|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 24
|
1. Info |
| To: | 1-27: indra; 28-30: varu sauṣāmṇa’s dānastuti |
|
| From: | viśvamanas vaiyaśva | |
| Metres: | 1st set of styles: uṣṇik (2-5, 7, 8, 10, 16, 25-27); nicṛduṣṇik (1, 6, 11, 13, 20, 23, 24); virāḍuṣnik (9, 12, 18, 22, 28, 29); pādanicṛduṣṇik (14, 15, 17, 21); ārcīsvarāḍuṣṇik (19); nicṛdanuṣṭup (30) 2nd set of styles: uṣṇih (1-29); anuṣṭubh (30) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.024.01 (Mandala. Sukta. Rik)
6.2.15.01 (Ashtaka. Adhyaya. Varga. Rik)
08.04.067 (Mandala. Anuvāka. Rik)
Samhita Devanagari Accented
सखा॑य॒ आ शि॑षामहि॒ ब्रह्मेंद्रा॑य व॒ज्रिणे॑ ।
स्तु॒ष ऊ॒ षु वो॒ नृत॑माय धृ॒ष्णवे॑ ॥
Samhita Devanagari Nonaccented
सखाय आ शिषामहि ब्रह्मेंद्राय वज्रिणे ।
स्तुष ऊ षु वो नृतमाय धृष्णवे ॥
Samhita Transcription Accented
sákhāya ā́ śiṣāmahi bráhméndrāya vajríṇe ǀ
stuṣá ū ṣú vo nṛ́tamāya dhṛṣṇáve ǁ
Samhita Transcription Nonaccented
sakhāya ā śiṣāmahi brahmendrāya vajriṇe ǀ
stuṣa ū ṣu vo nṛtamāya dhṛṣṇave ǁ
Padapatha Devanagari Accented
सखा॑यः । आ । शि॒षा॒म॒हि॒ । ब्रह्म॑ । इन्द्रा॑य । व॒ज्रिणे॑ ।
स्तु॒षे । ऊं॒ इति॑ । सु । वः॒ । नृऽत॑माय । धृ॒ष्णवे॑ ॥
Padapatha Devanagari Nonaccented
सखायः । आ । शिषामहि । ब्रह्म । इन्द्राय । वज्रिणे ।
स्तुषे । ऊं इति । सु । वः । नृऽतमाय । धृष्णवे ॥
Padapatha Transcription Accented
sákhāyaḥ ǀ ā́ ǀ śiṣāmahi ǀ bráhma ǀ índrāya ǀ vajríṇe ǀ
stuṣé ǀ ūṃ íti ǀ sú ǀ vaḥ ǀ nṛ́-tamāya ǀ dhṛṣṇáve ǁ
Padapatha Transcription Nonaccented
sakhāyaḥ ǀ ā ǀ śiṣāmahi ǀ brahma ǀ indrāya ǀ vajriṇe ǀ
stuṣe ǀ ūṃ iti ǀ su ǀ vaḥ ǀ nṛ-tamāya ǀ dhṛṣṇave ǁ
08.024.02 (Mandala. Sukta. Rik)
6.2.15.02 (Ashtaka. Adhyaya. Varga. Rik)
08.04.068 (Mandala. Anuvāka. Rik)
Samhita Devanagari Accented
शव॑सा॒ ह्यसि॑ श्रु॒तो वृ॑त्र॒हत्ये॑न वृत्र॒हा ।
म॒घैर्म॒घोनो॒ अति॑ शूर दाशसि ॥
Samhita Devanagari Nonaccented
शवसा ह्यसि श्रुतो वृत्रहत्येन वृत्रहा ।
मघैर्मघोनो अति शूर दाशसि ॥
Samhita Transcription Accented
śávasā hyási śrutó vṛtrahátyena vṛtrahā́ ǀ
magháirmaghóno áti śūra dāśasi ǁ
Samhita Transcription Nonaccented
śavasā hyasi śruto vṛtrahatyena vṛtrahā ǀ
maghairmaghono ati śūra dāśasi ǁ
Padapatha Devanagari Accented
शव॑सा । हि । असि॑ । श्रु॒तः । वृ॒त्र॒ऽहत्ये॑न । वृ॒त्र॒ऽहा ।
म॒घैः । म॒घोनः॑ । अति॑ । शू॒र॒ । दा॒श॒सि॒ ॥
Padapatha Devanagari Nonaccented
शवसा । हि । असि । श्रुतः । वृत्रऽहत्येन । वृत्रऽहा ।
मघैः । मघोनः । अति । शूर । दाशसि ॥
Padapatha Transcription Accented
śávasā ǀ hí ǀ ási ǀ śrutáḥ ǀ vṛtra-hátyena ǀ vṛtra-hā́ ǀ
magháiḥ ǀ maghónaḥ ǀ áti ǀ śūra ǀ dāśasi ǁ
Padapatha Transcription Nonaccented
śavasā ǀ hi ǀ asi ǀ śrutaḥ ǀ vṛtra-hatyena ǀ vṛtra-hā ǀ
maghaiḥ ǀ maghonaḥ ǀ ati ǀ śūra ǀ dāśasi ǁ
08.024.03 (Mandala. Sukta. Rik)
6.2.15.03 (Ashtaka. Adhyaya. Varga. Rik)
08.04.069 (Mandala. Anuvāka. Rik)
Samhita Devanagari Accented
स नः॒ स्तवा॑न॒ आ भ॑र र॒यिं चि॒त्रश्र॑वस्तमं ।
नि॒रे॒के चि॒द्यो ह॑रिवो॒ वसु॑र्द॒दिः ॥
Samhita Devanagari Nonaccented
स नः स्तवान आ भर रयिं चित्रश्रवस्तमं ।
निरेके चिद्यो हरिवो वसुर्ददिः ॥
Samhita Transcription Accented
sá naḥ stávāna ā́ bhara rayím citráśravastamam ǀ
nireké cidyó harivo vásurdadíḥ ǁ
Samhita Transcription Nonaccented
sa naḥ stavāna ā bhara rayim citraśravastamam ǀ
nireke cidyo harivo vasurdadiḥ ǁ
Padapatha Devanagari Accented
सः । नः॒ । स्तवा॑नः । आ । भ॒र॒ । र॒यिम् । चि॒त्रश्र॑वःऽतमम् ।
नि॒रे॒के । चि॒त् । यः । ह॒रि॒ऽवः॒ । वसुः॑ । द॒दिः ॥
Padapatha Devanagari Nonaccented
सः । नः । स्तवानः । आ । भर । रयिम् । चित्रश्रवःऽतमम् ।
निरेके । चित् । यः । हरिऽवः । वसुः । ददिः ॥
Padapatha Transcription Accented
sáḥ ǀ naḥ ǀ stávānaḥ ǀ ā́ ǀ bhara ǀ rayím ǀ citráśravaḥ-tamam ǀ
nireké ǀ cit ǀ yáḥ ǀ hari-vaḥ ǀ vásuḥ ǀ dadíḥ ǁ
Padapatha Transcription Nonaccented
saḥ ǀ naḥ ǀ stavānaḥ ǀ ā ǀ bhara ǀ rayim ǀ citraśravaḥ-tamam ǀ
nireke ǀ cit ǀ yaḥ ǀ hari-vaḥ ǀ vasuḥ ǀ dadiḥ ǁ
08.024.04 (Mandala. Sukta. Rik)
6.2.15.04 (Ashtaka. Adhyaya. Varga. Rik)
08.04.070 (Mandala. Anuvāka. Rik)
Samhita Devanagari Accented
आ नि॑रे॒कमु॒त प्रि॒यमिंद्र॒ दर्षि॒ जना॑नां ।
धृ॒ष॒ता धृ॑ष्णो॒ स्तव॑मान॒ आ भ॑र ॥
Samhita Devanagari Nonaccented
आ निरेकमुत प्रियमिंद्र दर्षि जनानां ।
धृषता धृष्णो स्तवमान आ भर ॥
Samhita Transcription Accented
ā́ nirekámutá priyámíndra dárṣi jánānām ǀ
dhṛṣatā́ dhṛṣṇo stávamāna ā́ bhara ǁ
Samhita Transcription Nonaccented
ā nirekamuta priyamindra darṣi janānām ǀ
dhṛṣatā dhṛṣṇo stavamāna ā bhara ǁ
Padapatha Devanagari Accented
आ । नि॒रे॒कम् । उ॒त । प्रि॒यम् । इन्द्र॑ । दर्षि॑ । जना॑नाम् ।
धृ॒ष॒ता । धृ॒ष्णो॒ इति॑ । स्तव॑मानः । आ । भ॒र॒ ॥
Padapatha Devanagari Nonaccented
आ । निरेकम् । उत । प्रियम् । इन्द्र । दर्षि । जनानाम् ।
धृषता । धृष्णो इति । स्तवमानः । आ । भर ॥
Padapatha Transcription Accented
ā́ ǀ nirekám ǀ utá ǀ priyám ǀ índra ǀ dárṣi ǀ jánānām ǀ
dhṛṣatā́ ǀ dhṛṣṇo íti ǀ stávamānaḥ ǀ ā́ ǀ bhara ǁ
Padapatha Transcription Nonaccented
ā ǀ nirekam ǀ uta ǀ priyam ǀ indra ǀ darṣi ǀ janānām ǀ
dhṛṣatā ǀ dhṛṣṇo iti ǀ stavamānaḥ ǀ ā ǀ bhara ǁ
08.024.05 (Mandala. Sukta. Rik)
6.2.15.05 (Ashtaka. Adhyaya. Varga. Rik)
08.04.071 (Mandala. Anuvāka. Rik)
Samhita Devanagari Accented
न ते॑ स॒व्यं न दक्षि॑णं॒ हस्तं॑ वरंत आ॒मुरः॑ ।
न प॑रि॒बाधो॑ हरिवो॒ गवि॑ष्टिषु ॥
Samhita Devanagari Nonaccented
न ते सव्यं न दक्षिणं हस्तं वरंत आमुरः ।
न परिबाधो हरिवो गविष्टिषु ॥
Samhita Transcription Accented
ná te savyám ná dákṣiṇam hástam varanta āmúraḥ ǀ
ná paribā́dho harivo gáviṣṭiṣu ǁ
Samhita Transcription Nonaccented
na te savyam na dakṣiṇam hastam varanta āmuraḥ ǀ
na paribādho harivo gaviṣṭiṣu ǁ
Padapatha Devanagari Accented
न । ते॒ । स॒व्यम् । न । दक्षि॑णम् । हस्त॑म् । व॒र॒न्ते॒ । आ॒ऽमुरः॑ ।
न । प॒रि॒ऽबाधः॑ । ह॒रि॒ऽवः॒ । गोऽइ॑ष्टिषु ॥
Padapatha Devanagari Nonaccented
न । ते । सव्यम् । न । दक्षिणम् । हस्तम् । वरन्ते । आऽमुरः ।
न । परिऽबाधः । हरिऽवः । गोऽइष्टिषु ॥
Padapatha Transcription Accented
ná ǀ te ǀ savyám ǀ ná ǀ dákṣiṇam ǀ hástam ǀ varante ǀ ā-múraḥ ǀ
ná ǀ pari-bā́dhaḥ ǀ hari-vaḥ ǀ gó-iṣṭiṣu ǁ
Padapatha Transcription Nonaccented
na ǀ te ǀ savyam ǀ na ǀ dakṣiṇam ǀ hastam ǀ varante ǀ ā-muraḥ ǀ
na ǀ pari-bādhaḥ ǀ hari-vaḥ ǀ go-iṣṭiṣu ǁ
08.024.06 (Mandala. Sukta. Rik)
6.2.16.01 (Ashtaka. Adhyaya. Varga. Rik)
08.04.072 (Mandala. Anuvāka. Rik)
Samhita Devanagari Accented
आ त्वा॒ गोभि॑रिव व्र॒जं गी॒र्भिर्ऋ॑णोम्यद्रिवः ।
आ स्मा॒ कामं॑ जरि॒तुरा मनः॑ पृण ॥
Samhita Devanagari Nonaccented
आ त्वा गोभिरिव व्रजं गीर्भिर्ऋणोम्यद्रिवः ।
आ स्मा कामं जरितुरा मनः पृण ॥
Samhita Transcription Accented
ā́ tvā góbhiriva vrajám gīrbhírṛṇomyadrivaḥ ǀ
ā́ smā kā́mam jaritúrā́ mánaḥ pṛṇa ǁ
Samhita Transcription Nonaccented
ā tvā gobhiriva vrajam gīrbhirṛṇomyadrivaḥ ǀ
ā smā kāmam jariturā manaḥ pṛṇa ǁ
Padapatha Devanagari Accented
आ । त्वा॒ । गोभिः॑ऽइव । व्र॒जम् । गीः॒ऽभिः । ऋ॒णो॒मि॒ । अ॒द्रि॒ऽवः॒ ।
आ । स्म॒ । काम॑म् । ज॒रि॒तुः । आ । मनः॑ । पृ॒ण॒ ॥
Padapatha Devanagari Nonaccented
आ । त्वा । गोभिःऽइव । व्रजम् । गीःऽभिः । ऋणोमि । अद्रिऽवः ।
आ । स्म । कामम् । जरितुः । आ । मनः । पृण ॥
Padapatha Transcription Accented
ā́ ǀ tvā ǀ góbhiḥ-iva ǀ vrajám ǀ gīḥ-bhíḥ ǀ ṛṇomi ǀ adri-vaḥ ǀ
ā́ ǀ sma ǀ kā́mam ǀ jaritúḥ ǀ ā́ ǀ mánaḥ ǀ pṛṇa ǁ
Padapatha Transcription Nonaccented
ā ǀ tvā ǀ gobhiḥ-iva ǀ vrajam ǀ gīḥ-bhiḥ ǀ ṛṇomi ǀ adri-vaḥ ǀ
ā ǀ sma ǀ kāmam ǀ jarituḥ ǀ ā ǀ manaḥ ǀ pṛṇa ǁ
08.024.07 (Mandala. Sukta. Rik)
6.2.16.02 (Ashtaka. Adhyaya. Varga. Rik)
08.04.073 (Mandala. Anuvāka. Rik)
Samhita Devanagari Accented
विश्वा॑नि वि॒श्वम॑नसो धि॒या नो॑ वृत्रहंतम ।
उग्र॑ प्रणेत॒रधि॒ षू व॑सो गहि ॥
Samhita Devanagari Nonaccented
विश्वानि विश्वमनसो धिया नो वृत्रहंतम ।
उग्र प्रणेतरधि षू वसो गहि ॥
Samhita Transcription Accented
víśvāni viśvámanaso dhiyā́ no vṛtrahantama ǀ
úgra praṇetarádhi ṣū́ vaso gahi ǁ
Samhita Transcription Nonaccented
viśvāni viśvamanaso dhiyā no vṛtrahantama ǀ
ugra praṇetaradhi ṣū vaso gahi ǁ
Padapatha Devanagari Accented
विश्वा॑नि । वि॒श्वऽम॑नसः । धि॒या । नः॒ । वृ॒त्र॒ह॒न्ऽत॒म॒ ।
उग्र॑ । प्र॒ने॒त॒रिति॑ प्रऽनेतः । अधि॑ । सु । व॒सो॒ इति॑ । ग॒हि॒ ॥
Padapatha Devanagari Nonaccented
विश्वानि । विश्वऽमनसः । धिया । नः । वृत्रहन्ऽतम ।
उग्र । प्रनेतरिति प्रऽनेतः । अधि । सु । वसो इति । गहि ॥
Padapatha Transcription Accented
víśvāni ǀ viśvá-manasaḥ ǀ dhiyā́ ǀ naḥ ǀ vṛtrahan-tama ǀ
úgra ǀ pranetaríti pra-netaḥ ǀ ádhi ǀ sú ǀ vaso íti ǀ gahi ǁ
Padapatha Transcription Nonaccented
viśvāni ǀ viśva-manasaḥ ǀ dhiyā ǀ naḥ ǀ vṛtrahan-tama ǀ
ugra ǀ pranetariti pra-netaḥ ǀ adhi ǀ su ǀ vaso iti ǀ gahi ǁ
08.024.08 (Mandala. Sukta. Rik)
6.2.16.03 (Ashtaka. Adhyaya. Varga. Rik)
08.04.074 (Mandala. Anuvāka. Rik)
Samhita Devanagari Accented
व॒यं ते॑ अ॒स्य वृ॑त्रहन्वि॒द्याम॑ शूर॒ नव्य॑सः ।
वसोः॑ स्पा॒र्हस्य॑ पुरुहूत॒ राध॑सः ॥
Samhita Devanagari Nonaccented
वयं ते अस्य वृत्रहन्विद्याम शूर नव्यसः ।
वसोः स्पार्हस्य पुरुहूत राधसः ॥
Samhita Transcription Accented
vayám te asyá vṛtrahanvidyā́ma śūra návyasaḥ ǀ
vásoḥ spārhásya puruhūta rā́dhasaḥ ǁ
Samhita Transcription Nonaccented
vayam te asya vṛtrahanvidyāma śūra navyasaḥ ǀ
vasoḥ spārhasya puruhūta rādhasaḥ ǁ
Padapatha Devanagari Accented
व॒यम् । ते॒ । अ॒स्य । वृ॒त्र॒ऽह॒न् । वि॒द्याम॑ । शू॒र॒ । नव्य॑सः ।
वसोः॑ । स्पा॒र्हस्य॑ । पु॒रु॒ऽहू॒त॒ । राध॑सः ॥
Padapatha Devanagari Nonaccented
वयम् । ते । अस्य । वृत्रऽहन् । विद्याम । शूर । नव्यसः ।
वसोः । स्पार्हस्य । पुरुऽहूत । राधसः ॥
Padapatha Transcription Accented
vayám ǀ te ǀ asyá ǀ vṛtra-han ǀ vidyā́ma ǀ śūra ǀ návyasaḥ ǀ
vásoḥ ǀ spārhásya ǀ puru-hūta ǀ rā́dhasaḥ ǁ
Padapatha Transcription Nonaccented
vayam ǀ te ǀ asya ǀ vṛtra-han ǀ vidyāma ǀ śūra ǀ navyasaḥ ǀ
vasoḥ ǀ spārhasya ǀ puru-hūta ǀ rādhasaḥ ǁ
08.024.09 (Mandala. Sukta. Rik)
6.2.16.04 (Ashtaka. Adhyaya. Varga. Rik)
08.04.075 (Mandala. Anuvāka. Rik)
Samhita Devanagari Accented
इंद्र॒ यथा॒ ह्यस्ति॒ तेऽप॑रीतं नृतो॒ शवः॑ ।
अमृ॑क्ता रा॒तिः पु॑रुहूत दा॒शुषे॑ ॥
Samhita Devanagari Nonaccented
इंद्र यथा ह्यस्ति तेऽपरीतं नृतो शवः ।
अमृक्ता रातिः पुरुहूत दाशुषे ॥
Samhita Transcription Accented
índra yáthā hyásti té’parītam nṛto śávaḥ ǀ
ámṛktā rātíḥ puruhūta dāśúṣe ǁ
Samhita Transcription Nonaccented
indra yathā hyasti te’parītam nṛto śavaḥ ǀ
amṛktā rātiḥ puruhūta dāśuṣe ǁ
Padapatha Devanagari Accented
इन्द्र॑ । यथा॑ । हि । अस्ति॑ । ते॒ । अप॑रिऽइतम् । नृ॒तो॒ इति॑ । शवः॑ ।
अमृ॑क्ता । रा॒तिः । पु॒रु॒ऽहू॒त॒ । दा॒शुषे॑ ॥
Padapatha Devanagari Nonaccented
इन्द्र । यथा । हि । अस्ति । ते । अपरिऽइतम् । नृतो इति । शवः ।
अमृक्ता । रातिः । पुरुऽहूत । दाशुषे ॥
Padapatha Transcription Accented
índra ǀ yáthā ǀ hí ǀ ásti ǀ te ǀ ápari-itam ǀ nṛto íti ǀ śávaḥ ǀ
ámṛktā ǀ rātíḥ ǀ puru-hūta ǀ dāśúṣe ǁ
Padapatha Transcription Nonaccented
indra ǀ yathā ǀ hi ǀ asti ǀ te ǀ apari-itam ǀ nṛto iti ǀ śavaḥ ǀ
amṛktā ǀ rātiḥ ǀ puru-hūta ǀ dāśuṣe ǁ
08.024.10 (Mandala. Sukta. Rik)
6.2.16.05 (Ashtaka. Adhyaya. Varga. Rik)
08.04.076 (Mandala. Anuvāka. Rik)
Samhita Devanagari Accented
आ वृ॑षस्व महामह म॒हे नृ॑तम॒ राध॑से ।
दृ॒ळ्हश्चि॑द्दृह्य मघवन्म॒घत्त॑ये ॥
Samhita Devanagari Nonaccented
आ वृषस्व महामह महे नृतम राधसे ।
दृळ्हश्चिद्दृह्य मघवन्मघत्तये ॥
Samhita Transcription Accented
ā́ vṛṣasva mahāmaha mahé nṛtama rā́dhase ǀ
dṛḷháściddṛhya maghavanmagháttaye ǁ
Samhita Transcription Nonaccented
ā vṛṣasva mahāmaha mahe nṛtama rādhase ǀ
dṛḷhaściddṛhya maghavanmaghattaye ǁ
Padapatha Devanagari Accented
आ । वृ॒ष॒स्व॒ । म॒हा॒ऽम॒ह॒ । म॒हे । नृ॒ऽत॒म॒ । राध॑से ।
दृ॒ळ्हः । चि॒त् । दृ॒ह्य॒ । म॒घ॒ऽव॒न् । म॒घत्त॑ये ॥
Padapatha Devanagari Nonaccented
आ । वृषस्व । महाऽमह । महे । नृऽतम । राधसे ।
दृळ्हः । चित् । दृह्य । मघऽवन् । मघत्तये ॥
Padapatha Transcription Accented
ā́ ǀ vṛṣasva ǀ mahā-maha ǀ mahé ǀ nṛ-tama ǀ rā́dhase ǀ
dṛḷháḥ ǀ cit ǀ dṛhya ǀ magha-van ǀ magháttaye ǁ
Padapatha Transcription Nonaccented
ā ǀ vṛṣasva ǀ mahā-maha ǀ mahe ǀ nṛ-tama ǀ rādhase ǀ
dṛḷhaḥ ǀ cit ǀ dṛhya ǀ magha-van ǀ maghattaye ǁ
08.024.11 (Mandala. Sukta. Rik)
6.2.17.01 (Ashtaka. Adhyaya. Varga. Rik)
08.04.077 (Mandala. Anuvāka. Rik)
Samhita Devanagari Accented
नू अ॒न्यत्रा॑ चिदद्रिव॒स्त्वन्नो॑ जग्मुरा॒शसः॑ ।
मघ॑वंछ॒ग्धि तव॒ तन्न॑ ऊ॒तिभिः॑ ॥
Samhita Devanagari Nonaccented
नू अन्यत्रा चिदद्रिवस्त्वन्नो जग्मुराशसः ।
मघवंछग्धि तव तन्न ऊतिभिः ॥
Samhita Transcription Accented
nū́ anyátrā cidadrivastvánno jagmurāśásaḥ ǀ
mághavañchagdhí táva tánna ūtíbhiḥ ǁ
Samhita Transcription Nonaccented
nū anyatrā cidadrivastvanno jagmurāśasaḥ ǀ
maghavañchagdhi tava tanna ūtibhiḥ ǁ
Padapatha Devanagari Accented
नु । अ॒न्यत्र॑ । चि॒त् । अ॒द्रि॒ऽवः॒ । त्वत् । नः॒ । ज॒ग्मुः॒ । आ॒ऽशसः॑ ।
मघ॑ऽवन् । श॒ग्धि । तव॑ । तत् । नः॒ । ऊ॒तिऽभिः॑ ॥
Padapatha Devanagari Nonaccented
नु । अन्यत्र । चित् । अद्रिऽवः । त्वत् । नः । जग्मुः । आऽशसः ।
मघऽवन् । शग्धि । तव । तत् । नः । ऊतिऽभिः ॥
Padapatha Transcription Accented
nú ǀ anyátra ǀ cit ǀ adri-vaḥ ǀ tvát ǀ naḥ ǀ jagmuḥ ǀ ā-śásaḥ ǀ
mágha-van ǀ śagdhí ǀ táva ǀ tát ǀ naḥ ǀ ūtí-bhiḥ ǁ
Padapatha Transcription Nonaccented
nu ǀ anyatra ǀ cit ǀ adri-vaḥ ǀ tvat ǀ naḥ ǀ jagmuḥ ǀ ā-śasaḥ ǀ
magha-van ǀ śagdhi ǀ tava ǀ tat ǀ naḥ ǀ ūti-bhiḥ ǁ
08.024.12 (Mandala. Sukta. Rik)
6.2.17.02 (Ashtaka. Adhyaya. Varga. Rik)
08.04.078 (Mandala. Anuvāka. Rik)
Samhita Devanagari Accented
न॒ह्यं१॒॑ग नृ॑तो॒ त्वद॒न्यं विं॒दामि॒ राध॑से ।
रा॒ये द्यु॒म्नाय॒ शव॑से च गिर्वणः ॥
Samhita Devanagari Nonaccented
नह्यंग नृतो त्वदन्यं विंदामि राधसे ।
राये द्युम्नाय शवसे च गिर्वणः ॥
Samhita Transcription Accented
nahyáṅgá nṛto tvádanyám vindā́mi rā́dhase ǀ
rāyé dyumnā́ya śávase ca girvaṇaḥ ǁ
Samhita Transcription Nonaccented
nahyaṅga nṛto tvadanyam vindāmi rādhase ǀ
rāye dyumnāya śavase ca girvaṇaḥ ǁ
Padapatha Devanagari Accented
न॒हि । अ॒ङ्ग । नृ॒तो॒ इति॑ । त्वत् । अ॒न्यम् । वि॒न्दामि॑ । राध॑से ।
रा॒ये । द्यु॒म्नाय॑ । शव॑से । च॒ । गि॒र्व॒णः॒ ॥
Padapatha Devanagari Nonaccented
नहि । अङ्ग । नृतो इति । त्वत् । अन्यम् । विन्दामि । राधसे ।
राये । द्युम्नाय । शवसे । च । गिर्वणः ॥
Padapatha Transcription Accented
nahí ǀ aṅgá ǀ nṛto íti ǀ tvát ǀ anyám ǀ vindā́mi ǀ rā́dhase ǀ
rāyé ǀ dyumnā́ya ǀ śávase ǀ ca ǀ girvaṇaḥ ǁ
Padapatha Transcription Nonaccented
nahi ǀ aṅga ǀ nṛto iti ǀ tvat ǀ anyam ǀ vindāmi ǀ rādhase ǀ
rāye ǀ dyumnāya ǀ śavase ǀ ca ǀ girvaṇaḥ ǁ
08.024.13 (Mandala. Sukta. Rik)
6.2.17.03 (Ashtaka. Adhyaya. Varga. Rik)
08.04.079 (Mandala. Anuvāka. Rik)
Samhita Devanagari Accented
एंदु॒मिंद्रा॑य सिंचत॒ पिबा॑ति सो॒म्यं मधु॑ ।
प्र राध॑सा चोदयाते महित्व॒ना ॥
Samhita Devanagari Nonaccented
एंदुमिंद्राय सिंचत पिबाति सोम्यं मधु ।
प्र राधसा चोदयाते महित्वना ॥
Samhita Transcription Accented
éndumíndrāya siñcata píbāti somyám mádhu ǀ
prá rā́dhasā codayāte mahitvanā́ ǁ
Samhita Transcription Nonaccented
endumindrāya siñcata pibāti somyam madhu ǀ
pra rādhasā codayāte mahitvanā ǁ
Padapatha Devanagari Accented
आ । इन्दु॑म् । इन्द्रा॑य । सि॒ञ्च॒त॒ । पिबा॑ति । सो॒म्यम् । मधु॑ ।
प्र । राध॑सा । चो॒द॒या॒ते॒ । म॒हि॒ऽत्व॒ना ॥
Padapatha Devanagari Nonaccented
आ । इन्दुम् । इन्द्राय । सिञ्चत । पिबाति । सोम्यम् । मधु ।
प्र । राधसा । चोदयाते । महिऽत्वना ॥
Padapatha Transcription Accented
ā́ ǀ índum ǀ índrāya ǀ siñcata ǀ píbāti ǀ somyám ǀ mádhu ǀ
prá ǀ rā́dhasā ǀ codayāte ǀ mahi-tvanā́ ǁ
Padapatha Transcription Nonaccented
ā ǀ indum ǀ indrāya ǀ siñcata ǀ pibāti ǀ somyam ǀ madhu ǀ
pra ǀ rādhasā ǀ codayāte ǀ mahi-tvanā ǁ
08.024.14 (Mandala. Sukta. Rik)
6.2.17.04 (Ashtaka. Adhyaya. Varga. Rik)
08.04.080 (Mandala. Anuvāka. Rik)
Samhita Devanagari Accented
उपो॒ हरी॑णां॒ पतिं॒ दक्षं॑ पृं॒चंत॑मब्रवं ।
नू॒नं श्रु॑धि स्तुव॒तो अ॒श्व्यस्य॑ ॥
Samhita Devanagari Nonaccented
उपो हरीणां पतिं दक्षं पृंचंतमब्रवं ।
नूनं श्रुधि स्तुवतो अश्व्यस्य ॥
Samhita Transcription Accented
úpo hárīṇām pátim dákṣam pṛñcántamabravam ǀ
nūnám śrudhi stuvató aśvyásya ǁ
Samhita Transcription Nonaccented
upo harīṇām patim dakṣam pṛñcantamabravam ǀ
nūnam śrudhi stuvato aśvyasya ǁ
Padapatha Devanagari Accented
उपो॒ इति॑ । हरी॑णाम् । पति॑म् । दक्ष॑म् । पृ॒ञ्चन्त॑म् । अ॒ब्र॒व॒म् ।
नू॒नम् । श्रु॒धि॒ । स्तु॒व॒तः । अ॒श्व्यस्य॑ ॥
Padapatha Devanagari Nonaccented
उपो इति । हरीणाम् । पतिम् । दक्षम् । पृञ्चन्तम् । अब्रवम् ।
नूनम् । श्रुधि । स्तुवतः । अश्व्यस्य ॥
Padapatha Transcription Accented
úpo íti ǀ hárīṇām ǀ pátim ǀ dákṣam ǀ pṛñcántam ǀ abravam ǀ
nūnám ǀ śrudhi ǀ stuvatáḥ ǀ aśvyásya ǁ
Padapatha Transcription Nonaccented
upo iti ǀ harīṇām ǀ patim ǀ dakṣam ǀ pṛñcantam ǀ abravam ǀ
nūnam ǀ śrudhi ǀ stuvataḥ ǀ aśvyasya ǁ
08.024.15 (Mandala. Sukta. Rik)
6.2.17.05 (Ashtaka. Adhyaya. Varga. Rik)
08.04.081 (Mandala. Anuvāka. Rik)
Samhita Devanagari Accented
न॒ह्यं१॒॑ग पु॒रा च॒न ज॒ज्ञे वी॒रत॑र॒स्त्वत् ।
नकी॑ रा॒या नैवथा॒ न भं॒दना॑ ॥
Samhita Devanagari Nonaccented
नह्यंग पुरा चन जज्ञे वीरतरस्त्वत् ।
नकी राया नैवथा न भंदना ॥
Samhita Transcription Accented
nahyáṅgá purā́ caná jajñé vīrátarastvát ǀ
nákī rāyā́ náiváthā ná bhandánā ǁ
Samhita Transcription Nonaccented
nahyaṅga purā cana jajñe vīratarastvat ǀ
nakī rāyā naivathā na bhandanā ǁ
Padapatha Devanagari Accented
न॒हि । अ॒ङ्ग । पु॒रा । च॒न । ज॒ज्ञे । वी॒रऽत॑रः । त्वत् ।
नकिः॑ । रा॒या । न । ए॒वऽथा॑ । न । भ॒न्दना॑ ॥
Padapatha Devanagari Nonaccented
नहि । अङ्ग । पुरा । चन । जज्ञे । वीरऽतरः । त्वत् ।
नकिः । राया । न । एवऽथा । न । भन्दना ॥
Padapatha Transcription Accented
nahí ǀ aṅgá ǀ purā́ ǀ caná ǀ jajñé ǀ vīrá-taraḥ ǀ tvát ǀ
nákiḥ ǀ rāyā́ ǀ ná ǀ evá-thā ǀ ná ǀ bhandánā ǁ
Padapatha Transcription Nonaccented
nahi ǀ aṅga ǀ purā ǀ cana ǀ jajñe ǀ vīra-taraḥ ǀ tvat ǀ
nakiḥ ǀ rāyā ǀ na ǀ eva-thā ǀ na ǀ bhandanā ǁ
08.024.16 (Mandala. Sukta. Rik)
6.2.18.01 (Ashtaka. Adhyaya. Varga. Rik)
08.04.082 (Mandala. Anuvāka. Rik)
Samhita Devanagari Accented
एदु॒ मध्वो॑ म॒दिंत॑रं सिं॒च वा॑ध्वर्यो॒ अंध॑सः ।
ए॒वा हि वी॒रः स्तव॑ते स॒दावृ॑धः ॥
Samhita Devanagari Nonaccented
एदु मध्वो मदिंतरं सिंच वाध्वर्यो अंधसः ।
एवा हि वीरः स्तवते सदावृधः ॥
Samhita Transcription Accented
édu mádhvo madíntaram siñcá vādhvaryo ándhasaḥ ǀ
evā́ hí vīráḥ stávate sadā́vṛdhaḥ ǁ
Samhita Transcription Nonaccented
edu madhvo madintaram siñca vādhvaryo andhasaḥ ǀ
evā hi vīraḥ stavate sadāvṛdhaḥ ǁ
Padapatha Devanagari Accented
आ । इत् । ऊं॒ इति॑ । मध्वः॑ । म॒दिन्ऽत॑रम् । सि॒ञ्च । वा॒ । अ॒ध्व॒र्यो॒ इति॑ । अन्ध॑सः ।
ए॒व । हि । वी॒रः । स्तव॑ते । स॒दाऽवृ॑धः ॥
Padapatha Devanagari Nonaccented
आ । इत् । ऊं इति । मध्वः । मदिन्ऽतरम् । सिञ्च । वा । अध्वर्यो इति । अन्धसः ।
एव । हि । वीरः । स्तवते । सदाऽवृधः ॥
Padapatha Transcription Accented
ā́ ǀ ít ǀ ūṃ íti ǀ mádhvaḥ ǀ madín-taram ǀ siñcá ǀ vā ǀ adhvaryo íti ǀ ándhasaḥ ǀ
evá ǀ hí ǀ vīráḥ ǀ stávate ǀ sadā́-vṛdhaḥ ǁ
Padapatha Transcription Nonaccented
ā ǀ it ǀ ūṃ iti ǀ madhvaḥ ǀ madin-taram ǀ siñca ǀ vā ǀ adhvaryo iti ǀ andhasaḥ ǀ
eva ǀ hi ǀ vīraḥ ǀ stavate ǀ sadā-vṛdhaḥ ǁ
08.024.17 (Mandala. Sukta. Rik)
6.2.18.02 (Ashtaka. Adhyaya. Varga. Rik)
08.04.083 (Mandala. Anuvāka. Rik)
Samhita Devanagari Accented
इंद्र॑ स्थातर्हरीणां॒ नकि॑ष्टे पू॒र्व्यस्तु॑तिं ।
उदा॑नंश॒ शव॑सा॒ न भं॒दना॑ ॥
Samhita Devanagari Nonaccented
इंद्र स्थातर्हरीणां नकिष्टे पूर्व्यस्तुतिं ।
उदानंश शवसा न भंदना ॥
Samhita Transcription Accented
índra sthātarharīṇām nákiṣṭe pūrvyástutim ǀ
údānaṃśa śávasā ná bhandánā ǁ
Samhita Transcription Nonaccented
indra sthātarharīṇām nakiṣṭe pūrvyastutim ǀ
udānaṃśa śavasā na bhandanā ǁ
Padapatha Devanagari Accented
इन्द्र॑ । स्था॒तः॒ । ह॒री॒णा॒म् । नकिः॑ । ते॒ । पू॒र्व्यऽस्तु॑तिम् ।
उत् । आ॒नं॒श॒ । शव॑सा । न । भ॒न्दना॑ ॥
Padapatha Devanagari Nonaccented
इन्द्र । स्थातः । हरीणाम् । नकिः । ते । पूर्व्यऽस्तुतिम् ।
उत् । आनंश । शवसा । न । भन्दना ॥
Padapatha Transcription Accented
índra ǀ sthātaḥ ǀ harīṇām ǀ nákiḥ ǀ te ǀ pūrvyá-stutim ǀ
út ǀ ānaṃśa ǀ śávasā ǀ ná ǀ bhandánā ǁ
Padapatha Transcription Nonaccented
indra ǀ sthātaḥ ǀ harīṇām ǀ nakiḥ ǀ te ǀ pūrvya-stutim ǀ
ut ǀ ānaṃśa ǀ śavasā ǀ na ǀ bhandanā ǁ
08.024.18 (Mandala. Sukta. Rik)
6.2.18.03 (Ashtaka. Adhyaya. Varga. Rik)
08.04.084 (Mandala. Anuvāka. Rik)
Samhita Devanagari Accented
तं वो॒ वाजा॑नां॒ पति॒महू॑महि श्रव॒स्यवः॑ ।
अप्रा॑युभिर्य॒ज्ञेभि॑र्वावृ॒धेन्यं॑ ॥
Samhita Devanagari Nonaccented
तं वो वाजानां पतिमहूमहि श्रवस्यवः ।
अप्रायुभिर्यज्ञेभिर्वावृधेन्यं ॥
Samhita Transcription Accented
tám vo vā́jānām pátimáhūmahi śravasyávaḥ ǀ
áprāyubhiryajñébhirvāvṛdhényam ǁ
Samhita Transcription Nonaccented
tam vo vājānām patimahūmahi śravasyavaḥ ǀ
aprāyubhiryajñebhirvāvṛdhenyam ǁ
Padapatha Devanagari Accented
तम् । वः॒ । वाजा॑नाम् । पति॑म् । अहू॑महि । श्र॒व॒स्यवः॑ ।
अप्रा॑युऽभिः । य॒ज्ञेभिः॑ । व॒वृ॒धेन्य॑म् ॥
Padapatha Devanagari Nonaccented
तम् । वः । वाजानाम् । पतिम् । अहूमहि । श्रवस्यवः ।
अप्रायुऽभिः । यज्ञेभिः । ववृधेन्यम् ॥
Padapatha Transcription Accented
tám ǀ vaḥ ǀ vā́jānām ǀ pátim ǀ áhūmahi ǀ śravasyávaḥ ǀ
áprāyu-bhiḥ ǀ yajñébhiḥ ǀ vavṛdhényam ǁ
Padapatha Transcription Nonaccented
tam ǀ vaḥ ǀ vājānām ǀ patim ǀ ahūmahi ǀ śravasyavaḥ ǀ
aprāyu-bhiḥ ǀ yajñebhiḥ ǀ vavṛdhenyam ǁ
08.024.19 (Mandala. Sukta. Rik)
6.2.18.04 (Ashtaka. Adhyaya. Varga. Rik)
08.04.085 (Mandala. Anuvāka. Rik)
Samhita Devanagari Accented
एतो॒ न्विंद्रं॒ स्तवा॑म॒ सखा॑यः॒ स्तोम्यं॒ नरं॑ ।
कृ॒ष्टीर्यो विश्वा॑ अ॒भ्यस्त्येक॒ इत् ॥
Samhita Devanagari Nonaccented
एतो न्विंद्रं स्तवाम सखायः स्तोम्यं नरं ।
कृष्टीर्यो विश्वा अभ्यस्त्येक इत् ॥
Samhita Transcription Accented
éto nvíndram stávāma sákhāyaḥ stómyam náram ǀ
kṛṣṭī́ryó víśvā abhyástyéka ít ǁ
Samhita Transcription Nonaccented
eto nvindram stavāma sakhāyaḥ stomyam naram ǀ
kṛṣṭīryo viśvā abhyastyeka it ǁ
Padapatha Devanagari Accented
एतो॒ इति॑ । नु । इन्द्र॑म् । स्तवा॑म । सखा॑यः । स्तोम्य॑म् । नर॑म् ।
कृ॒ष्टीः । यः । विश्वाः॑ । अ॒भि । अस्ति॑ । एकः॑ । इत् ॥
Padapatha Devanagari Nonaccented
एतो इति । नु । इन्द्रम् । स्तवाम । सखायः । स्तोम्यम् । नरम् ।
कृष्टीः । यः । विश्वाः । अभि । अस्ति । एकः । इत् ॥
Padapatha Transcription Accented
éto íti ǀ nú ǀ índram ǀ stávāma ǀ sákhāyaḥ ǀ stómyam ǀ náram ǀ
kṛṣṭī́ḥ ǀ yáḥ ǀ víśvāḥ ǀ abhí ǀ ásti ǀ ékaḥ ǀ ít ǁ
Padapatha Transcription Nonaccented
eto iti ǀ nu ǀ indram ǀ stavāma ǀ sakhāyaḥ ǀ stomyam ǀ naram ǀ
kṛṣṭīḥ ǀ yaḥ ǀ viśvāḥ ǀ abhi ǀ asti ǀ ekaḥ ǀ it ǁ
08.024.20 (Mandala. Sukta. Rik)
6.2.18.05 (Ashtaka. Adhyaya. Varga. Rik)
08.04.086 (Mandala. Anuvāka. Rik)
Samhita Devanagari Accented
अगो॑रुधाय ग॒विषे॑ द्यु॒क्षाय॒ दस्म्यं॒ वचः॑ ।
घृ॒तात्स्वादी॑यो॒ मधु॑नश्च वोचत ॥
Samhita Devanagari Nonaccented
अगोरुधाय गविषे द्युक्षाय दस्म्यं वचः ।
घृतात्स्वादीयो मधुनश्च वोचत ॥
Samhita Transcription Accented
ágorudhāya gavíṣe dyukṣā́ya dásmyam vácaḥ ǀ
ghṛtā́tsvā́dīyo mádhunaśca vocata ǁ
Samhita Transcription Nonaccented
agorudhāya gaviṣe dyukṣāya dasmyam vacaḥ ǀ
ghṛtātsvādīyo madhunaśca vocata ǁ
Padapatha Devanagari Accented
अगो॑ऽरुधाय । गो॒ऽइषे॑ । द्यु॒क्षाय॑ । दस्म्य॑म् । वचः॑ ।
घृ॒तात् । स्वादी॑यः । मधु॑नः । च॒ । वो॒च॒त॒ ॥
Padapatha Devanagari Nonaccented
अगोऽरुधाय । गोऽइषे । द्युक्षाय । दस्म्यम् । वचः ।
घृतात् । स्वादीयः । मधुनः । च । वोचत ॥
Padapatha Transcription Accented
ágo-rudhāya ǀ go-íṣe ǀ dyukṣā́ya ǀ dásmyam ǀ vácaḥ ǀ
ghṛtā́t ǀ svā́dīyaḥ ǀ mádhunaḥ ǀ ca ǀ vocata ǁ
Padapatha Transcription Nonaccented
ago-rudhāya ǀ go-iṣe ǀ dyukṣāya ǀ dasmyam ǀ vacaḥ ǀ
ghṛtāt ǀ svādīyaḥ ǀ madhunaḥ ǀ ca ǀ vocata ǁ
08.024.21 (Mandala. Sukta. Rik)
6.2.19.01 (Ashtaka. Adhyaya. Varga. Rik)
08.04.087 (Mandala. Anuvāka. Rik)
Samhita Devanagari Accented
यस्यामि॑तानि वी॒र्या॒३॒॑ न राधः॒ पर्ये॑तवे ।
ज्योति॒र्न विश्व॑म॒भ्यस्ति॒ दक्षि॑णा ॥
Samhita Devanagari Nonaccented
यस्यामितानि वीर्या न राधः पर्येतवे ।
ज्योतिर्न विश्वमभ्यस्ति दक्षिणा ॥
Samhita Transcription Accented
yásyā́mitāni vīryā́ ná rā́dhaḥ páryetave ǀ
jyótirná víśvamabhyásti dákṣiṇā ǁ
Samhita Transcription Nonaccented
yasyāmitāni vīryā na rādhaḥ paryetave ǀ
jyotirna viśvamabhyasti dakṣiṇā ǁ
Padapatha Devanagari Accented
यस्य॑ । अमि॑तानि । वी॒र्या॑ । न । राधः॑ । परि॑ऽएतवे ।
ज्योतिः॑ । न । विश्व॑म् । अ॒भि । अस्ति॑ । दक्षि॑णा ॥
Padapatha Devanagari Nonaccented
यस्य । अमितानि । वीर्या । न । राधः । परिऽएतवे ।
ज्योतिः । न । विश्वम् । अभि । अस्ति । दक्षिणा ॥
Padapatha Transcription Accented
yásya ǀ ámitāni ǀ vīryā́ ǀ ná ǀ rā́dhaḥ ǀ pári-etave ǀ
jyótiḥ ǀ ná ǀ víśvam ǀ abhí ǀ ásti ǀ dákṣiṇā ǁ
Padapatha Transcription Nonaccented
yasya ǀ amitāni ǀ vīryā ǀ na ǀ rādhaḥ ǀ pari-etave ǀ
jyotiḥ ǀ na ǀ viśvam ǀ abhi ǀ asti ǀ dakṣiṇā ǁ
08.024.22 (Mandala. Sukta. Rik)
6.2.19.02 (Ashtaka. Adhyaya. Varga. Rik)
08.04.088 (Mandala. Anuvāka. Rik)
Samhita Devanagari Accented
स्तु॒हींद्रं॑ व्यश्व॒वदनू॑र्मिं वा॒जिनं॒ यमं॑ ।
अ॒र्यो गयं॒ मंह॑मानं॒ वि दा॒शुषे॑ ॥
Samhita Devanagari Nonaccented
स्तुहींद्रं व्यश्ववदनूर्मिं वाजिनं यमं ।
अर्यो गयं मंहमानं वि दाशुषे ॥
Samhita Transcription Accented
stuhī́ndram vyaśvavádánūrmim vājínam yámam ǀ
aryó gáyam máṃhamānam ví dāśúṣe ǁ
Samhita Transcription Nonaccented
stuhīndram vyaśvavadanūrmim vājinam yamam ǀ
aryo gayam maṃhamānam vi dāśuṣe ǁ
Padapatha Devanagari Accented
स्तु॒हि । इन्द्र॑म् । व्य॒श्व॒ऽवत् । अनू॑र्मिम् । वा॒जिन॑म् । यम॑म् ।
अ॒र्यः । गय॑म् । मंह॑मानम् । वि । दा॒शुषे॑ ॥
Padapatha Devanagari Nonaccented
स्तुहि । इन्द्रम् । व्यश्वऽवत् । अनूर्मिम् । वाजिनम् । यमम् ।
अर्यः । गयम् । मंहमानम् । वि । दाशुषे ॥
Padapatha Transcription Accented
stuhí ǀ índram ǀ vyaśva-vát ǀ ánūrmim ǀ vājínam ǀ yámam ǀ
aryáḥ ǀ gáyam ǀ máṃhamānam ǀ ví ǀ dāśúṣe ǁ
Padapatha Transcription Nonaccented
stuhi ǀ indram ǀ vyaśva-vat ǀ anūrmim ǀ vājinam ǀ yamam ǀ
aryaḥ ǀ gayam ǀ maṃhamānam ǀ vi ǀ dāśuṣe ǁ
08.024.23 (Mandala. Sukta. Rik)
6.2.19.03 (Ashtaka. Adhyaya. Varga. Rik)
08.04.089 (Mandala. Anuvāka. Rik)
Samhita Devanagari Accented
ए॒वा नू॒नमुप॑ स्तुहि॒ वैय॑श्व दश॒मं नवं॑ ।
सुवि॑द्वांसं च॒र्कृत्यं॑ च॒रणी॑नां ॥
Samhita Devanagari Nonaccented
एवा नूनमुप स्तुहि वैयश्व दशमं नवं ।
सुविद्वांसं चर्कृत्यं चरणीनां ॥
Samhita Transcription Accented
evā́ nūnámúpa stuhi váiyaśva daśamám návam ǀ
súvidvāṃsam carkṛ́tyam caráṇīnām ǁ
Samhita Transcription Nonaccented
evā nūnamupa stuhi vaiyaśva daśamam navam ǀ
suvidvāṃsam carkṛtyam caraṇīnām ǁ
Padapatha Devanagari Accented
ए॒व । नू॒नम् । उप॑ । स्तु॒हि॒ । वैय॑श्व । द॒श॒मम् । नव॑म् ।
सुऽवि॑द्वांसम् । च॒र्कृत्य॑म् । च॒रणी॑नाम् ॥
Padapatha Devanagari Nonaccented
एव । नूनम् । उप । स्तुहि । वैयश्व । दशमम् । नवम् ।
सुऽविद्वांसम् । चर्कृत्यम् । चरणीनाम् ॥
Padapatha Transcription Accented
evá ǀ nūnám ǀ úpa ǀ stuhi ǀ váiyaśva ǀ daśamám ǀ návam ǀ
sú-vidvāṃsam ǀ carkṛ́tyam ǀ caráṇīnām ǁ
Padapatha Transcription Nonaccented
eva ǀ nūnam ǀ upa ǀ stuhi ǀ vaiyaśva ǀ daśamam ǀ navam ǀ
su-vidvāṃsam ǀ carkṛtyam ǀ caraṇīnām ǁ
08.024.24 (Mandala. Sukta. Rik)
6.2.19.04 (Ashtaka. Adhyaya. Varga. Rik)
08.04.090 (Mandala. Anuvāka. Rik)
Samhita Devanagari Accented
वेत्था॒ हि निर्ऋ॑तीनां॒ वज्र॑हस्त परि॒वृजं॑ ।
अह॑रहः शुं॒ध्युः प॑रि॒पदा॑मिव ॥
Samhita Devanagari Nonaccented
वेत्था हि निर्ऋतीनां वज्रहस्त परिवृजं ।
अहरहः शुंध्युः परिपदामिव ॥
Samhita Transcription Accented
vétthā hí nírṛtīnām vájrahasta parivṛ́jam ǀ
áharahaḥ śundhyúḥ paripádāmiva ǁ
Samhita Transcription Nonaccented
vetthā hi nirṛtīnām vajrahasta parivṛjam ǀ
aharahaḥ śundhyuḥ paripadāmiva ǁ
Padapatha Devanagari Accented
वेत्थ॑ । हि । निःऽऋ॑तीनाम् । वज्र॑ऽहस्त । प॒रि॒ऽवृज॑म् ।
अहः॑ऽअहः । शु॒न्ध्युः । प॒रि॒पदा॑म्ऽइव ॥
Padapatha Devanagari Nonaccented
वेत्थ । हि । निःऽऋतीनाम् । वज्रऽहस्त । परिऽवृजम् ।
अहःऽअहः । शुन्ध्युः । परिपदाम्ऽइव ॥
Padapatha Transcription Accented
véttha ǀ hí ǀ níḥ-ṛtīnām ǀ vájra-hasta ǀ pari-vṛ́jam ǀ
áhaḥ-ahaḥ ǀ śundhyúḥ ǀ paripádām-iva ǁ
Padapatha Transcription Nonaccented
vettha ǀ hi ǀ niḥ-ṛtīnām ǀ vajra-hasta ǀ pari-vṛjam ǀ
ahaḥ-ahaḥ ǀ śundhyuḥ ǀ paripadām-iva ǁ
08.024.25 (Mandala. Sukta. Rik)
6.2.19.05 (Ashtaka. Adhyaya. Varga. Rik)
08.04.091 (Mandala. Anuvāka. Rik)
Samhita Devanagari Accented
तदिं॒द्राव॒ आ भ॑र॒ येना॑ दंसिष्ठ॒ कृत्व॑ने ।
द्वि॒ता कुत्सा॑य शिश्नथो॒ नि चो॑दय ॥
Samhita Devanagari Nonaccented
तदिंद्राव आ भर येना दंसिष्ठ कृत्वने ।
द्विता कुत्साय शिश्नथो नि चोदय ॥
Samhita Transcription Accented
tádindrā́va ā́ bhara yénā daṃsiṣṭha kṛ́tvane ǀ
dvitā́ kútsāya śiśnatho ní codaya ǁ
Samhita Transcription Nonaccented
tadindrāva ā bhara yenā daṃsiṣṭha kṛtvane ǀ
dvitā kutsāya śiśnatho ni codaya ǁ
Padapatha Devanagari Accented
तत् । इ॒न्द्र॒ । अवः॑ । आ । भ॒र॒ । येन॑ । दं॒सि॒ष्ठ॒ । कृत्व॑ने ।
द्वि॒ता । कुत्सा॑य । शि॒श्न॒थः॒ । नि । चो॒द॒य॒ ॥
Padapatha Devanagari Nonaccented
तत् । इन्द्र । अवः । आ । भर । येन । दंसिष्ठ । कृत्वने ।
द्विता । कुत्साय । शिश्नथः । नि । चोदय ॥
Padapatha Transcription Accented
tát ǀ indra ǀ ávaḥ ǀ ā́ ǀ bhara ǀ yéna ǀ daṃsiṣṭha ǀ kṛ́tvane ǀ
dvitā́ ǀ kútsāya ǀ śiśnathaḥ ǀ ní ǀ codaya ǁ
Padapatha Transcription Nonaccented
tat ǀ indra ǀ avaḥ ǀ ā ǀ bhara ǀ yena ǀ daṃsiṣṭha ǀ kṛtvane ǀ
dvitā ǀ kutsāya ǀ śiśnathaḥ ǀ ni ǀ codaya ǁ
08.024.26 (Mandala. Sukta. Rik)
6.2.20.01 (Ashtaka. Adhyaya. Varga. Rik)
08.04.092 (Mandala. Anuvāka. Rik)
Samhita Devanagari Accented
तमु॑ त्वा नू॒नमी॑महे॒ नव्यं॑ दंसिष्ठ॒ सन्य॑से ।
स त्वं नो॒ विश्वा॑ अ॒भिमा॑तीः स॒क्षणिः॑ ॥
Samhita Devanagari Nonaccented
तमु त्वा नूनमीमहे नव्यं दंसिष्ठ सन्यसे ।
स त्वं नो विश्वा अभिमातीः सक्षणिः ॥
Samhita Transcription Accented
támu tvā nūnámīmahe návyam daṃsiṣṭha sányase ǀ
sá tvám no víśvā abhímātīḥ sakṣáṇiḥ ǁ
Samhita Transcription Nonaccented
tamu tvā nūnamīmahe navyam daṃsiṣṭha sanyase ǀ
sa tvam no viśvā abhimātīḥ sakṣaṇiḥ ǁ
Padapatha Devanagari Accented
तम् । ऊं॒ इति॑ । त्वा॒ । नू॒नम् । ई॒म॒हे॒ । नव्य॑म् । दं॒सि॒ष्ठ॒ । सन्य॑से ।
सः । त्वम् । नः॒ । विश्वाः॑ । अ॒भिऽमा॑तीः । स॒क्षणिः॑ ॥
Padapatha Devanagari Nonaccented
तम् । ऊं इति । त्वा । नूनम् । ईमहे । नव्यम् । दंसिष्ठ । सन्यसे ।
सः । त्वम् । नः । विश्वाः । अभिऽमातीः । सक्षणिः ॥
Padapatha Transcription Accented
tám ǀ ūṃ íti ǀ tvā ǀ nūnám ǀ īmahe ǀ návyam ǀ daṃsiṣṭha ǀ sányase ǀ
sáḥ ǀ tvám ǀ naḥ ǀ víśvāḥ ǀ abhí-mātīḥ ǀ sakṣáṇiḥ ǁ
Padapatha Transcription Nonaccented
tam ǀ ūṃ iti ǀ tvā ǀ nūnam ǀ īmahe ǀ navyam ǀ daṃsiṣṭha ǀ sanyase ǀ
saḥ ǀ tvam ǀ naḥ ǀ viśvāḥ ǀ abhi-mātīḥ ǀ sakṣaṇiḥ ǁ
08.024.27 (Mandala. Sukta. Rik)
6.2.20.02 (Ashtaka. Adhyaya. Varga. Rik)
08.04.093 (Mandala. Anuvāka. Rik)
Samhita Devanagari Accented
य ऋक्षा॒दंह॑सो मु॒चद्यो वार्या॑त्स॒प्त सिंधु॑षु ।
वध॑र्दा॒सस्य॑ तुविनृम्ण नीनमः ॥
Samhita Devanagari Nonaccented
य ऋक्षादंहसो मुचद्यो वार्यात्सप्त सिंधुषु ।
वधर्दासस्य तुविनृम्ण नीनमः ॥
Samhita Transcription Accented
yá ṛ́kṣādáṃhaso mucádyó vā́ryātsaptá síndhuṣu ǀ
vádhardāsásya tuvinṛmṇa nīnamaḥ ǁ
Samhita Transcription Nonaccented
ya ṛkṣādaṃhaso mucadyo vāryātsapta sindhuṣu ǀ
vadhardāsasya tuvinṛmṇa nīnamaḥ ǁ
Padapatha Devanagari Accented
यः । ऋक्षा॑त् । अंह॑सः । मु॒चत् । यः । वा॒ । आर्या॑त् । स॒प्त । सिन्धु॑षु ।
वधः॑ । दा॒सस्य॑ । तु॒वि॒ऽनृ॒म्ण॒ । नी॒न॒मः॒ ॥
Padapatha Devanagari Nonaccented
यः । ऋक्षात् । अंहसः । मुचत् । यः । वा । आर्यात् । सप्त । सिन्धुषु ।
वधः । दासस्य । तुविऽनृम्ण । नीनमः ॥
Padapatha Transcription Accented
yáḥ ǀ ṛ́kṣāt ǀ áṃhasaḥ ǀ mucát ǀ yáḥ ǀ vā ǀ ā́ryāt ǀ saptá ǀ síndhuṣu ǀ
vádhaḥ ǀ dāsásya ǀ tuvi-nṛmṇa ǀ nīnamaḥ ǁ
Padapatha Transcription Nonaccented
yaḥ ǀ ṛkṣāt ǀ aṃhasaḥ ǀ mucat ǀ yaḥ ǀ vā ǀ āryāt ǀ sapta ǀ sindhuṣu ǀ
vadhaḥ ǀ dāsasya ǀ tuvi-nṛmṇa ǀ nīnamaḥ ǁ
08.024.28 (Mandala. Sukta. Rik)
6.2.20.03 (Ashtaka. Adhyaya. Varga. Rik)
08.04.094 (Mandala. Anuvāka. Rik)
Samhita Devanagari Accented
यथा॑ वरो सु॒षाम्णे॑ स॒निभ्य॒ आव॑हो र॒यिं ।
व्य॑श्वेभ्यः सुभगे वाजिनीवति ॥
Samhita Devanagari Nonaccented
यथा वरो सुषाम्णे सनिभ्य आवहो रयिं ।
व्यश्वेभ्यः सुभगे वाजिनीवति ॥
Samhita Transcription Accented
yáthā varo suṣā́mṇe saníbhya ā́vaho rayím ǀ
vyáśvebhyaḥ subhage vājinīvati ǁ
Samhita Transcription Nonaccented
yathā varo suṣāmṇe sanibhya āvaho rayim ǀ
vyaśvebhyaḥ subhage vājinīvati ǁ
Padapatha Devanagari Accented
यथा॑ । व॒रो॒ इति॑ । सु॒ऽसाम्ने॑ । स॒निऽभ्यः॑ । आ । अव॑हः । र॒यिम् ।
विऽअ॑श्वेभ्यः । सु॒ऽभ॒गे॒ । वा॒जि॒नी॒ऽव॒ति॒ ॥
Padapatha Devanagari Nonaccented
यथा । वरो इति । सुऽसाम्ने । सनिऽभ्यः । आ । अवहः । रयिम् ।
विऽअश्वेभ्यः । सुऽभगे । वाजिनीऽवति ॥
Padapatha Transcription Accented
yáthā ǀ varo íti ǀ su-sā́mne ǀ saní-bhyaḥ ǀ ā́ ǀ ávahaḥ ǀ rayím ǀ
ví-aśvebhyaḥ ǀ su-bhage ǀ vājinī-vati ǁ
Padapatha Transcription Nonaccented
yathā ǀ varo iti ǀ su-sāmne ǀ sani-bhyaḥ ǀ ā ǀ avahaḥ ǀ rayim ǀ
vi-aśvebhyaḥ ǀ su-bhage ǀ vājinī-vati ǁ
08.024.29 (Mandala. Sukta. Rik)
6.2.20.04 (Ashtaka. Adhyaya. Varga. Rik)
08.04.095 (Mandala. Anuvāka. Rik)
Samhita Devanagari Accented
आ ना॒र्यस्य॒ दक्षि॑णा॒ व्य॑श्वाँ एतु सो॒मिनः॑ ।
स्थू॒रं च॒ राधः॑ श॒तव॑त्स॒हस्र॑वत् ॥
Samhita Devanagari Nonaccented
आ नार्यस्य दक्षिणा व्यश्वाँ एतु सोमिनः ।
स्थूरं च राधः शतवत्सहस्रवत् ॥
Samhita Transcription Accented
ā́ nāryásya dákṣiṇā vyáśvām̐ etu somínaḥ ǀ
sthūrám ca rā́dhaḥ śatávatsahásravat ǁ
Samhita Transcription Nonaccented
ā nāryasya dakṣiṇā vyaśvām̐ etu sominaḥ ǀ
sthūram ca rādhaḥ śatavatsahasravat ǁ
Padapatha Devanagari Accented
आ । ना॒र्यस्य॑ । दक्षि॑णा । विऽअ॑श्वान् । ए॒तु॒ । सो॒मिनः॑ ।
स्थू॒रम् । च॒ । राधः॑ । श॒तऽव॑त् । स॒हस्र॑ऽवत् ॥
Padapatha Devanagari Nonaccented
आ । नार्यस्य । दक्षिणा । विऽअश्वान् । एतु । सोमिनः ।
स्थूरम् । च । राधः । शतऽवत् । सहस्रऽवत् ॥
Padapatha Transcription Accented
ā́ ǀ nāryásya ǀ dákṣiṇā ǀ ví-aśvān ǀ etu ǀ somínaḥ ǀ
sthūrám ǀ ca ǀ rā́dhaḥ ǀ śatá-vat ǀ sahásra-vat ǁ
Padapatha Transcription Nonaccented
ā ǀ nāryasya ǀ dakṣiṇā ǀ vi-aśvān ǀ etu ǀ sominaḥ ǀ
sthūram ǀ ca ǀ rādhaḥ ǀ śata-vat ǀ sahasra-vat ǁ
08.024.30 (Mandala. Sukta. Rik)
6.2.20.05 (Ashtaka. Adhyaya. Varga. Rik)
08.04.096 (Mandala. Anuvāka. Rik)
Samhita Devanagari Accented
यत्त्वा॑ पृ॒च्छादी॑जा॒नः कु॑ह॒या कु॑हयाकृते ।
ए॒षो अप॑श्रितो व॒लो गो॑म॒तीमव॑ तिष्ठति ॥
Samhita Devanagari Nonaccented
यत्त्वा पृच्छादीजानः कुहया कुहयाकृते ।
एषो अपश्रितो वलो गोमतीमव तिष्ठति ॥
Samhita Transcription Accented
yáttvā pṛcchā́dījānáḥ kuhayā́ kuhayākṛte ǀ
eṣó ápaśrito való gomatī́máva tiṣṭhati ǁ
Samhita Transcription Nonaccented
yattvā pṛcchādījānaḥ kuhayā kuhayākṛte ǀ
eṣo apaśrito valo gomatīmava tiṣṭhati ǁ
Padapatha Devanagari Accented
यत् । त्वा॒ । पृ॒च्छात् । ई॒जा॒नः । कु॒ह॒या । कु॒ह॒या॒ऽकृ॒ते॒ ।
ए॒षः । अप॑ऽश्रितः । व॒लः । गो॒ऽम॒तीम् । अव॑ । ति॒ष्ठ॒ति॒ ॥
Padapatha Devanagari Nonaccented
यत् । त्वा । पृच्छात् । ईजानः । कुहया । कुहयाऽकृते ।
एषः । अपऽश्रितः । वलः । गोऽमतीम् । अव । तिष्ठति ॥
Padapatha Transcription Accented
yát ǀ tvā ǀ pṛcchā́t ǀ ījānáḥ ǀ kuhayā́ ǀ kuhayā-kṛte ǀ
eṣáḥ ǀ ápa-śritaḥ ǀ valáḥ ǀ go-matī́m ǀ áva ǀ tiṣṭhati ǁ
Padapatha Transcription Nonaccented
yat ǀ tvā ǀ pṛcchāt ǀ ījānaḥ ǀ kuhayā ǀ kuhayā-kṛte ǀ
eṣaḥ ǀ apa-śritaḥ ǀ valaḥ ǀ go-matīm ǀ ava ǀ tiṣṭhati ǁ