्छ्रे॒ऽश्रितः॑ । शक्ति॑ऽवन्तः । ग॒भी॒राः ।
चि॒त्रऽसे॑नाः । इषु॑ऽबलाः । अमृ॑ध्राः । स॒तःऽवी॑राः । उ॒रवः॑ । व्रा॒त॒ऽस॒हाः ॥
Padapatha Devanagari Nonaccented
स्वादुऽसंसदः । पितरः । वयःऽधाः । कृच्छ्रेऽश्रितः । शक्तिऽवन्तः । गभीराः ।
चित्रऽसेनाः । इषुऽबलाः । अमृध्राः । सतःऽवीराः । उरवः । व्रातऽसहाः ॥
Padapatha Transcription Accented
svādu-saṃsádaḥ ǀ pitáraḥ ǀ vayaḥ-dhā́ḥ ǀ kṛcchre-śrítaḥ ǀ śákti-vantaḥ ǀ gabhīrā́ḥ ǀ
citrá-senāḥ ǀ íṣu-balāḥ ǀ ámṛdhrāḥ ǀ satáḥ-vīrāḥ ǀ urávaḥ ǀ vrāta-sahā́ḥ ǁ
Padapatha Transcription Nonaccented
svādu-saṃsadaḥ ǀ pitaraḥ ǀ vayaḥ-dhāḥ ǀ kṛcchre-śritaḥ ǀ śakti-vantaḥ ǀ gabhīrāḥ ǀ
citra-senāḥ ǀ iṣu-balāḥ ǀ amṛdhrāḥ ǀ sataḥ-vīrāḥ ǀ uravaḥ ǀ vrāta-sahāḥ ǁ
06.075.10 (Mandala. Sukta. Rik)
5.1.20.05 (Ashtaka. Adhyaya. Varga. Rik)
06.06.109 (Mandala. Anuvāka. Rik)
Samhita Devanagari Accented
ब्राह्म॑णासः॒ पित॑रः॒ सोम्या॑सः शि॒वे नो॒ द्यावा॑पृथि॒वी अ॑ने॒हसा॑ ।
पू॒षा नः॑ पातु दुरि॒तादृ॑तावृधो॒ रक्षा॒ माकि॑र्नो अ॒घशं॑स ईशत ॥
Samhita Devanagari Nonaccented
ब्राह्मणासः पितरः सोम्यासः शिवे नो द्यावापृथिवी अनेहसा ।
पूषा नः पातु दुरितादृतावृधो रक्षा माकिर्नो अघशंस ईशत ॥
Samhita Transcription Accented
brā́hmaṇāsaḥ pítaraḥ sómyāsaḥ śivé no dyā́vāpṛthivī́ anehásā ǀ
pūṣā́ naḥ pātu duritā́dṛtāvṛdho rákṣā mā́kirno agháśaṃsa īśata ǁ
Samhita Transcription Nonaccented
brāhmaṇāsaḥ pitaraḥ somyāsaḥ śive no dyāvāpṛthivī anehasā ǀ
pūṣā naḥ pātu duritādṛtāvṛdho rakṣā mākirno aghaśaṃsa īśata ǁ
Padapatha Devanagari Accented
ब्राह्म॑णासः । पित॑रः । सोम्या॑सः । शि॒वे इति॑ । नः॒ । द्यावा॑पृथि॒वी इति॑ । अ॒ने॒हसा॑ ।
पू॒षा । नः॒ । पा॒तु॒ । दुः॒ऽइ॒तात् । ऋ॒त॒ऽवृ॒धः॒ । रक्ष॑ । माकिः॑ । नः॒ । अ॒घऽशं॑सः । ई॒श॒त॒ ॥
Padapatha Devanagari Nonaccented
ब्राह्मणासः । पितरः । सोम्यासः । शिवे इति । नः । द्यावापृथिवी इति । अनेहसा ।
पूषा । नः । पातु । दुःऽइतात् । ऋतऽवृधः । रक्ष । माकिः । नः । अघऽशंसः । ईशत ॥
Padapatha Transcription Accented
brā́hmaṇāsaḥ ǀ pítaraḥ ǀ sómyāsaḥ ǀ śivé íti ǀ naḥ ǀ dyā́vāpṛthivī́ íti ǀ anehásā ǀ
pūṣā́ ǀ naḥ ǀ pātu ǀ duḥ-itā́t ǀ ṛta-vṛdhaḥ ǀ rákṣa ǀ mā́kiḥ ǀ naḥ ǀ aghá-śaṃsaḥ ǀ īśata ǁ
Padapatha Transcription Nonaccented
brāhmaṇāsaḥ ǀ pitaraḥ ǀ somyāsaḥ ǀ śive iti ǀ naḥ ǀ dyāvāpṛthivī iti ǀ anehasā ǀ
pūṣā ǀ naḥ ǀ pātu ǀ duḥ-itāt ǀ ṛta-vṛdhaḥ ǀ rakṣa ǀ mākiḥ ǀ naḥ ǀ agha-śaṃsaḥ ǀ īśata ǁ
06.075.11 (Mandala. Sukta. Rik)
5.1.21.01 (Ashtaka. Adhyaya. Varga. Rik)
06.06.110 (Mandala. Anuvāka. Rik)
Samhita Devanagari Accented
सु॒प॒र्णं व॑स्ते मृ॒गो अ॑स्या॒ दंतो॒ गोभिः॒ संन॑द्धा पतति॒ प्रसू॑ता ।
यत्रा॒ नरः॒ सं च॒ वि च॒ द्रवं॑ति॒ तत्रा॒स्मभ्य॒मिष॑वः॒ शर्म॑ यंसन् ॥
Samhita Devanagari Nonaccented
सुपर्णं वस्ते मृगो अस्या दंतो गोभिः संनद्धा पतति प्रसूता ।
यत्रा नरः सं च वि च द्रवंति तत्रास्मभ्यमिषवः शर्म यंसन् ॥
Samhita Transcription Accented
suparṇám vaste mṛgó asyā dánto góbhiḥ sáṃnaddhā patati prásūtā ǀ
yátrā náraḥ sám ca ví ca drávanti tátrāsmábhyamíṣavaḥ śárma yaṃsan ǁ
Samhita Transcription Nonaccented
suparṇam vaste mṛgo asyā danto gobhiḥ saṃnaddhā patati prasūtā ǀ
yatrā naraḥ sam ca vi ca dravanti tatrāsmabhyamiṣavaḥ śarma yaṃsan ǁ
Padapatha Devanagari Accented
सु॒ऽप॒र्णम् । व॒स्ते॒ । मृ॒गः । अ॒स्याः॒ । दन्तः॑ । गोभिः॑ । सम्ऽन॑द्धा । प॒त॒ति॒ । प्रऽसू॑ता ।
यत्र॑ । नरः॑ । सम् । च॒ । वि । च॒ । द्रव॑न्ति । तत्र॑ । अ॒स्मभ्य॑म् । इष॑वः । शर्म॑ । यं॒स॒न् ॥
Padapatha Devanagari Nonaccented
सुऽपर्णम् । वस्ते । मृगः । अस्याः । दन्तः । गोभिः । सम्ऽनद्धा । पतति । प्रऽसूता ।
यत्र । नरः । सम् । च । वि । च । द्रवन्ति । तत्र । अस्मभ्यम् । इषवः । शर्म । यंसन् ॥
Padapatha Transcription Accented
su-parṇám ǀ vaste ǀ mṛgáḥ ǀ asyāḥ ǀ dántaḥ ǀ góbhiḥ ǀ sám-naddhā ǀ patati ǀ prá-sūtā ǀ
yátra ǀ náraḥ ǀ sám ǀ ca ǀ ví ǀ ca ǀ drávanti ǀ tátra ǀ asmábhyam ǀ íṣavaḥ ǀ śárma ǀ yaṃsan ǁ
Padapatha Transcription Nonaccented
su-parṇam ǀ vaste ǀ mṛgaḥ ǀ asyāḥ ǀ dantaḥ ǀ gobhiḥ ǀ sam-naddhā ǀ patati ǀ pra-sūtā ǀ
yatra ǀ naraḥ ǀ sam ǀ ca ǀ vi ǀ ca ǀ dravanti ǀ tatra ǀ asmabhyam ǀ iṣavaḥ ǀ śarma ǀ yaṃsan ǁ
06.075.12 (Mandala. Sukta. Rik)
5.1.21.02 (Ashtaka. Adhyaya. Varga. Rik)
06.06.111 (Mandala. Anuvāka. Rik)
Samhita Devanagari Accented
ऋजी॑ते॒ परि॑ वृङ्धि॒ नोऽश्मा॑ भवतु नस्त॒नूः ।
सोमो॒ अधि॑ ब्रवीतु॒ नोऽदि॑तिः॒ शर्म॑ यच्छतु ॥
Samhita Devanagari Nonaccented
ऋजीते परि वृङ्धि नोऽश्मा भवतु नस्तनूः ।
सोमो अधि ब्रवीतु नोऽदितिः शर्म यच्छतु ॥
Samhita Transcription Accented
ṛ́jīte pári vṛṅdhi nó’śmā bhavatu nastanū́ḥ ǀ
sómo ádhi bravītu nó’ditiḥ śárma yacchatu ǁ
Samhita Transcription Nonaccented
ṛjīte pari vṛṅdhi no’śmā bhavatu nastanūḥ ǀ
somo adhi bravītu no’ditiḥ śarma yacchatu ǁ
Padapatha Devanagari Accented
ऋजी॑ते । परि॑ । वृ॒ङ्धि॒ । नः॒ । अश्मा॑ । भ॒व॒तु॒ । नः॒ । त॒नूः ।
सोमः॑ । अधि॑ । ब्र॒वी॒तु॒ । नः॒ । अदि॑तिः । शर्म॑ । य॒च्छ॒तु॒ ॥
Padapatha Devanagari Nonaccented
ऋजीते । परि । वृङ्धि । नः । अश्मा । भवतु । नः । तनूः ।
सोमः । अधि । ब्रवीतु । नः । अदितिः । शर्म । यच्छतु ॥
Padapatha Transcription Accented
ṛ́jīte ǀ pári ǀ vṛṅdhi ǀ naḥ ǀ áśmā ǀ bhavatu ǀ naḥ ǀ tanū́ḥ ǀ
sómaḥ ǀ ádhi ǀ bravītu ǀ naḥ ǀ áditiḥ ǀ śárma ǀ yacchatu ǁ
Padapatha Transcription Nonaccented
ṛjīte ǀ pari ǀ vṛṅdhi ǀ naḥ ǀ aśmā ǀ bhavatu ǀ naḥ ǀ tanūḥ ǀ
somaḥ ǀ adhi ǀ bravītu ǀ naḥ ǀ aditiḥ ǀ śarma ǀ yacchatu ǁ
06.075.13 (Mandala. Sukta. Rik)
5.1.21.03 (Ashtaka. Adhyaya. Varga. Rik)
06.06.112 (Mandala. Anuvāka. Rik)
Samhita Devanagari Accented
आ जं॑घंति॒ सान्वे॑षां ज॒घनाँ॒ उप॑ जिघ्नते ।
अश्वा॑जनि॒ प्रचे॑त॒सोऽश्वा॑न्त्स॒मत्सु॑ चोदय ॥
Samhita Devanagari Nonaccented
आ जंघंति सान्वेषां जघनाँ उप जिघ्नते ।
अश्वाजनि प्रचेतसोऽश्वान्त्समत्सु चोदय ॥
Samhita Transcription Accented
ā́ jaṅghanti sā́nveṣām jaghánām̐ úpa jighnate ǀ
áśvājani prácetasó’śvāntsamátsu codaya ǁ
Samhita Transcription Nonaccented
ā jaṅghanti sānveṣām jaghanām̐ upa jighnate ǀ
aśvājani pracetaso’śvāntsamatsu codaya ǁ
Padapatha Devanagari Accented
आ । ज॒ङ्घ॒न्ति॒ । सानु॑ । ए॒षा॒म् । ज॒घना॑न् । उप॑ । जि॒घ्न॒ते॒ ।
अश्व॑ऽअजनि । प्रऽचे॑तसः । अश्वा॑न् । स॒मत्ऽसु॑ । चो॒द॒य॒ ॥
Padapatha Devanagari Nonaccented
आ । जङ्घन्ति । सानु । एषाम् । जघनान् । उप । जिघ्नते ।
अश्वऽअजनि । प्रऽचेतसः । अश्वान् । समत्ऽसु । चोदय ॥
Padapatha Transcription Accented
ā́ ǀ jaṅghanti ǀ sā́nu ǀ eṣām ǀ jaghánān ǀ úpa ǀ jighnate ǀ
áśva-ajani ǀ prá-cetasaḥ ǀ áśvān ǀ samát-su ǀ codaya ǁ
Padapatha Transcription Nonaccented
ā ǀ jaṅghanti ǀ sānu ǀ eṣām ǀ jaghanān ǀ upa ǀ jighnate ǀ
aśva-ajani ǀ pra-cetasaḥ ǀ aśvān ǀ samat-su ǀ codaya ǁ
06.075.14 (Mandala. Sukta. Rik)
5.1.21.04 (Ashtaka. Adhyaya. Varga. Rik)
06.06.113 (Mandala. Anuvāka. Rik)
Samhita Devanagari Accented
अहि॑रिव भो॒गैः पर्ये॑ति बा॒हुं ज्याया॑ हे॒तिं प॑रि॒बाध॑मानः ।
ह॒स्त॒घ्नो विश्वा॑ व॒युना॑नि वि॒द्वान्पुमा॒न्पुमां॑सं॒ परि॑ पातु वि॒श्वतः॑ ॥
Samhita Devanagari Nonaccented
अहिरिव भोगैः पर्येति बाहुं ज्याया हेतिं परिबाधमानः ।
हस्तघ्नो विश्वा वयुनानि विद्वान्पुमान्पुमांसं परि पातु विश्वतः ॥
Samhita Transcription Accented
áhiriva bhogáiḥ páryeti bāhúm jyā́yā hetím paribā́dhamānaḥ ǀ
hastaghnó víśvā vayúnāni vidvā́npúmānpúmāṃsam pári pātu viśvátaḥ ǁ
Samhita Transcription Nonaccented
ahiriva bhogaiḥ paryeti bāhum jyāyā hetim paribādhamānaḥ ǀ
hastaghno viśvā vayunāni vidvānpumānpumāṃsam pari pātu viśvataḥ ǁ
Padapatha Devanagari Accented
अहिः॑ऽइव । भो॒गैः । परि॑ । ए॒ति॒ । बा॒हुम् । ज्यायाः॑ । हे॒तिम् । प॒रि॒ऽबाध॑मानः ।
ह॒स्त॒ऽघ्नः । विश्वा॑ । व॒युना॑नि । वि॒द्वान् । पुमा॑न् । पुमां॑सम् । परि॑ । पा॒तु॒ । वि॒श्वतः॑ ॥
Padapatha Devanagari Nonaccented
अहिःऽइव । भोगैः । परि । एति । बाहुम् । ज्यायाः । हेतिम् । परिऽबाधमानः ।
हस्तऽघ्नः । विश्वा । वयुनानि । विद्वान् । पुमान् । पुमांसम् । परि । पातु । विश्वतः ॥
Padapatha Transcription Accented
áhiḥ-iva ǀ bhogáiḥ ǀ pári ǀ eti ǀ bāhúm ǀ jyā́yāḥ ǀ hetím ǀ pari-bā́dhamānaḥ ǀ
hasta-ghnáḥ ǀ víśvā ǀ vayúnāni ǀ vidvā́n ǀ púmān ǀ púmāṃsam ǀ pári ǀ pātu ǀ viśvátaḥ ǁ
Padapatha Transcription Nonaccented
ahiḥ-iva ǀ bhogaiḥ ǀ pari ǀ eti ǀ bāhum ǀ jyāyāḥ ǀ hetim ǀ pari-bādhamānaḥ ǀ
hasta-ghnaḥ ǀ viśvā ǀ vayunāni ǀ vidvān ǀ pumān ǀ pumāṃsam ǀ pari ǀ pātu ǀ viśvataḥ ǁ
06.075.15 (Mandala. Sukta. Rik)
5.1.21.05 (Ashtaka. Adhyaya. Varga. Rik)
06.06.114 (Mandala. Anuvāka. Rik)
Samhita Devanagari Accented
आला॑क्ता॒ या रुरु॑शी॒र्ष्ण्यथो॒ यस्या॒ अयो॒ मुखं॑ ।
इ॒दं प॒र्जन्य॑रेतस॒ इष्वै॑ दे॒व्यै बृ॒हन्नमः॑ ॥
Samhita Devanagari Nonaccented
आलाक्ता या रुरुशीर्ष्ण्यथो यस्या अयो मुखं ।
इदं पर्जन्यरेतस इष्वै देव्यै बृहन्नमः ॥
Samhita Transcription Accented
ā́lāktā yā́ rúruśīrṣṇyátho yásyā áyo múkham ǀ
idám parjányaretasa íṣvai devyái bṛhánnámaḥ ǁ
Samhita Transcription Nonaccented
ālāktā yā ruruśīrṣṇyatho yasyā ayo mukham ǀ
idam parjanyaretasa iṣvai devyai bṛhannamaḥ ǁ
Padapatha Devanagari Accented
आल॑ऽअक्ता । या । रुरु॑ऽशीर्ष्णी । अथो॒ इति॑ । यस्याः॑ । अयः॑ । मुख॑म् ।
इ॒दम् । प॒र्जन्य॑ऽरेतसे । इष्वै॑ । दे॒व्यै । बृ॒हत् । नमः॑ ॥
Padapatha Devanagari Nonaccented
आलऽअक्ता । या । रुरुऽशीर्ष्णी । अथो इति । यस्याः । अयः । मुखम् ।
इदम् । पर्जन्यऽरेतसे । इष्वै । देव्यै । बृहत् । नमः ॥
Padapatha Transcription Accented
ā́la-aktā ǀ yā́ ǀ rúru-śīrṣṇī ǀ átho íti ǀ yásyāḥ ǀ áyaḥ ǀ múkham ǀ
idám ǀ parjánya-retase ǀ íṣvai ǀ devyái ǀ bṛhát ǀ námaḥ ǁ
Padapatha Transcription Nonaccented
āla-aktā ǀ yā ǀ ruru-śīrṣṇī ǀ atho iti ǀ yasyāḥ ǀ ayaḥ ǀ mukham ǀ
idam ǀ parjanya-retase ǀ iṣvai ǀ devyai ǀ bṛhat ǀ namaḥ ǁ
06.075.16 (Mandala. Sukta. Rik)
5.1.22.01 (Ashtaka. Adhyaya. Varga. Rik)
06.06.115 (Mandala. Anuvāka. Rik)
Samhita Devanagari Accented
अव॑सृष्टा॒ परा॑ पत॒ शर॑व्ये॒ ब्रह्म॑संशिते ।
गच्छा॒मित्रा॒न्प्र प॑द्यस्व॒ मामीषां॒ कं च॒नोच्छि॑षः ॥
Samhita Devanagari Nonaccented
अवसृष्टा परा पत शरव्ये ब्रह्मसंशिते ।
गच्छामित्रान्प्र पद्यस्व मामीषां कं चनोच्छिषः ॥
Samhita Transcription Accented
ávasṛṣṭā párā pata śáravye bráhmasaṃśite ǀ
gácchāmítrānprá padyasva mā́mī́ṣām kám canócchiṣaḥ ǁ
Samhita Transcription Nonaccented
avasṛṣṭā parā pata śaravye brahmasaṃśite ǀ
gacchāmitrānpra padyasva māmīṣām kam canocchiṣaḥ ǁ
Padapatha Devanagari Accented
अव॑ऽसृष्टा । परा॑ । प॒त॒ । शर॑व्ये । ब्रह्म॑ऽसंशिते ।
गच्छ॑ । अ॒मित्रा॑न् । प्र । प॒द्य॒स्व॒ । मा । अ॒मीषा॑म् । कम् । च॒न । उत् । शि॒षः॒ ॥
Padapatha Devanagari Nonaccented
अवऽसृष्टा । परा । पत । शरव्ये । ब्रह्मऽसंशिते ।
गच्छ । अमित्रान् । प्र । पद्यस्व । मा । अमीषाम् । कम् । चन । उत् । शिषः ॥
Padapatha Transcription Accented
áva-sṛṣṭā ǀ párā ǀ pata ǀ śáravye ǀ bráhma-saṃśite ǀ
gáccha ǀ amítrān ǀ prá ǀ padyasva ǀ mā́ ǀ amī́ṣām ǀ kám ǀ caná ǀ út ǀ śiṣaḥ ǁ
Padapatha Transcription Nonaccented
ava-sṛṣṭā ǀ parā ǀ pata ǀ śaravye ǀ brahma-saṃśite ǀ
gaccha ǀ amitrān ǀ pra ǀ padyasva ǀ mā ǀ amīṣām ǀ kam ǀ cana ǀ ut ǀ śiṣaḥ ǁ
06.075.17 (Mandala. Sukta. Rik)
5.1.22.02 (Ashtaka. Adhyaya. Varga. Rik)
06.06.116 (Mandala. Anuvāka. Rik)
Samhita Devanagari Accented
यत्र॑ बा॒णाः सं॒पतं॑ति कुमा॒रा वि॑शि॒खा इ॑व ।
तत्रा॑ नो॒ ब्रह्म॑ण॒स्पति॒रदि॑तिः॒ शर्म॑ यच्छतु वि॒श्वाहा॒ शर्म॑ यच्छतु ॥
Samhita Devanagari Nonaccented
यत्र बाणाः संपतंति कुमारा विशिखा इव ।
तत्रा नो ब्रह्मणस्पतिरदितिः शर्म यच्छतु विश्वाहा शर्म यच्छतु ॥
Samhita Transcription Accented
yátra bāṇā́ḥ sampátanti kumārā́ viśikhā́ iva ǀ
tátrā no bráhmaṇaspátiráditiḥ śárma yacchatu viśvā́hā śárma yacchatu ǁ
Samhita Transcription Nonaccented
yatra bāṇāḥ sampatanti kumārā viśikhā iva ǀ
tatrā no brahmaṇaspatiraditiḥ śarma yacchatu viśvāhā śarma yacchatu ǁ
Padapatha Devanagari Accented
यत्र॑ । बा॒णाः । स॒म्ऽपत॑न्ति । कु॒मा॒राः । वि॒शि॒खाःऽइ॑व ।
तत्र॑ । नः॒ । ब्रह्म॑णः । पतिः॑ । अदि॑तिः । शर्म॑ । य॒च्छ॒तु॒ । वि॒श्वाहा॑ । शर्म॑ । य॒च्छ॒तु॒ ॥
Padapatha Devanagari Nonaccented
यत्र । बाणाः । सम्ऽपतन्ति । कुमाराः । विशिखाःऽइव ।
तत्र । नः । ब्रह्मणः । पतिः । अदितिः । शर्म । यच्छतु । विश्वाहा । शर्म । यच्छतु ॥
Padapatha Transcription Accented
yátra ǀ bāṇā́ḥ ǀ sam-pátanti ǀ kumārā́ḥ ǀ viśikhā́ḥ-iva ǀ
tátra ǀ naḥ ǀ bráhmaṇaḥ ǀ pátiḥ ǀ áditiḥ ǀ śárma ǀ yacchatu ǀ viśvā́hā ǀ śárma ǀ yacchatu ǁ
Padapatha Transcription Nonaccented
yatra ǀ bāṇāḥ ǀ sam-patanti ǀ kumārāḥ ǀ viśikhāḥ-iva ǀ
tatra ǀ naḥ ǀ brahmaṇaḥ ǀ patiḥ ǀ aditiḥ ǀ śarma ǀ yacchatu ǀ viśvāhā ǀ śarma ǀ yacchatu ǁ
06.075.18 (Mandala. Sukta. Rik)
5.1.22.03 (Ashtaka. Adhyaya. Varga. Rik)
06.06.117 (Mandala. Anuvāka. Rik)
Samhita Devanagari Accented
मर्मा॑णि ते॒ वर्म॑णा छादयामि॒ सोम॑स्त्वा॒ राजा॒मृते॒नानु॑ वस्तां ।
उ॒रोर्वरी॑यो॒ वरु॑णस्ते कृणोतु॒ जयं॑तं॒ त्वानु॑ दे॒वा म॑दंतु ॥
Samhita Devanagari Nonaccented
मर्माणि ते वर्मणा छादयामि सोमस्त्वा राजामृतेनानु वस्तां ।
उरोर्वरीयो वरुणस्ते कृणोतु जयंतं त्वानु देवा मदंतु ॥
Samhita Transcription Accented
mármāṇi te vármaṇā chādayāmi sómastvā rā́jāmṛ́tenā́nu vastām ǀ
urórvárīyo váruṇaste kṛṇotu jáyantam tvā́nu devā́ madantu ǁ
Samhita Transcription Nonaccented
marmāṇi te varmaṇā chādayāmi somastvā rājāmṛtenānu vastām ǀ
urorvarīyo varuṇaste kṛṇotu jayantam tvānu devā madantu ǁ
Padapatha Devanagari Accented
मर्मा॑णि । ते॒ । वर्म॑णा । छा॒द॒या॒मि॒ । सोमः॑ । त्वा॒ । राजा॑ । अ॒मृते॑न । अनु॑ । व॒स्ता॒म् ।
उ॒रोः । वरी॑यः । वरु॑णः । ते॒ । कृ॒णो॒तु॒ । जय॑न्तम् । त्वा॒ । अनु॑ । दे॒वाः । म॒द॒न्तु॒ ॥
Padapatha Devanagari Nonaccented
मर्माणि । ते । वर्मणा । छादयामि । सोमः । त्वा । राजा । अमृतेन । अनु । वस्ताम् ।
उरोः । वरीयः । वरुणः । ते । कृणोतु । जयन्तम् । त्वा । अनु । देवाः । मदन्तु ॥
Padapatha Transcription Accented
mármāṇi ǀ te ǀ vármaṇā ǀ chādayāmi ǀ sómaḥ ǀ tvā ǀ rā́jā ǀ amṛ́tena ǀ ánu ǀ vastām ǀ
uróḥ ǀ várīyaḥ ǀ váruṇaḥ ǀ te ǀ kṛṇotu ǀ jáyantam ǀ tvā ǀ ánu ǀ devā́ḥ ǀ madantu ǁ
Padapatha Transcription Nonaccented
marmāṇi ǀ te ǀ varmaṇā ǀ chādayāmi ǀ somaḥ ǀ tvā ǀ rājā ǀ amṛtena ǀ anu ǀ vastām ǀ
uroḥ ǀ varīyaḥ ǀ varuṇaḥ ǀ te ǀ kṛṇotu ǀ jayantam ǀ tvā ǀ anu ǀ devāḥ ǀ madantu ǁ
06.075.19 (Mandala. Sukta. Rik)
5.1.22.04 (Ashtaka. Adhyaya. Varga. Rik)
06.06.118 (Mandala. Anuvāka. Rik)
Samhita Devanagari Accented
यो नः॒ स्वो अर॑णो॒ यश्च॒ निष्ट्यो॒ जिघां॑सति ।
दे॒वास्तं सर्वे॑ धूर्वंतु॒ ब्रह्म॒ वर्म॒ ममांत॑रं ॥
Samhita Devanagari Nonaccented
यो नः स्वो अरणो यश्च निष्ट्यो जिघांसति ।
देवास्तं सर्वे धूर्वंतु ब्रह्म वर्म ममांतरं ॥
Samhita Transcription Accented
yó naḥ svó áraṇo yáśca níṣṭyo jíghāṃsati ǀ
devā́stám sárve dhūrvantu bráhma várma mámā́ntaram ǁ
Samhita Transcription Nonaccented
yo naḥ svo araṇo yaśca niṣṭyo jighāṃsati ǀ
devāstam sarve dhūrvantu brahma varma mamāntaram ǁ
Padapatha Devanagari Accented
यः । नः॒ । स्वः । अर॑णः । यः । च॒ । निष्ट्यः॑ । जिघां॑सति ।
दे॒वाः । तम् । सर्वे॑ । धू॒र्व॒न्तु॒ । ब्रह्म॑ । वर्म॑ । मम॑ । अन्त॑रम् ॥
Padapatha Devanagari Nonaccented
यः । नः । स्वः । अरणः । यः । च । निष्ट्यः । जिघांसति ।
देवाः । तम् । सर्वे । धूर्वन्तु । ब्रह्म । वर्म । मम । अन्तरम् ॥
Padapatha Transcription Accented
yáḥ ǀ naḥ ǀ sváḥ ǀ áraṇaḥ ǀ yáḥ ǀ ca ǀ níṣṭyaḥ ǀ jíghāṃsati ǀ
devā́ḥ ǀ tám ǀ sárve ǀ dhūrvantu ǀ bráhma ǀ várma ǀ máma ǀ ántaram ǁ
Padapatha Transcription Nonaccented
yaḥ ǀ naḥ ǀ svaḥ ǀ araṇaḥ ǀ yaḥ ǀ ca ǀ niṣṭyaḥ ǀ jighāṃsati ǀ
devāḥ ǀ tam ǀ sarve ǀ dhūrvantu ǀ brahma ǀ varma ǀ mama ǀ antaram ǁ