|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 40
|
1. Info |
| To: | viśvedevās | |
| From: | vasiṣṭha maitrāvaruṇi | |
| Metres: | 1st set of styles: virāṭtrisṭup (2, 4); nicṛttriṣṭup (5, 7); paṅktiḥ (1); bhurikpaṅkti (3); virāṭpaṅkti (6) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.040.01 (Mandala. Sukta. Rik)
5.4.07.01 (Ashtaka. Adhyaya. Varga. Rik)
07.03.073 (Mandala. Anuvāka. Rik)
Samhita Devanagari Accented
ओ श्रु॒ष्टिर्वि॑द॒थ्या॒३॒॑ समे॑तु॒ प्रति॒ स्तोमं॑ दधीमहि तु॒राणां॑ ।
यद॒द्य दे॒वः स॑वि॒ता सु॒वाति॒ स्यामा॑स्य र॒त्निनो॑ विभा॒गे ॥
Samhita Devanagari Nonaccented
ओ श्रुष्टिर्विदथ्या समेतु प्रति स्तोमं दधीमहि तुराणां ।
यदद्य देवः सविता सुवाति स्यामास्य रत्निनो विभागे ॥
Samhita Transcription Accented
ó śruṣṭírvidathyā́ sámetu práti stómam dadhīmahi turā́ṇām ǀ
yádadyá deváḥ savitā́ suvā́ti syā́māsya ratníno vibhāgé ǁ
Samhita Transcription Nonaccented
o śruṣṭirvidathyā sametu prati stomam dadhīmahi turāṇām ǀ
yadadya devaḥ savitā suvāti syāmāsya ratnino vibhāge ǁ
Padapatha Devanagari Accented
ओ इति॑ । श्रु॒ष्टिः । वि॒द॒थ्या॑ । सम् । ए॒तु॒ । प्रति॑ । स्तोम॑म् । द॒धी॒म॒हि॒ । तु॒राणा॑म् ।
यत् । अ॒द्य । दे॒वः । स॒वि॒ता । सु॒वाति॑ । स्याम॑ । अ॒स्य॒ । र॒त्निनः॑ । वि॒ऽभा॒गे ॥
Padapatha Devanagari Nonaccented
ओ इति । श्रुष्टिः । विदथ्या । सम् । एतु । प्रति । स्तोमम् । दधीमहि । तुराणाम् ।
यत् । अद्य । देवः । सविता । सुवाति । स्याम । अस्य । रत्निनः । विऽभागे ॥
Padapatha Transcription Accented
ó íti ǀ śruṣṭíḥ ǀ vidathyā́ ǀ sám ǀ etu ǀ práti ǀ stómam ǀ dadhīmahi ǀ turā́ṇām ǀ
yát ǀ adyá ǀ deváḥ ǀ savitā́ ǀ suvā́ti ǀ syā́ma ǀ asya ǀ ratnínaḥ ǀ vi-bhāgé ǁ
Padapatha Transcription Nonaccented
o iti ǀ śruṣṭiḥ ǀ vidathyā ǀ sam ǀ etu ǀ prati ǀ stomam ǀ dadhīmahi ǀ turāṇām ǀ
yat ǀ adya ǀ devaḥ ǀ savitā ǀ suvāti ǀ syāma ǀ asya ǀ ratninaḥ ǀ vi-bhāge ǁ
07.040.02 (Mandala. Sukta. Rik)
5.4.07.02 (Ashtaka. Adhyaya. Varga. Rik)
07.03.074 (Mandala. Anuvāka. Rik)
Samhita Devanagari Accented
मि॒त्रस्तन्नो॒ वरु॑णो॒ रोद॑सी च॒ द्युभ॑क्त॒मिंद्रो॑ अर्य॒मा द॑दातु ।
दिदे॑ष्टु दे॒व्यदि॑ती॒ रेक्णो॑ वा॒युश्च॒ यन्नि॑यु॒वैते॒ भग॑श्च ॥
Samhita Devanagari Nonaccented
मित्रस्तन्नो वरुणो रोदसी च द्युभक्तमिंद्रो अर्यमा ददातु ।
दिदेष्टु देव्यदिती रेक्णो वायुश्च यन्नियुवैते भगश्च ॥
Samhita Transcription Accented
mitrástánno váruṇo ródasī ca dyúbhaktamíndro aryamā́ dadātu ǀ
dídeṣṭu devyáditī rékṇo vāyúśca yánniyuváite bhágaśca ǁ
Samhita Transcription Nonaccented
mitrastanno varuṇo rodasī ca dyubhaktamindro aryamā dadātu ǀ
dideṣṭu devyaditī rekṇo vāyuśca yanniyuvaite bhagaśca ǁ
Padapatha Devanagari Accented
मि॒त्रः । तत् । नः॒ । वरु॑णः । रोद॑सी॒ इति॑ । च॒ । द्युऽभ॑क्तम् । इन्द्रः॑ । अ॒र्य॒मा । द॒दा॒तु॒ ।
दिदे॑ष्टु । दे॒वी । अदि॑तिः । रेक्णः॑ । वा॒युः । च॒ । यत् । नि॒यु॒वैते॒ इति॑ नि॒ऽयु॒वैते॑ । भगः॑ । च॒ ॥
Padapatha Devanagari Nonaccented
मित्रः । तत् । नः । वरुणः । रोदसी इति । च । द्युऽभक्तम् । इन्द्रः । अर्यमा । ददातु ।
दिदेष्टु । देवी । अदितिः । रेक्णः । वायुः । च । यत् । नियुवैते इति निऽयुवैते । भगः । च ॥
Padapatha Transcription Accented
mitráḥ ǀ tát ǀ naḥ ǀ váruṇaḥ ǀ ródasī íti ǀ ca ǀ dyú-bhaktam ǀ índraḥ ǀ aryamā́ ǀ dadātu ǀ
dídeṣṭu ǀ devī́ ǀ áditiḥ ǀ rékṇaḥ ǀ vāyúḥ ǀ ca ǀ yát ǀ niyuváite íti ni-yuváite ǀ bhágaḥ ǀ ca ǁ
Padapatha Transcription Nonaccented
mitraḥ ǀ tat ǀ naḥ ǀ varuṇaḥ ǀ rodasī iti ǀ ca ǀ dyu-bhaktam ǀ indraḥ ǀ aryamā ǀ dadātu ǀ
dideṣṭu ǀ devī ǀ aditiḥ ǀ rekṇaḥ ǀ vāyuḥ ǀ ca ǀ yat ǀ niyuvaite iti ni-yuvaite ǀ bhagaḥ ǀ ca ǁ
07.040.03 (Mandala. Sukta. Rik)
5.4.07.03 (Ashtaka. Adhyaya. Varga. Rik)
07.03.075 (Mandala. Anuvāka. Rik)
Samhita Devanagari Accented
सेदु॒ग्रो अ॑स्तु मरुतः॒ स शु॒ष्मी यं मर्त्यं॑ पृषदश्वा॒ अवा॑थ ।
उ॒तेम॒ग्निः सर॑स्वती जु॒नंति॒ न तस्य॑ रा॒यः प॑र्ये॒तास्ति॑ ॥
Samhita Devanagari Nonaccented
सेदुग्रो अस्तु मरुतः स शुष्मी यं मर्त्यं पृषदश्वा अवाथ ।
उतेमग्निः सरस्वती जुनंति न तस्य रायः पर्येतास्ति ॥
Samhita Transcription Accented
sédugró astu marutaḥ sá śuṣmī́ yám mártyam pṛṣadaśvā ávātha ǀ
utémagníḥ sárasvatī junánti ná tásya rāyáḥ paryetā́sti ǁ
Samhita Transcription Nonaccented
sedugro astu marutaḥ sa śuṣmī yam martyam pṛṣadaśvā avātha ǀ
utemagniḥ sarasvatī junanti na tasya rāyaḥ paryetāsti ǁ
Padapatha Devanagari Accented
सः । इत् । उ॒ग्रः । अ॒स्तु॒ । म॒रु॒तः॒ । सः । शु॒ष्मी । यम् । मर्त्य॑म् । पृ॒ष॒त्ऽअ॒श्वाः॒ । अवा॑थ ।
उ॒त । ई॒म् । अ॒ग्निः । सर॑स्वती । जु॒नन्ति॑ । न । तस्य॑ । रा॒यः । प॒रि॒ऽए॒ता । अ॒स्ति॒ ॥
Padapatha Devanagari Nonaccented
सः । इत् । उग्रः । अस्तु । मरुतः । सः । शुष्मी । यम् । मर्त्यम् । पृषत्ऽअश्वाः । अवाथ ।
उत । ईम् । अग्निः । सरस्वती । जुनन्ति । न । तस्य । रायः । परिऽएता । अस्ति ॥
Padapatha Transcription Accented
sáḥ ǀ ít ǀ ugráḥ ǀ astu ǀ marutaḥ ǀ sáḥ ǀ śuṣmī́ ǀ yám ǀ mártyam ǀ pṛṣat-aśvāḥ ǀ ávātha ǀ
utá ǀ īm ǀ agníḥ ǀ sárasvatī ǀ junánti ǀ ná ǀ tásya ǀ rāyáḥ ǀ pari-etā́ ǀ asti ǁ
Padapatha Transcription Nonaccented
saḥ ǀ it ǀ ugraḥ ǀ astu ǀ marutaḥ ǀ saḥ ǀ śuṣmī ǀ yam ǀ martyam ǀ pṛṣat-aśvāḥ ǀ avātha ǀ
uta ǀ īm ǀ agniḥ ǀ sarasvatī ǀ junanti ǀ na ǀ tasya ǀ rāyaḥ ǀ pari-etā ǀ asti ǁ
07.040.04 (Mandala. Sukta. Rik)
5.4.07.04 (Ashtaka. Adhyaya. Varga. Rik)
07.03.076 (Mandala. Anuvāka. Rik)
Samhita Devanagari Accented
अ॒यं हि ने॒ता वरु॑ण ऋ॒तस्य॑ मि॒त्रो राजा॑नो अर्य॒मापो॒ धुः ।
सु॒हवा॑ दे॒व्यदि॑तिरन॒र्वा ते नो॒ अंहो॒ अति॑ पर्ष॒न्नरि॑ष्टान् ॥
Samhita Devanagari Nonaccented
अयं हि नेता वरुण ऋतस्य मित्रो राजानो अर्यमापो धुः ।
सुहवा देव्यदितिरनर्वा ते नो अंहो अति पर्षन्नरिष्टान् ॥
Samhita Transcription Accented
ayám hí netā́ váruṇa ṛtásya mitró rā́jāno aryamā́po dhúḥ ǀ
suhávā devyáditiranarvā́ té no áṃho áti parṣannáriṣṭān ǁ
Samhita Transcription Nonaccented
ayam hi netā varuṇa ṛtasya mitro rājāno aryamāpo dhuḥ ǀ
suhavā devyaditiranarvā te no aṃho ati parṣannariṣṭān ǁ
Padapatha Devanagari Accented
अ॒यम् । हि । ने॒ता । वरु॑णः । ऋ॒तस्य॑ । मि॒त्रः । राजा॑नः । अ॒र्य॒मा । अपः॑ । धुरिति॒ धुः ।
सु॒ऽहवा॑ । दे॒वी । अदि॑तिः । अ॒न॒र्वा । ते । नः॒ । अंहः॑ । अति॑ । प॒र्ष॒न् । अरि॑ष्टान् ॥
Padapatha Devanagari Nonaccented
अयम् । हि । नेता । वरुणः । ऋतस्य । मित्रः । राजानः । अर्यमा । अपः । धुरिति धुः ।
सुऽहवा । देवी । अदितिः । अनर्वा । ते । नः । अंहः । अति । पर्षन् । अरिष्टान् ॥
Padapatha Transcription Accented
ayám ǀ hí ǀ netā́ ǀ váruṇaḥ ǀ ṛtásya ǀ mitráḥ ǀ rā́jānaḥ ǀ aryamā́ ǀ ápaḥ ǀ dhúríti dhúḥ ǀ
su-hávā ǀ devī́ ǀ áditiḥ ǀ anarvā́ ǀ té ǀ naḥ ǀ áṃhaḥ ǀ áti ǀ parṣan ǀ áriṣṭān ǁ
Padapatha Transcription Nonaccented
ayam ǀ hi ǀ netā ǀ varuṇaḥ ǀ ṛtasya ǀ mitraḥ ǀ rājānaḥ ǀ aryamā ǀ apaḥ ǀ dhuriti dhuḥ ǀ
su-havā ǀ devī ǀ aditiḥ ǀ anarvā ǀ te ǀ naḥ ǀ aṃhaḥ ǀ ati ǀ parṣan ǀ ariṣṭān ǁ
07.040.05 (Mandala. Sukta. Rik)
5.4.07.05 (Ashtaka. Adhyaya. Varga. Rik)
07.03.077 (Mandala. Anuvāka. Rik)
Samhita Devanagari Accented
अ॒स्य दे॒वस्य॑ मी॒ळ्हुषो॑ व॒या विष्णो॑रे॒षस्य॑ प्रभृ॒थे ह॒विर्भिः॑ ।
वि॒दे हि रु॒द्रो रु॒द्रियं॑ महि॒त्वं या॑सि॒ष्टं व॒र्तिर॑श्विना॒विरा॑वत् ॥
Samhita Devanagari Nonaccented
अस्य देवस्य मीळ्हुषो वया विष्णोरेषस्य प्रभृथे हविर्भिः ।
विदे हि रुद्रो रुद्रियं महित्वं यासिष्टं वर्तिरश्विनाविरावत् ॥
Samhita Transcription Accented
asyá devásya mīḷhúṣo vayā́ víṣṇoreṣásya prabhṛthé havírbhiḥ ǀ
vidé hí rudró rudríyam mahitvám yāsiṣṭám vartíraśvināvírāvat ǁ
Samhita Transcription Nonaccented
asya devasya mīḷhuṣo vayā viṣṇoreṣasya prabhṛthe havirbhiḥ ǀ
vide hi rudro rudriyam mahitvam yāsiṣṭam vartiraśvināvirāvat ǁ
Padapatha Devanagari Accented
अ॒स्य । दे॒वस्य॑ । मी॒ळ्हुषः॑ । व॒याः । विष्णोः॑ । ए॒षस्य॑ । प्र॒ऽभृ॒थे । ह॒विःऽभिः॑ ।
वि॒दे । हि । रु॒द्रः । रु॒द्रिय॑म् । म॒हि॒ऽत्वम् । या॒सि॒ष्टम् । व॒र्तिः । अ॒श्वि॒नौ॒ । इरा॑ऽवत् ॥
Padapatha Devanagari Nonaccented
अस्य । देवस्य । मीळ्हुषः । वयाः । विष्णोः । एषस्य । प्रऽभृथे । हविःऽभिः ।
विदे । हि । रुद्रः । रुद्रियम् । महिऽत्वम् । यासिष्टम् । वर्तिः । अश्विनौ । इराऽवत् ॥
Padapatha Transcription Accented
asyá ǀ devásya ǀ mīḷhúṣaḥ ǀ vayā́ḥ ǀ víṣṇoḥ ǀ eṣásya ǀ pra-bhṛthé ǀ havíḥ-bhiḥ ǀ
vidé ǀ hí ǀ rudráḥ ǀ rudríyam ǀ mahi-tvám ǀ yāsiṣṭám ǀ vartíḥ ǀ aśvinau ǀ írā-vat ǁ
Padapatha Transcription Nonaccented
asya ǀ devasya ǀ mīḷhuṣaḥ ǀ vayāḥ ǀ viṣṇoḥ ǀ eṣasya ǀ pra-bhṛthe ǀ haviḥ-bhiḥ ǀ
vide ǀ hi ǀ rudraḥ ǀ rudriyam ǀ mahi-tvam ǀ yāsiṣṭam ǀ vartiḥ ǀ aśvinau ǀ irā-vat ǁ
07.040.06 (Mandala. Sukta. Rik)
5.4.07.06 (Ashtaka. Adhyaya. Varga. Rik)
07.03.078 (Mandala. Anuvāka. Rik)
Samhita Devanagari Accented
मात्र॑ पूषन्नाघृण इरस्यो॒ वरू॑त्री॒ यद्रा॑ति॒षाच॑श्च॒ रास॑न् ।
म॒यो॒भुवो॑ नो॒ अर्वं॑तो॒ नि पां॑तु वृ॒ष्टिं परि॑ज्मा॒ वातो॑ ददातु ॥
Samhita Devanagari Nonaccented
मात्र पूषन्नाघृण इरस्यो वरूत्री यद्रातिषाचश्च रासन् ।
मयोभुवो नो अर्वंतो नि पांतु वृष्टिं परिज्मा वातो ददातु ॥
Samhita Transcription Accented
mā́tra pūṣannāghṛṇa irasyo várūtrī yádrātiṣā́caśca rā́san ǀ
mayobhúvo no árvanto ní pāntu vṛṣṭím párijmā vā́to dadātu ǁ
Samhita Transcription Nonaccented
mātra pūṣannāghṛṇa irasyo varūtrī yadrātiṣācaśca rāsan ǀ
mayobhuvo no arvanto ni pāntu vṛṣṭim parijmā vāto dadātu ǁ
Padapatha Devanagari Accented
मा । अत्र॑ । पू॒ष॒न् । आ॒घृ॒णे॒ । इ॒र॒स्यः॒ । वरू॑त्री । यत् । रा॒ति॒ऽसाचः॑ । च॒ । रास॑न् ।
म॒यः॒ऽभुवः॑ । नः॒ । अर्व॑न्तः । नि । पा॒न्तु॒ । वृ॒ष्टिम् । परि॑ऽज्मा । वातः॑ । द॒दा॒तु॒ ॥
Padapatha Devanagari Nonaccented
मा । अत्र । पूषन् । आघृणे । इरस्यः । वरूत्री । यत् । रातिऽसाचः । च । रासन् ।
मयःऽभुवः । नः । अर्वन्तः । नि । पान्तु । वृष्टिम् । परिऽज्मा । वातः । ददातु ॥
Padapatha Transcription Accented
mā́ ǀ átra ǀ pūṣan ǀ āghṛṇe ǀ irasyaḥ ǀ várūtrī ǀ yát ǀ rāti-sā́caḥ ǀ ca ǀ rā́san ǀ
mayaḥ-bhúvaḥ ǀ naḥ ǀ árvantaḥ ǀ ní ǀ pāntu ǀ vṛṣṭím ǀ pári-jmā ǀ vā́taḥ ǀ dadātu ǁ
Padapatha Transcription Nonaccented
mā ǀ atra ǀ pūṣan ǀ āghṛṇe ǀ irasyaḥ ǀ varūtrī ǀ yat ǀ rāti-sācaḥ ǀ ca ǀ rāsan ǀ
mayaḥ-bhuvaḥ ǀ naḥ ǀ arvantaḥ ǀ ni ǀ pāntu ǀ vṛṣṭim ǀ pari-jmā ǀ vātaḥ ǀ dadātu ǁ
07.040.07 (Mandala. Sukta. Rik)
5.4.07.07 (Ashtaka. Adhyaya. Varga. Rik)
07.03.079 (Mandala. Anuvāka. Rik)
Samhita Devanagari Accented
नू रोद॑सी अ॒भिष्टु॑ते॒ वसि॑ष्ठैर्ऋ॒तावा॑नो॒ वरु॑णो मि॒त्रो अ॒ग्निः ।
यच्छं॑तु चं॒द्रा उ॑प॒मं नो॑ अ॒र्कं यू॒यं पा॑त स्व॒स्तिभिः॒ सदा॑ नः ॥
Samhita Devanagari Nonaccented
नू रोदसी अभिष्टुते वसिष्ठैर्ऋतावानो वरुणो मित्रो अग्निः ।
यच्छंतु चंद्रा उपमं नो अर्कं यूयं पात स्वस्तिभिः सदा नः ॥
Samhita Transcription Accented
nū́ ródasī abhíṣṭute vásiṣṭhairṛtā́vāno váruṇo mitró agníḥ ǀ
yácchantu candrā́ upamám no arkám yūyám pāta svastíbhiḥ sádā naḥ ǁ
Samhita Transcription Nonaccented
nū rodasī abhiṣṭute vasiṣṭhairṛtāvāno varuṇo mitro agniḥ ǀ
yacchantu candrā upamam no arkam yūyam pāta svastibhiḥ sadā naḥ ǁ
Padapatha Devanagari Accented
नु । रोद॑सी॒ इति॑ । अ॒भिस्तु॑ते॒ इत्य॒भिऽस्तु॑ते । वसि॑ष्ठैः । ऋ॒तऽवा॑नः । वरु॑णः । मि॒त्रः । अ॒ग्निः ।
यच्छ॑न्तु । च॒न्द्राः । उ॒प॒ऽमम् । नः॒ । अ॒र्कम् । यू॒यम् । पा॒त॒ । स्व॒स्तिऽभिः॑ । सदा॑ । नः॒ ॥
Padapatha Devanagari Nonaccented
नु । रोदसी इति । अभिस्तुते इत्यभिऽस्तुते । वसिष्ठैः । ऋतऽवानः । वरुणः । मित्रः । अग्निः ।
यच्छन्तु । चन्द्राः । उपऽमम् । नः । अर्कम् । यूयम् । पात । स्वस्तिऽभिः । सदा । नः ॥
Padapatha Transcription Accented
nú ǀ ródasī íti ǀ abhístute ítyabhí-stute ǀ vásiṣṭhaiḥ ǀ ṛtá-vānaḥ ǀ váruṇaḥ ǀ mitráḥ ǀ agníḥ ǀ
yácchantu ǀ candrā́ḥ ǀ upa-mám ǀ naḥ ǀ arkám ǀ yūyám ǀ pāta ǀ svastí-bhiḥ ǀ sádā ǀ naḥ ǁ
Padapatha Transcription Nonaccented
nu ǀ rodasī iti ǀ abhistute ityabhi-stute ǀ vasiṣṭhaiḥ ǀ ṛta-vānaḥ ǀ varuṇaḥ ǀ mitraḥ ǀ agniḥ ǀ
yacchantu ǀ candrāḥ ǀ upa-mam ǀ naḥ ǀ arkam ǀ yūyam ǀ pāta ǀ svasti-bhiḥ ǀ sadā ǀ naḥ ǁ