|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 9
|
1. Info |
| To: | aśvins | |
| From: | śaśakarṇa kāṇva | |
| Metres: | 1st set of styles: anuṣṭup (7, 8, 17, 19); bṛhatī (1, 4, 6); gāyatrī (2, 20); nicṛdgāyatrī (3, 21); nicṛdbṛhatī (14, 15); kakuṣṇik (5); pādanicṛdanuṣṭup (9); nicṛdārṣīpaṅkti (10); tripādavirāḍgāyatrī (11); jagatī (12); nicṛdanuṣṭup (13); ārcyanuṣṭup (16); virāḍanuṣṭup (18) 2nd set of styles: anuṣṭubh (7-9, 13, 16-19); bṛhatī (1, 4, 6, 14, 15); gāyatrī (2, 3, 20, 21); kakubh (5); triṣṭubh (10); virāj (11); jagatī (12) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.009.01 (Mandala. Sukta. Rik)
5.8.30.01 (Ashtaka. Adhyaya. Varga. Rik)
08.02.108 (Mandala. Anuvāka. Rik)
Samhita Devanagari Accented
आ नू॒नम॑श्विना यु॒वं व॒त्सस्य॑ गंत॒मव॑से ।
प्रास्मै॑ यच्छतमवृ॒कं पृ॒थु च्छ॒र्दिर्यु॑यु॒तं या अरा॑तयः ॥
Samhita Devanagari Nonaccented
आ नूनमश्विना युवं वत्सस्य गंतमवसे ।
प्रास्मै यच्छतमवृकं पृथु च्छर्दिर्युयुतं या अरातयः ॥
Samhita Transcription Accented
ā́ nūnámaśvinā yuvám vatsásya gantamávase ǀ
prā́smai yacchatamavṛkám pṛthú chardíryuyutám yā́ árātayaḥ ǁ
Samhita Transcription Nonaccented
ā nūnamaśvinā yuvam vatsasya gantamavase ǀ
prāsmai yacchatamavṛkam pṛthu chardiryuyutam yā arātayaḥ ǁ
Padapatha Devanagari Accented
आ । नू॒नम् । अ॒श्वि॒ना॒ । यु॒वम् । व॒त्सस्य॑ । ग॒न्त॒म् । अव॑से ।
प्र । अ॒स्मै॒ । य॒च्छ॒त॒म् । अ॒वृ॒कम् । पृ॒थु । छ॒र्दिः । यु॒यु॒तम् । याः । अरा॑तयः ॥
Padapatha Devanagari Nonaccented
आ । नूनम् । अश्विना । युवम् । वत्सस्य । गन्तम् । अवसे ।
प्र । अस्मै । यच्छतम् । अवृकम् । पृथु । छर्दिः । युयुतम् । याः । अरातयः ॥
Padapatha Transcription Accented
ā́ ǀ nūnám ǀ aśvinā ǀ yuvám ǀ vatsásya ǀ gantam ǀ ávase ǀ
prá ǀ asmai ǀ yacchatam ǀ avṛkám ǀ pṛthú ǀ chardíḥ ǀ yuyutám ǀ yā́ḥ ǀ árātayaḥ ǁ
Padapatha Transcription Nonaccented
ā ǀ nūnam ǀ aśvinā ǀ yuvam ǀ vatsasya ǀ gantam ǀ avase ǀ
pra ǀ asmai ǀ yacchatam ǀ avṛkam ǀ pṛthu ǀ chardiḥ ǀ yuyutam ǀ yāḥ ǀ arātayaḥ ǁ
08.009.02 (Mandala. Sukta. Rik)
5.8.30.02 (Ashtaka. Adhyaya. Varga. Rik)
08.02.109 (Mandala. Anuvāka. Rik)
Samhita Devanagari Accented
यदं॒तरि॑क्षे॒ यद्दि॒वि यत्पंच॒ मानु॑षाँ॒ अनु॑ ।
नृ॒म्णं तद्ध॑त्तमश्विना ॥
Samhita Devanagari Nonaccented
यदंतरिक्षे यद्दिवि यत्पंच मानुषाँ अनु ।
नृम्णं तद्धत्तमश्विना ॥
Samhita Transcription Accented
yádantárikṣe yáddiví yátpáñca mā́nuṣām̐ ánu ǀ
nṛmṇám táddhattamaśvinā ǁ
Samhita Transcription Nonaccented
yadantarikṣe yaddivi yatpañca mānuṣām̐ anu ǀ
nṛmṇam taddhattamaśvinā ǁ
Padapatha Devanagari Accented
यत् । अ॒न्तरि॑क्षे । यत् । दि॒वि । यत् । पञ्च॑ । मानु॑षान् । अनु॑ ।
नृ॒म्णम् । तत् । ध॒त्त॒म् । अ॒श्वि॒ना॒ ॥
Padapatha Devanagari Nonaccented
यत् । अन्तरिक्षे । यत् । दिवि । यत् । पञ्च । मानुषान् । अनु ।
नृम्णम् । तत् । धत्तम् । अश्विना ॥
Padapatha Transcription Accented
yát ǀ antárikṣe ǀ yát ǀ diví ǀ yát ǀ páñca ǀ mā́nuṣān ǀ ánu ǀ
nṛmṇám ǀ tát ǀ dhattam ǀ aśvinā ǁ
Padapatha Transcription Nonaccented
yat ǀ antarikṣe ǀ yat ǀ divi ǀ yat ǀ pañca ǀ mānuṣān ǀ anu ǀ
nṛmṇam ǀ tat ǀ dhattam ǀ aśvinā ǁ
08.009.03 (Mandala. Sukta. Rik)
5.8.30.03 (Ashtaka. Adhyaya. Varga. Rik)
08.02.110 (Mandala. Anuvāka. Rik)
Samhita Devanagari Accented
ये वां॒ दंसां॑स्यश्विना॒ विप्रा॑सः परिमामृ॒शुः ।
ए॒वेत्का॒ण्वस्य॑ बोधतं ॥
Samhita Devanagari Nonaccented
ये वां दंसांस्यश्विना विप्रासः परिमामृशुः ।
एवेत्काण्वस्य बोधतं ॥
Samhita Transcription Accented
yé vām dáṃsāṃsyaśvinā víprāsaḥ parimāmṛśúḥ ǀ
evétkāṇvásya bodhatam ǁ
Samhita Transcription Nonaccented
ye vām daṃsāṃsyaśvinā viprāsaḥ parimāmṛśuḥ ǀ
evetkāṇvasya bodhatam ǁ
Padapatha Devanagari Accented
ये । वा॒म् । दंसां॑सि । अ॒श्वि॒ना॒ । विप्रा॑सः । प॒रि॒ऽम॒मृ॒शुः ।
ए॒व । इत् । का॒ण्वस्य॑ । बो॒ध॒त॒म् ॥
Padapatha Devanagari Nonaccented
ये । वाम् । दंसांसि । अश्विना । विप्रासः । परिऽममृशुः ।
एव । इत् । काण्वस्य । बोधतम् ॥
Padapatha Transcription Accented
yé ǀ vām ǀ dáṃsāṃsi ǀ aśvinā ǀ víprāsaḥ ǀ pari-mamṛśúḥ ǀ
evá ǀ ít ǀ kāṇvásya ǀ bodhatam ǁ
Padapatha Transcription Nonaccented
ye ǀ vām ǀ daṃsāṃsi ǀ aśvinā ǀ viprāsaḥ ǀ pari-mamṛśuḥ ǀ
eva ǀ it ǀ kāṇvasya ǀ bodhatam ǁ
08.009.04 (Mandala. Sukta. Rik)
5.8.30.04 (Ashtaka. Adhyaya. Varga. Rik)
08.02.111 (Mandala. Anuvāka. Rik)
Samhita Devanagari Accented
अ॒यं वां॑ घ॒र्मो अ॑श्विना॒ स्तोमे॑न॒ परि॑ षिच्यते ।
अ॒यं सोमो॒ मधु॑मान्वाजिनीवसू॒ येन॑ वृ॒त्रं चिके॑तथः ॥
Samhita Devanagari Nonaccented
अयं वां घर्मो अश्विना स्तोमेन परि षिच्यते ।
अयं सोमो मधुमान्वाजिनीवसू येन वृत्रं चिकेतथः ॥
Samhita Transcription Accented
ayám vām gharmó aśvinā stómena pári ṣicyate ǀ
ayám sómo mádhumānvājinīvasū yéna vṛtrám cíketathaḥ ǁ
Samhita Transcription Nonaccented
ayam vām gharmo aśvinā stomena pari ṣicyate ǀ
ayam somo madhumānvājinīvasū yena vṛtram ciketathaḥ ǁ
Padapatha Devanagari Accented
अ॒यम् । वा॒म् । घ॒र्मः । अ॒श्वि॒ना॒ । स्तोमे॑न । परि॑ । सि॒च्य॒ते॒ ।
अ॒यम् । सोमः॑ । मधु॑ऽमान् । वा॒जि॒नी॒व॒सू॒ इति॑ वाजिनीऽवसू । येन॑ । वृ॒त्रम् । चिके॑तथः ॥
Padapatha Devanagari Nonaccented
अयम् । वाम् । घर्मः । अश्विना । स्तोमेन । परि । सिच्यते ।
अयम् । सोमः । मधुऽमान् । वाजिनीवसू इति वाजिनीऽवसू । येन । वृत्रम् । चिकेतथः ॥
Padapatha Transcription Accented
ayám ǀ vām ǀ gharmáḥ ǀ aśvinā ǀ stómena ǀ pári ǀ sicyate ǀ
ayám ǀ sómaḥ ǀ mádhu-mān ǀ vājinīvasū íti vājinī-vasū ǀ yéna ǀ vṛtrám ǀ cíketathaḥ ǁ
Padapatha Transcription Nonaccented
ayam ǀ vām ǀ gharmaḥ ǀ aśvinā ǀ stomena ǀ pari ǀ sicyate ǀ
ayam ǀ somaḥ ǀ madhu-mān ǀ vājinīvasū iti vājinī-vasū ǀ yena ǀ vṛtram ǀ ciketathaḥ ǁ
08.009.05 (Mandala. Sukta. Rik)
5.8.30.05 (Ashtaka. Adhyaya. Varga. Rik)
08.02.112 (Mandala. Anuvāka. Rik)
Samhita Devanagari Accented
यद॒प्सु यद्वन॒स्पतौ॒ यदोष॑धीषु पुरुदंससा कृ॒तं ।
तेन॑ माविष्टमश्विना ॥
Samhita Devanagari Nonaccented
यदप्सु यद्वनस्पतौ यदोषधीषु पुरुदंससा कृतं ।
तेन माविष्टमश्विना ॥
Samhita Transcription Accented
yádapsú yádvánaspátau yádóṣadhīṣu purudaṃsasā kṛtám ǀ
téna māviṣṭamaśvinā ǁ
Samhita Transcription Nonaccented
yadapsu yadvanaspatau yadoṣadhīṣu purudaṃsasā kṛtam ǀ
tena māviṣṭamaśvinā ǁ
Padapatha Devanagari Accented
यत् । अ॒प्ऽसु । यत् । वन॒स्पतौ॑ । यत् । ओष॑धीषु । पु॒रु॒ऽदं॒स॒सा॒ । कृ॒तम् ।
तेन॑ । मा॒ । अ॒वि॒ष्ट॒म् । अ॒श्वि॒ना॒ ॥
Padapatha Devanagari Nonaccented
यत् । अप्ऽसु । यत् । वनस्पतौ । यत् । ओषधीषु । पुरुऽदंससा । कृतम् ।
तेन । मा । अविष्टम् । अश्विना ॥
Padapatha Transcription Accented
yát ǀ ap-sú ǀ yát ǀ vánaspátau ǀ yát ǀ óṣadhīṣu ǀ puru-daṃsasā ǀ kṛtám ǀ
téna ǀ mā ǀ aviṣṭam ǀ aśvinā ǁ
Padapatha Transcription Nonaccented
yat ǀ ap-su ǀ yat ǀ vanaspatau ǀ yat ǀ oṣadhīṣu ǀ puru-daṃsasā ǀ kṛtam ǀ
tena ǀ mā ǀ aviṣṭam ǀ aśvinā ǁ
08.009.06 (Mandala. Sukta. Rik)
5.8.31.01 (Ashtaka. Adhyaya. Varga. Rik)
08.02.113 (Mandala. Anuvāka. Rik)
Samhita Devanagari Accented
यन्ना॑सत्या भुर॒ण्यथो॒ यद्वा॑ देव भिष॒ज्यथः॑ ।
अ॒यं वां॑ व॒त्सो म॒तिभि॒र्न विं॑धते ह॒विष्मं॑तं॒ हि गच्छ॑थः ॥
Samhita Devanagari Nonaccented
यन्नासत्या भुरण्यथो यद्वा देव भिषज्यथः ।
अयं वां वत्सो मतिभिर्न विंधते हविष्मंतं हि गच्छथः ॥
Samhita Transcription Accented
yánnāsatyā bhuraṇyátho yádvā deva bhiṣajyáthaḥ ǀ
ayám vām vatsó matíbhirná vindhate havíṣmantam hí gácchathaḥ ǁ
Samhita Transcription Nonaccented
yannāsatyā bhuraṇyatho yadvā deva bhiṣajyathaḥ ǀ
ayam vām vatso matibhirna vindhate haviṣmantam hi gacchathaḥ ǁ
Padapatha Devanagari Accented
यत् । ना॒स॒त्या॒ । भु॒र॒ण्यथः॑ । यत् । वा॒ । दे॒वा॒ । भि॒ष॒ज्यथः॑ ।
अ॒यम् । वा॒म् । व॒त्सः । म॒तिऽभिः॑ । न । वि॒न्ध॒ते॒ । ह॒विष्म॑न्तम् । हि । गच्छ॑थः ॥
Padapatha Devanagari Nonaccented
यत् । नासत्या । भुरण्यथः । यत् । वा । देवा । भिषज्यथः ।
अयम् । वाम् । वत्सः । मतिऽभिः । न । विन्धते । हविष्मन्तम् । हि । गच्छथः ॥
Padapatha Transcription Accented
yát ǀ nāsatyā ǀ bhuraṇyáthaḥ ǀ yát ǀ vā ǀ devā ǀ bhiṣajyáthaḥ ǀ
ayám ǀ vām ǀ vatsáḥ ǀ matí-bhiḥ ǀ ná ǀ vindhate ǀ havíṣmantam ǀ hí ǀ gácchathaḥ ǁ
Padapatha Transcription Nonaccented
yat ǀ nāsatyā ǀ bhuraṇyathaḥ ǀ yat ǀ vā ǀ devā ǀ bhiṣajyathaḥ ǀ
ayam ǀ vām ǀ vatsaḥ ǀ mati-bhiḥ ǀ na ǀ vindhate ǀ haviṣmantam ǀ hi ǀ gacchathaḥ ǁ
08.009.07 (Mandala. Sukta. Rik)
5.8.31.02 (Ashtaka. Adhyaya. Varga. Rik)
08.02.114 (Mandala. Anuvāka. Rik)
Samhita Devanagari Accented
आ नू॒नम॒श्विनो॒र्ऋषिः॒ स्तोमं॑ चिकेत वा॒मया॑ ।
आ सोमं॒ मधु॑मत्तमं घ॒र्मं सिं॑चा॒दथ॑र्वणि ॥
Samhita Devanagari Nonaccented
आ नूनमश्विनोर्ऋषिः स्तोमं चिकेत वामया ।
आ सोमं मधुमत्तमं घर्मं सिंचादथर्वणि ॥
Samhita Transcription Accented
ā́ nūnámaśvínorṛ́ṣiḥ stómam ciketa vāmáyā ǀ
ā́ sómam mádhumattamam gharmám siñcādátharvaṇi ǁ
Samhita Transcription Nonaccented
ā nūnamaśvinorṛṣiḥ stomam ciketa vāmayā ǀ
ā somam madhumattamam gharmam siñcādatharvaṇi ǁ
Padapatha Devanagari Accented
आ । नू॒नम् । अ॒श्विनोः॑ । ऋषिः॑ । स्तोम॑म् । चि॒के॒त॒ । वा॒मया॑ ।
आ । सोम॑म् । मधु॑मत्ऽतमम् । घ॒र्मम् । सि॒ञ्चा॒त् । अथ॑र्वणि ॥
Padapatha Devanagari Nonaccented
आ । नूनम् । अश्विनोः । ऋषिः । स्तोमम् । चिकेत । वामया ।
आ । सोमम् । मधुमत्ऽतमम् । घर्मम् । सिञ्चात् । अथर्वणि ॥
Padapatha Transcription Accented
ā́ ǀ nūnám ǀ aśvínoḥ ǀ ṛ́ṣiḥ ǀ stómam ǀ ciketa ǀ vāmáyā ǀ
ā́ ǀ sómam ǀ mádhumat-tamam ǀ gharmám ǀ siñcāt ǀ átharvaṇi ǁ
Padapatha Transcription Nonaccented
ā ǀ nūnam ǀ aśvinoḥ ǀ ṛṣiḥ ǀ stomam ǀ ciketa ǀ vāmayā ǀ
ā ǀ somam ǀ madhumat-tamam ǀ gharmam ǀ siñcāt ǀ atharvaṇi ǁ
08.009.08 (Mandala. Sukta. Rik)
5.8.31.03 (Ashtaka. Adhyaya. Varga. Rik)
08.02.115 (Mandala. Anuvāka. Rik)
Samhita Devanagari Accented
आ नू॒नं र॒घुव॑र्तनिं॒ रथं॑ तिष्ठाथो अश्विना ।
आ वां॒ स्तोमा॑ इ॒मे मम॒ नभो॒ न चु॑च्यवीरत ॥
Samhita Devanagari Nonaccented
आ नूनं रघुवर्तनिं रथं तिष्ठाथो अश्विना ।
आ वां स्तोमा इमे मम नभो न चुच्यवीरत ॥
Samhita Transcription Accented
ā́ nūnám raghúvartanim rátham tiṣṭhātho aśvinā ǀ
ā́ vām stómā imé máma nábho ná cucyavīrata ǁ
Samhita Transcription Nonaccented
ā nūnam raghuvartanim ratham tiṣṭhātho aśvinā ǀ
ā vām stomā ime mama nabho na cucyavīrata ǁ
Padapatha Devanagari Accented
आ । नू॒नम् । र॒घुऽव॑र्तनिम् । रथ॑म् । ति॒ष्ठा॒थः॒ । अ॒श्वि॒ना॒ ।
आ । वा॒म् । स्तोमाः॑ । इ॒मे । मम॑ । नभः॑ । न । चु॒च्य॒वी॒र॒त॒ ॥
Padapatha Devanagari Nonaccented
आ । नूनम् । रघुऽवर्तनिम् । रथम् । तिष्ठाथः । अश्विना ।
आ । वाम् । स्तोमाः । इमे । मम । नभः । न । चुच्यवीरत ॥
Padapatha Transcription Accented
ā́ ǀ nūnám ǀ raghú-vartanim ǀ rátham ǀ tiṣṭhāthaḥ ǀ aśvinā ǀ
ā́ ǀ vām ǀ stómāḥ ǀ imé ǀ máma ǀ nábhaḥ ǀ ná ǀ cucyavīrata ǁ
Padapatha Transcription Nonaccented
ā ǀ nūnam ǀ raghu-vartanim ǀ ratham ǀ tiṣṭhāthaḥ ǀ aśvinā ǀ
ā ǀ vām ǀ stomāḥ ǀ ime ǀ mama ǀ nabhaḥ ǀ na ǀ cucyavīrata ǁ
08.009.09 (Mandala. Sukta. Rik)
5.8.31.04 (Ashtaka. Adhyaya. Varga. Rik)
08.02.116 (Mandala. Anuvāka. Rik)
Samhita Devanagari Accented
यद॒द्य वां॑ नासत्यो॒क्थैरा॑चुच्युवी॒महि॑ ।
यद्वा॒ वाणी॑भिरश्विने॒वेत्का॒ण्वस्य॑ बोधतं ॥
Samhita Devanagari Nonaccented
यदद्य वां नासत्योक्थैराचुच्युवीमहि ।
यद्वा वाणीभिरश्विनेवेत्काण्वस्य बोधतं ॥
Samhita Transcription Accented
yádadyá vām nāsatyoktháirācucyuvīmáhi ǀ
yádvā vā́ṇībhiraśvinevétkāṇvásya bodhatam ǁ
Samhita Transcription Nonaccented
yadadya vām nāsatyokthairācucyuvīmahi ǀ
yadvā vāṇībhiraśvinevetkāṇvasya bodhatam ǁ
Padapatha Devanagari Accented
यत् । अ॒द्य । वा॒म् । ना॒स॒त्या॒ । उ॒क्थैः । आ॒ऽचु॒च्यु॒वी॒महि॑ ।
यत् । वा॒ । वाणी॑भिः । अ॒श्वि॒ना॒ । ए॒व । इत् । का॒ण्वस्य॑ । बो॒ध॒त॒म् ॥
Padapatha Devanagari Nonaccented
यत् । अद्य । वाम् । नासत्या । उक्थैः । आऽचुच्युवीमहि ।
यत् । वा । वाणीभिः । अश्विना । एव । इत् । काण्वस्य । बोधतम् ॥
Padapatha Transcription Accented
yát ǀ adyá ǀ vām ǀ nāsatyā ǀ uktháiḥ ǀ ā-cucyuvīmáhi ǀ
yát ǀ vā ǀ vā́ṇībhiḥ ǀ aśvinā ǀ evá ǀ ít ǀ kāṇvásya ǀ bodhatam ǁ
Padapatha Transcription Nonaccented
yat ǀ adya ǀ vām ǀ nāsatyā ǀ ukthaiḥ ǀ ā-cucyuvīmahi ǀ
yat ǀ vā ǀ vāṇībhiḥ ǀ aśvinā ǀ eva ǀ it ǀ kāṇvasya ǀ bodhatam ǁ
08.009.10 (Mandala. Sukta. Rik)
5.8.31.05 (Ashtaka. Adhyaya. Varga. Rik)
08.02.117 (Mandala. Anuvāka. Rik)
Samhita Devanagari Accented
यद्वां॑ क॒क्षीवाँ॑ उ॒त यद्व्य॑श्व॒ ऋषि॒र्यद्वां॑ दी॒र्घत॑मा जु॒हाव॑ ।
पृथी॒ यद्वां॑ वै॒न्यः साद॑नेष्वे॒वेदतो॑ अश्विना चेतयेथां ॥
Samhita Devanagari Nonaccented
यद्वां कक्षीवाँ उत यद्व्यश्व ऋषिर्यद्वां दीर्घतमा जुहाव ।
पृथी यद्वां वैन्यः सादनेष्वेवेदतो अश्विना चेतयेथां ॥
Samhita Transcription Accented
yádvām kakṣī́vām̐ utá yádvyáśva ṛ́ṣiryádvām dīrghátamā juhā́va ǀ
pṛ́thī yádvām vainyáḥ sā́daneṣvevédáto aśvinā cetayethām ǁ
Samhita Transcription Nonaccented
yadvām kakṣīvām̐ uta yadvyaśva ṛṣiryadvām dīrghatamā juhāva ǀ
pṛthī yadvām vainyaḥ sādaneṣvevedato aśvinā cetayethām ǁ
Padapatha Devanagari Accented
यत् । वा॒म् । क॒क्षीवा॑न् । उ॒त । यत् । विऽअ॑श्वः । ऋषिः॑ । यत् । वा॒म् । दी॒र्घऽत॑माः । जु॒हाव॑ ।
पृथी॑ । यत् । वा॒म् । वै॒न्यः । सद॑नेषु । ए॒व । इत् । अतः॑ । अ॒श्वि॒ना॒ । चे॒त॒ये॒था॒म् ॥
Padapatha Devanagari Nonaccented
यत् । वाम् । कक्षीवान् । उत । यत् । विऽअश्वः । ऋषिः । यत् । वाम् । दीर्घऽतमाः । जुहाव ।
पृथी । यत् । वाम् । वैन्यः । सदनेषु । एव । इत् । अतः । अश्विना । चेतयेथाम् ॥
Padapatha Transcription Accented
yát ǀ vām ǀ kakṣī́vān ǀ utá ǀ yát ǀ ví-aśvaḥ ǀ ṛ́ṣiḥ ǀ yát ǀ vām ǀ dīrghá-tamāḥ ǀ juhā́va ǀ
pṛ́thī ǀ yát ǀ vām ǀ vainyáḥ ǀ sádaneṣu ǀ evá ǀ ít ǀ átaḥ ǀ aśvinā ǀ cetayethām ǁ
Padapatha Transcription Nonaccented
yat ǀ vām ǀ kakṣīvān ǀ uta ǀ yat ǀ vi-aśvaḥ ǀ ṛṣiḥ ǀ yat ǀ vām ǀ dīrgha-tamāḥ ǀ juhāva ǀ
pṛthī ǀ yat ǀ vām ǀ vainyaḥ ǀ sadaneṣu ǀ eva ǀ it ǀ ataḥ ǀ aśvinā ǀ cetayethām ǁ
08.009.11 (Mandala. Sukta. Rik)
5.8.32.01 (Ashtaka. Adhyaya. Varga. Rik)
08.02.118 (Mandala. Anuvāka. Rik)
Samhita Devanagari Accented
या॒तं छ॑र्दि॒ष्पा उ॒त नः॑ पर॒स्पा भू॒तं ज॑ग॒त्पा उ॒त न॑स्तनू॒पा ।
व॒र्तिस्तो॒काय॒ तन॑याय यातं ॥
Samhita Devanagari Nonaccented
यातं छर्दिष्पा उत नः परस्पा भूतं जगत्पा उत नस्तनूपा ।
वर्तिस्तोकाय तनयाय यातं ॥
Samhita Transcription Accented
yātám chardiṣpā́ utá naḥ paraspā́ bhūtám jagatpā́ utá nastanūpā́ ǀ
vartístokā́ya tánayāya yātam ǁ
Samhita Transcription Nonaccented
yātam chardiṣpā uta naḥ paraspā bhūtam jagatpā uta nastanūpā ǀ
vartistokāya tanayāya yātam ǁ
Padapatha Devanagari Accented
या॒तम् । छ॒र्दिः॒ऽपौ । उ॒त । नः॒ । प॒रः॒ऽपा । भू॒तम् । ज॒ग॒त्ऽपौ । उ॒त । नः॒ । त॒नू॒ऽपा ।
व॒र्तिः । तो॒काय॑ । तन॑याय । या॒त॒म् ॥
Padapatha Devanagari Nonaccented
यातम् । छर्दिःऽपौ । उत । नः । परःऽपा । भूतम् । जगत्ऽपौ । उत । नः । तनूऽपा ।
वर्तिः । तोकाय । तनयाय । यातम् ॥
Padapatha Transcription Accented
yātám ǀ chardiḥ-páu ǀ utá ǀ naḥ ǀ paraḥ-pā́ ǀ bhūtám ǀ jagat-páu ǀ utá ǀ naḥ ǀ tanū-pā́ ǀ
vartíḥ ǀ tokā́ya ǀ tánayāya ǀ yātam ǁ
Padapatha Transcription Nonaccented
yātam ǀ chardiḥ-pau ǀ uta ǀ naḥ ǀ paraḥ-pā ǀ bhūtam ǀ jagat-pau ǀ uta ǀ naḥ ǀ tanū-pā ǀ
vartiḥ ǀ tokāya ǀ tanayāya ǀ yātam ǁ
08.009.12 (Mandala. Sukta. Rik)
5.8.32.02 (Ashtaka. Adhyaya. Varga. Rik)
08.02.119 (Mandala. Anuvāka. Rik)
Samhita Devanagari Accented
यदिंद्रे॑ण स॒रथं॑ या॒थो अ॑श्विना॒ यद्वा॑ वा॒युना॒ भव॑थः॒ समो॑कसा ।
यदा॑दि॒त्येभि॑र्ऋ॒भुभिः॑ स॒जोष॑सा॒ यद्वा॒ विष्णो॑र्वि॒क्रम॑णेषु॒ तिष्ठ॑थः ॥
Samhita Devanagari Nonaccented
यदिंद्रेण सरथं याथो अश्विना यद्वा वायुना भवथः समोकसा ।
यदादित्येभिर्ऋभुभिः सजोषसा यद्वा विष्णोर्विक्रमणेषु तिष्ठथः ॥
Samhita Transcription Accented
yádíndreṇa sarátham yāthó aśvinā yádvā vāyúnā bhávathaḥ sámokasā ǀ
yádādityébhirṛbhúbhiḥ sajóṣasā yádvā víṣṇorvikrámaṇeṣu tíṣṭhathaḥ ǁ
Samhita Transcription Nonaccented
yadindreṇa saratham yātho aśvinā yadvā vāyunā bhavathaḥ samokasā ǀ
yadādityebhirṛbhubhiḥ sajoṣasā yadvā viṣṇorvikramaṇeṣu tiṣṭhathaḥ ǁ
Padapatha Devanagari Accented
यत् । इन्द्रे॑ण । स॒ऽरथ॑म् । या॒थः । अ॒श्वि॒ना॒ । यत् । वा॒ । वा॒युना॑ । भव॑थः । सम्ऽओ॑कसा ।
यत् । आ॒दि॒त्येभिः॑ । ऋ॒भुऽभिः॑ । स॒ऽजोष॑सा । यत् । वा॒ । विष्णोः॑ । वि॒ऽक्रम॑णेषु । तिष्ठ॑थः ॥
Padapatha Devanagari Nonaccented
यत् । इन्द्रेण । सऽरथम् । याथः । अश्विना । यत् । वा । वायुना । भवथः । सम्ऽओकसा ।
यत् । आदित्येभिः । ऋभुऽभिः । सऽजोषसा । यत् । वा । विष्णोः । विऽक्रमणेषु । तिष्ठथः ॥
Padapatha Transcription Accented
yát ǀ índreṇa ǀ sa-rátham ǀ yātháḥ ǀ aśvinā ǀ yát ǀ vā ǀ vāyúnā ǀ bhávathaḥ ǀ sám-okasā ǀ
yát ǀ ādityébhiḥ ǀ ṛbhú-bhiḥ ǀ sa-jóṣasā ǀ yát ǀ vā ǀ víṣṇoḥ ǀ vi-krámaṇeṣu ǀ tíṣṭhathaḥ ǁ
Padapatha Transcription Nonaccented
yat ǀ indreṇa ǀ sa-ratham ǀ yāthaḥ ǀ aśvinā ǀ yat ǀ vā ǀ vāyunā ǀ bhavathaḥ ǀ sam-okasā ǀ
yat ǀ ādityebhiḥ ǀ ṛbhu-bhiḥ ǀ sa-joṣasā ǀ yat ǀ vā ǀ viṣṇoḥ ǀ vi-kramaṇeṣu ǀ tiṣṭhathaḥ ǁ
08.009.13 (Mandala. Sukta. Rik)
5.8.32.03 (Ashtaka. Adhyaya. Varga. Rik)
08.02.120 (Mandala. Anuvāka. Rik)
Samhita Devanagari Accented
यद॒द्याश्विना॑व॒हं हु॒वेय॒ वाज॑सातये ।
यत्पृ॒त्सु तु॒र्वणे॒ सह॒स्तच्छ्रेष्ठ॑म॒श्विनो॒रवः॑ ॥
Samhita Devanagari Nonaccented
यदद्याश्विनावहं हुवेय वाजसातये ।
यत्पृत्सु तुर्वणे सहस्तच्छ्रेष्ठमश्विनोरवः ॥
Samhita Transcription Accented
yádadyā́śvínāvahám huvéya vā́jasātaye ǀ
yátpṛtsú turváṇe sáhastácchréṣṭhamaśvínorávaḥ ǁ
Samhita Transcription Nonaccented
yadadyāśvināvaham huveya vājasātaye ǀ
yatpṛtsu turvaṇe sahastacchreṣṭhamaśvinoravaḥ ǁ
Padapatha Devanagari Accented
यत् । अ॒द्य । अ॒श्विनौ॑ । अ॒हम् । हु॒वेय॑ । वाज॑ऽसातये ।
यत् । पृ॒त्ऽसु । तु॒र्वणे॑ । सहः॑ । तत् । श्रेष्ठ॑म् । अ॒श्विनोः॑ । अवः॑ ॥
Padapatha Devanagari Nonaccented
यत् । अद्य । अश्विनौ । अहम् । हुवेय । वाजऽसातये ।
यत् । पृत्ऽसु । तुर्वणे । सहः । तत् । श्रेष्ठम् । अश्विनोः । अवः ॥
Padapatha Transcription Accented
yát ǀ adyá ǀ aśvínau ǀ ahám ǀ huvéya ǀ vā́ja-sātaye ǀ
yát ǀ pṛt-sú ǀ turváṇe ǀ sáhaḥ ǀ tát ǀ śréṣṭham ǀ aśvínoḥ ǀ ávaḥ ǁ
Padapatha Transcription Nonaccented
yat ǀ adya ǀ aśvinau ǀ aham ǀ huveya ǀ vāja-sātaye ǀ
yat ǀ pṛt-su ǀ turvaṇe ǀ sahaḥ ǀ tat ǀ śreṣṭham ǀ aśvinoḥ ǀ avaḥ ǁ
08.009.14 (Mandala. Sukta. Rik)
5.8.32.04 (Ashtaka. Adhyaya. Varga. Rik)
08.02.121 (Mandala. Anuvāka. Rik)
Samhita Devanagari Accented
आ नू॒नं या॑तमश्विने॒मा ह॒व्यानि॑ वां हि॒ता ।
इ॒मे सोमा॑सो॒ अधि॑ तु॒र्वशे॒ यदा॑वि॒मे कण्वे॑षु वा॒मथ॑ ॥
Samhita Devanagari Nonaccented
आ नूनं यातमश्विनेमा हव्यानि वां हिता ।
इमे सोमासो अधि तुर्वशे यदाविमे कण्वेषु वामथ ॥
Samhita Transcription Accented
ā́ nūnám yātamaśvinemā́ havyā́ni vām hitā́ ǀ
imé sómāso ádhi turváśe yádāvimé káṇveṣu vāmátha ǁ
Samhita Transcription Nonaccented
ā nūnam yātamaśvinemā havyāni vām hitā ǀ
ime somāso adhi turvaśe yadāvime kaṇveṣu vāmatha ǁ
Padapatha Devanagari Accented
आ । नू॒नम् । या॒त॒म् । अ॒श्वि॒ना॒ । इ॒मा । ह॒व्यानि॑ । वा॒म् । हि॒ता ।
इ॒मे । सोमा॑सः । अधि॑ । तु॒र्वशे॑ । यदौ॑ । इ॒मे । कण्वे॑षु । वा॒म् । अथ॑ ॥
Padapatha Devanagari Nonaccented
आ । नूनम् । यातम् । अश्विना । इमा । हव्यानि । वाम् । हिता ।
इमे । सोमासः । अधि । तुर्वशे । यदौ । इमे । कण्वेषु । वाम् । अथ ॥
Padapatha Transcription Accented
ā́ ǀ nūnám ǀ yātam ǀ aśvinā ǀ imā́ ǀ havyā́ni ǀ vām ǀ hitā́ ǀ
imé ǀ sómāsaḥ ǀ ádhi ǀ turváśe ǀ yádau ǀ imé ǀ káṇveṣu ǀ vām ǀ átha ǁ
Padapatha Transcription Nonaccented
ā ǀ nūnam ǀ yātam ǀ aśvinā ǀ imā ǀ havyāni ǀ vām ǀ hitā ǀ
ime ǀ somāsaḥ ǀ adhi ǀ turvaśe ǀ yadau ǀ ime ǀ kaṇveṣu ǀ vām ǀ atha ǁ
08.009.15 (Mandala. Sukta. Rik)
5.8.32.05 (Ashtaka. Adhyaya. Varga. Rik)
08.02.122 (Mandala. Anuvāka. Rik)
Samhita Devanagari Accented
यन्ना॑सत्या परा॒के अ॑र्वा॒के अस्ति॑ भेष॒जं ।
तेन॑ नू॒नं वि॑म॒दाय॑ प्रचेतसा छ॒र्दिर्व॒त्साय॑ यच्छतं ॥
Samhita Devanagari Nonaccented
यन्नासत्या पराके अर्वाके अस्ति भेषजं ।
तेन नूनं विमदाय प्रचेतसा छर्दिर्वत्साय यच्छतं ॥
Samhita Transcription Accented
yánnāsatyā parāké arvāké ásti bheṣajám ǀ
téna nūnám vimadā́ya pracetasā chardírvatsā́ya yacchatam ǁ
Samhita Transcription Nonaccented
yannāsatyā parāke arvāke asti bheṣajam ǀ
tena nūnam vimadāya pracetasā chardirvatsāya yacchatam ǁ
Padapatha Devanagari Accented
यत् । ना॒स॒त्या॒ । प॒रा॒के । अ॒र्वा॒के । अस्ति॑ । भे॒ष॒जम् ।
तेन॑ । नू॒नम् । वि॒ऽम॒दाय॑ । प्र॒ऽचे॒त॒सा॒ । छ॒र्दिः । व॒त्साय॑ । य॒च्छ॒त॒म् ॥
Padapatha Devanagari Nonaccented
यत् । नासत्या । पराके । अर्वाके । अस्ति । भेषजम् ।
तेन । नूनम् । विऽमदाय । प्रऽचेतसा । छर्दिः । वत्साय । यच्छतम् ॥
Padapatha Transcription Accented
yát ǀ nāsatyā ǀ parāké ǀ arvāké ǀ ásti ǀ bheṣajám ǀ
téna ǀ nūnám ǀ vi-madā́ya ǀ pra-cetasā ǀ chardíḥ ǀ vatsā́ya ǀ yacchatam ǁ
Padapatha Transcription Nonaccented
yat ǀ nāsatyā ǀ parāke ǀ arvāke ǀ asti ǀ bheṣajam ǀ
tena ǀ nūnam ǀ vi-madāya ǀ pra-cetasā ǀ chardiḥ ǀ vatsāya ǀ yacchatam ǁ
08.009.16 (Mandala. Sukta. Rik)
5.8.33.01 (Ashtaka. Adhyaya. Varga. Rik)
08.02.123 (Mandala. Anuvāka. Rik)
Samhita Devanagari Accented
अभु॑त्स्यु॒ प्र दे॒व्या सा॒कं वा॒चाहम॒श्विनोः॑ ।
व्या॑वर्दे॒व्या म॒तिं वि रा॒तिं मर्त्ये॑भ्यः ॥
Samhita Devanagari Nonaccented
अभुत्स्यु प्र देव्या साकं वाचाहमश्विनोः ।
व्यावर्देव्या मतिं वि रातिं मर्त्येभ्यः ॥
Samhita Transcription Accented
ábhutsyu prá devyā́ sākám vācā́hámaśvínoḥ ǀ
vyā́vardevyā́ matím ví rātím mártyebhyaḥ ǁ
Samhita Transcription Nonaccented
abhutsyu pra devyā sākam vācāhamaśvinoḥ ǀ
vyāvardevyā matim vi rātim martyebhyaḥ ǁ
Padapatha Devanagari Accented
अभु॑त्सि । ऊं॒ इति॑ । प्र । दे॒व्या । सा॒कम् । वा॒चा । अ॒हम् । अ॒श्विनोः॑ ।
वि । आ॒वः॒ । दे॒वि॒ । आ । म॒तिम् । वि । रा॒तिम् । मर्त्ये॑भ्यः ॥
Padapatha Devanagari Nonaccented
अभुत्सि । ऊं इति । प्र । देव्या । साकम् । वाचा । अहम् । अश्विनोः ।
वि । आवः । देवि । आ । मतिम् । वि । रातिम् । मर्त्येभ्यः ॥
Padapatha Transcription Accented
ábhutsi ǀ ūṃ íti ǀ prá ǀ devyā́ ǀ sākám ǀ vācā́ ǀ ahám ǀ aśvínoḥ ǀ
ví ǀ āvaḥ ǀ devi ǀ ā́ ǀ matím ǀ ví ǀ rātím ǀ mártyebhyaḥ ǁ
Padapatha Transcription Nonaccented
abhutsi ǀ ūṃ iti ǀ pra ǀ devyā ǀ sākam ǀ vācā ǀ aham ǀ aśvinoḥ ǀ
vi ǀ āvaḥ ǀ devi ǀ ā ǀ matim ǀ vi ǀ rātim ǀ martyebhyaḥ ǁ
08.009.17 (Mandala. Sukta. Rik)
5.8.33.02 (Ashtaka. Adhyaya. Varga. Rik)
08.02.124 (Mandala. Anuvāka. Rik)
Samhita Devanagari Accented
प्र बो॑धयोषो अ॒श्विना॒ प्र दे॑वि सूनृते महि ।
प्र य॑ज्ञहोतरानु॒षक्प्र मदा॑य॒ श्रवो॑ बृ॒हत् ॥
Samhita Devanagari Nonaccented
प्र बोधयोषो अश्विना प्र देवि सूनृते महि ।
प्र यज्ञहोतरानुषक्प्र मदाय श्रवो बृहत् ॥
Samhita Transcription Accented
prá bodhayoṣo aśvínā prá devi sūnṛte mahi ǀ
prá yajñahotarānuṣákprá mádāya śrávo bṛhát ǁ
Samhita Transcription Nonaccented
pra bodhayoṣo aśvinā pra devi sūnṛte mahi ǀ
pra yajñahotarānuṣakpra madāya śravo bṛhat ǁ
Padapatha Devanagari Accented
प्र । बो॒ध॒य॒ । उ॒षः॒ । अ॒श्विना॑ । प्र । दे॒वि॒ । सू॒नृ॒ते॒ । म॒हि॒ ।
प्र । य॒ज्ञ॒ऽहो॒तः॒ । आ॒नु॒षक् । प्र । मदा॑य । श्रवः॑ । बृ॒हत् ॥
Padapatha Devanagari Nonaccented
प्र । बोधय । उषः । अश्विना । प्र । देवि । सूनृते । महि ।
प्र । यज्ञऽहोतः । आनुषक् । प्र । मदाय । श्रवः । बृहत् ॥
Padapatha Transcription Accented
prá ǀ bodhaya ǀ uṣaḥ ǀ aśvínā ǀ prá ǀ devi ǀ sūnṛte ǀ mahi ǀ
prá ǀ yajña-hotaḥ ǀ ānuṣák ǀ prá ǀ mádāya ǀ śrávaḥ ǀ bṛhát ǁ
Padapatha Transcription Nonaccented
pra ǀ bodhaya ǀ uṣaḥ ǀ aśvinā ǀ pra ǀ devi ǀ sūnṛte ǀ mahi ǀ
pra ǀ yajña-hotaḥ ǀ ānuṣak ǀ pra ǀ madāya ǀ śravaḥ ǀ bṛhat ǁ
08.009.18 (Mandala. Sukta. Rik)
5.8.33.03 (Ashtaka. Adhyaya. Varga. Rik)
08.02.125 (Mandala. Anuvāka. Rik)
Samhita Devanagari Accented
यदु॑षो॒ यासि॑ भा॒नुना॒ सं सूर्ये॑ण रोचसे ।
आ हा॒यम॒श्विनो॒ रथो॑ व॒र्तिर्या॑ति नृ॒पाय्यं॑ ॥
Samhita Devanagari Nonaccented
यदुषो यासि भानुना सं सूर्येण रोचसे ।
आ हायमश्विनो रथो वर्तिर्याति नृपाय्यं ॥
Samhita Transcription Accented
yáduṣo yā́si bhānúnā sám sū́ryeṇa rocase ǀ
ā́ hāyámaśvíno rátho vartíryāti nṛpā́yyam ǁ
Samhita Transcription Nonaccented
yaduṣo yāsi bhānunā sam sūryeṇa rocase ǀ
ā hāyamaśvino ratho vartiryāti nṛpāyyam ǁ
Padapatha Devanagari Accented
यत् । उ॒षः॒ । यासि॑ । भा॒नुना॑ । सम् । सूर्ये॑ण । रो॒च॒से॒ ।
आ । ह॒ । अ॒यम् । अ॒श्विनोः॑ । रथः॑ । व॒र्तिः । या॒ति॒ । नृ॒ऽपाय्य॑म् ॥
Padapatha Devanagari Nonaccented
यत् । उषः । यासि । भानुना । सम् । सूर्येण । रोचसे ।
आ । ह । अयम् । अश्विनोः । रथः । वर्तिः । याति । नृऽपाय्यम् ॥
Padapatha Transcription Accented
yát ǀ uṣaḥ ǀ yā́si ǀ bhānúnā ǀ sám ǀ sū́ryeṇa ǀ rocase ǀ
ā́ ǀ ha ǀ ayám ǀ aśvínoḥ ǀ ráthaḥ ǀ vartíḥ ǀ yāti ǀ nṛ-pā́yyam ǁ
Padapatha Transcription Nonaccented
yat ǀ uṣaḥ ǀ yāsi ǀ bhānunā ǀ sam ǀ sūryeṇa ǀ rocase ǀ
ā ǀ ha ǀ ayam ǀ aśvinoḥ ǀ rathaḥ ǀ vartiḥ ǀ yāti ǀ nṛ-pāyyam ǁ
08.009.19 (Mandala. Sukta. Rik)
5.8.33.04 (Ashtaka. Adhyaya. Varga. Rik)
08.02.126 (Mandala. Anuvāka. Rik)
Samhita Devanagari Accented
यदापी॑तासो अं॒शवो॒ गावो॒ न दु॒ह्र ऊध॑भिः ।
यद्वा॒ वाणी॒रनू॑षत॒ प्र दे॑व॒यंतो॑ अ॒श्विना॑ ॥
Samhita Devanagari Nonaccented
यदापीतासो अंशवो गावो न दुह्र ऊधभिः ।
यद्वा वाणीरनूषत प्र देवयंतो अश्विना ॥
Samhita Transcription Accented
yádā́pītāso aṃśávo gā́vo ná duhrá ū́dhabhiḥ ǀ
yádvā vā́ṇīránūṣata prá devayánto aśvínā ǁ
Samhita Transcription Nonaccented
yadāpītāso aṃśavo gāvo na duhra ūdhabhiḥ ǀ
yadvā vāṇīranūṣata pra devayanto aśvinā ǁ
Padapatha Devanagari Accented
यत् । आऽपी॑तासः । अं॒शवः॑ । गावः॑ । न । दु॒ह्रे । ऊध॑ऽभिः ।
यत् । वा॒ । वाणीः॑ । अनू॑षत । प्र । दे॒व॒ऽयन्तः॑ । अ॒श्विना॑ ॥
Padapatha Devanagari Nonaccented
यत् । आऽपीतासः । अंशवः । गावः । न । दुह्रे । ऊधऽभिः ।
यत् । वा । वाणीः । अनूषत । प्र । देवऽयन्तः । अश्विना ॥
Padapatha Transcription Accented
yát ǀ ā́-pītāsaḥ ǀ aṃśávaḥ ǀ gā́vaḥ ǀ ná ǀ duhré ǀ ū́dha-bhiḥ ǀ
yát ǀ vā ǀ vā́ṇīḥ ǀ ánūṣata ǀ prá ǀ deva-yántaḥ ǀ aśvínā ǁ
Padapatha Transcription Nonaccented
yat ǀ ā-pītāsaḥ ǀ aṃśavaḥ ǀ gāvaḥ ǀ na ǀ duhre ǀ ūdha-bhiḥ ǀ
yat ǀ vā ǀ vāṇīḥ ǀ anūṣata ǀ pra ǀ deva-yantaḥ ǀ aśvinā ǁ
08.009.20 (Mandala. Sukta. Rik)
5.8.33.05 (Ashtaka. Adhyaya. Varga. Rik)
08.02.127 (Mandala. Anuvāka. Rik)
Samhita Devanagari Accented
प्र द्यु॒म्नाय॒ प्र शव॑से॒ प्र नृ॒षाह्या॑य॒ शर्म॑णे ।
प्र दक्षा॑य प्रचेतसा ॥
Samhita Devanagari Nonaccented
प्र द्युम्नाय प्र शवसे प्र नृषाह्याय शर्मणे ।
प्र दक्षाय प्रचेतसा ॥
Samhita Transcription Accented
prá dyumnā́ya prá śávase prá nṛṣā́hyāya śármaṇe ǀ
prá dákṣāya pracetasā ǁ
Samhita Transcription Nonaccented
pra dyumnāya pra śavase pra nṛṣāhyāya śarmaṇe ǀ
pra dakṣāya pracetasā ǁ
Padapatha Devanagari Accented
प्र । द्यु॒म्नाय॑ । प्र । शव॑से । प्र । नृ॒ऽसह्या॑य । शर्म॑णे ।
प्र । दक्षा॑य । प्र॒ऽचे॒त॒सा॒ ॥
Padapatha Devanagari Nonaccented
प्र । द्युम्नाय । प्र । शवसे । प्र । नृऽसह्याय । शर्मणे ।
प्र । दक्षाय । प्रऽचेतसा ॥
Padapatha Transcription Accented
prá ǀ dyumnā́ya ǀ prá ǀ śávase ǀ prá ǀ nṛ-sáhyāya ǀ śármaṇe ǀ
prá ǀ dákṣāya ǀ pra-cetasā ǁ
Padapatha Transcription Nonaccented
pra ǀ dyumnāya ǀ pra ǀ śavase ǀ pra ǀ nṛ-sahyāya ǀ śarmaṇe ǀ
pra ǀ dakṣāya ǀ pra-cetasā ǁ
08.009.21 (Mandala. Sukta. Rik)
5.8.33.06 (Ashtaka. Adhyaya. Varga. Rik)
08.02.128 (Mandala. Anuvāka. Rik)
Samhita Devanagari Accented
यन्नू॒नं धी॒भिर॑श्विना पि॒तुर्योना॑ नि॒षीद॑थः ।
यद्वा॑ सु॒म्नेभि॑रुक्थ्या ॥
Samhita Devanagari Nonaccented
यन्नूनं धीभिरश्विना पितुर्योना निषीदथः ।
यद्वा सुम्नेभिरुक्थ्या ॥
Samhita Transcription Accented
yánnūnám dhībhíraśvinā pitúryónā niṣī́dathaḥ ǀ
yádvā sumnébhirukthyā ǁ
Samhita Transcription Nonaccented
yannūnam dhībhiraśvinā pituryonā niṣīdathaḥ ǀ
yadvā sumnebhirukthyā ǁ
Padapatha Devanagari Accented
यत् । नू॒नम् । धी॒भिः । अ॒श्वि॒ना॒ । पि॒तुः । योना॑ । नि॒ऽसीद॑थः ।
यत् । वा॒ । सु॒म्नेभिः॑ । उ॒क्थ्या॒ ॥
Padapatha Devanagari Nonaccented
यत् । नूनम् । धीभिः । अश्विना । पितुः । योना । निऽसीदथः ।
यत् । वा । सुम्नेभिः । उक्थ्या ॥
Padapatha Transcription Accented
yát ǀ nūnám ǀ dhībhíḥ ǀ aśvinā ǀ pitúḥ ǀ yónā ǀ ni-sī́dathaḥ ǀ
yát ǀ vā ǀ sumnébhiḥ ǀ ukthyā ǁ
Padapatha Transcription Nonaccented
yat ǀ nūnam ǀ dhībhiḥ ǀ aśvinā ǀ pituḥ ǀ yonā ǀ ni-sīdathaḥ ǀ
yat ǀ vā ǀ sumnebhiḥ ǀ ukthyā ǁ