|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 41
|
1. Info |
| To: | 1: liṅgoktadevatāḥ; 2-6: bhaga; 7: uṣas |
|
| From: | vasiṣṭha maitrāvaruṇi | |
| Metres: | 1st set of styles: nicṛttriṣṭup (2, 3, 5, 7); nicṛjjagatī (1); paṅktiḥ (4); triṣṭup (6) 2nd set of styles: triṣṭubh (2-7); jagatī (1) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.041.01 (Mandala. Sukta. Rik)
5.4.08.01 (Ashtaka. Adhyaya. Varga. Rik)
07.03.080 (Mandala. Anuvāka. Rik)
Samhita Devanagari Accented
प्रा॒तर॒ग्निं प्रा॒तरिंद्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।
प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं हु॑वेम ॥
Samhita Devanagari Nonaccented
प्रातरग्निं प्रातरिंद्रं हवामहे प्रातर्मित्रावरुणा प्रातरश्विना ।
प्रातर्भगं पूषणं ब्रह्मणस्पतिं प्रातः सोममुत रुद्रं हुवेम ॥
Samhita Transcription Accented
prātáragním prātáríndram havāmahe prātármitrā́váruṇā prātáraśvínā ǀ
prātárbhágam pūṣáṇam bráhmaṇaspátim prātáḥ sómamutá rudrám huvema ǁ
Samhita Transcription Nonaccented
prātaragnim prātarindram havāmahe prātarmitrāvaruṇā prātaraśvinā ǀ
prātarbhagam pūṣaṇam brahmaṇaspatim prātaḥ somamuta rudram huvema ǁ
Padapatha Devanagari Accented
प्रा॒तः । अ॒ग्निम् । प्र॒तः । इन्द्र॑म् । ह॒वा॒म॒हे॒ । प्र॒तः । मि॒त्रावरु॑णा । प्रा॒तः । अ॒श्विना॑ ।
प्र॒तः । भग॑म् । पू॒षण॑म् । ब्रह्म॑णः । पति॑म् । प्र॒तः । सोम॑म् । उ॒त । रु॒द्रम् । हु॒वे॒म॒ ॥
Padapatha Devanagari Nonaccented
प्रातः । अग्निम् । प्रतः । इन्द्रम् । हवामहे । प्रतः । मित्रावरुणा । प्रातः । अश्विना ।
प्रतः । भगम् । पूषणम् । ब्रह्मणः । पतिम् । प्रतः । सोमम् । उत । रुद्रम् । हुवेम ॥
Padapatha Transcription Accented
prātáḥ ǀ agním ǀ pratáḥ ǀ índram ǀ havāmahe ǀ pratáḥ ǀ mitrā́váruṇā ǀ prātáḥ ǀ aśvínā ǀ
pratáḥ ǀ bhágam ǀ pūṣáṇam ǀ bráhmaṇaḥ ǀ pátim ǀ pratáḥ ǀ sómam ǀ utá ǀ rudrám ǀ huvema ǁ
Padapatha Transcription Nonaccented
prātaḥ ǀ agnim ǀ prataḥ ǀ indram ǀ havāmahe ǀ prataḥ ǀ mitrāvaruṇā ǀ prātaḥ ǀ aśvinā ǀ
prataḥ ǀ bhagam ǀ pūṣaṇam ǀ brahmaṇaḥ ǀ patim ǀ prataḥ ǀ somam ǀ uta ǀ rudram ǀ huvema ǁ
07.041.02 (Mandala. Sukta. Rik)
5.4.08.02 (Ashtaka. Adhyaya. Varga. Rik)
07.03.081 (Mandala. Anuvāka. Rik)
Samhita Devanagari Accented
प्रा॒त॒र्जितं॒ भग॑मु॒ग्रं हु॑वेम व॒यं पु॒त्रमदि॑ते॒र्यो वि॑ध॒र्ता ।
आ॒ध्रश्चि॒द्यं मन्य॑मानस्तु॒रश्चि॒द्राजा॑ चि॒द्यं भगं॑ भ॒क्षीत्याह॑ ॥
Samhita Devanagari Nonaccented
प्रातर्जितं भगमुग्रं हुवेम वयं पुत्रमदितेर्यो विधर्ता ।
आध्रश्चिद्यं मन्यमानस्तुरश्चिद्राजा चिद्यं भगं भक्षीत्याह ॥
Samhita Transcription Accented
prātarjítam bhágamugrám huvema vayám putrámáditeryó vidhartā́ ǀ
ādhráścidyám mányamānasturáścidrā́jā cidyám bhágam bhakṣī́tyā́ha ǁ
Samhita Transcription Nonaccented
prātarjitam bhagamugram huvema vayam putramaditeryo vidhartā ǀ
ādhraścidyam manyamānasturaścidrājā cidyam bhagam bhakṣītyāha ǁ
Padapatha Devanagari Accented
प्रा॒तः॒ऽजित॑म् । भग॑म् । उ॒ग्रम् । हु॒वे॒म॒ । व॒यम् । पु॒त्रम् । अदि॑तेः । यः । वि॒ऽध॒र्ता ।
आ॒ध्रः । चि॒त् । यम् । मन्य॑मानः । तु॒रः । चि॒त् । राजा॑ । चि॒त् । यम् । भग॑म् । भ॒क्षि॒ । इति॑ । आह॑ ॥
Padapatha Devanagari Nonaccented
प्रातःऽजितम् । भगम् । उग्रम् । हुवेम । वयम् । पुत्रम् । अदितेः । यः । विऽधर्ता ।
आध्रः । चित् । यम् । मन्यमानः । तुरः । चित् । राजा । चित् । यम् । भगम् । भक्षि । इति । आह ॥
Padapatha Transcription Accented
prātaḥ-jítam ǀ bhágam ǀ ugrám ǀ huvema ǀ vayám ǀ putrám ǀ áditeḥ ǀ yáḥ ǀ vi-dhartā́ ǀ
ādhráḥ ǀ cit ǀ yám ǀ mányamānaḥ ǀ turáḥ ǀ cit ǀ rā́jā ǀ cit ǀ yám ǀ bhágam ǀ bhakṣi ǀ íti ǀ ā́ha ǁ
Padapatha Transcription Nonaccented
prātaḥ-jitam ǀ bhagam ǀ ugram ǀ huvema ǀ vayam ǀ putram ǀ aditeḥ ǀ yaḥ ǀ vi-dhartā ǀ
ādhraḥ ǀ cit ǀ yam ǀ manyamānaḥ ǀ turaḥ ǀ cit ǀ rājā ǀ cit ǀ yam ǀ bhagam ǀ bhakṣi ǀ iti ǀ āha ǁ
07.041.03 (Mandala. Sukta. Rik)
5.4.08.03 (Ashtaka. Adhyaya. Varga. Rik)
07.03.082 (Mandala. Anuvāka. Rik)
Samhita Devanagari Accented
भग॒ प्रणे॑त॒र्भग॒ सत्य॑राधो॒ भगे॒मां धिय॒मुद॑वा॒ दद॑न्नः ।
भग॒ प्र णो॑ जनय॒ गोभि॒रश्वै॒र्भग॒ प्र नृभि॑र्नृ॒वंतः॑ स्याम ॥
Samhita Devanagari Nonaccented
भग प्रणेतर्भग सत्यराधो भगेमां धियमुदवा ददन्नः ।
भग प्र णो जनय गोभिरश्वैर्भग प्र नृभिर्नृवंतः स्याम ॥
Samhita Transcription Accented
bhága práṇetarbhága sátyarādho bhágemā́m dhíyamúdavā dádannaḥ ǀ
bhága prá ṇo janaya góbhiráśvairbhága prá nṛ́bhirnṛvántaḥ syāma ǁ
Samhita Transcription Nonaccented
bhaga praṇetarbhaga satyarādho bhagemām dhiyamudavā dadannaḥ ǀ
bhaga pra ṇo janaya gobhiraśvairbhaga pra nṛbhirnṛvantaḥ syāma ǁ
Padapatha Devanagari Accented
भग॑ । प्रने॑त॒रिति॒ प्रऽने॑तः । भग॑ । सत्य॑ऽराधः । भग॑ । इ॒माम् । धिय॑म् । उत् । अ॒व॒ । दद॑त् । नः॒ ।
भग॑ । प्र । नः॒ । ज॒न॒य॒ । गोभिः॑ । अश्वैः॑ । भग॑ । प्र । नृऽभिः॑ । नृ॒ऽवन्तः॑ । स्या॒म॒ ॥
Padapatha Devanagari Nonaccented
भग । प्रनेतरिति प्रऽनेतः । भग । सत्यऽराधः । भग । इमाम् । धियम् । उत् । अव । ददत् । नः ।
भग । प्र । नः । जनय । गोभिः । अश्वैः । भग । प्र । नृऽभिः । नृऽवन्तः । स्याम ॥
Padapatha Transcription Accented
bhága ǀ pránetaríti prá-netaḥ ǀ bhága ǀ sátya-rādhaḥ ǀ bhága ǀ imā́m ǀ dhíyam ǀ út ǀ ava ǀ dádat ǀ naḥ ǀ
bhága ǀ prá ǀ naḥ ǀ janaya ǀ góbhiḥ ǀ áśvaiḥ ǀ bhága ǀ prá ǀ nṛ́-bhiḥ ǀ nṛ-vántaḥ ǀ syāma ǁ
Padapatha Transcription Nonaccented
bhaga ǀ pranetariti pra-netaḥ ǀ bhaga ǀ satya-rādhaḥ ǀ bhaga ǀ imām ǀ dhiyam ǀ ut ǀ ava ǀ dadat ǀ naḥ ǀ
bhaga ǀ pra ǀ naḥ ǀ janaya ǀ gobhiḥ ǀ aśvaiḥ ǀ bhaga ǀ pra ǀ nṛ-bhiḥ ǀ nṛ-vantaḥ ǀ syāma ǁ
07.041.04 (Mandala. Sukta. Rik)
5.4.08.04 (Ashtaka. Adhyaya. Varga. Rik)
07.03.083 (Mandala. Anuvāka. Rik)
Samhita Devanagari Accented
उ॒तेदानीं॒ भग॑वंतः स्यामो॒त प्र॑पि॒त्व उ॒त मध्ये॒ अह्नां॑ ।
उ॒तोदि॑ता मघव॒न्त्सूर्य॑स्य व॒यं दे॒वानां॑ सुम॒तौ स्या॑म ॥
Samhita Devanagari Nonaccented
उतेदानीं भगवंतः स्यामोत प्रपित्व उत मध्ये अह्नां ।
उतोदिता मघवन्त्सूर्यस्य वयं देवानां सुमतौ स्याम ॥
Samhita Transcription Accented
utédā́nīm bhágavantaḥ syāmotá prapitvá utá mádhye áhnām ǀ
utóditā maghavantsū́ryasya vayám devā́nām sumatáu syāma ǁ
Samhita Transcription Nonaccented
utedānīm bhagavantaḥ syāmota prapitva uta madhye ahnām ǀ
utoditā maghavantsūryasya vayam devānām sumatau syāma ǁ
Padapatha Devanagari Accented
उ॒त । इ॒दानी॑म् । भग॑ऽवन्तः । स्या॒म॒ । उ॒त । प्र॒ऽपि॒त्वे । उ॒त । मध्ये॑ । अह्ना॑म् ।
उ॒त । उत्ऽइ॑ता । म॒घ॒ऽव॒न् । सूर्य॑स्य । व॒यम् । दे॒वाना॑म् । सु॒ऽम॒तौ । स्या॒म॒ ॥
Padapatha Devanagari Nonaccented
उत । इदानीम् । भगऽवन्तः । स्याम । उत । प्रऽपित्वे । उत । मध्ये । अह्नाम् ।
उत । उत्ऽइता । मघऽवन् । सूर्यस्य । वयम् । देवानाम् । सुऽमतौ । स्याम ॥
Padapatha Transcription Accented
utá ǀ idā́nīm ǀ bhága-vantaḥ ǀ syāma ǀ utá ǀ pra-pitvé ǀ utá ǀ mádhye ǀ áhnām ǀ
utá ǀ út-itā ǀ magha-van ǀ sū́ryasya ǀ vayám ǀ devā́nām ǀ su-matáu ǀ syāma ǁ
Padapatha Transcription Nonaccented
uta ǀ idānīm ǀ bhaga-vantaḥ ǀ syāma ǀ uta ǀ pra-pitve ǀ uta ǀ madhye ǀ ahnām ǀ
uta ǀ ut-itā ǀ magha-van ǀ sūryasya ǀ vayam ǀ devānām ǀ su-matau ǀ syāma ǁ
07.041.05 (Mandala. Sukta. Rik)
5.4.08.05 (Ashtaka. Adhyaya. Varga. Rik)
07.03.084 (Mandala. Anuvāka. Rik)
Samhita Devanagari Accented
भग॑ ए॒व भग॑वाँ अस्तु देवा॒स्तेन॑ व॒यं भग॑वंतः स्याम ।
तं त्वा॑ भग॒ सर्व॒ इज्जो॑हवीति॒ स नो॑ भग पुरए॒ता भ॑वे॒ह ॥
Samhita Devanagari Nonaccented
भग एव भगवाँ अस्तु देवास्तेन वयं भगवंतः स्याम ।
तं त्वा भग सर्व इज्जोहवीति स नो भग पुरएता भवेह ॥
Samhita Transcription Accented
bhága evá bhágavām̐ astu devāsténa vayám bhágavantaḥ syāma ǀ
tám tvā bhaga sárva íjjohavīti sá no bhaga puraetā́ bhavehá ǁ
Samhita Transcription Nonaccented
bhaga eva bhagavām̐ astu devāstena vayam bhagavantaḥ syāma ǀ
tam tvā bhaga sarva ijjohavīti sa no bhaga puraetā bhaveha ǁ
Padapatha Devanagari Accented
भगः॑ । ए॒व । भग॑ऽवान् । अ॒स्तु॒ । दे॒वाः॒ । तेन॑ । व॒यम् । भग॑ऽवन्तः । स्या॒म॒ ।
तम् । त्वा॒ । भ॒ग॒ । सर्वः॑ । इत् । जो॒ह॒वी॒ति॒ । सः । नः॒ । भ॒ग॒ । पु॒रः॒ऽए॒ता । भ॒व॒ । इ॒ह ॥
Padapatha Devanagari Nonaccented
भगः । एव । भगऽवान् । अस्तु । देवाः । तेन । वयम् । भगऽवन्तः । स्याम ।
तम् । त्वा । भग । सर्वः । इत् । जोहवीति । सः । नः । भग । पुरःऽएता । भव । इह ॥
Padapatha Transcription Accented
bhágaḥ ǀ evá ǀ bhága-vān ǀ astu ǀ devāḥ ǀ téna ǀ vayám ǀ bhága-vantaḥ ǀ syāma ǀ
tám ǀ tvā ǀ bhaga ǀ sárvaḥ ǀ ít ǀ johavīti ǀ sáḥ ǀ naḥ ǀ bhaga ǀ puraḥ-etā́ ǀ bhava ǀ ihá ǁ
Padapatha Transcription Nonaccented
bhagaḥ ǀ eva ǀ bhaga-vān ǀ astu ǀ devāḥ ǀ tena ǀ vayam ǀ bhaga-vantaḥ ǀ syāma ǀ
tam ǀ tvā ǀ bhaga ǀ sarvaḥ ǀ it ǀ johavīti ǀ saḥ ǀ naḥ ǀ bhaga ǀ puraḥ-etā ǀ bhava ǀ iha ǁ
07.041.06 (Mandala. Sukta. Rik)
5.4.08.06 (Ashtaka. Adhyaya. Varga. Rik)
07.03.085 (Mandala. Anuvāka. Rik)
Samhita Devanagari Accented
सम॑ध्व॒रायो॒षसो॑ नमंत दधि॒क्रावे॑व॒ शुच॑ये प॒दाय॑ ।
अ॒र्वा॒ची॒नं व॑सु॒विदं॒ भगं॑ नो॒ रथ॑मि॒वाश्वा॑ वा॒जिन॒ आ व॑हंतु ॥
Samhita Devanagari Nonaccented
समध्वरायोषसो नमंत दधिक्रावेव शुचये पदाय ।
अर्वाचीनं वसुविदं भगं नो रथमिवाश्वा वाजिन आ वहंतु ॥
Samhita Transcription Accented
sámadhvarā́yoṣáso namanta dadhikrā́veva śúcaye padā́ya ǀ
arvācīnám vasuvídam bhágam no ráthamivā́śvā vājína ā́ vahantu ǁ
Samhita Transcription Nonaccented
samadhvarāyoṣaso namanta dadhikrāveva śucaye padāya ǀ
arvācīnam vasuvidam bhagam no rathamivāśvā vājina ā vahantu ǁ
Padapatha Devanagari Accented
सम् । अ॒ध्व॒राय॑ । उ॒षसः॑ । न॒म॒न्त॒ । द॒धि॒क्रावा॑ऽइव । शुच॑ये । प॒दाय॑ ।
अ॒र्वा॒ची॒नम् । व॒सु॒ऽविद॑म् । भग॑म् । नः॒ । रथ॑म्ऽइव । अश्वाः॑ । वा॒जिनः॑ । आ । व॒ह॒न्तु॒ ॥
Padapatha Devanagari Nonaccented
सम् । अध्वराय । उषसः । नमन्त । दधिक्रावाऽइव । शुचये । पदाय ।
अर्वाचीनम् । वसुऽविदम् । भगम् । नः । रथम्ऽइव । अश्वाः । वाजिनः । आ । वहन्तु ॥
Padapatha Transcription Accented
sám ǀ adhvarā́ya ǀ uṣásaḥ ǀ namanta ǀ dadhikrā́vā-iva ǀ śúcaye ǀ padā́ya ǀ
arvācīnám ǀ vasu-vídam ǀ bhágam ǀ naḥ ǀ rátham-iva ǀ áśvāḥ ǀ vājínaḥ ǀ ā́ ǀ vahantu ǁ
Padapatha Transcription Nonaccented
sam ǀ adhvarāya ǀ uṣasaḥ ǀ namanta ǀ dadhikrāvā-iva ǀ śucaye ǀ padāya ǀ
arvācīnam ǀ vasu-vidam ǀ bhagam ǀ naḥ ǀ ratham-iva ǀ aśvāḥ ǀ vājinaḥ ǀ ā ǀ vahantu ǁ
07.041.07 (Mandala. Sukta. Rik)
5.4.08.07 (Ashtaka. Adhyaya. Varga. Rik)
07.03.086 (Mandala. Anuvāka. Rik)
Samhita Devanagari Accented
अश्वा॑वती॒र्गोम॑तीर्न उ॒षासो॑ वी॒रव॑तीः॒ सद॑मुच्छंतु भ॒द्राः ।
घृ॒तं दुहा॑ना वि॒श्वतः॒ प्रपी॑ता यू॒यं पा॑त स्व॒स्तिभिः॒ सदा॑ नः ॥
Samhita Devanagari Nonaccented
अश्वावतीर्गोमतीर्न उषासो वीरवतीः सदमुच्छंतु भद्राः ।
घृतं दुहाना विश्वतः प्रपीता यूयं पात स्वस्तिभिः सदा नः ॥
Samhita Transcription Accented
áśvāvatīrgómatīrna uṣā́so vīrávatīḥ sádamucchantu bhadrā́ḥ ǀ
ghṛtám dúhānā viśvátaḥ prápītā yūyám pāta svastíbhiḥ sádā naḥ ǁ
Samhita Transcription Nonaccented
aśvāvatīrgomatīrna uṣāso vīravatīḥ sadamucchantu bhadrāḥ ǀ
ghṛtam duhānā viśvataḥ prapītā yūyam pāta svastibhiḥ sadā naḥ ǁ
Padapatha Devanagari Accented
अश्व॑ऽवतीः । गोऽम॑तीः । नः॒ । उ॒षसः॑ । वी॒रऽव॑तीः । सद॑म् । उ॒च्छ॒न्तु॒ । भ॒द्राः ।
घृ॒तम् । दुहा॑नाः । वि॒श्वतः॑ । प्रऽपी॑ताः । यू॒यम् । पा॒त॒ । स्व॒स्तिऽभिः॑ । सदा॑ । नः॒ ॥
Padapatha Devanagari Nonaccented
अश्वऽवतीः । गोऽमतीः । नः । उषसः । वीरऽवतीः । सदम् । उच्छन्तु । भद्राः ।
घृतम् । दुहानाः । विश्वतः । प्रऽपीताः । यूयम् । पात । स्वस्तिऽभिः । सदा । नः ॥
Padapatha Transcription Accented
áśva-vatīḥ ǀ gó-matīḥ ǀ naḥ ǀ uṣásaḥ ǀ vīrá-vatīḥ ǀ sádam ǀ ucchantu ǀ bhadrā́ḥ ǀ
ghṛtám ǀ dúhānāḥ ǀ viśvátaḥ ǀ prá-pītāḥ ǀ yūyám ǀ pāta ǀ svastí-bhiḥ ǀ sádā ǀ naḥ ǁ
Padapatha Transcription Nonaccented
aśva-vatīḥ ǀ go-matīḥ ǀ naḥ ǀ uṣasaḥ ǀ vīra-vatīḥ ǀ sadam ǀ ucchantu ǀ bhadrāḥ ǀ
ghṛtam ǀ duhānāḥ ǀ viśvataḥ ǀ pra-pītāḥ ǀ yūyam ǀ pāta ǀ svasti-bhiḥ ǀ sadā ǀ naḥ ǁ