|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 35
|
1. Info |
| To: | viśvedevās | |
| From: | vasiṣṭha maitrāvaruṇi | |
| Metres: | 1st set of styles: triṣṭup (1-5, 11, 12); nicṛttriṣṭup (6, 8, 10, 15); virāṭtrisṭup (7, 9); bhurikpaṅkti (13, 14) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.035.01 (Mandala. Sukta. Rik)
5.3.28.01 (Ashtaka. Adhyaya. Varga. Rik)
07.03.026 (Mandala. Anuvāka. Rik)
Samhita Devanagari Accented
शं न॑ इंद्रा॒ग्नी भ॑वता॒मवो॑भिः॒ शं न॒ इंद्रा॒वरु॑णा रा॒तह॑व्या ।
शमिंद्रा॒सोमा॑ सुवि॒ताय॒ शं योः शं न॒ इंद्रा॑पू॒षणा॒ वाज॑सातौ ॥
Samhita Devanagari Nonaccented
शं न इंद्राग्नी भवतामवोभिः शं न इंद्रावरुणा रातहव्या ।
शमिंद्रासोमा सुविताय शं योः शं न इंद्रापूषणा वाजसातौ ॥
Samhita Transcription Accented
śám na indrāgnī́ bhavatāmávobhiḥ śám na índrāváruṇā rātáhavyā ǀ
śámíndrāsómā suvitā́ya śám yóḥ śám na índrāpūṣáṇā vā́jasātau ǁ
Samhita Transcription Nonaccented
śam na indrāgnī bhavatāmavobhiḥ śam na indrāvaruṇā rātahavyā ǀ
śamindrāsomā suvitāya śam yoḥ śam na indrāpūṣaṇā vājasātau ǁ
Padapatha Devanagari Accented
शम् । नः॒ । इ॒न्द्रा॒ग्नी इति॑ । भ॒व॒ता॒म् । अवः॑ऽभिः । शम् । नः॒ । इन्द्रा॒वरु॑णा । रा॒तऽह॑व्या ।
शम् । इन्द्रा॒सोमा॑ । सु॒वि॒ताय॑ । शम् । योः । शम् । नः॒ । इन्द्रा॑पू॒षणा॑ । वाज॑ऽसातौ ॥
Padapatha Devanagari Nonaccented
शम् । नः । इन्द्राग्नी इति । भवताम् । अवःऽभिः । शम् । नः । इन्द्रावरुणा । रातऽहव्या ।
शम् । इन्द्रासोमा । सुविताय । शम् । योः । शम् । नः । इन्द्रापूषणा । वाजऽसातौ ॥
Padapatha Transcription Accented
śám ǀ naḥ ǀ indrāgnī́ íti ǀ bhavatām ǀ ávaḥ-bhiḥ ǀ śám ǀ naḥ ǀ índrāváruṇā ǀ rātá-havyā ǀ
śám ǀ índrāsómā ǀ suvitā́ya ǀ śám ǀ yóḥ ǀ śám ǀ naḥ ǀ índrāpūṣáṇā ǀ vā́ja-sātau ǁ
Padapatha Transcription Nonaccented
śam ǀ naḥ ǀ indrāgnī iti ǀ bhavatām ǀ avaḥ-bhiḥ ǀ śam ǀ naḥ ǀ indrāvaruṇā ǀ rāta-havyā ǀ
śam ǀ indrāsomā ǀ suvitāya ǀ śam ǀ yoḥ ǀ śam ǀ naḥ ǀ indrāpūṣaṇā ǀ vāja-sātau ǁ
07.035.02 (Mandala. Sukta. Rik)
5.3.28.02 (Ashtaka. Adhyaya. Varga. Rik)
07.03.027 (Mandala. Anuvāka. Rik)
Samhita Devanagari Accented
शं नो॒ भगः॒ शमु॑ नः॒ शंसो॑ अस्तु॒ शं नः॒ पुरं॑धिः॒ शमु॑ संतु॒ रायः॑ ।
शं नः॑ स॒त्यस्य॑ सु॒यम॑स्य॒ शंसः॒ शं नो॑ अर्य॒मा पु॑रुजा॒तो अ॑स्तु ॥
Samhita Devanagari Nonaccented
शं नो भगः शमु नः शंसो अस्तु शं नः पुरंधिः शमु संतु रायः ।
शं नः सत्यस्य सुयमस्य शंसः शं नो अर्यमा पुरुजातो अस्तु ॥
Samhita Transcription Accented
śám no bhágaḥ śámu naḥ śáṃso astu śám naḥ púraṃdhiḥ śámu santu rā́yaḥ ǀ
śám naḥ satyásya suyámasya śáṃsaḥ śám no aryamā́ purujātó astu ǁ
Samhita Transcription Nonaccented
śam no bhagaḥ śamu naḥ śaṃso astu śam naḥ puraṃdhiḥ śamu santu rāyaḥ ǀ
śam naḥ satyasya suyamasya śaṃsaḥ śam no aryamā purujāto astu ǁ
Padapatha Devanagari Accented
शम् । नः॒ । भगः॑ । शम् । ऊं॒ इति॑ । नः॒ । शंसः॑ । अ॒स्तु॒ । शम् । नः॒ । पुर॑म्ऽधिः । शम् । ऊं॒ इति॑ । स॒न्तु॒ । रायः॑ ।
शम् । नः॒ । स॒त्यस्य॑ । सु॒ऽयम॑स्य । शंसः॑ । शम् । नः॒ । अ॒र्य॒मा । पु॒रु॒ऽजा॒तः । अ॒स्तु॒ ॥
Padapatha Devanagari Nonaccented
शम् । नः । भगः । शम् । ऊं इति । नः । शंसः । अस्तु । शम् । नः । पुरम्ऽधिः । शम् । ऊं इति । सन्तु । रायः ।
शम् । नः । सत्यस्य । सुऽयमस्य । शंसः । शम् । नः । अर्यमा । पुरुऽजातः । अस्तु ॥
Padapatha Transcription Accented
śám ǀ naḥ ǀ bhágaḥ ǀ śám ǀ ūṃ íti ǀ naḥ ǀ śáṃsaḥ ǀ astu ǀ śám ǀ naḥ ǀ púram-dhiḥ ǀ śám ǀ ūṃ íti ǀ santu ǀ rā́yaḥ ǀ
śám ǀ naḥ ǀ satyásya ǀ su-yámasya ǀ śáṃsaḥ ǀ śám ǀ naḥ ǀ aryamā́ ǀ puru-jātáḥ ǀ astu ǁ
Padapatha Transcription Nonaccented
śam ǀ naḥ ǀ bhagaḥ ǀ śam ǀ ūṃ iti ǀ naḥ ǀ śaṃsaḥ ǀ astu ǀ śam ǀ naḥ ǀ puram-dhiḥ ǀ śam ǀ ūṃ iti ǀ santu ǀ rāyaḥ ǀ
śam ǀ naḥ ǀ satyasya ǀ su-yamasya ǀ śaṃsaḥ ǀ śam ǀ naḥ ǀ aryamā ǀ puru-jātaḥ ǀ astu ǁ
07.035.03 (Mandala. Sukta. Rik)
5.3.28.03 (Ashtaka. Adhyaya. Varga. Rik)
07.03.028 (Mandala. Anuvāka. Rik)
Samhita Devanagari Accented
शं नो॑ धा॒ता शमु॑ ध॒र्ता नो॑ अस्तु॒ शं न॑ उरू॒ची भ॑वतु स्व॒धाभिः॑ ।
शं रोद॑सी बृह॒ती शं नो॒ अद्रिः॒ शं नो॑ दे॒वानां॑ सु॒हवा॑नि संतु ॥
Samhita Devanagari Nonaccented
शं नो धाता शमु धर्ता नो अस्तु शं न उरूची भवतु स्वधाभिः ।
शं रोदसी बृहती शं नो अद्रिः शं नो देवानां सुहवानि संतु ॥
Samhita Transcription Accented
śám no dhātā́ śámu dhartā́ no astu śám na urūcī́ bhavatu svadhā́bhiḥ ǀ
śám ródasī bṛhatī́ śám no ádriḥ śám no devā́nām suhávāni santu ǁ
Samhita Transcription Nonaccented
śam no dhātā śamu dhartā no astu śam na urūcī bhavatu svadhābhiḥ ǀ
śam rodasī bṛhatī śam no adriḥ śam no devānām suhavāni santu ǁ
Padapatha Devanagari Accented
शम् । नः॒ । धा॒ता । शम् । ऊं॒ इति॑ । ध॒र्ता । नः॒ । अ॒स्तु॒ । शम् । नः॒ । उ॒रू॒ची । भ॒व॒तु॒ । स्व॒धाभिः॑ ।
शम् । रोद॑सी॒ इति॑ । बृ॒ह॒ती इति॑ । शम् । नः॒ । अद्रिः॑ । शम् । नः॒ । दे॒वाना॑म् । सु॒ऽहवा॑नि । स॒न्तु॒ ॥
Padapatha Devanagari Nonaccented
शम् । नः । धाता । शम् । ऊं इति । धर्ता । नः । अस्तु । शम् । नः । उरूची । भवतु । स्वधाभिः ।
शम् । रोदसी इति । बृहती इति । शम् । नः । अद्रिः । शम् । नः । देवानाम् । सुऽहवानि । सन्तु ॥
Padapatha Transcription Accented
śám ǀ naḥ ǀ dhātā́ ǀ śám ǀ ūṃ íti ǀ dhartā́ ǀ naḥ ǀ astu ǀ śám ǀ naḥ ǀ urūcī́ ǀ bhavatu ǀ svadhā́bhiḥ ǀ
śám ǀ ródasī íti ǀ bṛhatī́ íti ǀ śám ǀ naḥ ǀ ádriḥ ǀ śám ǀ naḥ ǀ devā́nām ǀ su-hávāni ǀ santu ǁ
Padapatha Transcription Nonaccented
śam ǀ naḥ ǀ dhātā ǀ śam ǀ ūṃ iti ǀ dhartā ǀ naḥ ǀ astu ǀ śam ǀ naḥ ǀ urūcī ǀ bhavatu ǀ svadhābhiḥ ǀ
śam ǀ rodasī iti ǀ bṛhatī iti ǀ śam ǀ naḥ ǀ adriḥ ǀ śam ǀ naḥ ǀ devānām ǀ su-havāni ǀ santu ǁ
07.035.04 (Mandala. Sukta. Rik)
5.3.28.04 (Ashtaka. Adhyaya. Varga. Rik)
07.03.029 (Mandala. Anuvāka. Rik)
Samhita Devanagari Accented
शं नो॑ अ॒ग्निर्ज्योति॑रनीको अस्तु॒ शं नो॑ मि॒त्रावरु॑णाव॒श्विना॒ शं ।
शं नः॑ सु॒कृतां॑ सुकृ॒तानि॑ संतु॒ शं न॑ इषि॒रो अ॒भि वा॑तु॒ वातः॑ ॥
Samhita Devanagari Nonaccented
शं नो अग्निर्ज्योतिरनीको अस्तु शं नो मित्रावरुणावश्विना शं ।
शं नः सुकृतां सुकृतानि संतु शं न इषिरो अभि वातु वातः ॥
Samhita Transcription Accented
śám no agnírjyótiranīko astu śám no mitrā́váruṇāvaśvínā śám ǀ
śám naḥ sukṛ́tām sukṛtā́ni santu śám na iṣiró abhí vātu vā́taḥ ǁ
Samhita Transcription Nonaccented
śam no agnirjyotiranīko astu śam no mitrāvaruṇāvaśvinā śam ǀ
śam naḥ sukṛtām sukṛtāni santu śam na iṣiro abhi vātu vātaḥ ǁ
Padapatha Devanagari Accented
शम् । नः॒ । अ॒ग्निः । ज्योतिः॑ऽअनीकः । अ॒स्तु॒ । शम् । नः॒ । मि॒त्रावरु॑णौ । अ॒श्विना॑ । शम् ।
शम् । नः॒ । सु॒ऽकृता॑म् । सु॒ऽकृ॒तानि॑ । स॒न्तु॒ । शम् । नः॒ । इ॒षि॒रः । अ॒भि । वा॒तु॒ । वातः॑ ॥
Padapatha Devanagari Nonaccented
शम् । नः । अग्निः । ज्योतिःऽअनीकः । अस्तु । शम् । नः । मित्रावरुणौ । अश्विना । शम् ।
शम् । नः । सुऽकृताम् । सुऽकृतानि । सन्तु । शम् । नः । इषिरः । अभि । वातु । वातः ॥
Padapatha Transcription Accented
śám ǀ naḥ ǀ agníḥ ǀ jyótiḥ-anīkaḥ ǀ astu ǀ śám ǀ naḥ ǀ mitrā́váruṇau ǀ aśvínā ǀ śám ǀ
śám ǀ naḥ ǀ su-kṛ́tām ǀ su-kṛtā́ni ǀ santu ǀ śám ǀ naḥ ǀ iṣiráḥ ǀ abhí ǀ vātu ǀ vā́taḥ ǁ
Padapatha Transcription Nonaccented
śam ǀ naḥ ǀ agniḥ ǀ jyotiḥ-anīkaḥ ǀ astu ǀ śam ǀ naḥ ǀ mitrāvaruṇau ǀ aśvinā ǀ śam ǀ
śam ǀ naḥ ǀ su-kṛtām ǀ su-kṛtāni ǀ santu ǀ śam ǀ naḥ ǀ iṣiraḥ ǀ abhi ǀ vātu ǀ vātaḥ ǁ
07.035.05 (Mandala. Sukta. Rik)
5.3.28.05 (Ashtaka. Adhyaya. Varga. Rik)
07.03.030 (Mandala. Anuvāka. Rik)
Samhita Devanagari Accented
शं नो॒ द्यावा॑पृथि॒वी पू॒र्वहू॑तौ॒ शमं॒तरि॑क्षं दृ॒शये॑ नो अस्तु ।
शं न॒ ओष॑धीर्व॒निनो॑ भवंतु॒ शं नो॒ रज॑स॒स्पति॑रस्तु जि॒ष्णुः ॥
Samhita Devanagari Nonaccented
शं नो द्यावापृथिवी पूर्वहूतौ शमंतरिक्षं दृशये नो अस्तु ।
शं न ओषधीर्वनिनो भवंतु शं नो रजसस्पतिरस्तु जिष्णुः ॥
Samhita Transcription Accented
śám no dyā́vāpṛthivī́ pūrváhūtau śámantárikṣam dṛśáye no astu ǀ
śám na óṣadhīrvaníno bhavantu śám no rájasaspátirastu jiṣṇúḥ ǁ
Samhita Transcription Nonaccented
śam no dyāvāpṛthivī pūrvahūtau śamantarikṣam dṛśaye no astu ǀ
śam na oṣadhīrvanino bhavantu śam no rajasaspatirastu jiṣṇuḥ ǁ
Padapatha Devanagari Accented
शम् । नः॒ । द्यावा॑पृथि॒वी इति॑ । पू॒र्वऽहू॑तौ । शम् । अ॒न्तरि॑क्षम् । दृ॒शये॑ । नः॒ । अ॒स्तु॒ ।
शम् । नः॒ । ओष॑धीः । व॒निनः॑ । भ॒व॒न्तु॒ । शम् । नः॒ । रज॑सः । पतिः॑ । अ॒स्तु॒ । जि॒ष्णुः ॥
Padapatha Devanagari Nonaccented
शम् । नः । द्यावापृथिवी इति । पूर्वऽहूतौ । शम् । अन्तरिक्षम् । दृशये । नः । अस्तु ।
शम् । नः । ओषधीः । वनिनः । भवन्तु । शम् । नः । रजसः । पतिः । अस्तु । जिष्णुः ॥
Padapatha Transcription Accented
śám ǀ naḥ ǀ dyā́vāpṛthivī́ íti ǀ pūrvá-hūtau ǀ śám ǀ antárikṣam ǀ dṛśáye ǀ naḥ ǀ astu ǀ
śám ǀ naḥ ǀ óṣadhīḥ ǀ vanínaḥ ǀ bhavantu ǀ śám ǀ naḥ ǀ rájasaḥ ǀ pátiḥ ǀ astu ǀ jiṣṇúḥ ǁ
Padapatha Transcription Nonaccented
śam ǀ naḥ ǀ dyāvāpṛthivī iti ǀ pūrva-hūtau ǀ śam ǀ antarikṣam ǀ dṛśaye ǀ naḥ ǀ astu ǀ
śam ǀ naḥ ǀ oṣadhīḥ ǀ vaninaḥ ǀ bhavantu ǀ śam ǀ naḥ ǀ rajasaḥ ǀ patiḥ ǀ astu ǀ jiṣṇuḥ ǁ
07.035.06 (Mandala. Sukta. Rik)
5.3.29.01 (Ashtaka. Adhyaya. Varga. Rik)
07.03.031 (Mandala. Anuvāka. Rik)
Samhita Devanagari Accented
शं न॒ इंद्रो॒ वसु॑भिर्दे॒वो अ॑स्तु॒ शमा॑दि॒त्येभि॒र्वरु॑णः सु॒शंसः॑ ।
शं नो॑ रु॒द्रो रु॒द्रेभि॒र्जला॑षः॒ शं न॒स्त्वष्टा॒ ग्नाभि॑रि॒ह शृ॑णोतु ॥
Samhita Devanagari Nonaccented
शं न इंद्रो वसुभिर्देवो अस्तु शमादित्येभिर्वरुणः सुशंसः ।
शं नो रुद्रो रुद्रेभिर्जलाषः शं नस्त्वष्टा ग्नाभिरिह शृणोतु ॥
Samhita Transcription Accented
śám na índro vásubhirdevó astu śámādityébhirváruṇaḥ suśáṃsaḥ ǀ
śám no rudró rudrébhirjálāṣaḥ śám nastváṣṭā gnā́bhirihá śṛṇotu ǁ
Samhita Transcription Nonaccented
śam na indro vasubhirdevo astu śamādityebhirvaruṇaḥ suśaṃsaḥ ǀ
śam no rudro rudrebhirjalāṣaḥ śam nastvaṣṭā gnābhiriha śṛṇotu ǁ
Padapatha Devanagari Accented
शम् । नः॒ । इन्द्रः॑ । वसु॑ऽभिः । दे॒वः । अ॒स्तु॒ । शम् । आ॒दि॒त्येभिः॑ । वरु॑णः । सु॒ऽशंसः॑ ।
शम् । नः॒ । रु॒द्रः । रु॒द्रेभिः॑ । जला॑षः । शम् । नः॒ । त्वष्टा॑ । ग्नाभिः॑ । इ॒ह । शृ॒णो॒तु॒ ॥
Padapatha Devanagari Nonaccented
शम् । नः । इन्द्रः । वसुऽभिः । देवः । अस्तु । शम् । आदित्येभिः । वरुणः । सुऽशंसः ।
शम् । नः । रुद्रः । रुद्रेभिः । जलाषः । शम् । नः । त्वष्टा । ग्नाभिः । इह । शृणोतु ॥
Padapatha Transcription Accented
śám ǀ naḥ ǀ índraḥ ǀ vásu-bhiḥ ǀ deváḥ ǀ astu ǀ śám ǀ ādityébhiḥ ǀ váruṇaḥ ǀ su-śáṃsaḥ ǀ
śám ǀ naḥ ǀ rudráḥ ǀ rudrébhiḥ ǀ jálāṣaḥ ǀ śám ǀ naḥ ǀ tváṣṭā ǀ gnā́bhiḥ ǀ ihá ǀ śṛṇotu ǁ
Padapatha Transcription Nonaccented
śam ǀ naḥ ǀ indraḥ ǀ vasu-bhiḥ ǀ devaḥ ǀ astu ǀ śam ǀ ādityebhiḥ ǀ varuṇaḥ ǀ su-śaṃsaḥ ǀ
śam ǀ naḥ ǀ rudraḥ ǀ rudrebhiḥ ǀ jalāṣaḥ ǀ śam ǀ naḥ ǀ tvaṣṭā ǀ gnābhiḥ ǀ iha ǀ śṛṇotu ǁ
07.035.07 (Mandala. Sukta. Rik)
5.3.29.02 (Ashtaka. Adhyaya. Varga. Rik)
07.03.032 (Mandala. Anuvāka. Rik)
Samhita Devanagari Accented
शं नः॒ सोमो॑ भवतु॒ ब्रह्म॒ शं नः॒ शं नो॒ ग्रावा॑णः॒ शमु॑ संतु य॒ज्ञाः ।
शं नः॒ स्वरू॑णां मि॒तयो॑ भवंतु॒ शं नः॑ प्र॒स्वः१॒॑ शम्व॑स्तु॒ वेदिः॑ ॥
Samhita Devanagari Nonaccented
शं नः सोमो भवतु ब्रह्म शं नः शं नो ग्रावाणः शमु संतु यज्ञाः ।
शं नः स्वरूणां मितयो भवंतु शं नः प्रस्वः शम्वस्तु वेदिः ॥
Samhita Transcription Accented
śám naḥ sómo bhavatu bráhma śám naḥ śám no grā́vāṇaḥ śámu santu yajñā́ḥ ǀ
śám naḥ svárūṇām mitáyo bhavantu śám naḥ prasváḥ śámvastu védiḥ ǁ
Samhita Transcription Nonaccented
śam naḥ somo bhavatu brahma śam naḥ śam no grāvāṇaḥ śamu santu yajñāḥ ǀ
śam naḥ svarūṇām mitayo bhavantu śam naḥ prasvaḥ śamvastu vediḥ ǁ
Padapatha Devanagari Accented
शम् । नः॒ । सोमः॑ । भ॒व॒तु॒ । ब्रह्म॑ । शम् । नः॒ । शम् । नः॒ । ग्रावा॑णः । शम् । ऊं॒ इति॑ । स॒न्तु॒ । य॒ज्ञाः ।
शम् । नः॒ । स्वरू॑णाम् । मि॒तयः॑ । भ॒व॒न्तु॒ । शम् । नः॒ । प्र॒ऽस्वः॑ । शम् । ऊं॒ इति॑ । अ॒स्तु॒ । वेदिः॑ ॥
Padapatha Devanagari Nonaccented
शम् । नः । सोमः । भवतु । ब्रह्म । शम् । नः । शम् । नः । ग्रावाणः । शम् । ऊं इति । सन्तु । यज्ञाः ।
शम् । नः । स्वरूणाम् । मितयः । भवन्तु । शम् । नः । प्रऽस्वः । शम् । ऊं इति । अस्तु । वेदिः ॥
Padapatha Transcription Accented
śám ǀ naḥ ǀ sómaḥ ǀ bhavatu ǀ bráhma ǀ śám ǀ naḥ ǀ śám ǀ naḥ ǀ grā́vāṇaḥ ǀ śám ǀ ūṃ íti ǀ santu ǀ yajñā́ḥ ǀ
śám ǀ naḥ ǀ svárūṇām ǀ mitáyaḥ ǀ bhavantu ǀ śám ǀ naḥ ǀ pra-sváḥ ǀ śám ǀ ūṃ íti ǀ astu ǀ védiḥ ǁ
Padapatha Transcription Nonaccented
śam ǀ naḥ ǀ somaḥ ǀ bhavatu ǀ brahma ǀ śam ǀ naḥ ǀ śam ǀ naḥ ǀ grāvāṇaḥ ǀ śam ǀ ūṃ iti ǀ santu ǀ yajñāḥ ǀ
śam ǀ naḥ ǀ svarūṇām ǀ mitayaḥ ǀ bhavantu ǀ śam ǀ naḥ ǀ pra-svaḥ ǀ śam ǀ ūṃ iti ǀ astu ǀ vediḥ ǁ
07.035.08 (Mandala. Sukta. Rik)
5.3.29.03 (Ashtaka. Adhyaya. Varga. Rik)
07.03.033 (Mandala. Anuvāka. Rik)
Samhita Devanagari Accented
शं नः॒ सूर्य॑ उरु॒चक्षा॒ उदे॑तु॒ शं न॒श्चत॑स्रः प्र॒दिशो॑ भवंतु ।
शं नः॒ पर्व॑ता ध्रु॒वयो॑ भवंतु॒ शं नः॒ सिंध॑वः॒ शमु॑ सं॒त्वापः॑ ॥
Samhita Devanagari Nonaccented
शं नः सूर्य उरुचक्षा उदेतु शं नश्चतस्रः प्रदिशो भवंतु ।
शं नः पर्वता ध्रुवयो भवंतु शं नः सिंधवः शमु संत्वापः ॥
Samhita Transcription Accented
śám naḥ sū́rya urucákṣā údetu śám naścátasraḥ pradíśo bhavantu ǀ
śám naḥ párvatā dhruváyo bhavantu śám naḥ síndhavaḥ śámu santvā́paḥ ǁ
Samhita Transcription Nonaccented
śam naḥ sūrya urucakṣā udetu śam naścatasraḥ pradiśo bhavantu ǀ
śam naḥ parvatā dhruvayo bhavantu śam naḥ sindhavaḥ śamu santvāpaḥ ǁ
Padapatha Devanagari Accented
शम् । नः॒ । सूर्यः॑ । उ॒रु॒ऽचक्षाः॑ । उत् । ए॒तु॒ । शम् । नः॒ । चत॑स्रः । प्र॒ऽदिशः॑ । भ॒व॒न्तु॒ ।
शम् । नः॒ । पर्व॑ताः । ध्रु॒वयः॑ । भ॒व॒न्तु॒ । शम् । नः॒ । सिन्ध॑वः । शम् । ऊं॒ इति॑ । स॒न्तु॒ । आपः॑ ॥
Padapatha Devanagari Nonaccented
शम् । नः । सूर्यः । उरुऽचक्षाः । उत् । एतु । शम् । नः । चतस्रः । प्रऽदिशः । भवन्तु ।
शम् । नः । पर्वताः । ध्रुवयः । भवन्तु । शम् । नः । सिन्धवः । शम् । ऊं इति । सन्तु । आपः ॥
Padapatha Transcription Accented
śám ǀ naḥ ǀ sū́ryaḥ ǀ uru-cákṣāḥ ǀ út ǀ etu ǀ śám ǀ naḥ ǀ cátasraḥ ǀ pra-díśaḥ ǀ bhavantu ǀ
śám ǀ naḥ ǀ párvatāḥ ǀ dhruváyaḥ ǀ bhavantu ǀ śám ǀ naḥ ǀ síndhavaḥ ǀ śám ǀ ūṃ íti ǀ santu ǀ ā́paḥ ǁ
Padapatha Transcription Nonaccented
śam ǀ naḥ ǀ sūryaḥ ǀ uru-cakṣāḥ ǀ ut ǀ etu ǀ śam ǀ naḥ ǀ catasraḥ ǀ pra-diśaḥ ǀ bhavantu ǀ
śam ǀ naḥ ǀ parvatāḥ ǀ dhruvayaḥ ǀ bhavantu ǀ śam ǀ naḥ ǀ sindhavaḥ ǀ śam ǀ ūṃ iti ǀ santu ǀ āpaḥ ǁ
07.035.09 (Mandala. Sukta. Rik)
5.3.29.04 (Ashtaka. Adhyaya. Varga. Rik)
07.03.034 (Mandala. Anuvāka. Rik)
Samhita Devanagari Accented
शं नो॒ अदि॑तिर्भवतु व्र॒तेभिः॒ शं नो॑ भवंतु म॒रुतः॑ स्व॒र्काः ।
शं नो॒ विष्णुः॒ शमु॑ पू॒षा नो॑ अस्तु॒ शं नो॑ भ॒वित्रं॒ शम्व॑स्तु वा॒युः ॥
Samhita Devanagari Nonaccented
शं नो अदितिर्भवतु व्रतेभिः शं नो भवंतु मरुतः स्वर्काः ।
शं नो विष्णुः शमु पूषा नो अस्तु शं नो भवित्रं शम्वस्तु वायुः ॥
Samhita Transcription Accented
śám no áditirbhavatu vratébhiḥ śám no bhavantu marútaḥ svarkā́ḥ ǀ
śám no víṣṇuḥ śámu pūṣā́ no astu śám no bhavítram śámvastu vāyúḥ ǁ
Samhita Transcription Nonaccented
śam no aditirbhavatu vratebhiḥ śam no bhavantu marutaḥ svarkāḥ ǀ
śam no viṣṇuḥ śamu pūṣā no astu śam no bhavitram śamvastu vāyuḥ ǁ
Padapatha Devanagari Accented
शम् । नः॒ । अदि॑तिः । भ॒व॒तु॒ । व्र॒तेभिः॑ । शम् । नः॒ । भ॒व॒न्तु॒ । म॒रुतः॑ । सु॒ऽअ॒र्काः ।
शम् । नः॒ । विष्णुः॑ । शम् । ऊं॒ इति॑ । पू॒षा । नः॒ । अ॒स्तु॒ । शम् । नः॒ । भ॒वित्र॑म् । शम् । ऊं॒ इति॑ । अ॒स्तु॒ । वा॒युः ॥
Padapatha Devanagari Nonaccented
शम् । नः । अदितिः । भवतु । व्रतेभिः । शम् । नः । भवन्तु । मरुतः । सुऽअर्काः ।
शम् । नः । विष्णुः । शम् । ऊं इति । पूषा । नः । अस्तु । शम् । नः । भवित्रम् । शम् । ऊं इति । अस्तु । वायुः ॥
Padapatha Transcription Accented
śám ǀ naḥ ǀ áditiḥ ǀ bhavatu ǀ vratébhiḥ ǀ śám ǀ naḥ ǀ bhavantu ǀ marútaḥ ǀ su-arkā́ḥ ǀ
śám ǀ naḥ ǀ víṣṇuḥ ǀ śám ǀ ūṃ íti ǀ pūṣā́ ǀ naḥ ǀ astu ǀ śám ǀ naḥ ǀ bhavítram ǀ śám ǀ ūṃ íti ǀ astu ǀ vāyúḥ ǁ
Padapatha Transcription Nonaccented
śam ǀ naḥ ǀ aditiḥ ǀ bhavatu ǀ vratebhiḥ ǀ śam ǀ naḥ ǀ bhavantu ǀ marutaḥ ǀ su-arkāḥ ǀ
śam ǀ naḥ ǀ viṣṇuḥ ǀ śam ǀ ūṃ iti ǀ pūṣā ǀ naḥ ǀ astu ǀ śam ǀ naḥ ǀ bhavitram ǀ śam ǀ ūṃ iti ǀ astu ǀ vāyuḥ ǁ
07.035.10 (Mandala. Sukta. Rik)
5.3.29.05 (Ashtaka. Adhyaya. Varga. Rik)
07.03.035 (Mandala. Anuvāka. Rik)
Samhita Devanagari Accented
शं नो॑ दे॒वः स॑वि॒ता त्राय॑माणः॒ शं नो॑ भवंतू॒षसो॑ विभा॒तीः ।
शं नः॑ प॒र्जन्यो॑ भवतु प्र॒जाभ्यः॒ शं नः॒ क्षेत्र॑स्य॒ पति॑रस्तु शं॒भुः ॥
Samhita Devanagari Nonaccented
शं नो देवः सविता त्रायमाणः शं नो भवंतूषसो विभातीः ।
शं नः पर्जन्यो भवतु प्रजाभ्यः शं नः क्षेत्रस्य पतिरस्तु शंभुः ॥
Samhita Transcription Accented
śám no deváḥ savitā́ trā́yamāṇaḥ śám no bhavantūṣáso vibhātī́ḥ ǀ
śám naḥ parjányo bhavatu prajā́bhyaḥ śám naḥ kṣétrasya pátirastu śambhúḥ ǁ
Samhita Transcription Nonaccented
śam no devaḥ savitā trāyamāṇaḥ śam no bhavantūṣaso vibhātīḥ ǀ
śam naḥ parjanyo bhavatu prajābhyaḥ śam naḥ kṣetrasya patirastu śambhuḥ ǁ
Padapatha Devanagari Accented
शम् । नः॒ । दे॒वः । स॒वि॒ता । त्राय॑माणः । शम् । नः॒ । भ॒व॒न्तु॒ । उ॒षसः॑ । वि॒ऽभा॒तीः ।
शम् । नः॒ । प॒र्जन्यः॑ । भ॒व॒तु॒ । प्र॒ऽजाभ्यः॑ । शम् । नः॒ । क्षेत्र॑स्य । पतिः॑ । अ॒स्तु॒ । श॒म्ऽभुः ॥
Padapatha Devanagari Nonaccented
शम् । नः । देवः । सविता । त्रायमाणः । शम् । नः । भवन्तु । उषसः । विऽभातीः ।
शम् । नः । पर्जन्यः । भवतु । प्रऽजाभ्यः । शम् । नः । क्षेत्रस्य । पतिः । अस्तु । शम्ऽभुः ॥
Padapatha Transcription Accented
śám ǀ naḥ ǀ deváḥ ǀ savitā́ ǀ trā́yamāṇaḥ ǀ śám ǀ naḥ ǀ bhavantu ǀ uṣásaḥ ǀ vi-bhātī́ḥ ǀ
śám ǀ naḥ ǀ parjányaḥ ǀ bhavatu ǀ pra-jā́bhyaḥ ǀ śám ǀ naḥ ǀ kṣétrasya ǀ pátiḥ ǀ astu ǀ śam-bhúḥ ǁ
Padapatha Transcription Nonaccented
śam ǀ naḥ ǀ devaḥ ǀ savitā ǀ trāyamāṇaḥ ǀ śam ǀ naḥ ǀ bhavantu ǀ uṣasaḥ ǀ vi-bhātīḥ ǀ
śam ǀ naḥ ǀ parjanyaḥ ǀ bhavatu ǀ pra-jābhyaḥ ǀ śam ǀ naḥ ǀ kṣetrasya ǀ patiḥ ǀ astu ǀ śam-bhuḥ ǁ
07.035.11 (Mandala. Sukta. Rik)
5.3.30.01 (Ashtaka. Adhyaya. Varga. Rik)
07.03.036 (Mandala. Anuvāka. Rik)
Samhita Devanagari Accented
शं नो॑ दे॒वा वि॒श्वदे॑वा भवंतु॒ शं सर॑स्वती स॒ह धी॒भिर॑स्तु ।
शम॑भि॒षाचः॒ शमु॑ राति॒षाचः॒ शं नो॑ दि॒व्याः पार्थि॑वाः॒ शं नो॒ अप्याः॑ ॥
Samhita Devanagari Nonaccented
शं नो देवा विश्वदेवा भवंतु शं सरस्वती सह धीभिरस्तु ।
शमभिषाचः शमु रातिषाचः शं नो दिव्याः पार्थिवाः शं नो अप्याः ॥
Samhita Transcription Accented
śám no devā́ viśvádevā bhavantu śám sárasvatī sahá dhībhírastu ǀ
śámabhiṣā́caḥ śámu rātiṣā́caḥ śám no divyā́ḥ pā́rthivāḥ śám no ápyāḥ ǁ
Samhita Transcription Nonaccented
śam no devā viśvadevā bhavantu śam sarasvatī saha dhībhirastu ǀ
śamabhiṣācaḥ śamu rātiṣācaḥ śam no divyāḥ pārthivāḥ śam no apyāḥ ǁ
Padapatha Devanagari Accented
शम् । नः॒ । दे॒वाः । वि॒श्वऽदे॑वाः । भ॒व॒न्तु॒ । शम् । सर॑स्वती । स॒ह । धी॒भिः । अ॒स्तु॒ ।
शम् । अ॒भि॒ऽसाचः॑ । शम् । ऊं॒ इति॑ । रा॒ति॒ऽसाचः॑ । शम् । नः॒ । दि॒व्याः । पार्थि॑वाः । शम् । नः॒ । अप्याः॑ ॥
Padapatha Devanagari Nonaccented
शम् । नः । देवाः । विश्वऽदेवाः । भवन्तु । शम् । सरस्वती । सह । धीभिः । अस्तु ।
शम् । अभिऽसाचः । शम् । ऊं इति । रातिऽसाचः । शम् । नः । दिव्याः । पार्थिवाः । शम् । नः । अप्याः ॥
Padapatha Transcription Accented
śám ǀ naḥ ǀ devā́ḥ ǀ viśvá-devāḥ ǀ bhavantu ǀ śám ǀ sárasvatī ǀ sahá ǀ dhībhíḥ ǀ astu ǀ
śám ǀ abhi-sā́caḥ ǀ śám ǀ ūṃ íti ǀ rāti-sā́caḥ ǀ śám ǀ naḥ ǀ divyā́ḥ ǀ pā́rthivāḥ ǀ śám ǀ naḥ ǀ ápyāḥ ǁ
Padapatha Transcription Nonaccented
śam ǀ naḥ ǀ devāḥ ǀ viśva-devāḥ ǀ bhavantu ǀ śam ǀ sarasvatī ǀ saha ǀ dhībhiḥ ǀ astu ǀ
śam ǀ abhi-sācaḥ ǀ śam ǀ ūṃ iti ǀ rāti-sācaḥ ǀ śam ǀ naḥ ǀ divyāḥ ǀ pārthivāḥ ǀ śam ǀ naḥ ǀ apyāḥ ǁ
07.035.12 (Mandala. Sukta. Rik)
5.3.30.02 (Ashtaka. Adhyaya. Varga. Rik)
07.03.037 (Mandala. Anuvāka. Rik)
Samhita Devanagari Accented
शं नः॑ स॒त्यस्य॒ पत॑यो भवंतु॒ शं नो॒ अर्वं॑तः॒ शमु॑ संतु॒ गावः॑ ।
शं न॑ ऋ॒भवः॑ सु॒कृतः॑ सु॒हस्ताः॒ शं नो॑ भवंतु पि॒तरो॒ हवे॑षु ॥
Samhita Devanagari Nonaccented
शं नः सत्यस्य पतयो भवंतु शं नो अर्वंतः शमु संतु गावः ।
शं न ऋभवः सुकृतः सुहस्ताः शं नो भवंतु पितरो हवेषु ॥
Samhita Transcription Accented
śám naḥ satyásya pátayo bhavantu śám no árvantaḥ śámu santu gā́vaḥ ǀ
śám na ṛbhávaḥ sukṛ́taḥ suhástāḥ śám no bhavantu pitáro háveṣu ǁ
Samhita Transcription Nonaccented
śam naḥ satyasya patayo bhavantu śam no arvantaḥ śamu santu gāvaḥ ǀ
śam na ṛbhavaḥ sukṛtaḥ suhastāḥ śam no bhavantu pitaro haveṣu ǁ
Padapatha Devanagari Accented
शम् । नः॒ । स॒त्यस्य॑ । पत॑यः । भ॒व॒न्तु॒ । शम् । नः॒ । अर्व॑न्तः । शम् । ऊं॒ इति॑ । स॒न्तु॒ । गावः॑ ।
शम् । नः॒ । ऋ॒भवः॑ । सु॒ऽकृतः॑ । सु॒ऽहस्ताः॑ । शम् । नः॒ । भ॒व॒न्तु॒ । पि॒तरः॑ । हवे॑षु ॥
Padapatha Devanagari Nonaccented
शम् । नः । सत्यस्य । पतयः । भवन्तु । शम् । नः । अर्वन्तः । शम् । ऊं इति । सन्तु । गावः ।
शम् । नः । ऋभवः । सुऽकृतः । सुऽहस्ताः । शम् । नः । भवन्तु । पितरः । हवेषु ॥
Padapatha Transcription Accented
śám ǀ naḥ ǀ satyásya ǀ pátayaḥ ǀ bhavantu ǀ śám ǀ naḥ ǀ árvantaḥ ǀ śám ǀ ūṃ íti ǀ santu ǀ gā́vaḥ ǀ
śám ǀ naḥ ǀ ṛbhávaḥ ǀ su-kṛ́taḥ ǀ su-hástāḥ ǀ śám ǀ naḥ ǀ bhavantu ǀ pitáraḥ ǀ háveṣu ǁ
Padapatha Transcription Nonaccented
śam ǀ naḥ ǀ satyasya ǀ patayaḥ ǀ bhavantu ǀ śam ǀ naḥ ǀ arvantaḥ ǀ śam ǀ ūṃ iti ǀ santu ǀ gāvaḥ ǀ
śam ǀ naḥ ǀ ṛbhavaḥ ǀ su-kṛtaḥ ǀ su-hastāḥ ǀ śam ǀ naḥ ǀ bhavantu ǀ pitaraḥ ǀ haveṣu ǁ
07.035.13 (Mandala. Sukta. Rik)
5.3.30.03 (Ashtaka. Adhyaya. Varga. Rik)
07.03.038 (Mandala. Anuvāka. Rik)
Samhita Devanagari Accented
शं नो॑ अ॒ज एक॑पाद्दे॒वो अ॑स्तु॒ शं नोऽहि॑र्बु॒ध्न्यः१॒॑ शं स॑मु॒द्रः ।
शं नो॑ अ॒पां नपा॑त्पे॒रुर॑स्तु॒ शं नः॒ पृश्नि॑र्भवतु दे॒वगो॑पा ॥
Samhita Devanagari Nonaccented
शं नो अज एकपाद्देवो अस्तु शं नोऽहिर्बुध्न्यः शं समुद्रः ।
शं नो अपां नपात्पेरुरस्तु शं नः पृश्निर्भवतु देवगोपा ॥
Samhita Transcription Accented
śám no ajá ékapāddevó astu śám nó’hirbudhnyáḥ śám samudráḥ ǀ
śám no apā́m nápātperúrastu śám naḥ pṛ́śnirbhavatu devágopā ǁ
Samhita Transcription Nonaccented
śam no aja ekapāddevo astu śam no’hirbudhnyaḥ śam samudraḥ ǀ
śam no apām napātperurastu śam naḥ pṛśnirbhavatu devagopā ǁ
Padapatha Devanagari Accented
शम् । नः॒ । अ॒जः । एक॑ऽपात् । दे॒वः । अ॒स्तु॒ । शम् । नः॒ । अहिः॑ । बु॒ध्न्यः॑ । शम् । स॒मु॒द्रः ।
शम् । नः॒ । अ॒पाम् । नपा॑त् । पे॒रुः । अ॒स्तु॒ । शम् । नः॒ । पृश्निः॑ । भ॒व॒तु॒ । दे॒वऽगो॑पा ॥
Padapatha Devanagari Nonaccented
शम् । नः । अजः । एकऽपात् । देवः । अस्तु । शम् । नः । अहिः । बुध्न्यः । शम् । समुद्रः ।
शम् । नः । अपाम् । नपात् । पेरुः । अस्तु । शम् । नः । पृश्निः । भवतु । देवऽगोपा ॥
Padapatha Transcription Accented
śám ǀ naḥ ǀ ajáḥ ǀ éka-pāt ǀ deváḥ ǀ astu ǀ śám ǀ naḥ ǀ áhiḥ ǀ budhnyáḥ ǀ śám ǀ samudráḥ ǀ
śám ǀ naḥ ǀ apā́m ǀ nápāt ǀ perúḥ ǀ astu ǀ śám ǀ naḥ ǀ pṛ́śniḥ ǀ bhavatu ǀ devá-gopā ǁ
Padapatha Transcription Nonaccented
śam ǀ naḥ ǀ ajaḥ ǀ eka-pāt ǀ devaḥ ǀ astu ǀ śam ǀ naḥ ǀ ahiḥ ǀ budhnyaḥ ǀ śam ǀ samudraḥ ǀ
śam ǀ naḥ ǀ apām ǀ napāt ǀ peruḥ ǀ astu ǀ śam ǀ naḥ ǀ pṛśniḥ ǀ bhavatu ǀ deva-gopā ǁ
07.035.14 (Mandala. Sukta. Rik)
5.3.30.04 (Ashtaka. Adhyaya. Varga. Rik)
07.03.039 (Mandala. Anuvāka. Rik)
Samhita Devanagari Accented
आ॒दि॒त्या रु॒द्रा वस॑वो जुषंते॒दं ब्रह्म॑ क्रि॒यमा॑णं॒ नवी॑यः ।
शृ॒ण्वंतु॑ नो दि॒व्याः पार्थि॑वासो॒ गोजा॑ता उ॒त ये य॒ज्ञिया॑सः ॥
Samhita Devanagari Nonaccented
आदित्या रुद्रा वसवो जुषंतेदं ब्रह्म क्रियमाणं नवीयः ।
शृण्वंतु नो दिव्याः पार्थिवासो गोजाता उत ये यज्ञियासः ॥
Samhita Transcription Accented
ādityā́ rudrā́ vásavo juṣantedám bráhma kriyámāṇam návīyaḥ ǀ
śṛṇvántu no divyā́ḥ pā́rthivāso gójātā utá yé yajñíyāsaḥ ǁ
Samhita Transcription Nonaccented
ādityā rudrā vasavo juṣantedam brahma kriyamāṇam navīyaḥ ǀ
śṛṇvantu no divyāḥ pārthivāso gojātā uta ye yajñiyāsaḥ ǁ
Padapatha Devanagari Accented
आ॒दि॒त्याः । रु॒द्राः । वस॑वः । जु॒ष॒न्त॒ । इ॒दम् । ब्रह्म॑ । क्रि॒यमा॑णम् । नवी॑यः ।
शृ॒ण्वन्तु॑ । नः॒ । दि॒व्याः । पार्थि॑वासः । गोऽजा॑ताः । उ॒त । ये । य॒ज्ञिया॑सः ॥
Padapatha Devanagari Nonaccented
आदित्याः । रुद्राः । वसवः । जुषन्त । इदम् । ब्रह्म । क्रियमाणम् । नवीयः ।
शृण्वन्तु । नः । दिव्याः । पार्थिवासः । गोऽजाताः । उत । ये । यज्ञियासः ॥
Padapatha Transcription Accented
ādityā́ḥ ǀ rudrā́ḥ ǀ vásavaḥ ǀ juṣanta ǀ idám ǀ bráhma ǀ kriyámāṇam ǀ návīyaḥ ǀ
śṛṇvántu ǀ naḥ ǀ divyā́ḥ ǀ pā́rthivāsaḥ ǀ gó-jātāḥ ǀ utá ǀ yé ǀ yajñíyāsaḥ ǁ
Padapatha Transcription Nonaccented
ādityāḥ ǀ rudrāḥ ǀ vasavaḥ ǀ juṣanta ǀ idam ǀ brahma ǀ kriyamāṇam ǀ navīyaḥ ǀ
śṛṇvantu ǀ naḥ ǀ divyāḥ ǀ pārthivāsaḥ ǀ go-jātāḥ ǀ uta ǀ ye ǀ yajñiyāsaḥ ǁ
07.035.15 (Mandala. Sukta. Rik)
5.3.30.05 (Ashtaka. Adhyaya. Varga. Rik)
07.03.040 (Mandala. Anuvāka. Rik)
Samhita Devanagari Accented
ये दे॒वानां॑ य॒ज्ञिया॑ य॒ज्ञिया॑नां॒ मनो॒र्यज॑त्रा अ॒मृता॑ ऋत॒ज्ञाः ।
ते नो॑ रासंतामुरुगा॒यम॒द्य यू॒यं पा॑त स्व॒स्तिभिः॒ सदा॑ नः ॥
Samhita Devanagari Nonaccented
ये देवानां यज्ञिया यज्ञियानां मनोर्यजत्रा अमृता ऋतज्ञाः ।
ते नो रासंतामुरुगायमद्य यूयं पात स्वस्तिभिः सदा नः ॥
Samhita Transcription Accented
yé devā́nām yajñíyā yajñíyānām mánoryájatrā amṛ́tā ṛtajñā́ḥ ǀ
té no rāsantāmurugāyámadyá yūyám pāta svastíbhiḥ sádā naḥ ǁ
Samhita Transcription Nonaccented
ye devānām yajñiyā yajñiyānām manoryajatrā amṛtā ṛtajñāḥ ǀ
te no rāsantāmurugāyamadya yūyam pāta svastibhiḥ sadā naḥ ǁ
Padapatha Devanagari Accented
ये । दे॒वाना॑म् । य॒ज्ञियाः॑ । य॒ज्ञिया॑नाम् । मनोः॑ । यज॑त्राः । अ॒मृताः॑ । ऋ॒त॒ऽज्ञाः ।
ते । नः॒ । रा॒स॒न्ता॒म् । उ॒रु॒ऽगा॒यम् । अ॒द्य । यू॒यम् । पा॒त॒ । स्व॒स्तिऽभिः॑ । सदा॑ । नः॒ ॥
Padapatha Devanagari Nonaccented
ये । देवानाम् । यज्ञियाः । यज्ञियानाम् । मनोः । यजत्राः । अमृताः । ऋतऽज्ञाः ।
ते । नः । रासन्ताम् । उरुऽगायम् । अद्य । यूयम् । पात । स्वस्तिऽभिः । सदा । नः ॥
Padapatha Transcription Accented
yé ǀ devā́nām ǀ yajñíyāḥ ǀ yajñíyānām ǀ mánoḥ ǀ yájatrāḥ ǀ amṛ́tāḥ ǀ ṛta-jñā́ḥ ǀ
té ǀ naḥ ǀ rāsantām ǀ uru-gāyám ǀ adyá ǀ yūyám ǀ pāta ǀ svastí-bhiḥ ǀ sádā ǀ naḥ ǁ
Padapatha Transcription Nonaccented
ye ǀ devānām ǀ yajñiyāḥ ǀ yajñiyānām ǀ manoḥ ǀ yajatrāḥ ǀ amṛtāḥ ǀ ṛta-jñāḥ ǀ
te ǀ naḥ ǀ rāsantām ǀ uru-gāyam ǀ adya ǀ yūyam ǀ pāta ǀ svasti-bhiḥ ǀ sadā ǀ naḥ ǁ