|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 23
|
1. Info |
| To: | agni | |
| From: | viśvamanas vaiyaśva | |
| Metres: | 1st set of styles: nicṛduṣṇik (1, 3, 10, 14-16, 19-22, 26, 27); virāḍuṣnik (2, 4, 5, 7, 11, 17, 25, 29, 30); uṣṇik (6, 8, 9, 13, 18); pādanicṛduṣṇik (12, 23, 28); ārcīsvarāḍuṣṇik (24) 2nd set of styles: uṣṇih |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.023.01 (Mandala. Sukta. Rik)
6.2.09.01 (Ashtaka. Adhyaya. Varga. Rik)
08.04.037 (Mandala. Anuvāka. Rik)
Samhita Devanagari Accented
ईळि॑ष्वा॒ हि प्र॑ती॒व्यं१॒॑ यज॑स्व जा॒तवे॑दसं ।
च॒रि॒ष्णुधू॑म॒मगृ॑भीतशोचिषं ॥
Samhita Devanagari Nonaccented
ईळिष्वा हि प्रतीव्यं यजस्व जातवेदसं ।
चरिष्णुधूममगृभीतशोचिषं ॥
Samhita Transcription Accented
ī́ḷiṣvā hí pratīvyám yájasva jātávedasam ǀ
cariṣṇúdhūmamágṛbhītaśociṣam ǁ
Samhita Transcription Nonaccented
īḷiṣvā hi pratīvyam yajasva jātavedasam ǀ
cariṣṇudhūmamagṛbhītaśociṣam ǁ
Padapatha Devanagari Accented
ईळि॑ष्व । हि । प्र॒ती॒व्य॑म् । यज॑स्व । जा॒तऽवे॑दसम् ।
च॒रि॒ष्णुऽधू॑मम् । अगृ॑भीतऽशोचिषम् ॥
Padapatha Devanagari Nonaccented
ईळिष्व । हि । प्रतीव्यम् । यजस्व । जातऽवेदसम् ।
चरिष्णुऽधूमम् । अगृभीतऽशोचिषम् ॥
Padapatha Transcription Accented
ī́ḷiṣva ǀ hí ǀ pratīvyám ǀ yájasva ǀ jātá-vedasam ǀ
cariṣṇú-dhūmam ǀ ágṛbhīta-śociṣam ǁ
Padapatha Transcription Nonaccented
īḷiṣva ǀ hi ǀ pratīvyam ǀ yajasva ǀ jāta-vedasam ǀ
cariṣṇu-dhūmam ǀ agṛbhīta-śociṣam ǁ
08.023.02 (Mandala. Sukta. Rik)
6.2.09.02 (Ashtaka. Adhyaya. Varga. Rik)
08.04.038 (Mandala. Anuvāka. Rik)
Samhita Devanagari Accented
दा॒मानं॑ विश्वचर्षणे॒ऽग्निं वि॑श्वमनो गि॒रा ।
उ॒त स्तु॑षे॒ विष्प॑र्धसो॒ रथा॑नां ॥
Samhita Devanagari Nonaccented
दामानं विश्वचर्षणेऽग्निं विश्वमनो गिरा ।
उत स्तुषे विष्पर्धसो रथानां ॥
Samhita Transcription Accented
dāmā́nam viśvacarṣaṇe’gním viśvamano girā́ ǀ
utá stuṣe víṣpardhaso ráthānām ǁ
Samhita Transcription Nonaccented
dāmānam viśvacarṣaṇe’gnim viśvamano girā ǀ
uta stuṣe viṣpardhaso rathānām ǁ
Padapatha Devanagari Accented
दा॒मान॑म् । वि॒श्व॒ऽच॒र्ष॒णे॒ । अ॒ग्निम् । वि॒श्व॒ऽम॒नः॒ । गि॒रा ।
उ॒त । स्तु॒षे॒ । विऽस्प॑र्धसः । रथा॑नाम् ॥
Padapatha Devanagari Nonaccented
दामानम् । विश्वऽचर्षणे । अग्निम् । विश्वऽमनः । गिरा ।
उत । स्तुषे । विऽस्पर्धसः । रथानाम् ॥
Padapatha Transcription Accented
dāmā́nam ǀ viśva-carṣaṇe ǀ agním ǀ viśva-manaḥ ǀ girā́ ǀ
utá ǀ stuṣe ǀ ví-spardhasaḥ ǀ ráthānām ǁ
Padapatha Transcription Nonaccented
dāmānam ǀ viśva-carṣaṇe ǀ agnim ǀ viśva-manaḥ ǀ girā ǀ
uta ǀ stuṣe ǀ vi-spardhasaḥ ǀ rathānām ǁ
08.023.03 (Mandala. Sukta. Rik)
6.2.09.03 (Ashtaka. Adhyaya. Varga. Rik)
08.04.039 (Mandala. Anuvāka. Rik)
Samhita Devanagari Accented
येषा॑माबा॒ध ऋ॒ग्मिय॑ इ॒षः पृ॒क्षश्च॑ नि॒ग्रभे॑ ।
उ॒प॒विदा॒ वह्नि॑र्विंदते॒ वसु॑ ॥
Samhita Devanagari Nonaccented
येषामाबाध ऋग्मिय इषः पृक्षश्च निग्रभे ।
उपविदा वह्निर्विंदते वसु ॥
Samhita Transcription Accented
yéṣāmābādhá ṛgmíya iṣáḥ pṛkṣáśca nigrábhe ǀ
upavídā váhnirvindate vásu ǁ
Samhita Transcription Nonaccented
yeṣāmābādha ṛgmiya iṣaḥ pṛkṣaśca nigrabhe ǀ
upavidā vahnirvindate vasu ǁ
Padapatha Devanagari Accented
येषा॑म् । आ॒ऽबा॒धः । ऋ॒ग्मियः॑ । इ॒षः । पृ॒क्षः । च॒ । नि॒ऽग्रभे॑ ।
उ॒प॒ऽविदा॑ । वह्निः॑ । वि॒न्द॒ते॒ । वसु॑ ॥
Padapatha Devanagari Nonaccented
येषाम् । आऽबाधः । ऋग्मियः । इषः । पृक्षः । च । निऽग्रभे ।
उपऽविदा । वह्निः । विन्दते । वसु ॥
Padapatha Transcription Accented
yéṣām ǀ ā-bādháḥ ǀ ṛgmíyaḥ ǀ iṣáḥ ǀ pṛkṣáḥ ǀ ca ǀ ni-grábhe ǀ
upa-vídā ǀ váhniḥ ǀ vindate ǀ vásu ǁ
Padapatha Transcription Nonaccented
yeṣām ǀ ā-bādhaḥ ǀ ṛgmiyaḥ ǀ iṣaḥ ǀ pṛkṣaḥ ǀ ca ǀ ni-grabhe ǀ
upa-vidā ǀ vahniḥ ǀ vindate ǀ vasu ǁ
08.023.04 (Mandala. Sukta. Rik)
6.2.09.04 (Ashtaka. Adhyaya. Varga. Rik)
08.04.040 (Mandala. Anuvāka. Rik)
Samhita Devanagari Accented
उद॑स्य शो॒चिर॑स्थाद्दीदि॒युषो॒ व्य१॒॑जरं॑ ।
तपु॑र्जंभस्य सु॒द्युतो॑ गण॒श्रियः॑ ॥
Samhita Devanagari Nonaccented
उदस्य शोचिरस्थाद्दीदियुषो व्यजरं ।
तपुर्जंभस्य सुद्युतो गणश्रियः ॥
Samhita Transcription Accented
údasya śocírasthāddīdiyúṣo vyájáram ǀ
tápurjambhasya sudyúto gaṇaśríyaḥ ǁ
Samhita Transcription Nonaccented
udasya śocirasthāddīdiyuṣo vyajaram ǀ
tapurjambhasya sudyuto gaṇaśriyaḥ ǁ
Padapatha Devanagari Accented
उत् । अ॒स्य॒ । शो॒चिः । अ॒स्था॒त् । दी॒दि॒युषः॑ । वि । अ॒जर॑म् ।
तपुः॑ऽजम्भस्य । सु॒ऽद्युतः॑ । ग॒ण॒ऽश्रियः॑ ॥
Padapatha Devanagari Nonaccented
उत् । अस्य । शोचिः । अस्थात् । दीदियुषः । वि । अजरम् ।
तपुःऽजम्भस्य । सुऽद्युतः । गणऽश्रियः ॥
Padapatha Transcription Accented
út ǀ asya ǀ śocíḥ ǀ asthāt ǀ dīdiyúṣaḥ ǀ ví ǀ ajáram ǀ
tápuḥ-jambhasya ǀ su-dyútaḥ ǀ gaṇa-śríyaḥ ǁ
Padapatha Transcription Nonaccented
ut ǀ asya ǀ śociḥ ǀ asthāt ǀ dīdiyuṣaḥ ǀ vi ǀ ajaram ǀ
tapuḥ-jambhasya ǀ su-dyutaḥ ǀ gaṇa-śriyaḥ ǁ
08.023.05 (Mandala. Sukta. Rik)
6.2.09.05 (Ashtaka. Adhyaya. Varga. Rik)
08.04.041 (Mandala. Anuvāka. Rik)
Samhita Devanagari Accented
उदु॑ तिष्ठ स्वध्वर॒ स्तवा॑नो दे॒व्या कृ॒पा ।
अ॒भि॒ख्या भा॒सा बृ॑ह॒ता शु॑शु॒क्वनिः॑ ॥
Samhita Devanagari Nonaccented
उदु तिष्ठ स्वध्वर स्तवानो देव्या कृपा ।
अभिख्या भासा बृहता शुशुक्वनिः ॥
Samhita Transcription Accented
údu tiṣṭha svadhvara stávāno devyā́ kṛpā́ ǀ
abhikhyā́ bhāsā́ bṛhatā́ śuśukvániḥ ǁ
Samhita Transcription Nonaccented
udu tiṣṭha svadhvara stavāno devyā kṛpā ǀ
abhikhyā bhāsā bṛhatā śuśukvaniḥ ǁ
Padapatha Devanagari Accented
उत् । ऊं॒ इति॑ । ति॒ष्ठ॒ । सु॒ऽअ॒ध्व॒र॒ । स्तवा॑नः । दे॒व्या । कृ॒पा ।
अ॒भि॒ऽख्या । भा॒सा । बृ॒ह॒ता । शु॒शु॒क्वनिः॑ ॥
Padapatha Devanagari Nonaccented
उत् । ऊं इति । तिष्ठ । सुऽअध्वर । स्तवानः । देव्या । कृपा ।
अभिऽख्या । भासा । बृहता । शुशुक्वनिः ॥
Padapatha Transcription Accented
út ǀ ūṃ íti ǀ tiṣṭha ǀ su-adhvara ǀ stávānaḥ ǀ devyā́ ǀ kṛpā́ ǀ
abhi-khyā́ ǀ bhāsā́ ǀ bṛhatā́ ǀ śuśukvániḥ ǁ
Padapatha Transcription Nonaccented
ut ǀ ūṃ iti ǀ tiṣṭha ǀ su-adhvara ǀ stavānaḥ ǀ devyā ǀ kṛpā ǀ
abhi-khyā ǀ bhāsā ǀ bṛhatā ǀ śuśukvaniḥ ǁ
08.023.06 (Mandala. Sukta. Rik)
6.2.10.01 (Ashtaka. Adhyaya. Varga. Rik)
08.04.042 (Mandala. Anuvāka. Rik)
Samhita Devanagari Accented
अग्ने॑ या॒हि सु॑श॒स्तिभि॑र्ह॒व्या जुह्वा॑न आनु॒षक् ।
यथा॑ दू॒तो ब॒भूथ॑ हव्य॒वाह॑नः ॥
Samhita Devanagari Nonaccented
अग्ने याहि सुशस्तिभिर्हव्या जुह्वान आनुषक् ।
यथा दूतो बभूथ हव्यवाहनः ॥
Samhita Transcription Accented
ágne yāhí suśastíbhirhavyā́ júhvāna ānuṣák ǀ
yáthā dūtó babhū́tha havyavā́hanaḥ ǁ
Samhita Transcription Nonaccented
agne yāhi suśastibhirhavyā juhvāna ānuṣak ǀ
yathā dūto babhūtha havyavāhanaḥ ǁ
Padapatha Devanagari Accented
अग्ने॑ । या॒हि । सु॒श॒स्तिऽभिः॑ । ह॒व्या । जुह्वा॑नः । आ॒नु॒षक् ।
यथा॑ । दू॒तः । ब॒भूथ॑ । ह॒व्य॒ऽवाह॑नः ॥
Padapatha Devanagari Nonaccented
अग्ने । याहि । सुशस्तिऽभिः । हव्या । जुह्वानः । आनुषक् ।
यथा । दूतः । बभूथ । हव्यऽवाहनः ॥
Padapatha Transcription Accented
ágne ǀ yāhí ǀ suśastí-bhiḥ ǀ havyā́ ǀ júhvānaḥ ǀ ānuṣák ǀ
yáthā ǀ dūtáḥ ǀ babhū́tha ǀ havya-vā́hanaḥ ǁ
Padapatha Transcription Nonaccented
agne ǀ yāhi ǀ suśasti-bhiḥ ǀ havyā ǀ juhvānaḥ ǀ ānuṣak ǀ
yathā ǀ dūtaḥ ǀ babhūtha ǀ havya-vāhanaḥ ǁ
08.023.07 (Mandala. Sukta. Rik)
6.2.10.02 (Ashtaka. Adhyaya. Varga. Rik)
08.04.043 (Mandala. Anuvāka. Rik)
Samhita Devanagari Accented
अ॒ग्निं वः॑ पू॒र्व्यं हु॑वे॒ होता॑रं चर्षणी॒नां ।
तम॒या वा॒चा गृ॑णे॒ तमु॑ वः स्तुषे ॥
Samhita Devanagari Nonaccented
अग्निं वः पूर्व्यं हुवे होतारं चर्षणीनां ।
तमया वाचा गृणे तमु वः स्तुषे ॥
Samhita Transcription Accented
agním vaḥ pūrvyám huve hótāram carṣaṇīnā́m ǀ
támayā́ vācā́ gṛṇe támu vaḥ stuṣe ǁ
Samhita Transcription Nonaccented
agnim vaḥ pūrvyam huve hotāram carṣaṇīnām ǀ
tamayā vācā gṛṇe tamu vaḥ stuṣe ǁ
Padapatha Devanagari Accented
अ॒ग्निम् । वः॒ । पू॒र्व्यम् । हु॒वे॒ । होता॑रम् । च॒र्ष॒णी॒नाम् ।
तम् । अ॒या । वा॒चा । गृ॒णे॒ । तम् । ऊं॒ इति॑ । वः॒ । स्तु॒षे॒ ॥
Padapatha Devanagari Nonaccented
अग्निम् । वः । पूर्व्यम् । हुवे । होतारम् । चर्षणीनाम् ।
तम् । अया । वाचा । गृणे । तम् । ऊं इति । वः । स्तुषे ॥
Padapatha Transcription Accented
agním ǀ vaḥ ǀ pūrvyám ǀ huve ǀ hótāram ǀ carṣaṇīnā́m ǀ
tám ǀ ayā́ ǀ vācā́ ǀ gṛṇe ǀ tám ǀ ūṃ íti ǀ vaḥ ǀ stuṣe ǁ
Padapatha Transcription Nonaccented
agnim ǀ vaḥ ǀ pūrvyam ǀ huve ǀ hotāram ǀ carṣaṇīnām ǀ
tam ǀ ayā ǀ vācā ǀ gṛṇe ǀ tam ǀ ūṃ iti ǀ vaḥ ǀ stuṣe ǁ
08.023.08 (Mandala. Sukta. Rik)
6.2.10.03 (Ashtaka. Adhyaya. Varga. Rik)
08.04.044 (Mandala. Anuvāka. Rik)
Samhita Devanagari Accented
य॒ज्ञेभि॒रद्भु॑तक्रतुं॒ यं कृ॒पा सू॒दयं॑त॒ इत् ।
मि॒त्रं न जने॒ सुधि॑तमृ॒ताव॑नि ॥
Samhita Devanagari Nonaccented
यज्ञेभिरद्भुतक्रतुं यं कृपा सूदयंत इत् ।
मित्रं न जने सुधितमृतावनि ॥
Samhita Transcription Accented
yajñébhirádbhutakratum yám kṛpā́ sūdáyanta ít ǀ
mitrám ná jáne súdhitamṛtā́vani ǁ
Samhita Transcription Nonaccented
yajñebhiradbhutakratum yam kṛpā sūdayanta it ǀ
mitram na jane sudhitamṛtāvani ǁ
Padapatha Devanagari Accented
य॒ज्ञेभिः॑ । अद्भु॑तऽक्रतुम् । यम् । कृ॒पा । सू॒दय॑न्ते । इत् ।
मि॒त्रम् । न । जने॑ । सुऽधि॑तम् । ऋ॒तऽव॑नि ॥
Padapatha Devanagari Nonaccented
यज्ञेभिः । अद्भुतऽक्रतुम् । यम् । कृपा । सूदयन्ते । इत् ।
मित्रम् । न । जने । सुऽधितम् । ऋतऽवनि ॥
Padapatha Transcription Accented
yajñébhiḥ ǀ ádbhuta-kratum ǀ yám ǀ kṛpā́ ǀ sūdáyante ǀ ít ǀ
mitrám ǀ ná ǀ jáne ǀ sú-dhitam ǀ ṛtá-vani ǁ
Padapatha Transcription Nonaccented
yajñebhiḥ ǀ adbhuta-kratum ǀ yam ǀ kṛpā ǀ sūdayante ǀ it ǀ
mitram ǀ na ǀ jane ǀ su-dhitam ǀ ṛta-vani ǁ
08.023.09 (Mandala. Sukta. Rik)
6.2.10.04 (Ashtaka. Adhyaya. Varga. Rik)
08.04.045 (Mandala. Anuvāka. Rik)
Samhita Devanagari Accented
ऋ॒तावा॑नमृतायवो य॒ज्ञस्य॒ साध॑नं गि॒रा ।
उपो॑ एनं जुजुषु॒र्नम॑सस्प॒दे ॥
Samhita Devanagari Nonaccented
ऋतावानमृतायवो यज्ञस्य साधनं गिरा ।
उपो एनं जुजुषुर्नमसस्पदे ॥
Samhita Transcription Accented
ṛtā́vānamṛtāyavo yajñásya sā́dhanam girā́ ǀ
úpo enam jujuṣurnámasaspadé ǁ
Samhita Transcription Nonaccented
ṛtāvānamṛtāyavo yajñasya sādhanam girā ǀ
upo enam jujuṣurnamasaspade ǁ
Padapatha Devanagari Accented
ऋ॒तऽवा॑नम् । ऋ॒त॒ऽय॒वः॒ । य॒ज्ञस्य॑ । साध॑नम् । गि॒रा ।
उषः॑ । ए॒न॒म् । जु॒जु॒षुः॒ । नम॑सः । प॒दे ॥
Padapatha Devanagari Nonaccented
ऋतऽवानम् । ऋतऽयवः । यज्ञस्य । साधनम् । गिरा ।
उषः । एनम् । जुजुषुः । नमसः । पदे ॥
Padapatha Transcription Accented
ṛtá-vānam ǀ ṛta-yavaḥ ǀ yajñásya ǀ sā́dhanam ǀ girā́ ǀ
úṣaḥ ǀ enam ǀ jujuṣuḥ ǀ námasaḥ ǀ padé ǁ
Padapatha Transcription Nonaccented
ṛta-vānam ǀ ṛta-yavaḥ ǀ yajñasya ǀ sādhanam ǀ girā ǀ
uṣaḥ ǀ enam ǀ jujuṣuḥ ǀ namasaḥ ǀ pade ǁ
08.023.10 (Mandala. Sukta. Rik)
6.2.10.05 (Ashtaka. Adhyaya. Varga. Rik)
08.04.046 (Mandala. Anuvāka. Rik)
Samhita Devanagari Accented
अच्छा॑ नो॒ अंगि॑रस्तमं य॒ज्ञासो॑ यंतु सं॒यतः॑ ।
होता॒ यो अस्ति॑ वि॒क्ष्वा य॒शस्त॑मः ॥
Samhita Devanagari Nonaccented
अच्छा नो अंगिरस्तमं यज्ञासो यंतु संयतः ।
होता यो अस्ति विक्ष्वा यशस्तमः ॥
Samhita Transcription Accented
ácchā no áṅgirastamam yajñā́so yantu saṃyátaḥ ǀ
hótā yó ásti vikṣvā́ yaśástamaḥ ǁ
Samhita Transcription Nonaccented
acchā no aṅgirastamam yajñāso yantu saṃyataḥ ǀ
hotā yo asti vikṣvā yaśastamaḥ ǁ
Padapatha Devanagari Accented
अच्छ॑ । नः॒ । अङ्गि॑रःऽतमम् । य॒ज्ञासः॑ । य॒न्तु॒ । स॒म्ऽयतः॑ ।
होता॑ । यः । अस्ति॑ । वि॒क्षु । आ । य॒शःऽत॑मः ॥
Padapatha Devanagari Nonaccented
अच्छ । नः । अङ्गिरःऽतमम् । यज्ञासः । यन्तु । सम्ऽयतः ।
होता । यः । अस्ति । विक्षु । आ । यशःऽतमः ॥
Padapatha Transcription Accented
áccha ǀ naḥ ǀ áṅgiraḥ-tamam ǀ yajñā́saḥ ǀ yantu ǀ sam-yátaḥ ǀ
hótā ǀ yáḥ ǀ ásti ǀ vikṣú ǀ ā́ ǀ yaśáḥ-tamaḥ ǁ
Padapatha Transcription Nonaccented
accha ǀ naḥ ǀ aṅgiraḥ-tamam ǀ yajñāsaḥ ǀ yantu ǀ sam-yataḥ ǀ
hotā ǀ yaḥ ǀ asti ǀ vikṣu ǀ ā ǀ yaśaḥ-tamaḥ ǁ
08.023.11 (Mandala. Sukta. Rik)
6.2.11.01 (Ashtaka. Adhyaya. Varga. Rik)
08.04.047 (Mandala. Anuvāka. Rik)
Samhita Devanagari Accented
अग्ने॒ तव॒ त्ये अ॑ज॒रेंधा॑नासो बृ॒हद्भाः ।
अश्वा॑ इव॒ वृष॑णस्तविषी॒यवः॑ ॥
Samhita Devanagari Nonaccented
अग्ने तव त्ये अजरेंधानासो बृहद्भाः ।
अश्वा इव वृषणस्तविषीयवः ॥
Samhita Transcription Accented
ágne táva tyé ajaréndhānāso bṛhádbhā́ḥ ǀ
áśvā iva vṛ́ṣaṇastaviṣīyávaḥ ǁ
Samhita Transcription Nonaccented
agne tava tye ajarendhānāso bṛhadbhāḥ ǀ
aśvā iva vṛṣaṇastaviṣīyavaḥ ǁ
Padapatha Devanagari Accented
अग्ने॑ । तव॑ । त्ये । अ॒ज॒र॒ । इन्धा॑नासः । बृ॒हत् । भाः ।
अश्वाः॑ऽइव । वृष॑णः । त॒वि॒षी॒ऽयवः॑ ॥
Padapatha Devanagari Nonaccented
अग्ने । तव । त्ये । अजर । इन्धानासः । बृहत् । भाः ।
अश्वाःऽइव । वृषणः । तविषीऽयवः ॥
Padapatha Transcription Accented
ágne ǀ táva ǀ tyé ǀ ajara ǀ índhānāsaḥ ǀ bṛhát ǀ bhā́ḥ ǀ
áśvāḥ-iva ǀ vṛ́ṣaṇaḥ ǀ taviṣī-yávaḥ ǁ
Padapatha Transcription Nonaccented
agne ǀ tava ǀ tye ǀ ajara ǀ indhānāsaḥ ǀ bṛhat ǀ bhāḥ ǀ
aśvāḥ-iva ǀ vṛṣaṇaḥ ǀ taviṣī-yavaḥ ǁ
08.023.12 (Mandala. Sukta. Rik)
6.2.11.02 (Ashtaka. Adhyaya. Varga. Rik)
08.04.048 (Mandala. Anuvāka. Rik)
Samhita Devanagari Accented
स त्वं न॑ ऊर्जां पते र॒यिं रा॑स्व सु॒वीर्यं॑ ।
प्राव॑ नस्तो॒के तन॑ये स॒मत्स्वा ॥
Samhita Devanagari Nonaccented
स त्वं न ऊर्जां पते रयिं रास्व सुवीर्यं ।
प्राव नस्तोके तनये समत्स्वा ॥
Samhita Transcription Accented
sá tvám na ūrjām pate rayím rāsva suvī́ryam ǀ
prā́va nastoké tánaye samátsvā́ ǁ
Samhita Transcription Nonaccented
sa tvam na ūrjām pate rayim rāsva suvīryam ǀ
prāva nastoke tanaye samatsvā ǁ
Padapatha Devanagari Accented
सः । त्वम् । नः॒ । ऊ॒र्जा॒म् । प॒ते॒ । र॒यिम् । रा॒स्व॒ । सु॒ऽवीर्य॑म् ।
प्र । अ॒व॒ । नः॒ । तो॒के । तन॑ये । स॒मत्ऽसु॑ । आ ॥
Padapatha Devanagari Nonaccented
सः । त्वम् । नः । ऊर्जाम् । पते । रयिम् । रास्व । सुऽवीर्यम् ।
प्र । अव । नः । तोके । तनये । समत्ऽसु । आ ॥
Padapatha Transcription Accented
sáḥ ǀ tvám ǀ naḥ ǀ ūrjām ǀ pate ǀ rayím ǀ rāsva ǀ su-vī́ryam ǀ
prá ǀ ava ǀ naḥ ǀ toké ǀ tánaye ǀ samát-su ǀ ā́ ǁ
Padapatha Transcription Nonaccented
saḥ ǀ tvam ǀ naḥ ǀ ūrjām ǀ pate ǀ rayim ǀ rāsva ǀ su-vīryam ǀ
pra ǀ ava ǀ naḥ ǀ toke ǀ tanaye ǀ samat-su ǀ ā ǁ
08.023.13 (Mandala. Sukta. Rik)
6.2.11.03 (Ashtaka. Adhyaya. Varga. Rik)
08.04.049 (Mandala. Anuvāka. Rik)
Samhita Devanagari Accented
यद्वा उ॑ वि॒श्पतिः॑ शि॒तः सुप्री॑तो॒ मनु॑षो वि॒शि ।
विश्वेद॒ग्निः प्रति॒ रक्षां॑सि सेधति ॥
Samhita Devanagari Nonaccented
यद्वा उ विश्पतिः शितः सुप्रीतो मनुषो विशि ।
विश्वेदग्निः प्रति रक्षांसि सेधति ॥
Samhita Transcription Accented
yádvā́ u viśpátiḥ śitáḥ súprīto mánuṣo viśí ǀ
víśvédagníḥ práti rákṣāṃsi sedhati ǁ
Samhita Transcription Nonaccented
yadvā u viśpatiḥ śitaḥ suprīto manuṣo viśi ǀ
viśvedagniḥ prati rakṣāṃsi sedhati ǁ
Padapatha Devanagari Accented
यत् । वै । ऊं॒ इति॑ । वि॒श्पतिः॑ । शि॒तः । सुऽप्री॑तः । मनु॑षः । वि॒शि ।
विश्वा॑ । इत् । अ॒ग्निः । प्रति॑ । रक्षां॑सि । से॒ध॒ति॒ ॥
Padapatha Devanagari Nonaccented
यत् । वै । ऊं इति । विश्पतिः । शितः । सुऽप्रीतः । मनुषः । विशि ।
विश्वा । इत् । अग्निः । प्रति । रक्षांसि । सेधति ॥
Padapatha Transcription Accented
yát ǀ vái ǀ ūṃ íti ǀ viśpátiḥ ǀ śitáḥ ǀ sú-prītaḥ ǀ mánuṣaḥ ǀ viśí ǀ
víśvā ǀ ít ǀ agníḥ ǀ práti ǀ rákṣāṃsi ǀ sedhati ǁ
Padapatha Transcription Nonaccented
yat ǀ vai ǀ ūṃ iti ǀ viśpatiḥ ǀ śitaḥ ǀ su-prītaḥ ǀ manuṣaḥ ǀ viśi ǀ
viśvā ǀ it ǀ agniḥ ǀ prati ǀ rakṣāṃsi ǀ sedhati ǁ
08.023.14 (Mandala. Sukta. Rik)
6.2.11.04 (Ashtaka. Adhyaya. Varga. Rik)
08.04.050 (Mandala. Anuvāka. Rik)
Samhita Devanagari Accented
श्रु॒ष्ट्य॑ग्ने॒ नव॑स्य मे॒ स्तोम॑स्य वीर विश्पते ।
नि मा॒यिन॒स्तपु॑षा र॒क्षसो॑ दह ॥
Samhita Devanagari Nonaccented
श्रुष्ट्यग्ने नवस्य मे स्तोमस्य वीर विश्पते ।
नि मायिनस्तपुषा रक्षसो दह ॥
Samhita Transcription Accented
śruṣṭyágne návasya me stómasya vīra viśpate ǀ
ní māyínastápuṣā rakṣáso daha ǁ
Samhita Transcription Nonaccented
śruṣṭyagne navasya me stomasya vīra viśpate ǀ
ni māyinastapuṣā rakṣaso daha ǁ
Padapatha Devanagari Accented
श्रु॒ष्टी । अ॒ग्ने॒ । नव॑स्य । मे॒ । स्तोम॑स्य । वी॒र॒ । वि॒श्प॒ते॒ ।
नि । मा॒यिनः॑ । तपु॑षा । र॒क्षसः॑ । द॒ह॒ ॥
Padapatha Devanagari Nonaccented
श्रुष्टी । अग्ने । नवस्य । मे । स्तोमस्य । वीर । विश्पते ।
नि । मायिनः । तपुषा । रक्षसः । दह ॥
Padapatha Transcription Accented
śruṣṭī́ ǀ agne ǀ návasya ǀ me ǀ stómasya ǀ vīra ǀ viśpate ǀ
ní ǀ māyínaḥ ǀ tápuṣā ǀ rakṣásaḥ ǀ daha ǁ
Padapatha Transcription Nonaccented
śruṣṭī ǀ agne ǀ navasya ǀ me ǀ stomasya ǀ vīra ǀ viśpate ǀ
ni ǀ māyinaḥ ǀ tapuṣā ǀ rakṣasaḥ ǀ daha ǁ
08.023.15 (Mandala. Sukta. Rik)
6.2.11.05 (Ashtaka. Adhyaya. Varga. Rik)
08.04.051 (Mandala. Anuvāka. Rik)
Samhita Devanagari Accented
न तस्य॑ मा॒यया॑ च॒न रि॒पुरी॑शीत॒ मर्त्यः॑ ।
यो अ॒ग्नये॑ द॒दाश॑ ह॒व्यदा॑तिभिः ॥
Samhita Devanagari Nonaccented
न तस्य मायया चन रिपुरीशीत मर्त्यः ।
यो अग्नये ददाश हव्यदातिभिः ॥
Samhita Transcription Accented
ná tásya māyáyā caná ripúrīśīta mártyaḥ ǀ
yó agnáye dadā́śa havyádātibhiḥ ǁ
Samhita Transcription Nonaccented
na tasya māyayā cana ripurīśīta martyaḥ ǀ
yo agnaye dadāśa havyadātibhiḥ ǁ
Padapatha Devanagari Accented
न । तस्य॑ । मा॒यया॑ । च॒न । रि॒पुः । ई॒शी॒त॒ । मर्त्यः॑ ।
यः । अ॒ग्नये॑ । द॒दाश॑ । ह॒व्यदा॑तिऽभिः ॥
Padapatha Devanagari Nonaccented
न । तस्य । मायया । चन । रिपुः । ईशीत । मर्त्यः ।
यः । अग्नये । ददाश । हव्यदातिऽभिः ॥
Padapatha Transcription Accented
ná ǀ tásya ǀ māyáyā ǀ caná ǀ ripúḥ ǀ īśīta ǀ mártyaḥ ǀ
yáḥ ǀ agnáye ǀ dadā́śa ǀ havyádāti-bhiḥ ǁ
Padapatha Transcription Nonaccented
na ǀ tasya ǀ māyayā ǀ cana ǀ ripuḥ ǀ īśīta ǀ martyaḥ ǀ
yaḥ ǀ agnaye ǀ dadāśa ǀ havyadāti-bhiḥ ǁ
08.023.16 (Mandala. Sukta. Rik)
6.2.12.01 (Ashtaka. Adhyaya. Varga. Rik)
08.04.052 (Mandala. Anuvāka. Rik)
Samhita Devanagari Accented
व्य॑श्वस्त्वा वसु॒विद॑मुक्ष॒ण्युर॑प्रीणा॒दृषिः॑ ।
म॒हो रा॒ये तमु॑ त्वा॒ समि॑धीमहि ॥
Samhita Devanagari Nonaccented
व्यश्वस्त्वा वसुविदमुक्षण्युरप्रीणादृषिः ।
महो राये तमु त्वा समिधीमहि ॥
Samhita Transcription Accented
vyáśvastvā vasuvídamukṣaṇyúraprīṇādṛ́ṣiḥ ǀ
mahó rāyé támu tvā sámidhīmahi ǁ
Samhita Transcription Nonaccented
vyaśvastvā vasuvidamukṣaṇyuraprīṇādṛṣiḥ ǀ
maho rāye tamu tvā samidhīmahi ǁ
Padapatha Devanagari Accented
विऽअ॑श्वः । त्वा॒ । व॒सु॒ऽविद॑म् । उ॒क्ष॒ण्युः । अ॒प्री॒णा॒त् । ऋषिः॑ ।
म॒हः । रा॒ये । तम् । ऊं॒ इति॑ । त्वा॒ । सम् । इ॒धी॒म॒हि॒ ॥
Padapatha Devanagari Nonaccented
विऽअश्वः । त्वा । वसुऽविदम् । उक्षण्युः । अप्रीणात् । ऋषिः ।
महः । राये । तम् । ऊं इति । त्वा । सम् । इधीमहि ॥
Padapatha Transcription Accented
ví-aśvaḥ ǀ tvā ǀ vasu-vídam ǀ ukṣaṇyúḥ ǀ aprīṇāt ǀ ṛ́ṣiḥ ǀ
maháḥ ǀ rāyé ǀ tám ǀ ūṃ íti ǀ tvā ǀ sám ǀ idhīmahi ǁ
Padapatha Transcription Nonaccented
vi-aśvaḥ ǀ tvā ǀ vasu-vidam ǀ ukṣaṇyuḥ ǀ aprīṇāt ǀ ṛṣiḥ ǀ
mahaḥ ǀ rāye ǀ tam ǀ ūṃ iti ǀ tvā ǀ sam ǀ idhīmahi ǁ
08.023.17 (Mandala. Sukta. Rik)
6.2.12.02 (Ashtaka. Adhyaya. Varga. Rik)
08.04.053 (Mandala. Anuvāka. Rik)
Samhita Devanagari Accented
उ॒शना॑ का॒व्यस्त्वा॒ नि होता॑रमसादयत् ।
आ॒य॒जिं त्वा॒ मन॑वे जा॒तवे॑दसं ॥
Samhita Devanagari Nonaccented
उशना काव्यस्त्वा नि होतारमसादयत् ।
आयजिं त्वा मनवे जातवेदसं ॥
Samhita Transcription Accented
uśánā kāvyástvā ní hótāramasādayat ǀ
āyajím tvā mánave jātávedasam ǁ
Samhita Transcription Nonaccented
uśanā kāvyastvā ni hotāramasādayat ǀ
āyajim tvā manave jātavedasam ǁ
Padapatha Devanagari Accented
उ॒शना॑ । का॒व्यः । त्वा॒ । नि । होता॑रम् । अ॒सा॒द॒य॒त् ।
आ॒ऽय॒जिम् । त्वा॒ । मन॑वे । जा॒तऽवे॑दसम् ॥
Padapatha Devanagari Nonaccented
उशना । काव्यः । त्वा । नि । होतारम् । असादयत् ।
आऽयजिम् । त्वा । मनवे । जातऽवेदसम् ॥
Padapatha Transcription Accented
uśánā ǀ kāvyáḥ ǀ tvā ǀ ní ǀ hótāram ǀ asādayat ǀ
ā-yajím ǀ tvā ǀ mánave ǀ jātá-vedasam ǁ
Padapatha Transcription Nonaccented
uśanā ǀ kāvyaḥ ǀ tvā ǀ ni ǀ hotāram ǀ asādayat ǀ
ā-yajim ǀ tvā ǀ manave ǀ jāta-vedasam ǁ
08.023.18 (Mandala. Sukta. Rik)
6.2.12.03 (Ashtaka. Adhyaya. Varga. Rik)
08.04.054 (Mandala. Anuvāka. Rik)
Samhita Devanagari Accented
विश्वे॒ हि त्वा॑ स॒जोष॑सो दे॒वासो॑ दू॒तमक्र॑त ।
श्रु॒ष्टी दे॑व प्रथ॒मो य॒ज्ञियो॑ भुवः ॥
Samhita Devanagari Nonaccented
विश्वे हि त्वा सजोषसो देवासो दूतमक्रत ।
श्रुष्टी देव प्रथमो यज्ञियो भुवः ॥
Samhita Transcription Accented
víśve hí tvā sajóṣaso devā́so dūtámákrata ǀ
śruṣṭī́ deva prathamó yajñíyo bhuvaḥ ǁ
Samhita Transcription Nonaccented
viśve hi tvā sajoṣaso devāso dūtamakrata ǀ
śruṣṭī deva prathamo yajñiyo bhuvaḥ ǁ
Padapatha Devanagari Accented
विश्वे॑ । हि । त्वा॒ । स॒ऽजोष॑सः । दे॒वासः॑ । दू॒तम् । अक्र॑त ।
श्रु॒ष्टी । दे॒व॒ । प्र॒थ॒मः । य॒ज्ञियः॑ । भु॒वः॒ ॥
Padapatha Devanagari Nonaccented
विश्वे । हि । त्वा । सऽजोषसः । देवासः । दूतम् । अक्रत ।
श्रुष्टी । देव । प्रथमः । यज्ञियः । भुवः ॥
Padapatha Transcription Accented
víśve ǀ hí ǀ tvā ǀ sa-jóṣasaḥ ǀ devā́saḥ ǀ dūtám ǀ ákrata ǀ
śruṣṭī́ ǀ deva ǀ prathamáḥ ǀ yajñíyaḥ ǀ bhuvaḥ ǁ
Padapatha Transcription Nonaccented
viśve ǀ hi ǀ tvā ǀ sa-joṣasaḥ ǀ devāsaḥ ǀ dūtam ǀ akrata ǀ
śruṣṭī ǀ deva ǀ prathamaḥ ǀ yajñiyaḥ ǀ bhuvaḥ ǁ
08.023.19 (Mandala. Sukta. Rik)
6.2.12.04 (Ashtaka. Adhyaya. Varga. Rik)
08.04.055 (Mandala. Anuvāka. Rik)
Samhita Devanagari Accented
इ॒मं घा॑ वी॒रो अ॒मृतं॑ दू॒तं कृ॑ण्वीत॒ मर्त्यः॑ ।
पा॒व॒कं कृ॒ष्णव॑र्तनिं॒ विहा॑यसं ॥
Samhita Devanagari Nonaccented
इमं घा वीरो अमृतं दूतं कृण्वीत मर्त्यः ।
पावकं कृष्णवर्तनिं विहायसं ॥
Samhita Transcription Accented
imám ghā vīró amṛ́tam dūtám kṛṇvīta mártyaḥ ǀ
pāvakám kṛṣṇávartanim víhāyasam ǁ
Samhita Transcription Nonaccented
imam ghā vīro amṛtam dūtam kṛṇvīta martyaḥ ǀ
pāvakam kṛṣṇavartanim vihāyasam ǁ
Padapatha Devanagari Accented
इ॒मम् । घ॒ । वी॒रः । अ॒मृत॑म् । दू॒तम् । कृ॒ण्वी॒त॒ । मर्त्यः॑ ।
पा॒व॒कम् । कृ॒ष्णऽव॑र्तनिम् । विऽहा॑यसम् ॥
Padapatha Devanagari Nonaccented
इमम् । घ । वीरः । अमृतम् । दूतम् । कृण्वीत । मर्त्यः ।
पावकम् । कृष्णऽवर्तनिम् । विऽहायसम् ॥
Padapatha Transcription Accented
imám ǀ gha ǀ vīráḥ ǀ amṛ́tam ǀ dūtám ǀ kṛṇvīta ǀ mártyaḥ ǀ
pāvakám ǀ kṛṣṇá-vartanim ǀ ví-hāyasam ǁ
Padapatha Transcription Nonaccented
imam ǀ gha ǀ vīraḥ ǀ amṛtam ǀ dūtam ǀ kṛṇvīta ǀ martyaḥ ǀ
pāvakam ǀ kṛṣṇa-vartanim ǀ vi-hāyasam ǁ
08.023.20 (Mandala. Sukta. Rik)
6.2.12.05 (Ashtaka. Adhyaya. Varga. Rik)
08.04.056 (Mandala. Anuvāka. Rik)
Samhita Devanagari Accented
तं हु॑वेम य॒तस्रु॑चः सु॒भासं॑ शु॒क्रशो॑चिषं ।
वि॒शाम॒ग्निम॒जरं॑ प्र॒त्नमीड्यं॑ ॥
Samhita Devanagari Nonaccented
तं हुवेम यतस्रुचः सुभासं शुक्रशोचिषं ।
विशामग्निमजरं प्रत्नमीड्यं ॥
Samhita Transcription Accented
tám huvema yatásrucaḥ subhā́sam śukráśociṣam ǀ
viśā́magnímajáram pratnámī́ḍyam ǁ
Samhita Transcription Nonaccented
tam huvema yatasrucaḥ subhāsam śukraśociṣam ǀ
viśāmagnimajaram pratnamīḍyam ǁ
Padapatha Devanagari Accented
तम् । हु॒वे॒म॒ । य॒तऽस्रु॑चः । सु॒ऽभास॑म् । शु॒क्रऽशो॑चिषम् ।
वि॒शाम् । अ॒ग्निम् । अ॒जर॑म् । प्र॒त्नम् । ईड्य॑म् ॥
Padapatha Devanagari Nonaccented
तम् । हुवेम । यतऽस्रुचः । सुऽभासम् । शुक्रऽशोचिषम् ।
विशाम् । अग्निम् । अजरम् । प्रत्नम् । ईड्यम् ॥
Padapatha Transcription Accented
tám ǀ huvema ǀ yatá-srucaḥ ǀ su-bhā́sam ǀ śukrá-śociṣam ǀ
viśā́m ǀ agním ǀ ajáram ǀ pratnám ǀ ī́ḍyam ǁ
Padapatha Transcription Nonaccented
tam ǀ huvema ǀ yata-srucaḥ ǀ su-bhāsam ǀ śukra-śociṣam ǀ
viśām ǀ agnim ǀ ajaram ǀ pratnam ǀ īḍyam ǁ
08.023.21 (Mandala. Sukta. Rik)
6.2.13.01 (Ashtaka. Adhyaya. Varga. Rik)
08.04.057 (Mandala. Anuvāka. Rik)
Samhita Devanagari Accented
यो अ॑स्मै ह॒व्यदा॑तिभि॒राहु॑तिं॒ मर्तोऽवि॑धत् ।
भूरि॒ पोषं॒ स ध॑त्ते वी॒रव॒द्यशः॑ ॥
Samhita Devanagari Nonaccented
यो अस्मै हव्यदातिभिराहुतिं मर्तोऽविधत् ।
भूरि पोषं स धत्ते वीरवद्यशः ॥
Samhita Transcription Accented
yó asmai havyádātibhirā́hutim mártó’vidhat ǀ
bhū́ri póṣam sá dhatte vīrávadyáśaḥ ǁ
Samhita Transcription Nonaccented
yo asmai havyadātibhirāhutim marto’vidhat ǀ
bhūri poṣam sa dhatte vīravadyaśaḥ ǁ
Padapatha Devanagari Accented
यः । अ॒स्मै॒ । ह॒व्यदा॑तिऽभिः । आऽहु॑तिम् । मर्तः॑ । अवि॑धत् ।
भूरि॑ । पोष॑म् । सः । ध॒त्ते॒ । वी॒रऽव॑त् । यशः॑ ॥
Padapatha Devanagari Nonaccented
यः । अस्मै । हव्यदातिऽभिः । आऽहुतिम् । मर्तः । अविधत् ।
भूरि । पोषम् । सः । धत्ते । वीरऽवत् । यशः ॥
Padapatha Transcription Accented
yáḥ ǀ asmai ǀ havyádāti-bhiḥ ǀ ā́-hutim ǀ mártaḥ ǀ ávidhat ǀ
bhū́ri ǀ póṣam ǀ sáḥ ǀ dhatte ǀ vīrá-vat ǀ yáśaḥ ǁ
Padapatha Transcription Nonaccented
yaḥ ǀ asmai ǀ havyadāti-bhiḥ ǀ ā-hutim ǀ martaḥ ǀ avidhat ǀ
bhūri ǀ poṣam ǀ saḥ ǀ dhatte ǀ vīra-vat ǀ yaśaḥ ǁ
08.023.22 (Mandala. Sukta. Rik)
6.2.13.02 (Ashtaka. Adhyaya. Varga. Rik)
08.04.058 (Mandala. Anuvāka. Rik)
Samhita Devanagari Accented
प्र॒थ॒मं जा॒तवे॑दसम॒ग्निं य॒ज्ञेषु॑ पू॒र्व्यं ।
प्रति॒ स्रुगे॑ति॒ नम॑सा ह॒विष्म॑ती ॥
Samhita Devanagari Nonaccented
प्रथमं जातवेदसमग्निं यज्ञेषु पूर्व्यं ।
प्रति स्रुगेति नमसा हविष्मती ॥
Samhita Transcription Accented
prathamám jātávedasamagním yajñéṣu pūrvyám ǀ
práti srúgeti námasā havíṣmatī ǁ
Samhita Transcription Nonaccented
prathamam jātavedasamagnim yajñeṣu pūrvyam ǀ
prati srugeti namasā haviṣmatī ǁ
Padapatha Devanagari Accented
प्र॒थ॒मम् । जा॒तऽवे॑दसम् । अ॒ग्निम् । य॒ज्ञेषु॑ । पू॒र्व्यम् ।
प्रति॑ । स्रुक् । ए॒ति॒ । नम॑सा । ह॒विष्म॑ती ॥
Padapatha Devanagari Nonaccented
प्रथमम् । जातऽवेदसम् । अग्निम् । यज्ञेषु । पूर्व्यम् ।
प्रति । स्रुक् । एति । नमसा । हविष्मती ॥
Padapatha Transcription Accented
prathamám ǀ jātá-vedasam ǀ agním ǀ yajñéṣu ǀ pūrvyám ǀ
práti ǀ srúk ǀ eti ǀ námasā ǀ havíṣmatī ǁ
Padapatha Transcription Nonaccented
prathamam ǀ jāta-vedasam ǀ agnim ǀ yajñeṣu ǀ pūrvyam ǀ
prati ǀ sruk ǀ eti ǀ namasā ǀ haviṣmatī ǁ
08.023.23 (Mandala. Sukta. Rik)
6.2.13.03 (Ashtaka. Adhyaya. Varga. Rik)
08.04.059 (Mandala. Anuvāka. Rik)
Samhita Devanagari Accented
आभि॑र्विधेमा॒ग्नये॒ ज्येष्ठा॑भिर्व्यश्व॒वत् ।
मंहि॑ष्ठाभिर्म॒तिभिः॑ शु॒क्रशो॑चिषे ॥
Samhita Devanagari Nonaccented
आभिर्विधेमाग्नये ज्येष्ठाभिर्व्यश्ववत् ।
मंहिष्ठाभिर्मतिभिः शुक्रशोचिषे ॥
Samhita Transcription Accented
ā́bhirvidhemāgnáye jyéṣṭhābhirvyaśvavát ǀ
máṃhiṣṭhābhirmatíbhiḥ śukráśociṣe ǁ
Samhita Transcription Nonaccented
ābhirvidhemāgnaye jyeṣṭhābhirvyaśvavat ǀ
maṃhiṣṭhābhirmatibhiḥ śukraśociṣe ǁ
Padapatha Devanagari Accented
आभिः॑ । वि॒धे॒म॒ । अ॒ग्नये॑ । ज्येष्ठा॑भिः । व्य॒श्व॒ऽवत् ।
मंहि॑ष्ठाभिः । म॒तिऽभिः॑ । शु॒क्रऽशो॑चिषे ॥
Padapatha Devanagari Nonaccented
आभिः । विधेम । अग्नये । ज्येष्ठाभिः । व्यश्वऽवत् ।
मंहिष्ठाभिः । मतिऽभिः । शुक्रऽशोचिषे ॥
Padapatha Transcription Accented
ā́bhiḥ ǀ vidhema ǀ agnáye ǀ jyéṣṭhābhiḥ ǀ vyaśva-vát ǀ
máṃhiṣṭhābhiḥ ǀ matí-bhiḥ ǀ śukrá-śociṣe ǁ
Padapatha Transcription Nonaccented
ābhiḥ ǀ vidhema ǀ agnaye ǀ jyeṣṭhābhiḥ ǀ vyaśva-vat ǀ
maṃhiṣṭhābhiḥ ǀ mati-bhiḥ ǀ śukra-śociṣe ǁ
08.023.24 (Mandala. Sukta. Rik)
6.2.13.04 (Ashtaka. Adhyaya. Varga. Rik)
08.04.060 (Mandala. Anuvāka. Rik)
Samhita Devanagari Accented
नू॒नम॑र्च॒ विहा॑यसे॒ स्तोमे॑भिः स्थूरयूप॒वत् ।
ऋषे॑ वैयश्व॒ दम्या॑या॒ग्नये॑ ॥
Samhita Devanagari Nonaccented
नूनमर्च विहायसे स्तोमेभिः स्थूरयूपवत् ।
ऋषे वैयश्व दम्यायाग्नये ॥
Samhita Transcription Accented
nūnámarca víhāyase stómebhiḥ sthūrayūpavát ǀ
ṛ́ṣe vaiyaśva dámyāyāgnáye ǁ
Samhita Transcription Nonaccented
nūnamarca vihāyase stomebhiḥ sthūrayūpavat ǀ
ṛṣe vaiyaśva damyāyāgnaye ǁ
Padapatha Devanagari Accented
नू॒नम् । अ॒र्च॒ । विऽहा॑यसे । स्तोमे॑भिः । स्थू॒र॒यू॒प॒ऽवत् ।
ऋषे॑ । वै॒य॒श्व॒ । दम्या॑य । अ॒ग्नये॑ ॥
Padapatha Devanagari Nonaccented
नूनम् । अर्च । विऽहायसे । स्तोमेभिः । स्थूरयूपऽवत् ।
ऋषे । वैयश्व । दम्याय । अग्नये ॥
Padapatha Transcription Accented
nūnám ǀ arca ǀ ví-hāyase ǀ stómebhiḥ ǀ sthūrayūpa-vát ǀ
ṛ́ṣe ǀ vaiyaśva ǀ dámyāya ǀ agnáye ǁ
Padapatha Transcription Nonaccented
nūnam ǀ arca ǀ vi-hāyase ǀ stomebhiḥ ǀ sthūrayūpa-vat ǀ
ṛṣe ǀ vaiyaśva ǀ damyāya ǀ agnaye ǁ
08.023.25 (Mandala. Sukta. Rik)
6.2.13.05 (Ashtaka. Adhyaya. Varga. Rik)
08.04.061 (Mandala. Anuvāka. Rik)
Samhita Devanagari Accented
अति॑थिं॒ मानु॑षाणां सू॒नुं वन॒स्पती॑नां ।
विप्रा॑ अ॒ग्निमव॑से प्र॒त्नमी॑ळते ॥
Samhita Devanagari Nonaccented
अतिथिं मानुषाणां सूनुं वनस्पतीनां ।
विप्रा अग्निमवसे प्रत्नमीळते ॥
Samhita Transcription Accented
átithim mā́nuṣāṇām sūnúm vánaspátīnām ǀ
víprā agnímávase pratnámīḷate ǁ
Samhita Transcription Nonaccented
atithim mānuṣāṇām sūnum vanaspatīnām ǀ
viprā agnimavase pratnamīḷate ǁ
Padapatha Devanagari Accented
अति॑थिम् । मानु॑षाणाम् । सू॒नुम् । वन॒स्पती॑नाम् ।
विप्राः॑ । अ॒ग्निम् । अव॑से । प्र॒त्नम् । ई॒ळ॒ते॒ ॥
Padapatha Devanagari Nonaccented
अतिथिम् । मानुषाणाम् । सूनुम् । वनस्पतीनाम् ।
विप्राः । अग्निम् । अवसे । प्रत्नम् । ईळते ॥
Padapatha Transcription Accented
átithim ǀ mā́nuṣāṇām ǀ sūnúm ǀ vánaspátīnām ǀ
víprāḥ ǀ agním ǀ ávase ǀ pratnám ǀ īḷate ǁ
Padapatha Transcription Nonaccented
atithim ǀ mānuṣāṇām ǀ sūnum ǀ vanaspatīnām ǀ
viprāḥ ǀ agnim ǀ avase ǀ pratnam ǀ īḷate ǁ
08.023.26 (Mandala. Sukta. Rik)
6.2.14.01 (Ashtaka. Adhyaya. Varga. Rik)
08.04.062 (Mandala. Anuvāka. Rik)
Samhita Devanagari Accented
म॒हो विश्वाँ॑ अ॒भि ष॒तो॒३॒॑ऽभि ह॒व्यानि॒ मानु॑षा ।
अग्ने॒ नि ष॑त्सि॒ नम॒साधि॑ ब॒र्हिषि॑ ॥
Samhita Devanagari Nonaccented
महो विश्वाँ अभि षतोऽभि हव्यानि मानुषा ।
अग्ने नि षत्सि नमसाधि बर्हिषि ॥
Samhita Transcription Accented
mahó víśvām̐ abhí ṣató’bhí havyā́ni mā́nuṣā ǀ
ágne ní ṣatsi námasā́dhi barhíṣi ǁ
Samhita Transcription Nonaccented
maho viśvām̐ abhi ṣato’bhi havyāni mānuṣā ǀ
agne ni ṣatsi namasādhi barhiṣi ǁ
Padapatha Devanagari Accented
म॒हः । विश्वा॑न् । अ॒भि । स॒तः । अ॒भि । ह॒व्यानि॑ । मानु॑षा ।
अग्ने॑ । नि । स॒त्सि॒ । नम॑सा । अधि॑ । ब॒र्हिषि॑ ॥
Padapatha Devanagari Nonaccented
महः । विश्वान् । अभि । सतः । अभि । हव्यानि । मानुषा ।
अग्ने । नि । सत्सि । नमसा । अधि । बर्हिषि ॥
Padapatha Transcription Accented
maháḥ ǀ víśvān ǀ abhí ǀ satáḥ ǀ abhí ǀ havyā́ni ǀ mā́nuṣā ǀ
ágne ǀ ní ǀ satsi ǀ námasā ǀ ádhi ǀ barhíṣi ǁ
Padapatha Transcription Nonaccented
mahaḥ ǀ viśvān ǀ abhi ǀ sataḥ ǀ abhi ǀ havyāni ǀ mānuṣā ǀ
agne ǀ ni ǀ satsi ǀ namasā ǀ adhi ǀ barhiṣi ǁ
08.023.27 (Mandala. Sukta. Rik)
6.2.14.02 (Ashtaka. Adhyaya. Varga. Rik)
08.04.063 (Mandala. Anuvāka. Rik)
Samhita Devanagari Accented
वंस्वा॑ नो॒ वार्या॑ पु॒रु वंस्व॑ रा॒यः पु॑रु॒स्पृहः॑ ।
सु॒वीर्य॑स्य प्र॒जाव॑तो॒ यश॑स्वतः ॥
Samhita Devanagari Nonaccented
वंस्वा नो वार्या पुरु वंस्व रायः पुरुस्पृहः ।
सुवीर्यस्य प्रजावतो यशस्वतः ॥
Samhita Transcription Accented
váṃsvā no vā́ryā purú váṃsva rāyáḥ puruspṛ́haḥ ǀ
suvī́ryasya prajā́vato yáśasvataḥ ǁ
Samhita Transcription Nonaccented
vaṃsvā no vāryā puru vaṃsva rāyaḥ puruspṛhaḥ ǀ
suvīryasya prajāvato yaśasvataḥ ǁ
Padapatha Devanagari Accented
वंस्व॑ । नः॒ । वार्या॑ । पु॒रु । वंस्व॑ । रा॒यः । पु॒रु॒ऽस्पृहः॑ ।
सु॒ऽवीर्य॑स्य । प्र॒जाऽव॑तः । यश॑स्वतः ॥
Padapatha Devanagari Nonaccented
वंस्व । नः । वार्या । पुरु । वंस्व । रायः । पुरुऽस्पृहः ।
सुऽवीर्यस्य । प्रजाऽवतः । यशस्वतः ॥
Padapatha Transcription Accented
váṃsva ǀ naḥ ǀ vā́ryā ǀ purú ǀ váṃsva ǀ rāyáḥ ǀ puru-spṛ́haḥ ǀ
su-vī́ryasya ǀ prajā́-vataḥ ǀ yáśasvataḥ ǁ
Padapatha Transcription Nonaccented
vaṃsva ǀ naḥ ǀ vāryā ǀ puru ǀ vaṃsva ǀ rāyaḥ ǀ puru-spṛhaḥ ǀ
su-vīryasya ǀ prajā-vataḥ ǀ yaśasvataḥ ǁ
08.023.28 (Mandala. Sukta. Rik)
6.2.14.03 (Ashtaka. Adhyaya. Varga. Rik)
08.04.064 (Mandala. Anuvāka. Rik)
Samhita Devanagari Accented
त्वं व॑रो सु॒षाम्णेऽग्ने॒ जना॑य चोदय ।
सदा॑ वसो रा॒तिं य॑विष्ठ॒ शश्व॑ते ॥
Samhita Devanagari Nonaccented
त्वं वरो सुषाम्णेऽग्ने जनाय चोदय ।
सदा वसो रातिं यविष्ठ शश्वते ॥
Samhita Transcription Accented
tvám varo suṣā́mṇé’gne jánāya codaya ǀ
sádā vaso rātím yaviṣṭha śáśvate ǁ
Samhita Transcription Nonaccented
tvam varo suṣāmṇe’gne janāya codaya ǀ
sadā vaso rātim yaviṣṭha śaśvate ǁ
Padapatha Devanagari Accented
त्वम् । व॒रो॒ इति॑ । सु॒ऽसाम्ने॑ । अग्ने॑ । जना॑य । चो॒द॒य॒ ।
सदा॑ । व॒सो॒ इति॑ । रा॒तिम् । य॒वि॒ष्ठ॒ । शश्व॑ते ॥
Padapatha Devanagari Nonaccented
त्वम् । वरो इति । सुऽसाम्ने । अग्ने । जनाय । चोदय ।
सदा । वसो इति । रातिम् । यविष्ठ । शश्वते ॥
Padapatha Transcription Accented
tvám ǀ varo íti ǀ su-sā́mne ǀ ágne ǀ jánāya ǀ codaya ǀ
sádā ǀ vaso íti ǀ rātím ǀ yaviṣṭha ǀ śáśvate ǁ
Padapatha Transcription Nonaccented
tvam ǀ varo iti ǀ su-sāmne ǀ agne ǀ janāya ǀ codaya ǀ
sadā ǀ vaso iti ǀ rātim ǀ yaviṣṭha ǀ śaśvate ǁ
08.023.29 (Mandala. Sukta. Rik)
6.2.14.04 (Ashtaka. Adhyaya. Varga. Rik)
08.04.065 (Mandala. Anuvāka. Rik)
Samhita Devanagari Accented
त्वं हि सु॑प्र॒तूरसि॒ त्वं नो॒ गोम॑ती॒रिषः॑ ।
म॒हो रा॒यः सा॒तिम॑ग्ने॒ अपा॑ वृधि ॥
Samhita Devanagari Nonaccented
त्वं हि सुप्रतूरसि त्वं नो गोमतीरिषः ।
महो रायः सातिमग्ने अपा वृधि ॥
Samhita Transcription Accented
tvám hí supratū́rási tvám no gómatīríṣaḥ ǀ
mahó rāyáḥ sātímagne ápā vṛdhi ǁ
Samhita Transcription Nonaccented
tvam hi supratūrasi tvam no gomatīriṣaḥ ǀ
maho rāyaḥ sātimagne apā vṛdhi ǁ
Padapatha Devanagari Accented
त्वम् । हि । सु॒ऽप्र॒तूः । असि॑ । त्वम् । नः॒ । गोऽम॑तीः । इषः॑ ।
म॒हः । रा॒यः । सा॒तिम् । अ॒ग्ने॒ । अप॑ । वृ॒धि॒ ॥
Padapatha Devanagari Nonaccented
त्वम् । हि । सुऽप्रतूः । असि । त्वम् । नः । गोऽमतीः । इषः ।
महः । रायः । सातिम् । अग्ने । अप । वृधि ॥
Padapatha Transcription Accented
tvám ǀ hí ǀ su-pratū́ḥ ǀ ási ǀ tvám ǀ naḥ ǀ gó-matīḥ ǀ íṣaḥ ǀ
maháḥ ǀ rāyáḥ ǀ sātím ǀ agne ǀ ápa ǀ vṛdhi ǁ
Padapatha Transcription Nonaccented
tvam ǀ hi ǀ su-pratūḥ ǀ asi ǀ tvam ǀ naḥ ǀ go-matīḥ ǀ iṣaḥ ǀ
mahaḥ ǀ rāyaḥ ǀ sātim ǀ agne ǀ apa ǀ vṛdhi ǁ
08.023.30 (Mandala. Sukta. Rik)
6.2.14.05 (Ashtaka. Adhyaya. Varga. Rik)
08.04.066 (Mandala. Anuvāka. Rik)
Samhita Devanagari Accented
अग्ने॒ त्वं य॒शा अ॒स्या मि॒त्रावरु॑णा वह ।
ऋ॒तावा॑ना स॒म्राजा॑ पू॒तद॑क्षसा ॥
Samhita Devanagari Nonaccented
अग्ने त्वं यशा अस्या मित्रावरुणा वह ।
ऋतावाना सम्राजा पूतदक्षसा ॥
Samhita Transcription Accented
ágne tvám yaśā́ asyā́ mitrā́váruṇā vaha ǀ
ṛtā́vānā samrā́jā pūtádakṣasā ǁ
Samhita Transcription Nonaccented
agne tvam yaśā asyā mitrāvaruṇā vaha ǀ
ṛtāvānā samrājā pūtadakṣasā ǁ
Padapatha Devanagari Accented
अग्ने॑ । त्वम् । य॒शाः । अ॒सि॒ । आ । मि॒त्रावरु॑णा । व॒ह॒ ।
ऋ॒तऽवा॑ना । स॒म्ऽराजा॑ । पू॒तऽद॑क्षसा ॥
Padapatha Devanagari Nonaccented
अग्ने । त्वम् । यशाः । असि । आ । मित्रावरुणा । वह ।
ऋतऽवाना । सम्ऽराजा । पूतऽदक्षसा ॥
Padapatha Transcription Accented
ágne ǀ tvám ǀ yaśā́ḥ ǀ asi ǀ ā́ ǀ mitrā́váruṇā ǀ vaha ǀ
ṛtá-vānā ǀ sam-rā́jā ǀ pūtá-dakṣasā ǁ
Padapatha Transcription Nonaccented
agne ǀ tvam ǀ yaśāḥ ǀ asi ǀ ā ǀ mitrāvaruṇā ǀ vaha ǀ
ṛta-vānā ǀ sam-rājā ǀ pūta-dakṣasā ǁ