|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 68
|
1. Info |
| To: | aśvins | |
| From: | vasiṣṭha maitrāvaruṇi | |
| Metres: | 1st set of styles: virāḍārcītriṣṭup (2, 3, 5); nicṛdārcītriṣṭup (1, 6); ārcītriṣṭup (4, 7); virāṭtrisṭup (8); nicṛttriṣṭup (9) 2nd set of styles: virāj (1-7); triṣṭubh (8, 9) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.068.01 (Mandala. Sukta. Rik)
5.5.14.01 (Ashtaka. Adhyaya. Varga. Rik)
07.04.121 (Mandala. Anuvāka. Rik)
Samhita Devanagari Accented
आ शु॑भ्रा यातमश्विना॒ स्वश्वा॒ गिरो॑ दस्रा जुजुषा॒णा यु॒वाकोः॑ ।
ह॒व्यानि॑ च॒ प्रति॑भृता वी॒तं नः॑ ॥
Samhita Devanagari Nonaccented
आ शुभ्रा यातमश्विना स्वश्वा गिरो दस्रा जुजुषाणा युवाकोः ।
हव्यानि च प्रतिभृता वीतं नः ॥
Samhita Transcription Accented
ā́ śubhrā yātamaśvinā sváśvā gíro dasrā jujuṣāṇā́ yuvā́koḥ ǀ
havyā́ni ca prátibhṛtā vītám naḥ ǁ
Samhita Transcription Nonaccented
ā śubhrā yātamaśvinā svaśvā giro dasrā jujuṣāṇā yuvākoḥ ǀ
havyāni ca pratibhṛtā vītam naḥ ǁ
Padapatha Devanagari Accented
आ । शु॒भ्रा॒ । या॒त॒म् । अ॒श्वि॒ना॒ । सु॒ऽअश्वा॑ । गिरः॑ । द॒स्रा॒ । जु॒जु॒षा॒णा । यु॒वाकोः॑ ।
ह॒व्यानि॑ । च॒ । प्रति॑ऽभृता । वी॒तम् । नः॒ ॥
Padapatha Devanagari Nonaccented
आ । शुभ्रा । यातम् । अश्विना । सुऽअश्वा । गिरः । दस्रा । जुजुषाणा । युवाकोः ।
हव्यानि । च । प्रतिऽभृता । वीतम् । नः ॥
Padapatha Transcription Accented
ā́ ǀ śubhrā ǀ yātam ǀ aśvinā ǀ su-áśvā ǀ gíraḥ ǀ dasrā ǀ jujuṣāṇā́ ǀ yuvā́koḥ ǀ
havyā́ni ǀ ca ǀ práti-bhṛtā ǀ vītám ǀ naḥ ǁ
Padapatha Transcription Nonaccented
ā ǀ śubhrā ǀ yātam ǀ aśvinā ǀ su-aśvā ǀ giraḥ ǀ dasrā ǀ jujuṣāṇā ǀ yuvākoḥ ǀ
havyāni ǀ ca ǀ prati-bhṛtā ǀ vītam ǀ naḥ ǁ
07.068.02 (Mandala. Sukta. Rik)
5.5.14.02 (Ashtaka. Adhyaya. Varga. Rik)
07.04.122 (Mandala. Anuvāka. Rik)
Samhita Devanagari Accented
प्र वा॒मंधां॑सि॒ मद्या॑न्यस्थु॒ररं॑ गंतं ह॒विषो॑ वी॒तये॑ मे ।
ति॒रो अ॒र्यो हव॑नानि श्रु॒तं नः॑ ॥
Samhita Devanagari Nonaccented
प्र वामंधांसि मद्यान्यस्थुररं गंतं हविषो वीतये मे ।
तिरो अर्यो हवनानि श्रुतं नः ॥
Samhita Transcription Accented
prá vāmándhāṃsi mádyānyasthuráram gantam havíṣo vītáye me ǀ
tiró aryó hávanāni śrutám naḥ ǁ
Samhita Transcription Nonaccented
pra vāmandhāṃsi madyānyasthuraram gantam haviṣo vītaye me ǀ
tiro aryo havanāni śrutam naḥ ǁ
Padapatha Devanagari Accented
प्र । वा॒म् । अन्धां॑सि । मद्या॑नि । अ॒स्थुः॒ । अर॑म् । ग॒न्त॒म् । ह॒विषः॑ । वी॒तये॑ । मे॒ ।
ति॒रः । अ॒र्यः । हव॑नानि । श्रु॒तम् । नः॒ ॥
Padapatha Devanagari Nonaccented
प्र । वाम् । अन्धांसि । मद्यानि । अस्थुः । अरम् । गन्तम् । हविषः । वीतये । मे ।
तिरः । अर्यः । हवनानि । श्रुतम् । नः ॥
Padapatha Transcription Accented
prá ǀ vām ǀ ándhāṃsi ǀ mádyāni ǀ asthuḥ ǀ áram ǀ gantam ǀ havíṣaḥ ǀ vītáye ǀ me ǀ
tiráḥ ǀ aryáḥ ǀ hávanāni ǀ śrutám ǀ naḥ ǁ
Padapatha Transcription Nonaccented
pra ǀ vām ǀ andhāṃsi ǀ madyāni ǀ asthuḥ ǀ aram ǀ gantam ǀ haviṣaḥ ǀ vītaye ǀ me ǀ
tiraḥ ǀ aryaḥ ǀ havanāni ǀ śrutam ǀ naḥ ǁ
07.068.03 (Mandala. Sukta. Rik)
5.5.14.03 (Ashtaka. Adhyaya. Varga. Rik)
07.04.123 (Mandala. Anuvāka. Rik)
Samhita Devanagari Accented
प्र वां॒ रथो॒ मनो॑जवा इयर्ति ति॒रो रजां॑स्यश्विना श॒तोतिः॑ ।
अ॒स्मभ्यं॑ सूर्यावसू इया॒नः ॥
Samhita Devanagari Nonaccented
प्र वां रथो मनोजवा इयर्ति तिरो रजांस्यश्विना शतोतिः ।
अस्मभ्यं सूर्यावसू इयानः ॥
Samhita Transcription Accented
prá vām rátho mánojavā iyarti tiró rájāṃsyaśvinā śatótiḥ ǀ
asmábhyam sūryāvasū iyānáḥ ǁ
Samhita Transcription Nonaccented
pra vām ratho manojavā iyarti tiro rajāṃsyaśvinā śatotiḥ ǀ
asmabhyam sūryāvasū iyānaḥ ǁ
Padapatha Devanagari Accented
प्र । वा॒म् । रथः॑ । मनः॑ऽजवाः । इ॒य॒र्ति॒ । ति॒रः । रजां॑सि । अ॒श्वि॒ना॒ । श॒तऽऊ॑तिः ।
अ॒स्मभ्य॑म् । सू॒र्या॒व॒सू॒ इति॑ । इ॒या॒नः ॥
Padapatha Devanagari Nonaccented
प्र । वाम् । रथः । मनःऽजवाः । इयर्ति । तिरः । रजांसि । अश्विना । शतऽऊतिः ।
अस्मभ्यम् । सूर्यावसू इति । इयानः ॥
Padapatha Transcription Accented
prá ǀ vām ǀ ráthaḥ ǀ mánaḥ-javāḥ ǀ iyarti ǀ tiráḥ ǀ rájāṃsi ǀ aśvinā ǀ śatá-ūtiḥ ǀ
asmábhyam ǀ sūryāvasū íti ǀ iyānáḥ ǁ
Padapatha Transcription Nonaccented
pra ǀ vām ǀ rathaḥ ǀ manaḥ-javāḥ ǀ iyarti ǀ tiraḥ ǀ rajāṃsi ǀ aśvinā ǀ śata-ūtiḥ ǀ
asmabhyam ǀ sūryāvasū iti ǀ iyānaḥ ǁ
07.068.04 (Mandala. Sukta. Rik)
5.5.14.04 (Ashtaka. Adhyaya. Varga. Rik)
07.04.124 (Mandala. Anuvāka. Rik)
Samhita Devanagari Accented
अ॒यं ह॒ यद्वां॑ देव॒या उ॒ अद्रि॑रू॒र्ध्वो विव॑क्ति सोम॒सुद्यु॒वभ्यां॑ ।
आ व॒ल्गू विप्रो॑ ववृतीत ह॒व्यैः ॥
Samhita Devanagari Nonaccented
अयं ह यद्वां देवया उ अद्रिरूर्ध्वो विवक्ति सोमसुद्युवभ्यां ।
आ वल्गू विप्रो ववृतीत हव्यैः ॥
Samhita Transcription Accented
ayám ha yádvām devayā́ u ádrirūrdhvó vívakti somasúdyuvábhyām ǀ
ā́ valgū́ vípro vavṛtīta havyáiḥ ǁ
Samhita Transcription Nonaccented
ayam ha yadvām devayā u adrirūrdhvo vivakti somasudyuvabhyām ǀ
ā valgū vipro vavṛtīta havyaiḥ ǁ
Padapatha Devanagari Accented
अ॒यम् । ह॒ । यत् । वा॒म् । दे॒व॒ऽयाः । ऊं॒ इति॑ । अद्रिः॑ । ऊ॒र्ध्वः । विव॑क्ति । सो॒म॒ऽसुत् । यु॒वऽभ्या॑म् ।
आ । व॒ल्गू इति॑ । विप्रः॑ । व॒वृ॒ती॒त॒ । ह॒व्यैः ॥
Padapatha Devanagari Nonaccented
अयम् । ह । यत् । वाम् । देवऽयाः । ऊं इति । अद्रिः । ऊर्ध्वः । विवक्ति । सोमऽसुत् । युवऽभ्याम् ।
आ । वल्गू इति । विप्रः । ववृतीत । हव्यैः ॥
Padapatha Transcription Accented
ayám ǀ ha ǀ yát ǀ vām ǀ deva-yā́ḥ ǀ ūṃ íti ǀ ádriḥ ǀ ūrdhváḥ ǀ vívakti ǀ soma-sút ǀ yuvá-bhyām ǀ
ā́ ǀ valgū́ íti ǀ vípraḥ ǀ vavṛtīta ǀ havyáiḥ ǁ
Padapatha Transcription Nonaccented
ayam ǀ ha ǀ yat ǀ vām ǀ deva-yāḥ ǀ ūṃ iti ǀ adriḥ ǀ ūrdhvaḥ ǀ vivakti ǀ soma-sut ǀ yuva-bhyām ǀ
ā ǀ valgū iti ǀ vipraḥ ǀ vavṛtīta ǀ havyaiḥ ǁ
07.068.05 (Mandala. Sukta. Rik)
5.5.14.05 (Ashtaka. Adhyaya. Varga. Rik)
07.04.125 (Mandala. Anuvāka. Rik)
Samhita Devanagari Accented
चि॒त्रं ह॒ यद्वां॒ भोज॑नं॒ न्वस्ति॒ न्यत्र॑ये॒ महि॑ष्वंतं युयोतं ।
यो वा॑मो॒मानं॒ दध॑ते प्रि॒यः सन् ॥
Samhita Devanagari Nonaccented
चित्रं ह यद्वां भोजनं न्वस्ति न्यत्रये महिष्वंतं युयोतं ।
यो वामोमानं दधते प्रियः सन् ॥
Samhita Transcription Accented
citrám ha yádvām bhójanam nvásti nyátraye máhiṣvantam yuyotam ǀ
yó vāmomā́nam dádhate priyáḥ san ǁ
Samhita Transcription Nonaccented
citram ha yadvām bhojanam nvasti nyatraye mahiṣvantam yuyotam ǀ
yo vāmomānam dadhate priyaḥ san ǁ
Padapatha Devanagari Accented
चि॒त्रम् । ह॒ । यत् । वा॒म् । भोज॑नम् । नु । अस्ति॑ । नि । अत्र॑ये । महि॑ष्वन्तम् । यु॒यो॒त॒म् ।
यः । वा॒म् । ओ॒मान॑म् । दध॑ते । प्रि॒यः । सन् ॥
Padapatha Devanagari Nonaccented
चित्रम् । ह । यत् । वाम् । भोजनम् । नु । अस्ति । नि । अत्रये । महिष्वन्तम् । युयोतम् ।
यः । वाम् । ओमानम् । दधते । प्रियः । सन् ॥
Padapatha Transcription Accented
citrám ǀ ha ǀ yát ǀ vām ǀ bhójanam ǀ nú ǀ ásti ǀ ní ǀ átraye ǀ máhiṣvantam ǀ yuyotam ǀ
yáḥ ǀ vām ǀ omā́nam ǀ dádhate ǀ priyáḥ ǀ sán ǁ
Padapatha Transcription Nonaccented
citram ǀ ha ǀ yat ǀ vām ǀ bhojanam ǀ nu ǀ asti ǀ ni ǀ atraye ǀ mahiṣvantam ǀ yuyotam ǀ
yaḥ ǀ vām ǀ omānam ǀ dadhate ǀ priyaḥ ǀ san ǁ
07.068.06 (Mandala. Sukta. Rik)
5.5.15.01 (Ashtaka. Adhyaya. Varga. Rik)
07.04.126 (Mandala. Anuvāka. Rik)
Samhita Devanagari Accented
उ॒त त्यद्वां॑ जुर॒ते अ॑श्विना भू॒च्च्यवा॑नाय प्र॒तीत्यं॑ हवि॒र्दे ।
अधि॒ यद्वर्प॑ इ॒तऊ॑ति ध॒त्थः ॥
Samhita Devanagari Nonaccented
उत त्यद्वां जुरते अश्विना भूच्च्यवानाय प्रतीत्यं हविर्दे ।
अधि यद्वर्प इतऊति धत्थः ॥
Samhita Transcription Accented
utá tyádvām juraté aśvinā bhūccyávānāya pratī́tyam havirdé ǀ
ádhi yádvárpa itáūti dhattháḥ ǁ
Samhita Transcription Nonaccented
uta tyadvām jurate aśvinā bhūccyavānāya pratītyam havirde ǀ
adhi yadvarpa itaūti dhatthaḥ ǁ
Padapatha Devanagari Accented
उ॒त । त्यत् । वा॒म् । जु॒र॒ते । अ॒श्वि॒ना॒ । भू॒त् । च्यवा॑नाय । प्र॒तीत्य॑म् । ह॒विः॒ऽदे ।
अधि॑ । यत् । वर्पः॑ । इ॒तःऽऊ॑ति । ध॒त्थः ॥
Padapatha Devanagari Nonaccented
उत । त्यत् । वाम् । जुरते । अश्विना । भूत् । च्यवानाय । प्रतीत्यम् । हविःऽदे ।
अधि । यत् । वर्पः । इतःऽऊति । धत्थः ॥
Padapatha Transcription Accented
utá ǀ tyát ǀ vām ǀ juraté ǀ aśvinā ǀ bhūt ǀ cyávānāya ǀ pratī́tyam ǀ haviḥ-dé ǀ
ádhi ǀ yát ǀ várpaḥ ǀ itáḥ-ūti ǀ dhattháḥ ǁ
Padapatha Transcription Nonaccented
uta ǀ tyat ǀ vām ǀ jurate ǀ aśvinā ǀ bhūt ǀ cyavānāya ǀ pratītyam ǀ haviḥ-de ǀ
adhi ǀ yat ǀ varpaḥ ǀ itaḥ-ūti ǀ dhatthaḥ ǁ
07.068.07 (Mandala. Sukta. Rik)
5.5.15.02 (Ashtaka. Adhyaya. Varga. Rik)
07.04.127 (Mandala. Anuvāka. Rik)
Samhita Devanagari Accented
उ॒त त्यं भु॒ज्युम॑श्विना॒ सखा॑यो॒ मध्ये॑ जहुर्दु॒रेवा॑सः समु॒द्रे ।
निरीं॑ पर्ष॒दरा॑वा॒ यो यु॒वाकुः॑ ॥
Samhita Devanagari Nonaccented
उत त्यं भुज्युमश्विना सखायो मध्ये जहुर्दुरेवासः समुद्रे ।
निरीं पर्षदरावा यो युवाकुः ॥
Samhita Transcription Accented
utá tyám bhujyúmaśvinā sákhāyo mádhye jahurdurévāsaḥ samudré ǀ
nírīm parṣadárāvā yó yuvā́kuḥ ǁ
Samhita Transcription Nonaccented
uta tyam bhujyumaśvinā sakhāyo madhye jahurdurevāsaḥ samudre ǀ
nirīm parṣadarāvā yo yuvākuḥ ǁ
Padapatha Devanagari Accented
उ॒त । त्यम् । भु॒ज्युम् । अ॒श्वि॒ना॒ । सखा॑यः । मध्ये॑ । ज॒हुः॒ । दुः॒ऽएवा॑सः । स॒मु॒द्रे ।
निः । ई॒म् । प॒र्ष॒त् । अरा॑वा । यः । यु॒वाकुः॑ ॥
Padapatha Devanagari Nonaccented
उत । त्यम् । भुज्युम् । अश्विना । सखायः । मध्ये । जहुः । दुःऽएवासः । समुद्रे ।
निः । ईम् । पर्षत् । अरावा । यः । युवाकुः ॥
Padapatha Transcription Accented
utá ǀ tyám ǀ bhujyúm ǀ aśvinā ǀ sákhāyaḥ ǀ mádhye ǀ jahuḥ ǀ duḥ-évāsaḥ ǀ samudré ǀ
níḥ ǀ īm ǀ parṣat ǀ árāvā ǀ yáḥ ǀ yuvā́kuḥ ǁ
Padapatha Transcription Nonaccented
uta ǀ tyam ǀ bhujyum ǀ aśvinā ǀ sakhāyaḥ ǀ madhye ǀ jahuḥ ǀ duḥ-evāsaḥ ǀ samudre ǀ
niḥ ǀ īm ǀ parṣat ǀ arāvā ǀ yaḥ ǀ yuvākuḥ ǁ
07.068.08 (Mandala. Sukta. Rik)
5.5.15.03 (Ashtaka. Adhyaya. Varga. Rik)
07.04.128 (Mandala. Anuvāka. Rik)
Samhita Devanagari Accented
वृका॑य चि॒ज्जस॑मानाय शक्तमु॒त श्रु॑तं श॒यवे॑ हू॒यमा॑ना ।
याव॒घ्न्यामपि॑न्वतम॒पो न स्त॒र्यं॑ चिच्छ॒क्त्य॑श्विना॒ शची॑भिः ॥
Samhita Devanagari Nonaccented
वृकाय चिज्जसमानाय शक्तमुत श्रुतं शयवे हूयमाना ।
यावघ्न्यामपिन्वतमपो न स्तर्यं चिच्छक्त्यश्विना शचीभिः ॥
Samhita Transcription Accented
vṛ́kāya cijjásamānāya śaktamutá śrutam śayáve hūyámānā ǀ
yā́vaghnyā́mápinvatamapó ná staryám cicchaktyáśvinā śácībhiḥ ǁ
Samhita Transcription Nonaccented
vṛkāya cijjasamānāya śaktamuta śrutam śayave hūyamānā ǀ
yāvaghnyāmapinvatamapo na staryam cicchaktyaśvinā śacībhiḥ ǁ
Padapatha Devanagari Accented
वृका॑य । चि॒त् । जस॑मानाय । श॒क्त॒म् । उ॒त । श्रु॒त॒म् । श॒यवे॑ । हू॒यमा॑ना ।
यौ । अ॒घ्न्याम् । अपि॑न्वतम् । अ॒पः । न । स्त॒र्य॑म् । चि॒त् । श॒क्ती । अ॒श्वि॒ना॒ । शची॑भिः ॥
Padapatha Devanagari Nonaccented
वृकाय । चित् । जसमानाय । शक्तम् । उत । श्रुतम् । शयवे । हूयमाना ।
यौ । अघ्न्याम् । अपिन्वतम् । अपः । न । स्तर्यम् । चित् । शक्ती । अश्विना । शचीभिः ॥
Padapatha Transcription Accented
vṛ́kāya ǀ cit ǀ jásamānāya ǀ śaktam ǀ utá ǀ śrutam ǀ śayáve ǀ hūyámānā ǀ
yáu ǀ aghnyā́m ǀ ápinvatam ǀ apáḥ ǀ ná ǀ staryám ǀ cit ǀ śaktī́ ǀ aśvinā ǀ śácībhiḥ ǁ
Padapatha Transcription Nonaccented
vṛkāya ǀ cit ǀ jasamānāya ǀ śaktam ǀ uta ǀ śrutam ǀ śayave ǀ hūyamānā ǀ
yau ǀ aghnyām ǀ apinvatam ǀ apaḥ ǀ na ǀ staryam ǀ cit ǀ śaktī ǀ aśvinā ǀ śacībhiḥ ǁ
07.068.09 (Mandala. Sukta. Rik)
5.5.15.04 (Ashtaka. Adhyaya. Varga. Rik)
07.04.129 (Mandala. Anuvāka. Rik)
Samhita Devanagari Accented
ए॒ष स्य का॒रुर्ज॑रते सू॒क्तैरग्रे॑ बुधा॒न उ॒षसां॑ सु॒मन्मा॑ ।
इ॒षा तं व॑र्धद॒घ्न्या पयो॑भिर्यू॒यं पा॑त स्व॒स्तिभिः॒ सदा॑ नः ॥
Samhita Devanagari Nonaccented
एष स्य कारुर्जरते सूक्तैरग्रे बुधान उषसां सुमन्मा ।
इषा तं वर्धदघ्न्या पयोभिर्यूयं पात स्वस्तिभिः सदा नः ॥
Samhita Transcription Accented
eṣá syá kārúrjarate sūktáirágre budhāná uṣásām sumánmā ǀ
iṣā́ tám vardhadaghnyā́ páyobhiryūyám pāta svastíbhiḥ sádā naḥ ǁ
Samhita Transcription Nonaccented
eṣa sya kārurjarate sūktairagre budhāna uṣasām sumanmā ǀ
iṣā tam vardhadaghnyā payobhiryūyam pāta svastibhiḥ sadā naḥ ǁ
Padapatha Devanagari Accented
ए॒षः । स्यः । का॒रुः । ज॒र॒ते॒ । सु॒ऽउ॒क्तैः । अग्रे॑ । बु॒धा॒नः । उ॒षसा॑म् । सु॒ऽमन्मा॑ ।
इ॒षा । तम् । व॒र्ध॒त् । अ॒घ्न्या । पयः॑ऽभिः । यू॒यम् । पा॒त॒ । स्व॒स्तिऽभिः॑ । सदा॑ । नः॒ ॥
Padapatha Devanagari Nonaccented
एषः । स्यः । कारुः । जरते । सुऽउक्तैः । अग्रे । बुधानः । उषसाम् । सुऽमन्मा ।
इषा । तम् । वर्धत् । अघ्न्या । पयःऽभिः । यूयम् । पात । स्वस्तिऽभिः । सदा । नः ॥
Padapatha Transcription Accented
eṣáḥ ǀ syáḥ ǀ kārúḥ ǀ jarate ǀ su-uktáiḥ ǀ ágre ǀ budhānáḥ ǀ uṣásām ǀ su-mánmā ǀ
iṣā́ ǀ tám ǀ vardhat ǀ aghnyā́ ǀ páyaḥ-bhiḥ ǀ yūyám ǀ pāta ǀ svastí-bhiḥ ǀ sádā ǀ naḥ ǁ
Padapatha Transcription Nonaccented
eṣaḥ ǀ syaḥ ǀ kāruḥ ǀ jarate ǀ su-uktaiḥ ǀ agre ǀ budhānaḥ ǀ uṣasām ǀ su-manmā ǀ
iṣā ǀ tam ǀ vardhat ǀ aghnyā ǀ payaḥ-bhiḥ ǀ yūyam ǀ pāta ǀ svasti-bhiḥ ǀ sadā ǀ naḥ ǁ