|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 7
Sūkta 82
|
1. Info |
| To: | indra, varuṇa | |
| From: | vasiṣṭha maitrāvaruṇi | |
| Metres: | 1st set of styles: nicṛjjagatī (1, 2, 6, 7, 9); ārṣījagatī (4, 5, 10); bhurigārcījagatī (3); virāḍjagatī (8) 2nd set of styles: jagatī |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
07.082.01 (Mandala. Sukta. Rik)
5.6.02.01 (Ashtaka. Adhyaya. Varga. Rik)
07.05.063 (Mandala. Anuvāka. Rik)
Samhita Devanagari Accented
इंद्रा॑वरुणा यु॒वम॑ध्व॒राय॑ नो वि॒शे जना॑य॒ महि॒ शर्म॑ यच्छतं ।
दी॒र्घप्र॑यज्यु॒मति॒ यो व॑नु॒ष्यति॑ व॒यं ज॑येम॒ पृत॑नासु दू॒ढ्यः॑ ॥
Samhita Devanagari Nonaccented
इंद्रावरुणा युवमध्वराय नो विशे जनाय महि शर्म यच्छतं ।
दीर्घप्रयज्युमति यो वनुष्यति वयं जयेम पृतनासु दूढ्यः ॥
Samhita Transcription Accented
índrāvaruṇā yuvámadhvarā́ya no viśé jánāya máhi śárma yacchatam ǀ
dīrgháprayajyumáti yó vanuṣyáti vayám jayema pṛ́tanāsu dūḍhyáḥ ǁ
Samhita Transcription Nonaccented
indrāvaruṇā yuvamadhvarāya no viśe janāya mahi śarma yacchatam ǀ
dīrghaprayajyumati yo vanuṣyati vayam jayema pṛtanāsu dūḍhyaḥ ǁ
Padapatha Devanagari Accented
इन्द्रा॑वरुणा । यु॒वम् । अ॒ध्व॒राय॑ । नः॒ । वि॒शे । जना॑य । महि॑ । शर्म॑ । य॒च्छ॒त॒म् ।
दी॒र्घऽप्र॑यज्युम् । अति॑ । यः । व॒नु॒ष्यति॑ । व॒यम् । ज॒ये॒म॒ । पृत॑नासु । दुः॒ऽध्यः॑ ॥
Padapatha Devanagari Nonaccented
इन्द्रावरुणा । युवम् । अध्वराय । नः । विशे । जनाय । महि । शर्म । यच्छतम् ।
दीर्घऽप्रयज्युम् । अति । यः । वनुष्यति । वयम् । जयेम । पृतनासु । दुःऽध्यः ॥
Padapatha Transcription Accented
índrāvaruṇā ǀ yuvám ǀ adhvarā́ya ǀ naḥ ǀ viśé ǀ jánāya ǀ máhi ǀ śárma ǀ yacchatam ǀ
dīrghá-prayajyum ǀ áti ǀ yáḥ ǀ vanuṣyáti ǀ vayám ǀ jayema ǀ pṛ́tanāsu ǀ duḥ-dhyáḥ ǁ
Padapatha Transcription Nonaccented
indrāvaruṇā ǀ yuvam ǀ adhvarāya ǀ naḥ ǀ viśe ǀ janāya ǀ mahi ǀ śarma ǀ yacchatam ǀ
dīrgha-prayajyum ǀ ati ǀ yaḥ ǀ vanuṣyati ǀ vayam ǀ jayema ǀ pṛtanāsu ǀ duḥ-dhyaḥ ǁ
07.082.02 (Mandala. Sukta. Rik)
5.6.02.02 (Ashtaka. Adhyaya. Varga. Rik)
07.05.064 (Mandala. Anuvāka. Rik)
Samhita Devanagari Accented
स॒म्राळ॒न्यः स्व॒राळ॒न्य उ॑च्यते वां म॒हांता॒विंद्रा॒वरु॑णा म॒हाव॑सू ।
विश्वे॑ दे॒वासः॑ पर॒मे व्यो॑मनि॒ सं वा॒मोजो॑ वृषणा॒ सं बलं॑ दधुः ॥
Samhita Devanagari Nonaccented
सम्राळन्यः स्वराळन्य उच्यते वां महांताविंद्रावरुणा महावसू ।
विश्वे देवासः परमे व्योमनि सं वामोजो वृषणा सं बलं दधुः ॥
Samhita Transcription Accented
samrā́ḷanyáḥ svarā́ḷanyá ucyate vām mahā́ntāvíndrāváruṇā mahā́vasū ǀ
víśve devā́saḥ paramé vyomani sám vāmójo vṛṣaṇā sám bálam dadhuḥ ǁ
Samhita Transcription Nonaccented
samrāḷanyaḥ svarāḷanya ucyate vām mahāntāvindrāvaruṇā mahāvasū ǀ
viśve devāsaḥ parame vyomani sam vāmojo vṛṣaṇā sam balam dadhuḥ ǁ
Padapatha Devanagari Accented
स॒म्ऽराट् । अ॒न्यः । स्व॒ऽराट् । अ॒न्यः । उ॒च्य॒ते॒ । वा॒म् । म॒हान्तौ॑ । इन्द्रा॒वरु॑णा । म॒हाव॑सू॒ इति॑ म॒हाऽव॑सू ।
विश्वे॑ । दे॒वासः॑ । प॒र॒मे । विऽओ॑मनि । सम् । वा॒म् । ओजः॑ । वृ॒ष॒णा॒ । सम् । बल॑म् । द॒धुः॒ ॥
Padapatha Devanagari Nonaccented
सम्ऽराट् । अन्यः । स्वऽराट् । अन्यः । उच्यते । वाम् । महान्तौ । इन्द्रावरुणा । महावसू इति महाऽवसू ।
विश्वे । देवासः । परमे । विऽओमनि । सम् । वाम् । ओजः । वृषणा । सम् । बलम् । दधुः ॥
Padapatha Transcription Accented
sam-rā́ṭ ǀ anyáḥ ǀ sva-rā́ṭ ǀ anyáḥ ǀ ucyate ǀ vām ǀ mahā́ntau ǀ índrāváruṇā ǀ mahā́vasū íti mahā́-vasū ǀ
víśve ǀ devā́saḥ ǀ paramé ǀ ví-omani ǀ sám ǀ vām ǀ ójaḥ ǀ vṛṣaṇā ǀ sám ǀ bálam ǀ dadhuḥ ǁ
Padapatha Transcription Nonaccented
sam-rāṭ ǀ anyaḥ ǀ sva-rāṭ ǀ anyaḥ ǀ ucyate ǀ vām ǀ mahāntau ǀ indrāvaruṇā ǀ mahāvasū iti mahā-vasū ǀ
viśve ǀ devāsaḥ ǀ parame ǀ vi-omani ǀ sam ǀ vām ǀ ojaḥ ǀ vṛṣaṇā ǀ sam ǀ balam ǀ dadhuḥ ǁ
07.082.03 (Mandala. Sukta. Rik)
5.6.02.03 (Ashtaka. Adhyaya. Varga. Rik)
07.05.065 (Mandala. Anuvāka. Rik)
Samhita Devanagari Accented
अन्व॒पां खान्य॑तृंत॒मोज॒सा सूर्य॑मैरयतं दि॒वि प्र॒भुं ।
इंद्रा॑वरुणा॒ मदे॑ अस्य मा॒यिनोऽपि॑न्वतम॒पितः॒ पिन्व॑तं॒ धियः॑ ॥
Samhita Devanagari Nonaccented
अन्वपां खान्यतृंतमोजसा सूर्यमैरयतं दिवि प्रभुं ।
इंद्रावरुणा मदे अस्य मायिनोऽपिन्वतमपितः पिन्वतं धियः ॥
Samhita Transcription Accented
ánvapā́m khā́nyatṛntamójasā́ sū́ryamairayatam diví prabhúm ǀ
índrāvaruṇā máde asya māyínó’pinvatamapítaḥ pínvatam dhíyaḥ ǁ
Samhita Transcription Nonaccented
anvapām khānyatṛntamojasā sūryamairayatam divi prabhum ǀ
indrāvaruṇā made asya māyino’pinvatamapitaḥ pinvatam dhiyaḥ ǁ
Padapatha Devanagari Accented
अनु॑ । अ॒पाम् । खानि॑ । अ॒तृ॒न्त॒म् । ओज॑सा । आ । सूर्य॑म् । ऐ॒र॒य॒त॒म् । दि॒वि । प्र॒ऽभुम् ।
इन्द्रा॑वरुणा । मदे॑ । अ॒स्य॒ । मा॒यिनः॑ । अपि॑न्वतम् । अ॒पितः॑ । पिन्व॑तम् । धियः॑ ॥
Padapatha Devanagari Nonaccented
अनु । अपाम् । खानि । अतृन्तम् । ओजसा । आ । सूर्यम् । ऐरयतम् । दिवि । प्रऽभुम् ।
इन्द्रावरुणा । मदे । अस्य । मायिनः । अपिन्वतम् । अपितः । पिन्वतम् । धियः ॥
Padapatha Transcription Accented
ánu ǀ apā́m ǀ khā́ni ǀ atṛntam ǀ ójasā ǀ ā́ ǀ sū́ryam ǀ airayatam ǀ diví ǀ pra-bhúm ǀ
índrāvaruṇā ǀ máde ǀ asya ǀ māyínaḥ ǀ ápinvatam ǀ apítaḥ ǀ pínvatam ǀ dhíyaḥ ǁ
Padapatha Transcription Nonaccented
anu ǀ apām ǀ khāni ǀ atṛntam ǀ ojasā ǀ ā ǀ sūryam ǀ airayatam ǀ divi ǀ pra-bhum ǀ
indrāvaruṇā ǀ made ǀ asya ǀ māyinaḥ ǀ apinvatam ǀ apitaḥ ǀ pinvatam ǀ dhiyaḥ ǁ
07.082.04 (Mandala. Sukta. Rik)
5.6.02.04 (Ashtaka. Adhyaya. Varga. Rik)
07.05.066 (Mandala. Anuvāka. Rik)
Samhita Devanagari Accented
यु॒वामिद्यु॒त्सु पृत॑नासु॒ वह्न॑यो यु॒वां क्षेम॑स्य प्रस॒वे मि॒तज्ञ॑वः ।
ई॒शा॒ना वस्व॑ उ॒भय॑स्य का॒रव॒ इंद्रा॑वरुणा सु॒हवा॑ हवामहे ॥
Samhita Devanagari Nonaccented
युवामिद्युत्सु पृतनासु वह्नयो युवां क्षेमस्य प्रसवे मितज्ञवः ।
ईशाना वस्व उभयस्य कारव इंद्रावरुणा सुहवा हवामहे ॥
Samhita Transcription Accented
yuvā́mídyutsú pṛ́tanāsu váhnayo yuvā́m kṣémasya prasavé mitájñavaḥ ǀ
īśānā́ vásva ubháyasya kāráva índrāvaruṇā suhávā havāmahe ǁ
Samhita Transcription Nonaccented
yuvāmidyutsu pṛtanāsu vahnayo yuvām kṣemasya prasave mitajñavaḥ ǀ
īśānā vasva ubhayasya kārava indrāvaruṇā suhavā havāmahe ǁ
Padapatha Devanagari Accented
यु॒वाम् । इत् । यु॒त्ऽसु । पृत॑नासु । वह्न॑यः । यु॒वाम् । क्षेम॑स्य । प्र॒ऽस॒वे । मि॒तऽज्ञ॑वः ।
ई॒शा॒ना । वस्वः॑ । उ॒भय॑स्य । का॒रवः॑ । इन्द्रा॑वरुणा । सु॒ऽहवा॑ । ह॒वा॒म॒हे॒ ॥
Padapatha Devanagari Nonaccented
युवाम् । इत् । युत्ऽसु । पृतनासु । वह्नयः । युवाम् । क्षेमस्य । प्रऽसवे । मितऽज्ञवः ।
ईशाना । वस्वः । उभयस्य । कारवः । इन्द्रावरुणा । सुऽहवा । हवामहे ॥
Padapatha Transcription Accented
yuvā́m ǀ ít ǀ yut-sú ǀ pṛ́tanāsu ǀ váhnayaḥ ǀ yuvā́m ǀ kṣémasya ǀ pra-savé ǀ mitá-jñavaḥ ǀ
īśānā́ ǀ vásvaḥ ǀ ubháyasya ǀ kārávaḥ ǀ índrāvaruṇā ǀ su-hávā ǀ havāmahe ǁ
Padapatha Transcription Nonaccented
yuvām ǀ it ǀ yut-su ǀ pṛtanāsu ǀ vahnayaḥ ǀ yuvām ǀ kṣemasya ǀ pra-save ǀ mita-jñavaḥ ǀ
īśānā ǀ vasvaḥ ǀ ubhayasya ǀ kāravaḥ ǀ indrāvaruṇā ǀ su-havā ǀ havāmahe ǁ
07.082.05 (Mandala. Sukta. Rik)
5.6.02.05 (Ashtaka. Adhyaya. Varga. Rik)
07.05.067 (Mandala. Anuvāka. Rik)
Samhita Devanagari Accented
इंद्रा॑वरुणा॒ यदि॒मानि॑ च॒क्रथु॒र्विश्वा॑ जा॒तानि॒ भुव॑नस्य म॒ज्मना॑ ।
क्षेमे॑ण मि॒त्रो वरु॑णं दुव॒स्यति॑ म॒रुद्भि॑रु॒ग्रः शुभ॑म॒न्य ई॑यते ॥
Samhita Devanagari Nonaccented
इंद्रावरुणा यदिमानि चक्रथुर्विश्वा जातानि भुवनस्य मज्मना ।
क्षेमेण मित्रो वरुणं दुवस्यति मरुद्भिरुग्रः शुभमन्य ईयते ॥
Samhita Transcription Accented
índrāvaruṇā yádimā́ni cakráthurvíśvā jātā́ni bhúvanasya majmánā ǀ
kṣémeṇa mitró váruṇam duvasyáti marúdbhirugráḥ śúbhamanyá īyate ǁ
Samhita Transcription Nonaccented
indrāvaruṇā yadimāni cakrathurviśvā jātāni bhuvanasya majmanā ǀ
kṣemeṇa mitro varuṇam duvasyati marudbhirugraḥ śubhamanya īyate ǁ
Padapatha Devanagari Accented
इन्द्रा॑वरुणा । यत् । इ॒मानि॑ । च॒क्रथुः॑ । विश्वा॑ । जा॒तानि॑ । भुव॑नस्य । म॒ज्मना॑ ।
क्षेमे॑ण । मि॒त्रः । वरु॑णम् । दु॒व॒स्यति॑ । म॒रुत्ऽभिः॑ । उ॒ग्रः । शुभ॑म् । अ॒न्यः । ई॒य॒ते॒ ॥
Padapatha Devanagari Nonaccented
इन्द्रावरुणा । यत् । इमानि । चक्रथुः । विश्वा । जातानि । भुवनस्य । मज्मना ।
क्षेमेण । मित्रः । वरुणम् । दुवस्यति । मरुत्ऽभिः । उग्रः । शुभम् । अन्यः । ईयते ॥
Padapatha Transcription Accented
índrāvaruṇā ǀ yát ǀ imā́ni ǀ cakráthuḥ ǀ víśvā ǀ jātā́ni ǀ bhúvanasya ǀ majmánā ǀ
kṣémeṇa ǀ mitráḥ ǀ váruṇam ǀ duvasyáti ǀ marút-bhiḥ ǀ ugráḥ ǀ śúbham ǀ anyáḥ ǀ īyate ǁ
Padapatha Transcription Nonaccented
indrāvaruṇā ǀ yat ǀ imāni ǀ cakrathuḥ ǀ viśvā ǀ jātāni ǀ bhuvanasya ǀ majmanā ǀ
kṣemeṇa ǀ mitraḥ ǀ varuṇam ǀ duvasyati ǀ marut-bhiḥ ǀ ugraḥ ǀ śubham ǀ anyaḥ ǀ īyate ǁ
07.082.06 (Mandala. Sukta. Rik)
5.6.03.01 (Ashtaka. Adhyaya. Varga. Rik)
07.05.068 (Mandala. Anuvāka. Rik)
Samhita Devanagari Accented
म॒हे शु॒ल्काय॒ वरु॑णस्य॒ नु त्वि॒ष ओजो॑ मिमाते ध्रु॒वम॑स्य॒ यत्स्वं ।
अजा॑मिम॒न्यः श्न॒थयं॑त॒माति॑रद्द॒भ्रेभि॑र॒न्यः प्र वृ॑णोति॒ भूय॑सः ॥
Samhita Devanagari Nonaccented
महे शुल्काय वरुणस्य नु त्विष ओजो मिमाते ध्रुवमस्य यत्स्वं ।
अजामिमन्यः श्नथयंतमातिरद्दभ्रेभिरन्यः प्र वृणोति भूयसः ॥
Samhita Transcription Accented
mahé śulkā́ya váruṇasya nú tviṣá ójo mimāte dhruvámasya yátsvám ǀ
ájāmimanyáḥ śnatháyantamā́tiraddabhrébhiranyáḥ prá vṛṇoti bhū́yasaḥ ǁ
Samhita Transcription Nonaccented
mahe śulkāya varuṇasya nu tviṣa ojo mimāte dhruvamasya yatsvam ǀ
ajāmimanyaḥ śnathayantamātiraddabhrebhiranyaḥ pra vṛṇoti bhūyasaḥ ǁ
Padapatha Devanagari Accented
म॒हे । शु॒ल्काय॑ । वरु॑णस्य । नु । त्वि॒षे । ओजः॑ । मि॒मा॒ते॒ इति॑ । ध्रु॒वम् । अ॒स्य॒ । यत् । स्वम् ।
अजा॑मिम् । अ॒न्यः । श्न॒थय॑न्तम् । आ । अति॑रत् । द॒भ्रेभिः॑ । अ॒न्यः । प्र । वृ॒णो॒ति॒ । भूय॑सः ॥
Padapatha Devanagari Nonaccented
महे । शुल्काय । वरुणस्य । नु । त्विषे । ओजः । मिमाते इति । ध्रुवम् । अस्य । यत् । स्वम् ।
अजामिम् । अन्यः । श्नथयन्तम् । आ । अतिरत् । दभ्रेभिः । अन्यः । प्र । वृणोति । भूयसः ॥
Padapatha Transcription Accented
mahé ǀ śulkā́ya ǀ váruṇasya ǀ nú ǀ tviṣé ǀ ójaḥ ǀ mimāte íti ǀ dhruvám ǀ asya ǀ yát ǀ svám ǀ
ájāmim ǀ anyáḥ ǀ śnatháyantam ǀ ā́ ǀ átirat ǀ dabhrébhiḥ ǀ anyáḥ ǀ prá ǀ vṛṇoti ǀ bhū́yasaḥ ǁ
Padapatha Transcription Nonaccented
mahe ǀ śulkāya ǀ varuṇasya ǀ nu ǀ tviṣe ǀ ojaḥ ǀ mimāte iti ǀ dhruvam ǀ asya ǀ yat ǀ svam ǀ
ajāmim ǀ anyaḥ ǀ śnathayantam ǀ ā ǀ atirat ǀ dabhrebhiḥ ǀ anyaḥ ǀ pra ǀ vṛṇoti ǀ bhūyasaḥ ǁ
07.082.07 (Mandala. Sukta. Rik)
5.6.03.02 (Ashtaka. Adhyaya. Varga. Rik)
07.05.069 (Mandala. Anuvāka. Rik)
Samhita Devanagari Accented
न तमंहो॒ न दु॑रि॒तानि॒ मर्त्य॒मिंद्रा॑वरुणा॒ न तपः॒ कुत॑श्च॒न ।
यस्य॑ देवा॒ गच्छ॑थो वी॒थो अ॑ध्व॒रं न तं मर्त॑स्य नशते॒ परि॑ह्वृतिः ॥
Samhita Devanagari Nonaccented
न तमंहो न दुरितानि मर्त्यमिंद्रावरुणा न तपः कुतश्चन ।
यस्य देवा गच्छथो वीथो अध्वरं न तं मर्तस्य नशते परिह्वृतिः ॥
Samhita Transcription Accented
ná támáṃho ná duritā́ni mártyamíndrāvaruṇā ná tápaḥ kútaścaná ǀ
yásya devā gácchatho vīthó adhvarám ná tám mártasya naśate párihvṛtiḥ ǁ
Samhita Transcription Nonaccented
na tamaṃho na duritāni martyamindrāvaruṇā na tapaḥ kutaścana ǀ
yasya devā gacchatho vītho adhvaram na tam martasya naśate parihvṛtiḥ ǁ
Padapatha Devanagari Accented
न । तम् । अंहः॑ । न । दुः॒ऽइ॒तानि॑ । मर्त्य॑म् । इन्द्रा॑वरुणा । न । तपः॑ । कुतः॑ । च॒न ।
यस्य॑ । दे॒वा॒ । गच्छ॑थः । वी॒थः । अ॒ध्व॒रम् । न । तम् । मर्त॑स्य । न॒श॒ते॒ । परि॑ऽह्वृतिः ॥
Padapatha Devanagari Nonaccented
न । तम् । अंहः । न । दुःऽइतानि । मर्त्यम् । इन्द्रावरुणा । न । तपः । कुतः । चन ।
यस्य । देवा । गच्छथः । वीथः । अध्वरम् । न । तम् । मर्तस्य । नशते । परिऽह्वृतिः ॥
Padapatha Transcription Accented
ná ǀ tám ǀ áṃhaḥ ǀ ná ǀ duḥ-itā́ni ǀ mártyam ǀ índrāvaruṇā ǀ ná ǀ tápaḥ ǀ kútaḥ ǀ caná ǀ
yásya ǀ devā ǀ gácchathaḥ ǀ vītháḥ ǀ adhvarám ǀ ná ǀ tám ǀ mártasya ǀ naśate ǀ pári-hvṛtiḥ ǁ
Padapatha Transcription Nonaccented
na ǀ tam ǀ aṃhaḥ ǀ na ǀ duḥ-itāni ǀ martyam ǀ indrāvaruṇā ǀ na ǀ tapaḥ ǀ kutaḥ ǀ cana ǀ
yasya ǀ devā ǀ gacchathaḥ ǀ vīthaḥ ǀ adhvaram ǀ na ǀ tam ǀ martasya ǀ naśate ǀ pari-hvṛtiḥ ǁ
07.082.08 (Mandala. Sukta. Rik)
5.6.03.03 (Ashtaka. Adhyaya. Varga. Rik)
07.05.070 (Mandala. Anuvāka. Rik)
Samhita Devanagari Accented
अ॒र्वाङ्न॑रा॒ दैव्ये॒नाव॒सा ग॑तं शृणु॒तं हवं॒ यदि॑ मे॒ जुजो॑षथः ।
यु॒वोर्हि स॒ख्यमु॒त वा॒ यदाप्यं॑ मार्डी॒कमिं॑द्रावरुणा॒ नि य॑च्छतं ॥
Samhita Devanagari Nonaccented
अर्वाङ्नरा दैव्येनावसा गतं शृणुतं हवं यदि मे जुजोषथः ।
युवोर्हि सख्यमुत वा यदाप्यं मार्डीकमिंद्रावरुणा नि यच्छतं ॥
Samhita Transcription Accented
arvā́ṅnarā dáivyenā́vasā́ gatam śṛṇutám hávam yádi me jújoṣathaḥ ǀ
yuvórhí sakhyámutá vā yádā́pyam mārḍīkámindrāvaruṇā ní yacchatam ǁ
Samhita Transcription Nonaccented
arvāṅnarā daivyenāvasā gatam śṛṇutam havam yadi me jujoṣathaḥ ǀ
yuvorhi sakhyamuta vā yadāpyam mārḍīkamindrāvaruṇā ni yacchatam ǁ
Padapatha Devanagari Accented
अ॒र्वाक् । न॒रा॒ । दैव्ये॑न । अव॑सा । आ । ग॒त॒म् । शृ॒णु॒तम् । हव॑म् । यदि॑ । मे॒ । जुजो॑षथः ।
यु॒वोः । हि । स॒ख्यम् । उ॒त । वा॒ । यत् । आप्य॑म् । मा॒र्डी॒कम् । इ॒न्द्रा॒व॒रु॒णा॒ । नि । य॒च्छ॒त॒म् ॥
Padapatha Devanagari Nonaccented
अर्वाक् । नरा । दैव्येन । अवसा । आ । गतम् । शृणुतम् । हवम् । यदि । मे । जुजोषथः ।
युवोः । हि । सख्यम् । उत । वा । यत् । आप्यम् । मार्डीकम् । इन्द्रावरुणा । नि । यच्छतम् ॥
Padapatha Transcription Accented
arvā́k ǀ narā ǀ dáivyena ǀ ávasā ǀ ā́ ǀ gatam ǀ śṛṇutám ǀ hávam ǀ yádi ǀ me ǀ jújoṣathaḥ ǀ
yuvóḥ ǀ hí ǀ sakhyám ǀ utá ǀ vā ǀ yát ǀ ā́pyam ǀ mārḍīkám ǀ indrāvaruṇā ǀ ní ǀ yacchatam ǁ
Padapatha Transcription Nonaccented
arvāk ǀ narā ǀ daivyena ǀ avasā ǀ ā ǀ gatam ǀ śṛṇutam ǀ havam ǀ yadi ǀ me ǀ jujoṣathaḥ ǀ
yuvoḥ ǀ hi ǀ sakhyam ǀ uta ǀ vā ǀ yat ǀ āpyam ǀ mārḍīkam ǀ indrāvaruṇā ǀ ni ǀ yacchatam ǁ
07.082.09 (Mandala. Sukta. Rik)
5.6.03.04 (Ashtaka. Adhyaya. Varga. Rik)
07.05.071 (Mandala. Anuvāka. Rik)
Samhita Devanagari Accented
अ॒स्माक॑मिंद्रावरुणा॒ भरे॑भरे पुरोयो॒धा भ॑वतं कृष्ट्योजसा ।
यद्वां॒ हवं॑त उ॒भये॒ अध॑ स्पृ॒धि नर॑स्तो॒कस्य॒ तन॑यस्य सा॒तिषु॑ ॥
Samhita Devanagari Nonaccented
अस्माकमिंद्रावरुणा भरेभरे पुरोयोधा भवतं कृष्ट्योजसा ।
यद्वां हवंत उभये अध स्पृधि नरस्तोकस्य तनयस्य सातिषु ॥
Samhita Transcription Accented
asmā́kamindrāvaruṇā bhárebhare puroyodhā́ bhavatam kṛṣṭyojasā ǀ
yádvām hávanta ubháye ádha spṛdhí nárastokásya tánayasya sātíṣu ǁ
Samhita Transcription Nonaccented
asmākamindrāvaruṇā bharebhare puroyodhā bhavatam kṛṣṭyojasā ǀ
yadvām havanta ubhaye adha spṛdhi narastokasya tanayasya sātiṣu ǁ
Padapatha Devanagari Accented
अ॒स्माक॑म् । इ॒न्द्रा॒व॒रु॒णा॒ । भरे॑ऽभरे । पु॒रः॒ऽयो॒धा । भ॒व॒त॒म् । कृ॒ष्टि॒ऽओ॒ज॒सा॒ ।
यत् । वा॒म् । हव॑न्ते । उ॒भये॑ । अध॑ । स्पृ॒धि । नरः॑ । तो॒कस्य॑ । तन॑यस्य । सा॒तिषु॑ ॥
Padapatha Devanagari Nonaccented
अस्माकम् । इन्द्रावरुणा । भरेऽभरे । पुरःऽयोधा । भवतम् । कृष्टिऽओजसा ।
यत् । वाम् । हवन्ते । उभये । अध । स्पृधि । नरः । तोकस्य । तनयस्य । सातिषु ॥
Padapatha Transcription Accented
asmā́kam ǀ indrāvaruṇā ǀ bháre-bhare ǀ puraḥ-yodhā́ ǀ bhavatam ǀ kṛṣṭi-ojasā ǀ
yát ǀ vām ǀ hávante ǀ ubháye ǀ ádha ǀ spṛdhí ǀ náraḥ ǀ tokásya ǀ tánayasya ǀ sātíṣu ǁ
Padapatha Transcription Nonaccented
asmākam ǀ indrāvaruṇā ǀ bhare-bhare ǀ puraḥ-yodhā ǀ bhavatam ǀ kṛṣṭi-ojasā ǀ
yat ǀ vām ǀ havante ǀ ubhaye ǀ adha ǀ spṛdhi ǀ naraḥ ǀ tokasya ǀ tanayasya ǀ sātiṣu ǁ
07.082.10 (Mandala. Sukta. Rik)
5.6.03.05 (Ashtaka. Adhyaya. Varga. Rik)
07.05.072 (Mandala. Anuvāka. Rik)
Samhita Devanagari Accented
अ॒स्मे इंद्रो॒ वरु॑णो मि॒त्रो अ॑र्य॒मा द्यु॒म्नं य॑च्छंतु॒ महि॒ शर्म॑ स॒प्रथः॑ ।
अ॒व॒ध्रं ज्योति॒रदि॑तेर्ऋता॒वृधो॑ दे॒वस्य॒ श्लोकं॑ सवि॒तुर्म॑नामहे ॥
Samhita Devanagari Nonaccented
अस्मे इंद्रो वरुणो मित्रो अर्यमा द्युम्नं यच्छंतु महि शर्म सप्रथः ।
अवध्रं ज्योतिरदितेर्ऋतावृधो देवस्य श्लोकं सवितुर्मनामहे ॥
Samhita Transcription Accented
asmé índro váruṇo mitró aryamā́ dyumnám yacchantu máhi śárma sapráthaḥ ǀ
avadhrám jyótiráditerṛtāvṛ́dho devásya ślókam savitúrmanāmahe ǁ
Samhita Transcription Nonaccented
asme indro varuṇo mitro aryamā dyumnam yacchantu mahi śarma saprathaḥ ǀ
avadhram jyotiraditerṛtāvṛdho devasya ślokam saviturmanāmahe ǁ
Padapatha Devanagari Accented
अ॒स्मे इति॑ । इन्द्रः॑ । वरु॑णः । मि॒त्रः । अ॒र्य॒मा । द्यु॒म्नम् । य॒च्छ॒न्तु॒ । महि॑ । शर्म॑ । स॒ऽप्रथः॑ ।
अ॒व॒ध्रम् । ज्योतिः॑ । अदि॑तेः । ऋ॒त॒ऽवृधः॑ । दे॒वस्य॑ । श्लोक॑म् । स॒वि॒तुः । म॒ना॒म॒हे॒ ॥
Padapatha Devanagari Nonaccented
अस्मे इति । इन्द्रः । वरुणः । मित्रः । अर्यमा । द्युम्नम् । यच्छन्तु । महि । शर्म । सऽप्रथः ।
अवध्रम् । ज्योतिः । अदितेः । ऋतऽवृधः । देवस्य । श्लोकम् । सवितुः । मनामहे ॥
Padapatha Transcription Accented
asmé íti ǀ índraḥ ǀ váruṇaḥ ǀ mitráḥ ǀ aryamā́ ǀ dyumnám ǀ yacchantu ǀ máhi ǀ śárma ǀ sa-práthaḥ ǀ
avadhrám ǀ jyótiḥ ǀ áditeḥ ǀ ṛta-vṛ́dhaḥ ǀ devásya ǀ ślókam ǀ savitúḥ ǀ manāmahe ǁ
Padapatha Transcription Nonaccented
asme iti ǀ indraḥ ǀ varuṇaḥ ǀ mitraḥ ǀ aryamā ǀ dyumnam ǀ yacchantu ǀ mahi ǀ śarma ǀ sa-prathaḥ ǀ
avadhram ǀ jyotiḥ ǀ aditeḥ ǀ ṛta-vṛdhaḥ ǀ devasya ǀ ślokam ǀ savituḥ ǀ manāmahe ǁ