|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 20
|
1. Info |
| To: | indra | |
| From: | vasiṣṭha maitrāvaruṇi | |
| Metres: | 1st set of styles: nicṛttriṣṭup (2, 4, 10); triṣṭup (6, 8, 9); virāṭtrisṭup (3, 5); svarāṭpaṅkti (1); bhurikpaṅkti (7) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.020.01 (Mandala. Sukta. Rik)
5.3.01.01 (Ashtaka. Adhyaya. Varga. Rik)
07.02.037 (Mandala. Anuvāka. Rik)
Samhita Devanagari Accented
उ॒ग्रो ज॑ज्ञे वी॒र्या॑य स्व॒धावां॒चक्रि॒रपो॒ नर्यो॒ यत्क॑रि॒ष्यन् ।
जग्मि॒र्युवा॑ नृ॒षद॑न॒मवो॑भिस्त्रा॒ता न॒ इंद्र॒ एन॑सो म॒हश्चि॑त् ॥
Samhita Devanagari Nonaccented
उग्रो जज्ञे वीर्याय स्वधावांचक्रिरपो नर्यो यत्करिष्यन् ।
जग्मिर्युवा नृषदनमवोभिस्त्राता न इंद्र एनसो महश्चित् ॥
Samhita Transcription Accented
ugró jajñe vīryā́ya svadhā́vāñcákrirápo náryo yátkariṣyán ǀ
jágmiryúvā nṛṣádanamávobhistrātā́ na índra énaso maháścit ǁ
Samhita Transcription Nonaccented
ugro jajñe vīryāya svadhāvāñcakrirapo naryo yatkariṣyan ǀ
jagmiryuvā nṛṣadanamavobhistrātā na indra enaso mahaścit ǁ
Padapatha Devanagari Accented
उ॒ग्रः । ज॒ज्ञे॒ । वी॒र्या॑य । स्व॒धाऽवा॑न् । चक्रिः॑ । अपः॑ । नर्यः॑ । यत् । क॒रि॒ष्यन् ।
जग्मिः॑ । युवा॑ । नृ॒ऽसद॑नम् । अवः॑ऽभिः । त्रा॒ता । नः॒ । इन्द्रः॑ । एन॑सः । म॒हः । चि॒त् ॥
Padapatha Devanagari Nonaccented
उग्रः । जज्ञे । वीर्याय । स्वधाऽवान् । चक्रिः । अपः । नर्यः । यत् । करिष्यन् ।
जग्मिः । युवा । नृऽसदनम् । अवःऽभिः । त्राता । नः । इन्द्रः । एनसः । महः । चित् ॥
Padapatha Transcription Accented
ugráḥ ǀ jajñe ǀ vīryā́ya ǀ svadhā́-vān ǀ cákriḥ ǀ ápaḥ ǀ náryaḥ ǀ yát ǀ kariṣyán ǀ
jágmiḥ ǀ yúvā ǀ nṛ-sádanam ǀ ávaḥ-bhiḥ ǀ trātā́ ǀ naḥ ǀ índraḥ ǀ énasaḥ ǀ maháḥ ǀ cit ǁ
Padapatha Transcription Nonaccented
ugraḥ ǀ jajñe ǀ vīryāya ǀ svadhā-vān ǀ cakriḥ ǀ apaḥ ǀ naryaḥ ǀ yat ǀ kariṣyan ǀ
jagmiḥ ǀ yuvā ǀ nṛ-sadanam ǀ avaḥ-bhiḥ ǀ trātā ǀ naḥ ǀ indraḥ ǀ enasaḥ ǀ mahaḥ ǀ cit ǁ
07.020.02 (Mandala. Sukta. Rik)
5.3.01.02 (Ashtaka. Adhyaya. Varga. Rik)
07.02.038 (Mandala. Anuvāka. Rik)
Samhita Devanagari Accented
हंता॑ वृ॒त्रमिंद्रः॒ शूशु॑वानः॒ प्रावी॒न्नु वी॒रो ज॑रि॒तार॑मू॒ती ।
कर्ता॑ सु॒दासे॒ अह॒ वा उ॑ लो॒कं दाता॒ वसु॒ मुहु॒रा दा॒शुषे॑ भूत् ॥
Samhita Devanagari Nonaccented
हंता वृत्रमिंद्रः शूशुवानः प्रावीन्नु वीरो जरितारमूती ।
कर्ता सुदासे अह वा उ लोकं दाता वसु मुहुरा दाशुषे भूत् ॥
Samhita Transcription Accented
hántā vṛtrámíndraḥ śū́śuvānaḥ prā́vīnnú vīró jaritā́ramūtī́ ǀ
kártā sudā́se áha vā́ u lokám dā́tā vásu múhurā́ dāśúṣe bhūt ǁ
Samhita Transcription Nonaccented
hantā vṛtramindraḥ śūśuvānaḥ prāvīnnu vīro jaritāramūtī ǀ
kartā sudāse aha vā u lokam dātā vasu muhurā dāśuṣe bhūt ǁ
Padapatha Devanagari Accented
हन्ता॑ । वृ॒त्रम् । इन्द्रः॑ । शूशु॑वानः । प्र । आ॒वी॒त् । नु । वी॒रः । ज॒रि॒तार॑म् । ऊ॒ती ।
कर्ता॑ । सु॒ऽदासे॑ । अह॑ । वै । ऊं॒ इति॑ । लो॒कम् । दाता॑ । वसु॑ । मुहुः॑ । आ । दा॒शुषे॑ । भू॒त् ॥
Padapatha Devanagari Nonaccented
हन्ता । वृत्रम् । इन्द्रः । शूशुवानः । प्र । आवीत् । नु । वीरः । जरितारम् । ऊती ।
कर्ता । सुऽदासे । अह । वै । ऊं इति । लोकम् । दाता । वसु । मुहुः । आ । दाशुषे । भूत् ॥
Padapatha Transcription Accented
hántā ǀ vṛtrám ǀ índraḥ ǀ śū́śuvānaḥ ǀ prá ǀ āvīt ǀ nú ǀ vīráḥ ǀ jaritā́ram ǀ ūtī́ ǀ
kártā ǀ su-dā́se ǀ áha ǀ vái ǀ ūṃ íti ǀ lokám ǀ dā́tā ǀ vásu ǀ múhuḥ ǀ ā́ ǀ dāśúṣe ǀ bhūt ǁ
Padapatha Transcription Nonaccented
hantā ǀ vṛtram ǀ indraḥ ǀ śūśuvānaḥ ǀ pra ǀ āvīt ǀ nu ǀ vīraḥ ǀ jaritāram ǀ ūtī ǀ
kartā ǀ su-dāse ǀ aha ǀ vai ǀ ūṃ iti ǀ lokam ǀ dātā ǀ vasu ǀ muhuḥ ǀ ā ǀ dāśuṣe ǀ bhūt ǁ
07.020.03 (Mandala. Sukta. Rik)
5.3.01.03 (Ashtaka. Adhyaya. Varga. Rik)
07.02.039 (Mandala. Anuvāka. Rik)
Samhita Devanagari Accented
यु॒ध्मो अ॑न॒र्वा ख॑ज॒कृत्स॒मद्वा॒ शूरः॑ सत्रा॒षाड् ज॒नुषे॒मषा॑ळ्हः ।
व्या॑स॒ इंद्रः॒ पृत॑नाः॒ स्वोजा॒ अधा॒ विश्वं॑ शत्रू॒यंतं॑ जघान ॥
Samhita Devanagari Nonaccented
युध्मो अनर्वा खजकृत्समद्वा शूरः सत्राषाड् जनुषेमषाळ्हः ।
व्यास इंद्रः पृतनाः स्वोजा अधा विश्वं शत्रूयंतं जघान ॥
Samhita Transcription Accented
yudhmó anarvā́ khajakṛ́tsamádvā śū́raḥ satrāṣā́ḍ janúṣemáṣāḷhaḥ ǀ
vyā́sa índraḥ pṛ́tanāḥ svójā ádhā víśvam śatrūyántam jaghāna ǁ
Samhita Transcription Nonaccented
yudhmo anarvā khajakṛtsamadvā śūraḥ satrāṣāḍ januṣemaṣāḷhaḥ ǀ
vyāsa indraḥ pṛtanāḥ svojā adhā viśvam śatrūyantam jaghāna ǁ
Padapatha Devanagari Accented
यु॒ध्मः । अ॒न॒र्वा । ख॒ज॒ऽकृत् । स॒मत्ऽवा॑ । शूरः॑ । स॒त्रा॒षाट् । ज॒नुषा॑ । ई॒म् । अषा॑ळ्हः ।
वि । आ॒से॒ । इन्द्रः॑ । पृत॑नाः । सु॒ऽओजाः॑ । अध॑ । विश्व॑म् । श॒त्रु॒ऽयन्त॑म् । ज॒घा॒न॒ ॥
Padapatha Devanagari Nonaccented
युध्मः । अनर्वा । खजऽकृत् । समत्ऽवा । शूरः । सत्राषाट् । जनुषा । ईम् । अषाळ्हः ।
वि । आसे । इन्द्रः । पृतनाः । सुऽओजाः । अध । विश्वम् । शत्रुऽयन्तम् । जघान ॥
Padapatha Transcription Accented
yudhmáḥ ǀ anarvā́ ǀ khaja-kṛ́t ǀ samát-vā ǀ śū́raḥ ǀ satrāṣā́ṭ ǀ janúṣā ǀ īm ǀ áṣāḷhaḥ ǀ
ví ǀ āse ǀ índraḥ ǀ pṛ́tanāḥ ǀ su-ójāḥ ǀ ádha ǀ víśvam ǀ śatru-yántam ǀ jaghāna ǁ
Padapatha Transcription Nonaccented
yudhmaḥ ǀ anarvā ǀ khaja-kṛt ǀ samat-vā ǀ śūraḥ ǀ satrāṣāṭ ǀ januṣā ǀ īm ǀ aṣāḷhaḥ ǀ
vi ǀ āse ǀ indraḥ ǀ pṛtanāḥ ǀ su-ojāḥ ǀ adha ǀ viśvam ǀ śatru-yantam ǀ jaghāna ǁ
07.020.04 (Mandala. Sukta. Rik)
5.3.01.04 (Ashtaka. Adhyaya. Varga. Rik)
07.02.040 (Mandala. Anuvāka. Rik)
Samhita Devanagari Accented
उ॒भे चि॑दिंद्र॒ रोद॑सी महि॒त्वा प॑प्राथ॒ तवि॑षीभिस्तुविष्मः ।
नि वज्र॒मिंद्रो॒ हरि॑वा॒न्मिमि॑क्ष॒न्त्समंध॑सा॒ मदे॑षु॒ वा उ॑वोच ॥
Samhita Devanagari Nonaccented
उभे चिदिंद्र रोदसी महित्वा पप्राथ तविषीभिस्तुविष्मः ।
नि वज्रमिंद्रो हरिवान्मिमिक्षन्त्समंधसा मदेषु वा उवोच ॥
Samhita Transcription Accented
ubhé cidindra ródasī mahitvā́ paprātha táviṣībhistuviṣmaḥ ǀ
ní vájramíndro hárivānmímikṣantsámándhasā mádeṣu vā́ uvoca ǁ
Samhita Transcription Nonaccented
ubhe cidindra rodasī mahitvā paprātha taviṣībhistuviṣmaḥ ǀ
ni vajramindro harivānmimikṣantsamandhasā madeṣu vā uvoca ǁ
Padapatha Devanagari Accented
उ॒भे इति॑ । चि॒त् । इ॒न्द्र॒ । रोद॑सी॒ इति॑ । म॒हि॒ऽत्वा । आ । प॒प्रा॒थ॒ । तवि॑षीभिः । तु॒वि॒ष्मः॒ ।
नि । वज्र॑म् । इन्द्रः॑ । हरि॑ऽवान् । मिमि॑क्षन् । सम् । अन्ध॑सा । मदे॑षु । वै । उ॒वो॒च॒ ॥
Padapatha Devanagari Nonaccented
उभे इति । चित् । इन्द्र । रोदसी इति । महिऽत्वा । आ । पप्राथ । तविषीभिः । तुविष्मः ।
नि । वज्रम् । इन्द्रः । हरिऽवान् । मिमिक्षन् । सम् । अन्धसा । मदेषु । वै । उवोच ॥
Padapatha Transcription Accented
ubhé íti ǀ cit ǀ indra ǀ ródasī íti ǀ mahi-tvā́ ǀ ā́ ǀ paprātha ǀ táviṣībhiḥ ǀ tuviṣmaḥ ǀ
ní ǀ vájram ǀ índraḥ ǀ hári-vān ǀ mímikṣan ǀ sám ǀ ándhasā ǀ mádeṣu ǀ vái ǀ uvoca ǁ
Padapatha Transcription Nonaccented
ubhe iti ǀ cit ǀ indra ǀ rodasī iti ǀ mahi-tvā ǀ ā ǀ paprātha ǀ taviṣībhiḥ ǀ tuviṣmaḥ ǀ
ni ǀ vajram ǀ indraḥ ǀ hari-vān ǀ mimikṣan ǀ sam ǀ andhasā ǀ madeṣu ǀ vai ǀ uvoca ǁ
07.020.05 (Mandala. Sukta. Rik)
5.3.01.05 (Ashtaka. Adhyaya. Varga. Rik)
07.02.041 (Mandala. Anuvāka. Rik)
Samhita Devanagari Accented
वृषा॑ जजान॒ वृष॑णं॒ रणा॑य॒ तमु॑ चि॒न्नारी॒ नर्यं॑ ससूव ।
प्र यः से॑ना॒नीरध॒ नृभ्यो॒ अस्ती॒नः सत्वा॑ ग॒वेष॑णः॒ स धृ॒ष्णुः ॥
Samhita Devanagari Nonaccented
वृषा जजान वृषणं रणाय तमु चिन्नारी नर्यं ससूव ।
प्र यः सेनानीरध नृभ्यो अस्तीनः सत्वा गवेषणः स धृष्णुः ॥
Samhita Transcription Accented
vṛ́ṣā jajāna vṛ́ṣaṇam ráṇāya támu cinnā́rī náryam sasūva ǀ
prá yáḥ senānī́rádha nṛ́bhyo ástīnáḥ sátvā gavéṣaṇaḥ sá dhṛṣṇúḥ ǁ
Samhita Transcription Nonaccented
vṛṣā jajāna vṛṣaṇam raṇāya tamu cinnārī naryam sasūva ǀ
pra yaḥ senānīradha nṛbhyo astīnaḥ satvā gaveṣaṇaḥ sa dhṛṣṇuḥ ǁ
Padapatha Devanagari Accented
वृषा॑ । ज॒जा॒न॒ । वृष॑णम् । रणा॑य । तम् । ऊं॒ इति॑ । चि॒त् । नारी॑ । नर्य॑म् । स॒सू॒व॒ ।
प्र । यः । से॒ना॒ऽनीः । अध॑ । नृऽभ्यः॑ । अस्ति॑ । इ॒नः । सत्वा॑ । गो॒ऽएष॑णः । सः । धृ॒ष्णुः ॥
Padapatha Devanagari Nonaccented
वृषा । जजान । वृषणम् । रणाय । तम् । ऊं इति । चित् । नारी । नर्यम् । ससूव ।
प्र । यः । सेनाऽनीः । अध । नृऽभ्यः । अस्ति । इनः । सत्वा । गोऽएषणः । सः । धृष्णुः ॥
Padapatha Transcription Accented
vṛ́ṣā ǀ jajāna ǀ vṛ́ṣaṇam ǀ ráṇāya ǀ tám ǀ ūṃ íti ǀ cit ǀ nā́rī ǀ náryam ǀ sasūva ǀ
prá ǀ yáḥ ǀ senā-nī́ḥ ǀ ádha ǀ nṛ́-bhyaḥ ǀ ásti ǀ ináḥ ǀ sátvā ǀ go-éṣaṇaḥ ǀ sáḥ ǀ dhṛṣṇúḥ ǁ
Padapatha Transcription Nonaccented
vṛṣā ǀ jajāna ǀ vṛṣaṇam ǀ raṇāya ǀ tam ǀ ūṃ iti ǀ cit ǀ nārī ǀ naryam ǀ sasūva ǀ
pra ǀ yaḥ ǀ senā-nīḥ ǀ adha ǀ nṛ-bhyaḥ ǀ asti ǀ inaḥ ǀ satvā ǀ go-eṣaṇaḥ ǀ saḥ ǀ dhṛṣṇuḥ ǁ
07.020.06 (Mandala. Sukta. Rik)
5.3.02.01 (Ashtaka. Adhyaya. Varga. Rik)
07.02.042 (Mandala. Anuvāka. Rik)
Samhita Devanagari Accented
नू चि॒त्स भ्रे॑षते॒ जनो॒ न रे॑ष॒न्मनो॒ यो अ॑स्य घो॒रमा॒विवा॑सात् ।
य॒ज्ञैर्य इंद्रे॒ दध॑ते॒ दुवां॑सि॒ क्षय॒त्स रा॒य ऋ॑त॒पा ऋ॑ते॒जाः ॥
Samhita Devanagari Nonaccented
नू चित्स भ्रेषते जनो न रेषन्मनो यो अस्य घोरमाविवासात् ।
यज्ञैर्य इंद्रे दधते दुवांसि क्षयत्स राय ऋतपा ऋतेजाः ॥
Samhita Transcription Accented
nū́ citsá bhreṣate jáno ná reṣanmáno yó asya ghorámāvívāsāt ǀ
yajñáiryá índre dádhate dúvāṃsi kṣáyatsá rāyá ṛtapā́ ṛtejā́ḥ ǁ
Samhita Transcription Nonaccented
nū citsa bhreṣate jano na reṣanmano yo asya ghoramāvivāsāt ǀ
yajñairya indre dadhate duvāṃsi kṣayatsa rāya ṛtapā ṛtejāḥ ǁ
Padapatha Devanagari Accented
नु । चि॒त् । सः । भ्रे॒ष॒ते॒ । जनः॑ । न । रे॒ष॒त् । मनः॑ । यः । अ॒स्य॒ । घो॒रम् । आ॒ऽविवा॑सात् ।
य॒ज्ञैः । यः । इन्द्रे॑ । दध॑ते । दुवां॑सि । क्षय॑त् । सः । रा॒ये । ऋ॒त॒ऽपाः । ऋ॒ते॒ऽजाः ॥
Padapatha Devanagari Nonaccented
नु । चित् । सः । भ्रेषते । जनः । न । रेषत् । मनः । यः । अस्य । घोरम् । आऽविवासात् ।
यज्ञैः । यः । इन्द्रे । दधते । दुवांसि । क्षयत् । सः । राये । ऋतऽपाः । ऋतेऽजाः ॥
Padapatha Transcription Accented
nú ǀ cit ǀ sáḥ ǀ bhreṣate ǀ jánaḥ ǀ ná ǀ reṣat ǀ mánaḥ ǀ yáḥ ǀ asya ǀ ghorám ǀ ā-vívāsāt ǀ
yajñáiḥ ǀ yáḥ ǀ índre ǀ dádhate ǀ dúvāṃsi ǀ kṣáyat ǀ sáḥ ǀ rāyé ǀ ṛta-pā́ḥ ǀ ṛte-jā́ḥ ǁ
Padapatha Transcription Nonaccented
nu ǀ cit ǀ saḥ ǀ bhreṣate ǀ janaḥ ǀ na ǀ reṣat ǀ manaḥ ǀ yaḥ ǀ asya ǀ ghoram ǀ ā-vivāsāt ǀ
yajñaiḥ ǀ yaḥ ǀ indre ǀ dadhate ǀ duvāṃsi ǀ kṣayat ǀ saḥ ǀ rāye ǀ ṛta-pāḥ ǀ ṛte-jāḥ ǁ
07.020.07 (Mandala. Sukta. Rik)
5.3.02.02 (Ashtaka. Adhyaya. Varga. Rik)
07.02.043 (Mandala. Anuvāka. Rik)
Samhita Devanagari Accented
यदिं॑द्र॒ पूर्वो॒ अप॑राय॒ शिक्ष॒न्नय॒ज्ज्याया॒न्कनी॑यसो दे॒ष्णं ।
अ॒मृत॒ इत्पर्या॑सीत दू॒रमा चि॑त्र॒ चित्र्यं॑ भरा र॒यिं नः॑ ॥
Samhita Devanagari Nonaccented
यदिंद्र पूर्वो अपराय शिक्षन्नयज्ज्यायान्कनीयसो देष्णं ।
अमृत इत्पर्यासीत दूरमा चित्र चित्र्यं भरा रयिं नः ॥
Samhita Transcription Accented
yádindra pū́rvo áparāya śíkṣannáyajjyā́yānkánīyaso deṣṇám ǀ
amṛ́ta ítpáryāsīta dūrámā́ citra cítryam bharā rayím naḥ ǁ
Samhita Transcription Nonaccented
yadindra pūrvo aparāya śikṣannayajjyāyānkanīyaso deṣṇam ǀ
amṛta itparyāsīta dūramā citra citryam bharā rayim naḥ ǁ
Padapatha Devanagari Accented
यत् । इ॒न्द्र॒ । पूर्वः॑ । अप॑राय । शिक्ष॑न् । अय॑त् । ज्याया॑न् । कनी॑यसः । दे॒ष्णम् ।
अ॒मृतः॑ । इत् । परि॑ । आ॒सी॒त॒ । दू॒रम् । आ । चि॒त्र॒ । चित्र्य॑म् । भ॒र॒ । र॒यिम् । नः॒ ॥
Padapatha Devanagari Nonaccented
यत् । इन्द्र । पूर्वः । अपराय । शिक्षन् । अयत् । ज्यायान् । कनीयसः । देष्णम् ।
अमृतः । इत् । परि । आसीत । दूरम् । आ । चित्र । चित्र्यम् । भर । रयिम् । नः ॥
Padapatha Transcription Accented
yát ǀ indra ǀ pū́rvaḥ ǀ áparāya ǀ śíkṣan ǀ áyat ǀ jyā́yān ǀ kánīyasaḥ ǀ deṣṇám ǀ
amṛ́taḥ ǀ ít ǀ pári ǀ āsīta ǀ dūrám ǀ ā́ ǀ citra ǀ cítryam ǀ bhara ǀ rayím ǀ naḥ ǁ
Padapatha Transcription Nonaccented
yat ǀ indra ǀ pūrvaḥ ǀ aparāya ǀ śikṣan ǀ ayat ǀ jyāyān ǀ kanīyasaḥ ǀ deṣṇam ǀ
amṛtaḥ ǀ it ǀ pari ǀ āsīta ǀ dūram ǀ ā ǀ citra ǀ citryam ǀ bhara ǀ rayim ǀ naḥ ǁ
07.020.08 (Mandala. Sukta. Rik)
5.3.02.03 (Ashtaka. Adhyaya. Varga. Rik)
07.02.044 (Mandala. Anuvāka. Rik)
Samhita Devanagari Accented
यस्त॑ इंद्र प्रि॒यो जनो॒ ददा॑श॒दस॑न्निरे॒के अ॑द्रिवः॒ सखा॑ ते ।
व॒यं ते॑ अ॒स्यां सु॑म॒तौ चनि॑ष्ठाः॒ स्याम॒ वरू॑थे॒ अघ्न॑तो॒ नृपी॑तौ ॥
Samhita Devanagari Nonaccented
यस्त इंद्र प्रियो जनो ददाशदसन्निरेके अद्रिवः सखा ते ।
वयं ते अस्यां सुमतौ चनिष्ठाः स्याम वरूथे अघ्नतो नृपीतौ ॥
Samhita Transcription Accented
yásta indra priyó jáno dádāśadásannireké adrivaḥ sákhā te ǀ
vayám te asyā́m sumatáu cániṣṭhāḥ syā́ma várūthe ághnato nṛ́pītau ǁ
Samhita Transcription Nonaccented
yasta indra priyo jano dadāśadasannireke adrivaḥ sakhā te ǀ
vayam te asyām sumatau caniṣṭhāḥ syāma varūthe aghnato nṛpītau ǁ
Padapatha Devanagari Accented
यः । ते॒ । इ॒न्द्र॒ । प्रि॒यः । जनः॑ । ददा॑शत् । अस॑त् । नि॒रे॒के । अ॒द्रि॒ऽवः॒ । सखा॑ । ते॒ ।
व॒यम् । ते॒ । अ॒स्याम् । सु॒ऽम॒तौ । चनि॑ष्ठाः । स्याम॑ । वरू॑थे । अघ्न॑तः । नृऽपी॑तौ ॥
Padapatha Devanagari Nonaccented
यः । ते । इन्द्र । प्रियः । जनः । ददाशत् । असत् । निरेके । अद्रिऽवः । सखा । ते ।
वयम् । ते । अस्याम् । सुऽमतौ । चनिष्ठाः । स्याम । वरूथे । अघ्नतः । नृऽपीतौ ॥
Padapatha Transcription Accented
yáḥ ǀ te ǀ indra ǀ priyáḥ ǀ jánaḥ ǀ dádāśat ǀ ásat ǀ nireké ǀ adri-vaḥ ǀ sákhā ǀ te ǀ
vayám ǀ te ǀ asyā́m ǀ su-matáu ǀ cániṣṭhāḥ ǀ syā́ma ǀ várūthe ǀ ághnataḥ ǀ nṛ́-pītau ǁ
Padapatha Transcription Nonaccented
yaḥ ǀ te ǀ indra ǀ priyaḥ ǀ janaḥ ǀ dadāśat ǀ asat ǀ nireke ǀ adri-vaḥ ǀ sakhā ǀ te ǀ
vayam ǀ te ǀ asyām ǀ su-matau ǀ caniṣṭhāḥ ǀ syāma ǀ varūthe ǀ aghnataḥ ǀ nṛ-pītau ǁ
07.020.09 (Mandala. Sukta. Rik)
5.3.02.04 (Ashtaka. Adhyaya. Varga. Rik)
07.02.045 (Mandala. Anuvāka. Rik)
Samhita Devanagari Accented
ए॒ष स्तोमो॑ अचिक्रद॒द्वृषा॑ त उ॒त स्ता॒मुर्म॑घवन्नक्रपिष्ट ।
रा॒यस्कामो॑ जरि॒तारं॑ त॒ आगं॒त्वमं॒ग श॑क्र॒ वस्व॒ आ श॑को नः ॥
Samhita Devanagari Nonaccented
एष स्तोमो अचिक्रदद्वृषा त उत स्तामुर्मघवन्नक्रपिष्ट ।
रायस्कामो जरितारं त आगंत्वमंग शक्र वस्व आ शको नः ॥
Samhita Transcription Accented
eṣá stómo acikradadvṛ́ṣā ta utá stāmúrmaghavannakrapiṣṭa ǀ
rāyáskā́mo jaritā́ram ta ā́gantvámaṅgá śakra vásva ā́ śako naḥ ǁ
Samhita Transcription Nonaccented
eṣa stomo acikradadvṛṣā ta uta stāmurmaghavannakrapiṣṭa ǀ
rāyaskāmo jaritāram ta āgantvamaṅga śakra vasva ā śako naḥ ǁ
Padapatha Devanagari Accented
ए॒षः । स्तोमः॑ । अ॒चि॒क्र॒द॒त् । वृषा॑ । ते॒ । उ॒त । स्ता॒मुः । म॒घ॒ऽव॒न् । अ॒क्र॒पि॒ष्ट॒ ।
रा॒यः । कामः॑ । ज॒रि॒तार॑म् । ते॒ । आ । अ॒ग॒न् । त्वम् । अ॒ङ्ग । श॒क्र॒ । वस्वः॑ । आ । श॒कः॒ । नः॒ ॥
Padapatha Devanagari Nonaccented
एषः । स्तोमः । अचिक्रदत् । वृषा । ते । उत । स्तामुः । मघऽवन् । अक्रपिष्ट ।
रायः । कामः । जरितारम् । ते । आ । अगन् । त्वम् । अङ्ग । शक्र । वस्वः । आ । शकः । नः ॥
Padapatha Transcription Accented
eṣáḥ ǀ stómaḥ ǀ acikradat ǀ vṛ́ṣā ǀ te ǀ utá ǀ stāmúḥ ǀ magha-van ǀ akrapiṣṭa ǀ
rāyáḥ ǀ kā́maḥ ǀ jaritā́ram ǀ te ǀ ā́ ǀ agan ǀ tvám ǀ aṅgá ǀ śakra ǀ vásvaḥ ǀ ā́ ǀ śakaḥ ǀ naḥ ǁ
Padapatha Transcription Nonaccented
eṣaḥ ǀ stomaḥ ǀ acikradat ǀ vṛṣā ǀ te ǀ uta ǀ stāmuḥ ǀ magha-van ǀ akrapiṣṭa ǀ
rāyaḥ ǀ kāmaḥ ǀ jaritāram ǀ te ǀ ā ǀ agan ǀ tvam ǀ aṅga ǀ śakra ǀ vasvaḥ ǀ ā ǀ śakaḥ ǀ naḥ ǁ
07.020.10 (Mandala. Sukta. Rik)
5.3.02.05 (Ashtaka. Adhyaya. Varga. Rik)
07.02.046 (Mandala. Anuvāka. Rik)
Samhita Devanagari Accented
स न॑ इंद्र॒ त्वय॑ताया इ॒षे धा॒स्त्मना॑ च॒ ये म॒घवा॑नो जु॒नंति॑ ।
वस्वी॒ षु ते॑ जरि॒त्रे अ॑स्तु श॒क्तिर्यू॒यं पा॑त स्व॒स्तिभिः॒ सदा॑ नः ॥
Samhita Devanagari Nonaccented
स न इंद्र त्वयताया इषे धास्त्मना च ये मघवानो जुनंति ।
वस्वी षु ते जरित्रे अस्तु शक्तिर्यूयं पात स्वस्तिभिः सदा नः ॥
Samhita Transcription Accented
sá na indra tváyatāyā iṣé dhāstmánā ca yé maghávāno junánti ǀ
vásvī ṣú te jaritré astu śaktíryūyám pāta svastíbhiḥ sádā naḥ ǁ
Samhita Transcription Nonaccented
sa na indra tvayatāyā iṣe dhāstmanā ca ye maghavāno junanti ǀ
vasvī ṣu te jaritre astu śaktiryūyam pāta svastibhiḥ sadā naḥ ǁ
Padapatha Devanagari Accented
सः । नः॒ । इ॒न्द्र॒ । त्वऽय॑तायै । इ॒षे । धाः॒ । त्मना॑ । च॒ । ये । म॒घऽवा॑नः । जु॒नन्ति॑ ।
वस्वी॑ । सु । ते॒ । ज॒रि॒त्रे । अ॒स्तु॒ । श॒क्तिः । यू॒यम् । पा॒त॒ । स्व॒स्तिऽभिः॑ । सदा॑ । नः॒ ॥
Padapatha Devanagari Nonaccented
सः । नः । इन्द्र । त्वऽयतायै । इषे । धाः । त्मना । च । ये । मघऽवानः । जुनन्ति ।
वस्वी । सु । ते । जरित्रे । अस्तु । शक्तिः । यूयम् । पात । स्वस्तिऽभिः । सदा । नः ॥
Padapatha Transcription Accented
sáḥ ǀ naḥ ǀ indra ǀ tvá-yatāyai ǀ iṣé ǀ dhāḥ ǀ tmánā ǀ ca ǀ yé ǀ maghá-vānaḥ ǀ junánti ǀ
vásvī ǀ sú ǀ te ǀ jaritré ǀ astu ǀ śaktíḥ ǀ yūyám ǀ pāta ǀ svastí-bhiḥ ǀ sádā ǀ naḥ ǁ
Padapatha Transcription Nonaccented
saḥ ǀ naḥ ǀ indra ǀ tva-yatāyai ǀ iṣe ǀ dhāḥ ǀ tmanā ǀ ca ǀ ye ǀ magha-vānaḥ ǀ junanti ǀ
vasvī ǀ su ǀ te ǀ jaritre ǀ astu ǀ śaktiḥ ǀ yūyam ǀ pāta ǀ svasti-bhiḥ ǀ sadā ǀ naḥ ǁ